District News
കയ്പമംഗലം: തകർന്നു കിടക്കുന്ന ഈസ്റ്റ് ടിപ്പു സുൽത്താൻ റോഡിന്റെ ശോചനീയാവസ്ഥയ്ക്ക് അടിയന്തര പരിഹാരം കാണണമെന്നാവശ്യപ്പെട്ട് കയ്പമംഗലം ചളിങ്ങാട് മേഖലയിൽ ഇന്നലെ ഹർത്താൽ ആചരിച്ചു. രാവിലെ 6 മുതൽ വൈകീട്ട് 6 വരെയായിരുന്നു ഹർത്താൽ. സമരത്തിന്റെ ഭാഗമായി റോഡ് ഉപരോധവും പ്രതിഷേധ പ്രകടനവും സംഘടിപ്പിച്ചു.
മാസങ്ങൾക്കുമുമ്പ് കുടിവെള്ള പൈപ്പ് സ്ഥാപിക്കുന്നതിനായി റോഡ് പൊളിച്ചെങ്കിലും പൈപ്പ് സ്ഥാപിച്ച ശേഷം റോഡ് വേണ്ട വിധത്തിൽ റീസ്റ്റോറേഷനോ ടാർ ചെയ്യുകയോ ചെയ്തിരുന്നില്ല. മഴ ശക്തമായതോടെ റോഡിൽ വലിയ വെള്ളക്കെട്ട് രൂപപ്പെടുകയും യാത്ര അതീവ ദുഷ്കരമാവുകയും ചെയ്തു. നിരവധി തവണ പ്രതിഷേധങ്ങൾ നടത്തിയെങ്കിലും നടപടിയുണ്ടാകാത്തതിനെ തുടർന്നാണ് ഹർത്താലും റോഡ് ഉപരോധവും നടത്തിയത്.
ആക്ഷൻ കൗൺസിൽ അംഗങ്ങളായ അനസ് അബൂബക്കർ, ഹുസൈൻ ബുറാഖ്, പി.എ.നസീർ, നാസർ ചളിങ്ങാട്, പി.എ. അബൂബക്കർ, ഷിയാസ് വനിത, ഇസ്ഹാഖ് പൊന്നാത്ത്, ടി.എ.അഹമദ്, മഹല്ല് സെക്രട്ടറി പി.എ.മുഹമ്മദ്, മദ്രസ സെക്രട്ടറി നൗഷാദ് തിണ്ടിക്കൽ, ജനപ്രതിനികളായ ഫാത്തിമ അനസ്, പി.എം.സൈനുദ്ദീൻ, അൻസ മോൾ, സന്ധ്യ രവീന്ദ്രൻ, രശ്മി ശ്രീജിത്ത്, സീന ഇസ്മായിൽ, നഹിത സലീം തുടങ്ങിയവർ പ്രസംഗിച്ചു .
District News
വെള്ളരിക്കുണ്ട്: കിനാനൂർ കരിന്തളം, ബളാൽ, വെസ്റ്റ് എളേരി പഞ്ചായത്തുകളെ ബന്ധിപ്പിക്കുന്ന പരപ്പ-ആനമഞ്ഞൾ-നാട്ടക്കല്ല് റോഡ് പൊതുമരാമത്ത് വകുപ്പ് ഏറ്റെടുത്തോ കേന്ദ്രത്തിന്റെ ഗ്രാമീണ റോഡ് വികസന പദ്ധതിയിൽ ഉൾപ്പെടുത്തിയോ മെക്കാഡം ടാർ ചെയ്ത് വികസിപ്പിക്കണമെന്ന ആവശ്യം ശക്തമാകുന്നു.
ഈ റോഡ് വികസിപ്പിച്ചാൽ മലയോരഹൈവേയുടെ ബൈപാസ് റോഡായി ഉപയോഗിക്കാനാവും. ഇതുവഴി വെള്ളരിക്കുണ്ടിലെ ഗതാഗതക്കുരുക്കിന് പരിഹാരം കാണാനും സാധിക്കും. പ്രതിഭാനഗർ, അരിങ്കല്ല് കാവ് ജംഗ്ഷൻ, അരീക്കര, ബളാൽ, ചെമ്പഞ്ചേരി, ആനമഞ്ഞൾ, ചുള്ളി, നാട്ടക്കല്ല് പ്രദേശങ്ങളുടെ പൊതുവായ വികസനത്തിനും കോട്ടഞ്ചേരിയും അച്ചൻകല്ലും പള്ളത്തുമലയും കേന്ദ്രീകരിച്ചുള്ള വിനോദസഞ്ചാര വികസനത്തിനും റോഡ് വികസനം ഗുണകരമാകുമെന്ന് നാട്ടുകാർ ചൂണ്ടിക്കാട്ടുന്നു.
District News
തൃപ്പൂണിത്തുറ: ഹിൽപാലസ് വളപ്പിൽ നിന്നിരുന്ന മഞ്ചാടി മരവും തെങ്ങും ശക്തമായ കാറ്റിൽ മറിഞ്ഞ് റോഡിൽ വൈദ്യുതി ലൈനിലേക്ക് വീണു. ഇന്നലെ രാവിലെ 6.15ഓടെയായിരുന്നു സംഭവം.
രാവിലെ റോഡിൽ വാഹനങ്ങളുടെ തിരക്കില്ലായിരുന്നതിനാൽ അപകടം ഒഴിവായി. ഇതേ തുടർന്ന് സമീപ പ്രദേശങ്ങളിലെ വൈദ്യുതി ബന്ധം പൂർണമായും നിലച്ചു. പിന്നീട് ഫയർഫോഴ്സും പോലീസും സ്ഥലത്തെത്തി മരം മുറിച്ചു മാറ്റിയാണ് ഗതാഗതം പുന:സ്ഥാപിച്ചത്.
ഹിൽപാലസ് വളപ്പിൽ അപകട ഭീഷണിയുയർത്തി നിൽക്കുന്ന മരങ്ങൾ മുറിച്ചു മാറ്റണമെന്ന് നാട്ടുകാർ പലതവണയായി ആവശ്യപ്പെട്ടിരുന്നുവെങ്കിലും നടപടിയുണ്ടായില്ലെന്ന് പറയുന്നു.