കലിംഗ സൂപ്പർ കപ്പ് ഫൈനൽ; ഗോവ X ജംഷഡ്പുർ ഫൈനല്‍ ശനിയാഴ്ച : Deepika.com Sports News |

Click here for detailed news of all items

കലിംഗ സൂപ്പർ കപ്പ് ഫൈനൽ; ഗോവ X ജംഷഡ്പുർ ഫൈനല്‍ ശനിയാഴ്ച

Thursday, May 1, 2025 1:41 AM IST

ഭുവനേശ്വർ: കലിംഗ സൂപ്പർ കപ്പ് ഫൈനലിൽ ഗോവ എഫ്‌സി- ജംഷഡ്പുര്‍ എഫ്‌സി പോരാട്ടം.

ഇന്നലെ നടന്ന ആദ്യ സെമിഫൈനലിൽ മോഹൻ ബഗാൻ സൂപ്പർ ജയന്‍റിനെ 1-3ന് പരാജയപ്പെടുത്തി ഗോവ ഫൈനലിൽ പ്രവേശിച്ചപ്പോള്‍ മുംബൈ സിറ്റി എഫ്‌സിയെ എതിരില്ലാത്ത ഒരു ഗോളിന് വീഴ്ത്തി ജംഷഡ്പുര്‍ ഫൈനലില്‍ കടന്നു. ശനിയാഴ്ചയാണ് ഫൈനല്‍ പോരാട്ടം.

ആക്രമണാത്മക ശൈലിയിലാണ് എഫ്സി ഗോവ മത്സരം ആരംഭിച്ചത്. മോഹൻ ബഗാൻ ശക്തമായ പ്രതിരോധം തീർത്തു. എന്നാൽ, 20-ാം മിനിറ്റിൽ ഗോവയുടെ നിരന്തര സമ്മർദം ഫലം കണ്ടു. ബ്രിസണ്‍ ഫെർണാണ്ടസ് തൊടുത്ത ഷോട്ട് മോഹൻ ബഗാൻ ഗോൾകീപ്പർ ധീരജ് സിംഗിനെ നിസഹായനാക്കി വല കുലുക്കി.

എന്നാൽ മൂന്നു മിനിറ്റുകൾക്കുള്ളിൽ മോഹൻ ബഗാൻ തിരിച്ചടിച്ച് സമനില പിടിച്ചു. 23-ാം മിനിറ്റിൽ സുഹൈൽ അഹമ്മദ്‌ പട്ട് സമനില ഗോളടിച്ചു. 1-1 സമനിലയിൽ ആദ്യ പകുതി അവസാനിച്ചു. രണ്ടാം പകുതി ഗോവൻ താരങ്ങളുടെ ആവേശപ്പോരിന് സാക്ഷ്യം വഹിച്ചു.

മോഹൻ ബഗാനെ നിഷ്പ്രഭമാക്കിയുള്ള മുന്നേറ്റം 51-ാം മിനിറ്റിൽ ലക്ഷ്യം കണ്ടു. ഐക്കർ ഗ്വാറോട്സെന ഗോവയ്ക്കായി ലീഡ് നേടി. 58-ാം മിനിറ്റിൽ ബോർജ ഹെറെറാ ഗോവയ്ക്കായി മൂന്നാം ഗോൾ നേടി വിജയവും ഫൈനൽ പ്രവേശനവും ഉറപ്പിച്ചു. ബോർജ ഹെറെറാ ഗോണ്‍സാൽസ് ആണ് കളിയിലെ താരം.

ജംഷഡ്പുരിന് ജയം:

ഇന്നലെ നടന്ന രണ്ടാം സെമിയിൽ മുംബൈ സിറ്റി എഫ്സിയെ എതിരില്ലാത്ത ഒരു ഗോളിന് തകർത്ത് ജംഷഡ്പുർ എഫ്സി ഫൈനലിൽ കടന്നു. അവസാന നിമിഷം വരെ ഗോൾ രഹിത സമനിലയായി നീങ്ങിയ മത്സരത്തിൽ 87-ാം മിനിറ്റിലാണ് ജംഷഡ്പുരിന്‍റെ വിജയഗോൾ പിറന്നത്. റേയ് ടച്ചിക്‌വാനയാണ് വിജയഗോളും ജംഷഡ്പുരിന്‍റെ ഫൈനൽ പ്രവേശനം സാധ്യമാക്കിയത്. റേയ് ടച്ചിക്‌വാനതന്നെയാണ് കളിയിലെ താരവും.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.