പാനിക് ബട്ടൺ തയാർ, പക്ഷേ... : Deepika.com Tech News

ന്യൂഡൽഹി: അടിയന്തര സാഹചര്യങ്ങളിൽ സഹായം അഭ്യർഥിക്കുന്നതിനായി ഫീച്ചർഫോണുകളിൽ പാനിക് ബട്ടൺ നിർബന്ധമാക്കുന്ന സർക്കാർ തീരുമാനം ഇനിയും നീളും. പരീക്ഷണാടിസ്ഥാനത്തിൽ പാനിക് ബട്ടൺ സംവിധാനം ഒരുക്കിയെങ്കിലും ഫീച്ചർ ഫോണുകളിൽ ജിപിഎസ് ലഭ്യമല്ലാത്തതാണ് പദ്ധതി നടപ്പാക്കൽ നീളുന്നതെന്ന് സർക്കാർ വൃത്തങ്ങൾ പറയുന്നു.

ജനുവരി 26ന് ഉത്തർപ്രദേശിൽ പരീക്ഷണാടിസ്ഥാനത്തിൽ പദ്ധതി ആരംഭിച്ചെങ്കിലും പാനിക് ബട്ടൺ സേവനം മാത്രമാണ് ലഭ്യമായിട്ടുള്ളത്. ഈ വർഷം ഡിസംബറോടെ പദ്ധതി രാജ്യവ്യാപകമായി നടപ്പാക്കാനാണ് തീരുമാനം.

അടിയന്തര സാഹചര്യങ്ങളിൽ സഹായം ആവശ്യമായ സ്ത്രീകൾക്ക് സഹായം ഉറപ്പാക്കുക എന്ന ലക്ഷ്യത്തോടെ ഫോണുകളിൽ പാനിക് ബട്ടണും ജിപിഎസും നിർബന്ധമായും ഉൾപ്പെടുത്തിയിരിക്കണമെന്ന് 2016ൽ കേന്ദ്രസർക്കാർ എല്ലാ മൊബൈൽ നിർമാതാക്കൾക്കും കർശന നിർദേശം നല്കിയിരുന്നു. കഴിഞ്ഞ വർഷം നവംബറിൽ ഫീച്ചർഫോണുകളിൽ പാനിക് ബട്ടൺ ഉൾപ്പെടുത്തിയെങ്കിലും ജിപിഎസ് സംവിധാനത്തിന്‍റെ കാര്യത്തിൽ ഇതുവരെ തീരുമാനമായിട്ടില്ല.

പാനിക് ബട്ടൺ അമർത്തി സഹായം തേടുന്നവർ എവിടെയാണെന്നുള്ളത് കണ്ടെത്താനാണ് ജിപിഎസ്. മൊബൈൽ ടവർ ലൊക്കേഷൻ പരിശോധിച്ച് ട്രാക്ക് ചെയ്യാമെങ്കിലും ശ്രമകരമാണ്. രാജ്യത്ത് എവിടെയാണെങ്കിലും സാറ്റലൈറ്റ് സഹായത്തോടെ കണ്ടെത്താനുള്ള സൗകര്യമാണ് ജിപിഎസ് ഒരുക്കുന്നത്.

നിലവിൽ പാനിക് ബട്ടൺ അമർത്തുന്പോൾ എസ്എംഎസ് വഴി പോലീസ് അധികൃതരിലേക്ക് സന്ദേശം എത്തുകയാണ് ചെയ്യുന്നത്. കൂടാതെ കുടുംബാംഗങ്ങൾക്കും എസ്എംഎസ് ലഭിക്കും.
ഫീച്ചർഫോണുകളിൽ ജിപിഎസ് സംവിധാനം ഒരുക്കിയാൽ ഫോണുകളുടെ വില ഉയർത്തേണ്ടിവരും.