മെഡിക്കൽ ജാമ്യത്തിനായി പ്രമേഹം ഉയർത്താൻ കേജരിവാൾ ശ്രമിക്കുന്നു: ഇഡി കോടതിയിൽ : Deepika.com National News |

ന്യൂഡൽഹി: ഡൽഹി മദ്യനയക്കേസിൽ ജയിലിൽ കഴിയുന്ന മുഖ്യമന്ത്രി അരവിന്ദ് കേജരിവാൾ മാന്പഴവും മധുരവും അമിതമായി കഴിച്ച്‌ പ്രമേഹത്തിന്‍റെ അളവ് ഉയർത്തി മെഡിക്കൽ ജാമ്യത്തിന് ശ്രമിക്കുന്നുവെന്ന് ഇഡി കോടതിയിൽ ആരോപിച്ചു. ഡോക്‌ടറെ കാണണമെന്നുള്ള കേജരിവാളിന്‍റെ ഹർജി പരിഗണിക്കുന്നതിനിടയിലായിരുന്നു ഇഡിയുടെ എതിർവാദം.

വീട്ടിൽ തയാറാക്കുന്ന ഭക്ഷണം കഴിക്കാൻ കേജരിവാളിനു നേരത്തേ അനുമതി ലഭിച്ചിരുന്നു. എന്നാൽ ഇഡിയുടെ വാദത്തിനെതിരേ ആം ആദ്മി രംഗത്തു വന്നിട്ടുണ്ട്. വീട്ടിൽ തയാറാക്കുന്ന ഭക്ഷണവും ഇൻസുലിനും നൽകാതെ കേജരിവാളിനെ കൊല്ലാനുള്ള ശ്രമമാണ് ഇഡി നടത്തുന്നതെന്ന് ഡൽഹി മന്ത്രിയും ആം ആദ്മി നേതാവുമായ അതിഷി മാർലേന ആരോപിച്ചു. അതേസമയം, കേജരിവാൾ കഴിക്കുന്ന ഭക്ഷണത്തിന്‍റെ റിപ്പോർട്ട് സമർപ്പിക്കാൻ ഹർജി പരിഗണിക്കവെ പ്രത്യേക ജഡ്ജി കാവേരി ബവേജ തിഹാർ ജയിൽ അധികൃതരോട് ആവശ്യപ്പെട്ടു.

ടൈപ് 2 പ്രമേഹമുള്ള കേജരിവാളിനു കഴിക്കാൻ ഡോക്‌ടർ നിർദേശിച്ചിട്ടുള്ള ഭക്ഷണത്തിന്‍റെ വിശദാംശങ്ങൾ സമർപ്പിക്കാൻ അദ്ദേഹത്തിന്‍റെ അഭിഭാഷകനോടും കോടതി ആവശ്യപ്പെട്ടു. ജയിലിൽ എല്ലാ സമയവും ഡോക്‌ടർമാരുണ്ടെന്നും കേജരിവാളിന്‍റെ ആരോഗ്യം ശ്രദ്ധിക്കുന്നുണ്ടെന്നും ഇഡി കോടതിയിൽ പറഞ്ഞു.