Deepika
ADVERTISEMENT
Kerala
തിരുവനന്തപുരം: യുഡിഎഫ് സർക്കാരിന്‍റെ ആദ്യ 100 ദിന കർമപദ്ധതി നാളെ പൂർത്തിയാകാനിരിക്കേ സംസ്ഥാനത്തെ 50 വകുപ്പുകളിലായി പ്രഖ്യാപിച്ച 598 പദ്ധതികളിൽ 539 എണ്ണം പൂർത്തിയാക്കാനായതായി പ്രോഗ്രസ് റിപ്പോർട്ട്. 39 പദ്ധതികൾ ഇനിയും പൂർത്തിയാക്കാനുണ്ട്. 90.13 ശതമാനം വിജയം. ഇന്നും നാളെയും കൂടി കാലാവധിയുള്ള സാഹചര്യത്തിൽ വിവിധ വകുപ്പുകൾ പദ്ധതികൾ പൂർത്തിയാക്കാനുള്ള തീവ്ര ശ്രമത്തിലാണ്.
ധനകാര്യം, ആരോഗ്യം, സാമൂഹിക നീതി, നോർക്ക, പുരാവസ്തു- പുരാരേഖ വകുപ്പുകളാണ് 90 ശതമാനത്തിനു താഴെ മാർക്ക് നേടിയ വകുപ്പുകൾ. പ്രഖ്യാപിച്ച മൂന്നു പദ്ധതികളിൽ രണ്ടെണ്ണം മാത്രം നടപ്പാക്കിയ മുഖ്യമന്ത്രി വി.ഡി. സതീശന്‍റെ കീഴിലുള്ള ധനവകുപ്പാണ് പിന്നിൽ. 67 ശതമാനം. റബറിന്‍റെ താങ്ങുവില 200 രൂപയിൽ നിന്ന് 250 ആക്കി ഉയർത്തൽ, വയോജനക്ഷേമ വകുപ്പ് രൂപീകരിക്കൽ, മിഷൻ സമുദ്ര പദ്ധതി അടക്കമുള്ള സുപ്രധാന പ്രഖ്യാപനങ്ങൾ 100 ദിന കർമപദ്ധതി പ്രകാരം സർക്കാരിനു നടപ്പാക്കാനായെന്ന നേട്ടവുമുണ്ട്.
എല്ലാ ആരോഗ്യ ഇൻഷ്വറൻസ് പദ്ധതികളെയും ഏകോപിപ്പിച്ചുകൊണ്ട് ഉമ്മൻ ചാണ്ടി ആരോഗ്യ ഇൻഷ്വറൻസ് പദ്ധതി നടപ്പാക്കുമെന്ന പ്രഖ്യാപനത്തിന്‍റെ വിദഗ്ധ സമിതി രൂപീകരണം അടക്കം പൂർത്തിയായി. അരലക്ഷം റേഷൻകാർഡുകൾ മുൻഗണനാ വിഭാഗത്തിലേക്കു മാറ്റുമെന്ന പ്രഖ്യാപനത്തിൽ ഇതിൽ കൂടുതൽ എണ്ണം മുൻഗണന വിഭാഗത്തിലേക്കു മാറ്റാനായി. ജൂലൈ ഒന്നിനാണ് മുഖ്യമന്ത്രി വി.ഡി. സതീശൻ യുഡിഎഫ് സർക്കാരിന്‍റെ ആദ്യ 100 ദിന കർമപദ്ധതി പ്രഖ്യാപിച്ചത്.
ഒക്്ടോബർ ഒൻപതിന് അവസാനിക്കുമെന്നായിരുന്നു പ്രഖ്യാപനം. 1748 പദ്ധതിഘടകങ്ങൾ പ്രഖ്യാപിച്ചവയിലുണ്ടായിരുന്നു. ഇതിൽ 1646 എണ്ണം പൂർത്തിയാക്കാനായി. 102 എണ്ണം പുരോഗതിയിലാണ്.
ഐഎഎസുകാരുടെ അലംഭാവവും പദ്ധതിയെ ഇഴച്ചു
പദ്ധതി പ്രഖ്യാപനത്തിന്‍റെ ആദ്യ 50 ദിവസം പിന്നിട്ടപ്പോൾ പദ്ധതികളുടെ പ്രവർത്തന പുരോഗതി മെല്ലെപ്പോക്കിലായിരുന്നു. പദ്ധതികൾക്കു വേഗം പോരാത്ത സാഹചര്യത്തിൽ മന്ത്രിമാർ, ഐഎഎസ് ഉദ്യോഗസ്ഥരായ സെക്രട്ടറിമാരുമായി ഇടയുന്ന സാഹചര്യവുമുണ്ടായി.
ഐഎഎസുകാർ ചട്ടങ്ങൾക്ക് അനുസൃതമായിട്ടായിരുന്നു ഫയലുകളിൽ തീരുമാനമെടുത്തിരുന്നത്. ഇതാണ് മന്ത്രിമാരുമായുള്ള തർക്കത്തിന് കാരണം. തുടർന്നാണ് 100 ദിന കർമപദ്ധതി വേഗം കൂട്ടി ടോപ്പ് ഗിയറിലാക്കിയത്.
കൃഷി അനുബന്ധം, പൊതുസേവനം, സാമൂഹിക സേവനം, തദ്ദേശ സ്വയംഭരണം, ഊർജം, ശാസ്ത്ര സാങ്കേതിക ഗവേഷണം, സാന്പത്തികം, വ്യവസായം, സഹകരണം, ജലവിഭവം, ജലസേചനം, ഗതാഗതം എന്നിങ്ങനെ 11 മേഖലകളായി തിരിച്ചായിരുന്നു കർമപദ്ധതി ആവിഷ്കരിച്ചത്.
100 ശതമാനം പദ്ധതികൾ പൂർത്തിയാക്കിയ വകുപ്പുകൾ
കൃഷി, മൃഗസംരക്ഷണം, പിന്നാക്ക വിഭാഗ വികസനം, സഹകരണം, സാംസ്കാരികം, ക്ഷീര വികസനം, ദേവസ്വം, ദുരന്ത നിവാരണം, മത്സ്യബന്ധനം, ഭക്ഷ്യ സിവിൽ സപ്ലൈസ് ആൻഡ് ലീഗൽ മെട്രോളജി, വനം- വന്യജീവി, പൊതുവിദ്യാഭ്യാസം, ഉന്നത വിദ്യാഭ്യാസം, ഭവനനിർമാണം, കയർ, ഇൻഫർമേഷൻ ആൻഡ് പബ്ലിക് റിലേഷൻസ്, വയോജനക്ഷേമം, തൊഴിലും നൈപുണ്യവും, നിയമം, പാർലമെന്‍ററി കാര്യം, ആസൂത്രണം, തുറമുഖം, ഊർജം, ഉൾനാടൻ ജലഗതാഗതം,ശാസ്ത്ര സാങ്കേതികം, നികുതി, എക്സൈസ്, രജിസ്ട്രേഷൻ, വിനോദ സഞ്ചാരം, വിജിലൻസ്, വനിതാ ശിശുവികസനം.
പൂർത്തിയാക്കാനാകാത്ത പ്രധാന പ്രഖ്യാപനങ്ങൾ
അയ്യന്‍കാളി തൊഴിലുറപ്പു പദ്ധതിയിൽ 100 തൊഴിൽ ദിനങ്ങൾ ഉറപ്പാക്കാൻ മാനദണ്ഡങ്ങളിൽ ഭേദഗതി, പ്ലാസ്റ്റിക് റീസൈക്ലിംഗ് നയം, സാനിറ്ററി പാഡുകളുടെയും ഡയപ്പറുകളുടെയും സംസ്കരണ സംവിധാനം ഒരുക്കൽ, പൊതുജനാരോഗ്യ നിയമത്തിലെ വ്യവസ്ഥകൾ നടപ്പാക്കാൻ തദ്ദേശ സ്ഥാപന അടിസ്ഥാനത്തിൽ കമ്മ്യൂണിറ്റി ഹെൽത്ത് സ്ക്വാഡുകൾ രൂപീകരിക്കൽ, ആദിവാസി മേഖലയിലെ ആരോഗ്യ പരിപാലനത്തിനുള്ള പദ്ധതി, സർക്കാർ ആശുപത്രികളിലെത്തുന്ന രോഗികൾക്ക് കിടക്ക അവകാശമാക്കി മാറ്റുന്ന പദ്ധതി, തീരമേഖലയിലെ ആരോഗ്യ പ്രശ്നം പഠിക്കാൻ സമിതി രൂപീകരിക്കൽ, തിരുവനന്തപുരം ജനറൽ ആശുപത്രിയിൽ 10 കിടക്കകളുള്ള ഐസൊലേഷൻ വാർഡ് തുറക്കൽ, നിക്ഷേപങ്ങൾ ആകർഷിക്കാൻ ഉപദേശക സമിതികളുടെ രൂപീകരണം, വേന്പനാട് കായലിലെ പഴുക്കാനില ശുചീകരണം തിരുവനന്തപുരം വനിത ഓപ്പണ്‍ ജയിൽസെല്ലുകളുടെ നവീകരണം, ഉയരമേറിയ കെട്ടിടങ്ങളിലെ രക്ഷാപ്രവർത്തനത്തിന് ഏരിയൽ ലാഡർ പ്ലാറ്റ് ഫോം വാങ്ങൽ, പൊലിസ് സേനയിലെ വനിതാ പ്രാതിനിധ്യം ഉയർത്തൽ, ജയിൽ വീഡിയോ കോണ്ഫറൻസ് സംവിധാന നവീകരണം.
Leader Page
‘പുതുയുഗ കേരളം’എന്ന മുദ്രാവാക്യവും ആശയവും ജനങ്ങള്‍ പൂര്‍ണമനസോടെ സ്വീകരിച്ചതിന്‍റെ പരിണിതിയായിരുന്നു 102 സീറ്റുമായുള്ള യുഡിഎഫിന്‍റെ ചരിത്രവിജയം. യുഡിഎഫ് സര്‍ക്കാര്‍ 100 ദിവസം പിന്നിടുകയാണ്. പ്രതിപക്ഷത്തിരുന്നപ്പോഴും തെരഞ്ഞെടുപ്പ് പ്രചാരണവേളയിലും ജനങ്ങള്‍ക്കു നല്‍കിയ വാഗ്ദാനങ്ങള്‍ കൃത്യമായി പാലിക്കാനുള്ളതാണെന്ന ഉത്തമബോധ്യം സര്‍ക്കാരിനുണ്ട്. അതിന്‍റെ ഭാഗമായാണ് ആദ്യ മന്ത്രിസഭാ യോഗത്തില്‍ത്തന്നെ കെഎസ്ആര്‍ടിസി ബസുകളില്‍ സ്ത്രീകള്‍ക്കു സൗജന്യയാത്ര തീരുമാനിച്ചതും ആശാ പ്രവര്‍ത്തകര്‍, അങ്കണവാടി ജീവനക്കാര്‍, പാചക തൊഴിലാളികള്‍, പ്രീ-പ്രൈമറി അധ്യാപകര്‍, ആയമാര്‍ എന്നിവരുടെ ഓണറേറിയം വര്‍ധിപ്പിച്ചതും പിഎസ്‌സി റാങ്ക് പട്ടികയുടെ കാലാവധി നീട്ടിയതും. വന്‍കിട വികസനപദ്ധതികളും സ്വപ്നപദ്ധതികളും നടപ്പിലാക്കുന്നതിനൊപ്പം സമൂഹത്തിന്‍റെ നാനാതുറകളിലുള്ളവരെയും ചേര്‍ത്തുപിടിച്ച് മുന്നോട്ടു പോകുകയെന്നതാണ് ഈ സര്‍ക്കാരിന്‍റെ ലക്ഷ്യം.
◄ഇന്ദിരാ ഗാരന്‍റികൾ
സാമൂഹികക്ഷേമത്തിനും സമഗ്ര വികസനത്തിനും മുന്‍ഗണന നല്‍കിക്കൊണ്ടാണ് ‘ഇന്ദിരാ ഗാരന്‍റി’കൾ പ്രഖ്യാപിച്ചത്. സ്ത്രീകള്‍ക്കുള്ള സൗജന്യ യാത്ര, വയോജന വകുപ്പ് എന്നിവ ഇതിനോടകം നടപ്പിലാകുകയും ചെയ്തു. സൗജന്യയാത്ര സ്ത്രീകളോടുള്ള സര്‍ക്കാരിന്‍റെ ആദരവാണ്. മുതിര്‍ന്ന പൗരന്മാരോടുള്ള സര്‍ക്കാരിന്‍റെ കരുതലിന്‍റെ ഭാഗമാണ് വയോജനവകുപ്പ്. ഇത്തരമൊരു പരിഗണന രാജ്യത്ത് ആദ്യമാണ്. ഇതിനു പുറമെയാണ് 100 ദിന കര്‍മപദ്ധതി പ്രഖ്യാപിച്ചത്. കൃഷി, വ്യവസായം, സഹകരണം എന്നിങ്ങനെ 11 മേഖലകളിലായി 43 വകുപ്പുകള്‍ ചേര്‍ന്ന് 597 പദ്ധതികളാണ് 100 ദിവസം കൊണ്ടു നടപ്പിലാക്കുന്നത്. സര്‍ക്കാരിനു കൃത്യമായ വീക്ഷണവും ലക്ഷ്യവുമുണ്ട്. വികസന പ്രവര്‍ത്തനങ്ങള്‍ക്ക് മുന്‍ഗണനാക്രമങ്ങളുണ്ട്.
◄വിലക്കയറ്റം നിയന്ത്രിക്കാൻ നടപടി
സര്‍ക്കാരിന് 100 ദിവസം തികയുമ്പോള്‍ സംസ്ഥാനം ഓണാഘോഷത്തിന്‍റെ ലഹരിയിലാണ്. വിപണിയില്‍ കൃത്യമായി ഇടപെട്ട് വിലക്കയറ്റം നിയന്ത്രിക്കാനുള്ള നടപടികളാണു സര്‍ക്കാര്‍ സ്വീകരിച്ചത്. സപ്ലൈകോ, കണ്‍സ്യൂമര്‍ഫെഡ് ഔട്ട്‌ലറ്റുകളില്‍ 13 സബ്‌സിഡി സാധനങ്ങളും വില കൂട്ടാതെ വിതരണം ചെയ്യുന്നുണ്ടെന്ന് ഉറപ്പുവരുത്തി. ചെറുപയര്‍, ഉഴുന്ന്, വന്‍കടല, വന്‍പയര്‍, തുവരപ്പരിപ്പ് തുടങ്ങി 10 പ്രമുഖ അവശ്യസാധനങ്ങള്‍ കഴിഞ്ഞ ഓണക്കാലത്തെ സബ്‌സിഡി നിരക്കിനേക്കാള്‍ കുറഞ്ഞ വിലയിലാണു വിതരണം ചെയ്യുന്നത്. വെളിച്ചെണ്ണയും വില കുറച്ചു നല്‍കി. ഓഗസ്റ്റ്, സെപ്റ്റംബര്‍ മാസങ്ങളിലെ സബ്‌സിഡി സാധനങ്ങള്‍ ഒരുമിച്ച് വാങ്ങാനുള്ള സൗകര്യവും ഒരുക്കിയിട്ടുണ്ട്. മുന്‍വര്‍ഷങ്ങളിലേതുപോലെ ഒഴിഞ്ഞ റാക്കുകള്‍ എന്ന പരാതി പരിഹരിച്ച് സപ്ലൈകോയില്‍ ആവശ്യത്തിന് സ്റ്റോക്ക് ഉറപ്പാക്കിയിട്ടുണ്ട്.
◄അധികനികുതി ചുമത്താതെ ആദ്യബജറ്റ്
ചരിത്രത്തിലൊരിക്കലുമില്ലാത്ത ധന പ്രതിസന്ധിയെ അഭിമുഖീകരിക്കുമ്പോഴും ഒരു രൂപയുടെ പോലും അധികനികുതി ചുമത്താതെയാണ് ആദ്യബജറ്റ് അവതരിപ്പിച്ചത്. സംസ്ഥാനത്തിന്‍റെ പ്രതിസന്ധി നിറഞ്ഞ ധനസ്ഥിതിയിലും ക്ഷേമ പെന്‍ഷന്‍ വിതരണം ഉള്‍പ്പെടെയുള്ള സാമൂഹിക ക്ഷേമ പരിപാടികള്‍ തടസപ്പെടാതിരിക്കാന്‍ പ്രത്യേകം ശ്രദ്ധിച്ചു. ഒരു മാസംപോലും ക്ഷേമ പെന്‍ഷന്‍ മുടങ്ങരുതെന്നതാണു സര്‍ക്കാരിന്‍റെ നിലപാട്.
ഓണം പ്രമാണിച്ച് ഓഗസ്റ്റ് മാസത്തെ പെന്‍ഷന്‍ വിതരണം നേരത്തേയാക്കി. അധ്യാപകര്‍ ഉള്‍പ്പെടെയുള്ള സര്‍ക്കാര്‍ ജീവനക്കാരുടെ ഉത്സവബത്തയും മറ്റ് ആനുകൂല്യങ്ങളും തടസമില്ലാതെ വിതരണം ചെയ്തു. കെടിഡിസി, കെഎസ്ആര്‍ടിസി, സഹകരണ മേഖല എന്നിവയിലെ ജീവനക്കാര്‍ക്കും പെന്‍ഷന്‍കാര്‍ക്കും ബോണസ്, ഉത്സവബത്ത, സാലറി അഡ്വാന്‍സ് എന്നിവ ഉറപ്പാക്കി.
തദ്ദേശ സ്വയംഭരണ സ്ഥാപനങ്ങളിലെ മുഴുവന്‍ ജനപ്രതിനിധികള്‍ക്കും ചരിത്രത്തിലാദ്യമായി 2,000 രൂപ ഓണം ഉത്സവബത്ത അനുവദിക്കുകയും ഹരിതകര്‍മ സേനാംഗങ്ങളുടെ ഉത്സവബത്ത 1,500 രൂപയായി ഉയര്‍ത്തുകയും ചെയ്തു. കഴിഞ്ഞ സര്‍ക്കാരിന്‍റെ കാലത്ത് ഫണ്ട് വകമാറ്റിയതിനെത്തുടര്‍ന്ന് കുടിശികയായ പ്രവാസി ക്ഷേമനിധി ബോര്‍ഡ് പെന്‍ഷന്‍ വിതരണത്തിന് 32 കോടി അനുവദിച്ചു.
◄ദുർബല വിഭാഗങ്ങളെ ചേർത്തുപിടിച്ചു
സ്‌കോളര്‍ഷിപ്പ് മുടങ്ങി പട്ടികജാതി-പട്ടികവര്‍ഗ വിദ്യാര്‍ഥികളുടെ പഠനം തടസപ്പെട്ട അവസ്ഥയ്ക്ക് ഈ സര്‍ക്കാര്‍ പരിഹാരം കണ്ടു. മുന്‍ സര്‍ക്കാരിന്‍റെ കാലത്തെ കുടിശിക തീര്‍ക്കാന്‍ അധികാരത്തിലെത്തി 84 ദിവസത്തിനകം 310 കോടി രൂപ അനുവദിച്ചു.
കാരുണ്യ, ആരോഗ്യകിരണം പദ്ധതികളിലെ അടിയന്തര ബാധ്യതകള്‍ തീര്‍ക്കാന്‍ 200 കോടി രൂപയും സപ്ലൈകോ വഴി നെല്ല് സംഭരിച്ചതിന്‍റെ പിആര്‍എസ് കുടിശിക തീര്‍ക്കാന്‍ 150 കോടി രൂപയും അനുവദിച്ചു. 100 തൊഴില്‍ ദിനങ്ങള്‍ പൂര്‍ത്തിയാക്കിയ 3.68 ലക്ഷം തൊഴിലുറപ്പ് തൊഴിലാളികള്‍ക്ക് 1,200 രൂപ വീതം നല്‍കാന്‍ 44.24 കോടി രൂപയും അയ്യങ്കാളി നഗര തൊഴിലുറപ്പ് തൊഴിലാളികള്‍ക്ക് 1,200 രൂപ വീതം നല്‍കാന്‍ 85.06 ലക്ഷം രൂപയും കൈമാറി.
സ്‌കൂള്‍ പാചക തൊഴിലാളികളുടെ പ്രതിമാസ വേതനം വര്‍ധിപ്പിച്ച് അക്കൗണ്ടുകളിലേക്ക് നേരിട്ടെത്തിക്കാന്‍ 44 കോടി രൂപ അനുവദിച്ചു. മുന്‍ സര്‍ക്കാരിന്‍റെ കാലത്ത് 650 മുതല്‍ 675 രൂപയായിരുന്ന പ്രതിദിന വേതനം 1,000 രൂപയായാണു വര്‍ധിപ്പിച്ചത്. ലോട്ടറി ഏജന്‍റുമാരുടെയും വില്‍പനക്കാരുടെയും ബോണസില്‍ 1,000 രൂപയുടെ വര്‍ധന വരുത്തി.
എന്‍ഡോസള്‍ഫാന്‍ ദുരിതബാധിതര്‍ക്കുള്ള ‘സ്നേഹസാന്ത്വനം’പദ്ധതിക്കായി 14.40 കോടി രൂപ അനുവദിച്ചു. പട്ടികവര്‍ഗ വിഭാഗക്കാര്‍ക്ക് ഓണസമ്മാനമായി 1000 രൂപ വീതം നല്‍കാന്‍ 5.28 കോടി രൂപ നീക്കിവച്ചു. ‘ആശ്വാസകിരണം’ പദ്ധതി വഴി നല്‍കുന്ന ധനസഹായം 600 രൂപയില്‍നിന്ന് 1,000 രൂപയായി ഉയര്‍ത്തി.
മുണ്ടക്കൈ-ചൂരല്‍മല പുനരധിവാസത്തിന്‍റെ ഭാഗമായി കുടുംബമൊന്നിന് രണ്ടു ലക്ഷം രൂപ വീതം അധികസഹായം പ്രഖ്യാപിച്ചു. സ്പോര്‍ട്സ് കൗണ്‍സില്‍ കരാര്‍ ജീവനക്കാരുടെ ശമ്പളക്കുടിശിക തീര്‍ക്കാന്‍ 1.50 കോടി രൂപയും പൂട്ടിക്കിടക്കുന്ന തോട്ടങ്ങളിലെ തൊഴിലാളികള്‍ക്ക് ഉത്സവബത്തയ്ക്കും ഓണക്കിറ്റിനുമായി 20.87 ലക്ഷം രൂപയും നല്‍കി. പ്രവാസി മലയാളികളുടെ സുരക്ഷയ്ക്കായി അഞ്ചു ലക്ഷം മുതല്‍ ഒരു കോടി രൂപവരെ ചികിത്സാ പരിരക്ഷ നല്‍കുന്ന ‘നോര്‍ക്ക കെയര്‍ പ്ലസ്’പദ്ധതിയുടെ രണ്ടാം ഘട്ടവും ആവിഷ്‌കരിച്ചു.
◄ഓപ്പറേഷൻ തൂഫാൻ
സിന്തറ്റിക് ലഹരിയുടെ ഹബ്ബായി മാറിയ കേരളത്തെ ലഹരിമുക്തമാക്കുമെന്ന പ്രഖ്യാപനത്തിന്‍റെ തുടര്‍ച്ചയായാണ് ആഭ്യന്തരവകുപ്പ് ‘ഓപ്പറേഷന്‍ തൂഫാന്‍’ആരംഭിച്ചത്. ലഹരി മാഫിയയുമായി ബന്ധപ്പെട്ട പതിനായിരത്തിലധികം പേരെ ഇതിനകം അറസ്റ്റ് ചെയ്തു. ലഹരിക്കെതിരേ കായിക മേഖലയിലേക്കു കുട്ടികളെ വഴിതിരിച്ച് വിടുകയെന്നത് ഫലപ്രദമായ മാര്‍ഗമാണ്. ഇതുകൂടി കണക്കിലെടുത്ത് കായികരംഗത്തെ അടിസ്ഥാനസൗകര്യങ്ങള്‍ വര്‍ധിപ്പിക്കാന്‍ സര്‍ക്കാര്‍-സ്വകാര്യ പങ്കാളിത്തത്തോടെ "ഓപ്പറേഷന്‍ കളരി’എന്ന പദ്ധതിക്കും തുടക്കം കുറിച്ചിട്ടുണ്ട്. എക്സൈസ് വകുപ്പ് ഓപ്പറേഷന്‍ തണ്ടര്‍ ഫലപ്രദമായി നടപ്പാക്കുന്നു. ലഹരി മാഫിയയുടെ അടിവേര് അറക്കുകയെന്നത് സര്‍ക്കാരിന്‍റെ പ്രഖ്യാപിത ലക്ഷ്യമാണ്.
◄മിഷന്‍ സമുദ്ര
കേരളത്തെ അന്താരാഷ്‌ട്ര തലത്തിലുള്ള തുറമുഖ നഗരമാക്കി മാറ്റാനുള്ള സ്വപ്നപദ്ധതിയാണ് ‘മിഷന്‍ സമുദ്ര’. തീരദേശത്തെ ആഗോള മാന്യുമഫാക്ചറിംഗ് ഹബ്ബാക്കി മാറ്റുന്ന 400 കോടിയുടെ പദ്ധതിയാണിത്.
ചരക്കുനീക്കം പൂര്‍ണതോതില്‍ ആരംഭിച്ച വിഴിഞ്ഞം അന്താരാഷ്‌ട്ര തുറമുഖത്തിന്‍റെ സാധ്യതകള്‍ മിഷന്‍ സമുദ്രയ്ക്ക് കരുത്തേകും. വിഴിഞ്ഞം രാജ്യാന്തര തുറമുഖത്ത് സമ്പൂര്‍ണ എക്സിം പ്രവര്‍ത്തനങ്ങള്‍ ആരംഭിച്ചതോടെ വിദേശ വിപണികളിലേക്കു നേരിട്ട് ചരക്കുകള്‍ അയക്കാനും യാത്രാസമയവും ചെലവും കുറയ്ക്കാനും വഴിതുറന്നു.
ഇന്‍കെല്‍ മുഖേന വിഴിഞ്ഞത്ത് 100 ഏക്കറില്‍ ലോജിസ്റ്റിക്സ് ഇക്കോസിസ്റ്റവും പാലക്കാട്ട് ലോജിസ്റ്റിക്സ് ഹബ്ബും അങ്കമാലിയില്‍ 28 കോടി ചെലവില്‍ ഐടി പാര്‍ക്കും റിയല്‍ എസ്റ്റേറ്റ് വികസനത്തിനായി 5,500 കോടിയുടെ വളര്‍ച്ചാഫണ്ടും ആവിഷ്‌കരിച്ചിട്ടുണ്ട്. കിന്‍ഫ്ര, ഇന്‍കെല്‍ മുഖേന വ്യവസായ-ഐടി വികസന പ്രവര്‍ത്തനങ്ങള്‍ക്കായി വിമാനത്താവളങ്ങളുടെയും തുറമുഖങ്ങളുടെയും സമീപ പ്രദേശങ്ങളില്‍ പുതുയ വ്യവസായ വികസന മേഖലകള്‍ സ്ഥാപിക്കുന്നതിനുള്ള പ്രവര്‍ത്തനങ്ങള്‍ പുരോഗമിക്കുന്നു.
Kerala
കൊച്ചി: പി എം ശ്രീ പദ്ധതിയുമായി മുന്നോട്ട് പോകാനുള്ള യുഡിഎഫ് സർക്കാരിന്‍റെ തീരുമാനത്തെ വിമർശിച്ച് മുൻ മന്ത്രി പി. രാജീവ്. തെരഞ്ഞെടുപ്പ് സമയത്ത് പദ്ധതി അറബിക്കടലിൽ എറിയുമെന്ന് പ്രഖ്യാപിച്ച യുഡിഎഫ് അധികാരത്തിലെത്തിയ ശേഷം അതേ പദ്ധതിയുമായി മുന്നോട്ട് പോകുന്നത് രാഷ്ട്രീയ വഞ്ചനയാണെന്ന് അദ്ദേഹം ആരോപിച്ചു.
വാഗ്ദാനങ്ങൾ പറയാൻ മാത്രമല്ല, അത് നടപ്പാക്കാനുള്ള നട്ടെല്ലും ഭരണത്തിന് ആവശ്യമാണെന്നും രാജീവ് പറഞ്ഞു. എൽ ഡി എഫ് സർക്കാർ പി എം ശ്രീ പദ്ധതിയുമായി ബന്ധപ്പെട്ട് ഒരു മെമ്മോറണ്ടത്തിൽ മാത്രമാണ് ഒപ്പുവെച്ചിരുന്നത്.
പദ്ധതിയിൽ ഒപ്പുവെച്ചതിന്റെ പേരിൽ ഒരു രൂപയുടെ ഫണ്ടും ലഭിച്ചിട്ടില്ലെന്നും വിഷയത്തിൽ മന്ത്രിസഭാ തീരുമാനവും ഉണ്ടായിരുന്നില്ലെന്നും അദ്ദേഹം പറഞ്ഞു. എസ് എസ് കെ ഫണ്ട് ലഭ്യമാക്കുന്നതിനായി മന്ത്രിസഭയുടെ അനുമതിയില്ലാതെ ഏതെങ്കിലും സെക്രട്ടറി കരാറിൽ ഒപ്പുവെച്ചിട്ടുണ്ടെങ്കിൽ അത്തരം ഉദ്യോഗസ്ഥർക്കെതിരെ നടപടിയെടുക്കുകയാണ് വേണ്ടതെന്നും രാജീവ് അഭിപ്രായപ്പെട്ടു.
എൽഡിഎഫ് സർക്കാർ സ്വീകരിച്ച മാതൃകയിൽ പദ്ധതി നിർത്തിവെക്കാൻ യുഡിഎഫ് സർക്കാരും തയാറാകണമെന്നും അദ്ദേഹം ആവശ്യപ്പെട്ടു. കേരളത്തിൽ ബിജെപിക്ക് അനുകൂലമായ നിലപാടാണ് നിലവിലെ സർക്കാർ സ്വീകരിക്കുന്നതെന്നും പി. രാജീവ് ആരോപിച്ചു. തെരഞ്ഞെടുപ്പ് വാഗ്ദാനങ്ങൾക്ക് വിരുദ്ധമായാണ് സർക്കാർ ഇപ്പോൾ പ്രവർത്തിക്കുന്നതെന്നും അദ്ദേഹം വിമർശിച്ചു.
ADVERTISEMENT
ADVERTISEMENT
SPACE FOR ADVERTISEMENT
Copyright © 2026, Rashtra Deepika Ltd. All Rights Reserved.
Design and Development 
Corehub Solutions
Contact Numbers :
+91 481 2566706, 2566707, 2566708
About Us Feedback Privacy Policy Terms and Conditions for Online Payment
E-paper LOGIN
LOGIN