1. ചെറുനാരങ്ങാ
ഇഞ്ചിസർബത്ത്
ആവശ്യമായ കാര്യങ്ങൾ: ചെറുനാരങ്ങ -ഒന്ന്, ഇഞ്ചി അരച്ചത് ഒരു ടീസ്പൂണ്, പഞ്ചസാര - രണ്ടു ടേബിൾസ്പൂണ്, ഉപ്പ് - ഒരുനുള്ള്, സോഡ - ഒരു ഗ്ലാസ്.
തയാറാക്കുന്നവിധം: ചെറുനാരങ്ങാ നീരും ഇഞ്ചിയും സമമായി രണ്ടു ഗ്ലാസുകളിലേക്ക് പകർത്തുക. ഓരോന്നിലും അര ഗ്ലാസ് തണുത്ത വെള്ളം ഒഴിച്ച് ഒരു ടേബിൾസ്പൂണ് പഞ്ചസാര രണ്ടിലും കലക്കുക. ഇതിലേക്ക് ഉപ്പും സോഡയും ചേർത്ത് ഇളക്കിയ ഉടനെ കഴിക്കാം. വളരെ നല്ല ഒരു ദാഹശമനി.
2. മോരുംവെള്ളം
നല്ല കട്ടത്തൈര് ഒരു കപ്പ്, ഇഞ്ചിയും പൊതിനയിലയും കൂടി അരച്ചത് രണ്ടു ടീസ്പൂണ്, ജീരകം വറുത്തുപൊടിച്ചത് -അരടീസ്പൂണ്, ഉപ്പ്.
തയാറാക്കുന്നവിധം: ഈ പറഞ്ഞവയെല്ലാംകൂടി അരക്കപ്പ് വെള്ളത്തിൽ നല്ലതുപോലെ മിക്സിയിൽ അടിച്ച് യോജിപ്പിക്കുക. ഈ കൂട്ട് രണ്ടു ഗ്ലാസിൽ ഒഴിച്ച് മുകളിൽ ആവശ്യത്തിന് ഐസ് കട്ടകൾ ഇട്ട് വിളന്പാം.
3. പച്ചമാങ്ങ ജ്യൂസ് (ഇത് സൂര്യാ തപം അകറ്റും)
രണ്ടു പച്ചമാങ്ങ, ഇഞ്ചി അരച്ചത് - ഒരു ടീസ്പൂണ്, പഞ്ചസാര - ആവശ്യത്തിന്, ഉപ്പ് - ഒരുനുള്ള്.
തയാറാക്കുന്നവിധം: പച്ചമാങ്ങ സ്ലൈസ് ആക്കിയത് പുഴുങ്ങി അതിന്റെ ചാറ് പിഴിഞ്ഞെടുക്കുക. ഇതിലേക്ക് ആവശ്യത്തിനു പഞ്ചസാരയും ഉപ്പും ഇഞ്ചിയും ചേർത്തിളക്കി രണ്ടു ഗ്ലാസിൽ ഒഴിച്ച് ഐസ്കട്ടകൾ ഇട്ട് വിളന്പാം.
4. ജൽജീര
ജീരകം വറുത്തുപൊടിച്ചത് - ഒരു ടേബിൾസ്പൂണ്, മല്ലിയിലയും പുതിനയിലയും ഒന്നിച്ച് അരച്ചെടുത്തത് - ഒരു ടേബിൾസ്പൂണ്, നാരങ്ങാനീര് - ഒരു ടേബിൾസ്പൂണ്, മാങ്ങ ഉണക്കിപ്പൊടിച്ചത് - അര ടീസ്പൂണ്, പഞ്ചസാര - അരടീസ്പൂണ്, നാരങ്ങാ സ്ലൈസ് -രണ്ടെണ്ണം അലങ്കാരത്തിന്, ഉപ്പ് - അര ടീസ്പൂണ്.
തയാറാക്കുന്നവിധം: ഒരു ഗ്ലാസ് വെള്ളത്തിലേക്ക് ഈ പറഞ്ഞവയെല്ലാം ചേർത്തിളക്കി, പകുതി വേറൊരു ഗ്ലാസിലേക്കു മാറ്റുക- അതിലേക്ക് തണുത്ത വെള്ളവും ഐസും ചേർത്ത് നാരങ്ങാ സ്ലൈസ് വച്ച് അലങ്കരിച്ചു വിളന്പാം.
5. മധുരമുള്ള മോര്
തൈര് പുളിയില്ലാത്തത് - ഒരു കപ്പ്, ഏലയ്ക്കാപൊടി - അര ടീസ്പൂണ്, റോസ് വാട്ടർ - അര ടീസ്പൂണ് (വാങ്ങാൻ കിട്ടും), കുങ്കുമപ്പൂവ് ഒരു നുള്ള്, പഞ്ചസാര - ഒരു ടേബിൾസ്പൂണ്.
തയാറാക്കുന്നവിധം: തൈര്, കുങ്കുമപൂവൊഴിച്ചു മറ്റെല്ലാ ചേരുവയും കൂടി ചേർത്തടിക്കുക.ഇതു രണ്ടു ഗ്ലാസുകളിലാക്കി മുകളിൽ ഐസ് കഷണങ്ങളും തണുത്ത വെള്ളവും ഒഴിച്ച് ഇളക്കി മുകളിൽ കുങ്കുമപ്പൂവ് അല്പാല്പമായി ചേർത്തു വിളന്പാം.
6. വെറും ചെറുനാരങ്ങാ സോഡാ
ഒരു ചെറുനാരങ്ങ, രണ്ടു ടേബിൾസ്പൂണ് പഞ്ചസാര, സോഡാവെള്ളം.
തയാറാക്കുന്നവിധം: നാരങ്ങാനീരും പഞ്ചസാരയും ചേർത്തിളക്കി ആവശ്യത്തിനു സോഡാവെള്ളം ചേർത്ത് രണ്ടു ഗ്ലാസുകളിൽ ആക്കി വിളന്പുക.
7. ഇരുന്പൻപുളി
12 ഇരുന്പൻപുളി പുഴുങ്ങിയത്, ഇഞ്ചി അരച്ചത് - ഒരു ടേബിൾസ്പൂണ്, പഞ്ചസാര - മൂന്ന് ടേബിൾസ്പൂണ്.
തയാറാക്കുന്നവിധം: പുളി നല്ലതുപോലെ ഉടച്ച് അല്പം വെള്ളം ചേർത്ത് അരിച്ചെടുക്കുക.ഇതിലേക്ക് പഞ്ചസാരയും ഇഞ്ചിയും ചേർത്തിളക്കുക.ഓരോ ഗ്ലാസിലും മൂന്നു ടേബിൾസ്പൂണ് പുളി സർബത്ത് ഒഴിച്ച് ബാക്കി തണുത്ത വെള്ളവും ഐസും ചേർത്ത് വിളന്പാം.
8. ഇളനീർ പാനീയം
കരിക്കിൻ വെള്ളം - രണ്ടു കപ്പ്, ചെറുനാരങ്ങാ നീര് - രണ്ടു ടേബിൾസ്പൂണ്, വെള്ളം - ഒരുകപ്പ്, ഇളനീരെടുത്തത് കഴിഞ്ഞ് അതിനകത്തെ ഇളംകാന്പ് - ഒരു കപ്പ്.
തയാറാക്കുന്നവിധം: വെള്ളവും അകത്തെ കാന്പുംകൂടി ബ്ലെൻഡ് ചെയ്യുക. ഇതിലേക്ക് പഞ്ചസാരയും ചെറുനാരങ്ങയും ചേർത്തിളക്കുക.ഇത് നാലു ഗ്ലാസുകളിൽ ഒഴിച്ച് ഐസ് ചേർത്ത് വിളന്പുക.
9. കാരാമെൽ മിൽക്ക് ഷേക്ക്
പഞ്ചസാര - മുക്കാൽ കപ്പ്, പാൽ - രണ്ടു ഗ്ലാസ്, ചൂടുവെള്ളം - അരക്കപ്പ്.
തയാറാക്കുന്നവിധം: പഞ്ചസാര ഒരു ചുവടുകട്ടിയുള്ള പാനിൽ ഇട്ട് ഗോൾഡൻ നിറം വരുന്നതുവരെ ഇളക്കുക.അടുപ്പത്തുനിന്നു മാറ്റി ഇതിലേക്ക് ചൂടുവെള്ളം ഒഴിക്കുക. വീണ്ടും അടുപ്പത്തുവച്ച് പഞ്ചസാര ഉരുക്കിയെടുക്കുക.ഇതിലേക്ക് പാലൊഴിച്ച് ഇളക്കി യോജിപ്പിക്കുക. നല്ലതുപോലെ തണുപ്പിച്ച് കഴിക്കാം.
10. ഐസ് ടീ
രണ്ടു - ടീബാഗ്സ്, ചെറുനാരങ്ങാനീര് - ഒരു ടേബിൾസ്പൂണ്, തേൻ - രണ്ടു ടേബിൾസ്പൂണ്.
തയാറാക്കുന്നവിധം: രണ്ടു കപ്പ് വെള്ളം തിളപ്പിച്ച് രണ്ടു ടീ ബാഗിലിട്ട് അഞ്ചു മിനിട്ട് കഴിഞ്ഞ് ഇതെടുത്ത് മാറ്റുക.ഇതിലേക്ക് തേനും നാരങ്ങാനീരും ചേർത്ത് നല്ലതുപോലെ ഐസ് കട്ടകൾ ഇട്ട് വിളന്പാം.