National
ന്യൂഡല്ഹി: 14 വയസില് താഴെയുള്ള കുട്ടികള്ക്കു മതവിദ്യാഭ്യാസം നല്കുന്നതിന് ബന്ധപ്പെട്ട സ്കൂളുകള്ക്കും സ്ഥാപനങ്ങള്ക്കും രജിസ്ട്രേഷന് നിര്ബന്ധമാക്കാന് കേന്ദ്ര-സംസ്ഥാന സര്ക്കാരുകള്ക്ക് നിര്ദേശം നല്കണമെന്നാവശ്യപ്പെട്ടുള്ള ഹര്ജിയില് ഇടപെടാതെ സുപ്രീംകോടതി.
ബന്ധപ്പെട്ട അഥോറിറ്റിയെ വിഷയം പരിഗണിക്കാന് വിസമ്മതിച്ചാല് ഇടപെടാമെന്നു വ്യക്തമാക്കിയാണ് ജസ്റ്റീസുമാരായ ദീപാങ്കര് ദത്ത, സതീഷ് ചന്ദ്ര ശര്മ എന്നിവരടങ്ങിയെ ബെഞ്ച് ഹര്ജി തള്ളിയത്.
14 വയസില് താഴെയുള്ള കുട്ടികള്ക്കു മതപരമായ പ്രബോധനമോ വിദ്യാഭ്യാസമോ നല്കുന്ന എല്ലാ സ്ഥാപനങ്ങളും ഭരണഘടനയുടെ വിവിധ വകുപ്പുകള് പ്രകാരം രജിസ്റ്റര് ചെയ്യാന് നിർദേശിക്കണമെന്നാണ് ഹര്ജിക്കാരനായ അശ്വനി കുമാര് ഉപാധ്യായ റിട്ട് ഹര്ജിയിലൂടെ ആവശ്യപ്പെട്ടത്.
District News
കൽപ്പറ്റ: സംഘർഷ സാധ്യതയുള്ള സ്ഥലങ്ങളിൽ പോലീസ് ഇടപെടൽ കൂടുതൽ കാര്യക്ഷമവും ക്രമബദ്ധവുമാക്കുന്നതിനായി ജില്ലയിലെ പോലീസ് ഉദ്യോഗസ്ഥർക്കായി ആന്റി റയറ്റ് ഡ്രിൽ പരിശീലനം സംഘടിപ്പിച്ചു.
പൊതുസമാധാനവും നിയമവ്യവസ്ഥയും നിലനിർത്തുന്നതിനിടെ നേരിടേണ്ടിവരുന്ന അക്രമസാഹചര്യങ്ങൾ കൃത്യതയോടെ പ്രതിരോധിക്കാനുള്ള പരിശീലനമാണ് നൽകിയത്. പുത്തൂർവയൽ എആർ ക്യാന്പിൽ പരേഡിന് മാനന്തവാടി ഡിവൈഎസ്പി വി.കെ. വിശ്വംഭരൻ നേതൃത്വം നൽകി. ഡിഎച്ച്ക്യു സബ് ഇൻസ്പെക്ടർ ജോസ് ജോർജ്, സബ് ഇൻസ്പെക്ടർ റോയ് എന്നിവർ ക്ലാസുകൾ നയിച്ചു. ജില്ലയിലെ വിവിധ സ്റ്റേഷനുകളിൽ നിന്നും യൂണിറ്റുകളിൽ നിന്നുമായി 40 ഓളം പോലീസ് ഉദ്യോഗസ്ഥർ പരേഡിൽ പങ്കെടുത്തു.
ജനക്കൂട്ട നിയന്ത്രണം, അപ്രതീക്ഷിത സംഘർഷ സാഹചര്യങ്ങളിൽ സ്വീകരിക്കേണ്ട നടപടികൾ, നിയമപരമായ ഇടപെടൽ രീതികൾ തുടങ്ങിയ വിഷയങ്ങളിലായിരുന്നു പരിശീലനം. അക്രമ സാഹചര്യം നേരിടുന്നതിനും പൊതുസമാധാനം നിലനിർത്തുന്നതിനുമുള്ള പ്രായോഗിക പരിശീലനങ്ങൾ നൽകി. അക്രമസാഹചര്യങ്ങളിൽ ഇടപെടുന്പോൾ പോലീസ് ഉദ്യോഗസ്ഥർ സ്വന്തം സുരക്ഷയ്ക്കും മുൻഗണന നൽകേണ്ടതിന്റെ പ്രാധാന്യവും പരിശീലനത്തിൽ ഊന്നിപ്പറഞ്ഞു.