റിയാദ്: നവോദയയുടെ ബത്ത ഓഫീസ് കേന്ദ്രീകരിച്ചു അഹമ്മദ് മേലാറ്റൂർ സ്മാരക ഗന്ഥശാല & വായനശാലയുടെ ഉദ്ഘാടനം കഥാകൃത്ത് റഫീഖ് പന്നിയങ്കര നിർവ്വഹിച്ചു. റിയാദിൽ അറിയപ്പെടുന്ന സാംസ്കാരിക പ്രവർത്തകനായിരുന്ന അഹമ്മദ് മേലാറ്റൂർ കഴിഞ്ഞ ഒക്ടോബറിലാണ് ഹൃദയാഘാതംമൂലം മരണമടഞ്ഞത്. അദ്ദേഹത്തിന്‍റെ സ്മരണയ്ക്ക് ഏറ്റവും യുക്തമായ മാർഗം എന്ന നിലയിലാണ് ഗ്രന്ഥശാല ആരംഭിച്ചത്.
ബത്ത കേന്ദ്രീകരിച്ചു ഒരു വായനശാല എന്നത് വർഷങ്ങളുടെ പഴക്കമുള്ള സ്വപ്നമാണെന്നും അത് യാഥാർഥ്യമായതിൽ അത്യധികം ആഹ്ലാദിക്കുന്നതായി റഫീഖ് പന്നിയങ്കര പറഞ്ഞു. കൂടുതൽപേർ വായനയിലേക്കെത്താനും അറിവു വർധപ്പിക്കാനും സൗഹാർദവും മതേതരത്വവും ഉൗട്ടി ഉറപ്പിക്കാനും ഗ്രന്ഥശാലക്ക് കഴിയട്ടെ എന്ന് റഫീഖ് ആശംസിച്ചു. ഗ്രന്ഥശാലയുടെ ഉദ്ഘാടനകർമ്മം നിർവ്വഹിച്ചു സംസാരിക്കുകയായിരുന്നു അദ്ദേഹം.
നവോദയ സാംസ്കാരിക കമ്മിറ്റി ചെയർമാൻ ഇബ്രാഹിം അധ്യക്ഷത വഹിച്ച യോഗത്തിൽ കണ്‍വീനർ ഷൈജു ചെന്പൂർ സ്വാഗതവും ഗ്രന്ഥശാലയുടെ പ്രവർത്തനരീതിയും വിവരിച്ചു. ആദ്യഘട്ടത്തിൽ നവോദയ അംഗങ്ങൾക്ക് മാത്രമായി പരിമിതപ്പെടുത്തിയിരിക്കുന്നു ഗ്രന്ഥശാല അധികം താമസിയാതെ പൊതുജനങ്ങൾക്കും ഉപയോഗിക്കാൻ കഴിയുമെന്ന് ഷൈജു വിശദീകരിച്ചു.
രവീന്ദ്രൻ പയ്യന്നൂർ, ജയകുമാർ, സുരേഷ് സോമൻ, സിദ്ധീഖ് കൊണ്ടോട്ടി, ഒ.കെ സുധാകരൻ, ഹക്കീം മാരാത്ത്, ബാലകൃഷ്ണൻ, ജോജോ, ഹേമന്ദ്, കുമ്മിൾ സുധീർ എന്നിവർ സംസാരിച്ചു. കബീർ, ഷൈജു, മാസി, ജോജോ, സുധാകരൻ, ഹക്കീർ മാരാത്ത്, റഫീഖ്, കുമ്മിൾ സുധീർ എന്നിവർ ഗ്രന്ഥശാലക്ക് പുസ്തകങ്ങൾ കൈമാറി. അൻവാസ് നന്ദി പറഞ്ഞു.
റിപ്പോർട്ട്: കുമ്മിൾ സുധീർ