തൊടുപുഴ നഗരസഭ
തൊടുപുഴ: നഗരസഭയിൽ മഴക്കാലപൂർവ ശുചീകരണത്തിന്റെ ഭാഗമായി നടത്തുന്ന പൊതു ശുചീകരണ പരിപാടിയുടെ ഉദ്ഘാടനം ചെയർമാൻ സനീഷ് ജോർജ് നിർവഹിച്ചു. സ്റ്റാൻഡിംഗ് കമ്മിറ്റി ചെയർമാൻ എം.എ. കരീം അധ്യക്ഷത വഹിച്ചു.
വൈസ് ചെയർപേഴ്സണ് പ്രഫ. ജെസി ആന്റണി, സ്റ്റാൻഡിംഗ് കമ്മിറ്റി ചെയർമാൻ പി.ജി.രാജശേഖരൻ, കൗണ്സിലർമാരായ ജോസഫ് ജോണ്, സി. ജിതേഷ്, ജയലക്ഷ്മി ഗോപൻ, കവിത വേണു, സെക്രട്ടറി ബിജുമോൻ ജേക്കബ്, മാലിന്യമുക്തം നവകേരളം നഗരസഭ നോഡൽ ഓഫീസർ ബിജോ മാത്യു, സിഡിഎസ് ചെയർപേഴ്സണ് സുമ ജോയി എന്നിവർ പ്രസംഗിച്ചു.
തുടർന്ന് ലോറി സ്റ്റാൻഡ് പരിസരം, പഴയ കെഎസ്ആർടിസി റോഡ് എന്നിവിടങ്ങളിൽ ശുചീകരണം നടത്തി.
കാഞ്ഞാർ- പുള്ളിക്കാനം പാത
മൂലമറ്റം: മഴക്കാലപൂർവ ശുചീകരണത്തിന്റെ ഭാഗമായി അറക്കുളം പഞ്ചായത്തിന്റെ പ്രവേശന കവാടമായ കൂവപ്പള്ളിയിൽനിന്ന് തുടങ്ങി പുള്ളിക്കാനം വരെയുള്ള 10 കിലോമീറ്ററോളം വരുന്ന വാഗമണ്, കുമളി, കുട്ടിക്കാനം, തേക്കടി തുടങ്ങിയ ടൂറിസം കേന്ദ്രങ്ങളിലേക്കുള്ള സംസ്ഥാന പാതയാണ് വൃത്തിയാക്കിയത്.
വിനോദ സഞ്ചാരികൾ ഉപേക്ഷിച്ച കുപ്പികൾ, പാറകളിൽ എറിഞ്ഞുടച്ച കുപ്പിച്ചില്ലുകൾ, പ്ലാസ്റ്റിക് മാലിന്യങ്ങൾ എന്നിവ സംഭരിച്ചു. ഡ്രൈവർമാരുടെ കാഴ്ച മറച്ചിരുന്ന റോഡിനിരുവശവും വളർന്നുനിന്ന കാടുകൾ വെട്ടി നീക്കി നടത്തിയ ശുചീകരണ പ്രവർത്തനങ്ങളിൽ നൂറുകണക്കിനാളുകൾ പങ്കെടുത്തു.
വാർഡ് മെംബർമാർ, തൊഴിലുറപ്പ്, കുടുംബശ്രീ, ആരോഗ്യ വകുപ്പ് പ്രവർത്തകരുടെയും നേതൃത്വലായിരുന്നു ശുചീകരണം. പഞ്ചായത്ത് വൈസ് പ്രസിഡന്റ് സുബി ജോമോൻ, ബ്ലോക്ക് മെംബർ സ്നേഹൻ രവി, മെംബർമാരായ ഓമന ജോണ്സൻ, എലിസബത്ത് ജോണ്സൻ, ഷീജ സുരേഷ്, പി.എ. വേലുക്കുട്ടൻ, ഗ്രാമ തൊഴിലുറപ്പ് ഓവർസിയർ ജയകൃഷ്ണൻ, എന്നിവർ നേതൃത്വം നൽകി.
പൂപ്പാറയിൽ ഡെങ്കിപ്പനി പ്രതിരോധ പ്രവർത്തനം
രാജകുമാരി: ശാന്തൻപാറ പഞ്ചായത്തിലെ പൂപ്പാറയിൽ ഡെങ്കിപ്പനി വ്യാപകമായി. ഡെങ്കിപ്പനി സ്ഥിരീകരിച്ചതിനെത്തുടർന്ന് 20ലധികം പേരാണ് വിവിധ ആശുപത്രികളിൽ ചികിത്സ തേടിയത്.
ശാന്തൻപാറ ഗ്രാമപഞ്ചായത്തും ആരോഗ്യവകുപ്പും പ്രതിരോധ പ്രവർത്തനങ്ങൾ ഊർജിതമാക്കി. ഇതിന്റെ ഭാഗമായി വാർഡുകളിൽ രോഗനിർണയ മെഡിക്കൽ ക്യാമ്പുകൾ സംഘടിപ്പിച്ചു.
തോട്ടം തൊഴിലാളികൾ തിങ്ങിപ്പാർക്കുന്ന പാലം പൂപ്പാറ എസ്റ്റേറ്റ് പൂപ്പാറ മേഖലകൾ ഉൾപ്പെടുന്ന 11,12 വാർഡുകളിൽ ആണ് വ്യാപകമായി പനി പടർന്നിരിക്കുന്നത്.
കൊതുക് നിവാരണത്തിനുള്ള സംവിധാനങ്ങൾ വിവിധ ഇടങ്ങളിൽ നടപ്പിലാക്കി. രണ്ടു വാർഡുകളിൽ ജനങ്ങളെ ഉൾപ്പെടുത്തി പഞ്ചായത്തിന്റെയും ആരോഗ്യവകുപ്പിന്റെയും നേതൃത്വത്തിൽ മെഡിക്കൽ ക്യാമ്പ് സംഘടിപ്പിച്ചു. രോഗനിർണയങ്ങൾ നടത്തുകയും മഴക്കാല രോഗ പ്രതിരോധ മരുന്നുകൾ വിതരണം ചെയ്യുകയും ചെയ്തു.
ഡെങ്കിപ്പനി പടരാതിരിക്കുന്നതിന് ഗ്രാമപഞ്ചായത്തിൽ വിവിധ ഇടങ്ങൾ കേന്ദ്രീകരിച്ച് മെഡിക്കൽ ക്യാമ്പുകൾ, ഡ്രൈ ഡേ, ശുചീകരണ പ്രവർത്തനങ്ങൾ, ബോധവത്്കരണങ്ങൾ എന്നിവ നടത്തും.
ഡെങ്കിപ്പനി ദിനാചരണം
ഇടുക്കി: ദേശീയ ഡെങ്കിപ്പനി ദിനാചരണത്തിന്റെ ജില്ലാതല ഉദ്ഘാടനം വണ്ടിപ്പെരിയാർ സാമൂഹ്യാരോഗ്യ കേന്ദ്രത്തിൽ നടന്നു. ജില്ലാ മെഡിക്കൽ ഓഫീസിന്റെയും വണ്ടിപ്പെരിയാർ സാമൂഹ്യാരോഗ്യ കേന്ദ്രത്തിന്റെയും ആഭിമുഖ്യത്തിൽ നടത്തിയ പരിപാടി ബ്ലോക്ക് മെഡിക്കൽ ഓഫീസർ ഡോ. വെങ്കിടലക്ഷ്മി ഉദ്ഘാടനം ചെയ്തു.
ജില്ലാ എഡ്യൂക്കേഷൻ ആൻഡ് മീഡിയ ഓഫീസർ തങ്കച്ചൻ ആന്റണി അധ്യക്ഷത വഹിച്ചു. ജൂണിയർ ഹെൽത്ത് ഇൻസ്പെക്ടർ കെ.എം. ജാസ്മിൻ, ഡെപ്യൂട്ടി ജില്ലാ എഡ്യൂക്കേഷൻ ആൻഡ് മീഡിയ ഓഫീസർ വി.ആർ. ഷൈലാഭായി, ഹെൽത്ത് ഇൻസ്പെക്ടർ കെ.ടി.ആന്റണി, എസ്. അനിൽ എന്നിവർ പ്രസംഗിച്ചു.