നിയന്ത്രണം വിട്ട കാർ കുളത്തിലേക്ക് തലകീഴായി മറിഞ്ഞു, യാത്രക്കാർ രക്ഷപ്പെട്ടു : Deepika.com Nattu Visesham

KOTTAYAM

നിയന്ത്രണം വിട്ട കാർ കുളത്തിലേക്ക് തലകീഴായി മറിഞ്ഞു, യാത്രക്കാർ രക്ഷപ്പെട്ടു

Thursday, May 16, 2024 7:03 AM IST

വൈക്കം: വിനോദയാത്രയ്ക്കു വീട്ടിൽനിന്നുമിറങ്ങിയ കുടുംബം സഞ്ചരിച്ച കാർ നിയന്ത്രണം വിട്ട് കുളത്തിലേക്കു തലകീഴായി മറിഞ്ഞു. യാത്രക്കാർ അദ്ഭുതകരമായി രക്ഷപ്പെട്ടു. ഇന്നലെ പുലർച്ചെ നാലിന് ഗുരുകൃപ റോഡിലാണ് അപകടം. വൈക്കം മറവൻതുരുത്ത് പാറപ്പുറം നൗബിൻ (30), ഭാര്യ ഷഹനാസ് (26), മക്കൾ നൂഹ മറിയം ( നാല്), നിഹ മറിയം (രണ്ട്) എന്നിവർ സഞ്ചരിച്ച കാർ മണിയശേരി ക്ഷേത്രത്തിനു സമീപം മുട്ടത്ത് കുളത്തിലേക്കാണു മറിഞ്ഞത്.

വീട്ടുകാരുമൊത്തു മൂന്നാറിലേക്ക് വിനോദയാത്ര പോകാനായി പുലർച്ചെ വീട്ടിൽനിന്നും ഇറങ്ങി വീതി കുറഞ്ഞ റോഡിൽ വളവ് തിരിക്കുന്നതിനിടെ റോഡിന്‍റെ തിട്ടയിടിഞ്ഞ് കുളത്തിലേക്കു തലകീഴായ് മറിയുകയായിരുന്നെന്ന് നൗബിൻ പറഞ്ഞു. പെട്ടെന്നു ഡോർ തുറക്കാൻ ശ്രമം നടത്തിയെങ്കിലും സാധിച്ചില്ല.

ആദ്യം എന്ത് ചെയ്യണമെന്ന് അറിയാതെ പകച്ചുപോയെങ്കിലും നിമിഷങ്ങൾക്കുള്ളിൽ ഡോറിന്റെ ഗ്ലാസ് താഴ്ത്തി ഇട്ടിരുന്ന വിടവിലൂടെ പുറത്തിറങ്ങി ഭാര്യയേയും രണ്ട് കുട്ടികളെയും സുരക്ഷിതമായി കരയിൽ എത്തിച്ചു. കുളത്തിൽ വെള്ളം കുറവായതും കാറിന്‍റെ ഗ്ലാസ് താഴ്ത്തിയിട്ടതും മൂലം ദുരന്തമൊഴിവാകുകയായിരുന്നു. രക്ഷാപ്രവർത്തനത്തിനിടെ കൈയ്ക്ക് പരുക്കേറ്റ നൗബിൻ താലൂക്ക് ആശുപത്രിയിൽ ചികിത്സ തേടി.