ന്യൂയോർക്ക്: ജീവകാരുണ്യ പ്രവർത്തനങ്ങൾക്ക് മുൻതൂക്കം നൽകുന്ന എക്കോ എന്ന സംഘടന ജീവകാരുണ്യ പ്രവർത്തനങ്ങളിൽ ഏർപ്പെടുന്ന മനുഷ്യസ്നേഹികളെ പ്രോത്സാഹിപ്പിക്കുന്നതിനായി 2021 മുതൽ ഏർപ്പെടുത്തിയിരിക്കുന്ന മൂന്നാമത് ഹ്യൂമാനിറ്റേറിയൻ അവാർഡിനാണ് ജോൺസൺ സാമുവേൽ അർഹനായത്.
രണ്ടായിരം ഡോളറും പ്രശംസ ഫലകവുമാണ് അവാർഡായി നൽകിയത്. കാലുകൾ നഷ്ട്ടപ്പെട്ടവർക്ക് സാധാരണ ജീവിതത്തിലേക്ക് തിരിച്ച് വരുന്നതിനു സഹായകരമായി കൃത്രിമ കാലുകൾ നൽകുന്ന ജീവ കാരുണ്യ പ്രവർത്തനമാണ് ജോൺസൺ സാമുവേൽ ചെയ്തു വരുന്നത്.
സ്വന്തം വരുമാനത്തിൽ നിന്നും മിച്ചം വച്ചും സുഹൃത്തുക്കളുടെയും സ്വന്തക്കാരുടെയും സഹായങ്ങളിലൂടെയും സ്വരൂപിക്കുന്ന തുകകൾ ചേർത്ത് 204 പേർക്കാണ് കഴിഞ്ഞ പത്ത് വർഷമായി ജോൺസൺ കൃത്രിമ കാലുകൾ നൽകി സഹായിച്ചിട്ടുള്ളത്.
ഒരു കാലിന് രണ്ടായിരം ഡോളറിലധികം(ഏകദേശം രണ്ട് ലക്ഷം രൂപ) ചെലവ് വരുന്ന ലോകത്തിലെ ഏറ്റവും ഉന്നത നിലവാരം പുലർത്തുന്ന ജർമനിയിലെ ഓട്ടോബൂക് എന്ന കമ്പനിയിൽ നിന്നുമാണ് കൃത്രിമ കാലുകൾ ഇറക്കുമതി ചെയ്ത് കേരളത്തിലുള്ള ആവശ്യക്കാർക്ക് അദ്ദേഹം സൗജന്യമായി നൽകുന്നത്.
സ്വന്തം ജന്മദേശമായ മാവേലിക്കരയിലെ വെട്ടിയാറ്റിലുള്ള "ലൈഫ് ആൻഡ് ലിംബ്" എന്ന ചാരിറ്റി സ്ഥാപനത്തിലൂടെ 2013 മുതൽ കൃത്രിമ കാലുകൾ നൽകി വരുന്നു.
ന്യൂയോർക്ക് ലോംഗ് ഐലൻഡിൽ ന്യൂഹൈഡ് പാർക്ക് കേന്ദ്രീകരിച്ച് പ്രവർത്തിക്കുന്ന എക്കോ എന്ന സംഘടന ചാരിറ്റി പ്രവർത്തനം കൊണ്ട് സമൂഹത്തിൽ ജനശ്രദ്ധ നേടിയിട്ടുള്ള സംഘടനയാണ്.
ഒരു ദശാബ്ദക്കാലം പ്രവർത്തനം പിന്നിട്ട എക്കോ ഈ വർഷം ധാരാളം ചാരിറ്റി പ്രവർത്തനങ്ങൾ നടത്തുവാനാണ് പദ്ധതിയിടുന്നത്.
പ്രസ്തുത ചടങ്ങിൽ ന്യൂയോർക്ക് സംസ്ഥാന സെനറ്റർമാരും നാസോ കൗണ്ടിയിലെ തെരഞ്ഞെടുക്കപ്പെട്ട രാഷ്ട്രീയ നേതാക്കളും സാമൂഹിക സാംസ്കാരിക മണ്ഡലങ്ങളിലെ പ്രമുഖരും എക്കോയെ സ്നേഹിക്കുന്ന ധാരാളം കുടുംബങ്ങളും പങ്കെടുത്തു.
എക്കോ പ്രോഗ്രാം ഡയറക്ടറായ സാബു ലൂക്കോസ് സന്നിഹിതരായ എല്ലാവർക്കും ഭാഷയിൽ സ്വാഗതം ആശംസിച്ചു. എക്സിക്യൂട്ടീവ് ഡയറക്ടറും ചെയർമാനുമായ ഡോ. തോമസ് മാത്യു സംഘടനയുടെ വിവിധ പ്രൊജെക്റ്റുകളെപ്പറ്റിയും പ്രവർത്തനങ്ങളെപ്പറ്റിയും വിശദീകരിച്ചു.
മുഖ്യ അതിഥിയായി പങ്കെടുത്ത ബ്ലൂ ഓഷൻ വെൽത്ത് സൊല്യൂഷൻസ് സിഇഒ ഫ്രാങ്ക് സ്കെലെസ്, എക്കോ ഡയറക്ടർ ബോർഡ് അംഗങ്ങൾ എന്നിവർ ചേർന്ന് ഭദ്രദീപം കൊളുത്തിയതിനു ശേഷം മുഖ്യാതിഥി ഫ്രാങ്ക് മുഖ്യ പ്രഭാഷണം നിർവഹിച്ചു.
ന്യൂയോർക്ക് സ്റ്റേറ്റ് സെനറ്റർ ജാക്ക് എം. മാർട്ടിൻ, നാസ്സോ കൗണ്ടി കംപ്ട്രോളർ എലൈൻ ഫിലിപ്സ്, കൗണ്ടി ലെജിസ്ലേറ്റർമാരായ സ്കോട്ട് സ്ട്രൂസ്, മാസ്സി മേലാസ ഫിലിപ്പ്, നോർത്ത് ഹെംസ്റ്റെഡ് ടൌൺ സൂപ്പർവൈസർ ജെന്നിഫർ ഡിസേന തുടങ്ങിയ പ്രാദേശിക രാഷ്ട്രീയ പ്രമുഖരുടെ സാന്നിധ്യം ചടങ്ങുകളെ ഗംഭീരമാക്കി.
എക്കോ ക്യാപിറ്റൽ റിസോഴ്സ് ഡയറക്ടർ ആനി മാത്യു അകാലത്തിൽ മണ്മറഞ്ഞ തന്റെ ജീവിത പങ്കാളിയും എക്കോയുടെ ആദ്യകാല ഡയറക്ടറുമായിരുന്ന സോളമൻ മാത്യുവിൻറെ ഓർമയ്ക്കായി ഫണ്ട് നൽകി "മദർ തെരേസാ സേവന അവാർഡ്' ഉദ്ഘാടനം ചെയ്തു.
എക്കോ എക്സിക്യൂട്ടീവ് ഡയറക്ടർ ഡോ. തോമസ് മാത്യു, ഓപ്പറേഷൻസ് ഡയറക്ടർ ബിജു ചാക്കോ, പ്രോഗ്രാം ഡയറക്ടർ സാബു ലൂക്കോസ്, ഫിനാൻസ് ഡയറക്ടർ വർഗ്ഗീസ് ജോൺ, ക്യാപിറ്റൽ റിസോഴ്സ് ഡയറക്ടർമാരായ ടി. ആർ. ജോയി, ആനി മാത്യു, അസ്സോസിയേറ്റ് ഓപ്പറേഷൻസ് ഡയറക്ടർ തോമസ് ജോർജ്,
കമ്മ്യൂണിക്കേഷൻസ് ഡയറക്ടർ കെ. ബി. സാമുവേൽ, കമ്യൂണിറ്റി ലയസൺ ഡയറക്ടർ കാർത്തിക് ധാമ, പി.ആർ.ഓ. മാത്യുക്കുട്ടി ഈശോ, ഉപദേശക സമിതി അംഗങ്ങളായ ഡോ. ഗീതാ മേനോൻ, ഡോ. ഉണ്ണികൃഷ്ണൻ തമ്പി, ഡോ. സാബു വർഗീസ്, ഡോ. സെലിൻ പൗലോസ്,
ഡോ. അന്നാ ജോർജ്, വിനോദ് എബ്രഹാം, ജെയിൻ ജേക്കബ്, ബാബു ഉത്തമൻ, തോമസ് നെടുനിലം, സീനിയർ വെൽനെസ്സ് പ്രോഗ്രാം അഡ്മിനിസ്ട്രേറ്റർ വർഗ്ഗീസ് പി. എബ്രഹാം, പ്രോഗ്രാം കോർഡിനേറ്റർ ബിജി ടി. ജോസഫ്, യോഗാ ഡയറക്ടർ സജി ജോർജ്, മാർക്കറ്റിംഗ് കോർഡിനേറ്റർ ആഷിഷ് എബ്രഹാം,
ഹൗസിംഗ് പ്രൊജക്റ്റ് കോഓർഡിനേറ്റർ ജോൺ മാത്യു, സീനിയർ വെൽനെസ് കോഓർഡിനേറ്റർമാരായ മറിയ ഫിലിപ്പ്, ഉഷാ ജോർജ്, ലീലമ്മ അപ്പുകുട്ടൻ തുടങ്ങിയവരുടെ നേതൃത്വത്തിലാണ് വാർഷിക ഡിന്നർ മീറ്റിംഗ് പരിപാടി ഭംഗിയാക്കി തീർത്തത്.
നൂപുര ഡാൻസ് അക്കാദമിയിലെ കുട്ടികളുടെ നൃത്തപരിപാടികളും ഗായകൻ ശബരീനാഥിന്റെ നേതൃത്വത്തിലുള്ള സംഗീത പരിപാടികളും സീനിയർ വെൽനെസ് അംഗങ്ങളുടെ ക്രിസ്മസ് ഗാനവും പ്രോഗ്രാമിന് കൊഴുപ്പേകി.
|