പന്നിക്കോട്ട് പി.ജെ. കുര്യന്‍ അനുസ്മരണവും പുരസ്‌കാര സമര്‍പ്പണവും ഇന്ന്
1566824
Friday, June 13, 2025 3:52 AM IST
തിരുവല്ല: രാഷ്‌ട്രീയ-സാമൂഹിക മണ്ഡലങ്ങളില്‍ നിറഞ്ഞുനിന്ന പന്നിക്കോട്ട് അഡ്വ. പി.ജെ. കുര്യന്‍ സ്മാരക ഗുഡ് സമരിറ്റന്‍ അവാര്‍ഡ്ദാന സമ്മേളനം തിരുവല്ല എംജിഎം ഹയര്‍ സെക്കൻഡറി സ്‌കൂളില്‍ ഇന്ന് ഉച്ചകഴിഞ്ഞു മൂന്നിനു നടക്കും.
അഡ്വ. പി.ജെ. കുര്യന്‍ സ്മാരക ഗുഡ് സമരിറ്റന്‍ ട്രസ്റ്റ് വക മാനവ സേവാ പുരസ്കാരം മുന്‍ മുഖ്യമന്ത്രി ഉമ്മന്‍ ചാണ്ടിക്ക് മരണാനന്തര ബഹുമതിയായി സമര്‍പ്പിക്കും. പുരസ്കാരം മകള്‍ ഡോ. മറിയ ഉമ്മന്‍ ചടങ്ങില്‍ ഏറ്റുവാങ്ങും. ഡോ. ഗബ്രിയേല്‍ മാര്‍ ഗ്രിഗോറിയോസിന്‍റെ അധ്യക്ഷതയില്‍ ചേരുന്ന സമ്മേളനം രമേശ് ചെന്നിത്തല ഉദ്ഘാടനം ചെയ്യും.
തിരുവിതാംകൂര്‍ രാജകുടുംബാംഗം അശ്വതി തിരുനാള്‍ ഗൗരി ലക്ഷ്മിഭായി, ഇന്ത്യന്‍ അംബാസിഡറായിരുന്ന ടി.പി. ശ്രീനിവാസന്‍, വെണ്ണിക്കുളം സെന്‍റ് ബെഹനാന്‍സ് ഹയര്‍ സെക്കൻഡറി സ്‌കൂള്‍ പ്രിന്‍സിപ്പല്‍ ഡോ. ജേക്കബ് മണ്ണുമൂട് എന്നിവരെയും പുരസ്‌കാരങ്ങള്‍ സമ്മാനിച്ച് ആദരിക്കും.
മികച്ച വിദ്യാലയത്തിനുള്ള ട്രസ്റ്റ് വക പുരസ്കാരം എംജിഎം സ്‌കൂളിനു സമ്മാനിക്കും. മികവുറ്റ വിദ്യാർഥികളെയും കൂടാതെ തൊഴില്‍ സംരംഭകത്വം, വനിതാ ശക്തീകരണം, കമ്യൂണിറ്റി ഹെല്‍ത്ത് മേഖലകളില്‍ പ്രവര്‍ത്തിക്കുന്ന ട്രസ്റ്റുകളെയും ആദരിക്കും.
പ്രഫ. പി.ജെ. കുര്യന്‍, തിരുവഞ്ചൂര്‍ രാധാകൃഷ്ണന്‍ എംഎല്‍എ, ആന്‍റോആന്‍റണി എംപി, പ്ലാനിംഗ് കമ്മീഷനംഗം ഡോ. വര്‍ഗീസ് ജോര്‍ജ്, അഡ്വ. കെ. അനന്തഗോപന്‍, അഡ്വ. ബിജു ഉമ്മന്‍, പ്രഫ. സതീഷ് കൊച്ചുപറമ്പില്‍, ജോര്‍ജ് മാമ്മന്‍ കൊണ്ടൂര്‍, ഈപ്പന്‍ കുര്യന്‍, ജൂലി കെ. വര്‍ഗീസ്, അനു ജോര്‍ജ് തുടങ്ങിയവര്‍ പ്രസംഗിക്കും.
തിരുവല്ല എംജിഎം ഹയര്‍ സെക്കൻഡറി സ്‌കൂള്‍, വെണ്ണിക്കുളം സെന്‍റ് ബെഹനാന്‍സ് ഹയര്‍ സെക്കൻഡറി സ്‌കൂള്‍, പത്തനംതിട്ട കാതോലിക്കേറ്റ് ഹയര്‍ സെക്കൻഡറി സ്‌കൂളുകള്‍ എന്നിവിടങ്ങളില്‍ ട്രസ്റ്റിന്‍റെ ആഭിമുഖ്യത്തില്‍ എസ് ടിഎഎം (സയന്‍സ്, ടെക്‌നോളജി, എൻജിനിയറിംഗ്, ആര്‍ട്‌സ്, മാത്തമാറ്റിക്‌സ്) പ്രോഗ്രാം ആരംഭിക്കുമെന്നു പിജെകെ ഗുഡ് സമരിറ്റന്‍ ട്രസ്റ്റ് മാനേജിംഗ് ഡയറക്ടര്‍ കെ. ഏബ്രഹാം പന്നിക്കോട്ട് പറഞ്ഞു.