സുനില്കുമാറിന്റെ ഒന്നര ഏക്കറോളം നെല്കൃഷി കാട്ടാന നശിപ്പിച്ച നിലയില്.
ദാസനക്കര: തരകമ്പം ഭാഗത്ത് നിന്നും ജനവാസ മേഖലയിലെത്തിയ കാട്ടാന ഒന്നര ഏക്കറോളം നെല്കൃഷി നശിപ്പിച്ചു.
ദാസനക്കര അപ്പന്കവലയില് കല്ലുവയല് സുനില്കുമാറിന്റെയും കല്ലുവയല് സുനിതയുടേയും ഉടമസ്ഥതയിലുള്ള നെല്വയലിലാണ് കഴിഞ്ഞ ദിവസം കാട്ടാന വ്യാപകമായി നാശം വിതച്ചത്.
ഈ ഭാഗത്ത് ക്രാഷ് ഗാര്ഡ് ഫെന്സിംഗ് സ്ഥാപിച്ചിട്ടുണ്ടെങ്കിലും ഇത് തകര്ത്താണ് കാട്ടാന തരകമ്പം പാതയില്നിന്ന് നെല്വയലിലേക്ക് പ്രവേശിച്ചത്. വയലിലെ നെല്ച്ചെടികള് ചവിട്ടിമെതിച്ചും തിന്നും വ്യാപകമായി നശിപ്പിച്ചു. കാട്ടാനയുടെ ആക്രമണത്തില് കര്ഷകര്ക്ക് വലിയ സാമ്പത്തിക നഷ്ടം ഉണ്ടായി. ഫെന്സിംഗ് സംവിധാനം ഉണ്ടായിട്ടും കാട്ടാനകള് കൃഷിയിടങ്ങളിലേക്ക് ഇറങ്ങുന്നത് പ്രദേശത്തെ കര്ഷകരില് ആശങ്ക വര്ധിപ്പിച്ചിരിക്കുകയാണ്. ഈ ഭാഗത്ത് ക്രാഷ് ഗാര്ഡ് വേലി നിര്മാണത്തില് കര്ഷകര് അപാകതകള് ചൂണ്ടിക്കാണിച്ചിരുന്നു. തകര്ന്ന ഫെന്സിംഗ് അടിയന്തരമായി പുനഃസ്ഥാപിക്കണമെന്നും കൃഷിനാശത്തിന് അര്ഹമായ നഷ്ടപരിഹാരം അനുവദിക്കണമെന്നുമാണ് കര്ഷകരുടെ ആവശ്യം.