കോൺഗ്രസ് രാഷ്‌ട്രീയം കളിക്കുന്നുവെന്നു നഡ്ഡ : Deepika.com National News |

ന്യൂഡൽഹി: കോവിഡിനെതിരായ പോരാട്ടത്തിൽ കോണ്‍ഗ്രസ് രാഷ്‌ട്രീയം കളിക്കുന്നുവെന്നു ബിജെപി ദേശീയ അധ്യക്ഷൻ ജെ.പി. നഡ്ഡ. രാജ്യം സധൈര്യമായാണ് മഹാമാരിയെ നേരിടുന്നത്. ആളുകളെ തെറ്റിദ്ധരിപ്പിച്ച് പരിഭ്രാന്തി പടർത്താനാണ് കോണ്‍ഗ്രസ് ശ്രമിക്കുന്നതെന്ന് കോണ്‍ഗ്രസ് അധ്യക്ഷ സോണിയാ ഗാന്ധിക്കയച്ച കത്തിൽ നഡ്ഡ ചൂണ്ടിക്കാട്ടി.

മഹാമാരിക്കിടെ കോണ്‍ഗ്രസ് പാർട്ടിയുടെ പെരുമാറ്റം ഏറെ വേദനിപ്പിക്കുന്നു. കോവിഡിനെതിരേ പ്രധാനമന്ത്രി നരേന്ദ്ര മോദി അക്ഷീണം പ്രവർത്തിക്കുകയാണെന്നും എന്നാൽ കേന്ദ്രം ഒന്നും ചെയ്യുന്നില്ലെന്നാണ് കോണ്‍ഗ്രസ് പ്രചരിപ്പിക്കുന്നതെന്നും അദ്ദേഹം വിമർശിച്ചു.

കേരളത്തിലടക്കം വൻറാലികൾ നടത്തിയ ശേഷം കോവിഡ് പ്രോട്ടോകോൾ പാലിക്കണമെന്നു പറയുന്നത് കോണ്‍ഗ്രസിന്‍റെ ഇരട്ടത്താപ്പാണ്. കേരളത്തിൽ കോവിഡ് രോഗികൾ കൂടാൻ രാഹുൽ ഗാന്ധിയുടെ റാലിയും കാരണമായി. തെരഞ്ഞെടുപ്പ് നടന്ന സംസ്ഥാനങ്ങളിൽ കോണ്‍ഗ്രസ് നേതാക്കൾ നിയന്ത്രണങ്ങൾ ലംഘിച്ചുവെന്നും നഡ്ഡ കുറ്റപ്പെടുത്തി.

കോവിഡ് രണ്ടാം തരംഗത്തെക്കുറിച്ചുള്ള മുന്നറിയിപ്പുകൾ ഉള്ളപ്പോൾ തന്നെയാണ് കോണ്‍ഗ്രസ് നേതാക്കൾ ഉത്തരേന്ത്യയിലടക്കം വലിയ രാഷ്‌ട്രീയ യോഗങ്ങളിൽ പങ്കെടുത്തതും സംഘടിപ്പിച്ചതും.-നഡ്ഡ കുറ്റപ്പെടുത്തി.