കൊച്ചി: കേരള മീഡിയ അക്കാഡമിയുടെ ആഭിമുഖ്യത്തിൽ കൊല്ലത്തു നടത്തുന്ന ദ്വിദിന ദേശീയ മാധ്യമ സെമിനാർ ഇന്നു രാവിലെ 10.30ന് പ്രശസ്ത ചലച്ചിത്രകാരൻ കുമാർ സാഹ്നി ഉദ്ഘാടനംചെയ്യും. ദേശസ്നേഹം, ജനാധിപത്യം, മാധ്യമം എന്ന വിഷയത്തിലാണ് സെമിനാർ. ക്വയിലോണ് ബീച്ച് ഹോട്ടൽ ഓഡിറ്റോറിയത്തിൽ നടക്കുന്ന ചടങ്ങിൽ അക്കാഡമി ചെയർമാൻ ആർ.എസ്. ബാബു അധ്യക്ഷത വഹിക്കും.
കൊല്ലം കോർപറേഷൻ മേയർ വി. രാജേന്ദ്രബാബു വിശിഷ്ടാതിഥിയായിരിക്കും. ചലച്ചിത്ര സംവിധായിക വിധു വിൻസെന്‍റിനെ ചടങ്ങിൽ അനുമോദിക്കും. ഏഷ്യാനെറ്റ് ന്യൂസ് എഡിറ്റർ എം.ജി. രാധാകൃഷ്ണനാണു സെമിനാർ മോഡറേറ്റർ. ദേശാഭിമാനി റസിഡന്‍റ് എഡിറ്റർ പി.എം. മനോജ്, ദീപിക അസോസിയേറ്റ് എഡിറ്ററും അക്കാഡമി മുൻ ചെയർമാനുമായ സെർജി ആന്‍റണി, ന്യൂസ് 18 കേരള എഡിറ്റർ രാജീവ് ദേവരാജ്, അമൃത ടിവി എക്സിക്യൂട്ടീവ് എഡിറ്റർ സുരേഷ് ബാബു, ഇന്‍റർനാഷണൽ പ്രസ് ഫോട്ടോ ഫെസ്റ്റിവൽ ഡയറക്‌ടർ ടി.കെ. രാജീവ് കുമാർ, കൊല്ലം പ്രസ് ക്ലബ് പ്രസിഡന്‍റ് സി. വിമൽ കുമാർ എന്നിവർ പങ്കെടുക്കും.
കേരള മീഡിയ അക്കാദമി സെക്രട്ടറി കെ.ജി. സന്തോഷ് സ്വാഗതവും അസിസ്റ്റന്‍റ് സെക്രട്ടറി കെ.ആർ. പ്രമോദ് കുമാർ നന്ദിയും പറയും. ഉച്ചയ്ക്ക് 2.30ന് നടക്കുന്ന സെഷൻ പ്രശസ്ത മാധ്യമപ്രവർത്തകൻ വെങ്കിടേഷ് രാമകൃഷ്ണനും നാളെ രാവിലെ 10ന് നടക്കുന്ന സെഷൻ മാധ്യമപ്രവർത്തകൻ ജോണി ലൂക്കോസും ഉദ്ഘാടനംചെയ്യും. ഡോ. സെബാസ്റ്റ്യൻ പോൾ മുഖ്യപ്രഭാഷണം നടത്തും. സി. ഗൗരീദാസൻ നായർ മോഡറേറ്ററായിരിക്കും.
കേരള മീഡിയ അക്കാഡമി മുൻ ചെയർമാൻ എൻ.പി. രാജേന്ദ്രൻ, പ്രശസ്ത മാധ്യമപ്രവർത്തകരായ രാജാജി മാത്യു തോമസ്, ധന്യ രാജേന്ദ്രൻ, ബിനു കെ. ജോണ്, എൻ.പി. ചന്ദ്രശേഖരൻ, ജോസ് പനച്ചിപ്പുറം, വി.എസ്. രാജേഷ്, കേരള പത്രപ്രവർത്തക യൂണിയൻ ജനറൽ സെക്രട്ടറി സി. നാരായണൻ എന്നിവർ പങ്കെടുക്കും. പ്രസ് ക്ലബ് സെക്രട്ടറി ഡി. ജയ്കൃഷ്ണൻ സ്വാഗതവും അക്കാഡമി ലക്ചറർ കെ. അജിത് നന്ദിയും പറയും.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.