ഇന്ത്യൻ കൗണ്‍സിൽ മെഡിക്കൽ റിസർച്ച് (ഐസിഎംആർ) ചണ്ഡിഗഡിലെ പോസ്റ്റ് ഗ്രാജ്വേറ്റ് ഇൻസ്റ്റിറ്റ്യൂട്ട് ഓഫ് മെഡിക്കൽ എഡ്യൂക്കേഷൻ ആൻഡ് റിസർച്ചുമായി സഹകരിച്ചു നൽകുന്ന ജൂണിയർ റിസർച്ച് ഫെലോഷിപ്പി (ജെആർഎഫ്)ന് ഇപ്പോൾ അപേക്ഷിക്കാം. ജൂലൈ 22ന് ദേശീയതലത്തിൽ നടത്തുന്ന പ്രവേശന പരീക്ഷയുടെ അടിസ്ഥാനത്തിലാണ് ഫെലോഷിപ്പിന് യോഗ്യരായവരെ തെരഞ്ഞെടുക്കുന്നത്. ബംഗളൂരു, ഭോപ്പാൽ, ഭുവനേശ്വർ, ചണ്ഡിഗഡ്, ചെന്നൈ, ഡൽഹി, ഗോഹട്ടി, ഹൈദരാബാദ്, കോൽക്കത്ത, മുംബൈ, ശ്രീനഗർ, വാരണാസി എന്നിവിടങ്ങളിൽ വച്ചാണു പ്രവേശന പരീക്ഷ.
ആകെ 150 ഫെലോഷിപ്പുകളാണു നൽകുന്നത്. ഇതിൽ 120 എണ്ണം ബയോ മെഡിക്കൽ സയൻസിലും 30 എണ്ണം സോഷ്യൽ സയൻസിലുമാണു നൽകുന്നത്. സോഷ്യോളജി, സൈക്കോളജി, ഹോം സയൻസ്, സ്റ്റാറ്റിസ്റ്റിക്സ് അന്ത്രപ്പോളജി, സോഷ്യൽ വർക്ക്, പബ്ലിക് ഹെൽത്ത് എന്നീ വിഷയങ്ങളാണ് സോഷ്യൽ സയൻസിൽ ഉൾപ്പെടുത്തിയിരിക്കുന്നത്. ഈ മാസം 12 മുതൽ മേയ് 15 വരെ ഓണ്‍ലൈനായി വേണം അപേക്ഷ സമർപ്പിക്കാൻ. അപേക്ഷാ ഫീസ് 1000 രൂപ. പട്ടിക ജാതി-വർഗക്കാർക്ക് 800 രൂപ. ബന്ധപ്പെട്ട വിഷയത്തിൽ 55 ശതമാനം മാർക്കോടെ ബിരുദാനന്തര ബിരുദം നേടിയവർക്കും അവസാന വർഷ വിദ്യാർഥികൾക്കും അപേക്ഷിക്കാം. പ്രായം 2018 സെപ്റ്റംബർ 30ന് 28 കഴിയരുത്. സംവരണ വിഭാഗങ്ങൾക്ക് ഇളവുണ്ട്. വെബ്സൈറ്റ്: http://pgime r.edu.in, www.icmr.ni c.in.