ADVERTISEMENT

ADVERTISEMENT

വേസ്റ്റ്ബിൻ കൈമാറി

കോന്നി: ലോകപരിസ്ഥിതി വരാചരണത്തിന്‍റെ ഭാഗമായികോന്നി സീനിയർ ചേംബർ പ്രസിഡന്‍റ് ജയിംസ് വർഗീസ് ആർഎംഒ ഡോ. സബീറിന് വേസ്റ്റ്ബിൻ കൈമാറി. ബ്ലോക്ക് പഞ്ചായത്ത് മെംബർ തുളസീമണിയമ്മ യോഗം ഉദ്ഘാടനം ചെയ്തു.

രാജീസ് കൊട്ടാരം, ഹെൽത്ത് സൂപ്പർവൈസർ ബി. അനിൽകുമാർ ബി., ഹെൽത്ത് ഇൻസ്പെക്ടർ ബാബു എൻ., മനോഹരൻ, ജേക്കബ് തോമസ്, മാത്യു കെ. ചെറിയാൻ, ഏബ്രഹാം സാമുവൽ, വേണു ജി., രാജേഷ്കുമാർ തുടങ്ങിയവർ പ്രസംഗിച്ചു.

ADVERTISEMENT

റാന്നിയിൽ വർക്കിംഗ് വിമൻസ് ഹോസ്റ്റൽ

റാന്നി: റാന്നി വർക്കിംഗ് വിമൻസ് ഹോസ്റ്റൽ കെട്ടിടം നിർമാണത്തിനുള്ള നടപടികൾ ആരംഭിച്ചതായി പ്രമോദ് നാരായൺ എംഎൽഎ അറിയിച്ചു. കേന്ദ്രസർക്കാരിന്‍റെ സംസ്ഥാനങ്ങൾക്കുള്ള പ്രത്യേക സാമ്പത്തിക സഹായ പദ്ധതിയിൽ (എസ് സി ഐ) നിന്നുള്ള 10.10 കോടി രൂപ വിനിയോഗിച്ചാണ് ഹോസ്റ്റൽ നിർമിക്കുക. ഇതിനാവശ്യമായ ടെൻഡർ ക്ഷണിച്ചു. 14927 ചതുരശ്ര മീറ്റർ കെട്ടിടമാണ് നിർമിക്കുക. ഒരു കിടക്കയുടെ 16 മുറികളും മൂന്ന് കിടക്കകളുള്ള എട്ട് മുറികളും അഞ്ച് കിടക്കകളുടെ രണ്ട് മുറികളും ഭിന്നശേഷിക്കാർക്ക് രണ്ടു മുറികളുമാണ് കെട്ടിടത്തിൽ ഉൾപ്പെടുത്തിയിരിക്കുന്നത്. എല്ലാ മുറികളോടും അനുബന്ധിച്ച് ശുചിമുറികൾ ഉണ്ടായിരിക്കും. രണ്ടു നിലകളിലായാണ് കെട്ടിടം നിർമിക്കുക. അടുക്കള, ഡൈനിംഗ് ഏരിയ. ലോൺട്രി, റിക്രിയേഷൻ, സിക്ക് റൂം എന്നിവയെല്ലാം ഇതിൽ ഉൾപ്പെടുത്തിയിട്ടുണ്ട്. ഹൗസിംഗ് ബോർഡിന്‍റെ ഉടമസ്ഥതയിലുള്ള സ്ഥലത്ത് അവരുടെ തന്നെ ചുമതലയിലായിരിക്കും നിർമാണമെന്നും എംഎൽഎ പറഞ്ഞു. ജോലിക്കും മറ്റ് ആവശ്യങ്ങൾക്കുമായി എത്തുന്ന വനിതകൾക്ക് താമസിക്കാൻ ഹോസ്റ്റൽ സൗകര്യങ്ങളൊന്നും തന്നെ റാന്നിയിൽ ഇല്ല. വർക്കിംഗ് വിമൻസ് ഹോസ്റ്റൽ നിർമാണം പൂർത്തിയാകുന്നതോടെ ഒറ്റയ്ക്ക് ജോലിക്കായും മറ്റും എത്തുന്ന വനിതകൾക്ക് സുരക്ഷിതമായ താമസസ്ഥലം ഒരുക്കാനാകും.

വീടിനുള്ളിൽ കയറിയ കാട്ടുപൂച്ച പിടിയിലായി

തിരുവല്ല: വീടിന്‍റെ ഉള്ളില്‍ കടന്ന കാട്ടുപൂച്ചയെ വനപാലകര്‍ പിടികൂടി. തിരുവല്ല പുളിക്കീഴ് അന്നപറമ്പില്‍ വാസുദേവന്‍റെ വീടിന്‍റെ ഉള്ളില്‍ നിന്നുമാണ് വനംവകുപ്പ് റാന്നി ആര്‍ആര്‍ടി സംഘം കാട്ടൂപൂച്ചയെ പിടികൂടിയത്. സെക്‌ഷന്‍ ഫോറസ്റ്റ് ഓഫീസര്‍ ജിജോ ജോര്‍ജിന്‍റെ നേതൃത്വത്തില്‍ ബീറ്റ് ഫോറസ്റ്റര്‍മാരായ മനീഷ് മോൻ, അരുണ്‍ കുമാര്‍, ഫിറോസ്ഖാന്‍ എന്നിവര്‍ സംഘത്തിലുണ്ടായിരുന്നു.

മലയാലപ്പുഴയിലെ മാലമോഷണം; നാടോടി സംഘത്തിലെ ഒരാൾകൂടി പിടിയിൽ

പത്തനംതിട്ട: മലയാലപ്പുഴ ദേവി ക്ഷേത്രത്തില്‍ ദര്‍ശനത്തിനെത്തിയ വീട്ടമ്മയുടെ നാലര പവന്‍ സ്വര്‍ണമാല കവര്‍ന്ന നാടോടി സംഘത്തിൽ ഒരാളെക്കൂടി പോലീസ് അറസ്റ്റ് ചെയ്തു. അട്ടക്കുളങ്ങര സബ് ജയിലില്‍ കഴിഞ്ഞുവരുന്ന തമിഴ്‌നാട് തിരുവല്ലൂര്‍ പൊളിവാക്കം വൈഷ്ണവി നഗര്‍ രതി(40) യെയാണ് കോടതി ഉത്തരവ് പ്രകാരം, മലയാലപ്പുഴ എസ്ഐ വി. എസ്. കിരണ്‍ ജയിലിലെത്തി അറസ്റ്റ് രേഖപ്പെടുത്തിയത്. തുടര്‍ന്ന്, കസ്റ്റഡിയില്‍ വാങ്ങി മലയാലപ്പുഴയിലെത്തിച്ച് തെളിവെടുപ്പും ചോദ്യം ചെയ്യലും പൂര്‍ത്തിയാക്കിയശേഷം കോടതിയില്‍ തിരികെ ഹാജരാക്കി. കേസില്‍ ഒന്നും രണ്ടും പ്രതികളായ തമിഴ്‌നാട് വെള്ളാച്ചി പള്ളിവാസല്‍ കോട്ടൂര്‍ സ്വദേശി ജൂലി (53), തമിഴ്‌നാട് രാജപാളയം ജക്കമ്മാള്‍(42) എന്നിവരെ നേരത്തേ അറസ്റ്റ് ചെയ്തിരുന്നു. ഈ മാസം ഒന്നിന് ക്ഷേത്രത്തിന്‍റെ ശ്രീകോവിലിനു സമീപം പത്തനംതിട്ട തോന്ന്യാമല പട്ടം കിഴക്കേക്കര വീട്ടില്‍ സുധാ ശശിയുടെ മൂന്നു ഗ്രാം താലിയും ഒരു ഗ്രാം ലോക്കറ്റുമടക്കം നാലരപവന്‍റെ മാലയാണ് സംഘം അപഹരിച്ചത്.

സൈക്കിൾദിനത്തിൽ സവാരി സംഘടിപ്പിച്ചു

അടൂർ: ഇളംപള്ളിൽ - പയ്യനല്ലൂർ പ്രതീക്ഷ ലൈബ്രറി ആർട്സ് ആൻഡ് സ്പോർട്സ് ക്ലബ‌ിന്‍റെ നേതൃത്വത്തിൽ പത്തനംതിട്ട മേരാ യുവഭാരതുമായി ചേർന്ന് ലോക സൈക്കിൾ ദിനത്തോടനുബന്ധിച്ച് ഫിറ്റ് ഇന്ത്യാ കാമ്പെയിന്‍റെ ഭാഗമായി സൺഡൈസ് ഓൺ സൈക്കിൾ പ്രോഗ്രാം സംഘടിപ്പിച്ചു. മഹാത്മാ ജനസേവന കേന്ദ്രം ട്രസ്റ്റി അക്ഷർ രാജ് സൈക്കിൾ റാലി ഫ്ലാഗ് ഓഫ് ചെയ്തു. ബാലവേദി പ്രസിഡന്‍റ് എം. അഭിജിത്ത്, ജോയിന്‍റ് സെക്രട്ടറി ആർ. അദ്വൈത്, ആർ. ആദിത്യൻ, ശിവശങ്കരൻ , അഗ്രജ് ബിശ്വാസ് എന്നിവർ പ്രസംഗിച്ചു. എക്സിക്യൂട്ടീവ് അംഗം അദ്വൈത് ബിശ്വാസ് റാലിക്ക് നേതൃത്വം നല്കി.

മീന്തലക്കരയിൽ വീട് തകർന്നു

തിരുവല്ല: കഴിഞ്ഞ ദിവസം രാത്രിയിൽ ഉണ്ടായ കാറ്റിലും മഴയിലും മീന്തലക്കര മൈലമൂട്ടിൽ പൊയ്കയിൽ എം. കെ. രാജേന്ദ്രന്‍റെ വീട് തക‌ർന്നു. കാറ്റിൽ വീടിന്‍റെ മേൽക്കൂര ഇളകിപ്പോയി. വീട് പൂർണമായും നശിച്ച നിലയിലാണ്. പിക്കപ്പ് വാഹന ഡ്രൈവറാണ് രാജേന്ദ്രൻ. മൂന്ന് മുറികളുള്ള വീട്ടിൽ രാജേന്ദ്രനും ഭാര്യയും സഹോദരനുമാണുള്ളത്. വീട്ടിലുണ്ടായിരുന്ന ഗൃഹോപകരണങ്ങളും നശിച്ചു. ഓടും ഷീറ്റു മേഞ്ഞതായിരുന്നു മേൽക്കൂര . അപകടം നടക്കുമ്പോൾ ഇവർ മറ്റൊരു മുറിയിലായിരുന്നതിനാൽ വൻ അപകടമാണ് ഒഴിവായത്.

ഹൈസ്കൂളിലെ അധികസമയം; പ്രൈമറി ക്ലാസുകളിൽ കാത്തിരിപ്പ്

കോഴഞ്ചേരി: ഹൈസ്കൂൾ ക്ലാസുകളിലെ സമയമാറ്റം മൂലം ആദ്യദിനത്തിൽ അവ്യക്തത.തിങ്കളാഴ്ച മുതലായിരുന്നു സംസ്ഥാനത്തെ പൊതുവിദ്യാല‍യങ്ങളിൽ അധ്യയന സമയം രാവിലെ 9.45 ന് ആരംഭിച്ച് വൈകുന്നേരം 4.45 ന് അവസാനിക്കുന്ന തരത്തിൽ പുനഃക്രമീകരിച്ചത്. ഇതിലൂടെ കുട്ടികള്‍ക്ക് അധ്യയന സമയം കൂടി. 45 മിനിട്ട് വീതമുള്ള എട്ട് പീരിയഡുകൾ നിലവിൽ വന്നു. തിങ്കളാഴ്ച ജില്ലയ്ക്ക് അവധിയായിരുന്നതിനാല്‍ ഇന്നലെ മുതലാണ് സമയമാറ്റം പ്രാവർത്തികമായത്. 8,9,10 ക്ലാസുകളില്‍ മാത്രമാണ് സമയ വ്യത്യാസമുളളത്. യുപി, എല്‍പി വിഭാഗങ്ങളില്‍ രാവിലെ 10 ന് തുടങ്ങി നാലിന് അവസാനിക്കുന്ന പഴയ രീതിയിലാണ് ക്ലാസുകള്‍ നടക്കുന്നത്. ഹൈസ്കൂളിനൊപ്പം പ്രവർത്തിക്കുന്ന പ്രൈമറി ക്ലാസുകളിലെ കുട്ടികൾക്ക് പുതിയ സമയമാറ്റം പൊല്ലാപ്പായിട്ടുണ്ട്. ഈ കുട്ടികളും ഹൈസ്കൂൾ കുട്ടികളോടൊപ്പം എത്തേണ്ടിവരും. സ്കൂൾ വാഹനങ്ങളുടെ സമയവും പുനഃക്രമീകരിച്ചിട്ടുണ്ട്. 9.30ന് ബെല്ലടിച്ച് 9.45ന് ഹൈസ്കൂൾ ക്ലാസുകളിൽ അധ്യയനം ആരംഭിക്കുമെങ്കിലും പ്രൈമറി ക്ലാസുകളിൽ പത്തിനു തുടങ്ങിയാൽ മതി. പ്രൈമറി കുട്ടികൾ അരമണിക്കൂർ ക്ലാസിൽ വെറുതെയിരിക്കേണ്ടിവരും. വൈകുന്നേരം പ്രൈമറി ക്ലാസുകൾ നാലിന് അവസാനിക്കുമെങ്കിലും ഹൈസ്കൂൾകുട്ടികൾ കൂടി വരാതെ വാഹനങ്ങൾ പുറപ്പെടില്ല. പ്രായോഗിക ബുദ്ധിമുട്ട് അധ്യയന സമയമാറ്റം സ്കൂൾ അധികൃതരെ ബുദ്ധിമുട്ടിലാക്കിയിട്ടുണ്ട്. രാവിലെയും വൈകുന്നേരവും കുട്ടികളുടെ യാത്ര ക്രമീകരിക്കുന്നതാണ് പൊല്ലാപ്പായത്. പല എയ്ഡഡ്, സർക്കാർ വിദ്യാലയങ്ങളും ഒരു വാഹനം ഉപയോഗിച്ചാണ് കുട്ടികളെ എത്തിക്കുന്നത്. പ്രൈമറി, ഹൈസ്കൂൾ കുട്ടികൾക്കായി വെവേറെ ട്രിപ്പ് നടത്താനാകില്ല. രണ്ടു വിഭാഗത്തിലെയും കുട്ടികളെയും കയറ്റി എത്തുകയും മടക്കിക്കൊണ്ടുപോകുകയും ചെയ്യുന്നത് ഒരു സമയത്താകും. വൈകുന്നേരങ്ങളിൽ അഞ്ചിന് ട്രിപ്പ് ആരംഭിച്ചാൽ വിദൂരങ്ങളിലെത്തുന്പോഴേക്കും സന്ധ്യയാകും. രാവിലെ ഏഴോടെ ട്രിപ്പ് ആരംഭിച്ചെങ്കിലേ കുട്ടികളെ 9.30നു മുന്പ് പലയിടത്തും എത്തിക്കാനാകൂ. സാധാരണക്കാരായ കുട്ടികൾ പഠിക്കുന്ന പൊതുവിദ്യാലയങ്ങളിൽ പൊതുഗതാഗത സംവിധാനത്തെ ആശ്രയിച്ചു കുട്ടികൾ വരട്ടേയെന്നു നിർദേശിക്കാനുമാകില്ല. വെള്ളിയാഴ്ചകളില്‍ പഴയതുപോലെ ക്ലാസുകള്‍ പ്രവര്‍ത്തിച്ചാല്‍ മതിയാവും. ആഴ്ചയിൽ ഒരുദിവസം മറ്റൊരു സമയക്രമമെന്നതിലും അപ്രായോഗികതയുണ്ടെന്ന് രക്ഷിതാക്കളും സ്കൂൾ അധികൃതരും ചൂണ്ടിക്കാട്ടുന്നു. ഹൈക്കോടതിയുടെ ഉത്തരവിനേ തുടര്‍ന്ന് 220 അധ്യയന ദിവസം ഹൈസ്‌കൂള്‍ ക്ലാസുകളില്‍ ഉറപ്പാക്കാനാണ് സമയമാറ്റം കൊണ്ടുവന്നിരിക്കുന്നത്.

തിരുമൂലപുരത്ത് ബേക്കറിയിൽ മോഷണം

തിരുവല്ല: തിരുമൂലപുരത്ത് ബേക്കറിയുടെ ഷട്ടർ കുത്തിത്തുറന്ന് മോഷണം. തിരുമൂലപുരത്ത് പ്രവർത്തിക്കുന്ന അമ്പാടിയിൽ ബേക്കറി ആൻഡ് കഫേയിലാണ് മോഷണം നടന്നത്. സ്ഥാപനത്തിന്‍റെ പ്രധാന ഷട്ടറിന്‍റെ പൂട്ട് തകർത്ത് അകത്തു കയറിയ അഞ്ചംഗ സംഘം മേശയിൽ നിന്നു 5200 രൂപയോളം കവർന്നു. ചൊവ്വാഴ്ച രാവിലെ എട്ടരയോടെ ജീവനക്കാരനായ സുരേന്ദ്രൻ കട തുറക്കാനായി എത്തിയപ്പോഴാണ് മോഷണ വിവരം അറിഞ്ഞത്. ഉടൻതന്നെ സ്ഥാപന ഉടമയെയും മറ്റ് ജീവനക്കാരെയും വിവരം അറിയിച്ചു. തുടർന്ന് സ്ഥാപന ഉടമ നൽകിയ പരാതിയിൽ തിരുവല്ല പോലീസ് സ്ഥലത്തെത്തി തെളിവുകൾ ശേഖരിച്ചു. പുലർച്ചെ 3.20 ഓടെ ഷട്ടറിന്‍റെ പൂട്ട് തകർത്ത് മോഷണസംഘം അകത്തു കയറുന്നതായ ദൃശ്യങ്ങൾ ലഭിച്ചു. മഴക്കോട്ടും തൊപ്പിയും ധരിച്ച സംഘം പണം പരതുന്ന ദൃശ്യങ്ങൾ സ്ഥാപനത്തിലെ സിസിടിവികളിൽ നിന്നും ലഭിച്ചിട്ടുണ്ട്. മോഷണം നടന്ന ബേക്കറിയുടെ എതിർവശത്ത് പ്രവർത്തിക്കുന്ന തട്ടുകടയിൽ എത്തിയ സംഘം മോഷണ ശ്രമം നടത്തുകയും ഇവിടെ സൂക്ഷിച്ചിരുന്ന ഗ്യാസ് അടുപ്പ് സമീപത്തെ വെള്ളക്കെട്ടിൽ ഉപേക്ഷിക്കുകയും ചെയ്തു. തിങ്കളാഴ്ച അർധരാത്രി മുതൽ പ്രദേശത്ത് ശക്തമായ മഴ അനുഭവപ്പെട്ടിരുന്നു. ഇതിന്‍റെ മറവിലാകാം മോഷണമെന്ന് അനുമാനിക്കുന്നതായും സ്ഥാപനത്തിൽ നിന്നും ലഭിച്ച സിസിടിവി ദൃശ്യങ്ങൾ അടിസ്ഥാനമാക്കി പ്രതികൾക്കായുള്ള അന്വേഷണം ആരംഭിച്ചതായും പോലീസ് പറഞ്ഞു. photo തിരുമൂലപുരത്ത് ബേക്കറിക്കുള്ളിൽ കടന്ന മോഷ്ടാക്കൾ മേശയിൽ നിന്നു പണം മോഷ്ടിക്കുന്ന ദൃശ്യം സിസിടിവിയിൽ പതിഞ്ഞപ്പോൾ.

റോഡരികിൽ കഞ്ചാവു ചെടി കണ്ടെത്തി

തിരുവല്ല: എംസി റോഡിൽ തിരുവല്ല തിരുമൂലപുരത്ത് ഫർണിച്ചർ കടയുടെ സമീപം കഞ്ചാവു ചെടി കണ്ടെത്തി. ഇന്നലെ വൈകുന്നരം തിരുവല്ല എക്സൈസ് സർക്കിൾ ഇൻസ്‌പെക്ടർ കെ. രാജേന്ദ്രനും സംഘവും നടത്തിയ പരിശോധനയിലാണ് റോഡരികിൽ വൈദ്യുതി പോസ്റ്റിന്‍റെ കിഴക്കുവശത്ത് കുറ്റിച്ചെടികൾക്കിടയിൽ നിന്ന് കഞ്ചാവ് ചെടി കണ്ടെത്തയിത്. 89 സെന്‍റിമീറ്റർ നീളമുള്ള ചെ‌ടിയാണിത്. എക്സൈസ് വകുപ്പ് കേസെടുത്തെങ്കിലും പ്രതിയായി ആരെയും ഉൾപ്പെടുത്തിയിട്ടില്ല.

പത്തനംതിട്ട നഗര റോഡുകളിലെ കുഴികൾ യാത്രക്കാർക്ക് ഭീഷണി

പത്തനംതിട്ട: കനത്ത മഴയിൽ പത്തനംതിട്ട നഗരത്തിലെ റോഡുകൾ നിറയെ കുണ്ടുംകുഴിയും. വെള്ളക്കെട്ടു കാരണം റോഡുകളിലൂടെ സഞ്ചരിക്കാനാകാത്ത സ്ഥിതിയാണ്. മാലിന്യങ്ങളും റോഡിലേക്ക് ഒഴുക്കാൻ തുടങ്ങിയതോടെ നഗരം ദുർഗന്ധപൂരിതവുമായി. പകർച്ച വ്യാധികൾ പടിവാതിൽക്കൽ നിൽക്കുന്പോഴാണ് നഗരം മുഴുവൻ ചെളിക്കുണ്ടിലും മാലിന്യത്തിലുമായിരിക്കുന്നത്. നഗരവാർഡുകളിലെ ഉപറോഡുകൾ മുഴുവൻ തകർന്നു കിടക്കുകയാണ്. പഴയ ബസ് സ്റ്റാൻഡിനു പിന്നിലൂടെ കടമ്മനിട്ട റോഡിലേക്ക് പ്രവേശിക്കുന്ന റോഡാണ് ഏറെ ശോച്യാവസ്ഥയിലായിരിക്കുന്നത്. മഴക്കാലത്ത് റോഡ് നിറഞ്ഞാണ് മലിനജലം ഒഴുകുന്നത്. ഇതിൽ ചവിട്ടിവേണം നടന്നുപോകേണ്ടത്. വെള്ളം ഒഴുകിപ്പോകാൻ ഓട സംവിധാനവും ഇവിടെയില്ല. സകല മാലിന്യങ്ങളും വെള്ളത്തിൽ കെട്ടിക്കിടക്കുകയാണ്. വാഹനങ്ങൾ കടന്നുപോകുമ്പോൾ സമീപത്തെ കടകളിലേക്കാണ് മാലിന്യം തെറിക്കുന്നത്. ഈ ഭാഗത്തെ മറ്റു റോഡുകളും തകർന്ന് കിടക്കുകയാണ്. പത്തനംതിട്ട ഗവൺമെന്‍റ് ഹൈസ്കൂളിലേക്കുള്ള പാത നിറയെ കുണ്ടും കുഴിയുമാണ്. ഗവൺമെന്‍റ് സ്കൂൾ, എംപ്ലോയ്മെന്‍റ് എക്സ്ചേഞ്ച് എന്നിവിടങ്ങളിലേക്കുള്ള പാതയാണിത്. ചിറ്റൂർ റോഡിന്‍റെസ്ഥിതിയും പരിതാപകരമാണ്. ഡോക്ടേഴ്സ്ലൈൻ, പീപ്പിൾസ് ക്ലിനിക് റോഡുകളും നിശേഷം തകർന്ന് യാത്ര ദുഷ്കരമാണ്. പീപ്പിൾസ് ക്ലിനിക് റോഡിൽ ഓട തകർന്നത് നന്നാക്കാതെയും കിടക്കുന്നു . കെഎസ്ആർടിസി - ശാസ്താക്ഷേത്രം റോഡിൽകൂടിയും സഞ്ചരിക്കാൻ കഴിയില്ല. നിരവധിവ്യാപാര സ്ഥാപനങ്ങളും അഭിഭാഷകരുടെ ഓഫീസുകളും പ്രവർത്തിക്കുന്നത് ഇവിടെയാണ്. കക്കൂസ് മാലിന്യംവരെ റോഡിലേക്ക് ഒഴുകിയെത്തുന്നുണ്ട്. മുനിസിപ്പൽ ബസ് സ്റ്റാൻഡ് റോഡ് തോടായി പത്തനംതിട്ട അബാൻ മേൽപാലം പണി നടക്കുന്ന സ്വകാര്യ ബസ് സ്റ്റാൻഡിനു മുന്നിലെ നഗരത്തിലെ പ്രധാനപ്പെട്ടറോഡും തോടിനു സമാനമാണിപ്പോൾ. കാലൊന്നു തെറ്റിയാൽ ചെളിയിൽ മുങ്ങും. റോഡും കുഴിയും തിരിച്ചറിയാനും കഴിയില്ല.അത്രത്തോളം തകർന്നു തരിപ്പണമായിരിക്കുകയാണ് ഈ പാത. കാൽനടയാത്രക്കാരും ഏറെ ബുദ്ധിമുട്ടുന്നു. കാലൊന്നു തെറ്റിയാൽ ചെളിയിൽ മുങ്ങുമെന്നതാണു സ്‌ഥിതി. മഴ കനത്തതോടെ വലിയ ദുരിതമാണ്. ഒട്ടേറെ വ്യാപാര സ്‌ഥാപനങ്ങളും ഓട്ടോ സ്‌റ്റാൻഡുമുള്ള മേഖല കൂടിയാണിത്. റോഡിന്‍റെ തകർച്ച വ്യാപാരികളെയും ദുരിതത്തിലാക്കി. മേൽപാലം നിർമാണഭാഗമായി സർവീസ് റോഡ് യാഥാർഥ്യമാക്കാൻ വൈകുന്നതാണ് ബുദ്ധിമു ട്ടുകൾക്കെല്ലാം കാരണമാകുന്ന്. സ്ഥലമേറ്റെടുപ്പ് ഉൾപ്പെടെയുള്ള വിവിധ കാരണങ്ങളാൽ സർവീസ് റോഡ് പണി വൈകുകയാണ്. രണ്ടാഴ്ചമുമ്പ് സർവീസ് റോഡിന്‍റെ സംരക്ഷണ ഭിത്തിയുടെ കുറെ ഭാഗം തകർന്നതും പുനർനിർമിക്കാനാകാതെ കിടക്കുകയാണ്. എൽഡിഎഫ് സർക്കാരിന്‍റെ നാലാം വാർഷികത്തിന്‍റെ ഭാഗമായി മുഖ്യമന്ത്രി പങ്കെടുത്ത യോഗം ബസ് സ്‌റ്റാൻഡിനുള്ളിലെ വടക്കേ യാർഡിലാണു നടത്തിയത്. റോഡിലെ ദുരവസ്ഥ കാണാതിരിക്കാൻ തലേന്നു ചില ഭാഗങ്ങളിൽഅറ്റകുറ്റപ്പണി നടത്തിയിരുന്നു. തൊട്ടടുത്ത ദിവസത്തെ കനത്ത മഴയിൽ ഇതെല്ലാം ഒഴുകിപ്പോകുകയും ചെയ്തു. താഴെ വെട്ടിപ്രത്ത് ബീക്കൺ ലൈറ്റ് സ്ഥാപിച്ച് കടയുടമ, ജലഅഥോറിറ്റി കുഴിമൂടി പത്തനംതിട്ട - മൈലപ്ര റോഡിൽ താഴെവെട്ടിപ്രം ഭാഗത്തു ബീക്കൺ ലൈറ്റ് സ്ഥാപിച്ച് സമീപത്തെ കടയുമട മുന്നറിയിപ്പ് നൽകിയതോടെ ജലഅഥോറിറ്റി ഇടപ്പെട്ടു. താഴെ വെട്ടിപ്രത്ത് പൈപ്പ് പൊട്ടി രൂപപ്പെട്ട കുഴിയിൽ നിരവധി ആളുകളാണ് കഴിഞ്ഞദിവസങ്ങളിൽ അപകടത്തിൽപെട്ടത്. എസ്പി ഓഫീസിനു സമീപത്തും ജില്ലാ ജഡ്ജിയുടേതടക്കം വീടിനു മുന്നിലുമാണ് കുഴി രൂപപ്പെട്ടത്. റോഡിനു സമീപം വർക്ക്ഷോപ്പ് നടത്തുന്ന പുഷ്പരാജാണ് തിങ്കളാഴ്ച രാത്രി റോഡിൽ ബോർഡ് വച്ച് മുന്നറിയിപ്പ് നൽകാൻ ബീക്കൺ ലൈറ്റ് സ്ഥാപിച്ചത്. ബീക്കൺ ലൈറ്റിനൊപ്പം ബോർഡും ചുവന്ന ലൈറ്റുകളും വച്ചിരുന്നു. ഉച്ചയോടെ ജലഅഥോറിറ്റി അധികൃതരെത്തി കുഴി അടച്ചു. മക്കിട്ട് കുഴി നികത്തുകയാണ് ചെയ്തത്. നഗരത്തിലെ പ്രധാന റോഡുകളിൽ പൈപ്പ് പൊട്ടി വൻ കുഴികളാണ് രൂപപ്പെട്ടിരുന്നത്. കെഎസ്ആർടിസി ജംഗ്ഷനിൽ പൈപ്പ് പൊട്ടിയുണ്ടായ കുഴി വാഹനയാത്രയ്ക്കു തടസമായി നിൽക്കുകയായിരുന്നു. പരാതികളേതുടർന്ന് ഇന്നലെയാണ് ഇത് മക്കിട്ട് നികത്തിയത്. കനത്ത മഴയ്ക്കിടെയിൽ നിലവിലെ കുഴിയടയ്ക്കൽ അധികദിവസം നീണ്ടു നിൽക്കില്ല. താഴെ വെട്ടിപ്രത്ത് ശബരിമല ഇടത്താവളത്തിനു സമീപം നിരന്തരം പൈപ്പ് പൊട്ടി രൂപപ്പെട്ട കുഴികളിലും ഇന്നലെ മക്കിട്ട് നികത്തുന്നുണ്ടായിരുന്നു. സുഗമമായ യാത്രയ്ക്കു തടസമാകുന്ന തരത്തിൽ രൂപപ്പെട്ട കുഴികൾ നികത്തുകയാണുണ്ടായത്.

സുരക്ഷാ ജീവനക്കാരനു മർദനമേറ്റു

അടൂർ: വസ്ത്ര വ്യാപാരശാലയിൽ എത്തിയയാൾ വാഹനം പാർക്ക് ചെയ്യുന്നതുമായുണ്ടായ തർക്കത്തിൽ സെക്യൂരിറ്റിയെ മർദിച്ചു. അടൂർ സെൻട്രൽ ടോളിൽ പ്രവർത്തിക്കുന്ന സുഡിയോ വസ്ത്രവ്യാപാരശാലയിലെ സുരക്ഷാജീവനക്കാരൻ കടമ്പനാട് അബി ഭവനം ബിജുകുമാറിനാണ് ( 52 ) മർദനമേറ്റത്. സംഭവത്തിൽ പന്തളം കടയ്ക്കാട് സുബൈദ മൻസിൽ അഖിൽ മുഹമ്മദിനെ (23) അടൂർ പോലീസ് അറസ്റ്റ് ചെയ്തു. ബിജു കുമാറിന്‍റെ തോളെല്ലിന് പരിക്കേറ്റു. കഴിഞ്ഞദിവസം ഉച്ചയ്ക്കാണ് സംഭവം. അഖിൽ മുഹമ്മദ് ബിജു കുമാറിനെ പിടിച്ചു തള്ളുന്നതിന്‍റെ ദൃശ്യം വസ്ത്രശാലയിലെ സിസിടിവിയിൽ പതിഞ്ഞിരുന്നു. തുടർന്ന് സ്ഥാപനത്തിലെ സെക്യൂരിറ്റി വിഭാഗം അധികൃതർ അടൂർ പോലീസിൽ പരാതി നൽകി. അടൂർ എസ് എച്ച്ഒ ശ്യാം മുരളിയുടെ നേതൃത്വത്തിലാണ് അഖിൽ മുഹമ്മദിനെ അറസ്റ്റ് ചെയ്തത്. ഇയാളെ പിന്നീട് സ്റ്റേഷൻ ജാമ്യത്തിൽ വിട്ടയച്ചു.

റോഡ് മുറിച്ചുകടക്കുന്നതിനിടയിൽ കാറിടിച്ച് കാൽനട യാത്രികൻ മരിച്ചു

അടൂർ: മണ്ണടിയിൽ റോഡ് മുറിച്ചു കടക്കുന്നതിനിടയിൽ കാറിടിച്ച് കാൽനടയാത്രികൻ മരിച്ചു. മണ്ണടി മുഖമുറി കൊണ്ടൂർ പടിക്കൽ എ. തങ്കപ്പനാണ് (69) മരിച്ചത്. തിങ്കളാഴ്ച രാത്രി 7.30ന് മണ്ണടി കല്ലുവിളേത്ത് ജംഗ്ഷനിലാണ് അപകടം. പരിക്കേറ്റ തങ്കപ്പനെ അടൂർ ജനറൽ ആശുപത്രിയിലും പിന്നീട് ചായലോട് സ്വകാര്യ മെഡിക്കൽ കോളജിലും എത്തിച്ചെങ്കിലും രക്ഷിക്കാനായില്ല.

ബാങ്ക് എംപ്ലോയീസ് ഫെഡറേഷൻ കൺവൻഷൻ

പത്തനംതിട്ട: കേരള ബാങ്ക് എംപ്ലോയീസ് ഫെഡറേഷൻ ജില്ലാ പ്രവർത്തക കൺവൻഷൻ സിപിഎം ജില്ലാ സെക്രട്ടറി രാജു ഏബ്രഹാം ഉദ്ഘാടനം ചെയ്തു. ജില്ലാ പ്രസിഡന്‍റ് എ.ആർ. വിക്രമൻ അധ്യക്ഷത വഹിച്ചു. കേരള ബാങ്ക് ഭരണസമിതിയംഗം നിർമലാദേവി, ഫെഡറേഷൻ ജില്ലാ സെക്രട്ടറി റോയി ഫിലിപ്പ്, സേതുകുമാർ, ഇന്ദുലേഖ, ആർ. അജയകുമാർ, യു. ജിൽ തുടങ്ങിയവർ പ്രസംഗിച്ചു. സംസ്ഥാന കമ്മിറ്റിയംഗം വി.ആർ. സജികുമാറിനും പത്മകുമാരിക്കും യോഗത്തിൽ യാത്രയയപ്പ് നല്കി.

ജില്ലാ നിയമ സേവന അഥോറിറ്റി അദാലത്ത്: 6332 കേസുകള്‍ തീര്‍പ്പാക്കി

പത്തനംതിട്ട: ജില്ലാ നിയമ സേവന അഥോറിറ്റിയുടെയും വിവിധ താലൂക്ക് ലീഗല്‍ സര്‍വീസ് കമ്മിറ്റികളുടെയും നേതൃത്വത്തില്‍ പത്തനംതിട്ട കോടതി സമുച്ചയത്തില്‍ നടന്ന അദാലത്തില്‍ ജില്ലയിലെ വിവിധ കോടതികളിലായി 6332 കേസുകള്‍ തീര്‍പ്പാക്കി. വിവിധ കേസുകളില്‍ നഷ്ടപരിഹാരമയും പിഴയിനത്തിലുമായി 10.25 കോടി രൂപ ഈടാക്കി. പിഴ ഒടുക്കിത്തീര്‍ക്കാവുന്നവ, എംഎസിറ്റി, ബാങ്ക്, ആര്‍ടിഒ, ബിഎസ്എന്‍എല്‍, സിവില്‍ വ്യവസായങ്ങൾ, കുടുംബ തര്‍ക്കങ്ങള്‍ തുടങ്ങിയവയാണ് തീര്‍പ്പാക്കിയത്. ജില്ലാ സേവന അഥോറിറ്റി ചെയര്‍മാനും ജില്ലാ ജഡ്ജിയുമായ എൻ. ഹരികുമാര്‍, താലൂക്ക് നിയമ സേവന കമ്മിറ്റി ചെയര്‍മാനും അഡീഷണൽ ജില്ലാ ജഡ്ജിയുമായ ജി. പി. ജയകുമാർ, ജില്ലാ സേവന അഥോറിറ്റി സെക്രട്ടറി സിവില്‍ ജഡ്ജ് സീനിയര്‍ ഡിവിഷന്‍ അരുണ്‍ ബെച്ചു എന്നിവര്‍ നേതൃത്വം നല്‍കി.

ഗവിയിലെ തൊഴിലാളി സമരം അവസാനിച്ചു

പത്തനംതിട്ട: കെഎഫ്ഡിസി മാനേജ്മെന്‍റുമായുള്ള തർക്കത്തേ തുടർന്ന് ഗവിയിലെ തൊഴിലാളികൾ മൂന്ന് ദിവസമായി നടത്തിവന്ന സമരം അവസാനിച്ചു. ടൂറിസം രംഗത്ത് പ്രവർത്തിച്ച 42 തൊഴിലാളികളെ തോട്ടം മേഖലയിലേക്ക് മാറ്റിയ തീരുമാനം കെഎഫ്ഡിസി പിൻവലിക്കാൻ തയാറായതിനേ തുടർന്നാണ് സമരം അവസാനിച്ചത്. തൊഴിലാളി യൂണിയൻ പ്രതിനിധികളും കെഎഫ്ഡിസി മാനേജ്മെന്‍റ് പ്രതിനിധികളും ഇന്നലെ പത്തനംതിട്ട ലേബർ ഓഫീസിൽ നടത്തിയ ചർച്ചയേ തുടർന്നാണ് പ്രശ്നം പരിഹരിച്ചത്. കഴിഞ്ഞ ദിവസം മൂഴിയാർ സിഐയുടെ സാന്നിധ്യത്തിൽ നടന്ന ചർച്ചയിൽ സമരം അവസാനിപ്പിക്കാൻ ധാരണയിലെത്തിയിരുന്നു. ഇന്നലെ നടന്ന ചർച്ചയിൽ ഗവിയിലെ തൊഴിലാളികൾ ഉന്നയിച്ച ആവശ്യങ്ങൾ കെഎഫ്ഡിസി ഡയറക്ടർ ബോർഡ് യോഗം ചേർന്ന് ചർച്ച ചെയ്യണമെന്ന് നിർദേശമുയർന്നു. ടൂറിസ്റ്റ് ഗൈഡുകൾക്ക് മഴക്കോട്ട്, ഷൂസ്, ട്രക്കിംഗ് പാത തെളിക്കൽ, ബോട്ടുകളുടെ സുരക്ഷാ പരിശോധന എന്നിവയാണ് തൊഴിലാളികൾ ഉന്നയിച്ച ആവശ്യങ്ങൾ.

ഇലവുംതിട്ടയിൽ നവജാതശിശുവിന്‍റെ മൃതദേഹം കണ്ടെത്തി

പത്തനംതിട്ട: നവജാതശിശുവിന്‍റെ മൃതദേഹം കണ്ടെത്തി. കുഞ്ഞിന്‍റെ അമ്മയെന്നു കരുതുന്ന യുവതി പോലീസ് നിരീക്ഷണത്തിൽ. മെഴുവേലി ആലക്കോട് കനാലിന് സമീപമുള്ള പറമ്പില്‍ ചൊവ്വാഴ്ച ഉച്ചയോടെയാണ് മൃതദേഹം കണ്ടത്. ചികില്‍സ തേടി ചെങ്ങന്നൂര്‍ ഉഷാ നഴ്സിംഗ് ഹോമില്‍ ചെന്ന അവിവാഹിതയില്‍ നിന്ന് കിട്ടിയ വിവരം അനുസരിച്ച് ഇലവുംതിട്ട പോലീസ് നടത്തിയ തെരച്ചിലിലാണ് മൃതദേഹം കണ്ടെത്തിയത്. മൃതദേഹത്തിനു മൂന്നുദിവസത്തെ പഴക്കമെങ്കിലുമുണ്ട്. ഇരുപത്തൊന്നു വയസുകാരിയാണ് വീട്ടില്‍ പ്രസവിച്ചത്. വീട്ടില്‍ പ്രസവിച്ചതിന്‍റെ അസ്വസ്ഥത കാരണം യുവതി ആദ്യം കിടങ്ങന്നൂരിലെ സ്വകാര്യ ആശുപത്രിയില്‍ ചികില്‍സ തേടിയിരുന്നു. യുവതി പ്രസവിച്ചതാണെന്ന് മനസിലാക്കിയ ആശുപത്രി അധികൃതര്‍ ഇവിടെ പ്രവേശിപ്പിക്കാതെ പറഞ്ഞു വിട്ടു. തുടര്‍ന്നാണ് ചെങ്ങന്നൂര്‍ അങ്ങാടിക്കലിലുള്ള ഉഷ നഴ്‌സിംഗ് ഹോമില്‍ എത്തി. പ്രസവലക്ഷണങ്ങൾ കണ്ടതോടെ കുഞ്ഞ് എവിടെയെന്നു ഡോക്ടർ തിരക്കി, യുവതി വ്യക്തമായ മറുപടി നൽകാതെ വന്നപ്പോൾ പോലീസിൽ അറിയിക്കുകയായിരുന്നു. ഇലവുംതിട്ട പോലീസ് നടത്തിയ തെരച്ചിലില്‍ തൊട്ടടുത്ത പറമ്പില്‍ പുല്ലിനിടയില്‍ നിന്ന് പെണ്‍കുഞ്ഞിന്‍റെ മൃതദേഹം കണ്ടെത്തുകയായിരുന്നു. ഇലവുംതിട്ട പോലീസ് ഇന്‍സ്‌പെക്ടര്‍ വിനോദ് കൃഷ്‌ണന്‍റെ നേതൃത്വത്തില്‍ അന്വേഷണം ആരംഭിച്ചു. യുവതി ആശുപത്രിയില്‍ ചികില്‍സയിലാണ്

ലഹരിക്കെതിരേ ‘പ്രൗഡ് കേരള’ ജില്ലാതല ഉദ്ഘാടനം

പത്തനംതിട്ട: ലഹരിക്കെതിരേ മുൻ പ്രതിപക്ഷ നേതാവ് രമേശ്‌ ചെന്നിത്തല നടത്തുന്ന പോരാട്ടം ശ്ലാഘനീയമെന്നും ഇതിനെ കേരളീയ സമൂഹം ഒന്നാകെ പിന്തുണയ്ക്കണമെന്നും മലങ്കര ഓർത്തഡോക്സ് സഭ വലിയ മെത്രാപ്പോലീത്ത കുര്യാക്കോസ് മാർ ക്ലിമീസ്. ലഹരിക്കെതിരേ രമേശ് ചെന്നിത്തല നേതൃത്വം നൽകുന്ന വാക്ക് എഗൈൻസ്റ്റ് ഡ്രഗ്സിന്‍റെ ഭാഗമായ പ്രൗഡ് കേരളയുടെ ജില്ലാ തല ഉദ്ഘാടനം നിർവഹിച്ചു പ്രസംഗിക്കുകയായിരുന്നു അദ്ദേഹം. എല്ലാവിധ ലഹരികളും സമൂഹത്തെ കാർന്നു തിന്നുന്ന ദുരവസ്ഥ വേദനജനകമാണ്. ഇതിനൊക്കെ പിന്തുണ നൽകുന്നവരെ സമൂഹം ഒറ്റപ്പെടുത്തണമെന്നും മെത്രാപ്പോലീത്ത പറഞ്ഞു. സംസ്ഥാന ചെയർമാൻ മലയിൻകീഴ് വേണുഗോപാൽ അധ്യക്ഷത വഹിച്ചു. പി. മോഹൻരാജ്, വെട്ടൂർജ്യോതിപ്രസാദ്, ആർ. വത്സലൻ, ജോൺസൻ വിളവിനാൽ, സാമുവേൽ കിഴക്കുപുറം, കെ. ജാസിംകുട്ടി, ടി. ടി. മുഹമ്മദ്‌, ഏബൽ മാത്യു, ഷാജിമോൻ, തട്ടയിൽ ഹരികുമാർ, രജനിപ്രദീപ്, എസ്.വി. പ്രസന്ന കുമാർ, റീബി ജോർജ്, അനു ഫിലിപ്പ്, പി. കെ. ജോസഫ്, എലിസബേത്ത് അബു, ലീലരാജൻ, വി. ടി. അജോമോൻ, സുനിൽ യമുന, മനോഷ് ഇലന്തൂർ, സുരേഷ്ബാബു പാലാഴി, കാട്ടൂർ അബ്ദുൽ സലാം, പി. രാമചന്ദ്രൻ നായർ എന്നിവർ പ്രസംഗിച്ചു.

ഇസ്രയേൽ - ഇറാൻ സംഘർഷത്തിന്‍റെ ആശങ്ക പ്രവാസി കുടുംബങ്ങളിലും

കോഴഞ്ചേരി: ഇസ്രയേല്‍ - ഇറാന്‍ സംഘര്‍ഷത്തിന്‍റെ ആശങ്കയിലും പ്രാർഥനയിലുമാണ് മധ്യതിരുവിതാംകൂറിലെ നിരവധി കുടുംബങ്ങൾ. പുല്ലാട്, - കോഴഞ്ചേരി, കുമ്പനാട്, ആറന്മുള, ആറാട്ടുപുഴ തുടങ്ങിയ പ്രദേശങ്ങളില്‍ നിന്നുള്ള നിരവധി ആളുകളാണ് ഇസ്രയേലിലും മറ്റുമുള്ളത്. ആതുര സേവന രംഗത്താണ് ബഹുഭൂരിപക്ഷം ആളുകളും ജോലി ചെയ്യുന്നത്. പുല്ലാട് സ്വദേശികളായ നിരവധിയാളുകള്‍ ഇസ്രയേലിലെ ടെല്‍ അവീവ്, ടെല്‍ഹി എന്നിവിടങ്ങളിലുണ്ട്. ഇവരെല്ലാം സുരക്ഷിതരാണെന്നാണ് ബന്ധുക്കൾക്കു ലഭിച്ച വിവരം. അടിയന്തര ഘട്ടങ്ങളിൽ ബങ്കറുകളിലേക്ക് മാറേണ്ട സാഹചര്യമുണ്ടെന്നും ബന്ധുക്കളെ അറിയിച്ചിട്ടുണ്ട്. ഇന്നലെ രാവിലെയും ഫോണില്‍ വിളിച്ചെന്നും സുരക്ഷിതരാണെന്നും എന്നാല്‍ പുറത്തിറങ്ങരുതെന്ന മുന്നറിയിപ്പുണ്ടെന്നും ടെല്‍ അവീവിൽ ജോലി ചെയ്യുന്ന പുല്ലാട് സ്വദേശിനിയുടെ മാതാവ് പറഞ്ഞു. യുദ്ധത്തിന്‍റെയും മിസൈല്‍ ആക്രമണത്തിന്‍റെയും ദൃശ്യങ്ങള്‍ മാധ്യമങ്ങളിൽ കാണുന്പോൾ ആകുലതകളുണ്ടെങ്കിലും ഫോണിലൂടെ അവിടെയുള്ളവരെ ലഭിക്കുന്നതാണ് ബന്ധുക്കൾക്ക് ഏക ആശ്വാസം.

മാർത്തോമ്മ മെത്രാപ്പോലീത്ത രഞ്ജിതയുടെ വീട് സന്ദർശിച്ചു

കോഴഞ്ചേരി: അഹമ്മദാബാദ് വിമാനാപകടത്തില്‍ മരിച്ച പുല്ലാട് സ്വദേശിനി രഞ്ജിത ജി. നായരുടെ പുല്ലാട് കൊഞ്ഞോണ്‍ വീട്ടില്‍ ആശ്വാസ വാക്കുകളുമായി മാര്‍ത്തോമ്മ സഭാധ്യക്ഷൻ ഡോ. തിയഡോഷ്യസ് മാര്‍ത്തോമ്മ മെത്രാപ്പോലീത്ത, ഡോ. യുയാക്കീം മാര്‍ കൂറിലോസ് സഫ്രഗൻ മെത്രാപ്പോലീത്തഎന്നിവരെത്തി. സഭ അല്മായ ട്രസ്റ്റി ആന്‍സില്‍ കോമാട്ടും മെത്രാപ്പോലീത്തയ്ക്കൊപ്പം ഉണ്ടായിരുന്നു. പുല്ലാട് ശ്രീരാമകൃഷ്ണവിലാസം എന്‍എസ്എസ് കരയോഗം പ്രസിഡന്‍റ് എം. പി. പ്രതാപന്‍ എന്നിവരും ഇന്നലെ രഞ്ജിതയുടെ വീട്ടിലെത്തി. കിടങ്ങന്നൂര്‍ വിജയാനന്ദാശ്രമം മഠാധിപതി കൃഷ്ണനന്ദ പൂര്‍ണമയിതീര്‍ഥയും എത്തിയിരുന്നു. ഇതിനിടെ രഞ്ജിതയുടെ ഡിഎൻഎ ഫലം ഇന്നലെയും എത്തിയില്ല. രഞ്ജിതയുടെ സഹോദരന്‍ രതീഷ് ജി. നായരുടെ രക്തസാമ്പിള്‍ ഡിഎന്‍എ പരിശോധനയ്ക്കായി അഹമ്മദാബാദിലെ സിവില്‍ ആശുപത്രി അധികൃതര്‍ ശേഖരിച്ചിരുന്നു. ഇന്നലെ രാവിലെ ഫലം അറിയുമെന്നു പറഞ്ഞിരുന്നെങ്കിലും ഇതുവരെ അറിവായിട്ടില്ല. ഡിഎന്‍എ പരിശോധനയിലൂടെ മൃതദേഹം തിരിച്ചറിഞ്ഞു കഴിഞ്ഞാൽ നാട്ടിലെത്തിച്ചു സംസ്‌കരിക്കാനുള്ള ക്രമീകരണങ്ങളും ആരംഭിക്കും. രഞ്ജിത പഠിച്ചതും മകന്‍ ഇന്ദുചൂഢന്‍ ഇപ്പോള്‍ പഠിക്കുന്നതുമായ പുല്ലാട് ശ്രീവിവേകാനന്ദ ഹൈസ്‌കൂളില്‍ പൊതു ദര്‍ശനത്തിനുവച്ചതിനു ശേഷമായിരിക്കും സംസ്‌കാര ചടങ്ങുകള്‍ നടക്കുന്നത്. ഇതുമായി ബന്ധപ്പെട്ട് പഞ്ചായത്ത് അധികൃതര്‍ ഇന്നലെ സ്‌കൂള്‍ സന്ദര്‍ശിച്ചിരുന്നു.

ആറന്മുള ഇലക്‌ട്രോണിക്സ് ക്ലസ്റ്റർ : അനുകൂലിച്ച് ഐടി വകുപ്പ്, പദ്ധതി നടപ്പാക്കാനാകില്ലെന്ന് കൃഷിവകുപ്പ്

പത്തനംതിട്ട: നിർദിഷ്ട ആറന്മുള വിമാനത്താവളം പദ്ധതി പ്രദേശത്ത് ഇലക്‌ട്രോണിക്സ് മാനുഫാക്ചറിംഗ് ക്ലസ്റ്റർ പദ്ധതി ആരംഭിക്കാനുള്ള നീക്കത്തെ പിന്തുണച്ച് ഐടി വകുപ്പ്. മുഖ്യമന്ത്രിയുടെ കീഴിലുള്ള ഐടി വകുപ്പിലെ കെഎസ്ഐടിഎൽ പദ്ധതിക്ക് പച്ചക്കൊടി നൽകിയിട്ടുണ്ട്. പദ്ധതി നടപ്പാക്കണമെങ്കിൽ ഭൂപരിഷ്കരണ നിയമത്തിൽ ഇളവുവേണമെന്നതിനാൽ ഇതിനായി ടേക്ക് ഓഫ് ടു ഫ്യൂച്ചർ പ്രൈവറ്റ് ലിമിറ്റഡ് (ടിഒഎഫ്എൽ) കന്പനി സർക്കാരിനെ സമീപിച്ചിട്ടുണ്ട്. ഇവർ നൽകിയ അപേക്ഷ സർക്കാരിന്‍റെ പരിഗണനയിലാണ്. സർക്കാർ മിച്ചഭൂമിയായി കണ്ടെത്തിയ സ്ഥലത്തു പദ്ധതി വരുന്നതിനെ എതിർത്ത് കൃഷിമന്ത്രി പി. പ്രസാദ് രംഗത്തെത്തിയിട്ടുണ്ട്. ആറന്മുളയിലെ നിർദിഷ്ട 139 ഹെക്ടർ ഭൂമിയിൽ 122.87 ഹെക്ടർ നിലമുണ്ടെന്നാണ് കണ്ടെത്തൽ. നിലം നികത്തിയ സ്ഥലത്ത് ഇത്തരമൊരു പ്രോജക്ട് വരുന്നതിലെ ദുരൂഹത തുടക്കം മുതൽ കൃഷി മന്ത്രി ചൂണ്ടിക്കാട്ടിയിരുന്നു. നെൽവയലും തണ്ണീർത്തടങ്ങളും നികത്തിയുള്ള പദ്ധതിയെ അനുകൂലിക്കില്ലെന്നതാണ് മന്ത്രിയുടെ നിലപാട്. മുന്പ് വിമാനത്താവള വിരുദ്ധ സമരത്തിലും മുൻപന്തിയിൽ തന്നെയുണ്ടായിരുന്നു. ഇലക്ട്രോണിക്സ് ക്ലസ്റ്റർ ആരംഭിക്കാനുദ്ദേശിക്കുന്ന ഭൂമിയിൽ നിലം നികത്തിയ ഭാഗമുണ്ടെന്നുള്ളത് ജില്ലാ കളക്ടർ സർക്കാരിലേക്കു നൽകിയ റിപ്പോർട്ടിൽ ചൂണ്ടിക്കാട്ടിയിരുന്നു. വിമാനത്താവള പദ്ധതിയുടെ നടത്തിപ്പുകാരായി എത്തിയ കെജിഎസ് ഗ്രൂപ്പ് പേരു മാറ്റിയാണ് പുതിയ പദ്ധതിക്കുവേണ്ടി ടിഐഎഫ്എൽ എന്ന കന്പനി രൂപീകരിച്ചതെന്നും കളക്ടറുടെ റിപ്പോർട്ടിൽ പറയുന്നു. രണ്ടു വർഷം മുമ്പാണ് കെജിഎസ് എന്ന സ്ഥാപനം ടേക്ക് ഓഫ് ടു ഫ്യൂച്ചർ പ്രൈവറ്റ് ലിമിറ്റഡ് എന്ന പുതിയ പേരിൽ പദ്ധതിക്കായി ഐവകുപ്പിൽ അപേക്ഷ സമർപ്പിക്കുന്നത്. ഭൂപരിഷ്കരണ നിയമത്തിൽ ഇളവു തേടി ഐടി വകുപ്പ് റവന്യു വകുപ്പിന് അപേക്ഷ കൈമാറി. റവന്യു വകുപ്പ് കൃഷി വകുപ്പിന്‍റെ പരിഗണനയ്ക്കായി കത്ത് സമർപ്പിച്ചു. നിർദ്ദിഷ്ട പ്രദേശത്ത് 65 ഹെക്ടറിൽ പുഞ്ചകൃഷി നടക്കുന്നുണ്ടെന്നും നെൽവയൽ നികത്തിയാൽ വെള്ളപ്പൊക്ക ഭീഷണി ഉണ്ടാകുമെന്നും കാട്ടി കൃഷി ഡെപ്യൂട്ടി ഡയറക്ടർ റിപ്പോർട്ട് നൽകിയിട്ടുമുണ്ട്. പദ്ധതിക്കു സിപിഎം പിന്തുണ സംസ്ഥാന സർക്കാർ രണ്ട് ബജറ്റുകളിൽ ആറന്മുള കേന്ദ്രീകരിച്ച് ഐടി പദ്ധതി പ്രഖ്യാപച്ചിരുന്നു. സർക്കാർ നേരിട്ടു നടത്തുന്ന ഐടി പാർക്കായിരിക്കുമെന്ന ധാരണ ആളുകൾക്കുണ്ടായിരുന്നു. ഇതിനിടെയണ് പുതിയ കന്പനി അപേക്ഷയുമായി രംഗപ്രവേശം ചെയ്തത്. 139 ഹെക്ടർ ഭൂമിയാണ് പദ്ധതിക്ക് ആവശ്യം എന്ന് അപേക്ഷയിൽ പറയുന്നു. എന്നാൽ ഇതിൽ 118.74 ഹെക്ടറും പണ്ട് വിമാനത്താവള പദ്ധതിക്കായി കണ്ടെത്തിയ വയലാണ്. കോഴഞ്ചേരി ചാരിറ്റബിൾ എഡ്യുക്കേഷൻ സൊസൈറ്റി ഉൾപ്പെടെയുള്ളവ കെജിഎസ് കന്പനിക്കു വിമാനത്താവളം ആവശ്യത്തിനായി നൽകിയ വസ്തു കോഴഞ്ചേരി താലൂക്കിലെ ആറന്മുള, കിടങ്ങന്നൂർ, മെഴുവേലി, മല്ലപ്പുഴശേരി വില്ലേജുകളിലാണ്. ഈ സ്ഥലം സ്വകാര്യ വ്യക്തി വാങ്ങിയതു നിയമപരമല്ലെന്നു കണ്ടെത്തുകയും പോക്കുവരവ് നടപടികൾ നിർത്തിവയ്ക്കുകയും ചെയ്തു. ഇതേത്തുടർന്ന് 118.74 ഹെക്ടർ മിച്ചഭൂമിയായി കോഴഞ്ചേരി താലൂക്ക് ലാൻഡ് ബോർഡ് പ്രഖ്യാപിച്ചിരുന്നു. 7.08 ഹെക്ടർ സർക്കാർ ഏറ്റെടുക്കുകയും ചെയ്തതാണ്. 5000 കോടിയുടെ നിക്ഷേപം, 1000 പേർ‌ക്ക് തൊഴിൽ ഭൂപരിഷ്കരണ നിയമത്തിൽ ഇളവുതേടി ഇലക്ട്രോണിക്സ് ക്ലസ്റ്ററിന് അനുമതി തേടിയിട്ടുള്ള പ്രദേശത്തിന്‍റെ 90 ശതമാനവും നിലമാണെന്ന് പറയുന്നു. നെൽവയലും തണ്ണീർത്തടവുമടങ്ങിയ പ്രദേശം നികത്തിയെടുത്താൽ വെള്ളപ്പൊക്ക സാധ്യയുണ്ടെന്ന മുന്നറിയിപ്പും കൃഷിവകുപ്പ് നൽകിയിരുന്നു. അനുമതി നൽകണമെങ്കിൽ പ്രാദേശിക നിരീക്ഷണസമിതിയുടെ ശിപാർശയും വേണം. എന്നാൽ വിമാനത്താവളം പോലെ പാടം നികത്തേണ്ട ആവശ്യമില്ലെന്ന് ഇലക്ട്രോണിക്സ് ക്ലസ്റ്റർ കന്പനി വാദിക്കുന്നു. ഒരേക്കർ സ്ഥലത്ത് പത്തു കോടി രൂപയുടെ നിക്ഷേപവും 20 പേർക്കു തൊഴിലും ഉറപ്പാക്കിയാൽ വ‍യലും തണ്ണീർത്തടവും നികത്തുന്നതിൽ ഇളവു നൽകാമെന്നു വ്യവസ്ഥയുണ്ട്. 1000 പേർക്കു തൊഴിലും 5000 കോടി നിക്ഷേപവുമാണ് ടിഒഎഫ്എൽ മുന്നോട്ടുവയ്ക്കുന്നത്. ആറന്മുളയിൽ പുതിയ പദ്ധതി പരിഗണനയിൽ ഇല്ല ആറന്മുളയിൽ വിമാനത്താവളമല്ലാതെ മറ്റേതെങ്കിലും പദ്ധതി പരിഗണനയിൽ ഇല്ലെന്ന് മൗണ്ട് സിയോൻ ഗ്രൂപ്പ് ചെയർമാനും എഡ്യുക്കേഷൻ ചാരിറ്റബി‌ൾ സൊസൈറ്റി ചെയർമാനുമായ ഡോ.ഏബ്രഹാം കലമണ്ണിൽ പറഞ്ഞു. എയറോനോട്ടിക്കൽ എൻജിനിയറിംഗ് പഠനത്തിനായുള്ള എയർ സ്ട്രിപ്പ് സ്ഥാപിക്കാനാണ് ആറന്മുളയിൽ സ്ഥലം വാങ്ങിയത്. പിന്നീട് ഇവിടെ വിമാനത്താവളം പദ്ധതി നിർദേശമുണ്ടായി.‌ ഇതിനാവശ്യമായ നടപടിക്രമങ്ങൾ നടത്തിയതാണ്. മറ്റാർക്കും ഭൂമി കൈമാറ്റം ചെയ്തിട്ടില്ലെന്നും മറ്റൊരു പദ്ധതി നിലവിൽ ആലോചനയിൽ ഇല്ലെന്നും ഏബ്രഹാം കലമണ്ണിൽ വ്യക്തമാക്കി.

ആറന്മുള വിമാനത്താവള പദ്ധതിപ്രദേശത്ത് ഇ പാർക്ക് പദ്ധതിയുമായി കെജിഎസ് ഗ്രൂപ്പ്

കോഴഞ്ചേരി: ആറന്മുള വിമാനത്താവളത്തിനായി ഏറ്റെടുത്ത സ്ഥലത്തു പുതിയ പദ്ധതികൾ സംബന്ധിച്ച നിർദേശങ്ങളും വിവാദത്തിൽ. വിമാനത്താവളം പദ്ധതി വിവാദങ്ങളിൽ കുടുങ്ങിയതോടെ പാഴായിപ്പോയ പദ്ധതി പ്രദേശത്ത് ഐടി പാർക്ക് അടക്കമുള്ള പദ്ധതികൾ പരിഗണിക്കുകയും സംസ്ഥാന സർക്കാർ ബജറ്റ് നിർദേശമായി അംഗീകരിക്കുകയും ചെയ്തിരുന്നു. പിന്നാലെ ഇതേ സ്ഥലത്ത് ഇലക്ട്രോണിക്‌സ് പാര്‍ക്ക് സിറ്റി ആരംഭിക്കുന്നതിനുള്ള സന്നദ്ധത അറിയിച്ചുകൊണ്ട് വിമാനത്താവള കമ്പനി ഉടകളായ കെജിഎസ് ഗ്രൂപ്പ് സർക്കാരിനെ സമീപിച്ചതോടെയാണ് പുതിയ വിവാദം ഉരുത്തിരിഞ്ഞിരിക്കുന്നത്. ഇതിനായി ഭൂപരിഷ്കരണ ചട്ടങ്ങളിൽ ഇളവ് തേടി ഐടി വകുപ്പിന് കെജിഎസ് അപേക്ഷ നൽകി. കെജിഎസ് ഗ്രൂപ്പിന്‍റെ 344 ഏക്കർ ഭൂമിയിൽ ഇലക്ട്രോണിക്സ് ക്ലസ്റ്റർ പദ്ധതിയാണ് ലക്ഷ്യം. അപേക്ഷ ജില്ലാ കളക്ടർ റവന്യു പ്രിൻസിപ്പൽ സെക്രട്ടറിക്കും കൃഷിവകുപ്പിനും കൈമാറി. പ്രദേശം കൃഷി ചെയ്യുന്ന നിലവുംതണ്ണീർത്തടവുമായതുകൊണ്ട് കൃഷി വകുപ്പിന്‌റെ അനുമതിയില്ലാതെ റവന്യു വകുപ്പിന് നടപടിയെടുക്കാനാവില്ല. കെജിഎസ് പത്തനംതിട്ട ഇൻഫ്ര ലിമിറ്റഡ് എന്ന കമ്പനി ടിഒഎഫ്എൽ എന്ന പേരിലാണ് പുതിയ പദ്ധതിക്ക് അപേക്ഷ നൽകിയത്.തണ്ണീർത്തടവും നിലവും നികത്തി വിമാനത്താവളം നിർമിക്കുന്നതിനെതിരേ പ്രതിഷേധമുയർന്നതിനേ തുടർന്നാണ് പദ്ധതിയിൽ നിന്നു പിൻമാറാൻ കെജിഎസ് നിർബന്ധിതമായത്. 2016ൽ സംസ്ഥാന സർക്കാർ പദ്ധതിക്കുള്ള എല്ലാ അനുമതികളും റദ്ദാക്കിയിരുന്നു. 2018ലെ പ്രളയത്തിൽ പമ്പാ നദി കരകവിഞ്ഞൊഴുകിയപ്പോൾ പ്രധാന ജലസംഭരണിയായത് പദ്ധതി പ്രദേശമായിരുന്നു. ആറൻമുള, കിടങ്ങന്നൂർ, മല്ലപ്പുഴശേരി വില്ലേജുകളിലാണ് സ്ഥലം. വിമാനത്താവളം നിർമിക്കുന്നതിനുവേണ്ടി സംസ്ഥാന സര്‍ക്കാര്‍ ഏറ്റെടുത്തതും നിലവിലുള്ള കമ്പനി ഉടമകളായ കെജിഎസ് ഗ്രൂപ്പിന്‍റെയും മുന്‍ ഉടമകളായ കലമണ്ണിൽ എഡ്യുക്കേഷണൽ ട്രസ്റ്റിന്‍റെയും ഉടമസ്ഥതയിലുള്ള 230 ഏക്കര്‍ സ്ഥലത്തിലെ 49 ഏക്കര്‍ മാത്രമാണ് മണ്ണിട്ട് നികത്തിയിട്ടുള്ളത്. എന്നാല്‍ ഇവര്‍ വാങ്ങിയ സ്ഥലത്ത് മിച്ചഭൂമി ഉണ്ടെന്നുള്ള തിരിച്ചറിവിന്‍റെ അടിസ്ഥാനത്തില്‍ 20 ലധികം കേസുകള്‍ ലാൻഡ് ബോര്‍ഡിന്‍റെ മുമ്പില്‍ നിലനില്‍ക്കുകയാണ്. സംസ്ഥാന സര്‍ക്കാര്‍ ഭൂമിക്കുവേണ്ടി നിശ്ചയിച്ചിട്ടുള്ള അടിസ്ഥാന വിലയില്‍ നിന്നും കുറച്ചാണ് ഉടമകളില്‍ നിന്നും വിമാനത്താവള കമ്പനികള്‍ ഭൂമി വാങ്ങിക്കൂടടിയത്. ഇക്കാരണത്താല്‍ തന്നെ പോക്കുവരവ് നടത്തി കരം ഒടുക്കിയിട്ടില്ലാത്തതിനാല്‍ ഇത്തരം ഭൂമി പാട്ടത്തിനെടുത്തും സ്വന്തമായി കര്‍ഷകര്‍ കൃഷി ചെയ്യുന്നുണ്ട്. പദ്ധതി പ്രദേശത്ത് കരിന്പു കൃഷി വിവാദ വിമാനത്താവളത്തിനുവേണ്ടിയുള്ള ഭൂമിയുടെ സമീപത്തായി വ്യാപിച്ചുകിടക്കുന്ന ആറന്മുള-മല്ലപ്പുഴശേരി വില്ലേജില്‍പ്പെട്ട കുറുന്താര്‍ പ്രദേശമുള്‍പ്പെടെയുള്ള 18 ഏക്കറോളം സ്ഥലത്ത് വിജയകരമായി കരിമ്പ് കൃഷി ഇപ്പോള്‍ നടക്കുന്നുണ്ട്. ഇതിനുവേണ്ടിയുള്ള വിത്തുകള്‍ തമിഴ്‌നാട്ടിൽ നിന്നുമാണ് ശേഖരിച്ചത്. ഇവിടെ കൃഷി ചെയ്യുന്ന കരിമ്പുകള്‍ ഒരടി ഉയരത്തില്‍ നില്‍ക്കുകയാണെന്നും കൃഷി നടത്തുന്ന ജൈവ വൈവിധ്യ ബോര്‍ഡിന്‍റെ അവാര്‍ഡ് ജേതാവുകൂടിയായ എഴുമറ്റൂര്‍ അമൃതധാര ഗോശാല ചെയര്‍മാന്‍ അജയകുമാര്‍ വല്ലൂഴത്തില്‍ പറഞ്ഞു. പ്രകൃതിക്ക് ഏറ്റവും അനുയോജ്യമായ സ്ഥലമാണെന്നും വിവാദമായിട്ടുളള വിമാനത്താവളം ഉള്‍പ്പെടെയുള്ള പ്രദേശങ്ങളില്‍ ജൈവകൃഷി നടത്തി വിജയിപ്പിക്കാമെന്നും ഇതിന് സംസ്ഥാന സര്‍ക്കാരിന്‍റെയും കൃഷി വകുപ്പിന്‍റെയും സഹായമാണ് ഉണ്ടാവേണ്ടതെന്നും അജയകുമാര്‍ പറഞ്ഞു. വെല്ലുവിളികള്‍ ഏറ്റെടുത്തുകൊണ്ടുതന്നെ നെല്‍കൃഷിയുള്‍പ്പെടെയുള്ള കൃഷികള്‍ പരമ്പരാഗതമായ രീതിയില്‍ ചെയ്യാമെന്നും കാര്‍ഷിക ജൈവമായി ബന്ധപ്പെട്ട മോഡല്‍ ഗ്രാമമായി ഇതിനെ മാറ്റാന്‍ കഴിയുമെന്നും അദ്ദേഹം പറഞ്ഞു. 2016 - 21 കാലയളവിൽ പദ്ധതി പ്രദേശത്തെ പാടശേഖരങ്ങൾ ഏറ്റെടുത്ത് കൃഷിവകുപ്പ് തന്നെ നെൽകൃഷി നടത്തിയിരുന്നു. മുഖ്യമന്ത്രി പിണറായി വിജയൻ നേരിട്ടെത്തി ഉദ്ഘാടനം ചെയ്ത പദ്ധതി പിന്നീട് ഉപേക്ഷിച്ചു. ആറന്മുള ബ്രാൻഡിൽ നെല്ലുത്പാദനം നടത്തിയെങ്കിലും ഇത്തരം പ്രവർത്തനങ്ങൾ ഇപ്പോൾ നടക്കുന്നില്ല. പദ്ധതി പ്രദേശത്തു കുടിൽ കെട്ടി താമസം തുടങ്ങിയവരെയും സംരക്ഷിക്കാനാളില്ലാത്ത സ്ഥിതിയാണ്. നീർച്ചാലുകൾ സംരക്ഷിക്കപ്പെടണം ഇലക്ട്രോണിക്സ് സിറ്റി പാര്‍ക്ക് വരുന്നതിന് തങ്ങള്‍ എതിരല്ലെന്നും എന്നാല്‍ ഈ പ്രദേശത്തെ നീര്‍ച്ചാലുകള്‍ സംരക്ഷിക്കുകയും ജലനിര്‍ഗമനം തടസമില്ലാതിരിക്കുകയുംഅതിനോടൊപ്പം പ്രകൃതിക്ക് ദോഷമുണ്ടാകാത്ത രീതിയിലായിരിക്കണമെന്നും ആറന്മുള വിമാനത്താവള വിരുദ്ധ സമിതി ജനറല്‍ കണ്‍വീനര്‍ പി. ആർ. ഷാജി പറഞ്ഞു. മണ്ണിട്ട് ഭൂമി നികത്തിയതിനാല്‍ ഈ പ്രദേശത്തെ നീര്‍ച്ചാലുകൾ ഒഴുക്കു നഷ്ടപ്പെട്ട് തടസപ്പെട്ടിരിക്കുന്ന സ്ഥിതിയാണുള്ളതെന്ന് അദ്ദേഹം ചൂണ്ടിക്കാട്ടി. മിച്ചഭൂമിയുമായി ബന്ധപ്പെട്ട കേസുകള്‍ക്ക് പൂര്‍ണ വിരാമം ഉണ്ടാവുകയും ഇവിടെ താമസിക്കുന്നവര്‍ക്ക് ഭൂമിയടക്കമുള്ള സംരക്ഷണം നല്‍കാനുള്ള ബാധ്യതയും സര്‍ക്കാര്‍ ഏറ്റെടുക്കണമെന്നും പി. ആർ. ഷാജി പറഞ്ഞു. എതിർപ്പുമായി കൃഷി വകുപ്പ് കൃഷി ചെയ്യുന്ന നിലവും തണ്ണീർത്തടവും നികത്തി ഒരു പദ്ധതിക്കും അനുമതി നൽകില്ലെന്ന് കൃഷി വകുപ്പ് വ്യക്തമാക്കി. വയലുകൾ നികത്താൻ അനുവദിക്കില്ല. തൊണ്ണൂറ് ശതമാനവും നിലമായ ഭാഗത്താണ് പദ്ധതി നടപ്പാക്കാൻ നീക്കം. നിലം നികത്തിയാൽ വെള്ളക്കെട്ട് ഉണ്ടാകുമെന്ന് കൃഷി ഓഫീസർ റിപ്പോർട്ട് നൽകിയിട്ടുണ്ട്. ഗുരുതരമായ പരിസ്ഥിതി പ്രശ്നങ്ങൾ ഉയർത്തിക്കാട്ടിയാണ് വിമാനത്താവളത്തിനുള്ള അനുമതികൾ റദ്ദാക്കിയത്. ഇതുമായി ബന്ധപ്പെട്ട് ഹരിത ട്രിബ്യൂണലിന്‍റെ വിധിയും പദ്ധതിക്ക് എതിരായിരുന്നു. നിലം നികത്തി പദ്ധതി നടപ്പാക്കാൻ അനുവദിക്കേണ്ടതില്ലെന്ന നിലപാടിലാണ് കൃഷി മന്ത്രി പി. പ്രസാദ്. വിമാനത്താവളത്തിനെതിരേയുള്ള സമരത്തിൽ മുൻപന്തിയിലായിരുന്നു അദ്ദേഹം.

കാട്ടാന ശല്യം: വനാതിർത്തിയിലെ കൈതക്കൃഷിക്കെതിരേ വനംവകുപ്പ്

പത്തനംതിട്ട: വനാതിർത്തികളിലെ കൈതകൃഷി നിരോധിക്കുകയോ നിയന്ത്രിക്കുകയോ വേണമെന്ന് വനംവകുപ്പ്. വന്യജീവികളെ ആകർഷിക്കുന്ന കൈത കൃഷി ചെയ്യുന്നത് കാട്ടാനകളെ ആകർഷിക്കാൻ കാരണമാകുമെന്നതിനാലാണിത്. കോന്നി, റാന്നി വനം ഡിവിഷനുകളിലെ വിവിധ സ്ഥലങ്ങളിലായി 1100 ഹെക്ടറിൽ കൈതകൃഷി ആരംഭിച്ചിട്ടുണ്ട്. കുളത്തുമൺ, പാടം, വെള്ളംതെറ്റി, കല്ലേലി ഭാഗങ്ങളിൽ സമീപകാലത്ത് കൈത കൃഷിയ്ക്കായി സ്ഥലം പാട്ടത്തിനു നൽകിയിട്ടുണ്ട്. വിവിധ പ്ലാന്‍റേഷൻ കമ്പനികളുടെ ഉടമസ്ഥതയിലുള്ള റബർ തോട്ടങ്ങളിൽ, പുതിയ റബർ കൃഷിക്കൊപ്പം ഇടവിളയായാണ് കൈത കൃഷി ആരംഭിച്ചിരിക്കുന്നത്. അഞ്ച് വർഷത്തേക്ക് വരെ പാട്ടത്തിനെടുത്താണ് കൃഷി. തോട്ടങ്ങൾക്ക് ചുറ്റും ഫെൻസിംഗ് സ്ഥാപിച്ചിട്ടുണ്ട്. ഇതിലേക്ക് ഉയർന്ന തോതിൽ വൈദ്യുതി കടത്തിവിടുന്നതായും വന്യ ജീവികൾക്ക് ജീവഹാനി സംഭവിക്കുന്നതായും റേഞ്ച് ഓഫീസർമാർ ഡിവിഷണൽ ഫോറസ്റ്റ് ഓഫീസർമാർക്ക് റിപ്പോർട്ട് നൽകി. ആനകൾ അടക്കമുള്ള വന്യജീവികൾ കൈതയുടെ മണം പിടിച്ചെത്തുകയും തോട്ടങ്ങൾക്ക് സമീപം തമ്പടിക്കുകയും ചെയ്യുന്നു. കൈതത്തോട്ടങ്ങളിലേക്ക് ഇറങ്ങാൻ ശ്രമിച്ചപ്പോൾ ഷോക്കേറ്റാണ് കുളത്തുമണ്ണിൽ അടുത്തയിടെ കാട്ടാന ചരിഞ്ഞത്. ഷോക്കേറ്റ് പിൻമാറുന്ന കാട്ടാനകൾ ഫെൻസിംഗ് ഇല്ലാത്ത ഭാഗത്തു കൂടി ജനവാസ മേഖലയിലെത്തി കൃഷി നശിപ്പിക്കുന്നുണ്ട്. കൈത കൃഷി ചെയ്യുന്ന സ്ഥലങ്ങളിൽ അവസാന ചെടിയും ഇല്ലാതാകുന്നതുവരെ ആന ഏതുവഴിയും എത്തിയിരിക്കുമെന്ന് വനംവകുപ്പ് പറയുന്നു. സമീപകാലത്ത് കക്കാട്ടാറ് നീന്തിക്കടന്ന് രണ്ട് കാട്ടാനകൾ അള്ളുങ്കൽ ഭാഗത്തെ ജനവാസ മേഖലയിൽ എത്തിയിരുന്നത് ഉദാഹരണമായി ചൂണ്ടിക്കാണിക്കപ്പെടുന്നു. എലിഫന്‍റ് ബാരിക്കേഡ് സ്ഥാപിക്കണം കാട്ടാനകൾ കൃഷി സ്ഥലങ്ങളിലേക്ക് ഇറങ്ങാതിരിക്കാൻ പ്രതിരോധ മാർഗങ്ങളായ കിടങ്ങുകളും സോളാർ ഫെൻസിംഗും ഫലപ്രദമല്ലെന്ന് വനപാലകർ പറയുന്നു. പാറക്കെട്ടുകളുള്ള സ്ഥലങ്ങളിൽ കിടങ്ങുകൾ കുഴിക്കാൻ അനുമതിയില്ല. സോളാർ ഫെൻസിംഗിലേക്ക് വള്ളിപ്പടർപ്പുകൾ കയറി തകരാറുകൾ സംഭവിക്കുന്നു. ഇതിനു പരിഹാരമായി കർണാടക വനപ്രദേശങ്ങളിലെ അതിർത്തികളിൽ സ്ഥാപിച്ചിട്ടുള്ള തരം എലിഫന്‍റ് ബാരിക്കേഡ് സ്ഥാപിക്കണമെന്നാണ് നിർദേശം. റെയിൽവേയുടെ ഉപയോഗശൂന്യമായ പാളങ്ങൾ ലെയറുകളായി ഘടിപ്പിച്ചാണ് അവിടെ ബാരിക്കേഡുകൾ സ്ഥാപിക്കുന്നത്. ചെലവ് കുറവാണ്. ഇവ കാട്ടാനൾക്ക് നശിപ്പിക്കാനാവില്ലെന്ന് തെളിഞ്ഞിട്ടുണ്ട്. സോളാർ വേലികൾ പുനർ നിർമിക്കുകയും ഫെൻസിംഗ് ജോലിൾ നടത്തുകയും ചെയ്തു താത്കാലിക പ്രശ്ന പരിഹാരത്തിനും വനംവകുപ്പ് നിർദേശങ്ങൾ സമർപ്പിച്ചിട്ടുണ്ട്. കല്ലേലിയിൽ കാട്ടാനക്കൂട്ടം കല്ലേലിയിൽ പട്ടാപകലും കാട്ടാനക്കൂട്ടം . കല്ലേലി ഡിപ്പോ ജംഗ്ഷനു സമീപമാണ് കാട്ടാനകൾ ഇറങ്ങിയത്. അഞ്ച് ആനകൾ റോഡ് മുറിച്ചു കടന്ന് പോകുന്ന ദൃശ്യങ്ങൾ സാമൂഹ മാധ്യമങ്ങളിൽ പ്രചരിച്ചിരുന്നു. കല്ലേലി, കുളത്തുമൺ പ്രദേശങ്ങളിൽ കാട്ടാന ശല്യം രൂക്ഷമാകുകയാണ്. കല്ലേലി റോഡിൽ കാട്ടാന ശല്യം വർധിച്ചതിനേ തുടർന്ന് സ്ഥലത്ത് രാത്രികാല പട്രോളിംഗ് ശക്തമാക്കുമെന്ന് വനം വകുപ്പ് അറിയിക്കുകയും ചെയ്തു. നിരവധി വാഹന യാത്രക്കാർക്ക് നേരെയും എസ്റ്റേറ്റ് തൊഴിലാളികൾക്കു നേരെയും കാട്ടാനയുടെ ആക്രണം ഇതിനോടകം ഉണ്ടായിട്ടുണ്ട്. കല്ലേലി - കൊക്കാത്തോട് റോഡിൽ നിരവധി തവണയാണ് കാട്ടാന ഇറങ്ങിയത്. സാധാരണ ഇറങ്ങുന്ന ആനത്താരകൾക്കു പുറന പുതിയ പാതകൾ കണ്ടെത്തിയാണ് കാട്ടാനകൾ ഇറങ്ങുന്നതെന്നാണ് വനം വകുപ്പ് അധികൃതർ പറയുന്നത്.

ശിശു സൗഹൃദ കോര്‍ണറുമായി പ്രമാടം ഗ്രാമപഞ്ചായത്ത്

പ്രമാടം: കുരുന്നുകളുടെ പ്രിയ ഇടമാക്കാന്‍ സ്‌കൂള്‍ ചുമരുകളില്‍ വര്‍ണ വിസ്മയം തീര്‍ക്കുകയാണ് പ്രമാടം ഗ്രാമപഞ്ചായത്ത്. അക്ഷരങ്ങള്‍ക്കും അക്കങ്ങള്‍ക്കുമൊപ്പം ഓരോ ക്ലാസ് മുറിയേയും മനോഹരമാക്കി കുട്ടികളുടെ ഇഷ്ട മൃഗങ്ങളും ഫലങ്ങളും ചുമരുകളില്‍ ഇടം പിടിച്ചിട്ടുണ്ട്. പഞ്ചായത്ത് പരിധിയിലെ അഞ്ചു സ്‌കൂളുകളിലാണ് അറിഞ്ഞും രസിച്ചും പഠിക്കാന്‍ ശിശു സൗഹൃദ കോര്‍ണര്‍ ഒരുക്കുന്നത്. പ്രമാടം ജിഎല്‍പിഎസ്, മല്ലശേരി ജിഎല്‍പിഎസ്, തെങ്ങുംകാവ് ജിഎല്‍പിഎസ്, വി കോട്ടയം ജിഎല്‍പിഎസ്, ളാക്കൂര്‍ ജിഎല്‍പിഎസ് എന്നിവിടങ്ങളിലാണ് ശിശു സൗഹൃദ കോര്‍ണര്‍ തയാറാകുന്നത്. ഓരോ സ്‌കൂളിനും 50,000 രൂപയാണ് പദ്ധതി ചെലവ്. പ്രവേശനോത്സവത്തിന്‍റെ ഭാഗമായി പ്രമാടം സര്‍ക്കാര്‍ എല്‍പി സ്‌കൂളില്‍ ശിശു സൗഹൃദ കോര്‍ണര്‍ പഞ്ചായത്ത് പ്രസിഡന്‍റ് എന്‍. നവനിത്ത് ഉദ്ഘാടനം ചെയ്തിരുന്നു. ചിത്രകാരന്‍ ഉന്മേഷ് പൂങ്കാവാണ് ചുവരുകള്‍ മനോഹരമാക്കിയത്. കുട്ടികള്‍ക്ക് കലാപഠനവും പ്രഭാത ഭക്ഷണം ഒരുക്കി പഞ്ചായത്ത് മുമ്പും ശ്രദ്ധ നേടിയിരുന്നു. ശാസ്ത്രത്തെ അടുത്ത് അറിയാന്‍ സയന്‍സ് കോര്‍ണറുമുണ്ട്. കായിക ഉപകരണങ്ങളും നല്‍കിയിരുന്നു. ക്രിയേറ്റീവ് കോര്‍ണർ, ചികിത്സാ മുറി പദ്ധതികളും ആരംഭിക്കുമെന്ന് നവനിത്ത് പറഞ്ഞു.

മുതിര്‍ന്ന പൗരന്മാരോടുള്ള അതിക്രമം: ബോധവത്കരണ പരിപാടി നടന്നു

പത്തനംതിട്ട: മുതിര്‍ന്ന പൗരന്മാരോടുള്ള അതിക്രമങ്ങള്‍ക്കെതിരേ ബോധവത്കരണ പരിപാടി സാമൂഹികനീതി വകുപ്പിന്‍റെ ആഭിമുഖ്യത്തില്‍ കുമ്പനാട് ധര്‍മഗിരി മന്ദിരത്തില്‍ നടന്നു. ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം ഉദ്ഘാടനം ചെയ്തു. ക്ഷേമകാര്യ സ്ഥിരം സമിതി ചെയര്‍മാന്‍ ജിജി മാത്യു അധ്യക്ഷത വഹിച്ചു. ജില്ല സാമൂഹികനീതി ഓഫീസര്‍ ജെ.ഷംല ബീഗം, കോയിപ്രം ഗ്രാമപഞ്ചായത്ത് പ്രസിഡന്‍റ് പി. സുജാത, ജില്ല പഞ്ചായത്തംഗം സി. കെ. ലതാകുമാരി, പ്രൊബേഷന്‍ ഓഫീസര്‍ സിജു ബെന്‍, റവ. കെ. എസ്. മാത്യൂസ്, വയോജന കമ്മിറ്റി അംഗങ്ങളായ ബി. ഹരികുമാര്‍, രാമേശ്വരി അമ്മ, വി.ആര്‍. ബാലകൃഷ്ണന്‍, പി. ഇ. ലാലച്ചന്‍, വയോമിത്രം കോഓര്‍ഡിനേറ്റര്‍ എ.എല്‍. പ്രീത, ഓള്‍ഡ്ഏജ് ഹോം സൂപ്രണ്ട് ഒ.എസ്. മീന എന്നിവര്‍ പങ്കെടുത്തു. എന്‍എസ്എസ് ജില്ല കോ-ഓര്‍ഡിനേറ്റര്‍ രാജശ്രീ വയോജന സംരക്ഷണ പ്രതിജ്ഞ ചൊല്ലി. മുതിര്‍ന്ന പൗരന്മാരുടെ മാനസികാരോഗ്യത്തില്‍ കുടുംബത്തിനുള്ള പങ്ക് വിഷയത്തിലും മുതിര്‍ന്ന പൗരന്മാരും നിയമസംരക്ഷണവും വിഷയത്തിലും ക്ലിനിക്കല്‍ സൈക്കോളജിസ്റ്റ് പി.റ്റി. സന്ദീഷ് , പ്രകാശ് പി. തോമസ് എന്നിവര്‍ ബോധവത്കരണ ക്ലാസുകള്‍ നയിച്ചു. ദിനാഘോഷത്തോടനുബന്ധിച്ച് നടത്തിയ സെല്‍ഫി , ഷോര്‍ട്ട് വീഡിയോ മത്സരത്തിലെ വിജയികള്‍ക്ക് ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം കാഷ് അവാര്‍ഡ് വിതരണം ചെയ്തു. വയോജനങ്ങള്‍ക്കുളള സൗജന്യ ഗ്ലൂക്കോ മീറ്റര്‍ വിതരണവും നടന്നു.

ഓണക്കാലം ലക്ഷ്യമിട്ട് പൂകൃഷിയുമായി ഇരവിപേരൂര്‍

പത്തനംതിട്ട: ഓണക്കാല പൂകൃഷിക്കാവശ്യമായ ബന്ദി തൈകളുടെ വിതരണോദ്ഘാടനം ഇരവിപേരൂര്‍ ഗ്രാമപഞ്ചായത്ത് പ്രസിഡന്‍റ് കെ. ബി. ശ്രീധരന്‍ പിള്ള നിര്‍വഹിച്ചു. കാര്‍ഷിക കര്‍മസേന ഉത്പാദിപ്പിച്ച ഓറഞ്ച്, മഞ്ഞ നിറങ്ങളിലുള്ള 16000 ഹൈബ്രിഡ് ബന്ദിതൈകള്‍ സൗജന്യമായാണ് വിതരണം ചെയ്തത്. ഫ്ളോറി വില്ലേജ് പദ്ധതിയിലൂടെ 80,000 രൂപയാണ് കൃഷിക്കായി വിനിയോഗിക്കുന്നത്. പഞ്ചായത്ത് പരിധിയിലെ 1.6 ഹെക്ടര്‍ സ്ഥലമാണ് ബന്ദിക്കൃഷിക്ക് ഒരുങ്ങുന്നത്. ഓരോ വാര്‍ഡില്‍ നിന്നുള്ള വനിതകളാണ് കൃഷി ചെയ്യുന്നത്. വൈസ് പ്രസിഡന്‍റ് സാലി ജേക്കബ് അധ്യക്ഷത വഹിച്ചു. വികസനകാര്യ സ്ഥിരം സമിതി അധ്യക്ഷ ആര്‍. ജയശ്രീ, അംഗങ്ങളായ അമ്മിണി ചാക്കോ, ത്രേസ്യാമ്മ കുരുവിള, മോഹനൻ, അനില്‍ ബാബു, വിജയമ്മ തുടങ്ങിയവർ പ്രസംഗിച്ചു. ബന്ദി തൈകള്‍ വിതരണം ചെയ്തു വള്ളിക്കോട്: ഗ്രാമപഞ്ചായത്തില്‍ ബന്ദി തൈകളുടെ വിതരണം പ്രസിഡന്‍റ് ആര്‍. മോഹനന്‍ നായര്‍ നിര്‍വഹിച്ചു. ഓണവിപണി ലക്ഷ്യമാക്കിയാണ് പദ്ധതി നടപ്പാക്കുന്നത്. സ്ഥിര സമിതി അധ്യക്ഷരായ എം. പി. ജോസ്, ജി സുഭാഷ്, സെക്രട്ടറി പി. ജെ. രാജേഷ്, സിഡിഎസ് ചെയര്‍പെഴ്‌സണ്‍ സരിതാ മുരളി എന്നിവര്‍ പ്രസംഗിച്ചു.

ശുചിത്വമിഷൻ പ‌ ുരസ്കാരം തുന്പമൺ എംജി എച്ച്എസ്എസിന്

പത്തനംതിട്ട: ജില്ലയിലെ ഏറ്റവും മികച്ച സ്നേഹാരാമം നിർമിക്കുകയും പരിപാലിക്കുകയും ചെയ്യുന്ന തുന്പമൺ എംജി എച്ച്എസ്എസ് എൻഎസ്എസ് യൂണിറ്റിന് പത്തനംതിട്ട ശുചിത്വമിഷൻ നൽകുന്ന പുരസ്കാരം പത്തനംതിട്ട ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം സമ്മാനിച്ചു. പ്രിൻസിപ്പൽ ഡോ. മാത്യു പി.ജോർജ്, തുന്പമൺ ഗ്രാമപഞ്ചായത്ത് പ്രസിഡന്‍റ് റോണി ഏബ്രഹാം, ജില്ലാ പഞ്ചായത്തംഗം റോബിൻ പീറ്റർ, കാതോലിക്കേറ്റ് ആൻഡ് എംഡി സ്കൂൾസ് കോർപറേറ്റ് മാനേജർ ഡോ. ഗബ്രിയേൽ മാർ ഗ്രീഗോറിയോസ് മെത്രാപ്പോലീത്ത, ഹയർ സെക്കൻഡറി വിഭാഗം റീജിയണൽ ഡെപ്യൂട്ടി ഡയറക്ടർ കെ. സുധ, പന്തളം ബ്ലോക്ക് പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ലാലി ജോൺ തുടങ്ങിയവർ പങ്കെടുത്തു.

പെയ്തിറങ്ങിയത് ശക്തമായ മഴ; നാശനഷ്ടങ്ങളും ഏറി

പത്തനംതിട്ട: കഴിഞ്ഞ രണ്ടുദിവസം ജില്ലയിൽ ലഭിച്ചത് കനത്ത മഴ. അധികസമയം നീണ്ടുനിന്നില്ലെങ്കിലും ശക്തമായ മഴയാണ് ഈ ദിവസങ്ങളിൽ പെയ്തിറങ്ങിയത്. ഇന്നലെ രാവിലെ അവസാനിച്ച 24 മണിക്കൂറിൽ ജില്ലയിലെ വിവിധ ഭാഗങ്ങളിലെ മഴമാപിനികളിൽ നിന്നു ലഭിച്ച കണക്കുകളും ഇത് വ്യക്തമാക്കുന്നു. നദികളിലെ ജലനിരപ്പും ഉയർന്നുവെങ്കിലും ഇന്നലെ പകൽ മഴയ്ക്കു ശമനമുണ്ടായതോടെ പ്രളയഭീതി ഒഴിഞ്ഞു. തിരുവല്ല താലൂക്കിന്‍റെ വിവിധ ഭാഗങ്ങളിൽ താഴ്ന്ന പ്രദേശങ്ങളിൽ വെള്ളം കയറിയിരുന്നു. മഴ കുറഞ്ഞതിനാൽ വെള്ളം ഇറങ്ങുകയാണെന്ന് പ്രദേശവാസികൾ പറഞ്ഞു. പത്തനംതിട്ടയിൽ 40, തുന്പമൺ 36.4, കക്കി 129, പന്പ 111, മൂഴിയാർ 65, നിലയ്ക്കൽ 53.2, വടശേരിക്കര 83, പെരുന്തേനരുവി 57, അയിരൂർ 58.4, കല്ലൂപ്പാറ 41.4, തിരുവല്ല 44 മില്ലിമീറ്റർ എന്നിങ്ങനെയാണ് ഞായറാഴ്ച പകലും രാത്രിയിലുമായി ലഭിച്ച മഴയുടെ അളവ്. പന്പാനദിയുടെ അയിരൂർ ഭാഗത്ത് 7.99 മീറ്റർ, മാരാമൺ 6.76, ആറന്മുള 6.36, അച്ചൻകോവിലാറിന്‍റെ കോന്നിയിൽ 19.1, പന്തളം 8.2, തുന്പമൺ 8.85 മീറ്ററും ഇന്നലെ ജലനിരപ്പ് രേഖപ്പെടുത്തി. മണിമലയാറിന്‍റെ വള്ളംകുളം ഭാഗത്ത് 5.17, കല്ലൂപ്പാറയിൽ 6.04 മീറ്ററും ജലനിരപ്പുണ്ടായിരുന്നു. ജലനിരപ്പുയർന്നതിനേ തുടർന്ന് അച്ചൻകോവിൽ, മണിമല നദികളിൽ പ്രളയസാധ്യത മുന്നറിയിപ്പ് പുറപ്പെടുവിച്ചിരുന്നു. മൂഴിയാർ സംഭരണിയുടെ ഷട്ടറുകൾ ജലനിരപ്പ് ക്രമീകരിക്കുന്നതിനായി വെള്ളിയാഴ്ച രാത്രി മുതൽ തുറക്കുന്നുണ്ട്. കക്കിയിൽ 46 ശതമാനം മാത്രമാണ് ഇന്നലെയും ജലനിരപ്പ്. റോഡിന്‍റെ സംരക്ഷണഭിത്തി ഇടിഞ്ഞു താഴ്ന്നു റോഡിന്‍റെ സംരക്ഷണ ഭിത്തി ഇടിഞ്ഞു താഴ്ന്നു. റാന്നി ഗ്രാമപഞ്ചായത്തിന്‍റെ ഉടമസ്ഥതയിലുള്ള മുണ്ടപ്പുഴ - പെരുമ്പുഴ റോഡില്‍ ടെലിഫോണ്‍ ഭവനു മുന്നിലായിട്ടാണ് റോഡിന്‍റെ സംരക്ഷണ ഭിത്തി തകര്‍ന്നു വീണത്. കഴിഞ്ഞ ദിവസം പെയ്ത കനത്ത മഴയിലാണ് കെട്ട് ഇടിഞ്ഞു വീണത്.

കെട്ട് ഇടിഞ്ഞതോടെ ഗതാഗതത്തിന് ഭീഷണിയായി വശം ഇരുത്തി തുടങ്ങിയിട്ടുമുണ്ട്. നാട്ടുകാര്‍ മരച്ചില്ലകള്‍ ഉപയോഗിച്ചാണ് അപകട മുന്നറിയിപ്പു നല്‍കിയിരിക്കുന്നത്. മഴ തുടരുന്ന സാഹചര്യത്തില്‍ കൂടുതല്‍ മണ്ണ് ഒലിച്ചു പോകാന്‍ സാധ്യത ഏറെയാണ്. അങ്ങനെ സംഭവിച്ചാല്‍ വലിയ ദുരന്തം ഉണ്ടാകുമെന്ന് നാട്ടുകാര്‍ ആശങ്കപ്പെടുന്നുണ്ട്. അധികൃതര്‍ സംഭവത്തിന്‍റെ ഗൗരവം മനസിലാക്കി എത്രയുംവേഗം വശം കെട്ടി ബലപ്പെടുത്തണമെന്ന് നാട്ടുകാര്‍ ആവശ്യപ്പെട്ടു. ഏഴ് വീടുകള്‍ ഭാഗികമായി തകര്‍ന്നു ശക്തമായ മഴയില്‍ ജില്ലയിലെ രണ്ട് താലൂക്കുകളിലായി ഏഴ് വീടുകള്‍ ഭാഗികമായി തകര്‍ന്നു. കോന്നി അഞ്ച്, റാന്നി രണ്ട് എന്നിങ്ങനെയാണ് കണക്ക്. കോന്നി താലൂക്കില്‍ മൂന്നും റാന്നിയില്‍ ഒരു വില്ലേജിലുമാണ് മഴക്കെടുതി ബാധിച്ചത്. ജില്ലയില്‍ മൂന്ന് കര്‍ഷകരുടെ 30 വാഴകള്‍ കഴിഞ്ഞ ദിവസത്തെ കാറ്റില്‍ നശിച്ചു. മലയാലപ്പുഴയിൽ വീടിനു മുകളിൽ മരം വീണു; വയോധികനു പരിക്ക് മലയാലപ്പുഴ: കാറ്റിലും മഴയിലും വീടിനു മുകളിൽ മരം വീണ് മലയാലപ്പുഴയിൽ വായോധികന് പരിക്ക്. മലയാലപ്പുഴ താഴം ശ്യാം വിലാസിൽ കൃഷ്ണൻ കുട്ടിക്കാണ് (65) നാണ് പരിക്കേറ്റത്. ഞായറാഴ്ച രാത്രിയുണ്ടായ കാറ്റിലാണ് അപകടമുണ്ടായത്. ശക്തമായ കാറ്റിൽ കൃഷ്ണൻകുട്ടിയുടെ വീടിന് മുകളിലേക്ക് ആഞ്ഞിലി മരം വീഴുകയായിരുന്നു. കൃഷ്ണൻകുട്ടിയും ഭാര്യ ശ്യാമളയുമാണ് വീട്ടിലുണ്ടായിരുന്നത്. മേൽക്കൂരയുടെ ഓട് പൊട്ടിവീണാണ് കൃഷ്ണൻകുട്ടിയുടെ തലയ്ക്കു പരിക്കേറ്റത്. ഭാര്യ ശ്യാമളയ്ക്കും പരിക്കേറ്റു. കൃഷ്ണൻകുട്ടി നായരെ കോഴഞ്ചേരിയിലെ സ്വകാര്യ ആശുപത്രിയിൽ എത്തിച്ച് ചികിത്സ നൽകിയ ശേഷം കോന്നി മെഡിക്കൽ കോളജിൽ പ്രവേശിപ്പിച്ചു. വീടിന്‍റെ മേൽക്കൂര പൂർണമായി തകർന്നു. മലയാലപ്പുഴ പഞ്ചായത്ത് പ്രസിഡന്റ് പ്രീജ പി. നായർ, വില്ലേജ് ഓഫിസർ വിനോദ് തോമസ് തുടങ്ങിയവർ സ്ഥലം സന്ദർശിച്ചു. മലയാലപ്പുഴ താഴം സ്യമന്തകം വീട്ടിൽ രേഷ്മ രമേശിന്‍റെ വീടിനു മുകളിലേക്ക് ആഞ്ഞിലി മരം വീണ് നഷ്ടമുണ്ടായി. മലയാലപ്പുഴ താഴം പനമ്പള്ളി ഇല്ലം ഇന്ദിരാ ദേവി, കിഴക്കുപുറം പനാറയിൽ ആനി, തേക്കിനാൽ പതാലിൽ ബാബു എന്നിവരുടെ വീടുകൾക്ക് മുകളിൽ മരം വീണ് നാശനഷ്ടമുണ്ടായി. ഇളകൊള്ളൂരിൽ വീടിന്‍റെ മുറി ഇടിഞ്ഞുവീണുവെങ്കിലും വീട്ടിനുള്ളിലുണ്ടായിരുന്നവർ പരിക്കേൽക്കാതെ രക്ഷപെട്ടു. അജിതിന്‍റെ വീടാണ് ഇടിഞ്ഞുവീണത്.

അഭിഭാഷകന്‍ ഉൾപ്പെട്ട പോക്‌സോ കേസ് അന്വേഷണം ഇനി ക്രൈംബ്രാഞ്ചിന്

പത്തനംതിട്ട: അഭിഭാഷകന്‍ കുറ്റാരോപിതനായ പോക്സോ കേസിന്‍റെ തുടരന്വേഷണം സംസ്ഥാന ക്രൈംബ്രാഞ്ചിനു കൈമാറി. പതിനാറുകാരിയെ മദ്യം കൊടുത്ത് മയക്കി ലൈംഗിക വൈകൃതങ്ങള്‍ക്കും പ്രകൃതി വിരുദ്ധ പീഡനത്തിനും ഇരയാക്കി ബലാല്‍സംഗം ചെയ്ത കേസാണ് ക്രൈംബ്രാഞ്ചിനെ ഏല്പിച്ചത്. കേസ് അട്ടിമറിക്കാനും കുറ്റാരോപിതനായ അഭിഭാഷകനെ രക്ഷിക്കാനും തുടർ ശ്രമങ്ങൾ നടന്നുവെന്ന ആരോപണങ്ങളുടെ പേരിലാണ് അന്വേഷണം കൈമാറിയത്. കേസിൽ വീഴ്ച വരുത്തിയെന്ന പേരിൽ കോന്നി ഡിവൈഎസ്പി, എസ്എച്ച്ഒ എന്നിവർ സസ്പെൻഷനിലാണ്. കേസിൽ കോന്നി സ്വദേശിയായ ബിൻസിയെ (41) മാത്രമാണ് ഇതേവരെ അറസ്റ്റു ചെയ്തത്. ഇവര്‍ കേസില്‍ രണ്ടാം പ്രതിയാണ്. അഭിഭാഷകനായ ഒന്നാം പ്രതിക്ക്, ബലാല്‍സംഗത്തിനും ലൈംഗിക അതിക്രമങ്ങള്‍ക്കും കുട്ടിയെ വിധേയമാക്കാൻ സഹായിയായി നിന്നുവെന്നതാണ് ബിൻസിക്കെതിരേയുള്ള കുറ്റം. ഒന്നാം പ്രതി നൗഷാദ് (46) ഒളിവിലാണ്. ഹൈക്കോടതിയിൽ ഇയാൾ നൽകിയ മുൻകൂർ ജാമ്യാപേക്ഷ തള്ളിയതിനേ തുടർ്ന് സുപ്രീംകോടതിയെ സമീപിച്ചിരിക്കുകയാണ്. കോഴഞ്ചേരി ഹോട്ടല്‍ പാര്‍ക്ക്, പത്തനംതിട്ട കുമ്പഴയിലെ ഹോട്ടല്‍ ഹില്‍പാര്‍ക്ക് എന്നിവിടങ്ങളിലെത്തിച്ചായിരുന്നു പീഡനം തുടര്‍ന്നത്. പ്ലസ് വണ്‍ വെക്കേഷന്‍ കാലയളവില്‍ എറണാകുളത്ത് കോറല്‍ ഹോട്ടലില്‍ എത്തിച്ചും അഭിഭാഷകന്‍ കുട്ടിയെ ക്രൂര ലൈംഗിക പീഡനങ്ങള്‍ക്ക് ഇരയാക്കിയിരുന്നു. പത്തനംതിട്ട ചൈല്‍ഡ് വെല്‍ഫയര്‍ കമ്മിറ്റിയില്‍ നിന്നും ലഭിച്ച വിവരത്തിന്‍റെ അടിസ്ഥാനത്തില്‍ ആറന്മുള പോലീസ് കേസ് രജിസ്റ്റര്‍ ചെയ്ത് അന്വേഷണം നടത്തിയത്. ആദ്യം പരാതി ലഭിച്ചത് കോന്നി പോലീസ് സ്റ്റേഷനിലായിരുന്നു. ഇതിൽ കേസെടുക്കുന്നതിൽ വീഴ്ച വരുത്തിയെന്ന ആരോപണമാണ് പോലീസിനെതിരേയുള്ളത്. കേസിൽ പത്തനംതിട്ട ജില്ലാ ക്രൈംബ്രാഞ്ച് അന്വേഷണം നടത്തിയെങ്കിലും പോലീസ് ഉദ്യോഗസ്ഥരുടേതടക്കമുള്ള വീഴ്ചകൾ ചൂണ്ടിക്കാട്ടി ഡിഐജി നൽകിയ റിപ്പോർട്ടിന്‍റെ അടിസ്ഥാനത്തിലാണ് അന്വേഷണം ക്രൈംബ്രാഞ്ചിനെ ഏല്പിച്ചത്.

നിയന്ത്രണം വിട്ട റിക്കവറി വാനും കാറും മറിഞ്ഞു

മല്ലപ്പള്ളി: മല്ലപ്പള്ളി - പരിയാരം റോഡിൽ തേരടപ്പുഴ വളവിൽ നിയന്ത്രണംവിട്ട റിക്കവറി വാനും ഒപ്പം വലിച്ചു കൊണ്ടു വന്ന കാറും കുഴിയിലേക്ക് മറിഞ്ഞു. ഇന്നലെ വൈകുന്നേരം ആറോടെയാണ് അപകടം. തേരടപ്പുഴ വളവ് സ്ഥിരം അപകട മേഖലയാണ്. ഏപ്രിലിൽ നിയന്ത്രണം വിട്ട സ്കൂട്ടർ കലുങ്കിൽ ഇടിച്ച് അധ്യാപകനായിരുന്ന കോട്ടയം ചെറുവളവിൽ കാവുംഭാഗം പള്ളിക്കൽ മുറിയിൽ അരവിന്ദ് മധു (25) മരിച്ചിരുന്നു. നിരവധി അപകടങ്ങളാണ് ഇതിനോടകം ഉണ്ടായത്.

സിപിഎമ്മിലെ വിവാദങ്ങൾക്കൊടുവിൽ അടൂർ ചെയർപേഴ്സൺ രാജിവച്ചു

അടൂർ: നഗരസഭ ചെയർപേഴ്സൺ സിപിഎമ്മിലെ ദിവ്യ റെജി മുഹമ്മദ് തൽസ്ഥാനം രാജിവച്ചു. തിങ്കളാഴ്ച ചേർന്ന നഗരസഭാ കൗൺസിലിനു ശേഷമാണ് നഗരസഭ സെകട്ടറിയുടെ ചുമതല വഹിക്കുന്ന സൂപ്രണ്ട് പ്രസാദിന് രാജിക്കത്തു നല്കിയത്. പാർട്ടി തീരുമാനം അനുസരിച്ചാണ് രാജി എന്നാണ് കത്തിൽ സൂചിപ്പിച്ചിരിക്കുന്നത്. സിപിഐയിലെ ഡി.സജി എൽഡിഎഫ് ധാരണ പ്രകാരമുള്ള കാലയളവായ രണ്ട് വർഷം പൂർത്തീകരിച്ചതിനേ തുടർന്ന് ചെയർമാൻ സ്ഥാനം രാജിവച്ചതോടെയാണ് 2023 ഫെബ്രുവരി 16ന് ദിവ്യ റെജി മുഹമ്മദ് ചുമതലയേറ്റത്. തുടർന്ന് രണ്ടരവർഷം പൂർത്തിയാകുകയും തദ്ദേശ തെരഞ്ഞെടുപ്പിന് മാസങ്ങൾ മാത്രം ശേഷിക്കേവേയാണ് ഇവർ രാജിവച്ചൊഴിയുന്നത്. സിപിഎം പാർലമെന്‍ററി പാർട്ടിയിൽ സമീപക‌ാലത്തുണ്ടായ ചില വിവാദങ്ങളാണ് ചെയർപേഴസ്‌ന്‍റെ രാജിയിൽ കലാശിച്ചത്. ദിവ്യ റെജി മുഹമ്മദിനെതിരേ ഒരു സിപിഎം കൗൺസിലർ പരസ്യമായി ആരോപണം ഉന്നയിച്ചതും ഇത് ഏറെ ചർച്ച ചെയ്യപ്പെടുകയുമുണ്ടായി. കൗൺസിലർക്കെതിരേ നിയമനടപടി ഉൾപ്പെടെ സ്വീകരിക്കാൻ ദിവ്യ സന്നദ്ധയായി. തുടർന്ന് പാർട്ടി ഇടപെട്ട് കൗൺസിലർ വിശദീകരണം നൽകുകയും ചെയ്തു. ഡി. സജി രാജിവച്ചപ്പോൾ സിപിഎമ്മിൽ നിന്നും ആരാകും ചെയർമാനാകുക എന്നതു സംബന്ധിച്ച് നീണ്ട ചർച്ചകളും പിന്നീട് ചില തർക്കങ്ങളും ഉണ്ടായെങ്കിലും കഴിഞ്ഞ നഗരസഭ ഭരണസമതിയിലെ വൈസ് ചെയർപെഴ്സണായിരുന്ന ദിവ്യ റെജി മുഹമ്മദിനു നറുക്കു വീഴുകയായിരുന്നു. ഇത് പാർലമെന്‍ററി പാർട്ടിയിലെ മുതിർന്ന നേതാക്കളെ ചൊടിപ്പിച്ചു. ആരോപണ വിധേയരെ ഒഴിവാക്കി ദിവ്യ റെജി മുഹമ്മദിനെ ചെയർപേഴ്സൺ സ്ഥാനത്തെത്തിച്ച അതേ നിലപാടാകും അടുത്ത ഏതാനും മാസത്തേക്കുള്ള അധ്യക്ഷനെ തെരഞ്ഞെടുക്കുന്നതിലും പാർട്ടി സ്വീകരിക്കുക. കെ. മഹേഷ് കുമാറിന്‍റെ പേരാണ് സിപിഎം പരിഗണിക്കുന്നതെന്നാണ് സൂചന.

രഞ്ജിതയുടെ ഡിഎൻഎ ഫലത്തിനായുള്ള കാത്തിരിപ്പ്‌ തുടരുന്നു

കോഴഞ്ചേരി: അഹമ്മദാബാദ് വിമാനാപകടത്തിൽ മരിച്ച പത്തനംതിട്ട പുല്ലാട് കുറുങ്ങഴക്കാവ് കൊഞ്ഞോൺ വീട്ടിൽ ര‍ഞ്ജിത ആർ. നായരുടെ(39) ഡിഎൻഎ പരിശോധനാ ഫലത്തിനായുള്ള കാത്തിരിപ്പ്‌ തുടരുന്നു. ശനിയാഴ്ചയാണ് രഞ്ജിതയുടെ സഹോദരൻ രതീഷിന്‍റെ രക്‌തസാമ്പിൾ ഡിഎൻഎ പരിശോധനക്കായി അഹമ്മദാബാദ് സിവിൽ ആശുപത്രിയിൽ അധികൃതർ ശേഖരിച്ചത്. എന്നാൽ, ഇതേവരെ ഫലമറിയാനായില്ല. ഇന്നലെ ഫലം ലഭിക്കുമെന്ന പ്രതീക്ഷയുണ്ടായിരുന്നെങ്കിലും വൈകുന്നേരം വരെ ലഭിച്ചില്ല. ഫലം ലഭിച്ചശേഷമേ മൃതദേഹം നാട്ടിലെത്തിക്കുന്നതു സംബന്ധിച്ച തീരുമാനമെടുക്കാനാകൂ. മൃതദേഹം പൂർണമായി കത്തിക്കരിഞ്ഞ സാഹചര്യത്തിലാണ് ഡിഎൻഎ പരിശോധന. സഹോദരൻ രതീഷും ബന്ധു ഉണ്ണിക്കൃഷ്‌ണനും അഹമ്മദാബാദിൽ തന്നെ തുടരുകയാണ്. രഞ്ജിതയുടെ കുടുംബാംഗങ്ങളെ ആശ്വസിപ്പിക്കാനായി തിങ്കളാഴ്ചയും നിരവധിപേർ പുല്ലാട്ടെ കുടുംബവീട്ടിലെത്തിയിരുന്നു. മാർത്തോമ്മ സഭയുടെ സഫ്രഗൻ മെത്രാപ്പോലീത്ത ഡോ ജോസഫ് മാർ ബർണബാസ്, അടൂർ ഭദ്രാസനധിപൻ മാത്യൂസ് മാർ സെറാഫിം, പ്രവാസി സംസ്കൃതി അസോസിയേഷൻ സംസ്ഥാന പ്രസിഡന്‍റ് ജനറൽ സെക്രട്ടറി ബിജു ജേക്കബ് കൈതാരം, അസോസിയേഷൻ സംസ്ഥാന പ്രസിഡന്‍റ് സാമുവൽ പ്രക്കാനം , ജില്ല പ്രസിഡന്‍റ് വർഗീസ് മാത്യു, നൗഷാദ് റാവുത്തർ വെണ്ണിക്കുളം എന്നിവർ വീട്ടിലെത്തി. രഞ്ജിതയുടെ കുടുംബത്തിനുവേണ്ട എല്ലാ സഹായവും പിന്തുണയും നല്‍കാന്‍ മാർത്തോമ്മ സഭ സന്നദ്ധമാണെന്ന് ജോസഫ് മാര്‍ ബർണബാസ് പറഞ്ഞു. അല്മായ ട്രസ്റ്റി അന്‍സില്‍ കോമാട്ട്, റവ. ദാനിയേല്‍ വര്‍ഗീസ്, സഭ കൗണ്‍സില്‍ അംഗം റവ. തോമസ് കോശി, മാര്‍ത്തോമ്മ യുവജനസഖ്യം ജനറല്‍ സെക്രട്ടറി റവ. ബിനോയ് ഡാനിയേല്‍, എന്നിവര്‍ക്കൊപ്പമാണ് സഫ്രഗന്‍ മെത്രാപ്പോലീത്താ എത്തിയത്.

ഗ‌വിയിലെ തൊഴിലാളിസമരം ഒത്തുതീർപ്പിലേക്ക്

പത്തനംതിട്ട: മൂന്നു ദിവസമായി ഗവിയിൽ ടൂറിസം മേഖലയിലെ തൊഴിലാളികൾ തുടരുന്ന സമരം ഒത്തുതീർപ്പിലേക്ക്. ആങ്ങമൂഴി പോലീസ് സ്റ്റേഷനിൽ തൊഴിലാളി പ്രതിനിധികളും കെഎഫ്ഡിസി മാനേജ്മെന്‍റും തമ്മിൽ നടത്തിയ ചർച്ചയിലാണ് ധാരണയായത്. ചർച്ചയേ തുടർന്ന് സമരം പിൻവലിക്കുന്നതിന്‍റെ സൂചനയായി ഗവി ഇക്കോ ടൂറിസം കവാടത്തിൽ തൊഴിലാളി യൂണിയനുകൾ കെട്ടിയ കൊടികൾ അഴിച്ചുമാറ്റി. ഇന്ന് പത്തനംതിട്ട ലേബർ ഓഫീസിൽ തൊഴിലാളി യൂണിയൻ നേതാക്കളും മാനേജ്മെന്‍റ് പ്രതിനിധികളുമായി ചർച്ച നടക്കും. ടൂറിസം മേഖലയിൽ നിന്ന് 42 തൊഴിലാളികളെ തൊട്ടം മേഖലയിലേക്ക് മാറ്റാനുള്ള തീരുമാനത്തിനെതിരേയാണ് തൊഴിലാളികൾ പണിമു‌ടക്കിയത്. സമരം ഗവി ടൂറിസത്തെ ബാധിച്ചതിനേ തുടർന്നാണ് അധികൃതർ ചർച്ചയ്ക്കു വിളിച്ചത്. ഇന്ന് ലേബർ ഓഫീസിൽ നടക്കുന്ന ചർച്ചയിൽ അനുകൂല നടപടി പ്രതീക്ഷിക്കുന്നതായി തൊഴിലാളികൾ പറഞ്ഞു. മൺസൂൺ സീസണായതിനാൽ അപകടം ഒഴിവാക്കാൻ ട്രക്കിംഗ് പാതയിലെ മരങ്ങൾ മുറിച്ചു മാറ്റുക, തൊഴിലാളികൾക്ക് പാമ്പുകടിയേൽക്കാതിരിക്കാൻ ഷൂസ് നൽകുക, മഴക്കോട്ട് നൽകുക, അലവൻസ് വർധിപ്പിക്കുക തുടങ്ങിയ ആവശ്യങ്ങളുന്നയിച്ചതിന് മാനേജ്മെന്‍റ് പകപോക്കൽ നടത്തുന്നതിന്‍റെ ഭാഗമാണ് തൊഴിലാളികളെ പെട്ടെന്ന് ടൂറിസം മേഖലയിലേക്ക് മാറ്റാൻ ശ്രമിച്ചതെന്ന് ആരോപണമുണ്ട്.

ദീപിക - ഹിന്ദുസ്ഥാൻ ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് ആദരം 2025, 21ന് റാന്നിയിൽ

റാന്നി: ഇക്കഴിഞ്ഞ പത്ത്, 12 ക്ലാസുകളിലെ പൊതുപരീക്ഷകളിൽ എല്ലാ വിഷയങ്ങൾക്ക് എ പ്ലസ്, എ വൺ നേടിയ കുട്ടികളെയും നൂറുശതമാനം വിജയം കൈവരിച്ച സ്കൂളുകളെയും ദീപിക, ഹിന്ദുസ്ഥാൻ ഗ്രൂപ്പ് ഓഫ് ഇൻസ്റ്റിറ്റ്യൂഷൻ ചെന്നൈയുടെ സഹകരണത്തിൽ ആദരിക്കും. 21ന് ഉച്ചകഴിഞ്ഞ് രണ്ടിന് റാന്നി സിറ്റഡൽ റസിഡൻഷൽ സ്കൂളിൽ നടക്കുന്ന ആദരിക്കൽ സമ്മേളനത്തിൽ, കുട്ടികൾക്ക് ഫലകവും സർട്ടിഫിക്കറ്റും സമ്മാനിക്കും. ഹിന്ദുസ്ഥാൻ ഗ്രൂപ്പ് സ്ഥാപക ചെയർമാൻ ഡോ.കെ.സി.ജി. വർഗീസിന്‍റെ 85 -ാം ജന്മദിനത്തോടനുബന്ധിച്ചാണ് ദീപിക - ഹിന്ദുസ്ഥാൻ ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് അക്കാഡമിക് എക്സലൻസ് അവാർഡ് (ആദരം 2025) സംഘടിപ്പിച്ചിരിക്കുന്നത്.

ഏനാത്ത് തോട് ഇടിഞ്ഞു, മടവീഴ്ചയിൽ കൃഷിനാശം

അടൂർ: ഏനാത്ത് വീണ്ടും തോട് ഇടിഞ്ഞുണ്ടായ മടവീഴ്ചയിൽ കൃഷിനാശം.കല്ലുപാലം ഏലായ്ക്കു സമീപം പലയിടത്തായാണ് തോടിന്‍റെ വശം ഇടിഞ്ഞത്. തോടിന്‍റെ ഊപ്പുവിളപടി മുതൽ കളമല വരെയുള്ള ഭാഗത്താണ് പലയിടത്തും തീരം ഇടിയുന്നുണ്ട്. ഊപ്പുവിളപടി പ്ലാംതുണ്ടിൽ ബേബിയുടെ പുരയിടത്തിന്‍റെ വശത്തെ കെട്ട് കഴിഞ്ഞദിവസം തോട്ടിലേക്ക് ഇടിഞ്ഞു വീണിരുന്നു. ഇദ്ദേഹം സ്വന്തം ചെലവിൽ നിർമിച്ച സംരക്ഷണ ഭിത്തിയാണ് ഇടിഞ്ഞത്. ഇതേ ഭാഗത്തു തന്നെ പഞ്ചായത്ത് നിർമിച്ച ഭാഗങ്ങളും പൊളിഞ്ഞു തുടങ്ങിയിട്ടുണ്ട്. തോടിന്റെ വശത്തെ കെട്ടുകൾക്ക് ഉയരമില്ലെന്നതാണ് മറ്റൊരു പ്രശ്നം. മഴക്കാലത്ത് കൃഷിയിടങ്ങളിലേക്ക് വേഗത്തിൽ വെള്ളം കയറുന്ന സ്ഥിതിയാണ്. നെല്ല്, വെറ്റില, പച്ചക്കറി കൃഷികൾക്കാണ് ഏറെയും നാശമുണ്ടാകുന്നത്. കഴിഞ്ഞവർഷം ഇതേ തോടിന്‍റെ കളമല ഭാഗത്ത് വെള്ളം കയറി കൊയ്തുവെച്ച നെൽ കറ്റകൾ ഒഴുകിപ്പോയ സംഭവവും ഉണ്ടായിട്ടുണ്ട്.

ശബരിമലയില്‍ മലകയറ്റത്തിനിടെ രണ്ടുപേര്‍ കുഴഞ്ഞുവീണു മരിച്ചു

പത്തനംതിട്ട: പമ്പയില്‍ നിന്ന് സന്നിധാനത്തേക്കുള്ള മല കയറ്റത്തിനിടെ രണ്ടു പേര്‍ കുഴഞ്ഞു വീണു മരിച്ചു. ഒരു തീർഥാടകനും മരക്കൂട്ടത്ത് നിന്ന് ഡ്യൂട്ടി കഴിഞ്ഞ് മടങ്ങിയ താത്കാലിക ദേവസ്വം ഗാര്‍ഡുമാണ് കുഴഞ്ഞു വീണു മരിച്ചത്. തീർഥാടകനായ കർണാടക രാമനഗര്‍ സ്വദേശി പ്രജ്വല്‍ (20) 5-ാം നമ്പര്‍ ഷെഡില്‍ കുഴഞ്ഞു വീഴുകയായിരുന്നു. ഉടന്‍ ആശുപത്രിയില്‍ എത്തിച്ചെങ്കിലും മരണം സംഭവിച്ചു. മരക്കൂട്ടത്ത് താല്‍കാലിക ദേവസ്വം ഗാര്‍ഡായി ജോലിചെയ്യുന്ന കൊല്ലം സ്വദേശി ഗോപകുമാറാണ് (60) മരിച്ച രണ്ടാമത്തേയാൾ. ജോലി കഴിഞ്ഞ് സന്നിധാനത്തേക്ക് മടങ്ങവേ മരക്കൂട്ടത്തിന് സമീപം കുഴഞ്ഞുവീഴുകയായിരുന്നു. ഉടന്‍ പമ്പാ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.

ആക്രമണക്കേസിൽ അറസ്റ്റ്

പത്തനംതിട്ട : യുവാവിനെയും സുഹൃത്തിനെയും മാരകായുധങ്ങളുമായി ആക്രമിച്ച കേസിൽ സഹോദരന്മാർ ഉൾപ്പെടെ മൂന്നു പേരെ ചിറ്റാർ പോലീസ് അറസ്റ്റ് ചെയ്തു. ചിറ്റാർ നീലിപിലാവ് കിഴക്കേക്കര സുനിൽ ( 51),നീലിപിലാവ് രോഹിണിപ്പടി നടശേരിൽ രജീഷ് ( 39), സഹോദരൻ രമേശ്‌ ( 40) എന്നിവരാണ് അറസ്റ്റിലായത്. 14 ന് രാത്രി 9.30 ന് പന്നിയാർ വച്ചാണ് ആക്രമണമുണ്ടായത്. ചിറ്റാർ ഡിപ്പോപ്പടി കണ്ടംകുളത്ത് വീട്ടിൽ ഷാനവാസ്‌ (34), ചിറ്റാർ പന്നിയാർ വാഴവിളയിൽ പ്രവീൺ (30) എന്നിവരെ മർദിച്ചതുമായി ബന്ധപ്പെട്ടാണ് അറസ്റ്റ്. പ്രവീണിന്‍റെ മാതാവിനും ദേഹോപദ്രവം ഏറ്റു. ഷാനവാസിന്‍റെ മൊഴിയനുസരിച്ചാണ് ചിറ്റാർ പോലീസ് കേസ് രജിസ്റ്റർ ചെയ്തത്.

കിച്ചണ്‍ ഷെഡ് പദ്ധതി ശിലാസ്ഥാപനം

കുമ്പനാട്: 2024 - 25 സാമ്പത്തിക വര്‍ഷത്തില്‍ ദേശീയ ഗ്രാമീണ തൊഴിലുറപ്പു പദ്ധതിയില്‍ ഉള്‍പ്പെടുത്തി കുമ്പനാട് ഗവ. യുപി സ്‌കൂളിന് 8,43,000 രൂപ ചെലവഴിച്ചു നിർമിക്കുന്ന കിച്ചണ്‍ ഷെഡിന്‍റെ ശിലാസ്ഥാപനം നടന്നു. കോയിപ്രം ഗ്രാമപഞ്ചായത്ത് പ്രസിഡന്‍റ് പി. സുജാത ശിലാസ്ഥാപനം നിർവഹിച്ചു. ആരോഗ്യവിദ്യാഭ്യാസ സ്റ്റാൻഡിംഗ് കമ്മിറ്റി ചെയര്‍പേഴ്‌സണ്‍ പി. എം. റോസ അധ്യക്ഷത വഹിച്ചു. ഗ്രാമപഞ്ചായത്തംഗങ്ങളായ പി. ഉണ്ണികൃഷ്ണൻ, ബിജു വര്‍ക്കി, ബ്ലോക്ക് പഞ്ചായത്തംഗം ജിജി ജോണ്‍ മാത്യു, മുന്‍ പഞ്ചായത്തംഗം ഗോപിക്കുട്ടന്‍ മോളിക്കൽ, പ്രഥമാധ്യാപിക ആര്‍. ജയദേവി, ഓവര്‍സിയര്‍ സംഗീത സുനിൽ, തോമസ് ജേക്കബ്, രാജീവ് എന്നിവര്‍ പ്രസംഗിച്ചു.

പ്ലാസ്റ്റിക് വേസ്റ്റ് മാനേജ്മെന്‍റ് ഫെസിലിറ്റി ഓഡിറ്റിംഗ്: ഒന്നാം സ്ഥാനം കോന്നി എസ്എഎസ് കോളജിന്

പത്തനംതിട്ട: മാലിന്യ മുക്തം നവകേരളം ജനകീയ കാമ്പെയിന്‍റെ ഭാഗമായി മികച്ച രീതിയിൽ പ്ലാസ്റ്റിക് വേസ്റ്റ് മാനേജ്മെന്‍റ് ഫെസിലിറ്റി ഓഡിറ്റിംഗ് പ്രവർത്തനം പൂർത്തിയാക്കിയ കോന്നി സഹോദരൻ അയ്യപ്പൻ സ്മാരക എസ്എൻഡിപി യോഗം കോളജിന് സംസ്ഥാനത്ത് ഒന്നാം സ്ഥാനം. കോളജുകളിലും സ്കൂളുകളിലും സജീവമായി പ്രവർത്തിക്കുന്ന ഭൂമിത്ര സേന ക്ലബുകളിലൂടെയാണ് സംസ്ഥാന പരിസ്ഥിതി കാലാവസ്ഥാ വ്യതിയാന ഡയറക്ടറേറ്റ് ശുചിത്വ മിഷനുമായി ചേർന്ന് പ്ലാസ്റ്റിക് വേസ്റ്റ് മാനേജ്മെന്‍റ് സംവിധാനങ്ങളുടെ ഓഡിറ്റിംഗ് നടത്തിയത്. പരിസ്ഥിതി കാലാവസ്ഥ വ്യതിയാന ഡയറക്ടറേറ്റിനു കീഴിലാണ് വിദ്യാഭ്യാസ സ്ഥാപനങ്ങളിലെ ഭൂമിത്രസേന ക്ലബുകൾ പ്രവർത്തിക്കുന്നത്. കഴിഞ്ഞ ജനുവരിയിലായിരുന്നു സംസ്ഥാന വ്യാപകമായി ഓഡിറ്റിംഗ് പ്രവർത്തനം നടന്നത്. ഇതിലൂടെ വീടുകളിൽ നിന്ന് ഹരിത കർമസേന അംഗങ്ങൾ ശേഖരിക്കുന്ന പ്ലാസ്റ്റിക് മാലിന്യം തരംതിരിക്കുന്നതിനെക്കുറിച്ചും തരംതിരിച്ച പ്ലാസ്റ്റിക് ക്ലീൻ കേരള കമ്പനിക്ക് കൈമാറുന്നതിനു മുമ്പ് നടത്തുന്ന പ്രക്രിയകളെക്കുറിച്ചും വിദ്യാർഥികൾക്ക് അടുത്തറിയാൻ സാധിച്ചു. പ്രധാനമായി ജില്ലയിലെ എംസിഎഫുകളിലായിരുന്നു ഭൂമിത്രസേന അംഗങ്ങളുടെ ഓഡിറ്റിംഗ് നടന്നത്. കോന്നി മേഖലയിലെ എംസിഎഫുകൾ കേന്ദ്രീകരിച്ചായിരുന്നു പ്രധാനമായും സഹോദരൻ അയ്യപ്പൻ സ്മാരക എസ്എൻഡിപി യോഗം കോളജ് ഭൂമിത്രസേന യൂണിറ്റ് പ്രവർത്തിച്ചിരുന്നത്. എറണാകുളം സെന്‍റ് തെരേസാസ് കോളജിനെയും കൊല്ലം ടികെഎം ആർട്സ് ആൻഡ് സയൻസ് കോളജിനെയും യഥാക്രമം രണ്ടും മൂന്നും സ്ഥാനത്തേക്ക് പിന്തള്ളിയാണ് കോന്നി സഹോദരൻ അയ്യപ്പൻ സ്മാരക എസ്എൻഡിപി യോഗം കോളജ് മിന്നും ജ‍യം നേടിയത്. സംസ്ഥാനത്തെ മികച്ച ഭൂമിത്രസേന കോ ഓർഡിനേറ്റർക്കുള്ള പുരസ്കാരം കോന്നി സഹോദരൻ അയ്യപ്പൻ സ്മാരക എസ്എൻഡിപി യോഗം കോളേജിലെ ഭൂമിത്രസേന കോ ഓർഡിനേറ്റർ വി.എസ്. ജിജിത്ത് നേടി. ഫീൽഡ് മോണിറ്ററായി കോന്നി ബ്ലോക്ക് പഞ്ചായത്ത് റിസോഴ്സ് പേഴ്സൺ അശ്വതി വിജയനും പത്തനംതിട്ട ജില്ലയിലെ പ്ലാസ്റ്റിക് വേസ്റ്റ് മാനേജ്മെന്‍റ് ഫെസിലിറ്റി ഓഡിറ്റിംഗിന്‍റെ ജില്ലാ ശുചിത്വ മിഷൻ അസിസ്റ്റന്‍റ് കോഓർഡിനേറ്റർ എസ്. അനൂപും പ്രവർത്തിച്ചു.

പുഷ്പഗിരി റിസർച്ച് സെന്‍റർ ദ്വിദിന ശാസ്ത്രസമ്മേളനം

തിരുവല്ല: ബയോറേഡിയൻസ് പുഷ്പഗിരി റിസർച്ച് സെന്‍റർ (പിആർസി) നടത്തിവരുന്ന വാർഷിക ശാസ്ത്ര കോൺഫറൻസ് ഇന്നും നാളെയും നടത്തും. 2010ൽ നിലവിൽ വന്ന പിആർസിയുടെ 13 ാമത് കോൺഫറൻസാണിത്. പിആർസിയും കേരള അക്കാഡമി ഓഫ് സയൻസും ചേർന്നാണ് കോൺഫറൻസ് നടത്തുന്നത്. ശാസ്ത്രജ്ഞർ, ഡോക്ടർമാർ, ഗവേഷണവിദ്യാർഥികൾ തുടങ്ങിയവർ പങ്കെടുക്കും. നൂറോളം ഗവേഷണ പ്രബന്ധങ്ങൾ ഇതിൽ അവതരിപ്പിക്കപ്പെടും. കോൺഫറൻസിന്‍റെ ഉദ്ഘാടനം ഇന്നു രാവിലെ 9.15 ന് ശ്രീചിത്ര ഇൻസ്റ്റിറ്റ്യൂട്ട് ഡയറക്ടർ ഡോ. സഞ്ജയ് ബിഹാരി നിർവഹിക്കും. തുടർന്ന് രണ്ടുദിവസമായി വിവിധവിഷയങ്ങളിൽ ഇന്ത്യയിലെയും വിദേശത്തെയും പ്രമുഖ ശാസ്ത്രജ്ഞരും മെഡിക്കൽ ഡോക്ടർമാരും പ്രഭാഷണങ്ങൾ നടത്തും. ഡ്രഗ് ഡിസ്കവറി, കാൻസർ തെറാപ്യൂട്ടിക്സ്, ടിഷ്യു എൻജിനിയറിംഗ്, ഫൈറ്റോകെമിസ്ട്രി, ഡെന്‍റിസ്ട്രി, മെഡിസിൻ, സാംക്രമിക രോഗങ്ങൾ, ഫാമിലി റെസിലിയൻസ് എന്നിവയിലും പ്രഭാഷണങ്ങൾ ഉണ്ടാകും. നാളെ 3.30ന് നടക്കുന്ന സമാപന സമ്മേളനത്തോടെ അവസാനിക്കും. സമാപനസമ്മേളനം കെഎസ് സിഎസ്ടിഇ മെംബർ സെക്രട്ടറി ഡോ. എ. സാബു ഉദഘാടനം ചെയ്യും. ഡോ.ആർ.എസ്. സൗമ്യ, ഡോ. ശ്രീജിത്ത് പണിക്കർ എന്നിവർ ഓർഗനൈസിംഗ് സെക്രട്ടറിമാരാണ്. തിരുവല്ല ആർച്ച് ബിഷപ് ഡോ. തോമസ് മാർ കൂറിലോസ് മുഖ്യരക്ഷാധികാരിയും പുഷ്പഗിരി സിഇഒ ഫാ. ഡോ. ബിജു വർഗീസ്, ഡോ. ജി. എം. നായർ, പിആർസി ഡയറക്ടർ ഫാ. ഡോ. മാത്യു മഴുവഞ്ചേരിൽ എന്നിവർ ഭാരവാഹികളുമായ സംഘാടക സമിതി പ്രവർത്തിക്കുന്നു.

വനിതാ കോൺഗ്രസ് -എം നേതാവിനെ പോലീസ് അപമാനിച്ചതായി പരാതി

തിരുവല്ല: കേരള വനിതാ കോൺഗ്രസ് - എം നേതാവിനെ പോലീസ് അവഹേളിച്ചതായി പരാതി. വനിതാ കോൺഗ്രസ് - എം തിരുവല്ല നിയോജകമണ്ഡലം പ്രസിഡന്‍റ് സൂസമ്മ ബേബിയാണ് തന്നെ കീഴ്‌വായ്പൂര് പോലീസ് സ്റ്റേഷനിലെ സിവിൽ പോലീസ് ഓഫീസർ അപമാനിച്ചതായി തിരുവല്ല ഡിവൈഎസ്പിക്കുപരാതി നൽകിയത്. ഒരു അടിപിടി കേസ് ഒത്തുതീർക്കുന്നതുമായി ബന്ധപ്പെട്ട് സർക്കിൾ ഇൻസ്പെക്ടറുടെ നിർദേശാനുസരണം കീഴ്‌വായ്പൂര് സ്റ്റേഷനിൽ എത്തിയ തന്നെ സ്റ്റേഷനിലെ സിപിഒ ഒലിവർ അസഭ്യം പറയുകയും സ്ത്രീത്വത്തെ അപമാനിക്കുന്ന തരത്തിൽ സംസാരിക്കുകയും ചെയ്തതായി സൂസമ്മ ബേബി തന്‍റെ പരാതിയിൽ പറയുന്നു.

സംസ്കാര സാഹിതി 5000 കത്തുകൾ അയയ്ക്കും

തിരുവല്ല: നിലമ്പൂര്‍ ഉപതെരഞ്ഞെടുപ്പില്‍ മല്‍സരിക്കുന്ന യുഡിഎഫ് സ്ഥാനാര്‍ഥി ആര്യാടന്‍ഷൗക്കത്തിന്‍റെ വിജയത്തിനായി 5000 കത്തുകള്‍ നിലമ്പൂരിലെ വീടുകളിലേക്ക് അയച്ച് സംസ്‌കാര സാഹിതി തിരുവല്ല നിയോജകമണ്ഡലം കമ്മിറ്റി. തിരുവല്ലയില്‍ ചേര്‍ന്ന സമ്മേളനം ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് ഈപ്പന്‍ കുര്യന്‍ ഉദ്ഘാടനം ചെയ്തു. നിയോജകമണ്ഡലം ചെയര്‍മാന്‍ തോമസ് കോശിയുടെ അധ്യക്ഷതയില്‍ ചേര്‍ന്ന യോഗത്തില്‍ സംസ്ഥാന ജനറല്‍ സെക്രട്ടറിമാരായ രാജേഷ് ചാത്തങ്കേരി, ഷിജു സ്‌കറിയ, രാജേഷ് മലയിൽ, ജോണ്‍സി ചാലക്കുഴി എന്നിവര്‍ പ്രസംഗിച്ചു.

റേഷന്‍കടകളില്‍ ഇ ത്രാസ്, ഇപോസ് മെഷീന്‍ ബന്ധിപ്പിക്കാന്‍ നീക്കം

പത്തനംതിട്ട: സംസ്ഥാനത്തെ പതിനാലായിരത്തോളം റേഷന്‍ കടകളില്‍ ഇലക്ട്രോണിക് ത്രാസ് സ്ഥാപിച്ച് ഭക്ഷ്യവകുപ്പ്. നിലവിലെ ഇ പോസ് യന്ത്രങ്ങളുമായി ബന്ധിപ്പിക്കാനായാണ് ത്രാസുകള്‍ സ്ഥാപിച്ചത്. ഇതിന്‍റെ ടെന്‍ഡര്‍ നടപടികളും ആരംഭിച്ചു. ഇതിനിടെ വ്യാപാരികളുമായി ആലോചിക്കാതെയാണ് പരിഷ്‌കാരം കൊണ്ടുവന്നതെന്ന് ഓള്‍ കേരള റീട്ടെയില്‍ റേഷന്‍ ഡീലേഴ്‌സ് അസോസിയേഷന്‍ സംസ്ഥാന വൈസ് പ്രസിഡന്‍റ് ജോണ്‍സണ്‍ വിളവിനാല്‍ പറഞ്ഞു. വേണ്ടത്ര പഠനം നടത്താതെ ഇതേപോലെയുള്ള കാര്യങ്ങള്‍ നടപ്പിലാക്കാന്‍ ശ്രമിച്ചാല്‍ റേഷന്‍ വിതരണം സ്തംഭിക്കാന്‍ വരെ സാധ്യതയുണ്ടെന്ന് അദ്ദേഹം കുറ്റപ്പെടുത്തി. അഞ്ചുലക്ഷം റേഷന്‍ കടകള്‍ ഇന്ത്യയിലുള്ളിടത്ത് ഒരു സംസ്ഥാനം പോലും ഈ പദ്ധതി നടപ്പിലാക്കിയിട്ടില്ല. ഒരു മാസത്തില്‍ ഒന്നരലക്ഷം ടണ്‍ അരിയില്‍ കൂടുതല്‍ വിതരണം ചെയ്യുന്നത് പൂര്‍ണമായും മനുഷ്യ അധ്വാനത്തിലാണ്. ഭക്ഷ്യ സുരക്ഷാ നിയമം നടപ്പിലാക്കിയ അന്നു മുതല്‍ സംസ്ഥാനത്തെ വ്യാപാരികള്‍ തൂക്കം സംബന്ധിച്ച് നിരവധി തവണ ഗവണ്‍മെന്‍റിനോടു പരാതി പറഞ്ഞിട്ടും യാതൊരു നടപടിയും എടുക്കാത്ത സര്‍ക്കാര്‍ ഇ ത്രാസുകള്‍ സ്ഥാപിച്ച് ഇ പോസുമായി ബന്ധിപ്പിക്കാന്‍ ഉള്ള നീക്കവുമായി രംഗത്തുവന്നിരിക്കുന്നത്. ഭക്ഷ്യവകുപ്പിന്‍റെ ഈ നീക്കം അംഗീകരിക്കില്ലെന്നു മാത്രമല്ല വേണ്ടിവന്നാല്‍ കടകള്‍ ഉപേക്ഷിക്കാന്‍ പോലും വ്യാപാരികള്‍ തയാറാകുമെന്നും ജോണ്‍സണ്‍ വിളവിനാല്‍ പറഞ്ഞു. ത്രാസുകള്‍ ബന്ധിപ്പിക്കണമെന്ന് സര്‍ക്കാരിന് നിര്‍ബന്ധം ഉണ്ടെങ്കില്‍ ആദ്യം സപ്ലൈകോയില്‍ നിന്ന് കടകളിലേക്ക് തരുന്ന സാധനങ്ങള്‍ റേഷന്‍ കടയിലേക്കുള്ള ത്രാസുമായി ബന്ധിപ്പിക്കുന്ന നടപടിയാണ് ആദ്യം നടപ്പിലാക്കേണ്ടത്. അങ്ങനെ നടപ്പിലാക്കിയാല്‍ മാത്രമേ ഇത് സംബന്ധിച്ച് ഒരു കൂടിയാലോചനയ്ക്ക് പോലും അസോസിയേഷന്‍ തയാറാകുകയുള്ളൂവെന്നും അദ്ദേഹം പറഞ്ഞു.

ബൈക്ക് തോട്ടില്‍ വീണ് കാണാതായ ആളിന്‍റെ മൃതദേഹം കണ്ടെത്തി

കോന്നി: ബൈക്ക് തോട്ടില്‍ വീണ് കാണാതായ മെഡിക്കല്‍ സ്‌റ്റോര്‍ ഉടമയുടെ മൃതദേഹം കണ്ടെത്തി. കോന്നി പരമേശ്വര മെഡിക്കല്‍സ് എന്ന സ്ഥാപനം നടത്തി വന്നിരുന്ന അതിരുങ്കല്‍ അര്‍ച്ചനയില്‍ (മൂക്കന്നൂർ) പ്രവീണിന്‍റെ (47 ) മൃതദേഹമാണ് ഇന്നലെ രാവിലെ അരുവാപ്പുലം കൃഷിഭവനു സമീപം വലിയ തോട്ടില്‍ നിന്നു ഞായറാഴ്ച കണ്ടെടുത്തത്. 13ന് വെള്ളിയാഴ്ച രാത്രി 11 ഓടെയാണ് പ്രവീണിനെ കാണാതായത്. കോന്നിയില്‍ നിന്ന് വീട്ടിലേക്ക് മടങ്ങുന്ന വഴിയില്‍ വകയാറിനും മുറിഞ്ഞകല്ലിനും ഇടയില്‍ മുറിഞ്ഞകല്‍ പുളിഞ്ചാണി തോട്ടിലേക്ക് വീഴുകയായിരുന്നു. ഫോണില്‍ വിളിച്ചിട്ട് പ്രവീണിനെ ബന്ധപ്പെടാന്‍ കഴിഞ്ഞില്ല. തുടര്‍ന്ന് വീട്ടുകാര്‍ സമീപത്തെ വീടിന്‍റെ സിസിറ്റിവി ദൃശ്യങ്ങള്‍ പരിശോധിച്ചപ്പോള്‍ പ്രവീണ്‍ തോട്ടിലേക്ക് വീഴുന്ന ദൃശ്യങ്ങളും ലഭിച്ചു. ശനിയാഴ്ച കോന്നിയില്‍ നിന്ന് അഗ്‌നിരക്ഷാ സേനയും നാട്ടുകാരും എത്തി തോട്ടില്‍ തെരച്ചില്‍ നടത്തിയെങ്കിലും പ്രവീണിനെ കണ്ടെത്താന്‍ കഴിഞ്ഞിരുന്നില്ല. ഇന്നലെ രാവിലെ വീണ്ടും തെരച്ചില്‍ നടത്തിയപ്പോഴാണ് മൃതദേഹം കണ്ടെത്തിയത്. സംസ്‌കാരം ഇന്ന് രണ്ടിന് വീട്ടുവളപ്പിൽ. ഭാര്യ: അനു കോന്നി ബ്ലോക്ക് ഓഫീസ് ഉദ്യോഗസ്ഥയാണ്. മക്കൾ: അദ്വൈത്, ഗൗരി (ഇരുവരും കുമ്പഴ മൗണ്ട് ബഥനി ഇംഗ്ലീഷ് സ്‌കൂള്‍ വിദ്യാര്‍ഥികള്‍)

വൃക്ഷ മുത്തശിയെ ആദരിച്ചു

റാന്നി: റാന്നി എംഎസ് ഹയര്‍സെക്കന്‍ഡറി സ്‌കൂളിന്‍റെ നേതൃത്വത്തില്‍ പരിസ്ഥിതി സംരക്ഷണ സന്ദേശത്തിന്‍റെ ഭാഗമായി റാന്നി പെരുമ്പുഴ സ്റ്റാന്‍ഡിനടുത്തുള്ള വൃക്ഷമുത്തശിയായ ആല്‍മരത്തെ ആദരിച്ചു. വൃക്ഷമുത്തശിത്തണലില്‍ നടന്ന ചടങ്ങ് റാന്നി ഗ്രാമപഞ്ചായത്ത് പ്രസിഡന്‍റ് കെ. ആര്‍. പ്രകാശ് ഉദ്ഘാടനം ചെയ്തു. സ്‌കൂള്‍ പ്രിന്‍സിപ്പല്‍ സ്മിജു ജേക്കബ് അധ്യക്ഷത വഹിച്ചു.സ്‌കൂള്‍ ഹെഡ്മാസ്റ്റര്‍ ബിനോയി കെ. ഏബ്രഹാം പരിസ്ഥിതി സംരക്ഷണ പ്രതിജ്ഞക്ക് നേതൃത്വം നല്‍കി. ഗ്രാമപഞ്ചായത്ത് അംഗം സന്ധ്യാദേവി, സ്‌കൂള്‍ പിടിഎ പ്രസിഡന്‍റ് രജനി പ്രദീപ്, സ‌കൂള്‍ പ്രൊട്ടക്ഷന്‍ ഗ്രൂപ്പ് അംഗം രവി കുന്നക്കാട്ട്, ജിനു സി. ഏബ്രഹാം, സൂസന്‍ തോമസ്, വോളണ്ടിയര്‍മാരായ എച്ച്. പാര്‍വൺ, വി. പൂര്‍ണിമ എന്നിവര്‍ പ്രസംഗിച്ചു. പരിപാടിയോടനുബന്ധിച്ച് റാന്നി ഗ്രാമപഞ്ചായത്തുമായി ചേര്‍ന്ന് 1001 ഫലവൃക്ഷത്തൈകള്‍ വിതരണം ചെയ്തു.

ശ്രേഷ്ഠ കാതോലിക്കാ ബാവയ്ക്ക് സ്വീകരണം നല്‍കി

പത്തനംതിട്ട: യാക്കോബായ സുറിയാനി സഭയുടെ ശ്രേഷ്ഠ കാതോലിക്കാ ജോസഫ് ബാവയ്ക്ക് തുമ്പമണ്‍ ഭദ്രാസനത്തിന്‍റെ ആഭിമുഖ്യത്തില്‍ വള്ളിക്കോട് കോട്ടയം സെന്‍റ് മേരീസ് കത്തീഡ്രലില്‍ സ്വീകരണം നല്‍കി. മഞ്ഞനിക്കരയില്‍ പരിശുദ്ധ ഏലിയാസ് തൃതിയന്‍ പാത്രിയര്‍ക്കീസ് ബാവായുടെ കബറിങ്കലെ ധൂപ പ്രാര്‍ഥനയ്ക്കു ശേഷം ശ്രേഷ്ഠ കാതോലിക്കാ ബാവയെ സ്വീകരിച്ച് ആനയിച്ചു. അനുമോദന യോഗത്തില്‍ ഭദ്രാസനാധിപന്‍ യൂഹാനോന്‍ മാര്‍ മിലിത്തിയോസ അധ്യക്ഷത വഹിച്ചു. സമ്മേളനം ആന്‍റോ ആന്‍റണി എംപി ഉദ്ഘാടനം ചെയ്തു. ഡോ. ജോസഫ് മാര്‍ ബര്‍ണബാസ് സഫ്രഗന്‍ മെത്രാപ്പോലീത്ത, ബിഷപ് യൂഹാനോന്‍ മാര്‍ ക്രിസോസ്റ്റം, മാത്യൂസ് മാര്‍ തേവോദോസിയോസ്, ഡോ. ഗീവര്‍ഗീസ് മാര്‍ കൂറിലോസ്, കെ.യു. ജനീഷ് കുമാര്‍ എംഎല്‍എ, ജില്ലാ പഞ്ചായത്തംഗം റോബിന്‍ പീറ്റർ, ഫാ. റോയ് ജോര്‍ജ് കട്ടച്ചിറ, ഫാ. സാംസണ്‍ വര്‍ഗീസ്, ജനറല്‍ കണ്‍വീനര്‍ ഫാ. ഗീവര്‍ഗീസ് സഖറിയ തുടങ്ങിയവര്‍ പ്രസംഗിച്ചു.

ബിലീവേഴ്‌സ് ആശുപത്രിയില്‍ രക്തദാന ക്യാമ്പും ബോധവത്കരണ പരിപാടികളും നടന്നു

തിരുവല്ല: ബിലീവേഴ്‌സ് ചര്‍ച്ച് മെഡിക്കല്‍ കോളജ് ട്രാന്‍സ്ഫ്യൂഷന്‍ മെഡിസിന്‍ ആന്‍ഡ് ഇമ്യൂണോ ഹെമറ്റോളജി വിഭാഗത്തിന്റെ ആഭിമുഖ്യത്തില്‍ ലോക രക്തദാതാക്കളുടെ ദിനം ആചരിച്ചു. രക്തദാന ക്യാമ്പിന്‍റെയും ബോധവത്കരണ പരിപാടികളുടെയും ഉദ്ഘാടനം ബിലീവേഴ്‌സ് ആശുപത്രി മെഡിക്കല്‍ സൂപ്രണ്ട് ഡോ ജോംസി ജോര്‍ജ് നിര്‍വഹിച്ചു. കോളജ് വൈസ് പ്രിന്‍സിപ്പല്‍ ഡോ. ഏബല്‍ കെ. സാമുവൽ, ബ്ലഡ് സെന്‍റര്‍ മെഡിക്കല്‍ ഓഫീസര്‍ ഡോ. അനുപാ ജേക്കബ്, അസിസ്റ്റന്‍റ് ഡയറക്ടര്‍ ഡോ. റിജു മാത്യു, കമ്യൂണിറ്റി മെഡിസിന്‍ വിഭാഗം ഫാക്കല‍റ്റി ഡോ. പ്രമോദ് തോമസ്, ഫാ. തോമസ് വര്‍ഗീസ് എന്നിവര്‍ പ്രസംഗിച്ചു.

പഞ്ചായത്ത് പ്രവര്‍ത്തനങ്ങള്‍ പഠിക്കാന്‍ എംഎസ് എച്ച്എസ്എസ് സ്‌കൗട്ട് ആന്‍ഡ് ഗൈഡ്‌സ് കുട്ടികള്‍

റാന്നി: ഗ്രാമപഞ്ചായത്തിന്‍റെ പ്രവര്‍ത്തനങ്ങളേയും സേവനങ്ങളെയും മനസിലാക്കി പൊതുജന സേവനമേഖലകളെ തിരിച്ചറിയുവാനും ജനാധിപത്യത്തിന്‍റെയും സാമൂഹ്യബോധത്തിന്‍റെയും പ്രാധാന്യം മനസിലാക്കുവാനും റാന്നി എംഎസ് ഹയര്‍സെക്കന്‍ഡറി സ്‌കൂള്‍ സ്‌കൗട്ട് ആന്‍ഡ് ഗൈഡ്‌സ് യൂണിറ്റിന്‍റെ നേതൃത്വത്തില്‍ വിദ്യാര്‍ഥികള്‍ റാന്നി ഗ്രാമപഞ്ചായത്ത് സന്ദര്‍ശനം നടത്തി. ഗ്രാമപഞ്ചായത്ത് പ്രസിഡന്‍റ് കെ. ആര്‍. പ്രകാശുമായി കുട്ടികള്‍ സംവദിച്ചു. പഞ്ചായത്ത് രാജ് സംവിധാനത്തിന്‍റെ പ്രാധാന്യമാണ് കുട്ടികള്‍ പ്രധാനമായും ആരാഞ്ഞത്. സെക്രട്ടറി അടക്കമുള്ള ജീവനക്കാരില്‍ നിന്നും പഞ്ചായത്ത് നല്‍കുന്ന സേവനങ്ങളെ കുറിച്ചും പ്രവര്‍ത്തനങ്ങളെക്കുറിച്ചും മനസിലാക്കി. സ്‌കൂള്‍ പ്രിന്‍സിപ്പല്‍ സ്മിജു ജേക്കബ്, ഗ്രാമപഞ്ചായത്ത് അംഗം സന്ധ്യാദേവി, സ്‌കൗട്ട് ആന്‍ഡ് ഗൈഡ്‌സ് അധ്യാപകരായ ടോണി ജേക്കബ്, ആർ. ശ്രീകല, ജെബു ജോസഫ്, പ്രീത എസ്. ജോസ് എന്നിവര്‍ നേതൃത്വം നല്‍കി. യൂണിറ്റ് നേതൃത്വത്തില്‍ പ്ലാസ്റ്റിക് വിമുക്ത കാമ്പസ് എന്ന ലക്ഷ്യത്തോടുകൂടി ഉപയോഗ രഹിതമായ പേനകള്‍ വലിച്ചെറിയുന്ന സംസ്‌കാരം ഉപേക്ഷിക്കുവാന്‍ പെന്‍ ബോക്‌സുകള്‍ ക്ലാസുകളില്‍ സ്ഥാപിച്ചു. പെന്‍ കളക്ഷന്‍ ബോക്‌സുകളുടെ വിതരണോദ്ഘാടനം സ്‌കൂള്‍ പ്രിന്‍സിപ്പല്‍ സ്മിജു ജേക്കബ് നിര്‍വഹിച്ചു.

പുതുതലമുറയെ ശാക്തീകരിക്കേണ്ടത് സഭയുടെ ദൗത്യം: തിരുവല്ല അതിരൂപത പാസ്റ്ററല്‍ കൗണ്‍സില്‍

തിരുവല്ല: പുതുതലമുറയെ ശാക്തീകരിക്കേണ്ടത് സഭയുടെ ദൗത്യമെന്ന് മലങ്കര കത്തോലിക്കാ സഭ തിരുവല്ല അതിരൂപത പാസ്റ്ററല്‍ കൗണ്‍സിൽ. ആധുനിക ലോകത്തെ വെല്ലുവിളികളെ നേരിടാനും ശാക്തീകരിക്കാനും സഭാ സംവിധാനങ്ങള്‍ സജ്ജമാകേണ്ടതുണ്ടെന്ന് പാസ്റ്ററല്‍ കൗണ്‍സില്‍ യോഗം ഉദ്ഘാടനം ചെയ്ത് അതിരൂപതാധ്യക്ഷന്‍ ആര്‍ച്ച് ബിഷപ് ഡോ.തോമസ് മാര്‍ കൂറിലോസ് പറഞ്ഞു. പുതുതലമുറയെ ഏതൊക്കെ മാര്‍ഗങ്ങളില്‍ ശാക്തീകരിക്കാം എന്ന വിഷയത്തെ അധികരിച്ച് ഡോ. സാം സ്‌കറിയ ക്ലാസ് നയിച്ചു. അതിരൂപതയുടെ അജപാലന സംവിധാനങ്ങള്‍ ഈ പ്രക്രിയയില്‍ എങ്ങനെ പങ്കാളികളാകണം എന്ന വിഷയം നാല് ഗ്രൂപ്പുകളില്‍ ചര്‍ച്ച ചെയ്തു. ചര്‍ച്ചകള്‍ക്ക് മുഖ്യ വികാരി ജനറാള്‍ റവ.ഡോ. ഐസക് പറപ്പള്ളില്‍ മോഡറേറ്ററായിരുന്നു. കാലം ചെയ്ത ഫ്രാന്‍സിസ് മാര്‍പാപ്പയെ അനുസ്മരിച്ച് പ്രത്യേകം പ്രാര്‍ഥന നടത്തി. വികാരി ജനറാള്‍ ഫാ. വര്‍ഗീസ് മരുതൂർ, സെക്രട്ടറി ഡോ. വര്‍ഗീസ് കെ. ചെറിയാൻ, ചാന്‍സിലര്‍ ഫാ. ജോസ് മണ്ണൂര്‍ കിഴക്കെതില്‍ എന്നിവര്‍ പ്രസംഗിച്ചു.അതിരൂപതയിലെ ഒമ്പത് വൈദിക മേഖലയിലെ മേഖല വികാരിമാരും സന്യസ്തരും വിവിധ ഭക്ത സംഘടനകളുടെ ഡയറക്ടേഴ്‌സും പ്രതിനിധികളും പാസ്റ്ററല്‍ കൗണ്‍സില്‍ അംഗങ്ങളും ശാന്തിനിലയത്തില്‍ നടന്ന സമ്മേളനത്തില്‍ പങ്കെടുത്തു. തിരുവല്ല അതിരൂപത 18-ാമത് പാസ്റ്ററല്‍ കൗണ്‍സിലിന്‍റെ അഞ്ചാമത് സമ്മേളനമാണ് നടന്നത്.

കൊക്കാത്തോട് കാട്ടാത്തിപ്പാറ: പ്രകൃതിയുടെ ത്രിവേണി സംഗമം

‌കോന്നി: വനമേഖലയുടെ ഹൃദയഭാഗത്ത്, മനുഷ്യന്‍റെ കാല്‍പ്പാടുകള്‍ അധികം പതിയാത്ത കൊക്കാത്തോട് ഗ്രാമത്തില്‍, പ്രകൃതിയുടെ വിസ്മയ കാഴ്ചകളുമായി കാട്ടാത്തിപ്പാറ. കാനന ഭംഗിയുടെ സൗന്ദര്യം ഇരട്ടിപ്പിക്കുന്ന കാട്ടിത്താപ്പാറ സഞ്ചാരികളുടെ മനംകവരും. ട്രിപ്പിള്‍ എക്കോ ശബ്ദം. കേള്‍ക്കുന്ന മലമുകളിലെ കാഴ്ചകള്‍ വേറിട്ടതാണ്. പ്രകൃതിയുടെ സമ്പത്തും ആദിവാസി സമൂഹത്തിന്‍റെ ജീവിതവും ജൈവവൈവിധ്യവും സംഗമിക്കുന്ന ഇടമാണ് കാട്ടാത്തിപ്പാറ.പച്ചപുതച്ച കുന്നുകളും തെളിഞ്ഞൊഴുകുന്ന അരുവികളും കിളികളുടെ കളകളാരവവും ചേരുമ്പോള്‍ ഒരു മാന്ത്രിക ലോകം തന്നെ കാട്ടാത്തിപ്പാറയില്‍ സൃഷ്ടിക്കപ്പെടുന്നു. പാറയുടെ മുകള്‍ത്തട്ടില്‍ നിന്ന് താഴേക്ക് കൂടുവച്ച് താമസിക്കുന്ന കാട്ടുതേനീച്ചകള്‍ മറ്റൊരു ആകര്‍ഷണമാണ്. താഴേക്ക് നോക്കുമ്പോള്‍ കറുത്ത പുള്ളികള്‍ പോലെ കാണുന്ന തേനീച്ചക്കൂടുകൾ, പ്രകൃതിയുടെ സ്വാഭാവികമായ വാസ്തുവിദ്യയുടെ ഉത്തമ ഉദാഹരണമാണ്. കൊക്കാത്തോട് മേഖലയിലെ കാടിന്‍റെ മക്കളായ ആദിവാസികളുടെ ജീവിതം കാട്ടാത്തിപ്പാറയുമായി അഭേദ്യമായി ബന്ധപ്പെട്ടിരിക്കുകയാണ്. തലമുറകളായി കാടിനെ ആശ്രയിച്ചു ജീവിക്കുന്ന ഇവർ, പ്രകൃതിയെ ആരാധിക്കുകയും സംരക്ഷിക്കുകയും ചെയ്യുന്നവരാണ്. തേന്‍ ശേഖരണവും വനവിഭവങ്ങള്‍ സംഭരിക്കലും ഇവരുടെ ജീവിതത്തിന്‍റെ ഭാഗമാണ്. ആദിവാസി സമൂഹത്തിന്‍റെ തനതായ ജീവിതരീതികളും സംസ്‌കാരവും പരമ്പരാഗത അറിവുകളും ഈ പ്രദേശത്തിന്‍റെ പ്രത്യേകതയാണ്. ഇവര്‍ കാടിന്‍റെ കാവല്‍ക്കാരാണ്, അവരുടെ അറിവ് പ്രദേശത്തിന്‍റെ സംരക്ഷണത്തിന് അത്യന്താപേക്ഷിതമാണ്. ടൂറിസം പദ്ധതികളോടു വനംവകുപ്പ് പുറംതിരിഞ്ഞു കാട്ടാത്തിപ്പാറ കേന്ദ്രീകരിച്ചുള്ള ടൂറിസം പദ്ധതികളോടു വനംവകുപ്പ് പുറംതിരിഞ്ഞു. പാറയുടെ സംരക്ഷണം ഉറപ്പാക്കിയുള്ള പദ്ധതികള്‍ തയാറാക്കാമെങ്കിലും വനത്തിനുള്ളിലെ പ്രദേശമെന്ന നിലയില്‍ നിര്‍മാണ പ്രവര്‍ത്തനങ്ങളോടു വകുപ്പിനു താത്പര്യമില്ല. കൊക്കാത്തോട് കാട്ടാത്തിപ്പാറയുടെ ജൈവവൈവിധ്യം സംരക്ഷിക്കാനും ആദിവാസി സമൂഹത്തിന്‍റെ ജീവിതനിലവാരം ഉയര്‍ത്താനും, വിനോദസഞ്ചാര സാധ്യതകള്‍ പ്രോത്സാഹിപ്പിക്കാനും വേണ്ട നടപടികള്‍ അധികൃതരുടെ ഭാഗത്തുനിന്നുണ്ടാകണമെന്ന് വര്‍ഷങ്ങളായി ഉള്ള ആവശ്യമാണ്.മുകള്‍ തട്ട് ഏക്കറുകണക്കിനു വിസ്തൃതിയിലുള്ള കാട്ടാത്തിപാറയ്ക്കു പറയാനും കഥകള്‍ ഏറെയാണ്. പ്രണയത്തിന്‍റെയും ചതിയുടെയും കഥകള്‍ ഈ മല നമുക്കു പറഞ്ഞുതരും. പ്രദേശത്തിന്‍റെ അടിസ്ഥാന സൗകയവികസനം അടക്കമുള്ള പദ്ധതികളാണ് ഉണ്ടാകേണ്ടത്. എന്നാല്‍ വന്യമൃഗങ്ങളുടേതടക്കമുള്ള സഞ്ചാരപഥം കൂടിയായതിനാല്‍ വികസന പദ്ധതികളെ വനംവകുപ്പ് പ്രോത്സാഹിപ്പിക്കുന്നില്ല.

പതിനാലുകാരിയുടെ നഗ്നചിത്രങ്ങള്‍ കൈക്കലാക്കിയ യുവാവ് പിടിയിൽ

പത്തനംതിട്ട: സമൂഹമാധ്യമങ്ങളിലൂടെ പരിചയപ്പെട്ടശേഷം നഗ്നചിത്രങ്ങള്‍ കൈക്കലാക്കിയ യുവാവിനെ പോലീസ് അറസ്റ്റ് ചെയ്തു. ഓമല്ലൂര്‍ പുത്തന്‍പീടിക പനച്ചിക്കുഴിയില്‍ വീട്ടില്‍ വിനീഷ് രവീന്ദ്രനാണ് (23) അറസ്റ്റിലായത്. കഴിഞ്ഞ ഫെബ്രുവരി 27 നും മാര്‍ച്ച് 25 നുമിടയിലുള്ള കാലയളവിലാണ് കുട്ടിയുടെ അമ്മയും സഹോദരിയും ഉപയോഗിക്കുന്ന മൊബൈല്‍ നമ്പറുകളില്‍ നിന്നും ഇയാളുടെ ഫോണിലേക്ക് നഗ്നചിത്രങ്ങള്‍ അയച്ചുവാങ്ങിയത്. വാട്സ്ആപ്പ് ഇന്‍സ്റ്റഗ്രാം ട്രൂകോളര്‍ എന്നിവയിലൂടെ പരിചയപ്പെട്ട ശേഷം നിരന്തരം സന്ദേശങ്ങള്‍ അയക്കുകയായിരുന്നു യുവാവ്. ചിത്രങ്ങള്‍ വാങ്ങിയശേഷം കുട്ടിയെ ഭീഷണിപ്പെടുത്തിവന്നു. കഴിഞ്ഞ 11ന് സ്‌കൂള്‍ കൗണ്‍സിലറുടെ റിപ്പോര്‍ട്ടിന്‍റെ അടിസ്ഥാനത്തിലായിരുന്നു പോലീസ് നടപടി. വിനീഷിന്‍റെ മൊബൈല്‍ ഫോണ്‍ കസ്റ്റഡിയിലെടുത്തു. തുടര്‍ന്ന് കോടതിയില്‍ ഹാജരാക്കി റിമാന്‍ഡ് ചെയ്തു. ചിറ്റാര്‍ പോലീസ് ഇന്‍സ്പെക്ടര്‍ ബി. രാജഗോപാല്‍, എഎസ്ഐ സുഷമ കൊച്ചുമ്മ അന്വേഷണ സംഘത്തിലുണ്ട്.

അറസ്റ്റു ചെയ്തു

റാന്നി: പിഞ്ചുബാലികയ്ക്കു നേരെ അതിക്രമം കാട്ടിയ ഓട്ടോറിക്ഷ ഡ്രൈവര്‍ അറസ്റ്റിൽ. അത്തിക്കയം കണ്ണമ്പള്ളി ചോവൂര്‍ പുത്തന്‍പുരയ്ക്കല്‍ വീട്ടില്‍ ലിബിന്‍ സി ജോണ്‍സണാണ് (23) പോലീസ് പിടിയിലായത്. 12ന് വൈകുന്നേരം ഓട്ടോ ഓടിക്കുന്നതിനിടെ മടിയിലിരുത്തി ദേഹത്തു കടന്നുപിടിച്ച് അതിക്രമത്തിന് ഇരയാക്കുകയായിരുന്നു. വീട്ടിലെത്തിയ കുട്ടി ശാരീരിക ബുദ്ധിമുട്ടുകള്‍ കാട്ടിയത് ശ്രദ്ധയില്‍ പെട്ടതിന്‍റെ അടിസ്ഥാനത്തില്‍ രക്ഷിതാക്കള്‍ ആശുപത്രിയില്‍ എത്തിച്ചു. കുട്ടിയെ പത്തനംതിട്ട ജനറല്‍ ആശുപത്രിയില്‍ ചികിത്സക്കെത്തിച്ച വിവരമറിഞ്ഞ പെരുനാട് പോലീസ്, അവിടെയെത്തി അമ്മയുടെ മൊഴി രേഖപ്പെടുത്തി കേസെടുത്തു. ഓട്ടോറിക്ഷയും ശാസ്ത്രീയ പരിശോധനയ്ക്കു വിധേയമാക്കി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact editor@deepika.com