ADVERTISEMENT

ADVERTISEMENT

ഗാന്ധിജയന്തി ദിനാഘോഷം സംഘടിപ്പിച്ചു

കോട്ടയം: കേരളാസ്റ്റേറ്റ് എക്സസർവീസസ് ലീഗ് കടുത്തുരുത്തി യൂണിറ്റിന്‍റെ 11-മത് വാർഷികവും കുടുംബസംഗമവും ഗാന്ധിജയന്തി ദിനാഘോഷവും വിമുക്തഭട ഭവനിൽ നടത്തി.

കെഎസ്ഇഎസ്എൽ കോട്ടയം ജില്ലാ പ്രസിഡന്‍റ് വി.ടി. ചാക്കോ ഉദ്ഘാടനം ചെയ്തു. യൂണിറ്റ് പ്രസിഡന്‍റ് ജോസ് പീറ്റർ അധ്യക്ഷത വഹിച്ചു. ഇസിഎച്ച്എസ് പോളിക്ലിനിക് ഓഫിസർ ഇൻ ചാർജ് ബ്രിഗേഡിയർ എം.ഡി. ചാക്കോ മുഖ്യപ്രഭാഷണം നടത്തി. യൂണിറ്റിന്‍റെ പ്രഥമ പ്രസിഡന്‍റ് ടി.ജെ. സണ്ണിയെയും നവതി ആഘോഷിച്ച ഏലിക്കുട്ടി കുര്യനെയും പൊന്നാട അണിയിച്ചാദരിച്ചു. ടി.ജെ. സണ്ണി, ബാബുക്കുട്ടി ജോസഫ്, പഞ്ചായത്ത് അംഗം ടോമി നിരപ്പേൽ വൈക്കം താലൂക്ക് പ്രസിഡന്‍റ് രാംകുമാർ, ജോസഫ് പോൾ, ജില്ലാ വനിതാ പ്രസിഡന്‍റ് ലളിതാ എം. നായർ, അന്നമ്മ സിറിയക്, ജോളി ജോസഫ് എന്നിവർ പ്രസംഗിച്ചു.

വൈക്കം: ഗാന്ധിജയന്തിയോടനുബന്ധിച്ച് എൻസിപി വൈക്കം നിയോജക മണ്ഡലം കമ്മിറ്റിയുടെ ആഭിമുഖ്യത്തിൽ പുഷ്പാർച്ചനയും ഗാന്ധിജയന്തി അനുസ്മരണവും നടത്തി.

വൈക്കം സത്യഗ്രഹ സ്മാരകത്തിന് മുന്നിലെ ഗാന്ധി പ്രതിമയ്ക്കു മുന്നിൽ നടന്ന പുഷ്പാർച്ചനയ്ക്കു ശേഷം നടന്ന അനുസ്മരണ യോഗം എൻസിപി സംസ്ഥാന ജനറൽ സെക്രട്ടറി സുഭാഷ് പുഞ്ചക്കോട്ടിൽ ഉദ്ഘാടനം ചെയ്തു. എൻസിപി വൈക്കം ബ്ലോക്ക് പ്രസിഡന്‍റ് പി. അമ്മിണിക്കുട്ടൻ അധ്യക്ഷത വഹിച്ചു. സംസ്ഥാന സെക്രട്ടറി ടി.വി. ബേബി, കെ.എസ്. അജീഷ്കുമാർ, മിൽട്ടൺ ഇടശേരി തുടങ്ങിയവർ സംബന്ധിച്ചു.

വൈക്കം: വൈക്കം ലയൺസ് ക്ലബ്ബിന്‍റെ ആഭിമുഖ്യത്തിൽ ഗാന്ധിജയന്തിയോടനുബന്ധിച്ചു വൈക്കം ബോട്ട് ജെട്ടിയും പരിസരവും വൃത്തിയാക്കി. പുല്ലും കുറ്റിച്ചെടികളും വെട്ടി തെളിച്ചു വൃക്ഷതൈ നട്ടു. ലയൺസ് ക്ലബ് പ്രസിഡന്‍റ് മാത്യു കോടാലിച്ചിറ, സെക്രട്ടറി സുരേഷ്‌കുമാർ, ട്രഷർ ബി. ജയകുമാർ എന്നിവർ നേതൃത്വം നൽകി. ക്ലബ്ബിലെ മറ്റ് അംഗങ്ങളായ സുനിൽ കുമാർ, റിട്ട. ക്യാപ്റ്റൻ വിനോദ് കുമാർ, സന്തോഷ്‌, മനോജ്കുമാർ, രാധാകൃഷ്ണൻ എന്നിവർ ശുചീകരണ പ്രവർത്തനങ്ങളിൽ പങ്കാളികളായി.

ADVERTISEMENT

പുഞ്ച ഉത്പാദനത്തില്‍ 5,000 ടണ്‍ കുറവ്

കോട്ടയം: പുഞ്ച നെല്ല് സംഭരണം പൂര്‍ത്തിയായശേഷവും വില നല്‍കുന്നതില്‍ അനിശ്ചിതത്വം ബാക്കി. സപ്ലൈകോ ഫെബ്രുവരി പകുതിയോടെ സംഭരണം തുടങ്ങി മാര്‍ച്ച് 15 വരെ വാങ്ങിയ നെല്ലിന്‍റെ പണം അക്കൗണ്ടില്‍ നല്‍കി. ഇതാവട്ടെ ആകെ ഉത്പാദനത്തിന്‍റെ അഞ്ചു ശതമാനം മാത്രമായിരുന്നു. കര്‍ഷകര്‍ക്ക് ലഭിച്ചതാകട്ടെ 20 കോടി രൂപ. സപ്ലൈകോ സംഭരിച്ച് കുത്തുമില്ലുകള്‍ക്ക് കൈമാറിയ നെല്ലിനുള്ള പിആര്‍എസ് വാങ്ങാന്‍ പോലും ബാങ്കുകള്‍ മടിക്കുകയാണ്. നിലവില്‍ ഏപ്രില്‍ വരെയുള്ള പിആര്‍എസ് മാത്രമേ സംഭരണ കണ്‍സോര്‍ഷ്യത്തില്‍ ഉള്‍പ്പെട്ട സ്റ്റേറ്റ് ബാങ്കും കനറ ബാങ്കും വാങ്ങുന്നുള്ളൂ. മേയിലെ പിആര്‍എസ് വാങ്ങാന്‍ ബാങ്കുകള്‍ താത്പര്യപ്പെടുന്നില്ല. സംഭരിച്ച നെല്ലിന് എന്നു പണം നല്‍കുമെന്നതില്‍ യാതൊരു വ്യക്തതയുമില്ല. കോട്ടയം ജില്ലയില്‍ 47,000 മെട്രിക് ടണ്‍ ഉത്പാദനം നടക്കുമെന്നായിരുന്നു വിലയിരുത്തല്‍. എന്നാല്‍ വിളവുമോശവും സംഭരണത്തിലെ താമസവും മൂലം 42,110 മെട്രിക് ടണ്‍ മാത്രമാണ് സംഭരിച്ച് പിആര്‍എസ് നല്‍കിയത്. കഴിഞ്ഞ വിരിപ്പു നെല്ല് സംഭരണത്തിലെ കുടിശിക ഉള്‍പ്പെടെ 140 കോടി രൂപ ജില്ലയിലെ കര്‍ഷകര്‍ക്ക് ലഭിക്കാനുണ്ട്. ജില്ലയില്‍ ആദ്യമായി 30 കിലോ നെല്ല് കിഴിവു നല്‍കേണ്ടിവന്നതും കൊയ്ത്ത് ഏറ്റവും അനിശ്ചിതത്വത്തിലായതും ഇക്കൊല്ലത്തെ പുഞ്ച കൃഷിയിലാണ്.

നിലമ്പൂരില്‍ ആവേശം കൂട്ടാൻ‍ കോട്ടയത്തെ നേതാക്കളും

കോട്ടയം: നിലമ്പൂര്‍ ഉപതെരഞ്ഞെടുപ്പ് പ്രചാരണത്തിന് കോട്ടയത്തുനിന്നുള്ള നേതാക്കളും പ്രവര്‍ത്തകരും. മൂന്നു മുന്നണി സ്ഥാനാര്‍ഥികള്‍ക്കു പുറമേ തൃണമൂല്‍ സ്ഥാനാര്‍ഥി പി.വി. അന്‍വറിനൊപ്പവും കോട്ടയത്തുനിന്നുള്ള നേതാക്കള്‍ നിലമ്പൂര്‍ മണ്ഡലത്തിലുണ്ട്. തെരഞ്ഞെടുപ്പ് പ്രഖ്യാപനം വന്നയുടന്‍തന്നെ നേതാക്കള്‍ക്ക് മുന്നണികളും പാര്‍ട്ടികളും വിവിധയിടങ്ങളില്‍ ചുമതലകള്‍ നല്‍കിയിരുന്നു. യുഡിഎഫ് സ്ഥാനാര്‍ഥി ആര്യാടന്‍ ഷൗക്കത്തിനായി ചാണ്ടി ഉമ്മന്‍ എംഎല്‍എയുടെ നേതൃത്വത്തിലാണ് പ്രവര്‍ത്തകര്‍ നിലമ്പൂരിലെത്തിയിരിക്കുന്നത്. ഒരു പഞ്ചായത്തിന്‍റെ പ്രചാരണച്ചുമതലയാണ് ചാണ്ടി ഉമ്മനു നല്‍കിയിരിക്കുന്നത്. കെപിസിസി അച്ചടക്ക സമിതി അധ്യക്ഷന്‍കൂടിയായ തിരുവഞ്ചൂര്‍ രാധാകൃഷ്ണന്‍ എംഎല്‍എയും നിലമ്പൂരിലെത്തിയിട്ടുണ്ട്. ഡിസിസി പ്രസിഡന്‍റ് നാട്ടകം സുരേഷ്, കെപിസിസി ജനറല്‍ സെക്രട്ടറി പി.എ. സലിം എന്നിവര്‍ക്കൊപ്പം ഭാരവാഹികളും പ്രവര്‍ത്തകരും നിലമ്പൂരിലെത്തും. കേരള കോണ്‍ഗ്രസില്‍ മോന്‍സ് ജോസഫ് എംഎല്‍എ, ഫ്രാന്‍സിസ് ജോര്‍ജ് എംപി എന്നിവരും പ്രവര്‍ത്തകരും പ്രചാരണരംഗത്തുണ്ട്. എല്‍ഡിഎഫ് സ്ഥാനാര്‍ഥി എം. സ്വരാജിനുവേണ്ടി സിപിഎം സംസ്ഥാന കമ്മിറ്റിയംഗം കെ. അനില്‍കുമാര്‍ മണ്ഡലത്തിലുണ്ട്. പ്രചാരണം, വിവിധ പഞ്ചായത്തുകളുടെ ഏകോപനം എന്നിങ്ങനെ ചുമതലകള്‍ അനില്‍കുമാറുണ്ട്. കേരള കോണ്‍ഗ്രസ്-എം ചെയര്‍മാന്‍ ജോസ് കെ. മാണി എംപി കഴിഞ്ഞ ദിവസങ്ങളില്‍ നിലമ്പൂരിലുണ്ടായിരുന്നു. കേരള കോണ്‍ഗ്രസ് പ്രചാരണത്തിന് എംഎല്‍എമാരെയും നേതാക്കളെയും ചുമതലപ്പെടുത്തിയിട്ടുണ്ട്. ബിജെപി സ്ഥാനാര്‍ഥി മോഹന്‍ ജോര്‍ജിനുവേണ്ടി പ്രചാരണം നടത്താന്‍ ബിജെപി ജില്ലാ നേതാക്കള്‍ വൈകാതെ നിലമ്പൂരിലെത്തും. തൃണമൂല്‍ കോണ്‍ഗ്രസ് സ്ഥാനാര്‍ഥി പി.വി. അന്‍വറിന്‍റെ മുഖ്യ തെരഞ്ഞെടുപ്പ് പ്രചാരകനായി സജി മഞ്ഞക്കടമ്പില്‍ നിലമ്പൂരിലുണ്ട്. സ്ഥാനാര്‍ഥി പ്രഖ്യാപനം, പാര്‍ട്ടി യോഗങ്ങള്‍, പത്രികാ സമര്‍പ്പണം തുടങ്ങിയവയില്‍ അന്‍വറിനൊപ്പം സജിയുണ്ടായിരുന്നു. ജില്ലയില്‍നിന്നുള്ള ഏതാനും പ്രവര്‍ത്തകരുമുണ്ട്. പ്രചാരണം തീരുംവരെ ഇവര്‍ മണ്ഡലത്തിലുണ്ടാകും.

വാട്‌സ് ആപ്പില്‍ സഹായസന്ദേശവുമായി തട്ടിപ്പുസംഘം

കോട്ടയം: മൊബൈല്‍ ഫോണില്‍ നെറ്റ് ബാങ്കിംഗും യുപിഐ സംവിധാനവുമുള്ളവര്‍ ജാഗ്രത പാലിക്കുക. പരിചിതരും പ്രമുഖരുമായ വ്യക്തികളുടെ വാട്‌സ് ആപ്പിലൂടെ മെസേജ് അയച്ച് പണം തട്ടുന്ന സംഘം സജീവമായിരിക്കുന്നു. ജില്ലയില്‍ വൈദികര്‍ ഉള്‍പ്പെടെയുള്ള പ്രമുഖരുടെ മൊബൈല്‍ നമ്പറുകള്‍ ഹാക്ക് ചെയ്താണ് അവരുടെ നമ്പറുകളില്‍നിന്ന് ഒരാഴ്ചയായി അഭ്യര്‍ഥന വന്നുകൊണ്ടിരിക്കുന്നത്. പ്രെയിസ് ദി ലോഡ്, ഐ നീഡ് എ ഫേവര്‍ ഫ്രം യു എന്ന് അക്ഷരത്തെറ്റോടെയുള്ള ഇംഗ്ലീഷ് മെസേജാണ് വരിക. എന്ത് സഹായം എന്ന് തിരികെ മെസേജിട്ടാല്‍ നാല്‍പതിനായിരം രൂപ തന്ന് സഹായിക്കണമെന്നും ബാങ്ക് ഇടപാടിന് തടസം സംഭവിച്ചെന്നും രാവിലെ തിരികെ തരാമെന്നും മറുപടി വരും. നിജസ്ഥിതി ചോദിച്ചറിയാതെ നിരവധി പേര്‍ ഇത്തരത്തില്‍ പണം യുപിഐ വഴി ട്രാന്‍സ് ചെയ്ത് തട്ടിപ്പില്‍പ്പെട്ടു. മൊബൈലിലെ കോള്‍ ലിസ്റ്റില്‍ ഏറെപ്പെരുടെ നമ്പര്‍ സൂക്ഷിച്ചിരിക്കുന്നവരെ തെരഞ്ഞുപിടിച്ചാണ് സംഘം നുഴഞ്ഞുകയറി സന്ദേശം അയയ്ക്കുക. ഈ സാഹചര്യത്തില്‍ പോലീസ് സൈബര്‍ സെല്ലില്‍ നിരവധി പരാതികളാണ് ലഭിച്ചുകൊണ്ടിരിക്കുന്നത്. തട്ടിയെടുക്കുന്ന പണം ഏത് അക്കൗണ്ടിലേക്ക് പോകുന്നതെന്ന് വ്യക്തമായിട്ടില്ല. അക്ഷരത്തെറ്റുകളും ഗ്രാമര്‍ തെറ്റുകളുമുള്ള മെസേജുകള്‍ക്കു പിന്നില്‍ വിദേശ സംഘമാണോ എന്നും സംശയിക്കുന്നു. മറുപടി നല്‍കാതെ വന്നാല്‍ വിശേഷങ്ങള്‍ തിരക്കിയും ആശംസകള്‍ നേര്‍ന്നും ഇവര്‍ തുടര്‍ മെസേജുകള്‍ അയയ്ക്കുന്നുണ്ട്.

കര്‍ഷകരെ നഷ്ടക്കെണിയിലാക്കി പെരുമഴ ശമിച്ചു

കോട്ടയം: രണ്ടാഴ്ച നീണ്ട കാലവര്‍ഷക്കെടുതിയില്‍ വാഴ, കപ്പ, പച്ചക്കറി കര്‍ഷകര്‍ക്ക് ഭീമമായ നഷ്ടം. മീനച്ചില്‍, പമ്പ നദിയോരങ്ങ ളിലെ താഴ്ന്ന പ്രദേശങ്ങളിലും പാടങ്ങളിലും കൃഷിയിറക്കിയവര്‍ക്കാണ് വന്‍നഷ്ടം. വെള്ളക്കെട്ടിലായ കപ്പ പറിച്ച് നിസാരവിലയ്ക്ക് വില്‍ക്കാന്‍ നിര്‍ബന്ധിതരായവരുമുണ്ട്. പച്ചക്കപ്പവില മാര്‍ക്കറ്റില്‍ 40 രൂപയുണ്ടായിരിക്കെ ഇക്കൊല്ലം ആശ്വാസവില കണക്കുകൂട്ടിയവര്‍ ഇരുപതു രൂപയ്ക്ക് വഴിയോരങ്ങളില്‍ കപ്പ വില്‍ക്കാന്‍ കഴിഞ്ഞ ദിവസങ്ങളില്‍ തിരക്ക് കൂട്ടി. കഴിഞ്ഞ മാസങ്ങളില്‍ നട്ട കപ്പയും വാഴയും മഴയ്ക്കൊപ്പമുണ്ടായ കനത്ത കാറ്റില്‍ പിഴുതുവീണതും നഷ്ടം ഇരട്ടിയാക്കി. ഓണം വിപണി ലക്ഷ്യമാക്കി വാഴയും പച്ചക്കറിയും കൃഷി ചെയ്ത ചെറുകിടക്കാര്‍ക്കാണ് ഏറ്റവും നഷ്ടമുണ്ടായത്. സ്ഥലം പാട്ടത്തിനെടുത്തും ലോണെടുത്തും സംഘകൃഷി നടത്തിയവര്‍ക്ക് ലക്ഷങ്ങളുടെ ബാധ്യതയാണുണ്ടായിരിക്കുന്നത്. മറ്റുള്ളവരുടെ സ്ഥലത്ത് വാരത്തിന് കൃഷി നടത്തി നഷ്ടമുണ്ടായാല്‍ കൃഷിവകുപ്പിന്‍റെ നഷ്ടപരിഹാര തുക ലഭിക്കാന്‍ പരിമിതിയുണ്ട്. പലയിടങ്ങളില്‍ നഷ്ടം നിര്‍ണയിക്കാന്‍ കൃഷി വകുപ്പ് ഉദ്യോഗസ്ഥര്‍ സ്ഥലത്തെത്താതിരുന്നതും തിരിച്ചടിയായി. മഴ തുടരെ പെയ്തതിനാല്‍ പച്ചക്കറി ഇനങ്ങള്‍ ചീഞ്ഞും കായ് കൊഴിഞ്ഞും കര്‍ഷകര്‍ക്ക് നഷ്ടമുണ്ടായി. പാടങ്ങളില്‍ നട്ട വെള്ളരി, മത്തന്‍, പടവലം എന്നിവയുടെ ഫലവും പൂര്‍ണമായി അഴുകി. പയര്‍, പടവലം, പാവല്‍, വെണ്ട, വഴുതിന, ചീര തുടങ്ങിയ പച്ചക്കറി കര്‍ഷകരും പ്രതീക്ഷയറ്റ് കഴിയുകയാണ്. ജൂണ്‍, ജൂലൈ മാസങ്ങളില്‍ കൃഷിയിറക്കി വിളകൊയ്യാന്‍ പാകത്തിലെത്തിയ നെല്‍പ്പാടങ്ങളില്‍ വെള്ളം കയറി കതിരുകള്‍ ചീഞ്ഞളിഞ്ഞ് നശിച്ചു. ആയിരക്കണക്കിന് കര്‍ഷകരുടെ പ്രതീക്ഷയാണ് മഴയും കാറ്റും തല്ലിക്കെടുത്തിത്. കാലവര്‍ഷം ഇടമുറിയാം കോട്ടയം: മേയില്‍ ശക്തമായ മഴ തത്കാലം പിന്മാറി നില്‍ക്കുമെന്ന് കാലാവസ്ഥാ നിരീക്ഷണ വിഭാഗം. രണ്ടു വര്‍ഷം മുന്‍പ് സംഭവിച്ചതുപോലെ ജൂണ്‍, ജൂലൈ മാസങ്ങളില്‍ മണ്‍സൂണ്‍ പൂര്‍ണമായി പിന്മാറി വേനലിന്‍റെ ഘടനയിലെത്തുകയും ഓഗസ്റ്റ്, സെപ്റ്റംബറില്‍ ശക്തിപ്പെടുകയും ചെയ്യാനുള്ള സാധ്യത കുറവല്ല. കേരളം നേരിടുന്ന കാലാവസ്ഥാവ്യതിയാനത്തിന്‍റെ ഭാഗമായി കാലവര്‍ഷം ഇടമുറിയാന്‍ സാധ്യതയുണ്ട്. അങ്ങനയെങ്കില്‍ കാര്‍ഷികവിളവിനെ അത് പ്രതികൂലമായി ബാധിക്കും. കാപ്പി, കുരുമുളക് തുടങ്ങിയ ഫലങ്ങള്‍ നന്നേ കുറയും. നടീല്‍ കൃഷി പകമാകാന്‍ വൈകും. വിളവും കുറയും. ജില്ലയില്‍ 57 ദുരിതാശ്വാസ ക്യാമ്പുകള്‍; 717 കുടുംബങ്ങള്‍ സുരക്ഷിത കേന്ദ്രങ്ങളില്‍ കോട്ടയം: കനത്ത മഴ, വെള്ളപ്പൊക്കം എന്നിവയെത്തുടര്‍ന്ന് ജില്ലയില്‍ സുരക്ഷിത കേന്ദ്രങ്ങളില്‍ കഴിയുന്നത് 717 കുടുംബങ്ങള്‍. 57 ദുരിതാശ്വാസ ക്യാമ്പുകളാണു പ്രവര്‍ത്തിക്കുന്നത്. കോട്ടയം താലൂക്കിലാണ് കൂടുതല്‍ ക്യാമ്പുകളുള്ളത് -41. ചങ്ങനാശേരി-12, വൈക്കം-4 എന്നിങ്ങനെയാണു മറ്റു താലൂക്കുകളിലെ ക്യാമ്പുകളുടെ എണ്ണം. 2,095 പേരാണു ക്യാമ്പുകളിലുള്ളത്. വിദ്യാഭ്യാസ സ്ഥാപനങ്ങൾക്ക് അവധി കോട്ടയം: ജില്ലയിൽ ദുരിതാശ്വാസ ക്യാമ്പുകൾ പ്രവർത്തിക്കുന്ന വിദ്യാഭ്യാസ സ്ഥാപനങ്ങൾക്ക് ഇന്ന് ജില്ലാ കളക്ടർ ജോൺ വി. സാമുവൽ അവധി പ്രഖ്യാപിച്ചു.

പ്രവേശനോത്സവത്തിൽ അണിചേർന്ന് അഫ്ഗാൻ ദന്പതികളുടെ മകൾ ബഹ്സ കരീമിയും

ഗാന്ധിനഗർ: മുടിയൂർക്കര ഗവ. എൽപി സ്കൂളിൽ അഫ്ഗാൻ കാബൂൾ സ്വദേശികളുടെ മകളായ ബഹ്‌സ കരീമി എന്ന അഞ്ചുവയസുകാരി ഒന്നാം ക്ലാസിൽ പുതിയ അതിഥിയായെത്തിയത് പ്രവേശനോത്സവ ആഘോഷങ്ങൾക്ക് കൊഴുപ്പേകി. പുതിയ കൂട്ടുകാരിയെ ലഭിച്ചതിന്‍റെ സന്തോഷത്തിലായിരുന്നു സഹപാഠികളായെത്തിയവർ. മാതാപിതാക്ക ളായ മുഹമ്മദ് ഫാഹീമിനും എല്ലാഹ സാഹിറിനും സഹോദരൻ ബാഹർ കരീമിനും ഒപ്പമാണ് ബഹ്‌സാ ഒന്നാം ക്ലാസ് വിദ്യാർഥിയായി സ്‌കൂളിലേക്കെത്തിയത്. 2021ലാണ് മുഹമ്മദ് കുടുംബത്തോടൊപ്പം കോട്ടയത്തെത്തിയത്. എംജി യൂണിവേഴ്‌സിറ്റിയിൽ ബിസിനസ് സ്റ്റഡീസിൽ റിസർച്ച് ചെയ്യുകയാണ് മുഹമ്മദ്. മുടിയൂർക്കര ഹൗസിംഗ് കോളനിയിലാണ് താമസം. എസ്എച്ച് മൗണ്ടിലായിരുന്നു ബഹ്‌സ കെജി പഠനം നടത്തിയിരുന്നത്. മുടിയൂർക്കര സ്‌കൂളിന്‍റെ പ്രവർത്തനമികവും പാഠ്യ-പാഠ്യേതര മികവും സോഷ്യൽ മീഡിയാകളിലൂടെ യും മറ്റും അറിഞ്ഞാണ് ബഹ്‌സയെ ഇവിടെ ചേർത്തതെന്ന് മുഹമ്മദ് പറഞ്ഞു. മലയാളം അറിയുമോയെന്ന ചോദ്യത്തിന് “ലിറ്റിൽ മലയാളം’’ എന്ന് ബഹ്‌സ പറഞ്ഞെങ്കിലും ഇംഗ്ലീഷിലാണ് സംസാരിക്കുന്നത്. അഫ്ഗാനി, ഉറുദു എന്നീ ഭാഷകളും അറിയാം. മലയാളം പഠിക്കണമെന്നാണ് ആഗ്രഹം. പൂക്കൾ നൽകിയാണ് പുതിയ അതിഥിയെ ഒന്നാം ക്ലാസ് ടീച്ചറായ സോളിയമ്മ ജേക്കബും ഹെഡ്മിസ്ട്രസ് കെ.സിന്ധുമോളും മറ്റ് സഹഅധ്യാപകരും വരവേറ്റത്. രണ്ട് വർഷം മുമ്പാണ് ഈ സ്‌കൂളിലേക്ക് ഇതരസംസ്ഥാനത്തുനിന്നുള്ള കുട്ടികളെത്തിയത്. ആറ് ബീഹാർ സ്വദേശികളായിരുന്നു പ്രവേശനം നേടിയിരുന്നത്. കൂടാതെ, ഒരു ആസാം സ്വദേശിയും പഠിക്കുന്നുണ്ട്. രണ്ട്, മൂന്ന്, നാല് ക്ലാസുകളിലായാണ് ഇവർ പഠിക്കുന്നത്. പ്രവേശനോത്സവത്തിൽ മുനിസിപ്പൽ ചെയർപേഴ്സൺ ബിൻസി സെബാസ്റ്റ്യൻ, കൗൺസിലർ സാബു മാത്യു, മുടിയൂർക്കര ഹോളി ഫാമിലി പള്ളി വികാരി ഫാ. ഫിലിപ്പ് നെൽപ്പുരപ്പറമ്പിൽ, ഗാന്ധിനഗർ പോലീസ് സ്റ്റേഷനിലെ എസ്എച്ച്ഒ ടി. ശ്രീജിത്ത് തുടങ്ങിയവർ പങ്കെടുത്തു.

അറിവിന്‍റെ ലോകത്തേക്ക് കുരുന്നുകള്‍; വര്‍ണാഭമായി വരവേറ്റ് സ്‌കൂളുകള്‍

കോട്ടയം: മഴമേഘങ്ങള്‍ മാറിനിന്ന അന്തരീക്ഷത്തില്‍ കുരുന്നുകള്‍ക്ക് അറിവന്‍റെ ലോകത്തേക്ക് പുതുപ്രവേശം. രണ്ടുമാസത്തെ വേനലവധിക്കുശേഷം തിരികെയെത്തിയ കുട്ടികള്‍ക്കും സൗഹൃദത്തിന്‍റെയും അറിവിന്‍റെയും ലോകത്തേക്ക് വീണ്ടുമെത്തിയതിന്‍റെ ആഹ്ലാദം. വര്‍ണാഭമായി അലങ്കരിച്ച ക്ലാസ് മുറികളിലേക്ക് ആദ്യമായെത്തിയ നവാഗതരെ മധുരം നല്‍കി സ്വീകരിച്ചാണ് ജില്ലയിലെ സ്‌കൂളുകളില്‍ പ്രവേശനോത്സവം ആഘോഷിച്ചത്. പുത്തനുടുപ്പും ബാഗും കുടയും പുസ്തകവും ചോറ്റുപാത്രവുമൊക്കെയായി മാതാപിതാക്കളുടെ കൈപിടിച്ചെത്തിയ നവാഗതര്‍ അക്ഷരമുറ്റം കണ്ടപ്പോള്‍ ആദ്യമൊന്ന് അമ്പരന്നു. പിന്നീട് മധുരം കഴിച്ച് കളിയും ചിരിയുമായി കൂട്ടുകാര്‍ക്കൊപ്പം കൂടി. ചിലരാകട്ടെ മാതാപിതാക്കളെ കാണാതെ കരഞ്ഞു. ഇവരെ ആശ്വസിപ്പിക്കാന്‍ മുതിര്‍ന്ന കുട്ടികളും അധ്യാപകരും കളിപ്പാട്ടങ്ങളും മധുരപലഹാരങ്ങളുമായി എത്തി. പാട്ടും ഡാന്‍സും പഠനവും കളിചിരികളുമായി പുതിയ കൂട്ടുകാര്‍ക്കൊപ്പം ആദ്യദിനം ആഘോഷമാക്കിയാണ് മടങ്ങിയത്. നീണ്ടൂര്‍ എസ്‌കെവി ഹയര്‍ സെക്കന്‍ഡറി സ്‌കൂളില്‍ നടന്ന ജില്ലാതല പ്രവേശനോത്സവം മന്ത്രി വി.എന്‍. വാസവന്‍ ഉദ്ഘാടനം ചെയ്തു. സ്‌കൂളിന് സര്‍വശിക്ഷാ കേരളം ഫണ്ടിലൂടെ അനുവദിച്ച ടിങ്കറിംഗ് ലാബിന്‍റെ ഉദ്ഘാടനവും മന്ത്രി നിര്‍വഹിച്ചു. നീണ്ടൂര്‍ പഞ്ചായത്ത് പ്രസിഡന്‍റ് വി.കെ. പ്രദീപ് അധ്യക്ഷത വഹിച്ചു. ഫ്രാന്‍സിസ് ജോര്‍ജ് എംപി മുഖ്യപ്രഭാഷണം നടത്തി. ജില്ലാ കളക്ടര്‍ ജോണ്‍ വി. സാമുവല്‍ നവാഗതരെ സ്വാഗതം ചെയ്തു. സാഹിത്യകാരനും പൂര്‍വവിദ്യാര്‍ഥിയുമായ എസ്. ഹരീഷ് സ്‌കൂളിന്‍റെ കൈയെഴുത്തു മാഗസിന്‍ പ്രകാശനം ചെയ്തു. ജില്ലാ വിദ്യാഭ്യാസ ഉപഡയറക്ടര്‍ ഹണി ജി. അലക്‌സാണ്ടര്‍, ത്രിതല പഞ്ചായത്തംഗങ്ങള്‍, പൊതുവിദ്യാഭ്യാസ വകുപ്പ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു. ഉദ്ഘാടനത്തിനു മുന്നോടിയായി നീണ്ടൂര്‍ പ്രാവട്ടത്തുനിന്ന് സ്‌കൂളിലേക്കു സാംസ്‌കാരിക ഘോഷയാത്ര നടന്നു. വാദ്യമേളങ്ങളും നാടന്‍ കലാരൂപങ്ങളും ഘോഷയാത്രയെ വര്‍ണാഭമാക്കി. എന്‍സിസി, സ്‌കൗട്ട് വിഭാഗങ്ങളടക്കം നൂറുകണക്കിനു കുട്ടികള്‍ അണിചേർന്നു. ആലപ്പുഴ കലവൂരില്‍ നടന്ന സംസ്ഥാനതല പ്രവേശനോത്സവം ഉദ്ഘാടനം തത്സമയം ഓണ്‍ലൈനായി പ്രദര്‍ശിപ്പിച്ചു. സ്‌കൂളുകളില്‍ ഉരഗ പരിശോധനയുമായി വനം വകുപ്പ് കോട്ടയം: പുതിയ അധ്യയനവര്‍ഷാരംഭത്തോടനുബന്ധിച്ച് സ്‌കൂളുകളില്‍ വനംവകുപ്പിന്‍റെ സര്‍പ്പ വോളന്‍റിയര്‍മാര്‍ പരിശോധന നടത്തുന്നു. സ്‌കൂള്‍ അധികൃതരോ പിടിഎ ഭാരവാഹികളോ അറിയിക്കുന്നതു പ്രകാരമാണ് പരിശോധന. സ്‌കൂളുകളിലും പരിസരങ്ങളിലും വിഷപാമ്പുകളുടെ സാന്നിധ്യം ഒഴിവാക്കി കുട്ടികളുടെ സുരക്ഷ ഉറപ്പാക്കുകയാണ് ലക്ഷ്യം. വിദ്യാര്‍ഥികളുടെയും അധ്യാപകരുടെയും സുരക്ഷയ്ക്കായി വനംവകുപ്പ് നല്‍കുന്ന സുപ്രധാനമായ സേവനമാണിത്. ജില്ലാ സാമൂഹിക വനവത്കരണ വിഭാഗം അസിസ്റ്റന്‍റ് ഫോറസ്റ്റ് കണ്‍സര്‍വേറ്റര്‍മാരുടെ നേതൃത്വത്തിലാണ് പരിശോധനാ പ്രവര്‍ത്തനങ്ങള്‍ ഏകോപിപ്പിക്കുന്നത്. സര്‍പ്പ വോളന്‍റിയര്‍മാരുടെ സഹായം ആവശ്യമുള്ള സ്‌കൂള്‍ അധികൃതര്‍ക്ക് അതാത് ജില്ലയിലെ സാമൂഹിക വനവത്കരണ വിഭാഗവുമായി ബന്ധപ്പെടാവുന്നതാണ്. സഹായങ്ങള്‍ക്കും അന്വേഷണങ്ങള്‍ക്കും വനംവകുപ്പിന്‍റെ ടോള്‍ ഫ്രീ നമ്പരിലും വിളിക്കാം. നമ്പര്‍: 1800 425 4733. സോഷ്യല്‍ ഫോറസ്ട്രി ഡിവിഷന്‍ കോട്ടയം: 9447979133.

റൈസിംഗ് പൂഞ്ഞാർ: മുന്നൊരുക്ക സെമിനാർ ഇന്ന് മുണ്ടക്കയത്ത്

മുണ്ടക്കയം: പൂഞ്ഞാർ നിയോജക മണ്ഡലത്തിൽ സംരംഭകത്വം പ്രോത്സാഹിപ്പിക്കുന്നത് ലക്ഷ്യം വച്ച് നടത്തുന്ന റൈസിംഗ് പൂഞ്ഞാർ 2കെ25 എന്ന നിക്ഷേപ സംഗമത്തിന് മുന്നോടിയായി കാഞ്ഞിരപ്പള്ളി ബ്ലോക്ക് തല മുന്നൊരുക്ക സെമിനാർ ഇന്ന് രാവിലെ 10.30ന് മുണ്ടക്കയം പഞ്ചായത്ത് കോൺഫറൻസ് ഹാളിൽ നടക്കും. സെബാസ്റ്റ്യൻ കുളത്തുങ്കൽ എംഎൽഎ ഉദ്ഘാടനം ചെയ്യും. ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ് അധ്യക്ഷത വഹിക്കും. ത്രിതല പഞ്ചായത്ത് ജനപ്രതിനിധികൾ, വ്യവസായ വകുപ്പ് ഉദ്യോഗസ്ഥർ, സംരംഭകർ, കുടുംബശ്രീ ഭാരവാഹികൾ തുടങ്ങിയവർ പ്രസംഗിക്കും. വനിതാ സംരംഭകർക്കുള്ള മാർഗനിർദേശങ്ങളും പ്രത്യേക ആനുകൂല്യങ്ങളും സംബന്ധിച്ച് സെമിനാറിൽ വിശദമാക്കും. കൂടാതെ കാർഷികാധിഷ്ഠിത ഭക്ഷ്യോൽപ്പന്നങ്ങളുടെ മൂല്യ വർധിത ഉൽപ്പന്ന നിർമാണം സംബന്ധിച്ചും വിദഗ്ധർ ക്ലാസുകൾ നയിക്കും. കാഞ്ഞിരപ്പള്ളി ബ്ലോക്ക് പഞ്ചായത്തിന്‍റെ നേതൃത്വത്തിൽ വിവിധ പഞ്ചായത്തുകളിലെ യുവതികൾക്കായി നടത്തിയ ദേ രുചി 3.0 പരിശീലന പരിപാടി വിജയകരമായി പൂർത്തീകരിച്ചവർക്കും കൂടാതെ 30 ദിവസത്തെ ബ്യൂട്ടീഷൻ കോഴ്സ് പരിശീലനം പൂർത്തീകരിച്ചവർക്കുമുള്ള സർട്ടിഫിക്കറ്റ് വിതരണവും നടത്തും. ഒന്പതിന് ഈരാറ്റുപേട്ട ബർക്കത്ത് സ്ക്വയറിൽ നടക്കുന്ന ഇൻവെസ്റ്റേഴ്സ് മീറ്റിൽ ടൂറിസം ഇൻഡസ്ട്രി, കാർഷികാധിഷ്ഠിത മൂല്യ വർധിത ഉൽപന്ന നിർമാണം, ഐടി സംരംഭങ്ങൾ, സുഗന്ധവ്യഞ്ജനാധിഷ്ഠിത ഉൽപ്പന്നങ്ങൾ, വുഡൻ ബേസ്ഡ് ഇൻഡസ്ട്രി മുതലായവ കേന്ദ്രീകരിച്ചുള്ള സംരംഭകത്വ വികസനമാണ് പ്രധാനമായും ലക്ഷ്യം വയ്ക്കുന്നത്.

പ്രാഥമികാരോഗ്യ കേന്ദ്രത്തിൽ വിവിധ തസ്തികകളിലേക്ക് നിയമനം

മുണ്ടക്കയം: കോരുത്തോട് പ്രാഥമികാരോഗ്യകേന്ദ്രത്തിൽ ഈവനിംഗ് ഒപി നടത്തുന്നതിനായി ഡോക്ടർ, സ്റ്റാഫ് നഴ്സ്, ഫാർമസിസ്റ്റ് തസ്തികകളിലേക്ക് നിയമനം നടത്തുന്നു. കോരുത്തോട് പഞ്ചായത്ത് വാർഷിക പദ്ധതി 2025-26 ഭാഗമായാണ് ദിവസവേതനാടിസ്ഥാനത്തിൽ നിയമനം നടത്തുന്നത്. ഗ്രാമപഞ്ചായത്തിൽ ഉള്ളവർക്ക് മുൻഗണന. ഡോക്ടർ ഒഴികെയുള്ള തസ്തികകളിലേക്ക് അപേക്ഷിക്കുന്നവരുടെ പരമാവധി പ്രായം 36 വയസ്. രണ്ടുവർഷം പ്രവൃത്തിപരിചയവും വേണം. ഉദ്യോഗാർഥികൾ യോഗ്യത, രജിസ്ട്രേഷൻ മുതലായവ തെളിയിക്കുന്ന രേഖകൾ, ബയോഡേറ്റ എന്നിവ 15ന് വൈകുന്നേരം നാലിനു മുൻപായി പിഎച്ച്സി ഓഫീസിൽ എത്തിക്കണം.

പ്രവേശനോത്സവം ഏറ്റെടുത്ത് പെരുവന്താനം പോലീസ്

മുണ്ടക്കയം ഈസ്റ്റ്‌: സ്കൂളുകളിൽ സർക്കാരിന്‍റെയും സ്കൂൾ മാനേജുമെന്‍റിന്‍റെയും സന്നദ്ധ സംഘടനകളുടെയുമൊക്കെ നേതൃത്വത്തിൽ പ്രവേശനോത്സവങ്ങൾ സംഘടിപ്പിക്കാറുണ്ട്. എന്നാൽ, ഒരു സ്കൂളിലെ പ്രവേശനോത്സവം പൂർണമായും ഏറ്റെടുത്തു നടത്തി വ്യത്യസ്തരായി മാറിയിരിക്കുകയാണ് പെരുവന്താനം പോലീസ് സ്റ്റേഷനിലെ ഉദ്യോഗസ്ഥർ. പെരുവന്താനം പഞ്ചായത്തിലെ ടിആർ ആൻഡ് ടി എസ്റ്റേറ്റിലെ മാട്ടുപ്പെട്ടി എൽപി സ്കൂളിലാണ് പോലീസിന്‍റെ പ്രവേശനോത്സവം നടന്നത്. സ്കൂളിലെ പ്രവേശനോത്സവത്തിന്‍റെ അലങ്കാരം മുതൽ നവാഗതരെ സ്വീകരിക്കൽ വരെയും പോലീസ് ഉദ്യോഗസ്ഥരുടെ നേതൃത്വത്തിലാണ് നടന്നത്. മധുര പലഹാരങ്ങൾ നൽകി കുഞ്ഞുകുട്ടികളെ കാക്കിപ്പട കയ്യിലെടുത്തതോടെ കുരുന്നുകളുടെ മനസിലെ പേടിയും മാഞ്ഞു. പ്രവേശനോത്സവത്തിൽ പങ്കെടുത്ത കുട്ടികൾക്ക് ബാഗും കുടയും പഠനോപകരണങ്ങളും കൂടാതെ ഉച്ചക്കഞ്ഞി കുടിക്കുന്നതിനാവശ്യമായ പാത്രങ്ങളും ഉൾപ്പെടെയാണ് പോലീസ് ഒരുക്കി നൽകിയത്. വാർഡ് മെംബർ എം.സി. സുരേഷ് അധ്യക്ഷത വഹിച്ചു. പീരുമേട് ഡിവൈഎസ്പി വിശാൽ ജോൺസൺ ഉദ്ഘാടനം ചെയ്തു. പിടിഎ പ്രസിഡന്‍റ് ജെ. രതീഷ്, ടി ആര്‍ ആൻഡ് ടി എസ്റ്റേറ്റ് മാനേജർ ജോർജ് ജേക്കബ്, പെരുവന്താനം എസ്എച്ച്ഒ ത്രിദീപ് ചന്ദ്രൻ, സുനിൽ സുരേന്ദ്രൻ, ജോസഫ് കാവ്യസാന്ദ്രം, ആശ മോൾ, സ്റ്റാഫ് സെക്രട്ടറി ധന്യ അരുൺ തുടങ്ങിയവർ പ്രസംഗിച്ചു. എസ്ഐമാരായ ബിജു ജോസഫ്, അജ്മൽ, സെയ്ദ്, ജനമൈത്രി പോലീസ് ഉദ്യോഗസ്ഥരായ പ്രവീൺ, അശോകൻ, ജോബിൻ, ജനിഷ് തുടങ്ങിയവർ നേതൃത്വം നൽകി. വിദ്യാർഥികളും അധ്യാപകരും രക്ഷാകർത്താക്കളും പോലീസ് ഉദ്യോഗസ്ഥരും ചേർന്ന് പ്രവേശനോത്സവത്തിന്‍റെ ഭാഗമായി അക്ഷരദീപവും തെളിയിച്ചു.

പ്രവേശനോത്സവം: അക്ഷരമുറ്റത്തേക്ക് കളിചിരികളുമായി കുട്ടികളെത്തി

കാഞ്ഞിരപ്പള്ളി: രണ്ടുമാസത്തെ വേനലവധിക്കുശേഷം കുട്ടികൾ അക്ഷരമുറ്റത്തേക്ക് കളിചിരികളുമായി എത്തി. ആദ്യമായി സ്കൂളിലെത്തുന്പോൾ കരയുന്ന കുട്ടികളുടെ പതിവ് കാഴ്ച ഇക്കുറി കാണാനില്ലായിരുന്നു. കൂട്ടുകാർക്കൊപ്പം കളിച്ചും പഠിച്ചും നടക്കാനാണ് അവർക്ക് ഇഷ്ടം. കാഞ്ഞിരപ്പള്ളിയിലെ വിവിധ സ്കൂളുകളിൽ പ്രവേശനോത്സവം നടത്തി. മധുരപലഹാരങ്ങളും പൂക്കളും നൽകിയാണ് കുട്ടികളെ അധ്യാപകർ സ്വീകരിച്ചത്. കാഞ്ഞിരപ്പള്ളി സെന്‍റ് ഡൊമിനിക്സ് ഹയർ സെക്കൻഡറി സ്കൂളിൽ നടന്ന പ്രവേശനോത്സവം സ്കൂൾ മാനേജരും ആർച്ച് പ്രീസ്റ്റുമായ റവ.ഡോ. കുര്യൻ താമരശേരി ഉദ്ഘാടനം ചെയ്തു. പിടിഎ പ്രസിഡന്‍റ് പി.ജെ. തോമസ് അധ്യക്ഷതവഹിച്ചു. ഹെഡ്മാസ്റ്റർ പി.ജെ. തോമസ്, വാർഡ് മെംബർ ബിജു പത്യാല, മേഴ്സി ജോൺ, അനീസിയ മാർഗരറ്റ് ജോസ് എന്നിവർ പ്രസംഗിച്ചു കാഞ്ഞിരപ്പള്ളി സെന്‍റ് മേരീസ് ഗേൾസ് ഹൈസ്കൂളിലെ പ്രവേശനോത്സവം ജില്ലാ പഞ്ചായത്തംഗം ജെസി ഷാജൻ മണ്ണംപ്ലാക്കൽ ഉദ്ഘാടനം ചെയ്തു. സ്കൂൾ മാനേജർ സിസ്റ്റർ സലോമി സിഎംസി അധ്യക്ഷത വഹിച്ചു. എക്സൈസ് ഡിപ്പാർട്ട്മെന്‍റ് പ്രിവന്‍റ് ഓഫീസർ സ്റ്റാൻലി ചാക്കോ ലഹരിവിരുദ്ധ ബോധവത്ക്കരണ ക്ലാസ് നയിച്ചു. ഹെഡ്മിസ്ട്രസ് നിസ മോൾ ജോൺ, വാർഡ് മെംബർ ബിജു പത്യാല, പിടിഎ പ്രസിഡന്‍റ് മാത്യു സെബാസ്റ്റ്യൻ, സീനിയർ അസിസ്റ്റന്‍റ് ജാക്വിലിൻ സെബാസ്റ്റ്യൻ എന്നിവർ പ്രസംഗിച്ചു. തുടർന്ന് കുട്ടികളുടെ വിവിധ കലാപരിപാടികൾ അവതരിപ്പിച്ചു. കുന്നുംഭാഗം സെന്‍റ് ജോസഫ്‌സ് പബ്ലിക് സ്‌കൂളിലെ പ്രവേശനോത്സവംസെന്‍റ് ജോസഫ്സ് ഇടവക വികാരി ഫാ. ആന്‍റണി ചെന്നക്കാട്ടുകുന്നേല്‍ ഉദ്ഘാടനം ചെയ്തു. ഡീക്കന്‍ ആല്‍ജില്‍ പള്ളിവാതുക്കല്‍, പിടിഎ പ്രസിഡന്‍റ് ആന്‍റണി മാര്‍ട്ടിന്‍, പ്രിന്‍സിപ്പല്‍ സിസ്റ്റർ ലിറ്റില്‍ റോസ് എസ്എബിഎസ്, വൈസ് പ്രിന്‍സിപ്പല്‍ സിസ്റ്റർ റോസ്‌ബെല്‍ എസ്എബിഎസ് എന്നിവര്‍ പ്രസംഗിച്ചു. കുന്നുംഭാഗം സെന്‍റ് ജോസഫ് കിന്‍റർ ഗാർഡൻ സ്കൂളിലെ പ്രവേശനോത്സവം എസ്എബിഎസ് പ്രൊവിൻഷ്യൽ കൗൺസിലർ സിസ്റ്റർ ജ്യോതി കുന്നപ്ലാത്ത് എസ്എബിഎസ് ഉദ്ഘാടനം ചെയ്തു. പ്രിൻസിപ്പൽ സിസ്റ്റർ ആൻ ജോസ് എസ്എബിഎസ് അധ്യക്ഷത വഹിച്ചു. അധ്യാപികമാരായ റാണി ഫിലിപ്പ്, ബിജി ജോസഫ് എന്നിവർ പ്രസംഗിച്ചു. തുടർന്ന് കുട്ടികളുടെ വിവിധ കലാപരിപാടികളും നടത്തി. കുന്നുംഭാഗം ഗവൺമെന്‍റ് ഹൈസ്കൂളിലെ പ്രവേശനോത്സവം വാർഡ് മെംബർ ആന്‍റണി മാർട്ടിൻ ഉദ്ഘാടനം ചെയ്തു. പിടിഎ പ്രസിഡന്‍റ് കെ.ആർ. രാജേഷ് അധ്യക്ഷത വഹിച്ചു. ഹെഡ്മിസ്ട്രസ് ആച്ചിയമ്മ ജോസഫ്, കെ.ടി. സുരേഷ്, പോൾ ജേക്കബ് എന്നിവർ പ്രസംഗിച്ചു. എസ്എസ്എൽസി പരീക്ഷയിൽ വിജയികളായവർക്കുള്ള മെമെന്‍റോ വിതരണം ചെയ്തു. കാഞ്ഞിരപ്പള്ളി എകെജെഎം സ്കൂളിലെ പ്രവേശനോത്സവം സ്കൂൾ മാനേജർ ഫാ. സ്റ്റീഫൻ സി. തടം എസ്ജെയുടെ അധ്യക്ഷതയിൽ നടത്തി. പ്രിൻസിപ്പൽ ഫാ. അഗസ്റ്റിൻ പീടികമല എസ്ജെ നവാഗതർക്ക് സന്ദേശം നൽകി. വൈസ് പ്രിൻസിപ്പൽ ഫാ. വിൽസൺ പുതുശേരി എസ്ജെ, വാർഡ് മെംബർ മഞ്ജു മാത്യു, എൽപി കോഓർഡിനേറ്റർ മായാ മാത്യു എന്നിവർ പ്രസംഗിച്ചു. ഒന്നാം ക്ലാസിലേക്ക് പ്രവേശനം ലഭിച്ച കുട്ടിൾക്ക് എൽപി ടീച്ചേഴ്സ് തയാറാക്കിയ ബട്ടർ ഫ്ലൈ നൽകിയാണ് സ്വീകരിച്ചത്. കാഞ്ഞിരപ്പള്ളി പേട്ട ഗവൺമെന്‍റ് ഹൈസ്കൂളിലെ പ്രവേശനോത്സവം പഞ്ചായത്തംഗം പി.എ. ഷെമീർ ഉദ്ഘാടനം ചെയ്തു. ഹെഡ്മിസ്ട്രസ് എസ്. ഷിജ, പിടിഎ പ്രസിഡന്‍റ് കെ. സജി, റംല ബീവി, പി.ആർ. സജി, അധ്യാപകരായ ജെയ്സൺ തോമസ്, ടി.ഡി. രമണി, സുനിജ പി. ജോസ് എന്നിവർ പ്രസംഗിച്ചു. ചെങ്കൽ: ബൗദ്ധിക വെല്ലുവിളി നേരിടുന്ന കുട്ടികൾക്ക് പഠന പരിശീലനം നൽകുന്നതിനായി ചെങ്കൽ 19ാം മൈലിൽ പ്രവർത്തിക്കുന്ന എയ്ഞ്ചൽസ് വില്ലേജിലുള്ള ആശാനിലയം സ്പെഷൽ സ്കൂളിലെ പ്രവേശനോത്സവം കാഞ്ഞിരപ്പള്ളി രൂപത വികാരി ജനറാൾ റവ.ഡോ. സെബാസ്റ്റ്യൻ കൊല്ലംകുന്നേൽ ഉദ്ഘാടനം ചെയ്തു. ഡയറക്ടർ ഫാ. റോയി മാത്യു വടക്കേൽ അധ്യക്ഷത വഹിച്ചു. എയ്ഞ്ചൽസ് വില്ലേജ് അസിസ്റ്റന്‍റ് ഡയറക്ടർ ഫാ. തോമസ് കണ്ടത്തിൽ, വാഴൂർ ബ്ലോക്ക് പഞ്ചായത്ത് വൈസ് പ്രസിഡന്‍റ് ഗീത എസ്. പിള്ള, പ്രിൻസിപ്പൽ സിസ്റ്റർ ലിറ്റി സേവ്യർ എസ്‌സിജിജെ, വാഴൂർ പഞ്ചായത്ത് പ്രസിഡന്‍റ് തോമസ് വെട്ടുവേലിൽ, സീനിയർ കൺസൾട്ടന്‍റ് സ്പെഷൽ എഡ്യൂക്കേഷൻ ഡോ. എ.ടി. ത്രേസ്യാകുട്ടി, സുശീല കുര്യാച്ചൻ, ഫാൻസി ടോമി എന്നിവർ പ്രസംഗിച്ചു. പ്ലസ് ടു പരീക്ഷയിൽ ഉന്നത വിജയവും കാഞ്ഞിരപ്പള്ളി രൂപത മതബോധന 12ാം ക്ലാസ് പരീക്ഷയിൽ ഒന്നാം റാങ്കും നേടിയ മരിയ മോനിക്ക ഫിലിപ്പിനെ യോഗത്തിൽ ആദരിച്ചു. ചെങ്ങളം: സെന്‍റ് ആന്‍റണീസ് എൽപി സ്കൂളിന്‍റെ പ്രവേശനോത്സവം വാർഡ് മെംബർ ടെസി രാജു ഉദ്ഘാടനം ചെയ്തു. സ്കൂൾ മാനേജർ ഫാ. വർഗീസ് പരിന്തിരിക്കൽ അധ്യക്ഷത വഹിച്ചു. ഹെഡ്മിസ്ട്രസ് സൗമ്യ പി. ജോസ്, പിടിഎ പ്രസിഡന്‍റ് എം.എം. ജീവൻ, ഉമ്മൻചാണ്ടി ഫൗണ്ടേഷൻ കോഓർഡിനേറ്റർ മധു മോഹനൻ എന്നിവർ പ്രസംഗിച്ചു. നവാഗതരായ കുട്ടികൾക്ക് സ്കൂൾ ബാഗും കുടയും വിതരണം ചെയ്തു. ചേനപ്പാടി: ആർവി ഗവൺമെന്‍റ് വൊക്കേഷണൽ ഹയർ സെക്കൻഡറി സ്കൂളിലെ പ്രവേശനോത്സവം ജില്ലാ പഞ്ചായത്തംഗം ജെസി ഷാജൻ ഉദ്ഘാടനം ചെയ്തു. ഹെഡ് മാസ്റ്റർ ഇൻ ചാർജ് മുഹമ്മദ്‌ റാഫി, പ്രിൻസിപ്പൽ വി. രശ്മി, സിന്ധു സോമൻ, ജോളി മടുക്കക്കുഴി, കെ.ബി. സാബു, സന്തോഷ്‌ മഞ്ഞാക്കൽ, കെ.കെ. പരമേശ്വരൻ, കെ.ആർ. പുഷ്പലാൽ, എ.കെ. അജിത എന്നിവർ പ്രസംഗിച്ചു. മുണ്ടക്കയം: സെന്‍റ് ആന്‍റണീസ് ഹൈസ്കൂളിൽ പ്രവേശനോത്സവവും മെറിറ്റ്ഡേയും സംഘടിപ്പിച്ചു. എറണാകുളം ക്രൈം ബ്രാഞ്ച് എസ്പി വി.യു. കുര്യാക്കോസ് ഉദ്ഘാടനം ചെയ്തു. മാനേജർ ഫാ. ജെയിംസ് മുത്തനാട്ട് അധ്യക്ഷത വഹിച്ചു. ഹെഡ്മാസ്റ്റർ സാജു കുര്യൻ, അഴുത ബ്ലോക്ക് പഞ്ചായത്തംഗം കെ.ആർ. വിജയൻ, പീരുമേട് ഡിവൈഎസ്പി വിശാൽ ജോൺസൺ, കൊക്കയാർ പഞ്ചായത്തംഗം സ്റ്റാൻലി സണ്ണി, പെരുവന്താനം എസ്എച്ച്ഒ ത്രിദീപ് ചന്ദ്രൻ, എസ്.ആർ. സുരേഷ് ബാബു, അധ്യാപകരായ ടി.വി. ജോയിസ്, ജിസ്ജോ എം. ജോസ്, സുനിൽ സെബാസ്റ്റ്യൻ തുടങ്ങിയവർ പ്രസംഗിച്ചു. സിവിൽ സർവീസ് റാങ്ക് ജേതാവും പൂർവ വിദ്യാർഥിനിയുമായ സോണറ്റ് ജോസിനെയും കായികാധ്യാപകൻ സന്തോഷ് ജോർജിനെയും എസ്എസ്എൽസി പരീക്ഷയിൽ എല്ലാ വിഷയങ്ങൾക്കും എ പ്ലസ് കരസ്ഥമാക്കിയ കുട്ടികളെയും എൻഎംഎംഎസ് നേടിയ വിദ്യാർഥികളെയും ചടങ്ങിൽ അനുമോദിച്ചു. എരുമേലി: സെന്‍റ് തോമസ് എൽ പി സ്കൂളിലെ പ്രവേശനോത്സവത്തിൽ മധുരമേറെ. അധ്യാപകരും രക്ഷിതാക്കളും ചേർന്ന് കുട്ടികൾക്ക് പായസവും തുടർന്ന് ഉച്ചഭക്ഷണവും നൽകി. ഒപ്പം കുട്ടികളുടെ വിവിധ കലാപരിപാടികൾ നടന്നു. സ്കൂൾ അസിസ്റ്റന്‍റ് മാനേജർ സിസ്റ്റർ ലൂസിറ്റ എഫ്സിസി, ഹെഡ്മിസ്ട്രസ് സിസ്റ്റർ റെജി സെബാസ്റ്റ്യൻ, വാർഡ് മെംബർ ഷാനവാസ്‌, പിടിഎ പ്രസിഡന്‍റ് പ്രശാന്ത് തോമസ്, സീനിയർ അധ്യാപിക ലൗലി പി. ജേക്കബ് എന്നിവർ നേതൃത്വം നൽകി. എരുമേലി: സ്കൂൾ പ്രവേശനത്തിൽ നേരിയ ചാറ്റൽ പോലുമില്ലാതെ മഴ മാറി നിന്ന അനുഭവം വർഷങ്ങൾക്ക് ശേഷം ഇതാദ്യം. പൂർണമായും വെയിൽ നിറഞ്ഞ തെളിഞ്ഞ കാലാവസ്ഥ അധ്യാപകരെയും കുട്ടികളെയും രക്ഷിതാക്കളെയും ഒരേപോലെ സന്തോഷമാക്കി. എരുമേലിയിൽ സ്കൂൾ ജംഗ്ഷനുകളിൽ കുട്ടികളെ കാത്ത് പോലീസ് ഉണ്ടായിരുന്നു. റോഡിലെ തിരക്ക് പരിഹരിച്ച് കുട്ടികളെ പോലിസ് കടത്തിവിട്ടു. ഇടകടത്തി പനയ്ക്കവയൽ ഗവ എൽ പി സ്കൂളിലായിരുന്നു പഞ്ചായത്ത്‌ തല പ്രവേശനോത്സവം. പഞ്ചായത്ത്‌ പ്രസിഡന്‍റ് സുബി സണ്ണി ഉദ്ഘാടനം നിർവഹിച്ചു. തുമരംപാറ, മുട്ടപ്പള്ളി, മൂക്കൻപെട്ടി, പാണപിലാവ്, നെടുങ്കാവുവയൽ, തുമരംപാറ, ചേനപ്പാടി എന്നിവിടങ്ങളിലെ സർക്കാർ സ്‌കൂളുകളിൽ പ്രവേശനോത്സവങ്ങൾ വിപുലമായ നിലയിലാണ് നടന്നത്. എയ്ഡഡ് മേഖലയിൽ ഏറ്റവും കൂടുതൽ വിദ്യാർഥികൾ ചേർന്ന എരുമേലി സെന്‍റ് തോമസ്, കണമല സാൻതോം, ചേനപ്പാടി തരകനാട്ടുകുന്ന് സെന്‍റ് ആന്‍റണീസ്, എരുമേലിയിലെ ദേവസ്വം ബോർഡ് സ്കൂൾ, വാവർ സ്മാരക സ്കൂൾ, കനകപ്പലം എൻഎംഎൽപിഎസ്, എംടിഎൽപി സ്കൂളുകളിലും സ്വകാര്യ മേഖലയിലെ എയ്ഞ്ചൽവാലി സെന്‍റ് മേരീസ്, എരുമേലി നിർമല പബ്ലിക് സ്കൂൾ, എലിവാലിക്കര കോൺവെന്‍റ സ്കൂൾ എന്നിവിടങ്ങളിലും നിരവധി കുട്ടികൾ ഒന്നാം ക്ലാസിൽ ചേർന്നു.

ഇരട്ടകളുടെ നിറ സാന്നിധ്യവുമായി ചെമ്മലമറ്റം ലിറ്റിൽ ഫ്ലവർ ഹൈസ്കൂൾ

ചെമ്മലമറ്റം: ഇരട്ടകളുടെ നിറ സാന്നിധ്യവുമായി ചെമ്മലമറ്റം ലിറ്റിൽ ഫ്ലവർ ഹൈസ്കൂൾ പുതിയ അധ്യയന വർഷത്തിൽ ഒന്നാം ക്ലാസിലാണ് മൂന്ന് ജോഡി ഇരട്ടകൾ എത്തിയത്. പിണ്ണാക്കനാട് കുരുവിൻപ്ലാക്കൽ നിതിൻ - മിന്‍റു ദമ്പതികളുടെ മക്കളാണ് സാറാ ആർ. നിതിൻ, റബേക്കാ ആർ. നിതിൻ എന്നിവർ. കാളകെട്ടി മുണ്ടയ്ക്കൽ രാജേഷ് - ആതിര ദമ്പതികളുടെ മക്കളാണ് മീനാക്ഷി അജേഷും പാർവതി അജേഷും. പിണ്ണാക്കനാട് ചേരാനി പൊങ്ങൻപാറയിൽ നിശാന്ത് - ഹണി മോൾ ദമ്പതികളുടെ മക്കളാണ് പി.ബി. ആദിദേവ്, പി.ബി ആദികേശ് എന്നിവർ.

തിടനാട്ടിൽ സ്കിൽ ഡവലപ്മെന്‍റ് സെന്‍റർ ഉദ്ഘാടനം ചെയ്തു

തിടനാട്: വിദ്യാഭ്യാസ വകുപ്പിനു കീഴില്‍ തിടനാട് വൊക്കേഷണല്‍ ഹയര്‍സെക്കന്‍ഡറി സ്‌കൂളിനോട് അനുബന്ധിച്ചു പുതുതായി രണ്ട് സ്‌കില്‍ ഡവലപ്‌മെന്‍റ് കോഴ്‌സുകള്‍ ആരംഭിച്ചു. ഫിറ്റ്‌നസ് ട്രെയിനര്‍, കോസ്‌മെറ്റോളജിസ്റ്റ് എന്നീ രണ്ടു കോഴ്‌സുകളാണ് ആരംഭിച്ചത്. അടിസ്ഥാന സൗകര്യങ്ങള്‍ ഒരുക്കുന്നതിന് 21.50 ലക്ഷം രൂപയും അനുവദിച്ചു. കോഴ്‌സുകളുടെ ഉദ്ഘാടനം സെബാസ്റ്റ്യന്‍ കുളത്തുങ്കല്‍ എംഎല്‍എ നിര്‍വഹിച്ചു. തിടനാട് പഞ്ചായത്ത് പ്രസിഡന്‍റ് സ്‌കറിയ ജോസഫ് പൊട്ടനാനി അധ്യക്ഷതവഹിച്ചു. ജില്ലാ പഞ്ചായത്ത് അംഗം ഷോണ്‍ ജോര്‍ജ്, ബ്ലോക്ക് പഞ്ചായത്ത് അംഗം ജോര്‍ജ് ജോസഫ് കല്ലങ്ങാട്ട്, പഞ്ചായത്ത് അംഗം ജോയിച്ചന്‍ കാവുങ്കല്‍, സന്ധ്യ ശിവകുമാര്‍, വൊക്കേഷണല്‍ ഹയര്‍സെക്കന്‍ഡറി സ്‌കൂള്‍ പ്രിന്‍സിപ്പല്‍ വി.ജി. ശാലിനി റാണി, ഹെഡ്മിസ്ട്രസ് പ്രതിഭ പടനിലം, ബിആര്‍സി കോഓഡിനേറ്റര്‍ ബിന്‍സ് ജോസഫ്, പിടിഎ പ്രസിഡന്‍റ് സജിനി സതീഷ് തുടങ്ങിയവര്‍ പ്രസംഗിച്ചു. രണ്ട് കോഴ്‌സുകളിലും 25 വിദ്യാര്‍ഥികള്‍ക്കു വീതമാണ് പ്രവേശനം. കോഴ്‌സുകളുടെ പ്രവേശനവും പഠനവും സൗജന്യമാണ്.

ആശ വർക്കർമാരുടെ രാപ്പകൽ സമര യാത്രയ്ക്ക് സ്വീകരണം നല്‍കി

ഈരാറ്റുപേട്ട: വിവിധ ആവശ്യങ്ങളുന്നയിച്ച് കേരള ആശാ ഹെൽത്ത് വർക്കേഴ്‌സ് അസോസിയേഷൻ ജനറൽ സെക്രട്ടറി എം.എ. ബിന്ദു നയിക്കുന്ന രാപ്പകൽ സമര യാത്രക്ക് ഈരാറ്റുപേട്ടയിൽ സ്വീകരണം നൽകി. യാത്രയുടെ കോട്ടയം ജില്ലാതല ഉദ്ഘാടനം ആന്‍റോ ആന്‍റണി എംപി നിർവഹിച്ചു. നഗരസഭാധ്യക്ഷ സുഹ്‌റ അബ്ദുൾ ഖാദർ അധ്യക്ഷത വഹിച്ചു. ഡിസിസി സെക്രട്ടറി ജോമോൻ ഐക്കര, കെ. സതീഷ് കുമാർ, മുഹമ്മദ് ഇല്യാസ്, ഓമന ഗോപാലൻ തുടങ്ങിയവർ പ്രസംഗിച്ചു. പാലാ: കേരള ആശ ഹെല്‍ത്ത് വര്‍ക്കേഴ്സ് അസോസിയേഷന്‍ ജനറല്‍ സെക്രട്ടറി എം.എ. ബിന്ദു നയിച്ച രാപകല്‍ സമര യാത്രക്ക് ളാലം പാലം ജംഗ്ഷനില്‍ സ്വീകരണം നല്‍കി. ക്യാപ്റ്റന്‍ എം.എ ബിന്ദുവിനെ ഹാരമണിയിച്ചു സീകരിച്ചു. യുഡിഎഫ് പാലാ നിയോജക മണ്ഡലം ചെയര്‍മാന്‍ പ്രഫ.സതീശ് ചൊള്ളാനി അധ്യക്ഷത വഹിച്ചു. കെപിസിസി മെംബര്‍ തോമസ് കല്ലാടന്‍ സ്വീകരണ സമ്മേളനം ഉദ്ഘാടനം ചെയ്തു. എ.കെ ചന്ദ്രമോഹന്‍, എന്‍. സുരേഷ്, മോളി പീറ്റര്‍, ജോര്‍ജ് പുളിങ്കാട്, ആര്‍. സജീവ്, ആര്‍. പ്രേംജി, അനസ് കണ്ടത്തില്‍, വിജയകുമാര്‍ സി.ജി, സന്തോഷ് കാവുകാട്ട്, ലിസമ്മ മത്തച്ചന്‍, സൗമ്യ സേവ്യര്‍, ആല്‍ബിന്‍ ഇമനശേരി തുടങ്ങിയവര്‍ പ്രസംഗിച്ചു.

പ്രവേശനോത്സവം വര്‍ണാഭമായി

പാലാ: അക്ഷരമുറ്റത്തിന്‍റെ പടിവാതിലിലെത്തിയ കുരുന്നുകള്‍ക്ക് വര്‍ണാഭമായ സ്വീകരണം. വിവിധ നിറങ്ങളിലുള്ള ബലൂണുകളും തൊപ്പികളും മധുരപലഹാരങ്ങളുമായാണ് അധ്യാപകര്‍ കുരുന്നുകളെ വരവേറ്റത്. നവാഗതര്‍ക്ക് ഹൃദ്യമായ സ്വീകരണമാണ് സ്‌കൂളുകള്‍ ഒരുക്കിയത്. പാട്ടും നൃത്തവും കളിചിരികളുമായി സ്‌കൂള്‍ അന്തരീക്ഷം ഹൃദ്യമാക്കി. പ്രവിത്താനം : സെന്‍റ് മൈക്കിള്‍സ് ഹയര്‍ സെക്കൻഡറി സ്‌കൂളിലെ പ്രവേശനോത്സവം പാലാ ഡിവൈഎസ്പി കെ. സദന്‍ ഉദ്ഘാടനം ചെയ്തു. നവാഗതരായ വിദ്യാര്‍ഥികളെയും അവധിക്കാലത്ത് സ്‌കൂള്‍ നടത്തിയ വിവിധ മത്സരങ്ങളില്‍ പങ്കെടുത്ത് വിജയം നേടിയ കുട്ടികളെയും സമ്മാനങ്ങള്‍ നല്‍കി ആദരിച്ചു.സ്‌കൂള്‍ മാനേജര്‍ ഫാ. ജോര്‍ജ് വേളൂപ്പറമ്പില്‍ അധ്യക്ഷത വഹിച്ച യോഗത്തില്‍ അസിസ്റ്റന്‍റ് മാനേജര്‍ ഫാ. ആന്‍റ്ണി കൊല്ലിയില്‍, പ്രിന്‍സിപ്പല്‍ ജിജി ജേക്കബ്, ഹെഡ്മാസ്റ്റര്‍ ജിനു ജെ. വല്ലനാട്ട്, ജിസ്‌മോന്‍ തുടിയന്‍പ്ലാക്കല്‍, ജാന്‍സി ജോസഫ്, സിസ്റ്റര്‍ ആന്‍സി ടോം എന്നിവര്‍ പ്രസംഗിച്ചു. അളനാട്: ഗവണ്‍മെന്‍റ് യുപി സ്‌കൂള്‍ പ്രവേശനോത്സവം വിപുലമായി ആചരിച്ചു. പുതിയതായി പ്രവേശനം ലഭിച്ച കുട്ടികള്‍ക്ക് മധുരം നല്‍കി പഞ്ചായത്ത് മെംബര്‍ വിനോദ് ചെറിയാന്‍ സ്വീകരിച്ചു. സ്‌കൂള്‍ ഓഡിറ്റോറിയത്തില്‍ നടന്ന സമ്മേളനത്തില്‍ വാര്‍ഡ് മെംബര്‍ അധ്യക്ഷത വഹിച്ചു. ളാലം ബ്ലോക്ക് വൈസ് പ്രസിഡന്‍റ് ആനന്ദ് മാത്യു ചെറുവള്ളി സമ്മേളനം ഉദ്ഘാടനം ചെയ്തു. ക്ഷേമ കാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ പഠനോപകരണങ്ങള്‍ വിവരണം ചെയ്തു. യോഗത്തില്‍ വ്യാപാരി വ്യവസായി ഏകോപന സമിതി പ്രവിത്താനം യൂണിറ്റ് പ്രസിഡന്‍റ് സജി എസ്. തെക്കേല്‍, ഹെഡ് മാസ്റ്റര്‍ എം.എന്‍. ബിന്ദു ,അശ്വന്ത് മഹേഷ് തുടങ്ങിയവര്‍ പ്രസംഗിച്ചു. മുത്തോലി: സെന്‍റ് ആന്‍റണീസ് ഹയര്‍ സെക്കൻഡറി സ്‌കൂളിലെ പ്രവേശനോത്സവം പഞ്ചായത്തംഗം രാജന്‍ മുണ്ടമറ്റം ഉദ്ഘാടനം ചെയ്തു. സ്‌കൂള്‍ മാനേജര്‍ റവ. ഡോ. മാത്യു ആനത്താരക്കല്‍ സിഎംഐ, പ്രിന്‍സിപ്പല്‍ മിനി മാത്യു, അസിസ്റ്റന്‍റ് എക്‌സൈസ് ഇന്‍സ്‌പെക്ടര്‍ കെ.വി. അനീഷ്‌കുമാര്‍, സ്റ്റാഫ് സെക്രട്ടറി ബിന്‍സി സെബാസ്റ്റ്യന്‍ എന്നിവര്‍ പ്രസംഗിച്ചു. കടനാട്: കുറുമണ്ണ് സെന്‍റ് ജോണ്‍സ് ഹൈസ്‌കൂളിലെ പ്രവേശനോത്സവം കടനാട് പഞ്ചായത്ത് പ്രസിഡന്‍റ് ജിജി തമ്പി ഉദ്ഘാടനം ചെയ്തു. സ്‌കൂള്‍ മാനേജര്‍ ഫാ. തോമസ് മണിയഞ്ചിറ അധ്യക്ഷത വഹിച്ച ചടങ്ങില്‍ രാമപുരം ബിആര്‍സി ക്ലസ്റ്റര്‍ കോഓര്‍ഡിനേറ്റര്‍ പി.കെ.ശ്രീരേഖ മുഖ്യപ്രഭാഷണം നടത്തി. വാര്‍ഡ് മെംബര്‍ ബിന്ദു ജേക്കബ് കൈയെഴുത്തുമാസികയുടെ പ്രകാശനം നടത്തി. ഹെഡ്മാസ്റ്റര്‍ ബിജോയി ജോസഫ്, കടനാട് പഞ്ചായത്ത് വൈസ് പ്രസിഡന്‍റ് വി.ജി. സോമന്‍, പിടിഎ പ്രസിഡന്‍റ് സുബി തോമസ്, സ്റ്റാഫ് പ്രതിനിധി കെ.എം. ജോസഫ് എന്നിവര്‍ പ്രസംഗിച്ചു അകലക്കുന്നം: അകലക്കുന്നം പഞ്ചായത്തിലെ 16 സ്‌കൂളുകളിലെ പ്രവേശനോത്സവം കാഞ്ഞിരമറ്റം ലിറ്റില്‍ ഫ്‌ളവര്‍ എല്‍പി സ്‌കൂളില്‍ നടത്തി. പഞ്ചായത്ത് പ്രസിഡന്‍റ് സിന്ധു അനില്‍കുമാര്‍ ഉദ്ഘാടനം ചെയ്തു. സ്‌കൂള്‍ മാനേജര്‍ ഫാ. ജോസഫ് മണ്ണനാല്‍ അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് മാത്തുക്കുട്ടി ഞായര്‍കുളം മുഖ്യപ്രഭാഷണം നടത്തി. സ്‌കൂള്‍ അസിസ്റ്റന്‍റ് മാനേജര്‍ ഫാ. ജോസഫ് മഠത്തിപറമ്പില്‍, സ്‌കൂള്‍ പ്രഥമ അധ്യാപിക സിസ്റ്റര്‍ ജയ്‌മോള്‍ പുത്തന്‍പുരയ്ക്കല്‍, ബിആര്‍സി പ്രതിനിധി ഷൈനി കുര്യന്‍, പിടിഎ പ്രസിഡന്‍റ് ജിസ്‌മോന്‍ മുങ്ങാമാക്കല്‍ എന്നിവര്‍ പ്രസംഗിച്ചു. ചെമ്മലമറ്റം: ലിറ്റിൽ ഫ്ളവർ ഹൈസ്കൂളിലെ പ്രവേശനോത്സവം ശ്രദ്ധയമായി. അക്ഷര വൃഷം ഒരുക്കിയാണ് ഒന്നാം ക്ലാസിൽ പ്രവേശനം ലഭിച്ച 63 വിദ്യാർഥികൾ പ്രവേശനോത്സവം ആഘോഷമാക്കിയത്. വർണ തൊപ്പികൾ അണിഞ്ഞ് കത്തിച്ച മെഴുകുതിരികൾ പിടിച്ച് വിശിഷ്ടാതിഥികളോടൊപ്പമാണ് കുരുന്നുകൾ ദീപം തെളിച്ചത്. ബ്ലോക്ക് മെംബർ മിനി സാവിയോ പഞ്ചായത്ത് മെംബർ രമേശ് ഇലവുങ്കൽ, ഹെഡ് മാസ്റ്റർ ജോബൈറ്റ് തോമസ്, അസിസ്റ്റന്‍റ് മാനേജർ ഫാ. ജേക്കബ് കട്ടുതോടിൽ, പിടിഎ പ്രതിനിധി സെബാസ്റ്റ്യൻ ഈറ്റത്തോട്ട്, അധ്യാപക പ്രതിനിധി ജിജി ജോസഫ് തുടങ്ങിയവർ പ്രസംഗിച്ചു. വാകക്കാട് : പുതുതായി വിദ്യാലയത്തിലേത്തിയ കുഞ്ഞുങ്ങൾക്കെല്ലാം കൈ നിറയെ പാവകൾ നിർമിച്ചു നൽകിയാണ് വാകക്കാട് എൽപി സ്കൂളിൽ കുട്ടികളെ സ്വാഗതം ചെയ്തത്. പ്രവേശനോത്സവം മേലുകാവ് പഞ്ചായത്ത് മെംബർ അലക്സ് ടി. ജോസഫ് ഉദ്ഘാടനം ചെയ്തു. സ്കൂൾ മാനേജർ ഫാ. മൈക്കിൾ ചീരാംകുഴി അധ്യക്ഷത വഹിച്ചു. അസിസ്റ്റന്‍റ് വികാരി ഫാ. എബിൻ കാക്കാനിയിൽ, പിടിഎ പ്രസിഡന്‍റ് ജോർജ്കുട്ടി അലക്സ്, ഹെഡ്മിസ്ട്രസ് സിസ്റ്റർ ടെസിൻ ജോർജ് എന്നിവർ പ്രസംഗിച്ചു. വെള്ളികുളം: പുതിയ അധ്യയന വർഷത്തിൽ വെള്ളികുളം സെന്‍റ് ആന്‍റണീസ് സ്കൂളിലേക്ക് കടന്നുവന്ന നവാഗതരായ വിദ്യാർഥികൾക്ക് വർണാഭമായ സ്വീകരണമാണ് നൽകിയത്.സ്കൂൾ ഓഡിറ്റോറിയത്തിൽ നടന്ന ചടങ്ങിൽ സ്കൂൾ മാനേജർ ഫാ. സ്കറിയ വേകത്താനം അധ്യക്ഷത വഹിച്ചു. ഹെഡ്മാസ്റ്റർ സോജൻ ജോർജ് ഇളംതുരുത്തിയിൽ വിദ്യാർഥികൾക്ക് സ്വാഗതമേകി. പഞ്ചായത്ത് മെംബർ ബിനോയി ജോസഫ് പാലക്കൽ പ്രവേശനോത്സവം ഉദ്ഘാടനം ചെയ്തു.

പാലാ രൂപതയ്ക്ക് മൂന്ന് ഫൊറോനകള്‍ കൂടി

പാലാ: പാലാ രൂപതയുടെ പ്ലാറ്റിനം ജൂബിലി വര്‍ഷത്തില്‍ മൂന്ന് പുതിയ ഫൊറോനകള്‍ കൂടി രൂപീകരിച്ചു. ബിഷപ് മാര്‍ ജോസഫ് കല്ലറങ്ങാട്ടിന്‍റെ അധ്യക്ഷതയില്‍ കൂടിയ പ്രസ്ബിറ്ററല്‍ കൗണ്‍സിലിലാണ് രൂപീകരണം പ്രഖ്യാപിച്ചത്. കടപ്ലാമാറ്റം, കൊഴുവനാല്‍, കൂത്താട്ടുകുളം എന്നീ ഇടവകകളെയാണ് ഫൊറോനകളായി ഉയര്‍ത്തുന്നത്. ഇതുവരെ 17 ഫൊറോനകളാണ് രൂപതയില്‍ ഉണ്ടായിരുന്നത്. പുതിയതായി രൂപം കൊള്ളുന്ന ഫൊറോനകള്‍ നിലവില്‍ വരുന്നത് എട്ടിന് പന്തക്കുസ്ത തിരുനാളോടു കൂടിയാണ്. അന്നേ ദിവസം നിയുക്ത ഫൊറോനകളില്‍ നടത്തപ്പെടുന്ന സ്ഥാനാരോഹണശുശ്രൂഷയില്‍ ബിഷപ് മാര്‍ ജോസഫ് കല്ലറങ്ങാട്ട് പ്രധാന കാര്‍മികത്വം വഹിക്കും. സ്ഥാനാരോഹണശുശ്രൂഷകള്‍ രാവിലെ എട്ടിന് കൊഴുവനാല്‍ പള്ളിയിലും 9.15 ന് കടപ്ലാമറ്റം പള്ളിയിലും വൈകുന്നേരം നാലിന് കൂത്താട്ടുകുളം പള്ളിയിലും ബിഷപ് നിര്‍വഹിക്കും. കടപ്ലാമറ്റം സെന്‍റ് മേരീസ് പള്ളി സുറിയാനി കത്തോലിക്കാസഭയിലെ അതിപുരാതനമായ പള്ളികളില്‍ ശ്രദ്ധേയമായ പള്ളിയാണ് കടപ്ലാമറ്റം. എഡി 1009 ല്‍ പണികഴിക്കപ്പെട്ട ഈ പുരാതന പള്ളി പരിശുദ്ധ കന്യകാമറിയത്തിന്‍റെ നാമത്തിലുള്ളതാണ്. 660 കുടുംബങ്ങളുള്ള ഈ പള്ളിയുടെ നിര്‍മാണരീതിയും അതിന്‍റെ കൊത്തുപണികളും പഴമയുടെ സൗകുമാര്യം വിളിച്ചറിയിക്കുന്നതാണ്. ഈ പള്ളിയുടെ പഴക്കംതന്നെ ദേശവാസികള്‍ക്ക് പരിശുദ്ധ അമ്മയോടുള്ള ഭക്തിയും വണക്കവും അതിരറ്റതാണ് എന്നതിന്‍റെ തെളിവ് കൂടിയാണ്. കൊഴുവനാല്‍ സെന്‍റ് ജോണ്‍ നെപുംസ്യാനോസ് പള്ളി 1858 ല്‍ സ്ഥാപിതമായ കൊഴുവനാല്‍ സെന്‍റ് ജോണ്‍ നെപുംസ്യാനോസ് പള്ളി പാലാ രൂപതയിലെ പുരാതനമായ പള്ളികളില്‍ ഒന്നാണ്. ഏറ്റവും കൂടുതല്‍ രൂപതാ വൈദികര്‍ക്ക് ജന്മം നല്‍കിയ ഇടവകയാണ് കൊഴുവനാല്‍. പാലാ രൂപതയ്ക്ക് മാത്രമല്ല, തിരുസഭയ്ക്ക് ഏറ്റവും കൂടുതല്‍ വൈദികരെ പ്രദാനം ചെയ്തിട്ടുള്ള പള്ളിയാണ് ഇത്. 730 കുടുംബങ്ങള്‍ ഉള്ള കൊഴുവനാല്‍ പള്ളി ജോണ്‍ നെപുംസ്യാനോസ് സഹദായുടെ നാമത്തിലുള്ളതാണ്. കൂത്താട്ടുകുളം ഹോളി ഫാമിലി പള്ളി 1995ല്‍ സ്ഥാപിതമായ കൂത്താട്ടുകുളം ഹോളി ഫാമിലി പള്ളി ഒരു ദേശത്തിന്‍റെ സംസ്‌കാരത്തെ പേറുന്നതാണ്. വിവിധ ക്രൈസ്തവസഭകളായ യാക്കോബായ ഓര്‍ത്തഡോക്‌സ് വിഭാഗങ്ങളും സീറോ മലബാർ സമൂഹവും ഏക മനസോടെ തിങ്ങിപ്പാര്‍ക്കുന്ന സ്ഥലമാണ് ഇത്. സഭയുടെ എക്യുമെനിസത്തിന്‍റെ വാതില്‍ തുറന്നിട്ടിരിക്കുന്ന പ്രദേശമാണ് കൂത്താട്ടുകുളം. മാര്‍ യൂദാ തദേവൂസിനോടുള്ള ഭക്തിയും വണക്കവും ആയിരം തിരികളുള്ള നിലവിളക്കും ഹോളി ഫാമിലി പള്ളിയുടെ പ്രത്യേകതകളാണ്. 500 കുടുംബങ്ങളുള്ള ഈ പള്ളി എറണാകുളം ജില്ലയിലാണ് സ്ഥിതി ചെയ്യുന്നത്. പുതുതായി രൂപംകൊണ്ട ഫൊറോനകളിലേക്ക് ചേര്‍ക്കപ്പെടുന്ന ഇടവകകള്‍ കടപ്ലാമറ്റം: കടപ്ലാമറ്റം, മംഗളാരം, കൂടല്ലൂര്‍, മരങ്ങാട്ടുപള്ളി, വയല, പാലയ്ക്കാട്ടുമല, പാളയം. കൊഴുവനാല്‍: അല്‍ഫോന്‍സാഗിരി, കാഞ്ഞിരമറ്റം, കരിമ്പാനി, കൊഴുവനാല്‍, മണലുങ്കല്‍, മഞ്ഞാമറ്റം, മറ്റക്കര, മൂഴൂര്‍, പൈക, ഉരുളികുന്നം. കൂത്താട്ടുകുളം: കാക്കൂര്‍, കൂത്താട്ടുകുളം, പെരിയപ്പുറം, പൂവക്കുളം, തിരുമാറാടി, ഉദയഗിരി വടകര. ഇടവകകളില്‍ മാറ്റം വരുന്ന ഫൊറോനകള്‍ (1) പാലാ കത്തീഡ്രല്‍: അരുണാപുരം, കിഴതടിയൂര്‍, കുടക്കച്ചിറ, ളാലം പുത്തന്‍പള്ളി, ളാലം പഴയപള്ളി, മീനച്ചില്‍, മൂന്നാനി, നെല്ലിയാനി, പൈങ്ങുളം, പാലാ കത്തീഡ്രല്‍, പാലാക്കാട്, പൂവരണി, വലവൂര്‍. (2) ചേര്‍പ്പുങ്കല്‍: ചെമ്പിളാവ്, ചേര്‍പ്പുങ്കല്‍, കുരുവിനാല്‍, പാദുവ, മുത്തോലി, മേവട, തോടനാല്‍. (3) രാമപുരം: അന്ത്യാളം, ചക്കാമ്പുഴ, ചിറ്റാര‍, ഏഴാച്ചേരി, കരൂര്‍, കൊണ്ടാട്, കുറിഞ്ഞി, നീറന്താനം, രാമപുരം. (4) ഭരണങ്ങാനം: അമ്പാറനിരപ്പേല്‍, ഭരണങ്ങാനം, ചൂണ്ടച്ചേരി, ഇടപ്പാടി, ഇടമറ്റം, കിഴപറയാര്‍, മല്ലികശേരി, പ്ലാശനാല്‍, പൂവത്തോട്, വിളക്കുമാടം. (5) കുറവിലങ്ങാട്: കുറവിലങ്ങാട്, കാളികാവ്, കാട്ടാമ്പാക്ക്, കുറിച്ചിത്താനം, മണ്ണയ്ക്കനാട്, മോനിപ്പള്ളി, രത്‌നഗിരി, വാക്കാട്. (6) ഇലഞ്ഞി: ഇലഞ്ഞി, ജോസ്ഗിരി, മരങ്ങോലി, മുളക്കുളം, മുത്തോലപുരം, പിറവം, ശാന്തിപുരം, സേവ്യര്‍പുരം.

വെളിയന്നൂര്‍ ആയുര്‍വേദ ആശുപത്രി ഒപി ബ്ലോക്ക് നിര്‍മാണം പുരോഗമിക്കുന്നു

വെളിയന്നൂര്‍: സര്‍ക്കാര്‍ ആയുര്‍വേദ ആശുപത്രിയിലെ പുതിയ ഒപി ബ്ലോക്കിന്‍റെ നിര്‍മാണ പ്രര്‍ത്തനങ്ങള്‍ പുരോഗമിക്കുന്നു. മുപ്പതു കിടക്കകള്‍ ഉള്‍പ്പെടെ മെച്ചപ്പെട്ട സൗകര്യങ്ങള്‍ നിലവിലുള്ള ആശുപത്രിയില്‍ പുതിയ ഒപി ബ്ലോക്കിന്‍റെ നിര്‍മാണം പൂര്‍ത്തിയാക്കി ഓഗസ്റ്റില്‍ ഉദ്ഘാടനം ചെയ്യാനാണ് ലക്ഷ്യമിടുന്നത്. വെളിയന്നൂര്‍ ജംഗ്ഷനില്‍ സര്‍ക്കാര്‍ ഉടമസ്ഥതയിലുള്ള 50 സെന്‍റ് സ്ഥലത്താണ് നിര്‍മാണം. 1200 ചതുരശ്ര അടിയില്‍ നിര്‍മിക്കുന്ന കെട്ടിടത്തില്‍ താഴത്തെ നിലയില്‍ ഒപി ബ്ലോക്കും ലാബും രോഗികള്‍ക്കു ഭക്ഷണം പാകം ചെയ്യുന്നതിനായി അടുക്കളയും സജ്ജമാക്കും. മുകള്‍നിലയില്‍ ഓഫീസും നഴ്‌സുമാര്‍ക്കുള്ള വിശ്രമമുറിയുമാണ് നിര്‍മിക്കുന്നത്. ആയുഷ് മിഷന്‍ അനുവദിച്ച 1.10 കോടി രൂപ ഉപയോഗിച്ചാണ് നിര്‍മാണം. നിര്‍മാണം പൂര്‍ത്തിയാകുന്ന മുറയ്ക്ക് അടിസ്ഥാന സൗകര്യങ്ങള്‍ ഒരുക്കുന്നതിന് 15 ലക്ഷം രൂപ പഞ്ചായത്ത് വാര്‍ഷിക പദ്ധതിയില്‍ ഉള്‍പ്പെടുത്തിയിട്ടുണ്ട്. ബിനോയ് വിശ്വം എംപി അനുവദിച്ച ഫണ്ട് വിനിയോഗിച്ച് കഴിഞ്ഞ വര്‍ഷം ഓഗസ്റ്റിലാണ് കിടത്തി ചികിത്സയ്ക്കുള്ള പുതിയ മന്ദിരം നിര്‍മാണം പൂര്‍ത്തിയാക്കിയത്.

കെഎസ്ആര്‍ടിസി ഡിപ്പോയില്‍ ക്ലറിക്കല്‍ ജീവനക്കാരുടെ കുറവ്, പ്രവര്‍ത്തനം താളം തെറ്റുന്നു

ചങ്ങനാശേരി: കെഎസ്ആര്‍ടിസി ഡിപ്പോയില്‍ ക്ലറിക്കല്‍ ജീവനക്കാരുടെ കുറവു മൂലം പ്രവര്‍ത്തനം താളം തെറ്റുന്നു. ക്ലറിക്കല്‍ വിഭാഗത്തില്‍ ജോലി ചെയ്തിരുന്ന മൂന്ന് ബദലി ജീവനക്കാരെ പിരിച്ചുവിട്ടിരുന്നു. ഒരു വനിതാ ക്ലര്‍ക്ക് പിറവത്തിനു സ്ഥലംമാറി പ്പോയി. പൊന്‍കുന്നം ഡിപ്പോയില്‍നിന്നു വനിതാ ക്ലര്‍ക്ക് ചങ്ങനാശേരിയിലേക്കു സ്ഥലംമാറ്റമാവശ്യപ്പെട്ട് ഉത്തരവ് വാങ്ങിയെങ്കിലും 18 ദിവസമായിട്ടും ഇവര്‍ ഈ ഡിപ്പോയില്‍ എത്തിയിട്ടില്ല. ക്ലാര്‍ക്കുമാരുടെ കുറവുമൂലം ഈ വിഭാഗത്തിലുള്ളവര്‍ക്ക് ജോലിഭാരം കൂടുകയാണ്. ഇന്നുമുതല്‍ വിദ്യാര്‍ഥികളുടെ കണ്‍സഷന്‍ കാര്യങ്ങള്‍കൂടി നോക്കേണ്ടിവരുന്നതോടെ ഏറെ പ്രതിസന്ധിയുണ്ടാകുമെന്നാണ് ജീവനക്കാര്‍ ചൂണ്ടിക്കാട്ടുന്നത്.

ചങ്ങനാശേരിയില്‍ എട്ട് ദുരിതാശ്വാസ ക്യാമ്പുകള്‍

ചങ്ങനാശേരി: മഴ മാറി, മാനം തെളിഞ്ഞത് ആളുകള്‍ക്ക് ആശ്വാസമായി. കിഴക്കന്‍ വെള്ളത്തിന്‍റെ കുത്തൊഴുക്കില്‍ തോടുകളിലും ആറുകളിലും ജലനിരപ്പുയരുന്നു. താഴ്ന്ന പ്രദേശങ്ങളിലെ നൂറുകണക്കിനു വീടുകള്‍ വെള്ളത്തിലായി. താലൂക്കില്‍ ആകെ എട്ടു ദുരിതാശ്വാസ ക്യാമ്പുകള്‍ തുറന്നു. നൂറോളം കുടുംബങ്ങളിലെ നാനൂറോളം അംഗങ്ങള്‍ ദുരിതാശ്വാസ ക്യാമ്പില്‍ കഴിയുന്നുണ്ട്. ചങ്ങനാശേരി-ആലപ്പുഴ റൂട്ടില്‍ കെഎസ്ആര്‍ടിസി സര്‍വീസുകള്‍ നടത്തുന്നുണ്ട്. വെള്ളക്കെട്ടുള്ളതിനാല്‍ പല ചെറുറൂട്ടുകളിലും സര്‍വീസുകളില്ല. ഇന്ന് അധ്യയനവര്‍ഷം ആരംഭിക്കുമ്പോള്‍ ആലപ്പുഴ സെക്ടറിലെ ബസുകളുടെ കുറവ് വിദ്യാര്‍ഥികളെയും മറ്റു യാത്രക്കാരെയും ബാധിക്കാനിടയുണ്ട്. ഗവ. മോഡല്‍ ഹയര്‍ സെക്കൻഡറി സ്‌കൂളിലെ ദുരിതാശ്വാസ ക്യാമ്പില്‍ എസി കോളനിയിലെ 11 കുടുംബങ്ങളിലെ 26 അംഗങ്ങളും പണ്ടകശാലക്കടവ് സെന്‍റ് ജയിംസ് എല്‍പി സ്‌കൂളില്‍ ഒരു കുടുംബത്തിലെ ഒരു സ്ത്രീയും പുരുഷനും കുട്ടിയും ഉള്‍പ്പടെ മൂന്നുപേരും പെരുന്ന വെസ്റ്റ് യുപിഎസില്‍ 19 കുടുംബങ്ങളിലെ 90 അംഗങ്ങളും പുഴവാത് എല്‍പി സ്‌കൂളില്‍ 18 കുടുംബങ്ങളില്‍നിന്നായി 71 അംഗങ്ങളും എത്തിയിട്ടുണ്ട്. ചങ്ങനാശേരി ടൗണ്‍ എല്‍പി സ്‌കൂളില്‍ 10 കുടുംബങ്ങളിലെ ഉള്‍പ്പെടെ 31 അംഗങ്ങളും വാഴപ്പള്ളി വിഎച്ച്എസ് സ്‌കൂളില്‍ ഏഴ് കുടുംബങ്ങളിലെ 28 അംഗങ്ങളും പൂവം യുപി സ്‌കൂളില്‍ 12 കുടുംബങ്ങളില്‍നിന്നുള്ള 45 അംഗങ്ങളും പെരുന്ന ഗവ. എല്‍പിഎസില്‍ 13 കുടുംബങ്ങളിലെ 47 അംഗങ്ങളും താമസക്കാരായുണ്ട്. photo: ജലപ്രളയം...പറാലില്‍ നിന്നൊരു പ്രളയക്കാഴ്ച.

തകര്‍ന്ന റോഡില്‍ ചങ്ങാടമിറക്കി യൂത്ത് കോണ്‍ഗ്രസ് പ്രതിഷേധം

മാടപ്പള്ളി: തകര്‍ന്നടിഞ്ഞ കുറുമ്പനാടം അസംപ്ഷന്‍ പള്ളി-പുളിയാംകുന്ന് റോഡില്‍ ചങ്ങാടമിറക്കി യൂത്ത്‌ കോണ്‍ഗ്രസ് പ്രതിഷേധം. തകര്‍ന്ന ഈ റോഡില്‍ വെള്ളക്കെട്ടുകൂടിയായപ്പോള്‍ സഞ്ചാരം അതിദുരിതമാണ്. റോഡ് തകര്‍ന്നതുമൂലം അസംപ്ഷന്‍ പള്ളിയിലേക്കുള്ള വിശ്വാസികളുടെ യാത്രയും ബുദ്ധിമുട്ടിലാണ്. പ്രതിഷേധസമരം യൂത്ത് കോണ്‍ഗ്രസ് ജില്ലാ ജനറല്‍ സെക്രട്ടറി സോബിച്ചന്‍ കണ്ണമ്പള്ളി ഉദ്ഘാടനം ചെയ്തു. മണ്ഡലം പ്രസിഡന്‍റ് നിധീഷ് കൊച്ചേരി അധ്യക്ഷത വഹിച്ചു. ഷെയിന്‍ പോള്‍സണ്‍, സിനോയ് മാത്യു, നിഖില്‍ ഫിലിപ്പ്, പ്രതീഷ് ഓമനക്കുട്ടന്‍, ജെബിന്‍ സേവ്യര്‍, ജോയല്‍, ലിജോമോന്‍ തുടങ്ങിയവര്‍ പ്രസംഗിച്ചു. തുടർന്ന് യൂത്ത് കോണ്‍ഗ്രസ് പ്രവര്‍ത്തകര്‍ റോഡില്‍ മണ്ണിറക്കി താത്കാലിക അറ്റകുറ്റപ്പണി നടത്തി.

പെരുമ്പനച്ചിയില്‍ ഓടയ്ക്ക് സ്ലാബിട്ട് റോഡ് ഗതാഗതത്തിനായി തുറന്നു

വാക്കുപാലിച്ച് പൊതുമരാമത്തു വകുപ്പ് ചങ്ങനാശേരി: പെരുമ്പനച്ചിയില്‍ ഓടയ്ക്ക് സ്ലാബിട്ട് റോഡ് തുറന്നു. പുതിയ അധ്യയനവര്‍ഷം ആരംഭിക്കുന്ന ഇന്ന് വിദ്യാര്‍ഥികള്‍ ഉള്‍പ്പെടെ യാത്രക്കാര്‍ക്കു സുഗമമായി സഞ്ചരിക്കാം. പെരുമ്പനച്ചി ജംഗ്ഷനില്‍ തോട്ടയ്ക്കാട് റോഡിന്‍റെ തുടക്കത്തിലാണ് ഓടനിര്‍മാണം പൂര്‍ത്തീകരിച്ച് സ്ലാബിട്ടത്. പെരുമ്പനച്ചിയിലെ ഓട നിര്‍മാണംമൂലം മൂന്നാഴ്ചക്കാലമായി കുറുമ്പനാടം വഴിയുള്ള തോട്ടയ്ക്കാട് റോഡിലെ ഗതാഗതം തടസപ്പെട്ടിരുന്നു. ഓടയില്ലാത്തതുമൂലം മാടപ്പള്ളി സഹകരണബാങ്കിന്‍റെ പെരുമ്പനച്ചി ഹെഡ് ഓഫീസിനു മുമ്പില്‍ അനുഭവപ്പെടുന്ന വെള്ളക്കെട്ട് പരിഹരിക്കുന്നതിനാണ് പൊതുമരാമത്തുവകുപ്പ് 27 ലക്ഷം രൂപ മുടക്കി ഓട നിര്‍മാണമാരംഭിച്ചത്. വേണ്ടത്ര മുന്നൊരുക്കങ്ങളില്ലാതെ ഓടനിര്‍മാണം ആരംഭിച്ചതിൽ പരക്കെ ആക്ഷേപം ഉയര്‍ന്നിരുന്നു. മാടപ്പള്ളിയിലെ കോണ്‍ഗ്രസ് പഞ്ചായത്തംഗം ജിന്‍സണ്‍ മാത്യു ഓടനിര്‍മാണം വേഗത്തിലാക്കണമെന്നാവശ്യപ്പെട്ട് ഓടയില്‍ ഇറങ്ങിയിരുന്ന് പ്രതിഷേധിച്ചിരുന്നു. അന്ന് പൊതുമരാമത്തുവകുപ്പ് ഉദ്യോഗസ്ഥര്‍ സ്ഥലത്തെത്തി ജൂണ്‍ ഒന്നിനകം ഓടയ്ക്കു മുകളിൽ സ്ലാബുകള്‍ സ്ഥാപിച്ച് റോഡ് തുറക്കുമെന്ന് നല്‍കിയ ഉറപ്പാണ് പാലിക്കപ്പെട്ടത്. സ്‌കൂള്‍ തുറക്കുന്നതിന് ഒരു ദിവസം മുമ്പ് പെരുമ്പനച്ചി റോഡിലെ ഗതാഗതം സൗകര്യം പുനരാരംഭിക്കുമെന്ന് ജോബ് മൈക്കിള്‍ എംഎല്‍എ അറിയിച്ചിരുന്നു. ഇപ്പോള്‍ ബൈക്ക് യാത്രകള്‍ക്കും കാര്‍ ഓട്ടോറിക്ഷ തുടങ്ങി ചെറു വാഹനങ്ങള്‍ക്കും മാത്രമായുള്ള ഗതാഗത സൗകര്യമാണ് ഒരുക്കിയിരിക്കുന്നത്. രണ്ടാഴ്ചയ്ക്കുള്ളില്‍ പൂര്‍ണമായും ഭാരവാഹനങ്ങള്‍ പോകാന്‍ തരത്തിലുള്ള സൗകര്യമൊരുക്കുമെന്നും എംഎല്‍എ അറിയിച്ചു. photo: ചങ്ങനാശേരി-വാഴൂര്‍ റോഡില്‍ പെരുമ്പനച്ചി ജംഗ്ഷനില്‍ തോട്ടയ്ക്കാട് റോഡിന്‍റെ തുടക്കത്തില്‍ ഓടനിര്‍മാണം പൂര്‍ത്തിയാക്കി സ്ലാബിട്ട് റോഡ് തുറന്നു നല്‍കിയപ്പോള്‍.

ബസിനടിയിൽ സ്‌കൂട്ടര്‍ വീണു; യാത്രക്കാരി അദ്ഭുതകരമായി രക്ഷപ്പെട്ടു

പാലാ: സ്വകാര്യ ബസിന് അടിയിലേക്ക് വീണ സ്‌കൂട്ടറില്‍ നിന്നു യുവതി അദ്ഭുതകരമായി രക്ഷപ്പെട്ടു. പാലാ- വൈക്കം റൂട്ടില്‍ ആര്‍വി ജംഗ്ഷനില്‍ ഇന്നലെ ഉച്ചയ്ക്ക് 11.30 ഓടെയായിരുന്നു അപകടം. പാലാ മരിയന്‍ ആശുപത്രിയിലെ ജീവനക്കാരിയായ മേരിലാന്‍ഡ് സ്വദേശിനി ആഷ് ആണ് അപകടത്തില്‍ നിന്നു രക്ഷപ്പെട്ടത്. നാല്‍ക്കവലയായ ആര്‍വി ജംഗ്ഷനില്‍ കൊട്ടാരമറ്റം ഭാഗത്തുനിന്നു വന്ന സ്വകാര്യ ബസ് ബൈപാസ് റോഡിലേക്ക് തിരിക്കുന്നതിനിടയില്‍ സ്‌കൂട്ടറില്‍ തട്ടുകയായിരുന്നു. സ്‌കൂട്ടര്‍ ബസിന്‍റെ അടിയിലേക്ക് വീണു. യുവതി മറുവശത്തേക്ക് വീണതിനാല്‍ രക്ഷപ്പെടുകയായിരുന്നു. അപകടത്തില്‍ യുവതിയുടെ കാലിന് സാരമായി പരിക്കേറ്റു. ഇവരെ സ്വകാര്യ ആശുപത്രിയില്‍ പ്രവേശിപ്പിച്ചു. അതേസമയം ആര്‍വി ജംഗ്ഷനില്‍ അപകടങ്ങള്‍ തുടര്‍ക്കഥയാവുകയാണ്. റൗണ്ടാന ഇല്ലാത്തതിനാല്‍ വാഹനങ്ങള്‍ കൂടുതല്‍ വലതുവശം ചേര്‍ന്ന് തിരിയുന്നതാണ് അപകടങ്ങള്‍ക്കിടയാക്കുന്നത്. ദിശാ സൂചകങ്ങളും ഇല്ല എന്ന പരാതിയും ഉയരുന്നുണ്ട്.

കുട്ടികളെ വരവേൽക്കാൻ അക്കരപ്പാടം ഗവ. യുപി സ്കൂളിൽ വർണക്കൂടാരം ഒരുങ്ങി

വൈക്കം: പുതിയ അധ്യയന വർഷത്തിലേക്ക് കടക്കുമ്പോൾ ഇന്ന് സ്കൂളിൽ എത്തുന്ന കുരുന്നുകളെ വരവേൽക്കാൻ അക്കരപ്പാടം ഗവൺമെന്‍റ് യുപി സ്കൂളിൽ വർണക്കൂടാരം ഒരുങ്ങി. എസ്എസ്കെ സ്റ്റാർസ് പദ്ധതിയുടെ ഭാഗമായി 10 ലക്ഷം രൂപ ചെലവഴിച്ചാണ് വർണക്കൂടാരം നിർമിച്ചത്. പ്രീ പ്രൈമറി കുട്ടികളുടെ മാനസികോല്ലാസത്തിനായി ഊഞ്ഞാലുകൾ, മെറിഗോ റൗണ്ട്, സ്ലൈസുകൾ, വെർട്ടിക്കൽ ക്ലൈംബർ, നെറ്റ് ക്ലൈംബർ, ഹാഫ് സർക്കിൾ ക്ലൈംബർ എന്നിവയാണ് സജ്ജീകരിച്ചിട്ടുള്ളത് . വർണക്കൂടാരത്തിൽ ഒരുക്കിയിരിക്കുന്ന 13 ഇടങ്ങളിലൂടെ കുട്ടികൾ ആർജിക്കേണ്ട എല്ലാ വികാസമേഖലകളും സ്വായത്തമാക്കുംവിധമാണ് വർണക്കൂടാരം ഒരുക്കിയിരിക്കുന്നത്. കുരുന്നുകളുടെ മനം കവരുന്ന വർണക്കൂടാരം ഇന്ന് രാവിലെ പത്തിന് സി.കെ. ആശ എംഎൽഎ ഉദ്ഘാടനം ചെയ്യും. പഞ്ചായത്ത് പ്രസിഡന്‍റ് പി. കെ.ആനന്ദവല്ലി അധ്യക്ഷതവഹിക്കും. എസ്എസ്കെ ജില്ലാ പ്രോജക്ട് കോ-ഓർഡിനേറ്റർ കെ.ജെ. പ്രസാദ് പദ്ധതി വിശദീകരണം നടത്തും. ബ്ലോക്ക് പഞ്ചായത്ത് പ്രസിഡന്‍റ് എസ്. ബിജു മുഖ്യപ്രഭാഷണം നടത്തും.

മരം വീണ് വൈക്കം-വെച്ചൂർ റോഡിൽ ഗതാഗതം തടസപ്പെട്ടു

വൈക്കം: വൈക്കം ചേരിൻചുവട്ടിൽ വൻമരം കടപുഴകി റോഡിനു കുറുകെ വീണ് വൈക്കം-വെച്ചൂർ റോഡിൽ ഒരു മണിക്കൂറോളം ഗതാഗതം തടസപ്പെട്ടു. ഇന്നലെ വൈകുന്നേരം അഞ്ചിനായിരുന്നു സംഭവം. മരം വീണതിനെത്തുടർന്ന് വൈദ്യുതിപോസ്റ്റ് ഒടിഞ്ഞതോടെ വൈദ്യുതിബന്ധവും തടസപ്പെട്ടു.ഫയർ ഫോഴ്‌സും നാട്ടുകാരും പോലീസും ചേർന്ന് ഒരു മണിക്കൂറിലധികം നടത്തിയ കഠിനപരിശ്രമത്തത്തുടർന്നാണ് മരം മുറിച്ചു നീക്കി ഗതാഗതം പുനഃസ്ഥാപിച്ചത്. പോസ്റ്റിനും വൈദ്യുതിലൈനും കാര്യമായി തകരാർ സംഭവിച്ചതിനാൽ വൈദ്യുതിവിതരണം പുനഃസ്ഥാപിക്കാനായിട്ടില്ല.

പാത്തുമ്മയ്ക്ക് ആശ്രയമായി നിത്യസഹായകന്‍റെ അമ്മവീട്

കടുത്തുരുത്തി; ആരോരുമില്ലാത്ത പാത്തുമ്മയ്ക്കു സംരക്ഷണമൊരുക്കി നിത്യസഹായകന്‍റെ അമ്മവീട്. വെള്ളൂര്‍ പഞ്ചായത്ത്‍ 13-ാo വാര്‍ഡില്‍ കരിപ്പാടത്ത് കോരിച്ചൊരിയുന്ന മഴയിലും പ്രായത്തിന്‍റെ അവശതയിലും കഴിഞ്ഞിരുന്ന പാത്തുമ്മ ഇനി നിത്യസഹായകന്‍റെ തണലില്‍. വീണ് ഇടുപ്പെല്ല് പൊട്ടി ഒറ്റപ്പെട്ടുപോയ പാത്തുമ്മ തനിച്ചായിരുന്നു താമസം. ഭര്‍ത്താവും മക്കളുമില്ലാത്ത പാത്തുമ്മയുടെ അവശതകളെപ്പറ്റി അറുനൂറ്റിമംഗലം ആശൂപത്രിയിലെ പാലിയേറ്റീവ് നഴ്‌സ് ആന്‍സിനെ, ആശാ പ്രവര്‍ത്തകയായ ഷംലയാണ് അറിയിച്ചത്. തുടര്‍ന്ന് പഞ്ചായത്തംഗം ഷിനി സജു നിത്യസഹായകന്‍ ട്രസ്റ്റിന്‍റെ അമ്മവീടിനെ വിവരമറിയിച്ചു. നിത്യസഹായകൻ പ്രസിഡന്‍റ് അനില്‍ ജോസഫും അമ്മവീട് സെക്രട്ടറി സിന്ധുവും പാത്തുമ്മയെ സന്ദര്‍ശിച്ചു കാര്യങ്ങള്‍ മനസിലാക്കി. തുടര്‍ന്ന് ഷിനി സജുവും ആശപ്രവര്‍ത്തക ഷംലയും നാട്ടുകാരും ചേര്‍ന്ന് ഉമ്മയെ നിത്യസഹായകന് കൈമാറി.

മാൻവെട്ടത്ത് വീട് കുത്തിത്തുറന്ന് മോഷണം

32 പവനും 25,000 രൂപയും നഷ്‌ടപ്പെട്ടു കടുത്തുരുത്തി: വീടിന്‍റെ മുന്‍വശത്തെ വാതില്‍ കുത്തിത്തുറന്ന് മുറിക്കുള്ളിലെ അലമാരയില്‍ സൂക്ഷിച്ചിരുന്ന 32 പവനും 25,000 രൂപയും മോഷ്ടിച്ചു. മാന്‍വെട്ടം നെടുംതുരുത്തിമ്യാലില്‍ എന്‍.ജെ. ജോയിയുടെ വീട്ടിലാണ് മോഷണം നടന്നത്. വെള്ളിയാഴ്ച രാത്രിയാണ് മോഷണം. വെള്ളിയാഴ്ച രാവിലെ ജോയിയും ഭാര്യ ലിസിയും മകള്‍ ജൂലിയുടെ ചികിത്സയ്ക്കായി പോയി. ശനിയാഴ്ച രാവിലെ പത്തോടെ ജോയി തിരികെ വീട്ടിലെത്തിയപ്പോഴാണ് വീടിന്‍റെ മുന്‍വശത്തെ വാതിലിന്‍റെ പൂട്ട് തകര്‍ത്ത നിലയില്‍ കാണുന്നത്. വീടിനുള്ളിലെ അഞ്ച് അലമാരകളില്‍ സൂക്ഷിച്ചിരുന്ന വസ്ത്രങ്ങളും മറ്റു സാധനങ്ങളെല്ലാം കട്ടിലില്‍ വാരിവലിച്ചിട്ട നിലയിലായിരുന്നു. അലമാരയുടെ അടിവശത്തെ അറയില്‍ സൂക്ഷിച്ചിരുന്ന ഭാര്യയുടെയും മകളുടെയും മരുമകന്‍ ബിനുവിന്‍റെയും മാല, വള, കമ്മല്‍, മോതിരങ്ങള്‍ തുടങ്ങിയ സ്വര്‍ണാഭരണങ്ങളാണ് മോഷ്ടിച്ചത്. ഇതിനൊപ്പമുണ്ടായിരുന്ന 25000 രൂപയും നഷ്ടപ്പെട്ടു. ഇക്കൂട്ടത്തിലുണ്ടായിരുന്ന റോള്‍ഡ് ഗോള്‍ഡ് ചെയിന്‍ മോഷ്ടാവ് ഉപേക്ഷിച്ച നിലയില്‍ കണ്ടെത്തി. കടുത്തുരുത്തി പോലീസും കോട്ടയത്തുനിന്നു ഡോഗ് സ്‌ക്വാഡും വിരലടയാള വിദഗ്ധരും സ്ഥലത്തെത്തി പരിശോധനകള്‍ നടത്തി. പോലീസ് നായ ജോയിയുടെ വീട്ടില്‍നിന്ന് ഓടി മാന്‍വെട്ടം കവലയിലെത്തിയ ശേഷം തിരികെ ജോയിയുടെ വീട്ടിലെത്തി. മേമ്മുറി കുരിശുപള്ളിക്കു സമീപം പുതിയകുന്നേല്‍ സജി ജോസിന്‍റെ വീടിന്‍റെ വാതിലും കുത്തിത്തുറന്നു മോഷണം നടത്തിയതായി കണ്ടെത്തി. ഇവിടെയും എല്ലാം വാരിവലിച്ചിട്ട നിലയിലാണ്. സജിയും കുടുംബവും വര്‍ഷങ്ങളായി യുകെയിലാണ്. ഇവിടെനിന്ന് ഒന്നും നഷ്ടപെട്ടിട്ടില്ല. സമീപത്തെ സിസി ടിവി കാമറകള്‍ പരിശോധിച്ചപ്പോള്‍ മഴക്കോട്ടിട്ട ഒരാളുടെ അവ്യക്തമായ ദൃശ്യം ലഭിച്ചതായി പോലീസ് പറഞ്ഞു. എസ്പിയുടെ നിര്‍ദേശാനുസരണം സ്‌പെഷല്‍ സ്‌ക്വാഡ് രൂപീകരിച്ച് അന്വേഷണം ഊര്‍ജിതമാക്കി.

ഏറ്റുമാനൂർ റെയിൽവേസ്റ്റേഷൻ റോഡിൽ വെള്ളക്കെട്ട്; യാത്രക്കാർ ദുരിതത്തിൽ

ഏറ്റുമാനൂർ: റെയിൽവേസ്റ്റേഷനിലേക്കുള്ള റോഡ് തകർന്നു. യാത്രക്കാർ ദുരിതത്തിൽ. മനയ്ക്കപ്പാടം മുതൽ റെയിൽവേസ്റ്റേഷൻ വരെ റോഡ് പൂർണമായി തകർന്നു.റോഡിലെ കുഴികളിൽ വെള്ളം നിറഞ്ഞു. കുഴികൾ തിരിച്ചറിയാൻ മാർഗമില്ലാതായതോടെ കാൽനടയാത്രക്കാരും ഇരുചക്ര വാഹനങ്ങളും അപകടത്തിൽപ്പെടുന്നത് പതിവായി. റെയിൽവേ സ്റ്റേഷനിലേക്ക് ഓട്ടം പോകാൻ ഓട്ടോറിക്ഷാ ഡ്രൈവർമാർ തയാറാകാത്തത് യാത്രക്കാർക്ക് ബുദ്ധിമുട്ടുണ്ടാക്കുന്നു. കുഴികളിൽ ചാടി വാഹനങ്ങൾക്ക് തകരാറിലാകുന്നതിനു പുറമേ തങ്ങൾക്ക് നടുവേദന ഉൾപ്പെടെ ശാരീരിക ബുദ്ധിമുട്ടുകൾ ഉണ്ടാകുന്നതായി ഓട്ടോറിക്ഷാ ഡ്രൈവർമാർ പറയുന്നു. മനയ്ക്കപ്പാടത്ത് ബസിറങ്ങി വരുന്ന കാൽനട യാത്രക്കാർ വെള്ളക്കെട്ടിൽനിന്ന് മാറി റെയിൽവേ ട്രാക്കിലൂടെ സ്റ്റേഷനിലേക്ക് പ്രവേശിക്കുന്നത് അപകടത്തിനിടയാക്കാം. മഴക്കാലത്ത് ട്രാക്കിലൂടെയുള്ള നടത്തം സുരക്ഷിതമല്ല. റെയിൽവേ ട്രാക്കിലൂടെയുള്ള പ്രവേശനം നിരോധിച്ചിട്ടുള്ളതാണെങ്കിലും യാത്രക്കാർക്കു മറ്റു മാർഗമില്ല. റോഡിന്‍റെ ശോച്യാവസ്ഥ പരിഹരിക്കണമെന്ന് ആവശ്യപ്പെട്ട് ബന്ധപ്പെട്ട അധികാരികളെയും ജന പ്രതിനിധികളെയും സമീപിച്ചിരുന്നെങ്കിലും നടപടിയൊന്നുമാകാത്തതിനാൽ വെള്ളക്കെട്ടിൽ പ്രതിഷേധിക്കാൻ ഒരുങ്ങുകയാണെന്ന് യാത്രക്കാരുടെ സംഘടനയായ ഫ്രണ്ട്‌സ് ഓൺ റെയിൽസ് ഭാരവാഹികളായ അജാസ് വടക്കേടം, ശ്രീജിത്ത് കുമാർ എന്നിവർ പറഞ്ഞു.

മെഡിക്കൽ കോളജ് ആശുപത്രിയിൽ നായ്ക്കളുടെ വിളയാട്ടം

ഗാന്ധിനഗർ: മെഡിക്കൽ കോളജ് ആശുപത്രി കോമ്പൗണ്ടിൽ നായശല്യം. ഒപി ടിക്കറ്റ് കൗണ്ടറിന് സമീപം രോഗികൾക്ക് ഭീഷണിയായി നായകൾ കൂട്ട ത്തോടെയാണ് നിൽക്കു ന്നത്. ക്യൂ നിൽക്കുന്ന രോഗികൾക്കിടയിലൂടെയാണ് നായ്ക്കൾ ഓടിനടക്കുന്നത്. ഇത് വലിയ ഭീഷണിയാണ് സൃഷ്ടിക്കുന്നത്. കഴിഞ്ഞദിവസം ഒപി ടിക്കറ്റ് എടുക്കാൻ നിന്ന രോഗിക്കു നേരേ നായ കുരച്ചുചാടി. ആശുപത്രിയിലെ വിവിധ ഭാഗങ്ങളിൽ ഇവ ഒറ്റയ്ക്കും കൂട്ടത്തോടെയും അലഞ്ഞുതിരിയുകയാണ്. രണ്ടാഴ്ച മുമ്പ് ആശുപത്രി ജീവനക്കാരനു നേരേ നായ്ക്കൾ കുരച്ചുചാടി കടിക്കാൻ ശ്രമിച്ചു. നായ്ക്കളെ ആശുപത്രി കോമ്പൗണ്ടിൽനിന്നു തുരത്താ ൻ അടിയന്തര നടപടി സ്വീകരിക്കണം.

കുമരകം ഗവ. ആശുപത്രിയിൽ 24 മണിക്കൂറും ഡോക്ടർമാർ വേണമെന്ന്

കുമരകം: കുമരകം ഗവൺമെലമെന്‍റ് ആശുപത്രിയിൽ 24 മണിക്കൂറും ഡോക്ടർമാരുടെ സേവനം ലഭ്യമാക്കണമെന്ന ആവശ്യം ശക്തമായി. കാലവർഷാരംഭത്തിൽത്തന്നെ പനിയും കോവിഡുപോലുള്ള മാരകമായ പകർച്ചവ്യാധികളും പെരുകുന്ന സാഹചര്യത്തിൽ പാവപ്പെട്ട ജനങ്ങൾക്ക് ആശ്രയമാകേണ്ട ആതുരാലയത്തിൽ രാത്രികാലത്തു ഡോക്ടർമാരുടെ സേവനം ഇല്ലാത്തത് രോഗികളെ കുറച്ചൊന്നുമല്ല ബുദ്ധിമുട്ടിക്കുന്നത്. കുമരകത്ത് ജി 20 ഉച്ചകോടി നടത്തിയപ്പോൾ ഹോസ്പിറ്റലിൽ ആവശ്യത്തിന് ഡോക്ടർമാർ, നേഴ്സുമാർ, അറ്റൻഡർമാർ, ഐസൊലേഷൻ വാർഡ്, ഐസിയു ആവശ്യത്തിനു മരുന്നുകൾ, എമർജൻസി ഓപ്പറേഷൻ തിയറ്ററുകൾ, ആംബുലൻസുകൾ എന്നിവ സജ്ജമാക്കിയിരുന്നു. ഡോക്ടർമാർക്ക് താമസിക്കാനുള്ള ക്വാർട്ടേഴ്സും സജ്ജീകരിച്ചിരുന്നു. ഈ ക്വാർട്ടേഴ്സിലാണ് അന്ന് ഡോക്ടർമാർ താമസിച്ചിരുന്നത് ഇതിനെല്ലാമുള്ള സൗകര്യങ്ങൾ ഹോസ്പിറ്റലിൽ ഉണ്ട്. ജി 20 കഴിഞ്ഞതോടെ എല്ലാം അപ്രത്യക്ഷമായി.ഇപ്പോൾ ആംബുലൻസ് സൗകര്യം പോലുമില്ല. എത്രയും വേഗം 24 മണിക്കൂറും ഡോക്ടർമാരെ നിയമിക്കണമെന്നാവശ്യപ്പെട്ട് ശക്തമായ സമരപരിപാടികളുമായി മുന്നോട്ടു പോകുമെന്ന് മഹിളാ കോൺഗ്രസ് മണ്ഡലം കമ്മിറ്റി അറിയിച്ചു. മണ്ഡലം പ്രസിഡന്‍റ് സലിമ ശിവാത്മജൻ അധ്യക്ഷത വഹിച്ചു.

കാർ മറിഞ്ഞു നാലുപേർക്കു പരിക്ക്

കോട്ടയം: പാമ്പാടി എട്ടാംമൈലിനുസമീപം കാര്‍ നിയന്ത്രണം വിട്ട് തോട്ടിലേക്ക് വീണു. യാത്രക്കാര്‍ അദ്ഭുതകരമായി രക്ഷപ്പെട്ടു. ദേശീയപാതയിൽ ഇന്നലെ രാത്രി 7.45നാണ് സംഭവം. എട്ടാം മൈലിനും ഏഴാം മൈലിനുമിടയിലുള്ള പാണംമ്പടി കല്ലുപാലം തോട്ടിലേക്കാണ് ആഡംബര വാഹനം നിയന്ത്രണം തെറ്റി വീണത്. തോട്ടിലേക്ക് വാഹനം കുത്തി വീണ നിലയിലായിരുന്നതിനാല്‍ ശബ്ദം കേട്ട് ഓടിയെത്തിയ നാട്ടുകാരും വഴിയാത്രക്കാരും ചേര്‍ന്ന് കാറില്‍ ഉണ്ടായിരുന്നവരെ രക്ഷപ്പെടുത്തി. കൊല്ലാട് സ്വദേശികളായ നാല് പേരായിരുന്നു ഡിഫെന്‍ഡര്‍ കാറില്‍ ഉണ്ടായിരുന്നത്. പരിക്കേറ്റ ഇവരെ മണര്‍കാട് ആശുപത്രിയില്‍ പ്രവേശിപ്പിച്ചു.

കോട്ടയം ടെക്സ്റ്റൈൽസ് ഇന്നു തുറക്കും

ഏറ്റുമാനൂർ: വർഷങ്ങളായി അടച്ചുപൂട്ടിയിരുന്ന കോട്ടയം ടെക്സ്റ്റൈൽസ് ഇന്നു മുതൽ തുറന്നു പ്രവർത്തിക്കാൻ സംസ്ഥാന സർക്കാരും ടെക്സ്റ്റൈൽസ് കോർപറേഷനും നടപടി സ്വീകരിച്ചതായി മോൻസ് ജോസഫ് എംഎൽഎ അറിയിച്ചു. കോട്ടയം ടെക്സ്റ്റൈൽസ് അടച്ചുപൂട്ടിയതു മൂലം ദീർഘനാളുകളായി ജീവനക്കാരും തൊഴിലാളികളും പ്രതിസന്ധിയിലായിരുന്നു. കടുത്തുരുത്തി അസംബ്ലി മണ്ഡലത്തിലെ വേദഗിരിയിൽ പ്രവർത്തിക്കുന്ന കോട്ടയം ടെക്സ്റ്റൈൽസ് തുറന്നു പ്രവർത്തിക്കണമെന്ന് ആവശ്യപ്പെട്ട് മോൻസ് ജോസഫ് എംഎൽഎ നിയമസഭയിൽ രണ്ടുതവണ സബ്മിഷനുകൾ അവതരിപ്പിച്ചിരുന്നു. വ്യവസായ വകുപ്പ് മന്ത്രി പി. രാജീവ്, സഹകരണ വകുപ്പ് മന്ത്രി വി.എൻ. വാസവൻ എന്നിവരുടെ നേതൃത്വത്തിൽ സ്ഥാപനത്തിന്‍റെ പ്രതിസന്ധി പരിഹരിക്കുന്നതു സംബന്ധിച്ച് സർക്കാർ തലത്തിൽ ചർച്ചകളും ഇടപെടലുകളും നടത്തി. 2025 - 26 വർഷത്തെ ബജറ്റിൽ ഉൾപ്പെടുത്തി ധനകാര്യ വകുപ്പ് മന്ത്രി കെ.എൻ. ബാലഗോപാൽ കോട്ടയം ടെക്സ്റ്റൈൽസിന്‍റെ ഭാവി വികസനത്തിനുവേണ്ടി 40 കോടി രൂപയുടെ പദ്ധതി പ്രഖ്യാപിച്ചു. മന്ത്രിമാരുടെ സംയുക്ത ഇടപെടലിലൂടെ ബജറ്റ് വിഹിതത്തിൽനിന്ന് എട്ടു കോടി രൂപ കമ്പനിയുടെ ആധുനികവത്കരണത്തിനുവേണ്ടി സംസ്ഥാന സർക്കാർ അനുവദിച്ചതായി മോൻസ് ജോസഫ് എംഎൽഎ വ്യക്തമാക്കി. പ്രസ്തുത ഫണ്ട് വിനിയോഗിച്ച് പുതിയ മെഷീനുകളും ആധുനിക സാമഗ്രികളും വാങ്ങുന്നതിനുള്ള ഓർഡർ ടെക്സ്റ്റൈൽസ് കോർപറേഷൻ അധികൃതർ ഇതിനോടകം നടത്തിയിട്ടുണ്ട്. കോട്ടയം ടെക്സ്റ്റൈൽസ് തുറന്നു പ്രവർത്തിക്കുന്നതിന് പ്രധാന തടസമായിരുന്ന വൈദ്യുതിചാർജ് കുടിശിക സംബന്ധിച്ച് സർക്കാർ പരിഹാര നടപടികൾ സ്വീകരിച്ചു. മുഖ്യമന്ത്രിയുടെ നേതൃത്വത്തിൽ ധനകാര്യ, വ്യവസായ, സഹകരണ, വൈദ്യുതി വകുപ്പ് മന്ത്രിമാർ കൂട്ടായി നടത്തിയ ചർച്ചയുടെ അടിസ്ഥാനത്തിൽ 2024 ഡിസംബർ 31 വരെ കോട്ടയം ടെക്സ്റ്റൈൽസ് അടയ്ക്കാനുണ്ടായിരുന്ന എട്ടു കോടി രൂപയുടെ വൈദ്യുതി കുടിശിക പൂർണമായും ഇളവുചെയ്തു. നിലവിലുള്ള കുടിശികയ്ക്ക് സാവകാശം അഭ്യർഥിച്ച് വൈദ്യുതിവകുപ്പ് മന്ത്രി കെ. കൃഷ്ണൻകുട്ടിക്ക് മോൻസ് ജോസഫ് എംഎൽഎ സമർപ്പിച്ച നിവേദനത്തിന്‍റെ അടിസ്ഥാനത്തിൽ വൈദ്യുതി ബോർഡ് അനുകൂല നടപടി സ്വീകരിച്ചതോടെയാണ് ഇന്നുമുതൽ കമ്പനി തുറന്നുപ്രവർത്തിക്കാൻ വഴിയൊരുങ്ങിയത്.

ക്‌നാനായ കത്തോലിക്ക കോൺഗ്രസ് കർഷക അവാർഡുകൾ സമ്മാനിച്ചു

ഉഴവൂർ: ക്‌നാനായ കത്തോലിക്കാ കോൺഗ്രസ് കർഷകഫോറം മികച്ച കർഷകർക്ക് ഏർപ്പെടുത്തിയ കീപ്പാറയിൽ കുരുവിള മെമ്മോറിയൽ അവാർഡ് വിതരണം ചെയ്തു. മികച്ച കർഷകൻ അരീക്കര ഇടവകാംഗം ചുമ്മാർ പുത്തൻപുരയെ ഫൊറോന വികാരി ഫാ. അലക്‌സ് ആക്കപ്പറമ്പിൽ ആദരിച്ചു. മികച്ച കർഷക ഉഴവൂർ ഇടവകാംഗം മേഴ്‌സി സിറിയക്കിനെ കർഷകഫോറം രൂപത ചെയർമാൻ എം.സി. കുര്യാക്കോസും കാർഷികരംഗത്ത് മികച്ച സംഭാവന നൽകിയ പുതുവേലി ഇടവകാംഗം ജോർജ് കൊറ്റംകൊമ്പിലിനെ കെസിസി ഉഴവൂർ ഫൊറോന പ്രസിഡന്‍റ് ഏബ്രാഹം വെളിയത്തും ആദരിച്ചു. കർഷക ഫോറം ഫൊറോന ജോയിന്‍റ് കൺവീനർ തോമസ് മുളയ്ക്കൽ അധ്യക്ഷത വഹിച്ചു. കെസിസി ഫൊറോന വൈസ് പ്രസിഡന്‍റ് ഷെറി മാത്യു, സെക്രട്ടറി ഫിലിപ്പ് പുള്ളോലിൽ, യൂണിറ്റ് പ്രസിഡന്‍റ് വി.സി.സിറിയക്ക്, സെക്രട്ടറി സജി ഒറ്റത്തെങ്ങാടി എന്നിവർ പ്രസംഗിച്ചു.

കോട്ടയത്ത് എത്തണോ? കുഴികള്‍ ചാടണം

നാഗമ്പടം സീസര്‍ പാലസ് ജംഗ്ഷനില്‍ മാലപോലെ കുഴികള്‍ കോട്ടയം: കോട്ടയത്ത്എത്താന്‍ കുഴികള്‍ താണ്ടണം. ഈ മഴക്കാലത്ത് സൂക്ഷിച്ചില്ലെങ്കില്‍ അപകടത്തില്‍പ്പെടാം. കാരണം കോട്ടയം നഗരത്തിലേക്ക് ഇറങ്ങിയാല്‍ യാത്രക്കാരെ കെണിവച്ചു വീഴ്ത്താനായി പൊതുമരാമത്ത് വകുപ്പും ദേശീയപാത വിഭാഗവും റെയില്‍വേയും ഒക്കെ കുഴികള്‍ റെഡിയാക്കിയിട്ടുണ്ട്. എംസി റോഡില്‍ നാഗമ്പടം മേല്‍പാലം ഇറങ്ങിവരുമ്പോള്‍ സീസര്‍ പാലസ് ജംഗ്ഷനില്‍ മാലപോലെ കുഴികളാണ്. ഇതില്‍ ചാടാതെ ആര്‍ക്കും നഗരത്തിലേക്ക് വരാന്‍ കഴിയില്ല. ചാടുമ്പോള്‍ വീണില്ലെങ്കില്‍, വണ്ടിക്ക് കേടു പറ്റിയില്ലെങ്കില്‍, അപകടത്തില്‍പ്പെട്ടില്ലെങ്കില്‍ ഭാഗ്യമെന്നു കരുതാം. കനത്ത മഴയെത്തുടർന്നാണ് ചെറുകുഴികളും പൊട്ടിയ റോഡും വലിയ കുഴിയായി മാറിയത്. രാവും പകലും നൂറുകണക്കിനു വാഹനങ്ങള്‍ കടന്നുപോകുന്ന ഇവിടെ ചെറുതും വലുതുമായ വാഹനങ്ങള്‍ കുഴിയില്‍ ചാടുന്നതോടെ കുരുക്കും അപകടവും വര്‍ധിച്ചു. കുഴികളില്‍ ചാടാതെ വെട്ടിക്കാനായി വാഹനങ്ങള്‍ ശ്രമിക്കുമ്പോഴാണ് അപകടമുണ്ടാകുന്നത്. നാഗമ്പടം റെയില്‍വേ മേല്‍പാലത്തിലുമുണ്ട് കുഴികള്‍. പാലവും റോഡും തമ്മില്‍ ചേരുന്നിടം അകന്നുതുടങ്ങിയിട്ട് നാളുകളായി. ഇവിടെ ഒരോ ദിവസവും റോഡ് ഇരുന്നുകൊണ്ടിരിക്കുകയാണ്. ഇതു നന്നാക്കേണ്ട റെയില്‍വേയും പൊതുമരാമത്തും അറിഞ്ഞ ഭാവം നടിക്കുന്നില്ല. റെയില്‍വേയ്ക്കാണ് കുടുതല്‍ ഉത്തരവാദിത്വം. പുളിമൂട് ജംഗ്ഷനില്‍ ഓടയുടെ സ്ലാബ് തകര്‍ന്ന് അപകടകരമായ നിലയിലാണ്. നഗരത്തിലെ വിവിധ പ്രദേശങ്ങളില്‍ ഫുട്പാത്തുകളും തകര്‍ന്നുകിടക്കുകയാണ്. കോട്ടയം മുതല്‍ ഏറ്റുമാനൂര്‍വരെ റോഡ് വളരെ മോശം മഴ ശക്തമായതോടെ എംസി റോഡിന്‍റെ സ്ഥിതി വളരെ മേശമായി. കോട്ടയം മുതല്‍ ഏറ്റുമാനൂര്‍ വരെയുള്ള ഭാഗമാണ് തകര്‍ന്നത്. വേനല്‍ക്കാലത്ത് വീണ്ടുകീറിയ ഭാഗത്ത് ഇപ്പോള്‍ വലിയ കുഴികളാണ്. 101 കവല മുതല്‍ കാരിത്താസ് വരെയും സംക്രാന്തി, കുമാരനല്ലൂര്‍, ചൂട്ടുവേലി ഭാഗത്തും നിറയെ കുഴികളാണ്. ചൂട്ടുവേലി ജംഗ്ഷനില്‍ രൂപപ്പെട്ട വലിയ കുഴി അടയ്ക്കന്‍ ഇതുവരെ അധികൃതര്‍ക്കായിട്ടില്ല. കുഴിയുടെ മുന്നറിയിപ്പിനായി വീപ്പയാണ് വച്ചിരിക്കുന്നത്. രാത്രികാലത്ത് ഇവിടെ വെളിച്ചവുമില്ല. വേഗതയിലെത്തുന്ന വാഹനങ്ങള്‍ വീപ്പ ഇടിച്ചു തെറിപ്പിക്കുകയാണ്. ഏറ്റുമാനൂര്‍ നഗര മധ്യത്തില്‍ രൂപപ്പെട്ട കുഴി വൻ കുഴിയായി മാറിയിരിക്കുകയാണ്. ഒരു മാസം മുമ്പ് കുഴി അടച്ചതാണ്. മഴ ശക്തമായതോടെ വീണ്ടും കുഴി രൂപപ്പെട്ടു. മഴയത്ത് കുഴിയടയ്ക്കുന്ന രീതി ഉപേക്ഷിച്ച് പൊതുമരാമത്ത് വകുപ്പ് തെളിഞ്ഞ അന്തരീക്ഷത്തില്‍ ടാറിംഗ് നടത്തണമെന്നാണ് നാട്ടുകര്‍ ആവശ്യപ്പെടുന്നത്.

ഇനി അക്ഷരമുറ്റത്ത്, അറിവിന്‍റെ ലോകത്ത്...

കോട്ടയം: പുത്തനുടുപ്പും ബാഗും കുടയും കളിചിരികളുമായി കുട്ടികള്‍ ഇന്ന് അക്ഷരമുറ്റത്തേക്ക്. രണ്ടു മാസത്തെ ഇടവേളയ്ക്കു ശേഷം സ്‌കൂളുകളില്‍ ഫസ്റ്റ് ബെല്ലും ക്ലാസുകളില്‍ ഹാജർ വിളികളും മുഴങ്ങും. വേനലവധിയുടെ ആലസ്യംവിട്ട് സ്‌കൂളുകളില്‍ ഇന്ന് പുതിയ അധ്യയനവര്‍ഷത്തിനു തുടക്കമാകും. രണ്ടുദിവസമായി കോരിച്ചൊരിയുന്ന മഴയ്ക്ക് ശമനമായത് കുട്ടികള്‍ക്കും രക്ഷിതാക്കള്‍ക്കും ഒരേപോലെ ആശ്വാസമായി. ഇന്നുമുതല്‍ വിദ്യാലയങ്ങളുടെ വാതിലുകള്‍ വീണ്ടും തുറക്കുമ്പോള്‍ കുട്ടികളെ സ്വീകരിക്കാനുള്ള എല്ലാ ഒരുക്കവും സ്‌കൂള്‍ അധികൃതരും അധ്യാപകരും നേരത്തെ പൂര്‍ത്തിയാക്കിയിരുന്നു. നീണ്ടൂര്‍ എസ്‌കെവി ഗവ. ഹയര്‍സെക്കന്‍ഡറി സ്‌കൂളിലാണ് ജില്ലാതല സ്‌കൂള്‍ പ്രവേശനോത്സവം. എല്ലാ സ്‌കൂളിലും പ്രവേശനോത്സവത്തോടെയാണ് കുട്ടികളെ വരവേല്‍ക്കുന്നത്. പൂക്കളും തോരണങ്ങളും ബലൂണുകളും ഉപയോഗിച്ച് സ്‌കൂളും പരിസരവും അലങ്കരിച്ചിട്ടുണ്ട്. ഒന്നാം ക്ലാസിലേക്ക് ആദ്യമായി എത്തുന്ന കുട്ടികളെ മുതിര്‍ന്ന കുട്ടികളും അധ്യാപകരും മധുരം നല്‍കിയാണ് സ്വീകരിക്കുന്നത്. ജില്ലയിലെ എല്ലാ സ്‌കൂളുകളും തുറന്നു പ്രവര്‍ത്തിക്കാന്‍ സജ്ജമാണെന്ന് പരിശോധിച്ചുറപ്പിച്ചതായി ജില്ലാ വിദ്യാഭ്യാസ ഓഫീസര്‍ അറിയിച്ചു. സ്‌കൂളുകളില്‍ വിദ്യാഭ്യാസ ഓഫീസര്‍മാര്‍ പരിശോധന നടത്തി. സ്‌കൂളുകളില്‍ തദ്ദേശ സ്വയംഭരണ സ്ഥാപനങ്ങളുടെ നേതൃത്വത്തിലും പരിശോധന നടത്തി. കനത്ത മഴ മൂലവും ചില സ്‌കൂളുകളില്‍ ദുരിതാശ്വാസ ക്യാമ്പുകള്‍ പ്രവര്‍ത്തിക്കുന്നതിനാലും ഇവിടെ പിന്നീടായിരിക്കും അധ്യയനം തുടങ്ങുക. തദ്ദേശ സ്വയംഭരണ സ്ഥാപനങ്ങള്‍ അനുവദിച്ച ഫണ്ടുപയോഗിച്ചുള്ള അറ്റകുറ്റപ്പണികളും ശുചീകരണ പ്രവര്‍ത്തനങ്ങളും ഇതിനോടകം പൂര്‍ത്തിയായിട്ടുണ്ട്. പിടിഎയുടെ നേതൃത്വത്തിലുള്ള ക്രമീകരണങ്ങളും നടന്നു. പുസ്തകവിതരണവും അവസാനഘട്ടത്തിലാണ്. 15,06,181 പുസ്തകങ്ങളാണ് ജില്ലയില്‍ ആവശ്യമുള്ളത്. ഇതില്‍ 11,17,461 പുസ്തകങ്ങള്‍ ഇതിനോടകം വിതരണം ചെയ്തു. ബാക്കിയുള്ള 3,88,720 പുസ്തകങ്ങള്‍ സ്‌കൂള്‍ തുറക്കുന്നതിനു മുമ്പുതന്നെ വിതരണം ചെയ്യും. യൂണിഫോമുകളുടെ വിതരണവും പൂര്‍ത്തിയായി. ഉച്ചഭക്ഷണം തയാറാക്കുന്നതിനുള്ള അടുക്കള, പാത്രങ്ങള്‍, മറ്റു സൗകര്യങ്ങള്‍ എന്നിവയുടെ പരിശോധനയും നടത്തി. സ്കൂള്‍ പരിസരങ്ങള്‍ വെട്ടിത്തെളിച്ചു. സ്‌കൂള്‍ കെട്ടിടത്തിലെയും മതിലുകളിലെയും സുഷിരങ്ങള്‍ സിമന്‍റ്വച്ച് അടച്ച് സുരക്ഷിതമാക്കുകയും ചെയ്തിട്ടുണ്ട്. സ്‌കൂള്‍ തുറക്കുന്നതുമായി ബന്ധപ്പെട്ട് ട്രാഫിക് ക്രമീകരണത്തിനും സുരക്ഷയുടെ ഭാഗമായി സ്‌കൂളുകള്‍ക്ക് മുമ്പിലും കൂടുതല്‍ പോലീസുകാരെ നിയമിക്കുമെന്ന് ജില്ലാ പോലീസും അറിയിച്ചിട്ടുണ്ട്.

നാളികേര വില ഉയരങ്ങളില്‍; വെളിച്ചെണ്ണ തിളയ്ക്കുന്നു

കോട്ടയം: വെളിച്ചെണ്ണ വില തിളച്ചു കയറുകയാണ്. ചില്ലറ വിപണിയില്‍ ശരാശരി വില കിലോക്ക് 340 രൂപ മുതല്‍ 360 രൂപ വരെയാണ്. കുപ്പിയില്‍ പായ്ക്ക് ചെയ്ത ബ്രാന്‍ഡഡ് വെളിച്ചെണ്ണക്ക് ഇതിലും കൂടുതലാണ് വില. എണ്ണവില വൈകാതെ 400 കടക്കുമെന്നും 500 രൂപയില്‍ എത്തിയാല്‍പോലും അതിശയിക്കേണ്ടെന്നാണ് വിപണി സൂചന. ആ സാഹചര്യത്തില്‍ നാളികേരവില കിലോയ്ക്ക് 100 കടന്നേക്കാം. കേരളത്തിലും അയല്‍ സംസ്ഥാനങ്ങളിലും കൊപ്രയുടെ ക്ഷാമമാണ് വെളിച്ചെണ്ണ വില ഉയരാന്‍ പ്രധാന കാരണം. കൊപ്ര കിട്ടാനില്ലാതെ വന്നതോടെ ചെറുകിട ആട്ടുമില്ലുകളുടെ പ്രവര്‍ത്തനം നിലച്ചു. തമിഴ്നാട്ടില്‍നിന്നും ആന്ധ്രയില്‍നിന്നും കൊപ്ര വരവ് വലിയ തോതില്‍ കുറഞ്ഞിട്ടുണ്ട്. വിദേശ കൊപ്രാ വരവും നിലച്ചു. വെളിച്ചെണ്ണ വിലയുടെ തോതില്‍ പാം ഓയില്‍, നല്ലെണ്ണ, സൂര്യകാന്തി ഓയില്‍ എന്നിവയ്ക്കും വില വര്‍ധിക്കുകയാണ്. മാര്‍ക്കറ്റില്‍ നാളികേര ലഭ്യത 30-35 ശതമാനം ഇടിവുണ്ടായി. നിലവില്‍ കൊപ്ര വില കേരളത്തില്‍ 186 രൂപയും തമിഴ്നാട്ടില്‍ 188 രൂപയുമാണ്. ഒരു വര്‍ഷത്തിനിടെ നാളി കേര വിലയില്‍ 25 രൂപയുടെ വര്‍ധനയാണുണ്ടായിരിക്കുന്നത്. ഇതാണ് കൊപ്രയിലും പ്രതിഫലിക്കുന്നത്. നാളി കേര ഉത്പാദനത്തില്‍ മുന്നിലുള്ള ഇന്തോനേഷ്യ, ഫിലിപ്പൈന്‍സ്, ശ്രീലങ്ക എന്നിവിടങ്ങളില്‍നിന്ന് ഇറക്കുമതി നടത്തി വില നിയന്ത്രിക്കണമെന്നാണ് വ്യാപാരികളുടെ ആവശ്യം.

മീനച്ചിലാറ്റിലെ ജലനിരപ്പ് അളന്ന്, മഴയെ പഠിച്ച് നദിയോര കൂട്ടായ്മ

റെജി ജോസഫ് കോട്ടയം: മീനച്ചില്‍ നദീ സംരക്ഷണ സമിതിയുടെ കാലാവസ്ഥാ നിരീക്ഷണ കൂട്ടായ്മ മഴപ്പെയ്ത്തും പുഴയിലെ ജലനിരപ്പും അളന്നു നിരീക്ഷിക്കുന്ന ജാഗ്രതയിലാണ്. വാഗമണ്‍ മുതല്‍ കുമരകം വരെ 170 കിലോമീറ്റര്‍ ദൂരം ജലനിരപ്പ് മീനച്ചില്‍ റെയിന്‍ ആന്‍ഡ് റിവര്‍ മോനിട്ടറിംഗ് നെറ്റ്‌വര്‍ക്ക് ദിവസവും കുറിച്ച് സര്‍ക്കാര്‍ സംവിധാനങ്ങളെയും പ്രദേശവാസികളെയും അറിയിക്കുന്നുണ്ട്. പെയ്യുന്ന മഴയും അത് മീനച്ചിലാറ്റിലെ ജലനിരപ്പിലുണ്ടാക്കുന്ന വ്യതിയാനവുമാണ് ഇവരുടെ പ്രധാന പഠനവിഷയം. ഇതിനായി മീനച്ചിലാറ്റിലും മറ്റു പ്രധാന കേന്ദ്രങ്ങളിലും സ്ഥാപിച്ച റിവര്‍ ഗേജുകളിലൂടെയും വീടുകള്‍ക്ക് മുകളില്‍ സ്ഥാപിച്ച ഇരുനൂറോളം റെയിന്‍ ഗേജുകളിലൂടെയാണ് പുഴ, മഴ നിരീക്ഷണം. മീനച്ചിലാറ്റിലെ ഏഴ് പാലങ്ങളിലും വലിയ പാറകളിലും സ്‌കെയിലുകള്‍ വരച്ച് ജലനിരപ്പ് അറിയിക്കുന്നതില്‍ സര്‍ക്കാര്‍ സംവിധാനങ്ങള്‍ക്കും ഈ കൂട്ടായ്മ കരുതലായിരിക്കുന്നു. ഇരുനൂറു പേരുടെ കൂട്ടായ്മയില്‍ 120 പേര്‍ സ്‌കൂള്‍ വിദ്യാര്‍ഥികളാണ്. എല്ലാവരും വീടുകളില്‍ സ്ഥാപിച്ച മഴമാപിനി നിരീക്ഷിച്ച് മഴയുടെ അളവ് വാട്‌സ് ആപ്പില്‍ നല്‍കും. കാലാവസ്ഥാ നിരീക്ഷണവകുപ്പിനു പോലും സാധിക്കാത്ത ജാഗ്രതയില്‍ കാലാവസ്ഥ അറിയിക്കുന്നവരുടെ പ്രാദേശിക കൂട്ടായ്മയാണ് മീനച്ചില്‍ റെയിന്‍ ആന്‍ഡ് റിവര്‍ മോനിട്ടറിംഗ് നെറ്റ്‌വര്‍ക്ക്. ‌ കാലാവസ്ഥാ വ്യതിയാനം രൂക്ഷമാവുകയും മേഘവിസ്‌ഫോടനം പോലുള്ള പ്രതിഭാസം സാധാരണമാവുകയും ചെയ്യുന്നതിനാല്‍ ഇവരുടെ പ്രവര്‍ത്തനത്തിന് പ്രസക്തിയേറുകയാണ്. മീനച്ചിലാറ്റില്‍ ജലനിരപ്പ് ഉയര്‍ന്നാല്‍ കുമരകത്തും കോട്ടയത്തിന്‍റെ പ്രാന്തപ്രദേശങ്ങളിലും എത്ര തോതില്‍ പ്രളയക്കെടുതിയുണ്ടാകുമെന്ന് ഇവര്‍ക്ക് നിരീക്ഷിക്കാനാകും. ജനങ്ങള്‍ എന്തൊക്കെ ജാഗ്രത പുലര്‍ത്തണം എന്നത് ഇവര്‍ വാട്‌സ് ആപ്പില്‍ അറിയിക്കുകയും ചെയ്യും. മഴക്കാലത്ത് രൗദ്രഭാവത്തില്‍ കുത്തിയൊഴുകുന്ന മീനച്ചില്‍ പുഴയോര വാസികള്‍ക്ക് വലിയ സഹായമാണ് ഇവരുടെ സേവനം. സിറ്റിസണ്‍സ് സയന്‍സ് എന്ന നിലയില്‍ ഈ സംരംഭത്തിന് പ്രസക്തിയേറെയാണെന്നും സേവനം കൂടുതല്‍ വിപുലീകരിക്കുമെന്നും കൂട്ടായ്മയുടെ കോ-ഓര്‍ഡിനേറ്റര്‍ എബി പൂണ്ടിക്കുളം പറഞ്ഞു. മഴ മാത്രമല്ല തെര്‍മോമീറ്റലൂടെ താപനിലയും ഇവര്‍ നിരീക്ഷിക്കുന്നുണ്ട്. ഓരോ ദിവസത്തെയും കൂടിയതും കുറഞ്ഞതുമായ താപനിലയും അന്തരീക്ഷ ഈർപ്പവും നിരീക്ഷിക്കും. നിരീക്ഷണങ്ങളുടെ ശരാശരി ഇതിനായി ചുമതലപ്പെട്ടവര്‍ വിലയിരുത്തി വാട്‌സ് ആപ്പിലൂടെ കൈമാറും. വോളണ്ടിയര്‍മാര്‍ അളന്നെടുക്കുന്ന മഴവെള്ളത്തിലൂടെ ഒരു പഞ്ചായത്തില്‍ പെയ്ത മഴയുടെ അളവ് കൃത്യമായി എടുക്കാം. വിവിധ ഇടങ്ങളില്‍നിന്നുള്ള വിവരങ്ങള്‍ എത്തുന്നതോടെ അലര്‍ട്ടുകളും നിര്‍ദേശങ്ങളും വാട്‌സ്ആപ്പ് കമ്യൂണിറ്റിയിലൂടെ ജനങ്ങളിലെത്തിക്കും. 2015 മുതല്‍ ഉണ്ടായിരുന്ന കൂട്ടായ്മ 2018ലെ പ്രളയകാലത്താണ് പൂര്‍ണതോതില്‍ പ്രവര്‍ത്തിച്ചു തുടങ്ങിയത്. മഴയുടെ ആശങ്ക ഓരോ വര്‍ഷവും കൂടുമ്പോള്‍ മഴ അലര്‍ട്ടുകള്‍ മാത്രമല്ല പ്രകൃതിസംരക്ഷണ പദ്ധതികളും ആവിഷ്‌കരിച്ച് വരികയാണ് ഈ നദിയോര നിരീക്ഷണ കൂട്ടായ്മ.

നാട്ടുമീനുകളുടെ രുചിയിൽ മഴക്കാലം

കോട്ടയം: മഴക്കാലം തീന്‍മേശയില്‍ നാട്ടുമീനുകളുടെ രുചിക്കാ ലം. കടല്‍, കായല്‍ മത്സ്യങ്ങള്‍ക്ക് ഇടവേള നല്‍കി എല്ലാവരും നാട്ടുമീനുകള്‍ക്കു പിന്നാലെയാണ്. പുതുവെള്ളമത്തെി പാടവും തോടും കനാലുമൊക്കെ നിറഞ്ഞതോടെ മീന്‍പിടിത്തവും തകൃതിയാണ്. മഞ്ഞക്കൂരിയും പുല്ലനും വാളയും കാരിയുമൊക്കെയാണ് നാട്ടുമീന്‍വിപണയിലെ താരങ്ങള്‍. മഴക്കാലത്തിന്‍റെ ആരംഭത്തില്‍ നാടന്‍ മത്സ്യങ്ങളുടെ ലഭ്യത കൂടുതലാണ്. ഈ സമയത്ത് ഇതിന് ആവശ്യക്കാരുമേറെയാണ്. കല്ലട, വരാല്‍, കാരി, മഞ്ഞക്കൂരി, പുല്ലന്‍, മുരശ്, കുറുവ, വയമ്പ്, വാള, കണ്ണി, പരല്‍, പ്രാഞ്ഞില്‍, ആരാന്‍ തുടങ്ങിയ മത്സ്യങ്ങളാണ് വ്യാപകമായി വില്‍ക്കുന്നത്. കല്ലട-200, വരാല്‍- 350, കാരി- 300, പുല്ലന്‍-80, മുരശ്-380, കുറുവ-160, വയമ്പ്-100, വാള- 350, കണ്ണി -180,പരല്‍- 150, പ്രാഞ്ഞില്‍- 200, ആരോന്‍-180. എന്നിങ്ങനെയാണ് കിലോഗ്രാമിനു വില. കുമരകത്തും പടിഞ്ഞാറന്‍ മേഖലയിലെ വിവിധ പ്രദേശങ്ങളിലും നാട്ടുമീന്‍ വില്‍പന തകൃതിയാണ്. ഏറ്റുമാനൂര്‍-പാലാ റോഡില്‍ കട്ടച്ചിറ മാവിന്‍ചുവടിനു സമീപമാണ് നാട്ടുമീനുകളുലെ വലിയ മാര്‍ക്കറ്റ്. ഇവിടെ നിരവധി മീന്‍പിടിത്തക്കാരാണ് റോഡിലിട്ട് മീന്‍ വില്‍ക്കുന്നത്. യാത്രക്കാര്‍ വാഹനങ്ങള്‍ നിര്‍ത്തി മീന്‍ വാങ്ങിയാണ് പോകുന്നത്. നാട്ടുമീന്‍ ഇവിടെ വില്‍പ്പനയുണ്ടെന്നറിഞ്ഞ് ദൂരെനിന്നുപോലും ധാരാളം ആളുകള്‍ എത്തുന്നുണ്ട്.

കുറവിലങ്ങാട് മുത്തിയമ്മയ്ക്കരികിൽ അവർ അണിനിരന്നു; ദൈവമാതാവിന്‍റെ വ്യത്യസ്ത വേഷഭാവങ്ങളിൽ

കുറവിലങ്ങാട്: മരിയൻ പ്രത്യക്ഷീകരണങ്ങളുടെ ദൃശ്യവിരുന്നൊരുക്കി കുറവിലങ്ങാട് മേജർ ആർക്കി എപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന ഇടവകയിലെ എസ്എംവൈഎം യൂണിറ്റ്. മേയ്മാസ വണക്കാചരണത്തിന്‍റെ സമാപനത്തോടനുബന്ധിച്ചായിരുന്നു മരിയഭക്തിയുടെ വേറിട്ട പ്രചരണം. ഇടവകയിലെ 28 വാർഡുകളിൽനിന്ന് തെരഞ്ഞെടുക്കപ്പെട്ട 28 പേരും രണ്ട് എസ്എംവൈഎം അംഗങ്ങളും ചേർന്ന് 30 സ്ഥലങ്ങളിലെ മരിയൻ പ്രത്യക്ഷീകരണദൃശ്യങ്ങളാണ് സമ്മാനിച്ചത്. കേട്ടും കണ്ടുമറിഞ്ഞിട്ടുള്ള മാതൃ പ്രത്യക്ഷീകരണങ്ങളെ നേരിൽ കണ്ട സന്തോഷത്തിലായിരുന്നു തീർഥാടകരടക്കമുള്ള വിശ്വാസീസമൂഹം. കുറവിലങ്ങാട്, വേളാങ്കണ്ണി, വല്ലാർപാടം, കൊരട്ടി, ഗാഡലൂപ്പ, ഫാത്തിമ, ലൂർദ് എന്നിങ്ങനെ വിവിധ സ്ഥലങ്ങളുടെ പേരിൽ അറിയിപ്പെടുന്ന മാതാവിന്‍റെ രൂപങ്ങളും വ്യാകുലമാതാവ്, കർമലമാതാവ്, നിത്യസഹായമാതാവ്, റോസ മിസ്റ്റിക്ക എന്നിങ്ങനെ വ്യത്യസ്ത വിളിപ്പേരുകളിൽ അറിയപ്പെടുന്ന മാതാവിന്‍റെ വേഷവിധാനങ്ങളുമായുള്ളവരും പങ്കെടുത്തു. മാതാവിന്‍റെ വേഷധാരികളായി എത്തിയവരെല്ലാം ഇടവക ദേവാലയത്തിൽനിന്ന് ജൂബിലി കപ്പേളയിലേക്ക് നടന്ന ജപമാല പ്രദക്ഷിണത്തിലും പങ്കെടുത്തു. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, സീനിയർ അസി. വികാരി ഫാ. ജോസഫ് മണിയഞ്ചിറ, അസി. വികാരിമാരായ ഫാ. പോൾ കുന്നുംപുറത്ത്, ഫാ. ആന്‍റണി വാഴക്കാലായിൽ, ഫാ. ജോസഫ് ചൂരയ്ക്കൽ, ഫാ. തോമസ് താന്നിമലയിൽ, പാസ്റ്ററൽ അസി. ഫാ. ജോസ് കോട്ടയിൽ എന്നിവർ തിരുക്കർമങ്ങളിൽ കാർമികരായി. എസ്എംവൈഎം ഡയറക്ടർ ഫാ. ജോസഫ് ചൂരയ്ക്കൽ, ജോയിന്‍റ് ഡയറക്ടർ സിസ്റ്റർ അമൽ ജോ, ഭാരവാഹികളായ സെബാസ്റ്റ്യൻ പൊയ്യാനി, അലാൻ ബെന്നി, എബിൻ സജി, നേഹ ലിജു തുടങ്ങിയവർ നേതൃത്വം നൽകി.

മാന്നാനം പള്ളിയിൽ പിടിയരി ഊണ് പുനരാരംഭിച്ചു

മാന്നാനം: ദരിദ്രരെയും അഗതികളെയും സംരക്ഷിക്കാനും അവരെ സമൂഹത്തിന്‍റെ മുഖ്യധാരയിലേക്ക് നയിക്കാനും യത്നിച്ച വിശുദ്ധ ചാവറയച്ചന്‍റെ സ്മരണയിൽ മാന്നാനം സെന്‍റ് ജോസഫ്സ് ആശ്രമ ദേവാലയത്തിൽ പിടിയരി ഊണ് പുനരാരംഭിച്ചു. എല്ലാ ശനിയാഴ്ചകളിലും രാവിലെ 11ന് വിശുദ്ധ കുർബാനയ്ക്കും നൊവേനയ്ക്കും ശേഷം പിടിയരി ഊണ് വിതരണം നടക്കും. സിഎംഐ തിരുവനന്തപുരം പ്രോവിൻസിന്‍റെ പ്രൊവിൻഷൽ ഫാ. ആന്‍റണി ഇളംതോട്ടത്തിന്‍റെ ആശീർവാദ പ്രാർഥനയോടെയാണ് പിടിയരി ഊണിന് തുടക്കമായത്. വിശുദ്ധ ചാവറ കുര്യാക്കോസ് ഏലിയാസച്ചന്‍റെ ആഹ്വാനപ്രകാരം വീടുകളിൽ ഭക്ഷണം തയാറാക്കുന്ന ഓരോ സമയത്തും ഒരുപിടി അരി വീതം മാറ്റിവയ് ക്കുകയും ഓരോ മാസാവസാനവും വീടുകളിൽനിന്ന് ഈ പിടിയരി ശേഖരിച്ച് പാവപ്പെട്ടവരെ സഹായിക്കാനും സ്കൂളുകളിൽ ഉച്ചഭക്ഷണം നല്കാനുമായി ഉപയോഗിക്കുകയും ചെയ്തിരുന്നു. വിശുദ്ധ ചാവറപ്പിതാവിനോടുള്ള മാധ്യസ്ഥ്യപ്രാർഥനക്കായി ഓരോ പിടി അരി വീതം നിയോഗത്തോടെ സമർപ്പിച്ച് പ്രാർഥിക്കുന്ന രീതി മാന്നാനം ആശ്രമ ദേവാലയത്തിലുണ്ട്. ഈ പിടിയരി പ്രാർഥന നേർച്ചയിൽനിന്നുള്ള വരുമാനമാണ് പിടിയരി ഊണ് വിതരണത്തിനായി ഉപയോഗിച്ചുവരുന്നത്.

മഴയ്ക്കു ശമനം; പടിഞ്ഞാറ് ദുരിതം തുടരുന്നു

കോട്ടയം: മഴയ്ക്കു ശമനമായി. മാനം തെളിഞ്ഞു. ഇന്നലെ പകല്‍ ജില്ലയില്‍ ഒരിടത്തും കാര്യമായ മഴ പെയ്തില്ല. ഇതോടെ വെള്ളപ്പൊക്ക ഭീതിയും ഒഴിഞ്ഞു. മഴയ്ക്കു ശമനമായെങ്കിലും ജില്ലയുടെ പടിഞ്ഞാറന്‍ മേഖലയില്‍നിന്ന് വെള്ളം പൂര്‍ണമായും ഇറങ്ങിയിട്ടില്ല. വേമ്പനാട്ടുകായലില്‍ ചെളിയും മണ്ണും നിറഞ്ഞതും പോള നിറഞ്ഞ തോടുകളും മണ്ണിട്ടുയര്‍ത്തിയ പാടങ്ങളുമാണ് മഴ മാറിയിട്ടും വെള്ളം ഇറങ്ങാന്‍ മടിക്കുന്നത്. വെള്ളം ഇറങ്ങാന്‍ ദിവസങ്ങള്‍ എടുക്കുന്നതോടെ പടിഞ്ഞാറന്‍ മേഖലയില്‍ ദുരിതം തുടരുകയാണ്. കോട്ടയം, വൈക്കം, ചങ്ങനാശേരി താലൂക്കുകളിലെ പടിഞ്ഞാറന്‍ പഞ്ചായത്തുകളിലെ താഴ്ന്ന പ്രദേശങ്ങളാണ് ഇപ്പോഴും വെള്ളത്തിലാണ്. സാധാരണ, മഴ മാറി പിറ്റേന്ന് മുതല്‍ അതിവേഗം ഇറങ്ങുന്ന വെള്ളം ഇത്തവണ ഇറങ്ങാന്‍ വൈകുന്നത് ജനങ്ങളിലും ആശങ്ക വര്‍ധിപ്പിച്ചിട്ടുണ്ട്. കോട്ടയം താലൂക്കില്‍ മണര്‍കാട്, അയര്‍ക്കുന്നം, വിജയപുരം, തിരുവാര്‍പ്പ്, അയ്മനം, ആര്‍പ്പൂക്കര, കുമരകം പഞ്ചായത്തുകളുടെയും കോട്ടയം, ഏറ്റുമാനൂര്‍ നഗരസഭയുടെയും താഴ്ന്ന പ്രദേശങ്ങള്‍ വെള്ളത്തിനടയിലാണ്. നീണ്ടൂര്‍, കല്ലറ, തലയാഴം, വെച്ചൂര്‍ പഞ്ചായത്തുകളിലും സമാന ദുരിതം അനുഭവപ്പെടുന്നു. ചങ്ങനാശേരി താലൂക്കില്‍ കുറിച്ചി, വാഴപ്പള്ളി പഞ്ചായത്തുകളിലെ താഴ്ന്ന പ്രദേശങ്ങളിലും വെള്ളക്കെട്ട് തുടരുകയാണ്. റോഡുകളില്‍ കയറിയ വെള്ളം ഇറങ്ങിത്തുടങ്ങിയെങ്കിലും നൂറുകണക്കിനു വീടുകളില്‍ ഇപ്പോഴും വെള്ളമുണ്ട്. മീനച്ചിലാറും മണിമലയാറും തെളിഞ്ഞൊഴുകി തുടങ്ങിയെങ്കിലും ജലനിരപ്പ് കാര്യമായി താഴ്ന്നിട്ടില്ല. വേമ്പനാട്ടുകായല്‍ വെള്ളമുൾക്കൊള്ളാൻ മടിക്കുന്നതാണ് ജലനിരപ്പ് കുറയാത്തതിനുകാരണം. കായലില്‍നിന്നു കടലിലേക്ക് പോകുന്ന വെള്ളത്തിന്‍റെ അളവും മാര്‍ഗങ്ങളും കുറഞ്ഞതു തിരിച്ചടിയായി. കായലിന്‍റെ അടിത്തട്ടില്‍ ചെളി അടിഞ്ഞതോടെ സംഭരണശേഷിയും കുറഞ്ഞു. ദുരിതാശ്വാസ ക്യാമ്പുകള്‍ പ്രവര്‍ത്തിക്കുന്ന വിദ്യാഭ്യാസ സ്ഥാപനങ്ങള്‍ക്ക് അവധി കോട്ടയം: ജില്ലയില്‍ ദുരിതാശ്വാസ ക്യാമ്പുകള്‍ പ്രവര്‍ത്തിക്കുന്ന വിദ്യാഭ്യാസ സ്ഥാപനങ്ങള്‍ക്ക് ഇന്ന് അവധി പ്രഖ്യാപിച്ച് ജില്ലാ കളക്ടര്‍ ജോണ്‍ വി. സാമുവല്‍ ഉത്തരവായി. ദുരിതാശ്വാസ ക്യാമ്പുകളായി പ്രവര്‍ത്തിക്കുന്ന സ്‌കൂളുകളിലെ പ്രവേശനോത്സവം ക്യാമ്പ് അവസാനിക്കുന്നതിന്‍റെ അടുത്ത പ്രവൃത്തിദിവസം നടത്തണമെന്നും സ്‌കൂള്‍ പരിസരത്തും ക്ലാസ് മുറികളിലും ശുചിമുറികളിലും ഇഴജന്തുക്കളുടെയും മറ്റും ശല്യം ഇല്ലെന്ന് ഉറപ്പാക്കണമെന്നും ഉത്തരവില്‍ പറയുന്നു. ജില്ലയില്‍ 66 ദുരിതാശ്വാസ ക്യാമ്പുകള്‍ കോട്ടയം: കനത്ത മഴ, വെള്ളപ്പൊക്കം എന്നിവയെത്തുടര്‍ന്ന് ജില്ലയില്‍ 679 കുടുംബങ്ങളെ സുരക്ഷിത കേന്ദ്രങ്ങളിലേക്ക് മാറ്റി. ജില്ലയില്‍ 66 ദുരിതാശ്വാസ ക്യാമ്പുകളാണ് പ്രവര്‍ത്തിക്കുന്നത്. 2,289 പേരാണ് ക്യാമ്പുകളിലുള്ളത്. 995 സ്ത്രീകളും 925 പുരുഷന്മാരും 369 കുട്ടികളുമുണ്ട്.

ഓപ്പൺ ജിം സ്ഥാപിച്ചു; പക്ഷേ, സൗകര്യങ്ങളിനിയും വേണം

എലിക്കുളം: എലിക്കുളം പഞ്ചായത്തിന്‍റെ ഇളങ്ങുളത്തെ ഹാപ്പിനെസ് പാർക്കിൽ ഓപ്പൺ ജിമ്മിന്‍റെ ഉദ്ഘാടനം നാലിന് നടത്തുമെങ്കിലും ഇനിയുമേറെ സൗകര്യങ്ങളൊരുങ്ങണം. ഉപകരണങ്ങൾ സ്ഥാപിച്ചെങ്കിലും പാർക്ക് കാടുവളർന്ന് വൃത്തിഹീനമായ നിലയിലാണ്. ഉദ്ഘാടനത്തിന് മുന്പ് കാടുതെളിക്കുമെന്ന് അധികൃതർ വിശദീകരിച്ചെങ്കിലും തറ ടൈൽ പാകുന്നതിന് നിലവിൽ ഫണ്ടില്ല. മഴക്കാലമായതിനാൽ ദിവസങ്ങൾക്കുള്ളിൽ വളപ്പിൽ വീണ്ടും കാടുകയറും. ഇതിനിടയിൽ വയോജനങ്ങൾ ഉൾപ്പെടെയുള്ളവർക്ക് ഓപ്പൺ ജിം ഉപയോഗിക്കുന്നത് സുഗമമാവില്ല. മഴക്കാലത്ത് ഇവിടെ ചെളി നിറയുകയും ചെയ്യും. ചെളിയിൽ ചവിട്ടി ഉപകരണങ്ങൾ ഉപയോഗിക്കുന്നതോടെ അവയുടെ നാശത്തിനും ഇതുകാരണമാകും. കൂടാതെ മേൽക്കൂര കൂടി സ്ഥാപിച്ചില്ലെങ്കിൽ മഴക്കാലത്തെ ജിം ഉപയോഗം ബുദ്ധിമുട്ടിലാവും.

റബർ മരങ്ങൾ വൈദ്യുതി ലൈനിലേക്ക് ചാഞ്ഞു നിൽക്കുന്നത് ഭീഷണിയാവുന്നു

പൊൻകുന്നം: റബർ മരങ്ങൾ വൈദ്യുതിലൈനിലേക്ക് ചാഞ്ഞു നിൽക്കുന്നത് ഭീഷണിയാവുന്നു. 20ാം മൈൽ പുളിക്കൽ ഗേറ്റ് - പന്നിക്കുഴി റോഡിലാണ് റബർ മരങ്ങൾ ഭീഷണിയാകുന്നത്. ചെറിയ കാറ്റ് വീശിയാൽ പോലും വൈദ്യുതി പോകുന്ന അവസ്ഥയാണ് പ്രദേശത്ത്. കഴിഞ്ഞ ദിവസം ലൈനിൽ മരം വീണതിനെത്തുടർന്ന് മൂന്നു ദിവസത്തോളം വൈദ്യുതിയില്ലായിന്നു. ഭീഷണിയുള്ള മരങ്ങൾ വെട്ടിമാറ്റണമെന്നാവശ്യപ്പെട്ട് പ്രദേശവാസികൾ ചിറക്കടവ് പഞ്ചായത്ത് സെക്രട്ടറിക്കും വാർഡ് മെംബർക്കും കഴിഞ്ഞദിവസം പരാതി നൽകിയിരുന്നു. എന്നാൽ, ഇരുവരെ നടപടിയായിട്ടില്ലെന്നു നാട്ടുകാർ ആരോപിക്കുന്നു. അപകടാവസ്ഥയിൽ നിൽക്കുന്ന മരങ്ങൾ എത്രയും വേഗം വെട്ടി നീക്കം ചെയ്യണമെന്ന് നാട്ടുകാർ ആവശ്യപ്പെട്ടു.

ഓടിക്കൊണ്ടിരുന്ന കാറിനു തീപിടിച്ചു

പെരുവന്താനം: കൊട്ടാരക്കര - ദിണ്ഡികൽ ദേശീയപാതയിൽ ചുഴുപ്പിനു സമീപം ഓടിക്കൊണ്ടിരുന്ന കാറിന് തീപിടിച്ച് അപകടം. ആർക്കും പരിക്കില്ല. കൊല്ലം പുത്തൂർ സ്വദേശി അഭിജിത്തിന്‍റെ കാറാണ് കത്തി നശിച്ചത്. ഇന്നലെ പുലർച്ചെ 2.15ാടെയാണ് സംഭവം. വാഹനത്തിൽ നിന്നു ചൂടും പുകയും ഉയരുന്നതു ശ്രദ്ധയിൽപ്പെട്ടതോടെ വാഹനം നിർത്തി യാത്രക്കാർ പുറത്തിറങ്ങുകയായിരുന്നു. തൊട്ടുപിന്നാലെ വാഹനം പൂർണമായും അഗ്നിക്കിരയായി. പ്രദേശവാസികൾ അറിയിച്ചതിനെ തുടർന്ന് പീരുമേട് ഫയർഫോഴ്സ് സ്ഥലത്തെത്തി തീ അണച്ചു. വാഹനം പൂർണമായും കത്തി നശിച്ചു. അപകടത്തെത്തുടർന്ന് തടസപ്പെട്ട ഗതാഗതം പുലർച്ചെ നാലോടെ പുനഃസ്ഥാപിച്ചു. കുട്ടിക്കാനത്തിനും മുണ്ടക്കയത്തിനുമിടയിൽ മുന്പും സമാനമായ രീതിയിൽ വാഹനങ്ങൾ ഓട്ടത്തിനിടെ കത്തി നശിച്ചിട്ടുണ്ട്.

ഇൻവെർട്ടർ ബൾബുകളും പഠനോപകരണങ്ങളും വിതരണം ചെയ്തു

കണമല: പമ്പാവാലി വനാതിർത്തിയിലെ എക്കോ ഡവലപ്പ്മെന്‍റ് കമ്മിറ്റി അംഗങ്ങളായ മുഴുവൻ കുടുംബങ്ങൾക്കും ഇൻവെർട്ടർ ബൾബുകളും വിദ്യാർഥികൾക്ക് പഠനോപകരണങ്ങളും വനം വകുപ്പിന്‍റെ നേതൃത്വത്തിൽ സൗജന്യമായി വിതരണം ചെയ്തു. നോട്ട് ബുക്ക്, കുട, വാട്ടർ ബോട്ടിൽ, പേന, പെൻസിൽ, ബോക്സ്‌, ടിഫിൻ ബോക്സ്‌, നെയിം സ്ലിപ് എന്നിവയാണ് പഠനോപകരണങ്ങളായി നൽകിയത്. എയ്ഞ്ചൽവാലി നേച്ചർ എഡ്യൂക്കേഷൻ സെന്‍ററിൽ നടന്ന ചടങ്ങിൽ പെരിയാർ ടൈഗർ റിസർവ് വെസ്റ്റ് ഡിവിഷനിലെ നിരവധി കുടുംബങ്ങൾ പങ്കെടുത്തു. പമ്പ ഫോറസ്റ്റ് റേഞ്ച് ഓഫീസർ എം.കെ. മുകേഷ് ഉദ്ഘാടനം നിർവഹിച്ചു. ശബരിമല സന്നിധാനം ഫോറസ്റ്റ് ഡപ്യൂട്ടി റേഞ്ച് ഓഫീസർ അനിൽ ചക്രവർത്തി, മുക്കുഴി ഡപ്യൂട്ടി റേഞ്ച് ഓഫീസർ കെ. ജയപ്രകാശ്, ഡിവിഷൻ കോഓർഡിനേറ്റർ നയന വിശ്വൻ, അജിൻ ഹാമിലിട്ടൻ, ഷാജി മുക്കാലി, റേഞ്ച് കോഓർഡിനേറ്റർമാരായ ബി. വിനീത്, പ്രശാന്ത് രാജ്, പമ്പ, അഴുത റേഞ്ച് ഓഫീസുകളിലെ ജീവനക്കാർ, ഇഡിസി അംഗങ്ങൾ എന്നിവർ പങ്കെടുത്തു.

ക്‌നാനായ കത്തോലിക്ക കോൺഗ്രസ് കർഷക അവാർഡുകൾ സമ്മാനിച്ചു

ഉഴവൂർ: ക്‌നാനായകത്തോലിക്ക കോൺഗ്രസ് കർഷക ഫോറം മികച്ച കർഷകർക്ക് ഏർപ്പെടുത്തിയ കീപ്പാറയിൽ കുരുവിള മെമ്മോറിയൽ അവാർഡ് വിതരണം ചെയ്തു. മികച്ച കർഷകൻ അരീക്കര ഇടവകാംഗം ചുമ്മാർ പുത്തൻപുരയെ ഫൊറോന വികാരി ഫാ. അലക്‌സ് ആക്കപ്പറമ്പിൽ ആദരിച്ചു. മികച്ച കർഷക ഉഴവൂർ ഇടവകാംഗം മേഴ്‌സി സിറിയക്കിനെ കർഷക ഫോറം രൂപത ചെയർമാൻ എം.സി. കുര്യാക്കോസും, കാർഷിക രംഗത്ത് മികച്ച സംഭാവന നൽകിയ പുതുവേലി ഇടവകാംഗം ജോർജ് കൊറ്റംകൊമ്പിലിനെ കെസിസി ഉഴവൂർ ഫൊറോന പ്രസിഡന്‍റ് എബ്രാഹം വെളിയത്തും ആദരിച്ചു. കർഷക ഫോറം ഫൊറോന ജോയിന്‍റ് കൺവീനർ തോമസ് മുളക്കൽ അധ്യക്ഷത വഹിച്ചു. കെസിസി ഫൊറോന വൈസ് പ്രസിഡന്‍റ് ഷെറി മാത്യു, സെക്രട്ടറി ഫിലിപ്പ് പുള്ളോലിൽ, യൂണിറ്റ് പ്രസിഡന്‍റ് വി.സി. സിറിയക്, സെക്രട്ടറി സജി ഒറ്റത്തെങ്ങാടി എന്നിവർ പ്രസംഗിച്ചു.

മരം വൈദ്യുതി ലൈനില്‍; വഴിയാത്രക്കാരുടെ നെഞ്ചില്‍ തീയാണ്

പൈക: കെഎസ്ഇബി കൈമലര്‍ത്തിയതോടെ ഏഴാംമൈല്‍ - പാമ്പോലി റോഡില്‍ സഞ്ചരിക്കുന്ന യാത്രക്കാരുടെ നെഞ്ചില്‍ തീയാണ്. ഒരാഴ്ചയായി വൈദ്യുതി ലൈനിലേക്ക് തേക്കു മരം വീണു ചരിഞ്ഞു നില്ക്കുകയാണ്. പഞ്ചായത്തംഗം ഇക്കാര്യം കെഎസ്ഇബി അധികൃതരെ വിളിച്ച് പല തവണ അറിച്ചെങ്കിലും ഫലമുണ്ടായില്ല. സ്‌കൂള്‍ വാഹനങ്ങള്‍ ഉള്‍പ്പടെ നിരവധി വാഹനങ്ങളും ധാരാളം കാല്‍നടയാത്രക്കാരും സഞ്ചരിക്കുന്ന വഴിയാണിത്. ഈ തേക്കു മരം നിലം പതിച്ചാല്‍ നാല് വൈദ്യുതി പോസ്റ്റുകള്‍ ഉള്‍പ്പടെ നിലം പൊത്തും. കൂടാതെ പ്രദേശത്ത് ദിവസങ്ങളോളം വൈദ്യുതി മുടങ്ങുകയും ചെയ്യും. അപകടകരമായ ഈ അവസ്ഥയ്ക്ക് ബന്ധപ്പെട്ട അധികാരികള്‍ ഉടന്‍ തീരുമാനമുണ്ടാക്കണമെന്ന് പഞ്ചായത്തംഗം മാത്യൂസ് പെരുമനങ്ങാട് ആവശ്യപ്പെട്ടു. പൈക ഏഴാം മൈല്‍-പാമ്പോലി റോഡില്‍ വൈദ്യുതി ലൈനിലേക്കു വീണു കിടക്കുന്ന മരം.

പുതിയ പൈപ്പുകള്‍ സ്ഥാപിച്ചു

ഇടമറ്റം: ളാലം ബ്ലോക്ക് പഞ്ചായത്ത് 2024-25 ജനകീയസൂത്രണ പദ്ധതിയില്‍പ്പെടുത്തി കിഴപറയാര്‍ ജീവ കുടിവെള്ള പദ്ധതിയുടെ കാലപ്പഴക്കം മൂലം നശിച്ച പൈപ്പുകള്‍ മാറ്റി പുതിയവ സ്ഥാപിച്ചു. ബ്‌ളോക്ക് പഞ്ചായത്ത് മെംബര്‍ ഷിബു പൂവേലിയുടെ നിര്‍ദേശപ്രകാരം എട്ട് ലക്ഷം രൂപ മുടക്കിയാണ് പദ്ധതി പൂര്‍ത്തീകരിച്ചത്. നൂറു കുടുംബങ്ങള്‍ക്ക് കുടിവെള്ളമെത്തിക്കുന്ന പൈപ്പ് ലൈന്‍ സ്ഥാപിച്ചതിന്‍റെ ഉദ്ഘാടനം മാണി സി. കാപ്പന്‍ എംഎല്‍എ നിര്‍വഹിച്ചു. യോഗത്തില്‍ ബ്ലോക്ക് പഞ്ചായത്ത് അംഗം ഷിബു പൂവേലി അധ്യക്ഷത വഹിച്ചു. മീനച്ചില്‍ പഞ്ചായത്ത് പ്രസിഡന്‍റ് സോജന്‍ തൊടുക, ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍, വാര്‍ഡ് മെംബര്‍ നളിനി ശ്രീധരന്‍, സൊസൈറ്റി പ്രസിഡന്‍റ് ടോമി മഠത്തിനട്ട് , വിന്‍സന്‍റ് കണ്ടത്തില്‍ എന്നിവര്‍ പ്രസംഗിച്ചു.

ആശുപത്രിയുടെ തകര്‍ന്ന കവാടം കോണ്‍ക്രീറ്റ് ചെയ്ത് കൃപാ സാരഥി ഓട്ടോ തൊഴിലാളികള്‍

രാമപുരം: ആധുനിക രീതിയില്‍ നിർമാണം പൂര്‍ത്തീകരിച്ച രാമപുരം ഗവണ്‍മെന്‍റ് ആശുപത്രിയുടെ പൊളിഞ്ഞുകിടന്ന കവാടം കൃപാ സാരഥിയുടെ ഓട്ടോറിക്ഷാ തൊഴിലാളികള്‍ കോണ്‍ക്രീറ്റ് ചെയ്തു. റോഡില്‍ നിന്ന് ആശുപത്രിയിലേക്കു കയറുന്ന ഭാഗത്ത് മലിനജലം കെട്ടിക്കിടന്ന് കോണ്‍ക്രീറ്റ് കട്ടകള്‍ ഇളകിമാറുകയും വലിയൊരു കുഴി രൂപപ്പെടുകയും ചെയ്തിരുന്നു. രോഗികളുമായി വരുന്ന വാഹനങ്ങള്‍ ആശുപത്രിയിലേത്തു കയറ്റുവാന്‍ വളരെയേറെ ബുദ്ധിമുട്ട് അനുഭവിച്ചിരുന്നു. ഇതിനെതിരേ നിരവധി തവണ നാട്ടുകാര്‍ അധികാരികളോട് പരാതികള്‍ പറഞ്ഞെങ്കിലും നടപടി സ്വീകരിക്കാത്തതിനാലാണ് ഓട്ടോ തൊഴിലാളികള്‍ ഇവിടെ കോണ്‍ക്രീറ്റ് ചെയ്തത്. ഓട്ടോറിക്ഷാ തൊഴിലാളികളും ഈ കുഴിമൂലം ബുദ്ധിമുട്ട് അനുഭവിച്ചിരുന്നു. പാലാ കേന്ദ്രമായി പ്രവര്‍ത്തിക്കുന്ന സോഷ്യല്‍ വെല്‍ഫെയര്‍ സൊസൈറ്റിയുടെ കീഴില്‍ പ്രവര്‍ത്തിക്കുന്ന സംഘടനയാണ് കൃപാസാരഥി. രാഷ്ട്രീയത്തിനതീതമായി പ്രവര്‍ത്തിക്കുന്ന കൂട്ടായ്മയാണ് ഇത്. കൃപാ സാരഥി കോ-ഓര്‍ഡിനേറ്റര്‍ സിസ്റ്റര്‍ ബെറ്റ്സിയുടെ നിര്‍ദേശ പ്രകാരമാണ് കോണ്‍ക്രീറ്റ് ചെയ്തത്. കൃപാ സാരഥി പ്രസിഡന്‍റ് ബിജു അഗസ്റ്റ്യന്‍, സെക്രട്ടറി രാജു പായിക്കാട്ട്, ബിനു പൊരുന്നിക്കല്‍, സനല്‍ പായിക്കാട്ട്, നോബി മങ്കുഴിച്ചാലില്‍, ബോബി മേലേവീട്ടില്‍, അഖില്‍ ദാസ്, മോഹനന്‍ ചെട്ടിയാര്‍, അഭിലാഷ് വി, പ്രിന്‍സ് തോട്ടുങ്കല്‍, സിബി പള്ളിക്കുന്നേല്‍, അലക്സ് എന്‍.ഇ, ഷാജി വെള്ളച്ചാലില്‍, ജോബി വയലില്‍, സുഗതന്‍ പെരുമ്പ്രായില്‍ എന്നിവര്‍ നേതൃത്വം നല്‍കി.

സ്വീകരണം നൽകി

കുറവിലങ്ങാട്: എംജി സർവകലാശാല ബിഎ മലയാളം പരീക്ഷയിൽ ഒന്നാം റാങ്ക് നേടിയ വിവേക് വി. നായരെ കോളജ് അനുമോദിച്ചു. എൻഎസ്എസ് വോളണ്ടിയർ സെക്രട്ടറി, അസോസിയേഷൻ സെക്രട്ടറി എന്നീ നിലകളിലും വിവേക് പ്രവർത്തിച്ചിരുന്നു. കോളജ് മാനേജർ ആർച്ച് പ്രീസ്റ്റ് റവ. ഡോ. തോമസ് മേനാച്ചേരി ഉപഹാരമായി ലാപ്‌ടോപ്പ് വിവേകിന് സമ്മാനിച്ചു. പ്രിൻസിപ്പൽ ഡോ. സുനിൽ സി. മാത്യു അധ്യക്ഷത വഹിച്ചു. ബർസാർ ഫാ. ജോസഫ് മണിയൻചിറ, എൻഎസ്എസ് പ്രോഗ്രാം ഓഫീസർമാരായ റെനീഷ് തോമസ്, വിദ്യാ ജോസ് എന്നിവർ പ്രസംഗിച്ചു.

കടപ്പാട്ടൂരില്‍ നത്ത മഴയെ തുടര്‍ന്ന് കിണര്‍ ഇടിഞ്ഞു താണു

പാലാ: കനത്ത മഴയെ തുടര്‍ന്ന് കിണര്‍ ഇടിഞ്ഞു താണു. മുത്തോലി പഞ്ചായത്ത് ആറാം വാര്‍ഡ് തോയിക്കതോട്ടത്തില്‍ മോഹനന്‍ നായരുടെ വീട്ടുമുറ്റത്ത് ഉണ്ടായിരുന്ന കിണറാണ് കനത്ത മഴയെ തുടര്‍ന്ന് ഇടിഞ്ഞു താണത്. കിണറിന്‍റെ അരമതില്‍ ഉള്‍പ്പെടെയുള്ള ഭാഗം പൂര്‍ണമായും ഇടിഞ്ഞു വീണു. ഇന്നലെ രാവിലെ 11 ടെ വലിയ ശബ്ദത്തോടെ ഇടിഞ്ഞു താഴുകയായിരുന്നു.

സ്കില്‍ ഡവലപ്പ്മെന്‍റ് സെന്‍റര്‍ പ്രവർത്തനം ആരംഭിച്ചു

പൊൻകുന്നം: ഗവൺമെന്‍റ് വെക്കേഷണല്‍ ഹയർ സെക്കൻഡറി സ്കൂളിൽ പ്രവർത്തനം ആരംഭിച്ച സ്കില്‍ ഡവലപ്പ്മെന്‍റ് സെന്‍റര്‍ ചീഫ് വിപ്പ് ഡോ.എന്‍. ജയരാജ്‌ ഉദ്ഘാടനം ചെയ്തു. വാഴൂര്‍ ബ്ലോക്ക് പഞ്ചായത്ത് പ്രസിഡന്‍റ് മുകേഷ് കെ. മണി അധ്യക്ഷത വഹിച്ചു. പഞ്ചയത്ത് പ്രസിഡന്‍റ് സി.ആര്‍. ശ്രീകുമാർ, ജില്ലാ പഞ്ചായത്തംഗം ടി.എൻ. ഗിരീഷ് കുമാർ, പ്രിൻസിപ്പൽ എം.എച്ച്. നിയാസ്, കെ.ജെ. പ്രസാദ്, മിനി സേതുനാഥ്, സുമേഷ് ആൻഡ്രൂസ്, ആന്‍റണി മാർട്ടിൻ, ശ്രീലത സന്തോഷ്, ബിനു എബ്രഹാം, അജാസ് വാരിക്കാടൻ, പി.ജി. ജനീവ്, അന്‍സുദീന്‍ അഹമ്മദ്, എം.സി. രജനി, സലാഹുദീൻ, എ.പി. ബിജു, രതീഷ് ബി. നായർ, സൗമ്യ സുകുമാരൻ, ആശാ രാജു തുടങ്ങിയവർ പ്രസംഗിച്ചു. യുവജനങ്ങൾക്ക് തൊഴിൽ സാധ്യതയുടെ അറിവും നൈപുണ്യവും നൽകുക എന്ന ലക്ഷ്യത്തോടെ സ്റ്റാർസും സമഗ്ര ശിക്ഷ കേരളവും സംയുക്തമായി ഗവൺമെന്‍റ് സ്കൂളുകളിൽ നടപ്പാക്കുന്നതാണ് സ്കിൽ ഡവലപ്മെന്‍റ് സെന്‍റര്‍.

പതിവുതെറ്റിച്ചില്ല; മഴ പെയ്തു, ഉറവയായി, കംഫർട്ട് സ്റ്റേഷൻ അടച്ചു

കാഞ്ഞിരപ്പള്ളി: എല്ലാം പതിവു പോലെ തന്നെ. മഴ പെയ്തു, ഉറവയായി, കംഫർട്ട് സ്റ്റേഷൻ അടച്ചു, അധികൃതരുടെ വാക്കുകൾക്കും മാറ്റമില്ല. വർഷങ്ങളായി കാഞ്ഞിരപ്പള്ളി ബസ് സ്റ്റാൻഡിലെ അവസ്ഥ ഇതാണ്. തുടര്‍ച്ചയായി മഴ പെയ്താൽ കംഫർട്ട് സ്റ്റേഷനിൽ നിന്നുള്ള മലിനജലം ബസ് സ്റ്റാന്‍ഡിലൂടെ ഒഴുകി ദുര്‍ഗന്ധം വമിച്ചു തുടങ്ങും. അതിനാൽ മഴക്കാലത്ത് കംഫർട്ട് സ്റ്റേഷൻ അടച്ചിടുകയാണ് പതിവ്. 2010ല്‍ 25 വര്‍ഷത്തേക്ക് ബിഒടി അടിസ്ഥാനത്തില്‍ നിര്‍മിച്ച കംഫര്‍ട്ട് സ്റ്റേഷനാണ് മതിയായ സെപ്റ്റിക് ടാങ്കുകള്‍ ഇല്ലാത്തത്. ദിവസേന ദീർഘദൂരസർവീസുകളടക്കം ആയിരത്തിലധികം ബസുകള്‍ കടന്നു പോകുന്ന സ്റ്റാന്‍ഡില്‍ എത്തുന്ന യാത്രക്കാര്‍ക്കും ബസ് ജീവനക്കാര്‍ക്കും പ്രാഥമികാവശ്യങ്ങള്‍ക്ക് മറ്റ് മാര്‍ഗങ്ങളിലാത്ത അവസ്ഥയാണ്. സ്ത്രീകളാണ് ഏറ്റവും കൂടുതൽ ദുരിതം അനുഭവിക്കുന്നത്. പുരുഷൻമാരാകട്ടെ കംഫർട്ട് സ്റ്റേഷന്‍റെ സമീപത്തു തന്നെ ശങ്ക തീർക്കുന്ന സ്ഥിതിയാണ്. കംഫര്‍ട്ട് സ്റ്റേഷന്‍ സ്ഥിതി ചെയ്യുന്ന ഭാഗത്തെ ഉറവയാണ് പുതിയ മാലിന്യക്കുഴി നിര്‍മിക്കുന്നതിന് തടസമായി നില്‍ക്കുന്നതെന്ന് പഞ്ചായത്ത് അധികൃതര്‍ പറയുന്നു. പരിഹാരമായി പഞ്ചായത്ത് വാർഷിക പദ്ധതിയിൽ ഉൾപ്പെടുത്തി സീവേജ് ട്രീറ്റ്മെന്‍റ് പ്ലാന്‍റ് നിർമിക്കുന്നതിനുവേണ്ടി പദ്ധതി തയാറാക്കിയിട്ടുണ്ടെന്നും അംഗീകാരം ലഭിച്ചാൽ മഴക്കാലം കഴിയുന്പോൾ നിർമാണം ആരംഭിക്കുമെന്നും പഞ്ചായത്ത് അധികൃതർ അറിയിച്ചു.

ബസിന് അടിയിലേക്ക് സ്‌കൂട്ടര്‍ വീണു; യാത്രക്കാരി അദ്ഭുതകരമായി രക്ഷപ്പെട്ടു

പാലാ: സ്വകാര്യ ബസിന് അടിയിലേക്ക് വീണ സ്‌കൂട്ടറില്‍ നിന്നു യുവതി അദ്ഭുതകരമായി രക്ഷപ്പെട്ടു. പാലാ- വൈക്കം റൂട്ടില്‍ ആര്‍വി ജംഗ്ഷനില്‍ ഇന്നലെ ഉച്ചയ്ക്ക് 11.30 യോടെയായിരുന്നു അപകടം. പാലാ മരിയന്‍ ആശുപത്രിയിലെ ജീവനക്കാരിയായ മേരിലാന്‍ഡ് സ്വദേശിനി ആഷ് ആണ് അപകടത്തില്‍ നിന്നു രക്ഷപ്പെട്ടത്. നാല്‍ക്കവലയായ ആര്‍വി ജംഗ്ഷനില്‍ കൊട്ടാരമറ്റം ഭാഗത്തുനിന്നു വന്ന സ്വകാര്യ ബസ് ബൈപാസ് റോഡിലേക്ക് തിരിക്കുന്നതിനിടയില്‍ സ്‌കൂട്ടറില്‍ തട്ടുകയായിരുന്നു. സ്‌കൂട്ടര്‍ ബസിന്‍റെ അടിയിലേക്ക് വീണു. യുവതി മറുവശത്തേക്ക് വീണതിനാല്‍ രക്ഷപ്പെടുകയായിരുന്നു. അപകടത്തില്‍ യുവതിയുടെ കാലിന് സാരമായി പരിക്കേറ്റു. ഇവരെ സ്വകാര്യ ആശുപത്രിയില്‍ പ്രവേശിപ്പിച്ചു. അതേസമയം ആര്‍വി ജംഗ്ഷനില്‍ അപകടങ്ങള്‍ തുടര്‍ക്കഥയാവുകയാണ്. റൗണ്ടാന ഇല്ലാത്തതിനാല്‍ വാഹനങ്ങള്‍ കൂടുതല്‍ വലതുവശം ചേര്‍ന്ന് തിരിയുന്നതാണ് അപകടങ്ങള്‍ക്കിടയാക്കുന്നത്. ദിശാ സൂചകങ്ങളും ഇല്ല എന്ന പരാതിയും ഉയരുന്നുണ്ട്.

മൂന്നിലവ് കടപുഴയിൽ താത്ക്കാലിക പാലം നിർമിച്ച് നാട്ടുകാർ

മൂന്നിലവ്: പ്രളയത്തിൽ തകർന്ന കടപുഴ പാലത്തിനു പകരം നാട്ടുകാർ താത്ക്കാലിക പാലം പണിതു. മഴ ശക്തമാവുകയും മറുകരയിലുള്ളവര്‍ക്ക് മൂന്നിലവിലെത്താന്‍ കിലോമീറ്ററുകളോളം ചുറ്റേണ്ടിയും വന്നതോടെയാണ് ജനകീയ സഹകരണത്തോടെ തടികള്‍കൊണ്ടുള്ള താത്ക്കാലിക പാലം നിർമിച്ചത്. മീനച്ചിലാറിന്‍റെ കൈവഴിയായ മൂന്നിലവ് കടപുഴ ആറിനു കുറുകെയുള്ള പാലത്തിന് ബലക്ഷയം സംഭവിച്ചത് 2022 ലെ പ്രളയത്തിലാണ്. തുടർന്ന് ചെറു വാഹനങ്ങൾ മാത്രമാണ് ഇതു വഴി കടന്നുപോയിരുന്നത്. പിന്നീട് കഴിഞ്ഞ മാര്‍ച്ച് 11ന് ക്രെയിന്‍ കടന്നുപോയതിനെ തുടര്‍ന്ന് പാലത്തിന്‍റെ സ്ലാബുകള്‍ ആറ്റില്‍ വീണ് ഗതാഗതം പൂർണമായി സ്തംഭിച്ചു. തുടര്‍ന്ന് ആറ്റിലൂടെ ഇറങ്ങി കടക്കാവുന്ന തരത്തില്‍ പഞ്ചായത്ത് വഴി തയാറാക്കിയിരുന്നു. എന്നാൽ, മഴയെ തുടര്‍ന്ന് ഇത് ഇല്ലാതായി. രണ്ട് തവണയില്‍ കൂടുതല്‍ ഫണ്ട് അനുവദിക്കാനാവാത്തതിനാല്‍ ജനകീയ സഹകരണത്തോടെ പാലം നിര്‍മിക്കാന്‍ തീരുമാനിക്കുകയായിരുന്നു. എട്ടോളം തെങ്ങിന്‍തടികള്‍ ആറിന് കുറുകെ സ്ഥാപിച്ച് ഇതില്‍ പലകകള്‍ നിരത്തിയാണ് താത്ക്കാലിക നടപ്പാലം നിർമിച്ചത്. സ്‌കൂള്‍ തുറക്കുന്ന സാഹചര്യം കൂടി പരിഗണിച്ചാണ് അടിയന്തര നടപടി. അതേസമയം, പാലം പുനര്‍ നിര്‍മാണത്തിനുള്ള ഭരണാനുമതി ലഭിച്ചതായി പഞ്ചായത്ത് പ്രസിഡന്‍റ് ചാര്‍ലി ഐസക് പറഞ്ഞു. പാലം നിര്‍മിക്കണമെന്നാവശ്യപ്പെട്ട് പ്രദേശവാസിയായ വീട്ടമ്മ ഹൈക്കോടതിയില്‍ കൊടുത്ത ഹര്‍ജി പരിഗണിക്കവേ രണ്ടുമാസത്തിനുള്ളില്‍ അഡ്മിനിസ്‌ട്രേറ്റീവ് അനുമതി കൊടുക്കണമെന്ന് കോടതി ഉത്തരവിട്ടിരുന്നു. ജൂണ്‍ രണ്ടിന് ഈ ഹര്‍ജി വീണ്ടും പരിഗണിക്കാനിരിക്കവെയാണ് ഭരണാനുമതി ലഭിച്ചിരിക്കുന്നത്. മഴക്കാലം തീരുമ്പോള്‍ പാലം പുനര്‍നിര്‍മാണം ആരംഭിക്കാനുള്ള സാഹചര്യം ഒരുങ്ങിയതായി എംഎല്‍എ മാണി സി. കാപ്പനും അറിയിച്ചു. ചില്ലച്ചി പാലത്തിന് അനുവദിച്ച തുകയാവും പുതിയ പാലം നിര്‍മാണത്തിനായി മാറ്റി ചെലവഴിക്കുകയെന്നും എംഎല്‍എ പറഞ്ഞു.

കിഴക്കന്‍വെള്ളം പാഞ്ഞെത്തുന്നു; വെള്ളക്കെട്ടില്‍ റോഡ് ഗതാഗതം തടസപ്പെട്ടു : വെട്ടിത്തുരുത്ത്, പറാല്‍, പൂവം പ്രദേശങ്ങള്‍ ഒറ്റപ്പെട്ടു

ചങ്ങനാശേരി: മഴക്ക് ഇന്നലെ നേരിയ ശമനമുണ്ടായെങ്കിലും കിഴക്കന്‍ വെള്ളം ശക്തിയായി ഒഴുകിയെത്തുന്നു. ആറുകളും തോടുകളിലും ജലനിരപ്പുയരുന്നു. താഴ്ന്ന പ്രദേശങ്ങള്‍ വെള്ളത്തിലായ അവസ്ഥയാണ്. എസി റോഡില്‍ ഗതാഗത തടസം ഉണ്ടായില്ലെങ്കിലും പടിഞ്ഞാറന്‍ മേഖലകളിലെ റോഡുകളില്‍ വെള്ളം കയറിയത് കെഎസ്ആര്‍ടിസിയുടെ സര്‍വീസുകളെ ബാധിച്ചു. എസി റോഡ് കോളനി, എസി കോളനികളിലെ മുഴുവന്‍ വീടുകളും വെള്ളത്തിലാണ്. പൂവം, അറുനൂറില്‍ പുതുവല്‍, നക്രാന്‍, അംബേദ്കര്‍ കോളനി, മഹേന്ദ്രപുരം ഭാഗങ്ങളിലെ അഞ്ഞൂറോളം വീടുകളും ഈ വീടുകളിലെ നൂറുകണക്കിനാളുകളുമാണ് ദിനപ്രതി ദുരിതക്കയത്തിലേക്കു നീങ്ങുന്നത്. ഈ ഭാഗങ്ങളിലേക്കുള്ള റോഡുകളെല്ലാം വെള്ളത്തിന്‍റെ പിടിയില്‍ അമര്‍ന്നു. വെള്ളം കയറി വീടുകള്‍ നശിച്ചുപോകുന്നതിനാലും വീട്ടിലുള്ള വസ്തുവകകള്‍ മോഷണം പോകുമെന്നു ഭയന്നും പലരും വീടുവിട്ട് ക്യാമ്പുകളിലേക്കു പോകാന്‍ ഭയക്കുകയാണ്. വെട്ടിത്തുരുത്ത്, പറാല്‍, കുമരങ്കരി, കുന്നങ്കരി, നീലംപേരൂര്‍, ഈര, വാലടി, കൃഷ്ണപുരം തുടങ്ങിയ പടിഞ്ഞാറന്‍ പ്രദേശങ്ങളില്‍ വെള്ളത്തിന്‍റെ നില ക്രമാതീതമായി വര്‍ധിച്ചു. റോഡുകളില്‍ വെള്ളം കയറിയതോടെ ഈ പ്രദേശങ്ങള്‍ ഒറ്റപ്പെട്ട നിലയിലാണ്. പെട്രോള്‍ പമ്പില്‍നിന്ന് ഇന്ധനച്ചോര്‍ച്ച: ജനം പരിഭ്രാന്തരായി എസി റോഡില്‍ വെള്ളം കയറിയതിനെത്തുടര്‍ന്ന് പെട്രോള്‍ പമ്പില്‍നിന്ന് ഇന്ധനം ചോര്‍ന്നു. ഇന്നലെ രാവിലെയായിരുന്നു സംഭവം. രൂക്ഷഗന്ധം ശ്വസിച്ച സമീപവാസികള്‍ പോലീസില്‍ വിവരമറിയിക്കുകയായിരുന്നു. തുടര്‍ന്ന് ചങ്ങനാശേരി പോലീസും അഗ്‌നിരക്ഷാസേനയും എത്തി ചോര്‍ച്ച അടയ്ക്കാന്‍ ശ്രമിച്ചെങ്കിലും വിജയിച്ചില്ല. പിന്നീട് എറണാകുളത്തുനിന്ന് കമ്പിനിയുടെ ജീവനക്കാര്‍ എത്തിയാണ് പ്രതിസന്ധി പരിഹരിച്ചത്. ടാങ്കിനുള്ളില്‍ 15,000 ലീറ്ററോളം ഇന്ധനമുണ്ടായിരുന്നു. ശക്തമായ മഴയിലാണ് ഇന്ധനടാങ്കില്‍ വെള്ളം കയറിയത്. വെളിയനാട് റൂട്ടിൽ ബസ് സർവീസ് നിലച്ചു; പ്രതിഷേധം ചങ്ങനാശേരി: റോഡ് വെള്ളത്തിലായതോടെ കെഎസ്ആര്‍ടിസി ഡിപ്പോയില്‍നിന്ന് വെളിയനാട് ഭാഗത്തേക്ക് ബസ് സര്‍വീസ് നിലച്ചു. യാത്രക്കാര്‍ പ്രതിഷേധവുമായി രംഗത്തുവന്നു. യാത്രക്കാര്‍ ആലപ്പുഴ ഭാഗത്തേയ്ക്കുള്ള ബസ് തടഞ്ഞു. ഇന്നലെ വൈകുന്നേരമാണ് സംഭവം. പോലീസ് സ്ഥലത്തെത്തി കെഎസ്ആര്‍ടിസി അധികൃതരുമായി ചര്‍ച്ച നടത്തി കിടങ്ങറയിലേക്ക് ബസ് ഏര്‍പ്പാടാക്കി നല്‍കിയാണ് പ്രശ്‌നം പരിഹരിച്ചത്.

മഴക്കാലപൂര്‍വ ശുചീകരണം: നഗരസഭ പരാജയമെന്ന് കോണ്‍ഗ്രസ്

ചങ്ങനാശേരി: ശക്തമായ മഴ പെയ്തു ഓടകളും തോടുകളും നിറഞ്ഞുകവിഞ്ഞ് ഒഴുകുന്നതിനു കാരണം മഴക്കാലപൂര്‍വ ശുചീകരണത്തിലെ ചങ്ങനാശേരി നഗരസഭയുടെ പരാജയമാണെന്ന് കോണ്‍ഗ്രസ് വെസ്റ്റ് ബ്ലോക്ക് കമ്മിറ്റി ആരോപിച്ചു. വാര്‍ഡുകള്‍ കേന്ദ്രീകരിച്ച് ശുചീകരണ പ്രവര്‍ത്തനങ്ങള്‍ നടത്തുന്നതിന് നഗരസഭ ഒരു നടപടിയും സ്വീകരിച്ചിരുന്നില്ല. പലയിടത്തും രൂക്ഷമായ വെള്ളക്കെട്ട് രൂപപ്പെട്ടിരിക്കുകയാണ്. പ്രതിഷേധ യോഗത്തിൽ കോൺഗ്രസ് ബ്ലോക്ക് പ്രസിഡന്‍റ് ബാബു കോയിപ്പുറം അധ്യക്ഷത വഹിച്ചു ഡിസിസി പ്രസിഡന്‍റ് നാട്ടകം സുരേഷ് ഉദ്ഘാടനം ചെയ്തു. യുഡിഎഫ് നിയോജക മണ്ഡലം ചെയര്‍മാന്‍ പി.എന്‍. നൗഷാദ്, കെ.ജി. ഹരിദാസ്, തോമസ് അക്കര, തങ്കച്ചന്‍ പോളയ്ക്കല്‍, ജിന്‍സണ്‍ കല്ലുമാടിക്കല്‍, അന്‍സാരി ബാപ്പു, സുരേഷ് തോട്ടായി, സണ്ണി കുര്യാക്കോസ്, ശ്രീദേവി അജയന്‍, ശ്യാം സാംസണ്‍, പി.കെ. രാജു, റെജി കേളമ്മാട്ട്, ലൈജു തുരുത്തി എന്നിവര്‍ പ്രസംഗിച്ചു.

തടയണ നിർമാണത്തിലെ അശാസ്ത്രീയത : വെള്ളപ്പൊക്ക ഭീതിയിൽ ഒരു പ്രദേശം

നെടുംകുന്നം: മഴ കനത്തതോടെ ഒരു പ്രദേശത്തെ ജനങ്ങൾ മുഴുവൻ ആശങ്കയിൽ. കങ്ങഴ പഞ്ചായത്തിലെ ജലനിധി പദ്ധതികളുടെ ഭാഗമായി നെടുംകുന്നം പഞ്ചായത്തിലെ നെടുമണ്ണി തോട്ടിൽ നിർമിച്ച തടയണയാണ് നെടുംകുന്നം-ആര്യാട്ടുകുഴി പ്രദേശത്ത് ജനങ്ങളെ ഭീതിയിലാഴ്ത്തുന്നത്. എട്ട് വർഷങ്ങൾക്കു മുമ്പാണ് ഇവിടെ തടയണ നിർമിച്ചത്. അന്ന് തുടങ്ങിയതാണ് പ്രദേശവാസികളുടെ ദുരിതവും. 40ൽ പരം കുടുംബങ്ങളാണ് തടയണ മൂലം വർഷങ്ങളായി ദുരിതം പേറുന്നത്. മഴ കനത്താൽ തടയണ കവിഞ്ഞൊഴുകുന്നതും സമീപത്തെ പുരയിടങ്ങളിലേക്കും കൃഷിയിടങ്ങളിലേക്കും വീടുകളിലേക്കും വെള്ളം കയറുന്നതും പതിവാണ്. ഇതുവഴി ഓരോ വർഷവും ലക്ഷക്കണക്കിന് രൂപയുടെ നാശനഷ്ടമാണ് സംഭവിക്കുന്നത്. കൂടാതെ ചെളിയും മറ്റു മടിഞ്ഞ് കൃഷിയിടങ്ങൾ തകരുന്നതും വീടുകളിൽ വെള്ളം കയറി വീട്ടുപകരണങ്ങൾ നശിക്കുന്നതും പതിവാണ്. തുടർച്ചയായി അനുഭവിക്കുന്ന ഈ ദുരിതം പല ആവർത്തി അധികൃതരുടെ ശ്രദ്ധയിൽപ്പെടുത്തിയിട്ടും നടപടി ഉണ്ടാകാത്തതിൽ ജനങ്ങൾ അമർഷത്തിലാണ്. തടയണ കവിഞ്ഞ് ഉയരുന്ന വെള്ളം, കറുകച്ചാൽ-മണിമല റോഡിലെ ഗതാഗത തടസത്തിനും കച്ചവട സ്ഥാപനങ്ങളുടെ നഷ്ടത്തിനും കാരണമാകുന്നുണ്ട്. ജലനിധി പദ്ധതിയുടെ ഭാഗമായി നിർമിച്ച തടയണ പൊളിച്ചു നീക്കുന്നതിന് സാങ്കേതികമായി ചില തടസങ്ങൾ ഉള്ളതായി പറയപ്പെടുന്നു. തടസമില്ലാതെ വെള്ളമൊഴുകി നീങ്ങുന്നതിനുള്ള സൗകര്യമില്ലാത്തതാണ് നെടുമണ്ണി തോട്ടിലെ വെള്ളപ്പൊക്കത്തിന് കാരണമെന്നാണ് പ്രദേശവാസികൾ പറയുന്നത്.

ഇനി കര്‍ഷകരുടെ വീട്ടുപടിക്കല്‍ സേവനം : മൊബൈല്‍ വെറ്ററിനറി യൂണിറ്റ് പ്രവർത്തനം തുടങ്ങി

ചങ്ങനാശേരി: മാടപ്പള്ളി ബ്ലോക്കിനും നഗരസഭയ്ക്കും പാമ്പാടി ബ്ലോക്കിനുമായി ലഭിച്ച മൊബൈല്‍ വെറ്ററിനറി യൂണിറ്റ് പ്രവർത്തനമാരംഭിച്ചു. ജോബ് മൈക്കിള്‍ എംഎല്‍എ ഉദ്ഘാടനം ചെയ്തു. ക്ഷീരകര്‍ഷകര്‍ക്കും മറ്റ് കര്‍ഷകര്‍ക്കും വാര്‍ത്തുമൃഗങ്ങളെ പരിപാലിക്കുന്നവര്‍ക്കും വീട്ടുപടിക്കല്‍ സേവനം എത്തിക്കുക എന്ന ലക്ഷ്യത്തോടെ മൃഗസംരക്ഷണ വകുപ്പ് തുടങ്ങിയ മൊബൈല്‍ വെറ്ററിനറി യൂണിറ്റിന്‍റെ സേവനം വൈകുന്നേരം ആറു മുതല്‍ രാവിലെ അഞ്ചുവരെ ലഭിക്കും. കര്‍ഷകര്‍ക്ക് 1962 എന്ന ടോള്‍ ഫ്രീ നമ്പറില്‍ വിളിച്ചാൽ സേവനം ലഭ്യമാക്കുന്നതാണ്. പൂര്‍ണമായും സുതാര്യമായ ഈ സംവിധാനത്തില്‍ സര്‍ക്കാര്‍ നിശ്ചയിച്ച ഫീസ് നിരക്ക് വാഹനത്തില്‍ സജ്ജമാക്കിയിട്ടുള്ള ക്യുആര്‍ കോഡ് വഴി സ്‌കാന്‍ ചെയ്തു അടച്ചാല്‍ മതിയാകും. പെരുന്ന വെറ്ററിനറി ഹോസ്പിറ്റലിൽ നടന്ന ചടങ്ങില്‍ നഗരസഭാ അധ്യക്ഷ കൃഷ്ണകുമാരി രാജശേഖരന്‍ അധ്യക്ഷത വഹിച്ചു. നഗരസഭാ വൈസ് ചെയര്‍മാന്‍ മാത്യൂസ് ജോര്‍ജ്, മാടപ്പള്ളി ബ്ലോക്ക് പഞ്ചായത്ത് പ്രസിഡന്‍റ് എന്‍. രാജു, കൗണ്‍സിലര്‍മാരായ നിസാര്‍, നജിയ നൗഷാദ്, ഡോ. നയന്‍താര, ക്ഷീര സംഘം പ്രസിഡന്‍റ് ഓമന ശശികുമാര്‍, സെക്രട്ടറി ഷീലാ ജയന്‍ എന്നിവര്‍ പ്രസംഗിച്ചു.

മാടപ്പള്ളി പഞ്ചായത്ത് ഗവ. ആയുര്‍വേദ ആശുപത്രിക്ക് എന്‍എബിഎച്ച് അംഗീകാരം

മാടപ്പള്ളി: മാടപ്പള്ളി പഞ്ചായത്ത് ഗവ. ആയുര്‍വേദ ഡിസ്‌പെന്‍സറിക്ക് ഉന്നത നിലവാര അംഗീകാര പ്രവര്‍ത്തനങ്ങളുടെ ഭാഗമായി എന്‍എബിഎച്ച് എന്‍ട്രി ലെവല്‍ ദേശീയ അംഗീകാരം ലഭിച്ചു. തിരുവനന്തപുരം ടാഗോര്‍ തിയറ്ററില്‍ നടന്ന ചടങ്ങില്‍ ആരോഗ്യമന്ത്രി വീണ ജോര്‍ജില്‍നിന്ന് പഞ്ചായത്ത് പ്രസിഡന്‍റ് മണിയമ്മ രാജപ്പനും മെഡിക്കല്‍ ഓഫീസര്‍ ഡോ. വിനീത രവിയും ചേര്‍ന്ന് സര്‍ട്ടിഫിക്കറ്റ് ഏറ്റുവാങ്ങി. ജില്ലാ മെിക്കല്‍ ഓഫീസര്‍ എസ്. ശ്രീലത, ജില്ലാ പ്രോഗ്രാം മാനേജര്‍ ഡോ. ശരണ്യ ഉണ്ണികൃഷ്ണന്‍, മുന്‍ ജില്ലാ പ്രോഗ്രാം മാനേജര്‍ ഡോ. പ്രതിഭ, സ്റ്റേറ്റ് നോഡല്‍ ഓഫീസര്‍ ഡോ. എസ്. ശ്രീജിത്ത് എന്നിവര്‍ സന്നിഹിതരായിരുന്നു. ഉന്നതനിലവാരത്തിലുള്ള ചികിത്സ സൗകര്യങ്ങള്‍, യോഗപരിശീലനം,രക്തപരിശോധന, ഔഷധസസ്യത്തോട്ടം, ഗൃഹസന്ദര്‍ശനം, മെഡിക്കല്‍ക്യാമ്പ്, ബോധവത്കരണ ക്യാമ്പുകള്‍ എന്നീ സേവനങ്ങളാണ് സ്ഥാപനത്തില്‍നിന്ന് ലഭ്യമാകുന്നത്.

നെടുംകുന്നത്ത് രണ്ട് സ്‌കൂളുകൾ പുതിയ കെട്ടിടത്തിലേക്ക്

പുതിയ അധ്യയനവർഷത്തിൽ പുതിയ ക്ലാസ് മുറികൾ കോട്ടയം: പുതിയ അധ്യായനവർഷത്തിൽ നെടുംകുന്നത്തെ രണ്ട് സ്‌കൂളുകളിലെ കുട്ടികൾ പുതിയ ക്ലാസ് മുറികളിൽ പഠിച്ചുതുടങ്ങും. നെടുംകുന്നം നോർത്ത് ഗവ. യുപി സ്‌കൂളിലെയും ഗവ. ഹയർ സെക്കൻഡറി സ്‌കൂളിലെയും പുതിയ കെട്ടിടങ്ങളാണ് പുതിയ അധ്യയനവർഷത്തെ വരവേൽക്കാൻ സജ്ജമായിട്ടുള്ളത്. ചീഫ് വിപ്പ് ഡോ. എൻ. ജയരാജ് എംഎൽഎയുടെ ആസ്തിവികസന ഫണ്ടിൽനിന്ന് 3.52 കോടി ഉപയോഗിച്ചാണ് നെടുംകുന്നം ഗവ. ഹയർസെക്കൻഡറി സ്‌കൂളിന്‍റെ നിർമാണം ഇരുനിലകളിൽ പൂർത്തിയാക്കിയത്. കെട്ടിടത്തിന്‍റെ ഉദ്ഘാടനം ചീഫ് വിപ്പ് ഡോ. എൻ. ജയരാജ് നിർവഹിച്ചു. ചടങ്ങിൽ നെടുംകുന്നം പഞ്ചായത്ത് പ്രസിഡന്‍റ് രാജമ്മ രവീന്ദ്രൻ അധ്യക്ഷത വഹിച്ചു. ആന്‍റോ ആന്‍റണി എംപി, പഞ്ചായത്ത് വൈസ് പ്രസിഡന്‍റ് വി.എം. ഗോപകുമാർ, ബ്ലോക്ക് പഞ്ചായത്ത് അംഗം ലതാ ഉണ്ണികൃഷ്ണൻ, പഞ്ചായത്ത് അംഗങ്ങളായ ജോ ജോസഫ്, വീണ ബി. നായർ, മേഴ്‌സി റെൻ, കെ.എൻ. ശശീന്ദ്രൻ, സ്‌കൂൾ പ്രഥമാധ്യാപിക കെ.ജി. ബിന്ദുമോൾ, കെ.ജെ. പ്രസാദ്, സ്വപ്ന എന്നിവർ പങ്കെടുത്തു.

വാക്കേത്തറ-കല്ലുപുരയ്ക്കൽ റോഡിൽ വെള്ളക്കെട്ട്; മുണ്ടാർ നിവാസികൾ ദുരിതത്തിൽ

വൈക്കം: വൈക്കം - കോട്ടയം റോഡിനു സമാന്തര പാതയായി വിഭാവനം ചെയ്ത വൈക്കം - തോട്ടകം - വാക്കേത്തറ കല്ലുപുരയ്ക്കൽ റോഡ് വെള്ളത്തിൽ മുങ്ങിയതോടെ മുണ്ടാർനിവാസികളുടെ ഗതാഗതം വഴിമുട്ടി. തലയാഴം-കല്ലറ- കടുത്തുരുത്തി പഞ്ചായത്തുകളിലൂടെ കടന്നുപോകുന്ന ഈ റോഡിനെ ആശ്രയിച്ചാണ് മുണ്ടാർനിവാസികൾ തലയാഴം, വെച്ചൂർ, വൈക്കം എന്നിവടങ്ങളിലേക്ക് പോകുന്നത്. വൈക്കത്തുനിന്നു കോട്ടയം മെഡിക്കൽ കോളജ് ആശുപത്രിയിലേക്കുള്ള എളുപ്പമാർഗമായ റോഡ് ഗതാഗതയോഗ്യമാക്കാൻ ഊർജിതമായശ്രമം അധികൃതർ നടത്തുന്നില്ലെന്നാണ് നാട്ടുകാരുടെ ആരോപണം. മാസങ്ങളോളം വെള്ളത്തിൽ മുങ്ങിക്കിടക്കുന്ന റോഡിലൂടെ യാത്ര ചെയ്യുന്ന വിദ്യാർഥികളടക്കമുള്ളവർ വെള്ളംനീന്തി കരഭാഗത്തെത്തി വേറെ വസ്ത്രം ധരിച്ചാണ് യാത്ര തുടരുന്നത്. റോഡ് ആധുനിക നിലവാരത്തിൽ പുനർ നിർമിക്കണമെന്നാവശ്യപ്പെട്ട് നിരവധി തവണ പ്രദേശവാസികൾ പ്രക്ഷോഭം നടത്തിയിട്ടും ഫലമുണ്ടായില്ല. പാടശേഖരങ്ങൾക്കു നടുവിലൂടെ കടന്നുപോകുന്ന ഈ റോഡിന് ഭൂരിഭാഗം സ്ഥലങ്ങളിലും എട്ട് മീറ്റർ വീതിയുണ്ട്. 12 മീറ്റർ വീതിയിൽ സ്ഥലമെടുക്കാൻ പ്രായോഗിക ബുദ്ധിമുട്ടുള്ളതിനാൽ കിഫ്ബി അധികൃതർക്ക് പദ്ധതിയുടെ തുടർ പ്രവർത്തനങ്ങൾ നടത്താനായില്ല. പാടശേഖരത്തിനൊപ്പം താഴ്ന്ന നിലയിൽ കിടക്കുന്ന റോഡിൽ വെള്ളം നിറയുന്നതിനാൽ വാഹന ഗതാഗതവും കാൽ നടയും ഇതുവഴി ഒരുപോലെ ദൃഷ്കരമാണ്.

ജലനിരപ്പു ഉയരുന്നു, കൂടുതൽ കുടുംബങ്ങളെ ക്യാമ്പിലേക്കു മാറ്റി

വൈക്കം: താഴ്ന്നപ്രദേശങ്ങളിൽ ജലനിരപ്പ് ഉയരുന്നതിനാൽ ദുരിതാശ്വാസ ക്യാമ്പുകളിലേക്ക് കൂടുതൽ കുടുംബങ്ങളെ മാറ്റിപ്പാർപ്പിച്ചു. വൈക്കത്ത് ഇന്നലെ വെച്ചൂർ ദേവീവിലാസം സ്കൂളിൽ ദുരിതാശ്വാസ ക്യാമ്പ് തുറന്നു. 14 കുടുംബങ്ങളെ ക്യാമ്പിലേക്കു മാറ്റിപ്പാർപ്പിച്ചു. ചെമ്പ് കാട്ടിക്കുന്ന്, മറവൻതുരുത്ത്, ഉദയനാപുരം വല്ലകം, തലയോലപ്പറമ്പ് എ.ജെ. ജോൺ സ്കൂൾ എന്നിവടങ്ങളിൽ കഴിഞ്ഞ ദിവസം ക്യാമ്പ് തുടങ്ങിയിരുന്നു. എഴുമാംതുരുത്തിൽ പുതുതായി ക്യാമ്പ് തുറന്നിട്ടുണ്ട്. വെള്ളപ്പൊക്ക ദുരിതം ഏറ്റവും കൂടുതൽ അനുഭവപ്പെടുന്ന വാഴമന, കൊടിയാട്, മുട്ടുങ്കൽ തുടങ്ങിയ സ്ഥലങ്ങളിൽനിന്നു കൂടുതൽ കുടുംബങ്ങൾ ക്യാമ്പിലെത്തി. 54 കുടുംബങ്ങളിൽനിന്നായി 111 അംഗങ്ങളാണ് ഇപ്പോൾ ക്യാമ്പിലുള്ളത്. രാത്രിയും മഴ തുടുന്നതിനാൽ കൂടുതൽ പേരെ ക്യാമ്പിലേക്കു മാറ്റേണ്ടിവരുമെന്ന് പഞ്ചായത്ത്, റവന്യു അധികൃതർ പറഞ്ഞു.

വാക്കേത്തറ-ചെട്ടിക്കരി റോഡ്: ബിജെപി സമരത്തിനൊരുങ്ങുന്നു

തോട്ടകം: വെള്ളത്തിൽ മുങ്ങി യാത്ര ദുരിതപൂർണമായ തലയാഴം പഞ്ചായത്തിലെ മൂന്നാം വാർഡുമായി ബന്ധപ്പെട്ട വാക്കേത്തറ- ചെട്ടിക്കരി റോഡ് ഗതാഗതയോഗ്യമാക്കണമെന്നാവശ്യപ്പെട്ട് ബിജെപി സമരപരിപാടികൾ ആരംഭിക്കും. 20 വർഷം മുമ്പ് നിർമിച്ച റോഡ് ഗതാഗതയോഗ്യമാക്കാൻ അധികൃതർ നടപടി സ്വീകരിക്കാത്തത് നീതീകരിക്കാനാവില്ലെന്ന് ബിജെപി നേതാക്കൾ കുറ്റപ്പെടുത്തി. ബിജെപി ജില്ലാ പ്രസിഡന്‍റ് ലിജിൻ ലാലിന്‍റെ നേതൃത്വത്തിൽ റോഡിന്‍റെ ശോച്യാവസ്ഥ വിലയിരുത്തി. വൈക്കം മണ്ഡലം പ്രസിഡന്‍റ് എം.കെ. മഹേഷ്, ജില്ലാ വൈസ് പ്രസിഡന്‍റ് ലേഖ അശോകൻ, ജില്ലാ സെക്രട്ടറിമാരായ രൂപേഷ് ആർ. മേനോൻ, പി.ആർ. സുഭാഷ്, മണ്ഡലം വൈസ് പ്രസിഡന്‍റ് പ്രീജു കെ. ശശി, ബിജെപി തലയാഴം പഞ്ചായത്ത് പ്രസിഡന്‍റ് ടി.കെ. സുമേഷ്, അമ്പിളി സുനിൽ, വാമദേവൻ, സിജുമോൻ, അനൂപ് തുടങ്ങിയവർ സംബന്ധിച്ചു.

താഴ്ന്ന പ്രദേശത്തെ വീടുകൾ വെള്ളത്തില്‍

കടുത്തുരുത്തി: ശക്തമായ മഴയെയും വെള്ളപ്പൊക്കത്തെയും തുടര്‍ന്ന് കല്ലറ പഞ്ചായത്തിലെയും കടുത്തുരുത്തിയുടെ പടിഞ്ഞാറന്‍ മേഖലയിലെയും താഴ്ന്ന പ്രദേശങ്ങളിലെ വീടുകളിലെല്ലാം വെള്ളം കയറി. കല്ലറ പഞ്ചായത്തിലെ ഒന്ന്, രണ്ട് വാര്‍ഡുകളിലായി സ്ഥിതി ചെയ്യുന്ന മുണ്ടാര്‍ മേഖലയില്‍ 210 വീടുകളില്‍ വെള്ളം കയറി. കൂടുതല്‍പേരും ബന്ധുവീടുകളിലേക്കും വാടകവീടുകളിലേക്കും താമസം മാറ്റി. ചില കുടുംബങ്ങള്‍ ഇപ്പോഴും വീടുകളില്‍തന്നെ കഴിയുകയാണ്. ദുരിതാശ്വാസക്യാമ്പ് തുറക്കാനുള്ള ക്രമീകരണങ്ങള്‍ ഒരുക്കിയിട്ടുണ്ടെന്ന് കല്ലറ പഞ്ചായത്ത് പ്രസിഡന്‍റ് ജോണി തോട്ടുങ്കല്‍ പറഞ്ഞു. മുണ്ടാറിന് നടുവിലൂടെ പോകുന്ന കല്ലുപുര-വാക്കേത്തറ റോഡ് വെള്ളം കയറി മുങ്ങി. ഇതുവഴി വലിയ വാഹനങ്ങള്‍ക്ക് മാത്രമേ കടന്നുപോകാനാകൂ. ചെറിയ റോഡുകളും വെള്ളത്തിനടിയിലായി. തോണിയാത്ര മാത്രമാണ് മുണ്ടാറിലെ ഭൂരിപക്ഷം ആളുകള്‍ക്കും പുറംലോകവുമായി ബന്ധപ്പെടാനുള്ള ഏകമാര്‍ഗം. കഴിഞ്ഞ ദിവസത്തെക്കാളും പുഴകളിലും തോടുകളിലും ജലനിരപ്പ് ഉയരുകയാണെന്ന് കല്ലറ പഞ്ചായത്തംഗം വി.കെ. ശശികുമാര്‍ പറഞ്ഞു. കിഴക്കന്‍ വെള്ളത്തിന്‍റെ വരവ് നിന്നില്ലെങ്കില്‍ പ്രതിസന്ധി രൂക്ഷമാകുമെന്നും ശശികുമാര്‍ പറയുന്നു. മുണ്ടാറിലെ ഒന്നാം നമ്പര്‍ ബ്ലോക്ക് പാടശേഖരത്തെ മടവീഴ്ചയില്‍ 40 ഏക്കറിലെ വിളവെടുക്കാറായ കപ്പയും പത്ത് ഏക്കറിലെ ഏത്തവാഴക്കൃഷിയും പൂര്‍ണമായും നശിച്ചു. കടുത്തുരുത്തി പഞ്ചായത്തിന്‍റെ പടിഞ്ഞാറന്‍ മേഖലയായ എഴുമാന്തുരുത്ത്, മുക്കം, ആപ്പാഞ്ചിറ, കാന്താരിക്കടവ് പ്രദേശങ്ങളിലെ വീടുകളെല്ലാം വെള്ളം കയറി. എഴുമാന്തുരുത്ത് ഗവ. യുപി സ്‌കൂളിലെ ക്യാമ്പില്‍ 14 കുടുംബങ്ങളിലുള്ള 36 പേര്‍ കഴിയുന്നുണ്ട്. എഴുമാന്തുരുത്ത്-ആയാംകുടി, എഴുമാന്തുരുത്ത്-തലയോലപ്പറമ്പ്, കടുത്തുരുത്തി-ആപ്പുഴ തീരദേശ റോഡ്, എഴുമാന്തുരുത്ത്-പുലിത്തുരുത്ത്- മധുരവേലി എന്നീ റോഡുകളിലെല്ലാം വെള്ളം കയറി. ഇതുവഴിയുള്ള ഗതാഗതവും ഭാഗികമായേ നടക്കുന്നുള്ളൂ.

ലഹരിയില്‍നിന്ന് രക്ഷിക്കാനുള്ള പ്രവര്‍ത്തനങ്ങള്‍ ഏറ്റെടുക്കണം: മന്ത്രി

കോട്ടയം: ലഹരിയുടെ അപകടത്തില്‍നിന്ന് സമൂഹത്തെ രക്ഷിക്കാനുള്ള പ്രവര്‍ത്തനങ്ങള്‍ ഏറ്റെടുക്കേണ്ടത് കാലഘട്ടത്തിന്‍റെ ആവശ്യമാണെന്ന് മന്ത്രി വി.എന്‍. വാസവന്‍. ലോക പുകയിലവിരുദ്ധ ദിനാചരണത്തിന്‍റെ ജില്ലാതല ഉദ്ഘാടനം കോട്ടയം സിഎംഎസ് കോളജ് ഗ്രേറ്റ് ഹാളില്‍ നിര്‍വഹിച്ചു പ്രസംഗിക്കുകയായിരുന്നു അദേഹം. ജില്ലാ മെഡിക്കല്‍ ഓഫീസര്‍ ഡോ. എന്‍. പ്രിയ അധ്യക്ഷത വഹിച്ചു. ഡെപ്യൂട്ടി ഡിഎംഒ ഡോ. പി.എന്‍. വിദ്യാധരന്‍, ഡോ. വ്യാസ് സുകുമാരന്‍, എക്‌സൈസ് സിഐ സന്തോഷ് കുമാര്‍, സിഎംഎസ് കോളജ് പ്രിന്‍സിപ്പല്‍ ഡോ. അഞ്ജു ശോശന്‍ ജോര്‍ജ് എന്നിവര്‍ പ്രസംഗിച്ചു. നാര്‍ക്കോട്ടിക് സെല്‍ ഡിവൈഎസ്പി എ. ജെ. തോമസ് ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. പാലാ ജനറല്‍ ആശുപത്രിയിലെ റേഡിയേഷന്‍ ഓങ്കോളജിസ്റ്റ് ഡോ. പി.എസ്. ശബരിനാഥ് കാന്‍സര്‍ പ്രതിരോധ ബോധവത്കരണ ക്ലാസെടുത്തു.

ഇംഗ്ലീഷ് ഭാഷയെ അടുത്തറിഞ്ഞ് സ്‌കൂള്‍ വിദ്യാര്‍ഥികള്‍

കോട്ടയം: ഇംഗ്ലീഷ് ഭാഷയെയും സാഹിത്യത്തെയും കൂടുതലായി അറിയാന്‍ സ്‌കൂള്‍ വിദ്യാര്‍ഥികള്‍ക്ക് അവസരമൊരുക്കി എംജി സര്‍വകലാശാലയിലെ സ്‌കൂള്‍ ഓഫ് ലെറ്റേഴ്‌സ് സംഘടിപ്പിച്ച പ്രത്യേക പരിശീലന പരിപാടി സമാപിച്ചു. മൂന്നാഴ്ച നീണ്ടുനിന്ന പരിപാടിയില്‍ എട്ടു മുതല്‍ പ്ലസ് ടൂ വരെ ക്ലാസുകളിലെ പതിനെട്ട് വിദ്യാര്‍ഥികള്‍ പങ്കെടുത്തു. ചലച്ചിത്ര സംവിധായകരായ ദിലീഷ് പോത്തന്‍, സിദ്ധാര്‍ഥ ശിവ, കവയത്രി ആനി ജോര്‍ജ് തുടങ്ങിയവര്‍ വിദ്യാര്‍ഥികളുമായി സംവദിച്ചു. കുട്ടികള്‍ക്ക് ഇംഗ്ലീഷ് ഭാഷയിലുള്ള ആശയവിനിമയശേഷി വര്‍ധിപ്പിക്കുന്നതിനും സാഹിത്യാഭിരുചി പരിപോഷിപ്പിക്കുന്നതിനും ലക്ഷ്യമിട്ടാണ് പരിപാടി നടത്തിയത്. സമാപനച്ചടങ്ങില്‍ സര്‍വകലാശാലയിലെ വൈക്കം മുഹമ്മദ് ബഷീര്‍ ചെയര്‍ പ്രഫസര്‍ പ്രഫ. കെ.എം. കൃഷ്ണന്‍, സ്‌കൂള്‍ ഓഫ് ലെറ്റേഴ്‌സ് ഡയറക്ടര്‍ ഡോ. സജി മാത്യു, ഡോ. ദീപ റേച്ചല്‍ തോമസ്, ഡോ. ലിന്‍സി കെ. തങ്കപ്പന്‍ എന്നിവര്‍ പ്രസംഗിച്ചു.

ദുരന്ത ലഘൂകരണം; യുഎന്‍ സമ്മേളനത്തില്‍ ഡോ. കെ.ആര്‍. ബൈജു പങ്കെടുക്കും

കോട്ടയം: ആഗോളതലത്തില്‍ ദുരന്തസാധ്യത കുറയ്ക്കുന്നതു സംബന്ധിച്ച പ്രവര്‍ത്തനങ്ങള്‍ വിലയിരുത്തുന്നതിന് ഐക്യരാഷ്ട്ര സഭ നാളെ മുതല്‍ ജൂണ്‍ ആറു വരെ ജനീവയില്‍ നടത്തുന്ന ആഗോള സമ്മേളനത്തില്‍ എംജി സര്‍വകലാശാലയിലെ സ്‌കൂള്‍ ഓഫ് എന്‍വയോണ്‍മെന്‍റല്‍ സയന്‍സസിലെ പ്രഫസറും ഡീനുമായ ഡോ. കെ.ആര്‍. ബൈജു പങ്കെടുക്കും. ഐക്യരാഷ്ട്ര സഭയുടെ സെന്‍ഡായി ഫ്രെയിം വര്‍ക്ക് ഫോര്‍ ഡിസാസ്റ്റര്‍ റിസ്‌ക് റിഡക്‌ഷന്‍ പ്രവര്‍ത്തനപദ്ധതിയുടെ നിര്‍വഹണ പുരോഗതി വിലയിരുത്തുന്ന എട്ടാമത് സമ്മേളനത്തില്‍ ഇന്ത്യയിലെ അക്കാദമിക സമൂഹത്തിന്‍റെ പ്രതിനിധികളിലൊരാളായ ഇദ്ദേഹം ദുരന്ത സാധ്യതാ ലഘൂകരണ പ്രവര്‍ത്തനങ്ങളില്‍ എംജി സര്‍വകലാശാലയുടെ പങ്കാളിത്തത്തെക്കുറിച്ചു സംസാരിക്കും. കഴിഞ്ഞ വര്‍ഷം ഇന്ത്യയുടെ പ്രഥമ ശൈത്യകാല ധ്രുവ പര്യവേഷണ സംഘത്തില്‍ അംഗമായിരുന്ന ഡോ. ബൈജു ആര്‍ട്ടിക് സ്റ്റേഷന്‍ ലീഡറായും പ്രവര്‍ത്തിച്ചിരുന്നു.

അപകടാവസ്ഥയിലുള്ള മരം മുറിച്ചുനീക്കണം: തിരുവഞ്ചൂർ

നട്ടാശേരി: ചവിട്ടുവരി- വെള്ളൂപ്പറമ്പ് റോഡിൽ ഏതു നിമിഷവും വൻദുരന്തം സൃഷ്ടിക്കാവുന്ന വൃക്ഷശിഖരം ഉടൻ മുറിച്ചുമാറ്റണമെന്ന് തിരുവഞ്ചൂർ രാധാകൃഷ്ണൻ എംഎൽഎ ആവശ്യപ്പെട്ടു. നൂറോളം ഓട്ടോകൾ പാർക്ക് ചെയ്യുന്ന ഓട്ടോ സ്റ്റാൻഡിനോടു ചേർന്നുനിൽക്കുന്ന ഈ വൃക്ഷത്തിന്‍റെ ശിഖരങ്ങൾ ഒടിഞ്ഞുവീണുണ്ടായ അപകടങ്ങൾ സ്ഥലം സന്ദർശിച്ച എംഎൽഎയോട് നാട്ടുകാരും ഓട്ടോ ഡ്രൈവർമാരും അറിയിച്ചു. പ്രശ്നത്തിന് ഉടൻ പരിഹാരം കാണണമെന്നാവശ്യപ്പെട്ട് ജനപ്രതിനിധികളും നാട്ടുകാരും എംഎൽഎക്ക് നിവേദനം നൽകുകയും ചെയ്തു. മുനിസിപ്പൽ കൗൺസിലർമാരായ സാബു മാത്യു, ടി.സി. റോയി, പ്രദേശവാസികളായ രാജീവ് ഇലവച്ചേരിൽ, തങ്കച്ചൻ ചെട്ടിയാത്ത്, കെ.ബി. രാജൻ, കെ.ജി. സുന്ദരം എന്നിവർ നേതൃത്വം നൽകി.

സെന്‍റ്ഗിറ്റ്‌സില്‍ സെമി കണ്ടക്ടര്‍ ടെക് കോണ്‍ക്ലേവിന് തുടക്കം

കോട്ടയം: സെന്‍റ്ഗിറ്റ്‌സ് എന്‍ജിനിയറിംഗ് കോളജിലെ ഇലക്ട്രോണിക്‌സ് എന്‍ജിനിയറിംഗ് വിഭാഗവും സെന്‍റ്ഗിറ്റ്‌സ് വിഎല്‍എസ്‌ഐ എക്‌സലന്‍സ് സെന്‍ററും സംയുക്തമായി സംഘടിപ്പിക്കുന്ന സെമി കണ്ടക്ടര്‍ ടെക് കോണ്‍ക്ലേവിന് തുടക്കമായി. ഐഇഇഇ സോളിഡ് സ്റ്റേറ്റ് സര്‍ക്യൂട്ട്സ് സൊസൈറ്റി (SSCS) സെന്‍റ്ഗിറ്റ്‌സ് ചാപ്റ്റര്‍, ഐഇഇഇ ആര്‍എഫ്‌ഐഡി കൗണ്‍സില്‍ കേരള ചാപ്റ്റര്‍ എന്നിവരുടെ സഹകരണത്തോടെയാണ് കോണ്‍ക്ലേവ് നടത്തപ്പെടുന്നത്. ലോകത്തിലെ ഏറ്റവും വലിയ സെമി കണ്ടക്ടര്‍ ചിപ്പ് നിര്‍മാതാക്കളായ ഇന്‍റല്‍ കോര്‍പറേഷന്‍റെ ഇന്ത്യയിലെ അനലോഗ് ഡിസൈന്‍ മാനേജരായ ഡോ. ജി.എസ്. ജാവേദ് കോണ്‍ക്ലേവ് ഉദ്ഘാടനം ചെയ്തു. കോളജ് പ്രിന്‍സിപ്പല്‍ ഡോ. സുധ ടി. അധ്യക്ഷയായിരുന്നു. ചീഫ് ഡിജിറ്റല്‍ ഓഫീസര്‍ ഡോ. നവീന്‍ പുന്നൂസ്, ഇലക്‌ട്രോണിക്‌സ് എന്‍ജിനിയറിംഗ് വിഭാഗം മേധാവി ഡോ. കെ.എസ്. ശ്രീകല , ഡോ. ഏബ്രഹാം ജോര്‍ജ്, ഡോ. അജിത് രവീന്ദ്രന്‍, എസ്. ഗോവിന്ദ് എന്നിവര്‍ പ്രസംഗിച്ചു.

പോലീസിനെ സ്വാധീനിക്കാനെന്ന പേരിൽ പണം വാങ്ങി തട്ടിപ്പ്: യുവാവ് അറസ്റ്റിൽ

ഏറ്റുമാനൂർ: ബ്യൂട്ടി പാർലർ നടത്തുന്നതിന് പോലീസിനെ സ്വാധീനിക്കാണെന്ന് പറഞ്ഞ് പണം വാങ്ങി തട്ടിപ്പ് നടത്തിയ കേസിൽ യുവാവ് അറസ്റ്റിൽ. പെരുമ്പാവൂർ വെങ്ങോല കറ്റോലിപറമ്പിൽ സനീഷ് നൗഷാദി(38)നെയാണ് ബ്യൂട്ടിപാർലർ ഉടമയുടെ പരാതിയിൽ ഏറ്റുമാനൂർ പോലീസ് അറസ്റ്റ് ചെയ്തത്. ബ്യൂട്ടി പാർലർ നടത്തിപ്പുമായി ബന്ധപ്പെട്ട പരാതി പരിഹരിക്കുന്നതിന് പോലീസുകാർക്ക് കൊടുക്കാനെന്ന വ്യാജേന പ്രതി പരാതിക്കാരിയിൽനിന്ന് 50,000 രൂപ വാങ്ങിച്ചെടുത്ത ശേഷം ലൈംഗികച്ചുവയോടെ സംസാരിക്കാൻ ആരംഭിച്ചപ്പോൾ പോലീസ് സ്റ്റേഷനിൽ വിവരം അറിയിക്കുകയും പരാതി നൽകുകയുമായിരുന്നു. ഒളിവിലായിരുന്ന പ്രതിയെ ഏറ്റുമാനൂർ പോലീസ് ഇൻസ്‌പെക്ടർ എ.എസ്. അൻസലിന്‍റെ നേതൃത്വത്തിൽ സബ് ഇൻസ്‌പെക്ടർമാരായ അഖിൽദേവ്, തോമസ് ജോസഫ്, എഎസ്ഐ വി.കെ. വിനോദ്, സീനിയർ പോലീസ് ഓഫീസർ ജോഷ്കുമാർ, അനീഷ്, അജിത് എം. വിജയൻ എന്നിവരടങ്ങിയ സംഘം മലപ്പുറത്തുനിന്ന് പിടികൂടിയത്.

നീരാെഴുക്ക് തടഞ്ഞ് പോളക്കൂട്ടം; വില്ലനായി മഴ, താഴ്ന്ന പ്രദേശങ്ങൾ വെള്ളത്തിൽ

കുമരകം: ശക്തമായ മഴയെത്തുടർന്ന് രൂക്ഷമായ വെള്ളപ്പൊക്ക ദുരിതം അനുഭവിക്കുന്ന ജില്ലയിലെ താഴ്ന്ന പ്രദേശങ്ങളിലെ ജനങ്ങൾക്കു വില്ലനായി തോടുകളും നദികളും ജർമൻ പോളകൊണ്ട് നിറഞ്ഞു. തോടുകളിൽ കല്ലുകൾ കെട്ടി റോഡുകൾ നിർമിച്ചപ്പോൾ വീതി കുറയുകയും എക്കലും മാലിന്യങ്ങളും അടിത്തട്ടിൽ അടിഞ്ഞ് ആഴം കുറയുകയും ചെയ്ത തോടുകളിൽ പോള തിങ്ങിനിറയുകയുംകൂടി ചെയ്തതോടെ കിഴക്കൻ വെള്ളത്തിന് സുഗമമായി ഒഴുകി വേമ്പനാട്ടുകായലിലൂടെ കടലിൽ പതിക്കാൻ കഴിയുന്നില്ല. പോളക്കൊപ്പം പുൽ പടർപ്പുകളും പാലങ്ങളുടെ തൂണിൽ ഉടക്കിക്കിടക്കുന്നത് വെള്ളത്തിന്‍റെ സ്വാഭാവിക ഒഴുക്കിനെ തടസപ്പെടുത്തുകയാണ്. കുമരകം മുത്തേരിമട പാലത്തിൽ തടഞ്ഞു കിടക്കുന്ന പോള കാരണം പാലം തന്നെ തകർന്നു വീഴുമെന്ന ഭീതിയിലാണ് പ്രദേശവാസികൾ. പോള വാരി മാറ്റാനോ തള്ളിവിടാനോ തദേശ സ്വയംഭരണ സ്ഥാപനങ്ങൾ പദ്ധതി ആവിഷ്ക്കരിക്കുകയോ നടപ്പിലാക്കുകയോ ചെയ്യുന്നില്ല. ജില്ലാ പഞ്ചായത്ത് വാങ്ങിയ പോള വാരൽ യന്ത്രത്തിന്‍റെ പൊടിപോലുമില്ല കുട്ടനാട്ടുകാർക്ക് കണ്ടുപിടിക്കാൻ. ദുരിതാശ്വാസ ക്യാമ്പ് തുറന്നു തിരുവഞ്ചൂർ: തിരുവഞ്ചൂർ മരുതുകുളം ഭാഗത്ത് നാലു വീടുകളിൽനിന്ന് എട്ടുപേരെ തിരുവഞ്ചൂർ ഗവ. എൽപി സ്കൂളിലേക്ക് മാറ്റി. തിരുവഞ്ചൂർ നരിമറ്റം ഭാഗത്തും ജലനിരപ്പ് ഉയർന്ന നിലയിലാണ്.

മഴക്കെടുതി: താഴ്ന്ന പ്രദേശങ്ങളിലെ ജനജീവിതം ദുഃസഹമായി

ചിങ്ങവനം: രൂക്ഷമായ വെള്ളപ്പൊക്കത്തില്‍ ജനജീവിതം ദുഃസഹമായി. ചിങ്ങവനം, പള്ളം, നാട്ടകം, കുറിച്ചി, പനച്ചിക്കാട്, വാകത്താനം, പുതുപ്പള്ളി തുടങ്ങിയ പ്രദേശങ്ങളിലെ താഴ്ന്ന സ്ഥലങ്ങള്‍ വെള്ളത്തിനടിയിലാണ്. ചെറുതോടുകളിലേക്ക് പോളയും പുല്ലും കിഴക്കന്‍ വെള്ളത്തിന്‍റെ കുത്തൊഴുക്കില്‍ അടിഞ്ഞുകൂടിയതോടെ വെള്ളം പെട്ടെന്നിറങ്ങി പോകാനുള്ള സാധ്യതയും ഇല്ലാതായി. റോഡുകളില്‍ വെള്ളം ക്രമാതീതമായി ഉയര്‍ന്നതോടെ ഗതാഗതവും നിലച്ചു. പനച്ചിക്കാട് പഞ്ചായത്തിലെ തിരക്കുള്ള റോഡുകളില്‍ ഒന്നായ അമ്പാട്ടുകടവ് റോഡ് പൂര്‍ണമായും വെള്ളത്തിനടിയിലാണ്. അപകടസാധ്യത മുന്‍ നിര്‍ത്തി ഇതുവഴിയുള്ള ഗതാഗതം നിരോധിച്ചു. പനച്ചിക്കാട്-പുതുപ്പള്ളി പഞ്ചായത്തുകളെ തമ്മില്‍ ബന്ധിപ്പിക്കുന്ന റോഡ് അടച്ചതോടെ യാത്രക്കാര്‍ ദുരിതത്തിലായി. പള്ളം, വാലേക്കടവ് പ്രദേശങ്ങളിലെ മിക്കവീടുകളിലും വെള്ളം കയറിയ നിലയിലാണ്. പനച്ചിക്കാട്, കുഴിക്കാട് ഭാഗത്തെ വീടുകളില്‍ വെള്ളം കയറിയതോടെ പലരും സുരക്ഷിത സ്ഥാനത്തേക്ക് മാറുകയാണ്.

മഴയ്ക്കു ശമനം; ജലനിരപ്പിൽ നേരിയ കുറവ്

കുമരകം: ജില്ലയുടെ പടിഞ്ഞാറൻ പ്രദേശങ്ങളിലെ ജനങ്ങൾക്ക് പ്രതീക്ഷയുടെ കിരണങ്ങൾ മാനത്തു തെളിഞ്ഞു. ഇന്നലെ ഉച്ചയോടെ മഴ മാറി വെയിൽ പരക്കുകയും ജലനിരപ്പിൽ നേരിയ കുറവുണ്ടാകുകയും ചെയ്തു. അതോടെ 2018ലെ ജലപ്രളയത്തിന്‍റെ അവസ്ഥയിലേക്ക് വീണ്ടും എത്തുമെന്ന ആശങ്കയ്ക്ക് താല്കാലിക വിരാമമായി. പടിഞ്ഞാറൻ പഞ്ചായത്തുകളിലെ ഒട്ടനവധി വീടുകൾ ഇപ്പോഴും വെള്ളത്തിലാണ്. റോഡുകളിലും ഇടവഴികളിലും വെള്ളം കയറിക്കിടക്കുന്നത് പ്രദേശവാസികളുടെ ദുരിതം ഇരട്ടിയാക്കിയിട്ടുണ്ട്. കഴിഞ്ഞ ദിവസം തുടങ്ങിയ ദുരിതാശ്വാസ ക്യാമ്പുകളിലേക്ക് കൂടുതൽ വീട്ടുകാർ എത്തിക്കൊണ്ടിരിക്കുന്നു. കോവിഡിന്‍റെ പുനരാഗമനം പലരേയും ദുരിതാശ്വാസ ക്യാമ്പുകളിലേക്കു പോകുന്നതിന് ആശങ്ക സൃഷ്ടിക്കുന്നതായും ചൂണ്ടിക്കാണിക്കുന്നു. കമരകം, അയ്മമനം, തിരുവാർപ്പ് വില്ലേജുകളിലായി ഒമ്പതു ദുരിതാശ്വാസ ക്യാമ്പുകളാണ് തുറന്നിരിക്കുന്നത്. ക്യാമ്പുകളിലാകെ 273 ആളുകൾ എത്തിയിട്ടുണ്ട്. മന്ത്രി വി.എൻ. വാസവൻ ദുരിതാശ്വാസ ക്യാമ്പുകൾ സന്ദർശിച്ച് നിർദേശങ്ങൾ നൽകി.

ദുരിതബാധിതർക്ക് ആശ്വാസമേകി മന്ത്രി വി.എൻ. വാസവൻ

കോട്ടയം: കനത്ത മഴയെത്തുടർന്ന് ജില്ലയുടെ പടിഞ്ഞാറൻ മേഖലകളിൽ തുറന്ന ദുരിതാശ്വാസ ക്യാമ്പുകൾ സന്ദർശിച്ച് മന്ത്രി വി.എൻ. വാസവൻ. അയ്മനം, തിരുവാർപ്പ്, കുമരകം പഞ്ചായത്തുകളിലെ ദുരിതബാധിത പ്രദേശങ്ങളും ദുരിതാശ്വാസ ക്യാമ്പുകളുമാണ് മന്ത്രി സന്ദർശിച്ചത്. വെള്ളം കയറി ദുരിതത്തിലായ സ്ഥലങ്ങളും കൃഷിനാശമുണ്ടായ പ്രദേശങ്ങളും ജില്ലാ കളക്ടർ ജോൺ വി. സാമുവലിനും ജനപ്രതിനിധികൾക്കുമൊപ്പം സന്ദർശിച്ചു. ക്യാമ്പുകളിൽ കഴിയുന്ന ദുരിതബാധിതർക്ക് വൈദ്യസഹായമടക്കം ലഭ്യമാക്കാൻ മന്ത്രി നിർദേശം നൽകി. ഭക്ഷണം ഒരുക്കുന്നതിനുള്ള സൗകര്യങ്ങൾ എല്ലാ ക്യാമ്പുകളിലും പ്രത്യേകം വിലയിരുത്തി. അയ്മനം പി. ജോൺ മെമ്മോറിയൽ ഇംഗ്ലീഷ് സ്‌കൂളിലായിരുന്നു ആദ്യ സന്ദർശനം. 27 കുടുംബങ്ങളിൽനിന്നുള്ള 47 പേരാണ് ഇവിടുത്തെ ക്യാമ്പിലുള്ളത്. പരിപ്പ് ഹൈസ്‌കൂളിലെ ക്യാമ്പിൽ 13 കുടുംബങ്ങളിൽനിന്നുള്ള 35 പേരാണുള്ളത്. വിവിധ പഞ്ചായത്തുകളിലെ ജനപ്രതിനിധികളും ജില്ലാ ഇൻഫർമേഷൻ ഓഫീസർ എ. അരുൺ കുമാറും മന്ത്രിക്കൊപ്പമുണ്ടായിരുന്നു. അയ്മനംപഞ്ചായത്ത് പ്രസിഡന്‍റ് വിജി രാജേഷ്, വൈസ് പ്രസിഡന്‍റ് മനോജ് കരീമഠം, അംഗം ബിജു മാന്താറ്റിൽ, തിരുവാർപ്പ് പഞ്ചായത്ത് പ്രസിഡന്‍റ് ഒ.എസ്. അനീഷ് കുമാർ, അംഗങ്ങളായ കെ.ആർ. അജയ്, റൂബി ചാക്കോ, കുമരകം ഗ്രാമപഞ്ചായത്ത് പ്രസിഡന്‍റ് ധന്യ സാബു, വൈസ് പ്രസിഡന്‍റ് ആർഷാ ബൈജു, അംഗങ്ങളായ സ്മിത സുനിൽ, മായാ സുരേഷ് തുടങ്ങിയവരും വിവിധ സ്ഥലങ്ങളിൽ മന്ത്രിയോടൊപ്പമുണ്ടായിരുന്നു. ദുരിതാശ്വാസ ക്യാന്പുകളിൽ അടിസ്ഥാനസൗകര്യങ്ങൾ ഒരുക്കിയതായി മന്ത്രി ദുരിതാശ്വാസ ക്യാമ്പുകളിൽ എല്ലാ സൗകര്യങ്ങളും ഒരുക്കിയിട്ടുണ്ടെന്ന് മന്ത്രി വി.എൻ. വാസവൻ പറഞ്ഞു. പടിഞ്ഞാറൻ മേഖലയിലെ ദുരിതാശ്വാസ ക്യാമ്പുകൾ സന്ദർശിച്ച ശേഷം സംസാരിക്കുകയായിരുന്നു അദ്ദേഹം. ഭക്ഷണം, മരുന്ന് തുടങ്ങി എല്ലാ അടിസ്ഥാനാവശ്യങ്ങളും ഒരുക്കിയിട്ടുണ്ട്. ആംബുലൻസ് സൗകര്യം വേണ്ടിവന്നാൽ ഉപയോഗിക്കാനായി സജ്ജമാക്കിയിട്ടുണ്ട്. എല്ലാ സഹായങ്ങളുമായി ജില്ലാ ഭരണകൂടവും ജനപ്രതിനിധികളും ദുരിതബാധിതർക്കൊപ്പമുണ്ടെന്നും മന്ത്രി പറഞ്ഞു. കെ.എസ്.ഇ.ബി., അഗ്‌നിരക്ഷാസേന, പോലീസ് തുടങ്ങിയ വകുപ്പുകളുടെ സേവനവും മുഴുവൻ സമയവും ജനങ്ങൾക്ക് ഉറപ്പാക്കിയിട്ടുണ്ടെന്നും മന്ത്രി പറഞ്ഞു.

പാലാ ടൗണ്‍ കുരിശുപള്ളി വിശ്വാസത്തിന്‍റെ ഉയരം സംസാരിക്കുന്നു: മാര്‍ കല്ലറങ്ങാട്ട്

പാലാ: വിശ്വാസത്തിന്‍റെ ഉയരമാണ് പാലാ ടൗണ്‍ കുരിശുപള്ളി നമ്മോട് സംസാരിക്കുന്നതെന്നും സംസ്‌കാരത്തിന്‍റെയും പാരമ്പര്യത്തിന്‍റെയും പ്രതീകമായ ഈ കുരിശുപള്ളി പൊതുസമൂഹത്തിന്‍റെ സമ്പത്താണെന്നും ബിഷപ് മാര്‍ ജോസഫ് കല്ലറങ്ങാട്ട്. നവീകരിക്കപ്പെട്ട പാലാ ടൗണ്‍ അമലോത്ഭവ ജൂബിലി കുരിശുപള്ളിയുടെ ആശീര്‍വാദകര്‍മം നിര്‍വഹിച്ച് സന്ദേശം നല്‍കുകയായിരുന്നു ബിഷപ്. പാലായുടെ ഹൃദയത്തിലുള്ള ഈ കുരിശുപള്ളി ക്രിസ്തീയതയുടെ തുടര്‍ച്ചയും ദൈവം ഇവിടെയുണ്ടെന്നുള്ള ഓര്‍മപ്പെടുത്തലുമാണ്. പൗരാണിക മഹിമയുള്ള നിരവധിയായ നിര്‍മിതികള്‍ സംരക്ഷിക്കുക എന്നത് നമ്മുടെ കടമയാണ്. നിലനില്‍ക്കുന്ന കാര്യങ്ങളുടെ മഹത്വം മറ്റുള്ളവരെ പറഞ്ഞ് പഠിപ്പിക്കാന്‍ നമുക്ക് ചുമതലയുണ്ട്. ഈ കപ്പേള ഏതു മതവിഭാഗങ്ങളിലുള്ളവരെയും ധാര്‍മികമായി ഉയര്‍ത്തുന്നുവെന്നും വിശാല സമൂഹത്തെ ബലപ്പെടുത്തുന്നുവെന്നും ബിഷപ് പറഞ്ഞു. കത്തീഡ്രല്‍ വികാരി ഫാ. ജോസ് കാക്കല്ലില്‍, ളാലം പഴയപള്ളി വികാരി ഫാ. ജോസഫ് തടത്തില്‍, ളാലം പുത്തന്‍പള്ളി വികാരി ഫാ. ജോര്‍ജ് മൂലേച്ചാലില്‍, ടൗണ്‍ കുരിശുപള്ളി ഇന്‍ ചാര്‍ജ് ഫാ.ജോര്‍ജ് തറപ്പേല്‍, ഫാ.ജോസഫ് ആലഞ്ചേരില്‍, ഫാ.ചെറിയാന്‍ കുന്നക്കാട്ട്, ഫാ.സെബാസ്റ്റ്യന്‍ ആലപ്പാട്ടുകോട്ടയില്‍, ഫാ.സ്‌കറിയ മേനാംപറമ്പില്‍, ഫാ. ഐസക് പെരിങ്ങാമലയില്‍, ഫാ.ആന്‍റണി നങ്ങാപറമ്പില്‍ തുടങ്ങിയവര്‍ പ്രാര്‍ഥനാ ശുശ്രൂഷകള്‍ക്ക് നേതൃത്വം നല്‍കി. ഇന്നലെ വൈകുന്നേരം 5.30 ന് ജപമാല, വണക്കമാസ പ്രാര്‍ഥന സമാപനം, പുറത്ത് നമസ്‌കാരം എന്നിവയും നടന്നു. വൈദികര്‍, സന്യസ്ഥര്‍, വിശ്വാസികള്‍ തുടങ്ങിയവര്‍ പങ്കെടുത്തു. കുരിശുപള്ളി നവീകരണ പ്രവര്‍ത്തനങ്ങള്‍ക്ക് നേതൃത്വം നല്‍കിയവരെ ആദരിച്ചു. ചടങ്ങുകള്‍ക്ക് കൈകാരന്‍മാരായ ജോണി പന്തപ്ലാക്കല്‍, തോമസ് മേനാംപറമ്പില്‍, ജോയി പുളിക്കല്‍, കമ്മിറ്റിയംഗങ്ങള്‍ എന്നിവര്‍ നേതൃത്വം നല്‍കി.

രക്തദാനം നടത്തി ഷിബു തെക്കേമറ്റത്തിന്‍റെ വിരമിക്കല്‍

കൊഴുവനാല്‍: വിളക്കുമാടം സെന്‍റ് ജോസഫ് ഹയര്‍ സെക്കൻഡറി സ്‌കൂള്‍ ലാബ് അസ്സിസ്റ്റന്‍റ് ഷിബു തെക്കേമറ്റത്തിന്‍റെ വിരമിക്കല്‍ വ്യത്യസ്തതയാൽ ശ്രദ്ധേയമായി. പാലാ ബ്ലഡ് ഫോറം ജനറല്‍ കണ്‍വീനര്‍ കൂടിയായ ഷിബു മരിയന്‍ മെഡിക്കല്‍ സെന്‍റര്‍ ബ്ലഡ് ബാങ്കിലെത്തി 127ാം തവണ രക്തം ദാനം ചെയ്തും കൊഴുവനാല്‍ ഗേള്‍സ് ടൗണ്‍ ഓഡിറ്റോറിയത്തില്‍ സ്‌നേഹസംഗമം നടത്തിയുമാണ് വിരമിക്കല്‍ വ്യത്യസ്ഥമാക്കിയത്. മാര്‍ ജേക്കബ് മുരിക്കന്‍, യാക്കോബായ സുറിയാനി സഭയുടെ മുംബൈ ഭദ്രാസനാധിപന്‍ തോമസ് മോര്‍ അലക്‌സന്ത്രയോസ്, ഫ്രാന്‍സിസ് ജോര്‍ജ് എംപി , മാണി സി കാപ്പന്‍ എംഎല്‍ എ, മോന്‍സ് ജോസഫ് എംഎല്‍എ, ജില്ലാ പഞ്ചായത്ത് മെംബര്‍മാരായ ജോസ്മോന്‍ മുണ്ടയ്ക്കന്‍,രാജേഷ് വാളിപ്ലാക്കല്‍, സ്‌കൂള്‍ മാനേജര്‍ ഫാ. ജോര്‍ജ് മണ്ണുകുശുമ്പില്‍, കൊഴുവനാല്‍ പള്ളി വികാരി ഫാ. ജോസ് നെല്ലിക്കത്തെരുവില്‍, ബ്ലോക്ക് പഞ്ചായത്ത് പ്രസിഡന്‍റ് ജസി ജോര്‍ജ്, കൊഴുവനാല്‍ പഞ്ചായത്ത് പ്രസിഡന്‍റ് ലീലാമ്മ ബിജു, മുത്തോലി പഞ്ചായത്ത് പ്രസിഡന്‍റ് രഞ്ജിത്ത് മീനാഭവന്‍, പ്രിന്‍സിപ്പൽ ജോബി സെബാസ്റ്റ്യന്‍ തുടങ്ങിയവര്‍ പ്രസംഗിച്ചു.

വെള്ളക്കെട്ടില്‍ വലഞ്ഞ് നാട്ടുകാര്‍

രാമപുരം: മഴ കനത്തതോടെ രാമപുരം - കൂത്താട്ടുകുളം റോഡില്‍ അമ്പലം ജംഗ്ഷനില്‍ ആര്‍വിഎം ലൈബ്രറിക്ക് സമീപം റോഡില്‍ വെളളക്കെട്ട് രൂപപ്പെട്ടതിനെ തുടർന്ന് വലഞ്ഞ് യാത്രക്കാര്‍. മഴപെയ്യുമ്പോള്‍ സമീപത്തുള്ള വഴികളിലൂടെ ഒഴുകിയെത്തുന്ന വെള്ളം റോഡിലേക്കു നേരിട്ട് എത്തുന്നതിനാലാണ് ഇവിടെ വെള്ളക്കെട്ട് രൂപപ്പെടുന്നത്. റോഡിന് ഇരുവശത്തും ഓടകള്‍ ഉണ്ടെങ്കിലും അവ എക്കല്‍ കയറി അടഞ്ഞാണ് കിടക്കുന്നത്. ഓടയിലൂടെ ഒഴുകി പോകേണ്ട വെള്ളം റോഡില്‍ കെട്ടിക്കിടക്കുകയും ചെയ്യും. ഇരുചക്ര വാഹനങ്ങള്‍ ഇവിടെ അപകടത്തില്‍പ്പെടുന്നത് പതിവാണ്. വേഗത്തിലെത്തുന്ന വലിയ വാഹനങ്ങള്‍ വെള്ളക്കെട്ടില്‍ക്കൂടി പോകുമ്പോള്‍ സമീപത്തുകൂടി സഞ്ചരിക്കുന്ന കാല്‍നടയാത്രക്കാരുടെയും ഇരുചക്ര വാഹന യാത്രക്കാരുടെയും ദേഹത്തേക്കു വെള്ളം തെറിക്കുന്നതും നിത്യസംഭവമാണ്. പിഡബ്ലൂഡി അധികാരികള്‍ ഈ പ്രശ്നത്തില്‍ ഇടപെട്ട് അടിയന്തരമായി ഓടയിലെ എക്കല്‍ നീക്കുകയും ഓട ഇല്ലാത്ത ഭാഗത്ത് പുതിയ ഓട പണിയുകയും ചെയ്യണമെന്ന് നാട്ടുകാര്‍ ആവശ്യപ്പെട്ടു.

തീക്കോയി ഗവണ്‍മെന്‍റ് ടെക്നിക്കല്‍ ഹൈസ്‌കൂള്‍ കെട്ടിടം മന്ത്രി ആര്‍. ബിന്ദു ഉദ്ഘാടനം ചെയ്തു

തീക്കോയി: കാലത്തിന്‍റെ വെല്ലുവിളികളെ നേരിടാന്‍ വരും തലമുറയെ പ്രാപ്തരാക്കുകയെന്ന ലക്ഷ്യത്തോടെയാണ് ഉന്നത വിദ്യാഭ്യാസ രംഗത്ത് സര്‍ക്കാര്‍ മികച്ച സൗകര്യങ്ങളൊരുക്കുന്നതെന്ന് മന്ത്രി ഡോ. ആര്‍. ബിന്ദു. തീക്കോയി ഗവണ്‍മെനന്‍റ് ടെക്നിക്കല്‍ ഹൈസ്‌കൂളിന് 8.5 കോടി രൂപാ ചെലവിട്ടു നിര്‍മിച്ച കെട്ടിടത്തിന്‍റെ ഉദ്ഘാടനം നിര്‍വഹിച്ച് പ്രസംഗിക്കുകയായിരുന്നു മന്ത്രി. സെബാസ്റ്റ്യന്‍ കുളത്തുങ്കല്‍ എം.എല്‍.എ. അധ്യക്ഷത വഹിച്ചു. തീക്കോയി പഞ്ചായത്ത് വൈസ് പ്രസിഡന്‍റ് രാജി തോമസ്, ഈരാറ്റുപേട്ട നഗരസഭാംഗങ്ങളായ സുഹാനാ ജിയാസ്, പി. എം. അബ്ദുള്‍ ഖാദര്‍, തീക്കോയി പഞ്ചായത്തംഗം ജയറാണി തോമസുകുട്ടി, ബിനോയ് ജോസഫ്, മോഹനന്‍ കുട്ടപ്പന്‍, നഗരസഭാംഗം നസീറാ സുബൈര്‍, പഞ്ചായത്തംഗം അമ്മിണി തോമസ്, സാങ്കേതിക വിദ്യാഭ്യാസ ഡയറക്ടറേറ്റ് സീനിയര്‍ ജോയിന്‍റ് ഡയറക്ടര്‍ അനി എബ്രഹാം, റീജണല്‍ ഡയറക്ടറേറ്റ് അസ്സിസ്റ്റന്‍റ് ഡയറക്ടര്‍ ആര്‍. രാജേഷ്, തീക്കോയി ഗവൺമെന്‍റ് ടെക്‌നിക്കല്‍ ഹൈസ്‌കൂള്‍ സൂപ്രണ്ട് കെ. ദാമോദരന്‍ എന്നിവര്‍ പ്രസംഗിച്ചു. സാങ്കേതിക വിദ്യാഭ്യാസ ഡയറക്ടറേറ്റു വഴി സംസ്ഥാന സര്‍ക്കാര്‍ അനുവദിച്ച 7.5 കോടി രൂപയും സെബാസ്റ്റ്യന്‍ കുളത്തുങ്കല്‍ എംഎല്‍എയുടെ ആസ്തി വികസന ഫണ്ടില്‍ നിന്നുള്ള ഒരുകോടി രൂപയും ചെലവിട്ടാണ് പുതിയ കെട്ടിടം നിര്‍മിച്ചത്. പൂഞ്ഞാര്‍ നിയോജക മണ്ഡലത്തിലെ ഏക ടെക്‌നിക്കല്‍ ഹൈസ്‌കൂളായ തീക്കോയി ഗവണ്‍മെന്‍റ് ടെക്നിക്കല്‍ ഹൈസ്‌കൂള്‍ നാലു പതിറ്റാണ്ടായി തീക്കോയി പഞ്ചായത്തിലെ വാടക കെട്ടിടത്തിലാണ് പ്രവര്‍ത്തിച്ചിരുന്നത്. ഈരാറ്റുപേട്ട നഗരസഭയില്‍ ആനിയിളപ്പില്‍ വാങ്ങിയ 2.5 ഏക്കര്‍ സ്ഥലത്താണു സ്‌കൂള്‍ കെട്ടിടം നിര്‍മിച്ചത്.

ഓടകള്‍ വൃത്തിയാക്കും, റോഡിലെ അറ്റകുറ്റപ്പണികള്‍ പൂര്‍ത്തിയാക്കും

പാലാ: മണ്‍സൂണ്‍ ആരംഭിക്കുകയും നാളെ സ്‌കൂള്‍ തുറക്കുകയും ചെയ്യുന്ന സാഹചര്യത്തില്‍ ഓടകള്‍ അടിയന്തരമായി വൃത്തിയാക്കുന്നതിനും റോഡില്‍ നടത്തേണ്ട അറ്റകുറ്റപ്പണികള്‍ അടിയന്തിരമായി പൂര്‍ത്തിയാക്കുന്നതിനും മാണി സി കാപ്പന്‍ എംഎല്‍എ നിര്‍ദ്ദേശം നല്‍കി. പൊതുമരാമത്ത് വകുപ്പ് മുഖേന നടപ്പാക്കുന്ന വിവിധ പദ്ധതികളെ സംബന്ധിച്ച പ്രതിമാസ അവലോകന യോഗത്തിലാണ് നിര്‍ദേശം നല്‍കിയത്. അരുണാപുരം പിഡബ്ല്യുഡി റെസ്റ്റ് ഹൗസില്‍ ചേര്‍ന്ന യോഗത്തില്‍ റോഡ്, പാലം, കെട്ടിട വിഭാഗം, കെഎസ്ടിപി, റോഡ് മെയിന്‍റനന്‍സ്, ജല്‍ ജീവന്‍ മിഷന്‍ ഉദ്യോഗസ്ഥര്‍ തുടങ്ങിയവര്‍ പങ്കെടുത്തു. പൊതുജനങ്ങളില്‍ നിന്ന് ലഭിച്ച നിവേദനങ്ങള്‍ ബന്ധപ്പെട്ട ഉദ്യോഗസ്ഥരുടെ ശ്രദ്ധയില്‍പ്പെടുത്തുകയും ശ്രദ്ധിക്കേണ്ട നടപടികള്‍ സംബന്ധിച്ച് നിര്‍ദ്ദേശം നല്‍കുകയും ചെയ്തു. റോഡിന്‍റെ വശങ്ങളില്‍ അപകടകരമായി നില്‍ക്കുന്ന വൃക്ഷശിഖരങ്ങള്‍ ഒടിഞ്ഞുവീണ് അപകടങ്ങള്‍ ഉണ്ടാവുകയും പതിവായി വൈദ്യുതി മുടക്കത്തിന് കാരണമാകുകയും ചെയ്യുന്നതിനാല്‍ അവ അടിയന്തരമായി മുറിച്ചുമാറ്റുന്നതിന് നടപടികള്‍ സ്വീകരിക്കാന്‍ പൊതുമരാമത്ത് വകുപ്പ് അസിസ്റ്റന്‍റ് എന്‍ജിനിയര്‍മാരോട് ആവശ്യപ്പെട്ടു. ജല്‍ ജീവന്‍ പദ്ധതിയുടെ ഭാഗമായി തദ്ദേശസ്ഥാപനങ്ങളുടെയും പൊതുമരാമത്ത് വകുപ്പിന്‍റെയും റോഡുകള്‍ ഏറ്റെടുത്ത് നടത്തിവരുന്ന പ്രവര്‍ത്തികള്‍ യുദ്ധകാലാടിസ്ഥാനത്തില്‍ പൂര്‍ത്തിയാക്കുന്നതിനും മുന്നറിയിപ്പ് ബോര്‍ഡുകള്‍ സ്ഥാപിക്കുന്നതിനും ജൽ ജീവന്‍ മിഷന്‍ അധികൃതരോട് ആവശ്യപ്പെട്ടു.

ഡോ. ടി.സി. തങ്കച്ചന്‍ ബിഎഡ് കോളജ് പ്രിന്‍സിപ്പല്‍

പാലാ: സെന്‍റ് തോമസ് കോളജ് ഓഫ് ടീച്ചര്‍ എഡ്യൂക്കേഷന്‍ പ്രിന്‍സിപ്പലായി ഡോ. ടി.സി. തങ്കച്ചന്‍ നിയമിതനായി. അധ്യാപക പരിശീലനത്തില്‍ 25 വര്‍ഷമായി സേവനം ചെയ്തുകൊണ്ടിരിക്കുന്ന ഡോ. ടി. സി തങ്കച്ചന്‍ എംജി യൂണിവേഴ്‌സിറ്റിയില്‍ നിന്ന് പൊളിറ്റിക്കല്‍ സയന്‍സില്‍ ഒന്നാം റാങ്കോടെ ബിരുദാനന്തരബിരുദം കരസ്ഥമാക്കിയിട്ടുണ്ട്. കൂടാതെ ഇംഗ്ലീഷ് സാഹിത്യം, സോഷ്യോളജി, മനഃശാസ്ത്രം, ഫിലോസഫി, ജേര്‍ണലിസം, മാസ് കമ്മ്യൂണിക്കേഷന്‍, വിദ്യാഭ്യാസം എന്നീ വിഷയങ്ങളില്‍ ബിരുദാനന്തര ബിരുദവും വിദ്യാഭ്യാസത്തില്‍ എംഫില്‍, പിഎച്ച്ഡി എന്നിവയും നേടിയിട്ടുണ്ട്. 30 ഗ്രന്ഥങ്ങളുടെയും നൂറിലധികം പ്രബന്ധങ്ങളുടെയും ഇരുപതിലധികം എഡിറ്റഡ് ബുക്കുകളുടെ രചയിതാവും പ്രഭാഷകനും ഗവേഷകനും സംഘാടകനും നിരവധി പുരസ്‌കാരങ്ങള്‍ക്ക് അര്‍ഹനുമായ വ്യക്തിയുമാണ്. എംജി യൂണിവേഴ്സിറ്റി സ്‌കൂള്‍ ഓഫ് പെഡഗോഗിക്കല്‍ സയന്‍സിലെ ഗൈഡൻസായി സേവനം ചെയ്യുന്നു. പൗരസ്ത്യ വിദ്യാപീഠം സെനറ്റ് അംഗം, പാലാ സെന്‍റ് തോമസ് കോളജ്, ചൂണ്ടച്ചേരി സെന്‍റ് ജോസഫ് എൻജിനിയറിംഗ് കോളജ് എന്നിവയില്‍ അക്കാഡമിക് കൗണ്‍സില്‍ അംഗം, സൊസൈറ്റി ഓഫ് ഇന്നോവറ്റീവ് റിസര്‍ച്ചര്‍സ് ആന്‍ഡ് അക്കാഡമിഷ്യന്‍സ് എന്ന സംഘടനയുടെ പ്രസിഡന്‍റ്, സേവ്യര്‍ ബോര്‍ഡ്, ഓള്‍ ഇന്ത്യ അസോസിയേഷന്‍ ഫോര്‍ ക്രിസ്ത്യന്‍ ഹയര്‍ എഡ്യൂക്കേഷന്‍ എന്നിവയുടെ ദക്ഷിണകേരള വൈസ് പ്രസിഡന്‍റ് എന്നീ നിലകളിലും പ്രവര്‍ത്തിക്കുന്നു. 2020 മുതല്‍ കോളജിന്‍റെ വൈസ് പ്രിന്‍സിപ്പലായി സേവനം ചെയ്തുവരികയായിരുന്നു.

വിശ്വാസം ജീവിതസാക്ഷ്യമാണ്: മാര്‍ ജോസ് പുളിക്കല്‍

കാഞ്ഞിരപ്പള്ളി: വിശ്വാസം ജീവിതസാക്ഷ്യമാണെന്നും അനുദിന ജീവിത സാഹചര്യങ്ങളിലാണ് വിശ്വാസം തെളിയിക്കപ്പെടുന്നതെന്നും കാഞ്ഞിരപ്പള്ളി രൂപതാധ്യക്ഷന്‍ മാര്‍ ജോസ് പുളിക്കല്‍. രൂപത വിശ്വാസജീവിത പരിശീലനകേന്ദ്രത്തിന്‍റെയും ചെറുപുഷ്പ മിഷന്‍ലീഗിന്‍റെയും വാര്‍ഷികാഘോഷം കാഞ്ഞിരപ്പള്ളി പാസ്റ്ററല്‍ സെന്‍ററില്‍ ഉദ്ഘാടനം ചെയ്ത് പ്രസംഗിക്കുകയായിരുന്നു ബിഷപ്. ജീവിതത്തിലെ പ്രശ്‌നങ്ങളിലും പ്രതിസന്ധികളിലും തളരാതെ മുന്നേറാന്‍ വിശ്വാസം അനിവാര്യമാണെന്നും മാര്‍ ജോസ് പുളിക്കല്‍ പറഞ്ഞു. രൂപത പ്രോട്ടോസിഞ്ചെല്ലൂസ് റവ. ഡോ. ജോസഫ് വെള്ളമറ്റം അധ്യക്ഷത വഹിച്ചു. രൂപത സിഞ്ചെല്ലൂസ് ഫാ. സെബാസ്റ്റ്യന്‍ കൊല്ലംകുന്നേല്‍, ഫാ. വര്‍ഗീസ് കൊച്ചുപറമ്പില്‍ എന്നിവര്‍ പ്രസംഗിച്ചു. മതാധ്യാപനരംഗത്ത് 50 വര്‍ഷങ്ങള്‍ പൂര്‍ത്തിയാക്കിയ നാല് അധ്യാപകര്‍ക്കും 25 വര്‍ഷങ്ങള്‍ പൂര്‍ത്തിയാക്കിയ 29 അധ്യാപകര്‍ക്കും പുരസ്‌കാരങ്ങള്‍ നല്‍കുകയും വിവിധ മേഖലകളില്‍ മികവ് തെളിയിച്ച സണ്‍ഡേ സ്‌കൂളുകളെയും കുട്ടികളെയും ആദരിക്കുകയും ചെയ്തു. കഴിഞ്ഞ 12 വര്‍ഷവും മുടങ്ങാതെ എല്ലാ ഞായറാഴ്ചകളിലും വിശ്വാസജീവിത പരിശീലനത്തില്‍ പങ്കെടുത്ത 25 കുട്ടികളെ പ്രത്യേക പുരസ്‌കാരങ്ങള്‍ നൽകി ആദരിച്ചു. തുടര്‍ന്ന് വിശ്വാസജീവിത പരിശീലനകേന്ദ്രം രൂപത ഡയറക്ടര്‍ ഫാ. തോമസ് വാളന്മനാലിന്‍റെ നേതൃത്വത്തില്‍ പ്രധാനാധ്യാപകര്‍, സ്റ്റാഫ് സെക്രട്ടറിമാര്‍, ഫൊറോന സെക്രട്ടറിമാര്‍ എന്നിവരുടെ സമ്മേളനവും നടത്തി. സമ്മേളനത്തോടനുബന്ധിച്ച് അടുത്ത അധ്യയനവര്‍ഷത്തെ കര്‍മപദ്ധതികളുടെ വിശദീകരണവും ചര്‍ച്ചകളും നടത്തി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact editor@deepika.com