ഡോണ്‍ബോസ്കോ സമൂഹം ഇന്നു പ്രാർഥനാദിനം ആചരിക്കും : Deepika.com Kerala News |

തൃശൂർ: യെമനിൽ ഭീകരർ തട്ടിക്കൊണ്ടുപോയ ഡോണ്‍ബോസ്കോ സലേഷ്യൻ വൈദികനായ ഫാ. ടോം ഉഴുന്നാലിലിന്‍റെ മോചനത്തിനായി ഡോണ്‍ബോസ്കോ സലേഷ്യൻ സന്യാസസമൂഹാംഗങ്ങൾ ആഗോള വ്യാപകമായി ഇന്നു പ്രാർഥനാദിനമായി ആചരിക്കും.

റോം ആസ്ഥാനമായി പ്രവർത്തിക്കുന്ന സന്യാസസമൂഹത്തിന്‍റെ 132 രാജ്യങ്ങളിലായി സേവനനരിതരായ പതിനാറായിരത്തിലേറെ വൈദികരും സന്യാസിനിമാരും, ഡോണ്‍ബോസ്കോ സ്ഥാപിച്ച പ്രസ്ഥാനങ്ങളിലെ സഹകാരികൾ, പൂർവ വിദ്യാർഥികൾ, മരിയൻ കൂട്ടായ്മയായ ആത്മ എന്നിവ ഉൾപ്പെടെയുള്ള സലേഷ്യൻ കുടുംബത്തിലെ 36 വിവിധ ശാഖകളിലെ ആറു ലക്ഷത്തിലേറെ വരുന്ന അംഗങ്ങളും പ്രാർഥനായജ്ഞത്തിൽ അണിചേരും. സന്യാസ സമൂഹത്തിന്‍റെ അധിപനായ റെക്ടർ മേജർ ഫാ. എയ്ഞ്ചർ ഫെർണാണ്ടസിന്‍റെ ആഹ്വാനമനുസരിച്ചാണ് ഇന്നു പ്രാർഥനാദിനം ആചരിക്കുന്നത്.

കേരളം, കർണാടക സംസ്ഥാനങ്ങളിലെ പ്രാർഥനാ ശുശ്രൂഷകൾക്കു ബംഗളൂരു പ്രോവിൻഷ്യൽ ഫാ. ജോയ്സ് തോണിക്കുഴിയുടെ നേതൃത്വത്തിൽ ഒരുക്കങ്ങൾ പൂർത്തിയായി.
കേരളത്തിലെ എല്ലാ ജില്ലകളിലുമുള്ള സലേഷ്യൻ കുടുംബാംഗങ്ങൾ വിവിധ ഡോണ്‍ ബോസ്കോ സ്ഥാപനങ്ങൾ കേന്ദ്രീകരിച്ച് ഫാ. ടോമിന്‍റെ മോചനത്തിനായി ഉപവസിച്ചു പ്രാർഥനായജ്ഞത്തിൽ പങ്കുചേരും. ജനുവരി നാലിനു ഇന്ത്യയിലെ ആറായിരത്തിലേറെ വരുന്ന ഡോണ്‍ബോസ്കോ വൈദികരും സന്യാസിനിമാരും ഫാ. ടോമിന്‍റെ മോചനത്തിനായി പ്രാർഥനായജ്ഞം നടത്തിയിരുന്നു.
കഴിഞ്ഞവർഷം മാർച്ച് നാലിനാണ് യെമനിലെ ഈഡൻ എന്ന സ്ഥലത്തെ മദർ തെരേസ വൃദ്ധസദനത്തിൽനിന്ന് ഫാ. ടോമിനെ ഭീകരർ തട്ടിക്കൊണ്ടുപോയത്. ഫ്രാൻസിസ് മാർപാപ്പയും ഡോണ്‍ ബോസ്കോ സലേഷ്യൻ സന്യാസസമൂഹത്തിന്‍റെ അധികാരികളും ഇന്ത്യയിലെ ഭരണകൂടവും ഫാ. ടോമിന്‍റെ മോചനത്തിനായി ശ്രമങ്ങൾ നടത്തിവരികയാണ്.
പാലാ രാമപുരം സ്വദേശിയായ അന്പത്തെട്ടുകാരനായ ഫാ. ടോം സലേഷ്യൻ സഭയുടെ ബംഗളൂരു പ്രോവിൻസ് അംഗമാണ്. യെമനിൽ വൃദ്ധസദനത്തിൽ സേവനമനുഷ്ഠിക്കുന്പോഴാണ് തട്ടിക്കൊണ്ടുപോയത്.