ഹൂസ്റ്റൺ: ഹൂസ്റ്റണിൽ കെപിസിസി പ്രസിഡന്‍റ് കെ. സുധാകരന് ആവേശോജ്വല സ്വീകരണമൊരുക്കി ഓവർസീസ് ഇന്ത്യൻ കൾച്ചറൽ കോൺഗ്രസ് യുഎസ്എ ഹൂസ്റ്റൺ ഡാളസ് ചാപ്റ്റർ.
സെന്‍റ് തോമസ് ഓർത്തഡോക്സ് കത്തീഡ്രൽ ഹാളിൽ നടന്ന ചടങ്ങിൽ നൂറു കണക്കിനാളുകൾ പങ്കെടുത്തു. ചെണ്ടമേളത്തിന്‍റെയും താലപ്പൊലിയുടെയും അകമ്പടിയോടെയാണ് സുധാകരനെ പ്രവർത്തകർ വരവേറ്റത്.
കലാപരിപടികളോടെ ആരംഭിച്ച സംഗമത്തിൽ നൂപുര സ്കൂൾ ഓഫ് ഡാൻസിലെ നേസ, ആഞ്‌ജലീന, ഇസബെൽ എന്നിവർ ഭരതനാട്യം അവതരിപ്പിച്ചു. ഷിനു, റോഷി സി. മാലേത്ത്‌ എന്നിവരുടെ ഗാനങ്ങളും നേസ ചാക്കോയുടെ നൃത്തവും അരങ്ങേറി.
തുടർന്ന് ഒഐസിസി യുഎസ്എ ജനറൽ സെക്രട്ടറി ജീമോൻ റാന്നി എംസിയായ മഞ്ജു മേനോനെ വേദിയിയിലേക്ക് ക്ഷണിച്ചു. തുടർന്ന് ഇന്ത്യയുടെയും അമേരിക്കയുടെയും ദേശീയ ഗാനങ്ങൾ വേദിയിൽ ആലപിച്ചു. ജുഅനിറ്റ ജോയ്, ജ്യോത്സ്ന ജോയ്, ക്രിസ്റ്റൽ റോസ് ജോസഫ്, ആനി ജോസ്, ഷീല ചെറു എന്നിവർ നേതൃത്വം നൽകി.
ഒഐസിസി യുഎസ്എ ജനറൽ സെക്രട്ടറി ജീമോൻ റാന്നി ആമുഖ പ്രസ്താവന നടത്തി. നാഷണൽ പ്രസിഡന്‍റ് ബേബി മണക്കുന്നേൽ അധ്യക്ഷത വഹിച്ച യോഗത്തിൽ ഹൂസ്റ്റൺ ചാപ്റ്റർ പ്രസിഡന്‍റ് വാവച്ചൻ മത്തായി സ്വാഗതം പറഞ്ഞു. നാഷണൽ ചെയർമാൻ ജെയിംസ് കൂടൽ പ്രസംഗിച്ചു.
ഫോർട്ട് ബന്ദ് കൗണ്ടി ജഡ്ജ് കെ.പി.ജോർജ്, മിസോറി സിറ്റി മേയർ റോബിൻ ഇലക്കാട്ടു, സ്റ്റാഫോർഡ് സിറ്റി മേയർ കെൻ മാത്യു, ഫോർട്ട് ബെൻഡ് 240 ഡിസ്‌ട്രിക്ട് ജഡ്ജ് സുരേന്ദ്രൻ കെ. പട്ടേൽ, ഫോർട്ട് ബെൻഡ് കോർട്ട് ജഡ്ജ് ജൂലി മാത്യു, ഒഐസിസി ഭാരവാഹികൾ തുടങ്ങിയവർ പങ്കെടുത്തു.
തുടർന്ന് നാല് ദശകങ്ങൾക്ക് മുൻപ് ഹൂസ്റ്റണിൽ എത്തി കോൺഗ്രസ് പ്രസ്ഥാനത്തിന് ശക്തി പകർന്നു നൽകിയ പൊന്നു പിള്ള, എബ്രഹാം തോമസ് (അച്ചൻകുഞ്ഞു), തോമസ് വർക്കി (മൈസൂർ തമ്പി) എന്നിവരെ പൊന്നാട നൽകി ആദരിച്ചു. മുതിർന്ന അംഗമായ ജോർജ് എബ്രഹാമിന്‍റെ അഭാവത്തിൽ അദ്ദേഹത്തിന്‍റെ സേവനങ്ങളെ എടുത്തുപറഞ്ഞു.
ഒഐസിസിയുടെ ടെക്സസിലെ ഹൂസ്റ്റൺ, ഡാളസ് ചാപ്റ്ററുകൾക്കു ശേഷം പുതുതായി രൂപം കൊള്ളുന്ന സാൻഅന്‍റോണിയോ ചാപ്റ്ററിന്‍റെ പ്രഖ്യാപനം സുധാകരൻ നിർവഹിച്ചു. പ്രസിഡന്‍റായി നിയമിക്കപ്പെട്ട സ്റ്റീഫൻ മറ്റത്തിലിനെ കെപിസിസി പ്രസിഡന്‍റ് പൊന്നാട നൽകി ആദരിച്ചു.
തുടർന്ന് ന്യൂജഴ്സിയിൽ നിന്നും എത്തിയ ഡബ്ല്യുഎംസി ഗ്ലോബൽ പ്രസിഡന്‍റ് തോമസ് മൊട്ടക്കൽ, ഒഐസിസി സതേൺ റീജിയണൽ ജനറൽ സെക്രട്ടറി ജോമോൻ ഇടയാടി, റവ. എ.വി.തോമസ്. റവ.കെ.ബി.കുരുവിള, ശശിധരൻ നായർ, ജി.കെ.പിള്ള,സൈമൺ വളാച്ചേരിൽ, ജേക്കബ് കുടശനാട്, ബ്രൂസ് കൊളമ്പയിൽ, അജിത് പിള്ള, ബിജു ഇട്ടൻ, ടോം വിരിപ്പൻ തുടങ്ങിയവർ ആശംസകളർപ്പിച്ചു സംസാരിച്ചു.
തുടർന്ന് കെ. സുധാകരൻ മറുപടി പ്രസംഗം നടത്തി. യുഎസില്‍ എത്തിയിട്ടും മലയാളികള്‍ കേരളത്തിലെയും ഇന്ത്യയിലെയും രാഷ്ട്രീയത്തെക്കുറിച്ച് ചര്‍ച്ച ചെയ്യുന്നത് ഭാഗ്യമായി കരുതുന്നു എന്നും സ്വന്തം മണ്ണിനെക്കുറിച്ച് ചിന്തിക്കാന്‍ സമയം കണ്ടെത്തുന്ന പ്രവാസികളുടെ മനസ് വിശാലമാണെന്നും അദ്ദേഹം പറഞ്ഞു.
ഒഐസിസി ചാപ്റ്റർ സെക്രട്ടറി ജോജി ജോസഫ് നന്ദി പ്രകാശിപ്പിച്ചു. മൈസൂർ തമ്പി ജനറൽ കൺവീനർ ജോർജ് കൊച്ചുമ്മൻ, ജോമോൻ ഇടയാടി, പൊന്നു പിള്ള, ഷീല ചെറു, എബ്രഹാം തോമസ്, ജോജി ജോസഫ്, രാജീവ് റൊണാൾഡ്‌ തുടങ്ങിയവരുടെ നേതൃത്വത്തിൽ നിരവധി കമ്മിറ്റികൾ സമ്മേളനത്തിന്‍റെ വിജയത്തിനായി പ്രവർത്തിച്ചു.
|