സൗഹൃദ മത്സരം: ബ്ലൂ ടൈഗേഴ്സ് തായ്‌ലന്‍ഡിലേക്ക്
Thursday, May 1, 2025 1:41 AM IST
കോൽക്കത്ത: എഎഫ്സി ഏഷ്യൻ കപ്പ് ഗ്രൂപ്പ് സി യോഗ്യതാമത്സരത്തിനുള്ള തയാാറെടുപ്പിന്‍റെ ഭാഗമായി സൗഹൃദമത്സരത്തിൽ ഇന്ത്യൻ പുരുഷ ഫുട്ബോൾ ടീം തായ്‌ലന്‍ഡിനെ നേരിടും.
ജൂണ്‍ നാലിന് തായ്‌ലന്‍ഡിലെ പാത്തും താനിയിലുള്ള തമ്മസാറ്റ് സ്റ്റേഡിയത്തിലാണ് മത്സരം നടക്കുന്നത്. ജൂണ്‍ 10നാണ് 2027ലെ എഎഫ്സി ഏഷ്യൻ കപ്പ് ഗ്രൂപ്പ് സി യോഗ്യതാ മത്സരം. ഫിഫ റാങ്കിംഗ് പ്രകാരം ഇന്ത്യ 127-ാം സ്ഥാനത്തും തായ്‌ലന്‍ഡ് 99-ാം സ്ഥാനത്തുമാണ്.
18ന് കോല്‍ക്കത്തയിൽ നടക്കുന്ന ഫിഫ ഇന്‍റർനാഷണൽ വിൻഡോ പരിശീലന ക്യാന്പിനുശേഷം മേയ് 29ന് ഇന്ത്യ തായ്‌ലൻഡിലേക്ക് പോകും. തായ്‌ലൻഡിനെതിരായ സൗഹൃദമത്സരത്തിനു ശേഷം ഏഷ്യൻ കപ്പ് യോഗ്യതാ മത്സരത്തിനായി പരിശീലനം നേടാൻ ബ്ലൂ ടൈഗേഴ്സ് ഹോങ്കോങ്ങിലേക്ക് തിരിക്കും. ബംഗ്ലാദേശും സിംഗപ്പൂരുമാണ് ഗ്രൂപ്പ് സിയിലെ മറ്റ് ടീമുകൾ.
തായ്‌ലൻഡിനെതിരേ ബ്ലൂ ടൈഗേഴ്സ് 26 മത്സരങ്ങളിലാണ് ഏറ്റുമുട്ടിയത്. ഏഴ് ജയം ഇന്ത്യ നേടിയപ്പോൾ 12 ജയത്തിന്‍റെ മുൻതൂക്കം തായ്‌ലൻഡിനുണ്ട്. ഏഴ് മത്സരങ്ങൾ സമനിലയിൽ അവസാനിച്ചു. എന്നാൽ അവസാന രണ്ടു പ്രാവശ്യം നേർക്കുനേർ പോരാടിയപ്പോൾ ജയം സ്വന്തമാക്കിയ ആത്മവിശ്വാസത്തിലാണ് ഇന്ത്യ സൗഹൃദ മത്സരത്തിനിറങ്ങുന്നത്.