Kerala
കൊച്ചി: കൊച്ചിയില് വിദേശ മദ്യ ശേഖരവുമായി ആലപ്പുഴ സ്വദേശിയായ ജൂനിയര് ആര്ട്ടിസ്റ്റ് പിടിയില്. നീര്ക്കുന്നം വണ്ടാനം ഭാഗത്ത് താമസിക്കുന്ന ചക്കിട്ട പറമ്പ് വീട്ടില് എം. ഷുഹൈബ് (37) ആണ് എറണാകുളം സെന്ട്രല് പോലീസിന്റെ പിടിയിലായത്.
40 ലിറ്റര് മദ്യവും 48 ബോട്ടില് ബിയറുമാണ് ഇയാളില് നിന്നും പിടികൂടിയത്. മഹാരാജാസ് ഗ്രൗണ്ടിന്റെ ഭാഗത്തുള്ള പി.ടി. ഉഷ റോഡില് നിന്നാണ് ഇയാളെ പിടികൂടിയത്. കുറെ നാളുകളായി എറണാകുളത്ത് താമസമാക്കിയ ഷുഹൈബ് സിനിമയില് സെറ്റ് വര്ക്കു ചെയ്തും ജൂനിയര് ആര്ട്ടിസ്റ്റുമായാണ് പ്രവര്ത്തിക്കുന്നത്.
District News
വടക്കാഞ്ചേരി: വിദേശമദ്യവിൽപനശാല മാറ്റുന്നതുമായി ബന്ധപ്പെട്ട് അന്തിമ തീരുമാനമെടുക്കാൻ ഹൈക്കോടതി ഉത്തരവിട്ടു.
വടക്കാഞ്ചേരി ഡിവൈൻ ആശുപത്രി അധികൃതർ നൽകിയ പരാതിയുടെ അടിസ്ഥാനത്തിലാണ് നഗരസഭയോട് കോടതി ഉത്തരവിട്ടത്. മദ്യഷാപ്പ് മാറ്റണമെന്ന് ആവശ്യപ്പെട്ട് മുൻ മുഖ്യമന്ത്രി പിണറായി വിജയൻ, എംപി കെ. രാധാകൃഷ്ണൻ, സേവ്യർ ചിറ്റിലപ്പിളളി എംഎൽഎ എന്നിവർക്ക് ആശുപത്രി അധികൃതർ നേരിട്ട് പരാതികൾ നൽകിയെങ്കിലും ഒരു നടപടിയും ഉണ്ടാകാത്തതിനെതുടർന്നാണ് അധികൃതർ ഹൈക്കോടതിയെ സമീപിച്ചത്. ജൂൺ ഒന്നിനുമുന്നേ തീരുമാനം എടുക്കണമെന്നും ഉത്തരവിൽ പറയുന്നു.
ആശുപത്രികൾ, വിദ്യാഭ്യാസ സ്ഥാപനങ്ങൾ, മറ്റു കച്ചവട സ്ഥാപനങ്ങൾ, പാർപ്പിടസമുച്ചയങ്ങൾ എന്നിവയ്ക്ക് വലിയ രീതിയിൽ ബുദ്ധിമുട്ടുണ്ടാക്കുന്ന മദ്യവില്പനശാല പ്രദേശത്തുനിന്നു മാറ്റിസ്ഥാപിക്കണമെന്ന് ആവശ്യപ്പെട്ടാണ് ആശുപത്രി അധികൃതർ ഹൈക്കോടതിയെ സമീപിച്ചത്.
ഹൈക്കോടതി ജഡ്ജി പി.വി. കുഞ്ഞിക്കൃഷ്ണനാണ് വിഷയം പരിഗണിച്ച് രണ്ടുമാസത്തിനകം കൃത്യമായി തീരുമാനമെടുക്കണമെന്നു വടക്കാഞ്ചേരി നഗരസഭാ അധികൃതർക്ക് കർശനനിർദേശംനൽകിയത്.
District News
ഇരിട്ടി: ഇലക്ഷൻ സെപ്ഷൽ ഡ്രൈവിന്റെ ഭാഗമായി പോലീസ് നടത്തിയ പരിശോധനയിൽ വില്പനയ്ക്കായി വീട്ടിൽ ശേഖരിച്ചു വച്ച വിദേശമദ്യ ശേഖരം പിടികൂടി. സംഭവവുമായി ബന്ധപ്പെട്ട് ഒരാളെ അറസ്റ്റ് ചെയ്തു.
അയ്യൻകുന്ന് പഞ്ചായത്തിലെ കച്ചേരിക്കടവ് സ്വദേശി ജിജിയെയാണ് (45) ഇരിട്ടി പോലീസ് അറസ്റ്റ് ചെയ്തത്. രഹസ്യ വിവരത്തിന്റെ അടിസ്ഥാനത്തിലായിരുന്നു പോലീസ് പരിശോധന. വാടക വീട്ടിലെ കിടപ്പുമുറിയിലെ കട്ടിലിനുള്ളിൽ പ്രത്യേക അറ നിർമിച്ച് ഇതിലായിരുന്നു മദ്യശേഖരം ഒളിപ്പിച്ചു വച്ചിരുന്നത്. 14.50 ലിറ്റർ മദ്യവും 23750 രൂപയും പോലീസ് പിടിച്ചെടുത്തു.
റൂറൽ എസ്പി അനൂജ് പലിവാൾ, ഇരിട്ടി ഡിവൈഎസ്പി രാജേഷ് എന്നിവരുടെ മേൽനോട്ടത്തിൽ ഇരിട്ടി എസ്എച്ച് ഒ സിജിത്തിന്റെ നിർദേശപ്രകാരം എസ്ഐ കെ. ഷറഫുദ്ദീനും സംഘവുമായിരുന്നു പരിശോധന നടത്തിയത്. ഇരിട്ടി സ്റ്റേഷനിലെ എസ്ഐ എസ്. പ്രവീൺ, സിപിഒ ശിഹാബുദ്ദീൻ, നിസാമുദ്ദീൻ, രമ്യ, ഇരിട്ടി ഡിവൈഎസ്പി സ്ക്വാഡിലെ ജയദേവ് എന്നിവരും ഉണ്ടായിരുന്നു.
District News
മുണ്ടക്കയം ഈസ്റ്റ്: അനധികൃതമായി വിദേശ മദ്യവില്പന നടത്തിവന്നിരുന്നയാളെ പെരുവന്താനം പോലീസ് അറസ്റ്റ് ചെയ്തു. വണ്ടൻപതാൽ സ്വദേശി കല്ലറക്കൽ മനോജ് കുമാർ (56) ആണ് അറസ്റ്റിലായത്.
നിയമസഭാ തെരഞ്ഞെടുപ്പിനോടനുബന്ധിച്ച് അനധികൃത മദ്യവില്പനയും ലഹരിവസ്തുക്കളുടെയും കണക്കിൽപ്പെടാത്ത പണം കടത്തും കണ്ടെത്തുന്നതിനു പോലീസ് നടത്തിയ പരിശോധനയിലാണ് അനധികൃതമായി വില്പനയ്ക്ക് സൂക്ഷിച്ചിരുന്ന ആറര ലിറ്റർ വിദേശമദ്യം പിടിച്ചത്.
മുപ്പത്തഞ്ചാംമൈലിൽ വ്യാപാരസ്ഥാപനം നടത്തുകയാണ് ഇയാൾ. മുന്പും ഇയാളുടെ പക്കൽനിന്നു വില്പനയ്ക്ക് സൂക്ഷിച്ചിരുന്ന വിദേശമദ്യം പോലീസ് പിടികൂടിയിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.