ADVERTISEMENT

ADVERTISEMENT

അനീഷയുടെ വിജയത്തിന് ഇരട്ടി മധുരം

അതിരമ്പുഴ: പ്ലസ് ടു പരീക്ഷയിൽ എല്ലാ വിഷയങ്ങൾക്കും മുഴുവൻ മാർക്കും നേടിയ അതിരമ്പുഴ സെന്‍റ് അലോഷ്യസ് ഹയർ സെക്കൻഡറി സ്കൂൾ വിദ്യാർഥിനി അനീഷ ജോഷിക്ക് കളക്ടറാകാൻ മോഹം. സയൻസ് ഗ്രൂപ്പിൽ ഗ്രേസ് മാർക്കില്ലാതെ എല്ലാ വിഷയങ്ങൾക്കും മുഴുവൻ മാർക്ക് നേടിയ അനീഷയുടെ വിജയത്തിന് ഇരട്ടി മധുരമാണ്. സ്കൂളിന്‍റെ ജൂബിലി വർഷത്തിലാണ് ഈ മിന്നും നേട്ടം.

ട്യൂഷൻ ഇല്ലാതെയാണ് പഠിച്ചത്. അധ്യാപകർ നൽകിയ പിന്തുണയിലാണ് മികച്ച വിജയം നേടാനായതെന്ന് അനീഷ പറഞ്ഞു. എസ്എസ്എൽസിക്ക് എല്ലാ വിഷയങ്ങൾക്കും എ പ്ലസ് ലഭിച്ചിരുന്നു.

അതിരമ്പുഴ കോട്ടമുറി വാരികാട്ട് ജോഷി തോമസിന്‍റെ മകളാണ്. കൃഷിക്കാരനാണ് ജോഷി. അമ്മ ബെസി കിടങ്ങൂർ എൽഎൽഎം ആശുപത്രിയിൽ നഴ്സാണ്. സഹോദരിമാരായ അനീറ്റയും, അഞ്ജലീനയും നഴ്സിംഗ് വിദ്യാർഥിനികളാണ്.

ADVERTISEMENT

വായനയുടെ ലോകത്ത് സെബാസ്റ്റ്യൻ വലിയകാലാ

രാജു കുടിലിൽ ഏറ്റുമാനൂർ: സെബാസ്റ്റ്യൻ വലിയകാലാ അക്ഷരാർഥത്തിൽ വായനയുടെ ലോകത്താണ്. അദ്ദേഹത്തിന്‍റെ വായനയുടെ ലോകം ഏറ്റുമാനൂർ എസ്എംഎസ്എം പബ്ലിക് ലൈബ്രറി മുതൽ ലണ്ടനിലെ പ്രശസ്തമായ ബ്രിട്ടീഷ് ലൈബ്രറിവരെ പരന്നുകിടക്കുന്നു. ലോകത്തിന്‍റെ വിവിധ ഭാഗങ്ങളിലെ 72 ലൈബ്രറികളിൽ അദ്ദേഹത്തിന് അംഗത്വമുണ്ട്. ബ്രിട്ടീഷ് ലൈബ്രറിക്കു പുറമേ ഇംഗ്ലണ്ടിലെ സറേ ആൻഡ് സസക്സ് കൗണ്ടി കൗൺസിലിലെ റെഡ്‌ഹിൽ ഉൾപ്പെടെ 55 ലൈബ്രറികളിലും നോർത്തേൺ അയർലൻഡിലെ നൂറി പബ്ലിക് ലൈബ്രറിയിലും അദ്ദേഹം അംഗമാണ്. ബംഗളൂരു സെൻട്രൽ ലൈബ്രറി, തിരുവനന്തപുരം സ്റ്റേറ്റ് സെൻട്രൽ ലൈബ്രറി തുടങ്ങി ഇൻഡ്യയിലെ നിരവധി ലൈബ്രറികളിലും അദ്ദേഹം അംഗത്വമെടുത്തിട്ടുണ്ട്. വിദേശ ലൈബ്രറികളിൽ വിശിഷ്ടാതിഥിയായി ക്ഷണിക്കപ്പെടുകയും സംവാദങ്ങളിൽ പങ്കെടുക്കുകയും ചെയ്ത അനുഭവവുമുണ്ട്. ഇംഗ്ലണ്ടിലെ റെഡ്ഹിൽ ലൈബ്രറിയിൽ ബ്രിട്ടീഷ് നോവലിസ്റ്റ് റോഡ് റെയ്നോൾഡ്സിന്‍റെ ബ്ലാക്ക് റീഡ് ബേ എന്ന പുസ്തകത്തിന്‍റെ പ്രസാധനച്ചടങ്ങിൽ അദ്ദേഹത്തോടൊപ്പം പങ്കെടുത്ത് സംവാദത്തിൽ സംസാരിച്ചതും ക്രോയിഡോൺ ലൈബ്രറിയിൽ സെബാസ്റ്റ്യൻ ഫോക്സിന്‍റെ പുസ്തക പ്രസാധന ചടങ്ങിൽ സംബന്ധിച്ചതും മധുരിക്കുന്ന ഓർമകളാണ്. ഇംഗ്ലണ്ടിലെ ആദ്യത്തെ ബുക്സ്റ്റാൾ ആയ ഹാച്ചാർഡ്സ് ഉൾപ്പെടെയുള്ള പ്രശസ്തമായ ബുക്സ്റ്റാളുകളും സെബാസ്റ്റ്യൻ വലിയകാലാ സന്ദർശിച്ചിട്ടുണ്ട്. ഇംഗ്ലീഷ് സാഹിത്യത്തിലെ അതികായന്മാരെയും ലോകപ്രശസ്ത സംഗീതജ്ഞരെയുമൊക്കെ പരിചയപ്പെടാനായത് ഈ ലൈബ്രറികളിലൂടെയും ബുക്സ്റ്റാളുകളിലൂടെയുമാണെന്ന് അദ്ദേഹം പറയുന്നു. ഷേക്സ്പിയറുടെ ജന്മസ്ഥലം, സ്കോട്ട്ലൻഡിലെ റൈറ്റേഴ്സ് മ്യൂസിയം, എഡിൻബ്ര യൂണിവേഴ്സിറ്റി ലൈബ്രറി ബാർ തുടങ്ങിയവയിലെ സന്ദർശനങ്ങളെല്ലാംതന്നെ അക്ഷരങ്ങളും വായനകളും പകരുന്ന കൗതുകം തേടിയുള്ളതായി. അക്ഷരങ്ങളോടുള്ള അഭിനിവേശം തന്നിൽ നിറച്ചത് മാന്നാനം സെന്‍റ് ജോസഫ്സ് പ്രസിലെ ജീവനക്കാരനായിരുന്ന പിതാമഹൻ ആയിരുന്നെന്ന് സെബാസ്റ്റ്യൻ വലിയകാലാ ഓർമിക്കുന്നു. ആഫ്രിക്കയിലെ മിഷണറിമാരെക്കുറിച്ചുള്ള ഇംഗ്ലീഷ് പുസ്തകം അദ്ദേഹം കൈയിൽ വച്ചു കൊടുക്കുമ്പോൾ പ്രായം നാലു വയസ് മാത്രം. വളരുന്നതിനും ഇംഗ്ലീഷ് ഭാഷ പഠിക്കുന്നതിനുമൊപ്പം ഈ പുസ്തകവും മറിച്ചുനോക്കിക്കൊണ്ടിരുന്നു. 10-ാം ക്ലാസിൽ എത്തിയപ്പോഴേക്കും ആ പുസ്തകം വായിച്ചു മനസിലാക്കാറായി. 10-ാം വയസിൽ ഏറ്റുമാനൂർ എസ്എംഎസ്എം പബ്ലിക് ലൈബ്രറിയിൽ അംഗത്വമെടുത്ത് അക്ഷരങ്ങളുടെ ലോകത്തേക്ക് വലതുകാൽ വച്ചു. കെഇ കോളജിലെ ലൈബ്രറിയിൽ നിന്നാണ് ഗൗരവമായ വായന തുടങ്ങുന്നത്. കാഫ്കയെയും സാർത്രിനെയും കാമുവിനെയുമൊക്കെ പരിചയപ്പെടുന്നത് അവിടെനിന്നാണ്. സിഎംഎസ് കോളജിലെ കോളിൻസ് ലൈബ്രറിയും നിർണായക സ്വാധീനം ചെലുത്തി. മഞ്ചേരിയിൽ അധ്യാപകനായി എത്തിയ സെബാസ്റ്റ്യൻ വലിയകാലാ തന്‍റെ വഴി അക്ഷര ലോകത്താണെന്ന് തിരിച്ചറിഞ്ഞു. ഇൻഡ്യൻ എക്സ്പ്രസിലും ദി ഹിന്ദുവിലും ലേഖകനായി. പിന്നീട് അവിടെ തന്നെ സ്റ്റുഡന്‍റ്സ് വോയ്സ്, മലപ്പുറം വോയ്സ് എന്നിങ്ങനെ രണ്ടു മാസികകളും വോയ്സ് ബുക്സ് പുസ്തക പ്രസാധന ശാലയും ആരംഭിച്ച് അക്ഷരലോകത്ത് നിലയുറപ്പിച്ചു. ദി ഹിന്ദുവിൽ ഇപ്പോഴും ലേഖനങ്ങൾ എഴുതുന്നു. കോട്ടയം തെള്ളകം സ്വദേശിയായ സെബാസ്റ്റ്യൻ ഏറ്റുമാനൂർ എസ്എംഎസ്എം പബ്ലിക് ലൈബ്രറിയുമായി ബന്ധപ്പെട്ട് സാംസ്കാരിക പരിപാടികളിൽ സജീവമാണ്. ഭാര്യ അതിരമ്പുഴ പുല്ലുകാലാ കുടുംബാംഗം ജാൻസി സെബാസ്റ്റ്യൻ വോയ്സ് ബുക്സിന്‍റെ എഡിറ്ററാണ്.

പ്ലാറ്റിനം ജൂബിലിനിറവില്‍ പനമറ്റം ദേശീയവായനശാല

പൊന്‍കുന്നം: പ്ലാറ്റിനം ജൂബിലിയുടെ നിറവില്‍ പനമറ്റം ദേശീയവായനശാല. സ്വാതന്ത്ര്യസമരവും ദേശീയ പ്രസ്ഥാനവും നല്‍കിയ ആവേശം ഉള്‍ക്കൊണ്ട അന്നത്തെ ചെറുപ്പക്കാരുടെ കൂട്ടായ്മയാണ് പനമറ്റത്ത് വായനശാലയ്ക്ക് രൂപം നല്‍കിയത്. 1951 മേയ് 27ന് ആണ്ടുമുത്തില്‍ അയ്യപ്പന്‍ നായരാണ് വായനശാല ഉദ്ഘാടനം ചെയ്തത്. മുടവനാട്ട് കൃഷ്ണന്‍ നായര്‍ സംഭാവനയായി നല്‍കിയ രണ്ട് സെന്‍റ് സ്ഥലത്താണ് വായനശാല ആരംഭിച്ചത്. പിന്നീട് അദ്ദേഹത്തോടുതന്നെ വിലയ്ക്ക് വാങ്ങിയ രണ്ടു സെന്‍റ് സ്ഥലംകൂടി ചേര്‍ത്ത് 1954ല്‍ നാട്ടുകാരുടെ സംഭാവന സ്വീകരിച്ച് ആദ്യ കെട്ടിടം പണിതു. പിന്നീട് നാല് ഘട്ടങ്ങളിലായി പുനര്‍നിര്‍മാണം നടത്തി മൂന്നു നിലകളില്‍ 4000 സ്‌ക്വയര്‍ ഫീറ്റ് കെട്ടിടമുണ്ട്. 30 സെന്‍റുള്ള കളിസ്ഥലം വായനശാലയ്ക്ക് സ്വന്തമായിട്ടുണ്ട്. കായികരംഗത്ത് നിരവധി പ്രതിഭകള്‍ ഉയര്‍ന്നുവന്നതില്‍ ഈ കളിക്കളത്തിന് പങ്കുണ്ട്. വര്‍ഷങ്ങളായി വായനശാലയില്‍ പ്രവര്‍ത്തിച്ചു വരുന്ന കരിയര്‍ ഗൈഡന്‍സ് സെന്‍റര്‍ നാട്ടില്‍നിന്നു നിരവധിയാളുകള്‍ക്ക് വിവിധ മേഖലകളില്‍ ജോലി നേടിക്കൊടുക്കുവാന്‍ സഹായിച്ചു. സൗജന്യ പിഎസ്‌സി പരിശീലനം സെന്‍ററില്‍ വിജയകരമായി നടന്നുവരുന്നു. മികച്ച ഗ്രന്ഥശാലയ്ക്കുള്ള പുരസ്‌കാരം ഉള്‍പ്പെടെ നിരവധി പുരസ്‌കാരങ്ങള്‍ ലൈബ്രറിക്ക് ലഭ്യമായിട്ടുണ്ട്. വായനശാലയില്‍ കലാസംസ്‌കാരിക സാമൂഹിക പ്രവര്‍ത്തനങ്ങള്‍ വളരെ സജീവമായി നടന്നുവരുന്നു. ബാലവേദി, വനിതാവേദി, യുവജനവേദി, ഗുരുജനവേദി എന്നിവ സജീവമാണ്. വനിതകളുടെ കൈകൊട്ടിക്കളി, തിരുവാതിര സംഘം, യുവാക്കളുടെ രക്തദാനസംഘം എന്നിവയുമുണ്ട്. കുട്ടികള്‍ക്ക് അവധിക്കാല പരിപാടികള്‍, കുട്ടികളും മുതിര്‍ന്നവരും ഉള്‍പ്പെട്ട നാടകസംഘം, അമ്പത് കുട്ടികളുള്ള കരാട്ടെ ക്ലാസ് എന്നിവയുമുണ്ട്. എല്ലാരും പാടുന്നു എന്ന പേരില്‍ നടന്നുവരുന്ന പ്രതിമാസ സംഗീതപരിപാടി 50 വേദികള്‍ പിന്നിട്ടു. സാമൂഹ്യനീതി വകുപ്പിന്‍റെ കീഴിലുള്ള സായം പ്രഭാ ഹോം വായനശാല ഗുരുജനവേദിയോടനുബന്ധിച്ച് പ്രവര്‍ത്തിച്ചുവരുന്നു.

കായല്‍ ടൂറിസത്തിനു മാന്ദ്യം; ഹൗസ് ബോട്ടുകള്‍ വിശ്രമത്തില്‍

കുമരകം: കുമരകം വേമ്പനാട് കായലില്‍ ഹൗസ് ബോട്ടുകള്‍ 150 എണ്ണത്തോളമുണ്ടെങ്കിലും സഞ്ചാരികളുടെ കുറവ് ടൂറിസം മേഖലയെ മന്ദഗതിയിലാക്കി. കോവിഡ്, വെള്ളപ്പൊക്കം, പക്ഷിപ്പനി തുടങ്ങി ഓരോരോ കാരണങ്ങളാല്‍ വിദേശികളുടെയും സ്വദേശികളുടെയും വരവ് കുറയുകയാണ്. വള്ളംകളിക്കാലം വരുമ്പോള്‍ വിദേശികള്‍ വന്നുതുടങ്ങുമെന്നാണ് ടൂര്‍ ഓപ്പറേറ്റര്‍മാരുടെ പ്രതീക്ഷ. കഴിഞ്ഞ വര്‍ഷം പ്രളയംമൂലം നെഹ്റു ട്രോഫി വള്ളംകളി മുന്നോട്ടു മാറ്റിവച്ചതോടെ വിദേശ സഞ്ചാരികള്‍ ബുക്കിംഗ് കാന്‍സല്‍ ചെയ്തിരുന്നു. പിന്നീട് വള്ളംകളി നടന്നപ്പോള്‍ വിദേശികള്‍ ആരുംതന്നെ വന്നതുമില്ല. ഇക്കൊല്ലം അപ്രതീക്ഷിതമായി കോവിഡ് മടങ്ങിവന്നത് കായല്‍ ടൂറിസത്തിന് വലിയ തിരിച്ചടിയായി. കഴിഞ്ഞ ദിവസങ്ങളിലെ രണ്ടു പ്രളയവും വെള്ളക്കെട്ടും ടൂറിസ്റ്റുകളുടെ വരവിനെ സാരമായി ബാധിച്ചു. മുന്‍പ് ഹോട്ടലുകളും സ്റ്റേഹോമുകളും ബുക്ക് ചെയ്യുന്നവര്‍ ഹൗസ് ബോട്ടുകള്‍ക്കും ഓര്‍ഡര്‍ നല്‍കുക പതിവായിരുന്നു. കടുത്ത ചൂട് വന്നതിനാല്‍ ഇക്കൊല്ലം വേനല്‍ അവധിക്കാലത്തും സഞ്ചാരികള്‍ വളരെ കുറച്ചാണ് എത്തിയത്. കുമരകത്ത് ഹൗസ് ബോട്ടുകളെ ആശ്രയിച്ച് ജീവിക്കുന്ന നാനൂറിലധികം പേരുണ്ട്. ഡ്രൈവറും പാചകക്കാരനും സഹായിയും ഉള്‍പ്പെടെ മൂന്നു പേരാണ് ഒരു ബോട്ടില്‍ ജോലിക്കാരായുണ്ടാകുക. ഓട്ടം പോയാലും ഇല്ലെങ്കിലും ജീവനക്കാര്‍ക്ക് ഉടമ ശമ്പളം കൊടുക്കണം. ബോട്ട് ഓടാതെ കിടന്നാല്‍ ഉടമയ്ക്ക് ദിവസം 2500 - 3000 രൂപ ചെലവ് വരുന്നു. ഈ സാഹചര്യത്തില്‍ കരാര്‍ തൊഴിലാളികളെ ഓട്ടം ലഭിക്കുന്നതനുസരിച്ച് വിളിച്ചാണ് ബോട്ടുകള്‍ ഓടിക്കുക. നിലവില്‍ രാവിലെ മുതല്‍ സര്‍വീസ് പ്രതീക്ഷിച്ച് കുമരകം, ചീപ്പുങ്കല്‍, കവണാറ്റിന്‍കര തുടങ്ങി വിവിധയിടങ്ങളില്‍ ഡ്രൈവര്‍മാരുടെ കാത്തിരിപ്പാണ്. ഓട്ടം ലഭിച്ചില്ലെങ്കിലും ബോട്ടുകളുടെ അറ്റകുറ്റപ്പണികള്‍ക്കും ശുചീകരണത്തിനും വലിയ ചെലവുണ്ട്. നിലവില്‍ ശനി, ഞായര്‍ ദിവസങ്ങളില്‍ മാത്രമാണ് ഏതാനും സംഘങ്ങള്‍ എത്താറുള്ളതെന്ന് കുമരകത്തെ ബോട്ട് ഉടമകള്‍ പറഞ്ഞു. ഒരു മാസം കുറഞ്ഞത് 15 ദിവസമെങ്കിലും ഓട്ടം കിട്ടിയാല്‍ മാത്രമേ ബോട്ട് ഉടമയ്ക്കു പിടിച്ചുനില്‍ക്കാന്‍ കഴിയൂ. ഇപ്പോള്‍ അഞ്ചു ദിവസം പോലും ലഭിക്കുന്നില്ലെന്ന് ഉടമകള്‍ പറയുന്നു. വിനോദസഞ്ചാരികള്‍ എത്തിയാല്‍ത്തന്നെ മണിക്കൂര്‍ അടിസ്ഥാനത്തില്‍ കായല്‍യാത്ര നടത്തുകയാണ്. രാത്രി ഹൗസ് ബോട്ടില്‍ താമസിക്കുന്നവരുടെ എണ്ണവും കുറഞ്ഞു.

പ്ലസ് വണ്‍ സ്പോര്‍ട്‌സ് ക്വാട്ടാ ഓണ്‍ലൈന്‍ രജിസ്ട്രേഷന്‍ ആരംഭിച്ചു

കോട്ടയം: 2025-2026 അധ്യയന വര്‍ഷത്തേക്കുള്ള പ്ലസ് വണ്‍ സ്പോര്‍ട്സ് മികവ് രജിസ്ട്രേഷനും വേരിഫിക്കേഷനും (സപ്ലിമെന്‍ററി ഘട്ടം)ആരംഭിച്ചു. നാളെവരെ അപേക്ഷിക്കാം. പ്ലസ് വണ്‍ സ്പോര്‍ട്സ് ക്വാട്ടാ അഡ്മിഷന് അപേക്ഷിക്കാത്ത വിദ്യാര്‍ഥികള്‍ www.sports.hscap.kerala. gov.in എന്ന വെബ് സൈറ്റില്‍ പ്ലസ് വണ്ണിന് അപേക്ഷിച്ചശേഷം സ്പോര്‍ട്‌സ് ക്വാട്ടയ്ക്കുള്ള സര്‍ട്ടിഫിക്കറ്റുകള്‍ അപ്‌‌ലോഡ് ചെയ്യണം. ലഭിക്കുന്ന പ്രിന്‍റ് ഔട്ട്, ഒറിജിനല്‍ സ്പോര്‍ട്‌സ് സര്‍ട്ടിഫിക്കറ്റ്, ഫോട്ടോസ്റ്റാറ്റ് കോപ്പി എന്നിവയുമായി നേരിട്ട് ജില്ലാ സ്പോര്‍ട്‌സ് കൗണ്‍സിലില്‍ എത്തണം. അഡ്മിഷനായി 2023 ഏപ്രില്‍ ഒന്നു മുതല്‍ 2025 മാര്‍ച്ച് 31വരെയുള്ള സര്‍ട്ടിഫിക്കറ്റുകള്‍ മാത്രമാണ് പരിഗണിക്കുന്നത്. സ്‌കൂള്‍തല മത്സരങ്ങള്‍ക്ക് പുറമേ സംസ്ഥാന/ജില്ലാ അംഗീകൃത സ്പോര്‍ട്സ് അസോസിയേഷന്‍ നടത്തുന്ന മത്സരങ്ങളിലെ സര്‍ട്ടിഫിക്കറ്റുകളില്‍ ബന്ധപ്പെട്ട സ്പോര്‍ട്‌സ് കൗണ്‍സില്‍ ഒബ്‌സര്‍വറുടെ ഒപ്പ്, സീരിയല്‍ നമ്പര്‍, ഇഷ്യൂ ചെയ്ത തീയതി, ഇഷ്യൂ അഥോറിറ്റി എന്നിവ നിര്‍ബന്ധമായും ഉണ്ടായിരിക്കണം. ഇല്ലാത്ത പക്ഷം അതിന്‍റെ പൂര്‍ണ ഉത്തരവാദിത്വം അതാത് അഥോറിറ്റിക്കും അപേക്ഷ സമര്‍പ്പിക്കുന്ന വിദ്യാര്‍ഥികള്‍ക്കുമാണെന്നുള്ള സത്യവാങ്മൂലം ഇതോടൊപ്പം നല്‍കണം. കൂടാതെ അസോസിയേഷന്‍റെ ദേശീയ മത്സരങ്ങളില്‍ പങ്കെടുത്തവര്‍ സര്‍ട്ടിഫിക്കറ്റില്‍ അതാത് അസോസിയേഷന്‍റെ സംസ്ഥാന സെക്രട്ടറി കൗണ്ടര്‍ സൈന്‍ ചെയ്തിരിക്കണം. ജില്ലാ സ്പോര്‍ട്സ് കൗണ്‍സിലില്‍നിന്ന് സര്‍ട്ടിഫിക്കറ്റ് വേ രിഫിക്കേഷന്‍ നടത്തി സ്‌കോര്‍ കാര്‍ഡ് ലഭിക്കുന്ന മുറയ്ക്ക് വീണ്ടും ലോഗിന്‍ ചെയ്ത് സ്‌കൂള്‍ സെലക്ട് ചെയ്ത് അപേക്ഷിക്കണം. 0481-2563825/ 8547575248.

കോതനല്ലൂര്‍ ഫൊറോനാ പള്ളിയില്‍ കന്തീശങ്ങളുടെ ‌തിരുനാളും ഇരട്ടകളുടെ മഹാസംഗമവും ഇന്ന്

കടുത്തുരുത്തി: തീര്‍ഥാടന കേന്ദ്രമായ കോതനല്ലൂര്‍ ഫൊറോനാ പള്ളിയില്‍ കന്തീശങ്ങളുടെ തിരുനാളും ഇരട്ടകളുടെ മഹാസംഗമവും ഇന്ന് നടക്കും. 19-ാമത്തെ വര്‍ഷമാണ് ഇരട്ടകളുടെ സംഗമം നടക്കുന്നത്. കഴിഞ്ഞവര്‍ഷം നടന്ന ഇരട്ടകളുടെ സംഗമത്തില്‍ 410 ജോഡി ഇരട്ടകള്‍ പങ്കെടുത്തിരുന്നു. ഇന്ന് രാവിലെ 5.45ന് വിശുദ്ധ കുര്‍ബാന, ഏഴിന് പാട്ടുകുര്‍ബാന, നൊവേന, 8.30 ന് ഇരട്ടകളുടെ രജിസ്ട്രേഷന്‍ ആരംഭിക്കും. 9.30ന് സമൂഹബലി. ഇരട്ടവൈദികരായ ഫാ.റോയി കണ്ണൻചിറ സിഎംഐ, ഫാ.റോബി കണ്ണൻചിറ സിഎംഐ, ഫാ.റോജി മനയ്ക്കപ്പറമ്പില്‍ സിഎംഐ, ഫാ.റെജി മനയ്ക്കപ്പറമ്പില്‍ സിഎംഐ, ഫാ.ആന്‍റോ പേഴുംകാട്ടില്‍, ഫാ. അജോ പേഴുംകാട്ടില്‍, ഫാ. ജസ്റ്റിന്‍ തയ്യില്‍ ഒഎസ്ബി, ഫാ. ജിസ്റ്റോ തയ്യില്‍ ഒഎസ്ബി, ഫാ. ഡെയ്ന വടക്കേമുറിയില്‍ എന്നിവര്‍ കാര്‍മികത്വം വഹിക്കും. 11.15 ന് തിരുനാള്‍ പ്രദക്ഷിണം ആരംഭിക്കും. 12.15 ന് ഇരട്ടകളുടെ സമര്‍പ്പണ ശുശൂഷ - ബിഷപ് മാര്‍ ജോസഫ് കല്ലറങ്ങാട്ട് നിര്‍വഹിക്കും. തുടര്‍ന്ന് സ്നേഹവിരുന്ന്, വൈകുന്നേരം അഞ്ചിന് പാട്ടുകുര്‍ബാന, തുടര്‍ന്ന് കന്തീശങ്ങളുടെ തിരുസ്വരൂപങ്ങള്‍ പുനഃപ്രതിഷ്ഠിക്കും. തിരുനാള്‍ തിരുക്കര്‍മങ്ങള്‍ക്ക് വികാരി ഫാ. സെബാസ്റ്റ്യന്‍ പടിയ്ക്കക്കുഴുപ്പില്‍, സഹവികാരി ഫാ.ടോം ജോസ് മാമലശേരില്‍ എന്നിവര്‍ നേതൃത്വം വഹിക്കും.

മുല്ലപ്പെരിയാര്‍ ഡാമിന്‍റെ ചരിത്രം വിവരിക്കുന്ന പുസ്തകം പുറത്തിറങ്ങുന്നു

കോട്ടയം: മുല്ലപ്പെരിയാര്‍ ഡാമിന്‍റെ ചരിത്രവും കരാറുകളും വിവരിക്കുന്ന പുസ്തകം പുറത്തിറങ്ങുന്നു. മുല്ലപ്പെരിയാര്‍ സമരസമിതി മുന്‍ ചെയര്‍മാന്‍ പ്രഫ. സി.പി. റോയി എഴുതി പാഠഭേദം ബുക്‌സ് പ്രസിദ്ധീകരിക്കുന്ന മുല്ലപ്പെരിയാര്‍ ഡാം 999 പ്ലസ് 999 അറിയാത്തതും അറിയേണ്ടതും എന്ന പുസ്തകത്തിലാണ് മുല്ലപ്പെരിയാര്‍ ഡാം സംബന്ധിച്ചുള്ള സമഗ്രമായ വിവരങ്ങള്‍ ഉള്‍ക്കൊള്ളിച്ചിരിക്കുന്നത്. മുല്ലപ്പെരിയാര്‍ കരാര്‍ ഒപ്പിടാന്‍ നിര്‍ബന്ധിതമായ സാഹചര്യം, കേരളത്തില്‍ നിന്നും തമിഴ്‌നാടിനു വെള്ളം കൊടുക്കുന്ന മറ്റ് എട്ട് അണക്കെട്ടുകള്‍, കരാര്‍ കാലാവധി കഴിഞ്ഞ ഡാമുകളുടെ കരാര്‍ പുതുക്കുന്നതിന് കേരളം മടിക്കുന്നതെന്ത്, 2014 ലെ കോടതിവിധി നടപ്പാക്കാതെ കേരളവും തമിഴ്‌നാടും ഒളിച്ചുകളിക്കുന്നതെന്തുകൊണ്ട്, തമിഴ്‌നാടിന്‍റെ പണം കേരളത്തെ സ്വാധീനിക്കുന്നുണ്ടോ, 999 വര്‍ഷത്തെ കരാര്‍ കാലാവധി കഴിഞ്ഞ് വീണ്ടും ഒരു 999 വര്‍ഷത്തേക്ക് കൂടി കരാര്‍ പുതുക്കി നല്‍കാന്‍ 1970 ലെ കരാറില്‍ അച്യുതമേനോന്‍ എന്തിനു കൂട്ടു നിന്നു തുടങ്ങി അറിയാത്തതും അറിയേണ്ടതുമായ നിരവധി കാര്യങ്ങള്‍ പുസ്തകത്തില്‍ പരാമര്‍ശിക്കുന്നുണ്ട്. ഇന്നു രാവിലെ 11ന് കോട്ടയം പ്രസ് ക്ലബില്‍ നടക്കുന്ന ചടങ്ങില്‍ ഗീവര്‍ഗീസ് മാര്‍ കൂറിലോസ് പുസ്തകം പ്രകാശനം ചെയ്യും. പെരിയാര്‍ തീരദേശവാസികളും കരിങ്കുളം ചപ്പാത്തിലെ മുല്ലപ്പെരിയാര്‍ സമരസമിതി പ്രവര്‍ത്തകരുമായ രാജേന്ദ്രന്‍ മാരിയില്‍, വി. വി. മനോജ്, ജോയി തയ്യില്‍ തുടങ്ങിയവര്‍ ചേര്‍ന്ന് പുസ്തകം ഏറ്റുവാങ്ങും. സിവിക് ചന്ദ്രന്‍ പുസ്തകം പരിചയപ്പെടുത്തും.

വേറിട്ട പുസ്തകപരിചയ മത്സരവുമായി പിആര്‍ഡി

കോട്ടയം: വായന പക്ഷാചരണത്തോടനുബന്ധിച്ച് പുസ്തക പരേഡ് - പ്രിയ പുസ്തകം, എന്‍റെ വാക്കില്‍ പരിപാടിയുമായി വിവര - പൊതുജനസമ്പര്‍ക്ക വകുപ്പ്. ജില്ലാ ഇന്‍ഫര്‍മേഷന്‍ ഓഫീസിന്‍റെ ഔദ്യോഗിക ഫേസ്ബുക്ക് പേജി വഴി സംഘടിപ്പിക്കുന്ന പുസ്തക പരേഡ് മത്സരത്തില്‍ ഹൈസ്‌കൂള്‍, ഹയര്‍ സെക്കന്‍ഡറി വിദ്യാര്‍ഥികള്‍ക്കും കോളജ് വിദ്യാര്‍ഥികള്‍ക്കും പങ്കെടുക്കാം. പ്രിയപ്പെട്ട പുസ്തകത്തെ അവതരിപ്പിക്കുക മാത്രമാണ് ചെയ്യേണ്ടത്. എന്തുകൊണ്ടാണ് ഈ പുസ്തകത്തെ ഇഷ്ടപ്പെടുന്നത്, പുസ്തകത്തെപ്പറ്റി പറയുന്നത് എന്നു വ്യക്തമാക്കുന്ന 100 വാക്കില്‍ കവിയാത്ത കുറിപ്പും പുസ്തകത്തിനൊപ്പം നില്‍ക്കുന്ന മത്സരാര്‍ഥിയുടെ വ്യക്തമായ ചിത്രവും 9847998894 എന്ന വാട്സ് ആപ്പ് നമ്പറില്‍ അയച്ചുനല്‍കണം. പുസ്തകത്തിന്‍റെ പേര്, രചയിതാവിന്‍റെ പേര്, ഏതു വിഭാഗത്തില്‍ വരുന്ന പുസ്തകമാണ് (കഥ, നോവല്‍, ജീവചരിത്രം, പഠനം... എന്നിങ്ങനെ) എന്നീ വിവരങ്ങളും മത്സരാര്‍ഥിയുടെ പേര്, വയസ്, വിലാസം, സ്‌കൂള്‍, ക്ലാസ്, ബന്ധപ്പെടാനുള്ള ഫോണ്‍നമ്പര്‍ എന്നിവയും കുറിപ്പിനൊപ്പം നല്‍കണം. ഇന്നുമുതല്‍ ജൂലൈ ഒന്നുവരെ ഈ മത്സരത്തില്‍ പങ്കെടുക്കാം. എന്‍ട്രികളില്‍ പ്രസിദ്ധീകരണയോഗ്യമായവ ജില്ലാ ഇന്‍ഫര്‍മേഷന്‍ ഓഫീസിന്‍റെ ഫേസ്ബുക്ക് പേജില്‍ പുസ്തകവുമായുള്ള മത്സരാര്‍ഥിയുടെ ചിത്രം സഹിതം പോസ്റ്റ് ചെയ്യും. സ്‌കൂള്‍ വിഭാഗത്തിലും (ഹൈസ്‌കൂള്‍, ഹയര്‍ സെക്കന്‍ഡറി)കോളജ് വിഭാഗത്തിലും ഏറ്റവും മികച്ച മൂന്നു കുറിപ്പുകള്‍ക്ക് ആകര്‍ഷകമായ സമ്മാനങ്ങളും നല്‍കും. മേല്‍പ്പറഞ്ഞ രീതിയില്‍ പൊതുജനങ്ങള്‍ക്കും പുസ്തകപരേഡില്‍ പങ്കാളികളാകാം. ഈ വിഭാഗത്തില്‍ മത്സരമില്ല. പുസ്തകത്തെക്കുറിച്ചുള്ള കുറിപ്പും പുസ്തകവുമായുള്ള ചിത്രവും പേര്, വയസ്, വിലാസം, തൊഴില്‍/പ്രവൃത്തി മേഖല, ഫോണ്‍നമ്പര്‍ (വാട്‌സ്ആപ്പ്) എന്നിവ സഹിതം ജില്ലാ ഇന്‍ഫര്‍മേഷന്‍ ഓഫീസിന്‍റെ ഫേസ്ബുക്ക് മെസഞ്ചറിലൂടെ നല്‍കുക. ജൂലൈ ഏഴുവരെ എന്‍ട്രികള്‍ സ്വീകരിക്കും. ഏതു വിഭാഗത്തില്‍പ്പെട്ടവര്‍ക്കും ഏതു പ്രായക്കാര്‍ക്കും പങ്കെടുക്കാം. ജില്ലാ ഇന്‍ഫര്‍മേഷന്‍ ഓഫീസിന്‍റെ ഫേസ്ബുക്ക് പേജ് ഫോളോ ചെയ്യുക. ലിങ്ക്: https://www.facebook.com/diokottayam, 0481 2562558.

കുടയംപടിയിലുണ്ട് വഴിയോര വായനശാല

കോട്ടയം: അക്ഷരനഗരിയായ കോട്ടയം നഗരത്തോടു ചേര്‍ന്നുള്ള കുടയംപടിയിലെ ബസ് കാത്തിരിപ്പുകേന്ദ്രം വെറുമൊരു കാത്തിരിപ്പുകേന്ദ്രമല്ല. വായനയും വര്‍ത്തമാനവുമായി ഒരു ഒത്തുകൂടല്‍ കേന്ദ്രം കൂടിയാണ് ഈ ബസ്‌സ്റ്റോപ്പ്. ബസ്‌സ്റ്റോപ്പിനൊപ്പം വായനായിടം ഒരുക്കിയിരിക്കുകയാണ് കുടയംപടി മൈല്‍സ്റ്റോണ്‍ സ്വയംസഹായ സംഘം. പ്രധാനപ്പെട്ട എല്ലാ ദിനപത്രങ്ങളും ആനുകാലിക പ്രസിദ്ധീകരണങ്ങളും ബാലപ്രസിദ്ധീകരണങ്ങളും ഇവിടെയിരുന്ന് വായിക്കാം. പ്രദേശത്തെ ജനപ്രിയ ഡോക്ടറായിരുന്ന ഡോ. കുമാറിന്‍റെ സ്മരണയ്ക്കായിട്ടാണ് ഒരു വര്‍ഷം മുമ്പ് ബസ് കാത്തിരിപ്പുകേന്ദ്രം നിര്‍മിച്ചത്. വായന കുറഞ്ഞുവരുന്ന ഇക്കാലത്ത് വായനയെ പ്രോത്സാഹിപ്പിക്കുക എന്ന ഉദ്ദേശ്യത്തോടെയാണ് ബസ് കാത്തിരിപ്പു കേന്ദ്രത്തില്‍തന്നെ സ്വയംസഹായ സംഘം വായനശാല ഒരുക്കിയത്. വലിയ സ്വീകാര്യതയാണ് ഈ വഴിയോര വായനശാലയ്ക്ക് ഇപ്പോള്‍ ലഭിച്ചുകൊണ്ടിരിക്കുന്നത്. ബസ് കാത്തിരിപ്പുകാര്‍ മാത്രമല്ല പ്രഭാത നടപ്പുകാരും വ്യാപാരികളും കാല്‍നടയാത്രക്കാരും ഇവിടെ വായനയ്ക്കായി ഒത്തുകൂടാറുണ്ട്. വായനയെ ഇഷ്ടപ്പെടുന്ന ആര്‍ക്കും പുസ്തകങ്ങള്‍ ഇവിടെ സംഭാവനയായി നല്‍കാം. ഫോണ്‍ ഉപയോഗം കുറയ്ക്കുക, വായനയെ പ്രോത്സാഹിപ്പിക്കുക എന്നതാണ് വായനശാലയുടെ ലക്ഷ്യമെന്ന് സ്വയംസഹായ സംഘം രക്ഷാധികാരി കെ.എന്‍. മണിക്കുട്ടന്‍, പ്രസിഡന്‍റ് കെ.എന്‍. സുരേഷ്‌കുമാര്‍, സെക്രട്ടറി കെ.എസ്. ബിബിന്‍ എന്നിവര്‍ പറഞ്ഞു. കൂടുതല്‍ പുസ്തകൾ ഉള്‍പ്പെടുത്തി വായനശാലയെ ഒരു ലൈബ്രറിയാക്കി മാറ്റാനുള്ള തയാറെടുപ്പിലാണ് അധികൃതര്‍.

യൂത്ത് അസംബ്ലി ലോഗോ പ്രകാശനം ചെയ്തു

പാലാ: രൂപത എപ്പാര്‍ക്കിയല്‍ യൂത്ത് അസംബ്ലി ലോഗോ ബിഷപ് മാര്‍ ജോസഫ് കല്ലറങ്ങാട്ട് പ്രകാശനം ചെയ്തു. എസ്എംവൈഎം രൂപത പ്രസിഡന്‍റ് അന്‍വിന്‍ സോണി ഓടച്ചുവട്ടില്‍, ഡയറക്ടര്‍ ഫാ. മാണി കൊഴുപ്പന്‍കുറ്റി, രൂപതയിലെ ഫൊറോന ഡയറക്ടര്‍മാര്‍ എന്നിവരുടെ സാന്നിധ്യത്തിലാണ് ലോഗോ പ്രകാശനം ചെയ്തത്. രൂപതയില്‍നിന്ന് തെരഞ്ഞെടുക്കപ്പെട്ട യുവജനങ്ങള്‍ സഭ, സാമൂഹ്യ, രാഷ്‌ട്രീയ, വിദ്യാഭ്യാസ മേഖലകളില്‍ ഗൗരവകരമായ ചര്‍ച്ചകള്‍ നടത്തുന്ന എപ്പാര്‍ക്കിയല്‍ യൂത്ത് അസംബ്ലി സെപ്റ്റംബര്‍ ആദ്യ വാരമാണ് നടക്കുക.

മുനിസിപ്പല്‍ സ്റ്റേഡിയം നവീകരണം: സർക്കാർ അനുവദിച്ചത് 14 കോടി

പാലാ: മുനിസിപ്പൽ സ്റ്റേഡിയം നവീകരണത്തിനായി രണ്ടു തവണയായി സർക്കാർ അനുവദിച്ചതു 14 കോടി രൂപ. മാണി സി. കാപ്പൻ എംഎൽഎയുടെ ബജറ്റ് നിർദേശത്തിലും ജോസ് കെ. മാണി എംപിയുടെ നേതൃത്വത്തില്‍ നഗരസഭാ ചെയര്‍മാന്‍ മുഖ്യമന്ത്രിക്കു നിവേദനം നല്‍കിയപ്പോഴും ഏഴുകോടിരൂപ വീതം അനുവദിച്ചിരുന്നു. ബജറ്റ് നിര്‍ദേശങ്ങളില്‍പ്പെടുത്തി സ്റ്റേഡിയം നവീകരണത്തിനു പണം ആവശ്യപ്പെട്ടിരുന്നതനുസരിച്ചു സിന്തറ്റിക് ട്രാക്ക് നവീകരണത്തിനായി ബജറ്റില്‍ ഏഴു കോടി സർക്കാർ അനുവദിച്ചതിനെത്തുടർന്നു നടപടിക്രമങ്ങൾ ആരംഭിക്കാനായി ജില്ലാ കളക്ടറെ ചുമതലപ്പെടുത്തിയിരുന്നതായി മാണി സി. കാപ്പൻ എംഎല്‍എ അറിയിച്ചു. സിന്തറ്റിക് ട്രാക്ക് സ്റ്റേഡിയം പൊട്ടിപ്പൊളിഞ്ഞ് ഉപയോഗശൂന്യമാകുന്നുവെന്ന കായികപ്രേമികളുടെ പരാതിയെത്തുടര്‍ന്നാണ് ബജറ്റില്‍ മാണി സി. കാപ്പന്‍ സ്റ്റേഡിയം നവീകരണത്തിനുള്ള നിര്‍ദേശം ഉള്‍പ്പെടുത്തിയത്. നടപടിക്രമങ്ങള്‍ നടക്കുന്നതിനിടയിലാണ് മുഖ്യമന്ത്രിയുടെ നവകേരള സദസ് പാലായില്‍ എത്തുന്നത്. സിന്തറ്റിക് ട്രാക്ക് നവീകരണത്തിനു നടപടി സ്വീകരിക്കണമെന്ന് ആവശ്യപ്പെട്ട് ജോസ് കെ. മാണിയുടെ നേതൃത്വത്തില്‍ നഗരസഭാ ചെയര്‍മാന്‍ മുഖ്യമന്ത്രിക്കു നിവേദനം നല്‍കി. തുടര്‍ന്ന് ഏഴു കോടി രൂപ കൂടി സിന്തറ്റിക് ട്രാക്ക് നവീകരണത്തിനായി അനുവദിക്കുന്നതായി മുഖ്യമന്ത്രി പ്രഖ്യാപിക്കുകയും ചെയ്തു. ബജറ്റില്‍ സിന്തറ്റിക് ട്രാക്കിനായി പണം അനുവദിച്ചിരിക്കുന്നതുകൊണ്ട് പുതിയതായി അനുവദിച്ച തുക എങ്ങനെ വിനിയോഗിക്കണമെന്നു നിര്‍ദേശിക്കാന്‍ ജില്ലാ കളക്ടര്‍ മാണി സി. കാപ്പനോട് ആവശ്യപ്പെട്ടു. 6.75 കോടി രൂപ സ്റ്റേഡിയത്തില്‍ ഗാലറി പണിയാനും ബാക്കി 25 ലക്ഷം രാമപുരം പഞ്ചായത്തില്‍ ഒരു റോഡിനായും വിനിയോഗിക്കണമെന്നു മാണി സി. കാപ്പന്‍ ജില്ലാ കളക്ടര്‍ക്കു കത്തു നല്‍കി. തന്‍റെ നിര്‍ദേശമനുസരിച്ച് സിന്തറ്റിക് ട്രാക് നവീകരണത്തിനായി ബജറ്റില്‍ ഏഴു കോടി രൂപ അനുവദിച്ച സര്‍ക്കാരിനോടും തുടര്‍ന്ന് അനുവദിച്ച ഏഴു കോടി രൂപ ചെലവഴിക്കാന്‍ നിര്‍ദേശം സ്വീകരിച്ച മുഖ്യമന്ത്രിയോടും നന്ദിയുണ്ടെന്നും നാടിന്‍റെ വികസനത്തിനായി എല്ലാവരുമായി സഹകരിക്കാന്‍ തയാറാണെന്നും മാണി സി. കാപ്പന്‍ പറഞ്ഞു.

കൂടല്ലൂര്‍ സര്‍ക്കാര്‍ ആശുപത്രിയില്‍ ഇനിയെന്നും ശുദ്ധജലം ലഭ്യമാകും

കിടങ്ങൂര്‍: പാമ്പാടി ബ്ലോക്ക് പഞ്ചായത്തിന്‍റെ നിയന്ത്രണത്തിലുള്ള കൂടല്ലൂര്‍ സാമൂഹികാരോഗ്യകേന്ദ്രത്തിലെ ശുദ്ധജലക്ഷാമത്തിന് ശാശ്വത പരിഹാരമാകുന്നു. അൻപതു വര്‍ഷത്തോളം പഴക്കമുള്ള ആശുപത്രിയില്‍ ആവശ്യത്തിന് കുടിവെള്ളം എത്തിയിരുന്നത് ആശുപത്രിയില്‍നിന്നു കുറേ മാറി പാടശേഖരത്തോട് ചേര്‍ന്നുള്ള കിണറ്റില്‍ നിന്നായിരുന്നു. വര്‍ഷക്കാലങ്ങളില്‍ പാടശേഖരത്തില്‍ വെള്ളം നിറയുമ്പോള്‍ ചെളിവെള്ളം കിണറ്റിലേക്ക് ഇറങ്ങുകയും തത്ഫലമായി ്‍ ഈ കിണറ്റില്‍നിന്നു വെള്ളം ശേഖരിക്കുന്നതിന് സാധിക്കാത്ത അവസ്ഥയായിരുന്നു. സമീപത്തുള്ള കുടിവെള്ള പദ്ധതികളില്‍ നിന്നും വെള്ളം ശേഖരിച്ചാണ് വര്‍ഷക്കാലത്ത് ആശുപത്രിയില്‍ കുടിവെള്ളം എത്തിച്ചിരുന്നത്. ജില്ലാ പഞ്ചായത്തിന്‍റെ പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ അനുവദിച്ച 10 ലക്ഷം രൂപ ഉപയോഗിച്ച് ആശുപത്രി കോമ്പൗണ്ടില്‍ തന്നെ പുതിയ കിണര്‍ നിര്‍മാണം അവസാനഘട്ടത്തിലേക്ക് കടക്കുകയാണ്. രണ്ടാഴ്ചയ്ക്കുള്ളില്‍ കിണര്‍ നിര്‍മാണം പൂര്‍ത്തിയാകുന്നതോടെ കൂടല്ലൂര്‍ സാമൂഹ്യാരോഗ്യകേന്ദ്രത്തിലെ ശുദ്ധജല ക്ഷാമത്തിന് ശാശ്വതപരിഹാരം ആകുകയാണ്. കിണറിന്‍റെ നിര്‍മാണോദ്ഘാടനം ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ നിര്‍വഹിച്ചു. യോഗത്തില്‍ കിടങ്ങൂര്‍ പഞ്ചായത്ത് പ്രസിഡന്‍റ് അഡ്വ. ഇ.എം. ബിനു അധ്യക്ഷത വഹിച്ചു. ബ്ലോക്ക് പഞ്ചായത്ത് മെംബര്‍മാരായ ഡോ. മേഴ്സി ജോണ്‍, അശോക് കുമാര്‍ പുതമന, പഞ്ചായത്ത് വൈസ് പ്രസിഡന്‍റ് ടീന മാളിയേക്കല്‍, മെഡിക്കല്‍ ഓഫീസര്‍ ഡോ. സിജി വര്‍ഗീസ്, പ്രദീപ് വലിയപറമ്പില്‍, വര്‍ഗീസ് ഒഴുകയില്‍, പി.കെ. രാജു എന്നിവര്‍ പ്രസംഗിച്ചു.

ജലനിധി പദ്ധതിയുടെ കുഴിയിൽച്ചാടി കെഎസ്ആർടിസിക്ക് ട്രിപ്പ് മുടക്കം

പൂഞ്ഞാർ: ജലനിധി പദ്ധതിയുടെ ജലവിതരണക്കുഴലുകള്‍ സ്ഥാപിക്കാനായി എടുത്ത കുഴികളില്‍ ചാടിയുള്ള അപകടങ്ങള്‍ പതിവാകുന്നു. പൂഞ്ഞാര്‍ തെക്കേക്കര-കൈപ്പള്ളി റോഡിലെ കുഴിയിൽ കെഎസ്ആര്‍ടിസി ബസ് വീണതിനെത്തുടർന്ന് ട്രിപ്പ് മുടങ്ങി. ഇന്നലെ രാവിലെ 10.30ന് ഈരാറ്റുപേട്ട ഡിപ്പോയില്‍നിന്നു കൈപ്പള്ളിക്കു പോയ ബസാണ് വാഹനത്തിന് സൈഡ് കൊടുക്കുന്നതിനിടെ പയ്യാനിത്തോട്ടത്തിന് സമീപം കുഴിയിലേക്കു താഴ്ന്നത്. മുന്‍വശത്തെ ഇടത് ചക്രം പൂര്‍ണമായും കുഴിയിലേക്ക് ആഴ്ന്നുപോയി. വാഹനം മുന്നോട്ടോ പിന്നോട്ടോ അനക്കാനാവാതെ വന്നതോടെ ട്രിപ്പ് ഉപേക്ഷിക്കുകയായിരുന്നു. 11.30ഓടെ ഡിപ്പോയിലെ സര്‍വീസ് ബസ് എത്തിച്ച് ബസ് പിന്നിലേക്കു വലിച്ചുകയറ്റുകയായിരുന്നു. റോഡ് വശങ്ങളിലെ കുഴികള്‍ പൈപ്പിട്ട് മൂടി ഉറപ്പിക്കാതെ തുടരുന്നത് കൂടുതല്‍ പ്രതിസന്ധികള്‍ക്കിടയാക്കുകയാണ്. മഴ കനത്തതോടെ പലയിടത്തും പണികള്‍ നിര്‍ത്തിവച്ചു. ഇതോടെ റോഡിന് കുറുകെയും മറ്റും കുഴിച്ചത് അതേപടി തുടരുകയാണ്. കൈപ്പള്ളി റോഡില്‍ വര്‍ഷങ്ങളുടെ കാത്തിരിപ്പിനു ശേഷം ടാറിംഗ് നടത്തിയ റോഡിന്‍റെ വശങ്ങള്‍ കോണ്‍ക്രീറ്റിംഗ് നടത്തിയിരുന്നു. ഇത് പൂര്‍ണമായും തകര്‍ത്താണ് പൈപ്പ് ലൈന്‍ പണികള്‍ നടക്കുന്നത്.

കടനാട് സഹകരണബാങ്ക് സംരക്ഷണഫോറം സംവാദസദസ് 21ന്

കൊല്ലപ്പള്ളി: കടനാട് സഹകരണബാങ്ക് നേരിടുന്ന പ്രതിസന്ധിക്ക് പ്രശ്നപരിഹാരം തേടുന്നതിന് പഞ്ചായത്തിലെ പൊതുപ്രവര്‍ത്തകരെ ചേര്‍ത്ത് കടനാട് സഹകരണബാങ്ക് സംരക്ഷണഫോറം കൊല്ലപ്പള്ളി ജംഗ്ഷനില്‍ സംവാദസദസ് സംഘടിപ്പിക്കും. 21നു വൈകുന്നേരം നാലുമുതല്‍ 6.30 വരെയാണ് സദസ്. വിവിധ രാഷ്‌ട്രീയപാര്‍ട്ടി പ്രതിനിധികളും മത-സാമൂഹിക നേതാക്കളും നിക്ഷേപകരും ഓഹരി ഉടമകളും ബാങ്ക് സംരക്ഷണ കാര്യത്തില്‍ തങ്ങളുടെ അഭിപ്രായങ്ങള്‍ പങ്കുവയ്ക്കും. ഒരു വര്‍ഷത്തിലേറെയായി അഡ്മിനിസ്‌ട്രേറ്റര്‍ ഭരണത്തില്‍ തുടരുന്ന ബാങ്കിനെ കരകയറ്റുവാന്‍ നിലവിലുള്ള രണ്ടംഗ അഡ്മിനിസ്‌ട്രേറ്റർമാര്‍ക്ക് സാധ്യമാവുന്നില്ലെന്നും ജനകീയ അംഗീകാരമുള്ള ഒരു ഭരണസമിതിയും അവര്‍ക്ക് പൂര്‍ണ പിന്തുണ നല്‍കാന്‍ വിവിധ രാഷ്‌ട്രീയ പ്രസ്ഥാനങ്ങളും പൊതു പ്രവര്‍ത്തകരും കഴിഞ്ഞ 15 വര്‍ഷക്കാലത്തെ ബാങ്ക് ഭരണസമിതിയംഗങ്ങളും തയാറായാല്‍ ബാങ്കിനെ കരകയറ്റാന്‍ സാധിക്കുമെന്ന് ബാങ്ക് സംരക്ഷണഫോറം പറയുന്നു. പത്രസമ്മേളനത്തില്‍ ഭാരവാഹികളായ റോയി വെള്ളരിങ്ങാട്ട്, ഔസേപ്പച്ചന്‍ കണ്ടത്തിപറമ്പില്‍, ജോയി പാണ്ടിയാമാക്കല്‍, ജോര്‍ജ് തെക്കേല്‍, ജോയി ചന്ദ്രന്‍കുന്നേല്‍, പാലാ പൗരാവകാശ സമിതി പ്രസിഡന്‍റ് ജോയി കളരിക്കല്‍ എന്നിവര്‍ പങ്കെടുത്തു.

നിയുക്ത ബിഷപ് ഡോ. ജോസ് തെക്കുംചേരിക്കുന്നേലിന് തിടനാട്ട് സ്വീകരണം നൽകി

തിടനാട്: ജലന്ധർ രൂപതയുടെ നിയുക്ത ബിഷപ് ഡോ. ജോസ് സെബാസ്റ്റ്യൻ തെക്കുംചേരിക്കുന്നേലിനു തിടനാട് ഇടവക സ്വീകരണം നൽകി. ഇടവക സമൂഹത്തിനുവേണ്ടി വികാരി ഫാ. സെബാസ്റ്റ്യൻ എട്ടുപറയിൽ നിയുക്ത ബിഷപ്പിനെ സ്വീകരിച്ചു. തുടർന്നു നടന്ന ദിവ്യബലിയിൽ നിയുക്ത ബിഷപ് മുഖ്യ കാർമികനും ഫാ. ഡെന്നീസ് തെക്കുംചേരിക്കുന്നേൽ, ഫാ. ജോൺ വയലിൽ എന്നിവർ സഹകാർമികരുമായിരുന്നു. ആന്‍റോ ആന്‍റണി എംപി, സെബാസ്റ്റ്യൻ കുളത്തുങ്കൽ എംഎൽഎ, പഞ്ചായത്ത് പ്രസിഡന്‍റ് സ്കറിയാച്ചൻ പൊട്ടനാനി എന്നിവർ സ്വീകരണപരിപാടികളിൽ പങ്കെടുത്തു. നിയുക്ത ബിഷപ്പിന്‍റെ മാതാവ് സ്വീകരണ പരിപാടികളിലും ദിവ്യബലിയിലും ആദ്യാവസാനം പങ്കെടുത്തതു ശ്രദ്ധേയമായ അനുഭവമായി. സ്വീകരണ പരിപാടികൾക്ക് കൈക്കാരന്മാരായ ജയിംസ് കൊട്ടാരത്തിൽ, അപ്പച്ചൻ മണിയാക്കു പാറയിൽ, ചാക്കോച്ചൻ തയ്യിൽ, മാത്യൂസ് വാഴക്കാപ്പാറ എന്നിവർ നേതൃത്വം നൽകി.

സ്റ്റേറ്റ് ബാങ്കിന്‍റെ 70-ാം സ്ഥാപകദിനത്തിൽ എഴുപത് വിദ്യാർഥികൾ രക്തദാനം നടത്തി

കാഞ്ഞിരപ്പള്ളി: സ്റ്റേറ്റ് ബാങ്ക് ഓഫ് ഇന്ത്യയുടെ എഴുപതാം സ്ഥാപകദിനത്തോടനുബന്ധിച്ച് ചങ്ങനാശേരി റീജണൽ ബിസിനസ് ഓഫീസ് കാഞ്ഞിരപ്പള്ളി സെന്‍റ് ഡൊമിനിക്സ് കോളജ് എൻഎസ്എസ് യൂണിറ്റിന്‍റെയും പാലാ ബ്ലഡ് ഫോറത്തിന്‍റെയും സഹകരണത്തോടെ കാഞ്ഞിരപ്പള്ളി സെന്‍റ് ഡൊമിനിക് കോളജിൽ 70 വിദ്യാർഥികൾ സന്നദ്ധ രക്തദാനം നടത്തി. സ്റ്റേറ്റ് ബാങ്ക് ഓഫ് ഇന്ത്യയുടെ 70-ാം സ്ഥാപക ദിനത്തോടനുബന്ധിച്ച് ഇന്ത്യയൊട്ടാകെ 70,000 പേർ‌ രക്തദാനം നടത്തുന്നതിന്‍റെ ഭാഗമായാണ് കാഞ്ഞിരപ്പള്ളിയിൽ സന്നദ്ധ രക്തദാന ക്യാമ്പ് നടത്തിയത്. 70 പേരുടെ ആയിരം രക്തദാനക്യാമ്പിലൂടെ എഴുപതിനായിരം പേരുടെ രക്തം ശേഖരിച്ച് ബ്ലഡ് ബാങ്കുകൾക്ക് നൽകുക എന്നതാണ് ബാങ്കിന്‍റെ ലക്ഷ്യം. ലയൺസ് -എസ്എച്ച് മെഡിക്കൽ സെന്‍റർ ബ്ലഡ് ബാങ്കാണ് ക്യാമ്പ് നയിച്ചത്. സ്റ്റേറ്റ് ബാങ്ക് ഓഫ് ഇന്ത്യ റീജണൽ മാനേജർ പി. അനിത ക്യാമ്പ് ഉദ്ഘാടനം ചെയ്തു. പ്രിൻസിപ്പൽ ഡോ. സീമോൻ തോമസ് അധ്യക്ഷത വഹിച്ചു. കാഞ്ഞിരപ്പള്ളി ജനറൽ ആശുപത്രി മെഡിക്കൽ ഓഫീസർ ഡോ. ഗ്രാസന്നാ ജോയി മുഖ്യപ്രഭാഷണവും പാലാ ബ്ലഡ് ഫോറം ജനറൽ കൺവിനർ ഷിബു തെക്കേമറ്റം രക്തദാന സന്ദേശവും നൽകി. കോളജ് ബർസാർ റവ.ഡോ. മനോജ് പാലക്കുടി, എസ്ബിഐ കാഞ്ഞിരപ്പള്ളി ബ്രാഞ്ച് മാനേജർ യദു കെ. മാണി, എൻഎസ്എസ് പ്രോഗ്രാം ഓഫീസർ ഡോ. ജിനു എലിസബത്ത് സെബാസ്റ്റ്യൻ, വോളണ്ടിയർ സെക്രട്ടറി ആൽബിൻ തോമസ് എന്നിവർ പ്രസംഗിച്ചു. എസ്ബിഐ റീജണൽ ഓഫീസർ ടി.എൻ. ജയകൃഷ്ണൻ, കാഞ്ഞിരപ്പള്ളി ബ്രാഞ്ച് മാനേജർ ഗയിൻ ടി. ജോയി, ഡോ. ജോജി മാത്യു, സിസ്റ്റർ അനിലിറ്റ് എസ്എച്ച്, വോളണ്ടിയർ സെക്രട്ടറി ദിയ തെരേസ ജോഷി എന്നിവർ ക്യാമ്പിന് നേതൃത്വം നൽകി.

ആഗോളവത്‌കൃത സമൂഹത്തിന്‍റെ അംഗമാകാന്‍ സ്വയം സജ്ജരാകണം: കർദിനാൾ മാര്‍ ജോര്‍ജ്‌ ആലഞ്ചേരി

കാഞ്ഞിരപ്പള്ളി: ആഗോളവത്‌കൃത സമൂഹത്തിന്‍റെ അംഗമായി അതിന്‍റെ വെല്ലുവിളികളെ അഭിമുഖീകരിക്കാന്‍ വിദ്യാർഥികള്‍ സ്വയം സജ്ജരാകണമെന്ന്‌ കർദിനാൾ മാര്‍ ജോര്‍ജ്‌ ആലഞ്ചേരി. ആനക്കല്ല് സെന്‍റ് ആന്‍റണീസ്‌ പബ്ലിക്‌ സ്‌കൂളിലെ സാപ്‌സ്‌ എക്‌സലന്‍സിയ അവാര്‍ഡ്‌ ഡേ ഉദ്‌ഘാടനം ചെയ്‌ത്‌ പ്രസംഗിക്കുകയായിരുന്നു കർദിനാൾ. ഓരോരുത്തരും അവനവന്‍റെ കഴിവുകളും നൈപുണ്യങ്ങളും തിരിച്ചറിഞ്ഞ്‌ പഠന, തൊഴില്‍ മേഖലകള്‍ തെരഞ്ഞെടുക്കണമെന്നും പ്രകൃതിസ്‌നേഹമുള്ള ഒരു തലമുറയായി വളര്‍ന്നുവരണമെന്നും പരസ്‌പരം പിന്തുണച്ചുകൊണ്ട്‌ സമൂഹത്തിന്‍റെ ആവശ്യങ്ങള്‍ കണ്ടറിഞ്ഞ്‌ നമ്മുടെ ജീവിത മേഖലകളില്‍ വ്യാപരിക്കണമെന്നും മാര്‍ ജോര്‍ജ്‌ ആലഞ്ചേരി കൂട്ടിച്ചേര്‍ത്തു. മാനേജര്‍ ഫാ. ജോസഫ്‌ പൊങ്ങന്താനത്ത്‌ അധ്യക്ഷത വഹിച്ചു. പ്രിന്‍സിപ്പല്‍ ഫാ. ആന്‍റണി തോക്കനാട്ട്‌, പിടിഎ വൈസ്‌ പ്രസിഡന്‍റ് ശോഭ വര്‍ക്കി, അലുമ്നി അസോസിയേഷന്‍ പ്രസിഡന്‍റ് ഡോ. ജൂബിലന്‍റ് കിഴക്കേത്തോട്ടം, സ്റ്റാഫ്‌ സെക്രട്ടറി തനുജ മാത്യു, വിദ്യാർഥി പ്രതിനിധികളായ നകുല്‍ സി. അനില്‍, അസ്‌റ ഫാത്തിമ, നയന കൃഷ്‌ണകുമാര്‍, കെവിന്‍ ഷിജോ എന്നിവര്‍ പ്രസംഗിച്ചു. സിബിഎസ്‌ഇ 10, 12 പരീക്ഷകളില്‍ ഉന്നത വിജയം നേടിയ വിദ്യാർഥികള്‍ക്ക്‌ കാഷ്‌ അവാര്‍ഡും മെമന്‍റോയും നല്‍കി.

മത്സ്യബന്ധന നിരോധനം: മത്സ്യവില കുതിച്ചുയരുന്നു

കാഞ്ഞിരപ്പള്ളി: മത്സ്യബന്ധന നിരോധനം നിലവിൽ വന്നതോടെ മത്സ്യവില കുതിച്ചുയരുന്നു. 200 രൂപയിൽ താഴെയുണ്ടായിരുന്ന അയലയുടെ വില 400 കടന്നു. മത്സ്യലഭ്യത കുറഞ്ഞതോടെയാണ് വിലയും കുതിച്ചുയരാൻ തുടങ്ങിയത്. 420 രൂപയാണ് ഇന്നലത്തെ അയലയുടെ വില. മഞ്ഞ വറ്റയുടെ വില 500 രൂപയിലെത്തി. ചെമ്മീനിന്‍റെയും കല്ലൻ വറ്റയുടെയും വില നാനൂറിന് മുകളിലാണ്. മീനിൽ കെട എന്നറിയപ്പെടുന്ന മങ്കടയുടെ വില 300 രൂപയാണ്. വിളക്കുട്ടിക്കു മാത്രമാണ് അല്പമെങ്കിലും വിലക്കുറവുണ്ടായിരുന്നത്, 220 രൂപ. കേര, തള തുടങ്ങിയ വലിയ മത്സ്യങ്ങളൊന്നും പ്രാദേശികമായി വിപണിയിൽ ലഭിക്കുന്നില്ല. കടൽമത്സ്യങ്ങൾക്ക് വില ഉയർന്നതോടെ വളർത്തുമത്സ്യങ്ങൾക്കാണ് ഇപ്പോൾ ഡിമാന്‍റ്. വാള, പിരാന, സിലോപ്പിയ തുടങ്ങിയ വളർത്തു മത്സ്യങ്ങൾക്കെല്ലാം ആവശ്യക്കാരേറി. മുന്പുണ്ടായിരുന്നതിലും വില വർധന ഇവയ്ക്കും ഉണ്ടായിട്ടുണ്ട്. തമിഴ്നാട്ടിൽനിന്നു നേരത്തേ തന്നെ മത്സ്യങ്ങളുടെ വരവ് നിലച്ചിരുന്നു. ഇതിനു പുറമേയാണ് സംസ്ഥാനത്ത് ട്രോളിംഗ് കൂടി എത്തിയത്. ഇതോടെ മത്സ്യലഭ്യത കുറഞ്ഞു. കടൽക്ഷോഭം മൂലം വള്ളക്കാരും കടലിൽ പോകാതായതോടെ മത്സ്യവരവു തന്നെ പേരിന് മാത്രമായി. ഉള്ളവയ്ക്കാകട്ടെ തീ പിടിച്ച വിലയും. മത്സ്യലഭ്യത കുറഞ്ഞതോടെ ചെറുകിട കച്ചവടക്കാരെല്ലാം ഈ മേഖലയിൽനിന്നു പിൻവലിഞ്ഞു. ചെറുകടകളെല്ലാം അടഞ്ഞുകിടക്കുകയാണ്. വീടുകൾ തോറും മത്സ്യമെത്തിച്ചിരുന്നവരും താത്കാലികമായി വില്പന നിർത്തിവച്ചിരിക്കുകയാണ്.

റോഡിൽ വാഴ നട്ട് പ്രതിഷേധിച്ചു

എരുമേലി: പാക്കാനം-കാരിശേരി റോഡിന്‍റെ ശോചനീയാവസ്ഥ പരിഹരിക്കണമെന്ന് ആവശ്യപ്പെട്ട് കോൺഗ്രസ് പ്രവർത്തകർ റോഡിലെ കുഴിയിൽ വാഴ നട്ട് പ്രതിഷേധിച്ചു. തുടർന്ന് പാക്കാനം ടൗണിൽ പ്രതിഷേധ ധർണ സംഘടിപ്പിച്ചു. ഡിസിസി ജനറൽ സെക്രട്ടറി പ്രകാശ് പുളിക്കൻ ധർണ ഉദ്ഘാടനം ചെയ്തു. മുൻ വാർഡ് അംഗം ജോമോൻ വാഴപ്പനാടി അധ്യക്ഷത വഹിച്ചു. വാർഡ് പ്രസിഡന്‍റ് സി.പി. രാജപ്പൻ, ജോയ് പാലമുറി, പി.കെ. വിശ്വംഭരൻ, ഭാസ്കരൻ, തങ്കച്ചൻ വെട്ടിക്കൽ, ആന്‍റണി ചോലപാടം എന്നിവർ പ്രസംഗിച്ചു.

അഭയകേന്ദ്രങ്ങൾക്കു കൈത്താങ്ങായി കൂവപ്പള്ളി സെന്‍റ് ജോസഫ്സ് പള്ളി കൂട്ടായ്മ

കാഞ്ഞിരപ്പള്ളി: അഭയകേന്ദ്രങ്ങൾക്കു കൈത്താങ്ങായി കൂവപ്പള്ളി സെന്‍റ് ജോസഫ്സ് പള്ളി കൂട്ടായ്മ. സുമനസുകളുടെ സഹായത്തോടെ തുടര്‍ച്ചയായി അഞ്ചു വര്‍ഷമായി സൗജന്യ ഭക്ഷണം നല്‍കുകയാണ് ഈ കൂട്ടായ്മ. നിലവില്‍ മൂന്ന് അഭയകേന്ദ്രങ്ങളിലാണ് ഭക്ഷണമെത്തിച്ച് നല്‍കുന്നത്. കൂവപ്പള്ളി സെന്‍റ് ജോസഫ്സ് പള്ളി വികാരിയായിരുന്ന ഫാ. ഇമ്മാനുവല്‍ മടുക്കക്കുഴിയാണ് അഞ്ച് വര്‍ഷം മുന്പ് കാഞ്ഞിരപ്പള്ളി ബത്‌ലേഹം ആശ്രമത്തിലേക്ക് പൊതിച്ചോര്‍ നല്‍കി പദ്ധതിക്കു തുടക്കം കുറിച്ചത്. എല്ലാ വെള്ളിയാഴ്ചയും പലവീടുകളില്‍നിന്ന് പൊതിച്ചോര്‍ ശേഖരിച്ചാണ് അഭയകേന്ദ്രങ്ങൾക്ക് നല്‍കിയത്. കോവിഡ് നിയന്ത്രണങ്ങളുണ്ടായതോടെ ഭക്ഷണവിതരണത്തില്‍ തടസമുണ്ടായി. വീടുകളില്‍ പൊതിച്ചോര്‍ ശേഖരിക്കുന്നതിന് പല പ്രതിസന്ധികളുണ്ടായതോടെ ടോമി പന്തലാനിക്കലിന്‍റെ നേതൃത്വത്തില്‍ ഭക്ഷണവിതരണം ഏറ്റെടുക്കുകയായിരുന്നു. വീട്ടില്‍ സ്വന്തമായി അടുക്കള നിര്‍മിച്ച് ഭക്ഷണം തയാറാക്കാന്‍ തുടങ്ങി. പള്ളിയില്‍നിന്നുള്ള സഹായവും സുമനസുകളുടെ സഹായവും ലഭിച്ചു. അഞ്ചിലിപ്പ അഭയഭവന്‍, നല്ലയിടന്‍ ആശ്രമം, കപ്പാട് ദേവമാത സെന്‍റര്‍ എന്നിവിടങ്ങളില്‍ ഭക്ഷണം നല്‍കുന്നുണ്ട്. കൊരട്ടിയിലെ ആശ്രമത്തിലേക്ക് അടുത്ത ദിവസം മുതല്‍ ഭക്ഷണം നല്‍കും. വികാരി ഫാ. മാത്യു പുതുമന, അസി. വികാരി ഫാ. ജോസഫ് ഇടിയാകുന്നേല്‍ സിഎംഐ, പഞ്ചായത്തംഗങ്ങളായ ബിജോജി തോമസ്, ആന്‍റണി ജോസഫ്, ഏലിയാമ്മ ജോസഫ് എന്നിവരാണ് നിലവില്‍ ഭക്ഷണവിതരണത്തിന് നേതൃത്വം നല്‍കുന്നത്. കൂവപ്പള്ളി പൗരസമിതിയും പദ്ധതിക്ക് സഹായവുമായി ഒപ്പമുണ്ട്. പദ്ധതിയുടെ അഞ്ചാം വാര്‍ഷികത്തോടനുബന്ധിച്ച് നടത്തിയ യോഗത്തില്‍ കഴിഞ്ഞ അഞ്ച് വര്‍ഷത്തെ വരവുചെലവ് കണക്കുകള്‍ അവതരിപ്പിച്ചു. 20 ലക്ഷം രൂപ ചെലവായതില്‍ 13 ലക്ഷത്തോളം രൂപ സുമനസുകളുടെ സഹായത്തോടെ ലഭിച്ചു. യോഗത്തില്‍ ഫാ. മാത്യു പുതുമന അധ്യക്ഷത വഹിച്ചു. ടോമി ജോസഫ് പന്തലാനിക്കല്‍, പഞ്ചായത്തംഗങ്ങളായ ബിജോജി തോമസ്, ആന്‍റണി ജോസഫ്, ഏലിയാമ്മ ജോസഫ് എന്നിവര്‍ പ്രസംഗിച്ചു.

വിജയദിനാഘോഷം

പെരുവന്താനം: സെന്‍റ് ജോസഫ്സ് ഹയർ സെക്കൻഡറി സ്കൂളിൽ പ്രതിഭാസംഗമം നടത്തി. കാഞ്ഞിരപ്പള്ളി രൂപത വികാരി ജനറാൾ ഫാ. സെബാസ്റ്റ്യൻ കൊല്ലംകുന്നേൽ ഉദ്ഘാടനം ചെയ്തു. സ്കൂൾ മാനേജർ ഫാ. സോബിൻ താഴത്തുവീട്ടിൽ അധ്യക്ഷത വഹിച്ചു. പ്രിൻസിപ്പൽ മിനി ഏബ്രഹാം, ഹെഡ്മാസ്റ്റർ സിസ്റ്റർ ലിബിയ എഫ്സിസി, വാർഡ് മെംബർ ഗ്രേസി ജോസ്, പിടിഎ പ്രസിഡന്‍റ് സാജു പവ്വത്ത്, ജിൽസ് പി. ജോസ്, പൗർണമി ബാബു എന്നിവർ പ്രസംഗിച്ചു. സംഗമത്തിൽ അഖിലേന്ത്യാ നീറ്റ് പരീക്ഷയിൽ സംസ്ഥാനതലത്തിൽ അഞ്ചാം റാങ്ക് നേടിയ സ്കൂളിലെ പൂർവവിദ്യാർഥി ചെൽസി എസ്. തെരേസിനെയും പ്ലസ് ടു പരീക്ഷയിൽ എല്ലാ വിഷയങ്ങൾക്കും എ പ്ലസ് നേടിയ കുട്ടികളെയും അനുമോദിച്ചു. കാഞ്ഞിരപ്പള്ളി: എകെജെഎം സ്കൂളിൽ കഴിഞ്ഞ അധ്യയന വർഷം എസ്എസ്എൽസി, പ്ലസ് ടു പരീക്ഷകളിൽ ഫുൾ എ പ്ലസ് നേടിയ വിദ്യാർഥികളെ ആദരിച്ചു. സിവിൽ സർവീസ് റാങ്ക് ജേതാവ് സോനറ്റ് ജോസ് ഉദ്ഘാടനം ചെയ്തു. പ്രിൻസിപ്പൽ ഫാ. അഗസ്റ്റിൻ പീടികമല എസ്ജെ അധ്യക്ഷത വഹിച്ചു. സ്കൂൾ ചെയർമാൻ അബ്രാറുള്ള താജുദീൻ, ഹയർ സെക്കൻഡറി കോ-ഓർഡിനേറ്റർ സഞ്ജു ജോൺ എന്നിവർ പ്രസംഗിച്ചു. എരുമേലി: സെന്‍റ് തോമസ് ഹയർ സെക്കൻഡറി സ്കൂളിലെ മെറിറ്റ് ഡേ സിവിൽ സർവീസ് റാങ്ക് ജേതാവ് സോനറ്റ് ജോസ് ഉദ്ഘാടനം ചെയ്തു. സ്കൂൾ മാനേജർ ഫാ. വർഗീസ് പുതുപ്പറമ്പിൽ അധ്യക്ഷത വഹിച്ചു. ഡോ. ഡൊമിനിക് സാവിയോ, രേഖ മാത്യൂസ്, സോയൂസ് പി. തോമസ്, പ്രിൻസിപ്പൽ റോയി സ്കറിയ, ജിജി ഏബ്രഹാം എന്നിവർ പ്രസംഗിച്ചു.

കാർ ഇടിച്ച് തകർന്ന ട്രാഫിക് സിഗ്നൽതൂൺ കാൽനടയാത്രയ്ക്ക് തടസമാകുന്നു

കാഞ്ഞിരപ്പള്ളി: കാഞ്ഞിരപ്പള്ളിയിൽ കഴിഞ്ഞ ദിവസം കാർ ഇടിച്ചുതകർന്ന ട്രാഫിക് സിഗ്‌നൽ തൂൺ ദിവസങ്ങൾ കഴിഞ്ഞിട്ടും എടുത്തു മാറ്റിയില്ല. ദേശീയപാത 183ൽ പേട്ടക്കവലയിലെ നടപ്പാതയിലാണ് കാൽ നടയാത്രയ്ക്ക് തടസമായി തൂൺ‌ കിടക്കുന്നത്. കോട്ടയം ഭാഗത്തേക്കു പോകാനായി യാത്രക്കാർ ബസ് കാത്തുനിൽക്കുന്ന സ്ഥലത്താണ് തൂൺ ദിവസങ്ങളായി ഒടിഞ്ഞ് കിടക്കുന്നത്. ഫുട്പാത്തിൽ കിടക്കുന്ന തൂൺ കാൽനടയാത്രക്കാർക്ക് മാർഗതടസം സൃഷ്ടിക്കുന്ന സ്ഥിതിയാണ് നിലവിൽ. കൂടാതെ ബസുകളിലേക്കു കയറാനും ഇറങ്ങാനും ഇത് ബുദ്ധിമുട്ട് സൃഷ്ടിക്കുന്നുണ്ട്. വ്യാപാര സ്ഥാപനങ്ങൾക്ക് മുന്പിലാണ് തൂൺ ഇട്ടിരിക്കുന്നത്. അതുകൊണ്ട് ഇവിടെയെത്തുന്ന ഉപഭോക്താക്കൾക്കും ഒടിഞ്ഞുകിടക്കുന്ന തൂൺ മാർഗതടസമാവുകയാണ്. ഫുട്പാത്തിലൂടെ സഞ്ചരിക്കുന്നവർ തൂണിൽ തട്ടി താഴെ വീഴുന്ന സ്ഥിതിയുമുണ്ട്. തിങ്കളാഴ്ച ഇതുവഴിയെത്തിയ വയോധികൻ തൂണിന്‍റെ കമ്പിയിൽ കാൽ തട്ടി വീണിരുന്നു. ദേശീയപാതയിലെ സീബ്രാക്രോസിന് സമീപത്താണ് തൂണ് ഒടിഞ്ഞു കിടക്കുന്നത്. സ്‌കൂൾ സമയത്ത് വിദ്യാർഥികളടക്കം ബസ് കാത്തുനിൽക്കുകയും സഞ്ചരിക്കുകയും ചെയ്യുന്ന സ്ഥലം കൂടിയാണ് ഇവിടം. ഒടിഞ്ഞ തുണിന്‍റെ ബാക്കിയുള്ള ഭാഗവും അപകടം സൃഷ്ടിക്കുന്ന രീതിയിലാണ് നിൽക്കുന്നത്. ഇതും നീക്കം ചെയ്യേണ്ടതുണ്ട്. കഴിഞ്ഞ വെള്ളിയാഴ്ചയാണ് മുണ്ടക്കയം ഭാഗത്തുനിന്നെത്തിയ കാർ ഇടിച്ചുകയറി ട്രാഫിക് സിഗ്നൽ സംവിധാനത്തിന്‍റെ തൂണ് തകർത്തത്. വാഹനം ഇടിച്ചതിനെത്തുടർന്ന് സമീപത്തെ കടകൾക്കും നാശനഷ്ടമുണ്ടായിരുന്നു.

ലഹരിവിരുദ്ധ ബോധവത്കരണം

തെങ്ങണ: ഗുഡ് ഷെപ്പേ‍ഡ് പബ്ലിക് സ്‌കൂളും വിവേകാനന്ദ റെസിഡന്‍റ്സ് വെല്‍ഫെയര്‍ അസോസിയേഷനും കോട്ടയം ജില്ലാ റെസിഡന്‍റ്സ് അപ്പെക്‌സ് കൗണ്‍സിലിന്‍റെയും എക്‌സൈസ് ഡിപ്പാര്‍ട്ട്‌മെന്‍റിന്‍റെയും സഹകരണത്തോടെ വിദ്യാര്‍ഥികള്‍ക്കും മാതാപിതാക്കള്‍ക്കുമായി സ്‌കൂള്‍ ഓഡിറ്റോറിയത്തില്‍ ലഹരിവിരുദ്ധ ബോധവത്കരണ ക്ലാസ് നടത്തി. അസോസിയേഷന്‍ പ്രസിഡന്‍റ് ഗോപാലകൃഷ്ണ പിള്ള അധ്യക്ഷത വഹിച്ചു സ്‌കൂള്‍ പ്രിന്‍സിപ്പല്‍ ഡോ. സുനിതാ സതീഷ് ഉദ്ഘാടനം ചെയ്തു. വൈസ് പ്രിന്‍സിപ്പല്‍ സോണി ജോസ്, സിവില്‍ എക്‌സൈസ് ഡിവിഷന്‍ ഓഫീസര്‍ രാജേഷ്, ജില്ലാ റെസിഡന്‍റ്സ് അപ്പെക്‌സ് കൗണ്‍സില്‍ സെക്രട്ടറി വി. കൃഷ്ണമൂര്‍ത്തി, സ്‌കൂള്‍ പിആര്‍ഒ സിജോ ഫ്രാന്‍സിസ്, കെ.സി. ജയദ്രഥന്‍ എന്നിവര്‍ പ്രസംഗിച്ചു. എറണാകുളം അസിസ്റ്റന്‍റ് എക്‌സൈസ് ഇന്‍സ്‌പെക്ടര്‍ വി. ജയരാജ് ലഹരിക്കെതിരേ ബോധവത്കരണ ഓട്ടന്‍തുള്ളല്‍ അവതരിപ്പിച്ചു.

സെന്‍റ് തെരേസാസില്‍ പ്രതിഭകളെ ആദരിച്ചു

ചങ്ങനാശേരി: വാഴപ്പള്ളി സെന്‍റ് തെരേസാസ് ഹയര്‍ സെക്കന്‍ഡറി സ്‌കൂളില്‍ പ്ലസ്ടു പരീക്ഷയില്‍ മികച്ചവിജയം നേടിയ വിദ്യാര്‍ഥികളെ അഭിനന്ദിച്ചു. എമിനന്‍സ് -2025 എന്ന പേരില്‍ നടന്ന അനുമോദന യോഗത്തില്‍ എസ്എബിഎസ് വികാര്‍ പ്രൊവിന്‍ഷ്യല്‍ സിസ്റ്റര്‍ ടിസ പടിഞ്ഞാറേക്കര അധ്യക്ഷത വഹിച്ചു. എന്‍സിസി 5 കേരള ഗേള്‍സ് ബറ്റാലിയന്‍ കമാന്‍ഡിംഗ് ഓഫീസര്‍ കേണല്‍ ബി. ശ്രീകുമാര്‍ പിള്ള ഉദ്ഘാടനം ചെയ്തു. പ്രിന്‍സിപ്പല്‍ ഷിജി വര്‍ഗീസ്, അധ്യാപകരായ ഷിബു ജോസഫ്, സിസ്റ്റര്‍ റോസ്ബല്ല, ആശ ആന്‍റണി, വിദ്യാര്‍ഥി പ്രതിനിധി ട്രീസാ ജയിംസ് എന്നിവര്‍ പ്രസംഗിച്ചു.

യേൽ സർവകലാശാലയിൽ പ്രബന്ധമവതരിപ്പിച്ച് നെടുംകുന്നം സ്വദേശി

നെടുംകുന്നം: ഹൈദരാബാദ് കേന്ദ്ര സർവകലാശാലയിലെ പിഎച്ച്ഡി ഗവേഷകൻ നെടുംകുന്നം സ്വദേ ശി അമൽ ജോസ് ഫിലിപ്പ് തെങ്ങുംമൂട്ടിൽ യേൽ സർവകലാശാല സൗത്ത് ഏഷ്യൻ സ്റ്റഡീസ് കൗൺസിൽ സംഘടിപ്പിച്ച മോഡേൺ സൗത്ത് ഏഷ്യ വർക്ക് ഷോപ്പിൽ പ്രബന്ധമവതരിപ്പിച്ചു. കൊളോണിയൽ കാലഘട്ടത്തിൽ തിരുവിതാംകൂറിലെ ഭരണകൂട വ്യവസ്ഥയിൽ ഉണ്ടായ മാറ്റങ്ങളും സാമൂഹ്യ മുന്നേറ്റങ്ങളും വിദ്യാഭ്യാസ-ആരോഗ്യ മേഖലയിലെ നിക്ഷേപങ്ങളും തമ്മിലുള്ള കാരക ബന്ധങ്ങളെപ്പറ്റിയാണ് അമൽ പ്രബന്ധം അവതരിപ്പിച്ചത്

""അയ്യൻകാളിയുടെ ആശയങ്ങൾ സിലബസിൽ ഉൾപ്പെടുത്തണം’’

കുറിച്ചി: കേരളത്തിന്‍റെ നവോത്ഥാന നായകരിൽ പ്രധാനിയായ അയ്യൻകാളിയുടെ ആശയങ്ങൾ സിലബസിൽ ഉൾപ്പെടുത്താൻ സർക്കാർ തയാറാകണമെന്ന് കേരള കോൺഗ്രസ്‌ ഉന്നതാധികാര സമിതിയംഗം വി.ജെ. ലാലി. അയ്യൻകാളിയുടെ ആശയങ്ങൾ ഇപ്പോഴും പ്രസക്തമാണെന്നും അദ്ദേഹം പറഞ്ഞു. വിവിധ സാംസ്‌കാരിക സംഘടനകളുടെ നേതൃത്വത്തിൽ കുറിച്ചി മന്ദിരം കവലയിൽ നടന്ന അയ്യൻകാളി ചരമദിനാചാരണ പരിപാടികൾ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. യോഗത്തിൽ അംബേദ്കർ സ്മാരക സമിതി പ്രസിഡന്‍റ് പി.പി. മോഹനൻ അധ്യക്ഷത വഹിച്ചു. ബാബു കോയിപ്പുറം, അരുൺ ബാബു, ആർ. രാജഗോപാൽ, ജിക്കു കുര്യാക്കോസ്, അനീഷ് വരമ്പിനകം തുടങ്ങിയവർ പ്രസംഗിച്ചു.

ജൈവഭക്ഷണം, സുരക്ഷിത ഭക്ഷണം : ജൈവ കാര്‍ഷിക മേളയുമായി മാടപ്പള്ളി ബ്ലോക്ക് പഞ്ചായത്ത്

മാടപ്പള്ളി: കേന്ദ്ര-സംസ്ഥാന സര്‍ക്കാരുകളുടെ സഹായത്തോടെ കൃഷിവകുപ്പ് നടപ്പിലാക്കുന്ന സുഭിക്ഷം സുരക്ഷിതം ഭാരതീയ പ്രകൃതികൃഷി പദ്ധതിയുടെ ഭാഗമായി മാടപ്പള്ളി ബ്ലോക്കിലെ വിവിധ പഞ്ചായത്തുകളിലെ ജൈവകര്‍ഷകര്‍ ഉത്പാദിപ്പിച്ച ഉത്പന്നങ്ങള്‍, മൂല്യവര്‍ധിത ഉത്പന്നങ്ങള്‍, ജൈവകാര്‍ഷിക ഉപാധികള്‍ എന്നിവയുടെ പ്രദര്‍ശനവും വിപണനവും നാളെയും 20നും മാടപ്പള്ളി ബ്ലോക്ക് പഞ്ചായത്ത് അങ്കണത്തില്‍ നടക്കും. നാളെ രാവിലെ 10ന് നടത്തുന്ന സമ്മേളനത്തില്‍ ജൈവം-2025ന്‍റെ ഉദ്ഘാടനം ജോബ് മൈക്കിള്‍ എംഎല്‍എ നിര്‍വഹിക്കും. മാടപ്പള്ളി ബ്ലോക്ക് പഞ്ചായത്ത് പ്രസിഡന്‍റ് എന്‍. രാജു അധ്യക്ഷത വഹിക്കും. ബ്ലോക്ക് പഞ്ചായത്ത് വാര്‍ഷികപദ്ധതിയില്‍ ജൈവ പച്ചിലവര്‍ഗ കൃഷിക്ക് ഉള്‍പ്പെടുത്തിയിട്ടുള്ള "ആരോഗ്യപ്പച്ച'യുടെ ഉദ്ഘാടനം 20ന് ഉച്ചയ്ക്കു 12.30ന് ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ നിര്‍വഹിക്കും. ആത്മ കോട്ടയത്തിന്‍റെ ആഭിമുഖ്യത്തില്‍ കര്‍ഷക-ശാസ്ത്രജ്ഞ മുഖാമുഖം, നാടന്‍ ഭക്ഷ്യവിഭവങ്ങളുടെ സ്റ്റാളുകള്‍, സ്‌കൂള്‍ വിദ്യാര്‍ഥികള്‍ക്ക് കാര്‍ഷിക ക്വിസ് മത്സരം എന്നിവയും ഇതോടൊപ്പം നടക്കും. മികച്ച ജൈവകര്‍ഷകരെ ചടങ്ങില്‍ ആദരിക്കും. ചങ്ങനാശേരി നഗരസഭാധ്യക്ഷ കൃഷ്ണകുമാരി രാജശേഖരന്‍, പഞ്ചായത്ത് അധ്യക്ഷരായ മണിയമ്മ രാജപ്പന്‍, മോളി ജോസഫ്, ഗീതാ രാധാകൃഷ്ണന്‍, മിനി വിജയകുമാര്‍, കെ.ഡി. മോഹനന്‍, ബ്ലോക്ക് പഞ്ചായത്ത് വൈസ് പ്രസിഡന്‍റ് സുനിത സുരേഷ്, ജില്ലാ പഞ്ചായത്തംഗങ്ങളായ മഞ്ജു സുജിത്ത്, സുധാ കുര്യന്‍, നിബു ജോണ്‍, ബ്ലോക്ക് പഞ്ചായത്തംഗങ്ങൾ തുടങ്ങിയവർ പ്രസംഗിക്കും.

"ഗുണമേന്മയുള്ള നെല്‍വിത്തുകള്‍ ലഭ്യമാക്കണം'

ചങ്ങനാശേരി: വര്‍ഷകാല കൃഷിക്കായി നാഷണല്‍ സീഡ്‌സ് കോർപറേഷന്‍റെ മേല്‍ത്തരം വിത്തുകള്‍ ഉടന്‍ വിതരണം ചെയ്യാന്‍ കൃഷിവകുപ്പ് തയാറാകണമെന്നും കൃഷിനാശം നേരിട്ട കര്‍ഷകര്‍ക്ക് അടിയന്തര സഹായം നല്‍കണമെന്നും കര്‍ഷക കോണ്‍ഗ്രസ് ചങ്ങനാശേരി നിയോജകമണ്ഡലം പ്രവര്‍ത്തകയോഗം ആവശ്യപ്പെട്ടു. പ്രസിഡന്‍റ് പാപ്പച്ചന്‍ നേര്യംപറന്പിലിന്‍റെ അധ്യക്ഷതയില്‍ ജില്ലാ പ്രസിഡന്‍റ് തോമസുകുട്ടി മണക്കുന്നേല്‍ ഉദ്ഘാടനം ചെയ്തു. പരിസ്ഥിതി വാരാഘോഷത്തിന്‍റെ സമാപനത്തോടനുബന്ധിച്ച് ജില്ലാ പ്രസിഡന്‍റ് വൃക്ഷത്തൈ നട്ടു. ബേബിച്ചന്‍ പുത്തന്‍പറമ്പില്‍, ഭാരവാഹികളായ കെ.പി. മാത്യു, ജോണ്‍സണ്‍ കൊച്ചുതറ, രാജു കരിങ്ങണാമറ്റം, തോമസ് കല്ലുകുളം, ബേബിച്ചന്‍ തടത്തില്‍, ലൂയിസ് മാവേലിത്തുരുത്ത് എന്നിവര്‍ പ്രസംഗിച്ചു.

കുറുമ്പനാടം മുക്കാട്ടുകുന്ന്-പാലച്ചുവട് റോഡിന്‍റെ ശോച്യാവസ്ഥ: ജനകീയസമിതി റോഡ് ഉപരോധിച്ചു

കുറുമ്പനാടം: മുക്കാട്ടുകുന്ന്-പാലച്ചുവട് റോഡിന്‍റെ ശോച്യാവസ്ഥയ്ക്കെതിരേ നാട്ടുകാര്‍ ജനകീയ സമിതി രൂപീകരിച്ച് റോഡ് ഉപരോധിച്ചു. വര്‍ഷങ്ങളായി തകര്‍ന്നുകിടക്കുന്ന ഈ റോഡിലൂടെയുള്ള വാഹനസഞ്ചാരവും കാല്‍നടപ്പും ഏറെ ദുരിതപൂര്‍ണമാണ്. മാടപ്പള്ളി പഞ്ചായത്ത് ഒന്നാം വാര്‍ഡിലൂടെ കടന്ന് വാകത്താനം പഞ്ചായത്തിലെ പാലച്ചുവട് ജംഗ്ഷനിലെത്തുന്ന റോഡിന് 1.750 കിലോമീറ്റര്‍ ദൂരമാണുള്ളത്. ഈ റോഡിന്‍റെ അരികിലുള്ള തോടിന്‍റെ വശത്തുള്ള കല്‍ക്കെട്ട് പലഭാഗത്തും ഇടിഞ്ഞ നിലയിലാണ്. പി.സി. സാജുമോന്‍ ഉദ്ഘാടനം ചെയ്തു. തോമസ് തൂമ്പുങ്കല്‍, സണ്ണിച്ചന്‍ മുതിരക്കളം, സോണി കടന്തോട്, ജോര്‍ജുകുട്ടി കിഴക്കേവീട്ടില്‍, ജോമോന്‍ തൂമ്പുങ്കല്‍, ജിമ്മിച്ചന്‍ കുംഭവേലി എന്നിവര്‍ പ്രസംഗിച്ചു. റോഡ് നിര്‍മാണത്തിന് ടെന്‍ഡറായി മുക്കാട്ടുകുന്ന്-പാലച്ചുവട് റോഡിന്‍റെ നവീകരണത്തിനായി 48.5 ലക്ഷം രൂപ അനുവദിച്ച് ടെന്‍ഡർ നടപടികള്‍ പൂര്‍ത്തിയായതായും മഴമാറുന്നതോടെ റോഡ് നിര്‍മാണം പൂര്‍ത്തിയാക്കുമെന്നും ജോബ് മൈക്കിള്‍ എംഎല്‍എ അറിയിച്ചു.

ഡോക്ടര്‍ നിര്‍ദേശിച്ച സ്ഥാപനത്തില്‍ സ്‌കാനിംഗിനു പോയില്ല : ജനറല്‍ ആശുപത്രിയില്‍ വയോധികന് ചികിത്സ നിഷേധിച്ചെന്ന്

ചങ്ങനാശേരി: ചങ്ങനാശേരി ജനറല്‍ ആശുപത്രിയിലെ ഡോക്ടര്‍ നിര്‍ദേശിച്ച സ്വകാര്യ സ്ഥാപനത്തില്‍ സ്‌കാനിംഗ് പരിശോധനയ്ക്കു പോകാത്തതിന് വയോധികന് ചികിത്സ നിഷേധിച്ചതായും കോട്ടയം മെഡിക്കല്‍ കോളജ് ആശുപത്രിയില്‍ ചികിത്സ തേടാന്‍ ഡോക്ടര്‍ നിര്‍ദേശിച്ചതായും പരാതി. മോര്‍ക്കുളങ്ങര സ്വദേശിയായ വയോധികനാണ് ജനറല്‍ ആശുപത്രിയില്‍ ബുദ്ധിമുട്ട് നേരിട്ടത്. ഇന്നലെ രാവിലെയാണ് സംഭവം. വയറു സംബന്ധമായ അസുഖത്തിനുള്ള ചികിത്സയ്ക്കാണ് വയോധികൻ ഭാര്യക്കൊപ്പം ജനറല്‍ ആശുപത്രിയില്‍ എത്തിയത്. ഇവര്‍ കണ്‍സള്‍ട്ട് ചെയ്ത ഡോക്ടര്‍ ആശുപത്രിക്കു പുറത്തുള്ള സ്വകാര്യ ലാബിന്‍റെ പേരുള്ള ചീട്ടില്‍ സ്‌കാനിംഗ് നടത്താന്‍ എഴുതിക്കൊടുത്തു. കുറിപ്പടിയില്‍ത്തന്നെ ഡോക്ടറുടെ പേരും എഴുതിയിരുന്നു. എന്നാല്‍ ദമ്പതികള്‍ ആദ്യം കണ്ട ലാബിലെത്തി സ്‌കാനിംഗ് നടത്തി. 950 രൂപ ബില്‍ത്തുകയും നല്‍കി. സ്‌കാനിംഗ് റിപ്പോര്‍ട്ടുമായി തിരികെ ഡോക്ടറുടെയടുത്ത് എത്തിയപ്പോള്‍ താന്‍ നിര്‍ദേശിച്ച ലാബില്‍ പോകാത്തതിന് ഡോക്ടര്‍ ദേഷ്യപ്പെട്ടതായി ദമ്പതികള്‍ പറഞ്ഞു. സ്‌കാനിംഗ് റിപ്പോര്‍ട്ട് തെളിഞ്ഞിട്ടില്ലെന്നും ഇനി മെഡിക്കല്‍ കോളജ് ആശുപത്രിയില്‍ പോയി ചികിത്സ തേടിയാല്‍ മതിയെന്നുമാണ് ഡോക്ടര്‍ പറഞ്ഞതെന്നും ഇവര്‍ പറഞ്ഞു. ജനറല്‍ ആശുപത്രിയില്‍ 24 മണിക്കൂറും ലാബ് ഉണ്ടെങ്കിലും സാധാരണ ജനങ്ങള്‍ക്ക് പ്രയോജനപ്പെടുന്നില്ല. ചികിത്സ തേടിയെത്തുന്നവരെ ഡോക്ടര്‍മാര്‍ സ്വകാര്യ ലാബിലേക്ക് കുറിപ്പു നല്‍കി അയയ്ക്കുന്നതായാണ് പരാതി ഉയരുന്നത്. ആശുപത്രി വികസന സമിതി യോഗത്തില്‍ ഈ വിഷയം അംഗങ്ങള്‍ പലതവണ ഉയര്‍ത്തിയിരുന്നു. സ്വകാര്യ ലാബുകളുടെ കുറിപ്പടി ഡോക്ടര്‍മാര്‍ ഉപയോഗിക്കരുതെന്ന് വികസനസമിതി പലതവണ നിര്‍ദേശിച്ചിരുന്നു. ഇതൊന്നും ആരും കേൾക്കുന്നില്ലെന്നാണ് വിമര്‍ശനം.

എസ്ബി ഹയര്‍ സെക്കന്‍ഡറി സ്‌കൂളിലേക്ക് ആദ്യമായി ഇന്നു പെണ്‍കുട്ടികളെത്തും

പ്ലസ് വണ്‍ ക്ലാസുകള്‍ ഇന്നാരംഭിക്കും ചങ്ങനാശേരി: പ്ലസ്ടു ക്ലാസുകള്‍ ഇന്നാരംഭിക്കുമ്പോള്‍ ചങ്ങനാശേരി അതിരൂപത നേരിട്ടു നടത്തുന്ന എസ്ബി ഹയര്‍ സെക്കന്‍ഡറി സ്‌കൂളിലേക്ക് ഇന്ന് ആദ്യമായി പെണ്‍കുട്ടികളെത്തും. അറുപത് പെണ്‍കുട്ടികളാണ് സ്‌കൂളിലെ ആറ് ബാച്ചുകളിലായി പ്രവേശനം നേടിയിരിക്കുന്നത്. ബയോളജി സയന്‍സ് ബാച്ചിലാണ് കൂടുതല്‍ പെണ്‍കുട്ടികളും പ്രവേശനം നേടിയിരിക്കുന്നത്. ഹയര്‍സെക്കന്‍ഡറി വിഭാഗത്തില്‍ പെണ്‍കുട്ടികള്‍ക്ക് പഠിക്കാനുള്ള സീറ്റുകളുടെ ദൗര്‍ലഭ്യം കണക്കിലെടുത്താണ് മാനേജ്‌മെന്‍റ് എസ്ബി സ്‌കൂളിനെ മിക്‌സഡാക്കി മാറ്റാന്‍ തീരുമാനിച്ചത്. ഇതോടുകൂടിയാണ് ആണ്‍കുട്ടികളുടെ മാത്രം കുത്തകയായിരുന്ന എസ്ബി സ്‌കൂളിന്‍റെ കവാടം പെണ്‍കുട്ടികള്‍ക്കുകൂടി തുറക്കപ്പെട്ടത്. 1891ല്‍ മെട്രിക്കുലേഷന്‍ ക്ലാസും അതിനു തൊട്ടുതാഴെയുള്ള ഫിഫ്ത് ക്ലാസും (ഇന്നത്തെ പ്ലസ്ടു, പ്ലസ് വണ്‍) ആരംഭിച്ചുകൊണ്ട് തുടക്കംകുറിച്ച എസ്ബി ഹൈസ്‌കൂള്‍ കേരളത്തിലെ സുറിയാനി ക്രിസ്ത്യാനികളുടെ ആദ്യത്തെ ഉന്നതവിദ്യാഭ്യാസ കേന്ദ്രമാണ്. പടിപടിയായി വളര്‍ന്ന് സര്‍വകലാശാലയായി മാറണമെന്ന ആഗ്രഹത്തോടെ ബിഷപ് ചാള്‍സ് ലവീഞ്ഞ് സ്ഥാപിച്ചതാണ് ഈ സ്‌കൂള്‍. 1922ല്‍ ഡിഗ്രി ക്ലാസുകള്‍ ആരംഭിച്ചുകൊണ്ട് എസ്ബി കോളജ് സ്ഥാപിതമായി. സ്‌കൂളില്‍ നടന്നിരുന്ന മെട്രിക്കുലേഷന്‍ ക്ലാസ് പിന്നീട് കോളജിന്‍റെ ഭാഗമാവുകയായിരുന്നു. എസ്ബി സ്‌കൂളിന്‍റെ വനിതാ വിഭാഗമാണ് എസ്ബിയുടെ സമീപത്തുതന്നെ സെന്‍റ് ആന്‍സ് സ്‌കൂളായി വളര്‍ന്നത് . 1998ല്‍ കോളജുകളില്‍നിന്ന് പ്രീഡിഗ്രി ഡീലിങ്ക് ചെയ്തപ്പോഴാണ് എസ്ബി സ്‌കൂള്‍ ഹയര്‍ സെക്കന്‍ഡറിയായി ഉയര്‍ത്തപ്പെട്ടത്.

പുളിമരം വീണ് ഗതാഗതം തടസപ്പെട്ടു

ടിവിപുരം: ശക്തമായ കാറ്റിൽ പുളിമരം കടപുഴകി റോഡിന് കുറുകെ വീണു ഗതാഗതം തടസപ്പെട്ടു. ഇന്നലെ രാവിലെ മൂത്തേടത്തുകാവ് -കൊട്ടാരപ്പള്ളി റോഡിലാണ് മരം വീണത്. പുഴവിൽ ജോയി കെ. ജോയിയുടെ പുരയിടത്തിൽ നിന്ന പേരാലാൽ ചുറ്റപ്പെട്ട കൂറ്റൻ പുളിമരം വൈദ്യുതി ലൈനിന് മുകളിലൂടെ കടപുഴകി വീഴുകയായിരുന്നു. റോഡിൽ യാത്രക്കാർ ഇല്ലാതിരുന്നതിനാൽ ആളപായം ഒഴിവായി. ഫയർഫോഴ്സ് രണ്ടു മണിക്കൂർ കൊണ്ടാണ് മരം മുറിച്ചു നീക്കിയത്.

ടയർ പൊട്ടിയ പിക്കപ്പ് ഓടയിലെ സ്ലാബിലേക്ക് ഇടിച്ചു കയറി

തോട്ടകം: ടയർ പൊട്ടിയതിനെത്തുടർന്ന് നിയന്ത്രണംവിട്ട പിക്കപ്പ് വാൻ ഓടയുടെ സ്ലാബിലേക്ക് ഇടിച്ചുകയറി. മറ്റു വാഹനങ്ങൾ ആ സമയം ഇല്ലാതിരുന്നതിനാൽ ദുരന്തം ഒഴിവായി. അപകടത്തിൽ ആർക്കും പരിക്കില്ല. പിക്കപ്പ് വാനിന്‍റെ മുൻഭാഗം ഭാഗികമായി തകർന്നു. തോട്ടകം ഷാപ്പിനു സമീപത്തെ വളവിൽ ഇന്നലെ വൈകുന്നേരം 4.30നായിരുന്നു അപകടം. മൂന്ന് മാസം മുമ്പ് ഇതേ വളവിൽ സ്വകാര്യബസും ആപ്പയും കൂട്ടിയിടിച്ചുണ്ടായ അപകടത്തിൽ ആപ്പയുടെ ഡ്രൈവർ മരണപ്പെട്ടിരുന്നു.

കാണിക്കവഞ്ചിയുടെ പൂട്ട് തകര്‍ത്ത് മോഷണം

കല്ലറ: പാണ്ഡവര്‍കുളങ്ങര ഭഗവതീ ക്ഷേത്രത്തിന്‍റെ, കല്ലറ കുരിശുപള്ളി ജംഗ്ഷനോട് ചേര്‍ന്നുള്ള, കാണിക്കവഞ്ചിയുടെ പൂട്ട് തകര്‍ത്ത് മോഷണം. തിങ്കളാഴ്ച രാത്രിയാണ് മോഷണം നടത്തിയത്. ദേവസ്വം പ്രസിഡന്‍റ് ടി.കെ. ചന്ദ്രശേഖരന്‍ നായര്‍ കടുത്തുരുത്തി പോലീസില്‍ പരാതി നല്‍കി. കഴിഞ്ഞ 31 ന് കാണിക്കവഞ്ചി തുറന്ന് പണം ക്ഷേത്രത്തിലേക്ക് എടുത്തിരുന്നതായി ചന്ദ്രശേഖരന്‍നായര്‍ പറഞ്ഞു. 1500 രൂപയ്ക്കടുത്ത് നഷ്ടപ്പെട്ടിരിക്കാമെന്നാണ് കരുതുന്നതെന്നും അദേഹം പറയുന്നു. സമീപത്ത് ബേക്കറി നടത്തുന്നയാള്‍ ഇന്നലെ രാവിലെ കട തുറക്കാനെത്തിയപ്പോഴാണ് ഗ്രില്ലിന്‍റെയും കാണിക്കവഞ്ചിയുടെയും പൂട്ടുകള്‍ തുറന്ന് കിടക്കുന്നത് ശ്രദ്ധയില്‍പ്പെട്ടത്. കാണിക്കവഞ്ചിയുടെ താഴ് സമീപത്തുള്ള ഓടയില്‍നിന്ന് കണ്ടെത്തി. ക്ഷേത്ര കമ്മിറ്റിയംഗങ്ങളെത്തി പരിശോധന നടത്തി. കല്ലറ 395-ാം നമ്പര്‍ എന്‍എസ്എസ് കരയോഗത്തിന്‍റെ ഉടമസ്ഥതയിലുള്ളതാണ് പാണ്ഡവര്‍കുളങ്ങര ക്ഷേത്രം. കഴിഞ്ഞ പത്തിന് പുലര്‍ച്ചെ കുരിശുപള്ളി ജംഗ്ഷന് സമീപം പ്രവര്‍ത്തിക്കുന്ന ബേക്കറിയുടെ പൂട്ട് തകര്‍ത്ത് മോഷ്ടാക്കള്‍ പണവും സാധനങ്ങളും കവര്‍ന്നിരുന്നു. പഞ്ചായത്തിലെ വിവിധ പ്രദേശങ്ങളില്‍ മോഷണശ്രമങ്ങള്‍ കൂടിവരുന്ന സാഹചര്യത്തില്‍ പോലീസിന്‍റെ രാത്രികാല പരിശോധനകള്‍ ശക്തമാക്കണമെന്ന് പഞ്ചായത്തംഗങ്ങള്‍ ആവശ്യപ്പെട്ടു.

വൈക്കം താലൂക്ക് ലാന്‍ഡ് ബോര്‍ഡ് 70.86 ഏക്കര്‍ മിച്ചഭൂമി കണ്ടെത്തി

വൈക്കം: വൈക്കം താലൂക്കിലെ വടയാര്‍, കുലശേഖരമംഗലം വില്ലേജുകളിലെയും എറണാകുളം ജില്ലയില്‍ കണയന്നൂര്‍ താലൂക്കിലെ ഇളംകുളം വില്ലേജിലുമായി 70.86 ഏക്കര്‍ മിച്ചഭൂമിയായി കണ്ടെത്തി ഏറ്റെടുക്കുന്നതിന് വൈക്കം താലൂക്ക് ലാന്‍ഡ് ബോര്‍ഡ് ഉത്തരവായി. ഇതില്‍ 55.72 ഏക്കര്‍ റബര്‍ത്തോട്ടം അനധികൃത തരംമാറ്റം നടത്തിയതായി കണ്ടെത്തിയതിനെത്തുടര്‍ന്ന് സര്‍ക്കാരിലേക്ക് മിച്ചഭൂമിയെന്ന നിലയില്‍ ഏറ്റെടുക്കുന്നതിന് വൈക്കം താലൂക്ക് ലാന്‍ഡ് ബോര്‍ഡ് യോഗം തീരുമാനിച്ചു. സമയബന്ധിതമായി ഈ ഭൂമി ഏറ്റെടുക്കാന്‍ വൈക്കം, കണയന്നൂര്‍ തഹസില്‍ദാർമാര്‍ക്ക് ലാന്‍ഡ് ബോര്‍ഡ് ചെയര്‍മാന്‍ നിര്‍ദേശം നല്‍കി. ലാന്‍ഡ് ബോര്‍ഡ് യോഗത്തില്‍ കോട്ടയം സോണല്‍ ലാന്‍ഡ് ബോര്‍ഡ് ചെയര്‍മാനും ഡെപ്യൂട്ടി കളക്ടറുമായ എസ്. സനില്‍കുമാര്‍, വൈക്കം തഹസില്‍ദാര്‍ എ.എന്‍. ഗോപകുമാര്‍, ലാന്‍ഡ് ബോര്‍ഡ് അംഗങ്ങളായ എം.ഡി. ബാബുരാജ്, പി.ജി. ത്രിഗുണസെന്‍, കെ.കെ. ഗണേശന്‍, ഹെഡ് മിനിസ്റ്റീരിയല്‍ ഓഫീസര്‍ ടി.വി. ഷമി, ഓതറൈസ്ഡ് ഓഫീസര്‍ സ്വപ്ന എസ്. നായര്‍, വടയാര്‍ വില്ലേജ് ഓഫീസര്‍ മോളി ദാനിയേല്‍, കുലശേഖരമംഗലം വില്ലേജ് ഓഫീസര്‍ രഞ്ജിത്ത് എന്നിവര്‍ പങ്കെടുത്തു.

ഞീഴൂരില്‍ തെരുവുനായ്ക്കളുടെ ആക്രമണം; നാല് ആടുകള്‍ ചത്തു

ഞീഴൂര്‍: ഞീഴൂരില്‍ തെരുവുനായ്ക്കളുടെ ആക്രമണത്തില്‍ നാല് ആടുകള്‍ ചത്തു. നിരവധി ആടുകള്‍ക്ക് നായ്ക്കളുടെ ആക്രമണത്തില്‍ പരിക്കേറ്റു. ഒന്നാം വാര്‍ഡിലെ കളപ്പുരപ്പറമ്പില്‍ തങ്കച്ചന്‍റെ നാല് ആടുകളെയാണ് നായ്ക്കള്‍ കടിച്ചു കൊന്നത്. ഒരാഴ്ച മുമ്പ് 13, 14 വാര്‍ഡുകളിലെ മ്യാലില്‍കരോട്ട് സന്തോഷിന്‍റെ ആടിനെയും പാറശേരി ജോയിയുടെ രണ്ട് ആടുകളെയും നായ്ക്കള്‍ കടിച്ചുകൊന്നിരുന്നു. ഈ ദിവസങ്ങളില്‍ പലയിടത്തായി നിരവധി ആടുകള്‍ക്കാണ് തെരുവുനായ്ക്കളുടെ ആക്രമണത്തില്‍ ഗുരുതരമായി മുറിവേറ്റത്. ആടുകളെ വളര്‍ത്തി ജീവിക്കുന്ന നിരവധി കുടുംബങ്ങളാണ് തെരുവുനായ ശല്യത്തില്‍ പ്രതിസന്ധിയിലായത്. പഞ്ചായത്ത് അധികൃതരെ വിവരമറിയിച്ചിട്ടും യാതൊരു നടപടിയുമുണ്ടായില്ലെന്നാണ് നാട്ടുകാരുടെ പരാതി. പഞ്ചായത്ത് പ്രദേശത്ത് തെരുവുനായ്ക്കളുടെ എണ്ണം വര്‍ധിച്ചുവരികയാണെന്നും പഞ്ചായത്തിന്‍റെയും മൃഗസംരക്ഷണ വകുപ്പിന്‍റെയും അനാസ്ഥയാണ് തെരുവുനായ്ക്കള്‍ പെരുകാനിടയാക്കുന്നതെന്നും അധികൃതര്‍ക്കെതിരേ കോടതിയെ സമീപിക്കുമെന്നും നാട്ടുകാര്‍ പറയുന്നു. തെരുവുനായ പ്രശ്‌നം അടിയന്തരമായി പരിഹരിക്കണമെന്നും ഈ വിഷയം പഞ്ചായത്ത് കമ്മിറ്റിയില്‍ പലതവണ ഉന്നയിച്ചതാണെന്നും പഞ്ചായത്തംഗം ശരത് ശശി പറഞ്ഞു. എബിസി പ്രോഗ്രാമിന്‍റെ തുടര്‍ച്ചയില്ലാതെ പോയതാണ് തെരുവുനായ്ക്കള്‍ വര്‍ധിക്കാനിടയാക്കിയത്. സ്‌കൂള്‍ കുട്ടികള്‍ യാത്രചെയ്യുന്ന പ്രദേശങ്ങളിലുള്‍പ്പെടെ നായ്ക്കളുടെ ശല്യം രൂക്ഷമായിരിക്കുകയാണ്. നായ്ക്കള്‍ കടിച്ചുകൊന്ന ആടുകളുടെ ഉടമസ്ഥര്‍ക്ക് മൃഗസംരക്ഷണ വകുപ്പിന്‍റെയും പഞ്ചായത്തിന്‍റെയും അടിയന്തര ധനസഹായം നല്‍കണമെന്നും ശരത് ശശി ആവശ്യപ്പെട്ടു.

വെള്ളത്തിൽ മുങ്ങിയ റോഡുകൾ തകർച്ചാഭീഷണിയിൽ

വൈക്കം: കനത്ത മഴയെത്തുടർന്ന് വീടുകളിൽ വെള്ളം കയറി ജനജീവിതം ദുരിത പൂർണമായതിനു പുറമേ വെള്ളം കയറിയ റോഡുകളും തകർച്ചാഭീഷണിയിൽ. തലയോലപ്പറമ്പ് - കോരിക്കൽ, വാഴമന - വൈക്കം റോഡുകളുടെ പല ഭാഗങ്ങളിലും വെള്ളം കയറി. തലയോലപ്പറമ്പ് - കോരിക്കൽ റോഡ് ഏറെക്കാലം തകർന്നു കിടന്നശേഷമാണ് ഏതാനും മാസങ്ങൾക്ക് മുമ്പ് രീതിയിൽ ടാറിംഗ് നടത്തി ഗതാഗതയോഗ്യമാക്കിയത്. റോഡിന്‍റെ പലഭാഗങ്ങളും വെള്ളത്തിൽ മുങ്ങിയിരിക്കുന്നതിനാൽ റോഡ് തകരുമെന്ന ആശങ്കയിലാണ് പ്രദേശവാസികൾ. വാഴമന പുത്തൻപാലം - കൊടിയാട് റോഡിൽ 500 മീറ്ററിലധികം ദൂരം വെള്ളത്തിൽ മുങ്ങി. ഗ്രാമവണ്ടിയടക്കം നിരവധി വാഹനങ്ങളാണ് ഇതുവഴി കടന്നുപോകുന്നത്. റോഡ് വെള്ളത്തിൽ മുങ്ങിയതോടെ ഇരുചക്രവാഹനങ്ങൾക്ക് ഇതുവഴി കടന്നുപോകാനാത്ത സ്ഥിതിയാണ്. വെള്ളത്തിൽ മുങ്ങിയതോടെ അറ്റകുറ്റപ്പണി നടത്തി അധികം കഴിയാത്ത വാഴമന റോഡും തകരുമെന്ന സ്ഥിതിയിലാണ്.

മുണ്ടാറിലും വടയാറിലും കൂടുതൽ വീടുകളില്‍ വെള്ളം കയറി

മഴയ്ക്കും കിഴക്കന്‍ വെള്ളംവരവിനും ശക്തിയേറി കടുത്തുരുത്തി: കനത്ത മഴയും കിഴക്കന്‍ വെള്ളത്തിന്‍റെ വരവും ശക്തമായതോടെ മുണ്ടാറിലെ നൂറോളം വീടുകളില്‍ വെള്ളം കയറി. പല കുടുംബങ്ങളും ബന്ധുവീടുകളിലേക്കും വാടക വീടുകളിലേക്കും താമസം മാറ്റി. കെവി കനാലും കരിയാറും കളമ്പുകാട്-പുത്തന്‍തോട് തുടങ്ങി എല്ലാ പുഴകളും തോടുകളും നിറഞ്ഞൊഴുകുകയാണ്. മുണ്ടാറിന്‍റെ മധ്യഭാഗത്തുകൂടെ കടന്നുപോകുന്ന കല്ലുപുര-വാക്കേത്തറ റോഡ് പൂര്‍ണമായും വെള്ളത്തില്‍ മുങ്ങിയതോടെ ഗതാഗതം നിലച്ചു. വള്ളങ്ങളിലാണ് പുറംലോകവുമായി ബന്ധപ്പെടുന്നതെന്ന് പ്രദേശവാസിയായ സാനു പറഞ്ഞു. ഇന്നലെവരെ പല പാടശേഖരങ്ങളിലെയും മോട്ടോര്‍ പ്രവര്‍ത്തിപ്പിച്ചു വെള്ളം വറ്റിക്കാന്‍ കര്‍ഷകര്‍ ശ്രമിച്ചിരുന്നു. ജലാശയങ്ങളിലെ ജലനിരപ്പ് വര്‍ധിച്ചു മടവീഴ്ചയുണ്ടാകുമെന്ന സ്ഥിതിവന്നതോടെ മോട്ടോറുകളുപയോഗിച്ചുള്ള വെള്ളം വറ്റിക്കല്‍ നിര്‍ത്തിവച്ചു. ശക്തമായ പുറംബണ്ടില്ലാത്തതിനാല്‍ മടവീഴ്ചയുണ്ടായാല്‍ മുഴുവന്‍ പാടശേഖരങ്ങളും വെള്ളത്തില്‍ മുങ്ങിപ്പോകുന്ന അവസ്ഥയുണ്ടാകുമെന്നു കര്‍ഷകര്‍ പറയുന്നു. പാടശേഖരങ്ങളുടെ പുറംബണ്ടിലും ചിറകളിലുമാണ് ഇവിടത്തെ വീടുകളിലധികവും. എഴുമാംകായലിലൂടെയും മൂവാറ്റുപാഴയാറിലൂടെയുമാണ് മുണ്ടാറിലേക്ക് കിഴക്കന്‍ വെള്ളം ഒഴുകിയെത്തുന്നത്. രണ്ടാഴ്ച മുമ്പുണ്ടായ ശക്തമായ മഴയിലും വെള്ളപ്പൊക്കത്തിലും വീടുകളില്‍ വെള്ളം കയറിയതിനെത്തുടര്‍ന്ന് 150ലധികം കുടുംബങ്ങള്‍ ഇവിടെനിന്നു താമസം മാറിയിരുന്നു. തലയോലപ്പറമ്പ്: തലയോലപ്പറമ്പ് പഞ്ചായത്ത് വടയാറിലെ താഴ്ന്ന പ്രദേശങ്ങളിൽ നൂറിലധികം വീടുകളിൽ വീണ്ടും വെള്ളം കയറി. കോരിക്കൽ,പഴമ്പെട്ടി, മനക്കച്ചിറ,പന്ത്രണ്ടിൽ, മുണ്ടോടിയിൽ, വട്ടക്കേരിൽ, കാളിവേലിൽ, കുന്നുതറക്കരി,എട്ടടി ഭാഗങ്ങളെല്ലാം വെള്ളത്തിനടിയിലായി. കഴിഞ്ഞ മാസം കനത്ത മഴയിൽ പ്രദേശത്താകമാനം വീടുകളിൽ മുട്ടോളം പൊക്കത്തിൽ വെള്ളം കയറിയിരുന്നു. അന്ന് പല കുടുംബങ്ങളും തലയോലപ്പറമ്പ് എ.ജെ. ജോൺ മെമ്മോറിയൽ ഗവൺമെന്‍റ് ഗേൾസ് ഹയർ സെക്കൻഡറി സ്കൂളിലെ ദുരിതാശ്വാസ ക്യാമ്പിലും ബന്ധുവീടുകളിലേക്കുമായി താമസം മാറ്റിയിരുന്നു. വീടുകളിൽനിന്നും വെള്ളമിറങ്ങിയപ്പോൾ ദുരിതാശ്വാസ ക്യാമ്പുകളിൽനിന്നും ബന്ധുവീടുകളിൽനിന്നും തിരിച്ചെത്തി ജീവിതം കരുപ്പിടിപ്പിക്കാൻ തുടങ്ങി രണ്ടാഴ്ച തികയുംമുമ്പാണ് വീണ്ടും പെരുമഴയും വെള്ളപ്പൊക്കവും ഉണ്ടായത്. ഇതോടെ ദുരിതമൊഴിയാതെ താഴ്ന്ന പ്രദേശങ്ങൾ ഒറ്റപ്പെട്ടിരിക്കുകയാണ്. വെള്ളം കയറിയ വീടുകളിൽനിന്നും ജനങ്ങളെ ക്യാമ്പുകളിലേക്ക് മാറ്റാൻ അധികൃതർ തയാറാണെങ്കിലും വളർത്തുമൃഗങ്ങളെയും മറ്റും സംരക്ഷിക്കേണ്ടതുള്ളതിനാൽ പലരും ക്യാമ്പുകളിലേക്ക് മാറാൻ കൂട്ടാക്കുന്നില്ല. കനത്ത മഴ തുടരുന്നതിനാൽ കാർഷിക മേഖലയിലും നിർമാണ മേഖലയിലും തൊഴിലെടുക്കുന്നവർക്ക് തൊഴിലില്ല. തൊഴിലാളികളുടെ പണിമുടങ്ങിയതോട നിർധന കുടുംബങ്ങൾ കടുത്ത പ്രതിസന്ധിയിലായി. മഴ കനത്തതോടെ മൂവാറ്റുപുഴയാറിലും കൈവഴികളിലും ജലനിരപ്പ് ഉയരുന്നത് ആശങ്ക വർധിപ്പിക്കുകയാണ്. മൂവാറ്റുപുഴയാറിലൂടെ കിഴക്കൻ വെള്ളം കുത്തിയൊലിച്ചെത്തിയാൽ പുഴ കരകവിഞ്ഞ് പ്രളയ സമാനമായ സാഹചര്യം ഉണ്ടാകുമെന്ന ഭീതിയിലാണ് ജനങ്ങൾ.

മണർകാട് കത്തീഡ്രലിൽ നവംബർ ഒന്നിന് വിശുദ്ധ അമ്പത്തിയൊന്നിന്മേൽ കുർബാന

മണർകാട്: ശ്രേഷ്ഠ കാതോലിക്കാ മാർ ബസേലിയോസ് തോമസ് പ്രഥമൻ ബാവായുടെ ഒന്നാം ശ്രാദ്ധപ്പെരുന്നാൾ ആചരിക്കുന്ന നവംബർ ഒന്നിന് ആഗോള മരിയൻ തീർഥാടന കേന്ദ്രമായ മണർകാട് വിശുദ്ധ മർത്തമറിയം യാക്കോബായ സുറിയാനി കത്തീഡ്രലിൽ വിശുദ്ധ അമ്പത്തിയൊന്നിന്മേൽ കുർബാന നടത്തും. യാക്കോബായ സുറിയാനി സഭയുടെ ശ്രേഷ്ഠ കാതോലിക്കാ മാർ ബസേലിയോസ് ജോസഫ് ബാവാ വിശുദ്ധ അമ്പത്തിയൊന്നിന്മേൽ കുർബാനയ്ക്കു പ്രധാന കാർമികത്വം വഹിക്കും. സഭയിലെ മെത്രാപ്പോലീത്തമാരും കോർ എപ്പിസ്കോപ്പാമാരും റമ്പാച്ചന്മാരും വൈദികരും സഹകാർമികത്വം വഹിക്കും.

അതിവേഗം പാമ്പാടി ബ്ലോക്ക് പഞ്ചായത്ത് ജോബ് സ്റ്റേഷന്‍

പാമ്പാടി: കേരള നോളജ് ഇക്കോണമി മിഷന്‍ ആരംഭിച്ച ഡിജിറ്റല്‍ വര്‍ക്ക് ഫോഴ്‌സ് മാനേജ്‌മെന്‍റ് സിസ്റ്റത്തിന്‍റെ ഭാഗമായുള്ള പാമ്പാടി ബ്ലോക്ക് പഞ്ചായത്ത് വിജ്ഞാനകേരളം ജോബ് സ്റ്റേഷന്‍ ക്രിയാത്മകമായ പ്രവര്‍ത്തനങ്ങളുമായി മുന്നോട്ട്. ബ്ലോക്ക് പഞ്ചായത്തിന്‍റെ പരിധിയിലുള്ളതും ഡിജിറ്റല്‍ വര്‍ക്ക് ഫോഴ്‌സ് മാനേജ്‌മെന്‍റ് സിസ്റ്റത്തിലൂടെ രജിസ്റ്റര്‍ ചെയ്തതുമായ 7,580 തൊഴിലന്വേഷകരെ യോഗ്യതയുടെയും വിവരങ്ങളുടെയും അടിസ്ഥാനത്തില്‍ തരംതിരിക്കുകയെന്നതാണ് ജോബ് സ്റ്റേഷനിലൂടെ നടക്കുന്ന പ്രധാനപ്പെട്ട ദൗത്യം. ഇതിന് ഓരോ വാര്‍ഡിലും രണ്ടു ലോക്കല്‍ റിസോഴ്സ് പേഴ്സണ്‍മാരെ (എല്‍ആര്‍പി) നിയോഗിച്ചിട്ടുണ്ട്. തെരഞ്ഞെടുക്കപ്പെട്ട നൂറിലധികം എല്‍ആര്‍പിമാര്‍ക്കായുള്ള അടിസ്ഥാന പരിശീലനം കില ബ്ലോക്ക് കോ-ഓര്‍ഡിനേറ്ററുടെയും തീമാറ്റിക് എക്സ്പേര്‍ട്ടിന്‍റെയും നേതൃത്വത്തില്‍ ബ്ലോക്ക് പഞ്ചായത്ത് ഹാളില്‍ വച്ച് നല്‍കി. അവരിലൂടെ ഉദ്യോഗാര്‍ഥികളുടെ വിവരം തരംതിരിക്കലും നടത്തി. ഒരു മാസത്തിനുള്ളില്‍ പാമ്പാടി ബ്ലോക്കിലെ എല്ലാ പഞ്ചായത്തുകളിലും ഫെസിലിറ്റേഷന്‍ സെന്‍ററുകള്‍ സ്ഥാപിക്കുക എന്നതാണ് ലക്ഷ്യം. തൊഴില്‍ മേഖലയില്‍ മുന്‍പന്തിയില്‍ നില്‍ക്കുന്നതിനായി ബ്ലോക്ക് അടിസ്ഥാനത്തില്‍ നൈപുണ്യ വികസന കേന്ദ്രങ്ങള്‍ ആരംഭിക്കാനും ലക്ഷ്യമിടുന്നതായി കില ബ്ലോക്ക് കോ-ഓര്‍ഡിനേറ്റര്‍ വി.ടി. കുര്യന്‍ പറഞ്ഞു. ജില്ലയിലെ എന്‍ജിനിയറിംഗ് കോളജുകളിലാണ് ഇപ്പോള്‍ വെര്‍ച്വല്‍ തൊഴില്‍ മേളകള്‍ സംഘടിപ്പിക്കുന്നത്. വെര്‍ച്വല്‍ തൊഴില്‍മേളകള്‍ ജോബ് സ്റ്റേഷനുകളില്‍ നിന്നുതന്നെ സംഘടിപ്പിക്കുകയും അതിലൂടെ ഉദ്യോഗാര്‍ഥികള്‍ക്ക് മികച്ച തൊഴിലവസരങ്ങള്‍ ഉറപ്പാക്കുകയും ചെയ്യുകയെന്നതാണ് അടുത്തചുവടെന്നു കില തീമാറ്റിക് എക്സ്പേര്‍ട്ട് ആര്‍. രേണു പറഞ്ഞു.

വ്യാപാരികൾ ദുരിതക്കയത്തിൽ

ഒറവയ്ക്കൽ: ഒറവയ്ക്കൽ-കൂരാലി റോഡ് മനോഹരമായി ടാർ ചെയ്തു ഗതാഗതയോഗ്യമാക്കി; നല്ലതു തന്നെ. പക്ഷേ, അതിനുശേഷം പെയ്ത മഴയോടെ, ഒറവയ്ക്കൽ കവല മുതൽ കളപ്പുരയ്ക്കൽപ്പടി വരെ റോഡരികിലുള്ള വ്യാപാരികൾ ദുരിതത്തിലായി. കടയ്ക്കുള്ളിലേക്ക് വെള്ളം ഒഴുകിയെത്തുന്ന നിലയിൽ മുൻവശത്ത് വെള്ളം കെട്ടിനിന്ന് ചെളിക്കുഴിയായി കടയിലേക്ക് ഒരു തരത്തിലും കയറാൻ പറ്റാത്ത അവസ്ഥയാണ്. അധികൃതരെ സമീപിച്ചുവെങ്കിലും നാളിതുവരെയും പരിഹാരമായില്ല. ബന്ധപ്പെട്ടവർ എത്രയും വേഗം പ്രശ്നത്തിന് പരിഹാരമുണ്ടാക്കണമെന്നു വ്യാപാരി വ്യവസായി ഏകോപന സമിതി ഒറവയ്ക്കൽ യൂണിറ്റ് ആവശ്യപ്പെട്ടു.

കന്നുവഴി വളവില്‍ സ്വകാര്യ ബസുകള്‍ കൂട്ടിയിടിച്ച് അപകടം; 6 പേർക്കു പരിക്ക്

പുതുപ്പള്ളി: കന്നുവഴി വളവില്‍ സ്വകാര്യ ബസുകള്‍ തമ്മില്‍ കൂട്ടിയിടിച്ച് അപകടം. തെറ്റായ ദിശയില്‍ വന്ന കാറില്‍ ഇടിക്കാതിരിക്കാന്‍ ശ്രമിച്ചപ്പോഴാണ് അപകടമുണ്ടായത്. പോലീസുകാരന്‍ ഉള്‍പ്പെടെ ആറു യാത്രക്കാര്‍ക്കു പരിക്കേറ്റു. ഇന്നലെ രാവിലെയായിരുന്നു അപകടം. കായംകുളത്തേക്കുപോയ പൊന്നൂസ് ബസിനു പിന്നില്‍ തിരുവല്ലയ്ക്കു പോയ കളത്തില്‍ ബസ് ഇടിക്കുകയായിരുന്നു. അപകടകരമാംവിധം ഓവര്‍ടേക്ക് ചെയ്തുവന്ന കാറില്‍ ഇടിക്കാതിരിക്കാന്‍ കായംകുളത്തേക്കു പോയ ബസ് വെട്ടിച്ചു നിര്‍ത്തുകയായിരുന്നു. ഇതേത്തുടർന്ന് തൊട്ടുപിന്നാലെ ഉണ്ടായിരുന്ന കളത്തില്‍ ബസ് പൊന്നൂസ് ബസിന്‍റെ പിന്നില്‍ ഇടിച്ചു കയറുകയായിരുന്നു. പരിക്കേറ്റവരില്‍ സ്ത്രീകളും കുട്ടികളും ഉള്‍പ്പെടും. അപകടത്തില്‍ വാകത്താനം പോലീസ് സ്റ്റേഷനിലെ ഉദ്യോഗസ്ഥനായ അഭിലാഷിനാണ് പരിക്കേറ്റത്. ബസിന്‍റെ പിന്‍ഭാഗത്തിരുന്ന അഭിലാഷ് അപകടത്തെത്തുടര്‍ന്ന് ബസിന്‍റെ മുന്‍ഭാഗത്തേക്കു തെറിച്ചുവീണു. പരിക്കേറ്റവരെ ഉടന്‍തന്നെ ആശുപത്രിയിലേക്കു മാറ്റി. പത്തനംതിട്ട സ്വദേശിയുടെ കാറാണ് അപകടത്തിനു കാരണമെന്നു പറയുന്നു. കാര്‍ നിര്‍ത്താതെ പോയി.

വായന പക്ഷാചരണം ജില്ലാതല ഉദ്ഘാടനം നാളെ

കോട്ടയം: വിവര-പൊതുജനസമ്പർക്ക വകുപ്പിന്‍റെയും ജില്ലാ ഭരണകേന്ദ്രത്തിന്‍റെയും വിവിധ വകുപ്പുകളുടെയും ആഭിമുഖ്യത്തിൽ നടത്തുന്ന വായന പക്ഷാചരണം നാളെ തുടങ്ങും. പക്ഷാചരണത്തിന്‍റെ ജില്ലാതല ഉദ്ഘാടനം നാളെ രാവിലെ 9.30ന് മാന്നാനം സെന്‍റ് എഫ്രേംസ് ഹയർ സെക്കൻഡറി സ്‌കൂളിൽ മന്ത്രി വി.എൻ. വാസവൻ നിർവഹിക്കും. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗർ അധ്യക്ഷത വഹിക്കും. കെ. ഫ്രാൻസിസ് ജോർജ് എംപി വായനദിന സന്ദേശം നൽകും. ജില്ലാ കളക്ടർ ജോൺ വി. സാമുവൽ വായനദിന പ്രതിജ്ഞ ചൊല്ലിക്കൊടുക്കും. ഏറ്റുമാനൂർ ബ്ലോക്ക് പഞ്ചായത്ത് പ്രസിഡന്‍റ് ആര്യ രാജൻ, അതിരമ്പുഴ പഞ്ചായത്ത് പ്രസിഡന്‍റ് ജോസ് അമ്പലക്കുളം, ജില്ലാ പഞ്ചായത്തംഗം പ്രഫ.ഡോ. റോസമ്മ സോണി, ബ്ലോക്ക് പഞ്ചായത്തംഗം അന്നമ്മ മാണി, പഞ്ചായത്തംഗം ഷാജി ജോസഫ്, ഇൻഫർമേഷൻ ആൻഡ് പബ്ലിക് റിലേഷൻസ് വകുപ്പ് മേഖലാ ഉപഡയറക്ടർ കെ.ആർ. പ്രമോദ് കുമാർ, ജില്ലാ ലൈബ്രറി കൗൺസിൽ പ്രസിഡന്‍റ് ബാബു കെ. ജോർജ്, പി.എൻ പണിക്കർ ഫൗണ്ടേഷൻ ജില്ലാ ജനറൽ സെക്രട്ടറി പി.ജി.എം. നായർ, തദ്ദേശ സ്വയംഭരണ വകുപ്പ് ജോയിന്റ് ഡയറക്ടർ ബിനു ജോൺ, ഫാ. ജയിംസ് മുല്ലശേരി, മാന്നാനം സെന്‍റ് ജോസഫ്സ് ആശ്രമം മാനേജർ ഫാ. കുര്യൻ ചാലങ്ങാടി, സ്‌കൂൾ പ്രിൻസിപ്പൽ ടെസി ലൂക്കോസ്, ഹെഡ് മാസ്റ്റർ ബെന്നി സ്‌കറിയ എന്നിവർ പ്രസംഗിക്കും. കുടുംബശ്രീ വായന വാരാചരണം കോട്ടയം: കുടുംബശ്രീ 19 മുതൽ ഒരാഴ്ച മഷിത്താളുകൾ എന്ന പേരിൽ വായനവാരമായി ആചരിക്കും. വായനമത്സരം, ക്വിസ് മത്സരം, സാഹിത്യ കൂട്ടായ്മാ സംഗമം, എല്ലാ അയൽക്കൂട്ടങ്ങലിലും പുസ്തക വായന, ക്വിസ് മത്സരം, പത്രവായന, കഥാരചന. കവിതാരചന എന്നിവ നടത്തും. 23 മുതൽ സാഹിത്യകാരന്മാരുടെ തെരഞ്ഞെടുത്ത കൃതികളിലെ സ്ത്രീ കഥാപാത്രങ്ങളേക്കുറിച്ച് ആസ്വാദനക്കുറിപ്പ് തയാറാക്കി അവതരിപ്പിക്കും.

പളളിക്കത്തോട്ടിലെ വൈദ്യുതിത്തകരാർ: വ്യാപാരികൾ സമരത്തിലേക്ക്

പള്ളിക്കത്തോട്: പ്രദേശത്ത് കുറേനാളുകളായി വൈദ്യുതിമുടക്കം പതിവാകുന്നു. 40 തവണയിൽ കൂടുതൽ വൈദ്യുതി പോയ ദിവസങ്ങളുണ്ട്. വൈദ്യുതി തടസം ജനജീവിതത്തെ ബാധിക്കുന്നതിനൊപ്പം വ്യാപാരികൾക്കും വലിയ ബുദ്ധിമുട്ടുണ്ടാക്കുന്നു. വൈദ്യുതിയെ ആശ്രയിച്ച് തൊഴിൽ ചെയ്യുന്ന ചെറുകിട വ്യവസായികളുടെ ജീവിതം തന്നെ വഴിമുട്ടുന്നു. പ്രശ്നത്തിന് പരിഹാരം കാണണമെന്നാവശ്യപ്പെട്ട് യുണൈറ്റഡ് മർച്ചന്‍റ്സ് ചേംബർ പള്ളിക്കത്തോട് യൂണിറ്റ് കമ്മിറ്റിയുടെ നേതൃത്വത്തിൽ വ്യാപാരികൾ പള്ളിക്കത്തോട് കെഎസ്ഇബി സെക്‌ഷൻ ഓഫീസിനു മുൻപിൽ ധർണ നടത്തി. പ്രസിഡന്‍റ് ജോസ് വെള്ളാപ്പള്ളി ഉദ്ഘാടനം ചെയ്തു. മുൻ പ്രസിഡന്‍റ് ജോജി മാത്യു, ജോസ് പി., ബെന്നി ജോൺ, ജോസൻ ജോസഫ്, ടോമി തോമസ്, ഷാജി എം. എന്നിവർ പ്രസംഗിച്ചു.

ലഹരിക്കെതിരേ പോരാടാൻ മെഡിക്കല്‍ സ്റ്റോറുകളും

കോട്ടയം: ലഹരിക്കെതിരേ പോരാടാൻ മെഡിക്കല്‍ സ്റ്റോറുകളും. ജില്ലയിലെ എല്ലാ മെഡിക്കല്‍ സ്റ്റോറുകള്‍ക്കു മുന്നിലും ഇന്നുമുതല്‍ ലഹരിവിരുദ്ധ പോസ്റ്റര്‍ പ്രദര്‍ശിപ്പിക്കും. പൊതുസമൂഹത്തിലേക്ക് ലഹരിവിരുദ്ധ സന്ദേശം എത്തിക്കുന്നതിന്‍റെ ഭാഗമായിട്ടാണ് ഷോപ്പുകള്‍ക്കു മുന്നില്‍ പോസ്റ്റര്‍ പ്രദര്‍ശിപ്പിക്കുന്നത്. ജില്ലാ നാര്‍കോ കോ-ഓര്‍ഡിനേഷന്‍ സെന്‍ററിന്‍റെ യോഗത്തിലാണ് ലഹരിവിരുദ്ധ പോസ്റ്റര്‍ പതിക്കണമെന്ന നിര്‍ദേശം ജില്ലാ കളക്ടര്‍ ജോണ്‍ വി. സാമുവേല്‍ മുന്നോട്ടുവച്ചത്. തുടര്‍ന്നു നിര്‍ദേശം നടപ്പാക്കാന്‍ തീരുമാനിക്കുകയായിരുന്നു. ഡ്രഗ്സ് കണ്‍ട്രോള്‍ വകുപ്പിന്‍റെയും ഓള്‍ കേരള കെമിസ്റ്റ് ആന്‍ഡ് ഡ്രഗിസ്റ്റ് അസോസിയേഷന്‍റെയും നേതൃത്വത്തിലാണ് പോസ്റ്റര്‍ തയാറാക്കിയിരിക്കുന്നത്. ആരോഗ്യമന്ത്രിയുടെ നിര്‍ദേശമനുസരിച്ച് ആന്‍റിബയോട്ടിക്കുകൾ നീല കവറുകളില്‍ നല്കണമെന്ന നി‍ബന്ധന ആദ്യം നടപ്പാക്കിയതും ജില്ലയിലായിരുന്നു. മെഡിക്കല്‍ ഷോപ്പുകള്‍ക്കു മുന്നില്‍ പതിക്കുന്നതിനായി തയാറാക്കിയ പോസ്റ്ററുകള്‍ ഇന്നു രാവിലെ 10നു ജനറല്‍ ആശുപത്രിയില്‍ ജില്ലാ കളക്ടര്‍ ജോണ്‍ വി. സാമുവല്‍ പ്രകാശനം ചെയ്യും. ജില്ലാ ഡ്രഗ്സ് കണ്‍ട്രോളര്‍ താരാ പിള്ള, അസിസ്റ്റ് ഡ്രഗ്സ് കണ്‍ട്രോളര്‍ ഡോ. അജു ജോസഫ് കുര്യന്‍, എകെസിഡിഎ ജില്ലാ പ്രസിഡന്‍റ് ജോസഫ് സെബാസ്റ്റ്യന്‍ എന്നിവര്‍ പ്രസംഗിക്കും.

പുഞ്ചക്കൃഷി ബഹിഷ്കരിക്കാൻ കുമരകം എംഎൻ ബ്ലോക്ക് പാടശേഖരസമിതി തീരുമാനം

നെൽകൃഷിയോട് വിടചൊല്ലാൻ കർഷകർ കുമരകം: കർഷകരിൽനിന്നും നെല്ല് ശേഖരിച്ച് മൂന്നു മാസത്തിലേറെ കഴിഞ്ഞിട്ടും വില ലഭ്യമാക്കാത്തതിലും കർഷകരുടെ പ്രശ്നങ്ങൾക്ക് പരിഹാരമുണ്ടാക്കാത്തതിലും പ്രതിഷേധിച്ച് പുഞ്ചക്കൃഷി ഉപേക്ഷിക്കാൻ കുമരകം എംഎൻ ബ്ലോക്ക് പാടശേഖര സമിതി തീരുമാനിച്ചു. കുമരകം, തിരുവാർപ്പ് കൃഷിഭവനുകളുടെ പരിധിയിൽപ്പെടുന്ന 1300 ഏക്കർ വരുന്നതും, അഞ്ചു ഗ്രൂപ്പ് ഫാം സമിതി ഉൾപ്പെട്ടതുമായ ജില്ലയിലെ ഏറ്റവും വലിയ പാടശേഖരത്തിന്‍റെ പൊതുയോഗമാണ് ഈ തീരുമാനമെടുത്തത്. ഗുണനിലവാരമുള്ള വിത്ത് യഥാസമയം ലഭ്യമാക്കാതെ വരിക, വളം, കീടനാശിനികൾ, പണിക്കൂലി എന്നിവയിലുണ്ടായ അമിത വർധനയ്ക്കനുസരിച്ച് നെല്ല് വില വർധിപ്പിക്കാതിരിക്കുക, പമ്പിംഗ് സബ്‌സിഡി വർധിപ്പിക്കാത്തതിനാൽ കർഷകർ അധികമായി പിരിവ് കൊടുക്കേണ്ടിവരിക തുടങ്ങിയ പ്രശ്‌നങ്ങൾ അഭിമുഖീകരിച്ചുകൊണ്ട് കൃഷിയുമായി മുന്നോട്ടുപോകാൻ പറ്റാത്ത സാഹചര്യത്തിലാണ് പുഞ്ചക്കൃഷി ഉപേക്ഷിക്കാൻ പാടശേഖര സമിതി തീരുമാനിച്ചത്. പൊതുയോഗ തീരുമാനം പ്രിൻസിപ്പൽ കൃഷി ഓഫീസറടക്കം വിവിധ അധികാരികളെ അറിയിച്ചതായി പാടശേഖരം ജനറൽ കൺവീനർ ടി.കെ. ശശിധരൻ തോട്ടുപുറം പറഞ്ഞു. ഗ്രൂപ്പ് ഫാം സമിതി സെക്രട്ടറിമാരായ സുരേഷ്, സജീവ്, കൊച്ചുമോൻ, രാജേഷ്, അനിരുദ്ധൻ എന്നിവർ പ്രസംഗിച്ചു.

വിശ്വാസജീവിതത്തിലൂടെ വിശുദ്ധിയിലേക്ക് വളരണം: മാര്‍ ജോസഫ് പണ്ടാരശേരില്‍

തെള്ളകം: വിശ്വാസജീവിതത്തിലൂടെ വിശുദ്ധിയിലേക്ക് വളരാന്‍ പരിശ്രമിക്കണമെന്ന് കോട്ടയം അതിരൂപത സഹായ മെത്രാന്‍ മാര്‍ ജോസഫ് പണ്ടാരശേരില്‍. അതിരൂപതയുടെ വിശ്വാസപരിശീലന വാര്‍ഷികവും ബൈബിള്‍ കമ്മീഷന്‍, മിഷന്‍ലീഗ്, തിരുബാലസഖ്യം സംഘടനകളുടെ പ്രവര്‍ത്തനവര്‍ഷ ഉദ്ഘാടനവും തെള്ളകം ചൈതന്യ പാസ്റ്ററല്‍ സെന്‍ററില്‍ ഉദ്ഘാടനം ചെയ്തു പ്രസംഗിക്കുകയായിരുന്നു മാര്‍ ജോസഫ് പണ്ടാരശേരില്‍. ദൈവവിളി കമ്മീഷന്‍ ചെയര്‍മാന്‍ ഫാ. സജി കൊച്ചുപറമ്പില്‍ അധ്യക്ഷത വഹിച്ചു. വിശ്വാസപരിശീലന കമ്മീഷന്‍ ചെയര്‍മാന്‍ ഫാ. ജിബിന്‍ മണലോടിയില്‍, വിശ്വാസപരിശീലന കമ്മീഷനംഗം സിസ്റ്റര്‍ കിരണ്‍ എസ്‌ജെസി, മിഷന്‍ലീഗ് അതിരൂപത സെക്രട്ടറി ഏബ്രഹാം സജി, തിരുബാലസഖ്യം സിസ്റ്റര്‍ അഡ്വൈസര്‍ സിസ്റ്റര്‍ ഡിവീന എസ്‌വിഎം ഫാ. ജെപിന്‍ ഒഴുങ്ങാലില്‍ എന്നിവര്‍ പ്രസംഗിച്ചു. അതിരൂപത തിരുബാലസഖ്യം ഡയറക്ടര്‍ ഫാ. മാത്തുക്കുട്ടി കുളക്കാട്ടുകുടിയില്‍ വിശ്വാസ പരിശീലന മാര്‍ഗരേഖയുടെയും ഹയര്‍സെക്കന്‍ഡറി വിദ്യാര്‍ഥികളുടെ ഉപപാഠപുസ്തകത്തിന്‍റെയും അവതരണം നടത്തി. ഫാ. ഷെറിന്‍ കുരിക്കിലേട്ട്, മിഷന്‍ലീഗ് ദേശീയ പ്രസിഡന്‍റ് സുജി പുല്ലുകാട്ട്, വിശ്വാസപരിശീലന കമ്മീഷനംഗം മാത്യു ജെറി, മിഷന്‍ലീഗ് വൈസ്-ഡയറക്ടര്‍ സിസ്റ്റർ അനു ജോസഫ്, ക്രിസ് സേവി കളപ്പുരത്തട്ടേല്‍ എന്നിവര്‍ പരിപാടിക്ക് നേതൃത്വം നല്‍കി.

കടകളുടെ മുകളിലേക്കു നിന്ന മരം മുറിച്ചുമാറ്റി

ഗാന്ധിനഗർ: മെഡിക്കൽ കോളജ് പനമ്പാലം റോഡിൽ കടകൾക്ക് മുകളിലേക്ക് നിന്ന മരങ്ങൾ മുറിച്ചുമാറ്റി. കനത്ത മഴയെയും കാറ്റിനെയും തുടർന്ന് ജില്ലയിൽ വ്യാപകമായി മരം കടപുഴകി നിരവധി വീടുകൾ തകരുകയും ഗതാഗതം തടസപ്പെടുകയും ചെയ്ത സാഹചര്യത്തിലാണ് മരം മുറിച്ചുമാറ്റിയത്.

നീണ്ടൂരിൽ ശക്തമായ കാറ്റ്, മരം വീണ് 18 വീടുകൾക്കു നാശം

നീണ്ടൂർ: തിങ്കളാഴ്ച രാത്രിയിൽ നീണ്ടൂർ മൂഴിക്കുളങ്ങരയിൽ ആഞ്ഞടിച്ച കാറ്റിൽ വൻമരങ്ങൾ കടപുഴകി വീണ് കനത്ത നാശനഷ്ടം. നീണ്ടൂർ പഞ്ചായത്ത് രണ്ടാം വാർഡിൽ 18 വീടുകൾക്ക് മരം വീണ് നാശനഷ്ടമുണ്ടായി. വൈദ്യുതി പോസ്റ്റുകൾ തകർന്ന് വൈദ്യുതി ബന്ധം തകരാറിലായി. തിങ്കളാഴ്ച രാത്രി എട്ടരയോടെയാണ് കനത്ത മഴയും കാറ്റും നാശംവിതച്ചത്. ഓണംതുരുത്ത് വില്ലേജിലെ മൂഴിക്കുളങ്ങര ഭഗവതീ ക്ഷേത്രത്തിന്‍റെ സമീപപ്രദേശങ്ങളിലാണ് മരങ്ങൾ കടപുഴകി വീണത്. കനത്ത മഴയെത്തുടർന്ന് ചുഴലിക്കാറ്റുണ്ടായപ്പോൾ വീടുകളിലും വഴികളിലും ഉണ്ടായിരുന്നവർ അപകടത്തിൽപ്പെടാതെ രക്ഷപ്പെടുകയായിരുന്നു. ജനങ്ങൾക്ക് പുറത്തേക്കിറങ്ങാൻ കടപുഴകിയ മരങ്ങളും പൊട്ടിവീണ വൈദ്യുതി ലൈനുകളും തടസമായി. ഫയർഫോഴ്സ് സംഘത്തിന് പല വീടുകളിലേക്കും എത്താൻ പോലും സാധിക്കുമായിരുന്നില്ല. പ്രദേശത്തെ ഗതാഗതവും തടസപ്പെട്ടു. മൂഴിക്കുളങ്ങര കോട്ടക്കുഴിയിൽ അക്ഷയ വീട്ടിൽ മഹേഷിന്‍റെ വീടിനു മുകളിലേക്ക് മരങ്ങൾ വീഴുമ്പോൾ 94 വയസുള്ള അമ്മയും ഭാര്യയും മാത്രമായിരുന്നു മഹേഷിന്‍റെ വീട്ടിൽ ഉണ്ടായിരുന്നത്. പൊന്നമ്മ കുട്ടൻ നൂറോകുറ്റിയിൽ, രമാഭായി അക്ഷയ, കുര്യാക്കോസ് തൊട്ടിയിൽ, ദിവ്യ കീപ്പാറയിൽ, തങ്കപ്പൻ കലവറ, സുനിൽ കൊങ്ങപ്പള്ളി, റെജിമോൻ പാലക്കൽ, വിശ്വനാഥ് പാതാരപ്പള്ളിൽ, ഷിബു ഇടപ്പതൊട്ടിയിൽ, സൂരജ് പറയങ്കാലാ, പ്രകാശ് തുരുത്തിക്കുന്ന്, രമാദേവി കീർത്തി, ബെന്നി ജയിംസ് കൊട്ടാരത്തിൽപറമ്പിൽ, സൈമൺ കൊട്ടാരത്തിൽപറമ്പിൽ, ശ്രീനാഥ് മാമ്പുഴയിൽ, സജിനി സോമൻ പുത്തൻപുരക്കൽ, ജേക്കബ് തേനകര എന്നിവരുടെയും വീടുകൾക്കു മരം വീണ് നാശനഷ്ടമുണ്ടായി. നിരവധി പേരുടെ കൃഷിക്കും നാശനഷ്ടങ്ങൾ സംഭവിച്ചു. ഒന്നാം വാർഡിലെ അങ്കണവാടിയുടെ മേൽക്കൂരയുടെ ഷീറ്റ് പറന്നുപോയി. നീണ്ടൂർ പഞ്ചായത്ത് പ്രസിഡന്‍റ് എം.കെ. പ്രദീപ്, ഓണംതുരുത്ത് വില്ലേജ് ഓഫീസർ ജയകുമാർ, ജനപ്രതിനിധികൾ, പൊതുപ്രവർത്തകർ തുടങ്ങിയവർ സ്ഥലത്തെത്തി. ഞായറാഴ്ച രാത്രിയിൽ അതിരമ്പുഴ ശ്രീകണ്ഠമംഗലം, കൈപ്പുഴ പ്രദേശങ്ങളിൽ ആഞ്ഞു വീശിയ കാറ്റിൽ വലിയ നാശനഷ്ടമുണ്ടായിരുന്നു. അതിരമ്പുഴയിൽ അതിരന്പുഴ പഞ്ചായത്ത് രണ്ടാം വാർഡ് കോട്ടമുറിക്ക് സമീപം ഉദിച്ചമുകളേൽ യു.എസ്. മാത്യുവിന്‍റെ വീടിനു മുകളിൽ ഇന്നലെയുണ്ടായ കാറ്റിൽ അയൽപുരയിടത്തിലെ റബർമരം കടപുഴകി വീണു.

ശബരി എയര്‍പോര്‍ട്ട്: സര്‍വേ തടസപ്പെടുത്തി മഴ

കോട്ടയം: എരുമേലിയില്‍ ശബരി വിമാനത്താവളം നിര്‍മാണത്തിനു മുന്നോടിയായുള്ള സ്ഥലം സര്‍വേ നടപടികള്‍ വൈകും. ഏറ്റെടുക്കേണ്ട സ്ഥലങ്ങളില്‍ വളര്‍ന്ന കാടുവെട്ടിത്തെളിക്കാതെ അതിരുകള്‍ കണ്ടെത്തുക എളുപ്പമല്ല. സ്ഥലത്തിന്‍റെ ഉടമകള്‍തന്നെ കാടു വെട്ടി സര്‍വേക്ക് സൗകര്യം ഒരുക്കണമെന്നാണ് നിര്‍ദേശം. ഒന്നര സെന്‍റ് മുതല്‍ മൂന്നര ഏക്കര്‍ വരെ സ്ഥലം വിട്ടുകൊടുക്കേണ്ടവര്‍ ഇതില്‍പ്പെടും. എരുമേലി തെക്ക്, മണിമല വില്ലേജുകളില്‍പ്പെട്ട 1039.876 ഹെക്ടര്‍ സ്ഥലമാണു വിമാനത്താവളത്തിനായി ഏറ്റെടുക്കുന്നത്. ഇതില്‍ ബിലീവേഴ്‌സ് ചര്‍ച്ചിനു കീഴിലുള്ള അയന ചാരിറ്റബിള്‍ ട്രസ്റ്റിന്‍റെ കൈവശമുള്ള ചെറുവള്ളി എസ്റ്റേറ്റില്‍പ്പെട്ടതാണ് 2,570 ഏക്കര്‍. കൂടാതെ എരുമേലി സൗത്ത്, മണിമല വില്ലജുകളിലായി 245 പേരുടെ ഭൂമിയും ഏറ്റെടുക്കും. ഈ സ്ഥലം എയര്‍പോര്‍ട്ട് പദ്ധതിയില്‍ പെടുത്തിയതിനുശേഷം കൃഷിയില്ലാതെ വെറുതെ കിടന്ന് കാടുകയറി. ഇവരില്‍ പലരും നിലവില്‍ സ്ഥലത്ത് താമസക്കുന്നുമില്ല. മാത്രവുമല്ല യന്ത്രം ഉപയോഗിച്ച് കാടുവെട്ടുന്നതിന് ഭാരിച്ച സാമ്പത്തിക ചെലവുമുണ്ട്. സ്ഥലത്തിന്‍റെ അതിരുകളിലെ കാടുകള്‍ മാത്രം തെളിച്ചാല്‍ മതിയെന്നാണ് റവന്യു വകുപ്പിന്‍റെ നിര്‍ദേശം. എന്നാല്‍, ഏറെ പ്രദേശങ്ങളും കാടുകയറി ഉള്ളിലേക്ക് കടക്കാന്‍ പറ്റാത്ത നിലയിലാണ്. സ്ഥലം അളന്നു തിരിക്കാന്‍ എട്ടു താത്കാലിക സര്‍വേയര്‍മാരെ നിയമിക്കാനാണ് നിശ്ചയിച്ചതെങ്കിലും നാലു പേരേ മാത്രമേ ലഭിച്ചിട്ടുള്ളൂ. രണ്ടാഴ്ച മുന്‍പ് നിയമനം നടന്നെങ്കിലും എരുമേലി തെക്ക്, മണിമല വില്ലേജുകളിലെ രേഖകളുടെ പരിശോധന പൂര്‍ത്തിയായതിനുശേഷമേ ഫീല്‍ഡ് സര്‍വേ അരംഭിക്കുകയുള്ളൂ. ഒരാഴ്ചയായി പെയ്യുന്ന കനത്ത മഴ മറ്റൊരു പരിമിതിയാണ്.

അവധിക്കാലം: സർക്കാർ ബോട്ടുകൾക്ക് ലക്ഷങ്ങളുടെ ലാഭം

കോട്ടയം: അവധിക്കാല കായല്‍ യാത്രയില്‍ സര്‍ക്കാര്‍ ബോട്ടുകള്‍ കോരിയെടുത്തത് ലക്ഷങ്ങള്‍. യാത്രാപ്രേമികള്‍ ഏറെ ഇഷ്ടപ്പെടുന്ന കോട്ടയം-ആലപ്പുഴ കായല്‍ യാത്രയിലാണ് സര്‍ക്കാര്‍ ബോട്ടുകള്‍ ലാഭം കൊയ്തത്. അവധിക്കാലമായ ഏപ്രില്‍, മേയ് മാസത്തില്‍ ടിക്കറ്റിനത്തില്‍ അഞ്ചര ലക്ഷം രൂപയുടെ വരുമാനമാണ് കോട്ടയം കോടിമത സ്റ്റേഷനില്‍നിന്നു ജലഗതാഗത വകുപ്പിന് ലഭിച്ചത്. ഏപ്രിലില്‍ രണ്ടര ലക്ഷവും മേയില്‍ മൂന്ന് ലക്ഷവും ലഭിച്ചു. കഴിഞ്ഞ വര്‍ഷത്തേക്കാള്‍ മികച്ച വര്‍ധനയാണിത്. പ്രകൃതിഭംഗി ആസ്വദിച്ച് വേഗത്തില്‍ കോട്ടയത്തുനിന്ന് ആലപ്പുഴയില്‍ എത്താന്‍ ചെലവുകുറഞ്ഞൊരു യാത്രയാണിത്. 29 രൂപയാണ് ടിക്കറ്റ് നിരക്ക്. മുന്‍ വര്‍ഷങ്ങളില്‍നിന്നു വ്യത്യസ്തമായി ഇത്തവണ കായല്‍യാത്ര ആസ്വദിക്കാന്‍ എത്തിയവരുടെ എണ്ണത്തിലും വലിയ വര്‍ധനയുണ്ടായി. വിദേശികളേക്കാള്‍ കൂടുതലും സ്വദേശികളാണ് ഇത്തവണ എത്തിയത്. വടക്കന്‍ ജില്ലകളില്‍നിന്നുള്ളവരാണ് കൂടുതല്‍. രണ്ടുമാസത്തില്‍ 40,000 യാത്രക്കാരെത്തിയതായാണ് ജലഗതാഗത വകുപ്പിന്‍റെ കണക്ക്. കോടിമതയില്‍നിന്ന് രണ്ടും ആലപ്പുഴയില്‍നിന്ന് ഒരു ബോട്ടുമാണ് സര്‍വീസ് നടത്തുന്നത്. രണ്ടു മണിക്കൂര്‍ നീളുന്ന യാത്ര പുതിയൊരു അനുഭവമാണ് സഞ്ചാരികള്‍ക്ക് സമ്മാനിക്കുന്നത്. ഇതാണ് ഈ കായല്‍ യാത്രയുടെ പ്രത്യേകതയും. കോടിമതയില്‍നിന്ന് പുറപ്പെട്ട് കൊടൂരാറിലൂടെ കാഞ്ഞിരം, വെട്ടിക്കാട്, പുത്തന്‍തോട്, പള്ളിക്കായല്‍, ആര്‍ ബ്ലോക്ക്,പുന്നമട വഴി ആലപ്പുഴ ബോട്ട് ജെട്ടിയിലെത്തും. കോട്ടയത്തുനിന്ന് രാവിലെ 6.45, 11.30, ഒന്ന്, ഉച്ചകഴിഞ്ഞ് 3.30, വൈകുന്നേരം 5.15 എന്നീ സമയത്താണ് സര്‍വീസ്. ആലപ്പുഴയില്‍നിന്ന് രാവിലെ 7.15, 9.35, 11.30, ഉച്ചകഴിഞ്ഞ് 2.30, വൈകുന്നേരം 5.15 എന്നീ സമയങ്ങളിലാണ് മടക്ക ബോട്ട്. കായല്‍ യാത്രയിലൂടെ ലക്ഷങ്ങള്‍ വരുമാനം നേടിയെങ്കിലും സര്‍വീസിനായി ഇപ്പോഴും പഴയ ബോട്ടുകളാണ് ഉപയോഗിക്കുന്നത്. സോളാര്‍ സംവിധാനത്തില്‍ പ്രവര്‍ത്തിക്കുന്ന പുതിയ ബോട്ടുകള്‍ യാത്രയ്ക്കായി ഉപയോഗിക്കണമെന്ന ആവശ്യവും ശക്തമായി.

മലയോരത്തെ വിറപ്പിച്ച് 23 കാട്ടാനകൾ

മുണ്ടക്കയം: ഒരുമിച്ചുകൂടിയാല്‍ ഇരുപത്തിമൂന്ന്. ചിലപ്പോള്‍ ആറും ഏഴുമായി കൂട്ടം തെറ്റി പലവഴി തിരിയും. പെരുവന്താനം, പീരുമേട് മലയോരമേഖലയിലെ കാട്ടാനക്കൂട്ടം ജനവാസ മേഖലയിലും വനാതിര്‍ത്തിയിലുമായി മേയാന്‍ തുടങ്ങിയിട്ട് കാലമേറെയായി. മുണ്ടക്കയം ടിആര്‍ ആന്‍ഡ് ടി എസ്റ്റേറ്റിലെ റബര്‍ത്തോട്ടത്തില്‍ ടാപ്പിംഗ്തൊഴിലാളികള്‍ക്ക് മുന്നില്‍ വഴിമുടക്കിയും ചിന്നംവിളിച്ചും എത്തുന്നത് ഇതേസംഘംതന്നെ. അടുത്തയിടെ കുട്ടിക്കാനത്തിനു സമീപം റോഡ് കുറുകെ കടന്ന് റബര്‍ത്തോട്ടത്തിലൂടെ വാലേവാലേ നീങ്ങിയപ്പോഴാണ് പ്രദേശത്ത് വിഹരിക്കുന്നത് ആറു കുട്ടിയാനകള്‍ ഉള്‍പ്പെടെ ഇരുപത്തിമൂന്ന് ആനകളാണെന്ന് പ്രദേശവാസികള്‍ എണ്ണിത്തിട്ടപ്പെടുത്തിയത്. തീറ്റ കുറവായതിനാല്‍ ഇവ പെരിയാര്‍ ഉള്‍വനം കയറിപ്പോകാന്‍ കൂട്ടാക്കുന്നില്ല. കാലങ്ങളായി ഇതേ ആനക്കൂട്ടം ഒരുമിച്ചും വഴിതിരിഞ്ഞും പെരുവന്താനം, കോരുത്തോട്, പീരുമേട് പഞ്ചായത്ത് പരിധിയിലെ വനമേഖലയിലൂടെ ഊരുചുറ്റുകയാണ്. കഴിഞ്ഞ ദിവസം മതമ്പ വനാതിര്‍ത്തിയില്‍ കുട്ടിയാനകള്‍ ഉള്‍പ്പെടെ ഏഴ് ആനകള്‍ കൃഷിയിടം ഒരു പകല്‍ മേഞ്ഞ് ചവിട്ടിമെതിച്ചു. കാളകെട്ടി, കൊയ്‌നാട്, കോരുത്തോട്, മതമ്പ, മുറിഞ്ഞപുഴ, പുല്ലുമേട്, ചെന്നാപ്പാറ, കുഴിമാവ്, ബോധി, പ്ലാക്കത്തടം, അഴുത പ്രദേശങ്ങളിലാണ് ഒരേ താരയിലൂടെ ആനക്കൂട്ടങ്ങളുടെ പ്രയാണം. അഴുത നദിയിലും കൈത്തോടുകളിലും ഇടയ്ക്കിടെ നീരാട്ടുമുണ്ട്. വനപാലകര്‍ ആത്മാര്‍ഥത കാണിക്കുന്നയിടങ്ങളില്‍ പടക്കം പൊട്ടിച്ച് ആനകളെ വിരട്ടിയോടിക്കുന്നുണ്ട്. മറ്റിടങ്ങളില്‍ ജനങ്ങള്‍ ആവശ്യപ്പെട്ടാലും വനപാലകര്‍ തിരിഞ്ഞുനോക്കില്ല. ചക്കയുടെ സീസണ്‍ തീരാതെ ഇവയൊന്നും കാടുകയറി പോകില്ലെന്നാണ് പ്രദേശവാസികളുടെ അനുഭവം. മതമ്പ കൊമ്പന്‍പാറയില്‍ നാലു മാസം മുന്‍പ് സോഫിയ എന്ന വീട്ടമ്മയെ കാട്ടാന കുത്തിക്കൊന്നതിന്‍റെ ഭീതി ഇപ്പോഴും മാറിയിട്ടില്ല. ശബരിമല വനത്തിന്‍റെ അതിര്‍ത്തി പങ്കിടുന്ന മറ്റ് പ്രദേശങ്ങളില്‍ സോളാര്‍ വേലികളുണ്ട്. എന്നാല്‍, മതമ്പ, ചെന്നാപ്പാറ മേഖലകളില്‍ സോളര്‍വേലികള്‍ നശിച്ചനിലയിലായതിനാല്‍ ആനകള്‍ കൂട്ടമായി നാട്ടിലേക്ക് ഇറങ്ങുകയാണ്. റബര്‍ത്തോട്ടങ്ങളില്‍ ടാപ്പിംഗിന് പോകുന്ന തൊഴിലാളികളും പത്രവിതരണക്കാരുമൊക്കെയാണ് ഏറ്റവുമധികം ഭീതിയില്‍ കഴിയുന്നത്. കോരുത്തോട് പഞ്ചായത്തിലെ മടുക്ക കൊമ്പകുത്തി മുതല്‍ ടിആര്‍ ആന്‍ഡ് ടി എസ്റ്റേറ്റ് അതിര്‍ത്തിയിലൂടെ കടന്ന് പനക്കച്ചിറ, ഇഡികെ കടമാന്‍കളം, ചെന്നാപ്പാറ, മതമ്പ പ്രദേശങ്ങളിലൂടെയാണ് കാട്ടാനകളുടെ സഞ്ചാരം. കൊമ്പുകുത്തി വനത്തില്‍ മുന്‍പും ആനകള്‍ ഉണ്ടായിരുന്നെങ്കിലും ജനത്തിനു ഭീഷണിയായിരുന്നില്ല. 2020 മുതലാണ് പനക്കച്ചിറ ഭാഗത്തേക്ക് ആനകള്‍ ഇറങ്ങിത്തുടങ്ങിയത്. പിന്നീട് കടമാന്‍കുളം ഭാഗത്തേക്കും മതമ്പ ഭാഗത്തേക്കും ആനകള്‍ എത്തിത്തുടങ്ങി. നാട്ടിലിറങ്ങി വാഴ, കപ്പ, തെങ്ങ്, പ്ലാവ് എന്നിവ വ്യാപകമായി ഇവ നശിപ്പിക്കുന്നു.

ദീപികയെ നെഞ്ചിലേറ്റിയ മോൻസിച്ചായൻ മടങ്ങി; മോൻസിക്കടവ് മൂകമായി

സ്വന്തം ലേഖകൻ കോട്ടയം: ഒരു തൊഴിൽ എന്ന നിലയിലും വരുമാനം എന്ന നിലയിലും പത്രത്തിന്‍റെ ഏജൻസി എടുക്കുന്നവരാണ് എല്ലാവരുംതന്നെ. എന്നാൽ, അവരിൽനിന്നു തികച്ചും വ്യത്യസ്തനായിരുന്നു കഴിഞ്ഞ ദിവസം അന്തരിച്ച പള്ളം നങ്ങച്ചിവീട്ടിൽ ആന്‍റണി ജോസഫ് എന്ന നാട്ടുകാരുടെ മോൻസിച്ചായൻ. ദീപികയോടുള്ള സ്നേഹത്തെപ്രതി പത്രം വായിക്കാൻ കിട്ടാൻ വേണ്ടി മാത്രം ദീപികയുടെ ഏജൻസി എടുത്തയാളാണ് മോൻസിച്ചായൻ. പതിനഞ്ചു വർഷങ്ങൾക്കു മുന്പ് ദീപികയുടെ ഏജൻസിയിൽ ചില തടസങ്ങളുണ്ടായി ഇവർ താമസിക്കുന്ന പ്രദേശത്തു ദീപിക പത്രം കിട്ടാൻ ബുദ്ധിമുട്ട് വന്നു. പല രീതിയിലും ശ്രമിച്ചിട്ടും പത്രം കൃത്യമായി കിട്ടാതെ വന്നതോടെ മോൻസിച്ചായൻ സ്വന്തം നിലയിൽ ദീപികയുടെ ഏജൻസി എടുക്കാൻ തീരുമാനിച്ചു. സമീപവാസികളായ ചില സുഹൃത്തുക്കളെയും വരിക്കാരായി കൂട്ടി. അങ്ങനെ അഞ്ചു പത്രത്തിന്‍റെ ഏജൻസിക്കു തുടക്കമിട്ടു. ഇങ്ങനെ വരുത്തിയ പത്രം വിതരണം ചെയ്യുന്നവരെ ഏല്പിച്ച് ഈ വീടുകളിൽ എത്തിക്കുകയായിരുന്നു. കുറെക്കാലത്തിനു ശേഷം അദ്ദേഹം ഏജൻസിയുടെ നടത്തിപ്പ് മറ്റൊരു ഏജന്‍റിനെ ഏൽപ്പിച്ചു. കൈനകരിയിൽനിന്നുവന്നു പള്ളം ബോർമക്കവലയ്ക്കു സമീപം താമസമാക്കിയ മോൻസിച്ചായൻ മികച്ച കർഷകൻകൂടിയായിരുന്നു. എൺപത്തിനാലാം വയസിലും കൃഷിയിൽ സജീവമായി നിന്നു. കുട്ടനാട്ടിൽ അടുത്ത കാലംവരെ കായൽ കൃഷി ചെയ്തു. കൂടാതെ പള്ളത്ത് നെൽകൃഷി, ഫാം, മീൻ വളർത്തൽ ഉൾപ്പെടെ നടത്തിയിരുന്നു. കഴിഞ്ഞ ദിവസം കൃഷി ഒാഫീസിലേക്കു പോകവേയാണ് കുഴഞ്ഞുവീണു മരിച്ചത്. ഇദ്ദേഹവും കുടുംബവും താമസിക്കുന്ന സ്ഥലത്തിനു സമീപമുള്ള കടവിന്‍റെ പേരുതന്നെ മോൻസിക്കടവ് എന്നാണ്. ചങ്ങനാശേരിയിൽനിന്നു നടത്തുന്ന അൽഫോൻസാ തീർഥാടനത്തിനു പള്ളം സെന്‍റ് പോൾസ് ഒാർത്തഡോക്സ് പള്ളി പരിസരത്തു വിശ്രമത്തിനും ഭക്ഷണത്തിനുമുള്ള ക്രമീകരണങ്ങളെല്ലാം ചെയ്യാൻ പതിറ്റാണ്ടുകളായി മോൻസിച്ചായൻ നേതൃനിരയിലുണ്ടായിരുന്നു. ഫാ. ജോർജ് നങ്ങച്ചിവീട്ടിൽ (അമേരിക്ക), സിസ്റ്റർ മേരി ഗ്രേസ് സിഎംസി, സിസ്റ്റർ റീമ എംഎസ്ജെ എന്നിവർ സഹോദരങ്ങളാണ്. ഏഷ്യയിലെ മാർത്തോമ്മ സഭകൾ എന്ന പ്രശസ്തമായ ഗ്രന്ഥം രചിച്ച റവ.ഡോ. എൻ.എ. തോമസ് നങ്ങച്ചിവീട്ടിൽ ഇദ്ദേഹത്തിന്‍റെ പിതൃസഹോദരനാണ്. സംസ്കാര ശുശ്രൂഷ ഇന്നു രാവിലെ 11ന് വീട്ടിൽ ആരംഭിച്ച് കടുവാക്കുളം ലിറ്റിൽ ഫ്ളവർ പള്ളിയിൽ. ഭാര്യ എൽസി ആന്‍റണി കാഞ്ഞിരപ്പള്ളി ഏർത്തയിൽ കുടുംബാംഗം. മക്കൾ: റോസി, മേഴ്സി. മരുമക്കൾ: ബിജു ഡൊമിനിക് നടുവിലേഴം (അബുദാബി, പ്രസിഡന്‍റ്; കത്തോലിക്ക കോൺഗ്രസ് യുഎഇ), ബിജോയി ജോസ് വെള്ളാമത്ര (അബുദാബി).

ശബരി റെയില്‍ ; സ്ഥലം ഏറ്റെടുക്കല്‍ വൈകിയേക്കും

കോട്ടയം: ശബരി റെയില്‍വേയ്ക്ക് സ്ഥലം ഏറ്റെടുക്കല്‍ നടപടി വൈകിയേക്കും. നാലായിരം കോടിയോളം മുടക്കില്‍ സംസ്ഥാനത്തിന്‍റെ വിഹിതം എത്രയെന്നതില്‍ ചര്‍ച്ചയോ ധാരണയോ ഉണ്ടായിട്ടില്ല. സ്ഥലം ഏറ്റെടുക്കല്‍ സംസ്ഥാന സര്‍ക്കാര്‍ നടത്തണമെന്നാണു കേന്ദ്രനിലപാട്. നിലവില്‍ മതിപ്പുവിലയുടെ മൂന്നിരട്ടി പൊന്നുംവിലയായി നല്‍കി വേണം കാലടി മുതല്‍ പിഴക് വരെ സ്ഥലം ഏറ്റെടുക്കേണ്ടത്. 2,125 കുടുംബങ്ങളുടെ കൈവശത്തിലുള്ള 416 ഹെക്ടര്‍ ഭൂമിയാണു സംസ്ഥാന സര്‍ക്കാര്‍ ഇനി ഏറ്റെടുക്കേണ്ടത്. ഭൂമി ഇതോടകം വിട്ടുകൊടുത്ത 2,862 കുടുംബങ്ങള്‍ നഷ്ടപരിഹാരം ലഭിക്കാതെ കാല്‍ നൂറ്റാണ്ടിലേറെയായി ആശങ്കയിലാണ്. കല്ല് സ്ഥാപിച്ച ഭൂമി വില്‍ക്കാനോ പണയപ്പെടുത്താനോ നിര്‍മാണം നടത്താനോ കൃഷി ചെയ്യാനോ ഇവര്‍ക്ക് കഴിയുന്നില്ല. മക്കള്‍ക്ക് ഓഹരി കൊടുക്കാന്‍പോലും സാധിക്കാത്ത കുടുംബങ്ങളുമുണ്ട്. അങ്കമാലി മുതല്‍ പിഴക് വരെ 70 കിലോമീറ്ററിലാണ് സര്‍വേക്കല്ലുകളുള്ളത്. അങ്കമാലി മുതല്‍ എരുമേലി വരെ 111 കിലോമീറ്ററാണ് ശബരി പാതയ്ക്കുള്ളത്. സ്ഥലം ഏറ്റെടുക്കലിന് മുന്നോടിയായി പെരുമ്പാവൂര്‍, തൊടുപുഴ, പാലാ എന്നിവിടങ്ങളില്‍ പുതിയ ഓഫീസുകള്‍ തുടങ്ങണം. ഒരു തഹസീല്‍ദാര്‍ ഉള്‍പ്പെടെ 30 പേരാണ് ഓരോ ഓഫീസിലും വേണ്ടത്. റവന്യു വകുപ്പില്‍നിന്ന് ഇത്രത്തോളം പേരെ മാറ്റിനിയമിക്കുക ഏറെ ദുഷ്‌കരമാണ്. മൂന്നാം ഘട്ടമായി പിഴക് മുതല്‍ എരുമേലി വരെ അന്തിമ അലൈന്‍മെന്‍റ് നിശ്ചയിക്കേണ്ടതുണ്ട്. പിന്നീട് വേണം സ്ഥലം ഏറ്റെടുക്കാന്‍. അങ്കമാലി, കാലടി, പെരുമ്പാവൂര്‍, ഓടക്കാലി, കോതമംഗലം, മൂവാറ്റുപുഴ, വാഴക്കുളം, തൊടുപുഴ, കരിങ്കുന്നം എന്നിവയാണ് എറണാകുളം, ഇടുക്കി ജില്ലകളിലെ സ്റ്റേഷനുകള്‍. ഇതില്‍ മൂവാറ്റുപുഴ, തൊടുപുഴ, പാലാ, കാഞ്ഞിരപ്പള്ളി എന്നിവിടങ്ങളില്‍ റെയില്‍വേ സ്റ്റേഷനുകള്‍ വരുന്ന സ്ഥലം നഗരങ്ങളില്‍നിന്ന് ഏറെ മാറിയാണെന്ന വിമര്‍ശനം ചിലയിടങ്ങളില്‍ ഉയരുന്നുണ്ട്. എന്നാല്‍ ഇക്കാര്യം പ്രായോഗികമല്ലെന്നാണ് റെയില്‍വേയുടെ നിലപാട്. കോട്ടയം ജില്ലയില്‍ രാമപുരം, ഭരണങ്ങാനം, ചെമ്മലമറ്റം, കാഞ്ഞിരപ്പള്ളി റോഡ്, എരുമേലി എന്നിങ്ങനെ അഞ്ച് സ്റ്റേഷനുകളാണ് പാതയ്ക്കായി നിര്‍ദേശിച്ചിരിക്കുന്നത്. ശബരി പാതയുടെ ഭൂമി ഏറ്റെടുക്കല്‍ നടപടികളുമായി ബന്ധപ്പെട്ട് റെയില്‍വേയുടെ വിദഗ്ധസംഘം അടുത്ത മാസം കേരളത്തിലെത്തും. അങ്കമാലി മുതല്‍ കാലടി വരെ ഏഴു കിലോമീറ്റര്‍ റെയില്‍വേ ലൈനും കാലടിയില്‍ സ്റ്റേഷനും പെരിയാറിനു കുറുകെ പാലവും നിര്‍മാണം നടത്തിയിട്ട് 25 വര്‍ഷമായി.മൂന്നു ജില്ലകളെ 14 പട്ടണങ്ങള്‍ക്കു ട്രെയിന്‍ യാതാസൗകര്യം ലഭ്യമാക്കുന്ന പദ്ധതിയാണ് ശബരി റെയില്‍. ഇതോടെ ഇടുക്കി ജില്ലയും റെയില്‍വേ ഭൂപടത്തില്‍ ഇടംനേടും. സാമൂഹിക ആഘാത പഠനം പൂര്‍ത്തിയാക്കിയതിനാല്‍ ഒന്നാം ഘട്ടമായി തൊടുപുഴ വരെ ഭൂമിയേറ്റെടുക്കാന്‍ കാലതാമസമുണ്ടാകില്ല. 1998ല്‍ വാജ്പേയി സര്‍ക്കാരിന്‍റെ കാലത്താണ് അങ്കമാലി-എരുമേലി പാതയ്ക്ക് അവസാന അംഗീകാരം ലഭിക്കുന്നത്. കാലടി-തൊടുപുഴ 48 കിലോമീറ്ററാണ്. ആയിരംകോടി രൂപയുണ്ടെങ്കില്‍ തൊടുപുഴ വരെ പാത നിര്‍മിക്കാന്‍ കഴിയും.1997ല്‍ ശബരിപാതയ്ക്ക് അനുമതി ലഭിച്ചപ്പോള്‍ ചെലവ് 540 കോടി രൂപയായിരുന്നത് നടപടികള്‍ നീണ്ടതോടെ 2017ല്‍ 2815 കോടി രൂപയായി. സ്ഥലമേറ്റെടുക്കുന്നതിലും പദ്ധതിയുടെ ചെലവു പങ്കിടുന്ന കാര്യത്തിലും തീരുമാനം വൈകിയതോടെ 2019ല്‍ റെയില്‍വേ പദ്ധതി മരവിപ്പിച്ചു. നിലവില്‍ ചെലവ് നാലായിരം കോടിയോളം വരും.

പോലീസ് ഉദ്യോഗസ്ഥർ ചുമതലയേറ്റു

കോട്ടയം: ജില്ലയിലെ പുതിയ അഡിഷണല്‍ എസ്പിയായി ചങ്ങനാശേരി ഡിവൈഎസ്പിയായിരുന്ന എ.കെ. വിശ്വനാഥന്‍ ചുമതലയേറ്റു. വൈക്കം ഡിവൈഎസ്പിയായി ഇടുക്കി ക്രൈംബ്രാഞ്ച് ഡിവൈഎസ്പിയായിരുന്ന ടി.ബി. വിജയനും കാഞ്ഞിരപ്പള്ളി ഡിവൈഎസ്പിയായി കോട്ടയം ക്രൈംബ്രാഞ്ച് ഡിവൈഎസ്പിയായിരുന്ന സാജു വര്‍ഗീസും ചുമതലയേറ്റു. പള്ളിക്കത്തോട് പോലീസ് ഇന്‍സ്പെക്ടറായിരുന്ന കെ.പി. ടോംസണ്‍ ചങ്ങനാശേരി ഡിവൈഎസ്പിയായും കോട്ടയം ക്രൈംബ്രാഞ്ച് ഡിവൈഎസ്പിയായി കൊച്ചി സിറ്റി കണ്‍ട്രോള്‍ ഇന്‍സ്പെക്ടറായിരുന്ന വി.എസ്. അനില്‍കുമാറും ചുമതലയേറ്റു.

വിതുര പീഡനക്കേസ്: നാലാംഘട്ട തുടര്‍വിചാരണ അടുത്തമാസം 16ന്

കോട്ടയം: വിതുര പീഡനക്കേസില്‍ നാലാംഘട്ട തുടര്‍വിചാരണ അടുത്തമാസം 16ലേക്കു മാറ്റി. ജൂണ്‍ 16നു നടത്താനിരുന്ന വിചാരണ അടുത്തമാസത്തേക്കു മാറ്റുകയായിരുന്നു. ഒന്നാം സാക്ഷിയായ അതിജീവിതയുടെ പ്രോസിക്യൂഷന്‍ ഭാഗം വിചാരണയാണു നടക്കുന്നത്. നേരത്തെ സാക്ഷിവിസ്താരം തുടങ്ങിയപ്പോള്‍ ഒന്നാംപ്രതി കൊല്ലം ജുബൈറ മന്‍സിലില്‍ സുരേഷ് (ഷംസുദ്ദീന്‍ മുഹമ്മദ് ഷാജഹാന്‍-52)നെ ഓണ്‍ലൈനായി കോടതിയില്‍ ഹാജരാക്കിയിരുന്നു. വിചാരണവേളയില്‍ അതിജീവിത പ്രതിയെ തിരിച്ചറിയുന്ന ഘട്ടത്തിലെത്തിയപ്പോള്‍ കോടതിയില്‍ നേരില്‍ ഹാജരാക്കണമെന്ന് ഇയാള്‍ ആവശ്യപ്പെട്ടതിനാല്‍ കേസ് മാറ്റിവച്ചു. പിന്നീട് ജഡ്ജി സ്ഥലംമാറിപ്പോകുകയും പുതിയ ജഡ്ജി ചുമതലയേല്‍ക്കുകയും ചെയ്തതോടെയാണ് സാക്ഷിവിചാരണ അടുത്ത 16നു പുനരാരംഭിക്കുന്നത്. ഒന്നാംപ്രതി സുരേഷിനെ വിചാരണദിവസം കോടതിയില്‍ ഹാജരാക്കും. വിതുര പീഡനക്കേസായി രജിസ്റ്റര്‍ ചെയ്ത 24 കേസുകളില്‍ 23 എണ്ണവും വിചാരണഘട്ടത്തിലാണ്. ഒരു കേസില്‍ മാത്രമാണ് ശിക്ഷ വിധിച്ചത്. ഇതില്‍ ജീവപര്യന്തം ശിക്ഷ സെന്‍ട്രല്‍ ജയിലില്‍ അനുഭവിച്ചുവരികയാണ് ഒന്നാംപ്രതി സുരേഷ്. 24 കേസുകളിലെയും ഒന്നാംപ്രതി ഇയാള്‍ തന്നെയാണ്. വിചാരണയിലുള്ള എല്ലാക്കേസുകളിലും കുറ്റം സമ്മതിക്കാന്‍ തന്നെ അനുവദിക്കണമെന്നും ശിക്ഷിക്കണമെന്നും ആവശ്യപ്പെട്ട് ഒന്നാം പ്രതി സുരേഷ് വിചാരണക്കോടതിയില്‍ നല്‍കിയ അപേക്ഷ പ്രോസിക്യൂഷന്‍റെ എതിര്‍പ്പിനെത്തുടര്‍ന്ന് പ്രതിഭാഗം പിന്‍വലിച്ചിരുന്നു. 1995ല്‍ വിതുര സ്വദേശിനിയായ പെണ്‍കുട്ടിയെ അകന്ന ബന്ധുവായ യുവതി വീട്ടില്‍നിന്നിറക്കിക്കൊണ്ടുവന്ന് ഒന്നാം പ്രതി സുരേഷിന് കൈമാറുകയും 1996 ജൂലൈ വരെ എട്ട് മാസത്തിലേറെ സംസ്ഥാനത്തിനകത്തും പുറത്തും നിരവധിപേര്‍ക്ക് കൈമാറി പീഡിപ്പിക്കുകയും ചെയ്തെന്നാണ് പ്രോസിക്യൂഷന്‍ കേസ്. ഇതില്‍ ആദ്യ കേസിലാണ് ഇപ്പോള്‍ വിചാരണ തുടങ്ങിയത്. മറ്റ് 18 കേസുകളിലെ 45 പ്രതികളെയാണ് ഇതുവരെ കോടതി കുറ്റവിമുക്തരാക്കിയത്. പ്രോസിക്യൂഷനുവേണ്ടി സ്‌പെഷല്‍ പബ്ലിക് പ്രോസിക്യൂട്ടര്‍ അഡ്വ. രാജഗോപാല്‍ പടിപ്പുരയ്ക്കല്‍ ഹാജരാകും. കോട്ടയം അഡീഷണല്‍ ജില്ലാ സെഷന്‍സ് കോടതി (രണ്ട്) ആണ് കേസ് പരിഗണിക്കുന്നത്.

നൈജീരിയയിലെ വംശഹത്യ ഭയാനകം: കത്തോലിക്ക കോണ്‍ഗ്രസ്

പാലാ: നൈജീരിയയിലെ ബെന്യു സംസ്ഥാനത്ത് ഫുലാനി ഭീകരര്‍ നടത്തിയ ആക്രമണം ഭയാനകവും അപലപനീയവുമാണെന്ന് കത്തോലിക്കാ കോണ്‍ഗ്രസ് പാലാ രൂപത സമിതി. ഈ ആഫ്രിക്കന്‍ രാജ്യത്ത് ദീര്‍ഘനാളായി നടക്കുന്ന സംഘര്‍ഷവും അതിന്‍റെ മറവിലെ വംശഹത്യയും അവസാനിപ്പിക്കാന്‍ അന്താരാഷ്ട്ര സമൂഹം ഇടപെടണമെന്ന് യോഗം ആവശ്യപ്പെട്ടു. പരിക്കേറ്റവര്‍ക്ക് ചികിത്സ പോലും ലഭ്യമാകാത്തതില്‍ യോഗം ആശങ്ക രേഖപ്പെടുത്തി. കഴിഞ്ഞ ദിവസമുണ്ടായ ആക്രമണത്തില്‍ മരിച്ച ഇരുനൂറോളം പേര്‍ക്കായി പ്രത്യേകം പ്രാര്‍ഥനയും നടത്തി. രൂപത പ്രസിഡന്‍റ് ഇമ്മാനുവല്‍ നിധീരിയുടെ അധ്യക്ഷതയില്‍ റവ. ഡോ. ജോര്‍ജ് വര്‍ഗീസ് ഞാറക്കുന്നേല്‍, ജോസ് വട്ടുകുളം, ആന്‍സമ്മ സാബു, ജോയി കണിപറമ്പില്‍, അഡ്വ. ജോണ്‍സണ്‍ വീട്ടിയാങ്കല്‍, സി.എം ജോര്‍ജ്, പയസ് കവളംമാക്കല്‍, സാബു പൂണ്ടിക്കുളം ജോണ്‍സണ്‍ ചെറുവള്ളി, ടോമി കണ്ണീറ്റുമാലില്‍, ബെന്നി കിണറ്റുകര, സിന്ധു ജയബു, രാജേഷ് പാറയില്‍, ജോബിന്‍ പുതിയടത്തുചാലില്‍, എഡ്വിന്‍ പാമ്പാറ, ലിബി മണിമല തുടങ്ങിയവര്‍ പ്രസംഗിച്ചു.

മണിയംകുന്ന് മഠംവാതില്‍ - വളതൂക്ക് റോഡ് ഗതാഗതയോഗ്യമാക്കണം

മണിയംകുന്ന്: മണിയംകുന്ന് മഠം വാതില്‍- വളതൂക്ക് റോഡ് നവീകരണം പൂര്‍ത്തിയാക്കി ഗതാഗതയോഗ്യമാക്കണമെന്നു നാട്ടുകാര്‍ നിവേദനത്തിലൂടെ സെബാസ്റ്റ്യൻ കുളത്തുങ്കല്‍ എംഎല്‍എയോട് ആവശ്യപ്പെട്ടു. പൂഞ്ഞാര്‍ പഞ്ചായത്തിലെ എട്ടാം വാര്‍ഡിലെ ഈ റോഡ് നന്നാക്കണമെന്നാവശ്യപ്പെട്ടു പലപ്രാവശ്യം അധികൃതര്‍ക്കു നിവേദനം നല്‍കിയിട്ടും തിരിഞ്ഞുനോക്കിയിട്ടില്ലെന്നാണ് നാട്ടുകാരുടെ പരാതി. മണിയംകുന്ന് പള്ളി, സെന്‍റ് ജോസഫ്‌സ് സ്‌കൂള്‍, മണിയംകുന്ന് മഠം എന്നിവിടങ്ങളിലേക്ക് വളതൂക്ക് ഭാഗത്തുനിന്നും എത്തുന്നതിനുള്ള ഏകവഴിയാണിത്. ഈ റോഡിന്‍റെ കുറച്ചുഭാഗം വിവിധ പദ്ധതികളില്‍ ഉള്‍പ്പെടുത്തി ടാറിംഗ് ചെയ്തിട്ടുണ്ട്. ബാക്കിയുള്ള ഭാഗം മെറ്റലിളകിയും കുഴികളായും ചെളി നിറഞ്ഞും ജനങ്ങളെ ബുദ്ധിമുട്ടിക്കുകയാണ്. കുട്ടികളുൾപ്പെ‌ടെയുള്ള യാത്രക്കാർ അപകടം നിറഞ്ഞ റോഡിലൂടെയാണ് യാത്ര ചെയ്യുന്നത്. റോഡിന്‍റെ ബാക്കിഭാഗം കോണ്‍ക്രീറ്റോ ടാറിംഗോ നടത്തി വാഹനങ്ങള്‍ക്കും യാത്രക്കാര്‍ക്കും സഞ്ചരിക്കാനുള്ള മാർഗം ഒരുക്കണമെന്നാണ് ജനങ്ങളുടെ ആവശ്യം. എംഎല്‍എയുടെ പ്രാദേശികവികസന ഫണ്ടില്‍നിന്നും തുക അനുവദിക്കണമെന്നും നാട്ടുകാര്‍ ആവശ്യപ്പെടുന്നു. മണിയംകുന്ന് പള്ളി വികാരി ഫാ. ജോര്‍ജ് തെരുവിലിന്‍റെ നേതൃത്വത്തിലാണ് ഒപ്പിട്ട നിവേദനം സമര്‍പ്പിച്ചിരിക്കുന്നത്.

കാൽനടയാത്രക്കാർക്ക് കഷ്ടകാലം; റോഡരിക് കണ്ടാൽ കാട് തോറ്റുപോകും

കുറവിലങ്ങാട്: എംസി റോഡിലുൾപ്പെടെ കാൽനടയാത്രക്കാർ റോഡരികിലെ പച്ചിലപ്പടർപ്പുകൾ വകഞ്ഞുമാറ്റി യാത്രനടത്തേണ്ട സ്ഥിതിയിൽ. ഒന്നാംനമ്പർ സംസ്ഥാന ഹൈവേയടക്കം കാടുകയറിയിട്ടും നടപടികളില്ലാത്തതിൽ പ്രതിഷേധവും ഉയരുന്നുണ്ട്. റോഡരികിലെ പച്ചിലപ്പടർപ്പുകൾ പലയിടങ്ങളിലും ബസ് കാത്തിരിപ്പ് കേന്ദ്രങ്ങളിലേക്കുപോലും പ്രവേശിച്ച് തുടങ്ങിയിട്ടുണ്ട്. ചിലയിടങ്ങളിൽ സ്വകാര്യ വ്യക്തികളും സംഘടനകളും പാതയോരങ്ങൾ ശുചീകരിച്ചിട്ടുണ്ട്. കാൽനടയാത്രക്കാരേക്കാൾ കൂടുതൽ ഉയരത്തിലാണ് പലസ്ഥലങ്ങളിലും പച്ചിലപ്പടർപ്പുകൾ നിൽക്കുന്നത്. ഇരമ്പിപ്പായുന്ന വാഹനങ്ങളിൽ നിന്ന് രക്ഷനേടാനായി കാൽനടയാത്രക്കാർ റോഡരികിലേക്ക് മാറിനിൽക്കാൻ ശ്രമിച്ചാലും കഴിയാത്ത സ്ഥിതിയാണ്. ഇഴജന്തുക്കളുടെ സാന്നിധ്യവും പ്രതിസന്ധി സൃഷ്ടിക്കുന്നുണ്ട്.

രക്തദായക ദിനാചരണവും മെഗാ രക്തദാന ക്യാമ്പും

പാലാ: ജില്ലാ ആരോഗ്യവകുപ്പിന്‍റെയും ആരോഗ്യ കേരളത്തിന്‍റെയും പാലാ ബ്ലഡ് ഫോറത്തിന്‍റെയും പാലാ സെന്‍റ് തോമസ് കോളജ് എന്‍എസ്എസ് യൂണിറ്റിന്‍റെയും നേതൃത്വത്തില്‍ ജില്ലാതല ലോക രക്തദായക ദിനാചരണവും മെഗാ രക്തദാന ക്യാമ്പും പാലായില്‍ നടന്നു. പാലാ സെന്‍റ് തോമസ് കോളജ് ഓഡിറ്റോറിയത്തില്‍ നടന്ന ദിനാചരണ സമ്മേളനം ജില്ലാ മെഡിക്കല്‍ ഓഫീസര്‍ ഡോ. എന്‍. പ്രിയ ഉദ്ഘാടനം ചെയ്തു. കോളജ് പ്രിന്‍സിപ്പൽ ഡോ. സിബി ജെയിംസ് അധ്യക്ഷത വഹിച്ചു. ആരോഗ്യകേരളം ജില്ലാ പ്രോഗ്രാം മാനേജര്‍ ഡോ. വ്യാസ് സുകുമാരന്‍, മുനിസിപ്പല്‍ കൗണ്‍സിലര്‍ ബൈജു കൊല്ലംപറമ്പില്‍, പാലാ ബ്ലഡ് ഫോറം ജനറല്‍ കണ്‍വീനര്‍ ഷിബു തെക്കേമറ്റം, എന്‍എസ്എസ് പ്രോഗ്രാം ഓഫീസര്‍മാരായ ഡോ. പ്രിന്‍സി ഫിലിപ്പ്, ഡോ. ആന്‍റോ മാത്യു, ആരോഗ്യകേരളം പ്രോഗ്രാം കോഓര്‍ഡിനേറ്റര്‍ സി.ആര്‍. വിനീഷ്, ഡെപ്യൂട്ടി മാസ് ഇന്‍ ചാര്‍ജ് ജി. ജയരാജ്, സിബി മാത്യു പ്ലാത്തോട്ടം, ഡോ. മാമച്ചന്‍ , സിസ്റ്റര്‍ ബിന്‍സി എഫ്‌സിസി, സിസ്റ്റര്‍ ആലീസ് ഔസേപ്പറമ്പില്‍, സജി വട്ടക്കാനാല്‍, ജയ്‌സണ്‍ പ്ലാക്കണ്ണി, ഷാജി തകിടിയേല്‍, സൂരജ് പാലാ എന്നിവര്‍ പ്രസംഗിച്ചു. മെഗാ രക്തദാന ക്യാമ്പ് പാലാ ബ്ലഡ് ഫോറം ജനറല്‍ കണ്‍വീനര്‍ ഷിബു തെക്കേമറ്റം ഉദ്ഘാടനം ചെയ്തു. പാലാ മരിയന്‍ മെഡിക്കല്‍ സെന്‍റര്‍ ബ്ലഡ് ബാങ്കും ഭരണങ്ങാനം ഐഎച്ച്എം ബ്ലഡ് ബാങ്കുമാണ് ക്യാമ്പ് നയിച്ചത്.

കുഞ്ഞച്ചന്‍ മിഷനറി ഭവന് അരീക്കരയില്‍ പുതിയ മന്ദിരം

രാമപുരം: അനാഥരുടെയും മാനസിക വെല്ലുവിളികള്‍ നേരിടുന്നവരുടെയും ആശ്രയ കേന്ദ്രമായ കുഞ്ഞച്ചന്‍ മിഷനറി ഭവന്‍റെ ഏഴാമത് കേന്ദ്രം അരീക്കരയില്‍ പ്രവര്‍ത്തനമാരംഭിച്ചു. രാമപുരം വിന്‍സെന്‍റ് ഡി പോള്‍ സൊസെറ്റിയുടെ കീഴില്‍ പ്രവര്‍ത്തിക്കുന്ന കുഞ്ഞച്ചന്‍ മിഷനറി ഭവന് രാമപുരം പഞ്ചായത്തില്‍ മൂന്നു കേന്ദ്രങ്ങളും മറ്റത്തിപ്പാറ, കുറുപ്പുന്തറ, പിറവം, അരീക്കര എന്നിവിടങ്ങളില്‍ ഓരോ കേന്ദ്രങ്ങളുമുണ്ട്. ഈ കേന്ദ്രങ്ങളിലായി മുന്നൂറോളം അന്തേവാസികളെയാണ് സംരക്ഷിക്കുന്നത്. കഴിഞ്ഞ കാല്‍ നൂറ്റാണ്ടിലേറെയായി നിരാലംബരായവര്‍ക്ക് ആശ്രയമായി മാതൃകാപരമായ ജീവകാരുണ്യ സേവന പ്രവര്‍ത്തനങ്ങള്‍ നടത്തി വരുന്ന കുഞ്ഞച്ചന്‍ മിഷനറി ഭവന്‍റെ പുതിയ കേന്ദ്രത്തില്‍ ജന്മനാ വൈകല്യമുള്ളവരും ഓട്ടിസം എംആര്‍ ബാധിച്ചവരും നിരാശ്രയരായവരുമായ ഇരുപത് ആളുകളെ പരിപാലിക്കുന്നതിനുള്ള സൗകര്യം ഏര്‍പ്പെടുത്തിയിട്ടുണ്ട്. അരീക്കര എറിക്കാട്ട് കുടുംബം സൗജന്യമായി നിര്‍മിച്ചു നല്‍കിയതാണ് ഈ കെട്ടിടം. അരീക്കര സെന്‍റ് റോക്കീസ് പള്ളി വികാരി ഫാ. കുര്യന്‍ ചുഴുകുന്നേല്‍ വെഞ്ചരിപ്പ് കര്‍മം നിര്‍വഹിച്ചു. കൂത്താട്ടുകുളം ഫൊറോന പള്ളി വികാരി ഫാ. ജെയിംസ് കുടിലില്‍, ഉഴവൂര്‍ ബ്ളോക്ക് പഞ്ചായത്ത് പ്രസിഡന്‍റ് രാജു ജോണ്‍ ചിറ്റേത്ത്, ഡോ. സിന്ധുമോള്‍ ജേക്കബ്, ഉഷ സന്തോഷ്, അഡ്വ. ബിജു പുന്നത്താനം, സണ്ണി പുതിയിടം, കോ-ഓര്‍ഡിനേറ്റര്‍ ബിനോയി ജയിംസ് ഊടുപുഴ എന്നിവര്‍ പങ്കെടുത്തു.

കുറിഞ്ഞി അത്താനിയില്‍ കാര്‍ തലകീഴായി മറിഞ്ഞു

രാമപുരം: പാലാ - തൊടുപുഴ റോഡില്‍ കുറിഞ്ഞിക്ക് സമീപം അത്താനിയില്‍ കാര്‍ നിയന്ത്രണം വിട്ട് മറിഞ്ഞ് ഡ്രൈവര്‍ക്ക് പരിക്കേറ്റു. കഴിഞ്ഞ ദിവസം വൈകുന്നേരം 4.30 നാണ് അപകടം നടന്നത്. തൊടുപുഴ ഭാഗത്തുനിന്നു പാലായിലേക്ക് പോവുകയായിരുന്ന കാറാണ് അപകടത്തില്‍പെട്ടത്. റോഡിന്‍റെ സൈഡിലെ മൈല്‍ കുറ്റികള്‍ ഇടിച്ചുതകര്‍ത്ത് നിരവധി തവണ തലകീഴായി മറിയുകയായിരുന്നു. വാഹനം ഓടിച്ചിരുന്ന തൃപ്പൂണിത്തുറ ചിറ്റയില്‍ വീട്ടില്‍ ദാസന്‍റെ മകന്‍ സജിത്തി(30) നെ പരിക്കുകളോടെ പ്രവിത്താനത്തെ എംകെഎം ആശുപത്രിയില്‍ പ്രവേശിപ്പിച്ചു.

കൊഴുവനാല്‍ പഞ്ചായത്തിന്‍റെ ആംബുലന്‍സ് കട്ടപ്പുറത്ത്

കൊഴുവനാല്‍: രോഗികള്‍ക്ക് സൗജന്യ സേവനം എന്ന നിലയില്‍ ആരംഭിച്ച ആംബുലന്‍സ് പഞ്ചായത്തിന്‍റെ മുറ്റത്ത് തുരുമ്പെടുത്ത് നശിക്കുന്നു. പഞ്ചായത്തില്‍ 2009 ല്‍ ജോസ്‌മോന്‍ മുണ്ടയ്ക്കല്‍ പ്രസിഡന്‍റായിരുന്ന കാലത്ത് വാങ്ങിയ ആംബുലന്‍സാണ് മൂന്നു വര്‍ഷത്തിലേറെയായി കട്ടപ്പുറത്തായിരിക്കുന്നത്. ഡ്രൈവറെ നിയമിക്കുന്നത് സംബന്ധിച്ച പഞ്ചായത്ത് അംഗങ്ങളുടെ തര്‍ക്കമാണ് ആംബുലന്‍സ് ഷെഡ്ഡില്‍ കയറാന്‍ കാരണമെന്നു പറയപ്പെടുന്നു. 2024 ല്‍ വാഹനത്തിന്‍റെ കാലാവധി 15 വര്‍ഷം പൂര്‍ത്തിയാവുകയും ചെയ്തു. ഈ വാഹനം റീ രജിസ്റ്റര്‍ ചെയ്യാന്‍ അധികൃതര്‍ക്ക് താല്പര്യവുമില്ല. ഇതിനാല്‍ ഈ വാഹനം തുരുമ്പെടുത്ത് നശിക്കാനുള്ള സാധ്യതയാണ് മുന്നിലുള്ളത്. പാലിയേറ്റീവിന് വേണ്ടി ഒരു ആംബുലന്‍സ് കൂടി ഇവിടുള്ളതാണ് മുമ്പുണ്ടായിരുന്ന ആംബുലന്‍സിനെ അവഗണിക്കാന്‍ കാരണമെന്നും പറയുന്നു.

ഭരണങ്ങാനം, പൈക സെക്‌ഷനുകളിൽ തുടര്‍ച്ചയായി വൈദ്യുതി തടസം

പാലാ: കെഎസ്ഇബി പാലാ ഡിവിഷനു കീഴിലെ ഭരണങ്ങാനം, പൈക സെക്‌ഷനുകളുടെ കീഴിലുള്ള പ്രദേശങ്ങളില്‍ തുടര്‍ച്ചയായ വൈദ്യുതി തടസത്തില്‍ പ്രതിഷേധം ഉയരുന്നു. മീനച്ചില്‍ താലൂക്കിലെ കിഴക്കന്‍ മലയോര മേഖലകളില്‍ പോലും അനുഭവപ്പെടാത്ത വൈദ്യുതി തടസമാണ് മീനച്ചില്‍ പഞ്ചായത്തു പരിധിയില്‍ ഉണ്ടാവുന്നതെന്ന് ഉപയോക്താക്കള്‍ പറയുന്നു. 11 കെവി ലൈനുകളിലെ ടച്ചിംഗ് വെട്ടുന്നതിലെ അപാകതകള്‍ മൂലം നിരന്തരമായി വൈദ്യുതി മുടങ്ങുകയാണ്. ഭരണങ്ങാനം സെക്‌ഷന്‍ ഓഫീസ് നിലനിര്‍ത്തുന്നതിനായി പൈക സെക്‌ഷന്‍ പരിധിയില്‍ ഉണ്ടായിരുന്ന ഉപഭോക്താക്കളെ ഭരണങ്ങാനം സെക്‌ഷനിലേക്കു മാറ്റിയതു മുതല്‍ മീനച്ചില്‍ പഞ്ചായത് പരിധിയിലെ ഭരണങ്ങാനം പൈക, സെക്‌ഷന്‍ പരിധികളില്‍ വൈദ്യുതി മുടക്കം കൂടിയതായി നാട്ടുകാര്‍ പറഞ്ഞു. പൈക സെക്‌ഷന്‍ പരിധിയിലെ ഉപഭോക്താക്കളെ ഭരണങ്ങാനം സെക്‌ഷനിലേക്കു മാറ്റിയപ്പോള്‍ 11 കെവി വിതരണ സംവിധാനത്തില്‍ മാറ്റം വരുത്താത്തതാണ് ഇതിനു കാരണമെന്നാണ് കരുതുന്നത്. വൈദ്യുതി വിതരണ സംവിധാനത്തിലെ അപാകതകള്‍ ഉടന്‍ പരിഹരിക്കണമെന്നും പൈക 33 കെവി സബ്സ്റ്റേഷന്‍ അപ്ഗ്രേഡ് ചെയ്യുന്നതിനു സര്‍ക്കാര്‍ തലത്തില്‍ ഇടപെടല്‍ ആവശ്യപ്പെട്ടും യൂത്ത് ഫ്രണ്ട്-എം പ്രവര്‍ത്തകര്‍ ജോസ് കെ. മാണി എംപിക്കു നിവേദനം നല്‍കിയിട്ടുണ്ട്. 11 കെവി ടച്ചിംഗ് വെട്ടുന്നതു പ്രഹസനമാക്കി മനഃപൂര്‍വം വൈദ്യുത തടസം ഉണ്ടാക്കി ഭരണങ്ങാനം പൈക സെക്‌ഷനുകള്‍ പ്രശ്ന ബാധിത സെക്‌ഷനുകളായി ചിത്രീകരിക്കാനുള്ള ചില ഉദ്യോഗസ്ഥരുടെ നടപടികള്‍ സര്‍ക്കാര്‍ തലത്തില്‍ പരിശോധിക്കണമെന്നും പ്രവര്‍ത്തകര്‍ ആവശ്യപ്പെട്ടു.

പ്രതിഭാസംഗമവും ക്ലബ്ബുകളുടെ ഉദ്ഘാടനവും

കാഞ്ഞിരപ്പള്ളി: പാലമ്പ്ര അസംപ്ഷൻ ഹൈസ്കൂളിൽ പ്രതിഭാ സംഗമവും അധ്യാപക രക്ഷാകർതൃ സമ്മേളനവും ബോധവത്ക്കരണ ക്ലാസും വിവിധ ക്ലബുകളുടെ ഉദ്ഘാടനവും നടത്തി. കോർപറേറ്റ് മാനേജർ ഫാ. ബാസ്റ്റിൻ മംഗലത്തിൽ സിഎംഐ പ്രതിഭാസംഗമവും വാർഡ് മെംബർ സിന്ധു മോഹനൻ വിവിധ ക്ലബുകളുടെയും ഉദ്ഘാടനവും നിർവഹിച്ചു. സ്കൂൾ മാനേജർ റവ.ഡോ. ജിയോ കണ്ണംകുളം സിഎംഐ അധ്യക്ഷത വഹിച്ചു. ഹെഡ്മാസ്റ്റർ ടോം ജോൺ, പിടിഎ പ്രസിഡന്‍റ് സിജോ മൊളോപ്പറമ്പിൽ, അധ്യാപക പ്രതിനിധി ട്രീസാ ബെല്ല, സീനിയർ അസിസ്റ്റന്‍റ് രശ്മി വർഗീസ്, ഡെൽന ഡൊമിനിക് എന്നിവർ പ്രസംഗിച്ചു. നാർക്കോട്ടിക് സെൽ കോട്ടയം ഡിവൈഎസ്പി എ.ജെ. തോമസ് ക്ലാസ് നയിച്ചു. തുടർന്ന് കുട്ടികളുടെ വിവിധ കലാപരിപാടികളും നടത്തി.

അപകട ഭീഷണിയുയർത്തി വാകമരത്തിന്‍റെ ശിഖരം

മുണ്ടക്കയം ഈസ്റ്റ്: ദേശീയപാതയോരത്ത് അപകട ഭീഷണിയുയർത്തി വാകമരത്തിന്‍റെ ശിഖരം. കൊട്ടാരക്കര - ദിണ്ഡിഗൽ ദേശീയപാതയിൽ 35ാംമൈലിനും മരുതുംമൂടിനുമിടയിൽ മെഡിക്കൽ ട്രസ്റ്റ് ജംഗ്ഷന് സമീപം നിൽക്കുന്ന വലിയ വാകമരത്തിന്‍റെ ശിഖരമാണ് അപകട ഭീഷണി ഉയർത്തി നിൽക്കുന്നത്. റോഡിലേക്ക് ചാഞ്ഞു നിൽക്കുന്ന മരത്തിന്‍റെ ശിഖരത്തിൽ റോഡിലൂടെ സഞ്ചരിക്കുന്ന കണ്ടെയ്നർ ലോറികളുടെ മുകൾഭാഗം തട്ടുന്നത് പതിവാണ്. കഴിഞ്ഞദിവസം ദേശീയപാതയിലൂടെ കടന്നുപോയ കണ്ടെയ്നർ ലോറിയുടെ മുകൾഭാഗം മരത്തിന്‍റെ ശിഖരത്തിൽ ഉടക്കിയതിനെത്തുടർന്ന് അരമണിക്കൂറിലധികം വാഹനം റോഡിലകപ്പെട്ടു. ഏറെ നേരത്തെ പരിശ്രമത്തിനൊടുവിലാണ് കണ്ടെയ്നർ ലോറിക്ക് യാത്ര തുടരുവാനായത്. റോഡിലേക്ക് ചാഞ്ഞു നിൽക്കുന്ന ശിഖരത്തിൽ ലോറികൾ പതിവായി ഇടിക്കുന്നതുമൂലം വലിയ മരക്കൊമ്പ് പാതി ഒടിഞ്ഞ നിലയിലാണ്. വലിയ ബലമില്ലാത്ത മരമായതിനാൽ ശക്തമായ കാറ്റിൽ ഏതു നിമിഷവും ഒടിഞ്ഞ് ദേശീയപാതയിലേക്ക് വീഴുവാനുള്ള സാധ്യത ഏറെയാണ്. ഇത് വലിയ അപകടങ്ങൾക്കാകും വഴിവയ്ക്കുക. 35ാംമൈലിനും പെരുവന്താനത്തിനുമിടയിൽ ഇത്തരത്തിൽ അപകട ഭീഷണി ഉയർത്തി നിരവധി മരങ്ങൾ നിൽപ്പുണ്ട്. കഴിഞ്ഞ നാലു മാസത്തിനിടെ മൂന്ന് സ്ഥലങ്ങളിലാണ് മരം ഒടിഞ്ഞുവീണ് അപകടമുണ്ടായിട്ടുള്ളത്. പലപ്പോഴും തലനാരിഴയ്ക്കാണ് യാത്രക്കാർ വലിയ ദുരന്തത്തിൽ നിന്ന് രക്ഷപ്പെടുന്നത്. ദേശീയപാതയിൽ അപകട ഭീഷണി ഉയർത്തി നിൽക്കുന്ന മരത്തിന്‍റെ ശിഖരങ്ങൾ വെട്ടി മാറ്റുവാൻ അധികാരികൾ തയാറായില്ലെങ്കിൽ കാത്തിരിക്കുന്നത് വലിയ അപകടമായിരിക്കും.

ചിറക്കടവ് പഞ്ചായത്തിന്‍റെ പ്രവർത്തനം മാതൃകാപരം: മന്ത്രി റോഷി അഗസ്റ്റിൻ

പൊൻകുന്നം: ജലനിധി ചിറക്കടവ് പഞ്ചായത്തിൽ അനുവദിച്ച മഴവെള്ള സംഭരണികൾ വിജയകരമായി പൂർത്തീകരിച്ച ചിറക്കടവ് പഞ്ചായത്തിന്‍റെ പ്രവർത്തനം മാതൃകാപരമാണെന്ന് ജലവിഭവ മന്ത്രി റോഷി അഗസ്റ്റിൻ. ചിറക്കടവ് പഞ്ചായത്ത് രണ്ടാം വാർഡിൽ വട്ടക്കാവുങ്കൽ തങ്കമ്മ ചന്ദ്രന്‍റെ പുരയിടത്തിൽ സ്ഥാപിച്ച മഴവെള്ള സംഭരണിയുടെ ഉദ്ഘാടനം നിർവഹിച്ച് പ്രസംഗിക്കുകയായിരുന്നു മന്ത്രി. ചീഫ് വിപ്പ് ഡോ.എൻ. ജയരാജ് അധ്യക്ഷത വഹിച്ചു. പഞ്ചായത്ത് പ്രസിഡന്‍റ് സി.ആർ. ശ്രീകുമാർ, വൈസ് പ്രസിഡന്‍റ് സതി സുരേന്ദ്രൻ, സുമേഷ് ആൻഡ്രൂസ്, ആന്‍റണി മാർട്ടിൻ, ഐ.എസ്. രാമചന്ദ്രൻ, ഷാജി പാന്പൂരി, മിനി സേതുനാഥ്, ഷാജി നല്ലേപറമ്പിൽ, വി.ഡി. റെജികുമാർ, അന്പിളി ശിവദാസ്, ഷാക്കി സജീവ്, കെ.ജി. രാജേഷ് എന്നിവർ പ്രസംഗിച്ചു. ബിപിഎൽ വിഭാഗങ്ങൾക്കായി 12 മഴവെള്ള സംഭരണികൾ കൂടി ചിറക്കടവ് പഞ്ചായത്തിൽ മന്ത്രി അനുവദിച്ചു.

കർപ്പൂര ഗന്ധമുള്ള കസ്തൂരി മഞ്ഞളുമായി വാഴൂർ ബ്ലോക്ക് പഞ്ചായത്ത്

വാഴൂർ: കർപ്പൂര ഗന്ധമുള്ള കസ്തൂരി മഞ്ഞൾ വിത്ത് വിതരണത്തിന്‍റെ ഉദ്ഘാടനം ബ്ലോക്ക് പഞ്ചായത്ത് പ്രസിഡന്‍റ് മുകേഷ് കെ. മണി നിർവഹിച്ചു. വൈസ്പ്രസിഡന്‍റ് ഗീത എസ്. പിള്ള അധ്യക്ഷത വഹിച്ചു. ബ്ലോക്ക് പഞ്ചായത്തംഗങ്ങളായ ഷാജി പാമ്പൂരി, ബി. രവീന്ദ്രൻ നായർ, ശ്രീകലാ ഹരി, ലതാ ഉണ്ണികൃഷ്ണൻ, കങ്ങഴ പഞ്ചായത്തംഗം മാത്യു ആനിത്തോട്ടം, കൃഷി വകുപ്പ് അസിസ്റ്റന്‍റ് ഡയറക്ടർ സിമി ഇബ്രാഹിം എന്നിവർ പ്രസംഗിച്ചു. മുഖസൗന്ദര്യം വർധിപ്പിക്കുന്നതിനും ഔഷധങ്ങളിലും മറ്റും ഉപയോഗിക്കുന്നതുമായ കർപ്പൂര ഗന്ധമുള്ള കസ്തൂരി മഞ്ഞൾ കൃഷി വ്യാപകമാക്കുക എന്ന ലക്ഷ്യത്തോടെ വാഴൂർ ബ്ലോക്ക് പഞ്ചായത്ത് ഈ സാമ്പത്തിക വർഷം നടപ്പിലാക്കുന്ന പദ്ധതിയാണ് കസ്തൂരിമഞ്ഞൾ കൃഷി. ആന്‍റിഓക്സിഡന്‍റ് ഗുണങ്ങളുള്ളതിനാൽ ശരീരത്തിലുള്ള ഹാനികരമായ തന്മാത്രകളെ നിർജീവമാക്കുന്നതിനും ശരീരത്തെ സംരക്ഷിക്കുന്നതിനും ഇതിനു കഴിയും. പാരമ്പര്യ വൈദ്യത്തിൽ കസ്തൂരി മഞ്ഞൾ വേദന സംഹാരിയായും ഉപയോഗിക്കുന്നു. കസ്തൂരി മഞ്ഞൾ നട്ട് ആറുമാസം കഴിഞ്ഞാൽ വിളവെടുപ്പ് നടത്താം. നാല് ലക്ഷം രൂപയാണ് ഈ പദ്ധതിക്കായി ചെലവഴിക്കുന്നത്. കൃഷി ചെയ്യാനുള്ള സബ്സിഡിയും സംസ്കരണത്തിനും മൂല്യവർധിത ഉത്പന്നങ്ങൾ ഉണ്ടാക്കുന്നതിനുള്ള സഹായവും കൃഷി വകുപ്പ് ചെയ്തു നൽകും.

റബർ ബോർഡ് ജിയോ മാപ്പിംഗ് തുടങ്ങി

കാഞ്ഞിരപ്പള്ളി: ഇയുഡിആർ ചട്ടങ്ങൾ പാലിച്ച് ഇന്ത്യയിൽ നിന്ന് യൂറോപ്യൻ യൂണിയനിലേക്കുള്ള റബറിന്‍റെയും റബറുൽപന്നങ്ങളുടെയും കയറ്റുമതി ഉറപ്പാക്കുന്നതിനായി റബർബോർഡിന്‍റെ ആഭിമുഖ്യത്തിൽ റബർതോട്ടങ്ങളിൽ ജിയോ മാപ്പിംഗ് ആരംഭിച്ചു. ജിയോ മാപ്പിംഗിനായി ഹൈദരാബാദ് കേന്ദ്രമായി പ്രവർത്തിക്കുന്ന ട്രയമ്പു ടെക് സൊല്യൂഷൻസ് പ്രൈവറ്റ് ലിമിറ്റഡ് എന്ന സ്ഥാപനത്തെയാണ് റബർബോർഡ് നിയോഗിച്ചിട്ടുള്ളത്. ഭൂമിയുടെ ഉടമസ്ഥാവകാശം, വിസ്തൃതി, റബർതോട്ടങ്ങളുടെ അതിരുകൾ തുടങ്ങിയ വിശദാംശങ്ങൾ ശേഖരിച്ചുകൊണ്ടാണ് മാപ്പിംഗ് നടത്തുന്നത്. ഇതുമായി ബന്ധപ്പെട്ട് ശേഖരിക്കുന്ന വിവരങ്ങൾ റബർബോർഡിന്‍റെ കേന്ദ്രീകൃത ഡാറ്റാ ബേസിൽ സൂക്ഷിക്കുന്നതും വിവരങ്ങളുടെ രഹസ്യാത്മകത ഉറപ്പാക്കുകയും ചെയ്യുന്നതാണ്. ഇയുഡിആറുമായി ബന്ധപ്പെട്ട വിവരങ്ങൾ പങ്കുവയ്ക്കാനായി തോട്ടമുടമകൾക്കും റബർഡീലർമാർക്കും സംസ്കർത്താക്കൾക്കും വ്യവസായികൾക്കുമായി അവബോധനപരിപാടികൾ റബർബോർഡ് സംഘടിപ്പിച്ചുവരുന്നു. റബർബോർഡിന്‍റെ ഈ ഉദ്യമത്തോട് കർഷകർ സഹകരിക്കണമെന്ന് അസിസ്റ്റന്‍റ ഡയറക്ടർ അറിയിച്ചു.

ഓടകൾ അടഞ്ഞു; ബസ് സ്റ്റാൻഡ് ജംഗ്ഷനിലെ വെള്ളക്കെട്ട് പരിഹരിക്കാൻ നടപടിയില്ല

കാഞ്ഞിരപ്പള്ളി: ദേശീയപാതയിൽ ബസ് സ്റ്റാൻഡ് ജംഗ്ഷനിലെ വെള്ളക്കെട്ട് പരിഹരിക്കാൻ നടപടികളില്ല. എല്ലാ വർഷവും ഈ ഭാഗത്ത് വെള്ളക്കെട്ട് പതിവാണ്. ഇതുമൂലം ഏറെ ദുരിതമനുഭവിക്കുന്നത് ഓട്ടോറിക്ഷ ഡ്രൈവർമാരും കാൽനടയാത്രക്കാരും സമീപത്തെ വ്യാപാരികളുമാണ്. ഓടകൾ ഇല്ലാത്തതും ഉള്ള ഓടകൾ മണ്ണും മാലിന്യവും നിറഞ്ഞു മൂടിയതുമാണ് വെള്ളക്കെട്ട് രൂപപ്പെടാൻ കാരണം. വർഷങ്ങളായി സ്ഥിരമായി ഇതാണ് അവസ്ഥയെങ്കിലും ഇതു പരിഹരിക്കുന്നതിനുള്ള നടപടികൾ അധികൃതരുടെ ഭാഗത്തുനിന്നുണ്ടാകുന്നില്ലെന്നു കാൽനടയാത്രക്കാർ പരാതിപ്പെടുന്നു. വെള്ളം കെട്ടിക്കിടക്കുന്നതിനാല്‍ വാഹനങ്ങള്‍ കടന്നുപോകുമ്പോള്‍ ആളുകളുടെ ദേഹത്തേക്കു ചെളിവെള്ളം തെറിക്കുന്ന സ്ഥിതിയാണ്. ബസ് സ്റ്റാന്‍ഡ് പ്രവേശന കവാടത്തിനു മുന്പിലൂടെയുള്ള റോഡിലൂടെ പുത്തനങ്ങാടി ഭാഗത്തുനിന്ന് ഒഴുകിയെത്തുന്ന വെള്ളം ഓടയിലേക്ക് ഒഴുകുന്നതിനുള്ള ഭാഗം അടഞ്ഞുകിടക്കുകയാണ്. അതിനാൽ വെള്ളം നേരെ ദേശീയപാതയിലേക്കാണ് എത്തുന്നത്. ബസ് സ്റ്റാന്‍ഡിനു മുന്‍വശം താഴ്ന്ന ഭാഗമാണ്. ഇവിടെനിന്ന് ഇരു വശത്തേക്കുമുള്ള ഓടയിലേക്കു വെള്ളം ഒഴുകുന്നതിനും സംവിധാനമില്ല. ഓട്ടോറിക്ഷാ സ്റ്റാന്‍ഡിലടക്കം വെള്ളം കെട്ടിനില്‍ക്കുന്ന സ്ഥിതിയിലാണ്. മഴ പെയ്ത് തീര്‍ന്ന് ഏറെ നേരം കഴിഞ്ഞാൽ മാത്രമേ ഇവിടുത്തെ വെള്ളക്കെട്ട് ഒഴിവാകുകയുള്ളു. മഴവെള്ളത്തിനൊപ്പമെത്തുന്ന കറുത്ത നിറത്തിലുള്ള മാലിന്യം കലർന്ന വെള്ളത്തിൽ നിൽക്കേണ്ട ഗതികേടിലാണ് ഓട്ടോറിക്ഷ ഡ്രൈവർമാർ. ഈ മാലിന്യ വെള്ളത്തിനു കടുത്ത ദുർഗന്ധമാണ് അനുഭവപ്പെടുന്നത്. മൂക്ക് പൊത്തി ഇരിക്കേണ്ട ഗതികേടാണെന്ന് സമീപത്തെ വ്യാപാരികളും പറയുന്നു. കാഞ്ഞിരപ്പള്ളി ടൗണിലെ ഓടകൾ വൃത്തിയാക്കിയിട്ട് വർഷങ്ങളായി. ഓടകളിലെ മണ്ണും മാലിന്യങ്ങളും നീക്കി വെള്ളം ഒഴുകിപ്പോകാനുള്ള സംവിധാനങ്ങള്‍ ഏര്‍പ്പെടുത്തണമെന്ന് ആവശ്യം ശക്തമായി.

ബിരുദദാന ചടങ്ങ്: രാജു നാരായണസ്വാമി ഉദ്ഘാടനം ചെയ്യും

അരുവിത്തുറ: സെന്‍റ് ജോർജ് കോളജിലെ ബിരുദദാന ചടങ്ങ് വ്യാഴാഴ്ച ഐഎഎസ് മുൻ ഉദ്യോഗസ്ഥൻ ഡോ. രാജു നാരായണ സ്വാമി ഉദ്ഘാടനം ചെയ്യും. 400 ഓളം വിദ്യാർഥികളാണ് ബിരുദം പൂർത്തിയാക്കി സർട്ടിഫിക്കറ്റുകൾ ഏറ്റുവാങ്ങുന്നത്. കോളജ് മാനേജർ വെരി റവ. ഫാ. സെബാസ്റ്റ്യൻ വെട്ടുകല്ലേൽ അധ്യക്ഷത വഹിക്കുന്ന ചടങ്ങിൽ പാലാ രൂപത പ്രോട്ടോസിഞ്ചല്യൂസ് മോൺ. റവ. ഡോ. ജോസഫ് തടത്തിൽ അനുഗ്രഹ പ്രഭാഷണം നടത്തും. കോളജ് ബർസാർ റവ ഫാ.ബിജു കുന്നയ്ക്കാട്ട്, വൈസ് പ്രിൻസിപ്പൾ ഡോ. ജിലു ആനി ജോൺ, ഐക്യുഎസി കോഓർഡിനേറ്റർ ഡോ. സുമേഷ് ജോർജ് തുടങ്ങിയവർ ചടങ്ങിൽ സംസാരിക്കും. നാക്ക് റീ അക്രഡിറ്റേഷനിൽ എ പ്ലസ് പ്ലസ് ആക്രഡിറ്റേഷൻ ലഭിച്ച അരുവിത്തുറ സെന്‍റ് ജോർജ് കോളജ് ജില്ലയിൽ കൂടുതൽ ബിരുദധാരികളെ സമൂഹത്തിന് സമ്മാനിക്കുന്ന വിദ്യാഭ്യാസ സ്ഥാപനമാണ്. ചടങ്ങിൽ പിജി വിദ്യാർഥികൾക്കുള്ള ബിരുദ സർട്ടിഫിക്കറ്റുകളും വിതരണം ചെയ്യും. ഈ വർഷം യൂണിവേഴ്സിറ്റി റാങ്കുകൾ കരസ്ഥമാക്കിയ വിദ്യാർഥികളേയും കാന്പസ് പ്ലെയ്സ്മെന്‍റ് വഴി ജോലി കരസ്ഥമാക്കിയ വിദ്യാർഥികളേയും ചടങ്ങിൽ ആദരിക്കും.

അപുഷ്പി സസ്യങ്ങളിൽ ഗണ്യമായ കുറവെന്ന് പഠനം

അരുവിത്തുറ: കാലവർഷം നേരത്തെ എത്തിയതും ഇടയ്ക്ക് ഉണ്ടായ ഇടവേളയും മൂലം അപുഷ്പി സസ്യങ്ങളിൽ കുറവുണ്ടായതായി അരുവിത്തുറ സെന്‍റ് ജോർജ് കോളജ് ബോട്ടണി വിഭാഗം പഠന റിപ്പോർട്ട്. കാലാവസ്ഥാ വ്യതിയാനം മൂലം കാലം തെറ്റിയെത്തിയ മഴ ഉണ്ടാക്കിയ മാറ്റങ്ങളാണ് ഈ വർഷം അപുഷ്‌പി സസ്യങ്ങളുടെ കുറവിന് കാരണമായത്. ഇത്തരം സസ്യങ്ങളുടെ കുറവ് മണ്ണിന്‍റെ സൂക്ഷ്മ ഘടനയിൽ മാറ്റങ്ങൾക്ക് കാരണമായേക്കാം. ഇത് മണ്ണിന്‍റെ ഫലഭൂയിഷ്ടിയെ ബാധിക്കുകയും മിത്ര കീടങ്ങൾ കുറയാൻ കാരണമാകുമെന്നും റബർ ഉൾപ്പെടെയുള്ള കാർഷിക വിളകളെ ഇത് പ്രതികൂലമായി ബാധിച്ചേക്കുമെന്നും പഠനം പറയുന്നു. പരിസ്ഥിതി ദിനത്തോടനുബന്ധിച്ച് കോളജിലെ ബോട്ടണി വിഭാഗം നടത്തിയ സർവ്വേ പഠനത്തിന് ബോട്ടണി വിഭാഗം മേധാവി ജോബി ജോസഫ് നേതൃത്വം നൽകി. അധ്യാപകരായ ഡോ. അബിൻ സെബാസ്റ്റ്യൻ, കാതറിൻ ജോസ് എനിവരുടെ കീഴിൽ വിദ്യാർഥികൾ രണ്ട് ടീമുകളായി തിരിഞ്ഞാണ് കാമ്പസിലും സമീപ പ്രദേശങ്ങളിലുമായി പഠനം നടത്തിയത്.

രണ്ടു മിനിറ്റ് കാറ്റ്: അതിരന്പുഴയിൽ നാശനഷ്ടമേറെ

അതിരമ്പുഴ: രണ്ടു മിനിറ്റുമാത്രം ദീർഘിച്ച ശക്തമായ കാറ്റിൽ അതിരമ്പുഴ പഞ്ചായത്തിലെ മൂന്നു വാർഡുകളിൽ വൻ നാശം. മരങ്ങൾ കടപുഴകി; വീടുകൾക്കും സ്ഥാപനങ്ങൾക്കും വലിയ നാശനഷ്ടമുണ്ടായി. വ്യാപകമായി കൃഷിനാശവുമുണ്ടായി. ഞായറാഴ്ച വൈകുന്നേരം 5.36നാണ് കാറ്റ് ആഞ്ഞുവീശിയത്. ചന്തക്കുളം മുതൽ കൈപ്പുഴ കവലവരെയുള്ള പ്രദേശങ്ങളിൽ കാറ്റ് നാശം വിതച്ചു. 22-ാം വാർഡിൽ അതിരമ്പുഴ പഞ്ചായത്തുവക മത്സ്യമാർക്കറ്റ് കെട്ടിടത്തിന്‍റെ മേൽക്കൂര അതേപടി നിലംപൊത്തി. മാർക്കറ്റിലെ ഹോൾസെയിൽ മത്സ്യവ്യാപാരി ജോയ്സ് മൂലേക്കരിയുടെ ഓഫീസ് കെട്ടിടത്തിന്‍റെ മേൽക്കൂരയിലെ ഷീറ്റുകൾ പറന്നുപോയി. വലിയ മതിൽ ഇടിഞ്ഞു വീണു. ചെമ്മാച്ചേരിൽ ജിമ്മി, കുട്ടപ്പായി കിടങ്ങയിൽ, പ്രസന്നൻ കുന്നത്തുപറമ്പിൽ, പെണ്ണമ്മ തുരുത്തേൽ എന്നിവരുടെ വീടുകൾക്കു മുകളിൽ മരം വീണു. ഷിബു പൊത്തനാംതടത്തിന്‍റെയും പഞ്ചായത്ത് മെംബർ ജോസ് അഞ്ജലിയുടെയും മതിലുകൾ ഇടിഞ്ഞു. ജോസ് അഞ്ജലിയുടെ പുരയിടത്തിലെ തേക്ക്, ആഞ്ഞിലി മരങ്ങൾ കടപുഴകി വീണു. പി ആൻഡ് എം സെറാമിക്സ് ഓഫീസ് കെട്ടിടത്തിന്‍റെ ഷീറ്റുകളും ഗേറ്റും തകർന്നു.

20-ാം വാർഡ് കുറ്റിയേൽ കവല ഭാഗത്ത് പാലയ്ക്കാത്തൊട്ടി ശ്രീനാഥിന്‍റെ വീടിനു മുന്നിലും പിന്നിലും നിന്നിരുന്ന മരങ്ങൾ വീടിനു മുകളിലേക്കു വീണു. വീടിന്‍റെ മേൽക്കൂര പൂർണമായി തകർന്നു. പാലയ്ക്കാത്തൊട്ടി ശാന്തമ്മയുടെ വീടിന്‍റെ മേൽക്കൂരയ്ക്കും മരം വീണ് നാശനഷ്ടമുണ്ടായി. ചിന്നമ്മ കൊല്ലംപറമ്പിലിന്‍റെ വീടിന്‍റെ മുകളിലെ ട്രസ് വർക്ക് മരം വീണു തകർന്നു. 21-ാം വാർഡിൽ കുറ്റിയേൽ പ്രസാദിന്‍റെ വീടിനു മുകളിലേക്ക് ആഞ്ഞിലിമരം വീണ് മേൽക്കൂര പൂർണമായി തകർന്നു. കുന്നത്ത് പ്രസാദിന്‍റെ വീടിനു മുകളിലേക്കും തേക്കുമരം കടപുഴകി വീണു. കുറ്റിയേൽ സുഭാഷ്, കുറ്റിയേൽ സുമോൻ, കുറ്റിയേൽ സജി, കിടങ്ങയിൽ സിബി എന്നിവരുടെ വീടുകൾക്കും മരംവീണ് നാശനഷ്ടമുണ്ടായി. എസ്എൻഡിപി ഹാളിനു മുകളിലേക്ക് വലിയ ആഞ്ഞിലിമരം വീണു. ഇവിടെ മതിലും ഇടിഞ്ഞു തകർന്നു. ട്രാൻസ്ഫോർമറിനു മുകളിലേക്ക് മരംവീണ് വൈദ്യുതി പോസ്റ്റുകൾ ഒടിഞ്ഞു. 11 കെവി ലൈൻ ഉൾപ്പെടെയുള്ള വൈദ്യുതിലൈനുകൾ മരംവീണ് വ്യാപകമായി തകർന്നു. റോഡിലെ തടസങ്ങൾ നീക്കം ചെയ്യൽ ഇന്നലെ ഉച്ചയോടെയാണ് പൂർത്തിയായത്. അതുവരെ അതിരമ്പുഴ - കൈപ്പുഴ റോഡിൽ ഗതാഗതം തടസപ്പെട്ടു. വൈകുന്നേരത്തോടെയാണ് പുതിയ പോസ്റ്റുകൾ സ്ഥാപിച്ച് വൈദ്യുതി ലൈനുകൾ പൂർവസ്ഥിതിയിലാക്കിയത്. തഹസിൽദാർ, വില്ലേജ് ഓഫീസർ എന്നിവരുടെ നേതൃത്വത്തിൽ റവന്യു അധികൃതർ വീടുകളും സ്ഥാപനങ്ങളും സന്ദർശിച്ച് റിപ്പോർട്ട് തയ്യാറാക്കി സമർപ്പിച്ചു. ബ്ലോക്ക് പഞ്ചായത്ത് മെംബർ ജയിംസ് കുര്യൻ, വാർഡ് മെംബർമാരായ ജോസ് അഞ്ജലി, കെ.എ. അശ്വതിമോൾ, ഐസി സാജൻ എന്നിവരും സിപിഐ ജില്ലാ സെക്രട്ടറി വി.ബി. ബിനു, മണ്ഡലം സെക്രട്ടറി കെ.ഐ. കുഞ്ഞച്ചൻ എന്നിവരും നാശനഷ്ടമുണ്ടായ സ്ഥലങ്ങളിലെത്തി. കൈപ്പുഴയിൽ വീടുകൾക്ക് മുകളിൽ മരംവീണു കൈപ്പുഴ: ശക്തമായ കാറ്റിലും മഴയിലും കൈപ്പുഴയില്‍ മരം കടപുഴകി വീടുകള്‍ക്കു നാശം. മഴയ്‌ക്കൊപ്പം ചുഴലിക്കാറ്റിന് സമാനമായ കാറ്റാണ് ഉണ്ടായതെന്നു നാട്ടുകാര്‍ പറയുന്നു. കൈപ്പുഴ തേനാകര കാവില്‍ റോഡിന് സമീപത്ത് താമസിക്കുന്ന മഠംപറമ്പില്‍ മായാ രാജുവിന്‍റെ വീടിനു മുകളിലേക്ക് മൂന്നു മരങ്ങളാണു വീണത്. വീടിന്‍റെ ഭിത്തിക്കും മുകള്‍ഭാഗത്തിനും കേടുപാടു സംഭവിച്ചു. വീടിനുള്ളില്‍ ആളുകളുണ്ടായിരുന്നെങ്കിലും അപകടം ഉണ്ടാകാതെ രക്ഷപ്പെട്ടു. സമീപത്തെ വലിയപറമ്പില്‍ ബിബിയുടെ വീടിനു മുകളിൽ കൂറ്റന്‍ തേക്കുമരം വീണു. തൊട്ടടുത്ത കാവില്‍ ഡൊമിനിക്കിന്‍റെ റബര്‍ത്തോട്ടത്തിലെ ഭൂരിഭാഗം റബര്‍മരങ്ങളും വട്ടം ഒടിഞ്ഞു. ബാക്കിയുള്ള റബര്‍ മരങ്ങള്‍ ചാഞ്ഞു നില്‍ക്കുകയാണ്. ഇതു നിലംപൊത്തിയാല്‍ സമീപവാസിയായ ബേബിയുടെ വീട് തകരും. മുണ്ടയ്ക്കല്‍ ലൂക്കോസിന്‍റെ വീടിനു മുകളിൽ തൊട്ടടുത്ത പുരയിടത്തില്‍നിന്ന തേക്കു മരം വീണു. ഇടമറ്റത്തില്‍ ജോസഫിന്‍റെ പുരയിടത്തിലെ മരങ്ങളും കടപുഴകി. കുടിലില്‍ കവല, പുളിങ്കാല ഭാഗങ്ങളിൽ മരം കടപുഴകി ഗതാഗതം തടസപ്പെട്ടു. ഇവിടെ വൈദ്യുതി പോസ്റ്റും ഒടിഞ്ഞു. തേനാകര കാവില്‍ റോഡിലും മൂന്നുപറ റോഡിലും വൈദ്യുതി പോസ്റ്റുകൾ ഒടിഞ്ഞുവീണു. കാറ്റിലും മഴയിലും ലക്ഷക്കണക്കിന് രൂപയുടെ നാശനഷ്ടങ്ങള്‍ സംഭവിച്ചിട്ടുണ്ട്. കാറ്റ് നാശം വിതച്ച പ്രദേശങ്ങള്‍ മന്ത്രി വാസവന്‍ സന്ദര്‍ശിച്ചു അതിരമ്പുഴ: ശക്തമായ കാറ്റില്‍ നാശനഷ്ടങ്ങളുണ്ടായ പ്രദേശങ്ങള്‍ മന്ത്രി വി.എന്‍. വാസവന്‍ സന്ദര്‍ശിച്ചു. അതിരമ്പുഴ, നീണ്ടൂര്‍ പഞ്ചായത്തുകളിലെ ദുരന്തബാധിത പ്രദേശങ്ങളിലാണ് മന്ത്രി എത്തിയത്. അതിരമ്പുഴ വില്ലേജിലെ ശ്രീകണ്ഠമംഗലം, കുറ്റിയേല്‍ ഭാഗങ്ങളിലായി 16 വീടുകളും കൈപ്പുഴ വില്ലേജിലെ കൈപ്പുഴ ഭാഗത്ത് 10 വീടുകളും മരംവീണു തകര്‍ന്നു. വര്‍ഷങ്ങള്‍ പഴക്കമുള്ള കരിന്തകര വീണ് വീട് പാടേ തകര്‍ന്ന ശ്രീകണ്ഠമംഗലം പാലയ്ക്കത്തൊടിയില്‍ സലില ശിവരാമന്‍റെ വീട്ടിലാണ് മന്ത്രി ആദ്യമെത്തിയത്. കുടുംബാംഗങ്ങളെ ആശ്വസിപ്പിച്ച മന്ത്രി പ്രകൃതി ദുരന്തത്തില്‍പ്പെടുത്തി ആവശ്യമായ എല്ലാ സഹായങ്ങളും ചെയ്തു നല്‍കാമെന്ന് ഉറപ്പുനല്‍കി. സാധ്യമായ എല്ലാ സഹായങ്ങളും അടിയന്തരമായി ലഭ്യമാക്കാനാവശ്യമായ നടപടികളെടുക്കുമെന്ന് മന്ത്രി ദുരന്തബാധിതര്‍ക്ക് ഉറപ്പുനല്‍കി. വൈദ്യുതി ബന്ധം കഴിയുന്നത്ര വേഗത്തില്‍ പുനഃസ്ഥാപിക്കാനും മന്ത്രി നിര്‍ദേശം നല്‍കി. തകര്‍ന്ന വീടുകളുടെ കണക്കെടുത്തു റിപ്പോര്‍ട്ട് ഉടന്‍തന്നെ തഹസില്‍ദാര്‍ക്കു നല്‍കാന്‍ പഞ്ചായത്ത് അസിസ്റ്റന്‍റ് എന്‍ജിനിയര്‍മാരോട് മന്ത്രി നിര്‍ദേശിച്ചു. നീണ്ടൂര്‍ പഞ്ചായത്ത് പ്രസിഡന്‍റ് വി.കെ. പ്രദീപ്, പഞ്ചായത്തംഗം പി.ഡി. ബാബു, കോട്ടയം തഹസില്‍ദാര്‍ എസ്.എന്‍. അനില്‍കുമാര്‍, ഡെപ്യൂട്ടി തഹസില്‍ദാര്‍ എന്‍. രാജേഷ്, അതിരമ്പുഴ വില്ലേജ് ഓഫീസര്‍ പി.വി. ലാല്‍ ദാസ്, കൈപ്പുഴ വില്ലേജ് ഓഫീസര്‍ കെ.പി. സ്മിത തുടങ്ങിയവരും മന്ത്രിയോടൊപ്പമുണ്ടായിരുന്നു.

നഗരത്തിലെ ഗതാഗതക്കുരുക്ക്: പോലീസ് ഏർപ്പെടുത്തിയ പരിഷ്‌കാരം ആരംഭിച്ചു

കോട്ടയം: നഗരത്തിലെ ഗതാഗതക്കുരുക്കഴിക്കാന്‍ പോലീസ് ഏര്‍പ്പെടുത്തിയ പരിഷ്‌കാരം ആരംഭിച്ചു. എന്നാല്‍, ഇന്നലെ വിദ്യാഭ്യാസ സ്ഥാപനങ്ങള്‍ക്ക് അവധിയായതിനാല്‍ തിരക്കു കുറവായിരുന്നു. അതിനാൽ, പരീക്ഷണം എത്രത്തോളം വിജയമാണെന്നറിയാന്‍ സാധിച്ചില്ല. രണ്ടോ മൂന്നോ ദിവസം കൊണ്ടേ വിജയ സാധ്യതയറിയാന്‍ സാധിക്കുകയുള്ളൂവെന്ന് പോലീസ് പറഞ്ഞു. ചാലുകുന്ന് ഭാഗത്തുനിന്നു വരുന്ന ബസുകള്‍ ശാസ്ത്രി റോഡ് വഴി നാഗമ്പടം ബസ് സ്റ്റാന്‍ഡിലേക്ക് പോകുന്ന തരത്തിലാണ് പരിഷ്‌കാരം. ബേക്കര്‍ ജംഗ്ഷനുസമീപം ആളെയിറക്കി എംസി റോഡ് വഴി സീസേഴ്‌സ് ജംഗ്ഷനിലൂടെയാണ് ബസുകള്‍ നാഗമ്പടം സ്റ്റാന്‍ഡില്‍ എത്തിയിരുന്നത്. പുതിയ പരിഷ്‌കാരപ്രകാരം കുമരകം, ചുങ്കം, ചാലുകുന്ന് ഭാഗങ്ങളിൽനിന്നു വരുന്ന ബസുകള്‍ ഇന്നലെ രാവിലെ മുതല്‍ ബേക്കര്‍ ജംഗ്ഷനിലെത്തി ശാസ്ത്രി റോഡില്‍ പ്രവേശിച്ച് അവിടെയുള്ള ബസ്‌സ്‌റ്റോപ്പിലാണ് ആളുകളെ ഇറക്കിയത്. തുടർന്ന് ബസുകള്‍ കുര്യന്‍ ഉതുപ്പ് റോഡുവഴി നാഗമ്പടം സ്റ്റാന്‍ഡിലെത്തി. കോട്ടയം വെസ്റ്റ് പോലീസ് എസ്എച്ച്ഒ, കോട്ടയം ട്രാഫിക് യൂണിറ്റ് ഹൗസ് ഓഫീസര്‍, പ്രൈവറ്റ് ബസ് ഓപ്പറേറ്റേഴ്‌സ് അസോസിയേഷന്‍ എന്നിവർ നടത്തിയ ചര്‍ച്ചയുടെ അടിസ്ഥാനത്തിലാണ് പുതിയ പരിഷ്കാരം. അഴിയാനുണ്ട് ഇനിയും കുരുക്കുകള്‍; പരിഷ്‌കാരങ്ങള്‍ വേണം സ്‌കൂള്‍കൂടി തുറന്നതോടെ നഗരത്തില്‍ പലയിടത്തും ഗതാഗതക്കുരുക്ക് രൂക്ഷമാണ്. ബേക്കര്‍ ജംഗ്ഷനിലാണ് ഗതാഗതക്കുരുക്ക് പാരമ്യത്തിലെത്തിയിരിക്കുന്നത്. നഗരത്തിലെ തിരക്കു നോക്കി ക്രമീകരണങ്ങള്‍ വരുത്തിയാല്‍ കുരുക്കിന് ഒരു പരിധിവരെ പരിഹാരമാകും. • ബേക്കര്‍ ജംഗ്ഷനു സമീപം എംസി റോഡില്‍ ശക്തി ഹോട്ടലിനു സമീപം ഡിവൈഡറുകള്‍ സ്ഥാപിച്ചിരിക്കുന്ന ഇറക്കത്തില്‍ യു ടേണ്‍ എടുക്കുന്നത് തടയുക. • ശക്തി ഹോട്ടലിനു സമീപമുള്ള റോഡില്‍കൂടി വാഹനങ്ങള്‍ കുമരകം റോഡിലേക്കു പ്രവേശിക്കുന്നത് തടയുക. • ബേക്കര്‍ ജംഗ്ഷനിലെ ട്രാഫിക് ഐലന്‍ഡില്‍ വലിയ വാഹനങ്ങള്‍ റോഡ് നിറഞ്ഞ് നിര്‍ത്തുന്നത് തടയുക. • ബേക്കര്‍ ജംഗ്ഷനിലെ ബസ്‌സ്റ്റോപ്പുകളില്‍ നിശ്ചിത സമയം കഴിഞ്ഞുള്ള ബസുകളുടെ പാര്‍ക്കിംഗ് തടയുക • പുതിയ പരിഷ്‌കാരത്തിനൊപ്പം ബേക്കര്‍ ജംഗ്ഷനില്‍ ശക്തി ഹോട്ടലിനു സമീപമുള്ള ബസ്‌ സ്റ്റോപ്പ് എംസി റോഡില്‍കൂടി ഏറ്റുമാനൂര്‍ ഭാഗത്തേക്ക് പോകുന്ന ബസുകള്‍ക്കായി ക്രമീകരിക്കുക. • ബസ്‌സ്റ്റോപ്പുകള്‍ക്ക് സമീപം നിര്‍ത്തിയിട്ട് ഓട്ടോറിക്ഷകള്‍ ഓട്ടം പിടിക്കുന്നത് തടയുക. • നാഗമ്പടത്തുനിന്നു പുറപ്പെടുന്ന ബസുകളുടെ ടൗണില്‍കൂടിയുള്ള നിരക്കല്‍ അവസാനിപ്പിക്കുക.

വികസനം കാത്ത് നാലുകോടി, പായിപ്പാട് ജംഗ്ഷനുകള്‍

ചങ്ങനാശേരി: വികസനം കാത്തുകഴിയുന്ന നാലുകോടി ജംഗ്ഷനില്‍ കനത്ത വെള്ളക്കെട്ട്. പായിപ്പാട് റോഡില്‍നിന്നും റോഡിന്‍റെ വശത്തുകൂടി ഒഴുകുന്ന വെള്ളം ജംഗ്ഷനിലെത്തുമ്പോള്‍ റോഡിന്‍റെ മധ്യത്തിലൂടെ കവിഞ്ഞ് വശത്തുള്ള ഞാലിക്കടവ് റോഡിലേക്ക് ഒഴുകുകയാണ്. വെള്ളം ഒഴുകുന്നതിന് ഡ്രെയിനേജ് സൗകര്യങ്ങളൊന്നും നാലുകോടി ജംഗ്ഷനിലില്ല. വേഗത്തിലെത്തുന്ന വാഹനങ്ങള്‍ വെള്ളക്കെട്ടിലേക്ക് പതിക്കുമ്പോള്‍ സമീപത്തെ വ്യാപാര സ്ഥാപനങ്ങളിലേക്കും പാര്‍ക്ക് ചെയ്തിരിക്കുന്ന ഓട്ടോകളിലേക്കും കാല്‍നടയാത്രക്കാരുടെ വസ്ത്രങ്ങളിലേക്കും മലിനജലം തെറിക്കുന്നത് പതിവാണ്. റോഡിലേക്ക് വന്‍തോതില്‍ വെള്ളം ഒഴുകിയെത്തി ജംഗ്ഷനില്‍ വെള്ളക്കെട്ടുണ്ടാകുന്നതായി പരാതി ഉയര്‍ന്നിട്ടും പഞ്ചായത്ത് അധികൃതരോ പൊതുമരാമത്ത് ഉദ്യോഗസ്ഥരോ വേണ്ട നടപടികള്‍ സ്വീകരിച്ചിട്ടില്ല. റോഡുകളുടെ നിര്‍മാണം നിലച്ചു; ജംഗ്ഷനുകളുടെ വികസനം മരവിച്ചു ചങ്ങനാശേരി-കവിയൂര്‍ റോഡിന്‍റെ നവീകരണത്തിന്‍റെ ഭാഗമായി നാലുകോടി, പായിപ്പാട് കവലകളുടെ വികസനം ലക്ഷ്യം വച്ചിരുന്നെങ്കിലും റോഡ് നിര്‍മാണം നിര്‍ദേശിക്കപ്പെട്ടിരുന്ന അവസ്ഥയില്‍ പൂര്‍ത്തിയാകാതിരുന്നതോടെ ജംഗ്ഷനുകളുടെ വികസനവും നിലയ്ക്കുകയായിരുന്നു. എന്‍എച്ച്-183 (എംസി റോഡ്)ല്‍ തിരുവല്ലയ്ക്കു സമീപം ആരംഭിക്കുന്ന പെരുന്തുരുത്തി-ഏറ്റുമാനൂര്‍ ബൈപാസ് കടന്നുപോകുന്ന പ്രധാന ജംഗ്ഷനുകളില്‍ ഒന്നാണ് ഗതാഗതക്കുരുക്കില്‍ നട്ടംതിരിയുന്ന നാലുകോടി ജംഗ്ഷന്‍. നൂറുകണക്കിനു വാഹനങ്ങള്‍ അനുദിനം കടന്നുപോകുന്ന ഈ ജംഗ്ഷന്‍റെ നവീകരണത്തിനായി ഇവിടുത്തെ ഒരു തണല്‍മരം നാലുവര്‍ഷം മുമ്പ് മുറിച്ചുമാറ്റിയിരുന്നു. ചങ്ങനാശേരി-കവിയൂര്‍, തിരുവല്ല-മല്ലപ്പള്ളി റോഡുകള്‍ കടന്നുപോകുന്ന ഏറെ തിരക്കുള്ള പായിപ്പാട് കവലയുടെ അവസ്ഥയും പരിതാപകരമാണ്. ഈ കവലയിലെ റോഡും പൊട്ടിപ്പൊളിഞ്ഞ നിലയിലാണ്. കവിയൂര്‍ റോഡിന്‍റെയും തിരുവല്ല-മല്ലപ്പള്ളി-നൂറോമ്മാവ് റോഡിന്‍റെയും വികസനത്തിന്‍റെ ഭാഗമായി പായിപ്പാട് കവല വികസിപ്പിക്കാനായിരുന്നു പദ്ധതി. എന്നാല്‍, രണ്ടു പദ്ധതികളും നിശ്ചലമായതോടെയാണ് പായിപ്പാട് കവലയുടെ വികസം മുരടിച്ചത്. ഇതരസംസ്ഥാന തൊഴിലാഴികള്‍ തിങ്ങിപ്പാര്‍ക്കുന്ന നാടെന്ന പേരുള്ള സ്ഥലംകൂടിയാണ് പായിപ്പാട്. ഈ രണ്ട് ജംഗ്ഷനുകളുടെയും വികസനത്തിന് സത്വര നടപടികളുണ്ടാകണമെന്ന ആവശ്യം ശക്തമാകുകയാണ്.

കുട്ടനാടിനുവേണ്ടി ശബ്ദമുയര്‍ത്താന്‍ റേഡിയോ മീഡിയ വില്ലേജ്

ചങ്ങനാശേരി: കുട്ടനാടിന്‍റെ വിവിധങ്ങളായ പ്രശ്‌നങ്ങള്‍ ജന മനഃസാക്ഷിയില്‍ എത്തിക്കുകയെന്ന ലക്ഷ്യത്തോടെ റേഡിയോ മീഡിയ വില്ലേജും ചമ്പക്കുളം ഫെറോനാ യുവദീപ്തി എസ്എംവൈഎമ്മും സംയുക്തമായി സംഘടിപ്പിക്കുന്ന "സേവ് കുട്ടനാട് ഓപ്പണ്‍ റേഡിയോ കാമ്പയിന്' മങ്കൊമ്പില്‍ തുടക്കമായി. അതിരൂപതാ വികാരി ജനറാള്‍ മോണ്‍. ആന്‍റണി എത്തയ്ക്കാട്ട് ഉദ്ഘാടനം ചെയ്തു. കുട്ടനാടിന് ലഭിച്ചിരിക്കുന്ന അനുഗ്രഹങ്ങളെ കാലാനുസൃതമായി പ്രയോജനപ്പെടുത്താന്‍ ഭരണകൂടം തയാറാകാത്തതാണ് ഇവിടത്തെ നിരവധിയായ പ്രശ്‌നങ്ങള്‍ക്ക് കാരണമെന്നും ഈ പ്രദേശത്തിന്‍റെ അന്തസും മഹിമയും ഉയര്‍ത്താന്‍ ഈ കാമ്പയിൻ വഴിതെളിക്കുമെന്നും അദ്ദേഹം പറഞ്ഞു. രാജ്യാന്തര കായല്‍കൃഷി ഗവേഷണകേന്ദ്രം ഡയറക്ടറും കൃഷി ശാസ്ത്രജ്ഞനുമായ കെ.ജി. പത്മകുമാര്‍, റിട്ട. ഡെപ്യൂട്ടി തഹസില്‍ദാര്‍ ആന്‍റണി ആറില്‍ച്ചിറ, ടൂറിസ്റ്റ് അഡ്വൈസര്‍ ജൂബി കാട്ടാമ്പള്ളി, ഇറിഗേഷന്‍ വിഭാഗം റിട്ട. അസിസ്റ്റന്‍റ് എന്‍ജിനിയര്‍ ജോസഫ് മാത്യു, കേരള ഗവ. കോണ്‍ട്രാക്ടേഴ്‌സ് അസോസിയേഷന്‍ സംസ്ഥാന പ്രസിഡന്‍റ് വര്‍ഗീസ് കണ്ണമ്പള്ളി, ആലപ്പുഴ ജില്ലാ മുന്‍ മെഡിക്കല്‍ ഓഫീസര്‍ മുരളീധരന്‍പിള്ള എന്നിവര്‍ ചര്‍ച്ചകളില്‍ പങ്കെടുത്തു. മീഡിയ വില്ലേജ് എക്‌സിക്യൂട്ടീവ് ഡയറക്ടര്‍ ഫാ. ജോഫി പുതുപ്പറമ്പ്, എസ്‌ജെസിസി പ്രിന്‍സിപ്പല്‍ ഫാ. മാത്യു മുര്യങ്കരി, ബര്‍സാര്‍ ഫാ. ലിപിന്‍ തുണ്ടുകളം, കെ.സി. ജോജോ, കെ. വിപിന്‍ രാജ്, ജയിംസ് കല്ലുപാത്ര, ജസ്റ്റിന്‍ ജോസ് എന്നിവര്‍ പ്രസംഗിച്ചു. കാമ്പയിന്‍റെ ഭാഗമായി കുട്ടനാടിന്‍റെ വിവിധ പ്രദേശങ്ങളില്‍ ഓപ്പണ്‍ റേഡിയോ പരിപാടി സംഘടിപ്പിക്കുമെന്ന് ഡയറക്ടര്‍ ഫാ. ജോഫി പുതുപ്പറമ്പ് പറഞ്ഞു.

കെസിഎസ്എല്‍ പ്രവര്‍ത്തനവര്‍ഷം ഉദ്ഘാടനം

ചങ്ങനാശേരി: കെസിഎസ്എല്‍ അതിരൂപതാതല പ്രവര്‍ത്തനവര്‍ഷാരംഭവും അനിമേറ്റേഴ്സ് സംഗമവും അവാര്‍ഡ് വിതരണവും എസ്ബി സ്‌കൂള്‍ ഓഡിറ്റോറിയത്തില്‍ നടത്തി. ആര്‍ച്ച്ബിഷപ് മാര്‍ ജോസഫ് പെരുന്തോട്ടം ഉദ്ഘാടനം ചെയ്തു. 2024-25 വര്‍ഷത്തെ മാര്‍ഗരേഖ പ്രകാശനം ചെയ്തു. മികച്ച കെസിഎസ്എല്‍ യൂണിറ്റുകള്‍ക്ക് അതിരൂപത കോര്‍പറേറ്റ് മാനേജര്‍ റവ.ഡോ. ആന്‍റണി മൂലയില്‍ അവാര്‍ഡുകള്‍ വിതരണം ചെയ്തു. എല്‍പി വിഭാഗത്തില്‍ ചങ്ങനാശേരി സെന്‍റ് ആന്‍സ്, യുപി വിഭാഗത്തില്‍ സെന്‍റ് ജോസഫ്, ഹൈസ്‌കൂള്‍ വിഭാഗത്തില്‍ കുറുമ്പനാടം സെന്‍റ് പീറ്റേഴ്‌സ്, ഹയര്‍ സെക്കന്‍ഡറി വിഭാഗത്തില്‍ എസ്ബി സ്‌കൂളുകള്‍ അവാര്‍ഡുകള്‍ നേടി. ഇന്നവേറ്റീവ് പ്രോഗ്രാമില്‍ യുപി വിഭാഗത്തില്‍ ആര്യങ്കാവ് സെന്‍റ് മേരീസും ഹൈസ്‌കൂള്‍ വിഭാഗത്തില്‍ പായിപ്പാട് സെന്‍റ് ജോസഫും അവാര്‍ഡുകള്‍ കരസ്ഥമാക്കി. അതിരൂപതാ ചെയര്‍പേഴ്‌സണ്‍ തെരേസ ബിജു സെബാസ്റ്റ്യന്‍ അധ്യക്ഷത വഹിച്ചു. സ്‌കൂള്‍ മാനേജര്‍ റവ.ഡോ. ടോണി ചെത്തിപ്പുഴ, ഹെഡ്മാസ്റ്റര്‍ വിനോദ് ബാബു, ഡയറക്ടര്‍ ഫാ. ജോജോ പള്ളിച്ചിറ, പ്രസിഡന്‍റ് റിന്‍സ് വര്‍ഗീസ്, സംസ്ഥാന ചെയര്‍പേഴ്‌സണ്‍ നേഹ മരിയ ജോസഫ്, ടിന്‍റു ആന്‍ ജയിംസ്, നോയല്‍ മാത്യു, സജിന്‍ എന്‍., സിസ്റ്റര്‍ അലീന മ്ലാവില്‍, സിസ്റ്റര്‍ സീനി, മനോജ് ചാക്കോ, ടോം ചാക്കോ, ജിജോമോന്‍ തോമസ് എന്നിവര്‍ പ്രസംഗിച്ചു.

വൈക്കത്തെ റോഡുകളിലെ വളവുകളിൽ അപകടങ്ങൾ തുടർക്കഥ

വൈക്കം: വൈക്കം-തലയോലപ്പറമ്പ്, വൈക്കം-വെച്ചൂർ, ഇടയാഴം-കല്ലറ റോഡുകളിലെ വളവുകളില്‍ അപകടം തുടര്‍ക്കഥയാകുന്നു. അപകടങ്ങളിൽ ജീവൻ പൊലിഞ്ഞിട്ടും പ്രധാന നിരത്തിലെ അപകടക്കെണിയാകുന്ന വളവുകൾ നിവര്‍ത്തുന്നതിന് നടപടിയില്ല. വാഹനഗതാഗതത്തിനും കാൽനടക്കാർക്കും ഒരുപോലെ വളവുകൾ ഭീഷണിയാകുന്നു. തലയോലപ്പറമ്പിലെ വടയാര്‍, പൊതി മേൽപ്പാലം, പൊട്ടന്‍ചിറ, ഉദയനാപുരത്തെ വല്ലകം, പുളിഞ്ചുവട്, ചാലപ്പറമ്പ്, തോട്ടകം, ഉദയനാപുരം, കൂട്ടുമ്മേല്‍, വൈക്കം-വെച്ചൂർ റോഡിലെ തോട്ടകം ഷാപ്പിനു സമീപത്തും തോട്ടകം ഗവൺമെന്‍റ് എൽപി സ്കൂളിനുംവളഞ്ഞമ്പലത്തിനു സമീപവും ഇടയാഴം - കല്ലറ റോഡിലെ വല്യാറ വളവുകളിലുമാണ് അപകടങ്ങൾ പതിവാകുന്നത്. തോട്ടകം ഇലഞ്ഞിച്ചുവട് ഭാഗത്തെ കൊടുംവളവ് നിരവധി അപകടങ്ങള്‍ക്കാണ് കാരണമാകുന്നത്. ഏതാനും വർഷങ്ങൾക്കുള്ളിൽ നിരവധി പേരാണ് ഇവിടെ അപകടത്തിൽ മരിച്ചത്. ഏഴു വർഷം മുമ്പാണ് ഇവിടെ ദമ്പതികൾ ദാരുണമായി അപകടത്തില്‍ മരിച്ചത്. മറുവശത്തുനിന്നു വരുന്ന വാഹനങ്ങൾ കാണാനാവാതെ വരുന്നതാണ്അപകടങ്ങള്‍ക്ക് ഇടയാക്കുന്നത്. വല്ലകം സബ്‌സ്റ്റേഷനു മുന്നിലെ വളവും ഗതാഗതത്തിന് വലിയ ഭീഷണിയാണ് ഉയര്‍ത്തുന്നത്. തലയോലപ്പറമ്പ് റോഡ് ആധുനികവത്കരിച്ചതിനെത്തുടര്‍ന്ന് ചാലപ്പറമ്പ് വളവിൽ റോഡരികിലെ മതില്‍ പത്തുതവണ വാഹനമിടിച്ചു തകര്‍ന്നിരുന്നു. ഇതിനുശേഷം അപകടങ്ങള്‍ കുറയ്ക്കാന്‍ ഇവിടെ സിഗ്നല്‍ ലൈറ്റ് സ്ഥാപിച്ചെങ്കിലും ഒരുതരത്തിലുമുള്ള പ്രയോജനവും ഉണ്ടാകുന്നില്ലെന്ന് നാട്ടുകാർ കുറ്റപ്പെടുത്തുന്നു. കൊടുംവളവില്‍ അമിതവേഗതയില്‍ പാഞ്ഞെത്തുന്ന വാഹനങ്ങള്‍ക്ക് ഈ മുന്നറിയിപ്പുകൾ ശ്രദ്ധിക്കാനുമാകുന്നില്ല. വൈക്കം-വെച്ചൂര്‍ റോഡിൽ വലിയാനപ്പുഴ പാലം മുതല്‍ വെച്ചൂര്‍വരെയുള്ള വീതി കുറഞ്ഞ റോഡിലെ വളവുകളിൽ നിരന്തരം അപകടങ്ങളുണ്ടാകുന്നു. വൈക്കം-വെച്ചൂര്‍ റോഡ് അന്താരാഷ്‌ട്ര നിലവാരത്തില്‍ വീതികൂട്ടി പുനര്‍നിര്‍മിക്കുമെന്ന പ്രഖ്യാപനം വന്നിട്ട് നാളേറെയായെങ്കിലും നടപടികള്‍ ഇഴഞ്ഞുനീങ്ങുകയാണ്. റോഡ് വീതികൂട്ടി വളവുകള്‍ നിവർത്തി ഗതാഗതം സുരക്ഷിതമാക്കണമെന്നു നാട്ടുകാർ ആവശ്യപ്പെട്ടു.

കാറ്റിൽ വീടിന്‍റെ ഷീറ്റ്മേൽക്കൂര 30 മീറ്റർ അകലേക്ക് പറന്നുപോയി

വൈക്കം: ശക്തമായ കാറ്റിൽ വീടിനു മുകളിൽ ട്രസ് വർക്ക് ചെയ്തിരുന്ന ഷീറ്റും മേൽക്കൂരയും പറന്നുപോയി. മുപ്പത് മീറ്ററകലെ സമീപവാസികളുടെ വളപ്പിലെ മരങ്ങളിൽ തങ്ങിനിന്നതിനാൽ താഴെ വീഴാതെ ആളപായം ഒഴിവായി. ഇന്നലെ രാവിലെപത്തിന് വൈക്കം നഗരസഭ ഒന്നാം വാർഡിൽ ഉദയനാപുരം ക്ഷേത്രത്തിന് സമീപമായിരുന്നു സംഭവം. ബ്ലൂനെയിലിൽ അല്ലിയുടെ വീടിന്‍റെ മുകളിൽ സ്ഥാപിച്ചിരുന്ന ഷീറ്റിട്ട 450 സ്ക്വയർ ഫീറ്റോളം വരുന്ന മേൽക്കൂരയാണ് 30 മീറ്റർ ദൂരത്തിൽ പറന്നുപോയത്.സമീപവാസികളായ ഹരിചന്ദനത്തിൽ ഹരിദാസ്, പ്ലാത്തോട്ടത്തിൽ ശശി എന്നിവരുടെ പുരയിടത്തിലെ തെങ്ങിലും മാവിലുമായി തങ്ങിനിന്നതിനാൽ താഴെക്ക് പതിയാതെ വലിയ അപകടം ഒഴിവാകുകയായിരുന്നു. വൈക്കം ഫയർ സ്റ്റേഷൻ അസിസ്റ്റന്‍റ് സ്റ്റേഷൻ ഓഫീസർ അഖിൽ രാജ്, സീനിയർ ഫയർ ആൻഡ് റെസ്ക്യു ഓഫീസർ സാജു, വി.ആർ. ബിജു, ഗോകുൽ ജി., കെ. ശ്രീജിത്ത്, കൃഷ്ണകുമാർ, വിജിലേഷ് എന്നിവരുടെ നേതൃത്വത്തിൽ അഗ്നിരക്ഷാസേന എത്തി തെങ്ങിന് മുകളിൽ വടം കെട്ടി കപ്പിയും കയറും ഉപയോഗിച്ച് മണിക്കൂറുകൾകൊണ്ടാണ് മേൽക്കൂര സുരക്ഷിതമായി താഴെയിറക്കിയത്. അഗ്നിരക്ഷാസേനയെ സഹായിക്കാനായി വാർഡ് കൗൺസിലർ എൻ. അയ്യപ്പന്‍റെ നേതൃത്വത്തിൽ നാട്ടുകാരുമെത്തിയിരുന്നു. മേൽക്കൂര പറന്നുപോയതോടെ പെയ്ത്തുവെള്ളം അല്ലിയുടെ വീടിനുള്ളിൽ നിറഞ്ഞു. പിന്നീട് പടുത വലിച്ചുകെട്ടിയാണ് വീടിനുള്ളിൽ വെള്ളം വീഴാതെ സംരക്ഷിച്ചത്. മുറിയിലുണ്ടായിരുന്ന കട്ടിൽ, ബെഡ് എന്നിവയ്ക്കും നാശം സംഭവിച്ചു.

കന്തീശങ്ങളുടെ തിരുനാളും ഇരട്ടകളുടെ മഹാസംഗമവും

കടുത്തുരുത്തി: തീര്‍ഥാടന കേന്ദ്രമായ കോതനല്ലൂര്‍ ഫൊറോനാ പള്ളിയില്‍ കന്തീശങ്ങളുടെ തിരുനാളും ഇരട്ടകളുടെ മഹാസംഗമവും 18, 19 തീയതികളില്‍ നടക്കും. ഇരട്ടകളുടെ സംഗമവും സമര്‍പ്പണ ശുശ്രൂഷയും 19 ന് നടക്കുമെന്ന് പള്ളിയധികൃതര്‍ പത്രസമ്മേളനത്തില്‍ അറിയിച്ചു. ഇന്നു രാവിലെ 6.30നും വൈകുന്നേരം അഞ്ചിനും വിശുദ്ധ കുര്‍ബാന. നാളെ രാവിലെ 6.15ന് കന്തീശങ്ങളുടെ തിരുസ്വരൂപങ്ങള്‍ മോണ്ടളത്തില്‍ പ്രതിഷ്ഠിക്കും. തുടര്‍ന്ന് 6.30നും പത്തിനും പാട്ടുകുര്‍ബാന. വൈകുന്നേരം അഞ്ചിന് പാട്ടുകുര്‍ബാന, സന്ദേശം, നൊവേന-ഫാ. ബിജു ഇളമ്പാശേരില്‍ സിഎംഎഫ്, 6.30ന് പ്രദക്ഷിണം. പ്രധാന തിരുനാള്‍ ദിനമായ 19ന് രാവിലെ 5.45ന് വിശുദ്ധ കുര്‍ബാന, ഏഴിന് പാട്ടുകുര്‍ബാന, നൊവേന. 8.30 ന് ഇരട്ടകളുടെ രജിസ്‌ട്രേഷന്‍ ആരംഭിക്കും. 9.30ന് സമൂഹബലി. ഇരട്ടവൈദികരായ ഫാ. റോയി കണ്ണഞ്ചിറ സിഎംഐ, ഫാ. റോബി കണ്ണഞ്ചിറ സിഎംഐ, ഫാ. റോജി മനയ്ക്കപ്പറമ്പില്‍ സിഎംഐ, ഫാ. റെജി മനയ്ക്കപ്പറമ്പില്‍ സിഎംഐ, ഫാ. ആന്‍റോ പേഴുംകാട്ടില്‍, ഫാ. അജോ പേഴുംകാട്ടില്‍, ഫാ.ജസ്റ്റിന്‍ തയ്യില്‍ ഒഎസ്ബി, ഫാ. ജിസ്റ്റോ തയ്യില്‍ ഒഎസ്ബി, ഫാ. ഡെയ്‌ന വടക്കേമുറിയില്‍ എന്നിവര്‍ കാര്‍മികത്വം വഹിക്കും. 11.15 ന് തിരുനാള്‍ പ്രദക്ഷിണം ആരംഭിക്കും. 12.15 ന് ഇരട്ടകളുടെ സമര്‍പ്പണ ശുശൂഷ - ബിഷപ് മാര്‍ ജോസഫ് കല്ലറങ്ങാട്ട് നിര്‍വഹിക്കും. തുടര്‍ന്ന് സ്‌നേഹവിരുന്ന്, വൈകുന്നേരം അഞ്ചിന് പാട്ടുകുര്‍ബാന, തുടര്‍ന്ന് കന്തീശങ്ങളുടെ തിരുസ്വരൂപങ്ങള്‍ പുനഃപ്രതിഷ്ഠിക്കും. തിരുനാള്‍ തിരുക്കര്‍മങ്ങളെക്കുറിച്ചു വിശദീകരിക്കുന്നതിനായി നടന്ന വാര്‍ത്താസമ്മേളനത്തില്‍ വികാരി ഫാ. സെബാസ്റ്റ്യന്‍ പടിയ്ക്കക്കുഴുപ്പില്‍, കൈക്കാരന്മാരായ ബേബി എടാട്ടേല്‍, പൊന്നി പുളിങ്ങാപ്പള്ളില്‍, ജോസഫ് പാളിയില്‍, ജോര്‍ജ് പട്ടമന എന്നിവര്‍ പങ്കെടുത്തു.

പ്രവർത്തനം നിലച്ച ശുചിമുറിസമുച്ചയം നശിക്കുന്നു

വൈക്കം: വൈക്കം ദളവാക്കുളം ബസ് ടെർമിനലിന്‍റെ സമീപത്തെ പ്രവർത്തനം നിലച്ച കംഫർട്ട് സ്റ്റേഷൻ കെട്ടിടം നാശത്തിന്‍റെ വക്കിൽ. ദളവാക്കുളം ബസ് ടെർമിനലിനു കിഴക്കുഭാഗത്ത് കോട്ടയം ജില്ലാ ടൂറിസം പ്രമോഷൻ കൗൺസിലിന്‍റെ ആഭിമുഖ്യത്തിൽ ലക്ഷങ്ങൾ ചെലവഴിച്ചു നിർമിച്ച കംഫർട്ട് സ്റ്റേഷൻ കെട്ടിടമാണ് ഏതാനും വർഷങ്ങളായി പ്രവർത്തനം നിലച്ചതോടെ കിടന്ന് നശിക്കുന്നത്. മഹാദേവ ക്ഷേത്രത്തിലെത്തുന്നവർക്കും നഗരത്തിലെത്തുന്നവർക്കും പ്രാഥമികാവശ്യം നിർവഹിക്കാൻ കംഫർട്ട് സ്റ്റേഷൻ വേണമെന്ന നിരന്തരാവശ്യത്തെത്തുടർന്നാണ് വിനോദസഞ്ചാര വകുപ്പിന്‍റെ ധനസഹായത്തോടെ ശുചിമുറി സമുച്ചയം നിർമിച്ചത്. ദളവാക്കുളം ബസ് ടെർമിനലിനുള്ളിൽ ടേക്ക് എ ബ്രേക്ക് പദ്ധതിയിൽ ഉൾപ്പെടുത്തി പുതിയ കംഫർട്ട് സ്റ്റേഷൻ പണിത് പ്രവർത്തനം ആരംഭിച്ചു. ദളവാക്കുളം ബസ് ടെർമിനലിനു കിഴക്കുഭാഗത്ത് നഗരസഭയുടെ സ്ഥലത്ത് ജില്ലാ ടൂറിസം പ്രമോഷൻ കൗൺസിൽ ലക്ഷങ്ങൾ വിനിയോഗിച്ചു പണിത കംഫർട്ട് സ്റ്റേഷന്‍റെ പ്രവർത്തനം പുനരാരംഭിക്കുന്നതിന് അധികൃതർ നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact editor@deepika.com