അപകടമൊഴിവാക്കാൻ മുട്ടത്ത് കുളത്തിന് സംരക്ഷണ ഭിത്തി കെട്ടണം : Deepika.com Nattu Visesham

KOTTAYAM

അപകടമൊഴിവാക്കാൻ മുട്ടത്ത് കുളത്തിന് സംരക്ഷണ ഭിത്തി കെട്ടണം

Thursday, May 16, 2024 7:03 AM IST

മറവൻതുരുത്ത്: മണിയശേരി ക്ഷേത്രത്തിനു സമീപം ഗുരുകൃപ റോഡിനോടു ചേർന്നുള്ള മുട്ടത്ത് കുളത്തിലേക്ക് വാഹനങ്ങൾ കൂപ്പുകുത്താതിരിക്കാൻ സംരക്ഷണ ഭിത്തികെട്ടണമെന്ന ആവശ്യത്തിന് വർഷങ്ങളുടെ പഴക്കമുണ്ട്.

സംരക്ഷണ ഭിത്തിയില്ലാത്തിനാൽ ഇതിനു മുമ്പും കുളത്തിലേക്കു വാഹനങ്ങൾ മറിഞ്ഞിട്ടുണ്ട്. ഇന്നലെ പുലർച്ചെ കുളത്തിലേക്ക് തലകീഴായി മറിഞ്ഞ കാറിൽ പിഞ്ചുകുട്ടികളടക്കമുണ്ടായിരുന്നു.

വീതി കുറഞ്ഞ റോഡിൽ വളവ് തിരിക്കുന്നതിനിടെ റോഡിന്‍റെ തിട്ട ഇടിഞ്ഞു കാർ കുളത്തിലേക്കു മറിയുകയായിരുന്നു. റവന്യു, പഞ്ചായത്ത് വകുപ്പുകളുടെ കൈവശമാണ് 22 സെന്‍റോളം വിസ്‌തൃതിയുള്ള മുട്ടത്തുകുളം. ഭിത്തി കെട്ടി സംരക്ഷിക്കാൻ 25 ലക്ഷം രൂപ അനുവദിച്ചിട്ട് ഒരു വർഷത്തിനു മുകളിലായി.

എന്നാൽ, പഞ്ചായത്തിന് ഉടമസ്‌ഥാവകാശം കിട്ടിയെങ്കിലെ ഫണ്ട് വിനിയോഗിക്കാൻ സാധിക്കൂ. ഇതിനുള്ള ശ്രമങ്ങൾ നടക്കുകയാണ്.

ഉടമസ്‌ഥാവകാശം പഞ്ചായത്തിനു ലഭിച്ചാൽ അടിയന്തരമായി സംരക്ഷണ ഭിത്തി നിർമിച്ച് സമീപത്തായി ഒരു വിശ്രമ കേന്ദ്രവും ഒരുക്കുമെന്നും ഇതോടെ റോഡിന് നിലവിലുള്ളതിനേക്കാൾ വീതി ലഭിക്കുമെന്നുമെന്നും പഞ്ചായത്ത് അധികൃതർ പറയുന്നു.