കാസർഗോഡ്: ലോക്സഭാ തെരഞ്ഞെടുപ്പില്‍ കാസര്‍ഗോഡ് ലോക്സഭാ മണ്ഡലത്തില്‍ 80.12 ശതമാനം പോളിംഗ്. ഏഴു നിയോജക മണ്ഡലങ്ങളിലായി ആകെയുള്ള 13,60,827 വോട്ടര്‍മാരില്‍ 10,90,421 പേര്‍ സമ്മതിദാനാവകാശം വിനിയോഗിച്ചു. 5,04,394 (76.83 ശതമാനം) പുരുഷന്മാരും 5,86,026 (83.19 ശതമാനം) സ്ത്രീകളും ഒരു ട്രാന്‍സ്‌ജെന്‍ഡറുമാണ് വോട്ട് രേഖപ്പെടുത്തിയത്. ഇന്നലെ രാത്രി 10 വരെയുള്ള കണക്കാണിത്. ഇതില്‍ മാറ്റമുണ്ടാകും. സ്ത്രീകളാണ് വോട്ട് ശതമാനത്തില്‍ മുന്നിട്ടു നില്‍ക്കുന്നത്. 2014 ല്‍ നടന്ന ലോക്സഭാ തെരഞ്ഞെടുപ്പിനെ അപേക്ഷിച്ച് പോളിംഗ് ശതമാനത്തില്‍ വര്‍ധനയുണ്ടായിട്ടുണ്ട്. കഴിഞ്ഞതവണ 78.49 ശതമാനമായിരുന്നു മണ്ഡലത്തിലെ പോളിംഗ് ശതമാനം.
1,317 ബൂത്തുകളിലായാണ് വോട്ടെടുപ്പ് നടന്നത്. രാവിലെ ഏഴു മുതല്‍ വൈകുന്നേരം ആറുവരെ നടന്ന വോട്ടെടുപ്പില്‍ വൈകുന്നേരം ആറുവരെ ക്യൂവിലുണ്ടായിരുന്നവര്‍ക്ക് ടോക്കണ്‍ നല്‍കി വോട്ട് ചെയ്യാന്‍ അനുവദിച്ചു. ഇവരുടെ അന്തിമ പോളിംഗ് ശതമാനം ലഭിക്കുമ്പോള്‍ ഇനിയും മാറ്റമുണ്ടാകാം. 1,317 വോട്ടിംഗ് യന്ത്രങ്ങളാണു തെരഞ്ഞെടുപ്പിനായി സജ്ജീകരിച്ചിരുന്നത്. എന്നാല്‍ ചില ബൂത്തുകളില്‍ വോട്ടിംഗ് യന്ത്രങ്ങളില്‍ തകരാറുണ്ടായത് അവിടങ്ങളില്‍ കുറച്ചുനേരത്തേക്ക് വോട്ടെടുപ്പ് തടസപ്പെട്ടു.
ജില്ലയില്‍ വോട്ടെടുപ്പ് സമാധാനപരമായിരുന്നുവെന്ന് ജില്ലാ വരണാധികാരികൂടിയായ ജില്ലാ കളക്ടര്‍ ഡോ.ഡി.സജിത് ബാബു അറിയിച്ചു. ജില്ലയിലെ പ്രശ്നബാധിതമായി കണക്കാക്കിയ 43 ബൂത്തുകളിലെ പ്രവര്‍ത്തനങ്ങള്‍ ജില്ലാകളക്ടര്‍ ഡോ. ഡി. സജിത് ബാബുവും സംഘവും വോട്ടെടുപ്പ് കഴിയുന്നവരെ കളക്ടറേറ്റ് മിനികോണ്‍ഫറന്‍സ് ഹാളില്‍ പ്രത്യേകം സജ്ജമാക്കിയ കണ്ട്രോള് റൂമിലിരുന്നു നിരീക്ഷിച്ചു. 71 മറ്റ് ബൂത്തുകളില്‍ മൈക്രോ ഒബ്‌സര്‍വര്‍മാരെയും നിയോഗിച്ചിരുന്നു. ജില്ലയിലെ വോട്ടെണ്ണല്‍ കേന്ദ്രമായ പടന്നക്കാട് നെഹ്‌റു ആര്‍ട്‌സ് ആൻഡ് സയന്‍സ് കോളജിലെ 15 സ്ട്രോംഗ് റൂമുകളിലായാണ് 1,317 ബൂത്തുകളിലെ വിവിപാറ്റ് ഉള്‍പ്പെടെയുള്ള വോട്ടിംഗ് മെഷിനുകള്‍ സൂക്ഷിക്കുന്നത്. സ്ട്രോംഗ് റൂമുകള്‍ സീല്‍ ചെയ്ത് താക്കോല്‍ പോലീസിന് കൈമാറും. വോട്ടെണ്ണല്‍ ദിവസമായ മേയ് 23 വരെ വന്‍ സുരക്ഷാ സംവിധാനമാണ് ഒരുക്കിയിരിക്കുന്നത്. തെരഞ്ഞെടുപ്പ് ഡ്യൂട്ടിക്കായി 3,872 ഉദ്യോഗസ്ഥരെയാണു നിയമിച്ചിരുന്നത്. ഇവര്‍ക്ക് പുറമേ 668 റിസര്‍വ്ഡ് ജീവനക്കാരുമുണ്ടായിരുന്നു. പോളിംഗ് ബൂത്തുകളിലെ സുരക്ഷാ ചുമതല നിര്‍വഹിക്കുന്നതിന് 2,641 പൊലീസുകാരെയും വിന്യസിച്ചിരുന്നു.
ഒറ്റപ്പെട്ട
അക്രമങ്ങൾ
കാസര്‍ഗോഡ്: പോളിംഗ് ദിനത്തിൽ ജില്ലയിൽ ഒറ്റപ്പെട്ട അക്രമസംഭവങ്ങൾ അരങ്ങേറി. ചട്ടഞ്ചാല്‍ തെക്കില്‍ സ്കൂളിൽ കള്ളവോട്ട് തടയാനുള്ള ശ്രമത്തെത്തുടർന്നുണ്ടായ സംഘർഷത്തിൽ യുഡിഎഫ് നേതാക്കൾക്ക് കുത്തേറ്റു. ബ്ലോക്ക് പഞ്ചായത്ത് സ്റ്റാന്‍ഡിംഗ് കമ്മിറ്റി ചെയര്‍മാന്‍ ടി.ഡി. കബീര്‍ (38), യുഡിഎഫ് ബൂത്ത് ഏജന്‍റ് അബ്ദുല്‍ ഖാദര്‍ മല്ലം, പ്രവാസി കോണ്‍ഗ്രസ് ചെമ്മനാട് മണ്ഡലം പ്രസിഡന്‍റ് ജലീല്‍ (38) എന്നിവര്‍ക്കാണു പരിക്കേറ്റത്. ഇന്നലെ വൈകുന്നേരം അഞ്ചോടെ പോളിംഗ് ബൂത്തിലാണ് അക്രമമുണ്ടായത്. വയറിനും കൈക്കും പരിക്കേറ്റ ഇവരെ കാസർഗോട്ടെ സ്വകാര്യാശുപത്രിയിൽ പ്രവേശിപ്പിച്ചു. സിപിഎം ലോക്കല്‍ സെക്രട്ടറിയുടെ നേതൃത്വത്തിലുള്ള സംഘമാണ് തങ്ങളെ ആക്രമിച്ചതെന്ന് പരിക്കേറ്റവർ പറഞ്ഞു.
ഉദുമ നിയോജക മണ്ഡലത്തിലെ 132-ാം ബൂത്തായ കൂട്ടക്കനി സ്‌കൂളിലെ ബിജെപി ബൂത്ത് ഏജന്‍റിനെ ഉദുമ എംഎല്‍എ കെ. കുഞ്ഞിരാമന്‍റെ മകന്‍ പദ്മകുമാറിന്‍റെ നേതൃത്വത്തില്‍ സിപിഎം പ്രവര്‍ത്തകര്‍ മര്‍ദ്ദിച്ചതായി പരാതി ഉയർന്നു. കള്ളവോട്ട് ചോദ്യം ചെയ്തതിനെതുടര്‍ന്നാണ് ബൂത്ത് ഏജന്‍റായ സന്ദീപിനെ മർദിച്ചതെന്ന് ബിജെപി നേതാക്കൾ ആരോപിച്ചു. സംഭവത്തില്‍ കളക്ടര്‍ക്കും ഡിവൈഎസ്പിക്കും പരാതി നല്‍കി.
മുസ്‌ലിം ലീഗ് പ്രവർത്തകരുടെ കള്ളവോട്ട് തടഞ്ഞ തന്നെ ബൂത്തിനകത്ത് മർദിച്ചതായി ലീഗ് വിമതനായി മത്സരിച്ച് വിജയിച്ച കാഞ്ഞങ്ങാട് നഗരസഭ ആരോഗ്യസ്റ്റാൻഡിംഗ് കമ്മിറ്റി ചെയമാൻ മഹമൂദ് മുറിയനാവി ആരോപിച്ചു. വനഗർ പിപിടി സ്കൂളിൽ ബൂത്ത് ഏജന്‍റായി ഇരിക്കാനും തന്നെ അനുവദിച്ചില്ലെന്ന് മഹമൂദ് ആരോപിച്ചു. 67ാം ബൂത്തായ പടന്നക്കാട് കള്ളവോട്ട് തടയാൻ ചെന്ന എൽഡിഎഫ‌് പ്രവർത്തകരായ ഷിബിൽ, ശരത‌് എന്നിവരെ ലീഗുകാർ ക്രൂരമായി മർദിച്ചെന്ന് സിപിഎം ആരോപിച്ചു. ഇരുവരും ജില്ലാശുപത്രിയിൽ ചികിത്സ തേടി. ചന്തേര ഗവ. യുപി സ്‌കൂളിലെ 118 നമ്പർ യുഡിഎഫ് ബൂത്ത് ഏജന്‍റും പിലിക്കോട് പഞ്ചായത്ത് അംഗവുമായ നിഷാം പട്ടേലിനെ മർദിച്ചതായും പരാതിയുണ്ട്. ചന്തേര പോലീസിൽ പരാതി നൽകി.