Kerala
കൊച്ചി: എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശനെതിരെ രൂക്ഷവിമർശനവുമായി സിപിഎം സംസ്ഥാന സെക്രട്ടേറിയറ്റ് അംഗം പി. ജയരാജൻ. വെള്ളാപ്പള്ളിയുടെ മുസ്ലിം വിരുദ്ധ നിലപാടുകൾ ചൂണ്ടിക്കാട്ടി ആയിരുന്നു ജയരാജന്റെ വിമർശനം.
എസ്എൻഡിപി ജനറൽ സെക്രട്ടറിയായിരുന്ന സി. കേശവനിൽ നിന്ന് ഇപ്പോഴത്തെ ജനറൽ സെക്രട്ടറി വെള്ളാപ്പള്ളി നടേശനിലേക്കുള്ള ദൂരം എത്രയാണെന്ന് ചോദിച്ച അദ്ദേഹം മുമ്പ് നായാടി മുതൽ നമ്പൂതിരി വരെ എന്ന് പറഞ്ഞിരുന്ന വെള്ളാപ്പള്ളി ഇപ്പോൾ നായാടി മുതൽ നസ്രാണി വരെ എന്നാണ് പറയുന്നതെന്നും ആരോപിച്ചു.
മുസ്ലിങ്ങളെ ബോധപൂർവം മാറ്റിനിർത്തുകയാണെന്നും ജയരാജൻ പറഞ്ഞു. അച്ഛൻ വെള്ളാപ്പള്ളി നടേശൻ നവോത്ഥാന സമിതി അധ്യക്ഷനാകുകയും മകൻ തുഷാർ വെള്ളാപ്പള്ളി ബിജെപി സഖ്യത്തിന്റെ നേതാവാകുകയും ചെയ്യുന്ന വൈരുധ്യമാണ് കേരളത്തിൽ സംഭവിക്കുന്നതെന്നും ജയരാജൻ പരിഹാസമുയർത്തി.
Kerala
കണ്ണൂർ: മാസപ്പടി കേസിൽ മുൻ മുഖ്യമന്ത്രി പിണറായി വിജയനെ ഉന്നമിടുന്നത് സിപിഎമ്മിനെ തകർക്കാനാണെന്ന് സിപിഎം സംസ്ഥാന സെക്രട്ടറിയേറ്റ് അംഗം പി. ജയരാജൻ. ഇഡിയുടെ നീക്കത്തെ രാഷ്ട്രീയമായും നിയമപരമായും എതിർക്കണമെന്നും അദ്ദേഹം കൂട്ടിച്ചേർത്തു.
യുഡിഎഫ് അധികാരത്തിൽ വന്നതോടെ ഏറ്റവും കൂടുതൽ സന്തോഷിക്കുന്നത് ആർഎസ്എസ് ആണ്. ചരിത്രത്തിൽ ആദ്യമായി മൂന്ന് സീറ്റ് ബിജെപിക്ക് കിട്ടി. പശ്ചിമ ബംഗാളിന് പിന്നാലെ കേരളത്തിലും ഭരണം കിട്ടുമെന്നാണ് അവരുടെ പ്രതീക്ഷ.
കേരളം കീഴടക്കണമെങ്കിൽ സിപിഎമ്മിനെ തകർക്കണം. അതിന്റെ ഭാഗമായാണ് ഇഡി കേരളത്തിലെത്തിയത്. അതാണ് പിണറായിയെയും റിയാസിനെയും കേസിൽ പെടുത്തുന്നത്. അതിൽ വി.ഡി. സതീശൻ സന്തോഷത്തിലാണെന്നും ജയരാജൻ പറഞ്ഞു.
അതേസമയം, പയ്യന്നൂർ, തളിപ്പറമ്പ് എന്നിവിടങ്ങളിലെ തോൽവിയെ കുറിച്ച് കേന്ദ്ര കമ്മിറ്റി കൃത്യമായി പറഞ്ഞെന്നും അദ്ദേഹം പ്രതികരിച്ചു. തെറ്റിദ്ധരിക്കപ്പെട്ട ആളുകളെ പാർട്ടിയുടെ ധാരണയ്ക്ക് അനുസരിച്ച് ഒന്നിപ്പിക്കാനുള്ള ശ്രമങ്ങൾ നടത്തും. സിപിഎമ്മിനകത്ത് എന്തെങ്കിലും ആശയ കുഴപ്പങ്ങൾ ഉണ്ടെങ്കിൽ തിരുത്താനുള്ള ശക്തി സിപിഎമ്മിനുണ്ടെന്നും ജയരാജൻ അവകാശപ്പെട്ടു.
Kerala
കണ്ണൂര്: പാർട്ടിക്ക് അണികൾ നല്കിയ തിരുത്തലാണ് പി.ജയരാജനെ സംസ്ഥാന സെക്രട്ടേറിയറ്റിലേക്കു കൈപിടിച്ചു കയറ്റുന്നത്. സംസ്ഥാന കമ്മിറ്റിയിലെ മുതിര്ന്ന അംഗങ്ങളിലൊരാളായ ജയരാജനെ കഴിഞ്ഞ സമ്മേളനകാലത്ത് സെക്രട്ടേറിയറ്റിലേക്കു പരിഗണിക്കാതിരുന്നത് നീതികേടായി വിലയിരുത്തപ്പെട്ടിരുന്നു.
അണികള്ക്കിടയില് പ്രതിഷേധം പുകഞ്ഞപ്പോഴും നേതൃത്വം അതൊന്നും കണക്കിലെടുത്തിരുന്നില്ല. അടുത്ത സമ്മേളനകാലത്ത് 75 വയസ് പിന്നിടുന്ന ജയരാജന് സംസ്ഥാന സമിതിയില്നിന്ന് ഇനിയൊരു ഉയർച്ചയില്ലെന്ന് കരുതിയിടത്തുനിന്നാണ് അസാധാരണ നീക്കത്തിലൂടെ ഇപ്പോൾ സെക്രട്ടേറിയറ്റിൽ ഉൾപ്പെടുത്തിയത്. ഇത് തീർച്ചയായും നേതൃത്വത്തിന് അണികൾ നൽകിയ തിരുത്തലാണ്.
വ്യക്തികള്ക്ക് ചുറ്റുമല്ല, പാര്ട്ടിയിലാണ് ആളുകളെ അണിനിരത്തേണ്ടതെന്നു കഴിഞ്ഞ സമ്മേളനത്തിൽ സംസ്ഥാന സെക്രട്ടറി പ്രവര്ത്തനറിപ്പോര്ട്ടില് ചൂണ്ടിക്കാട്ടിയപ്പോൾത്തന്നെ ജയരാജന്റെ സ്ഥാനം സംസ്ഥാന കമ്മിറ്റിയിൽത്തന്നെ ഒതുങ്ങുമെന്നു വ്യക്തമായിരുന്നു. പി. ജയരാജന്റെ ത്യാഗമോ പ്രവര്ത്തനപാരമ്പര്യമോ പാർട്ടി പരിഗണിക്കുന്നില്ലെന്ന് അണികൾ വിമർശനമുയർത്തി.
പല വിവാദങ്ങളിലും ഉൾപ്പെടുന്നതു മറയാക്കി സംസ്ഥാന നേതൃത്വം ജയരാജന്റെ വഴിയടയ്ക്കുന്പോഴും വിവാദങ്ങളുടെ വഴിയിലായിരുന്ന ചിലരെ നേതൃത്വം കൈവിടാതിരുന്നതും വലിയ ചര്ച്ചയായിരുന്നു. ജയരാജന്മാരിലെ സീനിയോറിറ്റി പരിഗണിച്ചാല് മൂന്നാം സ്ഥാനത്തുള്ള എം.വി. ജയരാജന് സംസ്ഥാന സെക്രട്ടേറിയറ്റിലെത്തിയതും കഴിഞ്ഞ സമ്മേളനകാലത്തെ പ്രധാന രാഷ്ട്രീയ ചർച്ചയായി.
കണ്ണൂരിലെ സിപിഎമ്മിന്റെ അനിഷേധ്യ നേതാക്കളിലൊരാളാണ് ജയരാജന്. അതുകൊണ്ടുതന്നെ പാര്ട്ടിയുള്പ്പെട്ട പല രാഷ്ട്രീയ സംഘര്ഷങ്ങളിലും വിവാദങ്ങളിലും ജയരാജന്റെ പേരുമുണ്ടായിരുന്നു.1972 ലാണ് ജയരാജന് സിപിഎം അംഗമാകുന്നത്. 10 വർഷം കൂത്തുപറമ്പ് ഏരിയാ സെക്രട്ടറിയായിരുന്നു. പിന്നീട് കണ്ണൂര് ജില്ലാ സെക്രട്ടേറിയറ്റിലെത്തി. 1998ല് സംസ്ഥാന സമിതി അംഗമായി. 2010 ഡിസംബറിലാണ് കണ്ണൂര് ജില്ലാ സെക്രട്ടറിയായത്. 2019ല് വടകര ലോക്സഭാ മണ്ഡലത്തില്നിന്നു മത്സരിക്കുന്നതിന് മുന്നോടിയായാണ് സ്ഥാനത്തുനിന്നു മാറ്റിയത്.
വടകര മണ്ഡലത്തില് പരാജയപ്പെട്ടെങ്കിലും ജയരാജന് ജില്ലാ സെക്രട്ടറി സ്ഥാനത്തേക്കു മടങ്ങിയെത്തിയില്ല. തുടർന്ന് ഏഴു കൊല്ലത്തിനിടെ പാര്ട്ടിയുടെ മറ്റൊരു ചുമതലയിലും ജയരാജനുണ്ടായിരുന്നില്ല. അണികളിൽ ജയരാജനുള്ള സ്വാധീനം ഒരുവിഭാഗം നേതാക്കളിൽ അതൃപ്തിയുളവാക്കിയെന്നും ഇതിന്റെ ഭാഗമായിട്ടാണ് ഒതുക്കലെന്നും ആക്ഷേപമുയർന്നു.
2021ല് ഖാദി ബോര്ഡ് ചെയര്മാന്സ്ഥാനം മാത്രമാണു പാര്ട്ടി ജയരാജന് നല്കിയിരുന്നത്. അധികാരത്തില് മൂന്നാമൂഴം കരുതിയിരുന്ന പാര്ട്ടിക്ക് ഇക്കുറി കനത്ത തിരിച്ചടി നേരിട്ടതോടെ ജയരാജന് നേതൃസ്ഥാനത്തെത്തണമെന്ന മുറവിളി ശക്തമായിരുന്നു.
Kerala
കണ്ണൂർ: പി. ജയരാജൻ പ്രതിപക്ഷ നേതാവ് പിണറായി വിജയനെ തള്ളിപ്പറഞ്ഞിട്ടില്ലെന്ന് സിപിഎം കണ്ണൂർ ജില്ലാ കമ്മിറ്റി. തെറ്റുതിരുത്തലെന്ന പിണറായി നിലപാട് തന്നെയാണ് ജയരാജനും പറഞ്ഞതെന്നാണ് ജില്ലാ കമ്മിറ്റിയുടെ വിശദീകരണം.
ഭിന്നതയെന്ന വാദം തെറ്റെന്നും സിപിഎം കണ്ണൂർ ജില്ലാ കമ്മിറ്റി അറിയിച്ചു. പി. ജയരാജന്റെ പോഡ്കാസ്റ്റ് അഭിമുഖത്തിന് പിന്നാലെയാണ് വിശദീകരണവുമായി ജില്ലാ കമ്മിറ്റി രംഗത്തെത്തിയത്. സംഭവത്തില് വിശദീകരണവുമായി പി. ജയരാജനും രംഗത്തെത്തിയിട്ടുണ്ട്.
പിണറായിയെ തള്ളിപ്പറഞ്ഞു എന്നത് തെറ്റായ വ്യാഖ്യാനമാണെന്ന് പി. ജയരാജൻ പറഞ്ഞു. പയ്യന്നൂരിൽ പിണറായി പ്രസംഗിക്കുന്നതിന് മുമ്പാണ് പോഡ്കാസ്റ്റ് ചിത്രീകരിച്ചത്. താനും പിണറായിയും പറഞ്ഞത് ഒരേ കാര്യമാണെന്നും അദ്ദേഹം വ്യക്തമാക്കി.
സ്വയം വിമർശനം പാർട്ടിയിൽ ഭിന്നിപ്പുണ്ടാക്കാനല്ലെന്നും പി. ജയരാജൻ കൂട്ടിച്ചേർത്തു. കമ്യൂണിസ്റ്റ് പാർട്ടിയിൽ ശുദ്ധീകരണം ആവശ്യമെന്നായിരുന്നു ജയരാജന്റെ പോഡ്കാസ്റ്റിലെ പരാമർശം.
Kerala
കണ്ണൂർ: സാമൂഹ്യമാധ്യമങ്ങളിലൂടെ തനിക്കെതിരെ വ്യാജ പ്രചരണം നടത്തുന്നവര്ക്കെതിരെ നിയമ നടപടികള് ആരംഭിച്ചെന്ന് സിപിഎം നേതാവ് പി. ജയരാജന്. പോലീസിനെ വെല്ലുവിളിച്ചതിന് പിന്നാലെ പിടിയിലായ അര്ജുന് ആയങ്കിയെ പി. ജയരാജന് ചേര്ത്തു പിടിച്ച് നില്ക്കുന്ന വ്യാജ ചിത്രം ഉപയോഗിച്ചാണ് വ്യാജ പ്രചരണം.
സാമൂഹ്യമാധ്യമങ്ങളിൽ പ്രചരിക്കുന്ന ചിത്രം പങ്കുവച്ചുകൊണ്ട് ഫേസ്ബുക്കിലൂടെയാണ് പി.ജയരാജൻ വ്യാജപ്രചരണത്തിനെതിരെ രംഗത്തെത്തിയത്. 27 വർഷം മുൻപ് നടന്ന ആർഎസ്എസ് ആക്രമണത്തിൽ നഷ്ടപ്പെട്ട ഇടതു കൈയിലെ പെരുവിരൽ, എഐ ഉപയോഗിച്ച് നിര്മിച്ച ചിത്രത്തിൽ പ്രത്യക്ഷപ്പെട്ടതും ജയരാജൻ പോസ്റ്റിൽ ചൂണ്ടിക്കാട്ടി. വ്യാജ പ്രചാരണത്തിനെതിരെ നിയമനടപടി തുടങ്ങിയതായും പി.ജയരാജൻ വ്യക്തമാക്കി.