ബെർലിൻ: യൂറോപ്പ് ഭദ്രാസനത്തിന്റെ നേതൃത്വത്തിൽ സംഘടിപ്പിച്ച വുമൺസ് ഫോറം എക്സെലൻസ് അവാർഡ് 2026 ശ്രദ്ധേയമായി. കുര്യാക്കോസ് മാർ ഫിലോക്സിനോസ് മെത്രാപ്പോലീത്തയുടെ നേതൃത്വത്തിലും ഫാ. എൽദോസ് വട്ടപ്പറമ്പിൽ വൈസ് പ്രസിഡന്റായും റ്റീന ജോസഫ് സെക്രട്ടറി, സിന്ധു അബ്ജിൻ,മെറിൻ കുഞ്ഞുമോൻ, മറ്റു ഭാരവാഹികൾ എന്നിവരുടെ മേൽനോട്ടത്തിൽ പ്രവർത്തിക്കുന്ന വനിതാ ഫോറത്തിന്റെ ആഭിമുഖ്യത്തിലായിരുന്നു പുരസ്കാര വിതരണം.
വേങ്ങൂർ മാർ കൗമാ യാക്കോബായ സുറിയാനി പള്ളിയിൽ നടന്ന അഖില മലങ്കര ദേശീയ വാർഷിക സമ്മേളനത്തിലാണ് പുരസ്കാരദാന ചടങ്ങ് നടന്നത്. കാത്തോലിക്കാബാവ മോറൻ മോർ ബസേലിയോസ് ജോസഫാണ് അവാർഡ് വിതരണം നിർവഹിച്ചത്.
ഒരു ലക്ഷം രൂപയുടെ കാഷ് പ്രൈസും ട്രോഫിയും പ്രശസ്തിപത്രവും ഉൾപ്പെട്ട ഈ വർഷത്തെ വുമൺസ് ഫോറം എക്സലൻസ് അവാർഡ് കൊച്ചി ഭദ്രസനത്തിലെ സെന്റ് ജോർജ് യാക്കോബായ സുറിയാനി ഓർത്തഡോക്സ് ചാപ്പൽ കക്കാടം വനിതാസമാജം അംഗങ്ങൾ ഏറ്റുവാങ്ങി.
സഭാ സമൂഹത്തിൽ വനിതകളുടെ ആത്മീയവും സാമൂഹികവുമായ പങ്കാളിത്തം കൂടുതൽ ശക്തിപ്പെടുത്തുന്നതിനും പ്രോത്സാഹിപ്പിക്കുന്നതിനുമുള്ള യൂറോപ്പ് ഭദ്രാസനത്തിന്റെ പ്രവർത്തനങ്ങൾക്ക് ഈ പുരസ്കാര പദ്ധതി കൂടുതൽ കരുത്തേകുമെന്ന് കാത്തോലിക്കാ ബാവ അഭിപ്രായപ്പെട്ടു.