ടെക്സസ്: ഇലോൺ മസ്കിന്‍റെ ബഹിരാകാശ കമ്പനിയായ സ്പേസ് എക്സിന്‍റെ ഭീമാകാരമായ ‘സ്റ്റാർഷിപ്പ്’ റോക്കറ്റ് ചരിത്രത്തിലാദ്യമായി വിജയകരമായി ഭൂമിയുടെ ഭ്രമണപഥത്തിലെത്തി. നിർണായകമായ 14-ാമത് പരീക്ഷണപ്പറക്കലിലാണ് സ്റ്റാർഷിപ്പ് ഈ സുപ്രധാന നേട്ടം കൈവരിച്ചത്.
2023 മുതൽ നടന്ന 13 പരീക്ഷണ വിക്ഷേപണങ്ങളും സബ് ഓർബിറ്റൽ തലത്തിൽ മാത്രമായിരുന്നു. 1500 കോടി ഡോളറിലധികം ചെലവഴിച്ചുള്ള വികസനത്തിനൊടുവിലാണ് ഈ ചരിത്രനേട്ടം. ടെക്സസിലെ ബോകാ ചിതയിലുള്ള സ്പേസ് ബേസ് കേന്ദ്രത്തിൽനിന്ന് ഇന്ത്യൻ സമയം ഇന്നലെ വൈകുന്നേരം 6.15നായിരുന്നു വിക്ഷേപണം.
ദൗത്യത്തിനിടെ നേരിട്ട നാടകീയമായ സാങ്കേതിക തടസങ്ങൾ മറികടന്നാണ് സ്റ്റാർഷിപ്പ് ലക്ഷ്യത്തിലെത്തിയത്. യാത്രാമധ്യേ മൂന്ന് പ്രധാന എൻജിനുകളിലൊന്ന് അപ്രതീക്ഷിതമായി പ്രവർത്തനം നിലച്ചതിനെത്തുടർന്ന് ദൗത്യം ഉപേക്ഷിക്കേണ്ടിവരുമെന്ന ഭീതി ഉയർന്നിരുന്നു. എന്നാൽ, മിനിറ്റുകൾക്കകം എൻജിനിയർമാർ അടിയന്തര പുനഃക്രമീകരണവും റീ സ്റ്റാർട്ടും നടത്തി റോക്കറ്റിനെ ഭ്രമണപഥത്തിൽ എത്തിക്കുകയായിരുന്നു. പത്തു മണിക്കൂർ നീളേണ്ടിയിരുന്ന ദൗത്യം സാങ്കേതികതടസം കാരണം മൂന്നു മണിക്കൂറായി വെട്ടിച്ചുരുക്കി.
ഭ്രമണപഥത്തിലെത്തിയ സ്റ്റാർഷിപ്പ്, തങ്ങളുടെ ആദ്യ പേലോഡായ 26 പുതിയ തലമുറ ‘സ്റ്റാർലിങ്ക് വി 3’ ഉപഗ്രഹങ്ങൾ വിജയകരമായി വിക്ഷേപിച്ചു. മുൻ തലമുറ ഉപഗ്രഹങ്ങളേക്കാൾ പത്തുമടങ്ങ് കൂടുതൽ ഡാറ്റാശേഷിയുള്ളവയാണിവ. ഉപഗ്രഹങ്ങളെല്ലാം പ്രവർത്തിച്ചുതുടങ്ങിയതായി ഇലോൺ മസ്ക് എക്സിലൂടെ അറിയിച്ചു.
ഭ്രമണപഥം പൂർത്തിയാക്കിയശേഷം പസഫിക് സമുദ്രത്തിൽ നിയന്ത്രിത ലാൻഡിംഗ് ബേൺ നടത്താൻ റോക്കറ്റിനായെങ്കിലും കടലിലെ പതനം മുന്പത്തേതുപോലെ സുഗമമല്ലാത്തതിനാൽ സമുദ്രോപരിതലത്തിൽ വച്ച് കൂറ്റൻ തീഗോളമായി മാറുകയാണുണ്ടായത്.
2008 സെപ്റ്റംബർ 28നാണ് സ്പേസ് എക്സിന്‍റെ ആദ്യ റോക്കറ്റായ ‘ഫാൽക്കൺ 1’ ആദ്യമായി ഭ്രമണപഥത്തിലെത്തിയത്. കൃത്യം 18 വർഷത്തിനുശേഷം അതേ തീയതിയിൽ തന്നെയാണ് സ്റ്റാർഷിപ്പും ഈ നേട്ടം കൊയ്തത്.
ലോകത്ത് ഇതുവരെ നിർമിക്കപ്പെട്ടിട്ടുള്ളതിൽവച്ച് ഏറ്റവും വലുതും ശക്തിയേറിയതുമായ റോക്കറ്റ് സിസ്റ്റമാണിത്.
124 മീറ്റർ ഉയരമുള്ള സ്റ്റാർഷിപ്പിന് 100 പേരെ വഹിക്കാനും 100 ടണ്ണിലധികം ഭാരം ബഹിരാകാശത്ത് എത്തിക്കാനും ശേഷിയുണ്ട്. നാസയുടെ അടുത്ത ചാന്ദ്രദൗത്യമായ ആർട്ടിമിസ്, ഭാവിയിലെ ചൊവ്വാദൗത്യങ്ങൾ എന്നിവയ്ക്ക് മനുഷ്യരെ കൊണ്ടുപോകാൻ രൂപകല്പന ചെയ്ത പൂർണമായും പുനരുപയോഗിക്കാവുന്ന റോക്കറ്റാണ് സ്റ്റാർഷിപ്പ്.
Deepika
E-paper LOGIN
LOGIN