ഷാഫി പറന്പിലിന് കെ.കെ. ശൈലജയുടെ വക്കീൽ നോട്ടീസ് : Deepika.com Kerala News |

Click here for detailed news of all items

ഷാഫി പറന്പിലിന് കെ.കെ. ശൈലജയുടെ വക്കീൽ നോട്ടീസ്

Wednesday, April 24, 2024 1:22 AM IST

കോഴിക്കോട്: വടകര മണ്ഡലത്തിൽ സൈബർ അധിക്ഷേപ വിവാദം കൊഴുക്കുന്നു. മോർഫ് ചെയ്ത അശ്ലീല വീഡിയോ പ്രചരിപ്പിച്ചുവെന്ന ആരോപണത്തിനെതിരേ വടകരയിലെ എൽഡിഎഫ് സ്ഥാനാർഥി കെ.കെ. ശൈലജയ്ക്ക് യുഡിഎഫ് സ്ഥാനാർഥി ഷാഫി പറന്പിൽ വക്കീൽ നോട്ടീസ് അയച്ചതിനിടെ ഈ വിഷയവുമായി ബന്ധപ്പെട്ട് കെ.കെ. ശൈലജ ഷാഫിക്കു തിരിച്ചും വക്കീൽ നോട്ടീസ് അയച്ചു.

യുഡിഎഫ് പ്രവർത്തകർ സമൂഹമാധ്യമങ്ങളിൽ തനിക്കെതിരേ പ്രചരിപ്പിക്കുന്ന വ്യാജ വീഡിയോകളും മോർഫ് ചെയ്ത ചിത്രങ്ങളും അശ്ലീല കമന്‍റുകളും പിൻവലിച്ച് ഷാഫി മാപ്പു പറയണമെന്നാണു വക്കീൽനോട്ടീസിലെ ആവശ്യം. പിൻവലിക്കാൻ തയാറായില്ലെങ്കിൽ നിയമ നടപടി സ്വീകരിക്കുമെന്നും നോട്ടീസിൽ മുന്നറിയിപ്പ് നൽകുന്നു.

മതപണ്ഡിതൻ എ.പി. അബൂബക്കർ മുസ്‌ല്യാരുടെ വ്യാജ ലെറ്റർപാഡ് ഉപയോഗിച്ച് പരാതിക്കാരിയെ സമൂഹമധ്യത്തിൽ അപമാനിക്കും വിധം ‘ബോംബമ്മ’ എന്നു പരാമർശിച്ച് പ്രചാരണം നടത്തിയതും ഒരു ഓണ്‍ലൈൻ മാധ്യമത്തിന്‍റെ പേരിൽ കെ.കെ. ശൈലജയെ ലൗ ജിഹാദ് വാദിക്കാരിയായി ചിത്രീകരിച്ചുവെന്നും വക്കീൽ നോട്ടീസിൽ ആരോപിക്കുന്നു.

ലൈംഗിക ചുവയുള്ള പരാമർശവുംമോർഫ് ചെയ്ത ഫോട്ടോകളുംപ്രചരിപ്പിക്കുന്ന യുഡിഎഫ് പ്രവർത്തകർക്ക് ഷാഫി പറന്പിൽ ഒത്താശ ചെയ്യുകയാണെന്നും നോട്ടീസിൽ പറയുന്നു.

അതിനിടെ, ഷാഫി പറന്പിൽ തനിക്ക് അയച്ചുവെന്നു പറയുന്ന വക്കീൽ നോട്ടീസ് ഇതുവരെ കിട്ടിയില്ലെന്ന് കെ.കെ. ശൈലജ പ്രതികരിച്ചു.

കെ.കെ. ശൈലജ 24 മണിക്കൂറിനകം വാർത്താസമ്മേളനം വിളിച്ച് മാപ്പു പറഞ്ഞില്ലെങ്കിൽ നിയമനടപടിയിലേക്ക് കടക്കുമെന്നാണ് ഷാഫി പറന്പിൽ ആവശ്യപ്പെട്ടിരിക്കുന്നത്. “ഷാഫി നിയമ നടപടി സ്വീകരിച്ചോട്ടെ. എന്തെങ്കിലും ഉണ്ടെങ്കിലല്ലേ നേരിടേണ്ട ആവശ്യമുള്ളൂ. ഞാൻ നിയമനടപടി എടുക്കുന്നതു കൊണ്ട് അവരും ചെയ്യുന്നുവെന്നേ ഉള്ളൂ

സൈബർ ആക്രമണ വിഷയത്തിൽ പറഞ്ഞതൊന്നും മാറ്റിപ്പറഞ്ഞിട്ടില്ല. തെളിവ് കൊടുക്കേണ്ടിടത്ത് കൊടുക്കും. സൈബർ ആക്രമണത്തിൽ ജനത്തിനു പ്രതിഷേധമുണ്ട്. തെരഞ്ഞെടുപ്പിൽ വില കുറഞ്ഞ പണിയൊന്നും എടുക്കേണ്ട കാര്യം എനിക്കില്ല. സോഷ്യൽ മീഡിയ ഇംപാക്റ്റ് യുഡിഎഫിന് ബൂമറാങ്ങായി മാറും’’- കെ.കെ.ശൈലജ പറഞ്ഞു.

സൈബർ പോരാളികളുടെ അധിക്ഷേപത്തെക്കുറിച്ച് കെ.കെ. ശൈലജ ആദ്യം പറഞ്ഞ കാര്യങ്ങൾ പർവതീകരിച്ച് പിന്നീട് സിപിഎം നേതാക്കൾ ഷാഫി പറന്പിലിനെതിരേ ഉന്നയിച്ച ആരോപണങ്ങൾ വൻ വിവാദമായതിനിടെ മോർഫ് ചെയ്ത തന്‍റെ അശ്ലീല വീഡിയോ ഇറക്കിയെന്നു പറഞ്ഞിട്ടില്ലെന്നും തല വെട്ടിയൊട്ടിച്ചുളള പോസ്റ്റർ പ്രചരിപ്പിക്കുന്നുവെന്നാണ് പറഞ്ഞതെന്നും കെ.കെ. ശൈലജ വെളിപ്പെടുത്തിയിരുന്നു.

ഇതോടെയാണ് ഷാഫി പറന്പിൽ കെ.കെ. ശൈലജയ്ക്കെതിരേ നിയമ നടപടി ആരംഭിച്ചത്. ഷാഫിയുടെ വക്കീൽ നോട്ടീസിനെ അതേ നാണയത്തിൽ നേരിടാനാണ് എൽഡിഎഫിന്‍റെ തീരുമാനം.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.