ന്യൂജഴ്സി: നോർത്ത് അമേരിക്ക -യൂറോപ്പ് മാർത്തോമ്മ ഭദ്രാസന യുവജനസഖ്യത്തിന്‍റെ 19-ാം സമ്മേളനത്തിന്‍റെ ഒരുക്കങ്ങൾ പൂർത്തിയായതായി സംഘാടകർ അറിയിച്ചു. ന്യൂജഴ്സി സെന്‍റ് പീറ്റേഴ്സ് മാർത്തോമ്മ യുവജനസഖ്യം ആതിഥ്യമരുളുന്ന യുവജന മഹാസമ്മേളനത്തിന് Honor's Heaven Resort and conference Center (1195 Arrowwhead Rd, Ellenville, NY-12428) വേദിയാകും.
നോർത്ത് അമേരിക്ക -യൂറോപ്പ് ഭദ്രാസനാധിപൻ ഡോ. ഐസക്ക് മാർ ഫീലക്സിനോക്സ് എപ്പിസ്കോപ്പ സമ്മേളനം ഉദ്ഘാടനം ചെയ്യും. ക്രിസ്റ്റ്യൻ കണ്‍വൻഷൻ : A Commitment or Compromise എന്നതാണ് ഈ വർഷത്തെ സമ്മേളന ചിന്താവിഷയം.
ഡോ. ഐസക് മാർ ഫീലക്സിനോക്സ്, റവ. ഈപ്പൻ വർഗീസ് (മാർത്തോമ്മ തിയോളജിക്കൽ സെമിനാരി കോട്ടയം), റവ. തോമസ് കുര്യൻ, ഡോ. ഷോണ് രാജൻ എന്നിവർ കോണ്ഫറൻസിന് നേതൃത്വം നൽകും. ആത്മീക ഉണർവ് നൽകുന്ന സന്ദേശങ്ങൾ, ചിന്താവിഷയതിഷ്ഠിതമായ പഠനങ്ങൾ, ചർച്ചകൾ, പ്രെയിസ് ആൻഡ് വർഷിപ്പ്, കലാവിരുന്നുകൾ കോർത്തിണക്കിയ ടാലന്‍റ് ഷോ, സഖ്യം പൂർവ്വകാല പ്രവർത്തകരെ പങ്കെടുപ്പിച്ചു കൊണ്ടുള്ള അലുംനി പ്രോഗ്രാം തുടങ്ങിയവ ഈ വർഷത്തെ സമ്മേളനത്തിന്‍റെ ഭാഗമായിരിക്കും. കോണ്ഫറൻസിനോടനുബന്ധിച്ച് സുവനീറും പ്രസിദ്ധീകരിക്കും. ഒക്ടോബർ ഒന്നിന് യുവജനസഖ്യം സമ്മേളനം സമാപിക്കും.
ഭദ്രാസനത്തിലെ വിവിധ ഇടവകകളിൽ നിന്നുമായി 450ൽ പരം അംഗങ്ങൾ പങ്കെടുക്കും. ഡോ. ഐസക്ക് മാർ ഫീലക്സിനോക്സ് എപ്പിസ്കോപ്പ രക്ഷാധികാരിയായ കോണ്ഫറൻസ് കമ്മിറ്റിക്ക് സെന്‍റ് പീറ്റേഴ്സ് യുവജനസഖ്യം പ്രസിഡന്‍റ് റവ. മോൻസി മാത്യു, ജനറൽ കണ്‍വീനർ വർഗീസ് ജേക്കബ്, ഡോ. ലിസി മാത്യു (കോ. കണ്‍വീനർ) അരുണ്‍ തോമസ് (വൈസ് പ്രസിഡന്‍റ്), സജി ഫിലിപ്പ് (സെക്രട്ടറി), റജി ജോസഫ് (റജിസ്ട്രേഷൻ), അനിൽ തോമസ് (സുവനീർ) ജോണ് വർഗീസ് (ഫൈനാൻസ്) ഷിബു മാത്യു (പബ്ലിക് റിലേഷൻ, വെബ്സൈറ്റ്, ഐടി), മാത്യു പി. സാം (പ്രോഗ്രാം), തോമസ് കൊച്ചുമ്മൻ (കൾച്ചറൽ പ്രോഗ്രാം), ഷൈൻ തോമസ് (ഫുഡ്) ഷിബി തോമസ് (ഗായക സംഘം), സജി റ്റി. മാത്യു (പ്രയർ ആൻഡ് വർഷിപ്പ്), റീനാ മാത്യു(മെഡിക്കൽ) ജിജി ഏബ്രഹാം( ഓഡിയോ ആൻഡ് വിഷ്വൽ), ഷീജാ മാത്യൂസ് (റിസപ്ഷൻ), റോയി മാത്യു(അലുംനി), ജോയി ജോണ് (ട്രാൻസ്പോർട്ടേഷൻ), പ്രേം അലക്സാണ്ടർ (റിക്രിയേഷൻ), ജെറി ജേക്കബ് (ചിൽഡ്രൻ ആൻഡ് യൂത്ത് പ്രോഗ്രാം) എന്നിവരുടെ നേതൃത്വത്തിലുള്ള വിവിധ സബ് കമ്മിറ്റികൾ നേതൃത്വം നൽകുന്നു.
സമ്മേളനത്തിന് ആത്മീയ ചൈതന്യം പകരുന്ന ശ്രുതി മധുരമായ ഗാനങ്ങൾ ഗായക സംഘം അവതരിപ്പിക്കും. കുട്ടികൾക്കും സ്കൂൾ വിദ്യാർഥികൾക്കുമായി വ്യത്യസ്തമായ പരിപാടികൾ ഈ വർഷത്തെ കോണ്ഫറൻസിന് ഒരുക്കിയിരിക്കുന്നു. ഈ വർഷത്തെ യുവജന സമ്മേളനം അനുഗ്രഹീതമായി നടത്താൻ എല്ലാ ക്രമീകരണങ്ങളും പീറ്റേഴ്സ് മാർത്തോമ്മ യുവജനസഖ്യം അംഗങ്ങൾ ഒരുക്കിയിരിക്കുന്നു.
നോർത്ത് അമേരിക്കൻ ഭദ്രാസന യുവജനസഖ്യം കൗണ്‍സിൽ നൽകി വരുന്ന പിന്തുണ സമ്മേളനത്തിന്‍റെ ക്രമീകരണങ്ങൾക്ക് സഹായകരമാകുന്നു. അഭി. ഡോ. ഐസക്ക് മാർ ഫീലക്സിനോക്സ് (പ്രസിഡന്‍റ്), റവ. ഡെന്നീസ് ഫിലിപ്പ്(ഭദ്രാസന സെക്രട്ടറി), റവ. സജു ബി.ജോണ് (വൈസ് പ്രസിഡന്‍റ്), അജു മാത്യു (സെക്രട്ടറി), ലിബു കോശി (ട്രഷറർ) റോജിഷ് സാമുവേൽ (ഭദ്രാസന അസംബ്ലി അംഗം) എന്നിവർ ഭദ്രാസന യുവജനസഖ്യം കൗണ്‍സിലിനു നേതൃത്വം നൽകുന്നു.
കൂടുതൽ വിവരങ്ങൾക്ക് :
www.ysconferencej2017.org എന്ന കോണ്ഫറൻസ് വെബ് സൈറ്റ് സന്ദർശിക്കുക.
റിപ്പോർട്ട്: ബെന്നി പരിമണം