District News
കുറുവ: വറ്റലൂർ കുഴിപ്പള്ളി പാടശേഖരത്തിൽ സ്കൂൾ വിദ്യാർഥികളും അധ്യാപകരും ചേർന്ന് പ്രകൃതിയോടൊപ്പം കൃഷിയിലേക്കൊരു ചുവടുവയ്പ് സന്ദേശവുമായി ഞാറുനടീൽ ഉത്സവം നടത്തി. കുറുവ ഗ്രാമപഞ്ചായത്ത് പ്രസിഡന്റ് പി. സലാം ഉദ്ഘാടനം നിർവഹിച്ചു. വിദ്യാർഥികളിൽ കാർഷിക സംസ്കാരവും പ്രകൃതിസ്നേഹവും വളർത്തുക എന്ന ലക്ഷ്യത്തോടെയാണ് വിദ്യാർഥികളും അധ്യാപകരും പാടത്തിറങ്ങി ഞാറുനട്ടത്.
അധ്യാപകരുടെയും നാട്ടുകാരുടെയും സാന്നിധ്യത്തിൽ നടന്ന പരിപാടി കുട്ടികൾക്ക് വേറിട്ട അനുഭവമായി.
District News
ശൂരനാട്: കുന്നത്തൂര് താലൂക്കിന്റെ നെല്ലറയായിരുന്ന ശൂരനാട് വടക്ക് ഓണമ്പള്ളി പാടശേഖരത്തില് നെല്ക്കൃഷി പ്രതിസന്ധിയിലേക്ക്. കൃഷിക്കാവശ്യമായ വെള്ളം കിട്ടാതായതോടെയാണ് കര്ഷകര് കടുത്ത പ്രതിസന്ധി നേരിടുന്നത്. കടുത്ത ജലക്ഷാമം മൂലം ഇത്തവണത്തെ കൃഷിക്കുള്ള ഞാറിനുവേണ്ടി നിലം ഉഴുതൊരുക്കി വിത്ത് പാകാന്പോലും കഴിയാതെ ദുരിതത്തിലാണ് കര്ഷകര്. ഏറെക്കാലമായി ചിങ്ങക്കൊയ്ത്തും നിലച്ചു.
ഇരുപ്പൂ കൃഷിയുണ്ടായിരുന്ന ഓണമ്പള്ളിയില് നെല്ക്കൃഷി ഒറ്റത്തവണയായി ചുരുങ്ങി. നികത്തലുമെല്ലാം കഴിഞ്ഞ് ഇപ്പോള് ശേഷിക്കുന്നത് 33 ഏക്കര് മാത്രമാണ്. അവിടെയും യഥാസമയം കൃഷിചെയ്യാന് കഴിയാതെ വലയുകയാണ് കര്ഷകര്. വേനല്ക്കാലത്ത് പള്ളിക്കലാറ്റിലെ വെള്ളത്തെ ആശ്രയിച്ചാണ് ശൂരനാട് വടക്ക് പഞ്ചായത്തിലെ പ്രധാന ഏലാകളായ ഓണമ്പള്ളി, കൂരിക്കുഴി, വിരിപ്പോലില്, ആനയടി എന്നിവിടങ്ങളിലെല്ലാം നെല്ക്കൃഷി നടത്തുന്നത്.
ആറ്റിലെ വെള്ളം പാതിരിക്കലിലെ അണയില് തടഞ്ഞുനിര്ത്തി ചാലുകള് വഴി തിരിച്ചുവിട്ട് പാടങ്ങളിലെത്തിക്കുകയാണ് ചെയ്യുന്നത്. എന്നാല് കാലപ്പഴക്കത്താല് അണയുടെ ഷട്ടര് തകര്ന്നുകിടക്കുന്നതു മൂലം വെള്ളം കെട്ടിനിര്ത്താനാകുന്നില്ല. അതോടെ പള്ളിക്കലാറ്റില് വെള്ളം കുറയുമ്പോള് കൃഷിയിറക്കും പ്രതിസന്ധിയിലാകുന്ന സ്ഥിതിയാണ്.
വെള്ളമെത്തിക്കുന്നതിന് ബദല് മാര്ഗവുമില്ല. വെള്ളിയാഴ്ച പ്ലാസ്റ്റിക് ചാക്ക് എത്തിച്ച് അണയുടെ തകര്ന്ന ഷട്ടറിനുതാഴെ കെട്ടി വെള്ളം തിരിച്ച് ഏലായിലേക്ക് വിടാനുള്ള ശ്രമവും കര്ഷകര് നടത്തുന്നു.
കാര്യമായി മഴലഭിക്കാത്തതാണ് ദുരിതം ഇരട്ടിയാക്കിയത്. വെള്ളം കിട്ടിയില്ലെങ്കില് ഇത്തവണ ഞാറ് നടാനും കഴിയാത്ത സ്ഥിതിയാണ്. 1999-ല് ഏറ്റവും നല്ല ഏലായ്ക്കുള്ള സംസ്ഥാന സര്ക്കാരിന്റെ നെല്ക്കതിര് അവാര്ഡ് ലഭിച്ച പാടശേഖരമാണ് പ്രതിസന്ധി നേരിടുന്നത്.
നെല്ക്കൃഷി ഉപേക്ഷിച്ചാല് ഓണമ്പള്ളി ഏലായില് നികത്തലും വ്യാപകമാകും. നികത്തുന്നതിനെതിരേ ഹൈക്കോടതി ഉത്തരവുണ്ടെങ്കിലും നടപ്പാകുന്നുമില്ല. ഏലാകളില് കൃഷിക്ക് വെള്ളമെത്തിക്കുന്നതിന് പള്ളിക്കലാറിന് കുറുകേ ബ്രിട്ടീഷ് ഭരണകാലത്ത് നിര്മിച്ചതാണ് അണ. അണയില് വെള്ളം കെട്ടിനിര്ത്തി ചാലുകള് വഴി ഏലാകളിലേക്ക് തിരിച്ചുവിടുകയാണ് രീതി.
പണിതിട്ട് ഒന്നര നൂറ്റാണ്ടിലേറെയായി.കുമ്മായവും മണലും പഞ്ചസാരയും ചേര്ത്തുള്ള മിശ്രിതമുപയോഗിച്ചാണ് നിര്മാണം.
പുരാതനകാലത്തെ തടിയാണ് ഇപ്പോഴും ഷട്ടറുകളായി ഉപയോഗിക്കുന്നത്. തടികള് ദ്രവിച്ച് വിടവുകളായതോടെ പൂര്ണമായ തോതില് വെള്ളം കെട്ടിനിര്ത്താന് കഴിയുന്നില്ല. അതിനാല് ചാലിലൂടെ വെള്ളം ഏലാകളിലേക്ക് എത്തുന്നില്ല.
മഴക്കാലത്ത് ആറ്റില് വെള്ളമേറുമ്പോഴും അണയുടെ തകര്ച്ചകാരണം ഷട്ടറിട്ട് വെള്ളം കെട്ടിനിര്ത്താനും കഴിഞ്ഞില്ല. ഇത് ശൂരനാട്ട് വെള്ളപ്പൊക്കത്തിനും കാരണമാകുന്നുണ്ട്. പാതിരിക്കലില് റെഗുലേറ്റര് കം ബ്രിഡ്ജ് പണിയുന്നതിന് വഴിപാടുപോലെ ഓരോ വര്ഷവും ബജറ്റില് ഒരു കോടി രൂപ വകയിരുത്തിവരുന്നു. എന്നാല് പ്രാരംഭനടപടിപോലും ഉണ്ടായി ട്ടില്ല.
District News
സുൽത്താൻ ബത്തേരി: കാലവർഷം ദുർബലമായതോടെ ജില്ലയിലെ നെൽക്കർഷകർ കടുത്ത പ്രതിസന്ധിയിൽ. കൃഷിയിറക്കിയ നാൾ മുതൽ തുടർച്ചയായ വെല്ലുവിളികളാണ് കർഷകർ നേരിടുന്നത്. മുൻവർഷത്തെപ്പോലെ കാലവർഷം ശക്തിപ്രാപിക്കുമെന്ന പ്രതീക്ഷയിൽ മാസങ്ങൾക്കുമുന്പ് വിത്തുപാകി ഞാറാക്കിയെങ്കിലും പിന്നീട് ആവശ്യത്തിന് മഴ ലഭിക്കാത്തത് കൃഷിയെ പ്രതികൂലമായി ബാധിച്ചു.
ഞാറ് പറിച്ച് പാടത്തിറക്കേണ്ട സമയത്ത് ആവശ്യത്തിന് വെള്ളമില്ലാത്തതിനാൽ പല കർഷകർക്കും പാകമായ ഞാറ് ഉപേക്ഷിക്കേണ്ടിവന്നു. തുടർന്ന് പുതിയ നെൽവിത്ത് വിതച്ച് വീണ്ടും കൃഷിയിറക്കുകയായിരുന്നു. ഇതിനിടയിലും മഴ ലഭിക്കാത്തത് കർഷകരുടെ പ്രതീക്ഷകൾക്ക് തിരിച്ചടിയായി. ഞാറ് പറിച്ചുനട്ട പാടങ്ങളിൽ കളപറിക്കാനും വളപ്രയോഗം നടത്താനും ആവശ്യമായ വെള്ളം ലഭിക്കാത്തതും കർഷകരെ ദുരിതത്തിലാക്കുന്നു. ജില്ലയിലെ പല പാടശേഖരങ്ങളും വെള്ളമില്ലാതെ വിണ്ടുകീറിത്തുടങ്ങി. വരുംദിവസങ്ങളിലും മഴ ലഭിച്ചില്ലെങ്കിൽ ഈ വർഷത്തെ നെൽകൃഷി തന്നെ ഉപേക്ഷിക്കേണ്ടിവരുമെന്ന ആശങ്കയിലാണ് കർഷകർ.
ജില്ലയിൽ ഏറ്റവും കുറവ് മഴ ലഭിച്ച പ്രദേശങ്ങളിലൊന്നായ നൂൽപ്പുഴ പഞ്ചായത്തിൽ സ്ഥിതി കൂടുതൽ രൂക്ഷമാണ്. പഞ്ചായത്തിലെ വിവിധ പാടശേഖരങ്ങളിലായി ആയിരക്കണക്കിന് ഏക്കർ നെൽകൃഷിയാണ് ജലസേചന സൗകര്യമില്ലാതെ പ്രതിസന്ധിയിലായത്. നന്പിക്കൊല്ലി, മാതമംഗലം, കണ്ണങ്കോട് തുടങ്ങിയ പാടശേഖരങ്ങളിൽ ജലസേചനത്തിനായി പ്രധാനമായും ആശ്രയിച്ചിരുന്ന കല്ലൂർ പുഴയിലും ജലനിരപ്പ് കുറഞ്ഞതോടെ കർഷകർ ആശങ്കയിലാണ്.
പുഴയിൽനിന്ന് ആവശ്യത്തിന് വെള്ളം ലഭിക്കാത്തതിനാൽ കൃഷിയിടങ്ങളിലേക്ക് ജലമെത്തിക്കുന്നതും പ്രയാസകരമായി. പല പാടശേഖരങ്ങളിലും സ്വന്തമായി മോട്ടോർ ഉപയോഗിച്ചാണ് കർഷകർ ഇപ്പോൾ ജലസേചനം നടത്തുന്നത്. ഇതോടെ നെൽകൃഷിയുടെ ചെലവ് ഇരട്ടിയായി. ഇന്ധനച്ചെലവും വൈദ്യുതി ചെലവും കൂടാതെ മോട്ടോർ ഉപയോഗിച്ച് വെള്ളം പന്പുചെയ്യുന്നതിനുള്ള അധിക ചെലവും കർഷകർക്ക് താങ്ങാനാകാത്ത സ്ഥിതിയാണ്. ഇനിയും മഴ ലഭിക്കാതെ മോട്ടോർ ഉപയോഗിച്ച് ജലസേചനം നടത്തി കൃഷി മുന്നോട്ടുകൊണ്ടുപോയാൽ വൻ സാന്പത്തിക നഷ്ടമുണ്ടാകുമെന്നാണ് കർഷകർ പറയുന്നത്. ഒട്ടേറെ കർഷകർ നെൽകൃഷി ഉപേക്ഷിക്കുന്നതിനെക്കുറിച്ച് ആലോചിക്കുന്നുമുണ്ട്. ഇപ്പോൾ കളപറിക്കലും വളയോഗവും നടത്തേണ്ട നിർണായക ഘട്ടത്തിലാണ് നെൽകൃഷി.
ആവശ്യത്തിന് വെള്ളം ലഭിക്കാതെ ഇവ ചെയ്യാൻ കഴിയാത്തപക്ഷം പാടങ്ങളിൽ കളകയറി നെച്ചെടികൾ നശിക്കുന്ന സ്ഥിതിയുണ്ടാകും. മഴയുടെ കുറവിനൊപ്പം ജലസേചന സംവിധാനങ്ങളുടെ അപര്യാപ്തതയും കർഷകരുടെ പ്രതിസന്ധി രൂക്ഷമാക്കുകയാണ്.
കൃഷിയുടെ നിർണായക ഘട്ടത്തിൽ വെള്ളം ലഭ്യമാക്കുന്നതിന് അടിയന്തര നടപടി സ്വീകരിക്കുന്നതിനൊപ്പം ആവശ്യമായ ജലസേചന സംവിധാനങ്ങൾ സജ്ജമാക്കാനും സർക്കാർ ഇടപെടണമെന്നാണ് കർഷകരുടെ ആവശ്യം. കൃഷിവകുപ്പും തദ്ദേശ സ്ഥാപനങ്ങളും ബന്ധപ്പെട്ട വകുപ്പുകളും ചേർന്ന് അടിയന്തരമായി ഇടപെട്ടില്ലെങ്കിൽ വയനാട്ടിലെ പരന്പരാഗത നെൽകൃഷിക്ക് കനത്ത തിരിച്ചടിയാകും. കാലവർഷത്തിന്റെ കുറവ് തുടർന്നാൽ നിലവിലെ കൃഷിയെ മാത്രമല്ല അടുത്ത കൃഷിയിറക്കലിനെയും ഇത് ബാധിക്കുമെന്ന ആശങ്കയും കർഷകർക്കുണ്ട്. വെള്ളമില്ലാതെ പാടങ്ങൾ വരണ്ടുണങ്ങുന്ന സാഹചര്യം തുടർന്നാൽ കർഷകർ കൃഷിയിൽനിന്ന് പിൻമാറാൻ നിർബന്ധിതരാകുമെന്നും അവർ പറയുന്നു.
Kerala
തിരുവനന്തപുരം: നെൽകൃഷിയെ തകർക്കുന്ന കേന്ദ്ര സർക്കാർ നയത്തിനെതിരെ കേരള കർഷക സംഘം 27ന് ലോക്ഭവൻ മാർച്ച് നടത്തുമെന്ന് സംസ്ഥാന പ്രസിഡന്റ് എം.വിജയകുമാർ അറിയിച്ചു.
നെൽകർഷകരെ സഹായിക്കാൻ സംസ്ഥാന സർക്കാർ നൽകുന്ന അധിക ബോണസ് നിർത്തലാക്കണമെന്നാണ് കേന്ദ്ര നിർദേശം. സ്വാമിനാഥൻ കമ്മീഷൻ റിപ്പോർട്ട് പ്രകാരം കിലോയ്ക്ക് 40 രൂപയെങ്കിലും കൊടുക്കണമെന്നാണ്.
കേരളത്തിൽ കൊടുക്കുന്ന 30 രൂപയിൽ സംസ്ഥാന സർക്കാരിന്റെ ബോണസായി വരുന്നത് 6.80 രൂപയാണ്. 23.20 രൂപ കേന്ദ്ര ആനുകൂല്യവും. എന്നാൽ ഈ ബോണസ് കൊടുക്കാൻ പാടില്ലെന്ന് കേന്ദ്ര ധനകാര്യമന്ത്രാലയത്തിൽ നിന്ന് ചീഫ് സെക്രട്ടറിക്ക് കത്ത് ലഭിച്ചതായും വിജയകുമാർ പറഞ്ഞു.
27ന് രാവിലെ 10 മാനവീയം വീഥിയിൽ നിന്ന് ആരംഭിക്കുന്ന ധർണ അഖിലേന്ത്യ കിസാൻ സഭ വൈസ് പ്രസിഡന്റ് ഇ.പി.ജയരാജൻ ഉദ്ഘാടനം ചെയ്യും.