Deepika
ADVERTISEMENT
National
സഹാറൻപുർ: ഉത്തർപ്രദേശിലെ സഹാറൻപുരിൽ ജില്ലാ കളക്ടറേറ്റ് ഓഫീസ് വളപ്പിൽ അനധികൃതമായി നിർമിച്ചതെന്ന് ആരോപിച്ചിരുന്ന മോസ്ക് പൊലി സിന്‍റെ സാന്നിധ്യത്തിൽ പൊളിച്ചുനീക്കി.
ഇന്നലെ രാവിലെ കനത്ത സുരക്ഷ ഏർപ്പെടുത്തിക്കൊണ്ട് കളക്ടറേറ്റ് സമുച്ചയത്തിലേക്കുള്ള അഞ്ചു പ്രവേശന കവാടങ്ങളും അടച്ചിട്ടാണു പൊളിക്കൽ നടപടിതുടങ്ങിയത്.
അഭിഭാഷകർ ഉൾപ്പെടെ പൊതുജനങ്ങളെ ആരെയും അകത്തേക്കു കടത്തിവിട്ടില്ല. കളക്ടറേറ്റ് വളപ്പിനുള്ളിൽ സ്ഥിതി ചെയ്യുന്ന മോസ്ക് അനധികൃതമായി നിർമിച്ചതാണെന്ന് 2025ൽ ബജ്‌രംഗ്ദ ൾ പ്രാദേശിക കണ്‍വീനർ വികാസ് ത്യാഗി, സിറ്റി മജിസ്ട്രേറ്റ് കോടതിയിൽ ഹർജി നൽകിയിരുന്നു.
Kerala
കോട്ടയം: പഴയ വാഹനങ്ങള്‍ നിരത്തുകളില്‍നിന്ന്‌ ഒഴിവാക്കി മലിനീകരണം കുറയ്‌ക്കുക എന്ന ലക്ഷ്യത്തോടെ കേന്ദ്രസര്‍ക്കാര്‍ കൊണ്ടുവന്ന വാഹനം പൊളിക്കല്‍ നയത്തോട്‌ മുഖം തിരിച്ച്‌ സംസ്ഥാനം.
കേന്ദ്രം പദ്ധതി പ്രഖ്യാപിച്ചിട്ട്‌ അഞ്ച്‌ വര്‍ഷമാകുമ്പോഴേക്കും കേരളത്തില്‍ ഒരു അംഗീകൃത പൊളിക്കല്‍ കേന്ദ്രം പോലും പൂര്‍ണ സജ്ജമായിട്ടില്ല. മോട്ടോര്‍ വാഹന വകുപ്പിന്‍റെ വിവരാവകാശ മറുപടിയില്‍ ഔദ്യോഗിക കണക്കുകള്‍ പ്രകാരം കഴിഞ്ഞ രണ്ടു വര്‍ഷത്തില്‍ അംഗീകൃത പൊളിക്കല്‍ കേന്ദ്രം (ആർവിഎസ്എഫ്- Registered Vehicle Scrapping Facility) വഴി പൊളിച്ചത് 388 വാഹനങ്ങള്‍ മാത്രമാണ്.
2025ല്‍ ഒരു വാഹനമാണ് ഇത്തരത്തില്‍ പൊളിച്ചത്. 2026ല്‍ ഇതുവരെ 387 വാഹനങ്ങള്‍ പൊളിച്ചു. അതേസമയം അംഗീകൃത വാഹനം പൊളിക്കല്‍ കേന്ദ്രംവഴി വാഹനം പൊളിച്ച് ആനുകൂല്യം പ്രയോജനപ്പെടുത്തിയത്‌ ഇതുവരെ 12 പേര്‍ മാത്രമാണ്. പഴയ വാഹനം പൊളിച്ച് പുതിയത്‌ വാങ്ങുന്നവര്‍ക്ക്‌ 25 ശതമാനം വരെ നികുതി ഇളവ്‌ കേന്ദ്രനയ പ്രകാരം ഉണ്ട്‌. 2023ല്‍ കേരളവും ഇതു സംബന്ധിച്ച് ഉത്തരവിറക്കിയിരുന്നു.
സര്‍ക്കാര്‍ കണക്കെടുത്ത 2253 വാഹനങ്ങള്‍ എവിടെ?
കേരളം 2023ല്‍ വാഹന സ്‌ക്രാപ്പിംഗ്‌ നയത്തിനു തുടക്കമിട്ടു. 15 വര്‍ഷത്തിലേറെ പഴക്കമുള്ള സര്‍ക്കാര്‍ വാഹനങ്ങള്‍ അംഗീകൃത കേന്ദ്രങ്ങൾ വഴി പൊളിച്ചുനീക്കാനായിരുന്നു തീരുമാനം. ആദ്യഘട്ടത്തില്‍ 2506 വാഹനങ്ങള്‍ സ്‌ക്രാപ്പ്‌ ചെയ്യാനാണ് സര്‍ക്കാര്‍ തീരുമാനിച്ചത്‌. 2023 ഫെബ്രുവരി 28നകം നടപടി പൂര്‍ത്തിയാക്കാനായിരുന്നു ലക്ഷ്യം. എന്നാല്‍, ഈ തീരുമാനം നടപ്പിലാക്കാനായില്ലെന്ന്‌ പിന്നീട് സര്‍ക്കാര്‍ പുറപ്പെടുവിച്ച ഉത്തരവില്‍ വ്യക്തമാക്കുന്നു.
തുടര്‍ന്ന്‌ കേന്ദ്രത്തിന്‍റെ 2023-24ലെ പ്രത്യേക മൂലധന നിക്ഷേപ പദ്ധതിയുടെ ഭാഗമായി സര്‍ക്കാര്‍ വിഷയം വീണ്ടും പരിശോധിച്ചു. സംസ്ഥാന സര്‍ക്കാര്‍, കെഎസ്‌ആര്‍ടിസി, തദ്ദേശ സ്വയംഭരണ സ്ഥാപനങ്ങള്‍, സ്വയംഭരണ സ്ഥാപനങ്ങള്‍, പൊതുമേഖലാ സ്ഥാപനങ്ങള്‍ എന്നിവയുടെ ഉടമസ്ഥതയിലുള്ള 15 വര്‍ഷത്തിലേറെ പഴക്കമുള്ള വാഹനങ്ങളുടെ പുതിയ കണക്ക്‌ തയാറാക്കി.
ഇതില്‍ 1436 സര്‍ക്കാര്‍ വാഹനങ്ങളും 720 കെഎസ്‌ആര്‍ടിസി വാഹനങ്ങളും ഒരു തദ്ദേശ സ്ഥാപന വാഹനവും അഞ്ച്‌ സ്വയംഭരണ സ്ഥാപന വാഹനങ്ങളും 91 പൊതുമേഖലാ സ്ഥാപന വാഹനങ്ങളും ഉള്‍പ്പടെ ആകെ 2,253 വാഹനങ്ങളാണ് കണ്ടെത്തിയത്. ഇവ സ്‌ക്രാപ്പ്‌ ചെയ്യാനാണ് സര്‍ക്കാര്‍ ഉത്തരവിട്ടത്‌. ഇതോടെ 2023ലെ ആദ്യ കണക്കായ 2506ല്‍നിന്ന്‌ പിന്നീട് തിരിച്ചറിഞ്ഞ വാഹനങ്ങളുടെ എണ്ണം 2253 ആയി. ഈ കുറവിന്‍റെ കാരണം സര്‍ക്കാര്‍ ഉത്തരവില്‍ പ്രത്യേകമായി വ്യക്തമാക്കിയിട്ടില്ല.
അതേസമയം, പദ്ധതിയുടെ അടുത്തഘട്ടമായി സംസ്ഥാനത്ത്‌ മൂന്നു മേഖലകളിലായി ആർവിഎസ്എഫ് കേന്ദ്രങ്ങള്‍ ഒരുക്കുന്നതിനുള്ള നടപടികളും മുന്നോട്ടുപോയി. എന്നാല്‍, 2025-26 കാലയളവില്‍ ആർവിഎസ്എഫ് വഴി സ്‌ക്രാപ്പ്‌ ചെയ്ത വാഹനങ്ങളുടെ എണ്ണം 388 മാത്രമാണെന്നാണ് മോട്ടോര്‍ വാഹന വകുപ്പിന്‍റെ വിവരാവകാശ മറുപടി വ്യക്തമാക്കുന്നത്‌.
മൂന്ന് മേഖല, മൂന്ന് കേന്ദ്രം, ഒന്നും പൂര്‍ണ സജ്ജമല്ല
കേരളത്തെ തെക്ക്‌, മധ്യം, വടക്ക്‌ എന്നിങ്ങനെ തിരിച്ച്‌ ഓരോ ആർവിഎസ്എഫ് സ്ഥാപിച്ചെങ്കിലും പൂര്‍ണ സജ്ജമായിട്ടില്ല. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം ജില്ലകള്‍ ഉള്‍പ്പെടുന്ന തെക്കന്‍ മേഖലയ്‌ക്കായി സ്റ്റീല്‍ ഇന്‍ഡസ്‌ട്രിയല്‍ ലിമിറ്റഡിന്‍റെ ചുമതലയില്‍ ചേര്‍ത്തല എസ്‌എന്‍പുരത്തും എറണാകുളം, ഇടുക്കി, തൃശൂര്‍, മലപ്പുറം, പാലക്കാട്‌ ജില്ലകള്‍ അടങ്ങുന്ന മധ്യമേഖലയ്‌ക്കായി കെഎസ്‌ആര്‍ടിസി-സിംകോയുടെ ചുമതലയില്‍ എടപ്പാളിലും കോഴിക്കോട്, വയനാട്‌, കണ്ണൂര്‍, കാസര്‍ഗോഡ്‌ ജില്ലകള്‍ അടങ്ങുന്ന വടക്കന്‍ മേഖലയ്‌ക്കായി സ്റ്റീല്‍ ഇന്‍ഡസ്‌ട്രിയല്‍ ലിമിറ്റഡിന്‍റെ ചുമതലയില്‍ കണ്ണൂര്‍ അഴീക്കലുമാണ് ആർവിഎസ്എഫ് സ്ഥാപിച്ചെങ്കിലും പൂര്‍ണതോതില്‍ പ്രവര്‍ത്തനസജ്ജമായിട്ടില്ല.
District News
കൊല്ലം: വാടക തര്‍ക്കത്തെത്തുടര്‍ന്ന് വര്‍ഷങ്ങളായി ദന്പതികൾ താമസിച്ചുവരുന്ന വീടും കടയും ഉടമകള്‍ മണ്ണുമാന്തി യന്ത്രം ഉപയോഗിച്ച് ഇടിച്ചുനിരത്തി.
വാടകക്കാരായ ദമ്പതികള്‍ പരാതി നല്‍കാന്‍ പൊലീസ് സ്റ്റേഷനില്‍ പോയിരുന്ന സമയത്താണ് സംഭവം.
അബ്ദുൾ വാഹിദും സുഹറാ ബീവിയും വര്‍ഷങ്ങളായി താമസിച്ചു വന്നിരുന്ന കടയോട് കൂടിയ വീടാണ് ഉടമകള്‍ ഇന്നലെ രാവിലെ പൂര്‍ണമായും തകര്‍ത്തത്.
വാടകക്കാരും ഉടമകളും തമ്മില്‍ വിഷയത്തില്‍ കോടതിയില്‍ കേസ് നിലനില്‍ക്കുന്നുണ്ട്. തങ്ങള്‍ പരാതി നല്‍കുന്നതിനായി പൊലീസ് സ്റ്റേഷനില്‍ പോയിരുന്ന സമയത്താണ് ഉടമസ്ഥര്‍ കെട്ടിടം തകര്‍ത്തതെന്ന് ദമ്പതികള്‍ ആരോപിച്ചു. അന്‍വര്‍, ദില്‍വര്‍ എന്നിവരുടെ നേതൃത്വത്തിലാണ് വീട് തകര്‍ത്തതെന്നും ദമ്പതികള്‍ ആരോപിക്കുന്നു. വീട് തകര്‍ത്തതോടെ വസ്ത്രങ്ങളും മറ്റ് വീട്ടുസാധനങ്ങളും അടക്കം അവശിഷ്ടങ്ങള്‍ക്കിടയില്‍പ്പെട്ടു നശിച്ചതായും അബ്ദുൾ വാഹിദും സുഹറാ ബീവിയും പറഞ്ഞു.
National
മുംബൈ: ബാബറി മസ്ജിദ് തകർക്കാൻ പാടില്ലായിരുന്നുവെന്ന് പറയുന്നത് ദേശവിരുദ്ധമല്ലെന്ന് ബോംബെ ഹൈക്കോടതി. എസ്ഡിപിഐ പ്രവർത്തകരെ നാടുകടത്തിയ പോലീസ് നടപടി റദ്ദാക്കിയായിരുന്നു കോടതിയുടെ പരാമർശം.
ഹർജിക്കാരുടെ മതം പോലീസ് നടപടിക്കു പ്രേരണയായെന്ന് കരുതുന്നതായും ജസ്റ്റീസ് മാധവ് ജാംദറിന്‍റെ ബെഞ്ച് പറഞ്ഞു.
എസ്ഡിപിഐ പ്രവർത്തകരായ ഫിറോസ് അബ്ദുൾ വഹാബ് ഖാൻ, മുഹമ്മദ് റഫീഖ് ഗുലാം റസൂൽ അൻസാരി എന്നിവരെ നാടുകടത്തിയ നടപടി കോടതി റദ്ദാക്കി.
2025 ഡിസംബറിൽ ഇരുവരെയും മുംബൈയിൽനിന്ന് ഒരു വർഷത്തേക്കാണു പോലീസ് നാടുകടത്തിയത്. വഖഫ് ബിൽ, സിമന്‍റ് ഗോഡൗണുകൾ മൂലമുണ്ടാകുന്ന വായു മലിനീകരണം, ബാബറി മസ്ജിദ് പ്രശ്നം എന്നിവയുമായി ബന്ധപ്പെട്ട പ്രതിഷേധങ്ങളിൽ പങ്കെടുത്തതുമായി ബന്ധപ്പെട്ട് രജിസ്റ്റർ ചെയ്ത കേസിലായിരുന്നു പോലീസ് നടപടി.
മറ്റ് രാഷ്‌ട്രീയ പാർട്ടികളിലെ പ്രവർത്തകരും ഇതേ പ്രകടനത്തിൽ പങ്കെടുത്തിരുന്നെങ്കിലും ഇവർക്കെതിരേ മാത്രം നടപടിയെടുത്തതിനെ കോടതി വിമർശിച്ചു.
ഒരു പ്രത്യേക മതവിഭാഗത്തില്‍പ്പെട്ടതുകൊണ്ടാണോ ഇവര്‍ക്കെതിരേ മാത്രം നടപടിയെടുത്തതെന്നും കോടതി പോലീസിനോട് ആരാഞ്ഞു. എഫ്‌ഐആറിൽ മുദ്രാവാക്യം വിളിച്ചതായി മാത്രമേ പറയുന്നുള്ളൂ.
വ്യക്തികൾക്കോ പൊതു സ്വത്തിനോ നാശനഷ്‌ടങ്ങളുണ്ടായതായി സൂചിപ്പിക്കുന്നില്ലെന്നും കോടതി ചൂണ്ടിക്കാട്ടി. ഊഹാപോഹങ്ങളുടെ അടിസ്ഥാനത്തിൽ മൗലികാവകാശങ്ങൾ പരിമിതപ്പെടുത്താൻ കഴിയില്ലെന്നും കോടതി കൂട്ടിച്ചേർത്തു.
National
കോൽക്കത്ത: തൃണമൂൽ കോൺഗ്രസ് ദേശീയജനറൽ സെക്രട്ടറിയും എംപിയുമായ അഭിഷേക ബാനർജിയുടെ ഓഫീസ് കെട്ടിടം ജില്ലാഭരണകൂടം പൊളിച്ചുനീക്കി. ആംതലയിലുള്ള ഓഫീസ് കെട്ടിടമാണ് പൊളിച്ചുനീക്കിയത്.
നിർമാണ അനുമതികളില്ലാതെയും ചട്ടങ്ങൾ ലംഘിച്ചുമാണ് അഞ്ചുനിലകളുള്ള കെട്ടിടം നിർമിച്ചതെന്നാണ് ജില്ലാ ഭരണകൂടത്തിന്‍റെ വാദം. ബുൾഡോസറുകൾ ഉപയോഗിച്ച് കെട്ടിടം പൊളിച്ചുനീക്കിയത്.
നിയമപരമായ നോട്ടീസുകൾ നൽകിയിട്ടും ബന്ധപ്പെട്ടവരിൽ നിന്ന് പ്രതികരണമില്ലെന്നും അവർ പറയുന്നു.
പശ്ചിമബംഗാളിലും ബിജെപി ബുൾഡോസർ സംസ്‌കാരം നടപ്പിലാക്കുകയാണെന്നാണ് സംഭവത്തോട് തൃണമൂൽ കോൺഗ്രസിന്‍റെ പ്രതികരണം.
National
കോൽക്കത്ത: പശ്ചിമബംഗാളിൽ നിർമാണത്തിലിരുന്ന പള്ളിക്കു നേരേ തീവ്രഹിന്ദുത്വവാദികളുടെ ആക്രമണം.
കോൽക്കത്തയിൽനിന്നു 30 കിലോമീറ്റർ അകലെ സൗത്ത് 24 പർഗാനാസ് ജില്ലയിലെ സോനാർപുർ പോലീസ് സ്റ്റേഷൻ പരിധിയിലുള്ള സുഭാഷ് ഗ്രാമിൽ പ്രസ്ബിറ്റീരിയൻ ചർച്ച് ഓഫ് ഇന്ത്യയുടെ കീഴില്‍ നിർമിക്കുന്ന പള്ളിക്കു നേരേ കഴിഞ്ഞ ഞായറാഴ്ചയായിരുന്നു ആക്രമണം. ഉച്ചകഴിഞ്ഞ് മൂന്നോടെ നൂറോളം വരുന്ന ‘ഹിന്ദു ജാഗരൺ മഞ്ച് ’ പ്രവർത്തകർ, നിർമാണത്തിലിരുന്ന പള്ളിയിലേക്ക് അതിക്രമിച്ചു കയറുകയായിരുന്നുവെന്ന് പ്രദേശവാസികൾ പറയുന്നു.
പെയിന്‍റിംഗ് ജോലികൾ നടക്കുകയായിരുന്ന പള്ളിയുടെ തടിവാതിൽ അക്രമികൾ ചവിട്ടിപ്പൊളിച്ചു. തൊഴിലാളികൾ ഉപയോഗിച്ചിരുന്ന ഏണി ഉപയോഗിച്ച് പള്ളിക്കു മുകളിൽ കയറി മേൽക്കൂരയിലുണ്ടായിരുന്ന മൂന്ന് കുരിശുകൾ തകർത്തു. കുരിശ് തകര്‍ത്തപ്പോള്‍ താഴെ നിന്ന തീവ്ര ഹിന്ദുത്വവാദികള്‍ കരഘോഷം മുഴക്കുന്ന ദൃശ്യങ്ങളും പുറത്തു വന്നിട്ടുണ്ട്.
പ്രദേശത്തു പണം നൽകി മതപരിവർത്തനം നടത്തുന്നുവെന്ന് ആരോപിച്ചായിരുന്നു ആക്രമണം. എന്നാൽ, തങ്ങൾ 2017 മുതൽ ഇവിടെ താമസിക്കുന്നവരാണെന്നും പാവപ്പെട്ട കുടുംബങ്ങളായ തങ്ങൾക്ക് മതപരിവർത്തനം നടത്താൻ എവിടെനിന്നാണു പണമെന്നും വിശ്വാസികൾ ചോദിക്കുന്നു. സംഭവത്തില്‍ സോനാർപുർ പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.
ആക്രമണങ്ങൾ വർധിക്കുന്നതിൽ ആശങ്ക
പശ്ചിമബംഗാളിൽ ബിജെപി സർക്കാർ അധികാരമേറ്റതിനു പിന്നാലെ ക്രൈസ്തവ സമൂഹത്തിനും പള്ളികൾക്കും സ്ഥാപനങ്ങൾക്കും നേരേ ആക്രമണം വർധിച്ചതായാണു റിപ്പോർട്ട്.
കഴിഞ്ഞ നാലിന് പശ്ചിമ മേദിനിപുരിലെ പാൽബാരി പ്രദേശത്തു നടത്തിയ പ്രാർഥനാസമ്മേളനം തീവ്ര ഹിന്ദുത്വ സംഘടന തടസപ്പെടുത്തിയിരുന്നു. സ്ഥലത്തു പോലീസ് ഉണ്ടായിരുന്നിട്ടും അക്രമികളെ തടയുന്നതിൽ പരാജയപ്പെട്ടുവെന്നും പകരം സഭയിലെ പാസ്റ്ററായ അനൂപ് ഘോഷിനെ അടിസ്ഥാനരഹിതമായ ആരോപണങ്ങൾ ഉന്നയിച്ച് കസ്റ്റഡിയിലെടുക്കുകയാണു ചെയ്തതെന്നും സംഘടനകൾ ആരോപിച്ചു.
കഴിഞ്ഞ അഞ്ചിന് കത്വ സബ്ഡിവിഷനു കീഴിലുള്ള ഫരീദ്പുർ കോളനിയിലെ ഗ്രേസ് പള്ളിയിൽ ആരാധനയ്ക്കിടെ സായുധസംഘം ആക്രമണം നടത്തി. ആക്രമണത്തിന് ഒരു ദിവസം മുന്പ് പള്ളിയിലെത്തി രണ്ടു ലക്ഷം രൂപ ഗുണ്ടാപ്പിരിവ് ആവശ്യപ്പെട്ടിരുന്നുവെന്നും പോലീസിനെ അറിയിച്ചിട്ടും നടപടിയുണ്ടായില്ലെന്നും ബന്ധപ്പെട്ടവർ പറഞ്ഞു.
14ന് കോൽക്കത്തയിൽ പ്രതിഷേധപ്രകടനം
പള്ളികൾക്കും വിശ്വാസികൾക്കും നേരേയുണ്ടാകുന്ന അതിക്രമങ്ങളിൽ പ്രതിഷേധിച്ച് ഈ മാസം 14ന് തലസ്ഥാനമായ കോൽക്കത്തയിൽ പ്രകടനം നടത്താൻ ബംഗാൾ ക്രിസ്ത്യൻ കൗൺസിൽ തീരുമാനിച്ചിട്ടുണ്ട്.
District News
കോലഞ്ചേരി: പുത്തൻകുരിശ് പഞ്ചായത്തിലെ വടയാമ്പാത്ത് മലയ്ക്ക് സമീപം ഏതു നിമിഷവും നിലംപൊത്താവുന്ന വിധം അപകടാവസ്ഥയിൽ നിലനിന്ന വാട്ടർ ടാങ്ക് പുത്തൻകുരിശ് പഞ്ചായത്ത് അധികൃതർ ഇടപെട്ട് പൊളിച്ചുനീക്കി. ജനവാസ മേഖലയായ ഇവിടെ സമീപവാസികൾക്ക് പേടിസ്വപ്നമായി കഴിഞ്ഞ എട്ടു വർഷമായി നിലനിന്ന ടാങ്കാണ് പൊളിച്ചത്.
പഞ്ചായത്തിന്‍റെ വിവിധ മേഖലകളിലേക്ക് കുടിവെള്ളമെത്തിക്കുന്നതിനാണ് ഉയർന്ന പ്രദേശമായ വടയാമ്പാത്ത് മലയിൽ ടാങ്ക് സ്ഥാപിച്ചത്. 1983-84 കാലഘട്ടത്തിൽ കേരള വാട്ടർ അഥോറിറ്റി പട്ടിമറ്റം ഡിവിഷന്‍റെ കീഴിൽ നിർമിച്ച ഈ ടാങ്കിന് രണ്ട് ലക്ഷം ലിറ്റർ വെള്ളം സംഭരിക്കാനുള്ള ശേഷിയുണ്ടായിരുന്നു. എന്നാൽ ചോർച്ചയും ബലക്ഷയവും മൂലം 2018 മുതൽ ടാങ്ക് ഉപയോഗശൂന്യമായി.
ഏതുസമയത്തും തകർന്നുവീഴാവുന്ന അവസ്ഥയിലായിരുന്നതിനാൽ നാട്ടുകാർ ഏറെ ആശങ്കയിലായിരുന്നു. സമീപത്ത് പുത്തൻകുരിശ് - കരിമുകൾ റോഡും പഞ്ചായത്ത് റോഡും സ്ഥിതി ചെയ്യുന്നതിനാൽ ടാങ്ക് തകർന്നുവീണാൽ വലിയ ദുരന്തത്തിന് ഇടയാക്കുമെന്ന ആശങ്കയും ഉയർന്നിരുന്നു.
ഇതേത്തുടർന്ന് വാർഡ് അംഗം വിഷയം ഗ്രാമപഞ്ചായത്ത് യോഗത്തിൽ ഉന്നയിക്കുകയും ടാങ്ക് അടിയന്തരമായി പൊളിച്ചുനീക്കണമെന്ന് ആവശ്യപ്പെട്ട് ജലവിഭവ മന്ത്രിക്കും പ്രിൻസിപ്പൽ സെക്രട്ടറിക്കും പരാതി നൽകുകയും ചെയ്തിരുന്നു. കഴിഞ്ഞ പഞ്ചായത്ത് കമ്മിറ്റിയിൽ വിഷയമെത്തിയതോടെ അടിയന്തരമായി പൊളിച്ചുനീക്കാൻ പ്രസിഡന്‍റ് റെജി തോമസ് നിർദേശം നൽകി. തുടർന്നാണ് കേരള വാട്ടർ അഥോറിറ്റി നടപടി സ്വീകരിച്ച് ടാങ്ക് പൊളിച്ചുമാറ്റിയത്. വർഷങ്ങളായുള്ള ജനങ്ങളുടെ ആശങ്കയ്ക്ക് ഇതോടെ വിരാമമായി. സമീപ മേഖലകൾക്ക് മുഴുവൻ സുരക്ഷയും ഒരുക്കിയ ശേഷമാണ് ടാങ്ക് പൊളിച്ചത്.
പൊതുസുരക്ഷ ഉറപ്പാക്കാൻ ബന്ധപ്പെട്ട വകുപ്പുകളെ ഏകോപിപ്പിച്ച് പഞ്ചായത്ത് ഭരണസമിതി നടത്തിയ നീക്കമാണ് വിജയത്തിലെത്തിയതെന്ന് പ്രസിഡന്‍റ് അറിയിച്ചു.
International
ഇസ്‌ലാമാബാദ്: പാക്കിസ്ഥാനിൽ 125 വർഷം പഴക്കമുള്ള ചരിത്രപ്രസിദ്ധ സിക്ക് ഗുരുദ്വാര പൊളിച്ചുനീക്കി.
പാക് പഞ്ചാബ് പ്രവിശ്യയിലെ ഫറൂഖാബാദിലുള്ള ശ്രീ ഗുരു സിംഗ് സഭാ സാഹിബ് ഗുരുദ്വാരയാണ് കഴിഞ്ഞ മാസം 24ന് പ്രാദേശിക വ്യവസായി പൊളിച്ചുനീക്കിയത്.
സംഭവത്തിൽ സിക്ക് സമൂഹം പ്രതിഷേധവുമായി രംഗത്തെത്തി. ഇന്ത്യയും നടപടിയെ ശക്തമായി അപലപിച്ചു.
Kerala
കോതമംഗലം: മാമലക്കണ്ടത്ത് കാട്ടാനക്കൂട്ടം വീട് ആക്രമിച്ചു. ചാമപ്പാറ മാവിന്‍ചുവട് കോട്ടയ്ക്കകത്ത് ഡെനീഷ് ജോസഫിന്‍റെ വീടാണു തകര്‍ത്തത്. പലവട്ടം കാട്ടാനകൾ ആക്രമിച്ച വീടാണിത്. സംഭവസമയത്ത് വീട്ടിൽ ആരുമില്ലാതിരുന്നതിനാൽ വൻ ദുരന്തം ഒഴിവായി. ഇന്നലെ രാവിലെ 6.45ഓടെയായിരുന്നു സംഭവം.
ഡെനീഷിന്‍റെ പിതാവ് ജോസഫാണ് ഇവിടെ താമസിച്ചിരുന്നത്. കാന്‍സര്‍ ബാധിതനായ ജോസഫിനെ ആശുപത്രിയില്‍ കൊണ്ടുപോയശേഷം തിരികെയെത്തി അന്നു രാത്രി ഡെനീഷിന്‍റെ വീട്ടിലാണു താമസിച്ചത്. ഇന്നലെ പുർച്ചെ വീട്ടിലേക്കു തിരികെയെത്തിയപ്പോള്‍ വീട്ടുമുറ്റത്തും പരിസരത്തുമായി ആനക്കൂട്ടം നില്‍ക്കുന്നതാണു കണ്ടതെന്ന് ഡെനീഷ് പറഞ്ഞു.
വീട് വാസയോഗ്യമല്ലാത്ത വിധം തകർത്തനിലയിലാണ്. ഒച്ചവച്ചാണ് ആനക്കൂട്ടത്തെ തുരത്തിയത്. എട്ടു മാസത്തിനിടെ നാലാം തവണയാണ് ഡെനീഷിന്‍റെ വീട് ആനക്കൂട്ടം തകര്‍ക്കുന്നത്. ഇതിനുമുമ്പ് ഫെബ്രുവരിയിലായിരുന്ന ആക്രമണം. ഇക്കുറി വീടിന്‍റെ മൂന്നു ജനല്‍പ്പാളികളും ഭിത്തിയും തകര്‍ത്തു. വീടിനകത്തു കയറി പുതിയ കട്ടിലും വീട്ടുസാധനങ്ങളും നശിപ്പിച്ചു. അരിയും പലവ്യഞ്ജനങ്ങളും പാത്രങ്ങളും റേഷന്‍ കാര്‍ഡും പത്തു ദിവസത്തേക്ക് വാങ്ങിയ 4000 രൂപ വിലയുള്ള മരുന്നടക്കം പൂര്‍ണമായും നശിപ്പിച്ചു.
മൂന്നു തവണ ആനക്കൂട്ടം വീട് തകര്‍ത്തിട്ടും വനം വകുപ്പ് അധികൃതരെത്തി പരിശോധന നടത്തി പോയെങ്കിലും പട്ടയം ഇല്ലെന്ന കാരണം ചൂണ്ടിക്കാട്ടി ഇതുവരെ യാതൊരുവിധ സാമ്പത്തികസഹായവും നൽകിയിട്ടില്ലെന്ന് ഡെനീഷ് പറഞ്ഞു.
ആന പുരയിടത്തില്‍ പ്രവേശിക്കാതിരിക്കാന്‍ ട്രഞ്ച് താഴ്ത്താനും പുരയിടത്തിലെ മരംമുറിക്കാനും വനം വകുപ്പ് അധികൃതര്‍ അനുമതി നൽകുന്നില്ല. എന്നാൽ സമീപത്തെ പല റിസോര്‍ട്ടുകള്‍ക്കും വഴിവിട്ട സഹായം ഇവർ ചെയ്യുന്നുണ്ട്. നാലു പ്രാവശ്യമായി കാട്ടാന വീട് തകര്‍ത്തതിലൂടെ 15 ലക്ഷം രൂപയു‌ടെ നാശനഷ്‌ടം ഉണ്ടായിട്ടുണ്ട്.
National
ഛത്രപതി സംഭാജിനഗർ: നാസിക് ടിസിഎസ് നിർബന്ധിത മതപരിവർത്തന, ലൈംഗിക പീഡന കേസ് പ്രതി നിദ ഖാന് ഒളിയിടമൊരുക്കിയ എഐഎംഐഎം നഗരസഭാംഗം മതിൻ പട്ടേലിന്‍റെ വീട്ടിലെ അനധികൃത നിർമാണം നഗരസഭാ അധികൃതർ പൊളിച്ചുനീക്കി.
മേയ് ഏഴിനാണ് നിദ ഖാൻ അറസ്റ്റിലായത്. മേയ് ഒന്പതിന് അനധികൃത നിർമാണം സംബന്ധിച്ച് പട്ടേലിന് ഛത്രപതി സംഭാജിനഗർ കോർപറേഷൻ നോട്ടീസ് അയച്ചു. 72 മണിക്കൂറിനകം മറുപടി നല്കണമെന്നായിരുന്നു നിർദേശം.
എന്നാൽ, പട്ടേൽ കോർപറേഷനു മറുപടി നല്കിയില്ല. തുടർന്ന് കോടതിയെ സമീപിച്ചെങ്കിലും പ്രയോജനമുണ്ടായില്ല. ഇന്നലെ രാവിലെ നഗരസഭാ അധികൃതരെത്തി പട്ടേലിന്‍റെ വീട്ടിലെ അനധികൃത നിർമാണം പൊളിച്ചുനീക്കി.
National
ലക്നോ: തീവ്രവാദബന്ധം ആരോപിക്കപ്പെടുന്ന, ബ്രിട്ടൻ ആസ്ഥാനമായുള്ള ഇസ്‌ലാമിക പ്രഭാഷകന്‍റെ ഉടമസ്ഥതയിലുള്ള അനധികൃത മദ്രസ ഉത്തർപ്രദേശ് ഭരണകൂടം പൊളിച്ചുനീക്കി. സന്ത് കബീർ നഗറിലെ ഖലീലാബാദ് ടൗണിൽ മീറ്റ് മണ്ഡി മേഖലയിലുള്ള മദ്രസയാണ് ഞായറാഴ്ച പൊളിച്ചത്.
മദ്രസ സമിതി നൽകിയ അപ്പീൽ കോടതി തള്ളിയതിന് തൊട്ടുപിന്നാലെയാണ് നടപടി ആരംഭിച്ചതെന്ന് സബ് ഡിവിഷണൽ മജിസ്ട്രേറ്റ് ഹൃദയ് റാം തിവാരി പറഞ്ഞു. 2013-ൽ ബ്രിട്ടീഷ് പൗരത്വം നേടിയ മൗലാന ഷംഷുൽ ഹുദാഖാനുമായി ബന്ധപ്പെട്ടതാണ് പൊളിച്ച മദ്രസയെന്ന് അധികൃതർ വ്യക്തമാക്കി.
അനധികൃത വിദേശ ഫണ്ടിംഗ്, തീവ്രവാദ പ്രവർത്തനങ്ങൾ തുടങ്ങി വിവിധ കുറ്റങ്ങളിൽ മൗലാന ഷംഷുലിനെതിരേ ഭീകരവിരുദ്ധ സ്‌ക്വാഡ്, എൻഫോഴ്സ്മെന്‍റ് ഡയറക്‌ടറേറ്റ് തുടങ്ങിയ ഏജൻസികൾ അന്വേഷണം നടത്തിവരികയാണ്.
ഖലീലാബാദ് പോലീസ് സ്റ്റേഷനിൽ ഇയാൾക്കെതിരേ എഫ്‌ഐആർ രജിസ്റ്റർ ചെയ്തിട്ടുണ്ട്. മദ്രസ നിർമിച്ചിരിക്കുന്ന ഭൂമി സർക്കാർ ഭൂമിയാണെന്നും കെട്ടിട നിർമാണത്തിന് മുൻകൂർ അനുമതി വാങ്ങിയിട്ടില്ലെന്നും സബ് ഡിവിഷണൽ മജിസ്ട്രേറ്റ് അറിയിച്ചു. അസംഗഡ് സ്വദേശിയായ ഷംഷുൽ ഹുദാഖാൻ, തന്‍റെ രാജ ഫൗണ്ടേൻ എന്ന എൻജിഒ വഴിയും സ്വന്തം അക്കൗണ്ട് വഴിയും വിവിധ മദ്രസകളിലേക്ക് പണം എത്തിച്ചിരുന്നതായി കണ്ടെത്തിയിട്ടുണ്ട്.
ഇയാൾ പാക്കിസ്ഥാൻ സന്ദർശിച്ചിട്ടുണ്ടെന്നും പാക് കേന്ദ്രമായുള്ള ദഅ്‌വത്തെ ഇസ്‌ലാമി എന്ന് സംഘടനയിൽ അംഗമാണെന്നും അന്വേഷണ ഏജൻസികൾ ആരോപിക്കുന്നു. തട്ടിപ്പ്, ഗൂഢാലോചന തുടങ്ങി വിവിധ കുറ്റങ്ങൾ ചുമത്തി മൂന്നു എഫ്‌ഐആറുകളാണ് ഉത്തർപ്രദേശ് പോലീസ് ഇയാൾക്കെതിരേ സമർപ്പി ച്ചിട്ടുള്ളത്.
District News
ഇരിട്ടി: ആറളം പുനരധിവാസ മേഖലയിൽ ആനകളെ പ്രതിരോധിക്കാൻ സ്ഥാപിച്ചിരിക്കുന്ന സോളാർ തൂക്കുവേലികൾ ആനകൾ തകർക്കുന്നത് പതിവാകുന്നു. ബ്ലോക്ക് 10 കോട്ടപ്പാറ മേഖലയിലാണ് കാട്ടാനകൾ വേലികൾ വ്യാപകമായി തകർക്കുന്നത്. പ്രധാനമായും മരം മറിച്ചിട്ടാണ് ആനകൾ വേലി തകർക്കുന്നത്.
പുതുതായി സ്ഥാപിച്ച ഡബിൾ ലൈൻ തൂക്കുവേലിയാണ് ആന നിഷ്പ്രയാസം തകർക്കുന്നത്. അപകടകാരിയായ മോഴയാനായാണ് കൂടുതലായും വേലി തകർത്ത് ഉള്ളിൽ കയറുന്നത്. മോഴയാനക്ക് മറ്റാനകൾക്ക് ഏൽക്കുന്നത് പോലെ വേലിയിൽനിന്നു ഷോക്ക് എൽക്കില്ലെന്നാണ് പ്രദേശവാസികൾ പറയുന്നത്. മോഴയാനയുടെ ആക്രമണത്തിൽ മരിച്ച അനീഷിന്‍റെ വീടിന് മുന്നിൽ കഴിഞ്ഞ ദിവസവും ഇതേ ആനതന്നെ വീണ്ടും എത്തിയിരുന്നു.
വീടിന് മുന്നിൽ ഭീകരാന്തരീഷം സൃഷ്‌ടിച്ച മോഴ പിന്നീട് സമീപത്തെ സോളാർ വേലി തകർത്താണ് കാടുകയറിയത്. മാമ്പഴം, കശുവണ്ടി, ചക്ക തുടങ്ങിയ സീസൺ ആരംഭിച്ചതോടെ ആനകൾ ജനവാസ മേഖല ലക്ഷ്യമാക്കി നിരന്തരം എത്തുന്നതിൽ പ്രദേശവാസികൾ ആശങ്കയിലാണ്. മോഴ, ചെറിയ മോഴ, കല്ലേരി കൊമ്പൻ, കോരി കൊമ്പൻ, മൊട്ടു കൊമ്പൻ തുടങ്ങിയ ആനകളാണ് മേഖലയിലെ ഏറ്റവും അപകടകാരികൾ.
District News
ഇരിങ്ങാലക്കുട: ഉത്സവക്കാലത്തെ തിരക്ക് പരിഗണിച്ച് കൂടല്‍മാണിക്യം ക്ഷേത്രത്തിന്‍റെ ചുറ്റുമതിലിന്‍റെ തെക്കേനടപ്പുര വഴി പൊളിച്ച് വീതി കൂട്ടുന്നു. ഏഴടി വീതിയിലാണു പുതിയ വാതില്‍ നിര്‍മിക്കുന്നത്.
ഉത്സവം അടുത്തസാഹചര്യത്തില്‍ 75,000 രൂപ ചെലവഴിച്ച് താത്കാലിക ഇരുമ്പുവാതില്‍ സ്ഥാപിക്കും. ഉത്സവ ശേഷം സ്‌പോണ്‍സറെ കണ്ടെത്തി ക്ഷേത്രത്തിന്‍റെ കിഴക്കേനടപ്പുരയും പടിഞ്ഞാറേ നടപ്പുരയും പുനര്‍നിര്‍മിച്ചതുപോലെ തെക്കേ നടപ്പുരയും പുനര്‍നിര്‍മിക്കുമെന്ന് ദേവസ്വം വ്യക്തമാക്കി.
നേരത്തേ 130 സെന്‍റീമീറ്റര്‍ വീതിയുള്ള മരത്തിന്‍റെ വാതിലാണ് തെക്കേനടപ്പുരയിലുണ്ടായിരുന്നത്. ഇത് മാറ്റിയാണ് ഇപ്പോള്‍ താത്കാലികമായി ഇരുമ്പിന്‍റെ വാതില്‍ സ്ഥാപിക്കുന്നത്. വിശാലമായ ക്ഷേത്രമതില്‍ക്കെട്ടിനകത്തുനിന്നു കുപ്പിക്കഴുത്തുപോലെയുള്ള ഈ ഭാഗത്തുകൂടെ തിരക്കുള്ള സമയങ്ങളില്‍ ജനങ്ങള്‍ക്കു പുറത്തിറങ്ങാന്‍ വളരെ ബുദ്ധിമുട്ടുണ്ടാകുന്നുണ്ട്.
ആളുകളുടെ സുരക്ഷ പരിഗണിച്ച് വാതില്‍ വീതികൂട്ടി നിര്‍മിക്കണമെന്ന് പൊലീസും അഗ്നിശമനാസേനയും കുറേ കാലമായി ആവശ്യപ്പെടുന്നതാണ്. ഇതുകൂടി പരിഗണിച്ചാണ് ഇപ്പോള്‍ ഈ പണികള്‍ നടക്കുന്നത്. കിഴക്കേനടയിലെ ആനവാതില്‍ വീതികൂട്ടുന്ന പ്രവൃത്തിയും അവസാനഘട്ടത്തിലാണ്.
ഉത്സവത്തിന്‍റെ ഭാഗമായുള്ള കലാപരിപാടി ദേശീയ സംഗീത- നൃത്തോത്സവമായി ആഘോഷിക്കാന്‍ ആരംഭിച്ചതോടെ തെക്കേനടയില്‍ കുളത്തിന് എതിര്‍വശത്ത് പന്തല്‍കെട്ടി അകത്തും പുറത്തുമായിട്ടാണ് കലാപരിപാടികള്‍ അരങ്ങേറുന്നത്. ഇതുമൂലം ഇതുവഴിയുള്ള ആളുകളുടെ സഞ്ചാരം വളരെയേറെയായി.
മാത്രമല്ല, തൊട്ടടുത്ത ഉണ്ണായിവാര്യര്‍ കലാനിലയം ഹാളിലാണ് സംഘാടകര്‍ക്കും കലാകാരന്‍മാര്‍ക്കും ഭക്ഷണം സജ്ജമാക്കാറുള്ളത്. അതോടെ ഏതുസമയത്തും ആളുകള്‍ ക്ഷേത്രത്തിനകത്തേക്കും പുറത്തേക്കും കടക്കുന്നത് വലിയ തിരക്കുകണ്ടാക്കുന്നുണ്ട്. ഈ സാഹചര്യത്തിലാണ് ഉത്സവാഘോഷങ്ങളുടെ ഭാഗമായി വിളിച്ചുചേര്‍ത്ത യോഗത്തില്‍ പോലീസ് വാതിലിന് വീതികൂട്ടണമെന്ന് ആവശ്യപ്പെട്ടത്.
ഇതിന്‍റെ അടിസ്ഥാനത്തില്‍ കാണിപ്പയ്യൂര്‍ കൃഷ്ണന്‍ നമ്പൂതിരി നല്കിയ കണക്കുപ്രകാരം ക്ഷേത്രാചാരമര്യാദകള്‍ പാലിച്ചാണ് നടപ്പുരവഴി വീതികൂട്ടി നിര്‍മിക്കുന്നതെന്നും ദേവസ്വം അറിയിച്ചു.
Kerala
കണ്ണൂര്‍: പയ്യന്നൂരിലെ മുൻ സിപിഎം നേതാവും സ്വതന്ത്ര സ്ഥാനാർഥിയുമായ വി. കുഞ്ഞികൃഷ്ണന്‍റെ തെരഞ്ഞെടുപ്പ് കമ്മിറ്റി ഓഫീസ് പൊളിച്ചു. സ്ഥലം ഉടമയെ സിപിഎമ്മുകാര്‍ ഭീഷണിപ്പെടുത്തിയതിനെത്തുടര്‍ന്നാണ് പൊളിച്ചതെന്നാണ് ആക്ഷേപം.
ഭവിഷ്യത്ത് നേരിടേണ്ടിവരുമെന്നു ഭീഷണിപ്പെടുത്തിയതായും വിമതര്‍ ആരോപിച്ചു. ഓഫീസിനു സ്ഥലം കൊടുക്കരുതെന്ന ചിലര്‍ പറഞ്ഞതായി സ്ഥലമുടമ പറഞ്ഞു. പയ്യന്നൂര്‍ കോത്തായി മുക്കിലായിരുന്നു ഓഫീസ് നിര്‍മാണം.
ഭീഷണിയുണ്ടെന്നും ഓഫീസ് പൊളിച്ചു നീക്കിത്തരണമെന്നും ഉടമ ആവശ്യപ്പെട്ടതിനെത്തുടര്‍ന്നാണ് നീക്കം ചെയ്തതെന്നു കുഞ്ഞികൃഷ്ണൻ പറഞ്ഞു. തങ്ങള്‍ കാരണം മറ്റൊരാള്ക്ക് ബുദ്ധിമുട്ടുണ്ടാകരുതെന്നു കരുതിയാണ് പൊളിച്ചു നീക്കിയതെന്നും ജനാധിപത്യത്തെ പൂര്‍ണമായും അട്ടിമറിക്കുന്ന രീതിയിലേക്കാണ് കാര്യങ്ങള്‍ പോകുന്നതെന്നും കുഞ്ഞികൃഷ്ണൻ ആരോപിച്ചു.
National
ഹസാരിബാഗ് : ജാർഖണ്ഡ് മുൻ മന്ത്രിയും കോൺഗ്രസ് നേതാവുമായ യോഗേന്ദ്ര സാവോയുടെ വീട് ഹസാരിബാഗ് ജില്ലാ ഭരണകൂടം ഇടിച്ചുനിരത്തി. എൻടിപിസിയുടെ കൽക്കരി ഖനന പദ്ധതിക്കുവേണ്ടിയാണ് വീട് ഇടിച്ചുനിരത്തിയത്. ഭൂമി എൻടിപിസിക്കു കൈമാറി.
ജോർദാഗ് മേഖലയിലെവീടാണ് വൻ പോലീസ് സംഘത്തിന്‍റെ സാന്നിധ്യത്തിൽ ഇടിച്ചുനിരത്തിയത്. ഭൂമിയും നഷ്ടപരിഹാരവും സംബന്ധിച്ച് ദീർകാലമായി തർക്കം നിലനിന്നിരുന്നു. എൻടിപിസി നല്കിയ നഷ്ടപരിഹാരം യോഗേന്ദ്ര സാവോ സ്വീകരിച്ചിരുന്നില്ല. നഷ്ടപരിഹാരം വർധിപ്പിക്കണമെന്നാവശ്യപ്പെട്ട് സാവോയും ഭാര്യയും മുൻ എംഎൽഎയുമായ നിർമല ദേവിയും വീടിനു മുന്നിൽ ധർണ നടത്തിയിരുന്നു.
1.97 കോടി രൂപ നഷ്ടപരിഹാരം നല്കിയെങ്കിലും സാവോ സ്വീകരിച്ചില്ലെന്ന് എൻടിപിസി എജിഎം നീൽ മാധവ് സ്വെയിൻ പറഞ്ഞു. തുടർന്ന് റാഞ്ചിയിലെ ട്രൈബ്യൂണൽ കോടതിയിൽ പണം കെട്ടിവച്ചു.
കൽക്കരി ഖനന വികസന ജോലികൾ തടസപ്പെട്ടതിനെത്തുടർന്നാണ് വീട് ഇടിച്ചുപൊളിച്ചുനീക്കാൻ നടപടിയെടുത്തതെന്ന് എൻടിപിസി ഉദ്യോഗസ്ഥർ പറഞ്ഞു. വീട് പൊളിച്ചതിനെതിരേ നിയമനടപടി സ്വീകരിക്കുമെന്ന് യോഗേന്ദ്ര സാവോയുടെ മകളും മുൻ ബർക്കാഗാവ് എംഎൽഎയുമായ അംബാ പ്രസാദ് പറഞ്ഞു
District News
വരടിയം: കുട്ടികളുടെ ജീവനു ഭീഷണിയായ ഗവ. യുപി സ്കൂളിലെ തകർന്നുവീണ കവാടം ഉടൻ പൊളിച്ചുനീക്കണമെന്ന് ആവശ്യപ്പെട്ടും നിർമാണത്തിലെ അഴിമതി ചൂണ്ടിക്കാട്ടിയും കോണ്ഗ്രസ് അവണൂർ മണ്ഡലം കമ്മിറ്റി വരടിയം സ്കൂളിനുമുന്നിൽ സായാഹ്ന പ്രതിഷേധധർണ നടത്തി.
അടാട്ട് ബ്ലോക്ക് കോണ്ഗ്രസ് പ്രസിഡന്‍റ് പി.പി. അഭിലാഷ് ഉദ്ഘാടനം ചെയ്തു. മണ്ഡലം പ്രസിഡന്‍റ് എ.എം. ജെയ്സണ്‍ അധ്യക്ഷത വഹിച്ചു. ബാബു നീലങ്കാവിൽ, സുരേഷ് അവണൂർ, പി.വി. ബിജു, ലിന്‍റോ വരടിയം, അനിൽ സമ്രാട്ട്, മുരളീധരൻ ചേലാട്ട്, വി.വി. രാംകുമാർ, പി.ജെ. പോൾസണ്, പഞ്ചായത്ത് അംഗങ്ങളായ ബാബുരാജ്, പ്രിൻസി ജെൻസണ്‍, രമ്യ ഗിരീശൻ, തോമസ് വടക്കൻ, കെ.ജെ. ജോയ്സണ് എന്നിവർ പ്രസംഗിച്ചു.
Kerala
ന്യൂഡല്‍ഹി: പശ്ചിമ ഡല്‍ഹിയിൽ ബുള്‍ഡോസര്‍ രാജുമായി അധികൃതര്‍. കൊലക്കേസ് പ്രതിയുടെ വീട് ഡല്‍ഹി മുനിസിപ്പല്‍ കോര്‍പ്പറേഷന്‍ ഇടിച്ച് നിരത്തി. ഹോളി ദിനത്തില്‍ ഉത്തം നഗറില്‍ നടന്ന കൊലപാതക കേസിലെ മുഖ്യ പ്രതി ആകാശിന്‍റെ വീടാണ് തകര്‍ത്തത്.
വീട് അനധികൃതമായി കെട്ടിയതാണെന്ന് കാണിച്ചാണ് ശനിയാഴ്ച ഉച്ചയോടെ അധികൃതര്‍ തകര്‍ത്തത്. ശനിയാഴ്ച ഉച്ചയ്ക്ക് ഒന്നോടെ വലിയ പോലീസ് സന്നാഹത്തിന്‍റെ അകമ്പടിയോടെയാണ് ഉദ്യോഗസ്ഥര്‍ സ്ഥലത്തെത്തിയത്.
തുടർന്ന് ബുള്‍ഡോസറുകള്‍ ഉപയോഗിച്ച് കെട്ടിടം തകര്‍ക്കുകയായിരുന്നു.കെട്ടിടത്തിന്റെ മൂന്ന് നിലകളും പൂര്‍ണമായും ഇടിച്ച് നിരത്തി. കെട്ടിടം പൊളിക്കുന്ന സമയത്ത് പ്രദേശത്ത് സംഘര്‍ഷ സാധ്യത നിലനിന്നിരുന്നതിനാല്‍ കനത്ത സുരക്ഷ പോലീസ് ഒരുക്കിയിരുന്നു.
കഴിഞ്ഞ ആഴ്ചയാണ് ഉത്തം നഗറില്‍ നടന്ന തര്‍ക്കത്തിനിടെ ഒരു യുവാവ് ദാരുണമായി കൊല്ലപ്പെട്ടത്. വ്യക്തിപരമായ പ്രശ്നങ്ങളെ തുടർന്നുണ്ടായ തര്‍ക്കത്തിന് പിന്നാലെ ആകാശും കൂട്ടാളികളും ചേര്‍ന്ന് യുവാവിനെ കുത്തിക്കൊലപ്പെടുത്തുകയായിരുന്നു. പിന്നാലെ പ്രദേശത്ത് വലിയ പ്രതിഷേധം ഉടലെടുത്തിരുന്നു. സംഭവത്തിന് പിന്നാലെ ആകാശിനെ പൊലീസ് അറസ്റ്റ് ചെയ്തിരുന്നു.
മുൻകൂട്ടി നോട്ടീസ് നൽകിയ ശേഷമുള്ള അനധികൃത നിർമാണങ്ങൾക്കെതിരെയുള്ള സ്വാഭാവിക നടപടിയാണെന്നാണ് എംസിഡി ഉദ്യോഗസ്ഥർ വിശദീകരിക്കുന്നത്.
District News
വൈപ്പിൻ : ഏറെ നാളത്തെ മുറവിളിക്ക് ശേഷം നെടുങ്ങാട് പഴയ പള്ളി പാലം പൊളിച്ചു മാറ്റിയെങ്കിലും ഇതിന്‍റെ കോൺക്രീറ്റ് തൂണുകൾ ഇപ്പോഴും ബാക്കി. ഇതാകട്ടെ മത്സ്യത്തൊഴിലാളികൾക്കും പുഴയിലെ നീരൊഴുക്കിനും ഭീഷണിയായി നിലകൊള്ളുകയാണ്.
പാലം പൊളിക്കാൻ കരാറെടുത്ത ആളെക്കൊണ്ട് പണികൾ പൂർണമായും ചെയ്യിക്കേണ്ടത് പൊതുമരാമത്ത് അധികൃതരാണ്.എന്നാൽ ഒട്ടേറെ പരാതികൾ ഉയർന്നിട്ടും ഇവരുടെ ഭാഗത്തുനിന്നും ഒരു നടപടിയും ഉണ്ടായിട്ടില്ല.
ഈ സാഹചര്യത്തിൽ ഉദ്യോഗസ്ഥർ അനാസ്ഥ വെടിഞ്ഞ് അപകട ഭീഷണിയായി നിലനിൽക്കുന്ന തൂണുകൾ എത്രയും വേഗം പൊളിച്ച് മാറ്റണമെന്ന് നായരമ്പലം വില്ലേജ് കായലോര ടൂറിസം ഡെവലപ്മെന്‍റ് സൊസൈറ്റി പ്രസിഡന്‍റ് അഗസ്റ്റിൻ മണ്ടോത്ത് ആവശ്യപ്പെട്ടു.
District News
മുക്കം: നവീകരണ പ്രവൃത്തി പുരോഗമിക്കുന്ന പിസി ജംഗ്ഷൻ - വെസ്റ്റ് മാമ്പറ്റ ബൈപാസിൽ യാത്ര ഇനി സുഗമമാവും. നവീകരണ പ്രവൃത്തിക്ക് തടസമായിരുന്ന സാംസ്കാരിക നിലയവും അങ്കണവാടിയും പൊളിച്ചു മാറ്റി.
ഈ കെട്ടിടങ്ങൾ പൊളിച്ചു നീക്കാതെ പ്രവൃത്തി പൂർത്തിയാക്കിയാൽ, വീതി കൂട്ടുന്ന റോഡിന്‍റെ ഈ ഭാഗം കുപ്പിക്കഴുത്താകുമെന്ന് ആശങ്കയുണ്ടായിരുന്നു. റോഡിന്‍റെ മറ്റു ഭാഗങ്ങളിൽ വീടുകളുടെ ചുറ്റുമതിൽ ഉൾപ്പെടെയുള്ള കയ്യേറ്റങ്ങൾ പൊളിച്ചാണ് ആവശ്യമായ സ്ഥലം കണ്ടെത്തിയത്. എന്നാൽ നിലവിലെ സാഹചര്യത്തിൽ, റോഡിന്‍റെ വീതി ഏഴു മീറ്ററാക്കി വർധിപ്പിക്കുന്നതിനുള്ള സ്ഥലം കുറ്റിപ്പാല ഭാഗത്തുണ്ടായിരുന്നില്ല.
അങ്കണവാടിയുടെ ചുറ്റുമതിൽ മാത്രം പൊളിച്ച് റോഡിന്‍റെ വീതികൂട്ടാനുള്ള ശ്രമത്തിലായിരുന്നു കരാറുകാരും പൊതുമരാമത്ത് വകുപ്പും. റോഡ് നവീകരണ പ്രവൃത്തിയുടെ ഭാഗമായി സമീപത്തെ വാടക വീട്ടിലാണ് അങ്കണവാടി പ്രവർത്തിക്കുന്നത്. 25 വർഷത്തിലധികം പഴക്കമുള്ള ഈ രണ്ട് കെട്ടിടങ്ങളും പൊളിച്ചു മാറ്റാൻ നഗരസഭാ കൗൺസിൽ യോഗം നേരത്തെ അനുമതി നൽകിയിരുന്നു.
സാംസ്കാരിക നിലയം ഏറെ നാളായി ഉപയോഗ ശൂന്യമായി കിടക്കുകയായിരുന്നു. അഞ്ചരക്കോടി രൂപ ചെലവിലാണ് രണ്ടര കിലോമീറ്റർ ദൈർഘ്യമുള്ള പാത നവീകരിക്കുന്നത്. നിലവിൽ അഞ്ചര മീറ്റർ വീതിയുള്ള റോഡ് ബിഎം ആൻഡ് ബിസി നിലവാരത്തിൽ ഏഴു മീറ്ററാക്കി വികസിപ്പിച്ച്, ആവശ്യമായ സ്ഥലങ്ങളിൽ ഓവുചാലുകളും സുരക്ഷാ ഭിത്തിയും നിർമിച്ച് അന്താരാഷ്ട്ര നിലവാരത്തിലേക്ക് ഉയർത്തുന്നതാണ് പദ്ധതി.
കെട്ടിടങ്ങൾ പൊളിച്ചു മാറ്റുന്നതോടെ മുൻ നിശ്ചയിച്ച രീതിയിൽ റോഡും അനുബന്ധ നിർമാണവും പൂർത്തിയാക്കാനാകും. ഗതാഗതക്കുരുക്ക് പതിവായ മുക്കം - അഗസ്ത്യൻമുഴി - മാമ്പറ്റ റോഡിന്‍റെ ബദൽപാത കൂടിയാണ് പിസി ജംഗ്ഷൻ - വെസ്റ്റ് മാമ്പറ്റ ബൈപാസ്.
പദ്ധതി പൂർത്തിയാകുന്നതോടെ അഗസ്ത്യൻമുഴിലെ ഗതാഗതക്കുരുക്കിന് നേരിയ പരിഹാരമാകും. മുക്കത്ത് നിന്ന് കോഴിക്കോട്, താമരശേരി ഭാഗത്തേക്കുള്ള വാഹനങ്ങൾക്ക് അഗസ്ത്യൻമുഴി വഴി സഞ്ചരിക്കാതെ ലക്ഷ്യസ്ഥാനത്തേക്കെത്താനാകും. ബസുകളും ടോറസ് ലോറികളും ഉൾപ്പെടെ നൂറു കണക്കിന് വാഹനങ്ങളാണ് ഓരോ ദിവസവും ഇതുവഴി കടന്നു പോകുന്നത്.
ADVERTISEMENT
ADVERTISEMENT
SPACE FOR ADVERTISEMENT
Copyright © 2026, Rashtra Deepika Ltd. All Rights Reserved.
Design and Development 
Corehub Solutions
Contact Numbers :
+91 481 2566706, 2566707, 2566708
About Us Feedback Privacy Policy Terms and Conditions for Online Payment
E-paper LOGIN
LOGIN