അബുദാബി: ഇൻസ്റ്റിറ്റ്യൂട്ട് ഓഫ് ചാർട്ടേഡ് അക്കൗണ്ടന്റ്സ് ഓഫ് ഇന്ത്യ(ഐസിഎഐ) അബുദാബി ചാപ്റ്റർ സംഘടിപ്പിക്കുന്ന രാജ്യാന്തര സെമിനാർ ശനി, ഞായർ ദിവസങ്ങളിൽ അബുദാബി കോൺറാഡ് ഹോട്ടലിൽ നടക്കും.
ആർട്ടിഫിഷ്യൽ ഇന്റലിജൻസ് ഉൾപ്പെടെയുള്ള ആധുനിക സാങ്കേതിക വിദ്യകൾ സാമ്പത്തിക, അക്കൗണ്ടിംഗ് മേഖലകളിൽ ഉയർത്തുന്ന സാധ്യതകൾ സെമിനാർ ചർച്ച ചെയ്യും. വ്യവസായിക സാമ്പത്തിക സാമൂഹ്യ മേഖലകളിൽ നിന്നുള്ള പ്രമുഖർ ചർച്ചകൾക്ക് നേതൃത്വം നൽകും.
ചെയർമാൻ ജോൺ ജോർജ് അധ്യക്ഷത വഹിക്കും. മന്ത്രി ഷെയ്ഖ് നഹ്യാൻ ബിൻ മുബാറക് അൽ നഹ്യാൻ സെമിനാർ ഉദ്ഘാടനം ചെയ്യും. ഇന്ത്യൻ സ്ഥാനപതി സഞ്ജയ് സുധീർ മുഖ്യാതിഥിയാകും.
ഐസിഎഐ ഇന്ത്യ പ്രസിഡന്റ് അങ്കിത് തലതി, യുഎഇ അക്കൗണ്ടന്റ് ആൻഡ് ഓഡിറ്റേഴ്സ് അസോസിയേഷൻ പ്രസിഡന്റ് റിയാദ് അൽ മുബാറക്, അൽ ഫഹിം ഫാമിലി കൗൺസിൽ ചെയർമാൻ മുഹമ്മദ് അബ്ദുൽ ജലാൽ അൽ ഫഹിം തുടങ്ങിയവർ ചടങ്ങിൽ പങ്കെടുക്കും.
രാവിലെ 11.30ന് നടക്കുന്ന ടെക്നിക്കൽ സെഷനിൽ ഗണേഷ് പ്രസാദ് (തിങ്ക് സ്കൂൾ സിഇഒ), ജാൻ പിൽബോർ (അൽ ഇത്തിഹാദ് പേയ്മെന്റ്സ് സിഇഒ), ഫ്രേസർ ബ്രോൺ (എഡിജെഎം എക്സിക്യൂട്ടീവ് ഡയറക്ടർ), പ്രകാശ് സുൻകര (ഡബ്ല്യുഐഒ ബാങ്ക് സിഎഫ്ഒ) എന്നിവർ അണിനിരക്കും.
ടി.കെ. രാമൻ (ഫിനാൻസ് ഹൗസ് ഗ്രൂപ്പ് സിഇഒ) ആണ് മോഡറേറ്റർ. ഐഎസ്ആർഒ മുൻ ശാസ്ത്രജ്ഞൻ നമ്പി നാരായണൻ, ഇക്വിറ്റി ഇന്റലിജൻസ് സ്ഥാപകൻ പൊറിഞ്ചു വെലിയത്ത്, മാധ്യമ പ്രവർത്തക ശ്വേത സിംഗ്, അഭിലാഷ് ടോമി തുടങ്ങിയവർ പങ്കെടുക്കും.
പരിപാടിയുടെ സമാപന സമ്മേളനത്തിൽ പ്രശസ്ത പിന്നണി ഗായിക നീതി മോഹൻ അവതരിപ്പിക്കുന്ന സംഗീത പരിപാടിയും അരങ്ങേറും.
ചെയർമാൻ ജോൺ ജോർജ്, വൈസ് പ്രസിഡന്റ് എൻ.വി. കൃഷ്ണൻ, സെക്രട്ടറി രോഹിത് ദയാമ, ട്രഷറർ പ്രിയങ്ക ബിർള, മീഡിയ കോഓർഡിനേറ്റർ രമേശ് ദവെ, ഷഫീഖ് നീലയിൽ, അജയ് സിഗ്വി, മുഹമ്മദ് ഷഫീഖ്, അനു തോമസ് എന്നിവർ വാർത്താസമ്മേളനത്തിൽ പങ്കെടുത്തു.
|