Deepika
ADVERTISEMENT
International
മെറ്റ്സ് (ഫ്രാൻസ്): ഭൗമശാസ്ത്രപരമായ അതിരുകൾക്കപ്പുറം ചരിത്രപരവും സാംസ്കാരികവുമായ അടിത്തറയിൽ കെട്ടിപ്പടുത്തതാണു യൂറോപ്പിന്‍റെ സ്വത്വമെന്നും നിലവിലെ ബഹുസാംസ്കാരിക പശ്ചാത്തലത്തിൽ യൂറോപ്പ് സ്വന്തം വേരുകൾ വീണ്ടെടുത്ത് സംഭാഷണങ്ങൾക്ക് തുറന്ന മനസ് കാട്ടണമെന്നും ലെയോ പതിനാലാമൻ മാർപാപ്പ. ഫ്രാൻസിലെ മെറ്റ്സ് നഗരത്തിലുള്ള റോബർട്ട് ഷൂമാൻ സെന്‍ററിൽ സംഘടിപ്പിച്ച ‘യൂറോപ്പിന്‍റെ വേരുകളിലേക്ക്, സമാധാനത്തിനും ഐക്യത്തിനും’ എന്ന സമ്മേളനത്തിൽ സന്ദേശം നൽകുകയായിരുന്നു അദ്ദേഹം.
യൂറോപ്യൻ ഐക്യത്തിന് അടിത്തറയിട്ട റോബർട്ട് ഷുമാൻ, അൾചിദേ ദെ ഗാസ്പാരി, യൂറോപ്പിന്‍റെ മധ്യസ്ഥനായ വിശുദ്ധ ബെനഡിക്ട് എന്നിവരുടെ സംഭാവനകളെ മാർപാപ്പ അനുസ്മരിച്ചു. ഭരണകൂടങ്ങളുടെ മതേതരത്വം എന്നാൽ കേവലം നിഷ്പക്ഷത പാലിക്കലല്ല, മറിച്ച് വിവിധ വിഭാഗങ്ങൾ തമ്മിലുള്ള സഹകരണവും സഭകളുടെ സ്വാതന്ത്ര്യത്തെ ആദരിക്കലുമാണെന്ന് അദ്ദേഹം വ്യക്തമാക്കി.
യുദ്ധങ്ങളിൽനിന്നും പീഡനങ്ങളിൽനിന്നും രക്ഷപ്പെട്ട് യൂറോപ്പിലെത്തുന്ന അഭയാർഥികൾക്ക് നിയമപരമായ സുരക്ഷിത മാർഗങ്ങളും സംരക്ഷണവും ഉറപ്പാക്കണം. മനുഷ്യക്കടത്തുകാർക്കെതിരേ കർശന നടപടി സ്വീകരിക്കുന്നതോടൊപ്പം, എത്തുന്നവരെ കുടുംബാംഗങ്ങളെപ്പോലെ ഉൾക്കൊള്ളാനും അവരുടെ കഴിവുകൾ വളർത്താനും സാധിക്കണം. ലോകസമാധാനത്തിനായി ആയുധങ്ങൾ സംഭരിച്ച് വരാനിരിക്കുന്ന യുദ്ധങ്ങൾക്ക് തയാറെടുക്കുകയാണോ അതോ സർഗാത്മകമായി എന്തെങ്കിലും ചെയ്യുന്നുണ്ടോയെന്ന് നാം ആത്മപരിശോധന നടത്തണം.
ആയുധപോരാട്ടങ്ങൾക്കു പകരം ക്ഷമയോടെയുള്ള സംഭാഷണങ്ങൾക്കും വിഭവങ്ങൾ പങ്കുവയ്ക്കുന്നതിനും യൂറോപ്പ് മുൻഗണന നൽകണമെന്നും മാർപാപ്പ ആവശ്യപ്പെട്ടു. ഭാവിയെ ഭയപ്പെടാതെ കുടുംബങ്ങൾ ആരംഭിക്കാനും ഗർഭധാരണം മുതൽ മരണം വരെയുള്ള മനുഷ്യജീവന്‍റെ അന്തസ് ഉയർത്തിപ്പിടിച്ച് നന്മയുടെ ശില്പികളാകാനും ആഹ്വാനം ചെയ്തുകൊണ്ടാണ് മാർപാപ്പ സന്ദേശം അവസാനിപ്പിച്ചത്.
ഫ്രഞ്ച് പ്രസിഡന്‍റ് ഇമ്മാനുവൽ മാക്രോൺ, മൊണാക്കോയിലെ ആൽബർട്ട് രണ്ടാമൻ രാജകുമാരൻ, ചാർലീൻ രാജകുമാരി, ലക്സംബർഗ് ഗ്രാൻഡ് ഡ്യൂക്ക് ഗിയ്യോം എന്നിവരുൾപ്പടെ യൂറോപ്പിലെ പ്രമുഖ ഭരണാധികാരികളും സഭാ തലവന്മാരും സമ്മേളനത്തിൽ പങ്കെടുത്തു.
നേരത്തേ ലൂർദിലെ സന്ദർശനം പൂർത്തിയാക്കി വടക്കുകിഴക്കൻ ഫ്രാൻസിലെ മെറ്റ്സിലേക്കു പോകവേ മാർപാപ്പയുടെ വിമാനത്തെ ആദരസൂചകമായി ഫ്രഞ്ച് യുദ്ധവിമാനങ്ങൾ അകന്പടി സേവിച്ചു. മെറ്റ്സ് നഗരത്തിലും മാർപാപ്പയെ കാണാൻ ജനലക്ഷങ്ങളാണ് ഒഴുകിയെത്തിയത്. നാലുദിവസത്തെ ഫ്രാൻസ് സന്ദർശനം പൂർത്തിയാക്കി ഇന്നലെ രാത്രി മാർപാപ്പ വത്തിക്കാനിൽ മടങ്ങിയെത്തി.
International
ലൂർദ്: ലൂർദിന്‍റെ പുണ്യഭൂമിയിലെത്തിയ മാർപാപ്പയ്ക്കു മുന്നിൽ വിശുദ്ധ ബർണദീത്തയുടെ വേഷത്തിലെത്തി ഗാനം ആലാപിച്ച് 13കാരി ഏവ മൊളൻമേക്കർ ഏവരുടെയും മനം കവർന്നു.‘ബർണദീത്ത് ദെ ലൂർദ് ’ എന്ന സംഗീതനാടകത്തിലെ രണ്ടു പ്രധാന ഗാനങ്ങളാണ് ഏവ പാടിയത്.
1858ൽ മാസബിയേൽ ഗുഹയിൽ പരിശുദ്ധ കന്യക മറിയത്തിന്‍റെ ദർശനം ലഭിച്ച വിശുദ്ധ ബർണദീത്തയുടെ ജീവിതത്തെ ആസ്പദമാക്കിയുള്ളതാണ് ഈ നാടകം. ഫ്രാൻസിലെ എക്സ് ഓൺ പ്രവിശ്യയിലെ ഫുവോ സ്വദേശിനിയായ ഏവയാണ് നാടകാവിഷ്കാരത്തിൽ പ്രധാന കഥാപാത്രത്തെ അവതരിപ്പിക്കുന്നത്.
വാക്കുകൾക്കതീതമായ, വിശ്വസിക്കാനാകാത്ത നിമിഷമാണിതെന്നും മാർപാപ്പയ്ക്കു മുന്നിൽ പാടാൻ കഴിഞ്ഞത് ജീവിതത്തിലെ ഏറ്റവും വലിയ ഭാഗ്യമായി കരുതുന്നുവെന്നും ഏവ വികാരഭരിതയായി പ്രതികരിച്ചു.
നിർമലമായ ശബ്‌ദത്തിൽ ഉയർന്നുവന്ന ഗാനം മാർപാപ്പയെയും സദസിനെയും ഒരേപോലെ കോരിത്തരിപ്പിച്ചു. ഭക്തിസാന്ദ്രമായ ഈ അവിസ്മരണീയ നിമിഷത്തിന്‍റെ വീഡിയോ ദൃശ്യങ്ങൾ ഇപ്പോൾ സമൂഹമാധ്യമങ്ങളിൽ തരംഗമായിരിക്കുകയാണ്.
International
ലൂർദ് (ഫ്രാൻസ്): മനസിൽ പ്രത്യാശയുടെ പ്രകാശവും കൈകളിൽ തെളിച്ച മെഴുകുതിരികളുമായി ഒഴുകിയെത്തിയ തീർഥാടകരെ സാക്ഷിനിർത്തി, ലെയോ പതിനാലാമൻ മാർപാപ്പയുടെ നേതൃത്വത്തിൽ നടന്ന ജപമാലപ്രദക്ഷിണം ലൂർദിന്‍റെ പുണ്യഭൂമിയെ ഭക്തിസാന്ദ്രമാക്കി. ഞായറാഴ്ച രാത്രി നടന്ന ജപമാല ്രദക്ഷിണത്തിൽ ലോകത്തിന്‍റെ വിവിധ ഭാഗങ്ങളിൽനിന്ന് എത്തിയ രണ്ടു ലക്ഷത്തോളം വിശ്വാസികളാണു പങ്കെടുത്തത്.
വലതുകൈയിൽ വലിയ മെഴുകുതിരിയും ഇടതുകൈയിൽ ജപമാലയുമേന്തി, പരിശുദ്ധ അമ്മയുടെ അലങ്കരിച്ച തിരുസ്വരൂപത്തിനു പിന്നാലെ നടന്നുനീങ്ങിയ മാർപാപ്പ വിശ്വാസികൾക്ക് ആത്മീയാനുഭൂതി പകർന്നു. വിവിധ ഭാഷകളിൽ ‘മഹിമയുടെ രഹസ്യങ്ങൾ’ പ്രാർഥിച്ചപ്പോൾ, റോസറി ബസിലിക്കയ്ക്കു മുന്നിലെ ചത്വരത്തിൽ തടിച്ചുകൂടിയ പതിനായിരക്കണക്കിന് തീർഥാടകർ തങ്ങളുടെ മെഴുകുതിരികൾ ഉയർത്തിപ്പിടിച്ച് ‘ആവേ മരിയ’ ഗീതങ്ങൾ ആലപിച്ചു. ലൂർദിന്‍റെ പുണ്യഭൂമിയിൽ ഇതു വെളിച്ചത്തിന്‍റെ വലിയൊരു സമുദ്രംതന്നെ തീർത്തു.
‘നമ്മെ മുന്നോട്ട് നയിക്കുന്ന പ്രകാശം പ്രതീക്ഷയുടേതാണ്. കഷ്‌ടപ്പാടുകളും പരീക്ഷണങ്ങളും നിറഞ്ഞ ഈ ജീവിതത്തിലും നമ്മൾ ദൈവത്തിന്‍റെ പ്രിയപ്പെട്ട മക്കളാണെന്ന സന്തോഷം ആ പ്രകാശം നമുക്ക് നൽകുന്നു,’ - സന്ദേശത്തിൽ മാർപാപ്പ ഓർമിപ്പിച്ചു.
ഒക്‌ടോബറിൽ സമാധാനത്തിനായുള്ള ജപമാലപ്രാർഥനയ്ക്ക് ആഹ്വാനം
ലോകമെമ്പാടും സമാധാനം പുലരുന്നതിനും യുദ്ധങ്ങൾ അവസാനിക്കുന്നതിനുമായി ഒക്‌ടോബർ മാസത്തിൽ ജപമാല ചൊല്ലി പ്രാർഥിക്കാൻ കത്തോലിക്ക വിശ്വാസികളോട് മാർപാപ്പ ആഹ്വാനം ചെയ്തു. ലൂർദിലെ വിശുദ്ധ കുർബാനയ്ക്കുശേഷം ‘ത്രികാലപ്രാർഥന’ നയിച്ചു സംസാരിക്കുകയായിരുന്നു അദ്ദേഹം.
ലൂർദിൽ പരിശുദ്ധ കന്യക മറിയം വിശുദ്ധ ബർണദീത്തയ്ക്കു പ്രത്യക്ഷപ്പെട്ടപ്പോൾ കൈകളിൽ ജപമാലയേന്തി പ്രാർഥിക്കാൻ പഠിപ്പിച്ച കാര്യം ഓർമിപ്പിച്ച മാർപാപ്പ, പ്രാർഥനയോടൊപ്പം പശ്ചാത്താപത്തിന്‍റെയും കരുണയുടെയും പ്രവൃത്തികൾ ചെയ്യാനും, സംഭാഷണങ്ങളിലൂടെ അനുരഞ്ജനത്തിനായി നിലകൊള്ളാനും ആഹ്വാനം ചെയ്തു.
International
പാരീസ്: പാരീസിലെ ദേശീയ ഫുട്ബോൾ സ്റ്റേഡിയമായ ‘സ്റ്റാഡ് ദെ ഫ്രാൻസി’ൽ വെള്ളിയാഴ്ച രാത്രി നടന്ന പ്രാർഥനാസംഗമത്തിൽ ഒരു ലക്ഷത്തോളം കത്തോലിക്ക യുവതീ-യുവാക്കളാണു പങ്കെടുത്തത്.
സംഗീതവും ആത്മീയപ്രഭയും നിറഞ്ഞ ചടങ്ങിൽ, തിന്മകളെ ഉപേക്ഷിച്ച് നന്മയുടെയും സ്നേഹത്തിന്‍റെയും പാത തെരഞ്ഞെടുക്കാൻ മാർപാപ്പ യുവതയോട് ആഹ്വാനം ചെയ്തു.
പ്രാർഥനാഗാനങ്ങൾ ആലപിച്ചും വിശുദ്ധരുടെ തിരുശേഷിപ്പുകളോടും പാരീസിൽ നൂറ്റാണ്ടു കളായി വണങ്ങിപ്പോരുന്ന ഈശോമിശിഹായുടെ വിശുദ്ധ വസ്ത്രത്തോടും (ട്യൂണിക്കാ ക്രിസ്തി) ഭക്തിയോടെ പ്രണാമമർപ്പിച്ചുമുള്ള ഒന്നര മണിക്കൂറോളം നീണ്ട പ്രാർഥനാചടങ്ങുകൾ പാരീസ് നഗരത്തെ ഭക്തിദീപ്തിയിലാക്കി.
ഒരു റോക്ക് സ്റ്റാറിനെയെന്നപോലെ യുവാക്കൾ മാർപാപ്പയെ ഹർഷാരവത്തോടെ സ്വീകരിച്ചു. റോക്ക് സംഗീത പരിപാടികളെ ഓർമിപ്പിക്കുന്ന തരത്തിലുള്ള ആവേശമാണു സ്റ്റേഡിയത്തിൽ ദൃശ്യമായത്.
മാർപാപ്പയുടെ വരവിനുപിന്നാലെ ഫ്രഞ്ച് വിശുദ്ധരെയും ഫ്രാൻസിലെ സഭയുടെ ചരിത്രത്തെയും ആവിഷ്കരിക്കുന്ന കലാപരിപാടികളും കുതിരകളെ അണിനിരത്തിയുള്ള ദൃശ്യാവിഷ്കാരവും അതിമനോഹരമായ വെടിക്കെട്ടും അരങ്ങേറി.
International
പാരീസ്: നാലു ദിവസത്തെ ഔദ്യോഗിക സന്ദർശനത്തിനായി ഫ്രാൻസിലെത്തിയ ലെയോ പതിനാലാമൻ മാർപാപ്പയ്ക്ക് പാരീസിൽ പ്രൗഢഗംഭീര വരവേല്പ്. 2008ൽ ബെനഡിക്ട് പതിനാറാമൻ മാർപാപ്പ നടത്തിയ സന്ദർശനത്തിനുശേഷം, നീണ്ട 18 വർഷങ്ങൾക്കുശേഷമാണ് ഒരു മാർപാപ്പ ഫ്രാൻസിൽ ഔദ്യോഗിക സന്ദർശനം നടത്തുന്നത്.
പാരീസ് ഓർലി വിമാനത്താവളത്തിൽ പ്രാദേശികസമയം ഇന്നലെ രാവിലെ പത്തിന് എത്തിയ മാർപാപ്പയെ ഫ്രഞ്ച് പ്രസിഡന്‍റ് ഇമ്മാനുവൽ മാക്രോണിന്‍റെ നേതൃത്വത്തിൽ ഔദ്യോഗിക സൈനിക ബഹുമതികളോടെയാണു സ്വീകരിച്ചത്. സ്വീകരണച്ചടങ്ങ് നടക്കുന്പോൾ ഫ്രാൻസിലെ എല്ലാ കത്തോലിക്കാ പള്ളികളിലും ഏഴു മിനിറ്റ് നേരം മണികൾ മുഴക്കി മാർപാപ്പയ്ക്ക് സ്വാഗതമോതി.
സ്വീകരണത്തിനുശേഷം പ്രസിഡന്‍റിന്‍റെ ഔദ്യോഗിക വസതിയായ എലീസി കൊട്ടാരത്തിൽ പ്രസിഡന്‍റ് ഇമ്മാനുവൽ മാക്രോണുമായി മാർപാപ്പ കൂടിക്കാഴ്ച നടത്തി. തുടർന്ന് രാഷ്‌ട്രീയ-സാമൂഹിക നയതന്ത്ര പ്രമുഖരെ അഭിസംബോധന ചെയ്ത മാർപാപ്പ, ആഗോള സമാധാനത്തിലും സാങ്കേതികവിദ്യയുടെ ഉപയോഗത്തിലും കാത്തുസൂക്ഷിക്കേണ്ട ധാർമികതയെക്കുറിച്ച് ശക്തമായ സന്ദേശം നൽകി.
ഇന്നലെ വൈകുന്നേരം യുനെസ്കോ ആസ്ഥാനം, നോത്ര് ദാം കത്തീഡ്രൽ എന്നിവിടങ്ങൾ മാർപാപ്പ സന്ദർശിച്ചു. വൈകുന്നേരം നാലിന് നഗരത്തിലെ പ്രധാന വീഥികളിലൂടെ നോത്ര് ദാം കത്തീഡ്രലിലേക്കു പോപ്പ് മൊബീലിൽ യാത്ര ചെയ്ത മാർപാപ്പയെ ഒരുനോക്കു കാണാൻ ജനലക്ഷങ്ങളാണ് റോഡിനിരുവശവും തടിച്ചുകൂടിയത്. ഈ സമയത്ത് പാരീസ് നഗരത്തിലെ എല്ലാ പള്ളികളിലും മണികൾ മുഴങ്ങി.
വൈകുന്നേരം 5.15ന് നോത്ര് ദാം കത്തീഡ്രലിൽ വൈദികർക്കും സന്യസ്തർക്കുമൊപ്പം സായാഹ്ന നമസ്കാരത്തിൽ പങ്കെടുത്ത മാർപാപ്പ, തുടർന്ന് കത്തീഡ്രലിനു മുന്നിൽ ജനങ്ങളെ അഭിസംബോധന ചെയ്തു. രാത്രി 7.30 മുതൽ 11 വരെ സെന്‍റ് ഡെനിസിലെ ‘സ്റ്റാഡ് ഡി ഫ്രാൻസ്’ സ്റ്റേഡിയത്തിൽ നടന്ന യുവജന പ്രാർഥനാസംഗമത്തിലും മാർപാപ്പ പങ്കെടുത്തു. ഒരു ലക്ഷത്തോളം യുവജനങ്ങളാണ് പ്രാർഥനാസംഗമത്തിൽ പങ്കെടുത്തത്.
ഇന്നു തിരക്കിട്ട പരിപാടികളാണു മാർപാപ്പയ്ക്കുള്ളത്. രാവിലെ ഒന്പതിന് പാരീസിലെ കത്തോലിക്കാ സന്നദ്ധ സംഘടന സംഘടിപ്പിക്കുന്ന ചടങ്ങിൽ അഭയാർഥികളും കുടിയേറ്റക്കാരുമായും മാർപാപ്പ സംവദിക്കും. ഉച്ചകഴിഞ്ഞ് നഗരത്തിലെ കോൺകോർഡ് ചത്വരത്തിൽ വിശുദ്ധ കുർബാന അർപ്പിക്കും. ആറു ലക്ഷത്തോളം ആളുകളാണ് വിശുദ്ധ കുർബാനയ്ക്കായി രജിസ്റ്റർ ചെയ്തിട്ടുള്ളത്.
International
സെന്‍റ് ലൂയിസ് (അമേരിക്ക): റേഡിയോ, ടെലിവിഷൻ പരിപാടികളിലൂടെയും ഗ്രന്ഥരചനയിലൂടെയും ദശലക്ഷക്കണക്കിന് ആളുകളിലേക്ക് സുവിശേഷ സന്ദേശമെത്തിച്ച ആർച്ച്ബിഷപ് ഫുൾട്ടൺ ജെ. ഷീൻ ഇനി വാഴ്ത്തപ്പെട്ടവൻ.
അമേരിക്കയിലെ മിസോറി സംസ്ഥാനത്തിൽപ്പെട്ട സെന്‍റ് ലൂയിസ് നഗരത്തിലെ ‘ദ ഡോം അറ്റ് അമേരിക്കാസ് സെന്‍ററിൽ’ നടന്ന ഭക്തിനിർഭരവും പ്രൗഢഗംഭീരവുമായ ചടങ്ങിലായിരുന്നു ചരിത്രപ്രധാനമായ പ്രഖ്യാപനം.
തിരുക്കർമങ്ങളിൽ മാർപാപ്പയുടെ പ്രത്യേക പ്രതിനിധിയായി സുവിശേഷവത്കരണത്തിനായുള്ള വത്തിക്കാൻ കാര്യാലയം പ്രോ-പ്രീഫെക്‌ട് കർദിനാൾ ലൂയിസ് അന്‍റോണിയോ ടാഗ്ലെ മുഖ്യകാർമികത്വം വഹിച്ചു. മാർപാപ്പയുടെ സന്ദേശം അദ്ദേഹം ലത്തീൻ ഭാഷയിൽ വായിച്ചു. തുടർന്ന് പിയോറിയ ബിഷപ് ലൂയിസ് റ്റിൽക്ക ഇത് ഇംഗ്ലീഷിൽ വായിച്ചു. അമേരിക്കയിലെയും വിവിധ വിദേശരാജ്യങ്ങളിലെയും എൺപതോളം ബിഷപ്പുമാരും ആയിരത്തിലധികം വൈദികരും 80,000ത്തോളം വിശ്വാസികളും ചടങ്ങിൽ പങ്കെടുത്തു.
ആർച്ച്ബിഷപ് ഷീന്‍റെ ചരമവാർഷിക ദിനമായ ഡിസംബർ ഒന്പത് അദ്ദേഹത്തിന്‍റെ തിരുനാൾദിനമായി മാർപാപ്പ പ്രഖ്യാപിച്ചു.
ജനനസമയത്ത് ഹൃദയമിടിപ്പ് നിലയ്ക്കുകയും 61 മിനിറ്റുകളോളം ജീവന്‍റെ ലക്ഷണങ്ങളില്ലാതിരിക്കുകയും ചെയ്ത അമേരിക്കയിലെ ഇല്ലിനോയ് സ്വദേശിയായ ജയിംസ് ഫുൾട്ടൺ എൻഗ്സ്ട്രോം എന്ന കുഞ്ഞിന് ആർച്ച്ബിഷപ് ഷീന്‍റെ മധ്യസ്ഥതയാൽ ജീവൻ തിരിച്ചുകിട്ടിയത് അദ്ഭുത രോഗശാന്തിയായി വത്തിക്കാൻ ഔദ്യോഗികമായി അംഗീകരിക്കുകയായിരുന്നു. പൂർണ ആരോഗ്യവാനായ ജയിംസ് എൻഗ്സ്ട്രോമും കുടുംബവുമാണ് തിരുക്കർമങ്ങളിൽ വാഴ്ത്തപ്പെട്ട ഷീന്‍റെ തിരുശേഷിപ്പ് അൾത്താരയിലേക്കു സംവഹിച്ചത്.
വെറുമൊരു പ്രശസ്തനായ പ്രസംഗകനോ ടെലിവിഷൻ വ്യക്തിത്വമോ ആയതുകൊണ്ടല്ല ഫുൾട്ടൺ ഷീൻ വിശുദ്ധിയുടെ പദവിയിലേക്ക് ഉയർന്നതെന്നും ഈശോമിശിഹായുമായുള്ള അഗാധമായ ബന്ധവും വിശുദ്ധ കുർബാനയോടുള്ള ഭക്തിയും എളിയവരോടുള്ള കരുണയുമാണ് അദ്ദേഹത്തെ നയിച്ചതെന്നും കർദിനാൾ ടാഗ്ലെ വചനസന്ദേശത്തിൽ പറഞ്ഞു.
തന്‍റെ പ്രസംഗങ്ങൾ വഴി എത്രപേർ കത്തോലിക്കാസഭയിലേക്ക് കടന്നുവന്നുവെന്ന് പന്ത്രണ്ടാം പീയൂസ് മാർപാപ്പ ചോദിച്ചപ്പോൾ, “ആ കണക്കുകൾ ഞാൻ സൂക്ഷിക്കാറില്ല, അത് എന്‍റെ കഴിവുകൊണ്ടാണെന്ന അഹങ്കാരം എനിക്കുണ്ടാകാതിരിക്കാൻ” എന്നു മറുപടി നൽകിയ ഫുൾട്ടൺ ഷീന്‍റെ ലാളിത്യത്തെക്കുറിച്ച് കർദിനാൾ ഓർമിപ്പിച്ചു.
എമ്മി പുരസ്കാരം നേടിയ ‘ലൈഫ് ഈസ് വർത്ത് ലിവിംഗ്’ എന്ന ടെലിവിഷൻ പരിപാടിയിലൂടെയും റേഡിയോ സന്ദേശങ്ങളിലൂടെയും ദശലക്ഷക്കണക്കിന് ആളുകളെ സ്വാധീനിച്ച ആർച്ച്ബിഷപ് ഷീൻ, ആധുനിക മാധ്യമ സാങ്കേതികവിദ്യകളെ ദൈവവചന പ്രഘോഷണത്തിനായി എങ്ങനെ ഫലപ്രദമായി ഉപയോഗിക്കാമെന്നു ലോകത്തിനു കാണിച്ചുകൊടുത്തു.
റഫറൻസുകളോ ടെലിപ്രോംപ്റ്ററോ ഇല്ലാതെ, ഒരു ചോക്ക്ബോർഡ് മാത്രം ഉപയോഗിച്ച് സങ്കീർണമായ തത്വചിന്തകളും ദൈവവചനവും ലളിതമായി അവതരിപ്പിക്കാനുള്ള അദ്ദേഹത്തിന്‍റെ കഴിവ് ലോകശ്രദ്ധ നേടിയിരുന്നു.
International
പാരീസ്: ശാസ്ത്രത്തെയും നിർമിതബുദ്ധിയെയും ലാഭത്തിനുവേണ്ടി മാത്രം ഉപയോഗിക്കുന്ന പ്രവണത ആശങ്കാജനകമാണെന്ന് ലെയോ പതിനാലാമൻ മാർപാപ്പ. നാലു ദിവസത്തെ ഫ്രാൻസ് സന്ദർശനത്തിനായി പാരീസിലെത്തിയ മാർപാപ്പ എലീസി കൊട്ടാരത്തിൽ ഭരണാധികാരികളെയും നയതന്ത്ര പ്രതിനിധികളെയും സിവിൽ സമൂഹത്തെയും അഭിസംബോധന ചെയ്തു സംസാരിക്കുകയായിരുന്നു.
ജീനുകളിലെ മാറ്റങ്ങൾ, വാടകഗർഭധാരണം, അവയവക്കച്ചവടം, സ്വന്തം മരണം സ്വയം നിശ്ചയിക്കാനുള്ള അവസരമൊരുക്കൽ എന്നിവ പ്രോത്സാഹിപ്പിക്കുന്നതിലേക്ക് സാങ്കേതികവിദ്യ വഴിമാറരുതെന്ന് മാർപാപ്പ മുന്നറിയിപ്പ് നൽകി. യന്ത്രങ്ങളുടെ ലോകത്ത് മാനവികത നഷ്‌ടപ്പെടാതിരിക്കാൻ ധാർമികമായ തിരിച്ചറിവ് വളർത്തുന്ന വിദ്യാഭ്യാസം അത്യന്താപേക്ഷിതമാണെന്നും മാർപാപ്പ പറഞ്ഞു. മനുഷ്യജീവനെ പരസ്പര ബഹുമാനത്തോടെ സംരക്ഷിക്കുക എന്നത് ഏവരുടെയും കടമയാണെന്നും അദ്ദേഹം ഉദ്ബോ ധിപ്പിച്ചു.
സമീപകാലത്തു ഫ്രാൻസ് ദയാവധവും അപരസഹായ ത്തോടെയുള്ള സ്വയംഹത്യയും നിയമവിധേയമാക്കിയിരുന്നു. ബെൽജിയം, നെതർലാൻഡ്സ്, ലക്സംബർഗ്, സ്പെയിൻ എന്നിവയ്ക്കുശേഷം ഇതു നടപ്പിലാക്കുന്ന അഞ്ചാമത്തെ യൂറോപ്യൻ രാജ്യമാണ് ഫ്രാൻസ്. ഈ പശ്ചാത്തലത്തിലാണ് ജീവന്‍റെ സംരക്ഷണത്തിനായുള്ള മാർപാപ്പയുടെ ആഹ്വാനം.
ശക്തിയുടെ സന്തുലിതാവസ്ഥയല്ല സമാധാനമെന്നും അതു നീതിയിലൂടെയും സംവാദത്തിലൂടെയും നിർമിച്ചെടുക്കേണ്ടതാണെന്നും പറഞ്ഞ മാർപാപ്പ, ആണവായുധങ്ങൾ നിരോധിക്കണമെന്നും പശ്ചിമേഷ്യയിലെ യുദ്ധങ്ങൾ അവസാനിപ്പിക്കാൻ ഫ്രാൻസ് മുന്നിൽ നിൽക്കണമെന്നും അഭ്യർഥിച്ചു.
ഫ്രാൻസിലെ കടുത്ത മതനിരപേക്ഷതയെക്കുറിച്ച് പരാമർശിക്കവെ, യഥാർഥ മതനിരപേക്ഷത എന്നതു പൊതുമണ്ഡലത്തിൽനിന്ന് മതത്തെ ഒഴിവാക്കലല്ലെന്നും പൊതുനന്മയ്ക്കായി ഭരണകൂടവും മതസ്ഥാപനങ്ങളും തമ്മിൽ തുറന്ന സംവാദത്തിലേർപ്പെടുകയാണു വേണ്ടതെന്നും മാർപാപ്പ ചൂണ്ടിക്കാട്ടി. വിശുദ്ധ വിൻസെന്‍റ് ഡി പോളിന്‍റെ ജീവകാരുണ്യ പാരമ്പര്യം പിന്തുടർന്ന് ഫ്രഞ്ച് കത്തോലിക്കാ സമൂഹം നടത്തുന്ന സാമൂഹിക സേവനങ്ങളെ മാർപാപ്പ അഭിനന്ദിച്ചു.
നൂറ്റാണ്ടുകളായി ലോകത്തിന്‍റെ സംസ്കാരത്തിനും കലയ്ക്കും ചിന്തകൾക്കും വെളിച്ചം വീശിയ ഫ്രഞ്ച് പാരമ്പര്യത്തെ അദ്ദേഹം പ്രകീർത്തിച്ചു. ഫ്രഞ്ച് വിപ്ലവത്തിന്‍റെ പ്രഖ്യാപിത മുദ്രാവാക്യമായ ‘സ്വാതന്ത്ര്യം, സമത്വം, സാഹോദര്യം’ എന്നത് സുവിശേഷ സന്ദേശങ്ങളിൽനിന്ന് പ്രചോദനം ഉൾക്കൊള്ളുന്ന സാർവത്രിക ധാർമിക മൂല്യങ്ങളാണെന്ന് മാർപാപ്പ അനുസ്മരിച്ചു.
2019ലെ തീപിടിത്തത്തിൽ തകർന്ന നോത്ര് ദാം കത്തീഡ്രലിന്‍റെ പുനർനിർമാണം അദ്ഭുതകരമായ സാങ്കേതിക നേട്ടമാണെന്നു വിശേഷിപ്പിച്ച മാർപാപ്പ, അതിനായി പ്രവർത്തിച്ച ശില്പികളെയും വിദഗ്ധരെയും പ്രത്യേകം അഭിനന്ദിച്ചു. ‘തകർന്നുപോയെന്നു കരുതുന്ന ഒന്ന് പരസ്പര സഹകരണത്തിലൂടെ എങ്ങനെയെല്ലാം പുനർജനിക്കാം എന്നതിന്‍റെ തെളിവാണ് നോത്ര് ദാമിന്‍റെ പുനരുത്ഥാനം’ -മാർപാപ്പ കൂട്ടിച്ചേർത്തു.
International
വത്തിക്കാന്‍ സിറ്റി: ആഫ്രിക്കന്‍രാജ്യമായ സൊമാലിയ നേരിടുന്ന കടുത്ത മാനുഷിക പ്രതിസന്ധി അവസാനിക്കാന്‍ പ്രാര്‍ഥിച്ച് ലെയോ പതിനാലാമന് മാര്‍പാപ്പ.
ഇന്നലെ സെന്‍റ് പീറ്റേഴ്സ് ചത്വരത്തില്‍ ത്രികാലജപത്തിനിടെയായിരുന്നു മാര്‍പാപ്പ സൊമാലിയയുടെ യാതനകള്‍ അനുസ്മരിച്ചത്. സംഘര്‍ഷവും കൊടും വരള്‍ച്ചയും അസ്ഥിരമായ സൊമാലിയന്‍ ജനജീവിതത്തെ കൂടുതല്‍ ദുരിതമയമാക്കുന്നുവെന്നു മാര്‍പാപ്പ പറഞ്ഞു.
സൊമാലിയയ്ക്ക് സഹായമെത്തിക്കാന്‍ അന്താരാഷ് ട്ര സമൂഹം മുന്നോട്ടുവരുമെന്ന് അദ്ദേഹം പ്രത്യാശ പ്രകടിപ്പിച്ചു. ഏതാനും മാസമായി വിവിധ യുഎന്‍ ഏജന്‍സികള്‍ സൊമാലിയയ്ക്കുള്ള സഹായം വെട്ടിക്കുറച്ച സ്ഥിതിയാണുള്ളത്.
ബഹുഭൂരിപക്ഷം ജനങ്ങളും ഇസ്‌ലാം മതവിശ്വാസികളായ രാജ്യമാണു സൊമാലിയ. 1991ല് മുഹമ്മദ് സിയാഗ് ബാരെ അധികാരഭ്രഷ്ടനായശേഷം ആഭ്യന്തരകലഹത്തിന്‍റെ പിടിയിലാണ് രാജ്യം. ഇസ്‌ലാമിക തീവ്രവാദികള്‍ സൊമാലിയയില്‍ സമാന്തരഭരണം നടത്തിവരികയാണ്.
International
പാരീസ്: ഫ്രാൻസ് സന്ദർശനത്തിന്‍റെ ഭാഗമായി പാരീസിൽ ലെയോ പതിനാലാമൻ മാർപാപ്പ അർപ്പിക്കുന്ന വിശുദ്ധ കുർബാനയിൽ പങ്കെടുക്കാൻ റിക്കാർഡ് രജിസ്ട്രേഷൻ.
പാരീസിലെ പ്ലേസ് ഡി ലാ കോൺകോർഡിലും ഷാംപ്സ് എലിസേയിലുമായി നടക്കുന്ന വിശുദ്ധ കുർബാനയിലേക്ക് ഇതുവരെ ആറുലക്ഷത്തോളം വിശ്വാസികൾ രജിസ്റ്റർ ചെയ്തതായി സംഘാടകർ അറിയിച്ചു.
തീർഥാടകരുടെ എണ്ണം പ്രതീക്ഷിച്ചതിലും വളരെ ഉയർന്നതോടെ തിരക്ക് നിയന്ത്രിക്കുന്നതിനായി സ്ഥലവിസ്തൃതി കൂട്ടാനും പ്രവേശനമേഖലകൾ വിപുലീകരിക്കാനും പാരീസ് രൂപതയും സുരക്ഷാ വിഭാഗവും തീരുമാനിച്ചു.
പ്ലേസ് ഡി ലാ കോൺകോർഡിനും ഷാംപ്സ് എലിസേയ്ക്കും പുറമെ സമീപ പ്രദേശങ്ങളിലേക്കും പ്രവേശന സോണുകൾ വികസിപ്പിച്ചാണ് സുരക്ഷാ ക്രമീകരണങ്ങൾ ശക്തമാക്കുന്നത്. ഈ മാസം 25 മുതൽ 28 വരെയാണു മാർപാപ്പയുടെ ഫ്രാൻസ് സന്ദർശനം. 26നാണ് മാർപാപ്പ പാരീസിൽ വിശുദ്ധ കുർബാന അർപ്പിക്കുന്നത്. 18 വർഷത്തിനുശേഷമാണ് ഒരു മാർപാപ്പ ഫ്രഞ്ച് മണ്ണിലെത്തുന്നത്.
അതിനാൽത്തന്നെ വലിയ ആവേശത്തോടെയാണ് സർക്കാരും രാജ്യത്തെ ജനതയും ഈ സന്ദർശനത്തെ കാണുന്നത്. പാരീസിനുപുറമെ ലൂർദ്, മെറ്റ്സ് നഗരങ്ങളും മാർപാപ്പ സന്ദർശിക്കും. മരിയൻ തീർഥാടനകേന്ദ്രമായ ലൂർദിൽ നടക്കുന്ന വിശുദ്ധ കുർബാനയിലേക്കും കനത്ത രജിസ്ട്രേഷനാണു രേഖപ്പെടുത്തുന്നത്.
International
വത്തിക്കാൻ സിറ്റി: ലെയോ പതിനാലാമൻ മാർപാപ്പയുടെ സ്വകാര്യ കുറിപ്പുകളും പ്രസംഗങ്ങളും അടങ്ങിയ "ഫ്രീഡം അണ്ടർ ഗ്രേസ്: റിഫ്ലക്‌ഷൻസ് ഓൺ ദ സ്പിരിച്വൽ ട്രഡിഷൻ ദാറ്റ് ഫോംഡ് മീ' എന്ന പുസ്തകത്തിന്‍റെ ഇംഗ്ലീഷ് പതിപ്പ് പുറത്തിറങ്ങി.
യുഎസ്, യുകെ, ഓസ്‌ട്രേലിയ ഉൾപ്പടെയുള്ള രാജ്യങ്ങളിൽ പുസ്തകം വില്പനയ്‌ക്കെത്തി. വത്തിക്കാൻ പബ്ലിഷിംഗ് ഹൗസ് "ലീബെരി സൊത്തോ ലാ ഗ്രാസിയ' എന്നപേരിൽ മുന്പ് പ്രസിദ്ധീകരിച്ച ഇറ്റാലിയൻ പതിപ്പിന്‍റെ ഇംഗ്ലീഷ് പരിഭാഷയാണിത്.
തന്‍റെ ആത്മീയജീവിതത്തെയും ലോകവീക്ഷണത്തെയും സ്വാധീനിച്ച വിശുദ്ധ അഗസ്റ്റിന്‍റെ പാരമ്പര്യത്തെക്കുറിച്ചുള്ള മാർപാപ്പയുടെ ചിന്തകളാണ് പുസ്തകത്തിന്‍റെ പ്രധാന പ്രമേയം.
അഗസ്റ്റീനിയൻ സന്യാസസമൂഹത്തിന്‍റെ പ്രിയോർ ജനറലായിരുന്ന കാലത്തെ ധ്യാനങ്ങൾ, പ്രസംഗങ്ങൾ, വ്യക്തിഗത കുറിപ്പുകൾ എന്നിവയാണ് പുസ്തകത്തിലുള്ളത്. 9/11 ഭീകരാക്രമണം, രാഷ്‌ട്രീയ പ്രത്യയശാസ്ത്രങ്ങൾ, ദാരിദ്ര്യം, മനുഷ്യാവകാശ പ്രശ്നങ്ങൾ എന്നിവയോടുള്ള സഭയുടെ പ്രതികരണങ്ങൾ പുസ്തകത്തിൽ ചർച്ച ചെയ്യുന്നു.
പ്രശസ്ത ഹാസ്യനടൻ സ്റ്റീഫൻ കോൾബെർട്ട്, പ്രമുഖ നറേറ്റർ സ്‌കോട്ട് ബ്രിക്ക് എന്നിവരാണ് പുസ്തകത്തിന്‍റെ ഓഡിയോ പതിപ്പിന് ശബ്ദം നൽകിയിരിക്കുന്നത്.
International
വത്തിക്കാൻ സിറ്റി: സെപ്റ്റംബർ 11 ഭീകരാക്രമണത്തിന്‍റെ 25-ാം വാർഷികവേളയിൽ, ദുരന്തത്തിൽ ജീവൻ പൊലിഞ്ഞവർക്കായി പ്രാർഥിച്ചും ലോകസമാധാനത്തിനായി ആഹ്വാനം ചെയ്തും ലെയോ പതിനാലാമൻ മാർപാപ്പ.
വത്തിക്കാനിലെ സെന്‍റ് പീറ്റേഴ്സ് ചത്വരത്തിൽ നടന്ന ത്രികാല പ്രാർഥനയ്ക്കുശേഷം വിശ്വാസികളെ അഭിസംബോധന ചെയ്യുകയായിരുന്നു അദ്ദേഹം.
ദുരന്തത്തിൽ ജീവൻ നഷ്‌ടപ്പെട്ടവർക്കായും മുറിവുകൾ ഇപ്പോഴും പേറുന്നവർക്കായും തന്‍റെ പ്രാർഥനകൾ പുതുക്കുന്നുവെന്നും വ്യക്തമാക്കി. തുടർന്ന് ലോകസമാധാനത്തിനായി അടിയന്തര പ്രാർഥനാ ആഹ്വാനവും അദ്ദേഹം നടത്തി.
International
വത്തിക്കാൻ സിറ്റി: യുക്രെയ്നിൽ തുടരുന്ന ആക്രമണസംഭവങ്ങൾ അടിയന്തരമായി അവസാനിപ്പിക്കണമെന്ന് വീണ്ടും ആഹ്വാനം ചെയ്ത് ലെയോ പതിനാലാമൻ മാർപാപ്പ.
യുക്രേനിയൻ നഗരങ്ങൾക്കുനേരേ നടക്കുന്ന ശക്തമായ ആക്രമണങ്ങളെക്കുറിച്ചുള്ള വാർത്തകൾ ‘തകരുന്ന ഹൃദയത്തോടെയാണ്’താൻ കാണുന്നതെന്ന് ഇന്നലെ ത്രികാല പ്രാർഥനയ്ക്കുശേഷം തീർഥാടകരെ അഭിസംബോധന ചെയ്യവെ മാർപാപ്പ പറഞ്ഞു.
വർഷങ്ങളായി ഭയത്തിലും ഭീതിയിലും കഴിയുന്ന ആ ജനതയുടെ കഷ്‌ടപ്പാടുകൾ കാണുമ്പോൾ തന്‍റെ ഹൃദയം തകരുകയാണെന്നു പറഞ്ഞ മാർപാപ്പ, അക്രമവും നശീകരണവും അവസാനിപ്പിച്ച് സമാധാനത്തിന്‍റെ പാതയിലേക്ക് മനസ് തുറക്കണമെന്നും അഭ്യർഥിച്ചു.
International
വത്തിക്കാൻ സിറ്റി: മിന്നൽപ്രളയത്തിൽ കടുത്ത ദുരിതം നേരിടുന്ന നേപ്പാളിന് ആശ്വാസവുമായി ലെയോ പതിനാലാമൻ മാർപാപ്പ. ദുരന്തബാധിതരായ ജനങ്ങൾക്ക് ആവശ്യമായ അടിയന്തര സഹായങ്ങൾ മാർപാപ്പ കൈമാറി. വത്തിക്കാന്‍റെ കാരുണ്യ പ്രവർത്തനങ്ങൾക്കായുള്ള കാര്യാലയം വഴിയാണ് സാമ്പത്തികസഹായം എത്തിച്ചത്.
നേപ്പാളിലുണ്ടായ പ്രകൃതിദുരന്തത്തിൽ അതീവ ദുഃഖവും പ്രാർഥനകളും അറിയിച്ചുകൊണ്ട് മാർപാപ്പ ടെലിഗ്രാം സന്ദേശം അയച്ചിരുന്നു. ഇതിനുപിന്നാലെയാണ് അപ്പസ്തോലിക് നുൺഷ്യേച്ചറുമായി സഹകരിച്ച് ജനങ്ങളുടെ അടിയന്തര ആവശ്യങ്ങൾക്കായി സാമ്പത്തിക സഹായം നൽകിയത്. ദുരിതബാധിതർക്കു ഭക്ഷണം, താത്കാലിക പാർപ്പിടം, മറ്റ് അടിസ്ഥാന സൗകര്യങ്ങൾ എന്നിവ ഉറപ്പാക്കാൻ ഈ തുക വിനിയോഗിക്കും.
ഏറ്റവും ദുർബലരായ ജനങ്ങളോട് മാർപാപ്പയ്ക്കുള്ള സാമീപ്യത്തിന്‍റെയും സഭ അവരെ ചേർത്തുപിടിക്കുന്നു എന്നതിന്‍റെയും പ്രകടമായ തെളിവാണ് ഈ സഹായമെന്ന് കാരുണ്യ പ്രവർത്തനങ്ങൾക്കായുള്ള കാര്യാലയം അധ്യക്ഷൻ ആർച്ച്ബിഷപ് ലൂയിസ് മാരിൻ ഡി സാൻ മാർട്ടിൻ പറഞ്ഞു.
ഇറ്റാലിയൻ മെത്രാൻ സമിതിയും നേപ്പാളിന് സഹായവുമായി രംഗത്തെത്തിയിട്ടുണ്ട്. ദുരിതാശ്വാസ പ്രവർത്തനങ്ങൾക്കായി സമിതി അഞ്ചു ലക്ഷം യൂറോ അനുവദിച്ചു.
International
വത്തിക്കാൻ: പ്രാർഥനയും സാമൂഹിക നീതിക്കുവേണ്ടിയുള്ള പ്രവർത്തനങ്ങളും പരസ്പര പൂരകങ്ങളും വേർപിരിക്കാനാവാത്തതുമാണെന്ന വിശുദ്ധ വിൻസെന്‍റ് ഡി പോളിന്‍റെ പഠനങ്ങളെ അനുസ്മരിപ്പിച്ച് ലെയോ പതിനാലാമൻ മാർപാപ്പ.
അമേരിക്കയിലെ സെന്‍റ് വിൻസെന്‍റ് ഡി പോൾ സൊസൈറ്റിയിൽ നിന്നുള്ള പ്രതിനിധി സംഘവുമായി നടത്തിയ കൂടിക്കാഴ്ചയിലായിരുന്നു മാർപാപ്പ ഇക്കാര്യം അനുസ്മരിച്ചത്.
പാവപ്പെട്ടവരെ സംരക്ഷിക്കുന്നത് ക്രിസ്തുവിൽ അധിഷ്ഠിതമാണെന്നും അവരെ സേവിക്കുന്നവരോട് ദൈവം എപ്പോഴും ഉദാരമനസ്കനായിരിക്കുമെന്നുമുള്ള വിശുദ്ധ അഗസ്റ്റിന്‍റെ പഠനവും മാർപാപ്പ ഉദ്ധരിച്ചു.
പാവപ്പെട്ടവരിൽ ക്രിസ്തുവിനെ സേവിക്കുന്നതിലൂടെ, ദൈവകൃപ നിങ്ങളുടെ ഹൃദയങ്ങളെയും മനസുകളെയും ശുദ്ധീകരിക്കുമെന്നും മാർപാപ്പ പറഞ്ഞു.
International
വത്തിക്കാൻ സിറ്റി: പ്രാദേശിക പാരമ്പര്യങ്ങളുടെ അനുയോജ്യമായ കൂടിച്ചേരലുകൾ പ്രോത്സാഹിപ്പിക്കുന്നതോടൊപ്പം തന്നെ കത്തോലിക്കാസഭയുടെ പവിത്രമായ സംഗീതപാരമ്പര്യം വരുംതലമുറകൾക്കായി സംരക്ഷിക്കപ്പെടണമെന്നു ലെയോ പതിനാലാമൻ മാർപാപ്പ.
ആരാധനക്രമത്തിൽ വിശുദ്ധ സംഗീതത്തിന് വലിയ പ്രാധാന്യമുണ്ടെന്നും വത്തിക്കാനിലെ സെന്‍റ് പീറ്റേഴ്സ് ബസിലിക്കയിൽ നടന്ന പ്രതിവാര കൂടിക്കാഴ്ചയിൽ വിശ്വാസികളെ അഭിസംബോധന ചെയ്യവേ മാർപാപ്പ വ്യക്തമാക്കി.
രണ്ടാം വത്തിക്കാൻ കൗൺസിലിന്‍റെ ‘സാക്രോസാങ്തം കോൺസിലിയം’ എന്ന പ്രമാണരേഖയെ ആസ്പദമാക്കിയുള്ള പ്രബോധന പരമ്പരയുടെ ഭാഗമായാണ് മാർപാപ്പ വിശുദ്ധ സംഗീതത്തിന്‍റെ പ്രാധാന്യത്തെക്കുറിച്ച് വിശദീകരിച്ചത്.
"പാടുന്നത് സ്‌നേഹിക്കുന്നവരുടെ ലക്ഷണമാണ്'' എന്ന വിശുദ്ധ അഗസ്റ്റിന്‍റെ വാക്കുകൾ ഉദ്ധരിച്ച മാർപാപ്പ, സംഗീതം വിശ്വാസികൾക്കിടയിൽ ഐക്യവും ദൈവസ്തുതിയും വളർത്തുന്നുവെന്നും ചൂണ്ടിക്കാട്ടി.
സഭയുടെ സംഗീതപാരമ്പര്യത്തിന് വലിയ വിലയുണ്ട്. ഗ്രിഗോറിയൻ സംഗീതത്തിനും പൈപ്പ് ഓർഗനും ആരാധനക്രമത്തിൽ പ്രത്യേക സ്ഥാനമുണ്ട്. എങ്കിലും പ്രാദേശികവും അനുയോജ്യവുമായ മറ്റ് വാദ്യോപകരണങ്ങളും സംഗീതരൂപങ്ങളും ഉപയോഗിക്കാമെന്നും മാർപാപ്പ കൂട്ടിച്ചേർത്തു.
International
വത്തിക്കാൻ സിറ്റി: വെസ്റ്റ് ബാങ്കിലെ പലസ്തീൻ ജനതയ്‌ക്കെതിരേ തുടർച്ചയായുണ്ടാകുന്ന അക്രമങ്ങൾ ഉടനടി അവസാനിപ്പിക്കണമെന്ന് ലെയോ പതിനാലാമൻ മാർപാപ്പ. ഇന്നലെ സെന്‍റ് പീറ്റേഴ്സ് ചത്വരത്തിൽ ത്രികാല പ്രാർഥനയ്ക്കുശേഷം തീർഥാടകരെ അഭിസംബോധന ചെയ്യുകയായിരുന്നു മാർപാപ്പ.
മേഖലയിൽ ശാശ്വത സമാധാനം ഉറപ്പാക്കാൻ ‘ദ്വിരാഷ്‌ട്ര പരിഹാരം’നടപ്പിലാക്കുന്നതിന് അന്താരാഷ്‌ട്ര സമൂഹം മുൻകൈയെടുക്കണമെന്നും മാർപാപ്പ ആവശ്യപ്പെട്ടു.
ഇസ്രയേലും പലസ്തീനും അന്താരാഷ്‌ട്രതലത്തിൽ അംഗീകരിക്കപ്പെട്ട അതിർത്തികൾക്കുള്ളിൽ സമാധാനത്തിലും സുരക്ഷിതത്വത്തിലും കഴിയുന്ന ദ്വിരാഷ്‌ട്ര പരിഹാരമാണു മേഖലയിലെ പ്രശ്നങ്ങൾക്ക് ഏക പരിഹാരമെന്ന വത്തിക്കാന്‍റെ നിലപാട് മാർപാപ്പ വീണ്ടും വ്യക്തമാക്കിയിരിക്കുകയാണ്.
ബലപ്രയോഗത്തിലൂടെയല്ല, മറിച്ച് സംഭാഷണങ്ങളിലൂടെയും സഹകരണത്തിലൂടെയും മാത്രമേ ശാശ്വത സമാധാനം സാധ്യമാകൂവെന്നും മാർപാപ്പ ഓർമിപ്പിച്ചു.
International
വത്തിക്കാൻ സിറ്റി: വിശുദ്ധ കുർബാന അർപ്പിക്കുമ്പോൾ കത്തോലിക്കാസഭയുടെ ആരാധനക്രമങ്ങളും നിർദേശങ്ങളും വൈദികർ കൃത്യമായി പാലിക്കണമെന്നു ലെയോ പതിനാലാമൻ മാർപാപ്പ.
വിശുദ്ധ കുർബാന കൃത്യമായ ആദരവോടെയും അന്തസോടെയും അർപ്പിക്കുന്നതിനായി അതിന്‍റെ ടെക്സ്റ്റും നിർദേശങ്ങളും വൈദികർ കൃത്യമായി പാലിക്കണമെന്നും അതിനായി അവർക്കു ശരിയായ പരിശീലനം ലഭിക്കേണ്ടതുണ്ടെന്നും മാർപാപ്പ വ്യക്തമാക്കി.
അമേരിക്കയിലെ ഓറിഗണിലെ മൗണ്ട് ആഞ്ചൽ ആബിയിൽ ലിറ്റർജി പരിശീലനത്തെക്കുറിച്ച് നടക്കുന്ന സമ്മേളനത്തിനു മുന്നോടിയായി വത്തിക്കാനിലെ ആരാധനക്രമ കാര്യാലയം അധ്യക്ഷൻ കർദിനാൾ ആർതർ റോച്ചിന് അയച്ച കത്തിലാണ് മാർപാപ്പ ഇക്കാര്യം വ്യക്തമാക്കിയത്.
വിശുദ്ധ പോൾ ആറാമൻ, വിശുദ്ധ ജോൺ പോൾ രണ്ടാമൻ എന്നിവർ നിഷ്കർഷിച്ചിട്ടുള്ള വിശുദ്ധ കുർബാനക്രമങ്ങളെ വൈദികർ പൂർണമായി ബഹുമാനിക്കണം. ദൈവത്തോടുള്ള വിനയത്തിലും സഭാ കൂട്ടായ്മയോടുള്ള വിശ്വസ്തതയിലുമാണ് ഈ ആദരവ് അടിസ്ഥാനപ്പെട്ടിരിക്കുന്നത്-മാർപാപ്പ പറഞ്ഞു.
വെർച്വൽ/ഓൺലൈൻ കൂടിച്ചേരലുകൾക്ക് നേരിട്ടുള്ള ഞായറാഴ്ച കുർബാനയ്ക്കു പകരമാകാൻ കഴിയില്ലെന്ന് കഴിഞ്ഞ 12ലെ പൊതുകൂടിക്കാഴ്ചയിൽ മാർപാപ്പ ഓർമിപ്പിച്ചിരുന്നു.
14ന് ആരംഭിച്ച് 19വരെ നടക്കുന്ന ആഗോള സമ്മേളനത്തിൽ കർദിനാൾമാർ, മെത്രാന്മാർ, അല്മായ പ്രതിനിധികൾ തുടങ്ങിയവർ പങ്കെടുക്കുന്നുണ്ട്.
International
വത്തിക്കാൻ സിറ്റി: ലെയോ പതിനാലാമൻ മാർപാപ്പ അടുത്തമാസം 25 മുതൽ 28 വരെ ഫ്രാൻസിൽ സന്ദർശനം നടത്തും. 2008ൽ ബെനഡിക്ട് പതിനാറാമൻ മാർപാപ്പ നടത്തിയ സന്ദർശനത്തിന് 18 വർഷങ്ങൾക്കുശേഷമാണ് ഒരു മാർപാപ്പ ഫ്രഞ്ച് മണ്ണിലെത്തുന്നത്.
‘ലോകത്തിനു ജീവൻ ഉണ്ടാകേണ്ടതിന്’ എന്ന പ്രമേയമാണ് അപ്പസ്തോലിക് സന്ദർശനത്തിനു നൽകിയിരിക്കുന്നത്. വിശുദ്ധ യോഹന്നാന്‍റെ സുവിശേഷത്തിലെ (6:51) വചനത്തെ അടിസ്ഥാനമാക്കിയാണ് യാത്രയുടെ പ്രമേയം തെരഞ്ഞെടുത്തിരിക്കുന്നത്.
25ന് പാരീസിലെത്തുന്ന മാർപാപ്പ ഫ്രഞ്ച് പ്രസിഡന്‍റ്, സർക്കാർ പ്രതിനിധികൾ എന്നിവരുമായി കൂടിക്കാഴ്ച നടത്തും. തുടർന്ന് പാരീസിലെ യുനെസ്കോ ആസ്ഥാനം സന്ദർശിക്കുന്ന മാർപാപ്പ ഉദ്യോഗസ്ഥരെ അഭിസംബോധന ചെയ്യും.
നോത്റ് ദാം കത്തീഡ്രലിൽ സായാഹ്ന പ്രാർഥന, സെന്‍റ് ഡെനീസ് സ്റ്റേഡിയത്തിൽ യുവജന പ്രാർഥനാ സമ്മേളനം, ‘ബകിത ഭവനം’ എന്ന കുടിയേറ്റകേന്ദ്ര സന്ദർശനം എന്നിവയ്ക്കുശേഷം കോൺകോർഡ് ചത്വരത്തിൽ വിശുദ്ധകുർബാന അർപ്പിക്കും.
26ന് രാവിലെ പാരീസിൽ വിവിധ പരിപാടികൾക്കും വിശുദ്ധ കുർബാനയ്ക്കുംശേഷം വൈകുന്നേരം ലോകപ്രശസ്ത മരിയൻ തീർഥാടനകേന്ദ്രമായ ലൂർദിൽ എത്തുന്ന മാർപാപ്പ അവിടെ പ്രത്യേക പ്രാർഥന നടത്തും.
27ന് രാവിലെ ഫ്രഞ്ച് മെത്രാൻ സമിതി അംഗങ്ങളുമായി കൂടിക്കാഴ്ച നടത്തുകയും വിശുദ്ധകുർബാന അർപ്പിക്കുകയും ചെയ്യും. രാത്രിയിൽ ലൂർദ് മാതാവിന്‍റെ തീർഥാടനകേന്ദ്രത്തിലെ മെഴുകുതിരി പ്രദക്ഷിണത്തിലും പ്രാർഥനകളിലും പങ്കെടുക്കും.
സന്ദർശനത്തിന്‍റെ അവസാനദിനമായ 28ന് മെറ്റ്സ് നഗരം സന്ദർശിക്കുന്ന മാർപാപ്പ, റോബർട്ട് ഷൂമാൻ കോൺഫറൻസ് ഹാളിൽ മതാന്തര സമ്മേളനത്തെ അഭിസംബോധന ചെയ്യും. സെന്‍റ് സ്റ്റീഫൻസ് കത്തീഡ്രലിൽ വിശുദ്ധകുർബാന അർപ്പിച്ചശേഷം റോമിലേക്ക് മടങ്ങും.
International
വത്തിക്കാൻ സിറ്റി: സുഡാൻ, യുക്രെയ്ൻ, റഷ്യ എന്നിവിടങ്ങളിൽ തുടരുന്ന അക്രമങ്ങളിൽ കടുത്ത ആശങ്ക രേഖപ്പെടുത്തി ലെയോ പതിനാലാമൻ മാർപാപ്പ.
അക്രമങ്ങൾ വിതയ്ക്കുന്നവരുടെ മനസിന് മാറ്റമുണ്ടാകണമെന്നും നിരപരാധികളായ സാധാരണക്കാർ കൊല്ലപ്പെടുന്നത് അടിയന്തരമായി അവസാനിപ്പിക്കണമെന്നും ഇന്നലെ സെന്‍റ് പീറ്റേഴ്സ് ചത്വരത്തിൽ ത്രികാല ജപ പ്രാർഥനയ്ക്കുശേഷം തീർഥാടകരെ അഭിസംബോധന ചെയ്യവെ മാർപാപ്പ ആവശ്യപ്പെട്ടു.
‘യുദ്ധം കൂടുതൽ യുദ്ധങ്ങളെയല്ലാതെ മറ്റൊന്നും സൃഷ്‌ടിക്കില്ല. അത് അളവറ്റ ദുരിതങ്ങൾക്കു കാരണമാകുന്നു. അക്രമത്തിന്‍റെ ഈ ദുരന്തചക്രം അവസാനിപ്പിച്ച് സമാധാനത്തിനായി നയതന്ത്രത്തിനും സംഭാഷണങ്ങൾക്കും വഴിതുറക്കേണ്ട സമയമാണിത്-മാർപാപ്പ പറഞ്ഞു.
സുഡാനിൽ അടിയന്തര വെടിനിർത്തൽ പ്രാബല്യത്തിൽ വരുത്താനുള്ള പരിശ്രമങ്ങൾക്ക് പിന്തുണ നൽകാൻ രാജ്യാന്തരസമൂഹത്തോട് മാർപാപ്പ ആവശ്യപ്പെട്ടു.
യുക്രെയ്നിലും റഷ്യയിലും വർധിച്ചുവരുന്ന സാധാരണക്കാരുടെ മരണങ്ങളിൽ ആശങ്ക രേഖപ്പെടുത്തിയ മാർപാപ്പ, ഇരുവിഭാഗവും സാധാരണക്കാരെ ലക്ഷ്യമിട്ടുള്ള ആക്രമണങ്ങൾ അവസാനിപ്പിക്കണമെന്നും ആവശ്യപ്പെട്ടു.
International
അസീസി: സ്വാർഥതയും അക്രമവും നിറഞ്ഞ ലോകത്തു ഭയത്തെയും നിരാശയെയും അതിജീവിച്ചു സ്നേഹത്തിന്‍റെ പുതിയ സംസ്കാരം പടുത്തുയർത്താൻ ലെയോ മാർപാപ്പയുടെ ആഹ്വാനം.
ഇറ്റലിയിലെ അസീസിയിൽ സംഘടിപ്പിച്ച ‘ഗോ! 2026’ ഫ്രാൻസിസ്കൻ യുവജനസമ്മേളനത്തിന്‍റെ ഭാഗമായി സാന്താ മരിയ ദെല്ലി ആഞ്ചലി (മാലാഖമാരുടെ രാജ്ഞിയായ മറിയത്തിന്‍റെ) പള്ളിയിൽ വിശുദ്ധ കുർബാനമധ്യേ സന്ദേശം നൽകുകയായിരുന്നു മാർപാപ്പ.
സമൂഹത്തിലെ പാർശ്വവത്കരിക്കപ്പെട്ട മേഖലകളിലേക്ക് ഇറങ്ങിച്ചെല്ലാനും പീഡിപ്പിക്കപ്പെടുന്നവരുടെ മുറിവുകളിൽ ആശ്വാസമേകാനും അദ്ദേഹം യുവാക്കളോട് ആവശ്യപ്പെട്ടു.
“നീതിനിഷേധം മൂലം സാധാരണക്കാരുടെ സ്വപ്നങ്ങൾ തകർക്കപ്പെടുന്ന ഇടങ്ങളിലേക്ക് നിങ്ങൾ കടന്നുചെല്ലണം. ഭയവും നിരാശയും ഉപേക്ഷിച്ച്, ദൈവവചനത്തിൽ വിശ്വസിച്ച് ഈ യുഗത്തിലെ പുതിയ വിശുദ്ധരാകാൻ നിങ്ങൾ ധൈര്യം കാണിക്കണം. ഭയവും അജ്ഞതയുമാണ് മനുഷ്യർക്കിടയിൽ വേലിക്കെട്ടുകളും വർഗീയതയും സൃഷ്‌ടിക്കുന്നത്.
മതം രാഷ്‌ട്രീയലാഭങ്ങൾക്കായി ചൂഷണം ചെയ്യപ്പെടരുത്” -മാർപാപ്പ പറഞ്ഞു. ഫ്രാൻസിസ്കൻ സന്യാസ സമൂഹത്തിന്‍റെ ആത്മീയകേന്ദ്രമായ പോർസ്യുങ്കുളയിൽ നടന്ന പ്രാർഥനകൾക്കുശേഷമാണ് മാർപാപ്പ വത്തിക്കാനിലേക്കു മടങ്ങിയത്.
International
വത്തിക്കാൻ സിറ്റി: ലെയോ പതിനാലാമൻ മാർപാപ്പ നവംബർ മാസത്തിൽ ലാറ്റിൻ അമേരിക്കൻ രാജ്യങ്ങളായ ഉറുഗ്വേ, അർജന്‍റീന, പെറു എന്നിവിടങ്ങളിൽ സന്ദർശനം നടത്തും.
നവംബർ ആറു മുതൽ 17 വരെ 11 ദിവസം നടക്കുന്ന പര്യടനത്തിൽ 10 പ്രമുഖ നഗരങ്ങൾ മാർപാപ്പ സന്ദർശിക്കുമെന്ന് വത്തിക്കാൻ പ്രസ് ഓഫീസ് അറിയിച്ചു. സഭാധ്യക്ഷനായശേഷമുള്ള അദ്ദേഹത്തിന്‍റെ ആറാമത്തെ അന്താരാഷ്‌ട്ര പര്യടനമാണിത്.
നവംബർ ആറുമുതൽ എട്ടുവരെ ഉറുഗ്വെയിലെ മോന്തെവീദെയോ, പൈസാണ്ടു, ഫ്ലോറിഡ എന്നീ നഗരങ്ങൾ സന്ദർശിക്കും. എട്ടു മുതൽ 11 വരെയാണ് അർജന്‍റീനയിലെ സന്ദർശനം. ബുവേനോസ് ഐറിസ്, കോർഡോബ, ലുഹാൻ എന്നിവിടങ്ങൾ സന്ദർശിക്കും.
ദിവംഗതനായ ഫ്രാൻസിസ് മാർപാപ്പയുടെ ജന്മദേശമാണ് അർജന്‍റീന. അദ്ദേഹത്തിന് തന്‍റെ 13 വർഷത്തെ ഭരണകാലത്തിനിടയിൽ സ്വന്തം നാട് സന്ദർശിക്കാൻ സാധിച്ചിരുന്നില്ല. ഏകദേശം 40 വർഷങ്ങൾക്കു ശേഷമാണ് ഒരു മാർപാപ്പ അർജന്‍റീനയിലെത്തുന്നത്.
നവംബർ 11ന് പെറുവിലെത്തുന്ന ലെയോ മാർപാപ്പ ലിമ, ചിക്ലായോ, കുസ്കോ, പുക്കാൽപ എന്നീ നഗരങ്ങൾ സന്ദർശിക്കും. അമേരിക്കയിൽ ജനിച്ച ആദ്യ മാർപാപ്പയായ ലെയോ പതിനാലാമന് പെറുവുമായി ദീർഘകാലത്തെ അടുത്ത ബന്ധമുണ്ട്.
1985ൽ ഒരു മിഷനറിയായി പെറുവിലെത്തിയ അദ്ദേഹം പിന്നീട് ചിക്ലായോ രൂപതയുടെ ബിഷപ്പായി 2015 മുതൽ 2023 വരെ സേവനമനുഷ്ഠിച്ചിരുന്നു.
പെറുവിലെ പൗരത്വം കൂടിയുള്ള മാർപാപ്പ, നേരത്തേ അവിടെ ഭരണത്തിലിരുന്ന ആൽബർട്ടോ ഫുജിമോറിയുടെ കാലഘട്ടത്തിലെ മനുഷ്യാവകാശ ലംഘനങ്ങൾക്കെതിരേയും അദ്ദേഹത്തിനു നൽകിയ മാപ്പിനെതിരേയും ബിഷപ്പായിരിക്കെ പരസ്യമായി നിലപാടെടുത്തിരുന്നു.
ഈവർഷം സെപ്റ്റംബർ 25 മുതൽ 28 വരെ മാർപാപ്പ ഫ്രാൻസ് സന്ദർശിക്കും.
International
സരാജെവോ: താത്കാലിക സന്തോഷങ്ങളുടെ വ്യാമോഹങ്ങളിൽ വീണുപോകാതെ നമ്മെ സ്വതന്ത്രരാക്കുന്ന സത്യം ആത്മാർഥമായി അന്വേഷിക്കാൻ യുവജനങ്ങളോടു മാർപാപ്പയുടെ ആഹ്വാനം.
പെട്ടെന്നു ലഭിക്കുന്ന താത്കാലിക സന്തോഷങ്ങളുടെ വാഗ്ദാനങ്ങൾ ആകർഷകമായി തോന്നാമെങ്കിലും മനസിൽ ശാശ്വതമായ ഒരു മുദ്രയും പതിപ്പിക്കാതെ അവ പെട്ടെന്ന് അപ്രത്യക്ഷമാകുന്നുവെന്ന് മാർപാപ്പ ചൂണ്ടിക്കാട്ടി.
തെക്കുകിഴക്കൻ യൂറോപ്യൻ രാജ്യമായ ബോസ്നിയ ആൻഡ് ഹെർസഗോവിനയിലെ മരിയൻ തീർഥാടനകേന്ദ്രമായ മെഡ്ജുഗൊറെയിൽ സംഘടിപ്പിച്ച അന്താരാഷ്‌ട്ര യുവജനസമ്മേളനത്തിൽ സന്ദേശം നൽകുകയായിരുന്നു മാർപാപ്പ.
പരിശുദ്ധാത്മാവിനാൽ നയിക്കപ്പെടാൻ സ്വയം വിട്ടുകൊടുക്കാനും പരിശുദ്ധ അമ്മയുടെ മധ്യസ്ഥതയിൽ അഭയം തേടാനും ആഹ്വാനം ചെയ്തുകൊണ്ടാണ് മാർപാപ്പ സന്ദേശം അവസാനിപ്പിച്ചത്. അങ്ങനെ സുവിശേഷത്തിന്‍റെ പ്രകാശമാനമായ സാക്ഷികളാകാനും സാഹോദര്യത്തിന്‍റെ വക്താക്കളാകാനും സമൂഹത്തിൽ സമാധാനം കെട്ടിപ്പടുക്കുന്നവരാകാനും യുവാക്കൾക്ക് സാധിക്കട്ടേയെന്നും മാർപാപ്പ ആശംസിച്ചു.
വിശുദ്ധ കുർബാനയ്ക്കു മുന്നോടിയായി മെഡ്ജുഗൊറെ മരിയൻ തീർഥാടനകേന്ദ്രത്തിന്‍റെ പ്രത്യേക ചുമതലയുള്ള അപ്പോസ്തലിക് വിസിറ്റേറ്റർ ആർച്ച്ബിഷപ് അൽദോ കവല്ലിയാണ് മാർപാപ്പയുടെ സന്ദേശം വായിച്ചത്.
വിശുദ്ധ കുർബാനയ്ക്ക് ബോസ്നിയ-ഹെർസെഗോവിനയിലെയും മോണ്ടെനെഗ്രോയിലെയും അപ്പസ്തോലിക് നുൺഷ്യോ വരാപ്പുഴ അതിരൂപതാംഗമായ ആർച്ച്ബിഷപ് ഫ്രാൻസിസ് അസീസി ചുള്ളിക്കാട്ട് മുഖ്യകാർമികത്വം വഹിച്ചു.
1989ൽ ആരംഭിച്ച ഈ യുവജന സമ്മേളനം എല്ലാ വർഷവും നടന്നുവരുന്നു. ഈമാസം ആറുവരെ നടക്കുന്ന സമ്മേളനത്തിൽ 73 രാജ്യങ്ങളിൽനിന്നായി 50,000ത്തോളം യുവതീയുവാക്കളാണു പങ്കെടുക്കുന്നത്.
International
വത്തിക്കാൻ സിറ്റി: കസ്‌തേല്‍ ഗണ്ടോള്‍ഫോയിലെ വേനല്‍ക്കാല വസതിയിലെ വിശ്രമത്തിനുശേഷം ലെയോ പതിനാലാമൻ മാർപാപ്പ വത്തിക്കാനിൽ മടങ്ങിയെത്തി.
കഴിഞ്ഞ അഞ്ചിനാണ് പ്രാർഥനയ്ക്കും ധ്യാനത്തിനും വിശ്രമത്തിനും പഠനത്തിനുമായി മാർപാപ്പ വേനൽക്കാല വസതിയിലെത്തിയത്.
വിശ്രമദിനങ്ങളിൽ റോമിലെ പാവങ്ങളായ ഇരുനൂറോളം ആളുകൾക്കൊപ്പം മാർപാപ്പ ഉച്ചഭക്ഷണം കഴിച്ചത് ഏറെ ഹൃദ്യമായ അനുഭവമായിരുന്നു.
20ന് മോന്തെ കാസിനോയിലെ ബനഡിക്‌ടെൻ ആശ്രമത്തിലേക്കും 22ന് വല്ലെപിയേത്രയിലെ പരിശുദ്ധ ത്രിത്വത്തിന്‍റെ തീർഥാടനകേന്ദ്രത്തിലേക്കും വിശുദ്ധ ബനഡിക്‌ടിന്‍റെയും വിശുദ്ധ സ്‌കോളാസ്റ്റിക്കയുടെയും ആശ്രമത്തിലേക്കുമുള്ള സന്ദർശനങ്ങളും ഈ അവധിക്കാലത്തെ പ്രത്യേകതകളായിരുന്നു.
റോം: യുദ്ധവും ദാരിദ്ര്യവും മൂലം മുറിവേറ്റ ലോകത്തിന് സാഹോദര്യത്തിന്‍റെയും അനുരഞ്ജനത്തിന്‍റെയും സന്ദേശം നൽകുകയെന്ന ലക്ഷ്യത്തോടെ ഇന്നലെ വൈകുന്നേരം കസ്തേൽ ഗണ്ടോൾഫോയിലെ ലൗദാത്തോ സി ഗ്രാമത്തിൽ പ്രാർഥനാ സംഗീതനിശ സംഘടിപ്പിച്ചു.
ലൗദാത്തോ സി ഉന്നത പരിശീലനകേന്ദ്രവും അന്ദ്രേയ ബൊചെല്ലി ഫൗണ്ടേഷനും ചേർന്നു സംഘടിപ്പിച്ച "കാന്തിക്കോ ദി പാച്ചെ' (സമാധാനത്തിന്‍റെ ഗീതം) എന്ന പരിപാടിയിൽ ലെയോ പതിനാലാമൻ മാർപാപ്പയും സന്നിഹിതനായിരുന്നു.
വിശുദ്ധ ഫ്രാൻസിസ് അസീസിയുടെ മരണത്തിന്‍റെ 800-ാം വാർഷികത്തോടനുബന്ധിച്ചാണ് പ്രാർഥനാസംഗമം സംഘടിപ്പിച്ചത്. ഇറ്റലിയിലെ പ്രശസ്ത സംഗീതജ്ഞൻ അന്ദ്രേയ ബൊചെല്ലി സംഗീതമാലപിച്ചു.
ഇസ്രയേൽ, പലസ്തീൻ, ഉഗാണ്ട, ഹെയ്തി, ഇറ്റലി എന്നിവിടങ്ങളിൽനിന്നുള്ള 164 കുട്ടികൾ അടങ്ങുന്ന അന്ദ്രേയ ബൊചെല്ലി ഫൗണ്ടേഷൻ എന്ന ഗായകസംഘത്തിന്‍റെ സാന്നിധ്യം സംഗമത്തിന്‍റെ പ്രധാന ആകർഷണമായിരുന്നു.
ദുരിതപൂർണമായ സാഹചര്യങ്ങളിൽനിന്നുള്ള ഈ കുട്ടികൾ സംഗീതത്തിലൂടെ സമാധാനത്തിന്‍റെയും പ്രത്യാശയുടെയും അനുഭവങ്ങൾ പങ്കുവച്ചു.
International
റോം: വിശുദ്ധ നാട്ടിലും മധ്യപൂര്‍വേഷ്യയിലും ആക്രമണങ്ങള്‍ അവസാനിപ്പിക്കാന്‍ ലെയോ പതിനാലാമന് മാര്‍പാപ്പയുടെ അഭ്യര്‍ഥന. വര്‍ധിച്ചുവരുന്ന അക്രമങ്ങളില്‍ കടുത്ത ആശങ്ക പ്രകടിപ്പിച്ച മാര്‍പാപ്പ, സൈനികനടപടികള്‍ അവസാനിപ്പിച്ച് ചര്‍ച്ചകളിലൂടെ നീതിയുക്തമായ പരിഹാരം കണ്ടെത്തണമെന്നും ആഹ്വാനം ചെയ്തു.
വേനല്‍ക്കാല വസതിയായ കസ്‌തേല്‍ ഗണ്ടോള്‍ഫോയില്‍ ഇന്നലെ ത്രിസന്ധ്യാ പ്രാര്‍ഥനയ്ക്കുശേഷം തീര്‍ഥാടകരെ അഭിസംബോധന ചെയ്യുകയായിരുന്നു മാര്‍പാപ്പ.
വിശുദ്ധ നാട്ടില്‍ തുടരുന്നതും ശക്തമാകുന്നതുമായ അക്രമങ്ങളെ താന്‍ കടുത്ത ആശങ്കയോടെ നിരീക്ഷിച്ചുകൊണ്ടിരിക്കുകയാണെന്നു പറഞ്ഞ മാര്‍പാപ്പ, ഓരോ വ്യക്തിയുടെയും തുല്യ അന്തസിലും തുല്യ അവകാശങ്ങളിലും അധിഷ്ഠിതമായ, നീതിയുക്തമായ ഒരു രാഷ്‌ട്രീയ പരിഹാരം ലക്ഷ്യമിട്ടുള്ള ചര്‍ച്ചകളിലേക്ക് മടങ്ങിയെത്തണമെന്നും ആവശ്യപ്പെട്ടു.
യുദ്ധംമൂലം ദുരിതമനുഭവിക്കുന്ന ലോകമെമ്പാടുമുള്ള എല്ലാ ജനങ്ങള്‍ക്കുമായി പ്രാര്‍ഥിക്കുന്നത് തുടരാനും മാര്‍പാപ്പ എല്ലാവരെയും ആഹ്വാനം ചെയ്തു.
“മധ്യപൂര്‍വേഷ്യയില്‍ സൈനികനടപടികള്‍ ശക്തമാക്കിയത് വീണ്ടും അക്രമവും നാശനഷ്‌ടങ്ങളും വരുത്തിവച്ചിരിക്കുകയാണ്. ഇത് എണ്ണമറ്റ സാധാരണക്കാരുടെ ജീവനെ വലിയ അപകടത്തിലാക്കുകയും കുടിവെള്ളത്തിന്‍റെയും വൈദ്യുതിയുടെയും ക്ഷാമം രൂക്ഷമാക്കുകയും ചെയ്തിരിക്കുന്നു.
ബന്ധപ്പെട്ട എല്ലാ കക്ഷികളും തങ്ങളുടെ ആക്രമണങ്ങള്‍ നിര്‍ത്തലാക്കണമെന്നും അടിയന്തരമായി ചര്‍ച്ചകളുടെയും നയതന്ത്രത്തിന്‍റെയും വഴികള്‍ വീണ്ടും തുറക്കണമെന്നും ഞാന്‍ അഭ്യര്‍ഥിക്കുന്നു.” -മാര്‍പാപ്പ പറഞ്ഞു.
International
റോം: പരിസ്ഥിതിസംരക്ഷണ രംഗത്തും സാമൂഹികക്ഷേമത്തിലും വേറിട്ട സംഭാവനകൾ നൽകുന്ന വ്യക്തികൾക്കായി ലെയോ പതിനാലാമൻ മാർപാപ്പയുടെ പേരിൽ അന്താരാഷ്‌ട്ര ബഹുമതി പ്രഖ്യാപിച്ചു.
അമേരിക്കയിലെ പെൻസിൽവാനിയയിലെ വില്ലനോവ സർവകലാശാല ഏർപ്പെടുത്തിയ "പോപ്പ് ലെയോ പതിനാലാമൻ സസ്റ്റൈനബിലിറ്റി മെഡൽ' അടുത്ത ഒക്‌ടോബറിൽ റോമിൽ നടക്കുന്ന ചടങ്ങിൽ മാർപാപ്പതന്നെ നേരിട്ട് വിജയിക്കു സമ്മാനിക്കും.
ഒക്‌ടോബർ 12 മുതൽ 15 വരെ റോമിലെ പാട്രിസ്റ്റിക് ഇൻസ്റ്റിറ്റ്യൂട്ട് അഗസ്റ്റീനിയാനത്തിലും മാർപാപ്പയുടെ വേനൽക്കാല വസതിയായ കസ്തേൽ ഗാണ്ടാൾഫോയിലെ ലൗദാത്തോ സീ ഉദ്യാനത്തിലുമായാണ് അന്താരാഷ്‌ട്ര പരിസ്ഥിതിസമ്മേളനം നടക്കുന്നത്. ഒക്‌ടോബർ 13ന് നടക്കുന്ന ചടങ്ങിൽ അവാർഡ് വിതരണം ചെയ്യും.
ലെയോ പതിനാലാമൻ മാർപാപ്പ അംഗമായ അഗസ്റ്റീനിയൻ സന്യാസസഭ 1842ൽ സ്ഥാപിച്ചതാണ് വില്ലനോവ സർവകലാശാല. ലെയോ മാർപാപ്പ പഠിച്ച ഉന്നതവിദ്യാഭ്യാസ സ്ഥാപനംകൂടിയാണിത്.
1977ൽ ഇവിടെനിന്ന് ഗണിതശാസ്ത്രത്തിൽ ബിരുദം നേടിയ അദ്ദേഹത്തിന് 2014ൽ സർവകലാശാല ഓണററി ഡോക്‌ടറേറ്റും നൽകിയിരുന്നു. സർവകലാശാലയുടെ ഈ മുൻ വിദ്യാർഥിയോടുള്ള ആദരസൂചകമായാണ് രണ്ടു വർഷത്തിലൊരിക്കൽ നൽകുന്ന പുരസ്കാരം ഏർപ്പെടുത്തിയിരിക്കുന്നത്.
ആദ്യ പുരസ്കാരജേതാവിനെ സെപ്റ്റംബറിൽ പ്രഖ്യാപിക്കും. ഏതു മേഖലയിലുള്ളവർക്കും പരിസ്ഥിതി-സാമൂഹിക സുസ്ഥിരതയ്ക്കായി നൽകിയ സംഭാവനകൾ മുൻനിർത്തി പുരസ്കാരത്തിന് അർഹതയുണ്ടായിരിക്കും.
International
വത്തിക്കാൻ സിറ്റി: ലെയോ പതിനാലാമൻ മാർപാപ്പയുടെ സമാധാനസന്ദേശങ്ങൾ ഉൾക്കൊള്ളുന്ന പുതിയ പുസ്തകം ‘ഡിസാംഡ് ആൻഡ് ഡിസാമിംഗ്: പീസ് ഈസ് എ ഗിഫ്റ്റ്’ പുറത്തിറങ്ങി.
സാർവത്രികസഭയുടെ അധ്യക്ഷനായി 2025 മേയ് എട്ടിന് തെരഞ്ഞെടുക്കപ്പെട്ടതു മുതൽ സമാധാനവുമായി ബന്ധപ്പെട്ട് മാർപാപ്പ നടത്തിയിട്ടുള്ള വിവിധ പ്രഭാഷണങ്ങളും സന്ദേശങ്ങളും അടിസ്ഥാനമാക്കി വത്തിക്കാൻ പബ്ലിഷിംഗ് ഹൗസ് പ്രസിദ്ധീകരിച്ച ഈ ഗ്രന്ഥത്തിൽ ലോകസമാധാനത്തിന് അണുവായുധങ്ങളല്ല മറിച്ച് നിരായുധീകരണമാണ് ആവശ്യമെന്ന് മാർപാപ്പ ഊന്നിപ്പറയുന്നു.
അലസാൻഡ്രോ ബാൻഫി എഡിറ്റ് ചെയ്ത ഈ പുസ്തകത്തിന്‍റെ ഇറ്റാലിയൻ പതിപ്പാണ് ഇപ്പോൾ ലഭ്യമായിട്ടുള്ളത്.
International
റോം: ലോകത്തിന്‍റെ വിവിധ ഭാഗങ്ങളിൽ തുടരുന്ന യുദ്ധങ്ങളിലും അക്രമങ്ങളിലും ആശങ്ക രേഖപ്പെടുത്തിയും ദുരിതമനുഭവിക്കുന്നവർക്കായി പ്രാർഥനകൾ ശക്തമാക്കാൻ ആഹ്വാനം ചെയ്തും ലെയോ പതിനാലാമൻ മാർപാപ്പ.
വേനൽക്കാല വസതിയായ കസ്തേൽ ഗണ്ടോർഫോ ഇന്നലെ ത്രിസന്ധ്യാ പ്രാർഥനയ്ക്കുശേഷം തീർഥാടകരെ അഭിസംബോധന ചെയ്യുകയായിരുന്നു മാർപാപ്പ.
യുദ്ധവും അക്രമവും തകർത്ത വിവിധ രാജ്യങ്ങളിലെ സംഭവവികാസങ്ങളെ അതീവ ആശങ്കയോടെയാണ് നോക്കിക്കാണുന്നതെന്ന് മാർപാപ്പ പറഞ്ഞു. “ഈ സംഘർഷങ്ങൾ കാരണം ദുരിതമനുഭവിക്കുന്നവരെയും മരിക്കുന്നവരെയും നാം മറക്കരുത്. സമാധാനത്തിനായുള്ള ആത്മാർഥമായ ശ്രമങ്ങൾക്കൊപ്പം നമ്മുടെ നിരന്തരമായ പ്രാർഥനകളും ചേർത്തുവയ്ക്കാം” - മാർപാപ്പ ഓർമിപ്പിച്ചു.
യുക്രെയ്ൻ തലസ്ഥാനമായ കീവിൽ റഷ്യ നടത്തിയ ശക്തമായ മിസൈൽ ആക്രമണത്തിൽ ആളപായവും നാശനഷ്‌ടങ്ങളും റിപ്പോർട്ട് ചെയ്തിരുന്ന തിന്‍റെയും ഇറാനിൽ യുഎസ് നടത്തിയ വ്യോമാക്രമണങ്ങളും തുടർന്ന് കുവൈറ്റിലെ യുഎസ് സൈനിക താവളങ്ങൾക്കുനേരേ ഇറാൻ നടത്തിയ മിസൈൽ-ഡ്രോൺ ആക്രമണങ്ങളും ഉൾപ്പെടെ പശ്ചിമേഷ്യയിലുണ്ടായ പുതിയ സംഘർഷാവസ്ഥയുടെയും പശ്ചാത്തലത്തിലാണു മാർപാപ്പയുടെ ആഹ്വാനം.
ക്രൈസ്തവർ പുലർത്തേണ്ട വിനയത്തെയും കാരുണ്യത്തെയും കുറിച്ച് ഓർമിപ്പിച്ച മാർപാപ്പ, ബലപ്രയോഗത്തിലൂടെയോ ആധിപത്യത്തിലൂടെയോ ആഡംബരത്തോടെയോ കടന്നുവരുന്ന ഒരു ശക്തനായ ഭരണാധികാരിയായി ദൈവത്തെ സങ്കൽപ്പിക്കരുതെന്ന് മുന്നറിയിപ്പ് നൽകി. ഈമാസം 27 വരെ മാർപാപ്പ കസ്തേൽ ഗണ്ടോൾഫോയിൽ വിശ്രമത്തിൽ തുടരും.
Leader Page
ലെയോ പതിനാലാമൻ മാർപാപ്പയുടെ ആദ്യ ചാക്രിക ലേഖനമായ "മാഞ്ഞിഫിക്ക ഹുമാനിത്താസ്' ആഗോള തലത്തിൽ വലിയ ബൗദ്ധിക-രാഷ്‌ട്രീയ ചർച്ചകൾക്ക് തിരികൊളുത്തിയിരിക്കുകയാണ്. മനുഷ്യന്‍റെ ചിന്തയെയും ഓർമയെയും തൊഴിലെന്ന ആശയത്തെയും ഭാവിയെത്തന്നെയും കീഴടക്കാൻ ഡാറ്റയും നിർമിത ബുദ്ധിയും അൽഗോരിതങ്ങളുമായി ടെക്‌നോ കാപ്പിറ്റലിസ്റ്റുകൾ ശ്രമിക്കുന്ന കാലഘട്ടത്തിലാണ് ‘മഹത്തായ മാനവികത’ എന്ന ഈ ചാക്രിക ലേഖനം പ്രസിദ്ധീകരിക്കപ്പെടുന്നത്. ഇന്ന് ലോകം നേരിടുന്ന ഏറ്റവും വലിയ രാഷ്‌ട്രീയ-സാമൂഹിക പ്രതിസന്ധികളായ നിർമിത ബുദ്ധി (എഐ) യുടെ ഉടമസ്ഥത, സാങ്കേതിക വിദ്യയുടെ കേന്ദ്രീകരണം, തൊഴിൽ നഷ്ടം, മനുഷ്യന്‍റെ അസ്തിത്വ പ്രതിസന്ധി എന്നിവയെക്കുറിച്ചുള്ള ശക്തമായ സാമൂഹിക-ആത്മീയ ഇടപെടലായി ഈ ലേഖനം ഉയർന്നു നിൽക്കുന്നു.
ഇത് കത്തോലിക്കാ സഭയുടെയോ മാർപാപ്പയുടെയോ വെറും ധാർമിക ഉപദേശം മാത്രമല്ല. ടെക്‌നോ കാപിറ്റലിസത്തിന്‍റെ പുതിയ സാമ്രാജ്യത്വത്തിനെതിരേ ഉയരുന്ന മനുഷ്യകേന്ദ്രിത പ്രഖ്യാപനമാണ് തന്‍റെ ആദ്യ ചാക്രിക ലേഖനത്തിലൂടെ മാർപാപ്പ നടത്തിയിരിക്കുന്നത്. മനുഷ്യന്‍റെ മാന്യത, തൊഴിലിന്‍റെ മഹത്വം, പൊതുനന്മ, അധികാരത്തിന്‍റെ കേന്ദ്രീകരണം എന്നിവയെക്കുറിച്ചുള്ള മാർപാപ്പയുടെ നിലപാടുകൾ ശ്രദ്ധിക്കാതെ പോകാനാവില്ല.
മാനവികത എന്നതിനെ അപ്രസക്തമാക്കി ലോകം വെട്ടിപ്പിടിക്കാൻ അധികാരത്തിന്‍റെ ഹുങ്കും സാങ്കേതിക മികവിന്‍റെ ഗർവും സമ്പത്തിന്‍റെ അഹങ്കാരവുമായി എഴുന്നള്ളുന്ന ഭരണകൂട ദുർമേദസുകൾ ലോകമെല്ലാം അസ്വസ്ഥതകൾ വിതക്കുമ്പോഴാണ് ഈ ലേഖനം പുറത്തുവരുന്നത്. “ദൈവം അതിന്‍റെ എല്ലാ മഹത്വത്തോടും കൂടി സൃഷ്ടിച്ച മാനവികത ഇന്ന് ഒരു നിർണായക തെരഞ്ഞെടുപ്പിനെ അഭിമുഖീകരിക്കുകയാണെന്നും ഒന്നുകിൽ ഒരു പുതിയ ബാബേൽ ഗോപുരം പണിയുക അല്ലെങ്കിൽ ദൈവവും മനുഷ്യരും ഒരുമിച്ച് വസിക്കുന്ന നഗരം പണിയുക” എന്നാണ് മാർപാപ്പ ആഹ്വാനം ചെയ്യുന്നത്.
വർത്തമാനകാലത്തിന്‍റെ വെല്ലുവിളികളെ അതിജീവിക്കുന്നതിനുള്ള ഊർജമായി ഈ ലേഖനം മാറുന്നു എന്നതാണ് ശ്രദ്ധേയം. ബാബേൽ ഗോപുരവും ടെക്‌നോ-കാപിറ്റലിസവും ഈ ചാക്രിക ലേഖനത്തിലെ ഏറ്റവും ശക്തമായ പ്രതീകങ്ങളാണ്. ബൈബിളിൽ ഉല്പത്തി പുസ്തകത്തിൽ ‘നമുക്ക് ആകാശത്തെത്തുന്ന ഗോപുരം പണിയാം’ എന്ന് പറയുന്നുണ്ട്. ഇത് വെറുമൊരു പുരാതന കഥയല്ല. നിയന്ത്രണമില്ലാത്ത അധികാരത്തിന്‍റെ രാഷ്‌ട്രീയ ഉപമയാണ്. ഇന്ന് ഡാറ്റയും എഐ സംവിധാനങ്ങളും ഏതാനും കമ്പനികളുടെ കൈകളിൽ കേന്ദ്രീകരിക്കപ്പെടുമ്പോൾ ‘പുതിയ ബാബേൽ ഗോപുരം’ എന്നത് ഒരു മുന്നറിയിപ്പു കൂടിയായി മാറുന്നു.
ഈ ചാക്രിക ലേഖനത്തിൽ ലെയോ പതിനാലാമൻ മാർപാപ്പ ഒപ്പുവച്ച മേയ് 15 എന്ന തീയതി പ്രത്യേകമായ ശ്രദ്ധ ആകർഷിക്കുന്നുണ്ട്. 135 വർഷങ്ങൾക്ക് മുമ്പ് 1891 മേയ് 15നാണ് ലെയോ പതിമൂന്നാമൻ മാർപാപ്പ ‘റേരും നൊവാരും’ എന്ന വിഖ്യാതമായ ചാക്രിക ലേഖനം പുറപ്പെടുവിച്ചത്. പുതിയ കാര്യങ്ങളെക്കുറിച്ച് എന്നർഥമുള്ള ആ ചാക്രികലേഖനം പറഞ്ഞതാവട്ടെ തൊഴിലാളിവർഗത്തിന്‍റെ അവസ്ഥയെക്കുറിച്ചായിരുന്നു. സ്വകാര്യസ്വത്ത് സമ്പാദനത്തോട് യോജിച്ചുകൊണ്ട് തൊഴിലാളികളെ കൊടിയ ചൂഷണത്തിന് വിധേയമാക്കുന്നത് മനുഷ്യത്വത്തിന് നിരക്കാത്തതും ലജ്ജാവഹവുമാണെന്നും ലെയോ പതിമൂന്നാമൻ പാപ്പാ പ്രഖ്യാപിച്ചു.
വ്യവസായ വിപ്ലവകാലത്ത് തൊഴിലാളിയുടെ ശരീരത്തെ യന്ത്രം കീഴടക്കിയെങ്കിൽ, ഇന്നത്തെ ഡിജിറ്റൽ വിപ്ലവത്തിന്‍റെ കാലത്ത് മനുഷ്യന്‍റെ ബുദ്ധിയെയും സ്വകാര്യതയെയും വികാരങ്ങളെയും വരെ അൽഗോരിതങ്ങൾ നിയന്ത്രിക്കാൻ തുടങ്ങുന്നതിനെയാണ് ലെയോ പതിനാലാമൻ മാർപാപ്പ തന്‍റെ ആദ്യ ചാക്രിക ലേഖനത്തിലൂടെ ചൂണ്ടിക്കാണിക്കുന്നത്. അങ്ങിനെ മാഞ്ഞിഫിക്ക ഹുമാനിത്താസ് മനുഷ്യന്‍റെ മാന്യതയ്ക്കുവേണ്ടിയുള്ള സംസാരമായി മാറുന്നു.
“സാങ്കേതികവിദ്യ മനുഷ്യത്വത്തിന് വിരുദ്ധമായ ഒരു ശക്തിയല്ല, അത് സ്വതസിദ്ധമായി തിന്മയും അല്ല’’ എന്നാണ് പാപ്പാ പറയുന്നത്. എന്നാൽ അതിന്‍റെ തുടർച്ചയായി അദ്ദേഹം നടത്തുന്ന നിരീക്ഷണമാണ് ഏറെ ശ്രദ്ധേയം. “സാങ്കേതികവിദ്യ ഒരിക്കലും നിഷ്പക്ഷമല്ല, കാരണം അത് രൂപപ്പെടുത്തുകയും ധനസഹായം നൽകുകയും നിയന്ത്രിക്കുകയും ഉപയോഗിക്കുകയും ചെയ്യുന്നവരുടെ സ്വഭാവസവിശേഷതകൾ സ്വീകരിക്കുന്നു’’ എന്ന വാക്കുകൾ ഈ കാലത്തിന്‍റെ രാഷ്‌ട്രീയ സത്യമാണ്. അതുകൊണ്ടാണ് അവരുടെ ചെയ്തികൾ സൃഷ്ടിക്കാൻ പോകുന്ന ദുരിതങ്ങളെപ്പറ്റിയുള്ള ഭയാശങ്ക ഇതിൽ നിഴലിക്കുന്നതും. അതിനാൽ, ‘പൊതുനന്മയ്ക്കായി യത്നിക്കണമെന്നും’ ‘മനുഷ്യരായി തുടരണമെന്നും’ ലെയോ പതിനാലാമൻ മാർപാപ്പ ജനങ്ങളോട് അഭ്യർഥിക്കുന്നു. അങ്ങിനെയാകുമ്പോൾ “ദൈവം വസിക്കാൻ ആഗ്രഹിക്കുന്ന സ്ഥലമായി മനുഷ്യഹൃദയത്തെ ലോകം തിരിച്ചറിയും’’ എന്നാണ് പാപ്പായുടെ പ്രത്യാശ.
ദൈവത്തിന്‍റെ സ്വരൂപത്തിലും സാദൃശ്യത്തിലും സൃഷ്ടിക്കപ്പെട്ട മനുഷ്യന്‍റെ അന്തസ് സംരക്ഷിക്കേണ്ടതിന്‍റെ അനിവാര്യതയും പാപ്പാ ചൂണ്ടിക്കാട്ടുന്നുണ്ട്. മനുഷ്യനെ “ ഉപയോഗിക്കാനും ചൂഷണം ചെയ്യാനുമുള്ള ഒരു വിഭവമായി ” കണക്കാക്കുന്നതിനോട് വിയോജിക്കുന്നു എന്ന അദ്ദേഹത്തിന്‍റെ പ്രഖ്യാപനം ഏറ്റവും വലിയ രാഷ്‌ട്രീയ നിലപാടാണ്. ഗർഭധാരണം മുതൽ സ്വാഭാവിക അവസാനം വരെ ജീവിക്കാനുള്ള അവകാശമാണ് മനുഷ്യാവകാശമെന്നും അതിനെ ലംഘിക്കുന്നത് ന്യായീകരിക്കാൻ കഴിയാത്തതാണെന്നും ഒഴുക്കൻ മട്ടിൽ പറഞ്ഞുപോകുന്നതിനപ്പുറം ഗർഭഛിദ്രം, നിരപരാധികളെ കൊല്ലൽ, ദയാവധം എന്നിവയെ സഭ ഗുരുതരമായ തെറ്റായി കണക്കാക്കുന്ന തെരഞ്ഞെടുപ്പുകൾ എന്നാണ് രേഖപ്പെടുത്തിയിരിക്കുന്നത്.
Leader Page
സ്നേഹത്തെക്കുറിച്ച് ലോകചരിത്രത്തിൽ ഏറ്റവും ശക്തമായും ആധികാരികമായും തീവ്രമായും എക്കാലവും സംസാരിച്ചിട്ടുള്ളത് കത്തോലിക്കാ സഭയാണ്. മനുഷ്യജീവിതത്തെ മതവർഗീയതയും ജാതിസ്പർധകളും വിഘടനവാദവും വർഗസമരങ്ങളും ഭീകരവാദങ്ങളുമൊക്കെ നിരന്തരം സങ്കീർണമാക്കുമ്പോൾ മിശിഹായുടെ സഭ ലോകത്തിന് പരിചയപ്പെടുത്തുന്നത് ശത്രുക്കളെപോലും സ്നേഹിക്കാൻ ആവശ്യപ്പെടുന്ന ആഴമേറിയ സ്നേഹത്തിന്‍റെ ‘തീവ്രവാദ’മാണ്. ദരിദ്രരോടുള്ള പരിഗണനയും മാറ്റിനിർത്തപ്പെട്ടവരോടുള്ള പക്ഷം ചേരലും ക്രൈസ്തവ സ്നേഹത്തിന്‍റെ പ്രകടമായ ധാർമിക ദൗത്യമാണെന്ന് ഒരിക്കൽകൂടി പ്രഖ്യാപിക്കുകയാണ് ‘ദിലക്സി തേ’ (DILEXI TE) ‘ഞാൻ നിന്നെ സ്നേഹിച്ചു’ എന്ന അപ്പസ്തോലിക പ്രബോധനം.
ഫ്രാൻസിസും ലെയോയും
പ്രബോധനത്തിന്‍റെ സുന്ദരമായ ഒരു തുടർച്ചയാണ് ലെയോ പതിനാലാമൻ മാർപാപ്പയിലേക്കു നടക്കുന്നതെന്ന് തോന്നും. ബെനഡിക്ട് മാർപാപ്പ പൂർത്തിയാക്കാതെ പോയ ‘ലൂമെൻ ഫിദേയി’ പൂർത്തീകരിച്ചുകൊണ്ട് തന്‍റെ പ്രഥമാചാര്യദൗത്യം ആരംഭിച്ച ഫ്രാൻസിസ് മാർപാപ്പയുടെ പൂർത്തീകരിക്കപ്പെടാത്ത ‘ദിലക്സി തേ’ പൂർത്തിയാക്കി പ്രസിദ്ധീകരിച്ചുകൊണ്ടാണ് പിൻഗാമിയായ ലെയോ മാർപാപ്പ തന്‍റെ ഔദ്യോഗിക പ്രബോധന ദൗത്യം സമാരംഭിക്കുന്നതെന്നത് ശ്ലൈഹിക പിന്തുടർച്ചയുടെ മനോഹരമായ ദൃശ്യമാണ്. അസീസിയിലെ ഫ്രാൻസിസിന്‍റെ ആധ്യാത്മികപാത പിന്തുടർന്ന് ദൈവത്തിന്‍റെ മഹാകാരുണ്യത്തെക്കുറിച്ചും സ്നേഹത്തെക്കുറിച്ചും നിരന്തരം പഠിപ്പിച്ച ഫ്രാൻസിസ് പാപ്പായുടെ ‘സ്നേഹപ്രബോധന’ത്തിന്‍റെ ആദ്യഭാഗമായിരുന്നു ‘ദിലെക്സിത്ത് നോസ്’ (അവൻ നമ്മെ സ്നേഹിച്ചു) എന്ന ദൈവസ്നേഹ കേന്ദ്രീകൃതമായ ചാക്രിക ലേഖനം. അതിന്‍റെ രണ്ടാം ഭാഗമെന്നോണമാണ് സാമൂഹിക സ്വഭാവമുള്ള മനുഷ്യസ്നേഹത്തെക്കുറിച്ചുള്ള ‘ദിലക്സി തേ’ എന്ന അപ്പസ്തോലിക പ്രബോധനം അസീസിയിലെ ഫ്രാൻസിസിന്‍റെ സന്തതസഹചാരിയായിരുന്ന ലെയോയെ അനുസ്മരിപ്പിക്കുംവിധം ഇപ്പോൾ ലെയോ മാർപാപ്പ പ്രസിദ്ധീകരിക്കുന്നത്. ബെനഡിക്ട് പാപ്പായുടെ പ്രബോധകമനസും ഫ്രാൻസിസ് പാപ്പായുടെ ഹൃദയവുമാണ് ലെയോ പതിനാറാമൻ മാർപാപ്പയുടെതെന്ന് വീണ്ടും തോന്നിപ്പിക്കുകയാണ് ‘ദിലക്സി തേ’.
വെളിപാട് പുസ്തകത്തിലെ ശ്രദ്ധേയമായ ഒരു സ്നേഹപ്രഖ്യാപനമാണ് ഈ അപ്പസ്തോലിക പ്രബോധനത്തിന്‍റെ പേരായി മാറുന്നത്. ദുർബലവും ദരിദ്രവുമായ ഫിലാദൽഫിയിലെ സഭയോട് മിശിഹാ അരുൾ ചെയ്യുന്ന വാക്കുകളാണിത് (3.9). വിശ്വാസത്തിനും നീതിക്കുംവേണ്ടി സഹനമേറ്റെടുക്കുകയും തന്‍റേതല്ലാത്ത കുറ്റത്താൽ ദരിദ്രരായിരിക്കുകയും ചെയ്യുന്നവരോടുള്ള മിശിഹായുടെ സ്നേഹമാണ് തിരുസഭ പ്രഖ്യാപിക്കുന്നത്.
ദരിദ്രരുടെ നിലവിളി
ദരിദ്രരുടെ അവസ്ഥ തന്നെയാണ് അവരുടെ നിലവിളി. ആ നിലവിളി മനുഷ്യ ചരിത്രത്തിൽ ഉടനീളം നമ്മുടെ ജീവിതത്തെയും സാമൂഹിക വ്യവസ്ഥയെയും രാഷ്‌ട്രീയ സാമ്പത്തിക സംവിധാനങ്ങളെയും, സഭയെ തന്നെയും നിരന്തരം വെല്ലുവിളിക്കുന്നുണ്ടെന്ന് പാപ്പാ ഓർമിപ്പിക്കുന്നു. ദരിദ്രന്‍റെ മുറിവേൽപ്പിക്കപ്പെട്ട മുഖത്ത് നാം കാണുന്നത് നിരപരാധിയുടെ സഹനമാണ്, അത് മിശിഹായുടെതന്നെ സഹനമാണ്. അതേസമയംതന്നെ ദാരിദ്ര്യം ഒരു ബഹുമുഖ പ്രതിഭാസമാണെന്നും അത് ഭൗതിക വസ്തുക്കളുടെ ഇല്ലായ്മ മാത്രമല്ലെന്നും പാപ്പാ നിരീക്ഷിക്കുന്നു. തങ്ങളുടെ മഹത്വത്തിനും സാധ്യതകൾക്കും ശബ്ദം നൽകാൻ കഴിയാതെപോകുന്ന സമൂഹത്തിലെ പാർശ്വവത്കരിക്കപ്പെട്ടവരുടെ അവസ്ഥയും ദാരിദ്ര്യം തന്നെയാണ്. രോഗികൾ ആരോഗ്യത്തിന്‍റെ ദാരിദ്ര്യം അനുഭവിക്കുന്നവരും അന്യായമായി തടവിൽ കഴിയുന്നവർ സ്വാതന്ത്ര്യത്തിന്‍റെ ദാരിദ്ര്യം അനുഭവിക്കുന്നവരുമാണ്. ധാർമികവും ആധ്യാത്മികവുമായ ദാരിദ്ര്യവും സാംസ്കാരിക ദാരിദ്ര്യവും വ്യക്തിപരവും സാമൂഹികവുമായ ദുർബലതയുടെ ദാരിദ്ര്യവും അവകാശങ്ങളും സ്വാതന്ത്ര്യവും ഇല്ലാതിരിക്കുന്നതിന്‍റെ ദാരിദ്ര്യവും സാമ്പത്തിക ദാരിദ്ര്യത്തേക്കാൾ കൂടുതൽ ഗൗരവമായ പരിഗണന അർഹിക്കുന്നതാണ്. സാമൂഹിക-സാമ്പത്തിക അസമത്വങ്ങളും ചൂഷണ സംവിധാനങ്ങളും ദാരിദ്ര്യത്തിന്‍റെ കൂടുതൽ വികൃതമായ മുഖങ്ങളാണ്. ലോകരാഷ്‌ട്രങ്ങളും രാജ്യാന്തര സംവിധാനങ്ങളും പലപ്പോഴും ദാരിദ്ര്യത്തെ ഒരു സാമ്പത്തിക യാഥാർഥ്യം മാത്രമായി അവതരിപ്പിക്കുന്നുണ്ട്. മനുഷ്യവ്യക്തിയുടെ മഹത്വത്തെ അതിന്‍റെ സമഗ്രതയിൽ പരിഗണിക്കാതെ നടത്തുന്ന എല്ലാ ദാരിദ്ര്യനിർമാർജന പ്രയത്നങ്ങളും അർഥശൂന്യമാണ് എന്ന് പാപ്പാ ഓർമിപ്പിക്കുന്നു.
ദരിദ്രരോടുള്ള ഐക്യദാർഢ്യം
ദരിദ്രരോടുള്ള പ്രതിബദ്ധത നമ്മിൽനിന്ന് പ്രതീക്ഷിക്കുന്നത് മാനവ സാംസ്കാരിക തലത്തിൽതന്നെ മാറ്റം വരുത്താൻ കഴിയുന്ന മനോഭാവങ്ങളുടെയും കാഴ്ചപ്പാടുകളുടെയും മാറ്റമാണ്. ആധുനികലോകത്തിൽ ദാരിദ്ര്യം അത്രവലിയ പ്രശ്നമല്ല എന്ന് കണക്കുകൾ അവതരിപ്പിച്ച് വ്യാഖ്യാനിക്കുന്നവരുണ്ട്. പൊതുവിൽ സമ്പത്ത് വർധിച്ചിട്ടുണ്ട്, പക്ഷേ അതോടൊപ്പം അസമത്വവും വർധിച്ചു. ആധുനിക ലോകത്തിൽ പുതിയ തരത്തിലുള്ള ദാരിദ്ര്യമാണ് ആവിര്‍ഭവിക്കുന്നതും വളരുന്നതും. ഒരുകാലത്ത് വൈദ്യുതി കടന്നുചെല്ലാത്ത ഇടങ്ങളെ ദരിദ്രമായി കണക്കാക്കിയിരുന്നെങ്കിൽ ഇന്ന് അതത്ര പ്രസക്തമല്ല. ദാരിദ്ര്യത്തെ കാലികമായി വ്യാഖ്യാനിക്കേണ്ടതുണ്ട്. ആനുപാതികവും യഥാർഥവുമായ അവസരങ്ങളുടെ ലഭ്യതയുമായും മനുഷ്യന്‍റെ സമഗ്രവികാസ സാധ്യതയുമായി കൂട്ടിച്ചേർത്തു വേണം ഓരോ കാലഘട്ടത്തിലും ദാരിദ്ര്യത്തെ അളക്കാൻ. ദാരിദ്ര്യത്തെ വിലയിരുത്തുന്നതിന്‍റെ പിറകിലുണ്ടാകേണ്ട ദാർശനിക വീക്ഷണമാണ് മാർപാപ്പ മുന്നോട്ടു വയ്ക്കുന്നത്. അനുഭാവപൂർണമായി ദരിദ്രരെയും ദാരിദ്ര്യത്തെയും മനസിലാക്കാൻ ഈ പുതിയ വീക്ഷണം ആവശ്യമുണ്ട്.
ദൈവം ദരിദ്രരെ തെരഞ്ഞെടുക്കുന്നു!
ദൈവം തെരഞ്ഞെടുക്കുന്നത് ദരിദ്രരെയാണെന്ന് മാർപാപ്പ ഓർമിപ്പിക്കുന്നു. ദരിദ്രരെ തെരഞ്ഞെടുക്കുന്നു എന്നതിന് ദൈവം മറ്റുള്ളവരെ മാറ്റി നിർത്തുന്നു എന്ന് അർഥമില്ല. ഭൗതികദാരിദ്ര്യം ദൈവം വിലമതിക്കുന്ന ഒരു പുണ്യമായി തിരുസഭ കണക്കാക്കുന്നുമില്ല. ദൈവം ആരെയും ദരിദ്രരാക്കുകയോ ആരെങ്കിലും ദരിദ്രരാകണമെന്ന് ആഗ്രഹിക്കുകയോ ചെയ്യുന്നില്ല. വിശുദ്ധ ഗ്രന്ഥത്തിലുടനീളം കാണുന്ന ദരിദ്രരോടുള്ള ദൈവത്തിന്‍റെ മമത അവരുടെ സമ്പത്തില്ലായ്മയോടുള്ള സ്നേഹമല്ല; പകരം, അവർ അനുഭവിക്കുന്ന അനീതിയിലും ചൂഷണത്തിലും ദൈവത്തിന് പങ്കില്ല എന്ന് ലോകത്തെ ഓർമിപ്പിക്കുന്നതാണ്. ദൈവം നൽകിയ സ്വാതന്ത്ര്യത്തെ ദുരുപയോഗിച്ച് മനുഷ്യൻതന്നെ തന്‍റെ സഹജീവികളോട് ചെയ്യുന്ന അനീതിയോടും ചൂഷണത്തോടുമുള്ള ദൈവത്തിന്‍റെ എതിർപ്പാണ് ഈ പക്ഷംചേരലിന്‍റെ അടിസ്ഥാനം. അതിന്‍റെ പ്രകടമായ പ്രഖ്യാപനമായിരുന്നു ഈശോ തന്‍റെ ജനനത്തിലും പരസ്യജീവിതത്തിലും സ്വീകരിച്ച ദാരിദ്ര്യവും ദരിദ്രരോടുള്ള സഹവാസവും. ഞാൻ ‘നിന്നെ സ്നേഹിച്ചു’ എന്ന് അവിടുന്ന് ദരിദ്രരോട് അരുൾ ചെയ്യാനുള്ള കാരണവും ഇതാണ്.
ദരിദ്രരോടുള്ള സ്നേഹം അടിസ്ഥാനപരമായി അവർക്കു നൽകുന്ന പരിഗണനയും മഹത്വവുമാണ്, അല്ലാതെ നാം പലപ്പോഴും കരുതുന്നതുപോലെ ദാരിദ്ര്യനിർമാർജന പ്രവർത്തനങ്ങൾ മാത്രമല്ല. ദരിദ്രർക്ക് നാം നൽകുന്ന പരിഗണനയും മഹത്വവുമാണ് ദരിദ്രരെ പരിഗണിക്കുന്ന ദൈവത്തോടുള്ള നമ്മുടെ സ്നേഹം. അതുകൊണ്ട് ദരിദ്രരെ സ്നേഹിക്കാത്ത, പരിഗണിക്കുകയും വിലമതിക്കുകയും ചെയ്യാത്ത ആരും ദൈവത്തെ സ്നേഹിക്കുന്നില്ല എന്ന് മാർപാപ്പ ഓർമിപ്പിക്കുന്നു.
യഥാർഥ സമ്പത്ത്
യഥാർഥ സമ്പത്തിനെക്കുറിച്ചുള്ള ശരിയായധാരണയിൽനിന്നു മാത്രമേ ദാരിദ്ര്യത്തെക്കുറിച്ച് അർഥപൂർണമായി സംസാരിക്കാൻ കഴിയുകയുള്ളൂ എന്ന് ഈ പ്രബോധനരേഖ നമ്മെ ഓർമിപ്പിക്കുന്നുണ്ട്. യഥാർഥ സമ്പത്ത് പണമോ അധികാരമോ വസ്തുവകകളോ അല്ല എന്ന തിരിച്ചറിവാണ് മാർപാപ്പ ലോകത്തിനു നൽകാൻ ആഗ്രഹിക്കുന്നത്. യഥാർഥ സമ്പത്ത് ദൈവംതന്നെയാണ്. ദൈവത്തോട് ബന്ധപ്പെട്ടിരിക്കുന്ന മനുഷ്യന്‍റെ ആത്മാവും വ്യക്തിത്വവും വലിയ സമ്പത്താണ്. വിശുദ്ധിയും നൈർമല്യവും അതിലധിഷ്ഠിതമായ കൂട്ടായ്മയുടെ ബന്ധവും മനുഷ്യവംശത്തിന്‍റെ ശ്രേഷ്ഠമായ സമ്പത്തായി പരിഗണിക്കപ്പെടണം. സഭ എക്കാലവും ഏർപ്പെടേണ്ട ദാരിദ്ര്യനിർമാർജന പ്രവൃത്തികൾ വെറും സാമ്പത്തിക പരിഹാരപ്രവൃത്തികൾ മാത്രമായി ചുരുങ്ങിപ്പോകരുത്. യഥാർഥ സമ്പത്തായ ദൈവവും മനുഷ്യവ്യക്തിയുടെ മഹത്വവും വിലമതിക്കപ്പെടുന്ന ആധ്യാത്മിക സ്വഭാവമുള്ള ഒരു സാമൂഹിക സാമ്പത്തിക ലോകത്തെ പടുത്തുയർത്താനുള്ള ക്ഷണമാണ് ‘ദിലക്സി തേ’ എന്ന അപ്പസ്തോലിക പ്രബോധനം. അതുതന്നെയായിരിക്കും സഭയ്ക്ക് ലോകത്തിന് നൽകാവുന്ന യഥാർഥമായ സ്നേഹത്തിന്‍റെ പ്രകടനവും പ്രഖ്യാപനവും.
ദാരിദ്ര്യത്തെക്കുറിച്ചും ദരിദ്രരെക്കുറിച്ചുമുള്ള ഈ അപ്പസ്തോലിക പ്രബോധനത്തിന്‍റെ മനോഹാരിതയും വ്യതിരക്തതയും അത് സുവിശേഷ മൂല്യങ്ങൾക്ക്, പ്രത്യേകിച്ച് സുവിശേഷാത്മക ദാരിദ്ര്യത്തിന് കൊടുക്കുന്ന ഊന്നലാണ്. അതിന്‍റെ അഭാവത്തിൽ ഒരുപക്ഷേ ഈ പ്രബോധന രേഖ തീർത്തും ഭൗതിക വീക്ഷണങ്ങളായി അവസാനിച്ചേനെ. തിരുസഭ വെറും ഭൗതിക ദാരിദ്ര്യനിർമാർജന പ്രവർത്തനങ്ങളിൽ ഏർപ്പെട്ടിരിക്കുന്ന ഒരു അന്താരാഷ്‌ട്ര സംഘടനയല്ലെന്നും, ദാരിദ്ര്യത്തിന്‍റെ ആധ്യാത്മികവും ധാർമികവുമായ വിഷയങ്ങളാണ് തിരുസഭയുടെ അടിസ്ഥാന പരിഗണന എന്നും മാർപാപ്പയുടെ വാക്കുകളിൽനിന്നു വ്യക്തമാണ്. സമ്പത്തും ദാരിദ്ര്യവുമായി ബന്ധപ്പെട്ട കണക്കുകളെക്കാൾ ഈ പ്രബോധന രേഖ മുഴുവൻ നിറഞ്ഞുനിൽക്കുന്നത് വിശുദ്ധ ഗ്രന്ഥ പ്രബോധനങ്ങളും സഭാപിതാക്കന്മാരുടെ വാക്കുകളും സന്യാസ സമൂഹങ്ങളുടെ ജീവിത മാതൃകകളും ഒക്കെയാണ്. ഒരു സാമൂഹിക സാമ്പത്തിക വിശകലനത്തേക്കാൾ സൈദ്ധാന്തികവും പ്രബോധനാത്മകവുമാണ് ലെയോ പാപ്പായുടെ ‘ദിലക്സി തേ’.
ദരിദ്രർക്കായുള്ള മിശിഹായുടെ സഭ
‘ദരിദ്രർക്കായി നിലകൊള്ളുന്ന സഭ’ എന്നാണ് മൂന്നാം അധ്യായത്തിന്‍റെ ശീർഷകം തന്നെ. തിരുസഭ ഈശോമിശിഹായുടെ തുടർച്ചയാകയാൽ അടിസ്ഥാനപരമായി ദരിദ്രർക്കായി നിലകൊള്ളുന്ന സഭയാണെന്ന് പാപ്പാ പ്രഖ്യാപിക്കുന്നു. ഇത് കത്തോലിക്കാ സഭയുടെ നയപ്രഖ്യാപനമാണ്. സമ്പന്നരും പ്രബലരും അധികമില്ലാതിരുന്ന ആദിമസഭ പക്ഷേ, പങ്കുവയ്ക്കാനും പൊതുവായി കരുതാനുമുള്ള മനോഭാവത്തിൽ സമ്പന്നമായിരുന്നു. തിരുസഭയുടെ യഥാർഥ സമ്പത്ത് ഈ മനോഭാവമായിരിക്കണമെന്ന് ദൈവമാഗ്രഹിക്കുന്നു. സഭാപിതാക്കന്മാർ ആവർത്തിച്ച് പഠിപ്പിക്കുകയും വിശുദ്ധർ ജീവിക്കുകയും സന്യാസ സമൂഹങ്ങൾ സാക്ഷ്യം നൽകുകയും ചെയ്ത സഭ, സമ്പത്തിന്‍റെ സ്നേഹപൂർണമായ പങ്കുവയ്ക്കലിന്‍റെയും ഭൗതികവസ്തുക്കളുടെ പൊതുവായ കരുതലിന്‍റെയും സഭയാണ്. ‘അവർ തങ്ങൾക്കുള്ളതെല്ലാം പൊതുവായി കരുതി’ എന്നും ‘അവരുടെ ഇടയിൽ ദാരിദ്ര്യം അനുഭവിക്കുന്നവർ ആരും ഉണ്ടായിരുന്നില്ല’ എന്നും ആദിമസഭയെക്കുറിച്ച് വിശുദ്ധ ഗ്രന്ഥം സാക്ഷ്യപ്പെടുത്തുന്നു (അപ്പ. 4.32-34). ഈ ചൈതന്യമാണ് സഭയുടെ വ്യക്തിത്വം എന്ന് പാപ്പാ ഉറപ്പിച്ച് പഠിപ്പിക്കുന്നു.
സുഖസമ്പുഷ്ടമായ ജീവിതത്തിൽനിന്ന് ഉത്ഭവിക്കുന്ന സന്തോഷത്തിന്‍റെ മിഥ്യാബോധം പലപ്പോഴും മനുഷ്യനെ തള്ളിവിടുന്നത് ഏതുവിധേനയും സമ്പത്തു വാരിക്കൂട്ടാനും സമൂഹത്തിൽ വിജയം നേടാനുമുള്ള പ്രവണതയിലേക്കാണ്. ശക്തരായവരോട് മാത്രം പക്ഷം പിടിക്കുന്ന നീതിരഹിതമായ സാമൂഹിക പ്രത്യയശാസ്ത്രങ്ങളും രാഷ്‌ട്രീയ സംവിധാനങ്ങളും ഉപയോഗിച്ച് സമ്പന്നരാകുന്നവർ വിജയിച്ചവരായി തെറ്റിദ്ധരിപ്പിക്കപ്പെടുന്നു.
ഒരു വശത്ത് അത്യാഡംബരമായ ജീവിതം നയിക്കുന്ന മനുഷ്യരും മറുവശത്ത് മറ്റൊരു ലോകത്തിലെന്നോണം വിശന്നു മരിക്കുകയോ ജീവൻ നിലനിർത്താൻ പാടുപെടുകയോ ചെയ്യുന്ന മനുഷ്യാവകാശങ്ങൾ നിഷേധിക്കപ്പെട്ടവരും. ഈ അന്തരം ദരിദ്രരാജ്യങ്ങളിൽ മാത്രമല്ല, വികസിത രാജ്യങ്ങളിലും ദൃശ്യമാണ് എന്നത് നമ്മെ അത്ഭുതപ്പെടുത്തും. സഭ നിലകൊള്ളേണ്ടത് ആ മാറ്റിനിർത്തപ്പെട്ടവരോടൊപ്പമാണ് എന്നാണ് പാപ്പാ പഠിപ്പിക്കുന്നത്. അങ്ങനെയൊരു നിലപാടെടുക്കുന്നതിന്‍റെ പേരാണ് സഹോദരസ്നേഹം.
ADVERTISEMENT
ADVERTISEMENT
SPACE FOR ADVERTISEMENT
Copyright © 2026, Rashtra Deepika Ltd. All Rights Reserved.
Design and Development 
Corehub Solutions
Contact Numbers :
+91 481 2566706, 2566707, 2566708
About Us Feedback Privacy Policy Terms and Conditions for Online Payment
E-paper LOGIN
LOGIN