മിന്നൽ പണിമുടക്കിൽ പെരുവഴിയിലായി യാത്രികർ : Deepika.com Kerala News |

Click here for detailed news of all items

മിന്നൽ പണിമുടക്കിൽ പെരുവഴിയിലായി യാത്രികർ

Thursday, May 9, 2024 1:17 AM IST

നെടുമ്പാശേരി/തിരുവനന്തപുരം: എയർ ഇന്ത്യ എക്സ്പ്രസ് വിമാനങ്ങളിൽ ജീവനക്കാരുടെ മിന്നൽ പണിമുടക്കിനെത്തുടർന്ന് യാത്രക്കാർ പെരുവഴിയിലായി. കേരളത്തിലെ നാലു വിമാനത്താവളങ്ങളിൽ സർവീസ് നടത്തുന്ന എയർ ഇന്ത്യ എക്സ്പ്രസിന്‍റെ മുപ്പതോളം ഫ്ലൈറ്റുകളാണ് മുടങ്ങിയത്.

നെടുമ്പാശേരിയിൽ വന്നുപോകുന്ന ഒന്പത് വിമാനങ്ങൾ ഇന്നലെ റദ്ദാക്കി. ഷാർജ, ദമാം, മസ്കറ്റ്, ബഹ്റിൻ എന്നിവിടങ്ങളിലേക്കുള്ള അന്താരാഷ്‌ട്ര സർവീസുകളും ബംഗളൂരുവിലേക്കുള്ള ആഭ്യന്തര സർവീസും റദ്ദാക്കി.

ഗൾഫ് രാജ്യങ്ങളിൽനിന്നു കൊച്ചിയിലേക്കുള്ള നാല് സർവീസുകൾ മുടങ്ങി. അടിയന്തരമായി വിദേശത്ത് എത്തേണ്ടവരും അന്യജില്ലകളിൽനിന്നും ഇന്നു പോകാനായി ഇവിടെയെത്തി താമസിച്ചവരും വിമാനങ്ങൾ റദ്ദാക്കിയതുമൂലം ദുരിതത്തിലായി. കരാർ തൊഴിലാളികളുടെ ഉൾപ്പെടെ പലരുടെയും വീസ കാലാവധി അവസാനിക്കുമെന്നതും പ്രശ്നമാണ്.

കേരളത്തിൽ തിരുവനന്തപുരം, കൊച്ചി, കരിപ്പൂർ, കണ്ണൂർ എന്നീ വിമാനത്താവളങ്ങളിലായി എയർ ഇന്ത്യ എക്സ്പ്രസിന്‍റെ 30ൽപ്പരം അന്താരാഷ്‌ട്ര - ആഭ്യന്തര ഫ്ലൈറ്റുകൾ സർവീസ് നടത്തുന്നുണ്ട്.

ഉച്ചയ്ക്ക് 1.10ന് ദുബായിലേക്ക് പുറപ്പെടേണ്ട എയർ ഇന്ത്യ എക്സ്പ്രസ് വിമാനത്തിലേക്ക് പത്തരയോടെ ചെക്ക് ഇൻ തുടങ്ങിയത് യാത്രക്കാർക്ക് നേരിയ ആശ്വാസമായി. മറ്റു വിമാനങ്ങളും ക്രമേണ സർവീസ് നടത്താൻ കഴിയുമെന്നാണ് എയർ ഇന്ത്യ എക്സ്പ്രസ് മാനേജ്മെന്‍റിന്‍റെ പ്രതീക്ഷ.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.