ഒറ്റ ദിവസം ഏഴു പുതിയ ഷോറൂമുകളുമായി മലബാർ ഗോൾഡ് : Deepika.com Kerala News |

കോഴിക്കോട്: മലബാർ ഗോൾഡ് & ഡയമഡ്സിന്‍റെ 162ാം ഷോറൂം അൽബർഷ മാൾ ദുബായിൽ ക്ഷണിക്കപ്പെട്ട അതിഥികളുടെയും ടീം അംഗങ്ങളുടെയും സാന്നിദ്ധ്യത്തിൽ മലബാർ ഗ്രൂപ്പ് ചെയർമാൻ എം.പി. അഹമ്മദ് ഉദ്ഘാടനംചെയ്തു. ദുബായിലെ സത്വ, ഗോൾഡ് സെന്‍റർ എന്നിവടങ്ങളിലെ പുതിയ ഷോറൂമുകളുടെ ഉദ്ഘാടന കർമം എം.പി. അഹമ്മദും ഗ്രൂപ്പ് കോ-ചെയർമാൻ ഡോ.പി. എ. ഇബ്രാഹിം ഹാജിയും സംയുക്തമായി നിർവഹിച്ചു.

ഗോൾഡ് സെന്‍ററിലെ തന്നെ രണ്ടാമത്തെ ഷോറൂമിന്‍റെ ഉദ്ഘാടനം നാഷണൽ ബാങ്ക് ഓഫ് ഫുജൈറയിലെ സീനിയർ എക്സിക്യൂട്ടീവ് ഓഫീസർ പി.ബി. ദാസ്, കോർപറേറ്റ് ഹെഡ്-ഇൻസ്റ്റിറ്റ്യൂഷണൽ ബാങ്കിംഗ് വിക്രം പ്രധാൻ എന്നിവർ സംയുക്തമായി നിർവ്വഹിച്ചു. ഷാർജ ഷോപ്പിംഗ് സെന്‍ററിലെ പുതിയ ഷോറൂമിന്‍റെ ഉദ്ഘാടനം മലബാർ ഗോൾഡ് & ഡയമണ്ട്സ് ഡയറക്ടർ സി. മായിൻകുട്ടി, എം.പി. അഹമ്മദുമായി ചേർന്നു നിർവഹിച്ചു.

കുവൈറ്റ് സമ മാളിൽ ആരംഭിച്ച ഷോറൂം സൈനബ ഹുസൈൻ ഉദ്ഘാടനം ചെയ്തു. ബഹ്റൈനിലെ മനാമ ഗോൾഡ് സിറ്റിയിൽ 168-ാമത് ഷോറൂമിന്‍റെ ഉദ്ഘാടനം ഹെഷാം സാൽ ഖാലിഫ സാൽ അൽക്ബുഫ്ലാസെ നിർവഹിച്ചു.

ഷോറൂമുകളിൽ രണ്ടെണ്ണം മലബാർ ഗോൾഡ് & ഡയമഡ്സ് ലൈഫ് സ്റ്റൈൽ ജ്വല്ലറി ഷോറൂമുകളാണ്. “ബിസിനസ് വിപുലീകരണത്തിന്‍റെ ഭാഗമായി നടത്താൻ സാധിച്ച ഈ വലിയ മുന്നേറ്റം തുടക്കം മുതൽ തങ്ങളിൽ വിശ്വാസമർപ്പിച്ച ദശലക്ഷക്കണക്കിന് ഉപഭോക്താക്കൾക്കായി സമർപ്പിക്കുന്നു” മലബാർ ഗ്രൂപ്പ് ചെയർമാൻ എം.പി. അഹമ്മദ് അറിയിച്ചു. ഉപഭോക്താക്കൾ, ജിസിസി യിലെ അധികാരികൾ, നിക്ഷേപകർ, മാനേജ്മെന്‍റ് ടീം അംഗങ്ങൾ എന്നിവരോടുള്ള അളവറ്റ നന്ദി ഈ അവസരത്തിലറിയിക്കുന്നുവെന്നും അദ്ദേഹംകൂട്ടിച്ചേർത്തു.

620 കോടി (91.28 മില്ല്യണ്‍ യു. എസ് ഡോളർ) രൂപയുടെ വിപുലീകരണ പദ്ധതികളാണു ലോകത്തെ 5 മുൻനിര ജ്വല്ലറികളിലൊന്നായ മലബാർ ഗോൾഡ് & ഡയമഡ്സ് പ്രഖ്യാപിച്ചിരിക്കുന്നത്. 24 പുതിയ ഷോറൂമുകൾ ഇന്ത്യയിലും വിദേശത്തുമായി മൂന്നു മാസത്തിനുള്ളിൽ ആരംഭിക്കും. ഇതോടുകൂടി മാർച്ച് അവസാനത്തോടുകൂടി ഷോറൂമുകളുടെ എണ്ണം 185 ആയിത്തീരും.