പരിശുദ്ധ കാതോലിക്ക ബാവയ്ക്കും സംഘത്തിനും ന്യൂയോര്‍ക്കില്‍ സ്വീകരണം നല്‍കി
Wednesday, July 1, 2015 6:55 AM IST
ന്യൂയോര്‍ക്ക്: മലങ്കര സഭയുടെ പരമാധ്യക്ഷന്‍ പരിശുദ്ധ ബസേലിയോസ് മര്‍ത്തോമ പൌലോസ് ദ്വിതീയന്‍ കാതോലിക്ക ബാവ 14 ദിവസത്തെ സന്ദര്‍ശത്തിനായി അമേരിക്കയില്‍ എത്തി.

വ്യാഴാഴ്ച വൈകുന്നേരം 5.30നു ന്യൂയോര്‍ക്ക് ജെഎഫ്കെ ഇന്റര്‍നാഷണല്‍ എയര്‍പോര്‍ട്ടില്‍ എത്തിയ പരിശുദ്ധ കാതോലിക്ക ബാവയേയും സംഘത്തെയും നോര്‍ത്ത് ഈസ്റ് അമേരിക്കന്‍ ഭദ്രാസന മെത്രാപ്പോലീത്ത സഖറിയാസ് മാര്‍ നിക്കോളോവോസ്, അടൂര്‍ കടമ്പനാട് ഭദ്രാസന മെത്രാപ്പോലീത്ത ഡോ. സഖറിയാസ് മാര്‍ അപ്രേം, അഹമ്മദാബാദ് ഭദ്രാസന മെത്രാപ്പോലീത്ത ഡോ. ഗീവര്‍ഗീസ് മാര്‍ യൂലിയോസ്, ഭദ്രാസന കൌണ്‍സില്‍ അംഗങ്ങള്‍ സഭാ മാനേജിംഗ് കമ്മിറ്റിയംഗങ്ങള്‍ തുടങ്ങിയര്‍ ചേര്‍ന്നു സ്വീകരിച്ചു.

നിരണം ഭദ്രാസന മെത്രാപ്പോലീത്ത ഡോ. യൂഹാനോന്‍ മാര്‍ ക്രിസോസ്റമൊസ്, വൈദിക ട്രസ്റി ഡോ. ജോണ്‍സ് ഏബ്രഹാം കൊനാട്ട്, പേഴ്സണല്‍ സെക്രട്ടറി ഫാ. ജിന്‍സ് ജോണ്‍സണ്‍ എന്നിവരാണു ബാവായോടൊപ്പം അമേരിക്കന്‍ ഭദ്രാസനങ്ങള്‍ സന്ദര്‍ശിക്കുന്നത്.

1979ല്‍ സ്ഥാപിതമായ അമേരിക്കന്‍ ഭദ്രാസനങ്ങളിലേക്കു കാതോലിക്കാനിധി ശേഖരണവുമായി ബന്ധപ്പെട്ട് സഭയുടെ പരമാധ്യക്ഷന്‍ പരിശുദ്ധ കാതോലിക്കാ ബാവാ നേരിട്ട് എഴുന്നെള്ളുകയാണ്. ഇരു ഭദ്രാസനങ്ങളിലും ഫിലഡല്‍ഫിയ, ന്യൂയോര്‍ക്ക്, ഡാളസ് എന്നീ സ്ഥലങ്ങളിലായി ഭദ്രാസന മെത്രാപ്പോലീത്താമാരുടെ നേതൃത്വത്തില്‍ എല്ലാ ഇടവകകളില്‍ നിന്നും ചുമതലക്കാര്‍ തങ്ങളുടെ കാതോലിക്കാ നിധി ശേഖരണം കൈമാറും.
Copyright @ 2022 , Rashtra Deepika Ltd.