ADVERTISEMENT

ADVERTISEMENT

പോക്‌സോ കേസില്‍ യുവാവ് അറസ്റ്റില്‍

പാമ്പാടി: പ്രായപൂര്‍ത്തിയാകാത്ത പെണ്‍കുട്ടിക്കുനേരെ ലൈംഗികാതിക്രമം നടത്താന്‍ ശ്രമിച്ചതിന് യുവാവിനെ പോലീസ് അറസ്റ്റ് ചെയ്തു.

പാമ്പാടി വെള്ളൂര്‍ കുറിച്ചിമല താന്നിമറ്റത്തില്‍ ജിബിന്‍ ബാബുവി(20) നെയാണ് പാമ്പാടി പോലീസ് അറസ്റ്റ് ചെയ്തത്. പരാതിയെ തുടര്‍ന്ന് പാമ്പാടി പോലീസ് കേസ് രജിസ്റ്റര്‍ ചെയ്യുകയും ഇയാളെ പിടികൂടുകയുമായിരുന്നു.

ADVERTISEMENT

വൈകല്യങ്ങളെ കൈവല്യങ്ങളാക്കാൻ ഹോളിക്രോസ് സ്‌പെഷൽ സ്‌കൂളിൽ ഡിജിറ്റൽ വിദ്യാഭ്യാസ പദ്ധതിയും

മണ്ണയ്ക്കനാട്: പ്രവേശനോത്സവത്തിന് ഇരട്ടി മധുരം സമ്മാനിച്ച് ഹോളിക്രോസ് സ്‌പെഷൽ സ്‌കൂളിൽ ഡിജിറ്റൽ വിദ്യാഭ്യാസ പദ്ധതിക്ക് ഇന്ന് തുടക്കമാകും. ഇന്ന് രാവിലെ 10.30 ന് മോൻസ് ജോസഫ് എംഎൽഎ പദ്ധതി ഉദ്ഘാടനം ചെയ്യും. വിദേശ രാജ്യങ്ങളിൽ നടപ്പിലാക്കിയ ഡിജിറ്റലൈസ്ഡ് ലേണിംഗ് പ്രോഗ്രാമിന്‍റെ മാതൃകയിലാണ് സ്‌പെഷൽ സ്‌കൂൾ വിദ്യാർഥികൾക്കായി ഈ പദ്ധതി ആരംഭിക്കുന്നതെന്ന് പ്രിൻസിപ്പൽ സിസ്റ്റർ ബോബി പോൾ പറഞ്ഞു. വെർജ് ടാബ് ഉപയോഗിച്ച് പതിനെട്ട് വയസിൽ താഴെയുള്ള 30 കുട്ടികൾക്ക് ഒരേ സമയം പഠിക്കാൻ കഴിയുന്ന രീതിയിലാണ് ക്രമീകരണം. പ്രത്യേക പരിശീലനം പൂർത്തിയാക്കിയ 22 അധ്യാപകർ സ്‌കൂളിലുണ്ട്. തൊഴിൽ നൈപുണ്യ പരിശീലനവും കലാ കായിക മേഖലയിൽ കഴിവ് വികസിപ്പിക്കുന്നതിനും പ്രത്യേക പദ്ധതികൾ സ്‌കൂളിൽ ക്രമീകരിച്ചിട്ടുണ്ട്. ഹോളിക്രോസ് അങ്കമാലി പ്രൊവിൻഷ്യൽ സിസ്റ്റർ എൽസി ജോർജ് അധ്യക്ഷത വഹിക്കും. ഡോ. ജിനോ മുഖ്യപ്രഭാഷണം നടത്തും. ഹോളിക്രോസ് പള്ളി വികാരി ഫാ. തോമസ് പഴവക്കാട്ടിൽ, കുറവിലങ്ങാട് പഞ്ചായത്ത് പ്രസിഡന്‍റ് മിനി മത്തായി, മരങ്ങാട്ടുപിള്ളി പഞ്ചായത്തംഗം തുളസിദാസ്, സാന്താക്രൂസ് എൽപി സ്‌കൂൾ ഹെഡ്മിസ്ട്രസ് എൽസി സ്‌കറിയ, സ്‌കൂൾ മാനേജർ സിസ്റ്റർ ഫബി ജോസഫ് , പിടിഎ പ്രസിഡന്‍റ് സുനിൽ സിറിയക് , പ്രിൻസിപ്പൽ സിസ്റ്റർ ബോബി പോൾ എന്നിവർ പ്രസംഗിക്കും.

ആശാ പ്രവർത്തകരുടെ സമരം മാർക്സിസ്റ്റ് പാർട്ടിയുടെ ഇരട്ടത്താപ്പ് തുറന്നുകാട്ടിയെന്ന്

കാഞ്ഞിരപ്പള്ളി: കേരളത്തിലെ പൊതു സമൂഹം ഏറ്റെടുത്ത ആശാ വർക്കർമാരുടെ സമരം തൊഴിലാളി വർഗ പാർട്ടിയെന്ന് മേനി നടിക്കുന്ന മാർക്സിസ്റ്റ് പാർട്ടിയുടെ ഇരട്ടത്താപ്പ് തുറന്നുകാട്ടിയെ ന്ന് ആശാവർക്കർമാരുടെ രാപ്പകൽ സമര ജാഥയുടെ ക്യാപ്റ്റൻ എം.എ. ബിന്ദു പറഞ്ഞു. ഓണറേറിയം വർധിപ്പിക്കുക, വിരമിക്കൽ ആനുകൂല്യം പ്രഖ്യാപിക്കുക തുടങ്ങിയ ആവശ്യങ്ങൾ ഉന്നയിച്ചുകൊണ്ട് കേരള ആശാ ഹെൽത്ത് വർക്കേഴ്സ് അസോസിയേഷൻ നടത്തുന്ന രാപ്പകൽ സമര യാത്രക്ക് യുഡിഎഫ് ടൗണിൽ നൽകിയ സ്വീകരണത്തിന് നന്ദി പറയുകയായിരുന്നു എം.എ. ബിന്ദു. കോൺഗ്രസ് കാഞ്ഞിരപ്പള്ളി ബ്ലോക്ക് പ്രസിഡന്‍റ് പി. ജീരാജിന്‍റെ അധ്യക്ഷതയിൽ ഡിസിസി ജനറൽ സെക്രട്ടറി പ്രഫ. റോണി കെ. ബേബി ഉദ്ഘാടനം ചെയ്തു. ഡിസിസി ജനറൽ സെക്രട്ടറി പി.എ ഷെമീർ മുഖ്യപ്രഭാഷണം നടത്തി. കേരള ആശാ ഹെൽത്ത് വർക്കേഴ്സ് അസോസിയേഷൻ സംസ്ഥാന വൈസ് പ്രസിഡന്‍റ് എസ് മിനി, അബ്ദുൾ കരീം മുസലിയാർ, ബിജു പത്യാല, നാസർ കോട്ടവാതിൽക്കൽ, സുനിൽ തേനമ്മാക്കൽ, ഡാനി ജോസ് കുന്നത്ത് തുടങ്ങിയവർ പ്രസംഗിച്ചു. മുണ്ടക്കയം: ആശാ വർക്കർമാർ നടത്തുന്ന രാപകൽ സമര യാത്രയ്ക്ക് മുണ്ടക്കത്ത് സ്വീകരണം നൽകി. ആന്‍റോ ആന്‍റണി എംപി ഉദ്ഘാടനം ചെയ്തു. സ്വാഗത സംഘം ചെയർമാൻ കെ.എസ്. രാജു അധ്യക്ഷത വഹിച്ചു. രാപകൽ സമര യാത്ര ക്യാപ്റ്റൻ എം.എ. ബിന്ദു, എസ്. മിനി, മേഖല കോ ഓർഡിനേറ്റർ കെ.പി. മായാമോൾ, ജോമോൻ ഐക്കര, പ്രകാശ് പുളിക്കൻ, ടി.സി. ഷാജി, ചാൾസ് ആന്‍റണി, ഷാഹിദ റഹിം, സിജു കൈതമറ്റം, ഇമാം അബ്ദുൾ റഷീദ്, രാജീവ് പുഞ്ചവയൽ, തമ്പി കാവുംപാടം, ബിനു മറ്റക്കര, പി.ടി. നൗഷാദ്, പി.കെ. റസാക്ക്, ടി.സി. സെയ്ദ് മുഹമ്മദ്, ഷാജി അറത്തിൽ, റോയി കപ്പലുമാക്കൽ, ടി.ടി. സാബു എന്നിവർ പ്രസംഗിച്ചു.

മുണ്ടക്കയം പഞ്ചായത്തിന്‍റെ കാമറ കണ്ണുകൾ പണി തുടങ്ങി മാലിന്യ നിക്ഷേപകർക്കെതിരേ കർശന നടപടി

മുണ്ടക്കയം: പൊതുനിരത്തിൽ മാലിന്യം തള്ളുന്നവർ സൂക്ഷിക്കുക. നിങ്ങളെ പിടികൂടാൻ കാമറ കണ്ണുകൾ തുറന്നിരിക്കുന്നു. മുണ്ടക്കയം പഞ്ചായത്തിന്‍റെ നേതൃത്വത്തിൽ വിവിധ ഇടങ്ങളിൽ സ്ഥാപിച്ചിരിക്കുന്ന കാമറകളിലാണ് മാലിന്യം തള്ളിയവർ കുടുങ്ങിത്തുടങ്ങിയത്. കഴിഞ്ഞദിവസം രാത്രിയിൽ മുണ്ടക്കയം ടൗണിൽ ദേശീയപാതയിൽ പച്ച മീൻ കടയിൽ നിന്നു മാലിന്യം തള്ളിയവർക്കെതിരേ നടപടി ആരംഭിച്ചു. കൂടാതെ കഴിഞ്ഞ ദിവസം രാത്രി 10ാടെ മുണ്ടക്കയം- എരുമേലി റൂട്ടിൽ ഇല്ലികൂപ്പ് ഭാഗത്ത് തള്ളിയ വ്യക്തിയെ കാമറ പരിശോധിച്ചതിന്‍റെ അടിസ്ഥാനത്തിൽ പോലീസിന്‍റെ സഹായത്തോടെ കണ്ടെത്തി. ആദ്യഘട്ടമെന്ന നിലയിൽ കേസ് എടുക്കാതെ താക്കീത് നൽകി 5000 രൂപ ഫൈൻ ഈടാക്കി വിട്ടയച്ചു. മാലിന്യം തള്ളുന്നവരെ പിടികൂടുകയെന്ന ലക്ഷ്യത്തോടെ മുണ്ടക്കയം പഞ്ചായത്ത് വിവിധ ഭാഗങ്ങളിലായി 12 കാമറകളാണ് സ്ഥാപിച്ചിരിക്കുന്നത്. പഞ്ചായത്ത് ഓഫീസിൽ ക്രമീകരിച്ചിരിക്കുന്ന മോണിറ്ററിൽ വിവിധ സ്ഥലങ്ങളിൽ നിന്നുള്ള കാമറയിലെ ദൃശ്യങ്ങൾ നിരീക്ഷിക്കുവാൻ കഴിയും. ഇതിനായി ഒരു ജീവനക്കാരെ പ്രത്യേകം നിയോഗിച്ചിട്ടുണ്ട്. 360 ഡിഗ്രി തിരിയുന്ന ആധുനിക സംവിധാനങ്ങളോടുകൂടിയ കാമറ പഞ്ചായത്ത് ഓഫീസിൽ ഇരുന്നുകൊണ്ടുതന്നെ നിയന്ത്രിക്കുവാൻ കഴിയുമെന്നതും പ്രത്യേകതയാണ്. അടുത്ത ഘട്ടത്തിൽ കൂടുതൽ കാമറകൾ വിവിധ സ്ഥലങ്ങളിൽ സ്ഥാപിച്ച് പഞ്ചായത്തിനെ മാലിന്യമുക്തമാക്കുവാനാണ് അധികാരികളുടെ തീരുമാനം.

മുക്കൂട്ടുതറയിൽ ക്ഷേത്രത്തിൽ മോഷണശ്രമം: കാണിക്കവഞ്ചി അപഹരിച്ചു

മുക്കൂട്ടുതറ: ടൗണിന് സമീപത്തെ തിരുവമ്പാടി ശ്രീ കൃഷ്ണ സ്വാമി ക്ഷേത്രത്തിൽ മോഷണശ്രമം. തിങ്കളാഴ്ച രാത്രി 11.30 ഓടെ ക്ഷേത്രത്തിൽ കടന്ന മോഷ്ടാവ് പുലർച്ചെ ഒന്നരെ വരെ മോഷണം നടത്താൻ ശ്രമിച്ചു. നേർച്ചക്കുറ്റികൾ കുത്തിതുറന്ന് എടുക്കാൻ നടത്തിയ ശ്രമങ്ങൾ വിഫലമായതിന് ഒടുവിൽ ക്ഷേത്രത്തിന്‍റെ മുന്നിൽ ഇളക്കി എടുക്കാവുന്ന കാണിക്കവഞ്ചി എടുത്തു സ്ഥലം വിട്ട മോഷ്ടാവ് അതിൽ കാര്യമായ തുക ഇല്ലെന്ന് അറിഞ്ഞതോടെ ക്ഷേത്രത്തിന് സമീപത്തെ റബർ തോട്ടത്തിൽ ഉപേക്ഷിച്ചു. സംഭവം സംബന്ധിച്ച് ക്ഷേത്ര ഭാരവാഹികൾ ഇന്നലെ എരുമേലി പോലിസ് സ്റ്റേഷനിൽ പരാതി നൽകി. ക്ഷേത്രത്തിൽ ഒരു വർഷമായി സിസി കാമറകൾ പ്രവർത്തിക്കുന്നുണ്ട്. കാമറകളിൽ പതിഞ്ഞ മോഷ്ടാവിന്‍റെ ദൃശ്യങ്ങൾ ക്ഷേത്ര ഭാരവാഹികൾ പോലീസിന് കൈമാറി. മോഷണ ശ്രമം ഉണ്ടായ ദിവസം പകൽ ക്ഷേത്രത്തിലെ കാണിക്കവഞ്ചികൾ തുറന്ന് സംഭാവന തുകകൾ ഭാരവാഹികൾ ക്ഷേത്രം വക അക്കൗണ്ടിലേക്ക് എടുത്തതിനാൽ മോഷ്ടാവിന് കാര്യമായ പണാപഹരണം നടത്താൻ കഴിഞ്ഞില്ലന്ന് കരുതുന്നു. ഇന്നലെ ക്ഷേത്ര ഭാരവാഹികൾ നടത്തിയ തെരച്ചിലിലാണ് കാണിക്കവഞ്ചി ഇളക്കി എടുത്തതായും സമീപത്തെ റബർ തോട്ടത്തിൽ ഉപേക്ഷിച്ച നിലയിലും കണ്ടെത്തിയത്. മോഷ്ടാവ് കൈകളിൽ ഗ്ലൗസ് ധരിച്ചതായി സിസി കാമറകളിൽ കാണാം. റെയിൻ കോട്ടും പുറകിൽ ബാഗും ധരിച്ച നിലയിലാണ് മോഷ്ടാവിന്‍റെ ദൃശ്യങ്ങൾ.

പെരുന്തേനരുവിയിൽ ഗ്ലാസ് നടപ്പാലം ഉൾപ്പടെ പദ്ധതികൾക്ക് ഏഴ് കോടി

മുക്കൂട്ടുതറ: പെരുന്തേനരുവിയിൽ ഗ്ലാസ് നടപ്പാലം അടക്കമുള്ള പദ്ധതികൾക്കായി സർക്കാർ ഏഴ് കോടി അനുവദിച്ചു. വെള്ളച്ചാട്ടം തൊട്ടുമുകളിൽനിന്ന് കാണത്തക്ക വിധമുള്ള കണ്ണാടി നടപ്പാലം, സുരക്ഷാ സംവിധാനങ്ങൾ, പൂന്തോട്ടം, നദീതീരത്തുകൂടിയുള്ള നടപ്പാത എന്നിവയ്ക്കാണ് തുക. പെരുന്തേനരുവി ടൂറിസം പദ്ധതിയുടെ വികസനം അടക്കമുള്ളവയ്ക്കായി തുക ആവശ്യപ്പെട്ട് നവകേരള സദസ്സിനിടെ പ്രമോദ് നാരായൺ എംഎൽഎ മുഖ്യമന്ത്രിക്ക് നിവേദനം നൽകിയിരുന്നു. ഇതിന്‍റെ അടിസ്ഥാനത്തിലാണ് തുക അനുവദിച്ചത്. ഒരു വർഷം കൊണ്ട് നിർമാണം പൂർത്തിയാക്കാനാണ് ഉദ്ദേശിക്കുന്നത്. ടൂറിസം വകുപ്പിലാണ് നിർമാണ ചുമതല. പഞ്ചായത്തും ഇറിഗേഷൻ വകുപ്പും സ്ഥലം ലഭ്യമാക്കുന്നതോടെ നിർമാണം ആരംഭിക്കാനാകുമെന്ന് എംഎൽഎ പറഞ്ഞു. വെച്ചൂച്ചിറ, നാറാണംമൂഴി പഞ്ചായത്തുകൾ അതിർത്തി പങ്കിടുന്ന പമ്പാനദിയിലെ പെരുന്തേനരുവി വെള്ളച്ചാട്ടം കേന്ദ്രീകരിച്ചുള്ള പെരുന്തേനരുവി ടൂറിസം പദ്ധതിയുടെ വികസനം ഇരുപഞ്ചായത്തുകളുടെയും വികസനത്തിന് വഴി തെളിക്കും. ദിവസേന നൂറു കണക്കിന് സഞ്ചാരികളാണ് ഇവിടെയെത്തുന്നത്. നേരത്തെ, ഇവിടെ വാഹനങ്ങൾക്കുള്ള പാർക്കിംഗ് ഗ്രൗണ്ട്, കുട്ടികളുടെ കളി സ്ഥലം, അരുവിയിലേക്ക് ഇറങ്ങാനുള്ള പടിക്കെട്ടുകൾ, കൈവരികൾ, രണ്ട് കെട്ടിടങ്ങൾ, വെള്ളച്ചാട്ടം ദൂരെ നിന്ന് വീക്ഷിക്കാനുള്ള സംവിധാനങ്ങൾ എന്നിവയെല്ലാം ഒരുക്കിയിട്ടുണ്ട്. അരുവിയിലേക്ക് വളഞ്ഞ് വാഹനം ഇറങ്ങുന്ന റോഡിലെ കൊടും വളവും കുത്തിറക്കവും വീതി കൂട്ടി സൗകര്യപ്രദമാക്കിയിട്ടുണ്ട്. അമിനിറ്റി സെന്‍ററും ഭക്ഷണശാലയും താമസിക്കാനുള്ള മുറികളും ഇപ്പോൾ ഇവിടെ നിലവിലുണ്ട്. ഇതിനൊപ്പമാണ് പുതിയ സൗകര്യങ്ങളും ഒരുക്കുന്നത്.

ബസ് സ്റ്റാൻഡ് കവാടത്തിലെ മലിനജലം യാത്രക്കാർക്കു ദുരിതമാകുന്നു

കാഞ്ഞിരപ്പള്ളി: കാഞ്ഞിരപ്പള്ളി ബസ് സ്റ്റാൻഡ് കവാടത്തിലേക്ക് ഒഴുകിയെത്തുന്ന മലിനജലം യാത്രക്കാർക്കും വ്യാപാരികൾക്കും ദുരിതമാകുന്നു. ഓടകൾ അടഞ്ഞതോടെയാണ് കറുത്ത നിറത്തിലുള്ള മലിന ജലം പുത്തനങ്ങാടി റോഡിലൂടെ ബസ് സ്റ്റാൻഡ് കവാടത്തിലും ദേശീയ പാതയിലുമടക്കം ഒഴുകി പരക്കുന്നത്. കറുത്ത നിറത്തിലുള്ള വെള്ളം ഒഴുകി പോകുന്ന പ്രദേശത്തൊക്കെ കടുത്ത ദുർഗന്ധമാണ് അനുഭവപ്പെടുന്നത്. മത്സ്യ-മാംസ അവശിഷ്ടങ്ങൾ വരെ ഇക്കൂട്ടത്തിലുണ്ടെന്നു വ്യാപാരികൾ പറയുന്നു. പുത്തനങ്ങാടി റോഡിലൂടെ ഒഴുകിയെത്തുന്ന മലിനജലം ദേശീയ പാതയിലാകെ ഒഴുകി പരക്കുന്ന സ്ഥിതിയാണ്. വ്യാപാര സ്ഥാപനങ്ങളുടെ മുന്പിലൂടെയാണ് ഇത് ഒഴുകിയെത്തുന്നത്. ഇവരാണ് ഏറ്റവും കൂടുതൽ ദുരിതം പേറുന്നതും. മൂക്ക് പൊത്തി ഇരിക്കേണ്ട ഗതികേടാണെന്നു വ്യാപാരികൾ പറയുന്നു. ഒഴുകിയെത്തുന്ന മലിനജലം സ്റ്റാൻഡിനു മുന്പിലായി കെട്ടി കിടക്കുന്ന സ്ഥിതിയുമുണ്ട്. മലിനജലമാണെന്നറിയാതെ ഈ വെള്ളത്തിൽ ചവിട്ടിയാണ് വഴിയാത്രക്കാരടക്കം കടന്നു പോകുന്നത്. ദേശീയപാതയിൽനിന്നു ബസുകൾ സ്റ്റാൻഡിലേയ്ക്കു പ്രവേശിക്കുമ്പോൾ വെള്ളം യാത്രക്കാരുടെ മേൽ പതിക്കുന്നതും പതിവാണ്. സമീപത്തായുള്ള ഓട്ടോറിക്ഷ സ്റ്റാൻഡിലെ ഡ്രൈവർമാരും ഇതിന്‍റെ ദുരിതം പേറുന്നവരാണ്. കൃത്യമായി ഓടകൾ വൃത്തിയാക്കിയിരുന്നുവെങ്കിൽ മലിനജലം ഓടകൾ വഴി ഒഴുകി പോയേനെയെന്ന് ഇവർ ചൂണ്ടിക്കാട്ടുന്നു.

ട്രീ ബാങ്കിംഗ് പദ്ധതിയുമായി വനംവകുപ്പ്

കോട്ടയം: പരിസ്ഥിതി സംരക്ഷണത്തിന്‍റെ ഭാഗമായി സ്വകാര്യ ഭൂമിയില്‍ വൃക്ഷത്തിന്‍റെ സാന്ദ്രത വര്‍ധിപ്പിക്കുന്നതിന്‍റെ ഭാഗമായി ട്രീ ബാങ്കിംഗ് പദ്ധതിയുമായി വനംവകുപ്പ്. പദ്ധതിയുടെ ഭാഗമായി അത്യാവശ്യം ഭൂമിയുണ്ടെങ്കില്‍ മരം നട്ടുവളര്‍ത്തി കാശുണ്ടാക്കാം. വനം വകുപ്പിനു കീഴിലുള്ള സോഷ്യല്‍ ഫോറസ്ട്രി വിഭാഗമാണ് പരിസ്ഥിതി ദിനാചരണത്തിന്‍റെ ഭാഗമായി പദ്ധതി നടപ്പാക്കുന്നത്. പദ്ധതിക്കുള്ള അപേക്ഷ സോഷ്യല്‍ ഫോറസ്ട്രി വിഭാഗം ക്ഷണിച്ചു. സ്വന്തമായി ഭൂമിയുള്ളവര്‍ക്കോ കുറഞ്ഞത് 15 വര്‍ഷം ലീസിന് ഭൂമി കൈവശമുള്ളവര്‍ക്കോ ഭൂമിയുമായി ബന്ധപ്പെട്ട രേഖകളോടെ അതത് സോഷ്യല്‍ ഫോറസ്ട്രി റേഞ്ച് ഓഫീസില്‍ പദ്ധതിക്കായി രജിസ്റ്റര്‍ ചെയ്യാം. സര്‍ക്കാര്‍ നിശ്ചയിച്ചിട്ടുള്ള വൃക്ഷത്തൈകള്‍ നട്ടുവളര്‍ത്തുന്ന വ്യക്തികള്‍ക്ക് 15 വര്‍ഷംവരെ ധനസഹായം ലഭിക്കും. 15 വര്‍ഷം പൂര്‍ത്തിയായശേഷം സ്ഥലം ഉടമയ്ക്ക് സോഷ്യല്‍ ഫോറസ്ട്രി ഡിവിഷണല്‍ ഓഫീസിന്‍റെ അനുമതിയോടെ മരങ്ങള്‍ സ്വന്തം ആവശ്യത്തിന് മുറിച്ച് ഉപയോഗിക്കുകയോ വില്‍പന നടത്തുകയോ ചെയ്യാം. പദ്ധതിയില്‍ അംഗങ്ങളാകുന്നവര്‍ വനംവകുപ്പുമായി കരാറില്‍ ഏര്‍പ്പെടണം. തേക്ക്, ഈട്ടി, ചന്ദനം, പ്ലാവ്, ആഞ്ഞിലി, തമ്പകം, കരിമരുത്, കുമ്പിള്‍, വെന്തേക്ക് എന്നീ മരങ്ങള്‍ വച്ചു പിടിപ്പിക്കുന്നതിനാണ് ധനസഹായം. ഈ വര്‍ഷം ചന്ദനത്തൈകള്‍ക്കാണ് മുന്‍തൂക്കം. ചുരുങ്ങിയത് 10 തൈകള്‍മുതല്‍ പരമാവധി 1000 തൈകള്‍വരെ നട്ടുപരിപാലിക്കണം. തൈകള്‍ സൗജന്യമായി വനംവകുപ്പ് നല്‍കും. തൈകള്‍ നട്ടു മൂന്നു വര്‍ഷത്തിനു ശേഷമാണ് ധനസഹായം നല്‍കിത്തുടങ്ങുക. 10 മുതല്‍ നൂറുവരെ മരങ്ങള്‍ക്ക് പ്രതിവര്‍ഷം ഒരു മരത്തിന് 30 രൂപയും 101-250 മരങ്ങള്‍ക്ക് പ്രതിവര്‍ഷം ഒരു മരത്തിന് 25 രൂപയും 251-500 മരങ്ങള്‍ക്ക് 20 രൂപയും 501-750 മരങ്ങള്‍ക്ക് 15 രൂപയും, 751-1000 മരങ്ങള്‍ക്ക് 10 രൂപയുമാണ് ധനസഹായമായി നല്‍കുന്നത്. പദ്ധതിക്കായി അപേക്ഷിക്കേണ്ട അവസാന തീയതി 15. കൂടുതല്‍ വിവരങ്ങള്‍ക്ക് വനം വകുപ്പിന്‍റെ വെബ്സൈറ്റോ സോഷ്യല്‍ ഫോറസ്ട്രി ഡിവിഷന്‍/റെയിഞ്ച് ഫോറസ്റ്റ് ഓഫീസുമായോ ബന്ധപ്പെടണം. ഫോണ്‍: 0481-2310412, 8547603640, 8547603650.

യൂണിഫോം വിതരണം വൈകും

കോട്ടയം: പാഠപുസ്തക വിതരണത്തിലെ ആവേശം യൂണിഫോം വിതരണത്തിലില്ല. പ്രവേശനോത്സവം കഴിഞ്ഞിട്ടും പകുതി യൂണിഫോം പോലും സ്‌കൂളുകളില്‍ എത്തിയിട്ടില്ല. യൂണിഫോമിനു മുഴുവന്‍ അലവന്‍സും അനുവദിച്ചതായി വിദ്യാഭ്യാസ മന്ത്രി കഴിഞ്ഞ മാസം പ്രഖ്യാപനം നടത്തിയിരുന്നു. ഒന്നുമുതല്‍ എട്ടു വരെയുള്ള കുട്ടികള്‍ക്ക് 600 രൂപ ക്രമത്തില്‍ 79 കോടി രൂപയാണ് അനുവദിച്ചത്. പൊതുവിദ്യാഭ്യാസ വകുപ്പിന്‍റെയും കൈത്തറി വകുപ്പിന്‍റെയും സംയുക്താഭിമുഖ്യത്തിലുള്ള പദ്ധതി രണ്ട് തരത്തിലാണ് നടപ്പിലാക്കുന്നത്. എല്‍പി, യുപി സര്‍ക്കാര്‍ സ്‌കൂളുകളിലും ഒന്നുമുതല്‍ നാലു വരെ എയ്ഡഡ് എല്‍പിയിലും കൈത്തറി വകുപ്പാണ് യൂണിഫോം നല്‍കുന്നത്. കൈത്തറി യൂണിഫോം ലഭിക്കാത്ത ഒന്നുമുതല്‍ എട്ടുവരെയുള്ള ഗവ. ഹൈസ്‌കൂളിലെ എപിഎല്‍ വിഭാഗം ആണ്‍കുട്ടികള്‍ക്കും ഒന്നുമുതല്‍ എട്ടുവരെ എയ്ഡഡ് സ്‌കൂളുകളിലെ മുഴുവന്‍ കുട്ടികള്‍ക്കും ഒന്നു മുതല്‍ അഞ്ചുവരെയുള്ള എയ്ഡഡ് എല്‍പി സ്‌കൂളിലെ മുഴുവന്‍ കുട്ടികള്‍ക്കും ഒരു കുട്ടിക്ക് രണ്ട് ജോഡിക്ക് 600 രൂപ നിരക്കില്‍ നല്‍കും. നിലവില്‍ അലവന്‍സ് ലഭിച്ചിട്ടില്ലെന്നു മാത്രമല്ല ഈ തുക യൂണിഫോമിന് തികയുകയുമില്ല. തുണിവിലയും തുന്നല്‍കൂലിയിലും കണക്കാക്കിയാല്‍ 1500 രൂപയോളം ചെലവ് വരും. കഴിഞ്ഞ വര്‍ഷത്തെ യൂണിഫോം വിഹിതം ലഭിക്കാത്ത വിദ്യാര്‍ഥികളുമുണ്ട്.

കോവിഡ് വ്യാപനത്തില്‍ ആശങ്ക; ആരോഗ്യവകുപ്പിനു നിസംഗത

കോട്ടയം: ഇന്നലെ ജില്ലയില്‍ ഒരു കോവിഡ് മരണം റിപ്പോര്‍ട്ട് ചെയ്തിട്ടും ജില്ലാ ആരോഗ്യ വിഭാഗത്തിന് നിസംഗത. കോവിഡ് സംബന്ധിച്ച യാതൊരു വിവരങ്ങളും ജില്ലാ മെഡിക്കല്‍ വിഭാഗം പുറത്തു വിടുന്നുമില്ല. ചങ്ങനാശേരി സ്വദേശിനിയായ വയോധികയാണു തിങ്കളാഴ്ച രാത്രി കോവിഡ് ബാധയെത്തുടര്‍ന്ന് സ്വകാര്യ ആശുപത്രിയില്‍ മരിച്ചത്. ദിവസം അന്‍പതിലേറെ പേരില്‍ കോവിഡ് പുതുതായി സ്ഥിരീകരിക്കുമ്പോഴും ജില്ലാ ആരോഗ്യവകുപ്പ് നിര്‍ദേശങ്ങള്‍ പുറപ്പെടുവിക്കുകയോ ജാഗ്രതാ നടപടികള്‍ സ്വീകരിക്കുകയോ ചെയ്യുന്നില്ല. നിലവില്‍ 250 കോവിഡ് ബാധിതര്‍ ജില്ലയില്‍ ചികിത്സയിലുണ്ട്. കോവിഡ് പ്രതിരോധ നിര്‍ദേശങ്ങള്‍ നല്‍കാനോ വീഴ്ചയില്ലാത്ത ചികിത്സാ സംവിധാനങ്ങള്‍ ഏര്‍പ്പെടുത്താനോ ജില്ലയില്‍ നടപടിയെടുക്കുന്നില്ല. സ്‌കൂള്‍ തുറക്കല്‍ പ്രമാണിച്ച് വിദ്യാഭ്യാസ സ്ഥാപനങ്ങള്‍ പുലര്‍ത്തേണ്ട ജാഗ്രതാനിര്‍ദേശങ്ങളെക്കുറിച്ചും അറിയിപ്പുകളില്ല. ജലദോഷവും പനിയുമായി ആശുപത്രിയിലെത്തുന്നവരില്‍ മാത്രമാണു പരിശോധനയില്‍ കോവിഡ് സ്ഥിരീകരിക്കുന്നത്. ജലദോഷവും പനിയും ബാധിച്ചശേഷം ചികിത്സ തേടാത്തവരില്‍ ഏറെപ്പേര്‍ക്കും കോവിഡ് ഉണ്ടെന്നാണ് വിദഗ്ധരുടെ അഭിപ്രായം. സംസ്ഥാനത്ത് ഏറ്റവുമധികം കോവിഡ് ബാധിതരും വ്യാപനവുമുള്ള ജില്ലയെന്ന നിലയില്‍ കോട്ടയത്ത് രോഗവ്യാപനം തടയാന്‍ നടപടിയില്ല. കോട്ടയം നഗരസഭാ പരിധിയിലാണ് ഏറ്റവും കൂടുതല്‍ രോഗികളുള്ളത്. സ്‌കൂള്‍ ബസുകളില്‍ മാസ്‌ക് നിര്‍ബന്ധമാക്കാനാണു ചില സ്‌കൂളുകളുടെ തീരുമാനം. പൊതുവാഹനങ്ങളെ ആശ്രയിക്കുന്ന വിദ്യാര്‍ഥികളും മാസ്‌ക് ധരിക്കണമെന്ന് നിര്‍ദേശിക്കുന്നു. മാസ്‌ക്, സാനിറ്റൈസര്‍ തുടങ്ങിയവ ഉപയോഗിക്കണമെന്നും ആള്‍ക്കൂട്ടങ്ങള്‍ പരമാവധി ഒഴിവാക്കണമെന്നാണ് സര്‍ക്കാര്‍ നിര്‍ദേശം. വയോധികരിലും ഗുരുതര രോഗങ്ങള്‍ ബാധിച്ചവരിലും കോവിഡ് വലിയ ആഘാതമുണ്ടാക്കുന്നുണ്ട്. തമിഴ്‌നാട്, കര്‍ണാടക, മഹാരാഷ്ട്ര സംസ്ഥാനങ്ങളിലും കോവിഡ് വ്യാപനമുണ്ട്. ഉപരിപഠനത്തിനും ജോലിക്കും ജില്ലയില്‍നിന്ന് ഏറെപ്പേര്‍ പോയിവരുന്നുണ്ട്. അതിഥി തൊഴിലാളികളിലും കോവിഡ് ബാധ റിപ്പോര്‍ട്ട് ചെയ്തിട്ടുണ്ട്. സംസ്ഥാനത്ത് 1416 പേര്‍ കോവിഡ് ചികിത്സയിലുണ്ട്. ഇതിനോടകം ഒന്‍പത് മരണവും സ്ഥിരീകരിച്ചു. കോവിഡ്, പനി ലക്ഷണങ്ങളുമായി ആശുപത്രികളില്‍ എത്തുന്നവര്‍ക്ക് ആന്‍റിജന്‍ ടെസ്റ്റ് നിര്‍ബന്ധമാക്കി. റാപ്പിഡ് ആന്‍റിജന്‍ ടെസ്റ്റ് നടത്തി ഫലം നെഗറ്റീവെങ്കില്‍ ആര്‍ടി പിസിആര്‍ ചെയ്യണമെന്നും ആരോഗ്യവകുപ്പ് നിര്‍ദേശിച്ചു. രോഗം സ്ഥിരീകരിക്കുന്നവരെ പ്രത്യേക വാര്‍ഡില്‍ പാര്‍പ്പിക്കണം.

ബിരിയാണി സദ്യയോടെ അങ്കണവാടി പ്രവേശനോത്സവം

കോട്ടയം: അങ്കണവാടി പ്രവേശനോത്സവം കുഞ്ഞുങ്ങള്‍ക്ക് കുശാലായിരുന്നു. പടികയറി ചെന്നപ്പോള്‍ ടീച്ചറുടെ വക ലഡുവും മിഠായിയും. ടീച്ചറിന്‍റെ കഥപറച്ചിലും പാട്ടും കഴിഞ്ഞപ്പോള്‍ മേശപ്പുറത്ത് ചൂടന്‍ മുട്ടബിരിയാണി. അച്ചാറും പപ്പടവും സാലഡും ബിരിയാണിക്കു ചുറ്റും വട്ടംകൂടിയപ്പോള്‍ തിന്നാന്‍ നല്ല ശേല്. കരച്ചിലും പിഴിച്ചിലുമില്ലാതെ ഇന്നലെ ഒന്നാം ദിവസംതന്നെ ടീച്ചറും ആയയും പിള്ളേരെ കൈയിലെടുത്തു. പുലാവും ഉപ്പുമാവും ചോറുമൊക്കെ മാറിമാറി തരുമെന്ന ഉറപ്പുംകൊടുത്താണ് കുഞ്ഞുങ്ങളെ മടക്കിയയച്ചത്. ആഴ്ചയില്‍ മൂന്നു ദിവസം മുട്ടയും പാലുമൊക്കെ നിര്‍ബന്ധമാക്കിയതോടെ കുഞ്ഞുങ്ങള്‍ക്ക് നല്ല കാലമായി. കിടിലൻ മെനു റെഡി അങ്കണവാടികളിലെ പരിഷ്‌കരിച്ച മെനു അനുസരിച്ച് ഓരോ ദിവസവും വൈവിധ്യമാർന്ന ഭക്ഷണം നല്‍കും. തിങ്കളാഴ്ച രാവിലെ പാല്‍, പിടി, കൊഴുക്കട്ട, ഇലയട, ഉച്ചയ്ക്ക് ചോറ്, ചെറുപയര്‍, ഇലക്കറി, ഉപ്പേരി, തോരന്‍, പരിപ്പ് പായസം. ചൊവ്വാഴ്ച രാവിലെ ന്യൂട്രി ലഡു, ഉച്ചയ്ക്ക് മുട്ട ബിരിയാണി അല്ലെങ്കില്‍ മുട്ട പുലാവ്, ഫ്രൂട്ട് കപ്പ്, റാഗി അട. ബുധനാഴ്ച രാവിലെ പാല്‍, പിടി, കൊഴുക്കട്ട അല്ലെങ്കില്‍ ഇലയട, കടല മിഠായി, ഉച്ചയ്ക്ക് പയര്‍ കഞ്ഞി, വെജ് കിഴങ്ങ് കൂട്ടുകറി, സോയ ഡ്രൈ ഫ്രൈ, പൊതുഭക്ഷണമായി ഇഡ്ഡലി, സാമ്പാര്‍, പുട്ട്, ഗ്രീന്‍പീസ് കറി. വ്യാഴാഴ്ച രാവിലെ റാഗി, അരിഅട അല്ലെങ്കില്‍ ഇലയപ്പം. ഉച്ചയ്ക്ക് ചോറ്, മുളപ്പിച്ച ചെറുപയര്‍, ചീരത്തോരന്‍, സാമ്പാര്‍, മുട്ട, ഓംലറ്റ്, പൊതുഭക്ഷണമായി അവല്‍, ശര്‍ക്കര, പഴം മിക്‌സ്. പഞ്ചസാരയുടെയും ഉപ്പിന്‍റെയും അളവ് കുറച്ചുകൊണ്ട് കുട്ടികളുടെ ആരോഗ്യം ഉറപ്പാക്കി പോഷക മാനദണ്ഡ പ്രകാരമാണ് മെനു പരിഷ്‌കരിച്ചത്.

കുറവിലങ്ങാട് അഗ്രിഫെസ്റ്റ്

പാലാ: കാര്‍ഷിക രംഗത്ത് ഫലപ്രദമായ ഇടപെടലുകള്‍ക്ക് നേതൃത്വം കൊടുക്കുന്ന പാലാ രൂപതയുടെ സാമൂഹ്യ പ്രവര്‍ത്തന വിഭാഗമായ പാലാ സോഷ്യല്‍ വെല്‍ഫെയര്‍ സൊസൈറ്റിയുടെ നേതൃത്വത്തില്‍ പാലാ അഗ്രിമ കാര്‍ഷിക നഴ്‌സറിയുടെ സഹകരണത്തോടുകൂടി കുറവിലങ്ങാട് മര്‍ത്ത് മറിയം ആര്‍ക്കിഎപ്പിസ്‌കോപ്പല്‍ പള്ളിയുടെ അങ്കണത്തില്‍ കുറവിലങ്ങാട് അഗ്രി ഫെസ്റ്റ് എന്ന പേരില്‍ കാര്‍ഷികമേള സംഘടിപ്പിക്കും. ആറ്, ഏഴ്, എട്ട് തീയതികളിലായി നടത്തപ്പെടുന്ന അഗ്രി ഫെസ്റ്റിന്‍റെ ഉദ്ഘാടനം ആറിന് രാവിലെ വികാരിയും സ്വാശ്രയസംഘം രക്ഷാധികാരിയുമായ റവ. ഡോ. തോമസ് മേനാച്ചേരി നിര്‍വഹിക്കും. പിഎസ്ഡബ്ല്യുഎസ് ഡയറക്ടര്‍ ഫാ. തോമസ് കിഴക്കേല്‍ ആദ്യ വില്‍പ്പന നിര്‍വഹിക്കും. സ്വാശ്രയസംഘം ഡയറക്ടര്‍ ഫാ. ജോസഫ് ചൂരയ്ക്കല്‍ അധ്യക്ഷത വഹിക്കും. ഹൈബ്രിഡ് പച്ചക്കറി തൈകള്‍, നാടന്‍, വിദേശ ഫല വൃക്ഷ തൈകള്‍, പുതിയ ഇനം പച്ചക്കറി വിത്തുകള്‍, കാര്‍ഷിക മൂല്യ വര്‍ദ്ധിത ഉത്പന്നങ്ങള്‍, കാര്‍ഷിക വിഭവങ്ങള്‍,കാര്‍ഷിക വിളകള്‍ എന്നിവയുടെ പ്രദര്‍ശനവും വിപണനവും ഉണ്ടായിരിക്കും. വിവിധ ജൈവ വളങ്ങള്‍, കീടനാശിനികള്‍, ചെടിച്ചട്ടികള്‍, കൃഷി ഉപകരണങ്ങള്‍ തുടങ്ങിയവ മേളയില്‍ ലഭ്യമാണ്. റീജിയണ്‍, സോണ്‍ കോഓര്‍ഡിനേറ്റര്‍മാരായ സിബി കണിയാംപടി, ലിജി ജോണ്‍, സംഘം ഭാരവാഹികളായ ജോണ്‍ എം.വി. കുന്നേല്‍, കുഞ്ഞുമോന്‍ ഈന്തുകുഴി, റാണി ജോസഫ്, മഞ്ജു മാണി, എല്‍സമ്മ ജോസഫ് , സെലിന്‍ ഷാജി തുടങ്ങിയവര്‍ നേതൃത്വം നല്‍കും.

ലോക പുകയില വിരുദ്ധ ദിനാചരണം

പാലാ: അഡാര്‍ട്ടിന്‍റെ ആഭിമുഖ്യത്തില്‍ ലോക പുകയില വിരുദ്ധ ദിനം ആചരിച്ചു. ഡയറക്ടര്‍ ഫാ. ജെയിംസ് പൊരുന്നോലില്‍ അധ്യക്ഷത വഹിച്ച യോഗം പാലാ മുന്‍സിപ്പല്‍ ചെയര്‍മാന്‍ തോമസ് പീറ്റര്‍ ഉദ്ഘാടനം ചെയ്തു. എക്‌സൈസ് അസിസ്റ്റന്‍റ് ഇന്‍സ്‌പെക്ടര്‍ ജക്‌സി ജോസഫ്, അഡാര്‍ട്ട് പ്രൊജക്ട് കോഓർഡിനേറ്റര്‍ എന്‍.എം സെബാസ്റ്റ്യന്‍, സീനിയര്‍ കൗണ്‍സിലര്‍ ജോയി കെ. മാത്യു, പ്രഫ. കെ.പി. ജോസഫ്, ഒ.ജെ.ജോസഫ്, ലിജോ ജോസ് തുടങ്ങിയവര്‍ പ്രസംഗിച്ചു.

ശബരി റെയില്‍: പാലാ നഗരത്തെയും ഉള്‍പ്പെടുത്തണമെന്ന് പ്രാദേശിക സമിതി

പാലാ: ശബരി റെയില്‍ പ്രൊജക്ടിന് കേന്ദ്രം പച്ചക്കൊടി വീശിയതോടെ പുനര്‍ജന്മം ലഭിക്കുന്ന സാഹചര്യത്തില്‍ വളരുന്ന പാലാ നഗരത്തെയും റെയില്‍ കണക്ടിവിറ്റി സാദ്ധ്യമാക്കുന്നതിന് രാഷ്ട്രീയ ഇടപെടല്‍ ഉണ്ടാവണമെന്ന് ശബരി റെയില്‍ ആക്ഷന്‍ കൗണ്‍സില്‍ പ്രാദേശിക സമിതി കണ്‍വീനര്‍ ജയ്‌സണ്‍ മാന്തോട്ടം ആവശ്യപ്പെട്ടു. തുടക്കത്തിലെ അലൈന്‍മെന്‍റ് പ്രകാരം പാലാ നഗരപ്രദേശത്തു റെയില്‍വേ സ്റ്റേഷനും ഉള്‍പ്പെടുത്തിയിരുന്നു.പിന്നീട് നടന്ന ഏരിയല്‍ സര്‍വെ പ്രകാരം നഗരത്തില്‍നിന്നു വളരെ അകലെ ഗതാഗത സൗകര്യങ്ങള്‍ പരിമിതമായതും ചെന്നെത്തുവാന്‍ കൂടുതല്‍ സമയം എടുക്കേണ്ടി വരികയും ചെയ്യുന്ന പ്രദേശമായ മേലമ്പാറ വഴിയാക്കി മാറ്റുകയാണ് ഉണ്ടായത്. പാലാ നഗരത്തിന്‍റെ ഭാവി വളര്‍ച്ചയ്ക്കും സാമ്പത്തികാഭിവൃദ്ധിക്കും വാണിജ്യ മുന്നേറ്റത്തിനും റെയില്‍ കണക്ടിവിറ്റി അനിവാര്യമാണ്. പിഴക് വരെ കല്ലിട്ടു വര്‍ഷങ്ങള്‍ മുന്നേ അതിര്‍ തിരിച്ചിരുന്നു. ബാക്കി മേഖലയില്‍ കടനാട്, കരൂര്‍ പഞ്ചായത്ത് മേഖലയില്‍ ഭൂമി ഏറ്റെടുക്കലിനു വിജ്ഞാപനം പുറപ്പെടുവിച്ചിരുന്നുവെങ്കിലും എതിര്‍പ്പുകളെ തുടര്‍ന്ന് കല്ലിടീല്‍ നിര്‍ത്തിവയ്ക്കുകയാണ് ഉണ്ടായത്. തൊടുപുഴ റോഡിലെ അന്തീനാട് നിന്നു മേലമ്പാറയിലേക്കാണ് ഇപ്പോള്‍ നിശ്ചയിച്ചിരിക്കുന്ന റൂട്ട്. ഭൂമി ഏറ്റെടുക്കലിനായി പാലാ സിവില്‍ സ്റ്റേഷനില്‍ പ്രത്യേക തഹസില്‍ദാര്‍ ഓഫീസും പ്രത്യേകം അനുവദിച്ച് പ്രവര്‍ത്തിച്ചിരുന്നു. കേന്ദ്ര തീരുമാനത്തോടെ അളന്നു തിരിച്ച് കല്ലിട്ട ഭൂഉടമകളുടെ കാത്തിരിപ്പിന് വിരാമമാകും എന്നും ചൂണ്ടിക്കാണിക്കപ്പെടുന്നു. കഴിഞ്ഞ 20 വര്‍ഷമായി ഈ ഭൂമിയില്‍ ദീര്‍ഘകാല വിളകള്‍ കൃഷി ചെയ്യുവാനോ, ഭൂമി വില്‍ക്കുവാനോ ഈടു നല്‍കി വായ്പ എടുക്കുവാനോ വീട് പുതുക്കി പണിയുന്നതിനോ കഴിയാത്ത സ്ഥിതിയിലായിരുന്നു.

ക്ലാസുകള്‍ ആരംഭിച്ചു

പാലാ: സിവില്‍ സര്‍വീസ് ഇന്‍സ്റ്റിറ്റ്യൂട്ടില്‍ സിവില്‍ സര്‍വീസ് ഉള്‍പ്പെടെയുളള മത്സരപരീക്ഷകള്‍ക്കുളള പരിശീലനത്തോടൊപ്പം നടത്തപ്പെടുന്ന ബിഎ പബ്ലിക് അഡ്മിനിസ്‌ട്രേഷന്‍ കോഴ്‌സിന്‍റെ ക്ലാസുകള്‍ ആരംഭിച്ചു. പാലാ സെന്‍റ് തോമസ് കോളജ് മുന്‍ പ്രിന്‍സിപ്പല്‍ ഡോ.കെ.ജെ ജോസ് ക്ലാസുകള്‍ ഉദ്ഘാടനം ചെയ്തു. ഇന്‍സ്റ്റിറ്റ്യൂട്ട് മാനേജര്‍ മോണ്‍ .സെബാസ്റ്റ്യന്‍ വേത്താനത്ത്, പ്രിന്‍സിപ്പല്‍ ഡോ. വി.വി. ജോര്‍ജുകുട്ടി ഒട്ടലാങ്കല്‍, വൈസ് പ്രിന്‍സിപ്പല്‍ ആന്‍ഡ് ഡീന്‍ ഫാ. സെബാസ്റ്റ്യന്‍ ചാമക്കാലയില്‍, അപര്‍ണാ റോമി ജോണ്‍ എന്നിവര്‍ പ്രസംഗിച്ചു. പ്രവേശനപരീക്ഷയില്‍ പങ്കെടുത്ത് പ്രവേശനം നേടുന്നതിന് ജൂണ്‍ 10 വരെ അവസരമുണ്ട്. ഫോൺ: 9539381100.

അല്‍ഫോന്‍സാ കോളജില്‍ ടോപ്പേഴ്‌സ് ഡേ

പാലാ: അല്‍ഫോന്‍സാ കോളജില്‍ ടോപ്പേഴ്‌സ് ഡേ ഇന്ന് രാവിലെ 10.30ന് നടക്കും. കോളജ് മാനേജര്‍ റവ.ഡോ. ജോസഫ് തടത്തില്‍ അധ്യക്ഷത വഹിക്കുന്ന മീറ്റിംഗില്‍ നാഷണല്‍ അക്കാദമി ഓഫ് കസ്റ്റംസ് ഇന്‍ഡയറക്ട് ടാക്‌സസ് ആന്‍ഡ് നാര്‍ക്കോട്ടിക്‌സ് മുന്‍ പ്രിന്‍സിപ്പല്‍ ഡയറക്ടര്‍ ജനറല്‍ ഡോ. കെ.എന്‍. രാഘവന്‍ ഐആര്‍എസ് മുഖ്യാതിഥിയാകും. എം.ജി യൂണിവേഴ്‌സിറ്റി സിന്‍ഡിക്കേറ്റ് മെംബര്‍ ഡോ. ജോജി അലക്‌സ്, പ്രിന്‍സിപ്പല്‍ ഡോ. സിസ്റ്റര്‍ മിനിമോള്‍ മാത്യു, വൈസ് പ്രിന്‍സിപ്പല്‍ ഡോ. സിസ്റ്റര്‍ മഞ്ജു എലിസബത്ത് കുരുവിള, മഞ്ജു ജോസ്, കോളജ് ബര്‍സാര്‍ ഫാ. കുര്യാക്കോസ് വെള്ളച്ചാലില്‍ എന്നിവര്‍ പ്രസംഗിക്കും. എംജി യൂണിവേഴ്‌സിറ്റി ഡിഗ്രി പരീക്ഷാഫലം പ്രഖ്യാപിച്ചപ്പോള്‍ തിളങ്ങുന്ന വിജയം സ്വന്തമാക്കിയ അല്‍ഫോന്‍സാ കോളജ് യൂണിവേഴ്‌സിറ്റി തലത്തില്‍ 29 റാങ്കുകളും വണ്‍ എസ് ഗ്രേഡും 51എ പ്ലസുകളും 41 എ ഗ്രേഡുകളും നേടി. വര്‍ഷങ്ങളായി എംജി യൂണിവേഴ്‌സിറ്റി പരീക്ഷകളില്‍ ഏറ്റവും കൂടുതല്‍ റാങ്കുകളും എ പ്ലസും കരസ്ഥമാക്കിവരുന്ന കോളജിന്‍റെ അക്കാദമിക രംഗത്തെ അദ്വിതീയ സ്ഥാനത്തിന് അടിവരയിടുന്നതാണ് ഇത്തവണത്തെ പരീക്ഷാഫലം. പാഠ്യേതര രംഗത്തും സജീവമായ കോളജ് കേരളത്തിന്‍റെ കായിക ചരിത്രത്തിലും മായാത്ത മുദ്ര പതിപ്പിച്ചിട്ടുണ്ട്. രണ്ടേമുക്കാല്‍ കോടി രൂപയുടെ കേന്ദ്ര ഗവണ്‍മെന്‍റ് ഗ്രാന്‍റുകള്‍, സംസ്ഥാന, സര്‍വകലാശാലതല അവാര്‍ഡുകള്‍ എന്നിവ നേടിയെടുക്കാനും കോളജിനു സാധിച്ചു.

ഇരട്ടപ്പാതയ്ക്കായി സ്ഥലം നൽകിയവര്‍ക്ക് നഷ്ടപരിഹാരം നല്‍കാതെ റെയില്‍വേ

കോട്ടയം: ഇരട്ടപ്പാതയ്ക്കായി സ്ഥലം വിട്ടുകൊടുത്തവര്‍ക്ക് റെയില്‍വേ ഇനിയും നഷ്ടപരിഹാരം നൽകാത്തതിൽ കടുത്ത പ്രതിഷേധം ഉയരുന്നു. ചിങ്ങവനം മുതല്‍ കോട്ടയം വരെയുള്ള ഇരട്ടപ്പാതയ്ക്കായി സ്ഥലം വിട്ടുനല്‍കിയ നൂറോളം കുടുംബങ്ങള്‍ക്കാണ് ഇരട്ടപ്പാതയുടെ ഉദ്ഘാടനം കഴിഞ്ഞ് ഒരു വര്‍ഷമാകാറായിട്ടും നഷ്ടപരിഹാരം നല്‍കാത്തത്. നാട്ടകം വില്ലേജ് ഓഫീസിനു കീഴിലുള്ള 85 കുടുംബങ്ങള്‍ തങ്ങള്‍ വിട്ടു നല്‍കിയ സ്ഥലത്തിനും വീടിനും നഷ്ടപരിഹാരം കുറവാണെന്നു പറഞ്ഞ് ഹൈക്കോടതിയെ സമീപിച്ചിരുന്നു. റെയില്‍വേ നല്‍കാമെന്നു പറഞ്ഞ നഷ്ടപരിഹാരം കുറവാണെന്നും നിലവിലുള്ള ഭൂമിവിലയനുസരിച്ച് കൂടുതല്‍ തുക നല്‍കണമെന്നുമുള്ള വിധി കഴിഞ്ഞ ഡിസംബറില്‍ കോടതി പുറപ്പെടുവിച്ചിരുന്നു. കോടതി ഉത്തരവിന്‍റെ അടിസ്ഥാനത്തില്‍ സ്ഥലം വിട്ടുനല്‍കിയവര്‍ റെയില്‍വേയെ സമീപിച്ചപ്പോള്‍ ഫണ്ടില്ലെന്ന മറുപടിയാണ് ലഭിച്ചത്. റെയില്‍വേ പണം നല്‍കിയാല്‍ ഉടന്‍ പണം നല്‍കുമെന്നാണ് സര്‍ക്കാരും അറിയിച്ചിരിക്കുന്നത്. ഇതിനിടയില്‍ സ്ഥലം ഏറ്റെടുക്കലിനായി തുറന്ന സ്‌പെഷല്‍ തഹസില്‍ദാറുടെ ഓഫീസ് അടച്ചു പൂട്ടാനും റെയില്‍വേ നീക്കം ആരംഭിച്ചു. നഷ്ടപരിഹാരം ഉള്‍പ്പെടെയുള്ള ആവശ്യങ്ങള്‍ക്കായുള്ള ഓഫീസാണ് റെയില്‍വേ മുന്നറിയിപ്പില്ലാതെ പൂട്ടാനൊരുങ്ങുന്നത്. സ്ഥലം വിട്ടുനല്‍കിയവര്‍ കഴിഞ്ഞദിവസം തിരുവഞ്ചൂര്‍ രാധാകൃഷ്ണന്‍ എംഎല്‍എയെ സമീപിച്ച് കാര്യങ്ങള്‍ ധരിപ്പിച്ചിരുന്നു. എംഎല്‍എ കളക്ടറെയും റെയില്‍വേ ഡിവിഷണല്‍ മാനേജരെയും ബന്ധപ്പെട്ടു. ഉടന്‍ പണം നല്‍കാമെന്നാണ് റെയില്‍വേ അധികൃതരും എംഎല്‍എയോടു പറഞ്ഞത്. എന്നാല്‍ നാളിതുവരെയായിട്ടും പണം നല്‍കുന്നതിനുള്ള യാതൊരു നടപടിയും റെയില്‍വേ അധികൃതരുടെ ഭാഗത്തുനിന്നുണ്ടായിട്ടില്ല. കോടിക്കണക്കിനു രൂപയുടെ വികസന പ്രവര്‍ത്തനങ്ങള്‍ നടത്തുന്ന റെയില്‍വേക്ക് സ്ഥലം ഏറ്റെടുത്തതിന്‍റെ നഷ്ടപരിഹാരത്തുക നല്‍കാനാവാത്തത് എന്ത് വിരോധാഭാസമാണെന്നും അധികൃതര്‍ ജനങ്ങളെ ബുദ്ധിമുട്ടിക്കുകയാണെന്നും സ്ഥലം ഉടമകള്‍ കുറ്റപ്പെടുത്തി. നഷ്ടപരിഹാരം ലഭിക്കാത്തതിനാല്‍ പലര്‍ക്കും പുതിയ ഭൂമിയോ വീടോ വാങ്ങാന്‍ സാധിച്ചിട്ടില്ല. ബന്ധുവീട്ടിലും വാടക വീട്ടിലുമാണു പലരുടെയും താമസം. നഷ്ടപരിഹാര തുക ഉടന്‍ നല്‍കിയില്ലെങ്കില്‍ സ്ഥലം വിട്ടുനല്‍കിയവരുടെ കൂട്ടായ്മയുടെ നേതൃത്വത്തില്‍ സമരം ആരംഭിക്കുമെന്ന് സ്ഥലം വിട്ടുനല്‍കിയ പൂവന്തുരുത്ത് സ്വദേശി രാജന്‍ മേട്ടുങ്കല്‍ പറഞ്ഞു.

ശബരി റെയില്‍പാത: സ്ഥലം ഏറ്റെടുക്കല്‍ അടുത്ത മാസം തുടങ്ങും

കോട്ടയം: അങ്കമാലി-എരുമേലി ശബരി റെയില്‍പാതയ്ക്ക് സ്ഥലം ഏറ്റെടുക്കല്‍ അടുത്ത മാസം ആരംഭിക്കുമെന്ന് കേന്ദ്ര സര്‍ക്കാരിന്‍റെ ഉറപ്പ്. 111 കിലോമീറ്റര്‍ പാതയ്ക്ക് 1998ല്‍ റെയില്‍വേ അംഗീകാരം നല്‍കിയതാണ്. 2030ല്‍ പാത കമ്മീഷന്‍ ചെയ്യാനാണ് ആലോചന. സ്ഥലമെടുപ്പ് ഇഴഞ്ഞതനുസരിച്ച് പണിച്ചെലവ് കൂടിയതിനാല്‍ പാത നിര്‍മാണം അനിശ്ചിതത്വത്തിലായിരുന്നു. നിലവിലെ സ്ഥിതി നിര്‍ദിഷ്ടപാതയില്‍ എട്ടു കിലോമീറ്റര്‍ മാത്രം സ്ഥലമെടുപ്പും അങ്കമാലി-കാലടി ഏഴു കിലോമീറ്റര്‍ പാത നിര്‍മാണവും പൂര്‍ത്തിയായി. ഇത്രയും ഭാഗത്ത് രണ്ട് മേല്‍പ്പാലങ്ങളും രണ്ട് അടിപ്പാതകളും പണിയേണ്ടതുണ്ട്. പെരിയാറിനു കുറുകെ കാലടിയില്‍ പാലവും നിര്‍മിച്ചു. നിലവില്‍ രാമപുരത്തിനു സമീപം നീലൂര്‍വരെ അലൈന്‍മെന്‍റ് നടത്തി കല്ലിട്ടു. രാമപുരം മുതല്‍ എരുമേലി വരെ ഏരിയല്‍ സര്‍വേ മാത്രം നടന്നിട്ടുണ്ട്. പാലായില്‍നിന്നു പൊന്‍കുന്നം, ചിറക്കടവ്, വിഴിക്കത്തോട് വഴി എരുമേലിയിലേക്കുള്ള ആദ്യ അലൈന്‍മെന്‍റ് ഉപേക്ഷിച്ചു. ഭരണങ്ങാനം, തിടനാട്, കൊരട്ടിവഴിയുള്ള ലൈനാണ് ഇപ്പോള്‍ പരിഗണനയില്‍. എരുമേലി ടൗണിന് ഒന്നര കിലോമീറ്റര്‍ പിന്നിലായിരിക്കും എരുമേലി സ്റ്റേഷന്‍. ഭാവിയില്‍ ഇത് പ്രപ്പോസ്, മുക്കൂട്ടുതറ വഴി പമ്പയിലേക്ക് നീട്ടാനുള്ള ആലോചനയുണ്ട്. തൊടുപുഴ വഴി പാത വരുന്നതോടെ ഇടുക്കി ജില്ലയും റെയില്‍ഭൂപടത്തില്‍ ഇടംനേടും. നേട്ടം കാലടിയില്‍നിന്ന് നെടുമ്പാശേരി വിമാനത്താവളത്തിലേക്കുള്ള ദൂരം അഞ്ചു കിലോമീറ്റര്‍ മാത്രം. എരുമേലിയില്‍നിന്ന് തിരുവനന്തപുരത്തേക്ക് പാത നീട്ടിയാല്‍ വിഴിഞ്ഞം തുറമുഖത്തുനിന്നുള്ള ചരക്കുനീക്കം വേഗത്തിലാകും. വിമാനത്താവളം യാത്ര എളുപ്പമാകും. ഇതാണ് ശബരി റെയില്‍വേ അടിയന്തരമായി നടപ്പാക്കാന്‍ കേന്ദ്രത്തെ പ്രേരിപ്പിക്കുന്നത്. സ്‌റ്റേഷനുകള്‍, പാലങ്ങള്‍ അങ്കമാലി, കാലടി, പെരുമ്പാവൂര്‍, ഓടക്കാലി, കോതമംഗലം, മൂവാറ്റുപുഴ, വാഴക്കുളം, തൊടുപുഴ, കരിങ്കുന്നം, രാമപുരം, ഭരണങ്ങാനം (പാലാ), ചെമ്മലമറ്റം, കാഞ്ഞിരപ്പള്ളി, എരുമേലി എന്നിവയാണ് സ്റ്റേഷനുകള്‍. തൊടുപുഴ, മീനച്ചില്‍, മണിമല നദികള്‍ക്ക് വലിയ പാലങ്ങള്‍ പണിയണം. കൂടാതെ തോടുകള്‍ക്ക് കുറുകെ പത്തിലേറെ ചെറിയ പാലങ്ങളും. അടുത്തഘട്ടം ശേഷിക്കുന്ന 70 കിലോമീറ്റര്‍ സ്ഥലമെടുപ്പിന് വിജ്ഞാപനം പുറപ്പെടുവിച്ചിട്ടുണ്ട്. അടുത്ത ഘട്ടം മുപ്പത് കിലോമീറ്റര്‍ സര്‍വേയും അലൈന്‍മെന്‍റും പൂര്‍ത്തിയാക്കണം. പദ്ധതിയുടെ 50 ശതമാനം തുക സംസ്ഥാനം വഹിക്കണം. പുതുക്കിയ എസ്റ്റിമേറ്റ് പ്രകാരം ചെലവ് 3,800.93 കോടി രൂപയാണ്. സ്ഥലവും വീടും മറ്റ് കെട്ടിടങ്ങളും നഷ്ടപ്പെടുന്നവര്‍ക്ക് ഉടന്‍ നഷ്ടപരിഹാരം നല്‍കേണ്ടതുണ്ട്. പമ്പ പാത ഫയല്‍ മടക്കി ശബരി പാതയ്ക്ക് പകരം പരിഗണിച്ച ചെങ്ങന്നൂര്‍-പമ്പ (59 കി.മീ.) പാത വേണ്ടെന്നു വച്ചു. 8000 കോടി രൂപ ചെലവുള്ള പാത പണിയാന്‍ 213.687 ഹെക്ടര്‍ ഭൂമി വേണ്ടിവരും. ഇതില്‍ 127. 038 ഹെക്ടര്‍ സ്വകാര്യ ഭൂമിയും 81.367 ഹെക്ടര്‍ വനഭൂമിയുമാണ്. വനം, പരിസ്ഥിതി മന്ത്രാലയത്തിന്‍റെ അനുമതി ലഭിക്കണം. ശബരിമല സീസണില്‍ മാത്രമേ ഈ പാത നേട്ടമാകൂ. ചെങ്ങന്നൂര്‍, ആറന്മുള, വടശേരിക്കര, സീതത്തോട് സ്റ്റേഷനുകള്‍ ഒഴികെ വനംപ്രദേശമാണ്.

വർണാഭമായി പ്രവേശനോത്സവം

മാലം: ഗവണ്‍മെന്‍റ് യുപി സ്‌കൂളിലെ പ്രവേശനോത്സവം പഞ്ചായത്ത് പ്രസിഡന്‍റ് കെ.സി. ബിജു ഉദ്ഘാടനം ചെയ്തു. പഞ്ചായത്തംഗം ജിജി മണര്‍കാട് അധ്യക്ഷത വഹിച്ചു. പഞ്ചായത്തംഗം രാജീവ് രവീന്ദ്രന്‍, പ്രധാനാധ്യാപിക കെ.പി. ബിന്ദു, പിടിഎ പ്രസിഡന്‍റ് അമ്പിളി സജി, മുന്‍ അധ്യാപകരായ ജെസി ചാക്കോ, ജയപ്രകാശ്, അധ്യാപിക ജാസ്മിന്‍ ജോസഫ് എന്നിവര്‍ പ്രസംഗിച്ചു. ഓള്‍ കേരള ഫോട്ടോഗ്രഫേഴ്‌സ് അസോസിയേഷന്‍ കോട്ടയം ടൗണ്‍ യൂണിറ്റിന്‍റെ നേതൃത്വത്തില്‍ പഠനോപകരണങ്ങള്‍ വിതരണം ചെയ്തു. പാന്പാടി: പാമ്പാടി ബ്ലോക്ക് തല പ്രവേശനോത്സവം പനമറ്റം ഗവൺമെന്‍റ് ഹയർ സെക്കൻഡറി സ്കൂളിൽ ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയി മണിയങ്ങാട്ട് ഉദ്ഘാടനം ചെയ്തു. ബ്ലോക്ക് പഞ്ചായത്ത് വൈസ് പ്രസിഡന്‍റ് പ്രഫ. എം.കെ രാധാകൃഷ്ണൻ അധ്യക്ഷത വഹിച്ച സമ്മേളനത്തിൽ റിട്ട. പ്രിൻസിപ്പൽ ഹരികൃഷ്ണൻ ചെട്ടിയാർ മുഖ്യപ്രഭാഷണം നടത്തി.

ആർപ്പൂക്കര: ഗവൺമെന്‍റ് വൊക്കേഷണൽ ഹയർ സെക്കൻഡറി സ്കൂൾ പ്രവേശനോത്സവം ജില്ലാ പഞ്ചായത്തംഗം പ്രഫ. ഡോ. റോസമ്മ സോണി ഉദ്ഘാടനം ചെയ്തു. പിടിഎ പ്രസിഡന്‍റ് സി.ആർ. ഹരി ലക്ഷ്മീനന്ദകുമാർ അധ്യക്ഷത വഹിച്ചു. സ്കൂൾ പ്രിൻസിപ്പൽ രെന്ദു സാറ കുര്യൻ, ഹയർ സെക്കൻഡറി സ്കൂൾ പ്രിൻസിപ്പൽ ടി.എസ്. ഷീജ, ഹെഡ്മിസ്ട്രസ് എ.എൻ. ജീനാ എന്നിവർ പ്രസംഗിച്ചു. കുടമാളൂര്‍: ഗവണ്‍മെന്‍റ് ഹയര്‍ സെക്കന്‍ഡറി സ്‌കൂള്‍ പ്രവേശനോത്സവം ജില്ലാ പഞ്ചായത്തംഗം പ്രഫ. ഡോ. റോസമ്മ സോണി ഉദ്ഘാടനം ചെയ്തു. പിടിഎ പ്രസിഡന്‍റ് സുജിത് എസ്. നായര്‍ അധ്യക്ഷത വഹിച്ചു. ഹയര്‍ സെക്കന്‍ഡറി സ്‌കൂള്‍ പ്രിന്‍സിപ്പല്‍ ജെ. റാണി, ഹെഡ്മിസ്ട്രസ് ആശ എ. നായര്‍, ബ്ലോക്ക് പഞ്ചായത്തംഗം കെ.കെ. ഷാജിമോന്‍, ബിന്ദു ഹരികുമാര്‍ എന്നിവര്‍ പ്രസംഗിച്ചു. അതിരമ്പുഴ: സെന്‍റ് മേരീസ് എൽപിഎസിലെ പ്രവേശനോത്സവത്തിൽ വേറിട്ട കാഴ്ചയൊരുക്കി മൂവർ സംഘം. ശിവപ്രിയ, ശിവപ്രീതി, ശിവപ്രഭ എന്നിവരാണ് പ്രവേശനോത്സവത്തിൽ ശ്രദ്ധാകേന്ദ്രമായത്. ഇവരെ കൂടാതെ മൂന്ന് ജോഡി ഇരട്ടകളും പ്രവേശനോത്സവത്തിന്‍റെ മാറ്റുകൂട്ടി. സ്കൂൾ മാനേജർ റവ. സിസ്റ്റർ ഡെയ്സ് മരിയ പതിയിൽ അധ്യക്ഷത വഹിച്ചു. ജില്ലാ പഞ്ചായത്ത് മെംബർ പ്രഫ. ഡോ. റോസമ്മ സോണി ഉദ്ഘാടനം ചെയ്തു. ഹെഡ്മിസ്ട്രസ് അൽഫോൻസാ മാത്യു, വാർഡ് മെംബർ ബേബിനാസ് അജാസ്, പ്രിൻസിപ്പൽ സിസ്റ്റർ ടെസ് മരിയ പഴേമഠം, പിടിഎ പ്രസിഡന്‍റ് മനോജ് പി. ജോൺ എന്നിവർ പ്രസംഗിച്ചു. കൈപ്പുഴ: കൈപ്പുഴ സെന്‍റ് ജോർജ് വിഎച്ച്എസ്എസിൽ പ്രവേശനോത്സവം നടത്തി. നവഗതരായ വിദ്യാർഥികളെ വാദ്യമേളങ്ങളുടെ അകമ്പടിയോടെ സ്വീകരിച്ചു. തുടർന്ന് നടന്ന സമ്മേളനം എംജി യൂണിവേഴ്സിറ്റി സ്കൂൾ ഓഫ് ലെറ്റേഴ്സിലെ അധ്യാപകനായ ഡോ. അജു കെ. നാരയണൻ ഉദ്ഘാടനം ചെയ്തു. അസിസ്റ്റന്‍റ് മാനേജർ ഫാ. ജഗിൽ കൊളങ്ങയിൽ അധ്യക്ഷത വഹിച്ചു. ഹെഡ്മാസ്റ്റർ കെ.എസ്. ബിനോയി, പ്രിൻസിപ്പൽ തോമസ് മാത്യു, പിടിഎ ഭാരവാഹികൾ തുടങ്ങിയവർ പ്രസംഗിച്ചു. ആർപ്പൂക്കര: ആർപ്പൂക്കര പഞ്ചായത്തു തല സ്കൂൾ പ്രവേശനോത്സവം തൊണ്ണംകുഴി ഗവൺമെന്‍റ് എൽപി സ്കൂളിൽ നടന്നു. പഞ്ചായത്ത് പ്രസിഡന്‍റ് ദീപ ജോസ് പ്രവേശനോത്സവം ഉദ്ഘാടനം ചെയ്തു.വാർഡ് മെംബർ ജസ്റ്റിൻ ജോസഫ് അധ്യക്ഷത വഹിച്ചു.

സ്ത്രീയുൾപ്പെട്ട ക്രിമിനൽ സംഘം ലഹരിവസ്തുക്കളുമായി പിടിയിൽ

മണർകാട്: വില്പനയ്ക്കായി സൂക്ഷിച്ച കഞ്ചാവും നിയമവിധേയമല്ലാതെ സൂക്ഷിച്ച നൈട്രോസെപാം ഗുളികകളുമായി സ്ത്രീയുൾപ്പെട്ട ക്രിമിനൽസംഘം പോലീസിന്‍റെ പിടിയിലായി. മണർകാട് മാമുണ്ടിയിൽ പ്രിൻസ് മാത്യു (25), തിരുവഞ്ചൂർ പള്ളിപ്പറമ്പിൽ ജിബുമോൻ പി. പീറ്റർ (23), സരസ്വതിവിലാസം അശ്വിൻ (23), ദീർതി രാജ് (26) എന്നിവരാണ് മണർകാട് പോലീസിന്‍റെ പിടിയിലായത്. ഞായറാഴ്ച രാത്രി ഓട്ടോറിക്ഷയിലാണ് സംഘം ലഹരി വസ്തുക്കൾ വില്പനയ്ക്കായി കൊണ്ടുവന്നത്. പിടിയിലായ പ്രിൻസ് മാത്യുവിന് കാപ്പാ നിയമപ്രകാരം കോട്ടയം ജില്ലയിൽ പ്രവേശിക്കുന്നതിനു വിലക്കും ലഹരിക്കച്ചവടം ഉൾപ്പെടെ പത്തിലധികം കേസുകളിൽ പ്രതിയുമാണ്. രണ്ടാം പ്രതി അശ്വിൻ മോഷണം ഉൾപ്പെടെ നാലു കേസുകളിൽ പ്രതിയാണ്.

ബാലികയെ പീഡിപ്പിച്ച വയോധികന് 12 വർഷം കഠിനതടവ്

കോട്ടയം: ബാലികയെ പീഡിപ്പിച്ച വയോധികന് 12 വർഷം കഠിനതടവ്. 14 വയസ് പ്രായമുള്ള ബാലികയെ ലൈംഗികമായി ചൂഷണം ചെയ്ത മൂലവട്ടം ചോതിനിവാസിൽ എം.കെ. സോമനാ(74)ണ് കോടതി 12 വർഷം തടവും 40,000 രൂപ പിഴയും ചുമത്തിയത്. ചിങ്ങവനം പോലീസ് രജിസ്റ്റർ ചെയ്ത കേസിലാണ് ചങ്ങനാശേരി ഫാസ്റ്റ് ട്രാക്ക് കോടതി ജഡ്‌ജ് പി.എസ്. സൈമ ശിക്ഷ വിധിച്ചത്. പ്രോസിക്യൂഷനുവേണ്ടി പബ്ലിക് പ്രോസിക്യൂട്ടർ പി.എസ്. മനോജ് ഹാജരായി.

മീനച്ചിലാറില്‍ നീരൊഴുക്ക് തടസപ്പെട്ടു; ഇടപെട്ട് മന്ത്രി റോഷി അഗസ്റ്റിന്‍

കോട്ടയം: തിരുവാര്‍പ്പ് പഞ്ചായത്തില്‍ താഴത്തങ്ങാടി, ഇല്ലിക്കല്‍ ഭാഗത്ത് മീനച്ചിലാറിനു കുറുകെയുള്ള പാലത്തിനു താഴെ മാലിന്യം അടിഞ്ഞുകൂടി നീരൊഴുക്ക് തടസപ്പെട്ടത് എത്രയും വേഗം നീക്കം ചെയ്യാന്‍ കോട്ടയം മേജര്‍ ഇറിഗേഷന്‍ എക്സിക്യൂട്ടീവ് എന്‍ജിനിയര്‍ക്ക് ജലവിഭവ മന്ത്രി റോഷി അഗസ്റ്റിന്‍ നിര്‍ദേശം നല്‍കി. കനത്ത മഴയില്‍ ഒഴുകിയെത്തിയ മാലിന്യമാണ് പാലത്തിനു താഴെ തങ്ങിക്കിടന്ന് നീരൊഴുക്ക് തടസപ്പെടുത്തിയത്. ജില്ലയില്‍ മഴയ്ക്കു ശമനമായെങ്കിലും പടിഞ്ഞാറന്‍ മേഖലയില്‍നിന്നു വെള്ളം പൂര്‍ണമായും ഇറങ്ങിയിട്ടില്ല. വേമ്പനാട്ടു കായലില്‍ ചെളിയും മണ്ണു നിറഞ്ഞതും പോള നിറഞ്ഞ തോടുകളും മണ്ണിട്ടുയര്‍ത്തിയ പാടങ്ങളും മൂലമാണ് മഴ മാറിയിട്ടും വെള്ളം ഇറങ്ങാന്‍ മടിക്കുന്നത്. ഇതിനിടയിലാണ് താഴത്തങ്ങാടിയിലും ഇല്ലിക്കലും നീരൊഴുക്ക് തടസപ്പെടുത്തി പാലത്തിനടയില്‍ മാലിന്യങ്ങള്‍ അടിഞ്ഞുകൂടിയത്. കോട്ടയം താലൂക്കിലെ പടിഞ്ഞാറന്‍ പഞ്ചായത്തുകളിലെ താഴ്ന്ന പ്രദേശങ്ങളാണ് ഇപ്പോഴും വെള്ളത്തിനടിയിലുള്ളത്. സാധാരണ മഴ മാറി പിറ്റേന്നു മുതല്‍ അതിവേഗം ഇറങ്ങുന്ന വെള്ളം ഇത്തവണ ഇറങ്ങാന്‍ വൈകുന്നത് ജനങ്ങളിലൽ ആശങ്ക വര്‍ധിപ്പിച്ചിട്ടുണ്ട്. മീനച്ചിലാറും മണിമലയാറും തെളിഞ്ഞൊഴുകിത്തുടങ്ങിയെങ്കിലും ജലനിരപ്പ് കാര്യമായി താഴ്ന്നിട്ടില്ല. വേമ്പനാട്ട് കായല്‍ വെള്ളമെടുക്കാന്‍ മടിക്കുന്നതാണ് ജലനിരപ്പ് കുറയാത്തതിനു‍ കാരണം. കായലില്‍നിന്നു കടലിലേക്കു പോകുന്ന വെള്ളത്തിന്‍റെ അളവും മാര്‍ഗങ്ങളും കുറഞ്ഞതു തിരിച്ചടിയായി. കായലിന്‍റെ‍ അടിത്തട്ടില്‍ ചെളി അടിഞ്ഞതോടെ സംഭരണശേഷിയും കുറഞ്ഞു. ഇല്ലിക്കലും താഴത്തങ്ങാടിയിലും മാലിന്യം അടിഞ്ഞുകൂടി നീരൊഴുക്ക് തടസപ്പെട്ടതോടെ തിരുവാര്‍പ്പ് പഞ്ചായത്ത് ഭരണസമിതി പ്രശ്നം ചൂണ്ടിക്കാട്ടി മന്ത്രിയുടെ ഇടപെടല്‍ ആവശ്യപ്പെട്ട് പ്രമേയം പാസാക്കിയിരുന്നു. ഇതേത്തുടര്‍ന്നാണ് പ്രശ്നത്തില്‍ മന്ത്രി അടിയന്തരമായി ഇടപെടുകയും മാലിന്യം എത്രയും വേഗം നീക്കം ചെയ്യണമെന്ന് ബന്ധപ്പെട്ട ഉദ്യോഗസ്ഥര്‍ക്ക് നിര്‍ദേശം നല്‍കുകയും ചെയ്തത്. കഴിഞ്ഞ വര്‍ഷവും കനത്ത മഴയെത്തുടര്‍ന്ന് സമാനമായ സാഹചര്യം നേരിട്ടപ്പോള്‍ മന്ത്രി റോഷി അഗസ്റ്റിന്‍ അടിയന്തരമായി ഇടപെടുകയും ഉദ്യോഗസ്ഥരുടെ നേതൃത്വത്തില്‍ മാലിന്യം നീക്കം ചെയ്തു നീരൊഴുക്ക് സുഗമമാക്കുകയും ചെയ്തിരുന്നു.

ശാസ്‌ത്രജ്ഞര്‍ കര്‍ഷകരുമായി അഭിമുഖം നടത്തി

അകലക്കുന്നം: വികസിത കൃഷി സങ്കല്‍പ്പ്‌ അഭിയാന്‍ പദ്ധതിയുടെ ഭാഗമായി കൃഷി വിജ്ഞാന്‍ കേന്ദ്രത്തിലെയും ഇന്ത്യന്‍ കാര്‍ഷിക ഗവേഷണ കേന്ദ്രത്തിലെയും ശാസ്‌ത്രജ്ഞര്‍ കര്‍ഷകരുമായി മുഖാമുഖം പരിപാടി നടത്തി. അകലക്കുന്നം പഞ്ചായത്ത്‌ ഹാളില്‍ നടന്ന പരിപാടിയുടെ ഉദ്‌ഘാടനം പഞ്ചായത്ത്‌ പ്രസിഡന്‍റ് സിന്ധു അനില്‍കുമാര്‍ നിര്‍വഹിച്ചു.പഞ്ചായത്ത്‌ വൈസ്‌ പ്രസിഡന്‍റ് മാത്തുക്കുട്ടി ഞായര്‍കുളം അധ്യക്ഷനായിരുന്നു. ഇന്ത്യന്‍ ഇന്‍സ്റ്റിറ്റ്യൂട്ട്‌ ഓഫ്‌ സ്‌പൈസസ്‌ റിസര്‍ച്ചിലെ സീനിയര്‍ സയന്‍റിസ്റ്റ് ബി. മണിമാരന്‍, കോട്ടയം കൃഷി വിജ്ഞാന്‍ കേന്ദ്രത്തിലെ അസി. പ്രഫസര്‍മാരായ ഡോ. ക്രിസ്‌ ജോസഫ്‌, മാനുവല്‍ അലക്‌സ്‌ എന്നിവർ ക്ലാസെടുക്കുകയും കർഷകരുടെ സംശയങ്ങള്‍ക്ക്‌ മറുപടി നല്‌കുകയും ചെയ്തു. മണ്ണ്‌ പരിപോഷണ പദ്ധതിയുടെ ഭാഗമായി ചടങ്ങിൽ കര്‍ഷകര്‍ക്ക്‌ സൂക്ഷ്‌മ മൂലകക്കൂട്ടുകളും വിതരണം ചെയ്തു.

ടി.എസ്. മുരളി പുരസ്‌കാരം സമ്മാനിച്ചു

കോട്ടയം: ബിഇഎഫ്‌ഐ കേരളയുടെ സ്ഥാപക ജനറല്‍ സെക്രട്ടറി ടി.എസ്. മുരളിയുടെ സ്മരണാര്‍ഥം ഏര്‍പ്പെടുത്തിയ എട്ടാമത് ടി.എസ്. മുരളി പുരസ്‌കാരത്തിന് വൈക്കം വിശ്വന്‍ അര്‍ഹനായി. മന്ത്രി വി.എന്‍. വാസവന്‍ പുരസ്‌കാരം കൈമാറി. സംഘാടക സമിതി ചെയര്‍മാന്‍ പ്രസിഡന്‍റ് ടി.ആര്‍. രഘുനാഥന്‍ അധ്യക്ഷതവഹിച്ചു. ബിഇഎഫ്‌ഐ അഖിലേന്ത്യാ പ്രസിഡന്‍റ് എസ്.എസ്. അനില്‍ മുഖ്യപ്രഭാഷണം നടത്തി. ബിഇഎഫ്‌ഐ സംസ്ഥാന പ്രസിഡന്‍റ് എന്‍. സനില്‍ ബാബു, ബിഒബിഇയു സംസ്ഥാന പ്രസിഡന്‍റ് ജി. സതീഷ്, ബിഇഎഫ്‌ഐ വനിതാ സബ് കമ്മിറ്റി കണ്‍വീനര്‍ രമ്യാ രാജ്, സിഐടിയു ജില്ലാ പ്രസിഡന്‍റ് റെജി സക്കറിയ, കര്‍ഷക സംഘം സംസ്ഥാന ജോയിന്‍റ് സെക്രട്ടറി കെ.എം. രാധാകൃഷ്ണന്‍, എന്‍ജിഒ യൂണിയന്‍ സംസ്ഥാന സെക്രട്ടറി സീമ എസ്. നായര്‍, പി.വി. സുനില്‍, ബിഇഎഫ്‌ഐ സംസ്ഥാന ജോയിന്‍റ് സെക്രട്ടറി കെ.പി. ഷാ, ജനറല്‍ കണ്‍വീനര്‍ കെ.കെ. ബിനു, ജില്ലാ പ്രസിഡന്‍റ് വി.പി. ശ്രീരാമന്‍ ജില്ലാ സെക്രട്ടറി കെ.കെ. ബിനു എന്നിവര്‍ പ്രസംഗിച്ചു.

എംഡിഎംഎയും കഞ്ചാവുമായി മൂന്നുപേർ അറസ്റ്റിൽ

കിടങ്ങൂർ: എംഡിഎംഎയും കഞ്ചാവുമായി മൂന്നുപേർ പോലീസ് പിടിയിലായി. പാലക്കാട് പരിത്തൂർ പുത്തൻപീടികയിൽ അലി ഇക്ബാൽ (35), പെരുമ്പായിക്കാട് ഉദയംപൂത്തർ സതീഷ് കുമാർ (51), അമയന്നൂർ കോയിക്കൽ സുധിൻ സുരേഷ് (31) എന്നിവരെയാണ് 13 ഗ്രാം കഞ്ചാവും 2.66 ഗ്രാം എംഡിഎംഎയുമായി കിടങ്ങൂർ പോലീസ് അറസ്റ്റ് ചെയ്തത്. ഇന്നലെ രാവിലെ 9.30ഓടെ കിടങ്ങൂർ തെക്ക് ഭാഗത്തുള്ള വടക്കേനകത്തു വീട്ടിൽനിന്നുമാണ് പ്രതികൾ പിടിയിലായത്.

ഗീവർഗീസ് മാർ തിമോത്തിയോസ് അനുസ്മരണവും എംസിഎ പ്രവർത്തനോദ്ഘാടനവും

കോട്ടയം: എംസിഎ കോട്ടയം മേഖലാസമിതിയുടെ ആഭിമുഖ്യത്തിൽ തിരുവല്ല രൂപതയുടെ അഞ്ചാമത്തെ അധ്യക്ഷനായിരുന്ന ഗീവർഗീസ് മാർ തിമോത്തിയോസിന്‍റെ ആറാമത് ഓർമ പെരുന്നാളിനോടനുബന്ധിച്ച് അനുസ്മരണ പ്രഭാഷണവും കോട്ടയം മേഖലയുടെ പ്രവർത്തന ഉദ്ഘാടനവും നടത്തി. അമയന്നൂർ സെന്‍റ് മേരീസ് മലങ്കര സുറിയാനി കത്തോലിക്കാ പള്ളിയിൽ നടന്ന ചടങ്ങിൽ മേഖലാ പ്രസിഡന്‍റ് ഏബ്രഹാം കെ. തോമസ് അധ്യക്ഷത വഹിച്ചു. ചാണ്ടി ഉമ്മൻ എംഎൽഎ ഉദ്ഘാടനം ചെയ്തു. ഫാ. മാത്യു പുനക്കുളം അനുസ്മരണ പ്രഭാഷണം നടത്തി. വികാരി ഫാ. മാത്യു ചിറയിൽ, ഫാ. രഞ്ജിത്ത് ആലുങ്കൽ, ഫാ. ഏബ്രഹാം വലിയ കുളത്തുങ്കൽ, ഫാ. ആൽബിൻ പാറത്താനം തുടങ്ങിയവർ പ്രസംഗിച്ചു.

കുമരകത്തെ ദുരിതാശ്വാസ ക്യാമ്പുകൾ കോൺഗ്രസ് നേതാക്കൾ സർശിച്ചു

കുമരകം: കോട്ടയം ഡിസിസി പ്രസിഡന്‍റ് നാട്ടകം സുരേഷിന്‍റെയും വൈസ് പ്രസിഡന്‍റ് ജി. ഗോപകുമാറിന്‍റെയും നേതൃത്വത്തിൽ കുമരകത്തെ കോൺഗ്രസ് പ്രവർത്തകർ ദുരിതാശ്വാസ ക്യാമ്പുകൾ സന്ദർശിച്ചു. മണ്ഡലം പ്രസിഡന്‍റ് സി.ജെ. സാബു, രഘു അകവൂർ, പഞ്ചായത്തംഗങ്ങളായ പി.കെ. മനോഹരൻ, ദിവ്യ ദാമോദരൻ, അലൽ കുര്യാക്കോസ് മാത്യു എന്നിവർ ഉൾപ്പെട്ട സംഘമാണ് സന്ദർശനം നടത്തിയത്.

തോട്ടില്‍ വീണ ഗൃഹനാഥനെ മൂന്നാം ദിനവും കണ്ടെത്താനായില്ല

മീനടം: തോട്ടില്‍ വീണ ഗൃഹനാഥനെ മൂന്നാം ദിനവും കണ്ടെത്താനായില്ല. മീനടം കാട്ടുമറ്റത്തില്‍ ഈപ്പന്‍ തോമസിനെ (കുഞ്ഞ്-67) യാണു ശനിയാഴ്ച ഉച്ചകഴിഞ്ഞ് 3.45 മുതല്‍ കാണാതായത്. പടിഞ്ഞാറേവീട്ടില്‍ കടവ് ഭാഗത്തെ സ്വന്തം പുരയിടത്തിലെ തേങ്ങയിടുന്നതിനിടെയാണ് അപകടം. തോട്ടില്‍ വീണ തേങ്ങ എടുക്കാന്‍ ശ്രമിക്കുന്നതിനിടെ കാല്‍ വഴുതി ഈപ്പന്‍ തോട്ടില്‍ വീഴുകയായിരുന്നെന്നു തെങ്ങുകയറ്റക്കാരന്‍ രമണന്‍ പോലീസിനോട് പറഞ്ഞു. മൂന്നു ദിവസമായി സ്‌കൂബാ ടീമും ഈരാറ്റുപേട്ട നന്മ ടീമും തോട്ടില്‍ തെരച്ചിൽ നടത്തിയെങ്കിലും കണ്ടെത്താനായില്ല. ദീര്‍ഘനാളായി മുംബൈയിലായിരുന്ന ഈപ്പന്‍ കഴിഞ്ഞനാളിലാണ് നാട്ടിലെത്തിയത്.

പ്രവേശനം ഉത്സവമാക്കി സ്കൂളുകൾ

ചങ്ങനാശേരി: പൂക്കളും മധുരവും നല്‍കി കുട്ടികളെ വരവേറ്റ് സ്‌കൂളുകളില്‍ പ്രവേശനേത്സവം ആഘോഷമായി. പല സ്‌കൂളുകളിലും റാലിയോടെയാണ് കുട്ടികളെ സ്കൂളുകളിലേക്കു സ്വീകരിച്ചത്. മുത്തുക്കുടകളും തോരണങ്ങളും വാദ്യഘോഷങ്ങളും കുഞ്ഞുമനസുകള്‍ക്ക് ഇമ്പകരമായി. എസ്ബി സ്‌കൂളില്‍ നടന്ന പ്രവേശനോത്സവത്തില്‍ നവാഗതരായി വന്ന 325 കുട്ടികളെ സ്‌കൂളില്‍ വരവേറ്റു. പ്രവേശനോത്സവ റാലി ജോബ് മൈക്കിള്‍ എംഎല്‍എ ഫ്‌ളാഗ് ഓഫ് ചെയ്തു. സ്‌കൂള്‍ മാനേജര്‍ റവ.ഡോ. ടോണി ചെത്തിപ്പുഴ അധ്യക്ഷത വഹിച്ചു. മുന്‍സിപ്പല്‍ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍ മുഖ്യപ്രഭാഷണം നടത്തി. വൈസ്‌ ചെയര്‍മാന്‍ മാത്യൂസ് ജോര്‍ജ്, മുന്‍സിപ്പല്‍ കൗണ്‍സിലര്‍ ജോമി ജോസഫ്, പ്രിന്‍സിപ്പല്‍ ഫാ. റോജി വല്ലയില്‍, പിടിഎ പ്രസിഡന്‍റ് ട്വിങ്കിള്‍ പി. ജോണ്‍, സോണിയ ജോര്‍ജ്, പ്രവീണ്‍ കെ. മാത്യു, ലീന ജോണ്‍, വി.സി. തോമസ്, റിന്‍സ് വര്‍ഗീസ് എന്നിവര്‍ പ്രസംഗിച്ചു. ചങ്ങനാശേരി: ക്ലൂണി പബ്ലിക് സ്‌കൂളില്‍ പ്രവേശനോത്സവം ഡോ. സെബിന്‍ എസ്. കൊട്ടാരം ഉദ്ഘാടനം ചെയ്തു. പ്രിന്‍സിപ്പല്‍ സിസ്റ്റര്‍ ദീപ്തി അധ്യക്ഷത വഹിച്ചു. മാനേജര്‍ സിസ്റ്റര്‍ അനൂപ മുഖ്യപ്രഭാഷണം നടത്തി. പായിപ്പാട്: പായിപ്പാട് ഗവണ്‍മെന്‍റ് യുപി സ്‌കൂളില്‍ പായിപ്പാട് പഞ്ചായത്ത് ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ ജെസി തോമസിന്‍റെ അധ്യക്ഷതയില്‍ മാടപ്പള്ളി ബ്ലോക്ക് പഞ്ചായത്ത് മെംബര്‍ വിനു ജോബ് ഉദ്ഘാടനം നിര്‍വഹിച്ചു. പായിപ്പാട് പഞ്ചായത്ത് വികസന സ്റ്റാന്‍ഡിംഗ് കമ്മിറ്റി ചെയര്‍മാന്‍ എബി വര്‍ഗീസ് മുഖ്യപ്രഭാഷണം നടത്തി. കറുകച്ചാൽ: ചമ്പക്കര സുഭാഷ് മെമ്മോറിയൽ യുപി സ്കൂളിൽ ലഹരിവിരുദ്ധ പ്രതിജ്ഞ ചൊല്ലിയാണ് സ്കൂളിലെ ആദ്യദിനം ആരംഭിച്ചത്. കോട്ടയം നാർക്കോട്ടിക് സെൽ സിവിൽ പോലീസ് ഓഫീസർ വി.ബി. അമ്പിളി ബോധവത്കരണ ക്ലാസിനു നേതൃത്വം നൽകി. ചീഫ് വിപ്പ് ഡോ. എൻ. ജയരാജ് എംഎൽഎ ഉദ്ഘാടനം ചെയ്തു. സ്കൂൾ മാനേജർ അശോക് കുമാർ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് ശ്രീജിഷ കിരൺ, ബ്ലോക്ക് പഞ്ചായത്തംഗം ലതാ ഷാജൻ, കിരൺ കുമാർ, രാജേഷ് കൈടാച്ചിറ എന്നിവർ പ്രസംഗിച്ചു. പ്രവേശനോത്സവത്തിൽ സർക്കാർ സ്‌കൂളിന് പുതിയ കെട്ടിടം നെടുംകുന്നം: പ്രവേശനോത്സവത്തിൽ നെടുംകുന്നം ഗവൺമെന്‍റ് ഹയർ സെക്കൻഡറി സ്‌കൂളിന് പുതിയ കെട്ടിടവും. എംഎൽഎ ഫണ്ടിൽനിന്നും 3.52 കോടി രൂപ ചെലവഴിച്ച് നിർമിച്ച കെട്ടിടം ചീഫ് വിപ്പ് എൻ. ജയരാജ് എംഎൽഎ ഉദ്ഘാടനം ചെയ്തു. രണ്ടു നിലകളിലായി 10,020 ചതുരശ്ര അടി വിസ്തൃതിയിലാണ് എട്ട് ക്ലാസ് മുറികളോട് കൂടിയ കെട്ടിടം ഉന്നത നിലവാരത്തിൽ നിർമിച്ചത്. ഓഫീസ്മുറി, ലൈബ്രറി, കൗൺസിലിംഗ് മുറി, ശൗചാലയങ്ങൾ തുടങ്ങിയ സൗകര്യങ്ങളുമുണ്ട്. ഭാവിയിൽ മുകളിലേക്ക് രണ്ട് നിലകൾകൂടി നിർമിക്കാനും ആലോചനയുണ്ട്. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗർ അധ്യക്ഷത വഹിച്ചു. ലഹരിവിരുദ്ധ ബോധവത്കരണം ബ്ലോക്ക് പഞ്ചായത്ത് പ്രസിഡന്‍റ് മുകേഷ് കെ. മണി ഉദ്ഘാടനം ചെയ്തു. ലതാ ഉണ്ണികൃഷ്ണൻ, കെ.എൻ. ശശീന്ദ്രൻ, റോഷ്‌ന അലിക്കുഞ്ഞ്, കെ.എ. സുനിത, എം. സ്വപ്ന, ഫാ. ജോജിമോൻ ജോർജ്, രഞ്ജി രവീന്ദ്രൻ, അജി കാരുവാക്കൽ, റെജി പോത്തൻ തുടങ്ങിയവർ പ്രസംഗിച്ചു.

ധന്യന്‍ മാര്‍ കുര്യാളശേരിയുടെ ഓർമകള്‍ക്കു മുന്നില്‍ പുഷ്പാഞ്ജലിയുമായി വിശ്വാസികൾ

ചങ്ങനാശേരി: ധന്യന്‍ മാര്‍ തോമസ് കുര്യാളശേരിയുടെ നൂറാം ചരമവാര്‍ഷികാചരത്തിന് ചങ്ങനാശേരി മെത്രാപ്പോലീത്തന്‍ പള്ളിയിലെ കബറിടത്തില്‍ പ്രാര്‍ഥനാപുഷ്പങ്ങളുമായി വിശ്വാസീ സാഗരം. രാവിലെ മുതല്‍ തുടര്‍ച്ചയായി വിശുദ്ധ കുര്‍ബാനയും അനുസ്മരണപ്രാര്‍ഥനകളും ഉച്ചകഴിഞ്ഞ് ദിവ്യകാരുണ്യ പരസ്യ ആരാധനയും നടന്നു. ഉച്ചയ്ക്കു നടന്ന നേര്‍ച്ചസദ്യയിലും നൂറുകണക്കിനു വിശ്വാസികള്‍ പങ്കെടുത്തു. മേയ് 26 മുതലാണ് അനുസ്മരണ ശുശ്രൂകള്‍ ആരംഭിച്ചത്. വിവിധ സമയങ്ങളില്‍ അതിരൂപതാ വികാരി ജനറാള്‍ മോണ്‍. സ്‌കറിയ കന്യാകോണില്‍, കത്തീഡ്രല്‍ വികാരി ഫാ. ജോസഫ് വാണിയപ്പുരയ്ക്കല്‍, ചമ്പക്കുളം ബസലിക്ക റെക്ടര്‍ ഫാ. ജയിംസ് പാലയ്ക്കല്‍, എടത്വ ഫൊറോന പള്ളി വികാരി ഫാ. ഫിലിപ്പ് വൈക്കത്തുകാരന്‍, ഫാ. ജേക്കബ് കാട്ടടി, ഫാ. ജോസഫ് പുതുപ്പറമ്പില്‍, ഫാ. ആന്‍റണി അറയ്ക്കത്തറ, ഫാ. മാത്യു വടക്കേപ്പറമ്പില്‍, ഫാ. ജോസഫ് കുറശേരി എന്നിവര്‍ വിശുദ്ധ കുര്‍ബാനയര്‍പ്പിച്ചു. ജോസഫ് ആലഞ്ചേരി, കുര്യച്ചന്‍ ഒളശ, ചാള്‍സ് പാലാത്തറ, സൈബി അക്കര, ബിന്നി കല്ലൂക്കളം, ജസ്റ്റിന്‍ തോമസ്, ജോമി കാവാലം, പി.എ. തോമസ്‌കുട്ടി, ജോബി തൂമ്പുങ്കല്‍, സച്ചിന്‍ സാജന്‍ തുടങ്ങിയവര്‍ നേതൃത്വം നല്‍കി.

ചങ്ങനാശേരിക്കിനി കുടിവെള്ളം സുലഭമാകും

ചങ്ങനാശേരി: പെരുന്നയില്‍ ഉന്നതതല ജലസംഭരണിയുടെയും ഓഫീസ് സമുച്ചയത്തിന്‍റെയും നിര്‍മാണം അവസാനഘട്ടത്തില്‍. മുകളില്‍ 15 ലക്ഷം ലിറ്റര്‍ ശേഷിയുള്ള ജലസംഭരണിയും താഴത്തെ നിലയില്‍ ഓഫീസ് സംവിധാനങ്ങളുമാണ് സജ്ജമാകുന്നത്. നിര്‍മാണം പൂര്‍ത്തിയാക്കി ഈ വര്‍ഷം അവസാനത്തോടെ കമ്മീഷന്‍ ചെയ്യാനാണ് വാട്ടര്‍ അഥോറിറ്റി ആലോചിക്കുന്നത്. ചങ്ങനാശേരിയില്‍ റെയില്‍വേ ട്രാക്കിനടിയിലൂടെ കടന്നുപോകുന്ന കല്ലിശേരി, കറ്റോട് പദ്ധതികളുടെ പൈപ്പ് ലൈനുകളുടെ അറ്റകുറ്റപ്പണികള്‍ക്കായി റെയില്‍വേ അനുമതിക്കായി കാത്തിരിക്കേണ്ടിവരുന്നതിലുള്ള ബുദ്ധിമുട്ടുകള്‍ പരിഗണിച്ചാണ് പുതിയ പദ്ധതി വിഭാവനം ചെയ്യുന്നതിന് വിവിധ തലങ്ങളില്‍നിന്നു നിര്‍ദേശം ഉണ്ടായത്. ഇതേത്തുടർന്ന് ജല അഥോറിറ്റിക്ക് പെരുന്നയില്‍ ലഭ്യമായ സ്ഥലം പ്രയോജനപ്പെടുത്തി ഉന്നതതല ജലസംഭരണി ഉള്‍പ്പെടെ ഓഫീസ് സമുച്ചയം നിര്‍മിക്കുന്നതിന് പദ്ധതി ആസൂത്രണം ചെയ്യുകയായിരുന്നു. ജോബ് മൈക്കിള്‍ എംഎല്‍എ ഉള്‍പ്പെടെയുള്ള ജനപ്രതിനിധികള്‍ മുന്‍കൈയെടുത്ത് 2021-22 സാമ്പത്തികവര്‍ഷത്തെ ബജറ്റില്‍ ഇതിനായി 10 കോടി രൂപ ഉള്‍പ്പെടുത്തി ഭരണാനുമതി നേടി. 2023ലാണ് പദ്ധതിയുടെ നിര്‍മാണം ആരംഭിച്ചത്. ഈ പദ്ധതി പൂര്‍ത്തീകരിക്കുന്നതോടെ ചെറുകരക്കുന്നിലുള്ള ഓഫീസ് സമുച്ചയം പെരുന്നയിലെ പുതിയ കെട്ടിടത്തിലേക്ക് മാറ്റും. ചങ്ങനാശേരി നിവാസികൾക്കും ഉപഭോക്താക്കൾക്കും ചെറുകരക്കുന്നിലെ ഓഫീസില്‍ എത്താനുള്ള ബുദ്ധിമുട്ടുകള്‍ക്കു പരിഹാരമാകും. തടസമായി റെയില്‍വേ ട്രാക്കിനടിയിലെ പൈപ്പ് ലൈനുകളുടെ അറ്റകുറ്റപ്പണികള്‍ ചങ്ങനാശേരി നഗരസഭയിലും അനുബന്ധ പഞ്ചായത്തുകളിലും നിലവില്‍ കല്ലിശേരി, കറ്റോട് എന്നീ രണ്ടു പദ്ധതികളില്‍നിന്നാണ് ജല വിതരണം നടത്തിവരുന്നത്. അര്‍ബന്‍ വാട്ടര്‍ സപ്ലൈ സ്‌കീമായി കല്ലിശേരി പദ്ധതിയും റൂറല്‍ വാട്ടര്‍ സപ്ലൈ സ്‌കീമായി കറ്റോട് പദ്ധതിയുമാണ് നിലവിലുള്ളത്. ഈ രണ്ടു പദ്ധതികളുടെയും ജലസ്രോതസ് യഥാക്രമം കല്ലിശേരി പദ്ധതിയുടേത് പമ്പനദിയും കറ്റോട് പദ്ധതിയുടേത് മണിമലയാറുമാണ്. കല്ലിശേരി പദ്ധതിയുടെ ജലം കല്ലിശേരിയിലുള്ള ശുദ്ധീകരണ ശാലയില്‍ ശുദ്ധീകരിച്ച ശേഷം പെരുന്ന ഭൂതല ജലസേചന സംഭരണിയിലെത്തിച്ച് അവിടെനിന്നും പമ്പ് ചെയ്തു ചെറുകരക്കുന്നിലുള്ള ഉന്നതതല ജലസംഭരണിയില്‍ എത്തിച്ചാണ് വിതരണം ചെയ്യുന്നത്. കറ്റോട് പദ്ധതിയുടെ ജലം തിരുവല്ല ശുദ്ധീരണശാലയില്‍ ശുദ്ധീകരിച്ച് അവിടെനിന്നു പമ്പ് ചെയ്ത് നേരിട്ട് ചെറുകരക്കുന്നിലെ ഉന്നതതല ജലസംഭരണിയിലെത്തിച്ചാണ് വിതരണം ചെയ്യുന്നത്. ഇരുപദ്ധതികളുടെയും പൈപ്പ് ലൈനുകള്‍ ചങ്ങനാശേരി റെയില്‍വേ സ്റ്റേഷനോടു ചേര്‍ന്ന് പാതകളുടെ അടിയിലൂടെയാണ് ചെറുകരക്കുന്നിലേക്ക് കടന്നുപോകുന്നത്. പെരുന്നയില്‍നിന്നു ചെറുകരകുന്നിലേക്ക് പമ്പു ചെയ്തിരുന്ന പൈപ്പ്‌ലൈന്‍ മൂന്നുവര്‍ഷം മുമ്പ് റെയില്‍വേ ട്രാക്കിന് അടിയില്‍ പൊട്ടുകയും റെയില്‍വേ ട്രാക്കിനടിയിലൂടെയുള്ള പൈപ്പ് മാറ്റി സ്ഥാപിക്കുന്നതിന് ഒരു വര്‍ഷത്തോളം കാലതാമസം നേരിടുകയും ചെയ്തിരുന്നു. ചങ്ങനാശേരി റെയില്‍വേ സ്റ്റേഷനു കിഴക്ക്, പടിഞ്ഞാറ് ഭാഗങ്ങള്‍ക്കായി രണ്ടു പദ്ധതികള്‍ നിലവില്‍ പെരുന്ന ഭൂതല ജലസംഭരണിയില്‍ ലഭ്യമാകുന്ന ജലം പമ്പു ചെയ്ത് പുതുതായി നിര്‍മിച്ച ജലസംഭരണിയില്‍ സംഭരിച്ച് അവിടെനിന്നും ചങ്ങനാശേരി മുനിസിപ്പാലിറ്റിയുടെ റെയില്‍വേ ക്രോസിന് പടിഞ്ഞാറുവശത്തുള്ള മുഴുവന്‍ പ്രദേശങ്ങളിലും പായിപ്പാട് പഞ്ചായത്തിലെ ളായിക്കാട്, പൂവം, എസി റോഡ് പ്രദേശങ്ങളിലും വാഴപ്പള്ളി പഞ്ചായത്തിലെ പറാല്‍, വെട്ടിത്തുരുത്ത് പ്രദേശങ്ങളിലും ജലവിതരണം ചെയ്യുന്നതിനായാണ് ഈ പദ്ധതി ആവിഷ്‌കരിച്ചിട്ടുള്ളത്. ചങ്ങനാശേരി നഗരസഭയുടെ റെയില്‍വേ പാതയുടെ കിഴക്കന്‍ മേഖലയുള്‍പ്പെടെ സമീപ പഞ്ചായത്തുകളിൽ നിലവിലുള്ള ജലദൗര്‍ലഭ്യത്തിനു പരിഹാരമായി 22 ദശലക്ഷം ശേഷിയോടുകൂടിയ ശുദ്ധീകരണശാലയുള്‍പ്പെടെയുള്ള ബൃഹത് പദ്ധതി മോര്‍ക്കുളങ്ങര കേന്ദ്രമാക്കി നിര്‍മാണം നടന്നുവരികയാണ്. പെരുന്നയില്‍ അധികമായി ശുദ്ധജലം ശേഖരിച്ച് പടിഞ്ഞാറന്‍ മേഖലയില്‍ ജലവിതരണം നടത്തുമ്പോള്‍ കിഴക്കന്‍ മേഖലയിലുള്‍പ്പടെയുള്ള പഞ്ചായത്തുകള്‍ക്ക് ജലലഭ്യതക്കുറവുണ്ടാകുമെന്ന ആശങ്കകള്‍ക്കും ഇതോടെ പരിഹാരമാകും. ഈ ശുദ്ധീകരണശാലയോടൊപ്പം 20 ലക്ഷം ലിറ്റര്‍ ശേഷിയുള്ള ഓവര്‍ഹെഡ് ടാങ്കും മോര്‍ക്കുളങ്ങരയില്‍ നിര്‍മിക്കുന്നുണ്ട്. ഈ പ്രവൃത്തികള്‍ പൂര്‍ത്തിയാകുമ്പോള്‍ കല്ലിശേരിയില്‍നിന്നുള്ള വെള്ളം സംഭരിച്ചിരുന്ന ചെറുകരക്കുന്നിലുള്ള 20 ലക്ഷം ലിറ്റര്‍ ശേഷിയുള്ള ടാങ്ക് മോര്‍ക്കുളങ്ങരയില്‍നിന്നു പമ്പ് ചെയ്യുന്ന വെള്ളം സംഭരിക്കാന്‍ ഉപയോഗിക്കും. കൂടാതെ, മോര്‍ക്കുളങ്ങരയില്‍തന്നെ 20 ലക്ഷം ലിറ്റര്‍ ശേഷിയുള്ള ഉന്നതതല സംഭരണിയും നിര്‍മാണം നടന്നുവരികയാണ്. തൃക്കൊടിത്താനത്തും ഹോമിയോ കോളജിലും രണ്ട് പദ്ധതികള്‍ തൃക്കൊടിത്താനം കുന്നുംപുറത്ത് ഏഴു ലക്ഷം ലിറ്റര്‍ ശേഷിയുള്ള ഉന്നതതല സംഭരണിയും കുറിച്ചി ഹോമിയോ കോളജ് പരിസരത്ത് ഏഴു ലക്ഷം ലിറ്റര്‍ ശേഷിയുള്ള ഉന്നതതല ജലസംഭരണിയും വിതരണ ശൃംഖലകളും രണ്ടു വര്‍ഷത്തിനകം പൂര്‍ത്തിയാകുമെന്നാണു കരുതുന്നത്. ഇതോടെ ചങ്ങനാശേരി മണ്ഡലത്തിലെ എല്ലാ പ്രദേശങ്ങളിലും 24 മണിക്കൂറും ജലവിതരണം സാധ്യമാകും. ഇതോടൊപ്പം ചങ്ങനാശേരി നിയോജകമണ്ഡലത്തിലെ എല്ലാ പഞ്ചായത്തുകളിലും ജൽജീവന്‍ മിഷന്‍ പദ്ധതി മുഖേന പൈപ്പ്‌ലൈനുകള്‍ സ്ഥാപിക്കുന്ന പ്രവൃത്തികള്‍ നടന്നുവരുന്നുണ്ട്. തിരുവല്ല കറ്റോടുനിന്ന് ചങ്ങനാശേരി മോര്‍ക്കുളങ്ങരയിലേക്കു വെള്ളം എത്തിക്കുന്നതിന് ആവശ്യമായ 700 എംഎം ഡിഐ വാട്ടര്‍ പമ്പിംഗ് ലൈന്‍ സ്ഥാപിക്കാനുള്ള പദ്ധതിയുടെയും നിർമാണം നടന്നുവരികയാണ്. ചങ്ങനാശേരി മുനിസിപ്പാലിറ്റിയിലെ കാലപ്പഴക്കം ചെന്ന എസി പൈപ്പ്‌ലൈനുകള്‍ മാറ്റി സ്ഥാപിക്കുന്നതിനും പെരുന്നയില്‍ നിര്‍മിക്കുന്ന 15 ലക്ഷം ലിറ്റര്‍ ശേഷിയുള്ള ഉന്നതതല ജല സംഭരണിയില്‍നിന്ന് ഡിസ്ട്രിബൂഷന്‍ മെയിന്‍ സ്ഥാപിക്കുന്നതിനുമുള്ള ടെന്‍ഡര്‍ നടപടികളും നടന്നുവരുന്നു. അമൃത് പദ്ധതിയില്‍ ഉള്‍പ്പെടുത്തി 11.38 കോടി രൂപയുടെ ഭരണാനുമതി ഇതിനായി ലഭ്യമായിട്ടുണ്ട്.

‘സപ്പോര്‍ട്ട് ചൈല്‍ഡ് പദ്ധതി’ പ്രതീക്ഷയറ്റവര്‍ക്ക് കൈത്താങ്ങ്: മാര്‍ തോമസ് തറയില്‍

ചങ്ങനാശേരി: ആത്മതാ കേന്ദ്രത്തിന്‍റെ ആഭിമുഖ്യത്തില്‍ നടത്തിവരുന്ന സപ്പോര്‍ട്ട് ചൈല്‍ഡ് പദ്ധതി ജീവിതത്തില്‍ പ്രതീക്ഷയറ്റവര്‍ക്കുള്ള കൈത്താങ്ങാണെന്ന് ആര്‍ച്ച്ബിഷപ് മാര്‍ തോമസ് തറയില്‍. സപ്പോര്‍ട്ട് എ ചൈല്‍ഡ് പദ്ധതിയുടെ ഇരുപത്തിയൊന്നാമത് വാര്‍ഷികവും പഠനോപകരണ വിതരണവും ഉദ്ഘാടനം ചെയ്തു പ്രസംഗിക്കുകയായിരുന്നു മാർ തറയിൽ. വികാരി ജനറാൾ മോണ്‍. ആന്‍റണി എത്തയ്ക്കാട്ട് അധ്യക്ഷത വഹിച്ചു. ആത്മതാ കേന്ദ്രം ഡയറക്ടര്‍ ഫാ. ജിന്‍സ് ചോരേട്ട് ചാമക്കാല, വ്യാപാരി വ്യവസായി ഏകോപന സമിതി പ്രസിഡന്‍റ് ജോണ്‍സണ്‍ പ്ലാത്തോട്ടം, ജെസിഐ പ്രസിഡന്‍റ് ഡോ. ജോര്‍ജി ജോര്‍ജ്, ഡോ. ശരത് ചന്ദ്രന്‍, ഡോ. എസ്.ജി. ബിജു, സച്ചു ലൂയിസ്, തോമസ് തേവരുപറമ്പില്‍, വി.എ. റോസമ്മ, അരുണ്‍ എസ്. ആലുങ്കല്‍, ഡോ. രാജു തോമസ്, ജോണി പാലമുറിയില്‍, ട്രീസാ മാത്യു, ഡോ. ബോബന്‍, ടി.എം. മാത്യു എന്നിവര്‍ പ്രസംഗിച്ചു.

എന്‍എസ്എസ് വനിതാ സ്വയംസഹായ സംഘങ്ങളുടെ ക്രയവിക്രയം 3,892 കോടി

ചങ്ങനാശേരി: സ്ത്രീശക്തീകരണത്തിലൂടെ സമഗ്ര പുരോഗതി ലക്ഷ്യമിട്ട് എന്‍എസ്എസ് ആരംഭിച്ച വനിതാ സ്വയംസഹായ സംഘങ്ങളുടെ ക്രയവിക്രയം 3,892 കോടി. 19,508 സ്വയംസഹായ സംഘങ്ങളില്‍ 3.60 ലക്ഷം വനിതകള്‍ അംഗങ്ങളാണ്. ഈ സാമ്പത്തിക വര്‍ഷം 20,000 സംഘങ്ങളും അംഗങ്ങളുടെ എണ്ണം നാല് ലക്ഷമാക്കി ക്രയവിക്രയം 4,000 കോടി രൂപയാക്കി ഉയര്‍ത്താനും എൻഎസ്എസ് ലക്ഷ്യമിടുന്നു. പുതുതായി 50 പത്മാ കഫേകള്‍ ആരംഭിക്കും. നൂതന സാങ്കേതികവിദ്യ ഉപയോഗിച്ച് കൃഷി ഉത്പാദനം വര്‍ധിപ്പിക്കുന്നതിനും കര്‍ഷകരെ ഇടനിലക്കാരുടെ ചൂഷണത്തില്‍നിന്നു രക്ഷിക്കുന്നതിനുമായി ആരംഭിച്ച ഫാര്‍മര്‍ പ്രൊഡ്യൂസര്‍ ഓര്‍ഗനൈസേഷന്‍ 20 താലൂക്ക് യൂണിയനുകളില്‍ ദീര്‍ഘിപ്പിക്കും. എന്‍എസ്എസ് ബജറ്റ് അവതരണത്തിലാണ് ജനറല്‍ സെക്രട്ടറി ജി. സുകുമാരന്‍ നായര്‍ ഇക്കാര്യങ്ങള്‍ അറിയിച്ചത്. എൻഎസ്എസ് സെക്രട്ടറി ഹരികുമാർ കോയിക്കൽ, ഡയറക്ടർ ബോർഡംഗങ്ങൾ തുടങ്ങിയവർ ബജറ്റ് സമ്മേളനത്തിൽ പങ്കെടുത്തു.

എസി റോഡിന്‍റെ പുനര്‍നിര്‍മാണം അശാസ്ത്രീയം: കത്തോലിക്ക കോണ്‍ഗ്രസ്

ചങ്ങനാശേരി: എസി റോഡില്‍ നിലവില്‍ നടത്തിയിട്ടുള്ള നിര്‍മാണപ്രവര്‍ത്തനങ്ങള്‍ പരിസ്ഥിതിയെ ദോഷകരമായി ബാധിക്കുന്നതാണെന്നും ആ മേഖലയില്‍ ജീവിക്കുന്നവരുടെ ജീവിതത്തെ കൂടുതല്‍ സങ്കീര്‍ണമാക്കുന്ന തരത്തിലുള്ള നിര്‍മാണ പ്രവര്‍ത്തനങ്ങളാണ് നടത്തിയിട്ടുള്ളതെന്നും കത്തോലിക്ക കോണ്‍ഗ്രസ് ചങ്ങനാശേരി അതിരൂപതാ സമിതി. വലിയതോതില്‍ മുതല്‍മുടക്കി നിര്‍മാണപ്രവര്‍ത്തനങ്ങള്‍ നടത്തിയിട്ടും ഈ കഴിഞ്ഞദിവസങ്ങളിലെ മഴയില്‍ റോഡില്‍ കിലോമീറ്ററുകളോളം വെള്ളക്കെട്ടുകള്‍ രൂപപ്പെട്ടു. വലിയ വാഹനങ്ങള്‍ക്ക് മാത്രമാണ് റോഡിലൂടെ സഞ്ചാരം സാധ്യമാകുന്നത്. അപാകതകള്‍ പരിഹരിക്കാന്‍ സര്‍ക്കാര്‍ ഉടന്‍ മുന്‍കൈയെടുക്കണമെന്നും കത്തോലിക്കാ കോണ്‍ഗ്രസ് ആവശ്യപ്പെട്ടു. അതിരൂപത പ്രസിഡന്‍റ് ബിജു സെബാസ്റ്റ്യന്‍റെ അധ്യക്ഷതയില്‍ ചേര്‍ന്ന നേതൃസമ്മേളനം അതിരൂപതാ ഡയറക്ടര്‍ ഫാ. സെബാസ്റ്റ്യന്‍ ചാമക്കാല ഉദ്ഘാടനം ചെയ്തു. ജനറല്‍ സെക്രട്ടറി ബിനു ഡൊമിനിക്, ജോസ് വെങ്ങാന്തറ, സി.ടി. തോമസ്, ജോര്‍ജുകുട്ടി മുക്കത്ത്, ഷിജി ജോണ്‍സണ്‍, റോസിലിന്‍ കുരുവിള, ജിനോ ജോസഫ് എന്നിവര്‍ പ്രസംഗിച്ചു.

വർണാഭമായി പ്രവേശനോത്സവം

വൈക്കം: അറിവിന്‍റെ ആദ്യാക്ഷരമധുരം നുണയാൻ അക്ഷരമുറ്റത്തെത്തിയ കുരുന്നുകൾക്ക് ഊഷ്മള വരവേൽപ്പ്. അലങ്കരിച്ച വിദ്യാലയങ്ങളുടെ കവാടങ്ങളിൽ നവാഗതരെ വരവേൽക്കാൻ അധ്യാപകരും രക്ഷാകർതൃ സമിതികളും എത്തി. വൈക്കം പള്ളിപ്രത്തുശേരി സെന്‍റ് ലൂയിസ് യുപി സ്കൂളിൽ പ്രവേശനോത്സവം ടിവി പുരം പഞ്ചായത്ത് പ്രസിഡന്‍റ് ശ്രീജി ഷാജി ഉദ്ഘാടനം ചെയ്തു. പിടിഎ പ്രസിഡന്‍റ് ഉദയകുമാർ അധ്യക്ഷത വഹിച്ചു. പൂർവവിദ്യാർഥി ഡീക്കൻ ജിബിൻജോയി മുക്കുടിക്കൽതറ അക്ഷരദീപം തെളിച്ചു.പഠനോപകരണ വിതരണം പള്ളിപ്രത്തുശേരി സർവീസ് സഹകരണ ബാങ്ക് പ്രസിഡന്‍റ് അഡ്വ. ജോർജ് ജോസഫ് നിർവഹിച്ചു. ടിവി പുരം പള്ളിപ്രത്തുശേരി സെന്‍റ് ജോസഫ് സ്കൂളിൽ സ്കൂൾ മാനേജർ സിസ്റ്റർ മീന ഡാനിയേൽ സിഎംസി പ്രവേശനോത്സവം ഉദ്ഘാടനം ചെയ്തു. എംപിടിഎ പ്രസിഡന്‍റ് ജീന ടെൽസൺ അധ്യക്ഷത വഹിച്ചു. ഉദയനാപുരം നേരേകടവ് ഗവൺമെന്‍റ് ഹരിജൻ വെൽഫെയർ എൽപി സ്കൂളിൽ പഞ്ചായത്തംഗം ഗിരിജ പുഷ്കരൻ പ്രവേശനോത്സവം ഉദ്ഘാടനം ചെയ്തു. അഡ്വ.അനിൽകുമാർ അധ്യക്ഷത വഹിച്ചു. വൈക്കം അയ്യർകുളങ്ങര ഗവൺമെന്‍റ് യുപി സ്കൂളിൽ നഗരസഭാ ചെയർപേഴ്സൺ പ്രീതാ രാജേഷ് പ്രവേശനോത്സവം ഉദ്ഘാടനം ചെയ്തു. പിടിഎ പ്രസിഡന്‍റ് സാബു അധ്യക്ഷത വഹിച്ചു. കടുത്തുരുത്തി: ആയാംകുടി ഹൈസ്‌കൂളിൽ പ്രവേശനോത്സവം സ്‌കൂള്‍ മാനേജര്‍ വാസുദേവന്‍ നമ്പൂതിരിയുടെ അധ്യക്ഷതയില്‍ മാംഗോ മെഡോസ് എംഡി എന്‍.കെ. കുര്യന്‍ ഉദ്ഘാടനം ചെയ്തു. കടുത്തുരുത്തി പഞ്ചായത്ത് മെംബര്‍മാരായ സി.ബി. പ്രമോദ്, പൗളി ജോര്‍ജ്, എസ്. വിഷ്ണു നമ്പൂതിരി, പിടിഎ പ്രസിഡന്‍റ് രവീന്ദ്രന്‍, ഹെഡ്മാസ്റ്റര്‍ ടി.എസ്. ബിജുകുമാര്‍ തുടങ്ങിയവര്‍ പ്രസംഗിച്ചു. ആയാംകുടി: സെന്‍റ് തെരേസ് ഇംഗ്ലീഷ് മീഡിയം സ്‌കൂളില്‍ആയാംകുടി: സെന്റ് തെരേസ് ഇംഗ്ലീഷ് മീഡിയം സ്‌കൂളില്‍ 2025-26 അധ്യയന വര്‍ഷത്തെ പ്രവേശനോത്സവം നടന്നു. സ്‌കൂള്‍ മാനേജര്‍ ബ്രദര്‍ ഷാജി വാഴേപ്പറമ്പില്‍ ഉദ്ഘാടനം നിര്‍വഹിച്ചു. പ്രിന്‍സിപ്പല്‍ സോജോ എബ്രഹാം, അഡ്മിനിസ്‌ട്രേറ്റര്‍ ബ്രദര്‍ മാര്‍ട്ടിന്‍ മേനാച്ചേരില്‍, മലപ്പുറം സെന്‍റ് തെരേസാസ് പള്ളി വികാരി ഫാ. തോമസ് ചില്ലയ്ക്കല്‍, സ്റ്റാഫ് സെക്രട്ടറി നിമിഷാമോള്‍ മണി എന്നിവര്‍ പ്രസംഗിച്ചു. വെച്ചൂർ:സെന്‍റ് മൈക്കിള്‍സ് ഹയര്‍സെക്കൻഡറി സ്കൂളിലെ പ്രവേശനോത്സവം പഞ്ചായത്ത് പ്രസിഡന്‍റ് കെ.ആർ. ഷൈലകുമാർ ഉദ്ഘാടനം ചെയ്തു. സ്കൂള്‍ മാനേജര്‍ഫാ. പോള്‍ആത്തപ്പള്ളി അധ്യക്ഷത വഹിച്ചു. പഞ്ചായത്ത് അംഗം പി. കെ.മണിലാല്‍,പി ടി എ പ്രസിഡന്‍റ് ബിജു മിത്രംപള്ളി,സഹവികാരി ഫാ. ആന്‍റണികളത്തില്‍, ഹെഡ്മിസ്ട്രസ് ഷൈജ എം. ജോസഫ് തുടങ്ങിയവർ സംബന്ധിച്ചു. വൈക്കം: വൈക്കം ലിസ്യു ഇംഗ്ലീഷ് സ്കൂളിൽ പ്രവേശനോത്സവം വൈക്കo കൊതവറ സെന്‍റ് സേവ്യേഴ്സ് കോളജ് പ്രിൻസിപ്പൽ ഡോ.കെ.ജി. ഏബ്രഹാം ഉദ്ഘാടനം ചെയ്തു. സ്കൂൾ മാനേജർ ഫാ. സെബാസ്റ്റ്യൻ നാഴിയംപാറ അധ്യക്ഷത വഹിച്ചു.

കൂട്ടുകാരുടെ മനംകവർന്ന് ഇരട്ടകൾ

ഉദയനാപുരം: നേരേകടവ് ഗവൺമെന്‍റ് ഹരിജൻ വെൽഫെയർ എൽപി സ്കൂളിൽ യുകെജിയിലും ഒന്നാംക്ലാസിലും എത്തിയ ഇരട്ടകൾ സഹപാഠികളുടെ മനംകവർന്നു. നേരേകടവ് കാട്ടുകണ്ടത്തിൽ അഖിൽ-ദീപ്തി ദമ്പതികളുടെ മക്കളായ അൽവിതയും അൻവിതയുമാണ് യുകെജിയിൽ പഠിക്കാനെത്തിയത്. ഒന്നാം ക്ലാസിൽ നേരേകടവ് പുത്തൻകരിയിൽ പി.ഡി. റെജി-ജെ. ജെ. ജോൾവി ദമ്പതികളുടെ മക്കളായ റാഫേലും റാഹേലുമാണ് എത്തിയത്.

പുറംബണ്ട് കവിഞ്ഞൊഴുകി 125 ഏക്കറിലെ കൃഷി നശിച്ചു

തലയോലപ്പറമ്പ്: വടയാർ പൊന്നുരുക്കംപാറ പാടശേഖരത്തിൽ പുറംബണ്ട് കവിഞ്ഞൊഴുകി 125 ഏക്കറിലെ വർഷകൃഷി നശിച്ചു. പത്തു ദിവസം പ്രായമായ നെൽ വിത്തുകളാണ് ദിവസങ്ങളോളം വെള്ളം കെട്ടിനിന്നതിനെത്തുടർന്ന് നശിച്ചത്. കഴിഞ്ഞ ദിവസങ്ങളിലുണ്ടായ മഴയിൽ രണ്ടു ദിവസത്തോളം വൈദ്യുതി നിലച്ചിരുന്നു. തുടർന്ന് പാടശേഖരത്തിൽ രണ്ട് മോട്ടോറുകൾ ഉപയോഗിച്ച് മുഴുവൻ സമയം പമ്പിംഗ് നടത്തിയിട്ടും വെള്ളം വറ്റിയില്ല. ജലനിരപ്പ് ഉയർന്ന് പുറംബണ്ടു കവിഞ്ഞൊഴുകിയാണ് കൃഷിനാശം ഉണ്ടായത്. പാടശേഖരസമിതി 10 ലക്ഷത്തോളം രൂപ വായ്പയെടുത്താണ് അടിസ്ഥാന ജോലികൾ ചെയ്തത്. കൂടാതെ വിത സംബന്ധമായ ജോലികൾ ചെയ്തതിന് ഏക്കറിന് 10,000 രൂപയോളം കർഷകർക്ക് ചെലവായിട്ടുണ്ട്. വീണ്ടും കൃഷി ഇറക്കുന്നതിന് കൃഷിവകുപ്പ് ആവശ്യമായ സഹായം നൽകണമെന്ന് കർഷകർ ആവശ്യപ്പെട്ടു.

മാൻവെട്ടത്തെ മോഷണം: അന്വേഷണം ഊര്‍ജിതമാക്കിയെന്നു പോലീസ്

കടുത്തുരുത്തി: മാന്‍വെട്ടത്ത് വീടിന്‍റെ മുന്‍വശത്തെ വാതില്‍ കുത്തിത്തുറന്ന് മുറിക്കുള്ളിലെ അലമാരയില്‍ സൂക്ഷിച്ചിരുന്ന 32 പവനും 25,000 രൂപയും കവര്‍ന്ന സംഭവത്തില്‍ അന്വേഷണം ഊര്‍ജിതമാക്കിയതായി പോലീസ്. സിസിടിവി കാമറകള്‍ കേന്ദ്രീകരിച്ചാണ് അന്വേഷണം പുരോഗമിക്കുന്നത്. മോഷ്ടാവിനെ സംബന്ധിച്ചു സൂചിനകള്‍ ലഭിച്ചതായി പോലീസ് പറയുമ്പോഴും ഇതില്‍ എത്രമാത്രം വ്യക്തതയുണ്ടെന്ന് അറിയില്ല. രണ്ടു ദിവസത്തിനുള്ളില്‍ മോഷ്ടാവിനെ സംബന്ധിച്ചു വിവരങ്ങള്‍ ലഭ്യമാക്കാമെന്നാണ് പോലീസ് പറയുന്നത്. മാന്‍വെട്ടം നെടുംതുരുത്തി മ്യാലില്‍ എന്‍.ജെ. ജോയിയുടെ വീട്ടില്‍ വെള്ളിയാഴ്ച രാത്രിയാണ് മോഷണം നടന്നത്. നഷ്ടപ്പെട്ടെന്നു കരുതിയ എടിഎം കാര്‍ഡ് ഇന്നലെ വീട്ടില്‍നിന്നു കണ്ടുകിട്ടി. വെള്ളിയാഴ്ച രാവിലെ ജോയിയും ഭാര്യ ലിസിയും മകള്‍ ജൂലിയുടെ ചികിത്സ ആവശ്യത്തിനായി ഏറ്റുമാനൂര്‍ കാരിത്താസ് ആശുപത്രിയില്‍ പോയിരുന്നു. ശനിയാഴ്ച രാവിലെ പത്തോടെ ജോയി വീട്ടിലെത്തിയപ്പോഴാണ് മോഷണവിവരം അറിയുന്നത്.

പുഞ്ച ഉത്പാദനത്തില്‍ 5,000 ടണ്‍ കുറവ്

കോട്ടയം: പുഞ്ച നെല്ല് സംഭരണം പൂര്‍ത്തിയായശേഷവും വില നല്‍കുന്നതില്‍ അനിശ്ചിതത്വം ബാക്കി. സപ്ലൈകോ ഫെബ്രുവരി പകുതിയോടെ സംഭരണം തുടങ്ങി മാര്‍ച്ച് 15 വരെ വാങ്ങിയ നെല്ലിന്‍റെ പണം അക്കൗണ്ടില്‍ നല്‍കി. ഇതാവട്ടെ ആകെ ഉത്പാദനത്തിന്‍റെ അഞ്ചു ശതമാനം മാത്രമായിരുന്നു. കര്‍ഷകര്‍ക്ക് ലഭിച്ചതാകട്ടെ 20 കോടി രൂപ. സപ്ലൈകോ സംഭരിച്ച് കുത്തുമില്ലുകള്‍ക്ക് കൈമാറിയ നെല്ലിനുള്ള പിആര്‍എസ് വാങ്ങാന്‍ പോലും ബാങ്കുകള്‍ മടിക്കുകയാണ്. നിലവില്‍ ഏപ്രില്‍ വരെയുള്ള പിആര്‍എസ് മാത്രമേ സംഭരണ കണ്‍സോര്‍ഷ്യത്തില്‍ ഉള്‍പ്പെട്ട സ്റ്റേറ്റ് ബാങ്കും കനറ ബാങ്കും വാങ്ങുന്നുള്ളൂ. മേയിലെ പിആര്‍എസ് വാങ്ങാന്‍ ബാങ്കുകള്‍ താത്പര്യപ്പെടുന്നില്ല. സംഭരിച്ച നെല്ലിന് എന്നു പണം നല്‍കുമെന്നതില്‍ യാതൊരു വ്യക്തതയുമില്ല. കോട്ടയം ജില്ലയില്‍ 47,000 മെട്രിക് ടണ്‍ ഉത്പാദനം നടക്കുമെന്നായിരുന്നു വിലയിരുത്തല്‍. എന്നാല്‍ വിളവുമോശവും സംഭരണത്തിലെ താമസവും മൂലം 42,110 മെട്രിക് ടണ്‍ മാത്രമാണ് സംഭരിച്ച് പിആര്‍എസ് നല്‍കിയത്. കഴിഞ്ഞ വിരിപ്പു നെല്ല് സംഭരണത്തിലെ കുടിശിക ഉള്‍പ്പെടെ 140 കോടി രൂപ ജില്ലയിലെ കര്‍ഷകര്‍ക്ക് ലഭിക്കാനുണ്ട്. ജില്ലയില്‍ ആദ്യമായി 30 കിലോ നെല്ല് കിഴിവു നല്‍കേണ്ടിവന്നതും കൊയ്ത്ത് ഏറ്റവും അനിശ്ചിതത്വത്തിലായതും ഇക്കൊല്ലത്തെ പുഞ്ച കൃഷിയിലാണ്.

നിലമ്പൂരില്‍ ആവേശം കൂട്ടാൻ‍ കോട്ടയത്തെ നേതാക്കളും

കോട്ടയം: നിലമ്പൂര്‍ ഉപതെരഞ്ഞെടുപ്പ് പ്രചാരണത്തിന് കോട്ടയത്തുനിന്നുള്ള നേതാക്കളും പ്രവര്‍ത്തകരും. മൂന്നു മുന്നണി സ്ഥാനാര്‍ഥികള്‍ക്കു പുറമേ തൃണമൂല്‍ സ്ഥാനാര്‍ഥി പി.വി. അന്‍വറിനൊപ്പവും കോട്ടയത്തുനിന്നുള്ള നേതാക്കള്‍ നിലമ്പൂര്‍ മണ്ഡലത്തിലുണ്ട്. തെരഞ്ഞെടുപ്പ് പ്രഖ്യാപനം വന്നയുടന്‍തന്നെ നേതാക്കള്‍ക്ക് മുന്നണികളും പാര്‍ട്ടികളും വിവിധയിടങ്ങളില്‍ ചുമതലകള്‍ നല്‍കിയിരുന്നു. യുഡിഎഫ് സ്ഥാനാര്‍ഥി ആര്യാടന്‍ ഷൗക്കത്തിനായി ചാണ്ടി ഉമ്മന്‍ എംഎല്‍എയുടെ നേതൃത്വത്തിലാണ് പ്രവര്‍ത്തകര്‍ നിലമ്പൂരിലെത്തിയിരിക്കുന്നത്. ഒരു പഞ്ചായത്തിന്‍റെ പ്രചാരണച്ചുമതലയാണ് ചാണ്ടി ഉമ്മനു നല്‍കിയിരിക്കുന്നത്. കെപിസിസി അച്ചടക്ക സമിതി അധ്യക്ഷന്‍കൂടിയായ തിരുവഞ്ചൂര്‍ രാധാകൃഷ്ണന്‍ എംഎല്‍എയും നിലമ്പൂരിലെത്തിയിട്ടുണ്ട്. ഡിസിസി പ്രസിഡന്‍റ് നാട്ടകം സുരേഷ്, കെപിസിസി ജനറല്‍ സെക്രട്ടറി പി.എ. സലിം എന്നിവര്‍ക്കൊപ്പം ഭാരവാഹികളും പ്രവര്‍ത്തകരും നിലമ്പൂരിലെത്തും. കേരള കോണ്‍ഗ്രസില്‍ മോന്‍സ് ജോസഫ് എംഎല്‍എ, ഫ്രാന്‍സിസ് ജോര്‍ജ് എംപി എന്നിവരും പ്രവര്‍ത്തകരും പ്രചാരണരംഗത്തുണ്ട്. എല്‍ഡിഎഫ് സ്ഥാനാര്‍ഥി എം. സ്വരാജിനുവേണ്ടി സിപിഎം സംസ്ഥാന കമ്മിറ്റിയംഗം കെ. അനില്‍കുമാര്‍ മണ്ഡലത്തിലുണ്ട്. പ്രചാരണം, വിവിധ പഞ്ചായത്തുകളുടെ ഏകോപനം എന്നിങ്ങനെ ചുമതലകള്‍ അനില്‍കുമാറുണ്ട്. കേരള കോണ്‍ഗ്രസ്-എം ചെയര്‍മാന്‍ ജോസ് കെ. മാണി എംപി കഴിഞ്ഞ ദിവസങ്ങളില്‍ നിലമ്പൂരിലുണ്ടായിരുന്നു. കേരള കോണ്‍ഗ്രസ് പ്രചാരണത്തിന് എംഎല്‍എമാരെയും നേതാക്കളെയും ചുമതലപ്പെടുത്തിയിട്ടുണ്ട്. ബിജെപി സ്ഥാനാര്‍ഥി മോഹന്‍ ജോര്‍ജിനുവേണ്ടി പ്രചാരണം നടത്താന്‍ ബിജെപി ജില്ലാ നേതാക്കള്‍ വൈകാതെ നിലമ്പൂരിലെത്തും. തൃണമൂല്‍ കോണ്‍ഗ്രസ് സ്ഥാനാര്‍ഥി പി.വി. അന്‍വറിന്‍റെ മുഖ്യ തെരഞ്ഞെടുപ്പ് പ്രചാരകനായി സജി മഞ്ഞക്കടമ്പില്‍ നിലമ്പൂരിലുണ്ട്. സ്ഥാനാര്‍ഥി പ്രഖ്യാപനം, പാര്‍ട്ടി യോഗങ്ങള്‍, പത്രികാ സമര്‍പ്പണം തുടങ്ങിയവയില്‍ അന്‍വറിനൊപ്പം സജിയുണ്ടായിരുന്നു. ജില്ലയില്‍നിന്നുള്ള ഏതാനും പ്രവര്‍ത്തകരുമുണ്ട്. പ്രചാരണം തീരുംവരെ ഇവര്‍ മണ്ഡലത്തിലുണ്ടാകും.

വാട്‌സ് ആപ്പില്‍ സഹായസന്ദേശവുമായി തട്ടിപ്പുസംഘം

കോട്ടയം: മൊബൈല്‍ ഫോണില്‍ നെറ്റ് ബാങ്കിംഗും യുപിഐ സംവിധാനവുമുള്ളവര്‍ ജാഗ്രത പാലിക്കുക. പരിചിതരും പ്രമുഖരുമായ വ്യക്തികളുടെ വാട്‌സ് ആപ്പിലൂടെ മെസേജ് അയച്ച് പണം തട്ടുന്ന സംഘം സജീവമായിരിക്കുന്നു. ജില്ലയില്‍ വൈദികര്‍ ഉള്‍പ്പെടെയുള്ള പ്രമുഖരുടെ മൊബൈല്‍ നമ്പറുകള്‍ ഹാക്ക് ചെയ്താണ് അവരുടെ നമ്പറുകളില്‍നിന്ന് ഒരാഴ്ചയായി അഭ്യര്‍ഥന വന്നുകൊണ്ടിരിക്കുന്നത്. പ്രെയിസ് ദി ലോഡ്, ഐ നീഡ് എ ഫേവര്‍ ഫ്രം യു എന്ന് അക്ഷരത്തെറ്റോടെയുള്ള ഇംഗ്ലീഷ് മെസേജാണ് വരിക. എന്ത് സഹായം എന്ന് തിരികെ മെസേജിട്ടാല്‍ നാല്‍പതിനായിരം രൂപ തന്ന് സഹായിക്കണമെന്നും ബാങ്ക് ഇടപാടിന് തടസം സംഭവിച്ചെന്നും രാവിലെ തിരികെ തരാമെന്നും മറുപടി വരും. നിജസ്ഥിതി ചോദിച്ചറിയാതെ നിരവധി പേര്‍ ഇത്തരത്തില്‍ പണം യുപിഐ വഴി ട്രാന്‍സ് ചെയ്ത് തട്ടിപ്പില്‍പ്പെട്ടു. മൊബൈലിലെ കോള്‍ ലിസ്റ്റില്‍ ഏറെപ്പെരുടെ നമ്പര്‍ സൂക്ഷിച്ചിരിക്കുന്നവരെ തെരഞ്ഞുപിടിച്ചാണ് സംഘം നുഴഞ്ഞുകയറി സന്ദേശം അയയ്ക്കുക. ഈ സാഹചര്യത്തില്‍ പോലീസ് സൈബര്‍ സെല്ലില്‍ നിരവധി പരാതികളാണ് ലഭിച്ചുകൊണ്ടിരിക്കുന്നത്. തട്ടിയെടുക്കുന്ന പണം ഏത് അക്കൗണ്ടിലേക്ക് പോകുന്നതെന്ന് വ്യക്തമായിട്ടില്ല. അക്ഷരത്തെറ്റുകളും ഗ്രാമര്‍ തെറ്റുകളുമുള്ള മെസേജുകള്‍ക്കു പിന്നില്‍ വിദേശ സംഘമാണോ എന്നും സംശയിക്കുന്നു. മറുപടി നല്‍കാതെ വന്നാല്‍ വിശേഷങ്ങള്‍ തിരക്കിയും ആശംസകള്‍ നേര്‍ന്നും ഇവര്‍ തുടര്‍ മെസേജുകള്‍ അയയ്ക്കുന്നുണ്ട്.

കര്‍ഷകരെ നഷ്ടക്കെണിയിലാക്കി പെരുമഴ ശമിച്ചു

കോട്ടയം: രണ്ടാഴ്ച നീണ്ട കാലവര്‍ഷക്കെടുതിയില്‍ വാഴ, കപ്പ, പച്ചക്കറി കര്‍ഷകര്‍ക്ക് ഭീമമായ നഷ്ടം. മീനച്ചില്‍, പമ്പ നദിയോരങ്ങ ളിലെ താഴ്ന്ന പ്രദേശങ്ങളിലും പാടങ്ങളിലും കൃഷിയിറക്കിയവര്‍ക്കാണ് വന്‍നഷ്ടം. വെള്ളക്കെട്ടിലായ കപ്പ പറിച്ച് നിസാരവിലയ്ക്ക് വില്‍ക്കാന്‍ നിര്‍ബന്ധിതരായവരുമുണ്ട്. പച്ചക്കപ്പവില മാര്‍ക്കറ്റില്‍ 40 രൂപയുണ്ടായിരിക്കെ ഇക്കൊല്ലം ആശ്വാസവില കണക്കുകൂട്ടിയവര്‍ ഇരുപതു രൂപയ്ക്ക് വഴിയോരങ്ങളില്‍ കപ്പ വില്‍ക്കാന്‍ കഴിഞ്ഞ ദിവസങ്ങളില്‍ തിരക്ക് കൂട്ടി. കഴിഞ്ഞ മാസങ്ങളില്‍ നട്ട കപ്പയും വാഴയും മഴയ്ക്കൊപ്പമുണ്ടായ കനത്ത കാറ്റില്‍ പിഴുതുവീണതും നഷ്ടം ഇരട്ടിയാക്കി. ഓണം വിപണി ലക്ഷ്യമാക്കി വാഴയും പച്ചക്കറിയും കൃഷി ചെയ്ത ചെറുകിടക്കാര്‍ക്കാണ് ഏറ്റവും നഷ്ടമുണ്ടായത്. സ്ഥലം പാട്ടത്തിനെടുത്തും ലോണെടുത്തും സംഘകൃഷി നടത്തിയവര്‍ക്ക് ലക്ഷങ്ങളുടെ ബാധ്യതയാണുണ്ടായിരിക്കുന്നത്. മറ്റുള്ളവരുടെ സ്ഥലത്ത് വാരത്തിന് കൃഷി നടത്തി നഷ്ടമുണ്ടായാല്‍ കൃഷിവകുപ്പിന്‍റെ നഷ്ടപരിഹാര തുക ലഭിക്കാന്‍ പരിമിതിയുണ്ട്. പലയിടങ്ങളില്‍ നഷ്ടം നിര്‍ണയിക്കാന്‍ കൃഷി വകുപ്പ് ഉദ്യോഗസ്ഥര്‍ സ്ഥലത്തെത്താതിരുന്നതും തിരിച്ചടിയായി. മഴ തുടരെ പെയ്തതിനാല്‍ പച്ചക്കറി ഇനങ്ങള്‍ ചീഞ്ഞും കായ് കൊഴിഞ്ഞും കര്‍ഷകര്‍ക്ക് നഷ്ടമുണ്ടായി. പാടങ്ങളില്‍ നട്ട വെള്ളരി, മത്തന്‍, പടവലം എന്നിവയുടെ ഫലവും പൂര്‍ണമായി അഴുകി. പയര്‍, പടവലം, പാവല്‍, വെണ്ട, വഴുതിന, ചീര തുടങ്ങിയ പച്ചക്കറി കര്‍ഷകരും പ്രതീക്ഷയറ്റ് കഴിയുകയാണ്. ജൂണ്‍, ജൂലൈ മാസങ്ങളില്‍ കൃഷിയിറക്കി വിളകൊയ്യാന്‍ പാകത്തിലെത്തിയ നെല്‍പ്പാടങ്ങളില്‍ വെള്ളം കയറി കതിരുകള്‍ ചീഞ്ഞളിഞ്ഞ് നശിച്ചു. ആയിരക്കണക്കിന് കര്‍ഷകരുടെ പ്രതീക്ഷയാണ് മഴയും കാറ്റും തല്ലിക്കെടുത്തിത്. കാലവര്‍ഷം ഇടമുറിയാം കോട്ടയം: മേയില്‍ ശക്തമായ മഴ തത്കാലം പിന്മാറി നില്‍ക്കുമെന്ന് കാലാവസ്ഥാ നിരീക്ഷണ വിഭാഗം. രണ്ടു വര്‍ഷം മുന്‍പ് സംഭവിച്ചതുപോലെ ജൂണ്‍, ജൂലൈ മാസങ്ങളില്‍ മണ്‍സൂണ്‍ പൂര്‍ണമായി പിന്മാറി വേനലിന്‍റെ ഘടനയിലെത്തുകയും ഓഗസ്റ്റ്, സെപ്റ്റംബറില്‍ ശക്തിപ്പെടുകയും ചെയ്യാനുള്ള സാധ്യത കുറവല്ല. കേരളം നേരിടുന്ന കാലാവസ്ഥാവ്യതിയാനത്തിന്‍റെ ഭാഗമായി കാലവര്‍ഷം ഇടമുറിയാന്‍ സാധ്യതയുണ്ട്. അങ്ങനയെങ്കില്‍ കാര്‍ഷികവിളവിനെ അത് പ്രതികൂലമായി ബാധിക്കും. കാപ്പി, കുരുമുളക് തുടങ്ങിയ ഫലങ്ങള്‍ നന്നേ കുറയും. നടീല്‍ കൃഷി പകമാകാന്‍ വൈകും. വിളവും കുറയും. ജില്ലയില്‍ 57 ദുരിതാശ്വാസ ക്യാമ്പുകള്‍; 717 കുടുംബങ്ങള്‍ സുരക്ഷിത കേന്ദ്രങ്ങളില്‍ കോട്ടയം: കനത്ത മഴ, വെള്ളപ്പൊക്കം എന്നിവയെത്തുടര്‍ന്ന് ജില്ലയില്‍ സുരക്ഷിത കേന്ദ്രങ്ങളില്‍ കഴിയുന്നത് 717 കുടുംബങ്ങള്‍. 57 ദുരിതാശ്വാസ ക്യാമ്പുകളാണു പ്രവര്‍ത്തിക്കുന്നത്. കോട്ടയം താലൂക്കിലാണ് കൂടുതല്‍ ക്യാമ്പുകളുള്ളത് -41. ചങ്ങനാശേരി-12, വൈക്കം-4 എന്നിങ്ങനെയാണു മറ്റു താലൂക്കുകളിലെ ക്യാമ്പുകളുടെ എണ്ണം. 2,095 പേരാണു ക്യാമ്പുകളിലുള്ളത്. വിദ്യാഭ്യാസ സ്ഥാപനങ്ങൾക്ക് അവധി കോട്ടയം: ജില്ലയിൽ ദുരിതാശ്വാസ ക്യാമ്പുകൾ പ്രവർത്തിക്കുന്ന വിദ്യാഭ്യാസ സ്ഥാപനങ്ങൾക്ക് ഇന്ന് ജില്ലാ കളക്ടർ ജോൺ വി. സാമുവൽ അവധി പ്രഖ്യാപിച്ചു.

പ്രവേശനോത്സവത്തിൽ അണിചേർന്ന് അഫ്ഗാൻ ദന്പതികളുടെ മകൾ ബഹ്സ കരീമിയും

ഗാന്ധിനഗർ: മുടിയൂർക്കര ഗവ. എൽപി സ്കൂളിൽ അഫ്ഗാൻ കാബൂൾ സ്വദേശികളുടെ മകളായ ബഹ്‌സ കരീമി എന്ന അഞ്ചുവയസുകാരി ഒന്നാം ക്ലാസിൽ പുതിയ അതിഥിയായെത്തിയത് പ്രവേശനോത്സവ ആഘോഷങ്ങൾക്ക് കൊഴുപ്പേകി. പുതിയ കൂട്ടുകാരിയെ ലഭിച്ചതിന്‍റെ സന്തോഷത്തിലായിരുന്നു സഹപാഠികളായെത്തിയവർ. മാതാപിതാക്ക ളായ മുഹമ്മദ് ഫാഹീമിനും എല്ലാഹ സാഹിറിനും സഹോദരൻ ബാഹർ കരീമിനും ഒപ്പമാണ് ബഹ്‌സാ ഒന്നാം ക്ലാസ് വിദ്യാർഥിയായി സ്‌കൂളിലേക്കെത്തിയത്. 2021ലാണ് മുഹമ്മദ് കുടുംബത്തോടൊപ്പം കോട്ടയത്തെത്തിയത്. എംജി യൂണിവേഴ്‌സിറ്റിയിൽ ബിസിനസ് സ്റ്റഡീസിൽ റിസർച്ച് ചെയ്യുകയാണ് മുഹമ്മദ്. മുടിയൂർക്കര ഹൗസിംഗ് കോളനിയിലാണ് താമസം. എസ്എച്ച് മൗണ്ടിലായിരുന്നു ബഹ്‌സ കെജി പഠനം നടത്തിയിരുന്നത്. മുടിയൂർക്കര സ്‌കൂളിന്‍റെ പ്രവർത്തനമികവും പാഠ്യ-പാഠ്യേതര മികവും സോഷ്യൽ മീഡിയാകളിലൂടെ യും മറ്റും അറിഞ്ഞാണ് ബഹ്‌സയെ ഇവിടെ ചേർത്തതെന്ന് മുഹമ്മദ് പറഞ്ഞു. മലയാളം അറിയുമോയെന്ന ചോദ്യത്തിന് “ലിറ്റിൽ മലയാളം’’ എന്ന് ബഹ്‌സ പറഞ്ഞെങ്കിലും ഇംഗ്ലീഷിലാണ് സംസാരിക്കുന്നത്. അഫ്ഗാനി, ഉറുദു എന്നീ ഭാഷകളും അറിയാം. മലയാളം പഠിക്കണമെന്നാണ് ആഗ്രഹം. പൂക്കൾ നൽകിയാണ് പുതിയ അതിഥിയെ ഒന്നാം ക്ലാസ് ടീച്ചറായ സോളിയമ്മ ജേക്കബും ഹെഡ്മിസ്ട്രസ് കെ.സിന്ധുമോളും മറ്റ് സഹഅധ്യാപകരും വരവേറ്റത്. രണ്ട് വർഷം മുമ്പാണ് ഈ സ്‌കൂളിലേക്ക് ഇതരസംസ്ഥാനത്തുനിന്നുള്ള കുട്ടികളെത്തിയത്. ആറ് ബീഹാർ സ്വദേശികളായിരുന്നു പ്രവേശനം നേടിയിരുന്നത്. കൂടാതെ, ഒരു ആസാം സ്വദേശിയും പഠിക്കുന്നുണ്ട്. രണ്ട്, മൂന്ന്, നാല് ക്ലാസുകളിലായാണ് ഇവർ പഠിക്കുന്നത്. പ്രവേശനോത്സവത്തിൽ മുനിസിപ്പൽ ചെയർപേഴ്സൺ ബിൻസി സെബാസ്റ്റ്യൻ, കൗൺസിലർ സാബു മാത്യു, മുടിയൂർക്കര ഹോളി ഫാമിലി പള്ളി വികാരി ഫാ. ഫിലിപ്പ് നെൽപ്പുരപ്പറമ്പിൽ, ഗാന്ധിനഗർ പോലീസ് സ്റ്റേഷനിലെ എസ്എച്ച്ഒ ടി. ശ്രീജിത്ത് തുടങ്ങിയവർ പങ്കെടുത്തു.

അറിവിന്‍റെ ലോകത്തേക്ക് കുരുന്നുകള്‍; വര്‍ണാഭമായി വരവേറ്റ് സ്‌കൂളുകള്‍

കോട്ടയം: മഴമേഘങ്ങള്‍ മാറിനിന്ന അന്തരീക്ഷത്തില്‍ കുരുന്നുകള്‍ക്ക് അറിവന്‍റെ ലോകത്തേക്ക് പുതുപ്രവേശം. രണ്ടുമാസത്തെ വേനലവധിക്കുശേഷം തിരികെയെത്തിയ കുട്ടികള്‍ക്കും സൗഹൃദത്തിന്‍റെയും അറിവിന്‍റെയും ലോകത്തേക്ക് വീണ്ടുമെത്തിയതിന്‍റെ ആഹ്ലാദം. വര്‍ണാഭമായി അലങ്കരിച്ച ക്ലാസ് മുറികളിലേക്ക് ആദ്യമായെത്തിയ നവാഗതരെ മധുരം നല്‍കി സ്വീകരിച്ചാണ് ജില്ലയിലെ സ്‌കൂളുകളില്‍ പ്രവേശനോത്സവം ആഘോഷിച്ചത്. പുത്തനുടുപ്പും ബാഗും കുടയും പുസ്തകവും ചോറ്റുപാത്രവുമൊക്കെയായി മാതാപിതാക്കളുടെ കൈപിടിച്ചെത്തിയ നവാഗതര്‍ അക്ഷരമുറ്റം കണ്ടപ്പോള്‍ ആദ്യമൊന്ന് അമ്പരന്നു. പിന്നീട് മധുരം കഴിച്ച് കളിയും ചിരിയുമായി കൂട്ടുകാര്‍ക്കൊപ്പം കൂടി. ചിലരാകട്ടെ മാതാപിതാക്കളെ കാണാതെ കരഞ്ഞു. ഇവരെ ആശ്വസിപ്പിക്കാന്‍ മുതിര്‍ന്ന കുട്ടികളും അധ്യാപകരും കളിപ്പാട്ടങ്ങളും മധുരപലഹാരങ്ങളുമായി എത്തി. പാട്ടും ഡാന്‍സും പഠനവും കളിചിരികളുമായി പുതിയ കൂട്ടുകാര്‍ക്കൊപ്പം ആദ്യദിനം ആഘോഷമാക്കിയാണ് മടങ്ങിയത്. നീണ്ടൂര്‍ എസ്‌കെവി ഹയര്‍ സെക്കന്‍ഡറി സ്‌കൂളില്‍ നടന്ന ജില്ലാതല പ്രവേശനോത്സവം മന്ത്രി വി.എന്‍. വാസവന്‍ ഉദ്ഘാടനം ചെയ്തു. സ്‌കൂളിന് സര്‍വശിക്ഷാ കേരളം ഫണ്ടിലൂടെ അനുവദിച്ച ടിങ്കറിംഗ് ലാബിന്‍റെ ഉദ്ഘാടനവും മന്ത്രി നിര്‍വഹിച്ചു. നീണ്ടൂര്‍ പഞ്ചായത്ത് പ്രസിഡന്‍റ് വി.കെ. പ്രദീപ് അധ്യക്ഷത വഹിച്ചു. ഫ്രാന്‍സിസ് ജോര്‍ജ് എംപി മുഖ്യപ്രഭാഷണം നടത്തി. ജില്ലാ കളക്ടര്‍ ജോണ്‍ വി. സാമുവല്‍ നവാഗതരെ സ്വാഗതം ചെയ്തു. സാഹിത്യകാരനും പൂര്‍വവിദ്യാര്‍ഥിയുമായ എസ്. ഹരീഷ് സ്‌കൂളിന്‍റെ കൈയെഴുത്തു മാഗസിന്‍ പ്രകാശനം ചെയ്തു. ജില്ലാ വിദ്യാഭ്യാസ ഉപഡയറക്ടര്‍ ഹണി ജി. അലക്‌സാണ്ടര്‍, ത്രിതല പഞ്ചായത്തംഗങ്ങള്‍, പൊതുവിദ്യാഭ്യാസ വകുപ്പ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു. ഉദ്ഘാടനത്തിനു മുന്നോടിയായി നീണ്ടൂര്‍ പ്രാവട്ടത്തുനിന്ന് സ്‌കൂളിലേക്കു സാംസ്‌കാരിക ഘോഷയാത്ര നടന്നു. വാദ്യമേളങ്ങളും നാടന്‍ കലാരൂപങ്ങളും ഘോഷയാത്രയെ വര്‍ണാഭമാക്കി. എന്‍സിസി, സ്‌കൗട്ട് വിഭാഗങ്ങളടക്കം നൂറുകണക്കിനു കുട്ടികള്‍ അണിചേർന്നു. ആലപ്പുഴ കലവൂരില്‍ നടന്ന സംസ്ഥാനതല പ്രവേശനോത്സവം ഉദ്ഘാടനം തത്സമയം ഓണ്‍ലൈനായി പ്രദര്‍ശിപ്പിച്ചു. സ്‌കൂളുകളില്‍ ഉരഗ പരിശോധനയുമായി വനം വകുപ്പ് കോട്ടയം: പുതിയ അധ്യയനവര്‍ഷാരംഭത്തോടനുബന്ധിച്ച് സ്‌കൂളുകളില്‍ വനംവകുപ്പിന്‍റെ സര്‍പ്പ വോളന്‍റിയര്‍മാര്‍ പരിശോധന നടത്തുന്നു. സ്‌കൂള്‍ അധികൃതരോ പിടിഎ ഭാരവാഹികളോ അറിയിക്കുന്നതു പ്രകാരമാണ് പരിശോധന. സ്‌കൂളുകളിലും പരിസരങ്ങളിലും വിഷപാമ്പുകളുടെ സാന്നിധ്യം ഒഴിവാക്കി കുട്ടികളുടെ സുരക്ഷ ഉറപ്പാക്കുകയാണ് ലക്ഷ്യം. വിദ്യാര്‍ഥികളുടെയും അധ്യാപകരുടെയും സുരക്ഷയ്ക്കായി വനംവകുപ്പ് നല്‍കുന്ന സുപ്രധാനമായ സേവനമാണിത്. ജില്ലാ സാമൂഹിക വനവത്കരണ വിഭാഗം അസിസ്റ്റന്‍റ് ഫോറസ്റ്റ് കണ്‍സര്‍വേറ്റര്‍മാരുടെ നേതൃത്വത്തിലാണ് പരിശോധനാ പ്രവര്‍ത്തനങ്ങള്‍ ഏകോപിപ്പിക്കുന്നത്. സര്‍പ്പ വോളന്‍റിയര്‍മാരുടെ സഹായം ആവശ്യമുള്ള സ്‌കൂള്‍ അധികൃതര്‍ക്ക് അതാത് ജില്ലയിലെ സാമൂഹിക വനവത്കരണ വിഭാഗവുമായി ബന്ധപ്പെടാവുന്നതാണ്. സഹായങ്ങള്‍ക്കും അന്വേഷണങ്ങള്‍ക്കും വനംവകുപ്പിന്‍റെ ടോള്‍ ഫ്രീ നമ്പരിലും വിളിക്കാം. നമ്പര്‍: 1800 425 4733. സോഷ്യല്‍ ഫോറസ്ട്രി ഡിവിഷന്‍ കോട്ടയം: 9447979133.

റൈസിംഗ് പൂഞ്ഞാർ: മുന്നൊരുക്ക സെമിനാർ ഇന്ന് മുണ്ടക്കയത്ത്

മുണ്ടക്കയം: പൂഞ്ഞാർ നിയോജക മണ്ഡലത്തിൽ സംരംഭകത്വം പ്രോത്സാഹിപ്പിക്കുന്നത് ലക്ഷ്യം വച്ച് നടത്തുന്ന റൈസിംഗ് പൂഞ്ഞാർ 2കെ25 എന്ന നിക്ഷേപ സംഗമത്തിന് മുന്നോടിയായി കാഞ്ഞിരപ്പള്ളി ബ്ലോക്ക് തല മുന്നൊരുക്ക സെമിനാർ ഇന്ന് രാവിലെ 10.30ന് മുണ്ടക്കയം പഞ്ചായത്ത് കോൺഫറൻസ് ഹാളിൽ നടക്കും. സെബാസ്റ്റ്യൻ കുളത്തുങ്കൽ എംഎൽഎ ഉദ്ഘാടനം ചെയ്യും. ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ് അധ്യക്ഷത വഹിക്കും. ത്രിതല പഞ്ചായത്ത് ജനപ്രതിനിധികൾ, വ്യവസായ വകുപ്പ് ഉദ്യോഗസ്ഥർ, സംരംഭകർ, കുടുംബശ്രീ ഭാരവാഹികൾ തുടങ്ങിയവർ പ്രസംഗിക്കും. വനിതാ സംരംഭകർക്കുള്ള മാർഗനിർദേശങ്ങളും പ്രത്യേക ആനുകൂല്യങ്ങളും സംബന്ധിച്ച് സെമിനാറിൽ വിശദമാക്കും. കൂടാതെ കാർഷികാധിഷ്ഠിത ഭക്ഷ്യോൽപ്പന്നങ്ങളുടെ മൂല്യ വർധിത ഉൽപ്പന്ന നിർമാണം സംബന്ധിച്ചും വിദഗ്ധർ ക്ലാസുകൾ നയിക്കും. കാഞ്ഞിരപ്പള്ളി ബ്ലോക്ക് പഞ്ചായത്തിന്‍റെ നേതൃത്വത്തിൽ വിവിധ പഞ്ചായത്തുകളിലെ യുവതികൾക്കായി നടത്തിയ ദേ രുചി 3.0 പരിശീലന പരിപാടി വിജയകരമായി പൂർത്തീകരിച്ചവർക്കും കൂടാതെ 30 ദിവസത്തെ ബ്യൂട്ടീഷൻ കോഴ്സ് പരിശീലനം പൂർത്തീകരിച്ചവർക്കുമുള്ള സർട്ടിഫിക്കറ്റ് വിതരണവും നടത്തും. ഒന്പതിന് ഈരാറ്റുപേട്ട ബർക്കത്ത് സ്ക്വയറിൽ നടക്കുന്ന ഇൻവെസ്റ്റേഴ്സ് മീറ്റിൽ ടൂറിസം ഇൻഡസ്ട്രി, കാർഷികാധിഷ്ഠിത മൂല്യ വർധിത ഉൽപന്ന നിർമാണം, ഐടി സംരംഭങ്ങൾ, സുഗന്ധവ്യഞ്ജനാധിഷ്ഠിത ഉൽപ്പന്നങ്ങൾ, വുഡൻ ബേസ്ഡ് ഇൻഡസ്ട്രി മുതലായവ കേന്ദ്രീകരിച്ചുള്ള സംരംഭകത്വ വികസനമാണ് പ്രധാനമായും ലക്ഷ്യം വയ്ക്കുന്നത്.

പ്രാഥമികാരോഗ്യ കേന്ദ്രത്തിൽ വിവിധ തസ്തികകളിലേക്ക് നിയമനം

മുണ്ടക്കയം: കോരുത്തോട് പ്രാഥമികാരോഗ്യകേന്ദ്രത്തിൽ ഈവനിംഗ് ഒപി നടത്തുന്നതിനായി ഡോക്ടർ, സ്റ്റാഫ് നഴ്സ്, ഫാർമസിസ്റ്റ് തസ്തികകളിലേക്ക് നിയമനം നടത്തുന്നു. കോരുത്തോട് പഞ്ചായത്ത് വാർഷിക പദ്ധതി 2025-26 ഭാഗമായാണ് ദിവസവേതനാടിസ്ഥാനത്തിൽ നിയമനം നടത്തുന്നത്. ഗ്രാമപഞ്ചായത്തിൽ ഉള്ളവർക്ക് മുൻഗണന. ഡോക്ടർ ഒഴികെയുള്ള തസ്തികകളിലേക്ക് അപേക്ഷിക്കുന്നവരുടെ പരമാവധി പ്രായം 36 വയസ്. രണ്ടുവർഷം പ്രവൃത്തിപരിചയവും വേണം. ഉദ്യോഗാർഥികൾ യോഗ്യത, രജിസ്ട്രേഷൻ മുതലായവ തെളിയിക്കുന്ന രേഖകൾ, ബയോഡേറ്റ എന്നിവ 15ന് വൈകുന്നേരം നാലിനു മുൻപായി പിഎച്ച്സി ഓഫീസിൽ എത്തിക്കണം.

പ്രവേശനോത്സവം ഏറ്റെടുത്ത് പെരുവന്താനം പോലീസ്

മുണ്ടക്കയം ഈസ്റ്റ്‌: സ്കൂളുകളിൽ സർക്കാരിന്‍റെയും സ്കൂൾ മാനേജുമെന്‍റിന്‍റെയും സന്നദ്ധ സംഘടനകളുടെയുമൊക്കെ നേതൃത്വത്തിൽ പ്രവേശനോത്സവങ്ങൾ സംഘടിപ്പിക്കാറുണ്ട്. എന്നാൽ, ഒരു സ്കൂളിലെ പ്രവേശനോത്സവം പൂർണമായും ഏറ്റെടുത്തു നടത്തി വ്യത്യസ്തരായി മാറിയിരിക്കുകയാണ് പെരുവന്താനം പോലീസ് സ്റ്റേഷനിലെ ഉദ്യോഗസ്ഥർ. പെരുവന്താനം പഞ്ചായത്തിലെ ടിആർ ആൻഡ് ടി എസ്റ്റേറ്റിലെ മാട്ടുപ്പെട്ടി എൽപി സ്കൂളിലാണ് പോലീസിന്‍റെ പ്രവേശനോത്സവം നടന്നത്. സ്കൂളിലെ പ്രവേശനോത്സവത്തിന്‍റെ അലങ്കാരം മുതൽ നവാഗതരെ സ്വീകരിക്കൽ വരെയും പോലീസ് ഉദ്യോഗസ്ഥരുടെ നേതൃത്വത്തിലാണ് നടന്നത്. മധുര പലഹാരങ്ങൾ നൽകി കുഞ്ഞുകുട്ടികളെ കാക്കിപ്പട കയ്യിലെടുത്തതോടെ കുരുന്നുകളുടെ മനസിലെ പേടിയും മാഞ്ഞു. പ്രവേശനോത്സവത്തിൽ പങ്കെടുത്ത കുട്ടികൾക്ക് ബാഗും കുടയും പഠനോപകരണങ്ങളും കൂടാതെ ഉച്ചക്കഞ്ഞി കുടിക്കുന്നതിനാവശ്യമായ പാത്രങ്ങളും ഉൾപ്പെടെയാണ് പോലീസ് ഒരുക്കി നൽകിയത്. വാർഡ് മെംബർ എം.സി. സുരേഷ് അധ്യക്ഷത വഹിച്ചു. പീരുമേട് ഡിവൈഎസ്പി വിശാൽ ജോൺസൺ ഉദ്ഘാടനം ചെയ്തു. പിടിഎ പ്രസിഡന്‍റ് ജെ. രതീഷ്, ടി ആര്‍ ആൻഡ് ടി എസ്റ്റേറ്റ് മാനേജർ ജോർജ് ജേക്കബ്, പെരുവന്താനം എസ്എച്ച്ഒ ത്രിദീപ് ചന്ദ്രൻ, സുനിൽ സുരേന്ദ്രൻ, ജോസഫ് കാവ്യസാന്ദ്രം, ആശ മോൾ, സ്റ്റാഫ് സെക്രട്ടറി ധന്യ അരുൺ തുടങ്ങിയവർ പ്രസംഗിച്ചു. എസ്ഐമാരായ ബിജു ജോസഫ്, അജ്മൽ, സെയ്ദ്, ജനമൈത്രി പോലീസ് ഉദ്യോഗസ്ഥരായ പ്രവീൺ, അശോകൻ, ജോബിൻ, ജനിഷ് തുടങ്ങിയവർ നേതൃത്വം നൽകി. വിദ്യാർഥികളും അധ്യാപകരും രക്ഷാകർത്താക്കളും പോലീസ് ഉദ്യോഗസ്ഥരും ചേർന്ന് പ്രവേശനോത്സവത്തിന്‍റെ ഭാഗമായി അക്ഷരദീപവും തെളിയിച്ചു.

പ്രവേശനോത്സവം: അക്ഷരമുറ്റത്തേക്ക് കളിചിരികളുമായി കുട്ടികളെത്തി

കാഞ്ഞിരപ്പള്ളി: രണ്ടുമാസത്തെ വേനലവധിക്കുശേഷം കുട്ടികൾ അക്ഷരമുറ്റത്തേക്ക് കളിചിരികളുമായി എത്തി. ആദ്യമായി സ്കൂളിലെത്തുന്പോൾ കരയുന്ന കുട്ടികളുടെ പതിവ് കാഴ്ച ഇക്കുറി കാണാനില്ലായിരുന്നു. കൂട്ടുകാർക്കൊപ്പം കളിച്ചും പഠിച്ചും നടക്കാനാണ് അവർക്ക് ഇഷ്ടം. കാഞ്ഞിരപ്പള്ളിയിലെ വിവിധ സ്കൂളുകളിൽ പ്രവേശനോത്സവം നടത്തി. മധുരപലഹാരങ്ങളും പൂക്കളും നൽകിയാണ് കുട്ടികളെ അധ്യാപകർ സ്വീകരിച്ചത്. കാഞ്ഞിരപ്പള്ളി സെന്‍റ് ഡൊമിനിക്സ് ഹയർ സെക്കൻഡറി സ്കൂളിൽ നടന്ന പ്രവേശനോത്സവം സ്കൂൾ മാനേജരും ആർച്ച് പ്രീസ്റ്റുമായ റവ.ഡോ. കുര്യൻ താമരശേരി ഉദ്ഘാടനം ചെയ്തു. പിടിഎ പ്രസിഡന്‍റ് പി.ജെ. തോമസ് അധ്യക്ഷതവഹിച്ചു. ഹെഡ്മാസ്റ്റർ പി.ജെ. തോമസ്, വാർഡ് മെംബർ ബിജു പത്യാല, മേഴ്സി ജോൺ, അനീസിയ മാർഗരറ്റ് ജോസ് എന്നിവർ പ്രസംഗിച്ചു കാഞ്ഞിരപ്പള്ളി സെന്‍റ് മേരീസ് ഗേൾസ് ഹൈസ്കൂളിലെ പ്രവേശനോത്സവം ജില്ലാ പഞ്ചായത്തംഗം ജെസി ഷാജൻ മണ്ണംപ്ലാക്കൽ ഉദ്ഘാടനം ചെയ്തു. സ്കൂൾ മാനേജർ സിസ്റ്റർ സലോമി സിഎംസി അധ്യക്ഷത വഹിച്ചു. എക്സൈസ് ഡിപ്പാർട്ട്മെന്‍റ് പ്രിവന്‍റ് ഓഫീസർ സ്റ്റാൻലി ചാക്കോ ലഹരിവിരുദ്ധ ബോധവത്ക്കരണ ക്ലാസ് നയിച്ചു. ഹെഡ്മിസ്ട്രസ് നിസ മോൾ ജോൺ, വാർഡ് മെംബർ ബിജു പത്യാല, പിടിഎ പ്രസിഡന്‍റ് മാത്യു സെബാസ്റ്റ്യൻ, സീനിയർ അസിസ്റ്റന്‍റ് ജാക്വിലിൻ സെബാസ്റ്റ്യൻ എന്നിവർ പ്രസംഗിച്ചു. തുടർന്ന് കുട്ടികളുടെ വിവിധ കലാപരിപാടികൾ അവതരിപ്പിച്ചു. കുന്നുംഭാഗം സെന്‍റ് ജോസഫ്‌സ് പബ്ലിക് സ്‌കൂളിലെ പ്രവേശനോത്സവംസെന്‍റ് ജോസഫ്സ് ഇടവക വികാരി ഫാ. ആന്‍റണി ചെന്നക്കാട്ടുകുന്നേല്‍ ഉദ്ഘാടനം ചെയ്തു. ഡീക്കന്‍ ആല്‍ജില്‍ പള്ളിവാതുക്കല്‍, പിടിഎ പ്രസിഡന്‍റ് ആന്‍റണി മാര്‍ട്ടിന്‍, പ്രിന്‍സിപ്പല്‍ സിസ്റ്റർ ലിറ്റില്‍ റോസ് എസ്എബിഎസ്, വൈസ് പ്രിന്‍സിപ്പല്‍ സിസ്റ്റർ റോസ്‌ബെല്‍ എസ്എബിഎസ് എന്നിവര്‍ പ്രസംഗിച്ചു. കുന്നുംഭാഗം സെന്‍റ് ജോസഫ് കിന്‍റർ ഗാർഡൻ സ്കൂളിലെ പ്രവേശനോത്സവം എസ്എബിഎസ് പ്രൊവിൻഷ്യൽ കൗൺസിലർ സിസ്റ്റർ ജ്യോതി കുന്നപ്ലാത്ത് എസ്എബിഎസ് ഉദ്ഘാടനം ചെയ്തു. പ്രിൻസിപ്പൽ സിസ്റ്റർ ആൻ ജോസ് എസ്എബിഎസ് അധ്യക്ഷത വഹിച്ചു. അധ്യാപികമാരായ റാണി ഫിലിപ്പ്, ബിജി ജോസഫ് എന്നിവർ പ്രസംഗിച്ചു. തുടർന്ന് കുട്ടികളുടെ വിവിധ കലാപരിപാടികളും നടത്തി. കുന്നുംഭാഗം ഗവൺമെന്‍റ് ഹൈസ്കൂളിലെ പ്രവേശനോത്സവം വാർഡ് മെംബർ ആന്‍റണി മാർട്ടിൻ ഉദ്ഘാടനം ചെയ്തു. പിടിഎ പ്രസിഡന്‍റ് കെ.ആർ. രാജേഷ് അധ്യക്ഷത വഹിച്ചു. ഹെഡ്മിസ്ട്രസ് ആച്ചിയമ്മ ജോസഫ്, കെ.ടി. സുരേഷ്, പോൾ ജേക്കബ് എന്നിവർ പ്രസംഗിച്ചു. എസ്എസ്എൽസി പരീക്ഷയിൽ വിജയികളായവർക്കുള്ള മെമെന്‍റോ വിതരണം ചെയ്തു. കാഞ്ഞിരപ്പള്ളി എകെജെഎം സ്കൂളിലെ പ്രവേശനോത്സവം സ്കൂൾ മാനേജർ ഫാ. സ്റ്റീഫൻ സി. തടം എസ്ജെയുടെ അധ്യക്ഷതയിൽ നടത്തി. പ്രിൻസിപ്പൽ ഫാ. അഗസ്റ്റിൻ പീടികമല എസ്ജെ നവാഗതർക്ക് സന്ദേശം നൽകി. വൈസ് പ്രിൻസിപ്പൽ ഫാ. വിൽസൺ പുതുശേരി എസ്ജെ, വാർഡ് മെംബർ മഞ്ജു മാത്യു, എൽപി കോഓർഡിനേറ്റർ മായാ മാത്യു എന്നിവർ പ്രസംഗിച്ചു. ഒന്നാം ക്ലാസിലേക്ക് പ്രവേശനം ലഭിച്ച കുട്ടിൾക്ക് എൽപി ടീച്ചേഴ്സ് തയാറാക്കിയ ബട്ടർ ഫ്ലൈ നൽകിയാണ് സ്വീകരിച്ചത്. കാഞ്ഞിരപ്പള്ളി പേട്ട ഗവൺമെന്‍റ് ഹൈസ്കൂളിലെ പ്രവേശനോത്സവം പഞ്ചായത്തംഗം പി.എ. ഷെമീർ ഉദ്ഘാടനം ചെയ്തു. ഹെഡ്മിസ്ട്രസ് എസ്. ഷിജ, പിടിഎ പ്രസിഡന്‍റ് കെ. സജി, റംല ബീവി, പി.ആർ. സജി, അധ്യാപകരായ ജെയ്സൺ തോമസ്, ടി.ഡി. രമണി, സുനിജ പി. ജോസ് എന്നിവർ പ്രസംഗിച്ചു. ചെങ്കൽ: ബൗദ്ധിക വെല്ലുവിളി നേരിടുന്ന കുട്ടികൾക്ക് പഠന പരിശീലനം നൽകുന്നതിനായി ചെങ്കൽ 19ാം മൈലിൽ പ്രവർത്തിക്കുന്ന എയ്ഞ്ചൽസ് വില്ലേജിലുള്ള ആശാനിലയം സ്പെഷൽ സ്കൂളിലെ പ്രവേശനോത്സവം കാഞ്ഞിരപ്പള്ളി രൂപത വികാരി ജനറാൾ റവ.ഡോ. സെബാസ്റ്റ്യൻ കൊല്ലംകുന്നേൽ ഉദ്ഘാടനം ചെയ്തു. ഡയറക്ടർ ഫാ. റോയി മാത്യു വടക്കേൽ അധ്യക്ഷത വഹിച്ചു. എയ്ഞ്ചൽസ് വില്ലേജ് അസിസ്റ്റന്‍റ് ഡയറക്ടർ ഫാ. തോമസ് കണ്ടത്തിൽ, വാഴൂർ ബ്ലോക്ക് പഞ്ചായത്ത് വൈസ് പ്രസിഡന്‍റ് ഗീത എസ്. പിള്ള, പ്രിൻസിപ്പൽ സിസ്റ്റർ ലിറ്റി സേവ്യർ എസ്‌സിജിജെ, വാഴൂർ പഞ്ചായത്ത് പ്രസിഡന്‍റ് തോമസ് വെട്ടുവേലിൽ, സീനിയർ കൺസൾട്ടന്‍റ് സ്പെഷൽ എഡ്യൂക്കേഷൻ ഡോ. എ.ടി. ത്രേസ്യാകുട്ടി, സുശീല കുര്യാച്ചൻ, ഫാൻസി ടോമി എന്നിവർ പ്രസംഗിച്ചു. പ്ലസ് ടു പരീക്ഷയിൽ ഉന്നത വിജയവും കാഞ്ഞിരപ്പള്ളി രൂപത മതബോധന 12ാം ക്ലാസ് പരീക്ഷയിൽ ഒന്നാം റാങ്കും നേടിയ മരിയ മോനിക്ക ഫിലിപ്പിനെ യോഗത്തിൽ ആദരിച്ചു. ചെങ്ങളം: സെന്‍റ് ആന്‍റണീസ് എൽപി സ്കൂളിന്‍റെ പ്രവേശനോത്സവം വാർഡ് മെംബർ ടെസി രാജു ഉദ്ഘാടനം ചെയ്തു. സ്കൂൾ മാനേജർ ഫാ. വർഗീസ് പരിന്തിരിക്കൽ അധ്യക്ഷത വഹിച്ചു. ഹെഡ്മിസ്ട്രസ് സൗമ്യ പി. ജോസ്, പിടിഎ പ്രസിഡന്‍റ് എം.എം. ജീവൻ, ഉമ്മൻചാണ്ടി ഫൗണ്ടേഷൻ കോഓർഡിനേറ്റർ മധു മോഹനൻ എന്നിവർ പ്രസംഗിച്ചു. നവാഗതരായ കുട്ടികൾക്ക് സ്കൂൾ ബാഗും കുടയും വിതരണം ചെയ്തു. ചേനപ്പാടി: ആർവി ഗവൺമെന്‍റ് വൊക്കേഷണൽ ഹയർ സെക്കൻഡറി സ്കൂളിലെ പ്രവേശനോത്സവം ജില്ലാ പഞ്ചായത്തംഗം ജെസി ഷാജൻ ഉദ്ഘാടനം ചെയ്തു. ഹെഡ് മാസ്റ്റർ ഇൻ ചാർജ് മുഹമ്മദ്‌ റാഫി, പ്രിൻസിപ്പൽ വി. രശ്മി, സിന്ധു സോമൻ, ജോളി മടുക്കക്കുഴി, കെ.ബി. സാബു, സന്തോഷ്‌ മഞ്ഞാക്കൽ, കെ.കെ. പരമേശ്വരൻ, കെ.ആർ. പുഷ്പലാൽ, എ.കെ. അജിത എന്നിവർ പ്രസംഗിച്ചു. മുണ്ടക്കയം: സെന്‍റ് ആന്‍റണീസ് ഹൈസ്കൂളിൽ പ്രവേശനോത്സവവും മെറിറ്റ്ഡേയും സംഘടിപ്പിച്ചു. എറണാകുളം ക്രൈം ബ്രാഞ്ച് എസ്പി വി.യു. കുര്യാക്കോസ് ഉദ്ഘാടനം ചെയ്തു. മാനേജർ ഫാ. ജെയിംസ് മുത്തനാട്ട് അധ്യക്ഷത വഹിച്ചു. ഹെഡ്മാസ്റ്റർ സാജു കുര്യൻ, അഴുത ബ്ലോക്ക് പഞ്ചായത്തംഗം കെ.ആർ. വിജയൻ, പീരുമേട് ഡിവൈഎസ്പി വിശാൽ ജോൺസൺ, കൊക്കയാർ പഞ്ചായത്തംഗം സ്റ്റാൻലി സണ്ണി, പെരുവന്താനം എസ്എച്ച്ഒ ത്രിദീപ് ചന്ദ്രൻ, എസ്.ആർ. സുരേഷ് ബാബു, അധ്യാപകരായ ടി.വി. ജോയിസ്, ജിസ്ജോ എം. ജോസ്, സുനിൽ സെബാസ്റ്റ്യൻ തുടങ്ങിയവർ പ്രസംഗിച്ചു. സിവിൽ സർവീസ് റാങ്ക് ജേതാവും പൂർവ വിദ്യാർഥിനിയുമായ സോണറ്റ് ജോസിനെയും കായികാധ്യാപകൻ സന്തോഷ് ജോർജിനെയും എസ്എസ്എൽസി പരീക്ഷയിൽ എല്ലാ വിഷയങ്ങൾക്കും എ പ്ലസ് കരസ്ഥമാക്കിയ കുട്ടികളെയും എൻഎംഎംഎസ് നേടിയ വിദ്യാർഥികളെയും ചടങ്ങിൽ അനുമോദിച്ചു. എരുമേലി: സെന്‍റ് തോമസ് എൽ പി സ്കൂളിലെ പ്രവേശനോത്സവത്തിൽ മധുരമേറെ. അധ്യാപകരും രക്ഷിതാക്കളും ചേർന്ന് കുട്ടികൾക്ക് പായസവും തുടർന്ന് ഉച്ചഭക്ഷണവും നൽകി. ഒപ്പം കുട്ടികളുടെ വിവിധ കലാപരിപാടികൾ നടന്നു. സ്കൂൾ അസിസ്റ്റന്‍റ് മാനേജർ സിസ്റ്റർ ലൂസിറ്റ എഫ്സിസി, ഹെഡ്മിസ്ട്രസ് സിസ്റ്റർ റെജി സെബാസ്റ്റ്യൻ, വാർഡ് മെംബർ ഷാനവാസ്‌, പിടിഎ പ്രസിഡന്‍റ് പ്രശാന്ത് തോമസ്, സീനിയർ അധ്യാപിക ലൗലി പി. ജേക്കബ് എന്നിവർ നേതൃത്വം നൽകി. എരുമേലി: സ്കൂൾ പ്രവേശനത്തിൽ നേരിയ ചാറ്റൽ പോലുമില്ലാതെ മഴ മാറി നിന്ന അനുഭവം വർഷങ്ങൾക്ക് ശേഷം ഇതാദ്യം. പൂർണമായും വെയിൽ നിറഞ്ഞ തെളിഞ്ഞ കാലാവസ്ഥ അധ്യാപകരെയും കുട്ടികളെയും രക്ഷിതാക്കളെയും ഒരേപോലെ സന്തോഷമാക്കി. എരുമേലിയിൽ സ്കൂൾ ജംഗ്ഷനുകളിൽ കുട്ടികളെ കാത്ത് പോലീസ് ഉണ്ടായിരുന്നു. റോഡിലെ തിരക്ക് പരിഹരിച്ച് കുട്ടികളെ പോലിസ് കടത്തിവിട്ടു. ഇടകടത്തി പനയ്ക്കവയൽ ഗവ എൽ പി സ്കൂളിലായിരുന്നു പഞ്ചായത്ത്‌ തല പ്രവേശനോത്സവം. പഞ്ചായത്ത്‌ പ്രസിഡന്‍റ് സുബി സണ്ണി ഉദ്ഘാടനം നിർവഹിച്ചു. തുമരംപാറ, മുട്ടപ്പള്ളി, മൂക്കൻപെട്ടി, പാണപിലാവ്, നെടുങ്കാവുവയൽ, തുമരംപാറ, ചേനപ്പാടി എന്നിവിടങ്ങളിലെ സർക്കാർ സ്‌കൂളുകളിൽ പ്രവേശനോത്സവങ്ങൾ വിപുലമായ നിലയിലാണ് നടന്നത്. എയ്ഡഡ് മേഖലയിൽ ഏറ്റവും കൂടുതൽ വിദ്യാർഥികൾ ചേർന്ന എരുമേലി സെന്‍റ് തോമസ്, കണമല സാൻതോം, ചേനപ്പാടി തരകനാട്ടുകുന്ന് സെന്‍റ് ആന്‍റണീസ്, എരുമേലിയിലെ ദേവസ്വം ബോർഡ് സ്കൂൾ, വാവർ സ്മാരക സ്കൂൾ, കനകപ്പലം എൻഎംഎൽപിഎസ്, എംടിഎൽപി സ്കൂളുകളിലും സ്വകാര്യ മേഖലയിലെ എയ്ഞ്ചൽവാലി സെന്‍റ് മേരീസ്, എരുമേലി നിർമല പബ്ലിക് സ്കൂൾ, എലിവാലിക്കര കോൺവെന്‍റ സ്കൂൾ എന്നിവിടങ്ങളിലും നിരവധി കുട്ടികൾ ഒന്നാം ക്ലാസിൽ ചേർന്നു.

ഇരട്ടകളുടെ നിറ സാന്നിധ്യവുമായി ചെമ്മലമറ്റം ലിറ്റിൽ ഫ്ലവർ ഹൈസ്കൂൾ

ചെമ്മലമറ്റം: ഇരട്ടകളുടെ നിറ സാന്നിധ്യവുമായി ചെമ്മലമറ്റം ലിറ്റിൽ ഫ്ലവർ ഹൈസ്കൂൾ പുതിയ അധ്യയന വർഷത്തിൽ ഒന്നാം ക്ലാസിലാണ് മൂന്ന് ജോഡി ഇരട്ടകൾ എത്തിയത്. പിണ്ണാക്കനാട് കുരുവിൻപ്ലാക്കൽ നിതിൻ - മിന്‍റു ദമ്പതികളുടെ മക്കളാണ് സാറാ ആർ. നിതിൻ, റബേക്കാ ആർ. നിതിൻ എന്നിവർ. കാളകെട്ടി മുണ്ടയ്ക്കൽ രാജേഷ് - ആതിര ദമ്പതികളുടെ മക്കളാണ് മീനാക്ഷി അജേഷും പാർവതി അജേഷും. പിണ്ണാക്കനാട് ചേരാനി പൊങ്ങൻപാറയിൽ നിശാന്ത് - ഹണി മോൾ ദമ്പതികളുടെ മക്കളാണ് പി.ബി. ആദിദേവ്, പി.ബി ആദികേശ് എന്നിവർ.

തിടനാട്ടിൽ സ്കിൽ ഡവലപ്മെന്‍റ് സെന്‍റർ ഉദ്ഘാടനം ചെയ്തു

തിടനാട്: വിദ്യാഭ്യാസ വകുപ്പിനു കീഴില്‍ തിടനാട് വൊക്കേഷണല്‍ ഹയര്‍സെക്കന്‍ഡറി സ്‌കൂളിനോട് അനുബന്ധിച്ചു പുതുതായി രണ്ട് സ്‌കില്‍ ഡവലപ്‌മെന്‍റ് കോഴ്‌സുകള്‍ ആരംഭിച്ചു. ഫിറ്റ്‌നസ് ട്രെയിനര്‍, കോസ്‌മെറ്റോളജിസ്റ്റ് എന്നീ രണ്ടു കോഴ്‌സുകളാണ് ആരംഭിച്ചത്. അടിസ്ഥാന സൗകര്യങ്ങള്‍ ഒരുക്കുന്നതിന് 21.50 ലക്ഷം രൂപയും അനുവദിച്ചു. കോഴ്‌സുകളുടെ ഉദ്ഘാടനം സെബാസ്റ്റ്യന്‍ കുളത്തുങ്കല്‍ എംഎല്‍എ നിര്‍വഹിച്ചു. തിടനാട് പഞ്ചായത്ത് പ്രസിഡന്‍റ് സ്‌കറിയ ജോസഫ് പൊട്ടനാനി അധ്യക്ഷതവഹിച്ചു. ജില്ലാ പഞ്ചായത്ത് അംഗം ഷോണ്‍ ജോര്‍ജ്, ബ്ലോക്ക് പഞ്ചായത്ത് അംഗം ജോര്‍ജ് ജോസഫ് കല്ലങ്ങാട്ട്, പഞ്ചായത്ത് അംഗം ജോയിച്ചന്‍ കാവുങ്കല്‍, സന്ധ്യ ശിവകുമാര്‍, വൊക്കേഷണല്‍ ഹയര്‍സെക്കന്‍ഡറി സ്‌കൂള്‍ പ്രിന്‍സിപ്പല്‍ വി.ജി. ശാലിനി റാണി, ഹെഡ്മിസ്ട്രസ് പ്രതിഭ പടനിലം, ബിആര്‍സി കോഓഡിനേറ്റര്‍ ബിന്‍സ് ജോസഫ്, പിടിഎ പ്രസിഡന്‍റ് സജിനി സതീഷ് തുടങ്ങിയവര്‍ പ്രസംഗിച്ചു. രണ്ട് കോഴ്‌സുകളിലും 25 വിദ്യാര്‍ഥികള്‍ക്കു വീതമാണ് പ്രവേശനം. കോഴ്‌സുകളുടെ പ്രവേശനവും പഠനവും സൗജന്യമാണ്.

ആശ വർക്കർമാരുടെ രാപ്പകൽ സമര യാത്രയ്ക്ക് സ്വീകരണം നല്‍കി

ഈരാറ്റുപേട്ട: വിവിധ ആവശ്യങ്ങളുന്നയിച്ച് കേരള ആശാ ഹെൽത്ത് വർക്കേഴ്‌സ് അസോസിയേഷൻ ജനറൽ സെക്രട്ടറി എം.എ. ബിന്ദു നയിക്കുന്ന രാപ്പകൽ സമര യാത്രക്ക് ഈരാറ്റുപേട്ടയിൽ സ്വീകരണം നൽകി. യാത്രയുടെ കോട്ടയം ജില്ലാതല ഉദ്ഘാടനം ആന്‍റോ ആന്‍റണി എംപി നിർവഹിച്ചു. നഗരസഭാധ്യക്ഷ സുഹ്‌റ അബ്ദുൾ ഖാദർ അധ്യക്ഷത വഹിച്ചു. ഡിസിസി സെക്രട്ടറി ജോമോൻ ഐക്കര, കെ. സതീഷ് കുമാർ, മുഹമ്മദ് ഇല്യാസ്, ഓമന ഗോപാലൻ തുടങ്ങിയവർ പ്രസംഗിച്ചു. പാലാ: കേരള ആശ ഹെല്‍ത്ത് വര്‍ക്കേഴ്സ് അസോസിയേഷന്‍ ജനറല്‍ സെക്രട്ടറി എം.എ. ബിന്ദു നയിച്ച രാപകല്‍ സമര യാത്രക്ക് ളാലം പാലം ജംഗ്ഷനില്‍ സ്വീകരണം നല്‍കി. ക്യാപ്റ്റന്‍ എം.എ ബിന്ദുവിനെ ഹാരമണിയിച്ചു സീകരിച്ചു. യുഡിഎഫ് പാലാ നിയോജക മണ്ഡലം ചെയര്‍മാന്‍ പ്രഫ.സതീശ് ചൊള്ളാനി അധ്യക്ഷത വഹിച്ചു. കെപിസിസി മെംബര്‍ തോമസ് കല്ലാടന്‍ സ്വീകരണ സമ്മേളനം ഉദ്ഘാടനം ചെയ്തു. എ.കെ ചന്ദ്രമോഹന്‍, എന്‍. സുരേഷ്, മോളി പീറ്റര്‍, ജോര്‍ജ് പുളിങ്കാട്, ആര്‍. സജീവ്, ആര്‍. പ്രേംജി, അനസ് കണ്ടത്തില്‍, വിജയകുമാര്‍ സി.ജി, സന്തോഷ് കാവുകാട്ട്, ലിസമ്മ മത്തച്ചന്‍, സൗമ്യ സേവ്യര്‍, ആല്‍ബിന്‍ ഇമനശേരി തുടങ്ങിയവര്‍ പ്രസംഗിച്ചു.

പ്രവേശനോത്സവം വര്‍ണാഭമായി

പാലാ: അക്ഷരമുറ്റത്തിന്‍റെ പടിവാതിലിലെത്തിയ കുരുന്നുകള്‍ക്ക് വര്‍ണാഭമായ സ്വീകരണം. വിവിധ നിറങ്ങളിലുള്ള ബലൂണുകളും തൊപ്പികളും മധുരപലഹാരങ്ങളുമായാണ് അധ്യാപകര്‍ കുരുന്നുകളെ വരവേറ്റത്. നവാഗതര്‍ക്ക് ഹൃദ്യമായ സ്വീകരണമാണ് സ്‌കൂളുകള്‍ ഒരുക്കിയത്. പാട്ടും നൃത്തവും കളിചിരികളുമായി സ്‌കൂള്‍ അന്തരീക്ഷം ഹൃദ്യമാക്കി. പ്രവിത്താനം : സെന്‍റ് മൈക്കിള്‍സ് ഹയര്‍ സെക്കൻഡറി സ്‌കൂളിലെ പ്രവേശനോത്സവം പാലാ ഡിവൈഎസ്പി കെ. സദന്‍ ഉദ്ഘാടനം ചെയ്തു. നവാഗതരായ വിദ്യാര്‍ഥികളെയും അവധിക്കാലത്ത് സ്‌കൂള്‍ നടത്തിയ വിവിധ മത്സരങ്ങളില്‍ പങ്കെടുത്ത് വിജയം നേടിയ കുട്ടികളെയും സമ്മാനങ്ങള്‍ നല്‍കി ആദരിച്ചു.സ്‌കൂള്‍ മാനേജര്‍ ഫാ. ജോര്‍ജ് വേളൂപ്പറമ്പില്‍ അധ്യക്ഷത വഹിച്ച യോഗത്തില്‍ അസിസ്റ്റന്‍റ് മാനേജര്‍ ഫാ. ആന്‍റ്ണി കൊല്ലിയില്‍, പ്രിന്‍സിപ്പല്‍ ജിജി ജേക്കബ്, ഹെഡ്മാസ്റ്റര്‍ ജിനു ജെ. വല്ലനാട്ട്, ജിസ്‌മോന്‍ തുടിയന്‍പ്ലാക്കല്‍, ജാന്‍സി ജോസഫ്, സിസ്റ്റര്‍ ആന്‍സി ടോം എന്നിവര്‍ പ്രസംഗിച്ചു. അളനാട്: ഗവണ്‍മെന്‍റ് യുപി സ്‌കൂള്‍ പ്രവേശനോത്സവം വിപുലമായി ആചരിച്ചു. പുതിയതായി പ്രവേശനം ലഭിച്ച കുട്ടികള്‍ക്ക് മധുരം നല്‍കി പഞ്ചായത്ത് മെംബര്‍ വിനോദ് ചെറിയാന്‍ സ്വീകരിച്ചു. സ്‌കൂള്‍ ഓഡിറ്റോറിയത്തില്‍ നടന്ന സമ്മേളനത്തില്‍ വാര്‍ഡ് മെംബര്‍ അധ്യക്ഷത വഹിച്ചു. ളാലം ബ്ലോക്ക് വൈസ് പ്രസിഡന്‍റ് ആനന്ദ് മാത്യു ചെറുവള്ളി സമ്മേളനം ഉദ്ഘാടനം ചെയ്തു. ക്ഷേമ കാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ പഠനോപകരണങ്ങള്‍ വിവരണം ചെയ്തു. യോഗത്തില്‍ വ്യാപാരി വ്യവസായി ഏകോപന സമിതി പ്രവിത്താനം യൂണിറ്റ് പ്രസിഡന്‍റ് സജി എസ്. തെക്കേല്‍, ഹെഡ് മാസ്റ്റര്‍ എം.എന്‍. ബിന്ദു ,അശ്വന്ത് മഹേഷ് തുടങ്ങിയവര്‍ പ്രസംഗിച്ചു. മുത്തോലി: സെന്‍റ് ആന്‍റണീസ് ഹയര്‍ സെക്കൻഡറി സ്‌കൂളിലെ പ്രവേശനോത്സവം പഞ്ചായത്തംഗം രാജന്‍ മുണ്ടമറ്റം ഉദ്ഘാടനം ചെയ്തു. സ്‌കൂള്‍ മാനേജര്‍ റവ. ഡോ. മാത്യു ആനത്താരക്കല്‍ സിഎംഐ, പ്രിന്‍സിപ്പല്‍ മിനി മാത്യു, അസിസ്റ്റന്‍റ് എക്‌സൈസ് ഇന്‍സ്‌പെക്ടര്‍ കെ.വി. അനീഷ്‌കുമാര്‍, സ്റ്റാഫ് സെക്രട്ടറി ബിന്‍സി സെബാസ്റ്റ്യന്‍ എന്നിവര്‍ പ്രസംഗിച്ചു. കടനാട്: കുറുമണ്ണ് സെന്‍റ് ജോണ്‍സ് ഹൈസ്‌കൂളിലെ പ്രവേശനോത്സവം കടനാട് പഞ്ചായത്ത് പ്രസിഡന്‍റ് ജിജി തമ്പി ഉദ്ഘാടനം ചെയ്തു. സ്‌കൂള്‍ മാനേജര്‍ ഫാ. തോമസ് മണിയഞ്ചിറ അധ്യക്ഷത വഹിച്ച ചടങ്ങില്‍ രാമപുരം ബിആര്‍സി ക്ലസ്റ്റര്‍ കോഓര്‍ഡിനേറ്റര്‍ പി.കെ.ശ്രീരേഖ മുഖ്യപ്രഭാഷണം നടത്തി. വാര്‍ഡ് മെംബര്‍ ബിന്ദു ജേക്കബ് കൈയെഴുത്തുമാസികയുടെ പ്രകാശനം നടത്തി. ഹെഡ്മാസ്റ്റര്‍ ബിജോയി ജോസഫ്, കടനാട് പഞ്ചായത്ത് വൈസ് പ്രസിഡന്‍റ് വി.ജി. സോമന്‍, പിടിഎ പ്രസിഡന്‍റ് സുബി തോമസ്, സ്റ്റാഫ് പ്രതിനിധി കെ.എം. ജോസഫ് എന്നിവര്‍ പ്രസംഗിച്ചു അകലക്കുന്നം: അകലക്കുന്നം പഞ്ചായത്തിലെ 16 സ്‌കൂളുകളിലെ പ്രവേശനോത്സവം കാഞ്ഞിരമറ്റം ലിറ്റില്‍ ഫ്‌ളവര്‍ എല്‍പി സ്‌കൂളില്‍ നടത്തി. പഞ്ചായത്ത് പ്രസിഡന്‍റ് സിന്ധു അനില്‍കുമാര്‍ ഉദ്ഘാടനം ചെയ്തു. സ്‌കൂള്‍ മാനേജര്‍ ഫാ. ജോസഫ് മണ്ണനാല്‍ അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് മാത്തുക്കുട്ടി ഞായര്‍കുളം മുഖ്യപ്രഭാഷണം നടത്തി. സ്‌കൂള്‍ അസിസ്റ്റന്‍റ് മാനേജര്‍ ഫാ. ജോസഫ് മഠത്തിപറമ്പില്‍, സ്‌കൂള്‍ പ്രഥമ അധ്യാപിക സിസ്റ്റര്‍ ജയ്‌മോള്‍ പുത്തന്‍പുരയ്ക്കല്‍, ബിആര്‍സി പ്രതിനിധി ഷൈനി കുര്യന്‍, പിടിഎ പ്രസിഡന്‍റ് ജിസ്‌മോന്‍ മുങ്ങാമാക്കല്‍ എന്നിവര്‍ പ്രസംഗിച്ചു. ചെമ്മലമറ്റം: ലിറ്റിൽ ഫ്ളവർ ഹൈസ്കൂളിലെ പ്രവേശനോത്സവം ശ്രദ്ധയമായി. അക്ഷര വൃഷം ഒരുക്കിയാണ് ഒന്നാം ക്ലാസിൽ പ്രവേശനം ലഭിച്ച 63 വിദ്യാർഥികൾ പ്രവേശനോത്സവം ആഘോഷമാക്കിയത്. വർണ തൊപ്പികൾ അണിഞ്ഞ് കത്തിച്ച മെഴുകുതിരികൾ പിടിച്ച് വിശിഷ്ടാതിഥികളോടൊപ്പമാണ് കുരുന്നുകൾ ദീപം തെളിച്ചത്. ബ്ലോക്ക് മെംബർ മിനി സാവിയോ പഞ്ചായത്ത് മെംബർ രമേശ് ഇലവുങ്കൽ, ഹെഡ് മാസ്റ്റർ ജോബൈറ്റ് തോമസ്, അസിസ്റ്റന്‍റ് മാനേജർ ഫാ. ജേക്കബ് കട്ടുതോടിൽ, പിടിഎ പ്രതിനിധി സെബാസ്റ്റ്യൻ ഈറ്റത്തോട്ട്, അധ്യാപക പ്രതിനിധി ജിജി ജോസഫ് തുടങ്ങിയവർ പ്രസംഗിച്ചു. വാകക്കാട് : പുതുതായി വിദ്യാലയത്തിലേത്തിയ കുഞ്ഞുങ്ങൾക്കെല്ലാം കൈ നിറയെ പാവകൾ നിർമിച്ചു നൽകിയാണ് വാകക്കാട് എൽപി സ്കൂളിൽ കുട്ടികളെ സ്വാഗതം ചെയ്തത്. പ്രവേശനോത്സവം മേലുകാവ് പഞ്ചായത്ത് മെംബർ അലക്സ് ടി. ജോസഫ് ഉദ്ഘാടനം ചെയ്തു. സ്കൂൾ മാനേജർ ഫാ. മൈക്കിൾ ചീരാംകുഴി അധ്യക്ഷത വഹിച്ചു. അസിസ്റ്റന്‍റ് വികാരി ഫാ. എബിൻ കാക്കാനിയിൽ, പിടിഎ പ്രസിഡന്‍റ് ജോർജ്കുട്ടി അലക്സ്, ഹെഡ്മിസ്ട്രസ് സിസ്റ്റർ ടെസിൻ ജോർജ് എന്നിവർ പ്രസംഗിച്ചു. വെള്ളികുളം: പുതിയ അധ്യയന വർഷത്തിൽ വെള്ളികുളം സെന്‍റ് ആന്‍റണീസ് സ്കൂളിലേക്ക് കടന്നുവന്ന നവാഗതരായ വിദ്യാർഥികൾക്ക് വർണാഭമായ സ്വീകരണമാണ് നൽകിയത്.സ്കൂൾ ഓഡിറ്റോറിയത്തിൽ നടന്ന ചടങ്ങിൽ സ്കൂൾ മാനേജർ ഫാ. സ്കറിയ വേകത്താനം അധ്യക്ഷത വഹിച്ചു. ഹെഡ്മാസ്റ്റർ സോജൻ ജോർജ് ഇളംതുരുത്തിയിൽ വിദ്യാർഥികൾക്ക് സ്വാഗതമേകി. പഞ്ചായത്ത് മെംബർ ബിനോയി ജോസഫ് പാലക്കൽ പ്രവേശനോത്സവം ഉദ്ഘാടനം ചെയ്തു.

പാലാ രൂപതയ്ക്ക് മൂന്ന് ഫൊറോനകള്‍ കൂടി

പാലാ: പാലാ രൂപതയുടെ പ്ലാറ്റിനം ജൂബിലി വര്‍ഷത്തില്‍ മൂന്ന് പുതിയ ഫൊറോനകള്‍ കൂടി രൂപീകരിച്ചു. ബിഷപ് മാര്‍ ജോസഫ് കല്ലറങ്ങാട്ടിന്‍റെ അധ്യക്ഷതയില്‍ കൂടിയ പ്രസ്ബിറ്ററല്‍ കൗണ്‍സിലിലാണ് രൂപീകരണം പ്രഖ്യാപിച്ചത്. കടപ്ലാമാറ്റം, കൊഴുവനാല്‍, കൂത്താട്ടുകുളം എന്നീ ഇടവകകളെയാണ് ഫൊറോനകളായി ഉയര്‍ത്തുന്നത്. ഇതുവരെ 17 ഫൊറോനകളാണ് രൂപതയില്‍ ഉണ്ടായിരുന്നത്. പുതിയതായി രൂപം കൊള്ളുന്ന ഫൊറോനകള്‍ നിലവില്‍ വരുന്നത് എട്ടിന് പന്തക്കുസ്ത തിരുനാളോടു കൂടിയാണ്. അന്നേ ദിവസം നിയുക്ത ഫൊറോനകളില്‍ നടത്തപ്പെടുന്ന സ്ഥാനാരോഹണശുശ്രൂഷയില്‍ ബിഷപ് മാര്‍ ജോസഫ് കല്ലറങ്ങാട്ട് പ്രധാന കാര്‍മികത്വം വഹിക്കും. സ്ഥാനാരോഹണശുശ്രൂഷകള്‍ രാവിലെ എട്ടിന് കൊഴുവനാല്‍ പള്ളിയിലും 9.15 ന് കടപ്ലാമറ്റം പള്ളിയിലും വൈകുന്നേരം നാലിന് കൂത്താട്ടുകുളം പള്ളിയിലും ബിഷപ് നിര്‍വഹിക്കും. കടപ്ലാമറ്റം സെന്‍റ് മേരീസ് പള്ളി സുറിയാനി കത്തോലിക്കാസഭയിലെ അതിപുരാതനമായ പള്ളികളില്‍ ശ്രദ്ധേയമായ പള്ളിയാണ് കടപ്ലാമറ്റം. എഡി 1009 ല്‍ പണികഴിക്കപ്പെട്ട ഈ പുരാതന പള്ളി പരിശുദ്ധ കന്യകാമറിയത്തിന്‍റെ നാമത്തിലുള്ളതാണ്. 660 കുടുംബങ്ങളുള്ള ഈ പള്ളിയുടെ നിര്‍മാണരീതിയും അതിന്‍റെ കൊത്തുപണികളും പഴമയുടെ സൗകുമാര്യം വിളിച്ചറിയിക്കുന്നതാണ്. ഈ പള്ളിയുടെ പഴക്കംതന്നെ ദേശവാസികള്‍ക്ക് പരിശുദ്ധ അമ്മയോടുള്ള ഭക്തിയും വണക്കവും അതിരറ്റതാണ് എന്നതിന്‍റെ തെളിവ് കൂടിയാണ്. കൊഴുവനാല്‍ സെന്‍റ് ജോണ്‍ നെപുംസ്യാനോസ് പള്ളി 1858 ല്‍ സ്ഥാപിതമായ കൊഴുവനാല്‍ സെന്‍റ് ജോണ്‍ നെപുംസ്യാനോസ് പള്ളി പാലാ രൂപതയിലെ പുരാതനമായ പള്ളികളില്‍ ഒന്നാണ്. ഏറ്റവും കൂടുതല്‍ രൂപതാ വൈദികര്‍ക്ക് ജന്മം നല്‍കിയ ഇടവകയാണ് കൊഴുവനാല്‍. പാലാ രൂപതയ്ക്ക് മാത്രമല്ല, തിരുസഭയ്ക്ക് ഏറ്റവും കൂടുതല്‍ വൈദികരെ പ്രദാനം ചെയ്തിട്ടുള്ള പള്ളിയാണ് ഇത്. 730 കുടുംബങ്ങള്‍ ഉള്ള കൊഴുവനാല്‍ പള്ളി ജോണ്‍ നെപുംസ്യാനോസ് സഹദായുടെ നാമത്തിലുള്ളതാണ്. കൂത്താട്ടുകുളം ഹോളി ഫാമിലി പള്ളി 1995ല്‍ സ്ഥാപിതമായ കൂത്താട്ടുകുളം ഹോളി ഫാമിലി പള്ളി ഒരു ദേശത്തിന്‍റെ സംസ്‌കാരത്തെ പേറുന്നതാണ്. വിവിധ ക്രൈസ്തവസഭകളായ യാക്കോബായ ഓര്‍ത്തഡോക്‌സ് വിഭാഗങ്ങളും സീറോ മലബാർ സമൂഹവും ഏക മനസോടെ തിങ്ങിപ്പാര്‍ക്കുന്ന സ്ഥലമാണ് ഇത്. സഭയുടെ എക്യുമെനിസത്തിന്‍റെ വാതില്‍ തുറന്നിട്ടിരിക്കുന്ന പ്രദേശമാണ് കൂത്താട്ടുകുളം. മാര്‍ യൂദാ തദേവൂസിനോടുള്ള ഭക്തിയും വണക്കവും ആയിരം തിരികളുള്ള നിലവിളക്കും ഹോളി ഫാമിലി പള്ളിയുടെ പ്രത്യേകതകളാണ്. 500 കുടുംബങ്ങളുള്ള ഈ പള്ളി എറണാകുളം ജില്ലയിലാണ് സ്ഥിതി ചെയ്യുന്നത്. പുതുതായി രൂപംകൊണ്ട ഫൊറോനകളിലേക്ക് ചേര്‍ക്കപ്പെടുന്ന ഇടവകകള്‍ കടപ്ലാമറ്റം: കടപ്ലാമറ്റം, മംഗളാരം, കൂടല്ലൂര്‍, മരങ്ങാട്ടുപള്ളി, വയല, പാലയ്ക്കാട്ടുമല, പാളയം. കൊഴുവനാല്‍: അല്‍ഫോന്‍സാഗിരി, കാഞ്ഞിരമറ്റം, കരിമ്പാനി, കൊഴുവനാല്‍, മണലുങ്കല്‍, മഞ്ഞാമറ്റം, മറ്റക്കര, മൂഴൂര്‍, പൈക, ഉരുളികുന്നം. കൂത്താട്ടുകുളം: കാക്കൂര്‍, കൂത്താട്ടുകുളം, പെരിയപ്പുറം, പൂവക്കുളം, തിരുമാറാടി, ഉദയഗിരി വടകര. ഇടവകകളില്‍ മാറ്റം വരുന്ന ഫൊറോനകള്‍ (1) പാലാ കത്തീഡ്രല്‍: അരുണാപുരം, കിഴതടിയൂര്‍, കുടക്കച്ചിറ, ളാലം പുത്തന്‍പള്ളി, ളാലം പഴയപള്ളി, മീനച്ചില്‍, മൂന്നാനി, നെല്ലിയാനി, പൈങ്ങുളം, പാലാ കത്തീഡ്രല്‍, പാലാക്കാട്, പൂവരണി, വലവൂര്‍. (2) ചേര്‍പ്പുങ്കല്‍: ചെമ്പിളാവ്, ചേര്‍പ്പുങ്കല്‍, കുരുവിനാല്‍, പാദുവ, മുത്തോലി, മേവട, തോടനാല്‍. (3) രാമപുരം: അന്ത്യാളം, ചക്കാമ്പുഴ, ചിറ്റാര‍, ഏഴാച്ചേരി, കരൂര്‍, കൊണ്ടാട്, കുറിഞ്ഞി, നീറന്താനം, രാമപുരം. (4) ഭരണങ്ങാനം: അമ്പാറനിരപ്പേല്‍, ഭരണങ്ങാനം, ചൂണ്ടച്ചേരി, ഇടപ്പാടി, ഇടമറ്റം, കിഴപറയാര്‍, മല്ലികശേരി, പ്ലാശനാല്‍, പൂവത്തോട്, വിളക്കുമാടം. (5) കുറവിലങ്ങാട്: കുറവിലങ്ങാട്, കാളികാവ്, കാട്ടാമ്പാക്ക്, കുറിച്ചിത്താനം, മണ്ണയ്ക്കനാട്, മോനിപ്പള്ളി, രത്‌നഗിരി, വാക്കാട്. (6) ഇലഞ്ഞി: ഇലഞ്ഞി, ജോസ്ഗിരി, മരങ്ങോലി, മുളക്കുളം, മുത്തോലപുരം, പിറവം, ശാന്തിപുരം, സേവ്യര്‍പുരം.

വെളിയന്നൂര്‍ ആയുര്‍വേദ ആശുപത്രി ഒപി ബ്ലോക്ക് നിര്‍മാണം പുരോഗമിക്കുന്നു

വെളിയന്നൂര്‍: സര്‍ക്കാര്‍ ആയുര്‍വേദ ആശുപത്രിയിലെ പുതിയ ഒപി ബ്ലോക്കിന്‍റെ നിര്‍മാണ പ്രര്‍ത്തനങ്ങള്‍ പുരോഗമിക്കുന്നു. മുപ്പതു കിടക്കകള്‍ ഉള്‍പ്പെടെ മെച്ചപ്പെട്ട സൗകര്യങ്ങള്‍ നിലവിലുള്ള ആശുപത്രിയില്‍ പുതിയ ഒപി ബ്ലോക്കിന്‍റെ നിര്‍മാണം പൂര്‍ത്തിയാക്കി ഓഗസ്റ്റില്‍ ഉദ്ഘാടനം ചെയ്യാനാണ് ലക്ഷ്യമിടുന്നത്. വെളിയന്നൂര്‍ ജംഗ്ഷനില്‍ സര്‍ക്കാര്‍ ഉടമസ്ഥതയിലുള്ള 50 സെന്‍റ് സ്ഥലത്താണ് നിര്‍മാണം. 1200 ചതുരശ്ര അടിയില്‍ നിര്‍മിക്കുന്ന കെട്ടിടത്തില്‍ താഴത്തെ നിലയില്‍ ഒപി ബ്ലോക്കും ലാബും രോഗികള്‍ക്കു ഭക്ഷണം പാകം ചെയ്യുന്നതിനായി അടുക്കളയും സജ്ജമാക്കും. മുകള്‍നിലയില്‍ ഓഫീസും നഴ്‌സുമാര്‍ക്കുള്ള വിശ്രമമുറിയുമാണ് നിര്‍മിക്കുന്നത്. ആയുഷ് മിഷന്‍ അനുവദിച്ച 1.10 കോടി രൂപ ഉപയോഗിച്ചാണ് നിര്‍മാണം. നിര്‍മാണം പൂര്‍ത്തിയാകുന്ന മുറയ്ക്ക് അടിസ്ഥാന സൗകര്യങ്ങള്‍ ഒരുക്കുന്നതിന് 15 ലക്ഷം രൂപ പഞ്ചായത്ത് വാര്‍ഷിക പദ്ധതിയില്‍ ഉള്‍പ്പെടുത്തിയിട്ടുണ്ട്. ബിനോയ് വിശ്വം എംപി അനുവദിച്ച ഫണ്ട് വിനിയോഗിച്ച് കഴിഞ്ഞ വര്‍ഷം ഓഗസ്റ്റിലാണ് കിടത്തി ചികിത്സയ്ക്കുള്ള പുതിയ മന്ദിരം നിര്‍മാണം പൂര്‍ത്തിയാക്കിയത്.

കെഎസ്ആര്‍ടിസി ഡിപ്പോയില്‍ ക്ലറിക്കല്‍ ജീവനക്കാരുടെ കുറവ്, പ്രവര്‍ത്തനം താളം തെറ്റുന്നു

ചങ്ങനാശേരി: കെഎസ്ആര്‍ടിസി ഡിപ്പോയില്‍ ക്ലറിക്കല്‍ ജീവനക്കാരുടെ കുറവു മൂലം പ്രവര്‍ത്തനം താളം തെറ്റുന്നു. ക്ലറിക്കല്‍ വിഭാഗത്തില്‍ ജോലി ചെയ്തിരുന്ന മൂന്ന് ബദലി ജീവനക്കാരെ പിരിച്ചുവിട്ടിരുന്നു. ഒരു വനിതാ ക്ലര്‍ക്ക് പിറവത്തിനു സ്ഥലംമാറി പ്പോയി. പൊന്‍കുന്നം ഡിപ്പോയില്‍നിന്നു വനിതാ ക്ലര്‍ക്ക് ചങ്ങനാശേരിയിലേക്കു സ്ഥലംമാറ്റമാവശ്യപ്പെട്ട് ഉത്തരവ് വാങ്ങിയെങ്കിലും 18 ദിവസമായിട്ടും ഇവര്‍ ഈ ഡിപ്പോയില്‍ എത്തിയിട്ടില്ല. ക്ലാര്‍ക്കുമാരുടെ കുറവുമൂലം ഈ വിഭാഗത്തിലുള്ളവര്‍ക്ക് ജോലിഭാരം കൂടുകയാണ്. ഇന്നുമുതല്‍ വിദ്യാര്‍ഥികളുടെ കണ്‍സഷന്‍ കാര്യങ്ങള്‍കൂടി നോക്കേണ്ടിവരുന്നതോടെ ഏറെ പ്രതിസന്ധിയുണ്ടാകുമെന്നാണ് ജീവനക്കാര്‍ ചൂണ്ടിക്കാട്ടുന്നത്.

ചങ്ങനാശേരിയില്‍ എട്ട് ദുരിതാശ്വാസ ക്യാമ്പുകള്‍

ചങ്ങനാശേരി: മഴ മാറി, മാനം തെളിഞ്ഞത് ആളുകള്‍ക്ക് ആശ്വാസമായി. കിഴക്കന്‍ വെള്ളത്തിന്‍റെ കുത്തൊഴുക്കില്‍ തോടുകളിലും ആറുകളിലും ജലനിരപ്പുയരുന്നു. താഴ്ന്ന പ്രദേശങ്ങളിലെ നൂറുകണക്കിനു വീടുകള്‍ വെള്ളത്തിലായി. താലൂക്കില്‍ ആകെ എട്ടു ദുരിതാശ്വാസ ക്യാമ്പുകള്‍ തുറന്നു. നൂറോളം കുടുംബങ്ങളിലെ നാനൂറോളം അംഗങ്ങള്‍ ദുരിതാശ്വാസ ക്യാമ്പില്‍ കഴിയുന്നുണ്ട്. ചങ്ങനാശേരി-ആലപ്പുഴ റൂട്ടില്‍ കെഎസ്ആര്‍ടിസി സര്‍വീസുകള്‍ നടത്തുന്നുണ്ട്. വെള്ളക്കെട്ടുള്ളതിനാല്‍ പല ചെറുറൂട്ടുകളിലും സര്‍വീസുകളില്ല. ഇന്ന് അധ്യയനവര്‍ഷം ആരംഭിക്കുമ്പോള്‍ ആലപ്പുഴ സെക്ടറിലെ ബസുകളുടെ കുറവ് വിദ്യാര്‍ഥികളെയും മറ്റു യാത്രക്കാരെയും ബാധിക്കാനിടയുണ്ട്. ഗവ. മോഡല്‍ ഹയര്‍ സെക്കൻഡറി സ്‌കൂളിലെ ദുരിതാശ്വാസ ക്യാമ്പില്‍ എസി കോളനിയിലെ 11 കുടുംബങ്ങളിലെ 26 അംഗങ്ങളും പണ്ടകശാലക്കടവ് സെന്‍റ് ജയിംസ് എല്‍പി സ്‌കൂളില്‍ ഒരു കുടുംബത്തിലെ ഒരു സ്ത്രീയും പുരുഷനും കുട്ടിയും ഉള്‍പ്പടെ മൂന്നുപേരും പെരുന്ന വെസ്റ്റ് യുപിഎസില്‍ 19 കുടുംബങ്ങളിലെ 90 അംഗങ്ങളും പുഴവാത് എല്‍പി സ്‌കൂളില്‍ 18 കുടുംബങ്ങളില്‍നിന്നായി 71 അംഗങ്ങളും എത്തിയിട്ടുണ്ട്. ചങ്ങനാശേരി ടൗണ്‍ എല്‍പി സ്‌കൂളില്‍ 10 കുടുംബങ്ങളിലെ ഉള്‍പ്പെടെ 31 അംഗങ്ങളും വാഴപ്പള്ളി വിഎച്ച്എസ് സ്‌കൂളില്‍ ഏഴ് കുടുംബങ്ങളിലെ 28 അംഗങ്ങളും പൂവം യുപി സ്‌കൂളില്‍ 12 കുടുംബങ്ങളില്‍നിന്നുള്ള 45 അംഗങ്ങളും പെരുന്ന ഗവ. എല്‍പിഎസില്‍ 13 കുടുംബങ്ങളിലെ 47 അംഗങ്ങളും താമസക്കാരായുണ്ട്. photo: ജലപ്രളയം...പറാലില്‍ നിന്നൊരു പ്രളയക്കാഴ്ച.

തകര്‍ന്ന റോഡില്‍ ചങ്ങാടമിറക്കി യൂത്ത് കോണ്‍ഗ്രസ് പ്രതിഷേധം

മാടപ്പള്ളി: തകര്‍ന്നടിഞ്ഞ കുറുമ്പനാടം അസംപ്ഷന്‍ പള്ളി-പുളിയാംകുന്ന് റോഡില്‍ ചങ്ങാടമിറക്കി യൂത്ത്‌ കോണ്‍ഗ്രസ് പ്രതിഷേധം. തകര്‍ന്ന ഈ റോഡില്‍ വെള്ളക്കെട്ടുകൂടിയായപ്പോള്‍ സഞ്ചാരം അതിദുരിതമാണ്. റോഡ് തകര്‍ന്നതുമൂലം അസംപ്ഷന്‍ പള്ളിയിലേക്കുള്ള വിശ്വാസികളുടെ യാത്രയും ബുദ്ധിമുട്ടിലാണ്. പ്രതിഷേധസമരം യൂത്ത് കോണ്‍ഗ്രസ് ജില്ലാ ജനറല്‍ സെക്രട്ടറി സോബിച്ചന്‍ കണ്ണമ്പള്ളി ഉദ്ഘാടനം ചെയ്തു. മണ്ഡലം പ്രസിഡന്‍റ് നിധീഷ് കൊച്ചേരി അധ്യക്ഷത വഹിച്ചു. ഷെയിന്‍ പോള്‍സണ്‍, സിനോയ് മാത്യു, നിഖില്‍ ഫിലിപ്പ്, പ്രതീഷ് ഓമനക്കുട്ടന്‍, ജെബിന്‍ സേവ്യര്‍, ജോയല്‍, ലിജോമോന്‍ തുടങ്ങിയവര്‍ പ്രസംഗിച്ചു. തുടർന്ന് യൂത്ത് കോണ്‍ഗ്രസ് പ്രവര്‍ത്തകര്‍ റോഡില്‍ മണ്ണിറക്കി താത്കാലിക അറ്റകുറ്റപ്പണി നടത്തി.

പെരുമ്പനച്ചിയില്‍ ഓടയ്ക്ക് സ്ലാബിട്ട് റോഡ് ഗതാഗതത്തിനായി തുറന്നു

വാക്കുപാലിച്ച് പൊതുമരാമത്തു വകുപ്പ് ചങ്ങനാശേരി: പെരുമ്പനച്ചിയില്‍ ഓടയ്ക്ക് സ്ലാബിട്ട് റോഡ് തുറന്നു. പുതിയ അധ്യയനവര്‍ഷം ആരംഭിക്കുന്ന ഇന്ന് വിദ്യാര്‍ഥികള്‍ ഉള്‍പ്പെടെ യാത്രക്കാര്‍ക്കു സുഗമമായി സഞ്ചരിക്കാം. പെരുമ്പനച്ചി ജംഗ്ഷനില്‍ തോട്ടയ്ക്കാട് റോഡിന്‍റെ തുടക്കത്തിലാണ് ഓടനിര്‍മാണം പൂര്‍ത്തീകരിച്ച് സ്ലാബിട്ടത്. പെരുമ്പനച്ചിയിലെ ഓട നിര്‍മാണംമൂലം മൂന്നാഴ്ചക്കാലമായി കുറുമ്പനാടം വഴിയുള്ള തോട്ടയ്ക്കാട് റോഡിലെ ഗതാഗതം തടസപ്പെട്ടിരുന്നു. ഓടയില്ലാത്തതുമൂലം മാടപ്പള്ളി സഹകരണബാങ്കിന്‍റെ പെരുമ്പനച്ചി ഹെഡ് ഓഫീസിനു മുമ്പില്‍ അനുഭവപ്പെടുന്ന വെള്ളക്കെട്ട് പരിഹരിക്കുന്നതിനാണ് പൊതുമരാമത്തുവകുപ്പ് 27 ലക്ഷം രൂപ മുടക്കി ഓട നിര്‍മാണമാരംഭിച്ചത്. വേണ്ടത്ര മുന്നൊരുക്കങ്ങളില്ലാതെ ഓടനിര്‍മാണം ആരംഭിച്ചതിൽ പരക്കെ ആക്ഷേപം ഉയര്‍ന്നിരുന്നു. മാടപ്പള്ളിയിലെ കോണ്‍ഗ്രസ് പഞ്ചായത്തംഗം ജിന്‍സണ്‍ മാത്യു ഓടനിര്‍മാണം വേഗത്തിലാക്കണമെന്നാവശ്യപ്പെട്ട് ഓടയില്‍ ഇറങ്ങിയിരുന്ന് പ്രതിഷേധിച്ചിരുന്നു. അന്ന് പൊതുമരാമത്തുവകുപ്പ് ഉദ്യോഗസ്ഥര്‍ സ്ഥലത്തെത്തി ജൂണ്‍ ഒന്നിനകം ഓടയ്ക്കു മുകളിൽ സ്ലാബുകള്‍ സ്ഥാപിച്ച് റോഡ് തുറക്കുമെന്ന് നല്‍കിയ ഉറപ്പാണ് പാലിക്കപ്പെട്ടത്. സ്‌കൂള്‍ തുറക്കുന്നതിന് ഒരു ദിവസം മുമ്പ് പെരുമ്പനച്ചി റോഡിലെ ഗതാഗതം സൗകര്യം പുനരാരംഭിക്കുമെന്ന് ജോബ് മൈക്കിള്‍ എംഎല്‍എ അറിയിച്ചിരുന്നു. ഇപ്പോള്‍ ബൈക്ക് യാത്രകള്‍ക്കും കാര്‍ ഓട്ടോറിക്ഷ തുടങ്ങി ചെറു വാഹനങ്ങള്‍ക്കും മാത്രമായുള്ള ഗതാഗത സൗകര്യമാണ് ഒരുക്കിയിരിക്കുന്നത്. രണ്ടാഴ്ചയ്ക്കുള്ളില്‍ പൂര്‍ണമായും ഭാരവാഹനങ്ങള്‍ പോകാന്‍ തരത്തിലുള്ള സൗകര്യമൊരുക്കുമെന്നും എംഎല്‍എ അറിയിച്ചു. photo: ചങ്ങനാശേരി-വാഴൂര്‍ റോഡില്‍ പെരുമ്പനച്ചി ജംഗ്ഷനില്‍ തോട്ടയ്ക്കാട് റോഡിന്‍റെ തുടക്കത്തില്‍ ഓടനിര്‍മാണം പൂര്‍ത്തിയാക്കി സ്ലാബിട്ട് റോഡ് തുറന്നു നല്‍കിയപ്പോള്‍.

ബസിനടിയിൽ സ്‌കൂട്ടര്‍ വീണു; യാത്രക്കാരി അദ്ഭുതകരമായി രക്ഷപ്പെട്ടു

പാലാ: സ്വകാര്യ ബസിന് അടിയിലേക്ക് വീണ സ്‌കൂട്ടറില്‍ നിന്നു യുവതി അദ്ഭുതകരമായി രക്ഷപ്പെട്ടു. പാലാ- വൈക്കം റൂട്ടില്‍ ആര്‍വി ജംഗ്ഷനില്‍ ഇന്നലെ ഉച്ചയ്ക്ക് 11.30 ഓടെയായിരുന്നു അപകടം. പാലാ മരിയന്‍ ആശുപത്രിയിലെ ജീവനക്കാരിയായ മേരിലാന്‍ഡ് സ്വദേശിനി ആഷ് ആണ് അപകടത്തില്‍ നിന്നു രക്ഷപ്പെട്ടത്. നാല്‍ക്കവലയായ ആര്‍വി ജംഗ്ഷനില്‍ കൊട്ടാരമറ്റം ഭാഗത്തുനിന്നു വന്ന സ്വകാര്യ ബസ് ബൈപാസ് റോഡിലേക്ക് തിരിക്കുന്നതിനിടയില്‍ സ്‌കൂട്ടറില്‍ തട്ടുകയായിരുന്നു. സ്‌കൂട്ടര്‍ ബസിന്‍റെ അടിയിലേക്ക് വീണു. യുവതി മറുവശത്തേക്ക് വീണതിനാല്‍ രക്ഷപ്പെടുകയായിരുന്നു. അപകടത്തില്‍ യുവതിയുടെ കാലിന് സാരമായി പരിക്കേറ്റു. ഇവരെ സ്വകാര്യ ആശുപത്രിയില്‍ പ്രവേശിപ്പിച്ചു. അതേസമയം ആര്‍വി ജംഗ്ഷനില്‍ അപകടങ്ങള്‍ തുടര്‍ക്കഥയാവുകയാണ്. റൗണ്ടാന ഇല്ലാത്തതിനാല്‍ വാഹനങ്ങള്‍ കൂടുതല്‍ വലതുവശം ചേര്‍ന്ന് തിരിയുന്നതാണ് അപകടങ്ങള്‍ക്കിടയാക്കുന്നത്. ദിശാ സൂചകങ്ങളും ഇല്ല എന്ന പരാതിയും ഉയരുന്നുണ്ട്.

കുട്ടികളെ വരവേൽക്കാൻ അക്കരപ്പാടം ഗവ. യുപി സ്കൂളിൽ വർണക്കൂടാരം ഒരുങ്ങി

വൈക്കം: പുതിയ അധ്യയന വർഷത്തിലേക്ക് കടക്കുമ്പോൾ ഇന്ന് സ്കൂളിൽ എത്തുന്ന കുരുന്നുകളെ വരവേൽക്കാൻ അക്കരപ്പാടം ഗവൺമെന്‍റ് യുപി സ്കൂളിൽ വർണക്കൂടാരം ഒരുങ്ങി. എസ്എസ്കെ സ്റ്റാർസ് പദ്ധതിയുടെ ഭാഗമായി 10 ലക്ഷം രൂപ ചെലവഴിച്ചാണ് വർണക്കൂടാരം നിർമിച്ചത്. പ്രീ പ്രൈമറി കുട്ടികളുടെ മാനസികോല്ലാസത്തിനായി ഊഞ്ഞാലുകൾ, മെറിഗോ റൗണ്ട്, സ്ലൈസുകൾ, വെർട്ടിക്കൽ ക്ലൈംബർ, നെറ്റ് ക്ലൈംബർ, ഹാഫ് സർക്കിൾ ക്ലൈംബർ എന്നിവയാണ് സജ്ജീകരിച്ചിട്ടുള്ളത് . വർണക്കൂടാരത്തിൽ ഒരുക്കിയിരിക്കുന്ന 13 ഇടങ്ങളിലൂടെ കുട്ടികൾ ആർജിക്കേണ്ട എല്ലാ വികാസമേഖലകളും സ്വായത്തമാക്കുംവിധമാണ് വർണക്കൂടാരം ഒരുക്കിയിരിക്കുന്നത്. കുരുന്നുകളുടെ മനം കവരുന്ന വർണക്കൂടാരം ഇന്ന് രാവിലെ പത്തിന് സി.കെ. ആശ എംഎൽഎ ഉദ്ഘാടനം ചെയ്യും. പഞ്ചായത്ത് പ്രസിഡന്‍റ് പി. കെ.ആനന്ദവല്ലി അധ്യക്ഷതവഹിക്കും. എസ്എസ്കെ ജില്ലാ പ്രോജക്ട് കോ-ഓർഡിനേറ്റർ കെ.ജെ. പ്രസാദ് പദ്ധതി വിശദീകരണം നടത്തും. ബ്ലോക്ക് പഞ്ചായത്ത് പ്രസിഡന്‍റ് എസ്. ബിജു മുഖ്യപ്രഭാഷണം നടത്തും.

മരം വീണ് വൈക്കം-വെച്ചൂർ റോഡിൽ ഗതാഗതം തടസപ്പെട്ടു

വൈക്കം: വൈക്കം ചേരിൻചുവട്ടിൽ വൻമരം കടപുഴകി റോഡിനു കുറുകെ വീണ് വൈക്കം-വെച്ചൂർ റോഡിൽ ഒരു മണിക്കൂറോളം ഗതാഗതം തടസപ്പെട്ടു. ഇന്നലെ വൈകുന്നേരം അഞ്ചിനായിരുന്നു സംഭവം. മരം വീണതിനെത്തുടർന്ന് വൈദ്യുതിപോസ്റ്റ് ഒടിഞ്ഞതോടെ വൈദ്യുതിബന്ധവും തടസപ്പെട്ടു.ഫയർ ഫോഴ്‌സും നാട്ടുകാരും പോലീസും ചേർന്ന് ഒരു മണിക്കൂറിലധികം നടത്തിയ കഠിനപരിശ്രമത്തത്തുടർന്നാണ് മരം മുറിച്ചു നീക്കി ഗതാഗതം പുനഃസ്ഥാപിച്ചത്. പോസ്റ്റിനും വൈദ്യുതിലൈനും കാര്യമായി തകരാർ സംഭവിച്ചതിനാൽ വൈദ്യുതിവിതരണം പുനഃസ്ഥാപിക്കാനായിട്ടില്ല.

പാത്തുമ്മയ്ക്ക് ആശ്രയമായി നിത്യസഹായകന്‍റെ അമ്മവീട്

കടുത്തുരുത്തി; ആരോരുമില്ലാത്ത പാത്തുമ്മയ്ക്കു സംരക്ഷണമൊരുക്കി നിത്യസഹായകന്‍റെ അമ്മവീട്. വെള്ളൂര്‍ പഞ്ചായത്ത്‍ 13-ാo വാര്‍ഡില്‍ കരിപ്പാടത്ത് കോരിച്ചൊരിയുന്ന മഴയിലും പ്രായത്തിന്‍റെ അവശതയിലും കഴിഞ്ഞിരുന്ന പാത്തുമ്മ ഇനി നിത്യസഹായകന്‍റെ തണലില്‍. വീണ് ഇടുപ്പെല്ല് പൊട്ടി ഒറ്റപ്പെട്ടുപോയ പാത്തുമ്മ തനിച്ചായിരുന്നു താമസം. ഭര്‍ത്താവും മക്കളുമില്ലാത്ത പാത്തുമ്മയുടെ അവശതകളെപ്പറ്റി അറുനൂറ്റിമംഗലം ആശൂപത്രിയിലെ പാലിയേറ്റീവ് നഴ്‌സ് ആന്‍സിനെ, ആശാ പ്രവര്‍ത്തകയായ ഷംലയാണ് അറിയിച്ചത്. തുടര്‍ന്ന് പഞ്ചായത്തംഗം ഷിനി സജു നിത്യസഹായകന്‍ ട്രസ്റ്റിന്‍റെ അമ്മവീടിനെ വിവരമറിയിച്ചു. നിത്യസഹായകൻ പ്രസിഡന്‍റ് അനില്‍ ജോസഫും അമ്മവീട് സെക്രട്ടറി സിന്ധുവും പാത്തുമ്മയെ സന്ദര്‍ശിച്ചു കാര്യങ്ങള്‍ മനസിലാക്കി. തുടര്‍ന്ന് ഷിനി സജുവും ആശപ്രവര്‍ത്തക ഷംലയും നാട്ടുകാരും ചേര്‍ന്ന് ഉമ്മയെ നിത്യസഹായകന് കൈമാറി.

മാൻവെട്ടത്ത് വീട് കുത്തിത്തുറന്ന് മോഷണം

32 പവനും 25,000 രൂപയും നഷ്‌ടപ്പെട്ടു കടുത്തുരുത്തി: വീടിന്‍റെ മുന്‍വശത്തെ വാതില്‍ കുത്തിത്തുറന്ന് മുറിക്കുള്ളിലെ അലമാരയില്‍ സൂക്ഷിച്ചിരുന്ന 32 പവനും 25,000 രൂപയും മോഷ്ടിച്ചു. മാന്‍വെട്ടം നെടുംതുരുത്തിമ്യാലില്‍ എന്‍.ജെ. ജോയിയുടെ വീട്ടിലാണ് മോഷണം നടന്നത്. വെള്ളിയാഴ്ച രാത്രിയാണ് മോഷണം. വെള്ളിയാഴ്ച രാവിലെ ജോയിയും ഭാര്യ ലിസിയും മകള്‍ ജൂലിയുടെ ചികിത്സയ്ക്കായി പോയി. ശനിയാഴ്ച രാവിലെ പത്തോടെ ജോയി തിരികെ വീട്ടിലെത്തിയപ്പോഴാണ് വീടിന്‍റെ മുന്‍വശത്തെ വാതിലിന്‍റെ പൂട്ട് തകര്‍ത്ത നിലയില്‍ കാണുന്നത്. വീടിനുള്ളിലെ അഞ്ച് അലമാരകളില്‍ സൂക്ഷിച്ചിരുന്ന വസ്ത്രങ്ങളും മറ്റു സാധനങ്ങളെല്ലാം കട്ടിലില്‍ വാരിവലിച്ചിട്ട നിലയിലായിരുന്നു. അലമാരയുടെ അടിവശത്തെ അറയില്‍ സൂക്ഷിച്ചിരുന്ന ഭാര്യയുടെയും മകളുടെയും മരുമകന്‍ ബിനുവിന്‍റെയും മാല, വള, കമ്മല്‍, മോതിരങ്ങള്‍ തുടങ്ങിയ സ്വര്‍ണാഭരണങ്ങളാണ് മോഷ്ടിച്ചത്. ഇതിനൊപ്പമുണ്ടായിരുന്ന 25000 രൂപയും നഷ്ടപ്പെട്ടു. ഇക്കൂട്ടത്തിലുണ്ടായിരുന്ന റോള്‍ഡ് ഗോള്‍ഡ് ചെയിന്‍ മോഷ്ടാവ് ഉപേക്ഷിച്ച നിലയില്‍ കണ്ടെത്തി. കടുത്തുരുത്തി പോലീസും കോട്ടയത്തുനിന്നു ഡോഗ് സ്‌ക്വാഡും വിരലടയാള വിദഗ്ധരും സ്ഥലത്തെത്തി പരിശോധനകള്‍ നടത്തി. പോലീസ് നായ ജോയിയുടെ വീട്ടില്‍നിന്ന് ഓടി മാന്‍വെട്ടം കവലയിലെത്തിയ ശേഷം തിരികെ ജോയിയുടെ വീട്ടിലെത്തി. മേമ്മുറി കുരിശുപള്ളിക്കു സമീപം പുതിയകുന്നേല്‍ സജി ജോസിന്‍റെ വീടിന്‍റെ വാതിലും കുത്തിത്തുറന്നു മോഷണം നടത്തിയതായി കണ്ടെത്തി. ഇവിടെയും എല്ലാം വാരിവലിച്ചിട്ട നിലയിലാണ്. സജിയും കുടുംബവും വര്‍ഷങ്ങളായി യുകെയിലാണ്. ഇവിടെനിന്ന് ഒന്നും നഷ്ടപെട്ടിട്ടില്ല. സമീപത്തെ സിസി ടിവി കാമറകള്‍ പരിശോധിച്ചപ്പോള്‍ മഴക്കോട്ടിട്ട ഒരാളുടെ അവ്യക്തമായ ദൃശ്യം ലഭിച്ചതായി പോലീസ് പറഞ്ഞു. എസ്പിയുടെ നിര്‍ദേശാനുസരണം സ്‌പെഷല്‍ സ്‌ക്വാഡ് രൂപീകരിച്ച് അന്വേഷണം ഊര്‍ജിതമാക്കി.

ഏറ്റുമാനൂർ റെയിൽവേസ്റ്റേഷൻ റോഡിൽ വെള്ളക്കെട്ട്; യാത്രക്കാർ ദുരിതത്തിൽ

ഏറ്റുമാനൂർ: റെയിൽവേസ്റ്റേഷനിലേക്കുള്ള റോഡ് തകർന്നു. യാത്രക്കാർ ദുരിതത്തിൽ. മനയ്ക്കപ്പാടം മുതൽ റെയിൽവേസ്റ്റേഷൻ വരെ റോഡ് പൂർണമായി തകർന്നു.റോഡിലെ കുഴികളിൽ വെള്ളം നിറഞ്ഞു. കുഴികൾ തിരിച്ചറിയാൻ മാർഗമില്ലാതായതോടെ കാൽനടയാത്രക്കാരും ഇരുചക്ര വാഹനങ്ങളും അപകടത്തിൽപ്പെടുന്നത് പതിവായി. റെയിൽവേ സ്റ്റേഷനിലേക്ക് ഓട്ടം പോകാൻ ഓട്ടോറിക്ഷാ ഡ്രൈവർമാർ തയാറാകാത്തത് യാത്രക്കാർക്ക് ബുദ്ധിമുട്ടുണ്ടാക്കുന്നു. കുഴികളിൽ ചാടി വാഹനങ്ങൾക്ക് തകരാറിലാകുന്നതിനു പുറമേ തങ്ങൾക്ക് നടുവേദന ഉൾപ്പെടെ ശാരീരിക ബുദ്ധിമുട്ടുകൾ ഉണ്ടാകുന്നതായി ഓട്ടോറിക്ഷാ ഡ്രൈവർമാർ പറയുന്നു. മനയ്ക്കപ്പാടത്ത് ബസിറങ്ങി വരുന്ന കാൽനട യാത്രക്കാർ വെള്ളക്കെട്ടിൽനിന്ന് മാറി റെയിൽവേ ട്രാക്കിലൂടെ സ്റ്റേഷനിലേക്ക് പ്രവേശിക്കുന്നത് അപകടത്തിനിടയാക്കാം. മഴക്കാലത്ത് ട്രാക്കിലൂടെയുള്ള നടത്തം സുരക്ഷിതമല്ല. റെയിൽവേ ട്രാക്കിലൂടെയുള്ള പ്രവേശനം നിരോധിച്ചിട്ടുള്ളതാണെങ്കിലും യാത്രക്കാർക്കു മറ്റു മാർഗമില്ല. റോഡിന്‍റെ ശോച്യാവസ്ഥ പരിഹരിക്കണമെന്ന് ആവശ്യപ്പെട്ട് ബന്ധപ്പെട്ട അധികാരികളെയും ജന പ്രതിനിധികളെയും സമീപിച്ചിരുന്നെങ്കിലും നടപടിയൊന്നുമാകാത്തതിനാൽ വെള്ളക്കെട്ടിൽ പ്രതിഷേധിക്കാൻ ഒരുങ്ങുകയാണെന്ന് യാത്രക്കാരുടെ സംഘടനയായ ഫ്രണ്ട്‌സ് ഓൺ റെയിൽസ് ഭാരവാഹികളായ അജാസ് വടക്കേടം, ശ്രീജിത്ത് കുമാർ എന്നിവർ പറഞ്ഞു.

മെഡിക്കൽ കോളജ് ആശുപത്രിയിൽ നായ്ക്കളുടെ വിളയാട്ടം

ഗാന്ധിനഗർ: മെഡിക്കൽ കോളജ് ആശുപത്രി കോമ്പൗണ്ടിൽ നായശല്യം. ഒപി ടിക്കറ്റ് കൗണ്ടറിന് സമീപം രോഗികൾക്ക് ഭീഷണിയായി നായകൾ കൂട്ട ത്തോടെയാണ് നിൽക്കു ന്നത്. ക്യൂ നിൽക്കുന്ന രോഗികൾക്കിടയിലൂടെയാണ് നായ്ക്കൾ ഓടിനടക്കുന്നത്. ഇത് വലിയ ഭീഷണിയാണ് സൃഷ്ടിക്കുന്നത്. കഴിഞ്ഞദിവസം ഒപി ടിക്കറ്റ് എടുക്കാൻ നിന്ന രോഗിക്കു നേരേ നായ കുരച്ചുചാടി. ആശുപത്രിയിലെ വിവിധ ഭാഗങ്ങളിൽ ഇവ ഒറ്റയ്ക്കും കൂട്ടത്തോടെയും അലഞ്ഞുതിരിയുകയാണ്. രണ്ടാഴ്ച മുമ്പ് ആശുപത്രി ജീവനക്കാരനു നേരേ നായ്ക്കൾ കുരച്ചുചാടി കടിക്കാൻ ശ്രമിച്ചു. നായ്ക്കളെ ആശുപത്രി കോമ്പൗണ്ടിൽനിന്നു തുരത്താ ൻ അടിയന്തര നടപടി സ്വീകരിക്കണം.

കുമരകം ഗവ. ആശുപത്രിയിൽ 24 മണിക്കൂറും ഡോക്ടർമാർ വേണമെന്ന്

കുമരകം: കുമരകം ഗവൺമെലമെന്‍റ് ആശുപത്രിയിൽ 24 മണിക്കൂറും ഡോക്ടർമാരുടെ സേവനം ലഭ്യമാക്കണമെന്ന ആവശ്യം ശക്തമായി. കാലവർഷാരംഭത്തിൽത്തന്നെ പനിയും കോവിഡുപോലുള്ള മാരകമായ പകർച്ചവ്യാധികളും പെരുകുന്ന സാഹചര്യത്തിൽ പാവപ്പെട്ട ജനങ്ങൾക്ക് ആശ്രയമാകേണ്ട ആതുരാലയത്തിൽ രാത്രികാലത്തു ഡോക്ടർമാരുടെ സേവനം ഇല്ലാത്തത് രോഗികളെ കുറച്ചൊന്നുമല്ല ബുദ്ധിമുട്ടിക്കുന്നത്. കുമരകത്ത് ജി 20 ഉച്ചകോടി നടത്തിയപ്പോൾ ഹോസ്പിറ്റലിൽ ആവശ്യത്തിന് ഡോക്ടർമാർ, നേഴ്സുമാർ, അറ്റൻഡർമാർ, ഐസൊലേഷൻ വാർഡ്, ഐസിയു ആവശ്യത്തിനു മരുന്നുകൾ, എമർജൻസി ഓപ്പറേഷൻ തിയറ്ററുകൾ, ആംബുലൻസുകൾ എന്നിവ സജ്ജമാക്കിയിരുന്നു. ഡോക്ടർമാർക്ക് താമസിക്കാനുള്ള ക്വാർട്ടേഴ്സും സജ്ജീകരിച്ചിരുന്നു. ഈ ക്വാർട്ടേഴ്സിലാണ് അന്ന് ഡോക്ടർമാർ താമസിച്ചിരുന്നത് ഇതിനെല്ലാമുള്ള സൗകര്യങ്ങൾ ഹോസ്പിറ്റലിൽ ഉണ്ട്. ജി 20 കഴിഞ്ഞതോടെ എല്ലാം അപ്രത്യക്ഷമായി.ഇപ്പോൾ ആംബുലൻസ് സൗകര്യം പോലുമില്ല. എത്രയും വേഗം 24 മണിക്കൂറും ഡോക്ടർമാരെ നിയമിക്കണമെന്നാവശ്യപ്പെട്ട് ശക്തമായ സമരപരിപാടികളുമായി മുന്നോട്ടു പോകുമെന്ന് മഹിളാ കോൺഗ്രസ് മണ്ഡലം കമ്മിറ്റി അറിയിച്ചു. മണ്ഡലം പ്രസിഡന്‍റ് സലിമ ശിവാത്മജൻ അധ്യക്ഷത വഹിച്ചു.

കാർ മറിഞ്ഞു നാലുപേർക്കു പരിക്ക്

കോട്ടയം: പാമ്പാടി എട്ടാംമൈലിനുസമീപം കാര്‍ നിയന്ത്രണം വിട്ട് തോട്ടിലേക്ക് വീണു. യാത്രക്കാര്‍ അദ്ഭുതകരമായി രക്ഷപ്പെട്ടു. ദേശീയപാതയിൽ ഇന്നലെ രാത്രി 7.45നാണ് സംഭവം. എട്ടാം മൈലിനും ഏഴാം മൈലിനുമിടയിലുള്ള പാണംമ്പടി കല്ലുപാലം തോട്ടിലേക്കാണ് ആഡംബര വാഹനം നിയന്ത്രണം തെറ്റി വീണത്. തോട്ടിലേക്ക് വാഹനം കുത്തി വീണ നിലയിലായിരുന്നതിനാല്‍ ശബ്ദം കേട്ട് ഓടിയെത്തിയ നാട്ടുകാരും വഴിയാത്രക്കാരും ചേര്‍ന്ന് കാറില്‍ ഉണ്ടായിരുന്നവരെ രക്ഷപ്പെടുത്തി. കൊല്ലാട് സ്വദേശികളായ നാല് പേരായിരുന്നു ഡിഫെന്‍ഡര്‍ കാറില്‍ ഉണ്ടായിരുന്നത്. പരിക്കേറ്റ ഇവരെ മണര്‍കാട് ആശുപത്രിയില്‍ പ്രവേശിപ്പിച്ചു.

കോട്ടയം ടെക്സ്റ്റൈൽസ് ഇന്നു തുറക്കും

ഏറ്റുമാനൂർ: വർഷങ്ങളായി അടച്ചുപൂട്ടിയിരുന്ന കോട്ടയം ടെക്സ്റ്റൈൽസ് ഇന്നു മുതൽ തുറന്നു പ്രവർത്തിക്കാൻ സംസ്ഥാന സർക്കാരും ടെക്സ്റ്റൈൽസ് കോർപറേഷനും നടപടി സ്വീകരിച്ചതായി മോൻസ് ജോസഫ് എംഎൽഎ അറിയിച്ചു. കോട്ടയം ടെക്സ്റ്റൈൽസ് അടച്ചുപൂട്ടിയതു മൂലം ദീർഘനാളുകളായി ജീവനക്കാരും തൊഴിലാളികളും പ്രതിസന്ധിയിലായിരുന്നു. കടുത്തുരുത്തി അസംബ്ലി മണ്ഡലത്തിലെ വേദഗിരിയിൽ പ്രവർത്തിക്കുന്ന കോട്ടയം ടെക്സ്റ്റൈൽസ് തുറന്നു പ്രവർത്തിക്കണമെന്ന് ആവശ്യപ്പെട്ട് മോൻസ് ജോസഫ് എംഎൽഎ നിയമസഭയിൽ രണ്ടുതവണ സബ്മിഷനുകൾ അവതരിപ്പിച്ചിരുന്നു. വ്യവസായ വകുപ്പ് മന്ത്രി പി. രാജീവ്, സഹകരണ വകുപ്പ് മന്ത്രി വി.എൻ. വാസവൻ എന്നിവരുടെ നേതൃത്വത്തിൽ സ്ഥാപനത്തിന്‍റെ പ്രതിസന്ധി പരിഹരിക്കുന്നതു സംബന്ധിച്ച് സർക്കാർ തലത്തിൽ ചർച്ചകളും ഇടപെടലുകളും നടത്തി. 2025 - 26 വർഷത്തെ ബജറ്റിൽ ഉൾപ്പെടുത്തി ധനകാര്യ വകുപ്പ് മന്ത്രി കെ.എൻ. ബാലഗോപാൽ കോട്ടയം ടെക്സ്റ്റൈൽസിന്‍റെ ഭാവി വികസനത്തിനുവേണ്ടി 40 കോടി രൂപയുടെ പദ്ധതി പ്രഖ്യാപിച്ചു. മന്ത്രിമാരുടെ സംയുക്ത ഇടപെടലിലൂടെ ബജറ്റ് വിഹിതത്തിൽനിന്ന് എട്ടു കോടി രൂപ കമ്പനിയുടെ ആധുനികവത്കരണത്തിനുവേണ്ടി സംസ്ഥാന സർക്കാർ അനുവദിച്ചതായി മോൻസ് ജോസഫ് എംഎൽഎ വ്യക്തമാക്കി. പ്രസ്തുത ഫണ്ട് വിനിയോഗിച്ച് പുതിയ മെഷീനുകളും ആധുനിക സാമഗ്രികളും വാങ്ങുന്നതിനുള്ള ഓർഡർ ടെക്സ്റ്റൈൽസ് കോർപറേഷൻ അധികൃതർ ഇതിനോടകം നടത്തിയിട്ടുണ്ട്. കോട്ടയം ടെക്സ്റ്റൈൽസ് തുറന്നു പ്രവർത്തിക്കുന്നതിന് പ്രധാന തടസമായിരുന്ന വൈദ്യുതിചാർജ് കുടിശിക സംബന്ധിച്ച് സർക്കാർ പരിഹാര നടപടികൾ സ്വീകരിച്ചു. മുഖ്യമന്ത്രിയുടെ നേതൃത്വത്തിൽ ധനകാര്യ, വ്യവസായ, സഹകരണ, വൈദ്യുതി വകുപ്പ് മന്ത്രിമാർ കൂട്ടായി നടത്തിയ ചർച്ചയുടെ അടിസ്ഥാനത്തിൽ 2024 ഡിസംബർ 31 വരെ കോട്ടയം ടെക്സ്റ്റൈൽസ് അടയ്ക്കാനുണ്ടായിരുന്ന എട്ടു കോടി രൂപയുടെ വൈദ്യുതി കുടിശിക പൂർണമായും ഇളവുചെയ്തു. നിലവിലുള്ള കുടിശികയ്ക്ക് സാവകാശം അഭ്യർഥിച്ച് വൈദ്യുതിവകുപ്പ് മന്ത്രി കെ. കൃഷ്ണൻകുട്ടിക്ക് മോൻസ് ജോസഫ് എംഎൽഎ സമർപ്പിച്ച നിവേദനത്തിന്‍റെ അടിസ്ഥാനത്തിൽ വൈദ്യുതി ബോർഡ് അനുകൂല നടപടി സ്വീകരിച്ചതോടെയാണ് ഇന്നുമുതൽ കമ്പനി തുറന്നുപ്രവർത്തിക്കാൻ വഴിയൊരുങ്ങിയത്.

ക്‌നാനായ കത്തോലിക്ക കോൺഗ്രസ് കർഷക അവാർഡുകൾ സമ്മാനിച്ചു

ഉഴവൂർ: ക്‌നാനായ കത്തോലിക്കാ കോൺഗ്രസ് കർഷകഫോറം മികച്ച കർഷകർക്ക് ഏർപ്പെടുത്തിയ കീപ്പാറയിൽ കുരുവിള മെമ്മോറിയൽ അവാർഡ് വിതരണം ചെയ്തു. മികച്ച കർഷകൻ അരീക്കര ഇടവകാംഗം ചുമ്മാർ പുത്തൻപുരയെ ഫൊറോന വികാരി ഫാ. അലക്‌സ് ആക്കപ്പറമ്പിൽ ആദരിച്ചു. മികച്ച കർഷക ഉഴവൂർ ഇടവകാംഗം മേഴ്‌സി സിറിയക്കിനെ കർഷകഫോറം രൂപത ചെയർമാൻ എം.സി. കുര്യാക്കോസും കാർഷികരംഗത്ത് മികച്ച സംഭാവന നൽകിയ പുതുവേലി ഇടവകാംഗം ജോർജ് കൊറ്റംകൊമ്പിലിനെ കെസിസി ഉഴവൂർ ഫൊറോന പ്രസിഡന്‍റ് ഏബ്രാഹം വെളിയത്തും ആദരിച്ചു. കർഷക ഫോറം ഫൊറോന ജോയിന്‍റ് കൺവീനർ തോമസ് മുളയ്ക്കൽ അധ്യക്ഷത വഹിച്ചു. കെസിസി ഫൊറോന വൈസ് പ്രസിഡന്‍റ് ഷെറി മാത്യു, സെക്രട്ടറി ഫിലിപ്പ് പുള്ളോലിൽ, യൂണിറ്റ് പ്രസിഡന്‍റ് വി.സി.സിറിയക്ക്, സെക്രട്ടറി സജി ഒറ്റത്തെങ്ങാടി എന്നിവർ പ്രസംഗിച്ചു.

കോട്ടയത്ത് എത്തണോ? കുഴികള്‍ ചാടണം

നാഗമ്പടം സീസര്‍ പാലസ് ജംഗ്ഷനില്‍ മാലപോലെ കുഴികള്‍ കോട്ടയം: കോട്ടയത്ത്എത്താന്‍ കുഴികള്‍ താണ്ടണം. ഈ മഴക്കാലത്ത് സൂക്ഷിച്ചില്ലെങ്കില്‍ അപകടത്തില്‍പ്പെടാം. കാരണം കോട്ടയം നഗരത്തിലേക്ക് ഇറങ്ങിയാല്‍ യാത്രക്കാരെ കെണിവച്ചു വീഴ്ത്താനായി പൊതുമരാമത്ത് വകുപ്പും ദേശീയപാത വിഭാഗവും റെയില്‍വേയും ഒക്കെ കുഴികള്‍ റെഡിയാക്കിയിട്ടുണ്ട്. എംസി റോഡില്‍ നാഗമ്പടം മേല്‍പാലം ഇറങ്ങിവരുമ്പോള്‍ സീസര്‍ പാലസ് ജംഗ്ഷനില്‍ മാലപോലെ കുഴികളാണ്. ഇതില്‍ ചാടാതെ ആര്‍ക്കും നഗരത്തിലേക്ക് വരാന്‍ കഴിയില്ല. ചാടുമ്പോള്‍ വീണില്ലെങ്കില്‍, വണ്ടിക്ക് കേടു പറ്റിയില്ലെങ്കില്‍, അപകടത്തില്‍പ്പെട്ടില്ലെങ്കില്‍ ഭാഗ്യമെന്നു കരുതാം. കനത്ത മഴയെത്തുടർന്നാണ് ചെറുകുഴികളും പൊട്ടിയ റോഡും വലിയ കുഴിയായി മാറിയത്. രാവും പകലും നൂറുകണക്കിനു വാഹനങ്ങള്‍ കടന്നുപോകുന്ന ഇവിടെ ചെറുതും വലുതുമായ വാഹനങ്ങള്‍ കുഴിയില്‍ ചാടുന്നതോടെ കുരുക്കും അപകടവും വര്‍ധിച്ചു. കുഴികളില്‍ ചാടാതെ വെട്ടിക്കാനായി വാഹനങ്ങള്‍ ശ്രമിക്കുമ്പോഴാണ് അപകടമുണ്ടാകുന്നത്. നാഗമ്പടം റെയില്‍വേ മേല്‍പാലത്തിലുമുണ്ട് കുഴികള്‍. പാലവും റോഡും തമ്മില്‍ ചേരുന്നിടം അകന്നുതുടങ്ങിയിട്ട് നാളുകളായി. ഇവിടെ ഒരോ ദിവസവും റോഡ് ഇരുന്നുകൊണ്ടിരിക്കുകയാണ്. ഇതു നന്നാക്കേണ്ട റെയില്‍വേയും പൊതുമരാമത്തും അറിഞ്ഞ ഭാവം നടിക്കുന്നില്ല. റെയില്‍വേയ്ക്കാണ് കുടുതല്‍ ഉത്തരവാദിത്വം. പുളിമൂട് ജംഗ്ഷനില്‍ ഓടയുടെ സ്ലാബ് തകര്‍ന്ന് അപകടകരമായ നിലയിലാണ്. നഗരത്തിലെ വിവിധ പ്രദേശങ്ങളില്‍ ഫുട്പാത്തുകളും തകര്‍ന്നുകിടക്കുകയാണ്. കോട്ടയം മുതല്‍ ഏറ്റുമാനൂര്‍വരെ റോഡ് വളരെ മോശം മഴ ശക്തമായതോടെ എംസി റോഡിന്‍റെ സ്ഥിതി വളരെ മേശമായി. കോട്ടയം മുതല്‍ ഏറ്റുമാനൂര്‍ വരെയുള്ള ഭാഗമാണ് തകര്‍ന്നത്. വേനല്‍ക്കാലത്ത് വീണ്ടുകീറിയ ഭാഗത്ത് ഇപ്പോള്‍ വലിയ കുഴികളാണ്. 101 കവല മുതല്‍ കാരിത്താസ് വരെയും സംക്രാന്തി, കുമാരനല്ലൂര്‍, ചൂട്ടുവേലി ഭാഗത്തും നിറയെ കുഴികളാണ്. ചൂട്ടുവേലി ജംഗ്ഷനില്‍ രൂപപ്പെട്ട വലിയ കുഴി അടയ്ക്കന്‍ ഇതുവരെ അധികൃതര്‍ക്കായിട്ടില്ല. കുഴിയുടെ മുന്നറിയിപ്പിനായി വീപ്പയാണ് വച്ചിരിക്കുന്നത്. രാത്രികാലത്ത് ഇവിടെ വെളിച്ചവുമില്ല. വേഗതയിലെത്തുന്ന വാഹനങ്ങള്‍ വീപ്പ ഇടിച്ചു തെറിപ്പിക്കുകയാണ്. ഏറ്റുമാനൂര്‍ നഗര മധ്യത്തില്‍ രൂപപ്പെട്ട കുഴി വൻ കുഴിയായി മാറിയിരിക്കുകയാണ്. ഒരു മാസം മുമ്പ് കുഴി അടച്ചതാണ്. മഴ ശക്തമായതോടെ വീണ്ടും കുഴി രൂപപ്പെട്ടു. മഴയത്ത് കുഴിയടയ്ക്കുന്ന രീതി ഉപേക്ഷിച്ച് പൊതുമരാമത്ത് വകുപ്പ് തെളിഞ്ഞ അന്തരീക്ഷത്തില്‍ ടാറിംഗ് നടത്തണമെന്നാണ് നാട്ടുകര്‍ ആവശ്യപ്പെടുന്നത്.

ഇനി അക്ഷരമുറ്റത്ത്, അറിവിന്‍റെ ലോകത്ത്...

കോട്ടയം: പുത്തനുടുപ്പും ബാഗും കുടയും കളിചിരികളുമായി കുട്ടികള്‍ ഇന്ന് അക്ഷരമുറ്റത്തേക്ക്. രണ്ടു മാസത്തെ ഇടവേളയ്ക്കു ശേഷം സ്‌കൂളുകളില്‍ ഫസ്റ്റ് ബെല്ലും ക്ലാസുകളില്‍ ഹാജർ വിളികളും മുഴങ്ങും. വേനലവധിയുടെ ആലസ്യംവിട്ട് സ്‌കൂളുകളില്‍ ഇന്ന് പുതിയ അധ്യയനവര്‍ഷത്തിനു തുടക്കമാകും. രണ്ടുദിവസമായി കോരിച്ചൊരിയുന്ന മഴയ്ക്ക് ശമനമായത് കുട്ടികള്‍ക്കും രക്ഷിതാക്കള്‍ക്കും ഒരേപോലെ ആശ്വാസമായി. ഇന്നുമുതല്‍ വിദ്യാലയങ്ങളുടെ വാതിലുകള്‍ വീണ്ടും തുറക്കുമ്പോള്‍ കുട്ടികളെ സ്വീകരിക്കാനുള്ള എല്ലാ ഒരുക്കവും സ്‌കൂള്‍ അധികൃതരും അധ്യാപകരും നേരത്തെ പൂര്‍ത്തിയാക്കിയിരുന്നു. നീണ്ടൂര്‍ എസ്‌കെവി ഗവ. ഹയര്‍സെക്കന്‍ഡറി സ്‌കൂളിലാണ് ജില്ലാതല സ്‌കൂള്‍ പ്രവേശനോത്സവം. എല്ലാ സ്‌കൂളിലും പ്രവേശനോത്സവത്തോടെയാണ് കുട്ടികളെ വരവേല്‍ക്കുന്നത്. പൂക്കളും തോരണങ്ങളും ബലൂണുകളും ഉപയോഗിച്ച് സ്‌കൂളും പരിസരവും അലങ്കരിച്ചിട്ടുണ്ട്. ഒന്നാം ക്ലാസിലേക്ക് ആദ്യമായി എത്തുന്ന കുട്ടികളെ മുതിര്‍ന്ന കുട്ടികളും അധ്യാപകരും മധുരം നല്‍കിയാണ് സ്വീകരിക്കുന്നത്. ജില്ലയിലെ എല്ലാ സ്‌കൂളുകളും തുറന്നു പ്രവര്‍ത്തിക്കാന്‍ സജ്ജമാണെന്ന് പരിശോധിച്ചുറപ്പിച്ചതായി ജില്ലാ വിദ്യാഭ്യാസ ഓഫീസര്‍ അറിയിച്ചു. സ്‌കൂളുകളില്‍ വിദ്യാഭ്യാസ ഓഫീസര്‍മാര്‍ പരിശോധന നടത്തി. സ്‌കൂളുകളില്‍ തദ്ദേശ സ്വയംഭരണ സ്ഥാപനങ്ങളുടെ നേതൃത്വത്തിലും പരിശോധന നടത്തി. കനത്ത മഴ മൂലവും ചില സ്‌കൂളുകളില്‍ ദുരിതാശ്വാസ ക്യാമ്പുകള്‍ പ്രവര്‍ത്തിക്കുന്നതിനാലും ഇവിടെ പിന്നീടായിരിക്കും അധ്യയനം തുടങ്ങുക. തദ്ദേശ സ്വയംഭരണ സ്ഥാപനങ്ങള്‍ അനുവദിച്ച ഫണ്ടുപയോഗിച്ചുള്ള അറ്റകുറ്റപ്പണികളും ശുചീകരണ പ്രവര്‍ത്തനങ്ങളും ഇതിനോടകം പൂര്‍ത്തിയായിട്ടുണ്ട്. പിടിഎയുടെ നേതൃത്വത്തിലുള്ള ക്രമീകരണങ്ങളും നടന്നു. പുസ്തകവിതരണവും അവസാനഘട്ടത്തിലാണ്. 15,06,181 പുസ്തകങ്ങളാണ് ജില്ലയില്‍ ആവശ്യമുള്ളത്. ഇതില്‍ 11,17,461 പുസ്തകങ്ങള്‍ ഇതിനോടകം വിതരണം ചെയ്തു. ബാക്കിയുള്ള 3,88,720 പുസ്തകങ്ങള്‍ സ്‌കൂള്‍ തുറക്കുന്നതിനു മുമ്പുതന്നെ വിതരണം ചെയ്യും. യൂണിഫോമുകളുടെ വിതരണവും പൂര്‍ത്തിയായി. ഉച്ചഭക്ഷണം തയാറാക്കുന്നതിനുള്ള അടുക്കള, പാത്രങ്ങള്‍, മറ്റു സൗകര്യങ്ങള്‍ എന്നിവയുടെ പരിശോധനയും നടത്തി. സ്കൂള്‍ പരിസരങ്ങള്‍ വെട്ടിത്തെളിച്ചു. സ്‌കൂള്‍ കെട്ടിടത്തിലെയും മതിലുകളിലെയും സുഷിരങ്ങള്‍ സിമന്‍റ്വച്ച് അടച്ച് സുരക്ഷിതമാക്കുകയും ചെയ്തിട്ടുണ്ട്. സ്‌കൂള്‍ തുറക്കുന്നതുമായി ബന്ധപ്പെട്ട് ട്രാഫിക് ക്രമീകരണത്തിനും സുരക്ഷയുടെ ഭാഗമായി സ്‌കൂളുകള്‍ക്ക് മുമ്പിലും കൂടുതല്‍ പോലീസുകാരെ നിയമിക്കുമെന്ന് ജില്ലാ പോലീസും അറിയിച്ചിട്ടുണ്ട്.

നാളികേര വില ഉയരങ്ങളില്‍; വെളിച്ചെണ്ണ തിളയ്ക്കുന്നു

കോട്ടയം: വെളിച്ചെണ്ണ വില തിളച്ചു കയറുകയാണ്. ചില്ലറ വിപണിയില്‍ ശരാശരി വില കിലോക്ക് 340 രൂപ മുതല്‍ 360 രൂപ വരെയാണ്. കുപ്പിയില്‍ പായ്ക്ക് ചെയ്ത ബ്രാന്‍ഡഡ് വെളിച്ചെണ്ണക്ക് ഇതിലും കൂടുതലാണ് വില. എണ്ണവില വൈകാതെ 400 കടക്കുമെന്നും 500 രൂപയില്‍ എത്തിയാല്‍പോലും അതിശയിക്കേണ്ടെന്നാണ് വിപണി സൂചന. ആ സാഹചര്യത്തില്‍ നാളികേരവില കിലോയ്ക്ക് 100 കടന്നേക്കാം. കേരളത്തിലും അയല്‍ സംസ്ഥാനങ്ങളിലും കൊപ്രയുടെ ക്ഷാമമാണ് വെളിച്ചെണ്ണ വില ഉയരാന്‍ പ്രധാന കാരണം. കൊപ്ര കിട്ടാനില്ലാതെ വന്നതോടെ ചെറുകിട ആട്ടുമില്ലുകളുടെ പ്രവര്‍ത്തനം നിലച്ചു. തമിഴ്നാട്ടില്‍നിന്നും ആന്ധ്രയില്‍നിന്നും കൊപ്ര വരവ് വലിയ തോതില്‍ കുറഞ്ഞിട്ടുണ്ട്. വിദേശ കൊപ്രാ വരവും നിലച്ചു. വെളിച്ചെണ്ണ വിലയുടെ തോതില്‍ പാം ഓയില്‍, നല്ലെണ്ണ, സൂര്യകാന്തി ഓയില്‍ എന്നിവയ്ക്കും വില വര്‍ധിക്കുകയാണ്. മാര്‍ക്കറ്റില്‍ നാളികേര ലഭ്യത 30-35 ശതമാനം ഇടിവുണ്ടായി. നിലവില്‍ കൊപ്ര വില കേരളത്തില്‍ 186 രൂപയും തമിഴ്നാട്ടില്‍ 188 രൂപയുമാണ്. ഒരു വര്‍ഷത്തിനിടെ നാളി കേര വിലയില്‍ 25 രൂപയുടെ വര്‍ധനയാണുണ്ടായിരിക്കുന്നത്. ഇതാണ് കൊപ്രയിലും പ്രതിഫലിക്കുന്നത്. നാളി കേര ഉത്പാദനത്തില്‍ മുന്നിലുള്ള ഇന്തോനേഷ്യ, ഫിലിപ്പൈന്‍സ്, ശ്രീലങ്ക എന്നിവിടങ്ങളില്‍നിന്ന് ഇറക്കുമതി നടത്തി വില നിയന്ത്രിക്കണമെന്നാണ് വ്യാപാരികളുടെ ആവശ്യം.

മീനച്ചിലാറ്റിലെ ജലനിരപ്പ് അളന്ന്, മഴയെ പഠിച്ച് നദിയോര കൂട്ടായ്മ

റെജി ജോസഫ് കോട്ടയം: മീനച്ചില്‍ നദീ സംരക്ഷണ സമിതിയുടെ കാലാവസ്ഥാ നിരീക്ഷണ കൂട്ടായ്മ മഴപ്പെയ്ത്തും പുഴയിലെ ജലനിരപ്പും അളന്നു നിരീക്ഷിക്കുന്ന ജാഗ്രതയിലാണ്. വാഗമണ്‍ മുതല്‍ കുമരകം വരെ 170 കിലോമീറ്റര്‍ ദൂരം ജലനിരപ്പ് മീനച്ചില്‍ റെയിന്‍ ആന്‍ഡ് റിവര്‍ മോനിട്ടറിംഗ് നെറ്റ്‌വര്‍ക്ക് ദിവസവും കുറിച്ച് സര്‍ക്കാര്‍ സംവിധാനങ്ങളെയും പ്രദേശവാസികളെയും അറിയിക്കുന്നുണ്ട്. പെയ്യുന്ന മഴയും അത് മീനച്ചിലാറ്റിലെ ജലനിരപ്പിലുണ്ടാക്കുന്ന വ്യതിയാനവുമാണ് ഇവരുടെ പ്രധാന പഠനവിഷയം. ഇതിനായി മീനച്ചിലാറ്റിലും മറ്റു പ്രധാന കേന്ദ്രങ്ങളിലും സ്ഥാപിച്ച റിവര്‍ ഗേജുകളിലൂടെയും വീടുകള്‍ക്ക് മുകളില്‍ സ്ഥാപിച്ച ഇരുനൂറോളം റെയിന്‍ ഗേജുകളിലൂടെയാണ് പുഴ, മഴ നിരീക്ഷണം. മീനച്ചിലാറ്റിലെ ഏഴ് പാലങ്ങളിലും വലിയ പാറകളിലും സ്‌കെയിലുകള്‍ വരച്ച് ജലനിരപ്പ് അറിയിക്കുന്നതില്‍ സര്‍ക്കാര്‍ സംവിധാനങ്ങള്‍ക്കും ഈ കൂട്ടായ്മ കരുതലായിരിക്കുന്നു. ഇരുനൂറു പേരുടെ കൂട്ടായ്മയില്‍ 120 പേര്‍ സ്‌കൂള്‍ വിദ്യാര്‍ഥികളാണ്. എല്ലാവരും വീടുകളില്‍ സ്ഥാപിച്ച മഴമാപിനി നിരീക്ഷിച്ച് മഴയുടെ അളവ് വാട്‌സ് ആപ്പില്‍ നല്‍കും. കാലാവസ്ഥാ നിരീക്ഷണവകുപ്പിനു പോലും സാധിക്കാത്ത ജാഗ്രതയില്‍ കാലാവസ്ഥ അറിയിക്കുന്നവരുടെ പ്രാദേശിക കൂട്ടായ്മയാണ് മീനച്ചില്‍ റെയിന്‍ ആന്‍ഡ് റിവര്‍ മോനിട്ടറിംഗ് നെറ്റ്‌വര്‍ക്ക്. ‌ കാലാവസ്ഥാ വ്യതിയാനം രൂക്ഷമാവുകയും മേഘവിസ്‌ഫോടനം പോലുള്ള പ്രതിഭാസം സാധാരണമാവുകയും ചെയ്യുന്നതിനാല്‍ ഇവരുടെ പ്രവര്‍ത്തനത്തിന് പ്രസക്തിയേറുകയാണ്. മീനച്ചിലാറ്റില്‍ ജലനിരപ്പ് ഉയര്‍ന്നാല്‍ കുമരകത്തും കോട്ടയത്തിന്‍റെ പ്രാന്തപ്രദേശങ്ങളിലും എത്ര തോതില്‍ പ്രളയക്കെടുതിയുണ്ടാകുമെന്ന് ഇവര്‍ക്ക് നിരീക്ഷിക്കാനാകും. ജനങ്ങള്‍ എന്തൊക്കെ ജാഗ്രത പുലര്‍ത്തണം എന്നത് ഇവര്‍ വാട്‌സ് ആപ്പില്‍ അറിയിക്കുകയും ചെയ്യും. മഴക്കാലത്ത് രൗദ്രഭാവത്തില്‍ കുത്തിയൊഴുകുന്ന മീനച്ചില്‍ പുഴയോര വാസികള്‍ക്ക് വലിയ സഹായമാണ് ഇവരുടെ സേവനം. സിറ്റിസണ്‍സ് സയന്‍സ് എന്ന നിലയില്‍ ഈ സംരംഭത്തിന് പ്രസക്തിയേറെയാണെന്നും സേവനം കൂടുതല്‍ വിപുലീകരിക്കുമെന്നും കൂട്ടായ്മയുടെ കോ-ഓര്‍ഡിനേറ്റര്‍ എബി പൂണ്ടിക്കുളം പറഞ്ഞു. മഴ മാത്രമല്ല തെര്‍മോമീറ്റലൂടെ താപനിലയും ഇവര്‍ നിരീക്ഷിക്കുന്നുണ്ട്. ഓരോ ദിവസത്തെയും കൂടിയതും കുറഞ്ഞതുമായ താപനിലയും അന്തരീക്ഷ ഈർപ്പവും നിരീക്ഷിക്കും. നിരീക്ഷണങ്ങളുടെ ശരാശരി ഇതിനായി ചുമതലപ്പെട്ടവര്‍ വിലയിരുത്തി വാട്‌സ് ആപ്പിലൂടെ കൈമാറും. വോളണ്ടിയര്‍മാര്‍ അളന്നെടുക്കുന്ന മഴവെള്ളത്തിലൂടെ ഒരു പഞ്ചായത്തില്‍ പെയ്ത മഴയുടെ അളവ് കൃത്യമായി എടുക്കാം. വിവിധ ഇടങ്ങളില്‍നിന്നുള്ള വിവരങ്ങള്‍ എത്തുന്നതോടെ അലര്‍ട്ടുകളും നിര്‍ദേശങ്ങളും വാട്‌സ്ആപ്പ് കമ്യൂണിറ്റിയിലൂടെ ജനങ്ങളിലെത്തിക്കും. 2015 മുതല്‍ ഉണ്ടായിരുന്ന കൂട്ടായ്മ 2018ലെ പ്രളയകാലത്താണ് പൂര്‍ണതോതില്‍ പ്രവര്‍ത്തിച്ചു തുടങ്ങിയത്. മഴയുടെ ആശങ്ക ഓരോ വര്‍ഷവും കൂടുമ്പോള്‍ മഴ അലര്‍ട്ടുകള്‍ മാത്രമല്ല പ്രകൃതിസംരക്ഷണ പദ്ധതികളും ആവിഷ്‌കരിച്ച് വരികയാണ് ഈ നദിയോര നിരീക്ഷണ കൂട്ടായ്മ.

നാട്ടുമീനുകളുടെ രുചിയിൽ മഴക്കാലം

കോട്ടയം: മഴക്കാലം തീന്‍മേശയില്‍ നാട്ടുമീനുകളുടെ രുചിക്കാ ലം. കടല്‍, കായല്‍ മത്സ്യങ്ങള്‍ക്ക് ഇടവേള നല്‍കി എല്ലാവരും നാട്ടുമീനുകള്‍ക്കു പിന്നാലെയാണ്. പുതുവെള്ളമത്തെി പാടവും തോടും കനാലുമൊക്കെ നിറഞ്ഞതോടെ മീന്‍പിടിത്തവും തകൃതിയാണ്. മഞ്ഞക്കൂരിയും പുല്ലനും വാളയും കാരിയുമൊക്കെയാണ് നാട്ടുമീന്‍വിപണയിലെ താരങ്ങള്‍. മഴക്കാലത്തിന്‍റെ ആരംഭത്തില്‍ നാടന്‍ മത്സ്യങ്ങളുടെ ലഭ്യത കൂടുതലാണ്. ഈ സമയത്ത് ഇതിന് ആവശ്യക്കാരുമേറെയാണ്. കല്ലട, വരാല്‍, കാരി, മഞ്ഞക്കൂരി, പുല്ലന്‍, മുരശ്, കുറുവ, വയമ്പ്, വാള, കണ്ണി, പരല്‍, പ്രാഞ്ഞില്‍, ആരാന്‍ തുടങ്ങിയ മത്സ്യങ്ങളാണ് വ്യാപകമായി വില്‍ക്കുന്നത്. കല്ലട-200, വരാല്‍- 350, കാരി- 300, പുല്ലന്‍-80, മുരശ്-380, കുറുവ-160, വയമ്പ്-100, വാള- 350, കണ്ണി -180,പരല്‍- 150, പ്രാഞ്ഞില്‍- 200, ആരോന്‍-180. എന്നിങ്ങനെയാണ് കിലോഗ്രാമിനു വില. കുമരകത്തും പടിഞ്ഞാറന്‍ മേഖലയിലെ വിവിധ പ്രദേശങ്ങളിലും നാട്ടുമീന്‍ വില്‍പന തകൃതിയാണ്. ഏറ്റുമാനൂര്‍-പാലാ റോഡില്‍ കട്ടച്ചിറ മാവിന്‍ചുവടിനു സമീപമാണ് നാട്ടുമീനുകളുലെ വലിയ മാര്‍ക്കറ്റ്. ഇവിടെ നിരവധി മീന്‍പിടിത്തക്കാരാണ് റോഡിലിട്ട് മീന്‍ വില്‍ക്കുന്നത്. യാത്രക്കാര്‍ വാഹനങ്ങള്‍ നിര്‍ത്തി മീന്‍ വാങ്ങിയാണ് പോകുന്നത്. നാട്ടുമീന്‍ ഇവിടെ വില്‍പ്പനയുണ്ടെന്നറിഞ്ഞ് ദൂരെനിന്നുപോലും ധാരാളം ആളുകള്‍ എത്തുന്നുണ്ട്.

കുറവിലങ്ങാട് മുത്തിയമ്മയ്ക്കരികിൽ അവർ അണിനിരന്നു; ദൈവമാതാവിന്‍റെ വ്യത്യസ്ത വേഷഭാവങ്ങളിൽ

കുറവിലങ്ങാട്: മരിയൻ പ്രത്യക്ഷീകരണങ്ങളുടെ ദൃശ്യവിരുന്നൊരുക്കി കുറവിലങ്ങാട് മേജർ ആർക്കി എപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന ഇടവകയിലെ എസ്എംവൈഎം യൂണിറ്റ്. മേയ്മാസ വണക്കാചരണത്തിന്‍റെ സമാപനത്തോടനുബന്ധിച്ചായിരുന്നു മരിയഭക്തിയുടെ വേറിട്ട പ്രചരണം. ഇടവകയിലെ 28 വാർഡുകളിൽനിന്ന് തെരഞ്ഞെടുക്കപ്പെട്ട 28 പേരും രണ്ട് എസ്എംവൈഎം അംഗങ്ങളും ചേർന്ന് 30 സ്ഥലങ്ങളിലെ മരിയൻ പ്രത്യക്ഷീകരണദൃശ്യങ്ങളാണ് സമ്മാനിച്ചത്. കേട്ടും കണ്ടുമറിഞ്ഞിട്ടുള്ള മാതൃ പ്രത്യക്ഷീകരണങ്ങളെ നേരിൽ കണ്ട സന്തോഷത്തിലായിരുന്നു തീർഥാടകരടക്കമുള്ള വിശ്വാസീസമൂഹം. കുറവിലങ്ങാട്, വേളാങ്കണ്ണി, വല്ലാർപാടം, കൊരട്ടി, ഗാഡലൂപ്പ, ഫാത്തിമ, ലൂർദ് എന്നിങ്ങനെ വിവിധ സ്ഥലങ്ങളുടെ പേരിൽ അറിയിപ്പെടുന്ന മാതാവിന്‍റെ രൂപങ്ങളും വ്യാകുലമാതാവ്, കർമലമാതാവ്, നിത്യസഹായമാതാവ്, റോസ മിസ്റ്റിക്ക എന്നിങ്ങനെ വ്യത്യസ്ത വിളിപ്പേരുകളിൽ അറിയപ്പെടുന്ന മാതാവിന്‍റെ വേഷവിധാനങ്ങളുമായുള്ളവരും പങ്കെടുത്തു. മാതാവിന്‍റെ വേഷധാരികളായി എത്തിയവരെല്ലാം ഇടവക ദേവാലയത്തിൽനിന്ന് ജൂബിലി കപ്പേളയിലേക്ക് നടന്ന ജപമാല പ്രദക്ഷിണത്തിലും പങ്കെടുത്തു. ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, സീനിയർ അസി. വികാരി ഫാ. ജോസഫ് മണിയഞ്ചിറ, അസി. വികാരിമാരായ ഫാ. പോൾ കുന്നുംപുറത്ത്, ഫാ. ആന്‍റണി വാഴക്കാലായിൽ, ഫാ. ജോസഫ് ചൂരയ്ക്കൽ, ഫാ. തോമസ് താന്നിമലയിൽ, പാസ്റ്ററൽ അസി. ഫാ. ജോസ് കോട്ടയിൽ എന്നിവർ തിരുക്കർമങ്ങളിൽ കാർമികരായി. എസ്എംവൈഎം ഡയറക്ടർ ഫാ. ജോസഫ് ചൂരയ്ക്കൽ, ജോയിന്‍റ് ഡയറക്ടർ സിസ്റ്റർ അമൽ ജോ, ഭാരവാഹികളായ സെബാസ്റ്റ്യൻ പൊയ്യാനി, അലാൻ ബെന്നി, എബിൻ സജി, നേഹ ലിജു തുടങ്ങിയവർ നേതൃത്വം നൽകി.

മാന്നാനം പള്ളിയിൽ പിടിയരി ഊണ് പുനരാരംഭിച്ചു

മാന്നാനം: ദരിദ്രരെയും അഗതികളെയും സംരക്ഷിക്കാനും അവരെ സമൂഹത്തിന്‍റെ മുഖ്യധാരയിലേക്ക് നയിക്കാനും യത്നിച്ച വിശുദ്ധ ചാവറയച്ചന്‍റെ സ്മരണയിൽ മാന്നാനം സെന്‍റ് ജോസഫ്സ് ആശ്രമ ദേവാലയത്തിൽ പിടിയരി ഊണ് പുനരാരംഭിച്ചു. എല്ലാ ശനിയാഴ്ചകളിലും രാവിലെ 11ന് വിശുദ്ധ കുർബാനയ്ക്കും നൊവേനയ്ക്കും ശേഷം പിടിയരി ഊണ് വിതരണം നടക്കും. സിഎംഐ തിരുവനന്തപുരം പ്രോവിൻസിന്‍റെ പ്രൊവിൻഷൽ ഫാ. ആന്‍റണി ഇളംതോട്ടത്തിന്‍റെ ആശീർവാദ പ്രാർഥനയോടെയാണ് പിടിയരി ഊണിന് തുടക്കമായത്. വിശുദ്ധ ചാവറ കുര്യാക്കോസ് ഏലിയാസച്ചന്‍റെ ആഹ്വാനപ്രകാരം വീടുകളിൽ ഭക്ഷണം തയാറാക്കുന്ന ഓരോ സമയത്തും ഒരുപിടി അരി വീതം മാറ്റിവയ് ക്കുകയും ഓരോ മാസാവസാനവും വീടുകളിൽനിന്ന് ഈ പിടിയരി ശേഖരിച്ച് പാവപ്പെട്ടവരെ സഹായിക്കാനും സ്കൂളുകളിൽ ഉച്ചഭക്ഷണം നല്കാനുമായി ഉപയോഗിക്കുകയും ചെയ്തിരുന്നു. വിശുദ്ധ ചാവറപ്പിതാവിനോടുള്ള മാധ്യസ്ഥ്യപ്രാർഥനക്കായി ഓരോ പിടി അരി വീതം നിയോഗത്തോടെ സമർപ്പിച്ച് പ്രാർഥിക്കുന്ന രീതി മാന്നാനം ആശ്രമ ദേവാലയത്തിലുണ്ട്. ഈ പിടിയരി പ്രാർഥന നേർച്ചയിൽനിന്നുള്ള വരുമാനമാണ് പിടിയരി ഊണ് വിതരണത്തിനായി ഉപയോഗിച്ചുവരുന്നത്.

മഴയ്ക്കു ശമനം; പടിഞ്ഞാറ് ദുരിതം തുടരുന്നു

കോട്ടയം: മഴയ്ക്കു ശമനമായി. മാനം തെളിഞ്ഞു. ഇന്നലെ പകല്‍ ജില്ലയില്‍ ഒരിടത്തും കാര്യമായ മഴ പെയ്തില്ല. ഇതോടെ വെള്ളപ്പൊക്ക ഭീതിയും ഒഴിഞ്ഞു. മഴയ്ക്കു ശമനമായെങ്കിലും ജില്ലയുടെ പടിഞ്ഞാറന്‍ മേഖലയില്‍നിന്ന് വെള്ളം പൂര്‍ണമായും ഇറങ്ങിയിട്ടില്ല. വേമ്പനാട്ടുകായലില്‍ ചെളിയും മണ്ണും നിറഞ്ഞതും പോള നിറഞ്ഞ തോടുകളും മണ്ണിട്ടുയര്‍ത്തിയ പാടങ്ങളുമാണ് മഴ മാറിയിട്ടും വെള്ളം ഇറങ്ങാന്‍ മടിക്കുന്നത്. വെള്ളം ഇറങ്ങാന്‍ ദിവസങ്ങള്‍ എടുക്കുന്നതോടെ പടിഞ്ഞാറന്‍ മേഖലയില്‍ ദുരിതം തുടരുകയാണ്. കോട്ടയം, വൈക്കം, ചങ്ങനാശേരി താലൂക്കുകളിലെ പടിഞ്ഞാറന്‍ പഞ്ചായത്തുകളിലെ താഴ്ന്ന പ്രദേശങ്ങളാണ് ഇപ്പോഴും വെള്ളത്തിലാണ്. സാധാരണ, മഴ മാറി പിറ്റേന്ന് മുതല്‍ അതിവേഗം ഇറങ്ങുന്ന വെള്ളം ഇത്തവണ ഇറങ്ങാന്‍ വൈകുന്നത് ജനങ്ങളിലും ആശങ്ക വര്‍ധിപ്പിച്ചിട്ടുണ്ട്. കോട്ടയം താലൂക്കില്‍ മണര്‍കാട്, അയര്‍ക്കുന്നം, വിജയപുരം, തിരുവാര്‍പ്പ്, അയ്മനം, ആര്‍പ്പൂക്കര, കുമരകം പഞ്ചായത്തുകളുടെയും കോട്ടയം, ഏറ്റുമാനൂര്‍ നഗരസഭയുടെയും താഴ്ന്ന പ്രദേശങ്ങള്‍ വെള്ളത്തിനടയിലാണ്. നീണ്ടൂര്‍, കല്ലറ, തലയാഴം, വെച്ചൂര്‍ പഞ്ചായത്തുകളിലും സമാന ദുരിതം അനുഭവപ്പെടുന്നു. ചങ്ങനാശേരി താലൂക്കില്‍ കുറിച്ചി, വാഴപ്പള്ളി പഞ്ചായത്തുകളിലെ താഴ്ന്ന പ്രദേശങ്ങളിലും വെള്ളക്കെട്ട് തുടരുകയാണ്. റോഡുകളില്‍ കയറിയ വെള്ളം ഇറങ്ങിത്തുടങ്ങിയെങ്കിലും നൂറുകണക്കിനു വീടുകളില്‍ ഇപ്പോഴും വെള്ളമുണ്ട്. മീനച്ചിലാറും മണിമലയാറും തെളിഞ്ഞൊഴുകി തുടങ്ങിയെങ്കിലും ജലനിരപ്പ് കാര്യമായി താഴ്ന്നിട്ടില്ല. വേമ്പനാട്ടുകായല്‍ വെള്ളമുൾക്കൊള്ളാൻ മടിക്കുന്നതാണ് ജലനിരപ്പ് കുറയാത്തതിനുകാരണം. കായലില്‍നിന്നു കടലിലേക്ക് പോകുന്ന വെള്ളത്തിന്‍റെ അളവും മാര്‍ഗങ്ങളും കുറഞ്ഞതു തിരിച്ചടിയായി. കായലിന്‍റെ അടിത്തട്ടില്‍ ചെളി അടിഞ്ഞതോടെ സംഭരണശേഷിയും കുറഞ്ഞു. ദുരിതാശ്വാസ ക്യാമ്പുകള്‍ പ്രവര്‍ത്തിക്കുന്ന വിദ്യാഭ്യാസ സ്ഥാപനങ്ങള്‍ക്ക് അവധി കോട്ടയം: ജില്ലയില്‍ ദുരിതാശ്വാസ ക്യാമ്പുകള്‍ പ്രവര്‍ത്തിക്കുന്ന വിദ്യാഭ്യാസ സ്ഥാപനങ്ങള്‍ക്ക് ഇന്ന് അവധി പ്രഖ്യാപിച്ച് ജില്ലാ കളക്ടര്‍ ജോണ്‍ വി. സാമുവല്‍ ഉത്തരവായി. ദുരിതാശ്വാസ ക്യാമ്പുകളായി പ്രവര്‍ത്തിക്കുന്ന സ്‌കൂളുകളിലെ പ്രവേശനോത്സവം ക്യാമ്പ് അവസാനിക്കുന്നതിന്‍റെ അടുത്ത പ്രവൃത്തിദിവസം നടത്തണമെന്നും സ്‌കൂള്‍ പരിസരത്തും ക്ലാസ് മുറികളിലും ശുചിമുറികളിലും ഇഴജന്തുക്കളുടെയും മറ്റും ശല്യം ഇല്ലെന്ന് ഉറപ്പാക്കണമെന്നും ഉത്തരവില്‍ പറയുന്നു. ജില്ലയില്‍ 66 ദുരിതാശ്വാസ ക്യാമ്പുകള്‍ കോട്ടയം: കനത്ത മഴ, വെള്ളപ്പൊക്കം എന്നിവയെത്തുടര്‍ന്ന് ജില്ലയില്‍ 679 കുടുംബങ്ങളെ സുരക്ഷിത കേന്ദ്രങ്ങളിലേക്ക് മാറ്റി. ജില്ലയില്‍ 66 ദുരിതാശ്വാസ ക്യാമ്പുകളാണ് പ്രവര്‍ത്തിക്കുന്നത്. 2,289 പേരാണ് ക്യാമ്പുകളിലുള്ളത്. 995 സ്ത്രീകളും 925 പുരുഷന്മാരും 369 കുട്ടികളുമുണ്ട്.

ഓപ്പൺ ജിം സ്ഥാപിച്ചു; പക്ഷേ, സൗകര്യങ്ങളിനിയും വേണം

എലിക്കുളം: എലിക്കുളം പഞ്ചായത്തിന്‍റെ ഇളങ്ങുളത്തെ ഹാപ്പിനെസ് പാർക്കിൽ ഓപ്പൺ ജിമ്മിന്‍റെ ഉദ്ഘാടനം നാലിന് നടത്തുമെങ്കിലും ഇനിയുമേറെ സൗകര്യങ്ങളൊരുങ്ങണം. ഉപകരണങ്ങൾ സ്ഥാപിച്ചെങ്കിലും പാർക്ക് കാടുവളർന്ന് വൃത്തിഹീനമായ നിലയിലാണ്. ഉദ്ഘാടനത്തിന് മുന്പ് കാടുതെളിക്കുമെന്ന് അധികൃതർ വിശദീകരിച്ചെങ്കിലും തറ ടൈൽ പാകുന്നതിന് നിലവിൽ ഫണ്ടില്ല. മഴക്കാലമായതിനാൽ ദിവസങ്ങൾക്കുള്ളിൽ വളപ്പിൽ വീണ്ടും കാടുകയറും. ഇതിനിടയിൽ വയോജനങ്ങൾ ഉൾപ്പെടെയുള്ളവർക്ക് ഓപ്പൺ ജിം ഉപയോഗിക്കുന്നത് സുഗമമാവില്ല. മഴക്കാലത്ത് ഇവിടെ ചെളി നിറയുകയും ചെയ്യും. ചെളിയിൽ ചവിട്ടി ഉപകരണങ്ങൾ ഉപയോഗിക്കുന്നതോടെ അവയുടെ നാശത്തിനും ഇതുകാരണമാകും. കൂടാതെ മേൽക്കൂര കൂടി സ്ഥാപിച്ചില്ലെങ്കിൽ മഴക്കാലത്തെ ജിം ഉപയോഗം ബുദ്ധിമുട്ടിലാവും.

റബർ മരങ്ങൾ വൈദ്യുതി ലൈനിലേക്ക് ചാഞ്ഞു നിൽക്കുന്നത് ഭീഷണിയാവുന്നു

പൊൻകുന്നം: റബർ മരങ്ങൾ വൈദ്യുതിലൈനിലേക്ക് ചാഞ്ഞു നിൽക്കുന്നത് ഭീഷണിയാവുന്നു. 20ാം മൈൽ പുളിക്കൽ ഗേറ്റ് - പന്നിക്കുഴി റോഡിലാണ് റബർ മരങ്ങൾ ഭീഷണിയാകുന്നത്. ചെറിയ കാറ്റ് വീശിയാൽ പോലും വൈദ്യുതി പോകുന്ന അവസ്ഥയാണ് പ്രദേശത്ത്. കഴിഞ്ഞ ദിവസം ലൈനിൽ മരം വീണതിനെത്തുടർന്ന് മൂന്നു ദിവസത്തോളം വൈദ്യുതിയില്ലായിന്നു. ഭീഷണിയുള്ള മരങ്ങൾ വെട്ടിമാറ്റണമെന്നാവശ്യപ്പെട്ട് പ്രദേശവാസികൾ ചിറക്കടവ് പഞ്ചായത്ത് സെക്രട്ടറിക്കും വാർഡ് മെംബർക്കും കഴിഞ്ഞദിവസം പരാതി നൽകിയിരുന്നു. എന്നാൽ, ഇരുവരെ നടപടിയായിട്ടില്ലെന്നു നാട്ടുകാർ ആരോപിക്കുന്നു. അപകടാവസ്ഥയിൽ നിൽക്കുന്ന മരങ്ങൾ എത്രയും വേഗം വെട്ടി നീക്കം ചെയ്യണമെന്ന് നാട്ടുകാർ ആവശ്യപ്പെട്ടു.

ഓടിക്കൊണ്ടിരുന്ന കാറിനു തീപിടിച്ചു

പെരുവന്താനം: കൊട്ടാരക്കര - ദിണ്ഡികൽ ദേശീയപാതയിൽ ചുഴുപ്പിനു സമീപം ഓടിക്കൊണ്ടിരുന്ന കാറിന് തീപിടിച്ച് അപകടം. ആർക്കും പരിക്കില്ല. കൊല്ലം പുത്തൂർ സ്വദേശി അഭിജിത്തിന്‍റെ കാറാണ് കത്തി നശിച്ചത്. ഇന്നലെ പുലർച്ചെ 2.15ാടെയാണ് സംഭവം. വാഹനത്തിൽ നിന്നു ചൂടും പുകയും ഉയരുന്നതു ശ്രദ്ധയിൽപ്പെട്ടതോടെ വാഹനം നിർത്തി യാത്രക്കാർ പുറത്തിറങ്ങുകയായിരുന്നു. തൊട്ടുപിന്നാലെ വാഹനം പൂർണമായും അഗ്നിക്കിരയായി. പ്രദേശവാസികൾ അറിയിച്ചതിനെ തുടർന്ന് പീരുമേട് ഫയർഫോഴ്സ് സ്ഥലത്തെത്തി തീ അണച്ചു. വാഹനം പൂർണമായും കത്തി നശിച്ചു. അപകടത്തെത്തുടർന്ന് തടസപ്പെട്ട ഗതാഗതം പുലർച്ചെ നാലോടെ പുനഃസ്ഥാപിച്ചു. കുട്ടിക്കാനത്തിനും മുണ്ടക്കയത്തിനുമിടയിൽ മുന്പും സമാനമായ രീതിയിൽ വാഹനങ്ങൾ ഓട്ടത്തിനിടെ കത്തി നശിച്ചിട്ടുണ്ട്.

ഇൻവെർട്ടർ ബൾബുകളും പഠനോപകരണങ്ങളും വിതരണം ചെയ്തു

കണമല: പമ്പാവാലി വനാതിർത്തിയിലെ എക്കോ ഡവലപ്പ്മെന്‍റ് കമ്മിറ്റി അംഗങ്ങളായ മുഴുവൻ കുടുംബങ്ങൾക്കും ഇൻവെർട്ടർ ബൾബുകളും വിദ്യാർഥികൾക്ക് പഠനോപകരണങ്ങളും വനം വകുപ്പിന്‍റെ നേതൃത്വത്തിൽ സൗജന്യമായി വിതരണം ചെയ്തു. നോട്ട് ബുക്ക്, കുട, വാട്ടർ ബോട്ടിൽ, പേന, പെൻസിൽ, ബോക്സ്‌, ടിഫിൻ ബോക്സ്‌, നെയിം സ്ലിപ് എന്നിവയാണ് പഠനോപകരണങ്ങളായി നൽകിയത്. എയ്ഞ്ചൽവാലി നേച്ചർ എഡ്യൂക്കേഷൻ സെന്‍ററിൽ നടന്ന ചടങ്ങിൽ പെരിയാർ ടൈഗർ റിസർവ് വെസ്റ്റ് ഡിവിഷനിലെ നിരവധി കുടുംബങ്ങൾ പങ്കെടുത്തു. പമ്പ ഫോറസ്റ്റ് റേഞ്ച് ഓഫീസർ എം.കെ. മുകേഷ് ഉദ്ഘാടനം നിർവഹിച്ചു. ശബരിമല സന്നിധാനം ഫോറസ്റ്റ് ഡപ്യൂട്ടി റേഞ്ച് ഓഫീസർ അനിൽ ചക്രവർത്തി, മുക്കുഴി ഡപ്യൂട്ടി റേഞ്ച് ഓഫീസർ കെ. ജയപ്രകാശ്, ഡിവിഷൻ കോഓർഡിനേറ്റർ നയന വിശ്വൻ, അജിൻ ഹാമിലിട്ടൻ, ഷാജി മുക്കാലി, റേഞ്ച് കോഓർഡിനേറ്റർമാരായ ബി. വിനീത്, പ്രശാന്ത് രാജ്, പമ്പ, അഴുത റേഞ്ച് ഓഫീസുകളിലെ ജീവനക്കാർ, ഇഡിസി അംഗങ്ങൾ എന്നിവർ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact editor@deepika.com