എസ്‌എസ്എൽസിക്കു സാമൂഹ്യശാസ്ത്രം പുതിയ രീതിയിൽ : Deepika.com Kerala News |

കണ്ണൂർ: ഇത്തവണത്തെ എസ്എസ്എൽസി പരീക്ഷയിൽ സാമൂഹ്യശാസ്ത്രം അടിമുടി മാറുന്നു. സാമൂഹ്യശാസ്ത്രം പലപ്പോഴും എസ്എസ്എൽസി പരീക്ഷ‍യിൽ കുട്ടികൾക്ക് പ്രശ്നമാകാറുണ്ട്. പുസ്തകത്തിന്‍റെ ഉളളടക്കഭാരവും ഇതുമൂലം കുട്ടികൾക്കുണ്ടാകുന്ന പരീക്ഷാസമ്മർദവും ലഘൂകരിക്കുന്നതിന്‍റെ ഭാഗമായാണ് സാമൂഹ്യശാസ്ത്രത്തിൽ മാറ്റം വരുത്തിയിരിക്കുന്നത്. ഇത് സംബന്ധിച്ച് അധ്യാ പകർക്ക് നേരത്തേ അറിയിപ്പ് നൽകിയിരുന്നു.ഇത്തവണത്തെ സാമൂഹ്യശാസ്ത്ര പരീക്ഷാ ചോദ്യപേപ്പറിൽ എ, ബി എന്നിങ്ങനെ രണ്ട് ഭാഗങ്ങൾ ഉണ്ടായിരിക്കും. രണ്ട് ഭാഗങ്ങൾക്കും 40 വീതം മാർക്കുകളാണു നൽകിയിരിക്കുന്നത്.

എ വിഭാഗത്തിലെ എല്ലാ ചോദ്യങ്ങൾക്കും നിർബന്ധമായും ഉത്തരമെഴുതണം. ബി വിഭാഗത്തിലുളള ചോദ്യങ്ങളിൽ നിന്ന് നിശ്ചിത എണ്ണം തെരഞ്ഞെടുത്ത് ഉത്തരം എഴുതുന്നതിന് അവസരം ലഭിക്കും.

സാമൂഹ്യശാസ്ത്രത്തിന് രണ്ട് പാഠപുസ്തകങ്ങളാണു നിർദേശിച്ചിരിക്കുന്നത്. ഇവയിൽ നിന്നു തെരഞ്ഞെടുത്ത ഒമ്പത് അധ്യായങ്ങളാണ് എ വിഭാഗത്തിൽ ഉൾപ്പെടുത്തിയിരിക്കുന്നത്. ശേഷിക്കുന്ന പന്ത്രണ്ട് അധ്യായങ്ങളെ രണ്ടിന്‍റെ ക്ലസ്റ്ററുകളായി തിരിച്ച് ബി വിഭാഗത്തിൽ ഉൾപ്പെടുത്തിയിരിക്കുന്നു.
ഈ ക്ലസ്റ്ററുകളിൽ നിന്നു കുട്ടികൾക്ക് ഒന്നു വീതം തെരഞ്ഞെടുത്തു പൊതുപരീക്ഷയ്ക്കു വേണ്ടി പഠിക്കാൻ അവസരം ലഭിക്കും. ഇതിലൂടെ പഠനത്തിനു നിർദേശിച്ചിരിക്കുന്ന പാഠഭാഗങ്ങളിൽ നിന്ന് ആറ് അധ്യായങ്ങൾ ഒഴിവാക്കി പരീക്ഷാ തയാറെടുപ്പ് നടത്തുവാൻ കുട്ടികൾക്കു കഴിയും.

മാർച്ച് എട്ടിന് ആരംഭിക്കുന്ന എസ്എസ്എൽസി പരീക്ഷ 27ന് അവസാനിക്കും. മൂല്യ നിർണയം ഏപ്രിൽ മൂന്നിന് ആരംഭിച്ച് 21ന് പൂർത്തിയാകും. ഐടി പരീക്ഷയും മോഡൽ പരീക്ഷയും ഇതിനകം പൂർത്തിയായിക്കഴിഞ്ഞു. മാനസിക സമ്മർദം കുറയ്ക്കാനും ആത്മവിശ്വാസം ആർജിക്കുവാനുള്ള കൗൺസിലിംഗ് ക്ലാസുകളും ഇത്തവണ കുട്ടികൾക്കായി സംസ്ഥാനത്തെ മിക്ക സ്കൂളുകളിലും നടപ്പിലാക്കുന്നുണ്ട്. പഠനത്തിൽ പിന്നോക്കം നില്ക്കുന്നവർക്ക് രാവിലെയും വൈകുന്നേരവും പ്രത്യേക ക്ലാസുകളും നല്കി വരുന്നുണ്ട്.

റെനീഷ് മാത്യു