Deepika
ADVERTISEMENT
Kerala
ഗുരുവായൂർ: ഗുരുവായൂർ ക്ഷേത്രദർശനത്തിനെത്തിയ പ്രമുഖ വ്യവസായി മുകേഷ് അംബാനി ദേവസ്വം നിർമിക്കുന്ന മൾട്ടി സ്പെഷാലിറ്റി ആശുപത്രിക്കായി 15 കോടിയുടെ ചെക്ക് കൈമാറി. ആശുപത്രി നിർമാണത്തിനുള്ള ആദ്യ ഗഡുവായാണു തുക നൽകിയത്. ഇന്നലെ രാവിലെ ദർശനത്തിനെത്തിയ അംബാനി ആശുപത്രി നിർമാണത്തിനാവശ്യമായ മുഴുവൻതുകയും നൽകാമെന്നും അറിയിച്ചു.
ആനക്കോട്ടയിൽ അത്യാധുനികരീതിയിലുള്ള ലാബ് സൗകര്യം ഒരുക്കുന്നതിനുള്ള മുഴുവൻ കാര്യങ്ങളും ചെയ്തുനൽകാമെന്നും വാഗ്ദാനം ചെയ്തതായി അഡ്മിനിസ്ട്രേറ്റർ ഒ.ബി. അരുണ്കുമാർ അറിയിച്ചു.
ആനകളുടെ എക്സ്റേ മുതൽ രക്തപരിശോധന, സ്കാനിംഗ് എന്നിവ നടത്തുന്ന സംവിധാനമാണ് ഒരുക്കുന്നത്. ഇപ്പോഴത്തെ ആശുപത്രി സ്ഥിതിചെയ്യുന്ന സ്ഥലത്താണു പുതിയ ആശുപത്രി വരുന്നത്. 1.45 ഏക്കറിൽ 82,363 ചതുരശ്രഅടിയിൽ ബേസ്മെന്റ് ഉൾപ്പെടെ അഞ്ചു നിലകളിലായാണു നിർമാണം. ദേവസ്വം കമ്മീഷണറുടെ അനുമതി ലഭിച്ചാലുടൻ നിർമാണം ആരംഭിക്കും.
രാവിലെ ഏഴരയോടെയാണ് മുകേഷ് അംബാനി ദർശനത്തിനെത്തിയത്. പൊതുഅവധി ദിവസം വിഐപി ദർശനത്തിനു നിയന്ത്രണമുണ്ടായിരുന്നതിനാൽ 25 പേർക്കുള്ള നെയ് വിളക്ക് വഴിപാട് ചീട്ടാക്കിയാണ് മുകേഷ് അംബാനിയും കൂടെയുള്ളവരും ദർശനം നടത്തിയത്. സോപാനത്തിൽ കാണിക്കയർപ്പിച്ച് ദർശനം നടത്തിയ അദ്ദേഹത്തിനു മേൽശാന്തി മൂർത്തിയേടത്ത് സുധാകരൻ നന്പൂതിരി പ്രസാദം നൽകി. ശ്രീവത്സത്തിലെത്തിയ മുകേഷ് അംബാനിയെ ദേവസ്വം ചെയർമാൻ ഡോ. വി.കെ. വിജയൻ, ഭരണ സമിതിഅംഗം സി. മനോജ്, അഡ്മിനിസ്ട്രേറ്റർ ഒ.ബി. അരുണ്കുമാർ എന്നിവർ ചേർന്നു സ്വീകരിച്ചു.
Business
മുംബൈ: എഡെൽഗീവ് ഹുറൂണ്‍ ഇന്ത്യ ഫിലാന്ത്രോപ്പി ലിസ്റ്റ് 2025 പുറത്തുവിട്ട കണക്കുകൾ പ്രകാരം ഇന്ത്യയിലെ ഏറ്റവും ഉദാരമതികളായ വ്യക്തികൾ 2025ൽ മൊത്തത്തിൽ 10,380 കോടി രൂപ സംഭാവന ചെയ്തു. ഈ ലിസ്റ്റിൽ 12 പുതിയ അംഗങ്ങൾ ഉൾപ്പെടെ 191 ജീവകാരുണ്യപ്രവർത്തകരാണുള്ളത്. കഴിഞ്ഞ മൂന്നു വർഷത്തിനിടെയുള്ള മൊത്തം സംഭാവനയിൽ 85 ശതമാനം വർധനയാണുണ്ടായത്. ഇത് ഇന്ത്യയിലെ ജീവകാരുണ്യ സംസ്കാരത്തിൽ ശക്തമായ കുതിച്ചുചാട്ടമാണ് കാണിക്കുന്നത്.
ജീവകാരുണ്യ പ്രവർത്തനങ്ങളിൽ സംഭാവന നല്കുന്ന കാര്യത്തിൽ ഒന്നാമത് എച്ച്സിഎൽ സ്ഥാപകൻ ശിവ് നാടാർ ആൻഡ് ഫാമിലിയാണ്. 2708 കോടി രൂപയുടെ വാർഷിക സംഭാവനയാണ് നാടാർ നടത്തിയത്. അഞ്ചു വർഷത്തിനിടെ നാലാം തവണയും അദ്ദേഹം ഇന്ത്യയുടെ ഏറ്റവും ഉദാരമതിയെന്ന പേര് നിലനിർത്തി.
ശിവ് നാടാരുടെ സംഭാവനകൾ ദിവസേന ഏകദേശം 7.4 കോടി രൂപയ്ക്കു തുല്യമാണ്. കഴിഞ്ഞ വർഷത്തേക്കാൾ 26 ശതമാനം വർധനയാണ് സംഭാവനകളിൽ ഉണ്ടായിരിക്കുന്നത്. ഈ തുക പ്രധാനമായും നൽകുന്നത് ശിവ് നാടാർ ഫൗണ്ടേഷൻ വഴിയാണ്. ഇത് വിദ്യാഭ്യാസം, കല, സംസ്കാരം എന്നീ മേഖലകളിലാണ് ശ്രദ്ധകേന്ദ്രീകരിക്കുന്നത്.
ആദ്യ പത്ത് ഉദാരമതികൾ
പട്ടികയിലെ ആദ്യ പത്തുപേർ ചേർന്ന് ആകെ 5834 കോടി രൂപ സംഭാവന ചെയ്തു. ഇത് മൊത്തം സംഭാവനയുടെ 5834 കോടി രൂപവരും. കഴിഞ്ഞ വർഷത്തെക്കാൾ 26 ശതമാനം വർധനയാണുണ്ടായത്.
ഹിന്ദുജ ഫാമിലി, സുധിർ ആൻഡ് സമീർ മേത്ത, സൈറസ് ആൻഡ് അദാർ പൂനവാല എന്നിവർ ആദ്യ പത്തിൽ ഈ വർഷമെത്തിയവരാണ്. ഏഴ്, ഒന്പത്, പത്ത് സ്ഥാനങ്ങളിൽ ഇടംപിടിച്ചു.
രണ്ടാം സ്ഥാനത്തുള്ള മുകേഷ് അംബാനി ആൻഡ് ഫാമിലിയുടെ സംഭാവന 626 കോടി രൂപയാണ്. മുകേഷ് അംബാനിയുടെയും കുടുംബത്തിന്‍റെയും പ്രവർത്തനങ്ങൾ റിലയൻസ് ഫൗണ്ടേഷൻ വഴിയാണ് നടത്തുന്നത്. വിദ്യാഭ്യാസം, ആരോഗ്യപരിപാലനം, ഗ്രാമ പരിവർത്തനം, വനിതാ ശക്തീകരണം, പൈതൃക സംരക്ഷണം എന്നിവയാണ് മേഖലകൾ.
മൂന്നാം സ്ഥാനം നിലനിർത്തിയ ബജാജ് ഫാമിലിയുടെ ജീവകാരുണ്യപ്രവർത്തനങ്ങൾ ജംനാലാൽ കനിറാം ബജാജ് ട്രസ്റ്റ്, കമലനയൻ ജംനാലാൽ ബജാജ് ഫൗണ്ടേഷൻ എന്നിവയിലൂടെ ഇന്ത്യയിലെ ഗ്രാമീണ മേഖലയിലുടനീളം സാമൂഹിക, സാന്പത്തിക സംരംഭങ്ങൾക്കു നേതൃത്വം നല്കുന്നു.
നാലാം സ്ഥാനം നിലനിർത്തി കുമാർ മംഗളം ബിർളയും കുടുംബവും 440 കോടി രൂപ സംഭാവന ചെയ്തു. ഈ തുകയുടെ ഏകദേശം 20 ശതമാനം നേരിട്ട് സ്വകാര്യ ഫണ്ടുകളിൽനിന്നാണ് വന്നത്. വിദ്യാഭ്യാസം, ആരോഗ്യപരിപാലനം, വനിതാ ശക്തീകരണം, കായികം എന്നിവയ്ക്കാണ് സംഭാവന നൽകുന്നത്.
അഞ്ചാമതുള്ള ഗൗതം അദാനിയും കുടുംബത്തിന്‍റെ സംഭാവനയിൽ കഴിഞ്ഞ വർഷത്തേക്കാൾ 17 ശതമാനം വളർച്ചയാണുണ്ടായത്. വിദ്യാഭ്യാസം, നൈപുണ്യ വികസനം, കമ്യൂണിറ്റി ആരോഗ്യ പരിപാടികൾ എന്നിവയ്ക്കാണ് സംഭാവന നൽകുന്നത്.
ആറാമതുള്ള നന്ദൻ നിലേകനി സംഭാവനകൾ ചെയ്യുന്നത് നിലേകനി ഫിലാന്ത്രോപ്പീസ് വഴിയാണ്.
നിലേകനി ഫിലാന്ത്രോപ്പീസ് വഴിയുള്ള അദ്ദേഹത്തിന്‍റെ ജീവകാരുണ്യ പ്രവർത്തനങ്ങൾ, ആവാസവ്യവസ്ഥയുടെ നിർമാണത്തിലും പൊതു ചരക്ക്, സേവനങ്ങളിലെ നവീകരണത്തിലും ശ്രദ്ധ കേന്ദ്രീകരിക്കുന്നു.
298 കോടി രൂപയുടെ സംഭാവനയുമായി ഹിന്ദുജ ഫാമിലി ആദ്യ പത്ത് സ്ഥാനങ്ങളിൽ തിരിച്ചെത്തി.
ഹിന്ദുജ ഫൗണ്ടേഷനിലൂടെ ആരോഗ്യ സംരക്ഷണം, വിദ്യാഭ്യാസം, സുസ്ഥിര ഉപജീവന പരിപാടികളാണ് ലക്ഷ്യമിടുന്നത്.
എട്ടാമതുള്ള രോഹിണി നിലേകനി പട്ടികയിലെ ഏറ്റവും ഉദാരമതിയായ വനിതാ മനുഷ്യസ്നേഹിയായി. രോഹിണി നിലേകനി ഫിലാന്ത്രോപ്പീസിന്റെ ചെയർപേഴ്സണും എക്സ്റ്റെപ്പിന്‍റെ സഹസ്ഥാപകയുമായ അവർ വിദ്യാഭ്യാസത്തിലും സാമൂഹിക വികസനത്തിലും ശ്രദ്ധ കേന്ദ്രീകരിക്കുന്നു.
ആദ്യമായി ആദ്യ പത്തിൽ ഇടംനേടിയ സുധീർ, സമീർ മേത്ത യുഎൻഎം ഫൗണ്ടേഷൻ വഴി ആരോഗ്യ പരിപാലനം, വിദ്യാഭ്യാസം, ഗ്രാമവികസനം എന്നിവയെ പിന്തുണയ്ക്കുന്നു. വില്ലൂ പൂനവല്ല ഫൗണ്ടേഷൻ വഴി വിദ്യാഭ്യാസ, ആരോഗ്യ സംരക്ഷണ സംരംഭങ്ങൾക്കായി 173 കോടി രൂപ സംഭാവന നൽകി സൈറസ് എസ്. പൂനവാലയും അദാർ പൂനവാലയും ആദ്യ പത്തിൽ ഇടം നേടി.
ഇന്ത്യയിലുടനീളം സംഭാവനയിൽ കുത്തനെയുള്ള വർധനയാണ് മൊത്തത്തിലുള്ള പട്ടിക എടുത്തുകാണിക്കുന്നത്. കഴിഞ്ഞ അഞ്ച് വർഷത്തിനിടെ മുൻനിരയിലുള്ള 25 ഉദാരമതികൾ മാത്രം 50,000 കോടി രൂപ സംഭാവന ചെയ്തിട്ടുണ്ട്, പ്രതിദിനം ശരാശരി 46 കോടി രൂപ. 2014 മുതൽ ആദ്യ 25 പേരുടെ പട്ടികയിൽ ഇടം നേടാനുള്ള പരിധി 180% വർധിച്ചു. കൂടാതെ, ഇന്ത്യയിലെ മികച്ച 10 മനുഷ്യസ്നേഹികൾക്കുള്ള പരിധി 2020 മുതൽ ഇരട്ടിയിലധികമായി; 74 കോടി രൂപയിൽനിന്ന് 173 കോടിയായി ഉയർന്നു. 2024ൽ ഒരാളുടെ ശരാശരി സംഭാവന 43 കോടി രൂപയിൽ നിന്ന് 2025ൽ 54 കോടിയായി ഉയർന്നു.
ഉയർന്ന മൂല്യമുള്ള സംഭാവനകളിൽ കുതിച്ചുചാട്ടമാണുണ്ടായിരിക്കുന്നത്. 100 കോടി രൂപയ്ക്കു മുകളിൽ സംഭാവന ചെയ്യുന്ന വ്യക്തികളുടെ എണ്ണം 2018ൽ രണ്ടുപേരായിരുന്നു. എന്നാൽ ഈ വർഷമിത് 18 ആയി ഉയർന്നു. 50 കോടിക്കു മുകളിൽ സംഭാവന ചെയ്തവരുടെ എണ്ണം 33 ആയി. 20 കോടിക്കു മുകളിൽ സംഭാവന ചെയ്തവർ 70 ആണ്.
രഞ്ജൻ പൈ വ്യക്തിഗത ജീവകാരുണ്യത്തിൽ മുന്നിൽ
മണിപ്പാൽ എഡ്യുക്കേഷൻ ആൻഡ് മെഡിക്കൽ ഗ്രൂപ്പ് ചെയർമാനായ രഞ്ജൻ പൈ ഈ വർഷം വ്യക്തിഗത ജീവകാരുണ്യപ്രവർത്തനങ്ങളിൽ 100 കോടി രൂപയെന്ന നേട്ടം കൈവരിച്ചു. അദ്ദേഹത്തിന്‍റെ ആകെ സംഭാവന 160 കോടി രൂപയാണ്. ഇതോടെ വ്യക്തിഗത സംഭാവന നല്കുന്നവരിൽ ഏറ്റവും ഉദാരമതികളായ ആദ്യ അഞ്ചുപേരിൽ ഒരാളായി.
ഇൻഫോസിസ് കുടുംബം- നന്ദൻ നിലേകനി, ക്രിസ് ഗോപാലകൃഷ്ണൻ, കെ. ദിനേശ്, രോഹിണി നിലേകനി, കുമരി ഷിബുലാൽ - സംയുക്തമായി ഈ വർഷം 850 കോടി രൂപ സംഭാവന ചെയ്തു. പ്രതിദിനം ശരാശരി രണ്ടു കോടി രൂപ. ജീവകാരുണ്യപ്രവർത്തനത്തിന് ഒരു കോർപറേറ്റ് ഗ്രൂപ്പ് നൽകുന്ന ഏറ്റവും ഉയർന്ന തുകയെന്ന റിക്കാർഡ് ഇതാണ്.
വിദ്യാഭ്യാസത്തിനാണ് ഏറ്റവും കൂടുതൽ സംഭാവന ലഭിച്ചത്. 107 ഉദാരമതികൾ ഒന്നടങ്കം 4166 കോടി രൂപ ഇതിലേക്ക് സംഭാവന ചെയ്തു.
സെൽഫ് മേഡ് ഉദാമതികളുടെ എണ്ണം ഈ വർഷം 101 ആയി ഉയർന്നു. 2023ൽ 36 പേരായിരുന്നു. വനിതാ മനുഷ്യസ്നേഹികളുടെ എണ്ണം 24 ആയി.
Business
2008ല്‍ ഫോര്‍ബ്‌സ് പട്ടികയില്‍ 43 ബില്യണ്‍ ഡോളര്‍ സമ്പത്തുമായി മുകേഷ് അംബാനി ലോകസമ്പന്നരില്‍ അഞ്ചാമന്‍. തൊട്ടുപുറകില്‍ 42 ബില്യണ്‍ ഡോളറുമായി അനുജൻ അനില്‍ അംബാനി ആറാം സ്ഥാനത്ത്. 2025ല്‍ 92.5 ബില്യണ്‍ ഡോളര്‍ സമ്പത്തുമായി മുകേഷ് ലോകസമ്പന്നരില്‍ 18-ാമത്. അനില്‍ പട്ടികയ്ക്കു പുറത്ത്.
അധികാരത്തർക്കം
ധീരുഭായ് അംബാനി കെട്ടിപ്പടുത്ത റിലയന്‍സ് എന്ന ബിസിനസ് സാമ്രാജ്യത്തിന്‍റെ ചെങ്കോല്‍ മക്കള്‍ക്കു കൈമാറിയപ്പോള്‍ മാറിയത് റിലയന്‍സിന്‍റെ ചരിത്രം തന്നെയാണ്. മുകേഷിന്‍റെയും അനില്‍ അംബാനിയുടെയും പിതാവായ ധീരുഭായ് അംബാനി 2002ല്‍ വില്‍പത്രം തയാറാക്കാതെ മരിച്ചപ്പോള്‍, മുകേഷിനെ ചെയര്‍മാനും അനിലിനെ മാനേജിംഗ് ഡയറക്ടറുമായി നിയമിച്ചു.
28,000 കോടി രൂപയായിരുന്നു റിലയന്‍സ് കമ്പനിയുടെ അന്നത്തെ മൂല്യം. രണ്ടു സഹോദരങ്ങളും ഒന്നിച്ചുനീങ്ങുമെന്നു തോന്നി. എന്നാല്‍, അംബാനി സഹോദരങ്ങള്‍ക്കിടയില്‍ അധികാര തര്‍ക്കമുണ്ടെന്ന വാര്‍ത്ത പുറത്തുവരാന്‍ അധിക സമയംവേണ്ടിവന്നില്ല.
വിഭജനം
ഇരുവരും തമ്മിലുള്ള തര്‍ക്കം മുറുകിയതോടെ അമ്മ കോകിലബെന്‍ മുന്നോട്ടിറങ്ങി. ഭര്‍ത്താവ് ധീരുഭായ് അംബാനി സ്ഥാപിച്ച റിലയന്‍സ് സാമ്രാജ്യം രണ്ടായി വിഭജിക്കുകയേ മാര്‍ഗമുള്ളൂവെന്ന് മനസിലാക്കി. 2005 ല്‍ കമ്പനി രണ്ടായി വിഭജിക്കപ്പെട്ടു.
മുകേഷിന്‍റെ നേതൃത്വത്തിലുള്ള റിലയന്‍സ് ഇന്‍ഡസ്ട്രീസ് ലിമിറ്റഡും അനില്‍ നയിക്കുന്ന റിലയന്‍സ് അനില്‍ ധീരുഭായ് അംബാനി ഗ്രൂപ്പും പിറവിയെടുത്തു. അനില്‍ ടെലികോം, വൈദ്യുതി ഉല്‍പാദനം, ധനകാര്യ സേവന ബിസിനസുകള്‍ ഏറ്റെടുത്തപ്പോള്‍, മുകേഷ് എണ്ണ ശുദ്ധീകരണം, പെട്രോകെമിക്കല്സ് ബിസിനസുകള്‍ നിലനിര്‍ത്തി. 2010 വരെ അവര്‍ ബിസിനസില്‍ പരസ്പരം മത്സരിക്കില്ലെന്ന കരാറിലും ഒപ്പുവച്ചു.
റിലയന്‍സ് കമ്മ്യൂണിക്കേഷന്‍സ്, റിലയന്‍സ് പവര്‍, റിലയന്‍സ് ക്യാപിറ്റല്‍, റിലയന്‍സ് ഇന്‍ഫ്രാസ്ട്രക്ചര്‍, റിലയന്‍സ് നേവല്‍, റിലയന്‍സ് ഹോം ഫിനാന്‍സ് എന്നിവയാണ് അനില്‍ അംബാനിയുടെ റിലയന്‍സ് ഗ്രൂപ്പ് നടത്തുന്ന ബിസിനസുകള്‍. 2008ല്‍ അദ്ദേഹം റിലയന്‍സ് പവര്‍ ഐപിഒ (ഇനിഷ്യല്‍ പബ്ലിക് ഓഫറിംഗ്) ആരംഭിച്ചു.
നിക്ഷേപകരില്‍നിന്നു വന്‍ താത്പര്യം നേടിയതോടെ ഈ ഐപിഒ ഒരു മിനിറ്റിനുള്ളില്‍ സബ്‌സ്‌ക്രൈബ് ചെയ്യപ്പെട്ടു. ഇന്ത്യന്‍ മൂലധന വിപണിയിലെ ഏറ്റവും വേഗമേറിയ സബ്‌സ്‌ക്രിപ്ഷന്‍ അതായിരുന്നു. ഇതിലൂടെ 11,563 കോടി രൂപ സമാഹരിച്ചു. ഐപിഒയുടെ ആവേശത്തില്‍, അനിലിന്‍റെ ആസ്തി ഏകദേശം 42 ബില്യണ്‍ ഡോളറായി ഉയര്‍ന്നു, അദ്ദേഹം ലോകത്തിലെ ആറാമത്തെ ധനികനായ വ്യക്തിയായി.
ആദ്യ അടി
മുകേഷിന്‍റെ റിലയന്‍സ് ഇന്‍ഡസ്ട്രീസായിരുന്നു, കൃഷ്ണ ഗോദാവരി തടത്തിലെ പ്രകൃതിവാതകം കുഴിച്ചെടുത്തിരുന്നത്. മുഖ്യ ഉപഭോക്താവ് അനിലിന്‍റെ റിലയന്‍സ് നാച്ചുറല്‍ റിസോഴ്‌സും. അവര്‍ തമ്മിലുള്ള വിഭജന കരാറില്‍ പറഞ്ഞ പകുതി വിലയ്ക്കു പകരം കേന്ദ്ര സര്‍ക്കാര്‍ നിശ്ചയിച്ച ഉയര്‍ന്ന വിലക്കേ നല്‍കൂവെന്ന് മുകേഷ് നിലപാടെടുത്തു.
സുപ്രീംകോടതിയില്‍നിന്നു അനുകൂല വിധിയും നേടി. ഇതോടെ കുറഞ്ഞ പ്രകൃതി വാതക വില മുന്നില്‍ക്കണ്ട് തുടങ്ങിയ റിലയന്‍സ് പവറിന്‍റെ (റിലയന്‍സ് ഇന്‍ഫ്രാസ്ട്രക്ച്ചറിന്‍റെ ഉപ കമ്പനി) വൈദ്യുത പദ്ധതികളും ഇതിനായെടുത്ത വായ്പകളുടെ തിരിച്ചടവും പ്രശ്‌നത്തിലായി. ഇതായിരുന്നു അനിലിനേറ്റ ആദ്യ തിരിച്ചടി
റിലയന്‍സ് കമ്യൂണിക്കേഷന്‍റെ പതനം
അനില്‍ ഏറ്റെടുത്ത ഏറ്റവും പ്രതീക്ഷ നല്കുന്ന ബിസിനസായിരുന്നു റിലയന്‍സ് കമ്യൂണിക്കേഷന്‍സ് അഥവാ ആര്‍കോം.2002-ല്‍ റിലയന്‍സ് ഇന്‍ഫോകോം എന്ന പേരില്‍ ആര്‍കോം ആരംഭിച്ചപ്പോള്‍, അന്ന് വളര്‍ന്നുവരുന്ന ഒരു സാങ്കേതികവിദ്യയായിരുന്ന സിഡിഎംഎ (കോഡ് ഡിവിഷന്‍ മള്‍ട്ടിപ്പിള്‍ ആക്സസ്) പ്ലാറ്റ്ഫോമാണ് അവര്‍ തെരഞ്ഞെടുത്തത്. എയര്‍ടെല്‍, ഹച്ച് തുടങ്ങിയ എതിരാളികള്‍ ജിഎസ്എം (ഗ്ലോബല്‍ സിസ്റ്റം ഫോര്‍ മൊബൈല്‍ കമ്യൂണിക്കേഷന്‍) ഉപയോഗിച്ചിരുന്നു.
ടെലികോം വ്യവസായം വളര്‍ന്നപ്പോള്‍, ആര്‍കോമിന്‍റെ സിഡിഎംഎ റിലയന്‍സിനു പ്രതികൂലമായി. അവ 2ജി, 3ജി എന്നിവയെ മാത്രമേ പിന്തുണയ്ക്കുന്നുള്ളൂ. 4ജി വന്നതോടെ നഷ്ടം പൂര്‍ണമായി.റിലയന്‍സ് കമ്യൂണിക്കേഷന്‍സ് ഉപയോഗിച്ചിരുന്ന സിഡിഎംഎ സാങ്കേതികവിദ്യ 4 ജിക്കു യോജിക്കാത്തതായിരുന്നു. ഇരുവരും തമ്മില്‍ മത്സരമൊഴിവാക്കുന്ന കരാര്‍ രണ്ടു ഗ്രൂപ്പും റദ്ദുചെയ്തു.
മുകേഷിന്‍റെ വരവ്
2010ല്‍ നോണ്‍-കോമ്പീറ്റ് ക്ലോസ് അവസാനിച്ചതിനുശേഷം, അനില്‍ പ്രതിസന്ധി ഘട്ടത്തില്‍ നില്‍ക്കുമ്പോള്‍ 2016ല്‍ മുകേഷ് ഇന്‍ഫോടെല്‍ ബ്രോഡ്ബാന്ഡ് വാങ്ങി ടെലികോ വ്യവസായത്തിലേക്കു കടന്നു. വളരെ കുറഞ്ഞ വിലയ്ക്ക് ഫോണും സേവനവും നല്കിയ മുകേഷിന്‍റെ തന്ത്രം എല്ലാ ടെലികോം കമ്പനികളേയും പ്രതിസന്ധിയിലാക്കി.
സ്‌പെക്ട്രത്തിനും സേവന ശൃംഖല വിപുലമാക്കാനും വന്‍തോതില്‍ കടമെടുത്തിരുന്ന റിലയന്‍സ് കമ്യൂണിക്കേഷന്‍സ് ഇതോടെ തകര്‍ന്നടിഞ്ഞു. 2016ല്‍, റിലയന്‍സ് ജിയോ ഇന്‍ഫോകോം ആരംഭിച്ചുകൊണ്ട് മുകേഷ് ടെലികോ വ്യവസായത്തില്‍ കൊടുങ്കാറ്റായി മാറി, ഇത് ആര്‍കോമിന് മാത്രമല്ല, മുഴുവന്‍ ടെലികോം വ്യവസായത്തിനും ഭീഷണി ഉയര്‍ത്തി.
അങ്ങനെ മുകേഷ് ഇതോടെ അനിലിന്‍റെ സമ്പത്ത് 2008 ലെ 42 ബില്യണില്‍നിന്ന് 2011ല്‍ 8.8 ബില്യണിലേക്കു കൂപ്പു കുത്തി. മൂന്നു വര്‍ഷംകൊണ്ട് 80 ശതമാനം ഇടിവ്. പെരുകുന്ന നഷ്ടങ്ങള്‍ക്കും കടബാധ്യതകള്‍ക്കും ഇടയില്‍, ആര്‍കോം 2017 ല്‍ അതിന്‍റെ വയര്‍ലെസ് പ്രവര്‍ത്തനങ്ങള്‍ അടച്ചുപൂട്ടി. പിന്നീട് അനില്‍ മറ്റ് ബിസിനസുകളിലേക്കു ശ്രദ്ധ കേന്ദ്രീകരിച്ചു.
ആസ്തികള്‍ വില്‍ക്കുന്നതിനും കടം വീട്ടുന്നതിനുമുള്ള കട പരിഹാര പദ്ധതിയും അദ്ദേഹം പ്രഖ്യാപിച്ചു. 2019ല്‍ ആര്‍കോം കടം തിരിച്ചടയ്ക്കാന്‍ ആസ്തികള്‍ വില്‍ക്കാന്‍ കഴിയാത്തതിനാല്‍ പാപ്പരത്തത്തിന് അപേക്ഷ നല്കി.
നഷ്ടം തീര്‍ക്കാന്‍ വിൽപ്പന
2014ല്‍ റിലയന്‍സ് എന്റര്‍ടൈന്‍മെന്‍റ് ബിഗ് സിനിമാസ് തിയേറ്റര്‍ ശൃംഖല വിറ്റു. 2018ല്‍ മുംബൈയിലെ വൈദ്യുതി വിതരണ ബിസിനസ് റിലയന്‍സ് ഇന്‍ഫ്രാസ്ട്രക്ച്ചര്‍, അദാനി ട്രാന്‍സ്മിഷന് 18800 കോടി രൂപയ്ക്ക് വിറ്റു. ഭൂമി ഏറ്റെടുക്കല്‍, ഇന്ധനലഭ്യത പ്രശ്‌നങ്ങള്‍ കാരണം 2014ല്‍ ദാദ്രി വൈദ്യുത പദ്ധതിയില്‍നിന്നും റിലയന്‍സ് എനര്‍ജി പിന്‍വാങ്ങി.
2018ല്‍ റിലയന്‍സ് കമ്മ്യൂണിക്കേഷന്‍സ് അവരുടെ സ്‌പെക്ട്രം 18000 കോടിക്ക് ജിയോയ്ക്കു വില്‍ക്കാന്‍ ധാരണയായെങ്കിലും സ്‌പെക്ട്രം വാങ്ങുന്നയാള്‍ കുടിശിക കൂടി അടക്കണമെന്ന് ടെലികോം വകുപ്പ് നിബന്ധന മൂലം ഇതും മുടങ്ങി.
പ്രതിസന്ധിയുടെ ഘോഷയാത്ര
ഇങ്ങനെ ഒന്നിനുപിറകെ ഒന്നായി അനില്‍ ഗ്രൂപ്പ് കമ്പനികള്‍ പ്രതിസന്ധി നേരിട്ടു. വായ്പാ തിരിച്ചടവ് മുടങ്ങി, പാപ്പരാത്തനടപടികളിലേക്കു നീങ്ങി. ഇതിനിടയിലും റിലയന്‍സ് ക്യാപിറ്റല്‍ നല്ല രീതിയില്‍ പ്രവര്‍ത്തിച്ചിരുന്നു. റിലയന്‍സ് മ്യുച്വല്‍ ഫണ്ട്, റിലയന്‍സ് ജനറല്‍ ഇന്‍ഷുറന്‍സ്, റിലയന്‍സ് ലൈഫ് ഇന്‍ഷ്വറന്‍സ് എന്നീ മുന്‍നിര സ്ഥാപനങ്ങളും റിലയന്‍സ് ഹോം ഫിനാന്‍സ്, റിലയന്‍സ് കൊമേര്‍ഷ്യല്‍ ഫിനാന്‍സ് എന്നിവയും റിലയന്‍സ് ക്യാപ്പിറ്റലിനു കീഴിലായിരുന്നു.
കടബാധ്യത തീര്‍ക്കാന്‍ ഇന്ത്യയിലെതന്നെ മികച്ച മ്യൂച്വല്‍ ഫണ്ടുകളിലൊന്നായ റിലയന്‍സ് മ്യുച്വല്‍ ഫണ്ടും വില്‍ക്കാന്‍ അനില്‍ നിര്‍ന്ധിതനായി. പക്ഷേ, സെബി നിയന്ത്രണത്തിലുള്ള മ്യുച്വല്‍ ഫണ്ടിലെ നിക്ഷേപവും ലാഭവും യൂണിറ്റ് ഉടമകള്‍ക്കുള്ളതാണ്. അതു വക മാറ്റാന്‍ സാധ്യമല്ല.
സ്വന്തം കമ്പനികളുടെ ഓഹരികള്‍ അനില്‍ പണയം വച്ച് കടമെടുത്തിരുന്നു. 2019ല്‍ കമ്പനികളുടെ ഓഹരിവില കുത്തനെ ഇടിഞ്ഞപ്പോള്‍ ഇവയുടെ ഈടില്‍ വായ്പ കൊടുത്ത കമ്പനികള്‍ പണയപ്പെടുത്തിയ ഓഹരികള്‍ വില്‍ക്കാന്‍ തുടങ്ങി. ഇതു വിലത്തകര്‍ച്ച കൂട്ടി. മാത്രമല്ല ഇതോടെ പ്രമോട്ടറായ അനിലിന്‍റെ ഭൂരിപക്ഷ വിഹിതം വന്‍തോതില്‍ കുറഞ്ഞു.
തുടരുന്ന കോടതി നടപടികള്‍
2019ല്‍ ആര്‍കോമിനെതിരേ എറിക്സണ് സമര്‍പ്പിച്ച മൂന്ന് ഹര്‍ജികള്‍ നാഷണല്‍ കമ്പനി ലോ ട്രൈബ്യൂണല്‍ (എന്‍സിഎല്‍ടി) അംഗീകരിച്ചു. ആ സമയത്ത്, ആര്‍കോം 1,100 കോടിയിലധികം രൂപ കുടിശിക വരുത്തിയിട്ടുണ്ടെന്ന് എറിക്സണ് അവകാശപ്പെട്ടു.
എറിക്‌സണിനുള്ള കുടിശിക അടയ്ക്കാത്തതിന്‍റെ പേരില്‍ സുപ്രീം കോടതി അനില്‍ അനിലിനെതിരെ കോടതിയലക്ഷ്യത്തിന് കേസെടുത്തു. ഒരു മാസത്തിനുള്ളില്‍ എറിക്സണ് 453 കോടി രൂപ നാലാഴ്ചക്കുള്ളില്‍ കൊടുക്കാന്‍ നിര്‍ദേശിച്ചു, ഇല്ലെങ്കില്‍ ജയില്‍ ശിക്ഷയും. ഈ പണം കൊടുത്ത് അനുജനെ രക്ഷിച്ചത് മുകേഷായിരുന്നു.
ആസ്തികള്‍ വട്ടപൂജ്യം
റിലയന്‍സ് കമ്യൂണിക്കേഷൻ മൂന്നു ചൈനീസ് ബാങ്കുകള്‍ നല്കിയ വായ്പ മുടക്കം വരുത്തിയ കേസിന്‍റെ വിചരാണ യുകെ കോടതിയിലായിരുന്നു. 700 മില്യണ്‍ ഡോളറിലധികമാണ് ഈ ബാങ്കുള്‍ വായ്പയായി നല്‍കിയത്.
2020 മേയില്‍ യുകെ കോടതി അനിലിനോട് ജൂണ്‍ 12നോ അതിനു മുമ്പോ കോടതി ചെലവുകള്‍ ഉള്‍പ്പെടെ 7.17 മില്യണ്‍ ഡോളര്‍ ബാങ്കുകള്‍ക്കു തിരിച്ചടയ്ക്കാന്‍ നിര്‍ദേശം നല്കി. സെപ്റ്റംബറില്‍ 25 കോടതിയിലെത്തിയ അനില്‍ അംബാനി തന്‍റെ ആസ്തികള്‍ വട്ടപൂജ്യമാണെന്നു കോടതിയില്‍ വ്യക്തമാക്കി.
സെബിയുടെ വിലക്ക്
കമ്പനിയിലെ പണം വഴിതിരിച്ചുവിട്ടതിന് 2024ല്‍ സെബി (സെക്യൂരിറ്റീസ് എക്‌സ്‌ചേഞ്ച് ബോര്‍ഡ് ഓഫ് ഇന്ത്യ) അനില്‍ അംബാനിക്ക് ഓഹരി വിപണിയില്‍നിന്ന് അഞ്ചു വര്‍ഷത്തെ വിലക്കേര്‍പ്പെടുത്തി. 25 കോടി രൂപ പിഴയും ചുമത്തി.
റിലയന്‍സ് ഹോം ഫിനാന്‍സിലെ ഫണ്ട് വഴിതിരിച്ചുവിട്ടതിന് ആ സ്ഥാപനത്തിന്‍റെ തലപ്പത്തുണ്ടായിരുന്ന ഉദ്യോഗസ്ഥര്ക്കും 24 സ്ഥാപനങ്ങള്‍ക്കും വിലക്കും പിഴയും ചുമത്തി. റിലയന്‍ ഹോം ഫിനാന്‍സിലെ ഉയര്‍ന്ന ഉദ്യോഗസ്ഥരുടെ ഒത്താശയോടെ പണം തട്ടിയെടുക്കാന്‍ അനില്‍ അംബാനി ആസൂത്രണം ചെയ്തതായി കണ്ടെത്തിയതിനെത്തുടര്‍ന്നായിരുന്നു നടപടി.
സുപ്രീം കോടതിയുടെ വിധി
2024ല്‍ അടുത്ത തിരിച്ചടിയുമേറ്റു. റിലയന്‍സ് ഇന്‍ഫ്രാസ്ട്രക്ചറിന്‍റെ മെട്രോ വിഭാഗമായ ഡല്‍ഹി എയര്‍പോര്‍ട്ട് മെട്രോ എക്‌സ്പ്രസ് പ്രൈവറ്റ് ലിമിറ്റഡും (ഡിഎഎഇപിഎല്‍) ഡല്‍ഹി മെട്രോ കോര്‍പറേഷനും (ഡിഎംആര്‍സി) തമ്മിലുള്ള തകര്‍ത്തില്‍ ആര്‍ബിട്രേഷന്‍ ട്രൈബ്യൂണലിന്‍റെ ഉത്തരവ് സുപ്രീകോടതി അസാധുവാക്കി.
ആര്‍ബിട്രേഷന്‍ തുകയായി ഡിഎഎഇപിഎല്ലിന് ലഭിക്കാനിരുന്ന 8000 കോടി രൂപ ഡിഎംആര്‍സി നല്‍കേണ്ടതില്ലെന്നാണ് വിധി വന്നത്. മാത്രമല്ല ഡിഎംആര്‍സി നല്കിയ 3,300 കോടി രൂപ അനിലിന്‍റെ കമ്പനി തിരികെ നൽകാനും കോടതി ഉത്തവിട്ടു.
തട്ടിപ്പായി പ്രഖ്യാപിച്ച് എസ്ബിഐ
അനില്‍ അംബാനി പ്രൊമോട്ടര് ഡയറക്ടറായിരുന്ന റിലയന്‍സ് കമ്യൂണിക്കേഷന്‍റെ ലോണ്‍ അക്കൗണ്ടുകള്‍ ഈ വര്‍ഷം ജൂലൈയില്‍ സ്റ്റേറ്റ് ബാങ്ക് ഓഫ് ഇന്ത്യ തട്ടിപ്പ് വിഭാഗത്തില്‍പ്പെടുത്തി. ഇതിനുപിന്നാലെ ഈ നടപടി ബാങ്ക് ഓഫ് ഇന്ത്യ സ്വീകരിച്ചു. ഇതിനിടെ ആര്‍കോമിന് തട്ടിപ്പ് വിഭാഗത്തില്‍നിന്നു കനറാ ബാങ്ക് ഒഴിവാക്കിയ നടപടി മുന്‍ ഡയറക്ടറായിരുന്ന അനിലിന് ആശ്വാസമായി.
ആര്‍കോം നിലവില്‍ പാപ്പരത്ത നടപടികളിലൂടെ കടന്നുപോകുകയാണ്. അനില്‍ അംബാനിയുടെ പല കമ്പനികളും തിരിച്ചടികളിലൂടെ പോകുമ്പോഴും ഈ വര്‍ഷം റിലയന്‍സ് ഇന്‍ഫ്രായും റിലയന്‍സ് പവറും ലാഭത്തിലേക്കുവരുന്ന പ്രകടനം നടത്തി. ഇതോടെ അനില്‍ അംബാനി ഇതിന്‍റെ സഹസ്ഥാപനമായ റിലയന്‍സ് ഡിഫന്‍സിന് പല വിദേശ കമ്പനികളില്‍നിന്ന് ആയുധങ്ങളും നിര്‍മിക്കാനും വിതരണം ചെയ്യാനുമുള്ള കരാറുകള്‍ ലഭിച്ചു.
സ്വത്ത് കണ്ടുകെട്ടി
വായ്പ തട്ടിപ്പ് കേസില്‍ അനില്‍ അംബാനിയുടെ 7500 കോടി രൂപയുടെ സ്വത്തുക്കള്‍ എന്‍ഫോഴ്‌സമെന്‍റ് ഡയറക്ടറേറ്റ് കണ്ടുകെട്ടി എന്നതാണ് ഏറ്റവുമൊടുവിലത്തെ സംഭവം.
ADVERTISEMENT
ADVERTISEMENT
SPACE FOR ADVERTISEMENT
Copyright © 2026, Rashtra Deepika Ltd. All Rights Reserved.
Design and Development 
Corehub Solutions
Contact Numbers :
+91 481 2566706, 2566707, 2566708
About Us Feedback Privacy Policy Terms and Conditions for Online Payment
E-paper LOGIN
LOGIN