കുവൈത്ത് സിറ്റി: നാൽപതാം വാർഷികാഘോഷങ്ങളുടെ ഭാഗമായി കുവൈത്തിലെ ഇന്ത്യൻ സ്കൂളുകളിലെ കുട്ടികൾക്കായി കേരള ആർട്ട് ലവേഴ്സ് അസിയേഷൻ കല കുവൈത്ത് സംഘടിപ്പിക്കുന്ന ബാലകലാമേള മെയ് 4 വെള്ളിയാഴ്ച അബ്ബാസിയ യുണൈറ്റഡ് ഇന്ത്യൻ സ്കൂളിൽ വച്ചു നടക്കപ്പെടും. പത്തോളം സ്റ്റേജുകളിലായി കുവൈത്തിലെ വിവിധ സ്കൂളുകളിലെ കുട്ടികൾ മാറ്റുരക്കുന്ന മത്സരങ്ങൾ അരങ്ങേറും.
ഭരതനാട്യം, മോഹിനിയാട്ടം, നാടോടി നൃത്തം, ഗ്രൂപ്പ് ഡാൻസ്, പ്രച്ഛന്ന വേഷം, കവിതാപാരായണം, പ്രസംഗം, ശാസ്ത്രീയ സംഗീതം, ലളിതഗഗാനം, മോണോആക്ട് തുടങ്ങിയ സ്റ്റേജിനങ്ങൾക്ക് പുറമെ രചനാ മത്സരങ്ങളും മേളയുടെ ഭാഗമായി നടക്കും. കിന്‍റർഗാർഡൻ വിഭാഗത്തിലെ കുട്ടികൾക്കായി കഥ പറയൽ മത്സരവും പ്രച്ഛന്ന വേഷ മത്സരവും ഇത്തവണ പുതിയതായി ആരംഭിക്കും.
ഏറ്റവും കൂടുതൽ പോയിന്റ് നേടുന്ന സ്കൂളിന് എവർ റോളിംഗ് ട്രോഫിയും, കലാതിലകം, കലാപ്രതിഭ എന്നിവ നേടുന്നവർക്ക് സ്വർണമെഡലും സമ്മാനിക്കും. ബാലകലമേളയുടെ നടത്തിപ്പിനായി സ്വാഗതസംഘം ജനറൽ കണ്‍വീനർ കെ.വി. നിസാറിന്‍റെ നേതൃത്വത്തിൽ വിവിധ സബ്കമ്മിറ്റികൾ രൂപീകരിച്ച് പ്രവർത്തനങ്ങൾ നടന്നു വരുന്നു. മത്സരങ്ങളിൽ പങ്കെടുക്കാനാഗ്രഹിക്കുന്ന വിദ്യാർത്ഥികൾ പേരുകൾ രജിസ്റ്റർ ചെയ്യുന്നതിന് www.kalakuwait.com എന്ന വെബ്സൈറ്റ് സന്ദർശിക്കുക. കൂടുതൽ വിവരങ്ങൾക്ക് 94041755, 97262978, 66284396, 55575492, 24317875 എന്നീ നന്പറുകളിൽ കല കുവൈത്ത് പ്രവർത്തകരെ ബന്ധപ്പെടാവുന്നതാണ്.
റിപ്പോർട്ട്: സലിം കോട്ടയിൽ