ADVERTISEMENT

ADVERTISEMENT

ചാസ് എടത്വ മേഖല നേതൃസംഗമവും പിഎംഇയും

ഹരിപ്പാട്: ചങ്ങനാശേരി സോഷ്യൽ സർവീസ് സൊസൈറ്റിയുടെ എടത്വ മേഖല നേതൃസംഗമവും പിഎംഇയും കരുവാറ്റ ചാസ് യൂണിറ്റിൽ നടന്നു. ചാസ് ഡയറക്ടർ ഫാ. ജോർജ് പനക്കേഴം ഉദ്ഘാടനവും മുഖ്യപ്രഭാഷണവും നടത്തി.

കരുവാറ്റ യൂണിറ്റ് ഡയറക്ടർ ഫാ. ജയിംസ് പുളിച്ചമാക്കൽ അധ്യക്ഷത വഹിച്ചു. അസി. ഡയറക്ടർ ഫാ.ജോർജ് തയ്ച്ചേരി, മേഖലാ പ്രസിഡന്‍റ് മനേഷ് മാത്യു, സെക്രട്ടറി പോളി തോമസ്, ടീം ലീഡർ ബാബു ജോസഫ്, പ്രോജക്ട് ഓഫീസർ സിസ്റ്റർ ലിൻസി, മേഖല വൈസ് പ്രസിഡന്‍റ് ജൂലി റെജി തോമസ് മാത്യു, സിബിച്ചൻ വർഗീസ് എന്നിവർ പ്രസംഗിച്ചു.

ADVERTISEMENT

ഉയരപ്പാതനിർമാണ മേഖലയ്ക്കുള്ളിൽ സ്വകാര്യവാഹനങ്ങളുടെ അനധികൃത പാര്‍ക്കിംഗ്

തുറവൂര്‍: ചന്തിരൂര്‍ മേഖലയില്‍ ആകാശപ്പാത നിര്‍മാണ മേഖലയ്ക്കുള്ളില്‍ സ്വകാര്യ കമ്പനികളുടെ ഇന്‍സുലേറ്റഡ് അടക്കമുള്ള വാഹനങ്ങള്‍ യഥേഷ്ടം പാര്‍ക്ക് ചെയ്യുന്നത് അപകടകാരണമാകുന്നു. കനത്ത മഴയില്‍ അരൂര്‍ മേഖലയിലെ ദേശീയപാത ഗതാഗതയോഗ്യമല്ല. റോഡ് തകര്‍ന്ന് പലയിടത്തും ഭീമന്‍ ഗര്‍ത്തങ്ങള്‍ രൂപപ്പെട്ടിരിക്കുമ്പോഴാണ് ബാരിക്കേടിനുള്ളില്‍ എല്ലാ നിയമങ്ങളും ലംഘിച്ച് വലിയ വാഹനങ്ങളുടെ പാര്‍ക്കിംഗ്. ദേശീയപാതയില്‍ വാഹനങ്ങള്‍ രൂക്ഷമായ ഗതാഗത തടസം നേരിടുമ്പോഴും ഇത്തരം വാഹനങ്ങള്‍ ജനങ്ങള്‍ക്ക് സഞ്ചരിക്കുവാനുള്ള വഴികള്‍ പോലും കാണാനാവാത്ത വിധത്തിലാണ് പാര്‍ക്ക് ചെയ്യുന്നത്. ഭാര വാഹനങ്ങള്‍ വഴിതിരിച്ച് വിടുമെന്ന പ്രഖ്യാപനം നടപ്പാക്കാത്തതാണ് ഗതാഗതകുരുക്ക് വര്‍ധിക്കുന്നതിന് മറ്റൊരു കാരണം. നാട്ടുകാര്‍ ജില്ലാ കളക്ടര്‍ക്ക് നിവേദനം കഴിഞ്ഞ ജൂണില്‍ നല്‍കിയിരുന്നെങ്കിലും പ്രഖ്യാപനമല്ലാതെ ഇതുവരേയും ഒരു നടപടിയും സ്വീകരിച്ചിട്ടില്ല. എറണാകുളം ഭാഗത്തുനിന്നു വരുന്ന വാഹനങ്ങളും ആലപ്പുഴ ഭാഗത്തുനിന്ന് വരുന്ന ഭാരവാഹനങ്ങളും ഇപ്പോഴും നിര്‍മാണ മേഖലയിലൂടെ യാത്ര തുടരുന്നത് രൂക്ഷമായ ഗതാഗത പ്രശ്‌നങ്ങള്‍ക്ക് വഴിവയ്ക്കുന്നു. വിവിധ സ്ഥലങ്ങളിലേക്ക് ജോലിക്ക് പോകേണ്ടവര്‍ ഇത് മൂലം ഏറെ ബുദ്ധിമുട്ടുന്നു. മഴ കനത്തതോടെ ആകാശപാത നിര്‍മാണ മേഖലയില്‍ യാത്ര ദുരിതമാവുന്നു. വിദ്യാലയങ്ങള്‍ തുറക്കുന്നതോടെ കുട്ടികളെ സുരക്ഷിതമായി സ്‌കൂളില്‍ അയയ്ക്കുന്നതില്‍ രക്ഷിതാക്കള്‍ ആശങ്കാകുലരാണ്. ദേശിയപാതയിലൂടെ കടന്നു പോകുന്ന ഭാരവാഹനങ്ങളെ നിയന്ത്രിക്കാന്‍ നടപടിയുണ്ടാകണമെന്ന് ജനങ്ങള്‍ ആവശ്യപ്പെടുന്നു. അവശ്യ സര്‍വീസായ ആംബുലന്‍സുകള്‍ക്കു പോലും കടന്ന് പോകാന്‍ പറ്റാത്ത വിധത്തിലാണ് ഭാരവാഹനങ്ങള്‍ ജില്ലാ ഭരണകൂടത്തിന്‍റെ ഉത്തരവ് ലംഘിച്ച് നിര്‍മാണമേഖലയിലൂടെ സഞ്ചരിക്കുന്നത്. ഇത് അടിയന്തരമായി തടയാന്‍ നടപടി സ്വീകരിക്കണമെന്നാണ് ജനങ്ങളുടെ ആവശ്യം.

കാലവർഷം കനത്തതോടെ പമ്പാതീരത്ത് ആശങ്ക; തിട്ടയിടിഞ്ഞ് വീടുകൾ അപകടസ്ഥയിലായി

ചെങ്ങന്നൂര്‍: കാലവര്‍ഷം ശക്തി പ്രാപിച്ചതോടെ പാണ്ടനാട്ടില്‍ പമ്പാനദിയുടെ ഇരുകരകളിലും താമസിക്കുന്നവര്‍ ഭീതിയിലായി. തിട്ടകള്‍ ഇടിഞ്ഞ് നദിയിലേക്ക് പതിക്കുന്നതുമൂലം ഉറക്കം നഷ്ടപ്പെട്ട കുടംബങ്ങളാണിവിടുള്ളത്. പാണ്ടനാട് വില്ലേജില്‍ പ്രയാര്‍ കൊപ്പാറക്കടവ് മുതല്‍ മിത്രമഠം കടവ് വരെയുള്ള ഏകദേശം 800 മീറ്റര്‍ നീളത്തിലുള്ള പ്രദേശം ഗുരുതരമായ തീരശോഷണ ഭീഷണി നേരിടുകയാണ്. അപ്പിലി മഠം അജി ഈപ്പൻ, തേച്ചേരില്‍ ഐസക് ജേക്കബ്, വടേക്കേക്കുറ്റ് അശോക് കുമാർ, വിജയപുരം രൂപത അധ്യക്ഷന്‍ റവ. ഡോ. സെബാസ്റ്റ്യന്‍ തെക്കത്തെച്ചേരില്‍ പിതാവിന്‍റെ കുടുംബം, ടി.ഡി. ജോണ്‍ (പൊന്നച്ചന്‍) തെക്കത്തെച്ചേരിൽ, രാജേഷ്, കുഴിയത്ത്, ഗോപിനാഥന്‍ നായര്‍ തെക്കത്തെച്ചേരില്‍ എന്നിവരുള്‍പ്പെടെ കൊഴയത്തു കടവ് മുതല്‍ മേടക്കടവ് വരെയുള്ള 12-ല്‍ അധികം വീടുകളാണ് നിലവില്‍ ഏറ്റവും വലിയ അപകടഭീഷണി നേരിടുന്നത്. ഇവിടങ്ങളിലെ തിട്ടകളും വീടുകളും ഏത് നിമിഷവും നദിയിലേക്ക് പതിക്കാവുന്ന അവസ്ഥയിലാണ്. മിത്രമഠം പാലത്തിന് സമീപമുള്ള മാടശേരില്‍ ചേമ്പലത്ര സത്യഭാമ, ചേമ്പലത്ര കുന്നിക്കോട് സുകുമാരന്‍ എന്നിവരുടെ വീടുകള്‍ക്കും വെള്ളപ്പൊക്ക ഭീഷണിയുണ്ട്. തീരം ഇടിഞ്ഞ് നദിയിലേക്ക് പതിക്കുന്നതും വീടുകളും നദീതീരവും തമ്മിലുള്ള അകലം കുറഞ്ഞു വരുന്നതും ഇവിടുത്തെ താമസക്കാരെ കൂടുതല്‍ ഭയപ്പെടുത്തുന്നു. 2018-ലെ മഹാപ്രളയത്തിനു ശേഷമാണ് ഈ പ്രദേശത്ത് തിട്ടയിടിച്ചില്‍ രൂക്ഷമായതെന്ന് നാട്ടുകാര്‍ പറയുന്നു. സംരക്ഷണഭിത്തി നിര്‍മിച്ച് സുരക്ഷ ഉറപ്പാക്കണമെന്ന് ആവശ്യപ്പെട്ട് പഞ്ചായത്തംഗം ശ്രീകല ശിവനുണ്ണി അടക്കമുള്ള പ്രദേശവാസികള്‍ പഞ്ചായത്ത് മുതല്‍ എംഎല്‍എ ഓഫീസ്, ജലവിഭവ മന്ത്രി എന്നിവര്‍ക്ക് വര്‍ഷങ്ങളായി പരാതി നല്‍കിയിട്ടും യാതൊരു നടപടിയും ഉണ്ടായിട്ടില്ലെന്ന് നാട്ടുകാര്‍ കുറ്റപ്പെടുത്തുന്നു. കഴിഞ്ഞ വര്‍ഷം ഇറിഗേഷന്‍ വകുപ്പ് ആലപ്പുഴ ഓഫീസില്‍നിന്ന് ഉദ്യോഗസ്ഥരെത്തി അളവെടുത്ത് പോയതല്ലാതെ പിന്നീട് ഈ ഭാഗത്തേക്ക് തിരിഞ്ഞു നോക്കിയിട്ടില്ല എന്ന പരാതിയും ശക്തമാണ്. 2021 മുതല്‍ വാര്‍ഡിലെ അടിയന്തര പ്രാധാന്യത്തോടെയുള്ള തിട്ടയിടിയല്‍ ഭീഷണി വിഷയം പഞ്ചായത്ത് കമ്മിറ്റിയില്‍ അവതരിപ്പിക്കുന്നുണ്ട്. എന്നാല്‍ നാളിതുവരെ ഇതിനൊരു പരിഹാരം ഉണ്ടായിട്ടില്ല. നിരവധി വീടുകളാണ് പുഴയിലേക്ക് വീഴാറായ അവസ്ഥയിലാണ്. അടിയന്തരമായ ഒരു പരിഹാരം ഇതിന് ആവശ്യമാണന്ന് പഞ്ചായത്തംഗം ശ്രീകല ശിവനുണ്ണി റഞ്ഞു. പുരയിടത്തിന്‍റെ നല്ലൊരു ഭാഗം ഇതിനോടകം ഇടിഞ്ഞുപോയി. ഇതിനെക്കുറിച്ച് മുമ്പേ പലതവണ പരാതി നല്‍കിയിട്ടുള്ളതാണ്. മന്ത്രിക്ക് പോലും ഈ വിഷയത്തെക്കുറിച്ച് അറിയാം. ഏകദേശം 12 വീടുകളാണ് പുഴയോട് ചേര്‍ന്ന് അപകടാവസ്ഥയില്‍ നില്‍ക്കുന്നത്. ഉദ്യോഗസ്ഥരും രാഷ്‌ട്രീയക്കാരും എല്ലാവരും സഹായിക്കാമെന്ന് വാഗ്ദാനം മാത്രമേ നല്‍കിയിട്ടുള്ളൂ. കഴിഞ്ഞ കുറെ വര്‍ഷങ്ങളായി ഇതിനുവേണ്ടി കയറിയിറങ്ങാത്ത വാതിലുകളില്ലന്ന് ദുരിതബാധിതനായ ജയിംസ് പറയുന്നു. കാലവര്‍ഷം ശക്തമാകുന്ന ഈ സാഹചര്യത്തില്‍ അധികൃതര്‍ അടിയന്തരമായി ഇടപെട്ട് ഈ പ്രദേശത്തെ സുരക്ഷ ഉറപ്പാക്കണമെന്നാണ് നാട്ടുകാരുടെ ആവശ്യം.

പ്രളയക്കെടുതിയില്‍ അപ്പര്‍ കുട്ടനാട്

തിരുവല്ല: പത്തനംതിട്ട ജില്ലയുടെ പടിഞ്ഞാറന്‍ മേഖലയില്‍ പ്രളയക്കെടുതികള്‍ ഒഴിയുന്നില്ല. ഇന്നലെ മഴയ്ക്കു നേരിയ ശമനമുണ്ടായെങ്കിലും പടിഞ്ഞാറന്‍ മേഖലയിലെ വെള്ളക്കെട്ടുകള്‍ തുടരുകയാണ്. ഇതോടെ ദുരിതാശ്വാസ ക്യാമ്പുകളുടെ എണ്ണവും കൂടി. അപ്പര്‍ കുട്ടനാട്ടിലെ കൂടുതല്‍ പ്രദേശങ്ങളില്‍ വെള്ളംകയറിയതിനാല്‍ ദുരിതാശ്വാസ ക്യാമ്പുകളുടെ എണ്ണം 43ആയി. 412 കുടുംബങ്ങളിലായി 539 പുരുഷന്മാരും 565 സ്ത്രീകളും 275 കുട്ടിയും ഉള്‍പ്പെടെ 1379 പേരാണ് നിലവില്‍ ക്യാമ്പിലുള്ളത്. ജില്ലയില്‍ തിരുവല്ല താലൂക്കിലാണ് ഏറ്റവുമധികം ക്യാമ്പുകള്‍ പ്രവര്‍ത്തിക്കുന്നത്. 34 ക്യാമ്പുകളിലായി 501 പുരുഷന്മാരും 522 സ്ത്രീകളും 251 കുട്ടികളുമായി 377 കുടുംബങ്ങള്‍ ഇവിടെ കഴിയുന്നു. കോഴഞ്ചേരി താലൂക്കില്‍ ആറും മല്ലപ്പള്ളി, കോന്നി, അടൂര്‍ താലൂക്കുകളില്‍ ഓരോ ക്യാമ്പുമാണുള്ളത്. കോഴഞ്ചേരി താലൂക്കില്‍ ആറന്മുള കോഴിപ്പാലം എന്‍എംയുപി സ‌കൂള്‍, ആറാട്ടുപുഴ സര്‍ക്കാര്‍ യുപിഎസ്, നാല്‍കാലിക്കല്‍ എംടിഎല്‍പിഎസ്, വല്ലന എസ്എന്‍ഡിപി യുപിഎസ്, മല്ലപ്പുഴശേരി കുറുന്തര്‍ സാംസ്‌കാരിക നിലയം, ഓന്തേക്കാട് എംടിഎല്‍പിഎസ് ക്യാമ്പുകളിലായി 32 കുടുംബങ്ങളിലെ 95 പേരാണുള്ളത്. മല്ലപ്പള്ളി താലൂക്കില്‍ ആനിക്കാട് പിആര്‍ഡിഎസ് സ്‌കൂളില്‍ ഒരു കുടുംബങ്ങളിലെ നാലു പേരും കോന്നി താലൂക്കില്‍ തണ്ണിത്തോട് പകല്‍വീട് ഒരു കുടുംബത്തിലെ നാലു പേരും അടൂര്‍ താലൂക്കില്‍ പന്തളം മുടിയൂര്‍ക്കോണം എംടിഎല്‍പി സ്‌കൂളില്‍ ഒരു കുടുംബത്തിലെ രണ്ടു പേരുമാണുള്ളത്.

കുട്ടനാടിന് പ്രത്യേക ഫണ്ട് അനുവദിക്കണം: എംഎൽഎ

എടത്വ: കിഴക്കൻ വെള്ളത്തിന്‍റെ അനിയന്ത്രിതമായ വരവിൽ വെള്ളപ്പൊക്കക്കെടുതികൾ രൂക്ഷമായ സാഹചര്യം കണക്കിലെടുത്ത് ദുരന്ത നിവാരണത്തിനും നഷ്ടപരിഹാരത്തിനുമായി കുട്ടനാടിന് പ്രത്യേക ഫണ്ട് അനുവദിക്കണമെന്ന് മുഖ്യമന്ത്രിയോട് നേരിട്ട് ആവശ്യപ്പെട്ടതായി തോമസ് കെ. തോമസ് എംഎൽഎ പറഞ്ഞു. ഭൂപ്രകൃതിയുടെ പ്രത്യേകത കൊണ്ട് മഴക്കാലത്ത് ഏറെ ദുരിതം അനുഭവിക്കുന്ന പ്രദേശമാണ് കുട്ടനാട്. ദുരിതാശ്വാസ ക്യാമ്പുകൾ, കഞ്ഞിവീഴ്ത്തൽ കേന്ദ്രങ്ങൾ, ആരോഗ്യ വകുപ്പിന്‍റെ പ്രത്യേക പ്രാഥമിക ചികിത്സാ കേന്ദ്രങ്ങൾ എന്നിവ തുറന്ന് പ്രവർത്തിച്ചു വരികയാണ്. കൃഷിയില്ലാത്ത പാടശേഖരങ്ങളിൽ പെയ്ത്തുവെള്ളം നിറഞ്ഞ് രൂപപ്പെട്ട വെള്ളപ്പൊക്ക കെടുതികൾ അവസാനിക്കണമെങ്കിൽ പാടശേഖരങ്ങളിലെ ജലനിരപ്പ് നിയന്ത്രിത അളവിൽ ക്രമീകരിക്കണം. ഇതിനായി വൈദ്യുതി കണക്ഷൻ ലഭ്യമാക്കി പമ്പിംഗ് നടത്തുന്നതിനും കൂടുതൽ പമ്പുസെറ്റുകൾ എത്തിച്ച് വെള്ളം വറ്റിക്കുന്നതിനുമുള്ള നടപടി സ്വീകരിക്കണം. മടവീഴ്ച സംഭവിച്ച ഇടങ്ങളിൽ മട കുത്തുന്നതിനാവശ്യമായ അടിയന്തര സഹായം നൽകണം. വീടുകളിൽ വെള്ളം കയറിയും മരങ്ങൾ കഴപുഴകി വീണും ധാരാളം വീടുകൽക്ക് നാശനഷ്ടമുണ്ടായിട്ടുണ്ട്. കുട്ടനാട്ടിൽ വെള്ളപ്പൊക്ക കെടുതികൾ നേരിടേണ്ടി വന്ന മുഴുവൻ കുടുംബങ്ങൾക്കും അടിയന്തര ധനസഹായം നൽകുന്നതിന് ആവശ്യമായ നടപടി സ്വീകരിക്കണമെന്നും മുഖ്യമന്ത്രിയോട് ആവശ്യപ്പെട്ടതായും ഇക്കാര്യത്തിൽ അനുകൂല നടപടി ഉണ്ടാകുമെന്ന് മുഖ്യമന്ത്രി ഉറപ്പ് നൽകിയതായും തോമസ് കെ. തോമസ് എംഎൽഎ അറിയിച്ചു.

കാറ്റിലും മഴയിലും മരം വീണ് വീടിനും ക്ഷേത്രത്തിനും നാശം

ഹരിപ്പാട്: കാറ്റിലും മഴയിലും മരം വീണ് വീടിനും ക്ഷേത്രത്തിനും നാശം. ആറാട്ടുപുഴ തറയിൽക്കടവ് പുത്തൻമണ്ണേൽ മിനിമോളുടെ വീടും മുതുകുളം തെക്ക് കളീക്കൽ കുടുംബക്ഷേത്രവുമാണ് മരം വീണു തകർന്നത്. ശനിയാഴ്ച രാത്രി പതിനൊന്നോടെ തെക്കുവശത്തുനിന്ന മാവാണ് വീടിനു മുകളിലേക്ക് പിഴുതുവീണത്. കിടപ്പുമുറിയുൾപ്പെടെ ഒരുവശത്തെ മേൽക്കൂര തകർന്നു. വീടിന്‍റെ ഭിത്തിക്കാകമാനം നാശമുണ്ടായി. മിനിമോളും വയസായ അച്ഛൻ ഗോപിയുമാണ് വീട്ടിൽ താമസിച്ചു വന്നിരുന്നത്. കാറ്റും മഴയും കടക്കൽ ക്ഷേത്രത്തിന്‍റെ പിൻഭാഗത്തു നിന്ന കൂറ്റൻ തേക്കാണ് കടപുഴകിയത്. ഭദ്രകാളീ ശ്രീകോവിൽ തകർന്നു. സർപ്പ പ്രതിഷ്ഠയ്ക്കും ഷെഡിനും നാശമുണ്ടായി.

കുടശ്ശനാട്- പടനിലംബണ്ട് റോഡ് വെള്ളത്തിനടിയിലായി

ചാരുംമൂട്: അച്ചന്‍കോവിലാറ്റില്‍ ജലനിരപ്പ് ഉയര്‍ന്നതിനെത്തുടര്‍ന്ന് ഐരാണിക്കുടി വഴി ആറ്റുവെള്ളം കരിങ്ങാലിച്ചാല്‍ പുഞ്ചയുടെ മിക്ക ഭാഗത്തും എത്തി. പുഞ്ചയില്‍ വെള്ളം നിറഞ്ഞതിനെത്തുടര്‍ന്ന് വാഹനത്തിരക്കേറിയ കുടശനാട്- പടനിലംബണ്ട് റോഡ് വെള്ളത്തിനടിയിലായി. ഇതുവഴിയുള്ള വാഹനയാത്ര തടസപ്പെട്ടിരിക്കുകയാണ്. കുടശനാട് സൗപര്‍ണിക, തിരുമണിമംഗലം മഹാദേവര്‍ ക്ഷേത്രം, മാവിളപ്പടി ജംഗ്ഷന്‍ എന്നിവിടങ്ങളിലേക്ക് വെള്ളം ഒഴുകിയെത്തിക്കൊണ്ടിരിക്കുകയാണിപ്പോൾ. വെള്ളത്തിന്‍റെ ഒഴുക്ക് വര്‍ധിക്കുന്നതോടെ നൂറനാട് പത്താം മൈല്‍ - പന്തളം റോഡില്‍ ഗതാഗതം തടസപ്പെടും. ഇതുവഴി യാത്ര ചെയ്യുന്നവര്‍ ശ്രദ്ധിക്കണമെന്ന് പാലമേല്‍ പഞ്ചായത്ത് അധികൃതർ അറിയിച്ചു. ഗ്രുവൽ സെന്‍ററുകൾ ആരംഭിച്ചു എടത്വ: കനത്ത മഴയെയും വെള്ളപ്പൊക്കത്തെയും തുടർന്ന് എടത്വ പഞ്ചായത്തിലെ പതിനഞ്ച് വാർഡുകളിലെ വിവിധ സ്ഥലങ്ങളിൽ ഗ്രുവൽ സെന്‍ററുകൾ ആരംഭിച്ചു. എടത്വ പഞ്ചായത്തിലെ താഴ്ന്ന പ്രദേശത്ത് താമസിക്കുന്ന 25 കുടുംബങ്ങളിലെ എഴുപതോളം പേരെ എടത്വ സെന്‍റ് അലോഷ്യസ് കോളജ്‌ ഓഡിറ്റോറിയത്തിലെ ദുരിതാശ്വാസ ക്യാമ്പിലേക്ക് എത്തിച്ചിട്ടുണ്ട്. എടത്വ സിഎച്ച്സി, പോലീസ്, കെഎസ്ഇബി എന്നീ വകുപ്പുകളുടെ സേവനം ക്യാമ്പിൽ ലഭ്യമാണ്. എടത്വ പഞ്ചായത്തിന്‍റെയും വില്ലേജിന്‍റെയും നേതൃത്വത്തിൽ ക്യാമ്പിന്‍റെ പ്രവർത്തനം സുഗമമായി നടന്നുവരുന്നതായി പ്രസിഡണ്ട് ആൻസി ബിജോയ് അറിയിച്ചു. ദുരിതാശ്വാസ ക്യാമ്പിൽ കഴിയുന്ന കുടുംബങ്ങൾക്ക് അടിയന്തര ധനസഹായം നൽകണം: കൊടിക്കുന്നിൽ മാവേലിക്കര: വെള്ളപ്പൊക്കം മൂലം ദുരിതാശ്വാസ ക്യാമ്പിൽ കഴിയുന്ന കുടുംബങ്ങൾക്ക് അടിയന്തര സഹായമെന്ന നിലയിൽ പ്രാരംഭ ചെലവുകൾക്കായി പതിനായിരം രൂപ വീതം സർക്കാർ നൽകണമെന്ന് കൊടിക്കുന്നിൽ സുരേഷ് എംപി പറഞ്ഞു. കുട്ടനാട്ടിലെ വിവിധ ദുരിതാശ്വാസ ക്യാമ്പുകളിൽ സന്ദർശനം നടത്തി അദ്ദേഹം ക്യാമ്പിലുള്ളവരുമായി സംസാരിക്കുകയും ക്യാമ്പുകളിൽ ആവശ്യമായ അടിസ്ഥാന സൗകര്യങ്ങൾ ഉറപ്പാക്കണമെന്ന് ജില്ലാ കളക്ടറോട് ആവശ്യപ്പെടുകയും ചെയ്തു. കുട്ടനാട് താലൂക്ക് ഓഫീസിൽ തഹസിൽദാരുമായി നടത്തിയ അവലോകയോഗത്തിൽ ദുരിതാശ്വാസ ക്യാമ്പുകളിൽ ആവശ്യത്തിന് ഭക്ഷണവും വെള്ളവും ഉറപ്പുവരുത്തണമെന്നും സുഗമമായ ഗതാഗതത്തിന് ബസ്, ബോട്ട് സർവീസുകൾ ലഭ്യമാക്കണമെന്നും നിർദേശിച്ചു. കെസി പാലത്തിന് ഇരുവശത്തുമായി അവസാനിക്കുന്ന തരത്തിൽ കുട്ടനാട്ടിലേക്കും ചങ്ങനാശേരിയിലേക്കും ബോട്ട് സർവീസുകൾ പ്രത്യേകമായി ക്രമീകരിക്കണമെന്നും പറഞ്ഞു. പല പ്രദേശങ്ങളിലും വീടുകളിൽ വെള്ളം കയറിയതിനാൽ ജനജീവിതം ദുരിതപൂർണമാണെന്നും മുൻഗണനാക്രമത്തിൽ ഇവിടങ്ങളിൽ നിന്നും മോട്ടർ ഉപയോഗിച്ച് വെള്ളം വറ്റിക്കുന്നതിന് നടപടിയെടുക്കണമെന്നും ആവശ്യപ്പെട്ടു. മഴ മുന്നൊരുക്ക യോഗങ്ങളിൽ കൈക്കൊണ്ട് തീരുമാനങ്ങളൊന്നും നടപ്പിലാക്കാത്ത ജില്ലാ ഭരണകൂടവും സംസ്ഥാന സർക്കാരും ആണ് കാലവർഷത്തിനു മുൻപുള്ള കുട്ടനാട്ടിലെ ഈ വെള്ളപ്പൊക്കത്തിന് കാരണമെന്ന് കൊടിക്കുന്നിൽ സുരേഷ് എംപി വിമർശിച്ചു. യഥാസമയം തോടുകളിലെ നീരൊഴുക്ക് വർധിപ്പിക്കുന്നതിന് ആവശ്യമായ നടപടികൾ ഉണ്ടായില്ല. വേമ്പനാട് കായലിന്‍റെ ആഴം കൂട്ടൽ പദ്ധതികൾ എങ്ങും എത്താതിരിക്കുകയും കരുവാറ്റ ലീഡിങ് ചാനൽ വഴി തോട്ടപ്പള്ളി സ്പില്‍വേയിലൂടെ കിഴക്കൻ വെള്ളം ഒഴുക്കുന്നതിൽ സംഭവിച്ച വീഴ്ചയുമാണ് മഴക്കാലത്തിനു മുൻപ് തന്നെ കുട്ടനാടിനെ മഴക്കെടുതിയിൽ ആക്കിയതതെന്ന് എംപി പറഞ്ഞു. തകർന്ന മടകൾ ബലപ്പെടുത്തുന്നതിന് ആവശ്യമായ മണ്ണ് തോട്ടപ്പള്ളിയിൽനിന്ന് അടിയന്തരമായി ലഭ്യമാക്കണമെന്ന് പറഞ്ഞ എംപി ജില്ലാ കളക്ടർ ഇത് ഉറപ്പാക്കണമെന്നും പറഞ്ഞു.

അവാർഡ് ദാനവും പഠനോപകരണ വിതരണവും നടത്തി

അമ്പലപ്പുഴ: കുറവന്തോട് എളിമ പുരുഷ സ്വയം സഹായ സംഘത്തിന്‍റെ ആഭിമുഖ്യത്തിൽ എസ്എസ്എൽസി, പ്ലസ്ടു വിദ്യാർഥികൾക്ക് അവാർഡ് ദാനവും പഠനോപകരണ വിതരണവും നടത്തി. കുറവന്തോട് കിഴക്ക് വെള്ളാപ്പള്ളി ജംഗ്ഷനുസമീപം നടന്ന അനുമോദന സമ്മേളനം എച്ച്. സലാം എംൽഎ ഉദ്ഘാടനം ചെയ്തു എളിമ പുരുഷ സ്വയം സഹായ സംഘം പ്രസിഡന്‍റ് നിസാർ വെള്ളാപ്പള്ളി അധ്യക്ഷത വഹിച്ചു. ബ്ലോക്ക് പഞ്ചായത്ത് അംഗം വി.ആർ. അശോകൻ. പഞ്ചായത്ത് അംഗം കുഞ്ഞുമോൾ സജീവ്. എളിമ പുരുഷ സ്വയം സഹായം സംഘം സെക്രട്ടറി വി.എസ്. സാബു, പ്രസേനൻ, ശൈലേന്ദ്രൻ, മഹീന്ദ്രൻ, സുധീർ, അനിൽ കുമാർ, ഷൈജു എന്നിവർ പ്രസംഗിച്ചു

പുന്നപ്ര ബീച്ച് എൽപി സ്കൂളിൽ പ്രവേശനോത്സവം വിവിധ പരിപാടികളോടെ നടക്കും

അമ്പലപ്പുഴ: പുന്നപ്ര ബീച്ച് എൽ പി സ്കൂളിൽ പ്രവേശനോത്സവം വിവിധ പരിപാടികളോടെ നടക്കും. സംസ്ഥാനത്ത് ആദ്യമായി എയ്ഡഡ് മേഖലയിൽ ഒരു കുട്ടിക്ക് ഒരു മേശയും ഒരു കസേരയും പദ്ധതി നടപ്പിലാക്കിയത് പുന്നപ്ര ബീച്ച് എൽപി സ്കൂളിലാണ്. ഈ വർഷം ശീതീകരിച്ച ക്ലാസ് മുറികളിലാണ് കിന്‍റർ ക്ലാസുകൾ നടക്കുന്നത്. സ്കൂൾ മാനേജർ ഡി. അഖിലാനന്ദന്‍റെ അധ്യക്ഷതയിൽ പുന്നപ്ര തെക്ക് പഞ്ചായത്ത് പ്രസിഡന്‍റ് പി. ജി. സൈറസ് ഉദ്ഘാടനം ചെയ്യും. ബ്ലോക്ക് പഞ്ചായത്ത് അംഗം ഷീജ, പഞ്ചായത്ത് അംഗങ്ങളായ റാണി ഹരിദാസ്, നസീർ , ഷക്കീല നിസാർ സെക്രട്ടറി കെ.ആർ. തങ്കജി, പിടിഎ പ്രസിഡന്‍റ് ശ്രീന നാഗേന്ദ്രൻ, എന്നിവർ പ്രസംഗിക്കും. പുന്നപ്ര മഹാദേവനും മഹേഷും വിവിധ പരിപാടികൾ അവതരിപ്പിക്കും. സ്കൂൾ ഹെഡ്മിസ്ട്രസ് ശ്രീജ, ആർ. പുത്രൻ, ആർ. ത്യാഗരാജൻ, ജാൻസി, മൺസൂർ, അൻസർ,രഞ്ജു, ഷംന. ബിസ്മിന, ആദിത്യാ, ജിഷ എന്നിവർ പരിപാടികൾക്ക് നേതൃത്വം നൽകും.

കാർത്തികപ്പളളി - കായംകുളം റോഡിന് വീതി കൂട്ടണം

ഹരിപ്പാട്: കാര്‍ത്തികപ്പളളി-കായംകുളം റോഡിന് വാഹനങ്ങളെയും യത്രക്കാരെയും ഉള്‍ക്കൊളളാനാകുന്നില്ല. മതിയായ വീതിയില്ലാത്തതു മൂലമുണ്ടാകുന്ന തിരക്കും ഗതാഗതക്കുരുക്കും കാരണം യാത്രക്കാരും നാട്ടുകാരുമെല്ലാം കഷ്ടപ്പെടുകയാണ്. ദേശീയപാതയ്ക്ക് സമാന്തരമായി കായംകുളം ഒഎന്‍കെ ജംഗ്ഷനില്‍നിന്നു ഡാണാപ്പടിയില്‍ എത്തുന്ന റോഡാണിത്. തീരദേശത്തെ ജനസാന്ദ്രതയേറിയ പ്രദേശവുമാണിവിടം. അതിനാല്‍, മണിക്കൂറില്‍ നൂറുകണക്കിനു വാഹനങ്ങളും യാത്രക്കാരുമാണ് ഇതുവഴി പോകുന്നത്. ദേശീയപാതയൊഴിവാക്കിയും വാഹനങ്ങള്‍ ഇതുവഴി കടന്നുപോകുന്നുണ്ട്. ഓച്ചിറ, അമൃതപുരി ഭാഗങ്ങളില്‍നിന്നു ദേവികുളങ്ങര കൂട്ടുവാതുക്കല്‍ കടവ് പാലം വഴി വരുന്ന വാഹനങ്ങള്‍ പുല്ലുകുളങ്ങരയിലെത്തി ഈ റോഡിലൂടയാണ് ഹരിപ്പാട് ഭാഗത്തേക്ക് പോകുന്നത്. കൂടാതെ, ആറാട്ടുപുഴ കൊച്ചിയുടെ ജെട്ടി പാലം വഴി വരുന്ന വാഹനങ്ങളും പുല്ലുകുളങ്ങരയിലെത്തി കായംകുളം, ഹരിപ്പാട് ഭാഗത്തേക്ക് പോകുന്നതും ഇതുവഴിയാണ്. കായംകുളത്തുനിന്നു കാര്‍ത്തികപ്പളളി വരെ 15 കിലോമീറ്ററോളം ദൂരമുണ്ട്. എട്ടുമീറ്റര്‍ വീതിയുളള റോഡാണെന്ന് പറയുന്നുണ്ടെങ്കിലും പലയിടങ്ങളിലും ഏഴു മീറ്ററില്‍ താഴെ മാത്രമേ ടാറിംഗുളളൂ. മുതുകുളം വടക്കന്‍ മേഖലയിലും ചിങ്ങോലിയിലും റോഡിന് തീരെ വീതിയില്ല. പുതിയവിള മരയ്ക്കാലേത്ത്മുക്ക് ഭാഗത്തും വീതികുറവാണ്. ഇവിടെ അപകടവളവുമുണ്ട്. റോഡിന് ഇരുവശങ്ങളിലും നൂറുകണക്കിന് കടകളും സ്ഥാപനങ്ങളുമാണുളളത്. നഗരത്തിന്‍റെ തുടര്‍ച്ചയെന്നോണം ചെറിയ മുക്കുകളില്‍പ്പോലും കടകളുടെ എണ്ണം പതിന്‍മടങ്ങ് വര്‍ധിച്ചു. ഇവിടങ്ങളിലേക്ക് വരുന്നവര്‍ മിക്കപ്പോഴും പാതയോരത്താണ് വാഹനങ്ങള്‍ പാര്‍ക്ക് ചെയ്യുന്നത്. വീതിക്കുറവിനൊപ്പം ഇതുകൂടിയാകുമ്പോള്‍ ഗതാഗതതടസം ഒഴിയുകയേയില്ല. ചിലയിടങ്ങളില്‍ വഴിയോരക്കച്ചവടക്കാരും റോഡിനോടു ചേര്‍ന്ന് ഓട്ടോ സ്റ്റാന്‍ഡുമുണ്ട്. ഇതും ബുദ്ധിമുട്ടിനു കാരണമാകു ന്നുണ്ട്. പാതയ്ക്കടുത്തായി നാലു ഹയര്‍ സെക്കന്‍ഡറി സ്‌കൂളുകളും കോളജുകളുമടക്കം ഒട്ടേറെ വിദ്യഭ്യാസ സ്ഥാപനങ്ങളുമുണ്ട്. രാവിലെയും വൈകുന്നേരം നാലു മുതല്‍ എട്ടരവരെയും വലിയ തിരക്കാണ് അനുഭവപ്പെടുന്നത്. നിര്‍ത്തിയും ഇഴഞ്ഞിഴഞ്ഞും മാത്രമേ വാഹനങ്ങള്‍ക്ക് മുന്നോട്ടു പോകാന്‍ കഴിയൂ.

നവോത്ഥാന സമിതി ചെയർമാൻ വെള്ളാപ്പള്ളി നടേശൻതന്നെ ജാതി പറയുന്നു: കെ.പി.എം.എസ്

മാവേലിക്കര: ഇടതുപക്ഷ സർക്കാർ രൂപം കൊടുത്ത നവോത്ഥാന സമിതിയുടെ ചെയർമാൻ വെള്ളാപ്പള്ളി നടേശൻ മലപ്പുറത്ത് പോയി ജാതീയ പരാമർശം നടത്തി. കേരളത്തിന്‍റെ നവോത്ഥാന മൂല്യങ്ങൾ കുഴിച്ചു മൂടുന്നതിന് കുടപിടിക്കുന്ന സമീപനമാണ് സർക്കാർ ചെയ്തുകൊണ്ടിരിക്കുന്നത്. വേടന് പാട്ട് പാടാൻ സാധിക്കാത്തതും നായർക്ക് ശവമടക്കിന് പ്രത്യേകം സ്ഥലം വേണ്ടതുമായ നാടായി കേരളം മാറുന്നുവെന്നും കെപിഎംഎസ് സംസ്ഥാന ജനറൽ സെക്രട്ടറി പി.എം. വിനോദ് പറഞ്ഞു. കേരള പുലയർ മഹാസഭ 53-ാമത് ആലപ്പുഴ ജില്ലാ സമ്മേളനം മാവേലിക്കരയിൽ ഉദ്ഘാടനം ചെയ്യുകയായിരുന്നു അദ്ദേഹം. ജില്ലാ പ്രസിഡന്‍റ് ആല രവി അധ്യക്ഷത വഹിച്ചു. ജില്ലാ കമ്മറ്റി അംഗം കെ. വിജൻ പതാക ഉയർത്തി. ജില്ലാ സെക്രട്ടറി പി.കെ. വിദ്യാധരൻ പ്രവർത്തന റിപ്പോർട്ടും ട്രഷറർ കെ.അശോകൻ വരവ്-ചിലവ് കണക്കും അവതരിപ്പിച്ചു. സംസ്ഥാന അസിസ്റ്റന്‍റ് സെക്രട്ടറി എസ്. ചന്ദ്രൻ, എ.കെ.സുരേഷ്, വി.ആർ. ശശിധരകുമാർ, കെ.കെ.ഓമനകുട്ടൻ, പി. പ്രദീപ്കുമാർ, പി.കെ. ബിജു, പി.എസ്. സ്വരാജ്, രാജശ്രീ ഓമനക്കുട്ടൻ, ലതിക വിജയൻ, അരുൺ കെ. രവി, എസ്.വിഷ്ണു, അനിമോൾ, ബിജി രഘു, സിന്ധു അശോകൻ, അനിൽകുമാർ, പി.കെ.ബാലകൃഷ്ണൻ, സുജാത ഗോപി എന്നിവർ പ്രസംഗിച്ചു. ജില്ലാ അസിസ്റ്റന്‍റ് സെക്രട്ടറി സുരേഷ് ടി. മേനാമ്പളളി സ്വാഗതവും സ്വാഗത സംഘം ജോയിന്‍റ് കൺവീനർ കെ.ഷാജി നന്ദിയും പറഞ്ഞു.

ജനതയെ നശിപ്പിക്കുന്ന രീതിയിൽ മദ്യ ഉപഭോഗം വർധിക്കുന്നു: വി.എം. സുധീരൻ

മുഹമ്മ: മുൻപൊരിക്കലും ഉണ്ടാകാത്ത വിധം കേരളത്തിൽ മദ്യ ഉപഭോഗം വർധിച്ചതായി മുൻ എം.പി വി.എം. സുധീരൻ. മദ്യം തലമുറയെ കാർന്നുതിന്നുമ്പോഴും ബാറുകളുടെ എണ്ണം വർധിപ്പിക്കുന്ന നയമാണ് സർക്കാരിന്‍റേത്. 2016-ൽ വില്പനശാലകളുടെ എണ്ണം 29 ആയിരിന്നത് ഇന്ന് 1000 ത്തിലേറെയായി. ലഹരിയെ കുറിച്ച് പറയുമ്പോൾ മദ്യത്തെ ഒഴിവാക്കി മയക്കുമരുന്നിനെ കുറിച്ച് മാത്രമാണ് പറയുന്നത്. ഇത് വലിയ ഇരട്ടത്താപ്പാണെന്നും സുധീരൻ പറഞ്ഞു. മുഹമ്മ കായിപ്പുറം സൗഹൃദ വേദി വായനശാലയുടെ രജനി നീതി ലാബിന്‍റെ ഉദ്ഘാടനം നിർവഹിക്കുകയായിരുന്നു സുധീരൻ. മദ്യമില്ലെങ്കിലും മനുഷ്യർക്ക് ജീവിക്കാൻ കഴിയുമെന്നത് കോവിഡ് കാലത്ത് ബോധ്യം വന്നതാണ്. ജനജീവിതത്തിന്‍റെ താളം തെറ്റിക്കുന്ന മദ്യത്തെ ഒഴിവാക്കാൻ കഴിയുമെങ്കിലും അധികാരികൾ ജനത്തെ മറക്കുകയാണ്. ഒരു കുട്ടി പോലും ലഹരിക്ക് അടിമയാകാതിരിക്കാൻ സൗഹൃദ വേദിപോലുള്ള പ്രസ്ഥാനങ്ങൾ മുന്നിട്ടിറങ്ങണമെന്നും സുധീരൻ പറഞ്ഞു. സുധീർ രാഘവൻ തൈപ്പറമ്പിൽ അധ്യക്ഷത വഹിച്ചു. ഡോ.പി.എൽ. ലക്ഷ്മി, വായനശാല പ്രസിഡന്‍റ് ടി. കുഞ്ഞുമോൻ, സി.ഡി. വിശ്വനാഥൻ, ആർ. വിനോദ്, ടി.വി. സന്തോഷ് തോട്ടുങ്കൽ, സുജിത്ത്, അജീഷ്, സുഗാന്ധി എന്നിവർ പ്രസംഗിച്ചു .

ഹരിപ്പാട് കുടിവെള്ളപദ്ധതി: തടസം ഒഴിവാക്കാന്‍ ഹൈക്കോടതിയിലെ കേസില്‍ കക്ഷി ചേര്‍ന്നതായി രമേശ് ചെന്നിത്തല

ഹരിപ്പാട്: ഭരണാനുമതി ലഭിച്ച ഹരിപ്പാട് കുടിവെള്ള പദ്ധതിയുടെ രണ്ടാം ഘട്ടത്തിന്‍റെ നിര്‍വഹണ തടസം ഒഴിവാക്കുന്നതിനായി ഇതു സംബന്ധിച്ച് ഹൈക്കോടതിയില്‍ നിലനില്‍ക്കുന്ന കേസില്‍ കക്ഷി ചേര്‍ന്നതായി രമേശ് ചെന്നിത്തല എംഎൽഎ അറിയിച്ചു. 2011 ല്‍ യുഡിഎഫ് സര്‍ക്കാരിന്‍റെ കാലത്താണ് ഈ പദ്ധതിക്ക് ഭരണാനുമതി ലഭിച്ചത്. ഹരിപ്പാട് മണ്ഡലത്തിലെ പത്ത് പഞ്ചായത്തിലും ഹരിപ്പാട് നഗരസഭയിലും കുടിവെള്ളം എത്തിക്കാനാണ് പദ്ധതിയിലൂടെ വിഭാനം ചെയ്തിരുന്നത്. ഹരിപ്പാട് കുടിവെള്ള പദ്ധതിയുടെ രണ്ടാം ഘട്ടം റീച്ച് ഒന്നിന്‍റെ ഭാഗമായി മാന്നാര്‍ ഇന്‍ടേക്ക് വെല്‍ മുതല്‍ പള്ളിപ്പാട് വാട്ടര്‍ ട്രീറ്റ്‌മെന്‍റ് പ്ലാന്‍റ് വരെ 800 മില്ലിമീറ്റര്‍ സ്‌പെറലി വെല്‍ഡഡ് എംഎസ് പൈപ്പ് വിതരണം ചെയ്ത് സ്ഥാപിക്കുന്ന പ്രവൃത്തിയുടെ ടെണ്ടര്‍ നടപടികള്‍ ഹൈക്കോടതിയില്‍ കേസ് നിലവിലുള്ളതിനാല്‍ പൂര്‍ത്തീകരിക്കാന്‍ സാധിക്കാത്ത സാഹചര്യത്തിലാണ് കേസില്‍ കക്ഷി ചേര്‍ന്നത്. മാന്നാറില്‍ ഇന്‍ടേക്ക് വെല്‍ സ്ഥാപിക്കുന്നതിനുള്ള സ്ഥലം വിട്ടുനല്‍കുന്നതിന് ആദ്യഘട്ടത്തില്‍ പ്രാദേശിക തലത്തില്‍ വലിയ എതിര്‍പ്പാണ് ഉയര്‍ന്നിരുന്നത്. വളരെ ശ്രമകരമായ ദൗത്യത്തിലൂടെയാണ് ഇതിനുള്ള സ്ഥലം വാട്ടര്‍ അഥോറിറ്റിക്കായി ഏറ്റെടുത്ത് കൈമാറിയത്. ഇന്‍ടേക്ക് വെല്ലില്‍ നിന്നും പള്ളിപ്പാട് വാട്ടര്‍ ട്രീറ്റ്‌മെന്‍റ് പ്ലാന്‍റിലേക്ക് പൈപ്പ് സ്ഥാപിക്കുന്നതിനുള്ള നിര്‍ണായക ഘട്ടം പൂര്‍ത്തീകരിച്ചെങ്കില്‍ മാത്രമേ പള്ളിപ്പാട് സ്ഥാപിച്ചിട്ടുള്ള ട്രീറ്റ്‌മെന്‍റ് പ്ലാന്‍റില്‍ വെള്ളം കൊണ്ടുവന്ന് ശുദ്ധീകരണം നടത്തി ഹരിപ്പാട് പഞ്ചായത്തിലെ വിവിധ പ്രദേശങ്ങളില്‍ കുടിവെള്ളം വിതരണം ചെയ്യാന്‍ സാധിക്കുകയുള്ളൂ. ഈ പ്രവൃത്തിക്കായി 25.11.2021 ല്‍ ആദ്യം ടെണ്ടര്‍ ക്ഷണിച്ചെങ്കിലും കരാറുകാരില്‍ നിന്നും പ്രതികരണം ലഭിക്കാത്തതിനെ തുടര്‍ന്ന് 21.01.2022 ലും 20.14.2022 ലും വീണ്ടും ടെണ്ടര്‍ ചെയ്തിരുന്നു. എന്നാല്‍ അതില്‍ പങ്കെടുത്ത കരാറുകാരന്‍ ഉയര്‍ന്ന നിരക്ക് ക്വോട്ട് ചെയ്തതിനാല്‍ ധനകാര്യവകുപ്പിന്‍റെ അംഗീകാരത്തോടെ കാബിനറ്റില്‍ തീരുമാനിക്കാനായി മുഖ്യമന്ത്രിക്ക് നല്‍കിയെങ്കിലും വീണ്ടും ടെണ്ടര്‍ ചെയ്യാനാണ് സര്‍ക്കാര്‍ നിര്‍ദേശിച്ചത്. ഇതിന്‍റെ അടിസ്ഥാനത്തില്‍ വീണ്ടും നിരവധി തവണ ടെണ്ടര്‍ ചെയ്‌തെങ്കിലും ആരും പങ്കെടുത്തിരുന്നില്ല. പിന്നീട് 23.07.2024 ലെ ടെണ്ടറില്‍ പങ്കെടുത്ത കരാറുകാരന് ടെണ്ടര്‍ സ്ഥരീകരിച്ച് നല്‍കുന്നതിനള്ള നടപടി പുരോഗമിക്കേ ഹൈക്കോടതിയില്‍ കേസ് വരികയായിരുന്നു. ടെണ്ടര്‍ സ്ഥിരീകരിക്കുന്നതിന് വാട്ടര്‍ അഥോറിറ്റി തയാറാവാത്ത സാഹചര്യത്തിലാണ് ഹൈക്കോടതിയില്‍ കേസിലെ കക്ഷിചേരാന്‍ താന്‍ തീരുമാനിച്ചതെന്നും പൊതുതാല്‍പര്യം മുന്‍നിറുത്തി ഇക്കാര്യത്തില്‍ ഹൈക്കോടതിയില്‍നിന്ന് അനുകൂല തീരുമാനം ഉണ്ടാകുമെന്നാണ് പ്രതീക്ഷയെന്നും രമേശ് ചെന്നിത്തല പറഞ്ഞു.

ജോസഫ് നീസ്ഫര്‍ നീപ്‌സിന്‍റെ സ്മാരകം ഉയരുന്നു

മാവേലിക്കര: ഫോട്ടോഗ്രഫിയുടെ കണ്ടുപിടുത്ത വഴിയില്‍ നിര്‍ണായക പങ്കുവഹിച്ച ജോസഫ് നീസ്ഫര്‍ നീപ്‌സിന് രാജ്യത്തെ ആദ്യ സ്മാരകം മാവേലിക്കരയില്‍ ഉയരുന്നു. ഫോട്ടോഗ്രാഫറും ചിത്രകാരനുമായ സജി എണ്ണക്കാടിന്‍റെ നേതൃത്വത്തില്‍ രൂപീകരിച്ച ജോസഫ് നീസ്ഫര്‍ നീപ്‌സ് ഫൗണ്ടേഷനാണ് മാവേലിക്കര വാത്തികുളത്ത് സ്മാരകം പണിതുയര്‍ത്തുന്നത്. അഞ്ചര സെന്‍റ് സ്ഥലത്ത് പാരീസിലുള്ള നീപ്‌സിന്‍റെ പുരാതനഗൃഹത്തിന്‍റെ മാതൃകയിലാണ് സ്മാരകം നിര്‍ക്കുന്നത്. ഇരു നില കെട്ടിടത്തിന്‍റെ താഴത്തെ നില ആര്‍ട്ട് ഗാലറിയാണ്. ജോസഫ് നീസ്ഫര്‍ നീപ്‌സിന്‍റെ ജീവിതരേഖ വിശദീകരിക്കുന്ന ചിത്രങ്ങളും മറ്റ് രേഖകളും ഗാലറിയില്‍ ഉണ്ടാകും. ലോകത്തിലെ ആദ്യത്തെ വിജയകരമായ ഫോട്ടോ നീപ്‌സ് എടുത്ത പോയിന്‍റെ ദെ വോ ദെല ഫെനിത്രെ എന്ന ചിത്രമാണെന്നും എന്നാല്‍ ഫോട്ടോഗ്രഫിയുടെ ഉദയം സംബന്ധിച്ച് അര്‍ഹമായ സ്ഥാനം ഇദ്ദേഹത്തിന് നിഷേധിക്കപ്പെട്ടെന്നും സംഘടന ഭാരവാഹികള്‍ പറഞ്ഞു. സ്മാകരത്തിന്‍റെ ശിലാ സ്ഥാപനം നാളെ വൈകുന്നേരം നാലിന് മുന്‍ ചീഫ് സെക്രട്ടറി കെ. ജയകുമാര്‍ നിര്‍വഹിക്കും. ഫൗണ്ടേഷന്‍ വൈസ് പ്രസിഡന്‍റ് ഡോ.ബിന്ദു ഡി. സനല്‍ അധ്യക്ഷത വഹിക്കും. എം.എസ്. അരുണ്‍കുമാര്‍ എംഎല്‍എ ജോസഫ് നീസ്ഫര്‍ നീപ്‌സിന്‍റെ അര്‍ധകായ വെങ്കല പ്രതിമ അനാഛാദനം ചെയ്യും. ജോസഫ് നീസ്ഫര്‍ നീപ്‌സിന്‍റെ ജീവചരിത്ര കൈപ്പുസ്തകം നരേന്ദ്ര പ്രസാദ് സ്മാരക നാടക പഠന ഗവേഷണ കേന്ദ്രം ഭരണ സമിതി അംഗം എസ്.അഖിലേഷ് എ.ആർ. സ്മാരക ഭരണ സമിതി അംഗം ബിനു തങ്കച്ചന് നല്‍കി പ്രകാശനം ചെയ്തു. വെങ്കല പ്രതിമയുടെ ശില്‍പി സി.എസ്. സുനില്‍കുമാറിനെ ചടങ്ങില്‍ ആദരിക്കുമെന്നും ഭാരവാഹികളായ സജി എണ്ണക്കാട്, കെ.ആർ. രാധാകൃഷ്ണന്‍, ഡോ. ബിന്ദു ഡി. സനല്‍, അനില്‍ അനന്തപുരി എന്നിവര്‍ അറിയിച്ചു.

മീൻപിടിക്കാൻ പോയ യുവാവ് വെള്ളക്കെട്ടിൽ വീണ് മരിച്ചു

ഹരിപ്പാട്: മീൻപിടിക്കാൻ പോയ യുവാവ് വെള്ളക്കെട്ടിൽ വീണ് മരിച്ചു. പിലാപ്പുഴ ചാക്കാട്ട് കിഴക്കതിൽ പാസ്റ്റർ രാജേഷ് പിള്ള - ജിജി ദമ്പതികളുടെ മകൻ സ്റ്റീവ് രാജേഷ് (23) ആണ് ഇന്നലെ പുലർച്ചെ രണ്ടോടെ ചൂരല്ലാക്കൽ കുരീത്തറ കുന്നിന് പടിഞ്ഞാറ് ഭാഗത്തുള്ള പറമ്പിക്കേരി എ ബ്ലോക്ക് പാടശേഖരത്തിലെ വെള്ളക്കെട്ടിൽ വീണ് മരിച്ചത്. സുഹൃത്തുക്കളായ രണ്ടു പേരുമൊത്ത് മീൻ പിടിക്കുന്നതിന് വലയിടാൻ വേണ്ടി ഫൈബർ വള്ളത്തിൽ പോയതാണെന്ന് ഹരിപ്പാട് പോലീസ് പറഞ്ഞു. സുവിശേഷ പ്രവർത്തകരായ മാതാപിതാക്കളോടും സഹോദരങ്ങളോടുമൊപ്പം ഒഡീഷയിലെ ഗംജം സെറാമ്പൂർ തുളസീനഗർ സെക്കൻഡ് ലൈനിലായിരുന്നു സ്റ്റീവിന്‍റെ താമസം. മൂന്നാഴ്ച മുമ്പ് സഹോദരി സ്റ്റെഫിയോടും മാതാപിതാക്കളോടുമൊപ്പം നാട്ടിലെത്തിയ സ്റ്റീവ് ഇന്നലെ തിരികെ പോകാനിരിക്കെയാണ് ദുരന്തമുണ്ടായത്. കൂടെയുണ്ടായിരുന്ന സുഹൃത്തുക്കൾ വള്ളത്തിലും സ്റ്റീവ് ദുരന്തമുണ്ടായ പാടശേഖരത്തിന്‍റെ സൈഡിലൂടെ നടന്നും പോകവേ കാൽ വഴുതി വെള്ളക്കെട്ടിലേക്ക് വീഴുകയായിരുന്നു. അപകടമുണ്ടായ ഉടൻ കൂടെ ഉണ്ടായിരുന്നവർ പരിസരവാസികളെ അറിയിച്ചുവെങ്കിലും കനത്ത മഴയും ഇരുട്ടും കാരണം തെരച്ചിൽ സാധ്യമായില്ല. വിവരമറിഞ്ഞ് സ്റ്റേഷൻ ഓഫീസർ കൃഷ്ണകുമാറിന്‍റെ നേതൃത്വത്തിൽ സ്ഥലത്തെത്തിയ ഹരിപ്പാട് ഫയർഫോഴ്സ് സംഘം രാവിലെ 6.30ഓടെ മൃതദേഹം മുങ്ങിയെടുക്കുകയായിരുന്നു. ഹരിപ്പാട് പോലിസ് സബ് ഇൻസ്പെക്ടർ ശ്രീകുമാറിന്‍റെ നേതൃത്വത്തിൽ ഇൻക്വസ്റ്റ് നടത്തി. പോസ്റ്റ്മോർട്ടത്തിനുശേഷം മൃതദേഹം ഹരിപ്പാട് ഗവ.ആശുപത്രി മോർച്ചറിയിൽ. സംസ്കാരം ചൊവ്വാഴ്ച രാവിലെ ഒൻപതിന് പള്ളിപ്പാട് ഡിപിഎംഡി അഡിക്‌ഷൻ സെന്‍റർ പ്രയർ ഹാളിൽ നടക്കുന്ന ശുശ്രൂഷയ്ക്ക് ശേഷം ഉച്ചയ്ക്ക് 12ന് ഐപിസി ആലപ്പുഴ ഈസ്റ്റിന്‍റെ കണ്ടിയൂർ സെമിത്തേരിയിൽ.

ബ്ലോക്ക് പ്രസിഡന്‍റിനെ സുരക്ഷിത സ്ഥലത്തേക്കു മാറ്റി

എടത്വ: വീടുകളിൽ വെള്ളം കയറിയതിനെത്തുടർന്ന് ബ്ലോക്ക് പഞ്ചായത്ത് പ്രസിഡന്‍റ് ഉൾപ്പെടെ പരസഹായം ആവശ്യമുള്ള ദുരിതബാധിതരെ സുരക്ഷിത സ്ഥലത്തേക്കു മാറ്റി. വെളിയനാട് ബ്ലോക്ക് പഞ്ചായത്ത് പ്രസിഡന്‍റ് വി.കെ. വേണുഗോപാൽ, തലവടി പഞ്ചായത്ത് 11-ാം വാർഡിൽ കണിയാമ്പറമ്പിൽ വിജയമ്മ എന്നിവരെയാണ് സന്നദ്ധ പ്രവർത്തകരുടെ സഹായത്തോടെ ക്യാമ്പിലേക്കു മാറ്റിയത്. വീട്ടിൽ വെള്ളം കയറിയതിനെത്തുടർന്ന് വി.കെ. വേണുഗോപാൽ എടത്വ പോലീസ് സ്റ്റേഷനിൽ വിളിച്ചറിയിച്ചിരുന്നു. പോലീസ് ബ്ലോക്ക് മെംബർ അജിത്ത് കുമാർ പിഷാരത്തിനെ വിവരം ധരിപ്പിച്ചു. അജിത്തിന്‍റെ നേതൃത്വത്തിൽ സേവാഭാരതി പ്രവർത്തകരും സന്നദ്ധ പ്രവർത്തകരും ചേർന്നു വി.കെ. വേണുഗോപാലിനെ സുരക്ഷിത സ്ഥലത്തേക്കു മാറ്റുകയായിരുന്നു. കിടപ്പുരോഗിയായ വിജയമ്മയെ വീട്ടിൽനിന്ന് വള്ളത്തിൽ കരയ്ക്കെത്തിച്ച് തലവടി ഗവ. ഹൈസ്കൂളിൽ പ്രവർത്തിക്കുന്ന ക്യാമ്പിലേക്കു മാറ്റിയിട്ടുണ്ട്. ശരത്ത്, പ്രമോദ്, സതീശൻ, അനന്തകൃഷ്ണൻ, സേവാഭാരതി പ്രവർത്തകരായ എം.എസ്. മധുസൂദനൻ, കെ. ബിജു, ഗോകുൽ, ബിനീഷ്, അനന്തു, രാഖിൽ രാജ്, കാർത്തിക് തുടങ്ങിയവർ സന്നദ്ധ പ്രവർത്തനങ്ങൾക്ക് നേതൃത്വം നൽകി.

മൂന്ന് എസ്‌ഐമാര്‍ വിരമിച്ചു

മാന്നാര്‍: പോലീസ് സ്റ്റേഷനിലെ മൂന്ന് എസ്‌ഐമാര്‍ സര്‍വീസില്‍നിന്നു വിരമിച്ചു. സബ് ഇന്‍സ്‌പെക്ടര്‍മാരായ വി.ജി. ഗിരീഷ് കുമാര്‍, ടി.ഡി. അനിരുദ്ധന്‍, അജി വി. പണിക്കര്‍ എന്നിവരാണ് ഇന്നലെ വിരമിച്ചത്. 33 വര്‍ഷത്തെ ഔദ്യോഗിക ജീവിതത്തിനുശേഷം വിരമിച്ച തിരുവല്ല പൊടിയാടി സ്വദേശിയായ ഗിരീഷ് കുമാറിന്‍റെ പിതാവ് വി.എന്‍. ഗോപിനാഥന്‍ നായരും എഎസ്‌ഐ ആയി വിരമിച്ചതു മാന്നാര്‍ പോലീസ് സ്റ്റേഷനില്‍ നിന്നായിരുന്നു. കറ്റാനം പള്ളിക്കല്‍ സ്വദേശിയായ എസ്‌ഐ അനിരുദ്ധന്‍ 31 വര്‍ഷത്തെ സര്‍വീസിനു ശേഷവും കറ്റാനം വെട്ടിക്കോട് സ്വദേശിയായ എസ്‌ഐ അജി വി. പണിക്കര്‍ 30 വര്‍ഷത്തെ സര്‍വീസിനു ശേഷവുമാണ് വിരമിച്ചത്. മാന്നാര്‍ പോലീസ് സ്റ്റേഷനില്‍ നടന്ന യാത്രയയപ്പ് സമ്മേളനം ചെങ്ങന്നൂര്‍ ഡിവൈഎസ്പി ബിനുകുമാര്‍ ഉദ്ഘാടനം ചെയ്തു. മാന്നാര്‍ പോലീസ് എസ്എച്ച്ഒ ഡി. രജീഷ് കുമാര്‍ അധ്യക്ഷത വഹിച്ചു. മാന്നാര്‍ പോലീസ് സ്റ്റേഷനില്‍നിന്നു സ്ഥലം മാറിപ്പോകുന്ന എസ്‌ഐ സി.എസ്. അഭിരാം, വനിത എഎസ്‌ഐ സ്വര്‍ണരേഖ, സാജിദ്, ഹരിപ്രസാദ്, ശ്രീനാഥ്, മനേഷ് മോഹന്‍, മനേക്ഷ എന്നിവരെ ചടങ്ങില്‍ ആദരിച്ചു. എഎസ്‌ഐ ഷമീര്‍, എസ്‌സിപിഒ സാജിദ്, സിപിഒ ശ്യാം, ഹോം ഗാര്‍ഡ് രമേശ്, പ്രൊബേഷന്‍ എസ്‌ഐ ജോബിന്‍, ഗ്രേഡ് എഎസ്‌ഐ സജി വര്‍ഗീസ് എന്നിവര്‍ പ്രസംഗിച്ചു.

മയക്കുമരുന്ന് വില്പന: പ്രധാന പ്രതി റിമാൻഡിൽ

ചാരുംമൂട്: എംഡിഎംഎ ഉള്‍പ്പെടെയുള്ള രാസലഹരി വില്പന നടത്തുന്ന സംഘത്തിലെ പിടിയിലായ പ്രധാന പ്രതി റിമാന്‍ഡില്‍. നൂറനാട് പാലമേല്‍ ഉളവുക്കാട് മറ്റപ്പള്ളി കുമ്പഴവീട്ടില്‍ വട്ടോളി എന്നു വിളിക്കുന്ന എസ്. അനൂപി(30)നെ എറണാകുളം തമ്മനത്തെ രഹസ്യകേന്ദ്രത്തില്‍നിന്ന് കഴിഞ്ഞ ദിവസമാണ് നൂറനാട് പോലീസ് ഇന്‍സ്‌പെക്ടര്‍ എസ്. ശ്രീകുമാറിന്‍റെ നേതൃത്വത്തിലുള്ള സംഘം അറസ്റ്റ് ചെയ്തത്. കഴിഞ്ഞ മാസം എംഡിഎംഎയുമായി പിടികൂടിയ പാലമേല്‍ എരുമക്കുഴി കാവില്‍ ശ്യാ(29)മിനെ ചോദ്യം ചെയ്തതില്‍നിന്നാണ് അനൂപിനെക്കുറിച്ചുള്ള വിവരം പോലീസിന് ലഭിച്ചത്. ബംഗളൂരുവില്‍ നിന്നായിരുന്നു ഇവര്‍ എംഡിഎംഎ എത്തിച്ചിരുന്നത്. അനേഷണ ഉദ്യോഗസ്ഥനായ ചെങ്ങന്നൂര്‍ ഡിവൈഎസ്പി എം.കെ. ബിനുകുമാര്‍ പ്രതി ശ്യാമിന്‍റെ ബാങ്ക് അക്കൗണ്ട് രേഖകള്‍ ശേഖരിച്ച് നടത്തിയ അമ്പേഷണത്തിലാണ് ബംഗളൂരുവിലെ ഇടപാടുകാരന്‍റെയും അനൂപിന്‍റെയും പങ്ക് വ്യക്തമായത്. 2019ല്‍ പന്തളത്തെ കവര്‍ച്ചാക്കേസിലും 2022ലെ നൂറനാട്ടെ വാഹനം കത്തിക്കല്‍ കേസിലും ഉള്‍പ്പെടെ നിരവധി കേസുകളില്‍ പ്രതിയായ അനൂപ് കഴിഞ്ഞ രണ്ടു വര്‍ഷമായി എറണാകുളം കേന്ദ്രീകരിച്ചാണ് പ്രവര്‍ത്തനമെന്നും പോലീസ് പറഞ്ഞു. അനൂപിനെ മാവേലിക്കര ജുഡീഷ്യല്‍ ഒന്നാം ക്ലാസ് മജിസ്‌ട്രേറ്റ് കോടതി-2 മുമ്പാകെ ഹാജരാക്കിയതിനെത്തുടര്‍ന്നാണ് റിമാന്‍ഡ് ചെയ്തത്. പിടിച്ചെടുത്ത മയക്കുമരുന്നിന്‍റെ ഉറവിടം കണ്ടെത്താന്‍ ഇയാളെ കസ്റ്റഡിയില്‍ വാങ്ങി അന്വേഷണം നടത്തുമെന്ന് പോലീസ് അറിയിച്ചു. പ്രതികള്‍ ലഹരികടത്തും വില്‍പ്പനയും വഴി ആര്‍ജിച്ച് ബിനാമി പേരിലും മറ്റും സ്വരുക്കൂട്ടിയിട്ടുള്ള സ്വത്തുക്കള്‍ കണ്ടെത്താനുള്ള പരിശോധനകളും പോലീസ് ശക്തമാക്കി.

മാവേലിക്കര ആര്‍ട്സ് ക്ലബ് അങ്കണവാടിക്കായി സ്ഥലം വിട്ടുനല്‍കി

മാവേലിക്കര: മാവേലിക്കര ആര്‍ട്സ് ക്ലബ് അങ്കണവാടിക്കായി സൗജന്യമായി സ്ഥലം വിട്ടുനല്‍കി. 1981ല്‍ കലാ, സാംസ്‌കാരിക, കായിക പ്രവര്‍ത്തനങ്ങളെ പരിപോഷിപ്പിക്കുവാനായി മാവേലിക്കരയിലെ പൗരാവലി പടുത്തുയര്‍ത്തിയതായിരുന്നു മാവേലിക്കര ആര്‍ട്സ് ക്ലബ്. പ്രഫ. ആര്‍. നരേന്ദ്ര പ്രസാദ് ഉള്‍പ്പെടെയുള്ള മഹാരഥന്മാര്‍ ക്ലബ്ബിന്‍റെ അമരക്കാരായിരുന്നു. കേളി എന്ന നിലവിലെ മാവേലിക്കരയിലെ ഏറ്റവും പ്രശസ്തമായ സംഘടനയും ഉദയംകൊള്ളുന്നത് മാവേലിക്കര ആര്‍ട്സ് ക്ലബ്ബില്‍നിന്നായിരുന്നു. എം.പി. ചെല്ലപ്പന്‍നായര്‍ സ്മാരകസമിതി ഉള്‍പ്പെടെയുള്ള സാംസ്‌കാരിക സംഘടനകളും ഇതിന്‍റെ ഭാഗമായിരുന്നു. ക്ലബ് 1997ല്‍ ആസ്ഥാന മന്ദിര നിര്‍മാണത്തിനായി വാങ്ങിയതായിരുന്നു പൊന്നാരംതോട്ടം അമ്പലത്തിന് സമീപമായുള്ള ഈ വസ്തു. അന്ന് എന്‍.എന്‍. പിള്ളയുടെ ബൂമറാംഗ് എന്ന നാടകം മാവേലിക്കരയില്‍ പ്രദര്‍ശിപ്പിച്ചാണ് വസ്തു വാങ്ങുവാനുള്ള പണം സമാഹരിച്ചത്. തുടര്‍ന്നും ക്ലബ് പ്രവര്‍ത്തിച്ചു വന്നെങ്കിലും ആസ്ഥാന മന്ദിരം ഇവിടെ പണിയാനായി സാധിച്ചില്ല. മാവേലിക്കര മുനിസിപ്പാലിറ്റി 20-ാം വാര്‍ഡിലെ 111-ാം നമ്പര്‍ താലോലം അങ്കണവാടി വാടകക്കെട്ടിടത്തില്‍ പ്രവര്‍ത്തിക്കുന്നതായി അറിഞ്ഞ ക്ലബ് ഭാരവാഹികള്‍ അങ്കണവാടിക്ക് കെട്ടിടം പണിയുന്നതിനായി മാവേലിക്കര മുനിസിപ്പാലിറ്റിക്ക് സ്ഥലം കൈമാറാന്‍ ഐകകണ്ഠ്യേന തീരുമാനമെടുക്കുകയായിരുന്നു. പ്രസിഡന്‍റ് പ്രഫ. ജി. ചന്ദ്രശേഖരന്‍ നായര്‍, സെക്രട്ടറി രാമചന്ദ്രന്‍പിള്ള, ട്രഷറര്‍ പ്രഫ. ലക്ഷ്മി നാരായണ അയ്യര്‍ എന്നിവരുടെ നേതൃത്വത്തില്‍ സിവില്‍ സ്റ്റേഷന്‍ റെസിഡന്‍റ്സ് അസോസിയേഷന്‍ വാര്‍ഷിക സമ്മേളന പരിപാടിക്കിടെ മാവേലിക്കര മുനിസിപ്പല്‍ ചെയര്‍മാന്‍ നൈനാന്‍ സി. കുറ്റിശേരിക്ക് ആധാരം കൈമാറി.

പുതിയ അധ്യയന വർഷത്തിൽ വിദ്യാർഥികളെ കാത്തിരിക്കുന്നത് ഹൈടെക് ക്ലാസ് മുറികൾ

ആലപ്പുഴ: പുതിയ അധ്യയന വർഷത്തിൽ ക്ലാസിലെത്തുന്ന വിദ്യാർഥികളെ കാത്തിരിക്കുന്നത് ഹൈടെക് ക്ലാസ് മുറികൾ. പ്രീപ്രൈമറി മുതൽ എൽപി വിഭാഗം വരെ എല്ലാ ക്ലാസ് മുറിയും ഹൈടെക്കാക്കി ജില്ലയ്ക്ക് അഭിമാനമാകുകയാണ് ഈ പൊതു വിദ്യാലയം. പുന്നപ്ര ഗവ. ജെബി സ്കൂളാണ് എല്ലാ ക്ലാസ് മുറിയും ഹൈടെക് ആക്കിയത്. 500ഓളം വിദ്യാർഥികൾ പഠിക്കുന്ന ഈ വിദ്യാലയത്തിൽ പഴയ നാല് ഹൈടെക് ക്ലാസ് മുറികൾ ഉൾപ്പെടെ 19 ക്ലാസ് മുറികളാണ് ഏഴു ലക്ഷം രൂപ ചെലവിൽ ഹൈടെക്കാക്കി മാറ്റിയത്. പൊതുജന പങ്കാളിത്തത്തോടെ സ്കൂൾ വികസന സമിതിയുടെയും എസ്എംസിയുടെയും നേതൃത്വത്തിലാണ് സ്കൂളിനെ ആധുനികവത്കരിച്ചത്. മുപ്പതോളം കംപ്യൂട്ടറുകൾ ഉൾക്കൊള്ളുന്ന കംപ്യൂട്ടർ ലാബിന്‍റെ നിർമാണ പ്രവർത്തനങ്ങൾ ആരംഭിച്ചിട്ടുണ്ട്. രണ്ടു മാസത്തിനകം കംപ്യൂട്ടർ ലാബ് പ്രവർത്തനസജ്ജമാകുമെന്ന് പ്രഥമാധ്യാപിക കെ. മല്ലിക, അധ്യാപകൻ എ.പി. മുഹ്സിൻ, എസ്എംസി അംഗം എം.എം. അഹമ്മദ് കബീർ എന്നിവർ അറിയിച്ചു. നാളെ രാവലെ പത്തിന് സമ്പൂർണ ഹൈടെക് പദ്ധതിയുടെ ഉദ്ഘാടനവും പഞ്ചായത്തുതല പ്രവേശനോത്സവവും പുന്നപ്ര തെക്ക് പഞ്ചായത്ത് പ്രസിഡന്‍റ് പി.ജി. സൈറസ് ഉദ്ഘാടനം ചെയ്യും. എസ്എംസി ചെയർമാൻ എസ്. രതീഷ് അധ്യക്ഷത വഹിക്കും. ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ എൻ.കെ. ബിജുമോൻ മുഖ്യപ്രഭാഷണം നടത്തും. തുടർന്ന് ലഹരിവിരുദ്ധ സന്ദേശമടങ്ങിയ കുട്ടികളുടെ ഫ്ലാഷ് മോബ്, പ്രതിജ്ഞ എന്നിവയും നടക്കും.

സഹപ്രവര്‍ത്തകരോടുള്ള സ്‌നേഹംകൊണ്ട് യാത്രയയപ്പ് ഒഴിവാക്കി ഡെപ്യൂട്ടി തഹസില്‍ദാര്‍

കുട്ടനാട്: ഇരുപത്താറു വര്‍ഷത്തെ സേവനത്തിനു ശേഷം എം.എം. ആന്‍റണി സര്‍ക്കാര്‍ ഓഫീസിന്‍റെ പടികളിറങ്ങി. വിടപറഞ്ഞ സഹപ്രവര്‍ത്തകരോടുള്ള സ്‌നേഹ ബഹുമാന സൂചകമായി, പ്രത്യേകിച്ചു തന്‍റെ മേലുദ്യോഗസ്ഥനായിരുന്ന നവീന്‍ ബാബുവിനോടുള്ള ആദരസൂചകമായി യാത്രയയപ്പിന്‍റെ ചടങ്ങുകള്‍ അദ്ദേഹം പൂര്‍ണമായും ഒഴിവാക്കി. ചമ്പക്കുളം സ്വദേശിയായ എം.എം. ആന്‍റണി ഡെപ്യൂട്ടി തഹസില്‍ദാറാണ്. അകാരണമായി പൊതുവേദിയില്‍ അപമാനിതനായി തല കുനിച്ച് ഇറങ്ങിപ്പോയി ജീവന്‍ അവസാനിപ്പിച്ച മേലുദ്യോഗസ്ഥനോടുള്ള ആദരസൂചകമായും റവന്യുവകുപ്പിലെ ജോലിയുടെ സമ്മര്‍ദം താങ്ങാനാവാതെ സ്വയം ജീവന്‍ അവസാനിപ്പിച്ചവരെക്കൂടി ഓര്‍മിച്ചുമാണ് ഈ ഉദ്യോഗസ്ഥന്‍ യാത്രയയപ്പ് ചടങ്ങുകളും സമ്മാനങ്ങളും വേണ്ടെന്നുവച്ചത്. എഴുത്തുകാരന്‍ കൂടിയായ ഇദ്ദേഹം 2018ലെ പ്രളയ അനുഭവങ്ങളെ അടിസ്ഥാനപ്പെടുത്തി ഒരു പുസ്തകം പുറത്തിറക്കിയിരുന്നു. ദിനപ്പത്രങ്ങളിലും മാസികകളിലും കുട്ടനാടിന്‍റെ പ്രശ്‌നങ്ങളെപ്പറ്റിയും മറ്റു ചരിത്രവസ്തുതകളെ അടിസ്ഥാനപ്പെടുത്തിയും നിരവധി ലേഖനങ്ങള്‍ എഴുതിയിട്ടുണ്ട്. മൂന്ന് പുസ്തകങ്ങള്‍ പ്രസിദ്ധികരിച്ചിട്ടുണ്ട്. ചങ്ങനാശേരി അതിരൂപത പാസ്റ്ററല്‍ കൗണ്‍സില്‍ എക്‌സിക്യൂട്ടീവ് അംഗം കൂടിയായ ഇദ്ദേഹം ചമ്പക്കുളത്തിന്‍റെ സാമുഹ്യസേവന മുഖമായ മഡോണ ചാരിറ്റബിള്‍ ട്രസ്റ്റിന്‍റെ സജീവ പ്രവര്‍ത്തകനാണ്.

രാസലഹരി വ്യാപനത്തിനു പിന്നിൽ അന്താരാഷ്‌ട്ര ഗൂഢാലോചനയെന്ന്

മുഹമ്മ: ഇന്ത്യയുടെ മനുഷ്യവിഭവശേഷി തകർക്കുന്നതിനുള്ള അന്താരാഷ്‌ട്ര ഗൂഢാലോചനയാണ് രാസലഹരി വ്യാപനത്തിന് പിന്നിലെന്ന് റിട്ട. എക്സൈസ് ഡെപ്യൂട്ടി കമ്മീഷണർ സുരേഷ് റിച്ചാർഡ് പറഞ്ഞു. കായിപ്പുറം സൗഹൃദവേദി വായനശാലയുടെ ലഹരിവിരുദ്ധ സെമിനാർ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ലഹരിക്കേസുകളിലെ തൊണ്ടിമുതലിന്‍റെ പരിശോധനാ ഫലം ചുരുങ്ങിയ ദിവസങ്ങൾക്കുള്ളിൽ ലഭിക്കേണ്ടതാണെങ്കിലും മാസങ്ങളും വർഷങ്ങളുമെടുത്താണ് ലഭിക്കുന്നത്. ഇത് കുറ്റവാളികൾ രക്ഷപ്പെടാൻ വഴിയൊരുക്കുന്നുണ്ടെന്ന് അദ്ദേഹം പറഞ്ഞു. അമോണിയം ക്ലോറൈഡ് പോലുള്ള മാരക വിഷങ്ങൾ കലർന്ന രാസലഹരിയാണ് കുട്ടികൾ ഉൾപ്പെടെയുള്ളവർ ഉപയോഗിക്കുന്നത്. മദ്യ നിർമാണ ശാലകൾ സമൂഹത്തിന് താങ്ങാനാവാത്ത പാരിസ്ഥിതി പ്രശ്നങ്ങൾ സൃഷ്ടിക്കുമെന്നും അദ്ദേഹം പറഞ്ഞു. ബി. ത്രിവിക്രമൻ അധ്യക്ഷത വഹിച്ചു. കെ.വി. ദയാൽ, എക്സൈസ് സർക്കിൾ ഇൻസ്പെക്ടർ സുനിൽകുമാർ, വായനശാലാ പ്രസിഡന്‍റ് ടി. കുഞ്ഞുമോൻ, എം.എസ്. ലത, വിനോമ്മ രാജു, ഷൈല ഷാജി, സേതു ഭായി, കെ.ആർ. പ്രതാപൻ, എം. രമേശ്, ആർ. വിനോദ്, പി. പ്രവീൺ എന്നിവർ പ്രസംഗിച്ചു.

പമ്പാനദി പുനരുദ്ധാരണത്തിനായി പ്രത്യേക പദ്ധതി: കൊടിക്കുന്നിൽ സുരേഷ് എംപി

മാവേലിക്കര: പമ്പാനദിയുടെ പുനരുദ്ധാരണത്തിനും സംരക്ഷണത്തിനുമായി പ്രത്യേക കേന്ദ്ര പദ്ധതി വേണമെന്ന കൊടിക്കുന്നിൽ സുരേഷ് എംപിയുടെ ആവശ്യത്തിന് ദേശീയ നദീസംരക്ഷണ പദ്ധതി (എൻആർസിപി) പ്രകാരം പിന്തുണ നൽകുമെന്ന് കേന്ദ്ര ജലശക്തി മന്ത്രി സി.ആർ. പാട്ടീൽ ഉറപ്പുനൽകി. മലിനീകരണം കുറയ്ക്കുന്നതിനും സംരക്ഷണ പ്രവർത്തനങ്ങൾക്കുമായി കേരള സർക്കാരിന്‍റെ കൂടുതൽ നിർദേശങ്ങൾ പരിഗണിക്കുമെന്നും പദ്ധതി മാർഗനിർദേശങ്ങൾ, മുൻഗണന, മൂന്നാംകക്ഷി വിലയിരുത്തൽ, ഫണ്ടുകളുടെ ലഭ്യത എന്നിവയ്ക്ക് വിധേയമായിരിക്കുമെന്നും മന്ത്രി പറഞ്ഞു. മലിനജലത്തിന്‍റെയും മാലിന്യ സംസ്കരണത്തിന്‍റെയും പ്രാഥമിക ഉത്തരവാദിത്വം സംസ്ഥാന സർക്കാരിനും തദ്ദേശ സ്വയംഭരണ സ്ഥാപനങ്ങൾക്കുമാണെന്ന് അദ്ദേഹം വ്യക്തമാക്കി. മന്ത്രാലയത്തിന്‍റെ പ്രതികരണത്തെ സ്വാഗതം ചെയ്ത കൊടിക്കുന്നിൽ സുരേഷ്, പമ്പാനദിയുടെ ദീർഘകാല പുനരുദ്ധാരണത്തിനായി കേന്ദ്രസഹായം നേടുന്നതിന് സമഗ്രമായ നിർദേശം സമർപ്പിച്ചു വേഗത്തിൽ പ്രവർത്തിക്കണമെന്ന് സംസ്ഥാന സർക്കാരിനോട് ആവശ്യപ്പെട്ടു. ഇത് സംബന്ധിച്ച് സംസ്ഥാന ജലവിഭവമന്ത്രിക്ക് കത്ത് നൽകിയതായും അദ്ദേഹം കൂട്ടിച്ചേർത്തു.

മൂടിയില്ലാത്ത ഓട യാത്രക്കാർക്ക് കെണിയാകുന്നു

ഹരിപ്പാട്: ഓടയുടെ ഒരു വശത്ത് മേൽമൂടിയില്ലാത്തത് യാത്രക്കാർക്കും നാട്ടുകാർക്കും ഭീഷണിയാകുന്നു. മുതുകുളം തെക്ക് മങ്ങാട്ടുമുക്ക്-ആലുംചുവട് റോഡിനോടു ചേർന്ന് കരുണാമുറ്റം ക്ഷേത്രത്തിനു കിഴക്കുഭാഗത്തു നിർമിച്ച ഓടയാണ് കെണിയാകുന്നത്. ജലനിർഗമന മാർഗങ്ങളെല്ലാംഅടഞ്ഞുപോയതിനാൽ കാലവർഷക്കാലത്ത് പ്രദേശത്ത് ക്രമാതീതമായി ജലനിരപ്പുയരുകയും വീടുകളിൽ വെള്ളം കയറുകയും ചെയ്യും. ഇതിനു പരിഹാരമായാണ് തെക്കുഭാഗത്തേക്ക് ജലം ഒഴുകിമാറാനായി അടുത്തിടെ ഇവിടെ ഓട നിർമിച്ചത്. മുകളിൽ മൂടിയിട്ടെങ്കിലും റോഡിനോടു ചേർന്നുള്ള കുറച്ചുഭാഗം തുറന്നുകിടക്കുകയാണ്. നൂറുകണക്കിനു പേർ കായംകുളം-കാർത്തികപ്പള്ളി റോഡിലേക്കും കരുണാമുറ്റം ക്ഷേത്രത്തിലേക്കും പോകുന്ന റോഡാണിത്. അതിനാൽ ഇതുവഴി പോകുന്ന കാൽനടക്കാർ ഉൾപ്പെടെയുള്ളവർക്ക് അപകടമുണ്ടാകാനുള്ള സാധ്യതയേറെയാണ്. തെക്കുഭാഗത്തുള്ള താമസക്കാരും ഓടയ്ക്കു സമീപത്തുകൂടിയാണ് വീടുകളിലേക്കു പോകുന്നത്. ഇവർക്കും മൂടിയില്ലാത്തത് ഭീഷണിയാണ്. മുന്നറിയിപ്പു നൽകാനായി നാട്ടുകാർ ഇവിടെ കൊടി വച്ചിട്ടുണ്ടെങ്കിലും കുറച്ചുകൂടി ജലനിരപ്പുയർന്നാൽ യാത്രക്കാർക്ക് ഓട കാണാൻ കഴിയാത്ത സ്ഥിതിയുണ്ടാകും. ഇത് വലിയ അപകടത്തിനു കാരണമാകുമെന്നാണ് പ്രദേശവാസികൾ പറയുന്നത്.

മഴ വിട്ടുനിന്നെങ്കിലും അപ്പർ കുട്ടനാട്ടിൽ ജലനിരപ്പിനു മാറ്റമില്ല

എടത്വ: മഴ അല്പം വിട്ടുനിന്നെങ്കിലും അപ്പർ കുട്ടനാട്ടിൽ ജലനിരപ്പിനു മാറ്റമില്ല. കലിതുള്ളിയെത്തിയ കാലവർഷം കുട്ടനാടിനെ മുക്കിയെങ്കിലും ഇന്നലെ ഉച്ചയ്ക്ക് ശേഷം മഴയ്ക്ക് നേരിയ ശമനം. ആറു ദിവസമായി പെയ്യുന്ന കനത്ത മഴയിലും കിഴക്കൻ വെള്ളത്തിന്‍റെ കുത്തൊഴുക്കിലും അപ്പർ കുട്ടനാട് മേഖലയിലെ ജലനിരപ്പ് അപകട നിലയിൽ എത്തിയിരുന്നു. പമ്പ, മണിമല, അച്ചൻകോവിലാറുകൾ കര കവിഞ്ഞതോടെ ഒട്ടുമിക്ക പഞ്ചായത്തുകളും വെള്ളത്തിൽ മുങ്ങി. നൂറുകണക്കിനു വീടുകളിലാണ് വെള്ളം കയറിയത്. വെള്ളിയാഴ്ച രാവിലെ മുതൽ മിക്ക പഞ്ചായത്തിലും ദുരിതാശ്വസ ക്യാമ്പുകൾ ആരംഭിച്ചിരുന്നു. വൈകിട്ടോടെ നിരവധി കുടുംബങ്ങളാണ് ക്യാമ്പുകളിൽ എത്തിയത്. ഇന്നലെ രാവിലെയും നിരവധി കുടുംബങ്ങൾ ക്യാമ്പുകളിൽ എത്തിയിരുന്നു. നൂറുകണക്കിന് കുടുംബങ്ങൾ രണ്ടു ദിവസമായി ബന്ധുവീടുകളിൽ അഭയം തേടുന്നുണ്ട്. വെള്ളിയാഴ്ച രാത്രി മുതൽ ഇന്നലെ ഉച്ചവരെ തോരാതെ മഴ പെയ്തിരുന്നു. ഉച്ചയോടു കൂടിയാണ് മഴയ്ക്ക് അല്പം ശമനമുണ്ടായത്. മഴ ശമിച്ചെങ്കിലും മുടിക്കെട്ടിയ അന്തരീക്ഷമാണ് കാണപ്പെടുന്നത്. പത്തനംതിട്ടയിൽ നേരിയ തോതിൽ ജലനിരപ്പ് കുറഞ്ഞിരുന്നു. കിഴക്കൻ മേഖലയിൽനിന്ന് ഒഴുകിയെത്തുന്ന വെള്ളം കടലിലേക്ക് ഒഴിഞ്ഞു പോകാനുള്ള കാലതാമസമാണ് ജലനിരപ്പിന് കാര്യമായ മാറ്റം സംഭവിക്കാത്തത്. വരും ദിവസങ്ങളിൽ മഴയുടെ തീവ്രത കുറയുമ്പോൾ ജലനിരപ്പ് കുറയുമെന്നാണ് കുട്ടനാട്ടുകാരുടെ പ്രത്യാശ. തോട്ടപ്പള്ളി പൊഴി മുറിക്കൽ സമയബന്ധിതമായി പൂർത്തിയാക്കാത്തതാണ് അപ്പർ കുട്ടനാട്ടിലെ ജലനിരപ്പിന് മാറ്റമില്ലാതെ തുടർന്നത്. ഇക്കുറി പ്രധാന ഡാമുകൾ തുറന്ന് വെള്ളം ഒഴുക്കിവിടേണ്ട അവസ്ഥ സംജാതമായില്ലെങ്കിലും അപ്പർ കുട്ടനാട്ടിൽ ജലനിരപ്പ് അപകട നിലയിൽ എത്തിയിരുന്നു. മുട്ടാർ, തലവടി, എടത്വ, വീയപുരം, തകഴി പഞ്ചായത്തിലാണ് കാര്യമായ ദുരിതം നേരിടേണ്ടി വന്നത്. കാലവർഷം എത്തും മുൻപേ വീശിയടിച്ച ശക്തമായ കാറ്റിൽ അപ്പർ കുട്ടനാട്ടിൽ നൂറിലേറെ വീടുകൾ തകർന്നിരുന്നു. 25ഓളം വീടുകൾ താമസയോഗ്യമല്ലാത്ത നിലയിൽ എത്തിയിരുന്നു. പൂർണ തകർച്ച നേരിട്ട വീടുകളിലെ താമസക്കാർ അയൽപക്കത്തും ബന്ധുവീടുകളിലുമാണ് കഴിയുന്നത്. കാലവർഷത്തിന്‍റെ വരവറിയിച്ച് എത്തിയ കാറ്റ് വീടുകൾക്ക് മാത്രമല്ല കരകൃഷിയും വ്യാപകമായി തകർത്തിരുന്നു. കാറ്റിനു പിന്നാലെ എത്തിയ കനത്ത മഴ തകർച്ചയുടെ പൂർണതയിൽ എത്തി. പ്രളയ സമാനമായ അന്തരീക്ഷമാണ് കഴിഞ്ഞ ആറു ദിനങ്ങളായി അപ്പർ കുട്ടനാട്ടുകാർ അനുഭവിക്കുന്നത്. വീണ്ടും മഴ കനത്താൽ അപ്പർ കുട്ടനാട്ടുകാർ ഒന്നടങ്കം വീടുവിട്ടിറങ്ങേണ്ടി വരും.

അച്ചൻകോവിലാറ്റിൽ ജലനിരപ്പുയർന്നു; നിരവധി വീടുകൾ വെള്ളത്തിൽ

ചാരുംമൂട്: കനത്ത മഴയെത്തുടര്‍ന്ന് അച്ചന്‍കോവിലാറ്റില്‍ ജലനിരപ്പ് ഉയര്‍ന്നതോടെ നൂറനാട് പഞ്ചായത്തിന്‍റെ വടക്കന്‍ മേഖലയായ ആറ്റുവ വാര്‍ഡിലെ പത്തിലേറെ വീടുകള്‍ വെള്ളത്തിലായി. അച്ചന്‍കോവിലാറ്റിലെ ചേന്നാത്ത് കടവുവഴിയാണ് ഇവിടെ വെള്ളംകയറിയത്. ആറ്റുവ നന്ദനത്തില്‍ പുഷ്പനാഥന്‍, പഴവൂര്‍ വിനോദ്കുമാര്‍, പൂനംതറയില്‍ രാധാകൃഷ്ണന്‍, പ്രവീണ്‍ഭവനം പ്രസാദ്, വല്യത്ത് സജീവ്കുമാര്‍, പൂനംതറയില്‍ സരോജിനി, വല്യത്ത് ശ്രീധരന്‍ നായര്‍, വല്യത്ത് ഗോപകുമാര്‍, മാമ്പറയില്‍ സുരേഷ്‌കുമാര്‍, വല്യത്ത് വടക്കേതില്‍ റിജു ജേക്കബ് തുടങ്ങിയവരുടെ വീടുകളിലാണ് വെള്ളം കയറിയത്. വാര്‍ഡിലെ റോഡുകളും വെള്ളത്തിലായി. മഴ തുടര്‍ന്നാല്‍ വെള്ളം മാവേലിക്കര-പന്തളം റോഡിലെത്തും. ആറ്റുവ, ചെറുമുഖ, ഐരാണിക്കുടി, ഇടപ്പോണ്‍ ഭാഗങ്ങളിലെ ഏക്കറുകക്കണക്കിനു സ്ഥലത്തെ കൃഷിയും വെള്ളത്തിലായിട്ടുണ്ട്. കര്‍ഷകര്‍ക്ക് ലക്ഷക്കണക്കിനു രൂപയുടെ കൃഷിനാശമാണുണ്ടായിട്ടുള്ളത്. മൂന്നു വശവും അച്ചന്‍കോവിലാറിനാല്‍ ചുറ്റപ്പെട്ട സ്ഥലമാണ് ആറ്റുവ. മഴയെത്തുടര്‍ന്ന് എല്ലാ വര്‍ഷവും രണ്ടു പ്രാവശ്യമെങ്കിലും ആറ്റുവയില്‍ വെള്ളം കയറും. അച്ചന്‍കോവിലാറ്റിലെ ചേന്നാത്ത് കടവില്‍ ചീപ്പു നിര്‍മിച്ച് അരീത്തോടുവഴി ആറ്റുവയിലേക്ക് വെള്ളം കയറുന്നതു തടയുകയാണ് പരിഹാരം. ചേന്നാത്ത് കടവിന്‍റെ ഇരുഭാഗത്തും ഭൂവസ്ത്രം വിരിച്ച് ഒന്നര കിലോമീറ്റര്‍ ദൂരത്തില്‍ ബണ്ട് നിര്‍മിച്ചതോടെ ആ ഭാഗത്തുകൂടി വെള്ളം കയറുന്നതിനു പരിഹാരമായിരുന്നു. എന്നാല്‍, ചെന്നാത്ത് കടവുവഴി വെള്ളം കയറുകയാണ്. എല്ലാ വര്‍ഷവും ഇവിടെയുള്ള കുടുംബങ്ങളെ സമീപത്തുള്ള സ്‌കൂളിലെ ദുരിതാശ്വാസ ക്യാമ്പിലേക്ക് മാറ്റുകയാണു പതിവ്. വീടുകള്‍ക്ക് ലക്ഷക്കണക്കിനു രൂപയുടെ അറ്റകുറ്റപ്പണിയും വേണ്ടിവരുന്നു. വീട്ടുപകരണങ്ങളും സാധനങ്ങളും നശിക്കുന്നു. വളര്‍ത്തുമൃഗങ്ങളും ദുരിതത്തിലാകും.

പ്രളയബാധിതർക്കു കൈത്താങ്ങായി ഇൻഫാം ക്രിസ്

മങ്കൊമ്പ്: കാലം തെറ്റിയെത്തിയ അതിവർഷത്തിന്‍റെ കെടുതികളിൽ മരവിച്ചു നിൽക്കുന്ന കുട്ടനാടൻ ജനതയ്‌ക്കൊപ്പം എന്നുമുണ്ടാകുമെന്ന് ചങ്ങനാശേരി അതിരൂപത മെത്രാപ്പോലീത്ത മാർ തോമസ് തറയിൽ. മാമ്പുഴക്കരി ക്രിസ് ഇൻഫാം സെന്‍ററിൽ വെള്ളപ്പൊക്ക ദുരിതാശ്വാസ പ്രവർത്തനങ്ങളുടെ വിലയിരുത്തൽ നടത്തുകയായിരുന്നു അദ്ദേഹം. കുട്ടനാടൻ ജനത ഇന്നു നേരിടുന്ന ഈ ഭീകരാവസ്ഥ പരിസ്ഥിതി ആഘാതങ്ങളുടെ പഠനവും കൃത്യമായ പ്ലാനിംഗും ഇല്ലാതെയുള്ള വികസനത്തിന്‍റെയും പദ്ധതികളിൽ ഉണ്ടാവുന്ന വീഴ്ചകളുടെയും ഫലമാണ്. കുട്ടനാടിനെ എന്നും ഹൃദയത്തോട് ചേർത്തുപിടിച്ചുകൊണ്ടാണ് ചങ്ങനാശേരി അതിരൂപത മുന്നോട്ടു നീങ്ങുന്നത്. കുട്ടനാട്ടിൽ ഇപ്പോൾ ദുരിതാവസ്ഥയിൽ കഴിയുന്ന എല്ലാ കർഷകരെയും സഹായിക്കുവാൻ അതിരൂപത പ്രതിജ്ഞാബദ്ധമാണ്. സാധ്യമായ എല്ലാ സഹായങ്ങളും ലഭ്യമാക്കാൻ ക്രിസ്, ഇൻഫാം, ചാസ്, എകെസിസി തുടങ്ങിയ എല്ലാ സംഘടനകളെയും കോർത്തിണക്കിക്കൊണ്ട് ഒരു സംവിധാനം ഒരുക്കും. ദൂരദേശങ്ങളിലേക്കുള്ള ക്യാമ്പുകളിൽ പോയി ആളുകൾ ബുദ്ധിമുട്ടാതിരിക്കുവാൻ സൗകര്യപ്രദമെങ്കിൽ പള്ളികളുടെ എല്ലാ പാരിഷ് ഹാളുകളും സർക്കാർ ഇടപെടുകയാണെങ്കിൽ ക്യാമ്പുകൾ തുറക്കാൻ വിട്ടുകൊടുക്കുവാൻ തയാറാണ്. വെള്ളപ്പൊക്കക്കെടുതികൾ അനുഭവിക്കുന്ന കുട്ടനാടൻ ജനതയുടെ ദുരന്തത്തിലും ദുഃഖങ്ങളിലും സർക്കാർ അടിയന്തരമായി ഇടപെടണം. ഇനിയൊരു വെള്ളപ്പൊക്ക ദുരിതം ഉണ്ടാകാതിരിക്കാനുള്ള നടപടികൾ കാലേകൂട്ടി ചെയ്യണം. സാധാരണഗതിയിൽ മേയ് 15ഓടുകൂടി വെള്ളം ഒഴുകി മാറുവാൻ വേണ്ടി തോട്ടപ്പള്ളി പൊഴി മുറിക്കുന്ന രീതിയുണ്ട്. അത് ഇത്തവണയും തുടർന്നിരുന്നുവെങ്കിൽ ദുരിതം ഇത്രയധികം ശക്തമാവില്ലായിരുന്നു. നെൽകർഷകരുടെ നെല്ലിന്‍റെ വില ലഭ്യമാകാത്ത സാഹചര്യത്തിൽ ദുരന്തത്തിന്‍റെ ഭീകരത വീണ്ടും വർധിക്കുന്നു. മാർച്ച് 15ന് ശേഷം പിആർഎസ് ലഭ്യമായവരുടെ നെല്ലുവില നൽകാനുള്ള നടപടികൾ ത്വരിതഗതിയിൽ സ്വീകരിക്കണം. രണ്ടാം കൃഷിക്കായി ഒരുങ്ങുന്ന പാടശേഖരങ്ങളിൽ കാർഷിക പ്രവർത്തനങ്ങൾക്ക് ആവശ്യമായ നടപടികളും സ്വീകരിക്കണം. പമ്പിംഗ് സംവിധാനമൊരുക്കണം. ഒഴുകിവരുന്ന വെള്ളം ഒഴിഞ്ഞുമാറുന്നതിനായി തോടുകളും ആറുകളും കായലുകളും ആഴം കൂട്ടണം. ഇങ്ങനെയുള്ള നടപടികൾ പഞ്ചായത്ത് അടിസ്ഥാനത്തിൽ നടത്തി അതിന്‍റെ പുരോഗതി പരിശോധിക്കാൻ ജില്ലാ കളക്ടർ അടിയന്തര നടപടികൾ സ്വീകരിക്കണം. ജനപ്രതിനിധികളെ ഏകോപിപ്പിച്ചുകൊണ്ട് ദുരിതമനുഭവിക്കുന്ന പ്രദേശങ്ങളിൽ വെള്ളം എത്രയും പെട്ടെന്ന് ഒഴുകി മാറുവാനുള്ള സംവിധാനങ്ങൾ ഒരുക്കാനുള്ള നടപടികൾ സ്വീകരിക്കണം. പാടശേഖരങ്ങൾക്കുള്ളിൽ താമസിക്കുന്ന ആളുകളുടെ താമസസ്ഥലം ഉയർത്താനുള്ള നടപടികൾ പഞ്ചായത്ത് അടിസ്ഥാനത്തിൽ സ്വീകരിക്കണം. അവരുടെ സഞ്ചാരമാർഗങ്ങൾ ഉയർത്തി അവർക്ക് കുടിവെള്ളവും സഞ്ചാരവും അടിസ്ഥാന സൗകര്യങ്ങളും ഒരുക്കാനുള്ള നടപടികൾ പഞ്ചായത്ത് അധികാരികൾ സ്വീകരിക്കണം. ഇങ്ങനെയൊക്കെ കൂട്ടായ പ്രവർത്തനങ്ങളോടെ മാത്രമേ കുട്ടനാടിന്‍റെ ദുരിതാവസ്ഥയെ നമുക്ക് നേരിടുവാൻ പറ്റുകയുള്ളൂ. സാധ്യമായ എല്ലാ സഹായങ്ങളും ചങ്ങനാശേരി അതിരൂപത നേരിട്ട് ഇടപെട്ട് നൽകാൻ തയാറാണെന്നും ആർച്ച്ബിഷപ് പറഞ്ഞു. യോഗത്തിൽ അതിരൂപത പ്രോട്ടോസിഞ്ചെല്ലൂസ് ഫാ. ആന്‍റണി എത്തയ്ക്കാട്ട്, ഇൻഫാം ക്രിസ് അതിരൂപത ഡയറക്ടർ ഫാ. തോമസ് താന്നിയത്ത്, അസി. ഡയറക്ടർ ഫാ. സോണി പള്ളിച്ചിറയിൽ, സേവിച്ചൻ മുഹമ്മ, ഇൻഫാം സംസ്ഥാന ജോയിന്‍റ് സെക്രട്ടറി ടോം ജോസഫ് ചമ്പക്കുളം, ജോസ് ഡൊമിനിക്, ജിജി മൈക്കിൾ എന്നിവർ പ്രസംഗിച്ചു.

ചെറിയ മഴയിൽപ്പോലും നാട് കനത്ത വെള്ളക്കെട്ടിൽ; ഉത്തരവാദി സർക്കാർ

അന്പലപ്പുഴ: ചെറിയ മഴയിൽപ്പോലും നാട് കനത്ത വെള്ളക്കെട്ടിൽ, ഉത്തരവാദി സർക്കാർ. മുൻ കാലങ്ങളിൽ നടന്നുവന്ന മഴക്കാല പൂർവ ശുചീകരണം, തോട് ശുചീകരണം തുടങ്ങിയവ നടത്താതെ വന്നതോടെ നാട് വെള്ളത്തിലായി. ‌എല്ലാ വർഷവും പഞ്ചായത്തുകളിൽ വാർഡ് തലങ്ങളിൽ വാർഡുതല സാനിറ്റേഷൻ കമ്മിറ്റികളുടെ നേതൃത്വത്തിൽ ശുചീകരണം നടന്നിരുന്നു. ഇതിനായി പഞ്ചായത്തിന്‍റെ പതിനായിരവും സംസ്ഥാന സർക്കാർ വിഹിതമായ പതിനയ്യായിരവും ഉൾപ്പെടെ 25,000 രൂപ ഓരോ വാർഡിനും നൽകിയിരുന്നു. എന്നാൽ ഈ വർഷം സർക്കാരിന്‍റെ സാമ്പത്തിക പ്രതിസന്ധിയെത്തുടർന്ന് തദ്ദേശ സ്വയംഭരണ വകുപ്പ് മുഖേനെ നൽകുന്ന ഈ തുക വിതരണം ചെയ്യാതെ വന്നതോടെ ശുചീകരണവും നിലച്ചു. നീരൊഴുക്ക് തടസപ്പെട്ടതോടെ നാട്ടിലെ റോഡുകളും തോടുകളുമെല്ലാം വെള്ളത്തിൽ മുങ്ങി. ‌മുൻ കാലങ്ങളിൽ തോടുകളിലുണ്ടായിരുന്ന മാലിന്യങ്ങൾ നീക്കം ചെയ്യുകയും തോടുകൾക്ക് ആഴം വർധിപ്പിക്കുകയും ചെയ്യുമായിരുന്നു.എന്നാൽ ഇതെല്ലാം ഇത്തവണ നിലച്ചതോടെ ജനം വെള്ളക്കെട്ടിന്‍റെ ദുരിതത്തിലായി. തോടുകൾ കരകവിഞ്ഞതോടെ വീടുകളും ഗ്രാമീണ റോഡുകളും വെള്ളത്തിലായി. കൂടാതെ മഴക്കാലത്തിന് മുൻപ് ചെയ്തുവന്നിരുന്ന രോഗപ്രതിരോധ പ്രവർത്തനങ്ങളും ഇത്തവണ കടലാസിലൊതുങ്ങി. കൊതുക് ഉറവിട നശീകരണ പ്രവർത്തനങ്ങൾ ഉൾപ്പെടെയുള്ളവ ആരോഗ്യ വകുപ്പിന്‍റെ നേതൃത്വത്തിൽ നടന്നിരുന്നു. ഇവ കൃത്യമായി ഒരിടത്തും നടക്കാറില്ല. ആശാ വർക്കർമാർ, ആരോഗ്യ പ്രവർത്തകർ എന്നിവരുടെ സേവനം ഉപയോഗിച്ച് മഴക്കാലത്തിന് മുൻപ് വീടുകളിൽ ബ്ലീച്ചിംഗ് പൗഡർ വിതരണം ചെയ്യുന്നതുൾപ്പെടെയുള്ള പ്രവർത്തനങ്ങൾ നടത്തിയിരുന്നു. ‌കാലവർഷാരംഭത്തിന് മുൻപ് തദ്ദേശ സ്വയംഭരണ, ആരോഗ്യ വകുപ്പുകൾ ചെയ്തുവന്നിരുന്ന പല പ്രവർത്തനങ്ങളും നിലച്ചതിന്‍റെ ദുരിതമനുഭവിക്കുന്നത് ജനങ്ങളാണ്.

ചേര്‍ത്തലയില്‍ മൂവായിരത്തിലധികം വീടുകള്‍ ഭീഷണിയില്‍

ചേര്‍ത്തല: കനത്ത മഴയെത്തുടര്‍ന്ന് താലൂക്കിലെ താഴ്ന്ന പ്രദേശങ്ങള്‍ വെള്ളക്കെട്ടിലായി. മൂവായിരത്തിലധികം വീടുകളാണ് വെള്ളത്തിലായിരിക്കുന്നത്. മഴയ്ക്കൊപ്പം വീശിയടിക്കുന്ന കാറ്റ് വ്യാപകനാശം വിതയ്ക്കുന്നുണ്ട്. വെളളിയാഴ്ച മാത്രം മരം വീണ് താലൂക്കില്‍ അഞ്ചു വീടുകള്‍ക്കാണ് ഭാഗികനാശം ഉണ്ടായത്. പട്ടണക്കാട്, കടക്കരപ്പള്ളി, ചേര്‍ത്തല നഗരം, വയലാര്‍, തണ്ണീര്‍മുക്കം, ചേര്‍ത്തല തെക്ക് തുടങ്ങി എല്ലായിടത്തും വീടുകള്‍ വെളളക്കെട്ടിലായിട്ടുണ്ട്. പല പഞ്ചായത്തുകളിലും ദുരിതാശ്വാസ ക്യാമ്പുകള്‍ തുടങ്ങാന്‍ റവന്യു വകുപ്പ് സംവിധാനം ഒരുക്കിയിട്ടുണ്ട്. അവശ്യഘട്ടത്തില്‍ ജനങ്ങള്‍ ആവശ്യപ്പെട്ടാല്‍ ക്യാമ്പുകള്‍ തുറക്കും. സ്‌കൂളുകള്‍ തുറക്കാന്‍ രണ്ടു ദിനങ്ങള്‍ മാത്രം ഉള്ളപ്പോള്‍ വെള്ളക്കെട്ട് മുന്നൊരുക്ക പ്രവര്‍ത്തനങ്ങളെ ബാധിച്ചിട്ടുണ്ട്. ചേര്‍ത്തല ഗവണ്‍മെന്‍റ് ടൗണ്‍ സ്‌കൂളിലെ വെള്ളക്കെട്ടിനു പരിഹാരം തേടി പിടിഎ തഹസില്‍ദാര്‍ക്കു പരാതി നല്‍കി. പൊന്നാംവെളി ടികെഎസ് ഗ്രന്ഥശാലാ മന്ദിരത്തിന്‍റെ മതില്‍ നിലംപൊത്തി. ഒറ്റമശേരിയില്‍ പ്രതിരോധങ്ങള്‍ തകര്‍ത്തും കടലേറ്റം ശക്തമായിരിക്കുകയാണ്. മൂന്നുവീടുകള്‍ ഏതുസമയത്തും കടലെടുക്കുന്ന സ്ഥിതിയിലാണ്. ഇവിടെ കടല്‍വെള്ളക്കയറ്റം വീടുകൾക്ക് വലിയ വെല്ലുവിളിയാകുന്നുണ്ട്. പ്രദേശവാസികളെ മാറ്റിത്താമസിപ്പിക്കുന്നതിനു റവന്യുവകുപ്പ് പ്രത്യേക സംവിധാനങ്ങളൊരുക്കിയിട്ടുണ്ടെന്നു തഹസില്‍ദാര്‍ അറിയിച്ചു.

തുറവൂർ മേഖലയിൽ വെള്ളപ്പൊക്കം രൂക്ഷം

തുറവൂർ: വെള്ളപ്പൊക്കത്തത്തുടർന്ന് നൂറുകണക്കിന് വീടുകൾ വെള്ളത്തിനടിയിലായി. ചേർത്തല താലൂക്കിൽ വടക്കൻ മേഖലയിലെ താഴ്ന്ന പ്രദേശങ്ങളിൽ വെള്ളം കയറിയതിനെത്തുടർന്ന് നൂറുകണക്കിന് ജനങ്ങളാണ് ദുരിതമനുഭവിക്കുന്നത്. ഇവിടെ താമസിച്ചിരുന്നവർ ബന്ധുവീടുകളിൽ അഭയം തേടിയിരിക്കുകയാണ്. രണ്ട് ദിവസമായി രൂക്ഷമായ വെള്ളപ്പൊക്കം തുടരുകയാണ്. നിരവധി പ്രദേശത്തെ കൃഷിയിടങ്ങളും വെള്ളം കയറിയതിനെത്തുടർന്ന് നശിച്ചു. വയലാർ, കടക്കരപ്പള്ളി, പട്ടണക്കാട്, തുറവൂർ, കുത്തിയതോട്, എഴുപുന്ന, കോടംതുരുത്ത്, പഞ്ചായത്തുകളിലെ ഒട്ടുമിക്ക പ്രദേശത്തും വെള്ളം കെട്ടിക്കിടക്കുകയാണ്. രാത്രികാലങ്ങളിലാണ് രൂക്ഷമായ വെള്ളപ്പൊക്കം ഉണ്ടാകുന്നത്. ഇത് ജനങ്ങളെ ഉറക്കം കെടുത്തുന്ന അവസ്ഥയാണ്. മുൻ വർഷങ്ങളിൽ നിന്ന് വ്യത്യസ്തമായി രൂക്ഷമായ വെള്ളക്കെട്ടാണ് ഈ മേഖലയിൽ അനുഭവപ്പെട്ടു കൊണ്ടിരിക്കുന്നത്.

അപ്പർകുട്ടനാട് വെള്ളത്തിൽ

എടത്വ: കനത്ത മഴയും കിഴക്കന്‍ വെള്ളത്തിന്‍റെ വരവും വര്‍ധിച്ചതോടെ അപ്പര്‍കുട്ടനാട്ടില്‍ ജലനിരപ്പ് ഉയരുന്നു. പമ്പ, മണിമല, അച്ചന്‍കോവിലാറുകള്‍ കര കവിഞ്ഞതോടെ നിരവധി വീടുകള്‍ വെള്ളത്തില്‍ മുങ്ങി. അമ്പലപ്പുഴ-തിരുവല്ല സംസ്ഥാന പാതയും വെള്ളത്തിലായി. വാഹന ഗതാഗതം ഇന്നത്തോടെ പൂര്‍ണമായും നിലയ്ക്കും. കുട്ടനാട്, അപ്പര്‍കുട്ടനാട് മേഖലയിലെ അഞ്ച് പഞ്ചായത്തുകളില്‍ വെള്ളക്കെട്ട് രൂക്ഷമാണ്. മൂന്ന് ദിവസത്തിനുള്ളില്‍ പ്രധാന നദികളിലെ ജലനിരപ്പ് അഞ്ചടിയോളം ഉയര്‍ന്നിട്ടുണ്ട്. പ്രധാന നദികള്‍ കരകവിഞ്ഞതോടെ നദീതീര പ്രദേശത്തെയും താഴ്ന്ന പ്രദേശങ്ങളിലെയും വീടുകള്‍ വെള്ളത്തില്‍ മുങ്ങി. മുട്ടാര്‍ പഞ്ചായത്തില്‍ നിരവധി വീടുകളാണ് വെള്ളത്തിലായത്. തലവടി പഞ്ചായത്തിലെ കുന്നുമ്മാടി - കുതിരച്ചാല്‍ പ്രദേശത്തെ നിരവധി വീടുകളില്‍ വെള്ളം കയറി. കാലവര്‍ഷം ശക്തി പ്രാപിക്കുന്നതിന് മുന്‍പേ കുട്ടനാട്ടില്‍ ജലനിരപ്പ് ഉയര്‍ന്നിരുന്നു. മിക്ക പഞ്ചായത്തിലും ക്യാമ്പുകള്‍ ആരംഭിച്ചു. തലവടി പഞ്ചായത്തില്‍ ചക്കുളത്തുകാവ് ഓഡിറ്റോറിയത്തില്‍ 15 കുടുംബങ്ങളില്‍ നിന്ന് 68 അംഗങ്ങളും മണലേല്‍ സ്‌കൂള്‍, തലവടി ഗവ. ഹയര്‍ സെക്കന്ററി സ്‌കൂള്‍, തകഴിയില്‍ തകഴി ദേവസ്വം ബോര്‍ഡ് സ്‌കൂളില്‍ 8 കുടുംബങ്ങളില്‍ 30 അംഗങ്ങള്‍, കരുമാടി ഡിബിഎച്ച്എസില്‍ 5 കൂടുംങ്ങളില്‍ 23 അംഗങ്ങള്‍, മുട്ടാര്‍ പഞ്ചായത്തില്‍ മുട്ടാര്‍ സെന്‍റ് ജോര്‍ജ് ഹയര്‍ സെക്കന്ററി സ്‌കൂളില്‍ 15 കുടുംബങ്ങളില്‍ 43 അംഗങ്ങള്‍, വീയപുരം പഞ്ചായത്തില്‍ വീയപുരം ഹയര്‍ സെക്കന്‍ററി സ്‌കൂളില്‍ 6 കുടുംബങ്ങള്‍ 24 അംഗങ്ങള്‍, പായിപ്പാട് എല്‍പി സ്‌കൂള്‍ 5 കുടുംബങ്ങള്‍ 11 അംഗങ്ങളും എത്തിയിട്ടുണ്ട്. നിരവധി കുടുംബങ്ങള്‍ ക്യാമ്പ് തേടി എത്തിക്കൊണ്ടിരിക്കുകയാണ്. എടത്വയില്‍ ക്യാമ്പിന്‍റെ പ്രവര്‍ത്തനം ആരംഭിച്ചിട്ടില്ല. ഇന്നത്തോടെ ഇവിടെയും ക്യാമ്പ് ആരംഭിക്കും. നിരണം പടിഞ്ഞാറേ ഭാഗം, മുട്ടാര്‍, തലവടി, എടത്വ, വീയപുരം, തകഴി പഞ്ചായത്തിലാണ് വെള്ളക്കെട്ട് രൂക്ഷമായിരിക്കുന്നത്. കുട്ടനാട്ടിലെ പ്രധാന പാതകള്‍ ഉള്‍പ്പെടെ ഇടറോഡുകള്‍ വെള്ളത്തില്‍ മുങ്ങി. അമ്പലപ്പുഴ-തിരുവല്ല സംസ്ഥാന പാതയില്‍ നെടുമ്പ്രം, തകഴി കേളമംഗലം ജംഗ്ഷന്‍ എന്നിവിടങ്ങളില്‍ വെള്ളം കയറിയിട്ടുണ്ട്. തായങ്കരി-കൊടുപ്പുന്ന റോഡില്‍ വേഴപ്ര കുരിശടിക്ക് സമീപത്തും പടപ്പില്‍ മുട്ട് ഭാഗത്തും നീരേറ്റുപുറം-കിങ്ങറ റോഡില്‍ മുട്ടാര്‍ ജംഗ്ഷന് സമീപത്തും വെള്ളം കയറിയിട്ടുണ്ട്. അമ്പപ്പുഴ-തിരുവല്ല സംസ്ഥാന പാതയും എസി റോഡും തമ്മില്‍ ബന്ധിപ്പിക്കുന്ന കെഎസ്ആര്‍ടിസി സര്‍വീസുകള്‍ നിര്‍ത്തിവച്ചിരിക്കുകയാണ്. തലവടി കോടമ്പനാടി ഭാഗം ഏറെക്കുറെ മുങ്ങിയ അവസ്ഥയാണ്. നദീതിരങ്ങളിലും പാടശേഖര നടുവിലും താമസിക്കുന്നവര്‍ ഒറ്റപ്പെട്ട അവസ്ഥയിലാണ്. കിഴക്കന്‍ വെള്ളത്തിന്‍റെ വരവ് നിലയ്ക്കാത്തതും കനത്ത മഴയും ആശങ്ക കൂട്ടുകയാണ്.

കാറ്റും മഴയും: ചാരുംമൂട് മേഖല ഇരുട്ടിൽ

ചാരുംമൂട്: കനത്ത മഴയിലും വീശിയടിച്ച കാറ്റിലും പാലമേൽ, നൂറനാട്, താമരക്കുളം പഞ്ചായത്ത് പ്രദേശങ്ങളിൽ വൻ നാശനഷ്ടം. വൈദ്യുതിബന്ധം പൂർണമായും തകരാറിലായി. മരം വീണ് നിരവധി വൈദ്യുതിപോസ്റ്റുകൾ ഒടിയുകയും ലൈനുകൾ പൊട്ടിവീഴുകയും ചെയ്തതിനെത്തുടർന്ന് നൂറനാട് മേഖല ഇരുട്ടിലായി. പത്താംമൈൽ-പന്തളം റോഡിൽ കുടശനാടിനു കിഴക്ക് കൂറ്റൻ മരം വൈദ്യുതിലൈൻ തകർത്ത് റോഡിലേക്ക് വീണതിനാൽ ഇതുവഴിയുള്ള ഗതാഗതം പൂർണമായും തടസപ്പെട്ടു. അടൂരിൽനിന്ന് എത്തിയ അഗ്നിരക്ഷാസേന, നൂറനാട് വൈദ്യുതി സെക‌്ഷൻ ഉദ്യോഗസ്ഥർ, നൂറനാട് പോലീസ്, മരം മുറി തൊഴിലാളികൾ, നാട്ടുകാർ, സന്നദ്ധ സംഘടനങ്ങൾ എന്നിവർ കൂട്ടായി മരം മുറിച്ചു മാറ്റാനും ഒടിഞ്ഞ പോസ്റ്റുകൾ പുനഃസ്ഥാപിക്കുവാനുള്ള ശ്രമം നടത്തി. നൂറനാട്, കുടശ്ശനാട്, പുലിക്കുന്ന്, ആദിക്കാട്ടുകുളങ്ങര, ള്ളവുക്കാട്, പടനിലം, പാറ്റൂർ, എരുമക്കുഴി, ഇടപ്പോൺ , തടത്തിൽപ്പറമ്പ്, കിടങ്ങയം തുടങ്ങിയ പ്രദേശങ്ങളിൽ മരം വൈദ്യുതി ലൈനിലേക്ക് വീണതിനാൽ വൈദ്യുതി ബന്ധം നിലച്ചിരിക്കുകയാണ്. ചില സ്ഥലങ്ങളിൽ ഇന്നലെ വൈദ്യുതി പുനഃസ്ഥാപിച്ചിട്ടുണ്ട് .

കറുക സെന്‍റ് മേരീസ് ചാപ്പലിൽ തിരുനാൾ

ആലപ്പുഴ: കറുക സെന്‍റ് മേരിസ് ചാപ്പലിൽ പരിശുദ്ധ കന്യകമറിയത്തിന്‍റെ തിരുനാൾ തുടങ്ങി. തത്തംപള്ളി വികാരി ഫാ. ജോസ് മുകളേൽ കൊടിയേറ്റുകർമം നിർവഹിച്ചു. ഇന്നു വൈകുന്നേരം 5. 30ന് വിശുദ്ധ കുർബാന, തിരുവചന സന്ദേശം എന്നിവയ്ക്ക് ഫാ. ജോയൽ പുന്നശേരി കാർമികത്വം നിർവഹിക്കും. പ്രധാന തിരുനാൾ ദിവസമായ നാളെ വൈകുന്നേരം നാലിന് ആഘോഷമായ വിശുദ്ധ കുർബാന. ഫാ. ജോസി മണക്കുന്നേൽ കാർമികത്വം നിർവഹിക്കും. തിരുനാൾ പ്രദക്ഷിണം ഡീക്കൻ ബിപിൻ പുത്തൻപറമ്പിൽ നിർവഹിക്കും.

മദ്യത്തിന്‍റെ പേരില്‍ തര്‍ക്കം: ഇതരസംസ്ഥാന തൊഴിലാളിയെ തലയ്ക്കടിച്ചു പരിക്കേല്‍പ്പിച്ചു

ചേര്‍ത്തല: മദ്യത്തിന്‍റെ പേരിലുണ്ടായ തര്‍ക്കത്തത്തുടര്‍ന്ന് ആറംഗസംഘം ഇതരസംസ്ഥാന തൊഴിലാളിയെ വീടുകയറി അക്രമിച്ചതായി പരാതി. തലയ്ക്കടിയേറ്റ ഇയാളെ ആലപ്പുഴ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. പശ്ചിമബംഗാള്‍ സ്വദേശി ബിമല്‍കുമാര്‍മിത്ര(34)യ്ക്കാണ് പരിക്കേറ്റത്. വ്യാഴാഴ്ച രാത്രി 10.15ഓടെ പട്ടണക്കാട് അന്ധകാരനഴിയിലായിരുന്നു സംഭവം. പൊതുമാരമത്തു കരാറുകാരന്‍ പോട്ടച്ചിറ സുനിലിന്‍റെ തൊഴിലാളിയാണ്. നാലുവര്‍ഷമായി അന്ധകാരനഴിയില്‍ താമസിക്കുന്ന ബിമല്‍കുമാര്‍മിത്ര. സുനിലിന്‍റെ അന്ധകാരനഴിയിലെ കുടുംബവീട്ടിലാണ് താമസിച്ചിരുന്നത്. വൈദ്യുതി ബന്ധം വിഛേദിച്ച് വീടിന്‍റെ വാതിലുകള്‍ തകര്‍ത്താണ് അക്രമം. പരിക്കേറ്റ് അവശനായി കിടന്ന ഇയാളെ ആദ്യം തുറവൂര്‍ താലൂക്ക് ആശുപത്രിയിലും തുടര്‍ന്ന് ആലപ്പുഴ മെഡിക്കല്‍ കോളജിലും പ്രവേശിപ്പിച്ചു. പ്രദേശവാസികളായ ആറുപേരാണ് അക്രമി സംഘത്തിലുണ്ടായിരുന്നതെന്നാണ് പ്രാഥമികമായി കണ്ടെത്തിയിരിക്കുന്നത്. ഇവരെപ്പറ്റി ബിമല്‍കുമാര്‍ പോലീസിനു മൊഴിനല്‍കിയിട്ടുണ്ട്.

കപ്പലപകടം: നഷ്ടപരിഹാരംനല്‍കണമെന്ന് ഫാ. സേവ്യര്‍ കുടിയാംശേരി

ആലപ്പുഴ: കപ്പലപകടത്തെത്തു ടർന്ന് തൊഴിൽനഷ്ടത്തിലും മറ്റു പ്രതിസന്ധികളിലും അകപ്പെട്ട മത്സ്യത്തൊഴിലാളികൾക്ക് ഒരു ദിവസത്തെ സാമ്പത്തിക സഹായം മാത്രം നല്‍കിയാല്‍ പോരാ നഷ്ടപരിഹാരവും നല്‍കണമെന്ന് ആലപ്പുഴ രൂപത പിആര്‍ഒ ഫാ.സേവ്യര്‍ കുടിയാംശേരി. കപ്പലപകടം വന്‍ ദുരന്തമാണുണ്ടാക്കിയിരിക്കുന്നത്. കുറേക്കാലം നീണ്ടുനില്‍ക്കുന്ന പ്രത്യാഘാതങ്ങൾ ഉണ്ടാകും. അതിന് 1000 രൂപയും 6 കിലോ അരിയും നല്‍കി ഒരു ദിവസത്തേക്കുള്ള സഹായം പോരാ. കപ്പല്‍ കമ്പനി ഉടമയില്‍നിന്ന് മാന്യമായ നഷ്ടപരിഹാരം ലഭ്യമാക്കുകയും വേണം. കപ്പലപകടം വരുത്തിവച്ചിരിക്കുന്ന വിനകളെക്കുറിച്ചു ഗൗരവമായ പഠനം നടത്തുകയും മത്സ്യത്തൊഴിലാളികള്‍ക്കു വന്നുചേരുന്ന നഷ്ടങ്ങള്‍ വിലയിരുത്തുകയും ഒപ്പം തീരത്തടിഞ്ഞുകൂടിയിരിക്കുന്ന മാലിന്യങ്ങള്‍ നീക്കം ചെയ്ത് കടലും തീരവും ശുചീകരിക്കണമെന്നും അദ്ദേഹം പറഞ്ഞു.

കാറ്റും മഴയും: മാവേലിക്കരയിൽ വൻ നാശം

മാവേലിക്കര: താലൂക്കില്‍ ഇന്നു 13 വീടുകള്‍ക്കുകൂടി ഭാഗിക നാശനഷ്ടം ഉണ്ടായി. നൂറനാട് വില്ലേജില്‍ കറ്റാനം, വള്ളികുന്നം 2വീതം, ചുനക്കര, താമരക്കുളം, തഴക്കര, തൃപ്പേരുംതുറ, പാലമേല്‍, മാവേലിക്കര ഒന്നുവീതം വീടുകള്‍ക്ക് ഭാഗിക നാശനഷ്ടമുണ്ടായത്. മാവേലിക്കര മുനിസിപ്പൽ ഓഫീസിന് മുന്‍പിലെ ഇരുനില വ്യാപാര സമുച്ചയത്തിന് മുകളിലേക്കും സമീപത്തെ വീട്ടിലേക്കും ഇടശേരിക്കാവില്‍ നിന്നു വന്‍ മരങ്ങള്‍ വീണ് കെട്ടിടത്തിന് നാശനഷ്ടം ഉണ്ടായി. മാവേലിക്കര നഗരത്തില്‍ പല ഭാഗങ്ങളിലും മരങ്ങള്‍ കടപുഴകിവീണ് വൈദ്യുതി ബന്ധം നിലച്ചു. അച്ചന്‍ കോവിലാറ്റിലെ ജലനിരപ്പ് ഉയര്‍ന്നതുമൂലം തീരപ്രദേശങ്ങളിലുള്ള വീടുകളിൽ വെള്ളം കയറി. നിലവില്‍ ഒരു ക്യാമ്പ് പ്രവര്‍ത്തിച്ചുവരുന്നു. 5 കുടുംബങ്ങളിലെ 21 പേര്‍ ക്യാമ്പിലുണ്ട്.

പുതിയ ഇടയനെ വരവേല്ക്കാൻ അജഗണങ്ങൾ

തിരുവനന്തപുരം: മാവേലിക്കര രൂപതയുടെ പുതിയ ബിഷപ് ഡോ. മാത്യൂസ് മാർ പോളിക്കാർപ്പസിനെ വരവേല്ക്കാനായി ഇടവകകൾ ഒരുങ്ങി. മാവേലിക്കര രൂപതയിലെ ഒരു ഇടവകാംഗം ബിഷപ്പായി ഇതേ രൂപതയുടെ ചുമതലയിൽ എത്തുന്പോൾ വിശ്വാസികളുടെ ആഹ്ളാദം വർധിക്കുന്നു. വൈദിക പരിശീലനത്തിനുശേഷം 1983 ഡിസംബർ 18ന് ആർച്ച് ബിഷപ് ബനഡിക്ട് മാർ ഗ്രിഗോറിയോസിൽ നിന്നും വൈദിക പട്ടം സ്വീകരിച്ചു. ചെന്നൈ ലയോള കോളജ്, മധുര കാമരാജ് സർവകലാശാല എന്നിവിടങ്ങളിലെ പഠനശേഷം പാരീസിലെ കാത്തലിക് യൂണിവേഴ്സിറ്റിയിൽ നിന്നും ഫ്രഞ്ച് സാഹിത്യത്തിൽ ഉന്നത ബിരുദം നേടി. തുടർന്ന് തിരുവനന്തപുരം മാർ ഈവാനിയോസ് കോളജിൽ ഫ്രഞ്ച് സാഹിത്യത്തിൽ അധ്യാപകനായി ചേർന്നു. ദീർഘകാലം കോളജിൽ അധ്യാപകൻ, ഹോസ്റ്റൽ വാർഡൻ, ബർസാർ എന്നീ ചുമതലകൾ വഹിച്ചു. അഞ്ച് വർഷക്കാലം മാർ ഈവാനിയോസ് കോളജിൽ പ്രിൻസിപ്പലായിരുന്നു. തിരുനെൽവേലി എം.എസ്. യൂണിവേഴ്സിറ്റിയിൽ നിന്നും ഫ്രഞ്ച് സാഹിത്യത്തിൽ ഡോക്ടറേറ്റ് നേടി. യുജിസി നാക് അക്രഡിറ്റേഷൻ കമ്മിറ്റി അംഗം, കേരള സർവകലാശാല ബോർഡ് ഓഫ് സ്റ്റഡീസ് അംഗം, തിരുവനന്തപുരം മേജർ അതിഭദ്രാസനത്തിൽ മുഖ്യവികാരി ജനറാൾ, ജീവകാരുണ്യ ശുശ്രൂഷകളുടെ കോ- ഓർഡിനേറ്റർ, അണ്‍ എയ്ഡഡ് സ്കൂളുകളുടെ അഡ്മിനിസ്ട്രേറ്റർ, എയ്ഡഡ് കോളജ് മാനേജ്മെന്‍റ് സെക്രട്ടറി എന്നീ നിലകളിൽ പ്രവർത്തിച്ചു. നിലവിൽ സഭയുടെ വിദ്യാഭ്യാസം, കുടുംബം എന്നീ കമ്മീഷനുകളിൽ അംഗമാണ്. യുവജനങ്ങൾക്കുവേണ്ടിയുള്ള സുനഹദോസ് കമ്മീഷന്‍റെ ചെയർമാനാണ്. 2022 ജൂലൈ 15 ന് കർദിനാൾ മാർ ബസേലിയോസ് ക്ലീമിസ് കാതോലിക്കാ ബാവ മെത്രാൻ സ്ഥാനത്തേക്ക് ഉയർത്തി. തിരുവനന്തപുരം മേജർ അതിരൂപത വിഭജിച്ച് 2007 ജനുവരി രണ്ടിനാണ് മാവേലിക്കര രൂപത നിലവിൽ വന്നത്. രൂപതയുടെ പ്രഥമ ബിഷപ്പായി തിരുവനന്തപുരം മേജർ അതിരൂപത സഹായമെത്രാനായിരുന്ന ജോഷ്വാ മാർ ഇഗ്നാത്തിയോസ് ചുമതലയേറ്റു. 96 ഇടവകകളുള്ള രൂപതയിൽ 18 വർഷക്കാലത്തെ ഇടയ ശുശ്രൂഷ നടത്തിയശേഷമാണ് ബിഷപ് മാർ ഇഗ്നാത്തിയോസ് വിരമിക്കുന്നത്. മാവേലിക്കര അമലഗിരി ബിഷപ്സ് ഹൗസ്, പുന്നമൂട് സെന്‍റ് മേരീസ് കത്തീഡ്രൽ, കല്ലുമല മാർ ഈവാനിയോസ് മൈനർ സെമിനാരി, പുന്നമൂട് ഭദ്രാസന പാസ്റ്ററൽ സെന്‍റർ, കായംകുളം ചേതന സോഷ്യൽ സർവീസ് സൊസൈറ്റി, മാവേലിക്കര ഭദ്രാസന പ്രീസ്റ്റ് ഹോം, മാവേലിക്കര മാർ ഈവാനിയോസ് കോളജ്, പുലിയൂർ മാർ ഈവാനിയോസ് ലോ കോളജ്, ചേപ്പാട് ക്രൈസ്റ്റ് കിംഗ് ഹയർസെക്കൻഡറി സ്കൂൾ എന്നിവയുടെ സ്ഥാപനത്തിനും നേതൃത്വം നൽയിട്ടുണ്ട്. കെസിബിസി പ്രസിഡന്‍റ്, സിബിസിഐ വൈസ് പ്രസിഡന്‍റ്, കെസിബിസി, സിബിസിഐ വിവിധ കമ്മീഷനുകളുടെ ചെയർമാൻ, നിലയ്ക്കൽ എക്യൂമെനിക്കൽ ട്രസ്റ്റ്, കേരളാ ഇന്‍റർ ചർച്ച് കൗണ്‍സിൽ എന്നിവയുടെ നേതൃനിരയിൽ ബിഷപ് ജോഷ്വാ മാർ ഇഗ്നാത്തിയോസ് പ്രവർത്തിച്ചിട്ടുണ്ട്.

റോഡ് സേഫ്റ്റി കേഡറ്റ് പദ്ധതി സംസ്ഥാന വ്യാപകമാക്കും: മന്ത്രി കെ.ബി. ഗണേഷ്കുമാര്‍

മാവേലിക്കര: മാവേലിക്കരയില്‍ ആരംഭിച്ച റോഡ് സേഫ്റ്റി കേഡറ്റ് പദ്ധതി സംസ്ഥാന വ്യാപകമായി നടപ്പാക്കുമെന്ന് മന്ത്രി കെ.ബി.ഗണേശ്കുമാര്‍. കേഡറ്റുകള്‍ക്ക് ഗ്രേസ് മാര്‍ക്ക് ലഭിക്കുന്നതു സംബന്ധിച്ച് ചര്‍ച്ചചെയ്യും. ഇതിനായുള്ള പ്രവര്‍ത്തനങ്ങള്‍ തിങ്കളാഴ്ച തന്നെ ആരംഭിക്കുമെന്നും അദ്ദേഹം പറഞ്ഞു. മാവേലിക്കരയിലെ കെഎസ്ആര്‍ടിസി ഡ്രൈവിംഗ് സ്‌കൂളിന്‍റെയും ടെസ്റ്റ് ഗ്രൗണ്ടിന്‍റെയും ഉദ്ഘാടനം നിര്‍വഹിച്ചു പ്രസംഗിക്കുകയായിരുന്നു അദ്ദേഹം. റോഡ് സുരക്ഷിതത്തിന്‍റെ ഭാഗമായി വിദ്യാര്‍ഥികള്‍ക്കായി ആദ്യഘട്ടത്തില്‍ അനിമേറ്റഡ് വീഡിയോസ് ഇറക്കും. രണ്ടാം ഘട്ടത്തില്‍ മൊബൈല്‍ ഫോണില്‍ വാഹനം ഓടിക്കാവുന്ന തരത്തില്‍ ഗെയിം നിര്‍മിക്കും. വിദ്യാർഥികള്‍ക്കായി ലേണേഴ്‌സ് ടെസ്റ്റ് ആപ്പ് പുറത്തിറക്കും. 30 ചോദ്യങ്ങള്‍ ഉണ്ടാകും. ഇനിമുതൽ ഉദ്യോഗസ്ഥര്‍ മാസത്തില്‍ ഒരിക്കലും ഡ്രൈവിംഗ് ട്രെയിനർമാര്‍ മൂന്ന് മാസത്തില്‍ ഒരിക്കലും ടെസ്റ്റില്‍ പങ്കെടുത്ത് വിജയിക്കണം. ലേണേഴ്‌സ് ടെസ്റ്റിനായി അഞ്ച് ഭാഷകളില്‍ പഠിക്കാന്‍ സാധിക്കുന്ന ആപ്പും പുറത്തിറങ്ങുകയാണ്. കൂടാതെ കണ്‍സഷന് സ്മാര്‍ട്ട് കാര്‍ഡ് ആക്കും. കെഎസ്ആര്‍ടിസിക്കായുള്ള ആപ്പ് വരുന്നതോടെ ടിക്കറ്റ് നേരത്തേ ബുക്ക് ചെയ്യാനുള്ള സൗകര്യവും വാഹനത്തിന്‍റെ കൃത്യമായ സമയം, ബസ് സ്റ്റേഷന്‍റെ എവിടെ എന്നിവ അറിയാനുള്ള സൗകര്യവും ഉണ്ടാകും. പുതിയ സ്ലീപ്പര്‍, സെമി സ്ലീപ്പര്‍ ബസുകളും 8.5മീറ്റര്‍, 10 മീറ്റര്‍ നീളമുള്ള ലോക്കല്‍ ബസുകളും വരും. ഇതോടെ കെഎസ് ആര്‍ടിസി 25 ശതമാനം ആളുകള്‍ അധികമായി ഉപയോഗിക്കാന്‍ തുടങ്ങും. കെഎസ്ആര്‍ടിസി വര്‍ക്‌ഷോപ്പുകളില്‍ 460 കാമറകള്‍ ഉടന്‍ സ്ഥാപിക്കും. ലൈറ്റ് ഡ്യൂട്ടിയിലുള്ളവര്‍ക്ക് ഓഫീസ് ഡ്യൂട്ടി കൊടുക്കും. ജീവനക്കാര്‍ക്കും കുടുംബത്തിനും 3 ലക്ഷം മുതല്‍ 30 ലക്ഷം രൂപ ചികിത്സയ്ക്കായി ലഭിക്കുന്ന ഇന്‍ഷുറന്‍സ് സ്‌കീം ആരംഭിക്കും ഒരാള്‍ മരിച്ചാല്‍ ഒരു കോടി രൂപ കുടുംബത്തിന് ലഭിക്കും. 70 വയസുവരെ സര്‍വ ആനുകൂല്യങ്ങളും ലഭ്യമാകും. രാത്രിയില്‍ ഓടിയില്ലെങ്കില്‍ പ്രൈവറ്റ് ബസുകളുടെ പെര്‍മിറ്റ് റദ്ദാക്കും. ലഹരിക്കച്ചവടം, സ്ത്രീപീഡനം, പോക്‌സോ കേസ്, അപകട കരമായ ഡ്രൈവിംഗ് എന്നീ കേസുകളില്‍ ഉള്‍പ്പെട്ടവരെ സ്‌കൂള്‍ ബസിന്‍റെ ഡ്രൈവര്‍മാരാക്കരുതെന്നും മന്ത്രി കൂട്ടിച്ചേര്‍ത്തു. എം.എസ്.അരുണ്‍കുമാര്‍ എംഎല്‍എ അധ്യക്ഷത വഹിച്ചു. കെഎസ്ആര്‍ടിസി ചെയര്‍മാന്‍, മനേജിംഗ് ഡയറക്ടര്‍ പി.എസ്. പ്രമോദ് ശങ്കര്‍, മാവേലിക്കര നഗരസഭാ ചെയര്‍മാന്‍ നൈനാന്‍ സി. കുറ്റിശേരില്‍, ഭരണിക്കാവ് ബ്ലോക്ക് പഞ്ചായത്ത് പ്രസിഡന്‍റ് എസ്.രജനി, തെക്കേക്കര പഞ്ചായത്ത് പ്രസിഡന്‍റ് ഷീബ സതീഷ് തുടങ്ങിയവർ പ്രസംഗിച്ചു.

കാർത്തികപ്പള്ളി താലൂക്കിൽ അഞ്ചു ദുരിതാശ്വാസ ക്യാമ്പുകൾ തുറന്നു

ഹരിപ്പാട്: ശക്തമായ മഴയെത്തുടർന്ന് കാർത്തികപ്പള്ളി താലൂക്കിൽ അഞ്ചു ദുരിതാശ്വാസ ക്യാമ്പുകൾ തുറന്നു. കുമാരപുരത്ത് ഒന്നും തൃക്കുന്നപ്പുഴയിൽ രണ്ടും വീയപുരത്ത് രണ്ടും ക്യാമ്പുകൾ ആരംഭിച്ചു. മഴ ശക്തമായതിനാൽ കൂടുതൽ ക്യാമ്പുകളും കഞ്ഞിവീഴ്ത്തൽ കേന്ദ്രങ്ങളും തുറക്കും. തൃക്കുന്നപ്പുഴ കിഴക്കേക്കര ആത്മവിദ്യാസംഘം എൽപി സ്കൂളിൽ 28 കുടുംബങ്ങളും പല്ലന കുമാരനാശാൻ സ്മാരക സ്കൂളിൽ 42 കുടുംബങ്ങളും കരുവാറ്റ കുമാരപുരം സൈക്ലോൺ ഷെൽട്ടറിൽ ആറു കുടുംബങ്ങളെയും പാർപ്പിച്ചിട്ടുണ്ട്. തിമിർത്തു പെയ്യുന്ന മഴയിൽ വ്യാപകമായ നാശനഷ്ടങ്ങൾ റിപ്പോർട്ട് ചെയ്തിട്ടുണ്ട്. പല സ്ഥലങ്ങളിലും രണ്ട് ദിവസമായി വൈദ്യുതബന്ധം വിഛേദിക്കപ്പെട്ടു. ഹരിപ്പാട് മേഖലയിൽ മരം വീണ് നൂറു വൈദ്യുതിപോസ്റ്റുകൾ തകർന്നു. നൂറുകണക്കിന് വീടുകളും വെള്ളത്തിലായിട്ടുണ്ട്. പള്ളിപ്പാട്, വീയപുരം ചെറുതന, കുമാരപുരം തൃക്കുന്നപ്പുഴ പ്രദേശങ്ങളിൽ ഭൂരിഭാഗം സ്ഥലങ്ങളും വെള്ളത്തിനടിയിൽ ആയിട്ടുണ്ട്. ശക്തമായി ഉണ്ടായ കാറ്റിലും മരങ്ങൾ കടപുഴകിവീണു. പത്തിയൂർക്കാല പുന്നൂർ ശ്രീധരൻ പിള്ള, പത്തിയൂർ കുറ്റിക്കാട്ട് തെക്കതിൽ ആശാ റാണി, കരുവാറ്റ മാധവ മന്ദിരം ജാനമ്മ, കരുവാറ്റ ആഞ്ഞിലിമൂട്ടിൽ സോമൻ, പെരിങ്ങാല പാക്കുതറ വടക്കതിൽ നിയാസ്, ചേപ്പാട് മുട്ടം കണ്ടൻകര ബിജു ഭവനത്തിൽ റാഹേൽ അമ്മ, പത്തിയൂർ പനയഞ്ചേരി മണിയമ്മ, എന്നിവരുടെ വീടുകൾക്ക് നാശനഷ്ടമുണ്ടായി. ആറാട്ടുപുഴ - തൃക്കുന്നപ്പുഴ പ്രദേശങ്ങളിൽ കടൽക്ഷോഭം അതിരൂക്ഷമായിക്കൊണ്ടിരിക്കുകയാണ് വാഹനഗതാഗതവും തടസപ്പെട്ടു. തിരമാലയോടൊപ്പം കടലിലെ മണ്ണ് കരയിലേക്ക് അടിച്ചുകയറി റോഡുകൾ മുടിയതിനാൽ വാഹനങ്ങൾക്കു കടന്നുപോകാൻ തടസം നേരിടു ന്നുണ്ട്.

ജലനിരപ്പ് ഉയർന്നു; നിരവധി കുടുംബങ്ങളെ ദുരിതാശ്വാസക്യാമ്പുകളിലേക്കു മാറ്റി

അമ്പലപ്പുഴ: ജലനിരപ്പ് ഉയർന്നതോടെ നിരവധി കുടുംബങ്ങളെ ദുരിതാശ്വാസ ക്യാമ്പുകളിലേക്കു മാറ്റിപ്പാർപ്പിച്ചു. അമ്പലപ്പുഴ തെക്ക് പഞ്ചായത്തിലെ ഗവ. മോഡൽ സ്കൂൾ, ആമയിട എൽ പി സ്കൂൾ, തോട്ടപ്പള്ളി നാലു ചിറ ഗവ. ഹൈസ്കൂൾ എന്നിവിടങ്ങളിലാണ് ദുരിതാശ്വാസ ക്യാമ്പുകൾ ആരംഭിച്ചത്. അമ്പലപ്പുഴ തെക്ക് പഞ്ചായത്ത് 11 -ാം വാർഡിലെ മൂന്നും 5,7 വാർഡുകളിലെ അഞ്ചു കുടുംബങ്ങളെയാണ് സ്കൂളുകളിലേക്ക് മാറ്റിയത്. പ്രസവിച്ച് ഏഴാം ദിവസം വീട്ടിൽ വെള്ളം കയറിയതിനെത്തുടർന്ന് ക്യാമ്പിലെത്തിയ യുവതിയെയും നവജാത ശിശുവിനെയും വൃദ്ധ മാതാവിനെയും ആലപ്പുഴയിലെ സ്ത്രീകളുടെയും കുട്ടികളുടെയും ആശുപത്രിയിലേക്കു മാറ്റി. തോട്ടപ്പള്ളി നാലുചിറ സ്കൂളിൽ 400 കുടുംബങ്ങളിൽനിന്നായി 1100 ഓളം പേർ ക്യാമ്പിലുണ്ട്. പുന്തല വ്യാസ ഓഡിറ്റോറിയത്തിലും നൂറോളം കുടുംബങ്ങളെ മാറ്റിപ്പാർപ്പിച്ചു. എച്ച് സലാം എം എൽ എ, പഞ്ചായത്ത് പ്രസിഡന്‍റുമാരായ ശോഭാ ബാലൻ, എ. എസ്. സുദർശനൻ, പി. ജി. സൈറസ്, മറ്റ് ജനപ്രതിനിധികൾ എന്നിവർ ക്യാമ്പുകൾ സന്ദർശിച്ചു.

പുന്നപ്ര സെന്‍റ് മേരീസ് ചാപ്പലിൽ തിരുനാൾ

അമ്പലപ്പുഴ: പുന്നപ്ര സെന്‍റ് ജോൺ മരിയ വിയാനി ഇടവകയുടെ സെന്‍റ് മേരീസ് ചാപ്പലിൽ വേളാങ്കണ്ണി മാതാവിന്‍റെ തിരുനാളിന് കൊടിയേറി. നാളെ ആഘോഷമായ തിരുനാൾ പ്രദക്ഷിണത്തോടെ സമാപിക്കും. വികാരി ഫാ. ക്ലീറ്റസ് കാരക്കാട്ട് കൊടിയേറ്റി. നാളെ വൈകുന്നേരം 3.30ന് ആഘോഷമായ ദിവ്യബലി: ഫാ. സ്റ്റാർവിൻ ഒ സിഡി. ഫാ. യേശുദാസ് അറയ്ക്കൽ വചനസന്ദേശം നൽകും.

തീരദേശ റോഡ് ഉപരോധിച്ചു

അമ്പലപ്പുഴ: ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ തീരദേശ റോഡ് ഉപരോധിച്ചു. നാട് പ്രളയജലത്തിൽ മുങ്ങുമ്പോൾ കരിമണൽ കമ്പനിയുടെ താല്പര്യം സംരക്ഷിക്കാൻ പൊഴിമുറിക്കൽ താമസിപ്പിച്ച് ജനങ്ങളെ ദ്രോഹിച്ചു എന്ന് ആരോപിച്ചാണ് ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ തീരദേശ റോഡ് ഉപരോധിച്ചത്. ബ്ലോക്ക് കോൺഗ്രസ് പ്രസിഡന്‍റ് റ്റി.എ. ഹാമിദ്, ഡിസിസി സെക്രട്ടറി എസ്. സുബാഹു, എം.എച്ച്. വിജയൻ, എം.വി.രഘു തുടങ്ങിയവർ നേതൃത്വം നല്കി.

നൂറനാട് സ്പെഷാലിറ്റി ആശുപത്രിയിലെ ചോർച്ച: സൂപ്രണ്ടിനെ ഉപരോധിച്ചു

ചാരുംമൂട് : ജനുവരിയിൽ ആരോഗ്യമന്ത്രി ഉദ്ഘാടനം ചെയ്ത നൂറനാട് ലെപ്രസി സാനിറ്റോറിയം വളപ്പിലെ സ്പെഷാലിറ്റി ആശുപത്രിക്കെട്ടിടം ചോർന്നൊലിക്കുന്നതിൽ പ്രതിഷേധിച്ച് കോൺഗ്രസ് പ്രവർത്തകർ ആശുപത്രി സൂപ്രണ്ടിനെ ഉപരോധിച്ചു. നബാർഡിന്‍റെ സഹായത്തോടെ 23.53 കോടി രൂപ വിനിയോഗിച്ചു നിർമിച്ച കെട്ടിടത്തിന്‍റെ മുകൾഭാഗം മുഴുവൻ ചോർന്ന് രോഗികൾക്കും ജീവനക്കാർക്കും ബുദ്ധിമുട്ടായിരിക്കുകയാണ്. ഇതിനു ശാശ്വതപരിഹാരം വേണമെന്നാവശ്യപ്പെട്ടാണ് കോൺഗ്രസ് ബ്ലോക്ക് കമ്മിറ്റി സമരം നടത്തിയത്. കോൺഗ്രസ് നേതാക്കളായ കോശി എം. കോശി, കെ.ആർ. മുരളീധരൻ, ജി. ഹരിപ്രകാശ്, ജി. വേണു, എം.ആർ. രാമചന്ദ്രൻ തുടങ്ങിയവർ നേതൃത്വം നൽകി.

അശാസ്ത്രീയമായ പൊഴിമുറിക്കൽ: കിഴക്കൻ പ്രദേശങ്ങൾ വെള്ളത്തിൽ

അമ്പലപ്പുഴ: അശാസ്ത്രീയമായ പൊഴിമുറിക്കൽ മൂലം കിഴക്കൻ പ്രദേശങ്ങൾ വെള്ളത്തിൽ. അധികൃതരുടെ മുന്നൊരുക്കത്തിന്‍റെ കുറവെന്ന് ആക്ഷേപം. കുട്ടനാട്, അപ്പർ കുട്ടനാട് പ്രദേശങ്ങളെ വെള്ളക്കെട്ടിൽനിന്ന് രക്ഷിക്കാനാണ് തോട്ടപ്പള്ളി പൊഴി മുറിച്ചത്. ബുധനാഴ്ച രാത്രിയോടെയാണ് പൊഴിമുറിക്കൽ പൂർത്തിയാക്കിയത്. എന്നാൽ, കുട്ടനാട്, അപ്പർ കുട്ടനാട് പ്രദേശങ്ങളിൽനിന്ന് വെള്ളക്കെട്ട് ഒഴിഞ്ഞിട്ടില്ല. മഴ കനത്തതോടെ വീണ്ടും പ്രളയ സമാനമായ സ്ഥിതിയായിരിക്കുകയാണ്. ജില്ലാ ഭരണകൂടത്തിന്‍റെയും ജലസേചനവകുപ്പിന്‍റെയും ദീർഘവീക്ഷണമില്ലായ്മയും മുന്നൊരുക്ക കുറവുമാണ് ഇതിനു കാരണമായത്. ജില്ലയിലെ 19 പൊഴികളിൽ തോട്ടപ്പള്ളി, അന്ധകാരനഴി പൊഴികൾ മാത്രമാണ് നിലവിൽ തുറന്നിരിക്കുന്നത്. എല്ലാ പൊഴിയും തുറന്നാൽ മാത്രമേ ആലപ്പുഴ ഉൾപ്പെടെയുള്ള ജില്ലകളിൽനിന്ന് പ്രളയഭീഷണി ഒഴിയൂ. ഇതിൽ തോട്ടപ്പള്ളിയിൽ ദേശീയപാതാ വികസനത്തിന്‍റെ ഭാഗമായി പുതിയ പാലം നിർമിക്കുന്നതിനായി 12 പില്ലറുകളാണ് നിർമിച്ചിരിക്കുന്നത്. ഇത് കിഴക്കൻ വെള്ളം കടലിലേക്ക് സുഗമമായി ഒഴുകുന്നതിനും തടസമായിട്ടുണ്ട്. നിലവിൽ കായംകുളം പൊഴി വഴിയാണ് വെള്ളം ഒഴുകുന്നത്. ഇതിലേ വെള്ളം സുഗമമായി ഒഴുകണമെങ്കിൽ നിലവിൽ അടച്ചിട്ടിരിക്കുന്ന തൃക്കുന്നപ്പുഴയിലെ രണ്ടു ചെക്ക് ഡാമുകളും തുറക്കണം. മഴ ശക്തമായിട്ടും തോട്ടപ്പള്ളിയിൽ വളരെക്കുറച്ച് യന്ത്രങ്ങൾ ഉപയോഗിച്ചാണ് പൊഴി മുറിക്കുന്നത്. കരിമണൽ ഒലിച്ചുപോകുമോ എന്ന ആശങ്കയെത്തുടർന്നാണ് കൂടുതൽ യന്ത്രങ്ങളെത്തിച്ച് പൊഴി മുറിക്കാത്തതെന്നും ആക്ഷേപമുയർന്നിട്ടുണ്ട്.

മലവെള്ളമെത്തി, ദുരിതക്കയത്തിൽ കുട്ടനാട്

മങ്കൊമ്പ്: കഴിഞ്ഞ ദിവസങ്ങളിൽ മഴ ശക്തമായതോടെ കുട്ടനാട്ടിൽ ജലനിരപ്പുയരുന്നു. താഴ്ന്ന പ്രദേശങ്ങളെല്ലാം വെള്ളത്തിലായി. വെള്ളംകയറി പല റോഡുകളിലും ഗതാഗതതടസവും നേരിടുന്നുണ്ട്. ശക്തമായ കാറ്റിൽ മരങ്ങൾ കടപുഴകി വീണു നിരവധി വീടുകൾക്കു കേടുപാടുകൾ സംഭവിച്ചു. ചൊവ്വാഴ്ച വൈകുന്നേരം മുതൽ ഇന്നലെ വൈകുന്നേരം വരെ മഴ മാറിനിന്നെങ്കിലും ഇന്നലെ വൈകുന്നേരത്തോടെ ജലനിരപ്പു വീണ്ടും ഉയർന്നു. കഴിഞ്ഞ മൂന്നു ദിവസങ്ങളിലായി രണ്ടടിയിലേറെയാണ് ജലനിരപ്പുയർന്നിരിക്കുന്നത്. കാറ്റിൽ മരങ്ങൾ വീഴുന്നതോടെ വൈദ്യുതി തടസങ്ങളും പതിവാകുകയാണ്. ശക്തമായ കാറ്റിൽ ഇന്നലെ മാത്രം വിവിധയിടങ്ങളിലായി 70ലേറെ പോസ്റ്റുകൾ ഒടിഞ്ഞു. മങ്കൊമ്പ് സെക‌്ഷൻ പരിധിയിൽ 14, കിടങ്ങറയിൽ 5, ചമ്പക്കുളത്ത് 10, എടത്വയിൽ 22, തകഴിയിൽ 9, ചമ്പക്കുളത്ത് അഞ്ചും പോസ്റ്റുകൾ ഒടിഞ്ഞു. ജലനിരപ്പുയർന്നതോടെ കാവാലം കൃഷിഭവൻ പരിധിയിൽ മംഗലം മാണിക്യമംഗലം കായൽ, കട്ടക്കുഴി പാടശേഖരം എന്നിവിടങ്ങളിൽ മടവീഴ്ചയുണ്ടായി. കൈനകരി ആറുപങ്ക് പാടശേഖരത്തിലും മടവീഴ്ചയുണ്ടായത് പ്രദേശത്തെ താമസക്കാരെ ദുരിതത്തിലാക്കി. തട്ടാശേരി നാൽപതിൽ റോഡിന്‍റെ പല ഭാഗങ്ങളിലും വെള്ളം കയറി ഗതാഗതം തടസപ്പെട്ട നിലയിലാണ്. കൈനകരി കൃഷിഭവൻ പരിധിയിലെ ഇരുമ്പനം പാടശേഖരത്തിലെ കിടങ്ങറ കരിക്കത്തറയിലെ മോട്ടോർ തറയുടെ ഷെഡ് തകർന്നു. വൈശ്യംഭാഗം-ചതുർഥ്യാകരി-പുളിങ്കുന്ന്-പള്ളിക്കൂട്ടുമ്മ-നീലംപേരൂർ, മുട്ടാർ സെൻട്രൽ, മിത്രക്കരി ജീമംഗലം, മുളയ്ക്കാംതുരുത്തി-വാലടി എന്നീ റോഡുകളിൽ വെള്ളം കയറി. എന്നാൽ, ഇവിടെയെല്ലാം കെഎസ്ആർടിസി സർവീസുകൾ മുടങ്ങാതെ നടക്കുന്നുണ്ട്. ഇനിയും ജലനിരപ്പുയർന്നാൽ സർവീസുകൾ പ്രതിസന്ധിയിലാകും. പുളിങ്കുന്ന് താലൂക്ക് ആശുപത്രി വളപ്പിലും വെള്ളം കയറി. രണ്ടാം കൃഷിക്കായി നിലമൊരുക്കൽ ജോലികൾക്കായി ഒരുങ്ങുന്ന പാടശേഖരങ്ങൾക്കും ജലനിരപ്പുയർന്നത് വിനനായി. കുട്ടനാട്ടിലെ പലപ്രദേശങ്ങളിലും വ്യാപകമായ തോതിൽ കരകൃഷിക്കും നാശം സംഭവിച്ചു. ജലനിരപ്പുയർന്നത് കാവാലം, പുളിങ്കുന്ന് ജങ്കാർ സർവീസുകൾക്കും ഭീഷണിയായിട്ടുണ്ട്. ചേര്‍ത്തല താലൂക്കില്‍ വ്യാപക നാശനഷ്ടം ചേര്‍ത്തല: മഴയും കാറ്റും വീണ്ടും ശക്തിപ്രാപിച്ചതോടെ വീണ്ടും താലൂക്കില്‍ വലിയ നാശം. ഇന്നലെ മാത്രം താലൂക്കില്‍ അഞ്ചു വീടുകള്‍ ഭാഗികമായി തകര്‍ന്നിട്ടുണ്ട്. മരങ്ങള്‍ വീണും തൂണുകള്‍ ഒടിഞ്ഞുവീണും കെഎസ്ഇബിയുടെ നഷ്ടം ഒരു കോടിയും കടന്നിട്ടുണ്ട്. ഇന്നലെ ചേര്‍ത്തല, പട്ടണക്കാട്, അര്‍ത്തുങ്കല്‍ എന്നിവിടങ്ങളിലായി 15 വൈദ്യുതി തൂണുകളാണ് മരം വീണ് ഒടിഞ്ഞത്. ഇതിനൊപ്പം വെള്ളക്കെട്ടും ശക്തമായി. 2000ത്തോളം വീടുകളാണ് വെള്ളക്കെട്ടുഭീഷണിയിലുള്ളത്. ആലുങ്കല്‍ കവലയില്‍ റോഡിലേക്ക് മരങ്ങള്‍ കടപുഴകിവീണ് ആലുങ്കല്‍-കണ്ണികാട്ട് റോഡിലും ആലുങ്കല്‍ - കൊട്ടാരം റോഡിലും ഗതാഗതതടസം നേരിട്ടു. രണ്ടിടത്തുമുണ്ടായിരുന്ന മതിലുകള്‍ പൂര്‍ണമായി തകര്‍ന്നു. സ്റ്റാന്‍ഡിലുണ്ടായിരുന്ന ഓട്ടോകള്‍ക്കു സമീപമാണ് മരങ്ങള്‍ വീണത്. ചേര്‍ത്തല വടക്ക്, പട്ടണക്കാട്, തണ്ണീര്‍മുക്കം, അര്‍ത്തുങ്കല്‍ എന്നിവിടങ്ങളിലായാണ് അഞ്ചുവീടുകള്‍ ഭാഗികമായി തകര്‍ന്നത്. പട്ടണക്കാട്, ചേര്‍ത്തല, അര്‍ത്തുങ്കല്‍ വൈദ്യുതി സെക‌്ഷന്‍റെ പരിധിയില്‍ മാത്രം കാറ്റില്‍ പലയിടത്തും ലൈനുകളിലേക്കു മരം മറിഞ്ഞും വൈദ്യുതി തൂണുകള്‍ മറിഞ്ഞും പ്രതിസന്ധിയുണ്ടായി. വൈദ്യുതി തടസങ്ങള്‍ പരിഹരിക്കുന്നതിനായി തീവ്രശ്രമങ്ങളാണ് നടക്കുന്നത്. മാന്നാറിൽ വീടുകൾ തകർന്നു മാന്നാർ: കാലവർഷതാണ്ഡവം ഇന്നലെയും മാന്നാറിൽ വൻ നാശനഷ്ടങ്ങൾ വരുത്തി. ഇന്നലെ വൈകുന്നേരം വീശിയടിച്ച കാറ്റിൽ മരങ്ങൾ കടപുഴകിയും ഒടിഞ്ഞുവീണും നിരവധി വീടുകൾ ഭാഗികമായി തകർന്നു. നിരവധി വൈദ്യത പോസ്റ്റുകളും ഒടിഞ്ഞുവീണു. പലയിടങ്ങളിലും ഗതാഗതവും തടസപ്പെട്ടു. പാവുക്കര കറുകയിൽ ജിജോ തോമസിന്‍റെ വീടിനു മുകളിലേക്ക് സമീപ പുരയിടത്തിൽനിന്ന് രണ്ടു വലിയ മരങ്ങൾ വീണു ഭാഗികമായി തകർന്നു. മാന്നാർ നായർ സമാജം സ്കൂളിനു സമീപം നിന്ന മരം പിഴുതുവീണ് സ്കൂളിന്‍റെ മുൻവശത്തെ ജൂസ് കട തകർന്നു. പാവുക്കര കരയോഗം സ്കുളിന് വടക്ക് ശ്യാമശ്രീയിൽ പി.ഡി. ശ്യാമളന്‍റെ വീട്ടിൽനിന്ന വലിയമാവ് കടപുഴകി റോഡിലേക്ക് വീണു രണ്ടു പോസ്റ്റുകൾ ഒടിഞ്ഞു. ട്രാൻസ്ഫോർമറിനും കേടുപാടുണ്ടായി. കുട്ടംപേരൂർ വലിയകുളങ്ങര പുത്തൻപുരയ്ക്കൽ ഭാഗത്ത് റോഡിലേക്ക് മരം ഒടിഞ്ഞുവീണ് ഗതാഗതതടസമുണ്ടായി. രണ്ടു വൈദ്യുത തൂണുകളും ഒടിഞ്ഞു. കെഎസ്ഇബി ജീവനക്കാർ സ്ഥലത്തെത്തി ഒടിഞ്ഞ പോസ്റ്റുകൾ റോഡിൽനിന്നു നീക്കി. മാന്നാർ പാണ്ടനാട് ചെങ്ങന്നൂർ റോഡിൽ പരുമല പാലച്ചുവട് ജംഗ്ഷനിലെ പാല മരം വീണ് ഗതാഗതം തടസപ്പെട്ടു. ഫയർഫോഴ്സും നാട്ടുകാരും ചേർന്ന് മരം മുറിച്ചുനീക്കി. അപ്പര്‍ കുട്ടനാട്ടില്‍ ജലനിരപ്പ് ഉയരുന്നു, ഗതാഗതം നിലച്ചു എടത്വ: കനത്തമഴയും കിഴക്കന്‍ വെള്ളത്തിന്‍റെ വരവും മൂലം അപ്പര്‍ കുട്ടനാട്ടില്‍ ജലനിരപ്പ് ഉയരുന്നു. ഗ്രാമീണ സര്‍വീസ് റോഡുകളില്‍ ഗതാഗതം നിലച്ചു. ദിവസങ്ങളായി പെയ്യുന്ന കനത്ത മഴയും കിഴക്കന്‍ വെള്ളത്തിന്‍റെ കുത്തൊഴുക്കും വര്‍ധിച്ചതോടെ അപ്പര്‍ കുട്ടനാട്ടിലെ ഒട്ടുമിക്ക പഞ്ചായത്തിലും വെള്ളം കയറി. തലവടി പഞ്ചായത്തിലെ കുന്നുമ്മാടി കുതിരച്ചാല്‍ കോളനിയിലെ വീടുകളില്‍ വെള്ളം കയറി. പ്രദേശത്തുനിന്ന് താമസക്കാര്‍ ബന്ധുവീടുകളിലേക്കു മാറുകയാണ്. തലവടിയില്‍ ക്യാമ്പ് പ്രവര്‍ത്തിപ്പിക്കാനുള്ള നടപടി ആലോചിച്ചുവരുന്നു. പമ്പാ, മണിമല, അച്ചന്‍കോവിലാറുകളില്‍ ജലനിരപ്പ് ക്രമാതീതമായി ഉയരുകയാണ്. നിരണം, വീയപുരം, മുട്ടാര്‍, തലവടി, എടത്വ, തകഴി പഞ്ചായത്തിലെ ഒട്ടുമിക്ക പ്രദേശങ്ങളും വെള്ളത്തില്‍ മുങ്ങിയിട്ടുണ്ട്. താഴ്ന്ന സ്ഥലങ്ങള്‍ മുട്ടോളം വെള്ളത്തിലായി. മുട്ടാര്‍ പഞ്ചായത്തിലെ താഴ്ന്ന പ്രദേശങ്ങള്‍ വെള്ളത്തിലായതോടെ ജനജീവിതം ദുഃസഹമായി തീര്‍ന്നിരിക്കുകയാണ്. മുട്ടാറില്‍നിന്ന് പ്രധാന പാതകളിലേക്കുള്ള സര്‍വീസ് നിലച്ചതോടെ യാത്രാ ദുരിതവും ഇരട്ടിച്ചിട്ടുണ്ട്. വരുന്ന അഞ്ചു ദിവസം കനത്ത മഴയാണെന്ന് മുന്നറിയിപ്പ് ലഭിച്ചതോടെ ജനങ്ങള്‍ പരിഭ്രാന്തിയിലാണ്. ഇപ്പോള്‍ തന്നെ ഒട്ടുമിക്ക പ്രദേശവും വെള്ളത്തിനടിയിലായി. ഇനിയും മഴ ശക്തിപ്പെട്ടാല്‍ പ്രളയം ആവര്‍ത്തിക്കുമോയെന്ന് ആശങ്കയുണ്ട്. കുന്നുമ്മാടി-കുതിരച്ചാല്‍ നിവാസികളാണ് ഏറെ ദുരിതം അനുഭവിക്കുന്നത്. അപ്പര്‍ കുട്ടനാട്ടില്‍ ആദ്യം വെള്ളത്തില്‍ മുങ്ങുന്ന പ്രദേശമെന്നിരിക്കേ ഇവിടത്തെ താമസക്കാരെ ക്യാമ്പുകളിലേക്കു മറ്റേണ്ടിവരും. ജില്ലയില്‍ ഏതാനും ദിവസങ്ങളായി കനത്ത മഴ പെയ്യുന്നുണ്ടെങ്കിലും കിഴക്കന്‍ വെള്ളം എത്തിയതോടു കൂടിയാണ് ജലനിരപ്പിന് ക്രമാതീതമായി ഉയര്‍ന്നത്. ദിവസങ്ങളായി തുടരുന്ന ശക്തമായ കാറ്റില്‍ മരങ്ങള്‍ വീണ് അപ്പര്‍ കുട്ടനാട്ടിലെ നിരവധി വീടുകള്‍ക്ക് കേട് സംഭവിച്ചിരുന്നു. പൂര്‍ണമായി തകര്‍ന്ന വീടുകളില്‍നിന്ന് താമസക്കാര്‍ ബന്ധുവീടുകളിലേക്കു മാറിയിട്ടുണ്ട്. ഇന്നലയും തലവടി, എടത്വ പ്രദേശങ്ങളില്‍ മരം വീണ് വീടുകള്‍ തകര്‍ന്നു. മഴയ്‌ക്കൊപ്പം വീശിയടിക്കുന്ന ശക്തമായ കാറ്റാണ് ആശങ്കപ്പെടുത്തുന്നത്. റോഡുകളില്‍ വെള്ളം കയറിയതോടെ ബസ് സര്‍വീസ് നിലച്ചു. തായങ്കരി-ചങ്ങനാശേരി, നീരേറ്റുപുറം-മുട്ടാര്‍- കിടങ്ങറ, എടത്വ-കളങ്ങര, എടത്വ-വീയപുരം, എടത്വ-കൈതത്തോട് ഭാഗങ്ങളിലേക്കുള്ള സര്‍വവീസാണ് നിര്‍ത്തിവച്ചത്. ജലനിരപ്പ് ഇനിയും ഉയര്‍ന്നാല്‍ അമ്പലപ്പുഴ-തിരുവല്ല സംസ്ഥാന പാതയിലെ ഗതാഗതവും നിലയ്ക്കാന്‍ സാധ്യതയുണ്ട്. അപ്പര്‍ കുട്ടനാട്ടില്‍നിന്ന് തോട്ടപ്പള്ളി വഴി വെള്ളം കടലിലേക്ക് ഒഴുകിപ്പോകാനുള്ള താമസമാണ് അപ്പര്‍ കുട്ടനാടിനെ വെള്ളത്തില്‍ മുക്കുന്നത്. കുട്ടനാട്ടിൽ അടിയന്തര സഹായം എത്തിക്കണം: കൊടിക്കുന്നിൽ സുരേഷ് എംപി മാവേലിക്കര: മഴക്കെടുതിമൂലം ദുരിതമനുഭവിക്കുന്ന കുട്ടനാട്, അപ്പർ കുട്ടനാട് മേഖലയിലുള്ളവർക്ക് സർക്കാർ അടിയന്തര സഹായം എത്തിക്കണമെന്ന് കൊടിക്കുന്നിൽ സുരേഷ് എംപി ആവശ്യപ്പെട്ടു. തുടർച്ചയായുള്ള കനത്ത മഴമൂലം കിഴക്കൻ വെള്ളത്തിന്‍റെ ഒഴുക്ക് അതിശക്തമായി തുടരുന്ന കുട്ടനാട്ടിലെ വിവിധ പ്രദേശങ്ങൾ കടുത്ത വെള്ളപ്പൊക്ക ഭീഷണിയിലാണ്. കൈനകരി അടക്കമുള്ള പ്രദേശങ്ങളിൽ മട വീണതു മൂലം വീടുകളിലേക്ക് വെള്ളം കയറുന്ന അവസ്ഥയാണ് നിലവിലുള്ളത്. ഭൂരിപക്ഷം പ്രദേശങ്ങളിലും കാൽനടയായും വാഹനത്തിലുമുള്ള ഗതാഗതം പൂർണമായും തടസപ്പെട്ടിരിക്കുകയാണ്. ഈ സാഹചര്യത്തിൽ കിഴക്കൻ വെള്ളത്തിന്‍റെ ഒഴുക്ക് നിയന്ത്രിക്കുന്നതിനും വെള്ളക്കെട്ട് ഒഴിവാക്കുന്നതിനുമായി തണ്ണീർമുക്കം ബണ്ടും തോട്ടപ്പള്ളി സ്പിൽവേയും അടിയന്തരമായി തുറക്കണം. ദുരിതബാധിതർക്കായി സൗജന്യ ഭക്ഷണം ഉൾപ്പെടെ ലഭ്യമാകുന്ന ദുരിതാശ്വാസ ക്യാമ്പുകൾ അടിയന്തരമായി തുറക്കണമെന്നും സൗജന്യറേഷൻ ഏർപ്പെടുത്തണമെന്നും എംപി ആവശ്യപ്പെട്ടു. വെള്ളപ്പൊക്കം മൂലം സാംക്രമിക രോഗങ്ങൾ പടർന്നുപിടിക്കാനുള്ള സാധ്യതയുള്ളതിനാൽ പ്രാഥമികാരോഗ്യകേന്ദ്രങ്ങളിലും സബ് സെന്‍റർ ദുരിതാശ്വാസക്യാമ്പുകളിലും അവശ്യമരുന്നുകൾ ഉറപ്പാക്കണമെന്നും ജില്ലാ ദുരന്തനിവാരണ അഥോറിറ്റിയുടെ നേതൃത്വത്തിൽ പ്രവർത്തനങ്ങൾ ഏകോപിപ്പിക്കണമെന്നും കൊടുക്കുന്നിൽ ആവശ്യപ്പെട്ടു.

ചെങ്ങന്നൂരിൽ ചുഴലിക്കാറ്റിൽ വൻ നാശനഷ്ടം

ചെങ്ങന്നൂർ: ചെങ്ങന്നൂരിൽ ശക്തമായ ചുഴലിക്കാറ്റിൽ വൻ നാശനഷ്ടം. പുലിയൂർ, തിരുവൻ വണ്ടൂർ, ആല, പാണ്ടനാട്, വെൺമണി, ചെങ്ങന്നൂർ നഗരസഭ തുടങ്ങിയ സ്ഥലങ്ങളിൽ വൻ നാശനഷ്ടമുണ്ടായി. പുലിയൂർ ചിറയിൽ പടിയിൽ മരം വീണ് ഗതാഗതം തടസപ്പെട്ടു. വീടുപണി കാരണം താൽക്കാലിക ഷെഡിൽ താമസിച്ചു വന്ന ആല നെടുവരംകോട് തോട്ടുമേയത്തിൽ മോഹനന്‍റെ ( 52 ) വലത്തെ തോളിൽ സമീപത്തുനിന്ന മരം വീണ് കൈയ്ക്കു പരിക്കുപറ്റി. വിവിധ സ്ഥലങ്ങളിൽ വൈദ്യുതി തൂണുകളുടെ മുകളിൽ മരം വീണ് വൈദ്യുതി ബന്ധം തകരാറിലായി. തിരുവൻവണ്ടൂർ ഇരമല്ലിക്കര ശ്രീധർമ ശാസ്താ ക്ഷേത്രത്തിലെ അരയാൽ ശിഖരങ്ങൾ ശക്തമായ കാറ്റുമൂലം റോഡിലേക്ക് വീണ് വൈദ്യുതി ബന്ധം തകരാറിലായി. തിരുവൻവണ്ടൂർ ഗവ. ഹൈസ്കൂൾ ഗ്രൗണ്ടിനു സമീപം പ്രവർത്തിച്ചുവരുന്ന ബേബി സ്റ്റോഴ്സ് സ്റ്റേഷനറി കടയുടെ മുകളിലേക്ക് പ്ലാവ് ഒടിഞ്ഞുവീണ് കടയുടെ മുൻവശത്തെ ഷീറ്റ് തകർന്നു. വെൺമണി കല്യാത്ര ദേവീ ക്ഷേത്രത്തിന്‍റെ ഓടുകൾ കാറ്റിൽ പറന്നു. മാന്നാർ -ചെങ്ങന്നൂർ റോഡിൽ പുലിയൂർ പാലച്ചുവട് ജംഗ്ഷനിൽ പാല മരം വീണ് ഗതാഗതം തടസപ്പെട്ടു.

ശാപമോക്ഷം തേടുന്ന മണപ്ര-വൈശ്യംഭാഗം റോഡ്

മങ്കൊമ്പ്: നെടുമുടി പഞ്ചായത്തിലെ മണപ്ര-വൈശ്യംഭാഗം റോഡിന്‍റെ ശോച്യാവസ്ഥ നാടിനു സമ്മാനിക്കുന്നത് ദുരിതം മാത്രം. യാത്രക്കാർ, മഠത്തിൽ മുല്ലാക്കൽ പാടശേഖരത്തിലെ കർഷകർ, പാടശേഖരത്തിനു സമീപത്തെ താമസക്കാർ എന്നിവർക്കാണ് റോഡ് ദുരിതങ്ങൾ സമ്മാനിക്കുന്നത്. നെടുമുടി കൃഷിഭവന് കീഴിലുള്ള മഠത്തിൽ മുല്ലാക്കൽ പാടശേഖരത്തിന്‍റെ വടക്കേ ഭാഗത്തുകൂടി കടന്നുപോകുന്ന റോഡ് വർഷങ്ങളായി താഴ്ന്നനിലയിലാണ്. വടക്കുവശത്തെ തോട്ടിൽനിന്നുള്ള വെള്ളം റോഡ് വഴി കവിഞ്ഞുകയറി പാടശേഖരത്തിൽ നിറയുന്നതാണ് പ്രദേശവാസികളുടെ ജീവിതം ദുരിതപൂർണമാക്കുന്നത്. നെടുമുടി പഞ്ചായത്ത് ഓഫീസ് ജംഗ്ഷൻ മുതൽ പടിഞ്ഞാറോട്ട് ഏകദേശം 700 മീറ്റർ നീളം റോഡ് ഉയർത്തിയാൽ തങ്ങളുടെ ദുരിതങ്ങൾക്കു പരിഹാരമാകുമെന്നാണ് നാട്ടുകാർ പറയുന്നത്. കാലങ്ങളായി ഈ ആവശ്യം ഇവർ അധികാരികൾക്കു മുന്നിൽ അവതരിപ്പിക്കുന്നുണ്ടെങ്കിലും ഇവരെല്ലാം മുഖംതിരിഞ്ഞ സമീപനമാണ് കാട്ടുന്നത്. കഴിഞ്ഞ മൂന്നു വർഷങ്ങളിലും ബന്ധപ്പെട്ട കൃഷി ഓഫീസ്, പഞ്ചായത്ത് ഓഫീസ് മുഖാന്തരം ജില്ലാ ഭരണാധികാരികളുടെ മുന്നിൽ നാട്ടുകാരും പാടശേഖര സമിതിയും നിവേദനങ്ങൾ നല്കിയിരുന്നു. വീണ്ടുമൊരു മഴക്കാലം വന്നെത്തുമ്പോൾ ദുരിതങ്ങൾ ആവർത്തിക്കുകയാണ്. നിലവിൽ റോഡ് രണ്ടടിയോളം വെള്ളത്തിലാണ്. ഇതുമൂലം വാഹനഗതാഗതം തികച്ചും അസാധ്യമായിരിക്കുകയാണ്. ദേശീയ പാതയിൽനിന്ന് എസി റോഡിലേക്കും ചങ്ങനാശേരി-എടത്വ പ്രദേശങ്ങളിലേക്കുമുള്ള എളുപ്പവഴിയാണെന്നത് റോഡിന്‍റെ പ്രാധാന്യം വർധിപ്പിക്കുന്നു. ദിവസേന വലുതും ചെറുതുമായ നൂറുകണക്കിനു വാഹനങ്ങളാണ് ഇതുവഴി കടന്നുപോകുന്നത്. മഠത്തിൽ മുല്ലാക്കൽ പാടശേഖരത്തിലെ നൂറു കണക്കിന് വീടുകളാണ് ഇപ്പോൾ വെള്ളത്തിനടിയിലായിരിക്കുന്നത്. പ്രദേശത്തെ കരകൃഷികളും മറ്റും വെള്ളംകയറി നശിച്ചിരിക്കുന്നു. മിക്ക പുരയിടങ്ങളും വീടുകളും വെള്ളക്കെട്ടിലാണ്. റോഡിലും നടപ്പാതകളിലും കാൽനടയാത്ര പോലും ദുഷ്‌കരമായിരിക്കുകയാണ്. പാടശേഖരത്തിൽ മുൻവർഷങ്ങളിൽ രണ്ടാംകൃഷിയിറക്കിയപ്പോഴെല്ലാം റോഡ് കവിഞ്ഞു കയറി കൃഷി നശിക്കുന്നതിനാൽ കർഷകർ ഇതിൽ നിന്നു പിൻമാറുകയായിരുന്നു. നിയന്ത്രിത അളവിൽ വെള്ളം വറ്റിച്ചു നിർത്താനുള്ള ശ്രമങ്ങളും പരാജയപ്പെട്ടു. റോഡ് ഉയർത്തി നിർമിക്കുക മാത്രമാണ് തങ്ങളുടെ ദുരിതങ്ങൾക്കുള്ള ശാശ്വത പരിഹാരമെന്നാണ് നാട്ടുകാർ പറയുന്നത്.

പഠനോപകരണങ്ങൾ വിതരണം ചെയ്തു

ചേർത്തല: എറണാകുളം-അങ്കമാലി അതിരൂപത സാമൂഹ്യപ്രവർത്തന വിഭാഗമായ സഹൃദയയുടെ വൈക്കം- ചേർത്തല മേഖലകളിലെ വിദ്യാർഥികളുടെ പുരോഗതിക്കായി നടപ്പാക്കുന്ന വിദ്യാദർശൻ പദ്ധതിയുടെ ഭാഗമായി പഠനോപകരണങ്ങൾ വിതരണം ചെയ്തു. ചേർത്തല സഹൃദയ മേഖല ഓഫീസിൽ നടന്ന സമ്മേളനം ദലീമ ജോജോ എംഎൽഎ ഉദ്ഘാടനം ചെയ്തു. മുട്ടം ഫൊറോന വികാരി റവ. ഡോ. ആന്‍റോ ചേരാംതുരുത്തി അധ്യക്ഷത വഹിച്ചു. സഹൃദയ ഡയറക്ടർ ഫാ. ജോസ് കൊളുത്തുവെള്ളിൽ, സഹൃദയ റീജണൽ ഡയറക്ടർ ഫാ. സണ്ണി ഇരവിമംഗലം, സഹൃദയ അസി. ഡയറക്ടർ ഫാ. സിബിൻ മനയംപിള്ളി, സിസ്റ്റര്‍ ജൂലി, പ്രോഗ്രാം ഓഫീസർ കെ.ഒ. മാത്യൂസ്, നിഷേൽ, മാർട്ടിൻ വർഗീസ്, ഡോ. ഹെന എന്നിവർ പ്രസംഗിച്ചു.

ജില്ലയില്‍ 63 കോടി രൂപയുടെ പദ്ധതികള്‍ക്ക് അനുമതി

ആലപ്പുഴ: നവകേരള സദസില്‍ ഉയര്‍ന്നുവന്ന നിര്‍ദേശങ്ങള്‍ നടപ്പാക്കുന്നതിന്‍റെ ഭാഗമായി ജില്ലയില്‍ 63 കോടി രൂപയുടെ വികസന പദ്ധതികള്‍ക്ക് അനുമതി. ബുധനാഴ്ച ചേര്‍ന്ന മന്ത്രിസഭാ യോഗത്തില്‍ നവകേരള സദസിലെ നിര്‍ദേശങ്ങള്‍ നടപ്പാക്കാന്‍ 982.01 കോടി രൂപ അനുവദിക്കാന്‍ തീരുമാനിച്ചിരുന്നു. മുഖ്യമന്ത്രിയും മന്ത്രിമാരും 140 നിയമസഭാ മണ്ഡലങ്ങളിലും സഞ്ചരിച്ച് ജനങ്ങളുമായി സംവദിച്ചിരുന്നു. ആ സംവാദത്തില്‍ ഉരുത്തിരിഞ്ഞ നിര്‍ദേശങ്ങളുടെ അടിസ്ഥാനത്തില്‍ സംസ്ഥാന ആസൂത്രണ ബോര്‍ഡ് തയാറാക്കിയ മാര്‍ഗനിര്‍ദേശങ്ങളാണ് ഭേദഗതിയോടെ മന്ത്രിസഭ അംഗീകരിച്ചത്. ഓരോ നിയമസഭാ മണ്ഡലത്തിലും പരമാവധി ഏഴു കോടി രൂപ വീതമാണ് അനുവദിക്കുക. ജില്ലയിലെ അരൂര്‍ മണ്ഡലത്തിലെ വെള്ളക്കെട്ടിന് ശാശ്വതപരിഹാരം കാണുന്ന പദ്ധതിക്കായി ഏഴു കോടി രൂപ വിനിയോഗിക്കും. ജലവിഭവവകുപ്പിനാണ് നിര്‍വഹണച്ചുമതല. ചേര്‍ത്തല മണ്ഡലത്തില്‍ പുതിയ മിനി സിവില്‍ സ്റ്റേഷന്‍ അനക്‌സ് സ്ഥാപിക്കുന്നതിന് ഏഴു കോടി രുപ അനുവദിച്ചു. പൊതുമരാമത്തുവകുപ്പ് വഴിയാണ് നിര്‍വഹണം. ആലപ്പുഴ മണ്ഡലത്തില്‍ നെഹ്‌റു ട്രോഫി ട്രോഫി മത്സര വേദിയായ നെഹ്‌റു പവലിയനും അതിനോടനുബന്ധിച്ചുള്ള അമിനിറ്റി സെന്‍ററും നിര്‍മിക്കുന്നതിന് ഏഴു കോടി രൂപ ചെലവഴിക്കും. ടൂറിസം വകുപ്പിനാണ് നിര്‍മാണച്ചുമതല. കുട്ടനാട് വെള്ളാമാത്ര-തേവര്‍കോട് റോഡ് പുനര്‍നിര്‍മിക്കുന്നതിനും മുട്ടാര്‍ റോഡ് ഉയര്‍ത്തലിനുമായി ഏഴു കോടി രൂപ ചെലവഴിക്കും. ജലവിഭവവകുപ്പായിരിക്കും നിര്‍മാണം. ഹരിതം ഹരിപ്പാട് രണ്ടാം ഘട്ടത്തിന് ഏഴു കോടി രൂപയും നീക്കിവച്ചിട്ടുണ്ട്. കായംകുളത്തെ നിലവിലുള്ള ജില്ലാ ഓട്ടിസം സെന്‍ററിനു പുതിയ കെട്ടിടവും അനുബന്ധ സൗകര്യങ്ങളും ഒരുക്കുന്നതിന് മൂന്നുകോടി രൂപയും കായംകുളം- കുന്നത്താലും കടവ് റോഡിന് നാലു കോടി രൂപയും ഉള്‍പ്പെടെ ഏഴു കോടി രൂപ അനുവദിച്ചു. മാവേലിക്കര മണ്ഡലത്തില്‍ ചങ്ങംകുളങ്ങര-വാലുകുറ്റി റോഡ് ബിഎംബിസി നിലവാരത്തില്‍ ടാറിംഗ് ചെയ്യുന്നതിന് 3.25 കോടി രൂപയും വെട്ടിയാര്‍-പള്ളിമുക്ക് റോഡ് ടാറിംഗിന് രണ്ടു കോടി രൂപയും ഗുരുനാഥന്‍ കുളങ്ങര-കണ്ണനാംകുഴ-പാലയ്ക്കല്‍ റോഡ് ടാറിംഗിന് 1.75 കോടി രൂപയും ഉള്‍പ്പെടെ ഏഴുകോടി രൂപ അനുവദിച്ചു. മാന്നാര്‍-ചെങ്ങന്നൂര്‍ പൈതൃക ഗ്രാമം പദ്ധതിക്കായി ഏഴു കോടി രൂപയും അനുവദിച്ചിട്ടുണ്ട്.

ഹംഗറിയിൽ ജോലി വാഗ്ദാനം ചെയ്ത് പത്തു കോടിയുടെ തട്ടിപ്പ്

ചെങ്ങന്നൂർ: ഹംഗറിയിൽ ജോലി വാഗ്ദാനം ചെയ്ത് അഞ്ഞൂറിലധികം പേരിൽനിന്ന് 10 കോടിയിലധികം രൂപ തട്ടിയെടുത്തെന്ന പരാതിയിൽ സിപിഎം ലോക്കൽ കമ്മിറ്റി അംഗത്തിന്‍റെ മകനെതിരേ കേസ്. തമിഴ്നാട്ടിലും കേരളത്തിലുമായി വിവിധ പോലീസ് സ്റ്റേഷനുകളിൽ രജിസ്റ്റർ ചെയ്ത കേസിൽ പോലീസ് അന്വേഷണം ആരംഭിച്ചു. സിപിഎം ചെറിയനാട് തെക്ക് ലോക്കൽ കമ്മിറ്റിയംഗം ഉണ്ണികൃഷ്ണപിള്ളയുടെ മകൻ ദീപക് ബാലൻപിള്ളയ്ക്കെതിരേയാണ് പരാതി. ഇയാളുടെ ഉടമസ്ഥതയിലുള്ള ഹംഗറിയിലെ കൺസ്ട്രക‌്ഷൻ കമ്പനിയിൽ ഒഴിവുള്ള തസ്തികകളിലേക്ക് ജോലി വാഗ്ദാനം ചെയ്ത് ഉദ്യോഗാർഥികളിൽനിന്ന് ഏജന്‍റുമാർ മുഖേന പണം വാങ്ങുകയായിരുന്നു തട്ടിപ്പിന്‍റെ രീതിയെന്നു പറയുന്നു. തമിഴ്നാട് സ്വദേശിയായ ഏജന്‍റ് മോഹനൻ നാഗർകോവിൽ എസ്പിക്ക് നൽകിയ പരാതിയിൽ കേസ് രജിസ്റ്റർ ചെയ്ത വടശേരി എൻ-2 പോലീസ് കഴിഞ്ഞ ദിവസം ചെറിയനാട്ടെത്തി ഉണ്ണികൃഷ്ണപിള്ളയെയും ഭാര്യയെയും കസ്റ്റഡിയിലെടുത്തിരുന്നു. ചെറിയനാട് ദേവസ്വം ബോർഡ് ഹയർ സെക്കൻഡറി സ്കൂളിനു സമീപം ദീപക് അടുത്തിടെ വാങ്ങിയ ആഡംബര വീട്ടിലെത്തിയാണ് ഇരുവരെയും കസ്റ്റഡിയിലെടുത്തത്. വടശേരി പോലീസ് സ്റ്റേഷനിൽ ചോദ്യം ചെയ്തശേഷം വൈകിട്ടോടെ വിട്ടയച്ചു. മോഹനൻ നൽകിയ പരാതിയിൽ ഉണ്ണികൃഷ്ണപിള്ളയെയും ഭാര്യയെയും രണ്ടും മൂന്നും പ്രതികളാക്കിയാണ് ഉൾപ്പെടുത്തിയിരിക്കുന്നത്. ഇവരുടെ അക്കൗണ്ടുകളിലൂടെ സാമ്പത്തിക ഇടപാടുകൾ നടന്നതായി കണ്ടെത്താൻ സാധിക്കാത്തതിനാലാണ് വിട്ടയച്ചതെന്നും ദീപക്കിനെ നാട്ടിലെത്തിക്കാൻ ലുക്ക് ഔട്ട് നോട്ടീസ് പുറപ്പെടുവിക്കുമെന്നും നാഗർകോവിൽ എസ്പി ഡോ. ആർ. സ്റ്റാലിൻ പറഞ്ഞു. മോഹനൻ 400 പേരിൽനിന്ന് വാങ്ങിയ ഏകദേശം ഒന്നരക്കോടിയോളം രൂപ ദീപക്കിന് നൽകിയിട്ടുണ്ട്. ആദ്യം പണം നൽകിയ 33 പേർക്ക് ഉടൻ വീസ ലഭിച്ചതിനാലാണ് കൂടുതൽ പേരിൽനിന്ന് പണം വാങ്ങി നൽകിയതെന്ന് മോഹനൻ പറഞ്ഞു. എന്നാൽ, ഈ 33 പേരും ഇപ്പോൾ ജോലിയും ശമ്പളവുമില്ലാതെ ഹംഗറിയിൽ കുടുങ്ങിയിരിക്കുകയാണ്. ലുക്ക് ഔട്ട് നോട്ടീസ് പുറപ്പെടുവിക്കുന്നതിലൂടെ ദീപക് നാട്ടിലെത്തുമെന്നും പണം തിരികെ ലഭിക്കുമെന്നുമുള്ള പ്രതീക്ഷയിലാണ് മോഹനൻ. പണം നൽകിയവർ നിരന്തരം എത്തുന്നതിനാൽ വീട്ടിൽ പോകാൻ സാധിക്കാത്ത അവസ്ഥയാണെന്നും മോഹനൻ വെളിപ്പെടുത്തി. സമാനമായ അവസ്ഥയിലാണ് പല ഏജന്‍റുമാരും. ജോലിയുടെ സ്വഭാവം അനുസരിച്ച് ഓരോരുത്തരിൽനിന്ന് സർവീസ് ചാർജ് ഇനത്തിൽ 35,000 രൂപ മുതൽ ഒരുലക്ഷം രൂപ വരെയാണ് നിശ്ചയിച്ചിരുന്നത്. ഏജന്‍റുമാർ ശേഖരിച്ച തുക ദീപക്കിന്‍റെ അക്കൗണ്ടിലേക്കാണ് നൽകിയത്. വീസയോ ഓഫർ ലെറ്ററോ ലഭിക്കാതിരുന്നതോടെ പണം നൽകിയവർ ഏജന്‍റുമാരെ സമീപിച്ച് പണം തിരികെ ആവശ്യപ്പെട്ടു. ദീപക്കിനെ ബന്ധപ്പെട്ടപ്പോൾ അവധി പറഞ്ഞ് ഒഴിഞ്ഞതോടെയാണ് തട്ടിപ്പ് ബോധ്യപ്പെട്ടത്. ഇതോടെ ഏജന്‍റുമാർ 50 ലക്ഷം രൂപ മുതൽ ഒന്നരക്കോടി രൂപ വരെ കടബാധ്യതയിലായി. എറണാകുളം സ്വദേശിയായ അഭിഭാഷകൻ ഉൾപ്പെടെ വലിയൊരു സംഘം തട്ടിപ്പിനു പിന്നിലുള്ളതായാണ് ആരോപണം. 2023ൽ എറണാകുളം കേന്ദ്രീകരിച്ച് ദീപക് ആരംഭിച്ച ആർക്ക്സ് ഇന്‍റർനാഷണൽ എന്ന ഓഫീസ് കേന്ദ്രീകരിച്ചായിരുന്നു ഇടപാടുകൾ നടത്തിയിരുന്നത്. എറണാകുളം, കോട്ടയം, ഹരിപ്പാട്, കൊല്ലം തുടങ്ങിയ പ്രദേശങ്ങളിൽ നിന്നുള്ളവരാണ് പണം നഷ്ടമായവരിൽ ഏറെയും. ദീപക് അടുത്തിടെ വൻ തുക നൽകി ചില സ്വത്തുക്കൾ വാങ്ങിയതായി പറയപ്പെടുന്നു. ദീപക് നടത്തിയ തട്ടിപ്പിൽ പണം നഷ്ടപ്പെട്ടവർ നിയമ നടപടികളുമായി മുന്നോട്ടു പോകുകയാണ്. ഇതിന്‍റെ ഭാഗമായി ദീപക്കിന്‍റെ സ്വത്തുക്കൾ കണ്ടുകെട്ടുന്നതിനെക്കുറിച്ചും ആലോചനകളുണ്ട്. ദിവസവും നിരവധി ആളകൾ പണം തിരികെ ആവശ്യപ്പെട്ട് ദീപക്കിന്‍റെ വീട്ടിലെത്തുന്നുണ്ട്. എന്നാൽ, അവിടെയെത്തുന്നവരെ ദീപക് ഫോണിലൂടെ ഭീഷണിപ്പെടുത്തുന്നു എന്നാണ് പരാതികൾ.

പ്രകൃതിവിരുദ്ധ പീഡനം: ബസ് ഡ്രൈവർ റിമാൻഡിൽ

ചാരുംമൂട്: പ്രായപൂർത്തിയാകാത്ത കുട്ടിയെ പ്രകൃതിവിരുദ്ധ ലൈംഗിക പീഡനത്തിനിരയാക്കിയ സംഭവത്തിൽ അറസ്റ്റിലായ സ്വകാര്യ ബസ് ഡ്രൈവർ റിമാൻഡിൽ. വള്ളികുന്നം കടുവിനാൽ മുറിയിൽ കോയിപ്പുറത്ത് വീട്ടിൽ അരുൺ സോമനെ(32)യാണ് നൂറനാട് പോലീസ് സ്റ്റേഷൻ ഇൻസ്പെക്ടർ എസ്. ശ്രീകുമാറിന്‍റെ നേതൃത്വത്തിൽ കഴിഞ്ഞദിവസം അറസ്റ്റ് ചെയ്തത്. ചൊവ്വാഴ്ച വൈകിട്ട് ആറിന് കടയിൽ സാധനം വാങ്ങാൻ പോയ 15 കാരനായ ആൺകുട്ടിയെ പരിചയം നടിച്ച് ആളൊഴിഞ്ഞ സ്ഥലത്ത് കൊണ്ടുപോയി പ്രകൃതിവിരുദ്ധ ലൈംഗിക പീഡനം നടത്തുകയായിരുന്നുവെന്ന് പോലീസ് പറഞ്ഞു. ഭരണിക്കാവ് -ചെങ്ങന്നൂർ റൂട്ടിലോടുന്ന പ്രൈവറ്റ് ബസിലെ ഡ്രൈവറാണ് പ്രതി. ഇയാൾ കുട്ടിയെ പിതാവിന്‍റെ സുഹൃത്താണെന്ന് പറഞ്ഞ് പരിചയപ്പെട്ടാണ് കൂട്ടിക്കൊണ്ടുപോയത്. ഇന്നലെ വൈകിട്ട് അറസ്റ്റ് ചെയ്തു കൊണ്ടുവന്ന പ്രതി സ്റ്റേഷനിൽനിന്നു രക്ഷപ്പെടാൻ ശ്രമം നടത്തിയെങ്കിലും പോലീസ് തടഞ്ഞു. എസ്‌സിപിഒമാരായ ശരത്, സിജു, സിപിഒമാരായ മനു പ്രസന്നൻ, പ്രദീപ് എന്നിവരും എസ്എച്ച്ഒയ്ക്കൊപ്പമുണ്ടായിരുന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact editor@deepika.com