കൈകൊണ്ട് ഉടച്ചത് 124 തേങ്ങ; അബീഷ് ഗിന്നസിൽ : Deepika.com Kerala News |

Click here for detailed news of all items

കൈകൊണ്ട് ഉടച്ചത് 124 തേങ്ങ; അബീഷ് ഗിന്നസിൽ

Saturday, February 18, 2017 2:02 PM IST

തൃശൂർ: കേരംതിങ്ങും കേരളനാട്ടിൽനിന്ന് ഒരു മിനിറ്റിൽ 124 തേങ്ങകളുടച്ച് ഗിന്നസ് ബുക്ക് ഓഫ് റിക്കാർഡ്സിൽ ഇടംപിടിക്കുകയാണ് കോട്ടയം പൂഞ്ഞാർ സ്വദേശി അബീഷ് പി. ഡൊമിനിക്ക്. ജർമൻകാരനായ മുഹമ്മദ് കുറുമാനി ഒരു മിനിറ്റിൽ 118 തേങ്ങയുടച്ചു നേടിയ റിക്കാർഡാണ് അബീഷ് തകർത്തെറിഞ്ഞത്. വെറും കൈകൊണ്ടായിരുന്നു അതിവേഗ തേങ്ങയുടയ്ക്കൽ.

ശോഭാ സിറ്റിയിൽ നടന്ന പ്രകടനം തത്സമയം വിലയിരുത്താൻ ഗിന്നസ് ബുക്ക് പ്രതിനിധിയും യുആർഎഫ് വേൾഡ് റിക്കാർഡ് ഏഷ്യൻ ജൂറിയുമായ ഡോ. ഗിന്നസ് സുനിൽ ജോസഫ് എത്തിയിരുന്നു.

പ്രകടനത്തിന്‍റെ വിശദാംശങ്ങളും വീഡിയോ ദൃശ്യങ്ങളും അദ്ദേഹം ഗിന്നസ് അധികൃതർക്ക് അയയ്ക്കും. അംഗീകരിക്കപ്പെട്ടു കഴിയുമ്പോൾ അബീഷിന്‍റെ പേരിനു മുന്നിൽ ഒൗദ്യോഗികമായി ഗിന്നസ് എന്നു കൂട്ടിച്ചേർക്കാനാകും.

ഹെൽമറ്റ്, ഹോക്കിസ്റ്റിക് എന്നിവ കൈകൊണ്ട് പൊട്ടിക്കുക, പത്തു ടണ്‍ ഭാരമുള്ള ബസ് കടിച്ചുവലിക്കുക, കറങ്ങുന്ന ടേബിൾഫാൻ നാക്കുകൊണ്ട് തടഞ്ഞുനിർത്തുക തുടങ്ങിയവയും അബീഷിന്‍റെ ശ്രദ്ധേയമായ അഭ്യാസപ്രകടനങ്ങളാണ്. യുആർഎഫ് വേൾഡ് റിക്കാർഡ്, ലിംക ബുക്ക് ഓഫ് റിക്കാർഡ്സ്, റിക്കാർഡ് സെറ്റർ തുടങ്ങിയവയിലും അബീഷ് നേരത്തെ ഇടം നേടിയിട്ടുണ്ട്. പത്തുവർഷമായി കെഎസ്ആർടിസി ഈരാറ്റുപേട്ട ഡിപ്പോയിൽ എം പാനൽ ജീവനക്കാരനാണ്.

ശോഭാ ലിമിറ്റഡിന്‍റെ നേതൃത്വത്തിൽ ദക്ഷ് ഇവന്‍റ്സാണ് പരിപാടി സംഘടിപ്പിച്ചത്.
മേയർ അജിത ജയരാജൻ പ്രകടനം ഉദ്ഘാടനം ചെയ്തു. ശോഭ ലിമിറ്റഡ് ഏരിയ ഹെഡ് നിഷാന്ത്, ഏരിയ മാനേജർ വിശാഖ്, ശോഭ മാൾ മാനേജർ വിൻസെന്‍റ് ആന്‍റണി, ഗിന്നസ് സത്താർ ആദൂർ, ഗിന്നസ് സെയ്തലവി, ഗിന്നസ് സെബാസ്റ്റ്യൻ, ധിഷൻ ചന്ദ്രൻ തുടങ്ങിയവർ സന്നിഹിതരായിരുന്നു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.