National
ബംഗളൂരു: എൻഫോഴ്സ്മെന്റ് ഡയറക്ടറേറ്റ് (ഇഡി) മൂന്നോ നാലോ മന്ത്രിമാരെക്കൂടി ലക്ഷ്യമിട്ടേക്കാമെന്ന് കർണാടക മുഖ്യമന്ത്രി ഡി.കെ. ശിവകുമാർ.
പൊതുമരാമത്ത് മന്ത്രി സതീഷ് ജാർക്കിഹോളിയുടെ വസതിയിൽ നടന്ന ഇഡി റെയ്ഡ് രാഷ്ട്രീയപ്രേരിതമാണെന്ന് അദ്ദേഹം ആരോപിച്ചു. വ്യാഴാഴ്ച രാത്രിയിൽ ജാർക്കിഹോളിയെ മുഖ്യമന്ത്രി സന്ദർശിച്ചിരുന്നു.
National
ബംഗളൂരു: കർണാടകയിൽ ഭരണം നിലനിർത്താൻ നീക്കങ്ങളുമായി മുഖ്യമന്ത്രി ഡി.കെ. ശിവകുമാർ. 2028ലെ നിയമസഭാ തെരഞ്ഞെടുപ്പിൽ ബിജെപിയുടെയും ആർഎസ്എസിന്റെയും പരമ്പരാഗത കോട്ടയായ തീരദേശ കർണാടക പിടിച്ചെടുക്കാനാണ് ഡികെയുടെ തീരുമാനം.
ഇതിന്റെ ഭാഗമായി ഈമാസം 18ന് പ്രത്യേക മന്ത്രിസഭായോഗം മംഗളൂരുവിൽ നടത്താൻ സർക്കാർ തീരുമാനിച്ചു. കർണാടകയുടെ ചരിത്രത്തിൽ ആദ്യമായാണു മന്ത്രിസഭായോഗം ദക്ഷിണ കന്നഡ ജില്ലയുടെ ആസ്ഥാനമായ മംഗളൂരുവിൽ നടക്കുന്നത്.
ആദർശപരമായ ധ്രുവീകരണത്തെ നേരിടാൻ വികസന രാഷ്ട്രീയം മുന്നോട്ടുവയ്ക്കുകയാണ് കോൺഗ്രസ്. ‘ബ്രാൻഡ് കരാവലി’ എന്ന പേരിൽ 1,260 കോടി രൂപയുടെ തീരദേശ ടൂറിസം പദ്ധതിയും വികസന പാക്കേജുകളും മന്ത്രിസഭായോഗത്തിൽ പ്രഖ്യാപിച്ചേക്കും.
കഴിഞ്ഞ മൂന്ന് പതിറ്റാണ്ടുകളായി ബിജെപിയുടെയും ആർഎസ്എസിന്റെയും കരുത്തുറ്റ ആധിപത്യമുള്ള പ്രദേശമാണ് ദക്ഷിണ കന്നഡയും ഉഡുപ്പിയും അടങ്ങുന്ന തീരദേശ മേഖല.
ദക്ഷിണേന്ത്യയിലെ ആർഎസ്എസിന്റെ ‘ഹിന്ദുത്വ ലബോറട്ടറി’ എന്നാണ് ദക്ഷിണ കന്നഡയും ഉഡുപ്പിയും അറിയപ്പെടുന്നത്. പതിറ്റാണ്ടുകളായി ആർഎസ്എസും അനുബന്ധ സംഘടനകളും ഇവിടെ താഴെത്തട്ടിൽ ശക്തമായ പ്രവർത്തനങ്ങളാണു നടത്തിവരുന്നത്. 1975ൽ പ്രഖ്യാപിച്ച അടിയന്തരാവസ്ഥ ഈ മേഖലയിൽ വലിയ മാറ്റങ്ങൾക്കിടയാക്കി.
അടിയന്തരാവസ്ഥയ്ക്കെതിരേ ജനങ്ങളെ അണിനിരത്തി കോൺഗ്രസ് വിരുദ്ധ വികാരം മുതലെടുക്കാൻ ആർഎസ്എസിനു സാധിച്ചതാണ് തീരദേശ കർണാടകയിൽ അവരുടെ അടിത്തറ ശക്തമാക്കിയത്.
2023ലെ നിയമസഭാ തെരഞ്ഞെടുപ്പിൽ മേഖലയിലെ 13 സീറ്റുകളിൽ 11 എണ്ണത്തിലും വിജയിച്ചത് ബിജെപിയായിരുന്നു. വികസനമെത്തിച്ച് ഈ പ്രദേശങ്ങളിലെ ഈ ബിജെപി കോട്ട തകർക്കുകയാണ് ഡി.കെ. ശിവകുമാറിന്റെ ലക്ഷ്യം.
മുൻ മുഖ്യമന്ത്രി സിദ്ധരാമയ്യയുടെ സ്ഥാനചലനത്തിനുശേഷം പിന്നാക്ക, ന്യൂനപക്ഷ, ദളിത് വോട്ടുബാങ്കിൽ ഉണ്ടായേക്കാവുന്ന വിടവ് നികത്താൻ ലിംഗായത്തുകളുടെയും ഹിന്ദുത്വ വോട്ടർമാരുടെയും പിന്തുണ ഉറപ്പാക്കാൻ മൃദു ഹിന്ദുത്വ പ്രതിച്ഛായയും ഡി.കെ. ഉപയോഗപ്പെടുത്തുന്നു.
ബിജെപിയുടെ സുരക്ഷിതമണ്ഡലങ്ങളിൽ വികസനവാഗ്ദാനം നൽകി ഭിന്നതയുണ്ടാക്കാനും 2028ലെ തെരഞ്ഞെടുപ്പിൽ നേട്ടമുണ്ടാക്കാനുമാണ് ഡി.കെ. ശിവകുമാർ ശ്രമിക്കുന്നതെന്ന് രാഷ്ട്രീയ നിരീക്ഷകർ വിലയിരുത്തുന്നു.
National
ബംഗളൂരു: കർണാടകത്തിൽ മന്ത്രിസഭ വികസിപ്പിച്ച് പത്തുദിവസത്തിനുശേഷം മന്ത്രിമാർക്കു വകുപ്പുകൾ അനുവദിച്ച് മുഖ്യമന്ത്രി ഡി.കെ. ശിവകുമാർ.
അധികാരത്തിലെത്തി രണ്ടുമാസം പിന്നിട്ടശേഷമുള്ള മന്ത്രിസഭാ വികസനത്തിൽ വനിതകളെ പൂർണമായും തഴഞ്ഞതു ചർച്ചയായിരുന്നു. രണ്ടാംഘട്ടത്തിൽ 19 മന്ത്രിമാരെയാണു നിയോഗിച്ചത്. ആദ്യഘട്ടത്തിൽ ചുമതലയേറ്റ മന്ത്രിമാരിൽ ചിലരുടെ വകുപ്പുകൾ വച്ചുമാറിയിട്ടുണ്ട്.
ഭവനനിർമാണ വകുപ്പ് ബി.സെഡ് സമീർ അഹമ്മദ് ഖാനും സഹകരണവകുപ്പ് ലക്ഷ്മൺ സാവാദിക്കും നൽകി. ലെജിസ്ലേറ്റീവ് അസംബ്ലിയിലെ ഡെപ്യൂട്ടി സ്പീക്കർ രുദ്രപ്പ മാനപ്പ ലാമാനിയാണു പഞ്ചസാര, ടെക്സ്റ്റൈൽ വകുപ്പുകളുടെ മന്ത്രി.
വകുപ്പ് വിഭജനത്തിൽ അതൃപ്തനായിരുന്ന രാമലിംഗ റെഡ്ഡിക്കു മേജർ ഇറിഗേഷനുപകരം വനംവകുപ്പ് നൽകി. പരിസ്ഥിതിമന്ത്രാലയത്തിന്റെ അമിത ചുമതലയും ഉണ്ട്. കെ.എച്ച്. മുനിയപ്പയ്ക്കു ഭക്ഷ്യ പൊതുവിതരണത്തിനു പകരം സാമൂഹ്യനീതി വകുപ്പ് അനുവദിച്ചു.
National
ബംഗളൂരു: കർണാടകയിലെ കോൺഗ്രസ് സർക്കാരിന്റെ മന്ത്രിസഭാ വികസനത്തെ ചൊല്ലി പാർട്ടിയിൽ ആരംഭിച്ച അമർഷം പരസ്യപ്രതിഷേധത്തിലേക്ക്. മന്ത്രിസ്ഥാനം ലഭിക്കാത്തതിൽ പ്രതിഷേധിച്ച് പ്രമുഖ എംഎൽഎമാർ രാജി പ്രഖ്യാപിച്ചതോടെ ഭരണകക്ഷിയിൽ കടുത്ത പ്രതിസന്ധിയാണ് രൂപപ്പെട്ടിരിക്കുന്നത്. അനുനയ നീക്കങ്ങളുമായി കോൺഗ്രസ് ഹൈക്കമാൻഡ് രംഗത്തെത്തിയെങ്കിലും പാർട്ടിയിൽ അനിശ്ചിതത്വം തുടരുകയാണ്.
മന്ത്രിസ്ഥാനം നിഷേധിക്കപ്പെട്ടതിൽ പ്രതിഷേധിച്ച് ഇൻഡി മണ്ഡലത്തിലെ എംഎൽഎ യശ്വന്ത്രായ ഗൗഡ പാട്ടീലും ഭദ്രാവതി എംഎൽഎ സംഗമേഷും രാജി പ്രഖ്യാപിച്ചു. മുതിർന്ന നേതാവ് ടി.ബി. ജയചന്ദ്രയും രാജിക്ക് ഒരുങ്ങുന്നതായാണ് വിവരം. പ്രിയ നേതാക്കൾക്ക് മന്ത്രിസ്ഥാനം ലഭിക്കാത്തതിൽ പ്രതിഷേധിച്ച് മണ്ഡ്യ, കൊപ്പള, വിജയനഗരി എന്നിവിടങ്ങളിൽ അണികൾ തെരുവിലിറങ്ങി. വിജയനഗരിയിൽ മുഖ്യമന്ത്രി ഡി.കെ. ശിവകുമാറിനെതിരെ കടുത്ത രോഷമുയരുകയും പ്രതിഷേധക്കാർ അദ്ദേഹത്തിന്റെ കോലം കത്തിക്കുകയും ചെയ്തു.
ഒൻപത് പുതുമുഖങ്ങളും ഒരു വനിതയും ഉൾപ്പെടെ 20 പേരാണ് ഇന്ന് മന്ത്രിമാരായി സത്യപ്രതിജ്ഞ ചെയ്യുന്നത്. മലയാളി നേതാവ് എൻ.എ. ഹാരിസ്, മുൻ ആരോഗ്യമന്ത്രി ദിനേഷ് ഗുണ്ടുറാവു എന്നിവർ പുതിയ പട്ടികയിൽ നിന്ന് പുറത്തായി. അതേസമയം, വിവാദ പരാമർശങ്ങൾ നടത്തിയ സമീർ അഹമ്മദ് ഖാൻ സ്ഥാനം നിലനിർത്തി. ജി.എസ്. പാട്ടീൽ സ്പീക്കറായും പൊന്നണ്ണ ഡെപ്യൂട്ടി സ്പീക്കറായും ചുമതലയേൽക്കും. കർണാടക ലെജിസ്ലേറ്റീവ് കൗൺസിൽ സ്പീക്കറായി സലീം അഹമ്മദും ഡെപ്യൂട്ടി സ്പീക്കറായി ഉമാശ്രീയും നിയമിതരാകും.
മന്ത്രിസഭയിൽ ഒറ്റ വനിതയ്ക്ക് മാത്രം പ്രാതിനിധ്യം നൽകിയതിലും പ്രമുഖരെ ഒഴിവാക്കിയതിലും പാർട്ടി നേതൃത്വത്തിനുള്ളിൽ കടുത്ത ഭിന്നത നിലനിൽക്കുന്നുണ്ട്. സ്ഥിതിഗതികൾ ശാന്തമാക്കാൻ കേന്ദ്ര നേതൃത്വം തീവ്രശ്രമത്തിലാണ്.