ന്യൂജേഴ്സി: ന്യൂജേഴ്സിയിലെ സോമർസെറ്റ് സെന്‍റ് തോമസ് സീറോ മലബാർ കാത്തലിക് ഫൊറോന ദേവാലയത്തിൽ വി. യൂദാശ്ലീഹായുടെ നൊവേനയും തിരുശേഷിപ്പ് വണക്കവും തിരുനാളും ഒക്ടോബർ 19 മുതൽ ഒക്ടോബർ 28 വരെ ഭക്ത്യാദരപൂർവം നടത്തുന്നതാണെന്ന് ഫൊറോന വികാരി ഫാ. ലിഗോറി ഫിലിപ്സ് കട്ടിയാകാരൻ അറിയിച്ചു.
ആഘോഷമായ ദിവ്യബലിയും നൊവേനയും തിരുശേഷിപ്പ് വണക്കവും എല്ലാദിവസവും വൈകിട്ട് 7.30 മുതൽ നടക്കും. പ്രധാന തിരുനാൾ ഒക്ടോബർ 28ന് ഞായറാഴ്ച രാവിലെ 9.30 ന് ആരംഭിക്കും.
2013 ഒക്ടോബർ 17 നാണ് വിശുദ്ധന്‍റെ തിരുശേഷിപ്പ് പ്രതിഷ്ഠാ ചടങ്ങുകൾ സോമർസെറ്റ് ദേവാലയത്തിൽ നടന്നത്. ഓസ്ട്രിയയിലെ വിയന്നയിൽ നിന്ന് ഫാ. എബി പുതുമനയുടെ നേതൃത്വത്തിൽ വിയന്ന ആർച്ച് ബിഷപ്പ് ക്രസ്റ്റോഫ് ഷോണ് ബോണിന്റെ സാക്ഷ്യപത്രത്തോടുകൂടി സോമർസെറ്റിലെ സെൻറ് തോമസ് ഫൊറോന ദേവാലയത്തിൽ കൊണ്ടുവന്ന വിശുദ്ധന്‍റെ തിരുശേഷിപ്പ് അന്നത്തെ വികാരി ഫാ. തോമസ് കടുകപ്പിള്ളി ഏറ്റുവാങ്ങുകയും ഷിക്കാഗോ രൂപതയുടെ അഭി. പിതാവ് മാർ ജേക്കബ് അങ്ങാടിയത്ത് പരസ്യ വണക്കത്തിനായി ദേവാലയത്തിൽ പ്രതിഷ്ഠിക്കുകയും ചെയ്തിരുന്നു.
ഒക്ടോബർ 19ന് വെള്ളിയാഴ്ച വൈകീട്ട് 7.30ന് ആരംഭിക്കുന്ന വിശുദ്ധന്‍റെ നൊവേനയും വി. ദിവ്യബലിയും ഇടവക വികാരി ഫാ. ലിഗോറിയുടെ മുഖ്യ കാർമ്മികത്വത്തിൽ നടക്കും. ഇന്നത്തെ തിരുനാൾ ചടങ്ങുകൾക്ക് സെന്‍റ് തെരേസ വാർഡ് നേതൃത്വം നൽകും.
20നു ശനിയാഴ്ച രാവിലെ 9 നുള്ള വിശുദ്ധ ദിവ്യബലിക്ക് ഷിക്കാഗോ രൂപത മതബോധന കമ്മീഷൻ ഡയറക്ടർ റവ. ഡോ. ജോർജ് ദാനവേലിൽ നേതൃത്വം നൽകും. തുടർന്ന് വിശുദ്ധന്‍റെ നൊവേനയും മറ്റു പ്രാർത്ഥനകളും നടക്കും. അന്നേദിവസം മതാധ്യാപകർക്കുള്ള പ്രത്യേക പരിശീലന ക്ലാസുകളും നത്തപ്പെടും. ക്ലാസുകൾക്ക് റവ. ഡോ. ജോർജ് ദാനവേലിൽ നേതൃത്വം നൽകും.
ഒന്പത് ദിവസങ്ങളിലായി നടക്കുന്ന വിശുദ്ധന്‍റെ നൊവേനയും, പ്രാർത്ഥനകൾക്കും വിവിധ വാർഡ് അംഗങ്ങൾ നേതൃത്വം നൽകും. 19ന് സെന്‍റ് തെരേസ വാർഡ്, 20ന് സെന്‍റ് മേരീസ് വാർഡ്, 21ന് സെൻറ് .തോമസ് വാർഡ്, 22ന് സെന്‍റ് ജോസഫ് വാർഡ്, 23ന് സെന്‍റ് ജോർജ് വാർഡ്, 24ന് സെന്‍റ് ആന്‍റണി വാർഡ്, 25ന് സെന്‍റ് ജൂഡ് വാർഡ്, 26ന് സെന്‍റ് അൽഫോൻസാ വാർഡ്, 27ന് സെന്‍റ് പോൾസ് വാർഡ് എന്നിങ്ങനെയാണ് ക്രമപ്പെടുത്തിയിരിക്കുന്നത്.
വിശുദ്ധന്‍റെ പ്രധാന തിരുനാൾ തിരുക്കർമ്മങ്ങൾ ഒക്ടോബർ 28 ന് ഞായറാഴ്ച രാവിലെ 9.30ന് ഷിക്കാഗോ രൂപതാ സഹായ മെത്രാൻ മാർ. ജോയ് ആലപ്പാട്ടിന്‍റെ മുഖ്യ കാർമ്മികത്വത്തിൽ ആഘോഷമായ ദിവ്യബലിയോടെ ആരംഭിക്കും. ദിവ്യബലിക്കു ശേഷം ലദീഞ്ഞ്, വിശുദ്ധന്‍റെ രൂപം വഹിച്ചുകൊണ്ടുള്ള ആഘോഷപൂർവമായ പ്രദക്ഷിണവും പ്രദക്ഷിണത്തിനുശേഷം തിരിശേഷിപ്പ് വണക്കവും, തുടർന്ന് നേർച്ച വിതരണവും ഉണ്ടായിരിക്കും.
കൂടുതൽ വിവരങ്ങൾക്ക്:
മിനേഷ് ജോസഫ് (ട്രസ്റ്റി ) 201978 9828,മേരിദാസൻ തോമസ് (ട്രസ്റ്റി) 201 912 6451, ജസ്റ്റിൻ ജോസഫ് (ട്രസ്റ്റി ) 732762 6744, സാബിൻ മാത്യൂ (ട്രസ്റ്റി ) 848 391 8461, ബിൻസി ഫ്രാൻസിസ് (കോർഡിനേറ്റർ), 908 531 4034, ജോജോ ചിറയിൽ (കോർഡിനേറ്റർ) 732 215 4783, ജെയിംസ് പുതുമന (കോർഡിനേറ്റർ) 732 216 4783.
റിപ്പോർട്ട്: ജോയിച്ചൻ പുതുക്കുളം