കോട്ടയം: സ്ഥാനാര്ഥി പ്രഖ്യാപനം വരുന്നതിനു മുമ്പേ നഗരത്തില് റോഡ് ഷോയുമായി യുഡിഎഫ് സ്ഥാനാര്ഥി തിരുവഞ്ചൂര് രാധാകൃഷ്ണന്. കോട്ടയം നഗരത്തില് ഇന്നലെ വൈകുന്നേരം അഞ്ചോടെയാണ് റോഡ് ഷോ ആരംഭിച്ചത്. തൊട്ടുപിന്നാലെയാണ് കോണ്ഗ്രസ് സ്ഥാനാര്ഥികളെ പ്രഖ്യാപിച്ചത്. ഇതോടെ യുഡിഎഫ് സ്ഥാനാര്ഥിയായി ഔദ്യോഗിക പ്രചാരണവും ആരംഭിച്ചു.
നഗരത്തിലെ ചുവരുകളെല്ലാം യുഡിഎഫിനായി നേരത്തെതന്നെ ബുക്ക് ചെയ്തിട്ടിരുന്നു. പ്രഖ്യാപനം വന്നതോടെ ചുവരെഴുത്ത് പ്രവര്ത്തനങ്ങളും ആരംഭിച്ചു. വീ ട്രസ്റ്റ് യു എന്ന പ്രചാരണവാക്യമുയര്ത്തിയുള്ള പോസ്റ്ററും ഫ്ളെക്സ് ബോര്ഡുകളും നഗരത്തിന്റെ മുക്കിലും മൂലയിലും നിറഞ്ഞു.
പള്ളിപ്പുറത്തുകാവിനു സമീപത്തുനിന്ന് ആരംഭിച്ച റോഡ് ഷോ കോട്ടയം നഗരസഭ, വിജയപുരം, പനച്ചിക്കാട് പഞ്ചായത്തുകളില് പര്യടനം നടത്തി, കോട്ടയം ടൗണില് ഗാന്ധിസ്ക്വയറില് സമാപിച്ചു.
ഡിസിസി പ്രസിഡന്റ് നാട്ടകം സുരേഷ്, കുര്യൻ ജോയി, മുനിസിപ്പല് ചെയര്മാന് എം.പി. സന്തോഷ്കുമാര്, മുന് ചെയര്പേഴ്സണ് ബിന്സി സെബാസ്റ്റ്യന്, ജില്ലാപഞ്ചായ ത്തംഗം പി.കെ. വൈശാഖ്, യുഡിഎഫ് ജനപ്രതിനിധികള് എന്നിവര് റോഡ് ഷോയില് അണിചേര്ന്നു.
ഇന്നലെ രാവിലെ മുതല് മണ്ഡലത്തിലെ പ്രമുഖ വ്യക്തികളെ നേരില്ക്കണ്ടു തിരുവഞ്ചൂർ പിന്തുണ തേടി. ഇന്നു രാവിലെ മുതല് വിജയപുരം, പനച്ചിക്കാട് പഞ്ചായത്തുകളില് സ്ഥാനാര്ഥി പര്യടനം നടത്തും.