ന്യൂയോർക്ക്: ലിറ്റററി അസോസിയേഷൻ ഓഫ് നോർത്ത് അമേരിക്കയുടെ(ലാന) 202425 വർഷത്തെ പ്രവർത്തനോദ്ഘാടനം പ്രശസ്ത എഴുത്തുകാരിയും സാമൂഹ്യ പ്രവർത്തകയുമായ സാറാ ജോസഫ് നിർവഹിച്ചു.
പുതുതലമുറയ്ക്കിടയിൽ സാഹിത്യോത്സവ സംസ്കാരം ഉയർന്നുവന്നിട്ടുണ്ടെന്നും ഇത്തരം സാഹിത്യോത്സവങ്ങൾ പ്രതിരോധത്തിനും ബഹുസ്വരതയ്ക്കും വേണ്ടി ഉപയോഗിക്കപ്പെടുന്നുണ്ടെന്നും അത് നല്ലതാണെന്നും സാറാ ജോസഫ് പറഞ്ഞു.
ഭാഷയും സംസ്കാരവും സാഹിത്യവും ഉള്ളിൽ പേറി നടക്കുന്നവരാണ്‌ മലയാളികൾ. എഴുത്ത് നമ്മളെ തന്നെ പഠിക്കലും പുതുക്കലുമാണ്‌. ഭാഷയും ഭാഷണസമൂഹവും ഒന്ന് തന്നെയാണ്‌. സമൂഹത്തിലെന്തുണ്ടോ അത് ഭാഷയിലുണ്ടാകും. ഇല്ലാത്തത് ഉണ്ടാകുകയുമില്ല. എഴുത്തിനെ പൂരിപ്പിക്കുന്നതാണ്‌ വായന. വായിക്കാനുള്ള ഒരു പരിശീലനം പുതിയ തലമുറക്ക് കൊടുക്കേണ്ടതുണ്ട് എന്നും സാറാ ജോസഫ് കൂട്ടിച്ചേർത്തു.
കവി സെബാസ്റ്റ്യൻ ലാനയുടെ സമ്മേളനത്തിന്‌ ആശംസ നേർന്നുകൊണ്ട് സംസാരിച്ചു. ഗദ്യത്തിലോ പദ്യത്തിലോ കവിത എഴുതാനാവില്ല, കവിതയിലെ കവിതയെഴുതാനകൂ. ഗദ്യത്തിലായാലും പദ്യത്തിലായാലും കവിത വേണം. എഴുതുമ്പോൾ ഒരു ഭാഷ സൃഷ്ടിക്കൻ കഴിയുന്നുണ്ടോ എന്നുള്ളതാണ്‌ പ്രധാനമെന്നും സെബാസ്റ്റ്യൻ പറഞ്ഞു.
എല്ലാ ഇന്ദ്രിയങ്ങളേയും കവിതയ്ക്ക് സ്പർശിക്കാൻ കഴിയണം. പരാജയങ്ങളിൽ നിന്നും വീണ്ടെടുപ്പാണ്‌ കവിത. ദൈവാക്ഷരങ്ങളാണ്‌ കവിത, കവിത ഒരു വിസ്മയമാണ്‌, കവികൾ ഋഷിതുല്യരാണ്‌. സമകാലിക കവിത അതിരുവിട്ട് പറക്കുന്ന കാലമാണിതെന്നും അദ്ദേഹം ഓർമിപ്പിച്ചു.
ആധുനിക സാങ്കേതികവിദ്യ സാഹിത്യത്തിൽ ജനാധിപത്യം കോണ്ടുവന്നുവെന്നും അത് സ്വാഗതർഹമാണെന്നും സമ്മേളനത്തിന്‌ ആശംസ അർപ്പിച്ചുകൊണ്ട് യുവ എഴുത്തുകാരനും കേരള സാഹിത്യ അക്കാദമി ജേതാവുമായ വി. ഷിനിലാൽ പറഞ്ഞു.
മനുഷ്യൻ ജീവിക്കുന്നത് മറ്റെന്തും കൊണ്ടെന്നപോലെ ഭാവനകൊണ്ട് കൂടിയാണ്‌. ഭാവനകൊണ്ട് മനുഷ്യന്‌ എവിടേയും എത്തിച്ചേരാം. ഭാവനയാണ്‌ മനുഷ്യനെ എഴുത്തുകാരനാക്കുന്നത് എന്ന് ഷിനിലാൽ കൂട്ടിചേർത്തു.
ലാന പ്രസിഡന്‍റ് ശങ്കർ മന അധ്യക്ഷത വഹിച്ച യോഗത്തിൽ ജനറൽ സെക്രട്ടറി സാമുവൽ യോഹന്നാൻ സ്വാഗതം പറയുകയും ജോയിന്‍റ് ട്രഷറർ നിർമല ജോസഫ് നന്ദി പ്രകാശിപ്പിക്കുകയും ചെയ്തു.
മുന്നോട്ട് നയിക്കുന്നതിൽ എഴുത്തുകാർക്ക് വലിയ പങ്കുണ്ടെന്നും അതുകൊണ്ടാണ്‌ എഴുത്തുകാരെ സാംസ്കാരിക നായകരെന്നും വിളിക്കുന്നതെന്നും അധ്യക്ഷപ്രസംഗത്തിൽ ശങ്കർ മന പറഞ്ഞു. കവി സെബാസ്റ്റ്യനെ പ്രശസ്ത കവി ബിന്ദു ടിജിയും വി. ഷിനിലാനിനെ സാമുവൽ യോഹന്നാനും സദസിന്‌ പരിചയപ്പെടുത്തി.
സമ്മേളനത്തിൽ ലാന ട്രഷറർ ഷിബു പിള്ള, വൈസ് പ്രസിഡന്‍റ് ഹരിദാസ് തങ്കപ്പൻ, ജോയിന്‍റ് സെക്രട്ടറി ജോൺ കൊടിയൻ, ഭരണസമിതി അംഗങ്ങൾ, ലാന മുൻഭാരവാഹികൾ, ലാന അംഗങ്ങൾ എന്നിവർ സന്നിഹിതരായിരുന്നു.
തുടർന്ന് നടന്ന കാവ്യാലപന സമ്മേളനത്തിൽ അമേരിക്കയിലേയും കാനഡയിലേയും പ്രശസ്ത കവികളായ ലാനയുടെ പ്രോഗ്രാം കമ്മിറ്റി ചെയർ ജേക്കബ് ജോൺ, ഭരണസമിതി അംഗം ഡോ. സുകുമാർ കാനഡ, സന്തോഷ് പാല, ബിന്ദു ടിജി, ഷാജു ജോൺ, ഉമ സജി, ദീപ വിഷ്ണു എന്നിവർ സ്വന്തം കവിതകൾ ചൊല്ലി അവതരിപ്പിച്ചു.
സമ്മേളനത്തിന്‍റെ വിവിധ ഘട്ടങ്ങളിൽ നടന്ന ചർച്ചകളിൽ ലാന ജനറൽ സെക്രട്ടറി സാമുവൽ യോഹന്നാൻ, ജോയിന്‍റ് സെക്രട്ടറി ജോൺ കൊടിയൻ, ഭരണസമിതി അംഗം ഡോ. സുകുമാർ കാനഡ, രാജു തോമസ്, അബ്ദുൾ പുന്നയൂർക്കുളം, ലക്ഷ്മി നായർ, ഗീത ജോർജ്, സ്മിത കൊട്ടാരത്ത് എന്നിവർ പങ്കെടുത്തു.
|