ADVERTISEMENT

ADVERTISEMENT

കുറവിലങ്ങാട് ശ്ലൈഹിക പാരമ്പര്യത്തിന്‍റെ തറവാട്: കർദിനാൾ മാർ ജോർജ് ആലഞ്ചേരി

കുറവിലങ്ങാട്: കുറവിലങ്ങാട് ശ്ലൈഹിക പാരമ്പര്യത്തിന്‍റെ തറവാടാണെന്ന് കർദിനാൾ മാർ ജോർജ് ആലഞ്ചേരി. മേജർ ആർക്കിഎപ്പിസ്‌കോപ്പൽ മർത്ത്മറിയം അർക്കദിയാക്കോൻ തീർഥാടന ദേവാലയത്തിൽ റംശാ പ്രാർഥന നടത്തി സന്ദേശം നൽകുകയായിരുന്നു കർദിനാൾ.

വിശ്വാസത്തിന്‍റെ ഈറ്റില്ലമാണ് കുറവിലങ്ങാട്. ദൈവാത്മാവിനോട് ചേർന്ന് ജീവിക്കാൻ കഴിയണം. ദുഃഖങ്ങളും പ്രതിസന്ധികളും ഗ്രസിച്ചാൽ ദൈവാത്മാവിനോടു ചേർന്ന് നിൽക്കണം. വിശ്വാസം കൈവിടാതെ ദൈവസ്‌നേഹത്തിലും പരസ്‌നേഹത്തിലും ജീവിക്കണമെന്നും കർദിനാൾ പറഞ്ഞു.

ആർച്ച്പ്രീസ്റ്റ് റവ.ഡോ. തോമസ് മേനാച്ചേരി, സീനിയർ അസി. വികാരി ഫാ. ജോസഫ് മണിയഞ്ചിറ, അസി. വികാരിമാരായ ഫാ. പോൾ കുന്നുംപുറത്ത്, ഫാ. ജോസഫ് ചൂരയ്ക്കൽ, ഫാ. തോമസ് താന്നിമലയിൽ, പാസ്റ്ററൽ അസിസ്റ്റന്‍റുമാരായ ഫാ. ജോസ് കോട്ടയിൽ, ഫാ. പോൾ മഠത്തിക്കുന്നേൽ എന്നിവർ പ്രാർഥനാശുശ്രൂഷകളിൽ കാർമികരായി. യോഗപ്രതിനിധികളുമായും കർദിനാൾ സംവദിച്ചു.

ADVERTISEMENT

ശബരി എയര്‍പോര്‍ട്ട്: സര്‍വേ തടസപ്പെടുത്തി മഴ

കോട്ടയം: എരുമേലിയില്‍ ശബരി വിമാനത്താവളം നിര്‍മാണത്തിനു മുന്നോടിയായുള്ള സ്ഥലം സര്‍വേ നടപടികള്‍ വൈകും. ഏറ്റെടുക്കേണ്ട സ്ഥലങ്ങളില്‍ വളര്‍ന്ന കാടുവെട്ടിത്തെളിക്കാതെ അതിരുകള്‍ കണ്ടെത്തുക എളുപ്പമല്ല. സ്ഥലത്തിന്‍റെ ഉടമകള്‍തന്നെ കാടു വെട്ടി സര്‍വേക്ക് സൗകര്യം ഒരുക്കണമെന്നാണ് നിര്‍ദേശം. ഒന്നര സെന്‍റ് മുതല്‍ മൂന്നര ഏക്കര്‍ വരെ സ്ഥലം വിട്ടുകൊടുക്കേണ്ടവര്‍ ഇതില്‍പ്പെടും. എരുമേലി തെക്ക്, മണിമല വില്ലേജുകളില്‍പ്പെട്ട 1039.876 ഹെക്ടര്‍ സ്ഥലമാണു വിമാനത്താവളത്തിനായി ഏറ്റെടുക്കുന്നത്. ഇതില്‍ ബിലീവേഴ്‌സ് ചര്‍ച്ചിനു കീഴിലുള്ള അയന ചാരിറ്റബിള്‍ ട്രസ്റ്റിന്‍റെ കൈവശമുള്ള ചെറുവള്ളി എസ്റ്റേറ്റില്‍പ്പെട്ടതാണ് 2,570 ഏക്കര്‍. കൂടാതെ എരുമേലി സൗത്ത്, മണിമല വില്ലജുകളിലായി 245 പേരുടെ ഭൂമിയും ഏറ്റെടുക്കും. ഈ സ്ഥലം എയര്‍പോര്‍ട്ട് പദ്ധതിയില്‍ പെടുത്തിയതിനുശേഷം കൃഷിയില്ലാതെ വെറുതെ കിടന്ന് കാടുകയറി. ഇവരില്‍ പലരും നിലവില്‍ സ്ഥലത്ത് താമസക്കുന്നുമില്ല. മാത്രവുമല്ല യന്ത്രം ഉപയോഗിച്ച് കാടുവെട്ടുന്നതിന് ഭാരിച്ച സാമ്പത്തിക ചെലവുമുണ്ട്. സ്ഥലത്തിന്‍റെ അതിരുകളിലെ കാടുകള്‍ മാത്രം തെളിച്ചാല്‍ മതിയെന്നാണ് റവന്യു വകുപ്പിന്‍റെ നിര്‍ദേശം. എന്നാല്‍, ഏറെ പ്രദേശങ്ങളും കാടുകയറി ഉള്ളിലേക്ക് കടക്കാന്‍ പറ്റാത്ത നിലയിലാണ്. സ്ഥലം അളന്നു തിരിക്കാന്‍ എട്ടു താത്കാലിക സര്‍വേയര്‍മാരെ നിയമിക്കാനാണ് നിശ്ചയിച്ചതെങ്കിലും നാലു പേരേ മാത്രമേ ലഭിച്ചിട്ടുള്ളൂ. രണ്ടാഴ്ച മുന്‍പ് നിയമനം നടന്നെങ്കിലും എരുമേലി തെക്ക്, മണിമല വില്ലേജുകളിലെ രേഖകളുടെ പരിശോധന പൂര്‍ത്തിയായതിനുശേഷമേ ഫീല്‍ഡ് സര്‍വേ അരംഭിക്കുകയുള്ളൂ. ഒരാഴ്ചയായി പെയ്യുന്ന കനത്ത മഴ മറ്റൊരു പരിമിതിയാണ്.

അവധിക്കാലം: സർക്കാർ ബോട്ടുകൾക്ക് ലക്ഷങ്ങളുടെ ലാഭം

കോട്ടയം: അവധിക്കാല കായല്‍ യാത്രയില്‍ സര്‍ക്കാര്‍ ബോട്ടുകള്‍ കോരിയെടുത്തത് ലക്ഷങ്ങള്‍. യാത്രാപ്രേമികള്‍ ഏറെ ഇഷ്ടപ്പെടുന്ന കോട്ടയം-ആലപ്പുഴ കായല്‍ യാത്രയിലാണ് സര്‍ക്കാര്‍ ബോട്ടുകള്‍ ലാഭം കൊയ്തത്. അവധിക്കാലമായ ഏപ്രില്‍, മേയ് മാസത്തില്‍ ടിക്കറ്റിനത്തില്‍ അഞ്ചര ലക്ഷം രൂപയുടെ വരുമാനമാണ് കോട്ടയം കോടിമത സ്റ്റേഷനില്‍നിന്നു ജലഗതാഗത വകുപ്പിന് ലഭിച്ചത്. ഏപ്രിലില്‍ രണ്ടര ലക്ഷവും മേയില്‍ മൂന്ന് ലക്ഷവും ലഭിച്ചു. കഴിഞ്ഞ വര്‍ഷത്തേക്കാള്‍ മികച്ച വര്‍ധനയാണിത്. പ്രകൃതിഭംഗി ആസ്വദിച്ച് വേഗത്തില്‍ കോട്ടയത്തുനിന്ന് ആലപ്പുഴയില്‍ എത്താന്‍ ചെലവുകുറഞ്ഞൊരു യാത്രയാണിത്. 29 രൂപയാണ് ടിക്കറ്റ് നിരക്ക്. മുന്‍ വര്‍ഷങ്ങളില്‍നിന്നു വ്യത്യസ്തമായി ഇത്തവണ കായല്‍യാത്ര ആസ്വദിക്കാന്‍ എത്തിയവരുടെ എണ്ണത്തിലും വലിയ വര്‍ധനയുണ്ടായി. വിദേശികളേക്കാള്‍ കൂടുതലും സ്വദേശികളാണ് ഇത്തവണ എത്തിയത്. വടക്കന്‍ ജില്ലകളില്‍നിന്നുള്ളവരാണ് കൂടുതല്‍. രണ്ടുമാസത്തില്‍ 40,000 യാത്രക്കാരെത്തിയതായാണ് ജലഗതാഗത വകുപ്പിന്‍റെ കണക്ക്. കോടിമതയില്‍നിന്ന് രണ്ടും ആലപ്പുഴയില്‍നിന്ന് ഒരു ബോട്ടുമാണ് സര്‍വീസ് നടത്തുന്നത്. രണ്ടു മണിക്കൂര്‍ നീളുന്ന യാത്ര പുതിയൊരു അനുഭവമാണ് സഞ്ചാരികള്‍ക്ക് സമ്മാനിക്കുന്നത്. ഇതാണ് ഈ കായല്‍ യാത്രയുടെ പ്രത്യേകതയും. കോടിമതയില്‍നിന്ന് പുറപ്പെട്ട് കൊടൂരാറിലൂടെ കാഞ്ഞിരം, വെട്ടിക്കാട്, പുത്തന്‍തോട്, പള്ളിക്കായല്‍, ആര്‍ ബ്ലോക്ക്,പുന്നമട വഴി ആലപ്പുഴ ബോട്ട് ജെട്ടിയിലെത്തും. കോട്ടയത്തുനിന്ന് രാവിലെ 6.45, 11.30, ഒന്ന്, ഉച്ചകഴിഞ്ഞ് 3.30, വൈകുന്നേരം 5.15 എന്നീ സമയത്താണ് സര്‍വീസ്. ആലപ്പുഴയില്‍നിന്ന് രാവിലെ 7.15, 9.35, 11.30, ഉച്ചകഴിഞ്ഞ് 2.30, വൈകുന്നേരം 5.15 എന്നീ സമയങ്ങളിലാണ് മടക്ക ബോട്ട്. കായല്‍ യാത്രയിലൂടെ ലക്ഷങ്ങള്‍ വരുമാനം നേടിയെങ്കിലും സര്‍വീസിനായി ഇപ്പോഴും പഴയ ബോട്ടുകളാണ് ഉപയോഗിക്കുന്നത്. സോളാര്‍ സംവിധാനത്തില്‍ പ്രവര്‍ത്തിക്കുന്ന പുതിയ ബോട്ടുകള്‍ യാത്രയ്ക്കായി ഉപയോഗിക്കണമെന്ന ആവശ്യവും ശക്തമായി.

മലയോരത്തെ വിറപ്പിച്ച് 23 കാട്ടാനകൾ

മുണ്ടക്കയം: ഒരുമിച്ചുകൂടിയാല്‍ ഇരുപത്തിമൂന്ന്. ചിലപ്പോള്‍ ആറും ഏഴുമായി കൂട്ടം തെറ്റി പലവഴി തിരിയും. പെരുവന്താനം, പീരുമേട് മലയോരമേഖലയിലെ കാട്ടാനക്കൂട്ടം ജനവാസ മേഖലയിലും വനാതിര്‍ത്തിയിലുമായി മേയാന്‍ തുടങ്ങിയിട്ട് കാലമേറെയായി. മുണ്ടക്കയം ടിആര്‍ ആന്‍ഡ് ടി എസ്റ്റേറ്റിലെ റബര്‍ത്തോട്ടത്തില്‍ ടാപ്പിംഗ്തൊഴിലാളികള്‍ക്ക് മുന്നില്‍ വഴിമുടക്കിയും ചിന്നംവിളിച്ചും എത്തുന്നത് ഇതേസംഘംതന്നെ. അടുത്തയിടെ കുട്ടിക്കാനത്തിനു സമീപം റോഡ് കുറുകെ കടന്ന് റബര്‍ത്തോട്ടത്തിലൂടെ വാലേവാലേ നീങ്ങിയപ്പോഴാണ് പ്രദേശത്ത് വിഹരിക്കുന്നത് ആറു കുട്ടിയാനകള്‍ ഉള്‍പ്പെടെ ഇരുപത്തിമൂന്ന് ആനകളാണെന്ന് പ്രദേശവാസികള്‍ എണ്ണിത്തിട്ടപ്പെടുത്തിയത്. തീറ്റ കുറവായതിനാല്‍ ഇവ പെരിയാര്‍ ഉള്‍വനം കയറിപ്പോകാന്‍ കൂട്ടാക്കുന്നില്ല. കാലങ്ങളായി ഇതേ ആനക്കൂട്ടം ഒരുമിച്ചും വഴിതിരിഞ്ഞും പെരുവന്താനം, കോരുത്തോട്, പീരുമേട് പഞ്ചായത്ത് പരിധിയിലെ വനമേഖലയിലൂടെ ഊരുചുറ്റുകയാണ്. കഴിഞ്ഞ ദിവസം മതമ്പ വനാതിര്‍ത്തിയില്‍ കുട്ടിയാനകള്‍ ഉള്‍പ്പെടെ ഏഴ് ആനകള്‍ കൃഷിയിടം ഒരു പകല്‍ മേഞ്ഞ് ചവിട്ടിമെതിച്ചു. കാളകെട്ടി, കൊയ്‌നാട്, കോരുത്തോട്, മതമ്പ, മുറിഞ്ഞപുഴ, പുല്ലുമേട്, ചെന്നാപ്പാറ, കുഴിമാവ്, ബോധി, പ്ലാക്കത്തടം, അഴുത പ്രദേശങ്ങളിലാണ് ഒരേ താരയിലൂടെ ആനക്കൂട്ടങ്ങളുടെ പ്രയാണം. അഴുത നദിയിലും കൈത്തോടുകളിലും ഇടയ്ക്കിടെ നീരാട്ടുമുണ്ട്. വനപാലകര്‍ ആത്മാര്‍ഥത കാണിക്കുന്നയിടങ്ങളില്‍ പടക്കം പൊട്ടിച്ച് ആനകളെ വിരട്ടിയോടിക്കുന്നുണ്ട്. മറ്റിടങ്ങളില്‍ ജനങ്ങള്‍ ആവശ്യപ്പെട്ടാലും വനപാലകര്‍ തിരിഞ്ഞുനോക്കില്ല. ചക്കയുടെ സീസണ്‍ തീരാതെ ഇവയൊന്നും കാടുകയറി പോകില്ലെന്നാണ് പ്രദേശവാസികളുടെ അനുഭവം. മതമ്പ കൊമ്പന്‍പാറയില്‍ നാലു മാസം മുന്‍പ് സോഫിയ എന്ന വീട്ടമ്മയെ കാട്ടാന കുത്തിക്കൊന്നതിന്‍റെ ഭീതി ഇപ്പോഴും മാറിയിട്ടില്ല. ശബരിമല വനത്തിന്‍റെ അതിര്‍ത്തി പങ്കിടുന്ന മറ്റ് പ്രദേശങ്ങളില്‍ സോളാര്‍ വേലികളുണ്ട്. എന്നാല്‍, മതമ്പ, ചെന്നാപ്പാറ മേഖലകളില്‍ സോളര്‍വേലികള്‍ നശിച്ചനിലയിലായതിനാല്‍ ആനകള്‍ കൂട്ടമായി നാട്ടിലേക്ക് ഇറങ്ങുകയാണ്. റബര്‍ത്തോട്ടങ്ങളില്‍ ടാപ്പിംഗിന് പോകുന്ന തൊഴിലാളികളും പത്രവിതരണക്കാരുമൊക്കെയാണ് ഏറ്റവുമധികം ഭീതിയില്‍ കഴിയുന്നത്. കോരുത്തോട് പഞ്ചായത്തിലെ മടുക്ക കൊമ്പകുത്തി മുതല്‍ ടിആര്‍ ആന്‍ഡ് ടി എസ്റ്റേറ്റ് അതിര്‍ത്തിയിലൂടെ കടന്ന് പനക്കച്ചിറ, ഇഡികെ കടമാന്‍കളം, ചെന്നാപ്പാറ, മതമ്പ പ്രദേശങ്ങളിലൂടെയാണ് കാട്ടാനകളുടെ സഞ്ചാരം. കൊമ്പുകുത്തി വനത്തില്‍ മുന്‍പും ആനകള്‍ ഉണ്ടായിരുന്നെങ്കിലും ജനത്തിനു ഭീഷണിയായിരുന്നില്ല. 2020 മുതലാണ് പനക്കച്ചിറ ഭാഗത്തേക്ക് ആനകള്‍ ഇറങ്ങിത്തുടങ്ങിയത്. പിന്നീട് കടമാന്‍കുളം ഭാഗത്തേക്കും മതമ്പ ഭാഗത്തേക്കും ആനകള്‍ എത്തിത്തുടങ്ങി. നാട്ടിലിറങ്ങി വാഴ, കപ്പ, തെങ്ങ്, പ്ലാവ് എന്നിവ വ്യാപകമായി ഇവ നശിപ്പിക്കുന്നു.

ദീപികയെ നെഞ്ചിലേറ്റിയ മോൻസിച്ചായൻ മടങ്ങി; മോൻസിക്കടവ് മൂകമായി

സ്വന്തം ലേഖകൻ കോട്ടയം: ഒരു തൊഴിൽ എന്ന നിലയിലും വരുമാനം എന്ന നിലയിലും പത്രത്തിന്‍റെ ഏജൻസി എടുക്കുന്നവരാണ് എല്ലാവരുംതന്നെ. എന്നാൽ, അവരിൽനിന്നു തികച്ചും വ്യത്യസ്തനായിരുന്നു കഴിഞ്ഞ ദിവസം അന്തരിച്ച പള്ളം നങ്ങച്ചിവീട്ടിൽ ആന്‍റണി ജോസഫ് എന്ന നാട്ടുകാരുടെ മോൻസിച്ചായൻ. ദീപികയോടുള്ള സ്നേഹത്തെപ്രതി പത്രം വായിക്കാൻ കിട്ടാൻ വേണ്ടി മാത്രം ദീപികയുടെ ഏജൻസി എടുത്തയാളാണ് മോൻസിച്ചായൻ. പതിനഞ്ചു വർഷങ്ങൾക്കു മുന്പ് ദീപികയുടെ ഏജൻസിയിൽ ചില തടസങ്ങളുണ്ടായി ഇവർ താമസിക്കുന്ന പ്രദേശത്തു ദീപിക പത്രം കിട്ടാൻ ബുദ്ധിമുട്ട് വന്നു. പല രീതിയിലും ശ്രമിച്ചിട്ടും പത്രം കൃത്യമായി കിട്ടാതെ വന്നതോടെ മോൻസിച്ചായൻ സ്വന്തം നിലയിൽ ദീപികയുടെ ഏജൻസി എടുക്കാൻ തീരുമാനിച്ചു. സമീപവാസികളായ ചില സുഹൃത്തുക്കളെയും വരിക്കാരായി കൂട്ടി. അങ്ങനെ അഞ്ചു പത്രത്തിന്‍റെ ഏജൻസിക്കു തുടക്കമിട്ടു. ഇങ്ങനെ വരുത്തിയ പത്രം വിതരണം ചെയ്യുന്നവരെ ഏല്പിച്ച് ഈ വീടുകളിൽ എത്തിക്കുകയായിരുന്നു. കുറെക്കാലത്തിനു ശേഷം അദ്ദേഹം ഏജൻസിയുടെ നടത്തിപ്പ് മറ്റൊരു ഏജന്‍റിനെ ഏൽപ്പിച്ചു. കൈനകരിയിൽനിന്നുവന്നു പള്ളം ബോർമക്കവലയ്ക്കു സമീപം താമസമാക്കിയ മോൻസിച്ചായൻ മികച്ച കർഷകൻകൂടിയായിരുന്നു. എൺപത്തിനാലാം വയസിലും കൃഷിയിൽ സജീവമായി നിന്നു. കുട്ടനാട്ടിൽ അടുത്ത കാലംവരെ കായൽ കൃഷി ചെയ്തു. കൂടാതെ പള്ളത്ത് നെൽകൃഷി, ഫാം, മീൻ വളർത്തൽ ഉൾപ്പെടെ നടത്തിയിരുന്നു. കഴിഞ്ഞ ദിവസം കൃഷി ഒാഫീസിലേക്കു പോകവേയാണ് കുഴഞ്ഞുവീണു മരിച്ചത്. ഇദ്ദേഹവും കുടുംബവും താമസിക്കുന്ന സ്ഥലത്തിനു സമീപമുള്ള കടവിന്‍റെ പേരുതന്നെ മോൻസിക്കടവ് എന്നാണ്. ചങ്ങനാശേരിയിൽനിന്നു നടത്തുന്ന അൽഫോൻസാ തീർഥാടനത്തിനു പള്ളം സെന്‍റ് പോൾസ് ഒാർത്തഡോക്സ് പള്ളി പരിസരത്തു വിശ്രമത്തിനും ഭക്ഷണത്തിനുമുള്ള ക്രമീകരണങ്ങളെല്ലാം ചെയ്യാൻ പതിറ്റാണ്ടുകളായി മോൻസിച്ചായൻ നേതൃനിരയിലുണ്ടായിരുന്നു. ഫാ. ജോർജ് നങ്ങച്ചിവീട്ടിൽ (അമേരിക്ക), സിസ്റ്റർ മേരി ഗ്രേസ് സിഎംസി, സിസ്റ്റർ റീമ എംഎസ്ജെ എന്നിവർ സഹോദരങ്ങളാണ്. ഏഷ്യയിലെ മാർത്തോമ്മ സഭകൾ എന്ന പ്രശസ്തമായ ഗ്രന്ഥം രചിച്ച റവ.ഡോ. എൻ.എ. തോമസ് നങ്ങച്ചിവീട്ടിൽ ഇദ്ദേഹത്തിന്‍റെ പിതൃസഹോദരനാണ്. സംസ്കാര ശുശ്രൂഷ ഇന്നു രാവിലെ 11ന് വീട്ടിൽ ആരംഭിച്ച് കടുവാക്കുളം ലിറ്റിൽ ഫ്ളവർ പള്ളിയിൽ. ഭാര്യ എൽസി ആന്‍റണി കാഞ്ഞിരപ്പള്ളി ഏർത്തയിൽ കുടുംബാംഗം. മക്കൾ: റോസി, മേഴ്സി. മരുമക്കൾ: ബിജു ഡൊമിനിക് നടുവിലേഴം (അബുദാബി, പ്രസിഡന്‍റ്; കത്തോലിക്ക കോൺഗ്രസ് യുഎഇ), ബിജോയി ജോസ് വെള്ളാമത്ര (അബുദാബി).

ശബരി റെയില്‍ ; സ്ഥലം ഏറ്റെടുക്കല്‍ വൈകിയേക്കും

കോട്ടയം: ശബരി റെയില്‍വേയ്ക്ക് സ്ഥലം ഏറ്റെടുക്കല്‍ നടപടി വൈകിയേക്കും. നാലായിരം കോടിയോളം മുടക്കില്‍ സംസ്ഥാനത്തിന്‍റെ വിഹിതം എത്രയെന്നതില്‍ ചര്‍ച്ചയോ ധാരണയോ ഉണ്ടായിട്ടില്ല. സ്ഥലം ഏറ്റെടുക്കല്‍ സംസ്ഥാന സര്‍ക്കാര്‍ നടത്തണമെന്നാണു കേന്ദ്രനിലപാട്. നിലവില്‍ മതിപ്പുവിലയുടെ മൂന്നിരട്ടി പൊന്നുംവിലയായി നല്‍കി വേണം കാലടി മുതല്‍ പിഴക് വരെ സ്ഥലം ഏറ്റെടുക്കേണ്ടത്. 2,125 കുടുംബങ്ങളുടെ കൈവശത്തിലുള്ള 416 ഹെക്ടര്‍ ഭൂമിയാണു സംസ്ഥാന സര്‍ക്കാര്‍ ഇനി ഏറ്റെടുക്കേണ്ടത്. ഭൂമി ഇതോടകം വിട്ടുകൊടുത്ത 2,862 കുടുംബങ്ങള്‍ നഷ്ടപരിഹാരം ലഭിക്കാതെ കാല്‍ നൂറ്റാണ്ടിലേറെയായി ആശങ്കയിലാണ്. കല്ല് സ്ഥാപിച്ച ഭൂമി വില്‍ക്കാനോ പണയപ്പെടുത്താനോ നിര്‍മാണം നടത്താനോ കൃഷി ചെയ്യാനോ ഇവര്‍ക്ക് കഴിയുന്നില്ല. മക്കള്‍ക്ക് ഓഹരി കൊടുക്കാന്‍പോലും സാധിക്കാത്ത കുടുംബങ്ങളുമുണ്ട്. അങ്കമാലി മുതല്‍ പിഴക് വരെ 70 കിലോമീറ്ററിലാണ് സര്‍വേക്കല്ലുകളുള്ളത്. അങ്കമാലി മുതല്‍ എരുമേലി വരെ 111 കിലോമീറ്ററാണ് ശബരി പാതയ്ക്കുള്ളത്. സ്ഥലം ഏറ്റെടുക്കലിന് മുന്നോടിയായി പെരുമ്പാവൂര്‍, തൊടുപുഴ, പാലാ എന്നിവിടങ്ങളില്‍ പുതിയ ഓഫീസുകള്‍ തുടങ്ങണം. ഒരു തഹസീല്‍ദാര്‍ ഉള്‍പ്പെടെ 30 പേരാണ് ഓരോ ഓഫീസിലും വേണ്ടത്. റവന്യു വകുപ്പില്‍നിന്ന് ഇത്രത്തോളം പേരെ മാറ്റിനിയമിക്കുക ഏറെ ദുഷ്‌കരമാണ്. മൂന്നാം ഘട്ടമായി പിഴക് മുതല്‍ എരുമേലി വരെ അന്തിമ അലൈന്‍മെന്‍റ് നിശ്ചയിക്കേണ്ടതുണ്ട്. പിന്നീട് വേണം സ്ഥലം ഏറ്റെടുക്കാന്‍. അങ്കമാലി, കാലടി, പെരുമ്പാവൂര്‍, ഓടക്കാലി, കോതമംഗലം, മൂവാറ്റുപുഴ, വാഴക്കുളം, തൊടുപുഴ, കരിങ്കുന്നം എന്നിവയാണ് എറണാകുളം, ഇടുക്കി ജില്ലകളിലെ സ്റ്റേഷനുകള്‍. ഇതില്‍ മൂവാറ്റുപുഴ, തൊടുപുഴ, പാലാ, കാഞ്ഞിരപ്പള്ളി എന്നിവിടങ്ങളില്‍ റെയില്‍വേ സ്റ്റേഷനുകള്‍ വരുന്ന സ്ഥലം നഗരങ്ങളില്‍നിന്ന് ഏറെ മാറിയാണെന്ന വിമര്‍ശനം ചിലയിടങ്ങളില്‍ ഉയരുന്നുണ്ട്. എന്നാല്‍ ഇക്കാര്യം പ്രായോഗികമല്ലെന്നാണ് റെയില്‍വേയുടെ നിലപാട്. കോട്ടയം ജില്ലയില്‍ രാമപുരം, ഭരണങ്ങാനം, ചെമ്മലമറ്റം, കാഞ്ഞിരപ്പള്ളി റോഡ്, എരുമേലി എന്നിങ്ങനെ അഞ്ച് സ്റ്റേഷനുകളാണ് പാതയ്ക്കായി നിര്‍ദേശിച്ചിരിക്കുന്നത്. ശബരി പാതയുടെ ഭൂമി ഏറ്റെടുക്കല്‍ നടപടികളുമായി ബന്ധപ്പെട്ട് റെയില്‍വേയുടെ വിദഗ്ധസംഘം അടുത്ത മാസം കേരളത്തിലെത്തും. അങ്കമാലി മുതല്‍ കാലടി വരെ ഏഴു കിലോമീറ്റര്‍ റെയില്‍വേ ലൈനും കാലടിയില്‍ സ്റ്റേഷനും പെരിയാറിനു കുറുകെ പാലവും നിര്‍മാണം നടത്തിയിട്ട് 25 വര്‍ഷമായി.മൂന്നു ജില്ലകളെ 14 പട്ടണങ്ങള്‍ക്കു ട്രെയിന്‍ യാതാസൗകര്യം ലഭ്യമാക്കുന്ന പദ്ധതിയാണ് ശബരി റെയില്‍. ഇതോടെ ഇടുക്കി ജില്ലയും റെയില്‍വേ ഭൂപടത്തില്‍ ഇടംനേടും. സാമൂഹിക ആഘാത പഠനം പൂര്‍ത്തിയാക്കിയതിനാല്‍ ഒന്നാം ഘട്ടമായി തൊടുപുഴ വരെ ഭൂമിയേറ്റെടുക്കാന്‍ കാലതാമസമുണ്ടാകില്ല. 1998ല്‍ വാജ്പേയി സര്‍ക്കാരിന്‍റെ കാലത്താണ് അങ്കമാലി-എരുമേലി പാതയ്ക്ക് അവസാന അംഗീകാരം ലഭിക്കുന്നത്. കാലടി-തൊടുപുഴ 48 കിലോമീറ്ററാണ്. ആയിരംകോടി രൂപയുണ്ടെങ്കില്‍ തൊടുപുഴ വരെ പാത നിര്‍മിക്കാന്‍ കഴിയും.1997ല്‍ ശബരിപാതയ്ക്ക് അനുമതി ലഭിച്ചപ്പോള്‍ ചെലവ് 540 കോടി രൂപയായിരുന്നത് നടപടികള്‍ നീണ്ടതോടെ 2017ല്‍ 2815 കോടി രൂപയായി. സ്ഥലമേറ്റെടുക്കുന്നതിലും പദ്ധതിയുടെ ചെലവു പങ്കിടുന്ന കാര്യത്തിലും തീരുമാനം വൈകിയതോടെ 2019ല്‍ റെയില്‍വേ പദ്ധതി മരവിപ്പിച്ചു. നിലവില്‍ ചെലവ് നാലായിരം കോടിയോളം വരും.

പോലീസ് ഉദ്യോഗസ്ഥർ ചുമതലയേറ്റു

കോട്ടയം: ജില്ലയിലെ പുതിയ അഡിഷണല്‍ എസ്പിയായി ചങ്ങനാശേരി ഡിവൈഎസ്പിയായിരുന്ന എ.കെ. വിശ്വനാഥന്‍ ചുമതലയേറ്റു. വൈക്കം ഡിവൈഎസ്പിയായി ഇടുക്കി ക്രൈംബ്രാഞ്ച് ഡിവൈഎസ്പിയായിരുന്ന ടി.ബി. വിജയനും കാഞ്ഞിരപ്പള്ളി ഡിവൈഎസ്പിയായി കോട്ടയം ക്രൈംബ്രാഞ്ച് ഡിവൈഎസ്പിയായിരുന്ന സാജു വര്‍ഗീസും ചുമതലയേറ്റു. പള്ളിക്കത്തോട് പോലീസ് ഇന്‍സ്പെക്ടറായിരുന്ന കെ.പി. ടോംസണ്‍ ചങ്ങനാശേരി ഡിവൈഎസ്പിയായും കോട്ടയം ക്രൈംബ്രാഞ്ച് ഡിവൈഎസ്പിയായി കൊച്ചി സിറ്റി കണ്‍ട്രോള്‍ ഇന്‍സ്പെക്ടറായിരുന്ന വി.എസ്. അനില്‍കുമാറും ചുമതലയേറ്റു.

വിതുര പീഡനക്കേസ്: നാലാംഘട്ട തുടര്‍വിചാരണ അടുത്തമാസം 16ന്

കോട്ടയം: വിതുര പീഡനക്കേസില്‍ നാലാംഘട്ട തുടര്‍വിചാരണ അടുത്തമാസം 16ലേക്കു മാറ്റി. ജൂണ്‍ 16നു നടത്താനിരുന്ന വിചാരണ അടുത്തമാസത്തേക്കു മാറ്റുകയായിരുന്നു. ഒന്നാം സാക്ഷിയായ അതിജീവിതയുടെ പ്രോസിക്യൂഷന്‍ ഭാഗം വിചാരണയാണു നടക്കുന്നത്. നേരത്തെ സാക്ഷിവിസ്താരം തുടങ്ങിയപ്പോള്‍ ഒന്നാംപ്രതി കൊല്ലം ജുബൈറ മന്‍സിലില്‍ സുരേഷ് (ഷംസുദ്ദീന്‍ മുഹമ്മദ് ഷാജഹാന്‍-52)നെ ഓണ്‍ലൈനായി കോടതിയില്‍ ഹാജരാക്കിയിരുന്നു. വിചാരണവേളയില്‍ അതിജീവിത പ്രതിയെ തിരിച്ചറിയുന്ന ഘട്ടത്തിലെത്തിയപ്പോള്‍ കോടതിയില്‍ നേരില്‍ ഹാജരാക്കണമെന്ന് ഇയാള്‍ ആവശ്യപ്പെട്ടതിനാല്‍ കേസ് മാറ്റിവച്ചു. പിന്നീട് ജഡ്ജി സ്ഥലംമാറിപ്പോകുകയും പുതിയ ജഡ്ജി ചുമതലയേല്‍ക്കുകയും ചെയ്തതോടെയാണ് സാക്ഷിവിചാരണ അടുത്ത 16നു പുനരാരംഭിക്കുന്നത്. ഒന്നാംപ്രതി സുരേഷിനെ വിചാരണദിവസം കോടതിയില്‍ ഹാജരാക്കും. വിതുര പീഡനക്കേസായി രജിസ്റ്റര്‍ ചെയ്ത 24 കേസുകളില്‍ 23 എണ്ണവും വിചാരണഘട്ടത്തിലാണ്. ഒരു കേസില്‍ മാത്രമാണ് ശിക്ഷ വിധിച്ചത്. ഇതില്‍ ജീവപര്യന്തം ശിക്ഷ സെന്‍ട്രല്‍ ജയിലില്‍ അനുഭവിച്ചുവരികയാണ് ഒന്നാംപ്രതി സുരേഷ്. 24 കേസുകളിലെയും ഒന്നാംപ്രതി ഇയാള്‍ തന്നെയാണ്. വിചാരണയിലുള്ള എല്ലാക്കേസുകളിലും കുറ്റം സമ്മതിക്കാന്‍ തന്നെ അനുവദിക്കണമെന്നും ശിക്ഷിക്കണമെന്നും ആവശ്യപ്പെട്ട് ഒന്നാം പ്രതി സുരേഷ് വിചാരണക്കോടതിയില്‍ നല്‍കിയ അപേക്ഷ പ്രോസിക്യൂഷന്‍റെ എതിര്‍പ്പിനെത്തുടര്‍ന്ന് പ്രതിഭാഗം പിന്‍വലിച്ചിരുന്നു. 1995ല്‍ വിതുര സ്വദേശിനിയായ പെണ്‍കുട്ടിയെ അകന്ന ബന്ധുവായ യുവതി വീട്ടില്‍നിന്നിറക്കിക്കൊണ്ടുവന്ന് ഒന്നാം പ്രതി സുരേഷിന് കൈമാറുകയും 1996 ജൂലൈ വരെ എട്ട് മാസത്തിലേറെ സംസ്ഥാനത്തിനകത്തും പുറത്തും നിരവധിപേര്‍ക്ക് കൈമാറി പീഡിപ്പിക്കുകയും ചെയ്തെന്നാണ് പ്രോസിക്യൂഷന്‍ കേസ്. ഇതില്‍ ആദ്യ കേസിലാണ് ഇപ്പോള്‍ വിചാരണ തുടങ്ങിയത്. മറ്റ് 18 കേസുകളിലെ 45 പ്രതികളെയാണ് ഇതുവരെ കോടതി കുറ്റവിമുക്തരാക്കിയത്. പ്രോസിക്യൂഷനുവേണ്ടി സ്‌പെഷല്‍ പബ്ലിക് പ്രോസിക്യൂട്ടര്‍ അഡ്വ. രാജഗോപാല്‍ പടിപ്പുരയ്ക്കല്‍ ഹാജരാകും. കോട്ടയം അഡീഷണല്‍ ജില്ലാ സെഷന്‍സ് കോടതി (രണ്ട്) ആണ് കേസ് പരിഗണിക്കുന്നത്.

നൈജീരിയയിലെ വംശഹത്യ ഭയാനകം: കത്തോലിക്ക കോണ്‍ഗ്രസ്

പാലാ: നൈജീരിയയിലെ ബെന്യു സംസ്ഥാനത്ത് ഫുലാനി ഭീകരര്‍ നടത്തിയ ആക്രമണം ഭയാനകവും അപലപനീയവുമാണെന്ന് കത്തോലിക്കാ കോണ്‍ഗ്രസ് പാലാ രൂപത സമിതി. ഈ ആഫ്രിക്കന്‍ രാജ്യത്ത് ദീര്‍ഘനാളായി നടക്കുന്ന സംഘര്‍ഷവും അതിന്‍റെ മറവിലെ വംശഹത്യയും അവസാനിപ്പിക്കാന്‍ അന്താരാഷ്ട്ര സമൂഹം ഇടപെടണമെന്ന് യോഗം ആവശ്യപ്പെട്ടു. പരിക്കേറ്റവര്‍ക്ക് ചികിത്സ പോലും ലഭ്യമാകാത്തതില്‍ യോഗം ആശങ്ക രേഖപ്പെടുത്തി. കഴിഞ്ഞ ദിവസമുണ്ടായ ആക്രമണത്തില്‍ മരിച്ച ഇരുനൂറോളം പേര്‍ക്കായി പ്രത്യേകം പ്രാര്‍ഥനയും നടത്തി. രൂപത പ്രസിഡന്‍റ് ഇമ്മാനുവല്‍ നിധീരിയുടെ അധ്യക്ഷതയില്‍ റവ. ഡോ. ജോര്‍ജ് വര്‍ഗീസ് ഞാറക്കുന്നേല്‍, ജോസ് വട്ടുകുളം, ആന്‍സമ്മ സാബു, ജോയി കണിപറമ്പില്‍, അഡ്വ. ജോണ്‍സണ്‍ വീട്ടിയാങ്കല്‍, സി.എം ജോര്‍ജ്, പയസ് കവളംമാക്കല്‍, സാബു പൂണ്ടിക്കുളം ജോണ്‍സണ്‍ ചെറുവള്ളി, ടോമി കണ്ണീറ്റുമാലില്‍, ബെന്നി കിണറ്റുകര, സിന്ധു ജയബു, രാജേഷ് പാറയില്‍, ജോബിന്‍ പുതിയടത്തുചാലില്‍, എഡ്വിന്‍ പാമ്പാറ, ലിബി മണിമല തുടങ്ങിയവര്‍ പ്രസംഗിച്ചു.

മണിയംകുന്ന് മഠംവാതില്‍ - വളതൂക്ക് റോഡ് ഗതാഗതയോഗ്യമാക്കണം

മണിയംകുന്ന്: മണിയംകുന്ന് മഠം വാതില്‍- വളതൂക്ക് റോഡ് നവീകരണം പൂര്‍ത്തിയാക്കി ഗതാഗതയോഗ്യമാക്കണമെന്നു നാട്ടുകാര്‍ നിവേദനത്തിലൂടെ സെബാസ്റ്റ്യൻ കുളത്തുങ്കല്‍ എംഎല്‍എയോട് ആവശ്യപ്പെട്ടു. പൂഞ്ഞാര്‍ പഞ്ചായത്തിലെ എട്ടാം വാര്‍ഡിലെ ഈ റോഡ് നന്നാക്കണമെന്നാവശ്യപ്പെട്ടു പലപ്രാവശ്യം അധികൃതര്‍ക്കു നിവേദനം നല്‍കിയിട്ടും തിരിഞ്ഞുനോക്കിയിട്ടില്ലെന്നാണ് നാട്ടുകാരുടെ പരാതി. മണിയംകുന്ന് പള്ളി, സെന്‍റ് ജോസഫ്‌സ് സ്‌കൂള്‍, മണിയംകുന്ന് മഠം എന്നിവിടങ്ങളിലേക്ക് വളതൂക്ക് ഭാഗത്തുനിന്നും എത്തുന്നതിനുള്ള ഏകവഴിയാണിത്. ഈ റോഡിന്‍റെ കുറച്ചുഭാഗം വിവിധ പദ്ധതികളില്‍ ഉള്‍പ്പെടുത്തി ടാറിംഗ് ചെയ്തിട്ടുണ്ട്. ബാക്കിയുള്ള ഭാഗം മെറ്റലിളകിയും കുഴികളായും ചെളി നിറഞ്ഞും ജനങ്ങളെ ബുദ്ധിമുട്ടിക്കുകയാണ്. കുട്ടികളുൾപ്പെ‌ടെയുള്ള യാത്രക്കാർ അപകടം നിറഞ്ഞ റോഡിലൂടെയാണ് യാത്ര ചെയ്യുന്നത്. റോഡിന്‍റെ ബാക്കിഭാഗം കോണ്‍ക്രീറ്റോ ടാറിംഗോ നടത്തി വാഹനങ്ങള്‍ക്കും യാത്രക്കാര്‍ക്കും സഞ്ചരിക്കാനുള്ള മാർഗം ഒരുക്കണമെന്നാണ് ജനങ്ങളുടെ ആവശ്യം. എംഎല്‍എയുടെ പ്രാദേശികവികസന ഫണ്ടില്‍നിന്നും തുക അനുവദിക്കണമെന്നും നാട്ടുകാര്‍ ആവശ്യപ്പെടുന്നു. മണിയംകുന്ന് പള്ളി വികാരി ഫാ. ജോര്‍ജ് തെരുവിലിന്‍റെ നേതൃത്വത്തിലാണ് ഒപ്പിട്ട നിവേദനം സമര്‍പ്പിച്ചിരിക്കുന്നത്.

കാൽനടയാത്രക്കാർക്ക് കഷ്ടകാലം; റോഡരിക് കണ്ടാൽ കാട് തോറ്റുപോകും

കുറവിലങ്ങാട്: എംസി റോഡിലുൾപ്പെടെ കാൽനടയാത്രക്കാർ റോഡരികിലെ പച്ചിലപ്പടർപ്പുകൾ വകഞ്ഞുമാറ്റി യാത്രനടത്തേണ്ട സ്ഥിതിയിൽ. ഒന്നാംനമ്പർ സംസ്ഥാന ഹൈവേയടക്കം കാടുകയറിയിട്ടും നടപടികളില്ലാത്തതിൽ പ്രതിഷേധവും ഉയരുന്നുണ്ട്. റോഡരികിലെ പച്ചിലപ്പടർപ്പുകൾ പലയിടങ്ങളിലും ബസ് കാത്തിരിപ്പ് കേന്ദ്രങ്ങളിലേക്കുപോലും പ്രവേശിച്ച് തുടങ്ങിയിട്ടുണ്ട്. ചിലയിടങ്ങളിൽ സ്വകാര്യ വ്യക്തികളും സംഘടനകളും പാതയോരങ്ങൾ ശുചീകരിച്ചിട്ടുണ്ട്. കാൽനടയാത്രക്കാരേക്കാൾ കൂടുതൽ ഉയരത്തിലാണ് പലസ്ഥലങ്ങളിലും പച്ചിലപ്പടർപ്പുകൾ നിൽക്കുന്നത്. ഇരമ്പിപ്പായുന്ന വാഹനങ്ങളിൽ നിന്ന് രക്ഷനേടാനായി കാൽനടയാത്രക്കാർ റോഡരികിലേക്ക് മാറിനിൽക്കാൻ ശ്രമിച്ചാലും കഴിയാത്ത സ്ഥിതിയാണ്. ഇഴജന്തുക്കളുടെ സാന്നിധ്യവും പ്രതിസന്ധി സൃഷ്ടിക്കുന്നുണ്ട്.

രക്തദായക ദിനാചരണവും മെഗാ രക്തദാന ക്യാമ്പും

പാലാ: ജില്ലാ ആരോഗ്യവകുപ്പിന്‍റെയും ആരോഗ്യ കേരളത്തിന്‍റെയും പാലാ ബ്ലഡ് ഫോറത്തിന്‍റെയും പാലാ സെന്‍റ് തോമസ് കോളജ് എന്‍എസ്എസ് യൂണിറ്റിന്‍റെയും നേതൃത്വത്തില്‍ ജില്ലാതല ലോക രക്തദായക ദിനാചരണവും മെഗാ രക്തദാന ക്യാമ്പും പാലായില്‍ നടന്നു. പാലാ സെന്‍റ് തോമസ് കോളജ് ഓഡിറ്റോറിയത്തില്‍ നടന്ന ദിനാചരണ സമ്മേളനം ജില്ലാ മെഡിക്കല്‍ ഓഫീസര്‍ ഡോ. എന്‍. പ്രിയ ഉദ്ഘാടനം ചെയ്തു. കോളജ് പ്രിന്‍സിപ്പൽ ഡോ. സിബി ജെയിംസ് അധ്യക്ഷത വഹിച്ചു. ആരോഗ്യകേരളം ജില്ലാ പ്രോഗ്രാം മാനേജര്‍ ഡോ. വ്യാസ് സുകുമാരന്‍, മുനിസിപ്പല്‍ കൗണ്‍സിലര്‍ ബൈജു കൊല്ലംപറമ്പില്‍, പാലാ ബ്ലഡ് ഫോറം ജനറല്‍ കണ്‍വീനര്‍ ഷിബു തെക്കേമറ്റം, എന്‍എസ്എസ് പ്രോഗ്രാം ഓഫീസര്‍മാരായ ഡോ. പ്രിന്‍സി ഫിലിപ്പ്, ഡോ. ആന്‍റോ മാത്യു, ആരോഗ്യകേരളം പ്രോഗ്രാം കോഓര്‍ഡിനേറ്റര്‍ സി.ആര്‍. വിനീഷ്, ഡെപ്യൂട്ടി മാസ് ഇന്‍ ചാര്‍ജ് ജി. ജയരാജ്, സിബി മാത്യു പ്ലാത്തോട്ടം, ഡോ. മാമച്ചന്‍ , സിസ്റ്റര്‍ ബിന്‍സി എഫ്‌സിസി, സിസ്റ്റര്‍ ആലീസ് ഔസേപ്പറമ്പില്‍, സജി വട്ടക്കാനാല്‍, ജയ്‌സണ്‍ പ്ലാക്കണ്ണി, ഷാജി തകിടിയേല്‍, സൂരജ് പാലാ എന്നിവര്‍ പ്രസംഗിച്ചു. മെഗാ രക്തദാന ക്യാമ്പ് പാലാ ബ്ലഡ് ഫോറം ജനറല്‍ കണ്‍വീനര്‍ ഷിബു തെക്കേമറ്റം ഉദ്ഘാടനം ചെയ്തു. പാലാ മരിയന്‍ മെഡിക്കല്‍ സെന്‍റര്‍ ബ്ലഡ് ബാങ്കും ഭരണങ്ങാനം ഐഎച്ച്എം ബ്ലഡ് ബാങ്കുമാണ് ക്യാമ്പ് നയിച്ചത്.

കുഞ്ഞച്ചന്‍ മിഷനറി ഭവന് അരീക്കരയില്‍ പുതിയ മന്ദിരം

രാമപുരം: അനാഥരുടെയും മാനസിക വെല്ലുവിളികള്‍ നേരിടുന്നവരുടെയും ആശ്രയ കേന്ദ്രമായ കുഞ്ഞച്ചന്‍ മിഷനറി ഭവന്‍റെ ഏഴാമത് കേന്ദ്രം അരീക്കരയില്‍ പ്രവര്‍ത്തനമാരംഭിച്ചു. രാമപുരം വിന്‍സെന്‍റ് ഡി പോള്‍ സൊസെറ്റിയുടെ കീഴില്‍ പ്രവര്‍ത്തിക്കുന്ന കുഞ്ഞച്ചന്‍ മിഷനറി ഭവന് രാമപുരം പഞ്ചായത്തില്‍ മൂന്നു കേന്ദ്രങ്ങളും മറ്റത്തിപ്പാറ, കുറുപ്പുന്തറ, പിറവം, അരീക്കര എന്നിവിടങ്ങളില്‍ ഓരോ കേന്ദ്രങ്ങളുമുണ്ട്. ഈ കേന്ദ്രങ്ങളിലായി മുന്നൂറോളം അന്തേവാസികളെയാണ് സംരക്ഷിക്കുന്നത്. കഴിഞ്ഞ കാല്‍ നൂറ്റാണ്ടിലേറെയായി നിരാലംബരായവര്‍ക്ക് ആശ്രയമായി മാതൃകാപരമായ ജീവകാരുണ്യ സേവന പ്രവര്‍ത്തനങ്ങള്‍ നടത്തി വരുന്ന കുഞ്ഞച്ചന്‍ മിഷനറി ഭവന്‍റെ പുതിയ കേന്ദ്രത്തില്‍ ജന്മനാ വൈകല്യമുള്ളവരും ഓട്ടിസം എംആര്‍ ബാധിച്ചവരും നിരാശ്രയരായവരുമായ ഇരുപത് ആളുകളെ പരിപാലിക്കുന്നതിനുള്ള സൗകര്യം ഏര്‍പ്പെടുത്തിയിട്ടുണ്ട്. അരീക്കര എറിക്കാട്ട് കുടുംബം സൗജന്യമായി നിര്‍മിച്ചു നല്‍കിയതാണ് ഈ കെട്ടിടം. അരീക്കര സെന്‍റ് റോക്കീസ് പള്ളി വികാരി ഫാ. കുര്യന്‍ ചുഴുകുന്നേല്‍ വെഞ്ചരിപ്പ് കര്‍മം നിര്‍വഹിച്ചു. കൂത്താട്ടുകുളം ഫൊറോന പള്ളി വികാരി ഫാ. ജെയിംസ് കുടിലില്‍, ഉഴവൂര്‍ ബ്ളോക്ക് പഞ്ചായത്ത് പ്രസിഡന്‍റ് രാജു ജോണ്‍ ചിറ്റേത്ത്, ഡോ. സിന്ധുമോള്‍ ജേക്കബ്, ഉഷ സന്തോഷ്, അഡ്വ. ബിജു പുന്നത്താനം, സണ്ണി പുതിയിടം, കോ-ഓര്‍ഡിനേറ്റര്‍ ബിനോയി ജയിംസ് ഊടുപുഴ എന്നിവര്‍ പങ്കെടുത്തു.

കുറിഞ്ഞി അത്താനിയില്‍ കാര്‍ തലകീഴായി മറിഞ്ഞു

രാമപുരം: പാലാ - തൊടുപുഴ റോഡില്‍ കുറിഞ്ഞിക്ക് സമീപം അത്താനിയില്‍ കാര്‍ നിയന്ത്രണം വിട്ട് മറിഞ്ഞ് ഡ്രൈവര്‍ക്ക് പരിക്കേറ്റു. കഴിഞ്ഞ ദിവസം വൈകുന്നേരം 4.30 നാണ് അപകടം നടന്നത്. തൊടുപുഴ ഭാഗത്തുനിന്നു പാലായിലേക്ക് പോവുകയായിരുന്ന കാറാണ് അപകടത്തില്‍പെട്ടത്. റോഡിന്‍റെ സൈഡിലെ മൈല്‍ കുറ്റികള്‍ ഇടിച്ചുതകര്‍ത്ത് നിരവധി തവണ തലകീഴായി മറിയുകയായിരുന്നു. വാഹനം ഓടിച്ചിരുന്ന തൃപ്പൂണിത്തുറ ചിറ്റയില്‍ വീട്ടില്‍ ദാസന്‍റെ മകന്‍ സജിത്തി(30) നെ പരിക്കുകളോടെ പ്രവിത്താനത്തെ എംകെഎം ആശുപത്രിയില്‍ പ്രവേശിപ്പിച്ചു.

കൊഴുവനാല്‍ പഞ്ചായത്തിന്‍റെ ആംബുലന്‍സ് കട്ടപ്പുറത്ത്

കൊഴുവനാല്‍: രോഗികള്‍ക്ക് സൗജന്യ സേവനം എന്ന നിലയില്‍ ആരംഭിച്ച ആംബുലന്‍സ് പഞ്ചായത്തിന്‍റെ മുറ്റത്ത് തുരുമ്പെടുത്ത് നശിക്കുന്നു. പഞ്ചായത്തില്‍ 2009 ല്‍ ജോസ്‌മോന്‍ മുണ്ടയ്ക്കല്‍ പ്രസിഡന്‍റായിരുന്ന കാലത്ത് വാങ്ങിയ ആംബുലന്‍സാണ് മൂന്നു വര്‍ഷത്തിലേറെയായി കട്ടപ്പുറത്തായിരിക്കുന്നത്. ഡ്രൈവറെ നിയമിക്കുന്നത് സംബന്ധിച്ച പഞ്ചായത്ത് അംഗങ്ങളുടെ തര്‍ക്കമാണ് ആംബുലന്‍സ് ഷെഡ്ഡില്‍ കയറാന്‍ കാരണമെന്നു പറയപ്പെടുന്നു. 2024 ല്‍ വാഹനത്തിന്‍റെ കാലാവധി 15 വര്‍ഷം പൂര്‍ത്തിയാവുകയും ചെയ്തു. ഈ വാഹനം റീ രജിസ്റ്റര്‍ ചെയ്യാന്‍ അധികൃതര്‍ക്ക് താല്പര്യവുമില്ല. ഇതിനാല്‍ ഈ വാഹനം തുരുമ്പെടുത്ത് നശിക്കാനുള്ള സാധ്യതയാണ് മുന്നിലുള്ളത്. പാലിയേറ്റീവിന് വേണ്ടി ഒരു ആംബുലന്‍സ് കൂടി ഇവിടുള്ളതാണ് മുമ്പുണ്ടായിരുന്ന ആംബുലന്‍സിനെ അവഗണിക്കാന്‍ കാരണമെന്നും പറയുന്നു.

ഭരണങ്ങാനം, പൈക സെക്‌ഷനുകളിൽ തുടര്‍ച്ചയായി വൈദ്യുതി തടസം

പാലാ: കെഎസ്ഇബി പാലാ ഡിവിഷനു കീഴിലെ ഭരണങ്ങാനം, പൈക സെക്‌ഷനുകളുടെ കീഴിലുള്ള പ്രദേശങ്ങളില്‍ തുടര്‍ച്ചയായ വൈദ്യുതി തടസത്തില്‍ പ്രതിഷേധം ഉയരുന്നു. മീനച്ചില്‍ താലൂക്കിലെ കിഴക്കന്‍ മലയോര മേഖലകളില്‍ പോലും അനുഭവപ്പെടാത്ത വൈദ്യുതി തടസമാണ് മീനച്ചില്‍ പഞ്ചായത്തു പരിധിയില്‍ ഉണ്ടാവുന്നതെന്ന് ഉപയോക്താക്കള്‍ പറയുന്നു. 11 കെവി ലൈനുകളിലെ ടച്ചിംഗ് വെട്ടുന്നതിലെ അപാകതകള്‍ മൂലം നിരന്തരമായി വൈദ്യുതി മുടങ്ങുകയാണ്. ഭരണങ്ങാനം സെക്‌ഷന്‍ ഓഫീസ് നിലനിര്‍ത്തുന്നതിനായി പൈക സെക്‌ഷന്‍ പരിധിയില്‍ ഉണ്ടായിരുന്ന ഉപഭോക്താക്കളെ ഭരണങ്ങാനം സെക്‌ഷനിലേക്കു മാറ്റിയതു മുതല്‍ മീനച്ചില്‍ പഞ്ചായത് പരിധിയിലെ ഭരണങ്ങാനം പൈക, സെക്‌ഷന്‍ പരിധികളില്‍ വൈദ്യുതി മുടക്കം കൂടിയതായി നാട്ടുകാര്‍ പറഞ്ഞു. പൈക സെക്‌ഷന്‍ പരിധിയിലെ ഉപഭോക്താക്കളെ ഭരണങ്ങാനം സെക്‌ഷനിലേക്കു മാറ്റിയപ്പോള്‍ 11 കെവി വിതരണ സംവിധാനത്തില്‍ മാറ്റം വരുത്താത്തതാണ് ഇതിനു കാരണമെന്നാണ് കരുതുന്നത്. വൈദ്യുതി വിതരണ സംവിധാനത്തിലെ അപാകതകള്‍ ഉടന്‍ പരിഹരിക്കണമെന്നും പൈക 33 കെവി സബ്സ്റ്റേഷന്‍ അപ്ഗ്രേഡ് ചെയ്യുന്നതിനു സര്‍ക്കാര്‍ തലത്തില്‍ ഇടപെടല്‍ ആവശ്യപ്പെട്ടും യൂത്ത് ഫ്രണ്ട്-എം പ്രവര്‍ത്തകര്‍ ജോസ് കെ. മാണി എംപിക്കു നിവേദനം നല്‍കിയിട്ടുണ്ട്. 11 കെവി ടച്ചിംഗ് വെട്ടുന്നതു പ്രഹസനമാക്കി മനഃപൂര്‍വം വൈദ്യുത തടസം ഉണ്ടാക്കി ഭരണങ്ങാനം പൈക സെക്‌ഷനുകള്‍ പ്രശ്ന ബാധിത സെക്‌ഷനുകളായി ചിത്രീകരിക്കാനുള്ള ചില ഉദ്യോഗസ്ഥരുടെ നടപടികള്‍ സര്‍ക്കാര്‍ തലത്തില്‍ പരിശോധിക്കണമെന്നും പ്രവര്‍ത്തകര്‍ ആവശ്യപ്പെട്ടു.

പ്രതിഭാസംഗമവും ക്ലബ്ബുകളുടെ ഉദ്ഘാടനവും

കാഞ്ഞിരപ്പള്ളി: പാലമ്പ്ര അസംപ്ഷൻ ഹൈസ്കൂളിൽ പ്രതിഭാ സംഗമവും അധ്യാപക രക്ഷാകർതൃ സമ്മേളനവും ബോധവത്ക്കരണ ക്ലാസും വിവിധ ക്ലബുകളുടെ ഉദ്ഘാടനവും നടത്തി. കോർപറേറ്റ് മാനേജർ ഫാ. ബാസ്റ്റിൻ മംഗലത്തിൽ സിഎംഐ പ്രതിഭാസംഗമവും വാർഡ് മെംബർ സിന്ധു മോഹനൻ വിവിധ ക്ലബുകളുടെയും ഉദ്ഘാടനവും നിർവഹിച്ചു. സ്കൂൾ മാനേജർ റവ.ഡോ. ജിയോ കണ്ണംകുളം സിഎംഐ അധ്യക്ഷത വഹിച്ചു. ഹെഡ്മാസ്റ്റർ ടോം ജോൺ, പിടിഎ പ്രസിഡന്‍റ് സിജോ മൊളോപ്പറമ്പിൽ, അധ്യാപക പ്രതിനിധി ട്രീസാ ബെല്ല, സീനിയർ അസിസ്റ്റന്‍റ് രശ്മി വർഗീസ്, ഡെൽന ഡൊമിനിക് എന്നിവർ പ്രസംഗിച്ചു. നാർക്കോട്ടിക് സെൽ കോട്ടയം ഡിവൈഎസ്പി എ.ജെ. തോമസ് ക്ലാസ് നയിച്ചു. തുടർന്ന് കുട്ടികളുടെ വിവിധ കലാപരിപാടികളും നടത്തി.

അപകട ഭീഷണിയുയർത്തി വാകമരത്തിന്‍റെ ശിഖരം

മുണ്ടക്കയം ഈസ്റ്റ്: ദേശീയപാതയോരത്ത് അപകട ഭീഷണിയുയർത്തി വാകമരത്തിന്‍റെ ശിഖരം. കൊട്ടാരക്കര - ദിണ്ഡിഗൽ ദേശീയപാതയിൽ 35ാംമൈലിനും മരുതുംമൂടിനുമിടയിൽ മെഡിക്കൽ ട്രസ്റ്റ് ജംഗ്ഷന് സമീപം നിൽക്കുന്ന വലിയ വാകമരത്തിന്‍റെ ശിഖരമാണ് അപകട ഭീഷണി ഉയർത്തി നിൽക്കുന്നത്. റോഡിലേക്ക് ചാഞ്ഞു നിൽക്കുന്ന മരത്തിന്‍റെ ശിഖരത്തിൽ റോഡിലൂടെ സഞ്ചരിക്കുന്ന കണ്ടെയ്നർ ലോറികളുടെ മുകൾഭാഗം തട്ടുന്നത് പതിവാണ്. കഴിഞ്ഞദിവസം ദേശീയപാതയിലൂടെ കടന്നുപോയ കണ്ടെയ്നർ ലോറിയുടെ മുകൾഭാഗം മരത്തിന്‍റെ ശിഖരത്തിൽ ഉടക്കിയതിനെത്തുടർന്ന് അരമണിക്കൂറിലധികം വാഹനം റോഡിലകപ്പെട്ടു. ഏറെ നേരത്തെ പരിശ്രമത്തിനൊടുവിലാണ് കണ്ടെയ്നർ ലോറിക്ക് യാത്ര തുടരുവാനായത്. റോഡിലേക്ക് ചാഞ്ഞു നിൽക്കുന്ന ശിഖരത്തിൽ ലോറികൾ പതിവായി ഇടിക്കുന്നതുമൂലം വലിയ മരക്കൊമ്പ് പാതി ഒടിഞ്ഞ നിലയിലാണ്. വലിയ ബലമില്ലാത്ത മരമായതിനാൽ ശക്തമായ കാറ്റിൽ ഏതു നിമിഷവും ഒടിഞ്ഞ് ദേശീയപാതയിലേക്ക് വീഴുവാനുള്ള സാധ്യത ഏറെയാണ്. ഇത് വലിയ അപകടങ്ങൾക്കാകും വഴിവയ്ക്കുക. 35ാംമൈലിനും പെരുവന്താനത്തിനുമിടയിൽ ഇത്തരത്തിൽ അപകട ഭീഷണി ഉയർത്തി നിരവധി മരങ്ങൾ നിൽപ്പുണ്ട്. കഴിഞ്ഞ നാലു മാസത്തിനിടെ മൂന്ന് സ്ഥലങ്ങളിലാണ് മരം ഒടിഞ്ഞുവീണ് അപകടമുണ്ടായിട്ടുള്ളത്. പലപ്പോഴും തലനാരിഴയ്ക്കാണ് യാത്രക്കാർ വലിയ ദുരന്തത്തിൽ നിന്ന് രക്ഷപ്പെടുന്നത്. ദേശീയപാതയിൽ അപകട ഭീഷണി ഉയർത്തി നിൽക്കുന്ന മരത്തിന്‍റെ ശിഖരങ്ങൾ വെട്ടി മാറ്റുവാൻ അധികാരികൾ തയാറായില്ലെങ്കിൽ കാത്തിരിക്കുന്നത് വലിയ അപകടമായിരിക്കും.

ചിറക്കടവ് പഞ്ചായത്തിന്‍റെ പ്രവർത്തനം മാതൃകാപരം: മന്ത്രി റോഷി അഗസ്റ്റിൻ

പൊൻകുന്നം: ജലനിധി ചിറക്കടവ് പഞ്ചായത്തിൽ അനുവദിച്ച മഴവെള്ള സംഭരണികൾ വിജയകരമായി പൂർത്തീകരിച്ച ചിറക്കടവ് പഞ്ചായത്തിന്‍റെ പ്രവർത്തനം മാതൃകാപരമാണെന്ന് ജലവിഭവ മന്ത്രി റോഷി അഗസ്റ്റിൻ. ചിറക്കടവ് പഞ്ചായത്ത് രണ്ടാം വാർഡിൽ വട്ടക്കാവുങ്കൽ തങ്കമ്മ ചന്ദ്രന്‍റെ പുരയിടത്തിൽ സ്ഥാപിച്ച മഴവെള്ള സംഭരണിയുടെ ഉദ്ഘാടനം നിർവഹിച്ച് പ്രസംഗിക്കുകയായിരുന്നു മന്ത്രി. ചീഫ് വിപ്പ് ഡോ.എൻ. ജയരാജ് അധ്യക്ഷത വഹിച്ചു. പഞ്ചായത്ത് പ്രസിഡന്‍റ് സി.ആർ. ശ്രീകുമാർ, വൈസ് പ്രസിഡന്‍റ് സതി സുരേന്ദ്രൻ, സുമേഷ് ആൻഡ്രൂസ്, ആന്‍റണി മാർട്ടിൻ, ഐ.എസ്. രാമചന്ദ്രൻ, ഷാജി പാന്പൂരി, മിനി സേതുനാഥ്, ഷാജി നല്ലേപറമ്പിൽ, വി.ഡി. റെജികുമാർ, അന്പിളി ശിവദാസ്, ഷാക്കി സജീവ്, കെ.ജി. രാജേഷ് എന്നിവർ പ്രസംഗിച്ചു. ബിപിഎൽ വിഭാഗങ്ങൾക്കായി 12 മഴവെള്ള സംഭരണികൾ കൂടി ചിറക്കടവ് പഞ്ചായത്തിൽ മന്ത്രി അനുവദിച്ചു.

കർപ്പൂര ഗന്ധമുള്ള കസ്തൂരി മഞ്ഞളുമായി വാഴൂർ ബ്ലോക്ക് പഞ്ചായത്ത്

വാഴൂർ: കർപ്പൂര ഗന്ധമുള്ള കസ്തൂരി മഞ്ഞൾ വിത്ത് വിതരണത്തിന്‍റെ ഉദ്ഘാടനം ബ്ലോക്ക് പഞ്ചായത്ത് പ്രസിഡന്‍റ് മുകേഷ് കെ. മണി നിർവഹിച്ചു. വൈസ്പ്രസിഡന്‍റ് ഗീത എസ്. പിള്ള അധ്യക്ഷത വഹിച്ചു. ബ്ലോക്ക് പഞ്ചായത്തംഗങ്ങളായ ഷാജി പാമ്പൂരി, ബി. രവീന്ദ്രൻ നായർ, ശ്രീകലാ ഹരി, ലതാ ഉണ്ണികൃഷ്ണൻ, കങ്ങഴ പഞ്ചായത്തംഗം മാത്യു ആനിത്തോട്ടം, കൃഷി വകുപ്പ് അസിസ്റ്റന്‍റ് ഡയറക്ടർ സിമി ഇബ്രാഹിം എന്നിവർ പ്രസംഗിച്ചു. മുഖസൗന്ദര്യം വർധിപ്പിക്കുന്നതിനും ഔഷധങ്ങളിലും മറ്റും ഉപയോഗിക്കുന്നതുമായ കർപ്പൂര ഗന്ധമുള്ള കസ്തൂരി മഞ്ഞൾ കൃഷി വ്യാപകമാക്കുക എന്ന ലക്ഷ്യത്തോടെ വാഴൂർ ബ്ലോക്ക് പഞ്ചായത്ത് ഈ സാമ്പത്തിക വർഷം നടപ്പിലാക്കുന്ന പദ്ധതിയാണ് കസ്തൂരിമഞ്ഞൾ കൃഷി. ആന്‍റിഓക്സിഡന്‍റ് ഗുണങ്ങളുള്ളതിനാൽ ശരീരത്തിലുള്ള ഹാനികരമായ തന്മാത്രകളെ നിർജീവമാക്കുന്നതിനും ശരീരത്തെ സംരക്ഷിക്കുന്നതിനും ഇതിനു കഴിയും. പാരമ്പര്യ വൈദ്യത്തിൽ കസ്തൂരി മഞ്ഞൾ വേദന സംഹാരിയായും ഉപയോഗിക്കുന്നു. കസ്തൂരി മഞ്ഞൾ നട്ട് ആറുമാസം കഴിഞ്ഞാൽ വിളവെടുപ്പ് നടത്താം. നാല് ലക്ഷം രൂപയാണ് ഈ പദ്ധതിക്കായി ചെലവഴിക്കുന്നത്. കൃഷി ചെയ്യാനുള്ള സബ്സിഡിയും സംസ്കരണത്തിനും മൂല്യവർധിത ഉത്പന്നങ്ങൾ ഉണ്ടാക്കുന്നതിനുള്ള സഹായവും കൃഷി വകുപ്പ് ചെയ്തു നൽകും.

റബർ ബോർഡ് ജിയോ മാപ്പിംഗ് തുടങ്ങി

കാഞ്ഞിരപ്പള്ളി: ഇയുഡിആർ ചട്ടങ്ങൾ പാലിച്ച് ഇന്ത്യയിൽ നിന്ന് യൂറോപ്യൻ യൂണിയനിലേക്കുള്ള റബറിന്‍റെയും റബറുൽപന്നങ്ങളുടെയും കയറ്റുമതി ഉറപ്പാക്കുന്നതിനായി റബർബോർഡിന്‍റെ ആഭിമുഖ്യത്തിൽ റബർതോട്ടങ്ങളിൽ ജിയോ മാപ്പിംഗ് ആരംഭിച്ചു. ജിയോ മാപ്പിംഗിനായി ഹൈദരാബാദ് കേന്ദ്രമായി പ്രവർത്തിക്കുന്ന ട്രയമ്പു ടെക് സൊല്യൂഷൻസ് പ്രൈവറ്റ് ലിമിറ്റഡ് എന്ന സ്ഥാപനത്തെയാണ് റബർബോർഡ് നിയോഗിച്ചിട്ടുള്ളത്. ഭൂമിയുടെ ഉടമസ്ഥാവകാശം, വിസ്തൃതി, റബർതോട്ടങ്ങളുടെ അതിരുകൾ തുടങ്ങിയ വിശദാംശങ്ങൾ ശേഖരിച്ചുകൊണ്ടാണ് മാപ്പിംഗ് നടത്തുന്നത്. ഇതുമായി ബന്ധപ്പെട്ട് ശേഖരിക്കുന്ന വിവരങ്ങൾ റബർബോർഡിന്‍റെ കേന്ദ്രീകൃത ഡാറ്റാ ബേസിൽ സൂക്ഷിക്കുന്നതും വിവരങ്ങളുടെ രഹസ്യാത്മകത ഉറപ്പാക്കുകയും ചെയ്യുന്നതാണ്. ഇയുഡിആറുമായി ബന്ധപ്പെട്ട വിവരങ്ങൾ പങ്കുവയ്ക്കാനായി തോട്ടമുടമകൾക്കും റബർഡീലർമാർക്കും സംസ്കർത്താക്കൾക്കും വ്യവസായികൾക്കുമായി അവബോധനപരിപാടികൾ റബർബോർഡ് സംഘടിപ്പിച്ചുവരുന്നു. റബർബോർഡിന്‍റെ ഈ ഉദ്യമത്തോട് കർഷകർ സഹകരിക്കണമെന്ന് അസിസ്റ്റന്‍റ ഡയറക്ടർ അറിയിച്ചു.

ഓടകൾ അടഞ്ഞു; ബസ് സ്റ്റാൻഡ് ജംഗ്ഷനിലെ വെള്ളക്കെട്ട് പരിഹരിക്കാൻ നടപടിയില്ല

കാഞ്ഞിരപ്പള്ളി: ദേശീയപാതയിൽ ബസ് സ്റ്റാൻഡ് ജംഗ്ഷനിലെ വെള്ളക്കെട്ട് പരിഹരിക്കാൻ നടപടികളില്ല. എല്ലാ വർഷവും ഈ ഭാഗത്ത് വെള്ളക്കെട്ട് പതിവാണ്. ഇതുമൂലം ഏറെ ദുരിതമനുഭവിക്കുന്നത് ഓട്ടോറിക്ഷ ഡ്രൈവർമാരും കാൽനടയാത്രക്കാരും സമീപത്തെ വ്യാപാരികളുമാണ്. ഓടകൾ ഇല്ലാത്തതും ഉള്ള ഓടകൾ മണ്ണും മാലിന്യവും നിറഞ്ഞു മൂടിയതുമാണ് വെള്ളക്കെട്ട് രൂപപ്പെടാൻ കാരണം. വർഷങ്ങളായി സ്ഥിരമായി ഇതാണ് അവസ്ഥയെങ്കിലും ഇതു പരിഹരിക്കുന്നതിനുള്ള നടപടികൾ അധികൃതരുടെ ഭാഗത്തുനിന്നുണ്ടാകുന്നില്ലെന്നു കാൽനടയാത്രക്കാർ പരാതിപ്പെടുന്നു. വെള്ളം കെട്ടിക്കിടക്കുന്നതിനാല്‍ വാഹനങ്ങള്‍ കടന്നുപോകുമ്പോള്‍ ആളുകളുടെ ദേഹത്തേക്കു ചെളിവെള്ളം തെറിക്കുന്ന സ്ഥിതിയാണ്. ബസ് സ്റ്റാന്‍ഡ് പ്രവേശന കവാടത്തിനു മുന്പിലൂടെയുള്ള റോഡിലൂടെ പുത്തനങ്ങാടി ഭാഗത്തുനിന്ന് ഒഴുകിയെത്തുന്ന വെള്ളം ഓടയിലേക്ക് ഒഴുകുന്നതിനുള്ള ഭാഗം അടഞ്ഞുകിടക്കുകയാണ്. അതിനാൽ വെള്ളം നേരെ ദേശീയപാതയിലേക്കാണ് എത്തുന്നത്. ബസ് സ്റ്റാന്‍ഡിനു മുന്‍വശം താഴ്ന്ന ഭാഗമാണ്. ഇവിടെനിന്ന് ഇരു വശത്തേക്കുമുള്ള ഓടയിലേക്കു വെള്ളം ഒഴുകുന്നതിനും സംവിധാനമില്ല. ഓട്ടോറിക്ഷാ സ്റ്റാന്‍ഡിലടക്കം വെള്ളം കെട്ടിനില്‍ക്കുന്ന സ്ഥിതിയിലാണ്. മഴ പെയ്ത് തീര്‍ന്ന് ഏറെ നേരം കഴിഞ്ഞാൽ മാത്രമേ ഇവിടുത്തെ വെള്ളക്കെട്ട് ഒഴിവാകുകയുള്ളു. മഴവെള്ളത്തിനൊപ്പമെത്തുന്ന കറുത്ത നിറത്തിലുള്ള മാലിന്യം കലർന്ന വെള്ളത്തിൽ നിൽക്കേണ്ട ഗതികേടിലാണ് ഓട്ടോറിക്ഷ ഡ്രൈവർമാർ. ഈ മാലിന്യ വെള്ളത്തിനു കടുത്ത ദുർഗന്ധമാണ് അനുഭവപ്പെടുന്നത്. മൂക്ക് പൊത്തി ഇരിക്കേണ്ട ഗതികേടാണെന്ന് സമീപത്തെ വ്യാപാരികളും പറയുന്നു. കാഞ്ഞിരപ്പള്ളി ടൗണിലെ ഓടകൾ വൃത്തിയാക്കിയിട്ട് വർഷങ്ങളായി. ഓടകളിലെ മണ്ണും മാലിന്യങ്ങളും നീക്കി വെള്ളം ഒഴുകിപ്പോകാനുള്ള സംവിധാനങ്ങള്‍ ഏര്‍പ്പെടുത്തണമെന്ന് ആവശ്യം ശക്തമായി.

ബിരുദദാന ചടങ്ങ്: രാജു നാരായണസ്വാമി ഉദ്ഘാടനം ചെയ്യും

അരുവിത്തുറ: സെന്‍റ് ജോർജ് കോളജിലെ ബിരുദദാന ചടങ്ങ് വ്യാഴാഴ്ച ഐഎഎസ് മുൻ ഉദ്യോഗസ്ഥൻ ഡോ. രാജു നാരായണ സ്വാമി ഉദ്ഘാടനം ചെയ്യും. 400 ഓളം വിദ്യാർഥികളാണ് ബിരുദം പൂർത്തിയാക്കി സർട്ടിഫിക്കറ്റുകൾ ഏറ്റുവാങ്ങുന്നത്. കോളജ് മാനേജർ വെരി റവ. ഫാ. സെബാസ്റ്റ്യൻ വെട്ടുകല്ലേൽ അധ്യക്ഷത വഹിക്കുന്ന ചടങ്ങിൽ പാലാ രൂപത പ്രോട്ടോസിഞ്ചല്യൂസ് മോൺ. റവ. ഡോ. ജോസഫ് തടത്തിൽ അനുഗ്രഹ പ്രഭാഷണം നടത്തും. കോളജ് ബർസാർ റവ ഫാ.ബിജു കുന്നയ്ക്കാട്ട്, വൈസ് പ്രിൻസിപ്പൾ ഡോ. ജിലു ആനി ജോൺ, ഐക്യുഎസി കോഓർഡിനേറ്റർ ഡോ. സുമേഷ് ജോർജ് തുടങ്ങിയവർ ചടങ്ങിൽ സംസാരിക്കും. നാക്ക് റീ അക്രഡിറ്റേഷനിൽ എ പ്ലസ് പ്ലസ് ആക്രഡിറ്റേഷൻ ലഭിച്ച അരുവിത്തുറ സെന്‍റ് ജോർജ് കോളജ് ജില്ലയിൽ കൂടുതൽ ബിരുദധാരികളെ സമൂഹത്തിന് സമ്മാനിക്കുന്ന വിദ്യാഭ്യാസ സ്ഥാപനമാണ്. ചടങ്ങിൽ പിജി വിദ്യാർഥികൾക്കുള്ള ബിരുദ സർട്ടിഫിക്കറ്റുകളും വിതരണം ചെയ്യും. ഈ വർഷം യൂണിവേഴ്സിറ്റി റാങ്കുകൾ കരസ്ഥമാക്കിയ വിദ്യാർഥികളേയും കാന്പസ് പ്ലെയ്സ്മെന്‍റ് വഴി ജോലി കരസ്ഥമാക്കിയ വിദ്യാർഥികളേയും ചടങ്ങിൽ ആദരിക്കും.

അപുഷ്പി സസ്യങ്ങളിൽ ഗണ്യമായ കുറവെന്ന് പഠനം

അരുവിത്തുറ: കാലവർഷം നേരത്തെ എത്തിയതും ഇടയ്ക്ക് ഉണ്ടായ ഇടവേളയും മൂലം അപുഷ്പി സസ്യങ്ങളിൽ കുറവുണ്ടായതായി അരുവിത്തുറ സെന്‍റ് ജോർജ് കോളജ് ബോട്ടണി വിഭാഗം പഠന റിപ്പോർട്ട്. കാലാവസ്ഥാ വ്യതിയാനം മൂലം കാലം തെറ്റിയെത്തിയ മഴ ഉണ്ടാക്കിയ മാറ്റങ്ങളാണ് ഈ വർഷം അപുഷ്‌പി സസ്യങ്ങളുടെ കുറവിന് കാരണമായത്. ഇത്തരം സസ്യങ്ങളുടെ കുറവ് മണ്ണിന്‍റെ സൂക്ഷ്മ ഘടനയിൽ മാറ്റങ്ങൾക്ക് കാരണമായേക്കാം. ഇത് മണ്ണിന്‍റെ ഫലഭൂയിഷ്ടിയെ ബാധിക്കുകയും മിത്ര കീടങ്ങൾ കുറയാൻ കാരണമാകുമെന്നും റബർ ഉൾപ്പെടെയുള്ള കാർഷിക വിളകളെ ഇത് പ്രതികൂലമായി ബാധിച്ചേക്കുമെന്നും പഠനം പറയുന്നു. പരിസ്ഥിതി ദിനത്തോടനുബന്ധിച്ച് കോളജിലെ ബോട്ടണി വിഭാഗം നടത്തിയ സർവ്വേ പഠനത്തിന് ബോട്ടണി വിഭാഗം മേധാവി ജോബി ജോസഫ് നേതൃത്വം നൽകി. അധ്യാപകരായ ഡോ. അബിൻ സെബാസ്റ്റ്യൻ, കാതറിൻ ജോസ് എനിവരുടെ കീഴിൽ വിദ്യാർഥികൾ രണ്ട് ടീമുകളായി തിരിഞ്ഞാണ് കാമ്പസിലും സമീപ പ്രദേശങ്ങളിലുമായി പഠനം നടത്തിയത്.

രണ്ടു മിനിറ്റ് കാറ്റ്: അതിരന്പുഴയിൽ നാശനഷ്ടമേറെ

അതിരമ്പുഴ: രണ്ടു മിനിറ്റുമാത്രം ദീർഘിച്ച ശക്തമായ കാറ്റിൽ അതിരമ്പുഴ പഞ്ചായത്തിലെ മൂന്നു വാർഡുകളിൽ വൻ നാശം. മരങ്ങൾ കടപുഴകി; വീടുകൾക്കും സ്ഥാപനങ്ങൾക്കും വലിയ നാശനഷ്ടമുണ്ടായി. വ്യാപകമായി കൃഷിനാശവുമുണ്ടായി. ഞായറാഴ്ച വൈകുന്നേരം 5.36നാണ് കാറ്റ് ആഞ്ഞുവീശിയത്. ചന്തക്കുളം മുതൽ കൈപ്പുഴ കവലവരെയുള്ള പ്രദേശങ്ങളിൽ കാറ്റ് നാശം വിതച്ചു. 22-ാം വാർഡിൽ അതിരമ്പുഴ പഞ്ചായത്തുവക മത്സ്യമാർക്കറ്റ് കെട്ടിടത്തിന്‍റെ മേൽക്കൂര അതേപടി നിലംപൊത്തി. മാർക്കറ്റിലെ ഹോൾസെയിൽ മത്സ്യവ്യാപാരി ജോയ്സ് മൂലേക്കരിയുടെ ഓഫീസ് കെട്ടിടത്തിന്‍റെ മേൽക്കൂരയിലെ ഷീറ്റുകൾ പറന്നുപോയി. വലിയ മതിൽ ഇടിഞ്ഞു വീണു. ചെമ്മാച്ചേരിൽ ജിമ്മി, കുട്ടപ്പായി കിടങ്ങയിൽ, പ്രസന്നൻ കുന്നത്തുപറമ്പിൽ, പെണ്ണമ്മ തുരുത്തേൽ എന്നിവരുടെ വീടുകൾക്കു മുകളിൽ മരം വീണു. ഷിബു പൊത്തനാംതടത്തിന്‍റെയും പഞ്ചായത്ത് മെംബർ ജോസ് അഞ്ജലിയുടെയും മതിലുകൾ ഇടിഞ്ഞു. ജോസ് അഞ്ജലിയുടെ പുരയിടത്തിലെ തേക്ക്, ആഞ്ഞിലി മരങ്ങൾ കടപുഴകി വീണു. പി ആൻഡ് എം സെറാമിക്സ് ഓഫീസ് കെട്ടിടത്തിന്‍റെ ഷീറ്റുകളും ഗേറ്റും തകർന്നു.

20-ാം വാർഡ് കുറ്റിയേൽ കവല ഭാഗത്ത് പാലയ്ക്കാത്തൊട്ടി ശ്രീനാഥിന്‍റെ വീടിനു മുന്നിലും പിന്നിലും നിന്നിരുന്ന മരങ്ങൾ വീടിനു മുകളിലേക്കു വീണു. വീടിന്‍റെ മേൽക്കൂര പൂർണമായി തകർന്നു. പാലയ്ക്കാത്തൊട്ടി ശാന്തമ്മയുടെ വീടിന്‍റെ മേൽക്കൂരയ്ക്കും മരം വീണ് നാശനഷ്ടമുണ്ടായി. ചിന്നമ്മ കൊല്ലംപറമ്പിലിന്‍റെ വീടിന്‍റെ മുകളിലെ ട്രസ് വർക്ക് മരം വീണു തകർന്നു. 21-ാം വാർഡിൽ കുറ്റിയേൽ പ്രസാദിന്‍റെ വീടിനു മുകളിലേക്ക് ആഞ്ഞിലിമരം വീണ് മേൽക്കൂര പൂർണമായി തകർന്നു. കുന്നത്ത് പ്രസാദിന്‍റെ വീടിനു മുകളിലേക്കും തേക്കുമരം കടപുഴകി വീണു. കുറ്റിയേൽ സുഭാഷ്, കുറ്റിയേൽ സുമോൻ, കുറ്റിയേൽ സജി, കിടങ്ങയിൽ സിബി എന്നിവരുടെ വീടുകൾക്കും മരംവീണ് നാശനഷ്ടമുണ്ടായി. എസ്എൻഡിപി ഹാളിനു മുകളിലേക്ക് വലിയ ആഞ്ഞിലിമരം വീണു. ഇവിടെ മതിലും ഇടിഞ്ഞു തകർന്നു. ട്രാൻസ്ഫോർമറിനു മുകളിലേക്ക് മരംവീണ് വൈദ്യുതി പോസ്റ്റുകൾ ഒടിഞ്ഞു. 11 കെവി ലൈൻ ഉൾപ്പെടെയുള്ള വൈദ്യുതിലൈനുകൾ മരംവീണ് വ്യാപകമായി തകർന്നു. റോഡിലെ തടസങ്ങൾ നീക്കം ചെയ്യൽ ഇന്നലെ ഉച്ചയോടെയാണ് പൂർത്തിയായത്. അതുവരെ അതിരമ്പുഴ - കൈപ്പുഴ റോഡിൽ ഗതാഗതം തടസപ്പെട്ടു. വൈകുന്നേരത്തോടെയാണ് പുതിയ പോസ്റ്റുകൾ സ്ഥാപിച്ച് വൈദ്യുതി ലൈനുകൾ പൂർവസ്ഥിതിയിലാക്കിയത്. തഹസിൽദാർ, വില്ലേജ് ഓഫീസർ എന്നിവരുടെ നേതൃത്വത്തിൽ റവന്യു അധികൃതർ വീടുകളും സ്ഥാപനങ്ങളും സന്ദർശിച്ച് റിപ്പോർട്ട് തയ്യാറാക്കി സമർപ്പിച്ചു. ബ്ലോക്ക് പഞ്ചായത്ത് മെംബർ ജയിംസ് കുര്യൻ, വാർഡ് മെംബർമാരായ ജോസ് അഞ്ജലി, കെ.എ. അശ്വതിമോൾ, ഐസി സാജൻ എന്നിവരും സിപിഐ ജില്ലാ സെക്രട്ടറി വി.ബി. ബിനു, മണ്ഡലം സെക്രട്ടറി കെ.ഐ. കുഞ്ഞച്ചൻ എന്നിവരും നാശനഷ്ടമുണ്ടായ സ്ഥലങ്ങളിലെത്തി. കൈപ്പുഴയിൽ വീടുകൾക്ക് മുകളിൽ മരംവീണു കൈപ്പുഴ: ശക്തമായ കാറ്റിലും മഴയിലും കൈപ്പുഴയില്‍ മരം കടപുഴകി വീടുകള്‍ക്കു നാശം. മഴയ്‌ക്കൊപ്പം ചുഴലിക്കാറ്റിന് സമാനമായ കാറ്റാണ് ഉണ്ടായതെന്നു നാട്ടുകാര്‍ പറയുന്നു. കൈപ്പുഴ തേനാകര കാവില്‍ റോഡിന് സമീപത്ത് താമസിക്കുന്ന മഠംപറമ്പില്‍ മായാ രാജുവിന്‍റെ വീടിനു മുകളിലേക്ക് മൂന്നു മരങ്ങളാണു വീണത്. വീടിന്‍റെ ഭിത്തിക്കും മുകള്‍ഭാഗത്തിനും കേടുപാടു സംഭവിച്ചു. വീടിനുള്ളില്‍ ആളുകളുണ്ടായിരുന്നെങ്കിലും അപകടം ഉണ്ടാകാതെ രക്ഷപ്പെട്ടു. സമീപത്തെ വലിയപറമ്പില്‍ ബിബിയുടെ വീടിനു മുകളിൽ കൂറ്റന്‍ തേക്കുമരം വീണു. തൊട്ടടുത്ത കാവില്‍ ഡൊമിനിക്കിന്‍റെ റബര്‍ത്തോട്ടത്തിലെ ഭൂരിഭാഗം റബര്‍മരങ്ങളും വട്ടം ഒടിഞ്ഞു. ബാക്കിയുള്ള റബര്‍ മരങ്ങള്‍ ചാഞ്ഞു നില്‍ക്കുകയാണ്. ഇതു നിലംപൊത്തിയാല്‍ സമീപവാസിയായ ബേബിയുടെ വീട് തകരും. മുണ്ടയ്ക്കല്‍ ലൂക്കോസിന്‍റെ വീടിനു മുകളിൽ തൊട്ടടുത്ത പുരയിടത്തില്‍നിന്ന തേക്കു മരം വീണു. ഇടമറ്റത്തില്‍ ജോസഫിന്‍റെ പുരയിടത്തിലെ മരങ്ങളും കടപുഴകി. കുടിലില്‍ കവല, പുളിങ്കാല ഭാഗങ്ങളിൽ മരം കടപുഴകി ഗതാഗതം തടസപ്പെട്ടു. ഇവിടെ വൈദ്യുതി പോസ്റ്റും ഒടിഞ്ഞു. തേനാകര കാവില്‍ റോഡിലും മൂന്നുപറ റോഡിലും വൈദ്യുതി പോസ്റ്റുകൾ ഒടിഞ്ഞുവീണു. കാറ്റിലും മഴയിലും ലക്ഷക്കണക്കിന് രൂപയുടെ നാശനഷ്ടങ്ങള്‍ സംഭവിച്ചിട്ടുണ്ട്. കാറ്റ് നാശം വിതച്ച പ്രദേശങ്ങള്‍ മന്ത്രി വാസവന്‍ സന്ദര്‍ശിച്ചു അതിരമ്പുഴ: ശക്തമായ കാറ്റില്‍ നാശനഷ്ടങ്ങളുണ്ടായ പ്രദേശങ്ങള്‍ മന്ത്രി വി.എന്‍. വാസവന്‍ സന്ദര്‍ശിച്ചു. അതിരമ്പുഴ, നീണ്ടൂര്‍ പഞ്ചായത്തുകളിലെ ദുരന്തബാധിത പ്രദേശങ്ങളിലാണ് മന്ത്രി എത്തിയത്. അതിരമ്പുഴ വില്ലേജിലെ ശ്രീകണ്ഠമംഗലം, കുറ്റിയേല്‍ ഭാഗങ്ങളിലായി 16 വീടുകളും കൈപ്പുഴ വില്ലേജിലെ കൈപ്പുഴ ഭാഗത്ത് 10 വീടുകളും മരംവീണു തകര്‍ന്നു. വര്‍ഷങ്ങള്‍ പഴക്കമുള്ള കരിന്തകര വീണ് വീട് പാടേ തകര്‍ന്ന ശ്രീകണ്ഠമംഗലം പാലയ്ക്കത്തൊടിയില്‍ സലില ശിവരാമന്‍റെ വീട്ടിലാണ് മന്ത്രി ആദ്യമെത്തിയത്. കുടുംബാംഗങ്ങളെ ആശ്വസിപ്പിച്ച മന്ത്രി പ്രകൃതി ദുരന്തത്തില്‍പ്പെടുത്തി ആവശ്യമായ എല്ലാ സഹായങ്ങളും ചെയ്തു നല്‍കാമെന്ന് ഉറപ്പുനല്‍കി. സാധ്യമായ എല്ലാ സഹായങ്ങളും അടിയന്തരമായി ലഭ്യമാക്കാനാവശ്യമായ നടപടികളെടുക്കുമെന്ന് മന്ത്രി ദുരന്തബാധിതര്‍ക്ക് ഉറപ്പുനല്‍കി. വൈദ്യുതി ബന്ധം കഴിയുന്നത്ര വേഗത്തില്‍ പുനഃസ്ഥാപിക്കാനും മന്ത്രി നിര്‍ദേശം നല്‍കി. തകര്‍ന്ന വീടുകളുടെ കണക്കെടുത്തു റിപ്പോര്‍ട്ട് ഉടന്‍തന്നെ തഹസില്‍ദാര്‍ക്കു നല്‍കാന്‍ പഞ്ചായത്ത് അസിസ്റ്റന്‍റ് എന്‍ജിനിയര്‍മാരോട് മന്ത്രി നിര്‍ദേശിച്ചു. നീണ്ടൂര്‍ പഞ്ചായത്ത് പ്രസിഡന്‍റ് വി.കെ. പ്രദീപ്, പഞ്ചായത്തംഗം പി.ഡി. ബാബു, കോട്ടയം തഹസില്‍ദാര്‍ എസ്.എന്‍. അനില്‍കുമാര്‍, ഡെപ്യൂട്ടി തഹസില്‍ദാര്‍ എന്‍. രാജേഷ്, അതിരമ്പുഴ വില്ലേജ് ഓഫീസര്‍ പി.വി. ലാല്‍ ദാസ്, കൈപ്പുഴ വില്ലേജ് ഓഫീസര്‍ കെ.പി. സ്മിത തുടങ്ങിയവരും മന്ത്രിയോടൊപ്പമുണ്ടായിരുന്നു.

നഗരത്തിലെ ഗതാഗതക്കുരുക്ക്: പോലീസ് ഏർപ്പെടുത്തിയ പരിഷ്‌കാരം ആരംഭിച്ചു

കോട്ടയം: നഗരത്തിലെ ഗതാഗതക്കുരുക്കഴിക്കാന്‍ പോലീസ് ഏര്‍പ്പെടുത്തിയ പരിഷ്‌കാരം ആരംഭിച്ചു. എന്നാല്‍, ഇന്നലെ വിദ്യാഭ്യാസ സ്ഥാപനങ്ങള്‍ക്ക് അവധിയായതിനാല്‍ തിരക്കു കുറവായിരുന്നു. അതിനാൽ, പരീക്ഷണം എത്രത്തോളം വിജയമാണെന്നറിയാന്‍ സാധിച്ചില്ല. രണ്ടോ മൂന്നോ ദിവസം കൊണ്ടേ വിജയ സാധ്യതയറിയാന്‍ സാധിക്കുകയുള്ളൂവെന്ന് പോലീസ് പറഞ്ഞു. ചാലുകുന്ന് ഭാഗത്തുനിന്നു വരുന്ന ബസുകള്‍ ശാസ്ത്രി റോഡ് വഴി നാഗമ്പടം ബസ് സ്റ്റാന്‍ഡിലേക്ക് പോകുന്ന തരത്തിലാണ് പരിഷ്‌കാരം. ബേക്കര്‍ ജംഗ്ഷനുസമീപം ആളെയിറക്കി എംസി റോഡ് വഴി സീസേഴ്‌സ് ജംഗ്ഷനിലൂടെയാണ് ബസുകള്‍ നാഗമ്പടം സ്റ്റാന്‍ഡില്‍ എത്തിയിരുന്നത്. പുതിയ പരിഷ്‌കാരപ്രകാരം കുമരകം, ചുങ്കം, ചാലുകുന്ന് ഭാഗങ്ങളിൽനിന്നു വരുന്ന ബസുകള്‍ ഇന്നലെ രാവിലെ മുതല്‍ ബേക്കര്‍ ജംഗ്ഷനിലെത്തി ശാസ്ത്രി റോഡില്‍ പ്രവേശിച്ച് അവിടെയുള്ള ബസ്‌സ്‌റ്റോപ്പിലാണ് ആളുകളെ ഇറക്കിയത്. തുടർന്ന് ബസുകള്‍ കുര്യന്‍ ഉതുപ്പ് റോഡുവഴി നാഗമ്പടം സ്റ്റാന്‍ഡിലെത്തി. കോട്ടയം വെസ്റ്റ് പോലീസ് എസ്എച്ച്ഒ, കോട്ടയം ട്രാഫിക് യൂണിറ്റ് ഹൗസ് ഓഫീസര്‍, പ്രൈവറ്റ് ബസ് ഓപ്പറേറ്റേഴ്‌സ് അസോസിയേഷന്‍ എന്നിവർ നടത്തിയ ചര്‍ച്ചയുടെ അടിസ്ഥാനത്തിലാണ് പുതിയ പരിഷ്കാരം. അഴിയാനുണ്ട് ഇനിയും കുരുക്കുകള്‍; പരിഷ്‌കാരങ്ങള്‍ വേണം സ്‌കൂള്‍കൂടി തുറന്നതോടെ നഗരത്തില്‍ പലയിടത്തും ഗതാഗതക്കുരുക്ക് രൂക്ഷമാണ്. ബേക്കര്‍ ജംഗ്ഷനിലാണ് ഗതാഗതക്കുരുക്ക് പാരമ്യത്തിലെത്തിയിരിക്കുന്നത്. നഗരത്തിലെ തിരക്കു നോക്കി ക്രമീകരണങ്ങള്‍ വരുത്തിയാല്‍ കുരുക്കിന് ഒരു പരിധിവരെ പരിഹാരമാകും. • ബേക്കര്‍ ജംഗ്ഷനു സമീപം എംസി റോഡില്‍ ശക്തി ഹോട്ടലിനു സമീപം ഡിവൈഡറുകള്‍ സ്ഥാപിച്ചിരിക്കുന്ന ഇറക്കത്തില്‍ യു ടേണ്‍ എടുക്കുന്നത് തടയുക. • ശക്തി ഹോട്ടലിനു സമീപമുള്ള റോഡില്‍കൂടി വാഹനങ്ങള്‍ കുമരകം റോഡിലേക്കു പ്രവേശിക്കുന്നത് തടയുക. • ബേക്കര്‍ ജംഗ്ഷനിലെ ട്രാഫിക് ഐലന്‍ഡില്‍ വലിയ വാഹനങ്ങള്‍ റോഡ് നിറഞ്ഞ് നിര്‍ത്തുന്നത് തടയുക. • ബേക്കര്‍ ജംഗ്ഷനിലെ ബസ്‌സ്റ്റോപ്പുകളില്‍ നിശ്ചിത സമയം കഴിഞ്ഞുള്ള ബസുകളുടെ പാര്‍ക്കിംഗ് തടയുക • പുതിയ പരിഷ്‌കാരത്തിനൊപ്പം ബേക്കര്‍ ജംഗ്ഷനില്‍ ശക്തി ഹോട്ടലിനു സമീപമുള്ള ബസ്‌ സ്റ്റോപ്പ് എംസി റോഡില്‍കൂടി ഏറ്റുമാനൂര്‍ ഭാഗത്തേക്ക് പോകുന്ന ബസുകള്‍ക്കായി ക്രമീകരിക്കുക. • ബസ്‌സ്റ്റോപ്പുകള്‍ക്ക് സമീപം നിര്‍ത്തിയിട്ട് ഓട്ടോറിക്ഷകള്‍ ഓട്ടം പിടിക്കുന്നത് തടയുക. • നാഗമ്പടത്തുനിന്നു പുറപ്പെടുന്ന ബസുകളുടെ ടൗണില്‍കൂടിയുള്ള നിരക്കല്‍ അവസാനിപ്പിക്കുക.

വികസനം കാത്ത് നാലുകോടി, പായിപ്പാട് ജംഗ്ഷനുകള്‍

ചങ്ങനാശേരി: വികസനം കാത്തുകഴിയുന്ന നാലുകോടി ജംഗ്ഷനില്‍ കനത്ത വെള്ളക്കെട്ട്. പായിപ്പാട് റോഡില്‍നിന്നും റോഡിന്‍റെ വശത്തുകൂടി ഒഴുകുന്ന വെള്ളം ജംഗ്ഷനിലെത്തുമ്പോള്‍ റോഡിന്‍റെ മധ്യത്തിലൂടെ കവിഞ്ഞ് വശത്തുള്ള ഞാലിക്കടവ് റോഡിലേക്ക് ഒഴുകുകയാണ്. വെള്ളം ഒഴുകുന്നതിന് ഡ്രെയിനേജ് സൗകര്യങ്ങളൊന്നും നാലുകോടി ജംഗ്ഷനിലില്ല. വേഗത്തിലെത്തുന്ന വാഹനങ്ങള്‍ വെള്ളക്കെട്ടിലേക്ക് പതിക്കുമ്പോള്‍ സമീപത്തെ വ്യാപാര സ്ഥാപനങ്ങളിലേക്കും പാര്‍ക്ക് ചെയ്തിരിക്കുന്ന ഓട്ടോകളിലേക്കും കാല്‍നടയാത്രക്കാരുടെ വസ്ത്രങ്ങളിലേക്കും മലിനജലം തെറിക്കുന്നത് പതിവാണ്. റോഡിലേക്ക് വന്‍തോതില്‍ വെള്ളം ഒഴുകിയെത്തി ജംഗ്ഷനില്‍ വെള്ളക്കെട്ടുണ്ടാകുന്നതായി പരാതി ഉയര്‍ന്നിട്ടും പഞ്ചായത്ത് അധികൃതരോ പൊതുമരാമത്ത് ഉദ്യോഗസ്ഥരോ വേണ്ട നടപടികള്‍ സ്വീകരിച്ചിട്ടില്ല. റോഡുകളുടെ നിര്‍മാണം നിലച്ചു; ജംഗ്ഷനുകളുടെ വികസനം മരവിച്ചു ചങ്ങനാശേരി-കവിയൂര്‍ റോഡിന്‍റെ നവീകരണത്തിന്‍റെ ഭാഗമായി നാലുകോടി, പായിപ്പാട് കവലകളുടെ വികസനം ലക്ഷ്യം വച്ചിരുന്നെങ്കിലും റോഡ് നിര്‍മാണം നിര്‍ദേശിക്കപ്പെട്ടിരുന്ന അവസ്ഥയില്‍ പൂര്‍ത്തിയാകാതിരുന്നതോടെ ജംഗ്ഷനുകളുടെ വികസനവും നിലയ്ക്കുകയായിരുന്നു. എന്‍എച്ച്-183 (എംസി റോഡ്)ല്‍ തിരുവല്ലയ്ക്കു സമീപം ആരംഭിക്കുന്ന പെരുന്തുരുത്തി-ഏറ്റുമാനൂര്‍ ബൈപാസ് കടന്നുപോകുന്ന പ്രധാന ജംഗ്ഷനുകളില്‍ ഒന്നാണ് ഗതാഗതക്കുരുക്കില്‍ നട്ടംതിരിയുന്ന നാലുകോടി ജംഗ്ഷന്‍. നൂറുകണക്കിനു വാഹനങ്ങള്‍ അനുദിനം കടന്നുപോകുന്ന ഈ ജംഗ്ഷന്‍റെ നവീകരണത്തിനായി ഇവിടുത്തെ ഒരു തണല്‍മരം നാലുവര്‍ഷം മുമ്പ് മുറിച്ചുമാറ്റിയിരുന്നു. ചങ്ങനാശേരി-കവിയൂര്‍, തിരുവല്ല-മല്ലപ്പള്ളി റോഡുകള്‍ കടന്നുപോകുന്ന ഏറെ തിരക്കുള്ള പായിപ്പാട് കവലയുടെ അവസ്ഥയും പരിതാപകരമാണ്. ഈ കവലയിലെ റോഡും പൊട്ടിപ്പൊളിഞ്ഞ നിലയിലാണ്. കവിയൂര്‍ റോഡിന്‍റെയും തിരുവല്ല-മല്ലപ്പള്ളി-നൂറോമ്മാവ് റോഡിന്‍റെയും വികസനത്തിന്‍റെ ഭാഗമായി പായിപ്പാട് കവല വികസിപ്പിക്കാനായിരുന്നു പദ്ധതി. എന്നാല്‍, രണ്ടു പദ്ധതികളും നിശ്ചലമായതോടെയാണ് പായിപ്പാട് കവലയുടെ വികസം മുരടിച്ചത്. ഇതരസംസ്ഥാന തൊഴിലാഴികള്‍ തിങ്ങിപ്പാര്‍ക്കുന്ന നാടെന്ന പേരുള്ള സ്ഥലംകൂടിയാണ് പായിപ്പാട്. ഈ രണ്ട് ജംഗ്ഷനുകളുടെയും വികസനത്തിന് സത്വര നടപടികളുണ്ടാകണമെന്ന ആവശ്യം ശക്തമാകുകയാണ്.

കുട്ടനാടിനുവേണ്ടി ശബ്ദമുയര്‍ത്താന്‍ റേഡിയോ മീഡിയ വില്ലേജ്

ചങ്ങനാശേരി: കുട്ടനാടിന്‍റെ വിവിധങ്ങളായ പ്രശ്‌നങ്ങള്‍ ജന മനഃസാക്ഷിയില്‍ എത്തിക്കുകയെന്ന ലക്ഷ്യത്തോടെ റേഡിയോ മീഡിയ വില്ലേജും ചമ്പക്കുളം ഫെറോനാ യുവദീപ്തി എസ്എംവൈഎമ്മും സംയുക്തമായി സംഘടിപ്പിക്കുന്ന "സേവ് കുട്ടനാട് ഓപ്പണ്‍ റേഡിയോ കാമ്പയിന്' മങ്കൊമ്പില്‍ തുടക്കമായി. അതിരൂപതാ വികാരി ജനറാള്‍ മോണ്‍. ആന്‍റണി എത്തയ്ക്കാട്ട് ഉദ്ഘാടനം ചെയ്തു. കുട്ടനാടിന് ലഭിച്ചിരിക്കുന്ന അനുഗ്രഹങ്ങളെ കാലാനുസൃതമായി പ്രയോജനപ്പെടുത്താന്‍ ഭരണകൂടം തയാറാകാത്തതാണ് ഇവിടത്തെ നിരവധിയായ പ്രശ്‌നങ്ങള്‍ക്ക് കാരണമെന്നും ഈ പ്രദേശത്തിന്‍റെ അന്തസും മഹിമയും ഉയര്‍ത്താന്‍ ഈ കാമ്പയിൻ വഴിതെളിക്കുമെന്നും അദ്ദേഹം പറഞ്ഞു. രാജ്യാന്തര കായല്‍കൃഷി ഗവേഷണകേന്ദ്രം ഡയറക്ടറും കൃഷി ശാസ്ത്രജ്ഞനുമായ കെ.ജി. പത്മകുമാര്‍, റിട്ട. ഡെപ്യൂട്ടി തഹസില്‍ദാര്‍ ആന്‍റണി ആറില്‍ച്ചിറ, ടൂറിസ്റ്റ് അഡ്വൈസര്‍ ജൂബി കാട്ടാമ്പള്ളി, ഇറിഗേഷന്‍ വിഭാഗം റിട്ട. അസിസ്റ്റന്‍റ് എന്‍ജിനിയര്‍ ജോസഫ് മാത്യു, കേരള ഗവ. കോണ്‍ട്രാക്ടേഴ്‌സ് അസോസിയേഷന്‍ സംസ്ഥാന പ്രസിഡന്‍റ് വര്‍ഗീസ് കണ്ണമ്പള്ളി, ആലപ്പുഴ ജില്ലാ മുന്‍ മെഡിക്കല്‍ ഓഫീസര്‍ മുരളീധരന്‍പിള്ള എന്നിവര്‍ ചര്‍ച്ചകളില്‍ പങ്കെടുത്തു. മീഡിയ വില്ലേജ് എക്‌സിക്യൂട്ടീവ് ഡയറക്ടര്‍ ഫാ. ജോഫി പുതുപ്പറമ്പ്, എസ്‌ജെസിസി പ്രിന്‍സിപ്പല്‍ ഫാ. മാത്യു മുര്യങ്കരി, ബര്‍സാര്‍ ഫാ. ലിപിന്‍ തുണ്ടുകളം, കെ.സി. ജോജോ, കെ. വിപിന്‍ രാജ്, ജയിംസ് കല്ലുപാത്ര, ജസ്റ്റിന്‍ ജോസ് എന്നിവര്‍ പ്രസംഗിച്ചു. കാമ്പയിന്‍റെ ഭാഗമായി കുട്ടനാടിന്‍റെ വിവിധ പ്രദേശങ്ങളില്‍ ഓപ്പണ്‍ റേഡിയോ പരിപാടി സംഘടിപ്പിക്കുമെന്ന് ഡയറക്ടര്‍ ഫാ. ജോഫി പുതുപ്പറമ്പ് പറഞ്ഞു.

കെസിഎസ്എല്‍ പ്രവര്‍ത്തനവര്‍ഷം ഉദ്ഘാടനം

ചങ്ങനാശേരി: കെസിഎസ്എല്‍ അതിരൂപതാതല പ്രവര്‍ത്തനവര്‍ഷാരംഭവും അനിമേറ്റേഴ്സ് സംഗമവും അവാര്‍ഡ് വിതരണവും എസ്ബി സ്‌കൂള്‍ ഓഡിറ്റോറിയത്തില്‍ നടത്തി. ആര്‍ച്ച്ബിഷപ് മാര്‍ ജോസഫ് പെരുന്തോട്ടം ഉദ്ഘാടനം ചെയ്തു. 2024-25 വര്‍ഷത്തെ മാര്‍ഗരേഖ പ്രകാശനം ചെയ്തു. മികച്ച കെസിഎസ്എല്‍ യൂണിറ്റുകള്‍ക്ക് അതിരൂപത കോര്‍പറേറ്റ് മാനേജര്‍ റവ.ഡോ. ആന്‍റണി മൂലയില്‍ അവാര്‍ഡുകള്‍ വിതരണം ചെയ്തു. എല്‍പി വിഭാഗത്തില്‍ ചങ്ങനാശേരി സെന്‍റ് ആന്‍സ്, യുപി വിഭാഗത്തില്‍ സെന്‍റ് ജോസഫ്, ഹൈസ്‌കൂള്‍ വിഭാഗത്തില്‍ കുറുമ്പനാടം സെന്‍റ് പീറ്റേഴ്‌സ്, ഹയര്‍ സെക്കന്‍ഡറി വിഭാഗത്തില്‍ എസ്ബി സ്‌കൂളുകള്‍ അവാര്‍ഡുകള്‍ നേടി. ഇന്നവേറ്റീവ് പ്രോഗ്രാമില്‍ യുപി വിഭാഗത്തില്‍ ആര്യങ്കാവ് സെന്‍റ് മേരീസും ഹൈസ്‌കൂള്‍ വിഭാഗത്തില്‍ പായിപ്പാട് സെന്‍റ് ജോസഫും അവാര്‍ഡുകള്‍ കരസ്ഥമാക്കി. അതിരൂപതാ ചെയര്‍പേഴ്‌സണ്‍ തെരേസ ബിജു സെബാസ്റ്റ്യന്‍ അധ്യക്ഷത വഹിച്ചു. സ്‌കൂള്‍ മാനേജര്‍ റവ.ഡോ. ടോണി ചെത്തിപ്പുഴ, ഹെഡ്മാസ്റ്റര്‍ വിനോദ് ബാബു, ഡയറക്ടര്‍ ഫാ. ജോജോ പള്ളിച്ചിറ, പ്രസിഡന്‍റ് റിന്‍സ് വര്‍ഗീസ്, സംസ്ഥാന ചെയര്‍പേഴ്‌സണ്‍ നേഹ മരിയ ജോസഫ്, ടിന്‍റു ആന്‍ ജയിംസ്, നോയല്‍ മാത്യു, സജിന്‍ എന്‍., സിസ്റ്റര്‍ അലീന മ്ലാവില്‍, സിസ്റ്റര്‍ സീനി, മനോജ് ചാക്കോ, ടോം ചാക്കോ, ജിജോമോന്‍ തോമസ് എന്നിവര്‍ പ്രസംഗിച്ചു.

വൈക്കത്തെ റോഡുകളിലെ വളവുകളിൽ അപകടങ്ങൾ തുടർക്കഥ

വൈക്കം: വൈക്കം-തലയോലപ്പറമ്പ്, വൈക്കം-വെച്ചൂർ, ഇടയാഴം-കല്ലറ റോഡുകളിലെ വളവുകളില്‍ അപകടം തുടര്‍ക്കഥയാകുന്നു. അപകടങ്ങളിൽ ജീവൻ പൊലിഞ്ഞിട്ടും പ്രധാന നിരത്തിലെ അപകടക്കെണിയാകുന്ന വളവുകൾ നിവര്‍ത്തുന്നതിന് നടപടിയില്ല. വാഹനഗതാഗതത്തിനും കാൽനടക്കാർക്കും ഒരുപോലെ വളവുകൾ ഭീഷണിയാകുന്നു. തലയോലപ്പറമ്പിലെ വടയാര്‍, പൊതി മേൽപ്പാലം, പൊട്ടന്‍ചിറ, ഉദയനാപുരത്തെ വല്ലകം, പുളിഞ്ചുവട്, ചാലപ്പറമ്പ്, തോട്ടകം, ഉദയനാപുരം, കൂട്ടുമ്മേല്‍, വൈക്കം-വെച്ചൂർ റോഡിലെ തോട്ടകം ഷാപ്പിനു സമീപത്തും തോട്ടകം ഗവൺമെന്‍റ് എൽപി സ്കൂളിനുംവളഞ്ഞമ്പലത്തിനു സമീപവും ഇടയാഴം - കല്ലറ റോഡിലെ വല്യാറ വളവുകളിലുമാണ് അപകടങ്ങൾ പതിവാകുന്നത്. തോട്ടകം ഇലഞ്ഞിച്ചുവട് ഭാഗത്തെ കൊടുംവളവ് നിരവധി അപകടങ്ങള്‍ക്കാണ് കാരണമാകുന്നത്. ഏതാനും വർഷങ്ങൾക്കുള്ളിൽ നിരവധി പേരാണ് ഇവിടെ അപകടത്തിൽ മരിച്ചത്. ഏഴു വർഷം മുമ്പാണ് ഇവിടെ ദമ്പതികൾ ദാരുണമായി അപകടത്തില്‍ മരിച്ചത്. മറുവശത്തുനിന്നു വരുന്ന വാഹനങ്ങൾ കാണാനാവാതെ വരുന്നതാണ്അപകടങ്ങള്‍ക്ക് ഇടയാക്കുന്നത്. വല്ലകം സബ്‌സ്റ്റേഷനു മുന്നിലെ വളവും ഗതാഗതത്തിന് വലിയ ഭീഷണിയാണ് ഉയര്‍ത്തുന്നത്. തലയോലപ്പറമ്പ് റോഡ് ആധുനികവത്കരിച്ചതിനെത്തുടര്‍ന്ന് ചാലപ്പറമ്പ് വളവിൽ റോഡരികിലെ മതില്‍ പത്തുതവണ വാഹനമിടിച്ചു തകര്‍ന്നിരുന്നു. ഇതിനുശേഷം അപകടങ്ങള്‍ കുറയ്ക്കാന്‍ ഇവിടെ സിഗ്നല്‍ ലൈറ്റ് സ്ഥാപിച്ചെങ്കിലും ഒരുതരത്തിലുമുള്ള പ്രയോജനവും ഉണ്ടാകുന്നില്ലെന്ന് നാട്ടുകാർ കുറ്റപ്പെടുത്തുന്നു. കൊടുംവളവില്‍ അമിതവേഗതയില്‍ പാഞ്ഞെത്തുന്ന വാഹനങ്ങള്‍ക്ക് ഈ മുന്നറിയിപ്പുകൾ ശ്രദ്ധിക്കാനുമാകുന്നില്ല. വൈക്കം-വെച്ചൂര്‍ റോഡിൽ വലിയാനപ്പുഴ പാലം മുതല്‍ വെച്ചൂര്‍വരെയുള്ള വീതി കുറഞ്ഞ റോഡിലെ വളവുകളിൽ നിരന്തരം അപകടങ്ങളുണ്ടാകുന്നു. വൈക്കം-വെച്ചൂര്‍ റോഡ് അന്താരാഷ്‌ട്ര നിലവാരത്തില്‍ വീതികൂട്ടി പുനര്‍നിര്‍മിക്കുമെന്ന പ്രഖ്യാപനം വന്നിട്ട് നാളേറെയായെങ്കിലും നടപടികള്‍ ഇഴഞ്ഞുനീങ്ങുകയാണ്. റോഡ് വീതികൂട്ടി വളവുകള്‍ നിവർത്തി ഗതാഗതം സുരക്ഷിതമാക്കണമെന്നു നാട്ടുകാർ ആവശ്യപ്പെട്ടു.

കാറ്റിൽ വീടിന്‍റെ ഷീറ്റ്മേൽക്കൂര 30 മീറ്റർ അകലേക്ക് പറന്നുപോയി

വൈക്കം: ശക്തമായ കാറ്റിൽ വീടിനു മുകളിൽ ട്രസ് വർക്ക് ചെയ്തിരുന്ന ഷീറ്റും മേൽക്കൂരയും പറന്നുപോയി. മുപ്പത് മീറ്ററകലെ സമീപവാസികളുടെ വളപ്പിലെ മരങ്ങളിൽ തങ്ങിനിന്നതിനാൽ താഴെ വീഴാതെ ആളപായം ഒഴിവായി. ഇന്നലെ രാവിലെപത്തിന് വൈക്കം നഗരസഭ ഒന്നാം വാർഡിൽ ഉദയനാപുരം ക്ഷേത്രത്തിന് സമീപമായിരുന്നു സംഭവം. ബ്ലൂനെയിലിൽ അല്ലിയുടെ വീടിന്‍റെ മുകളിൽ സ്ഥാപിച്ചിരുന്ന ഷീറ്റിട്ട 450 സ്ക്വയർ ഫീറ്റോളം വരുന്ന മേൽക്കൂരയാണ് 30 മീറ്റർ ദൂരത്തിൽ പറന്നുപോയത്.സമീപവാസികളായ ഹരിചന്ദനത്തിൽ ഹരിദാസ്, പ്ലാത്തോട്ടത്തിൽ ശശി എന്നിവരുടെ പുരയിടത്തിലെ തെങ്ങിലും മാവിലുമായി തങ്ങിനിന്നതിനാൽ താഴെക്ക് പതിയാതെ വലിയ അപകടം ഒഴിവാകുകയായിരുന്നു. വൈക്കം ഫയർ സ്റ്റേഷൻ അസിസ്റ്റന്‍റ് സ്റ്റേഷൻ ഓഫീസർ അഖിൽ രാജ്, സീനിയർ ഫയർ ആൻഡ് റെസ്ക്യു ഓഫീസർ സാജു, വി.ആർ. ബിജു, ഗോകുൽ ജി., കെ. ശ്രീജിത്ത്, കൃഷ്ണകുമാർ, വിജിലേഷ് എന്നിവരുടെ നേതൃത്വത്തിൽ അഗ്നിരക്ഷാസേന എത്തി തെങ്ങിന് മുകളിൽ വടം കെട്ടി കപ്പിയും കയറും ഉപയോഗിച്ച് മണിക്കൂറുകൾകൊണ്ടാണ് മേൽക്കൂര സുരക്ഷിതമായി താഴെയിറക്കിയത്. അഗ്നിരക്ഷാസേനയെ സഹായിക്കാനായി വാർഡ് കൗൺസിലർ എൻ. അയ്യപ്പന്‍റെ നേതൃത്വത്തിൽ നാട്ടുകാരുമെത്തിയിരുന്നു. മേൽക്കൂര പറന്നുപോയതോടെ പെയ്ത്തുവെള്ളം അല്ലിയുടെ വീടിനുള്ളിൽ നിറഞ്ഞു. പിന്നീട് പടുത വലിച്ചുകെട്ടിയാണ് വീടിനുള്ളിൽ വെള്ളം വീഴാതെ സംരക്ഷിച്ചത്. മുറിയിലുണ്ടായിരുന്ന കട്ടിൽ, ബെഡ് എന്നിവയ്ക്കും നാശം സംഭവിച്ചു.

കന്തീശങ്ങളുടെ തിരുനാളും ഇരട്ടകളുടെ മഹാസംഗമവും

കടുത്തുരുത്തി: തീര്‍ഥാടന കേന്ദ്രമായ കോതനല്ലൂര്‍ ഫൊറോനാ പള്ളിയില്‍ കന്തീശങ്ങളുടെ തിരുനാളും ഇരട്ടകളുടെ മഹാസംഗമവും 18, 19 തീയതികളില്‍ നടക്കും. ഇരട്ടകളുടെ സംഗമവും സമര്‍പ്പണ ശുശ്രൂഷയും 19 ന് നടക്കുമെന്ന് പള്ളിയധികൃതര്‍ പത്രസമ്മേളനത്തില്‍ അറിയിച്ചു. ഇന്നു രാവിലെ 6.30നും വൈകുന്നേരം അഞ്ചിനും വിശുദ്ധ കുര്‍ബാന. നാളെ രാവിലെ 6.15ന് കന്തീശങ്ങളുടെ തിരുസ്വരൂപങ്ങള്‍ മോണ്ടളത്തില്‍ പ്രതിഷ്ഠിക്കും. തുടര്‍ന്ന് 6.30നും പത്തിനും പാട്ടുകുര്‍ബാന. വൈകുന്നേരം അഞ്ചിന് പാട്ടുകുര്‍ബാന, സന്ദേശം, നൊവേന-ഫാ. ബിജു ഇളമ്പാശേരില്‍ സിഎംഎഫ്, 6.30ന് പ്രദക്ഷിണം. പ്രധാന തിരുനാള്‍ ദിനമായ 19ന് രാവിലെ 5.45ന് വിശുദ്ധ കുര്‍ബാന, ഏഴിന് പാട്ടുകുര്‍ബാന, നൊവേന. 8.30 ന് ഇരട്ടകളുടെ രജിസ്‌ട്രേഷന്‍ ആരംഭിക്കും. 9.30ന് സമൂഹബലി. ഇരട്ടവൈദികരായ ഫാ. റോയി കണ്ണഞ്ചിറ സിഎംഐ, ഫാ. റോബി കണ്ണഞ്ചിറ സിഎംഐ, ഫാ. റോജി മനയ്ക്കപ്പറമ്പില്‍ സിഎംഐ, ഫാ. റെജി മനയ്ക്കപ്പറമ്പില്‍ സിഎംഐ, ഫാ. ആന്‍റോ പേഴുംകാട്ടില്‍, ഫാ. അജോ പേഴുംകാട്ടില്‍, ഫാ.ജസ്റ്റിന്‍ തയ്യില്‍ ഒഎസ്ബി, ഫാ. ജിസ്റ്റോ തയ്യില്‍ ഒഎസ്ബി, ഫാ. ഡെയ്‌ന വടക്കേമുറിയില്‍ എന്നിവര്‍ കാര്‍മികത്വം വഹിക്കും. 11.15 ന് തിരുനാള്‍ പ്രദക്ഷിണം ആരംഭിക്കും. 12.15 ന് ഇരട്ടകളുടെ സമര്‍പ്പണ ശുശൂഷ - ബിഷപ് മാര്‍ ജോസഫ് കല്ലറങ്ങാട്ട് നിര്‍വഹിക്കും. തുടര്‍ന്ന് സ്‌നേഹവിരുന്ന്, വൈകുന്നേരം അഞ്ചിന് പാട്ടുകുര്‍ബാന, തുടര്‍ന്ന് കന്തീശങ്ങളുടെ തിരുസ്വരൂപങ്ങള്‍ പുനഃപ്രതിഷ്ഠിക്കും. തിരുനാള്‍ തിരുക്കര്‍മങ്ങളെക്കുറിച്ചു വിശദീകരിക്കുന്നതിനായി നടന്ന വാര്‍ത്താസമ്മേളനത്തില്‍ വികാരി ഫാ. സെബാസ്റ്റ്യന്‍ പടിയ്ക്കക്കുഴുപ്പില്‍, കൈക്കാരന്മാരായ ബേബി എടാട്ടേല്‍, പൊന്നി പുളിങ്ങാപ്പള്ളില്‍, ജോസഫ് പാളിയില്‍, ജോര്‍ജ് പട്ടമന എന്നിവര്‍ പങ്കെടുത്തു.

പ്രവർത്തനം നിലച്ച ശുചിമുറിസമുച്ചയം നശിക്കുന്നു

വൈക്കം: വൈക്കം ദളവാക്കുളം ബസ് ടെർമിനലിന്‍റെ സമീപത്തെ പ്രവർത്തനം നിലച്ച കംഫർട്ട് സ്റ്റേഷൻ കെട്ടിടം നാശത്തിന്‍റെ വക്കിൽ. ദളവാക്കുളം ബസ് ടെർമിനലിനു കിഴക്കുഭാഗത്ത് കോട്ടയം ജില്ലാ ടൂറിസം പ്രമോഷൻ കൗൺസിലിന്‍റെ ആഭിമുഖ്യത്തിൽ ലക്ഷങ്ങൾ ചെലവഴിച്ചു നിർമിച്ച കംഫർട്ട് സ്റ്റേഷൻ കെട്ടിടമാണ് ഏതാനും വർഷങ്ങളായി പ്രവർത്തനം നിലച്ചതോടെ കിടന്ന് നശിക്കുന്നത്. മഹാദേവ ക്ഷേത്രത്തിലെത്തുന്നവർക്കും നഗരത്തിലെത്തുന്നവർക്കും പ്രാഥമികാവശ്യം നിർവഹിക്കാൻ കംഫർട്ട് സ്റ്റേഷൻ വേണമെന്ന നിരന്തരാവശ്യത്തെത്തുടർന്നാണ് വിനോദസഞ്ചാര വകുപ്പിന്‍റെ ധനസഹായത്തോടെ ശുചിമുറി സമുച്ചയം നിർമിച്ചത്. ദളവാക്കുളം ബസ് ടെർമിനലിനുള്ളിൽ ടേക്ക് എ ബ്രേക്ക് പദ്ധതിയിൽ ഉൾപ്പെടുത്തി പുതിയ കംഫർട്ട് സ്റ്റേഷൻ പണിത് പ്രവർത്തനം ആരംഭിച്ചു. ദളവാക്കുളം ബസ് ടെർമിനലിനു കിഴക്കുഭാഗത്ത് നഗരസഭയുടെ സ്ഥലത്ത് ജില്ലാ ടൂറിസം പ്രമോഷൻ കൗൺസിൽ ലക്ഷങ്ങൾ വിനിയോഗിച്ചു പണിത കംഫർട്ട് സ്റ്റേഷന്‍റെ പ്രവർത്തനം പുനരാരംഭിക്കുന്നതിന് അധികൃതർ നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.

റോഡില്‍ കളിവള്ളമിറക്കി പ്രതിഷേധിച്ചു

പെരുവ: വര്‍ഷങ്ങളായി സഞ്ചാരയോഗ്യമല്ലാത്ത രീതിയില്‍ താറുമാറായിക്കിടക്കുന്ന വെള്ളൂര്‍ റെയില്‍വേ സ്റ്റേഷന്‍ ചെക്ക്പോസ്റ്റ് റോഡ് ഗതാഗതയോഗ്യമാക്കണമെന്നാവശ്യപ്പെട്ട് റോഡില്‍ കളിവള്ളമിറക്കി പ്രതിഷേധിച്ചു. അപകടകരമായ കുഴികളും വെള്ളക്കെട്ടുംമൂലം നൂറുകണക്കിനാളുകള്‍ യാത്ര ചെയ്യുന്ന റോഡ് ദുരിതമായി മാറിയിരിക്കുകയാണ്. റോഡ് അടിയന്തരമായി സഞ്ചാരയോഗ്യമാക്കണമെന്ന ആവശ്യവുമായി വെള്ളൂര്‍ ഹോളി ഫാമിലി പള്ളി കെസിസി യൂണിറ്റിന്‍റെ നേതൃത്വത്തിലാണ് വ്യത്യസ്തമായ സമരം സംഘടിപ്പിച്ചത്. പള്ളിയിലെ മറ്റു സംഘടനകളുടെയും അംഗങ്ങള്‍ സമരത്തില്‍ പങ്കെടുത്തു. റോഡില്‍ കളിവള്ളങ്ങള്‍ ഇറക്കിയും ചെടികള്‍ നട്ടുമാണ് പ്രതിഷേധമറിയിച്ചത്. കെസിസി യൂണിറ്റ് പ്രസിഡന്‍റ് സാലസ് കുറ്റിയാംകോണത്തും ഭാരവാഹികളും സമരപരിപാടിക്കു നേതൃത്വം നല്‍കി. ഫാ. സ്റ്റീഫന്‍ കുളക്കാട്ടുകുടി പ്രതിഷേധ പരിപാടി ഉദ്ഘാടനം ചെയ്തു. എംപി ഫണ്ടില്‍നിന്ന് റോഡ് നിര്‍മാണത്തിനാവശ്യമായ തുക നേരത്തേ അനുവദിച്ചിട്ടുള്ളതും റെയില്‍വേ കരാറുകാരനെ പണികള്‍ ഏല്‍പ്പിച്ചിട്ടുള്ളതുമാണ്. ഏറെക്കാലമായിട്ടും റോഡിന്‍റെ പണികള്‍ നടക്കുന്നില്ല. മഴക്കാലമായതോടെ റോഡിലെ‍ വെള്ളക്കെട്ട് കാല്‍നട യാത്രപോലും പറ്റാത്ത വിധത്തിലാക്കിയിരിക്കു കയാണ്. ഇരുചക്ര വാഹനയാത്രികർ വെള്ളക്കെട്ടില്‍ വീണ് പരിക്കേല്‍ക്കുന്നതും പതിവായി. റോഡ് നന്നാക്കാന്‍ റെയില്‍വേയുടെയും പഞ്ചായത്തിന്‍റെയും മറ്റ് അധികാരികളുടെയും ഭാഗത്തുനിന്നും അടിയന്തര നടപടിയുണ്ടാകണമെന്ന് പ്രതിഷേധക്കാര്‍ ആവശ്യപ്പെട്ടു.

പൂവന്തുരുത്ത് ലക്ഷംവീട് കുടിവെള്ള പദ്ധതി ഉദ്ഘാടനം ചെയ്തു

പൂവന്തുരുത്ത്: രൂക്ഷമായ കുടിവെള്ളക്ഷാമം അനുഭവിച്ചിരുന്ന പൂവന്തുരുത്ത് ലക്ഷം വീട് ഭാഗത്തെ ജനങ്ങള്‍ക്ക് ആശ്വാസമായി പൂവന്തുരുത്ത് ലക്ഷംവീട് കുടിവെള്ള പദ്ധതി. പള്ളം ബ്ലോക്ക് പഞ്ചായത്ത് 2022-23 വാര്‍ഷിക പദ്ധതിയില്‍ ഉള്‍പ്പെടുത്തി കുഴിമറ്റം ഡിവിഷനില്‍ പനച്ചിക്കാട് പഞ്ചായത്ത് 21-ാം വാര്‍ഡിലാണ് കുടിവെള്ള പദ്ധതി ആരംഭിച്ചത്. പദ്ധതിയിലൂടെ 20 കുടുംബങ്ങള്‍ക്കും കോളനിയില്‍ പ്രവര്‍ത്തിക്കുന്ന അങ്കണവാടിക്കുമാണ് കുടിവെള്ളം ലഭ്യമാകുന്നത്. ഡിവിഷന്‍ ഫണ്ടില്‍നിന്ന് 7,75,000 രൂപ കോട്ടയം ഭൂജലവകുപ്പില്‍ നിക്ഷേപിച്ചാണ് പദ്ധതി നടപ്പാക്കിയത്. പള്ളം ബ്ലോക്ക് പഞ്ചായത്ത് പ്രസിഡന്‍റ് പ്രഫ. ടോമിച്ചന്‍ ജോസഫ് പൂവന്തുരുത്ത് ലക്ഷംവീട് മൈതാനിയില്‍ പദ്ധതി ഉദ്ഘാടനം ചെയ്തു. ഡിവിഷന്‍ മെംബറും ബ്ലോക്ക് പഞ്ചായത്ത് വൈസ് പ്രസിഡന്‍റുമായ രജനി അനില്‍ അധ്യക്ഷത വഹിച്ചു. ക്ഷേമകാര്യ സ്ഥിരം സമിതി അധ്യക്ഷന്‍ സിബി ജോണ്‍ കൈതയില്‍, പഞ്ചായത്തംഗങ്ങളായ വാസന്തി സലിം, മഞ്ജു രാജേഷ്, രാഷ്‌ട്രീയപ്പാര്‍ട്ടി പ്രതിനിധികളായ ഷാജി ഉതുപ്പാന്‍, പി.കെ. കൃഷ്ണന്‍, ജെയ് പി. പോള്‍, പദ്ധതി സമിതി സെക്രട്ടറി ബിജു ജോണ്‍ എന്നിവര്‍ പങ്കെടുത്തു.

അപകടാവസ്ഥയിലുള്ള മരങ്ങള്‍ കണ്ടെത്തി വെട്ടിമാറ്റണം: തിരുവഞ്ചൂർ

കോട്ടയം: പൊതുസ്ഥലങ്ങളില്‍ മനുഷ്യരുടെ ജീവനും സ്വത്തിനും ഭീഷണി ഉയര്‍ത്തുന്ന മരങ്ങള്‍ കണ്ടെത്തി വെട്ടിമാറ്റാന്‍ നടപടിയെടുക്കാത്തതിനാല്‍ ജനങ്ങള്‍ ഭയാശങ്കയിലാണ് കഴിയുന്നതെന്ന് തിരുവഞ്ചൂര്‍ രാധാകൃഷ്ണന്‍ എംഎല്‍എ. മരണത്തില്‍നിന്ന് ജനങ്ങളെ രക്ഷിക്കുന്നതിനു പകരം മരണത്തിന്‍റെ വ്യാപാരികളായി സര്‍ക്കാര്‍ മാറിയിരിക്കുകയാണ്. കാലവര്‍ഷത്തിനു മുന്നോടിയായി ചെയ്യേണ്ട നടപടികളില്‍ വലിയ വീഴ്ചയാണ് ഇത്തവണ ഉണ്ടായിട്ടുള്ളത്. മണ്‍സൂണിന് മുന്‍പ് നടത്തേണ്ടിയിരുന്ന മഴക്കാല പൂര്‍വകാല ശുചീകരണം ഇത്തവണ ഫലപ്രദമായി നടന്നിട്ടില്ലെന്നും തിരുവഞ്ചൂര്‍ ചൂണ്ടിക്കാട്ടി. പൊതുസ്ഥലങ്ങളിലെ വേരുറപ്പില്ലാത്ത വലിയ മരങ്ങള്‍ വെട്ടിമാറ്റുക മാത്രമാണു പോംവഴി. സോഷ്യല്‍ ഫോറസ്ട്രി വകുപ്പ് ഇത്തരം മരങ്ങളുടെ കണക്കെടുപ്പ് നടത്തണം. കഴിഞ്ഞദിവസമുണ്ടായ കാറ്റിലും മഴയിലും മരങ്ങള്‍ റോഡിലേക്ക് മറിഞ്ഞുവീണു വലിയ നാശനഷ്ടമാണ് ഉണ്ടായത്. പൊതുസ്ഥലങ്ങളിലെ അപകടാവസ്ഥയിലുള്ള മരങ്ങള്‍ കണ്ടെത്താനോ നടപടിയെടുക്കാനോ ഫലപ്രദമായ ഇടപെടല്‍ ഉണ്ടായിട്ടില്ല. മഴയും കാറ്റും കനത്തതോടെ എല്ലായിടത്തും ജനങ്ങള്‍ ഭയപ്പാടിലാണ് കഴിയുന്നത്. ദുരന്തനിവാരണ സമിതി ഇത്തരം സാഹചര്യങ്ങളില്‍ അടിയന്തര നടപടികള്‍ക്ക് തയാറാകണം. ജില്ലാ വികസനസമിതി ഇക്കാര്യങ്ങളില്‍ നടപടി എടുക്കണമെന്ന് ആവശ്യപ്പെട്ടിരുന്നതാണ്. ജനങ്ങളുടെ ജീവനും സ്വത്തിനും സംരക്ഷണം നല്‍കേണ്ട ഉത്തരവാദിത്വം സര്‍ക്കാര്‍ നിറവേറ്റണമെന്ന് തിരുവഞ്ചൂര്‍ പത്രസമ്മേളനത്തില്‍ ആവശ്യപ്പെട്ടു. ഇത്തരം സാഹചര്യങ്ങളില്‍ നാശനഷ്ടം ഉണ്ടാകുന്ന കുടുംബങ്ങള്‍ക്ക് അടിയന്തരമായി മതിയായ നഷ്ടപരിഹാരം നല്‍കണം. പ്രളയരഹിത കോട്ടയം എന്ന് പരസ്യമായി അവകാശവാദം ഉന്നയിച്ചവര്‍ അത് നടപ്പാക്കിക്കാണിക്കുകയാണ് വേണ്ടത്. മലയോരമേഖലയില്‍ ഉയരുന്ന ഏറ്റവും വലിയ ആവശ്യം വന്യജീവികളില്‍നിന്നും മനുഷ്യജീവന് സംരക്ഷണം നല്‍കണമെന്നതാണ്. എന്നാല്‍ ഇവിടെയും മനുഷ്യരെ വിധിക്ക് വിട്ടുകൊടുത്ത് മരണത്തിന്‍റെ വ്യാപാരികളായി സര്‍ക്കാര്‍ മാറിയെന്ന് തിരുവഞ്ചൂര്‍ ചൂണ്ടിക്കാട്ടി. യുഡിഎഫ് ജില്ലാ കണ്‍വീനര്‍ ഫില്‍സണ്‍ മാത്യൂസ്, എം.പി. സന്തോഷ്‌കുമാര്‍, ജയചന്ദ്രന്‍ ചിറോത്ത് എന്നിവരും പത്രസമ്മേളനത്തില്‍ പങ്കെടുത്തു.

സെൻട്രൽ ജംഗ്ഷനിൽ ഭാരവാഹനം കുടുങ്ങി

ചങ്ങനാശേരി: ഭാരവാഹനം നഗരമധ്യത്തിൽ കുടുങ്ങി. തിരുവനന്തപുരം ഭാഗത്തേക്ക് പോയ സ്വകാര്യ കമ്പനിയുടെ കൂറ്റൻ ലോറിയാണ് സെൻട്രൽ ജംഗ്ഷനിൽ കുടുങ്ങിയത്. സ്റ്റേഷനിൽനിന്ന് കൂടുതൽ പോലീസ് എത്തിയാണ് ഗതാഗത തടസം പരിഹരിച്ചത്. കമ്പനിയിൽനിന്ന് ആളുകളെത്തി തകരാർ പരിഹരിച്ചാണ് ലോറി കൊണ്ടുപോയത്. ഭാരവാഹനങ്ങളെ ചങ്ങനാശേരി ബൈപാസിലൂടെ പോലീസ് തിരിച്ചു വിടാത്തത് നഗരത്തിൽ ഗതാഗതക്കുരുക്കിന് ഇടയാക്കുന്നുണ്ട്.

വീട് നിര്‍മിച്ചു നല്‍കി കേരള കോണ്‍ഗ്രസിന്‍റെ വ്യത്യസ്ത സമരം

ചങ്ങനാശേരി: കുറിച്ചി പഞ്ചായത്ത് എണ്ണയ്ക്കാച്ചിറയിലെ വീടുകളുടെ അറ്റകുറ്റപ്പണി നടത്താന്‍ ഫണ്ട് അനുവദിക്കാത്തതിലും പട്ടയം നല്‍കാത്തതിലും പ്രതിഷേധിച്ച് വീട് ഇടിഞ്ഞുവീഴാറായ ഒരു കുടുംബത്തിനു വീട് നിര്‍മിച്ചു നല്‍കി കേരള കോണ്‍ഗ്രസിന്‍റെ വ്യത്യസ്ത സമര പരിപാടി. ഇതിനായി കേരള കോണ്‍ഗ്രസ് സംസ്ഥാന സ്റ്റിയറിംഗ് കമ്മിറ്റി അംഗം ഡോ. ജോബിന്‍ എസ്. കൊട്ടാരം കണ്‍വീനറായി ഭവന നിര്‍മാണ കമ്മിറ്റി രൂപീകരിച്ചു. കെ.എഫ്. വര്‍ഗീസ് സമ്മേളനം ഉദ്ഘാടനം ചെയ്തു. സി.ഡി. വത്സപ്പന്‍, വി.ജെ. ലാലി, ജിക്കു കുര്യാക്കോസ്, റോയി ചാണ്ടി, ജോസഫ് ആന്‍റണി, സണ്ണി മക്കൊള്ളില്‍, ഷാജി പാറത്താഴെ, ബിജോയ് എണ്ണക്കാച്ചിറ, തങ്കച്ചന്‍ കല്ലുതറ എന്നിവര്‍ പ്രസംഗിച്ചു.

യുജി, പിജി വിദ്യാര്‍ഥിനികള്‍ക്ക് അസംപ്ഷനില്‍ ബിരുദദാനം

ചങ്ങനാശേരി: അസംപ്ഷന്‍ ഓട്ടോണമസ് കോളജില്‍ വിവിധ യുജി, പിജി കോഴ്‌സുകള്‍ പാസായ വിദ്യാര്‍ഥിനികള്‍ക്ക് ബിരുദദാനം നടത്തി. ഹയര്‍ എഡ്യൂക്കേഷന്‍ പ്രിന്‍സിപ്പല്‍ സെക്രട്ടറി ഡോ. ശര്‍മിള മേരി ജോസഫ് ഉദ്ഘാടനം നിര്‍വഹിച്ചു. ജീവിതവിജയം നേടാന്‍ കഠിന പരിശ്രമങ്ങള്‍ക്കൊപ്പം മൂല്യാധിഷ്ഠിത വിദ്യാഭ്യാസവും അനിവാര്യമാണെന്ന് ഡോ. ശര്‍മിള പറഞ്ഞു. കോളജ് ഇന്‍ഡോര്‍ സ്റ്റേഡിയത്തില്‍ നടന്ന സമ്മേളനത്തില്‍ കോളജ് മാനേജര്‍ മോണ്‍. ആന്‍റണി എത്തയ്ക്കാട്ട് അധ്യക്ഷത വഹിച്ചു. വിദ്യാഭ്യാസത്തിലൂടെ വെല്ലുവിളികളെ അതിജീവിക്കാനും പ്രതിസന്ധികളെ തരണം ചെയ്യാനുമുള്ള കഴിവ് നേടണമെന്ന് വികാരി ജനറാള്‍ പറഞ്ഞു. പൂര്‍വവിദ്യാര്‍ഥിനിയും 2024 ലെ സിവില്‍ സര്‍വീസ് 569-ാം റാങ്ക് ജേതാവുമായ വി. ഹേമയെ സമ്മേളനത്തില്‍ ആദരിച്ചു. ജോബ് മൈക്കിള്‍ എംഎല്‍എ മുഖ്യാതിഥിയായിരുന്നു. കോളജ് പ്രന്‍സിപ്പല്‍ ഡോ. റാണി മരിയ തോമസ്, വൈസ് പ്രിന്‍സിപ്പല്‍ ഡോ. ജിസി മാത്യു, വിദ്യാര്‍ഥി പ്രതിനിധി ഷൈന്‍ മരിയ ഷാജി എന്നിവര്‍ പ്രസംഗിച്ചു.

മെഡിക്കല്‍ ക്യാമ്പ് ന‌ടത്തി

കുറിച്ചി: പഞ്ചായത്തും കുറിച്ചി ഗവണ്‍മെന്‍റ് ആയുഷ് ആയുര്‍വേദ ആശുപത്രിയും കല്ലട ഐ കെയര്‍ ഹോസ്പിറ്റലും ചങ്ങനാശേരി ശങ്കേഴ്സ് ലബോറട്ടറിയും ചേര്‍ന്ന് പഞ്ചായത്തിലെ 12-ാം വാര്‍ഡില്‍ സൗജന്യ മെഡിക്കല്‍ ക്യാമ്പ് സംഘടിപ്പിച്ചു. പഞ്ചായത്ത് പ്രസിഡന്‍റ് സുജാത സുശീലന്‍ ഉദ്ഘാടനം ചെയ്തു. ആരോഗ്യ വിദ്യാഭ്യാസ സ്ഥിരം സമിതി അധ്യക്ഷ കൊച്ചുറാണി ജോസഫ് അധ്യക്ഷയായി. പഞ്ചായത്തംഗം ബിജു എസ്. മേനോന്‍, ഇത്തിത്താനം ഹയര്‍ സെക്കന്‍ഡറി സ്‌കൂള്‍ പ്രിന്‍സിപ്പല്‍ വി.ജെ. വിജയകുമാര്‍, കല്ലട ഐ കെയര്‍ ഹോസ്പിറ്റല്‍ സിഇഒ കെ.കെ. അലക്സാണ്ടര്‍, ആശാ വര്‍ക്കര്‍ കുഞ്ഞുമോള്‍ ജോസഫ് എന്നിവര്‍ പങ്കെടുത്തു.

മാത്യൂസ് ജോര്‍ജ് വാഴപ്പള്ളി സഹകരണ ബാങ്ക് പ്രസിഡന്‍റ്

ചങ്ങനാശേരി: ജില്ലയിലെ ഏക സൂപ്പര്‍ സ്‌പെഷല്‍ ഗ്രേഡ് ബാങ്കായ വാഴപ്പള്ളി സര്‍വീസ് സഹകരണ ബാങ്ക് പ്രസിഡന്‍റായി ചങ്ങനാശേരി മുനിസിപ്പല്‍ വൈസ് ചെയര്‍മാന്‍കൂടിയായ മാത്യൂസ് ജോര്‍ജ് തെരഞ്ഞെടുക്കപ്പെട്ടു. കഴിഞ്ഞ കാല്‍ നൂറ്റാണ്ട് കാലമായി പാറേല്‍ പള്ളി വാര്‍ഡിനെ നഗരസഭയില്‍ പ്രതിനിധീകരിക്കുന്ന ഇദ്ദേഹം ജനാധിപത്യ കേരള കോണ്‍ഗ്രസ് കോട്ടയം ജില്ലാ പ്രസിഡന്‍റാണ്. ചങ്ങനാശേരി അര്‍ബന്‍ കോ ഓപ്പറേറ്റീവ് ബാങ്ക് മുന്‍ പ്രസിഡന്‍റായിരുന്നു.

പിതൃദിനത്തില്‍ പ്രഫ. തോമസ് കണയംപ്ലാവന് ആദരവ്

തൃക്കൊടിത്താനം: മാതൃ-പിതൃവേദി തൃക്കൊടിത്താനം ഫൊറോനാ സമിതിയുടെ നേതൃത്വത്തില്‍ ലോക പിതൃദിനം ആഘോഷിച്ചു. എഴുത്തുകാരനും ഗാനരചയിതാവും മുന്‍ എസ്ബി കോളജ് അധ്യാപകനുമായ പ്രഫ. തോമസ് കണയംപ്ലാവനെ ഡയറക്ടര്‍ ഫാ. ചെറിയാന്‍ കക്കുഴി പൊന്നാടയണിയിച്ചു. പിതൃവേദി ഫൊറോന പ്രസിഡന്‍റ് സിബി മുക്കാടന്‍ അധ്യക്ഷത വഹിച്ചു. സിസ്റ്റര്‍ ലിന്‍സിയ സിഎംസി, മാതൃവേദി പ്രസിഡന്‍റ് ജോളി തോമസ്, രാജു ആന്‍റണി, ജോഷി കൊല്ലാപുരം, മോളി ലൂയിസ്, ജോസഫ് തോമസ്, ലാലി ഇളപ്പുങ്കല്‍, റിറ്റി മനോഷ്, ബിന്നി ജോജി എന്നിവര്‍ പ്രസംഗിച്ചു.

മെറിറ്റ് അവാര്‍ഡ് വിതരണം

ചങ്ങനാശേരി: മോര്‍ക്കുളങ്ങര പബ്ലിക് സ്‌കൂളില്‍ പിടിഎ ജനറല്‍ബോഡി മീറ്റിംഗും മെറിറ്റ് അവാര്‍ഡ് ദാനവും നടത്തി. പ്രൊവിന്‍ഷ്യല്‍ കൗണ്‍സിലര്‍ സിസ്റ്റര്‍ ദീപ തോട്ടുകടവില്‍ എസ്എബിഎസ് ഉദ്ഘാടനം നിര്‍വഹിച്ചു. ക്ലിനിക്കല്‍ സൈക്കോളജിസ്റ്റ് ഡോ. ശ്രീജിത്ത് നായര്‍ ക്ലാസ് നയിച്ചു. പിടിഎ പ്രസിഡന്‍റ് സാജന്‍ ജോയി അധ്യക്ഷത വഹിച്ചു. പ്രിന്‍സിപ്പൽ സിസ്റ്റര്‍ ടിന്‍സി വാഴക്കാട് മുഖ്യപ്രഭാഷണം നടത്തി. റോബിന്‍ ജോര്‍ജ്, സോളി മാത്യു, ഐറിന്‍ മരിയ ജോസ്, ആര്‍. രാജേന്ദ്രന്‍, അഞ്ജു മാത്യു തുടങ്ങിയവര്‍ പ്രസംഗിച്ചു.

ഇത്തിത്താനം ആശാഭവന്‍ സ്‌പെഷല്‍ സ്‌കൂളില്‍ പ്രവേശനോത്സവം

ഇത്തിത്താനം: ചങ്ങനാശേരി അതിരൂപതയുടെ നേതൃത്വത്തിലു ള്ള ഇത്തിത്താനം ആശാഭവന്‍ സ്‌പെഷല്‍ സ്‌കൂളില്‍ 2025-26 വര്‍ഷത്തെ പ്രവേശനോത്സവം വികാരി ജനറാള്‍ മോണ്‍. മാത്യു ചങ്ങങ്കരി ഉദ്ഘാടനം ചെയ്തു. ഭിന്നശേഷിക്കാരായ കുട്ടികള്‍ക്ക് സഹതാപമല്ല, സമൂഹത്തിന്‍റെ അംഗീകാരമാണ് ആവശ്യമെന്നും അവരോട് കാരുണ്യപൂര്‍വമായ സമീപനമാണ് ഉണ്ടാകേണ്ടതെന്നും അദ്ദേഹം പറഞ്ഞു. ഡയറക്ടര്‍ ഫാ. സോണി മുണ്ടുനടയ്ക്കല്‍ അധ്യക്ഷത വഹിച്ചു. അതിരൂപത പ്രൊക്യുറേറ്റര്‍ ഫാ. ജയിംസ് മാളേക്കല്‍ മുഖ്യപ്രഭാഷണം നടത്തി. പിഎഐഡി സംസ്ഥാന പ്രസിഡന്‍റ് ജോര്‍ജ് മാത്യു, സിസ്റ്റര്‍ ജൂലിയറ്റ്, ജോസി, പിടിഎ പ്രസിഡന്‍റ് ജിജി കാലായില്‍, സെക്രട്ടറി ലൗലി ജോസഫ്, ട്രഷറര്‍ സീമ, ലിസി, ശാന്തി എന്നിവര്‍ പ്രസംഗിച്ചു.

നീറ്റ് പരീക്ഷ സംസ്ഥാനത്ത് അഞ്ചാം റാങ്ക് നേടി ചെൽസി എസ്. തെരേസ

മുണ്ടക്കയം: നീറ്റ് പരീക്ഷയിൽ സംസ്ഥാനത്ത് അഞ്ചാം റാങ്കും അഖിലേന്ത്യാതലത്തിൽ 290ാം റാങ്കും നേടി മലയോര നാടിന് അഭിമാനമായി മാറിയിരിക്കുകയാണ് പാലൂർക്കാവ് സ്വദേശിനിയായ വിദ്യാർഥിനി. പാലൂർക്കാവ് വടക്കേനിരപ്പേൽ സണ്ണി - ബീന ദമ്പതികളുടെ മകളായ ചെൽസി എസ്. തെരേസയാണ് മിന്നുന്ന വിജയം കരസ്ഥമാക്കിയത്. കർഷക കുടുംബത്തിൽ ജനിച്ച ചെൽസി ഒന്നു മുതൽ ഏഴു വരെ മുണ്ടക്കയം സെന്‍റ് ജോസഫ് സെൻട്രൽ സ്കൂളിലും പിന്നീട് പ്ലസ് ടു വരെ പെരുവന്താനം സെന്‍റ് ജോസഫ് ഹയർ സെക്കൻഡറി സ്കൂളിലുമാണ് പഠിച്ചത്. എസ്എസ്എൽസി, പ്ലസ്ടു പരീക്ഷകളിൽ എല്ലാ വിഷയങ്ങൾക്കും എ പ്ലസ് കരസ്ഥമാക്കിയാണ് ഈ മിടുക്കി നീറ്റ് പരീക്ഷയിലും മിന്നുന്ന വിജയം നേടിയത്. പാലാ ബ്രില്യന്‍റിലാണ് നീറ്റ് പരിശീലനം നേടിയത്. ചെൽസിയുടെ പിതാവ് കർഷകനാണ്. മാതാവ് പെരുവന്താനം സെന്‍റ് ജോസഫ് സ്കൂളിലെ അധ്യാപികയാണ്. ഏഴിലും ഒമ്പതിലും പഠിക്കുന്ന രണ്ട് സഹോദരിമാരെ കൂടാതെ പ്ലസ് ടു പരീക്ഷയിൽ എല്ലാ വിഷയങ്ങൾക്കും ഫുൾ എ പ്ലസ് കരസ്ഥമാക്കി തുടർ പഠനത്തിനായി ശ്രമിക്കുന്ന മറ്റൊരു സഹോദരിയുമാണ് ചെൽസിക്കുള്ളത്. വീട്ടുകാരുടെയും അധ്യാപകരുടെയും അകമഴിഞ്ഞ പിന്തുണയാണ് വിജയത്തിനു പിന്നിലെന്ന് ചെൽസി പറഞ്ഞു. എയിംസിൽ തുടർപഠനം നടത്തുവാനുള്ള ശ്രമത്തിലാണ് ചെൽസി.

കായല്‍യാത്രയില്‍ സര്‍ക്കാര്‍ ബോട്ടുകള്‍ കോരിയെടുത്തത് ലക്ഷങ്ങള്‍

കോട്ടയം: കായല്‍ യാത്രയില്‍ സര്‍ക്കാര്‍ ബോട്ടുകള്‍ കോരിയെടുത്തത് ലക്ഷങ്ങള്‍. യാത്രാപ്രേമികള്‍ ഏറെ ഇഷ്ടപ്പെടുന്ന കോട്ടയം-ആലപ്പുഴ കായല്‍ യാത്രയിലാണ് സര്‍ക്കാര്‍ ബോട്ടുകള്‍ ലാഭം കൊയ്തത്. അവധിക്കാലമായ ഏപ്രില്‍, മേയ് മാസത്തില്‍ ടിക്കറ്റിനത്തില്‍ അഞ്ചര ലക്ഷം രൂപയുടെ വരുമാനമാണ് കോട്ടയം കോടിമത സ്റ്റേഷനില്‍നിന്നും ജലഗതാഗത വകുപ്പിന് ലഭിച്ചത്. ഏപ്രിലില്‍ രണ്ടര ലക്ഷവും മേയില്‍ മൂന്നു ലക്ഷവും ലഭിച്ചു. കഴിഞ്ഞ വര്‍ഷത്തേക്കാള്‍ മികച്ച വര്‍ധനയാണിത്. പ്രകൃതിഭംഗി ആസ്വദിച്ച് വേഗത്തില്‍ കോട്ടയത്തുനിന്നും ആലപ്പുഴയില്‍ എത്താന്‍ ചെലവുകുറഞ്ഞൊരു യാത്രയാണിത്. 29 രൂപയാണ് ടിക്കറ്റ് നിരക്ക്. മുന്‍ വര്‍ഷങ്ങളില്‍ നിന്നും വ്യത്യസ്തമായി ഇത്തവണ കായല്‍യാത്ര ആസ്വദിക്കാന്‍ എത്തിയവരുടെ എണ്ണത്തിലും വലിയ വര്‍ധനയുണ്ടായി. വിദേശികളെ അപേക്ഷിച്ച് സ്വദേശികളാണ് ഇത്തവണ കൂടുതലും എത്തിയത്. വടക്കന്‍ ജില്ലകളില്‍ നിന്നുള്ളവരാണ് കൂടുതല്‍. രണ്ടുമാസത്തില്‍ 40,000 യാത്രക്കാരെത്തിയതാണ് ജലഗതാഗത വകുപ്പിന്‍റെ കണക്ക്. കോടിമതയില്‍നിന്ന് രണ്ടും ആലപ്പുഴയില്‍നിന്ന് ഒരു ബോട്ടുമാണ് സര്‍വീസ് നടത്തുന്നത്. രണ്ടു മണിക്കൂര്‍ നീളുന്ന യാത്ര പുതിയൊരു അനുഭവമാണ് സഞ്ചാരികള്‍ക്ക് സമ്മാനിക്കുന്നത്. കോടിമതയില്‍നിന്ന് പുറപ്പെട്ട് കൊടൂരാറ്റിലൂടെ കാഞ്ഞിരം, വെട്ടിക്കാട്,- പുത്തന്‍തോട്, പള്ളിക്കായല്‍,- ആര്‍ ബ്ലോക്ക്,- പുന്നമട- വഴി ആലപ്പുഴ ബോട്ട് ജെട്ടിയിലെത്തും. കോട്ടയത്തുനിന്ന് രാവിലെ 6.45, 11.30, ഒന്ന്, ഉച്ചകഴിഞ്ഞ് 3.30, വൈകുന്നേരം 5.15 എന്നീ സമയത്താണ് സര്‍വീസ്. ആലപ്പുഴയില്‍നിന്ന് രാവിലെ 7.15, 9.35, 11.30, ഉച്ചകഴിഞ്ഞ് 2.30, വൈകുന്നേരം 5.15 എന്നീ സമയങ്ങളിലാണ് മടക്ക ബോട്ട്. കായല്‍ യാത്രയിലൂടെ ലക്ഷങ്ങള്‍ വരുമാനം നേടിയെങ്കിലും സര്‍വീസിനായി ഇപ്പോഴും പഴയ ബോട്ടുകളാണ് ഉപയോഗിക്കുന്നത്. സോളാര്‍ സംവിധാനത്തില്‍ പ്രവര്‍ത്തിക്കുന്ന പുതിയ ബോട്ടുകള്‍ യാത്രയ്ക്കായി ഉപയോഗിക്കണമെന്ന ആവശ്യവും ശക്തമായി.

പ്രളയദുരിതം പേറി വീണ്ടും ദുരിതാശ്വാസ ക്യാമ്പുകളിലേക്ക്

കോട്ടയം: മഴക്കാലം കോട്ടയം നഗരപ്രാന്തത്തിലും കുട്ടനാട്ടിലും താമസിക്കുന്ന ഒട്ടേറെപ്പേര്‍ക്ക് ദുരിതകാലമാണ്. ഒരു മാസത്തിനുള്ളില്‍ ഇത് രണ്ടാം തവണയാണ് ദുരിതം നിറഞ്ഞ ക്യാമ്പുകളിലേക്ക് പോകാന്‍ ഇവര്‍ നിര്‍ബന്ധിതരാകുന്നത്. കൂലിവേലക്കാരും ചെറുകിടക്കാരുമാണ് വെള്ളക്കെടുതിയുടെ ഇരകളായി ദുരിതാശ്വാസ ക്യാമ്പുകളില്‍ എത്തുന്നത്. വീട്ടിലുള്ള വിലപിടിച്ച സാധനകളും പാത്രങ്ങളും വെള്ളം കയറാത്തയിടങ്ങളില്‍ സൂക്ഷിച്ചശേഷമാണ് വരവ്. ഇലക്‌ട്രോണിക് സാധനങ്ങള്‍ നനയാതെ സംരക്ഷിക്കുക ഏറെ ക്ലേശകരമാണ്. വളര്‍ത്തുമൃഗങ്ങളെ പരിപാലിക്കുന്നവര്‍ക്കാണ് ഏറ്റവും ദുരിതം. തൊഴുത്തുകളില്‍ വെള്ളം കയറുന്നവര്‍ കാലികളെ ഉയര്‍ന്ന പ്രദേശങ്ങളില്‍ ടാര്‍പോളിന്‍ കെട്ടി പാര്‍പ്പിക്കുകയാണ്. വെള്ളക്കെട്ട് രൂപംകൊണ്ടതോടെ ആടിനും പശുവിനും തീറ്റ ശേഖരിക്കുക ഏറെ ദുഷ്‌കരമായിരിക്കുന്നു. നായ, പൂച്ച, കോഴി എന്നിവയെ പരിപാലിക്കുന്നതും ഏറെ ദുരിതപൂര്‍ണം. ക്യാമ്പുകളില്‍ കഴിയുന്നതേറെയും കൂലിപ്പണിക്കാരായതിനാല്‍ പല കുടുംബങ്ങളും സാമ്പത്തിക ക്ലേശത്തിലാണ്. ക്യാമ്പുകളില്‍ പൊതുവായി തയാറാക്കുന്ന ഭക്ഷണമാണ് ഇവര്‍ക്ക് ഏക ആശ്രയം. കൊച്ചുകുട്ടികളും കിടപ്പുരോഗികളുമാണ് ക്യാമ്പുകളില്‍ ഏറ്റവും ദുരിതപ്പെടുന്നത്. ക്യാമ്പുകളില്‍നിന്ന് സ്‌കൂളുകളില്‍ പോകുന്ന കുട്ടികളുമുണ്ട്.

കര്‍ഷക രജിസ്‌ട്രേഷൻ: വെബ്സൈറ്റ് ഓപ്പണായി; സ്വന്തമായോ അക്ഷയ വഴിയോ ചെയ്യാം

കോട്ടയം: കര്‍ഷക രജിസ്‌ട്രേഷനായി ദിവസങ്ങള്‍ കൃഷി ഭവനുകളില്‍ കാത്തുനിന്നിട്ടും കഴിയാത്തവര്‍ക്ക് ആശ്വാസമായി. ഇനിമുതല്‍ കര്‍ഷക രജിസ്ട്രേഷന്‍ ഫാര്‍മര്‍ ലോഗിന്‍ വഴി സ്വന്തമായോ അക്ഷയ സെന്‍ററുകള്‍, കോമണ്‍ സര്‍വീസ് സെന്‍ററുകള്‍ എന്നിവ വഴിയോ ചെയ്യുന്നതിന് വെബ്സൈറ്റ് ഓപ്പണായി. ഇതുവരെ കര്‍ഷക രജിസ്‌ട്രേഷന്‍ ചെയ്യാന്‍ സാധിച്ചിരുന്നതു കൃഷിഭവനുകള്‍വഴി മാത്രമായിരുന്നു. അതിനാൽ രജിസ്‌ട്രേഷന്‍ നടത്തുന്നതിനു കൃഷിഭവനുകളില്‍ നീണ്ട ക്യൂവായിരുന്നു. ഇതോടെ കൃഷിഭവനുകളിലെ ദൈനംദിന ജോലികള്‍ നടക്കുന്നില്ലെന്ന് പരാതിയും വ്യാപകമായിരുന്നു. ദീര്‍ഘനേരം ക്യൂവില്‍ നിന്നശേഷം രജിസ്‌ട്രേഷന്‍ നടത്താന്‍ സാധിക്കാതെ പലര്‍ക്കും മടങ്ങേണ്ട അവസ്ഥയുമായിരുന്നു. ഒടിപി ലഭിക്കാന്‍ ബുദ്ധിമുട്ടുന്നതിനാല്‍ ഏറെനേരം കൃഷിഭവനുകളില്‍ കാത്തുനില്ക്കുന്നതും പതിവു കാഴ്ചയായിരുന്നു. സ്വന്തമായി രജിസ്റ്റര്‍ ചെയ്യാമെന്നതോടെ കൃഷിക്കാര്‍ക്ക് ഏറെ സൗകര്യമായി. കര്‍ഷകര്‍ക്ക് കേന്ദ്ര-സംസ്ഥാന സര്‍ക്കാരുകളുടെ സേവനങ്ങള്‍ ലഭ്യമാക്കാന്‍ രജിസ്ട്രേഷന്‍ നടത്തണം. കര്‍ഷകരുടെ വിവരങ്ങളും കൃഷിയുമായി ബന്ധപ്പെട്ട സേവനങ്ങളും ഏകീകരിക്കാനാണ് അഗ്രി സ്റ്റാക്ക് ഡിജിറ്റല്‍ പ്ലാറ്റ്‌ഫോം തയാറാക്കിയിരിക്കുന്നത്. പിഎം കിസാന്‍ സമ്മാന്‍നിധി പദ്ധതിപ്രകാരം അനുവദിക്കുന്ന തുകയുള്‍പ്പെടെയുള്ള ആനുകൂല്യങ്ങള്‍ ലഭ്യമാകണമെങ്കിലും രജിസ്ട്രേഷന്‍ വേണം. ഇതില്‍ത്തന്നെ പിഎം കിസാന്‍ പദ്ധതിയിലുള്‍പ്പെട്ടവര്‍ ആദ്യം രജിസ്ട്രേഷന്‍ പൂര്‍ത്തിയാക്കണമെന്ന നിര്‍ദേശമാണുള്ളത്. പ്രധാന്‍മന്ത്രി ഫസല്‍ ബീമാ യോജന, അഗ്രിക്കള്‍ച്ചര്‍ ഇന്‍ഷ്വറന്‍സ്, പ്രധാനമന്ത്രി കൃഷി സിഞ്ചായി യോജന തുടങ്ങി കൃഷിസംബന്ധമായ കേന്ദ്ര-സംസ്ഥാന സര്‍ക്കാര്‍ ആനുകൂല്യങ്ങള്‍ക്കും സേവനങ്ങള്‍ക്കുമെല്ലാം കര്‍ഷക രജിസ്ട്രേഷന്‍ ആവശ്യമാണ്. രജിസ്‌ട്രേഷന്‍ നടത്താനുള്ള അവസാന തീയതി ജൂലൈ 31 ആണ്. കര്‍ഷക രജിസ്‌ട്രേഷന്‍ എന്തിന്? കേന്ദ്ര സര്‍ക്കാരിന്‍റെ ഡിജിറ്റല്‍ അഗ്രികള്‍ച്ചര്‍ മിഷനു കീഴില്‍ നടപ്പിലാക്കുന്ന പദ്ധതിയാണ് അഗ്രിസ്റ്റാക് കര്‍ഷക രജിസ്‌ട്രേഷന്‍. കൃഷിക്കാര്‍ ഇത്തരത്തില്‍ രജിസ്റ്റര്‍ ചെയ്യുമ്പോള്‍ ആധാര്‍ കാര്‍ഡിനു സമാനമായ രീതിയില്‍ 21 അംഗ കര്‍ഷക ഐഡി ലഭിക്കും. ഈ ഐഡി കാര്‍ഡ് വഴി ഡിജിറ്റല്‍ സേവനങ്ങള്‍ കര്‍ഷകരിലേക്ക് എത്തിക്കാനാണു പദ്ധതിയിലൂടെ ലക്ഷ്യമിടുന്നത്. രജിസ്‌ട്രേഷന്‍ നടത്താന്‍... രജിസ്ട്രേഷനായി www.agritack.gov.in kerala എന്ന പോര്‍ട്ടല്‍ തുറക്കുക. പോര്‍ട്ടലില്‍ കര്‍ഷകന്‍ എന്ന ലിങ്കില്‍ പുതിയ അക്കൗണ്ട് തുറക്കണം. ഇതിനായി ആധാര്‍നമ്പരും ആധാറില്‍ ലിങ്ക് ചെയ്തിരിക്കുന്ന ഫോണ്‍നമ്പരും നല്‍കണം. ഈ സമയം നമ്മുടെ ആധാര്‍ ലിങ്ക് ചെയ്തിരിക്കുന്ന ഫോണിലേക്ക് ഒടിപി ലഭിക്കും. ഈ ഒടിപി നല്‍കി സബ്മിറ്റ് ചെയ്യണം. തുടര്‍ന്നു താഴെയായി ഫോണ്‍നമ്പര്‍ കൊടുക്കാനുള്ള സ്ഥലത്ത് ഫോണ്‍ നമ്പര്‍ ടൈപ്പ് ചെയ്ത് നല്കണം. അപ്പോഴും ഫോണിലേക്ക് ഒടിപി വരും. ഇതും നല്‍കണം. പിന്നീട് താഴെയായി പാസ് വേര്‍ഡ് സെറ്റ് ചെയ്യാനുള്ള ഓപ്ഷന്‍ വരും. അവിടെ പാസ്‌വേർഡ് സെറ്റ് ചെയ്യണം. തുടര്‍ന്ന് വീണ്ടും ലോഗിന്‍ പേജിലേക്ക് പോയി ഫാര്‍മര്‍ ഓപ്ഷന്‍ സെലക്ട് ചെയ്യണം. യൂസര്‍ ഐഡിയായി ഫോണ്‍ നമ്പര്‍ നല്കണം. പാസ്‌വേര്‍ഡ് നേരത്തേ സെറ്റ് ചെയ്യണം. തുടര്‍ന്ന് ക്യാപ്ച്ച കൊടുത്ത് ലോഗിന്‍ ചെയ്യാം. തുടര്‍ന്ന് താഴെ Register as farmer എന്നതില്‍ ക്ലിക്ക് ചെയ്യണം. അപ്പോള്‍ കാണിക്കുന്ന Mobile Number Change Confirmation എന്നതില്‍ No എന്ന് കൊടുക്കുക. തൊട്ട് താഴെ Land ownership details ല്‍ owner എന്ന് സെലക്ട് ചെയ്യണം. തുടര്‍ന്ന് വരുന്ന Occupation details ല്‍ Agriculture Land owing farmer എന്നത് രണ്ടും സെലക്ട് ചെയ്യണം. പിന്നീട് താഴെ Land details ല്‍ Fetch Land details ക്ലിക്ക് ചെയ്യണം. District, Sub district, Village എന്നിവ സെലക്ട് ചെയ്തു നല്‍കിയശേഷം കരം കെട്ടിയ രസീതില്‍ കാണിച്ചിരിക്കുന്ന ബ്ലോക്ക് നമ്പരും സര്‍വേ നമ്പറും നല്‍കി (സബ് സര്‍വേ നമ്പര്‍ കൊടുക്കണ്ട) സബ്മിറ്റ് ചെയ്യണം. ഈ സമയം കാണിക്കുന്ന Select owner identifier number എന്നതില്‍ കരം ഒടുക്കിയ രസീതില്‍ കാണിച്ചിരിക്കുന്ന ഭൂഉടമയുടെ പേരും വിവരങ്ങളും കാണിക്കും. അത് കൃത്യമാണോയെന്ന് പരിശോധിച്ചു സബ്മിറ്റ് ചെയ്യണം. തുടര്‍ന്ന് verifie all lands കൊടുക്കുക. ശേഷം Approving എന്നിടത്ത് Agriculture Revanue എന്നിടത്ത് Revanue എന്ന് സെലക്ട് ചെയ്യണം. ഇവിടെ ഒരു കാരണവശാലും Agriculture സെലക്ട് ചെയ്യരുത്. തുടര്‍ന്ന് proceed to e- Sign നല്കണം. അപ്പോള്‍ കാണുന്ന വിന്‍ഡോയില്‍ ചെക്ക്‌ബോക്‌സ് ടിക്ക് ചെയ്ത് താഴെ ആധാര്‍ നമ്പര്‍ കൊടുത്ത് Send otp കൊടുക്കുക. ഫോണിലേക്ക് വരുന്ന otp നല്‍കി സബ്മിറ്റ് കൊടുത്ത് രജിസ്‌ട്രേഷന്‍ പൂര്‍ത്തിയാകും.

ത്രിതല പഞ്ചായത്ത് തെരഞ്ഞെടുപ്പിന് ഇനി അഞ്ചു മാസം

കോട്ടയം: ത്രിതല പഞ്ചായത്ത് തെരഞ്ഞെടുപ്പിന് ഇനി അവേശഷിക്കുന്നത് അഞ്ചു മാസം. നവംബര്‍ 15നും ഡിസംബര്‍ 15നും ഇടയില്‍ തെരഞ്ഞെടുപ്പ് നടക്കുമെന്നാണ് സൂചന. പഞ്ചായത്തുകളിലെയും നഗരസഭകളിലെയും വാര്‍ഡ് വിഭജനം പൂര്‍ത്തിയായി. ഈ മാസാവസാനത്തോടെ ബ്ലോക്ക്, ജില്ലാ പഞ്ചായത്തുകളുടെ വിഭജനവും പൂര്‍ത്തിയാകും. തുടര്‍ന്ന് അന്തിമ വോട്ടര്‍പട്ടിക പ്രസിദ്ധീകരിക്കും. പുതിയ ഭരണസമിതി അധികാരമേല്‍ക്കുന്നതുവരെ നിലവിലെ ഭരണസമിതിക്ക് കാലാവധിയുണ്ടെങ്കിലും പഞ്ചായത്തുകളില്‍ അവസാനത്തെ ഗ്രാമസഭയും ഗുണഭോക്തൃലിസ്റ്റ് രൂപീകരണവും നടന്നുവരികയാണ്. തെരഞ്ഞെടുപ്പ് വിജ്ഞാപനം വരുന്നതുവരെ പ്രോജക്ടുകളും കരാറുകളും മറ്റും സമര്‍പ്പിക്കാമെങ്കിലും ത്രിതല പഞ്ചായത്ത് നഗരസഭകളില്‍ ഭരണത്തിന്‍റെ അവസാനവട്ടം തകൃതിയായി നടക്കുകയാണ്. ത്രിതല പഞ്ചായത്ത് തെരഞ്ഞെടുപ്പിനുള്ള മുന്നൊരുക്കങ്ങള്‍ മുന്നണികളും പാര്‍ട്ടികളും ആരംഭിച്ചു. എല്‍ഡിഎഫും യുഡിഎഫും ബിജെപിയും വിപുലമായ ഒരുക്കങ്ങളാണ് ബൂത്ത്തലം മുതല്‍ ആരംഭിച്ചിരിക്കുന്നത്. പഞ്ചായത്തുകളില്‍ ഭരണപക്ഷം വികസന നേട്ടങ്ങളുമായി ജനങ്ങള്‍ക്കിടയിലേക്ക് ഇറങ്ങിയപ്പോള്‍ നാട്ടിലെ ചെറിയ പ്രശ്‌നങ്ങളില്‍ വരെ ഇടപെട്ടാണു പ്രതിപക്ഷവും വിവിധ പാര്‍ട്ടികളും സമരങ്ങളും ജനകീയ ഇടപെടലും നടത്തുന്നത്. സ്ഥാനാര്‍ഥിത്വം പ്രതീക്ഷിച്ചിരിക്കുന്ന മൂന്നു മുന്നണികളിലെയും പ്രാദേശിക നേതാക്കളും സജീവമായി പൊതുരംഗത്തുണ്ട്. പഞ്ചായത്തുകളിലും നഗരസഭകളിലും വാര്‍ഡുകള്‍ കൂടി ജില്ലാ പഞ്ചായത്തില്‍ ഒരു ഡിവിഷന്‍ കൂടും കോട്ടയം: പുതുക്കിയ വാര്‍ഡുവിഭജനപ്രകാരം പഞ്ചായത്തുകളില്‍ വാര്‍ഡുകള്‍ കൂടി. നഗരസഭകളിലും വാര്‍ഡുകളുടെ എണ്ണം കൂടിയിട്ടുണ്ട്. എന്നാല്‍ പുതിയ പഞ്ചായത്തുകളോ ബ്ലോക്കുകളോ ഇല്ല. നഗരസഭകളും ഇല്ല. കാഞ്ഞിരപ്പള്ളി നഗരസഭയാകുമെന്ന് പ്രതീക്ഷിച്ചിരുന്നെങ്കിലും വിഭജനത്തില്‍ ഉണ്ടായിട്ടില്ല. ജില്ലാ പഞ്ചായത്തില്‍ പുനര്‍ വിഭജനപ്രകാരം ഒരു ഡിവിഷന്‍ വര്‍ധിക്കും. നിലവില്‍ ജനസംഖ്യ കൂടുതലുള്ള പൂഞ്ഞാര്‍, മുണ്ടക്കയം, എരുമേലി, കാഞ്ഞിരപ്പള്ളി ഡിവിഷനുകളുടെ മധ്യത്തില്‍ ഒരു ഡിവിഷന്‍ അധികമായി വരുമെന്നാണു കരുതുന്നത്. പാറത്തോട്, ആനക്കല്ല് എന്നീ പേരുകളിലൊന്നായിരിക്കും പുതിയ ഡിവിഷന്‍. ഇതല്ലെങ്കില്‍ വൈക്കം മുതല്‍ കാഞ്ഞിരപ്പള്ളി വരെ ബ്ലോക്ക് പഞ്ചായത്ത് ഡിവിഷനുകള്‍ പുനര്‍നിര്‍ണയിച്ച് പുതിയ ഡിവിഷന്‍ രൂപീകരിക്കും. ആദ്യ വിഭജനത്തിനാണ് സാധ്യതയേറെ. നിലവിലെ ബലാബലം കോട്ടയം: ജില്ലാ പഞ്ചായത്തിലും ബ്ലോക്ക് പഞ്ചായത്തില്‍ 11ല്‍ 10 ഇടത്തും 71 പഞ്ചായത്തുകളില്‍ 50 ഇടത്തും ഇടതു മുന്നണിയാണ് അധികാരത്തില്‍. നഗരഭരണത്തില്‍ യുഡിഎഫിനായിരുന്നു മുന്‍ തൂക്കം. പാലാ, ചങ്ങനാശേരി നഗരസഭകളൊഴികെ നാലു നഗരസഭകളും യുഡിഎഫാണ് ഭരിക്കുന്നത്. ചങ്ങനാശേരി നഗരസഭാ ഭരണം ഒരു വര്‍ഷം മുമ്പാണ് എല്‍ഡിഎഫ് നേടിയത്. പള്ളിക്കത്തോട്, മുത്തോലി പഞ്ചായത്തുകള്‍ ബിജെപിയാണ് ഭരിക്കുന്നത്. ബിജെപി കഴിഞ്ഞ തവണ കൂടുതല്‍ വാര്‍ഡുകള്‍ നേടിയിരുന്നു. ജനറല്‍ വാര്‍ഡുകള്‍ വനിതയാകും ജില്ലാ പഞ്ചായത്ത് പ്രസിഡന്‍റ് സ്ഥാനം ജനറലോ, സംവരണമോ ആകും കോട്ടയം: നിലവിലെ ജനറല്‍ വാര്‍ഡുകള്‍ വനിതാ വാര്‍ഡുകളായും വനിതാ വാര്‍ഡുകള്‍ ജനറൽ വാര്‍ഡുകളായും മാറും. ഇതോടെ നിലവിലെ മെംബര്‍മാരില്‍ വീണ്ടും മത്സരിക്കുന്നവര്‍ പുതിയ വാര്‍ഡുകള്‍ നോട്ടമിട്ട് പ്രവര്‍ത്തനങ്ങള്‍ തുടങ്ങി. ജില്ലാ പഞ്ചായത്ത് പ്രസിഡന്‍റ് സ്ഥാനം ഇത്തവണ ജനറലായിരിക്കും. ആറാമത്തെ ഭരണസമിതിയാണ് ജില്ലാ പഞ്ചായത്തില്‍ ഇനി എത്തുന്നത്. അതിനാല്‍ ഇത്തവണ ജനറല്‍ 80 ശതമാനവും സംവരണം 20 ശതമാനവും സാധ്യതയുണ്ട്. നഗരസഭകളില്‍ പാലാ നഗരസഭാ ചെയര്‍മാന്‍ സ്ഥാനം വനിതാ സംവരണമാകുമ്പോള്‍ മറ്റ് അഞ്ച് നഗരസഭകളിലും ജനറലായിരിക്കും ചെയര്‍മാന്‍ സ്ഥാനം. ഇതില്‍ ഏതെങ്കിലും ഒരു നഗരസഭയില്‍ ചെയര്‍മാന്‍ സ്ഥാനം സംവരണം ആകാനും സാധ്യതയുണ്ട്. ബ്ലോക്ക് പഞ്ചായത്തിലും നിലവിലെ ജനറല്‍ വനിതയായും വനിതാസംവരണം ജനറലായും മാറും. ഇവിടെയും ഒരു ബ്ലോക്ക് പ്രസിഡന്‍റ് സ്ഥാനം സംവരണം ആകും. തെരഞ്ഞെടുപ്പു വിജ്ഞാപനം വരുന്നതിനു മുമ്പ് നറുക്കെടുപ്പിലൂടെയാണ് ഇത് തീരുമാനിക്കുന്നത്. ജില്ലാ പഞ്ചായത്ത് ആകെ ഡിവിഷന്‍-22 എല്‍ഡിഎഫ്-14 യുഡിഎഫ്-ഏഴ് ബിജെപി-ഒന്ന് എല്‍ഡിഎഫ് (സിപിഎം-ആറ്, കേരള കോണ്‍-എം-അഞ്ച്, സിപിഐ-മൂന്ന്) യുഡിഎഫ് (കോണ്‍ഗ്രസ്-അഞ്ച്, കേരള കോണ്‍ഗ്രസ്-രണ്ട്) ബ്ലോക്ക് ആകെ-11 എല്‍ഡിഎഫ്-10 യുഡിഎഫ്-ഒന്ന് മുനിസിപ്പാലിറ്റി ആകെ-ആറ് എല്‍ഡിഎഫ്-രണ്ട് യുഡിഎഫ്-നാല് പഞ്ചായത്ത് ആകെ-71 എല്‍ഡിഎഫ്-50 യുഡിഎഫ്-19 ബിജെപി-രണ്ട്

കൗതുകമുണര്‍ത്തി കുട്ടി ബാന്‍ഡ് തെരേസിയന്‍ ബീറ്റ്‌സ്

ഭരണങ്ങാനം: കൊച്ചുകുട്ടികള്‍ ബാന്‍ഡ് യൂണിഫോമില്‍ അണിനിരന്നപ്പോള്‍ കണ്ടുനിന്നവര്‍ക്ക് കൗതുകം. ഡ്രം, ബ്യൂഗിള്‍ എന്നിവയൊക്കെ വളരെ മനോഹരമായി അടുക്കുംചിട്ടയുമോടെ ഹൃദ്യമായി അവതരിപ്പിച്ച കൊച്ചുകുട്ടികള്‍ ഏവരുടെയും കൈയടി നേടി. ഭരണങ്ങാനം സെന്‍റ് ലിറ്റില്‍ ത്രേസ്യാസ് എല്‍പി സ്‌കൂളില്‍ പുതുതായി ആരംഭിച്ച സ്‌കൂള്‍ ബാന്‍ഡ് തെരേസിയന്‍ ബീറ്റ്‌സാണ് ഹൃദ്യമായത്. ഏഴ് ആണ്‍കുട്ടികളും ഇരുപത് പെണ്‍കുട്ടികളും ബാന്‍ഡിലെ അംഗങ്ങളാണ്. ബാന്‍ഡ് മാസ്റ്റര്‍ ഹെലോയിസ് കെ. കുര്യാക്കോസിന്‍റെ നേതൃത്വത്തിലായിരുന്നു പരിശീലനം നേടിയത്. പ്രവേശനോത്സവത്തോടനുബന്ധിച്ച് നടത്തപ്പെട്ട തെരേസിയന്‍ ബീറ്റ്‌സ് പ്രദര്‍ശനം സ്‌കൂള്‍ മാനേജര്‍ ഫാ. സക്കറിയാസ് ആട്ടപ്പാട്ട് ഉദ്ഘാടനം ചെയ്തു.

പാലാ ടൗണ്‍ ബസ് സ്റ്റാന്‍ഡ് നവീകരണം ആരംഭിച്ചു

പാലാ: ടൗണ്‍ ബസ് സ്റ്റാന്‍ഡിന്‍റെ പുനരുദ്ധാരണ പ്രവൃത്തികള്‍ ആരംഭിച്ചു. ടാറിംഗ് തകർന്ന് കുഴിയായ ഭാഗങ്ങളില്‍ പേവിംഗ് ടൈല്‍ വിരിക്കുന്ന ജോലികളാണ് ഇപ്പോള്‍ നടത്തുന്നത്. സ്റ്റാന്‍ഡിൽ പൊന്‍കുന്നം ഭാഗത്തേക്കുള്ള ബസുകള്‍ നിര്‍ത്തുന്ന ഭാഗം പൂർണമായും തകര്‍ന്ന അവസ്ഥയിലായിരുന്നു. വലിയ കുഴികള്‍ ഇവിടെ രൂപപ്പെട്ടിരുന്നു. കനത്ത മഴയില്‍ കുഴികളില്‍ ചെളിവെള്ളം നിറയുന്നത് യാത്രക്കാര്‍ക്ക് ബുദ്ധിമുട്ട് സൃഷ്ടിച്ചിരുന്നു. ബസുകള്‍ കടന്നുപോകുമ്പോള്‍ കുഴികളില്‍നിന്ന് മിറ്റലുകള്‍ തെറിച്ച് യാത്രക്കാര്‍ക്ക് പരിക്കേറ്റ സംഭവവും ഉണ്ടായിട്ടുണ്ട്. ബസുകള്‍ സ്റ്റാന്‍ഡില്‍നിന്ന് പുറത്തേക്കിറങ്ങുന്ന ഭാഗത്തും പേവിംഗ് ടൈലുകള്‍ വിരിക്കുന്നുണ്ട്. യാത്രക്കാരുടെ നിരന്തര പരാതിയെത്തുടര്‍ന്ന് നഗരസഭാ ചെയര്‍മാന്‍ തോമസ് പീറ്ററും വൈസ്‌ ചെയര്‍പേഴ്‌സണ്‍ ബിജി ജോജോയും മുന്‍കൈയെടുത്തതോടെയാണ് ബസ് സ്റ്റാന്‍ഡ് നവീകരണം ആരംഭിച്ചത്. അഞ്ചര ലക്ഷത്തോളം രൂപയാണ് അനുവദിച്ചിരിക്കുന്നത്. മുനിസിപ്പല്‍ എൻജിനിയര്‍ക്കാണ് നിര്‍മാണച്ചുമതല.

ഇളപ്പുങ്കൽ-കാരക്കാട് നടപ്പാലം നിർമാണം ഇഴയുന്നു

ഈരാറ്റുപേട്ട: പ്രളയത്തിൽ തകർന്ന ഇളപ്പുങ്കൽ-കാരക്കാട് നടപ്പാലത്തിന്‍റെ നിർമാണം ഇഴയുന്നു. 2021ലെ പ്രളയത്തിലാണ് പാലം ഒലിച്ചുപോയത്. എംഎൽഎ ഫണ്ടിൽനിന്ന് 21 ലക്ഷം രൂപ അനുവദിച്ചിട്ടു രണ്ടു വർഷം കഴിഞ്ഞിട്ടും പാലംപണി എങ്ങുമെത്തിയില്ല. ഈ അധ്യയന വർഷമെങ്കിലും പാലം വരുമെന്ന് കരുതിയെങ്കിലും ജനങ്ങൾ വിഡ്ഢികളായി. മുപ്പതു വർഷം മുൻപ് ജില്ലാ പഞ്ചായത്ത് ഫണ്ട് ഉപയോഗിച്ചാണ് ഇവിടെ നടപ്പാലം നിർമിച്ചത്. ഇവിടം തലപ്പലം പഞ്ചായത്തിന്‍റെ ആസ്തിയിൽ ഉൾപ്പെട്ടതായിരുന്നു. പാലത്തിന്‍റെ മറുവശം ഈരാറ്റുപേട്ട നഗരസഭയിലും സ്വകാര്യ വ്യക്തിയുടെ ഭൂമിയിലുമായിരുന്നു അവസാനിച്ചിരുന്നത്. ഇതോടെ നിയമപ്രശ്നങ്ങൾ തുടങ്ങി പാലംപണി വൈകുകയായിരുന്നു. പഴയ പാലത്തിന്‍റെ തൂണുകളിൽ ആവശ്യമായ ബലപ്പെടുത്തൽ വരുത്തി ഇരുമ്പ് ഗർഡറുകൾ ഉപയോഗിച്ചാണ് നടപ്പാലം പണിയുന്നത്. ഇവ നിർമിച്ച് കൊണ്ടുവന്ന് തുണുകളിൽ ഘടിപ്പിക്കുകയാണ് ചെയ്യുന്നത്. ഉടൻ തന്നെ പാലം നിർമാണം പൂർത്തീകരിക്കുമെന്ന് സെബാസ്റ്റ്യൻ കുളത്തുങ്കൽ എംഎൽഎ പറഞ്ഞു.

ലഹരിവ്യാപനം തടയുന്നതിൽ തദ്ദേശ സ്ഥാപനങ്ങള്‍ക്ക് നിര്‍ണായക പങ്ക്: ജോസ് കെ. മാണി എംപി

പൂവരണി: ജനങ്ങളുടെ ആരോഗ്യ സംരക്ഷണത്തിനും ലഹരിവസ്തുക്കളുടെ വ്യാപനം തടയുന്നതിനും തദ്ദേശ സ്വയംഭരണ സ്ഥാപനങ്ങള്‍ക്ക് നിര്‍ണായക പങ്കാണു വഹിക്കാനുള്ളതെന്ന് ജോസ് കെ. മാണി എംപി. ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍ അനുവദിച്ച ഫണ്ട് ഉപയോഗിച്ച് പൂവരണി പള്ളിക്ക് സമീപം റോഡ് സൈഡില്‍ നിര്‍മിച്ച ഓപ്പണ്‍ ജിം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മദ്യ-മയക്കുമരുന്ന് ലഹരിയില്‍നിന്നു യുവജനങ്ങളെ അകറ്റുന്നതിന് ഇതുപോലുള്ള ആരോഗ്യ സംരക്ഷണകേന്ദ്രങ്ങള്‍ ഉപകരിക്കുമെന്നും അദ്ദേഹം പറഞ്ഞു. ‌പഞ്ചായത്ത് പ്രസിഡന്‍റ് സോജന്‍ തൊടുക അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍, ബ്ലോക്ക് പഞ്ചായത്ത് പ്രസിഡന്‍റ് ജെസി ജോര്‍ജ്, ലിന്‍സി മാര്‍ട്ടിന്‍, സാജോ പൂവത്താനി, ജോയി കുഴിപ്പാല, ബിജു തുണ്ടിയില്‍, ബിജു കുമ്പളന്താനം, ബിന്ദു ശശികുമാര്‍, ബിനോയി നരിതൂക്കില്‍, ജോസ് പാറേക്കാട്ട്, കെ.പി. ജോസഫ്, മാത്യു നരിതൂക്കില്‍, അനില്‍ മത്തായി, ശ്രീലത ഹരിദാസ്, ജിനു വാട്ടപ്പള്ളി, അജേഷ് പൊയ്യീപ്ലാക്കല്‍, ജോര്‍ജുകുട്ടി മാളിയേക്കല്‍, ടോമി പുല്ലാട്ട്, സിബി ഈറ്റത്തോട്ട്, പി.ടി. ജോസഫ് പന്തലാനി, തോമസ് നീലിയറ തുടങ്ങിയവര്‍ പ്രസംഗിച്ചു.

രാമപുരം കോളജില്‍ ബികോമിനൊപ്പം എസിസിഎയും

രാമപുരം: മാര്‍ ആഗസ്തീനോസ് കോളജും ബംഗളൂരു ആസ്ഥാനമായി പ്രവര്‍ത്തിക്കുന്ന ഐഎസ്ഡിസിയും ചേര്‍ന്ന് എസിസിഎ കോഴ്‌സ് ആരംഭിക്കുന്നതിനുള്ള ധാരണാപത്രം ഒപ്പുവച്ചു. ഇന്‍റഗ്രേറ്റഡ് ബികോം പ്രോഗ്രാമിൽ‍ എസിസിഎയും പഠിക്കാം. കോളജ് മാനേജര്‍ ഫാ. ബെര്‍ക്കുമാന്‍സ് കുന്നുംപുറം, പ്രിന്‍സിപ്പല്‍ ഡോ. റെജി വര്‍ഗീസ് മേക്കാടന്‍ എന്നിവര്‍ക്ക് ഐഎസ്ഡിസി റീജണല്‍ മാനേജര്‍ അര്‍ജുന്‍ രാജ് കോഴ്‌സ് സംബന്ധിച്ച ധാരണാപത്രം കൈമാറി. വൈസ് പ്രിന്‍സിപ്പല്‍മാരായ ഫാ. ജോസഫ് ആലഞ്ചേരില്‍, സിജി ജേക്കബ്, അഡ്മിനിസ്ട്രേറ്റീവ് ഓഫീസര്‍മാരായ രാജീവ് ജോസഫ്, പ്രകാശ് ജോസഫ്, ഡിപ്പാര്‍ട്ട്മെന്‍റ് മേധാവി ജോസ് ജോസഫ്, അധ്യാപകര്‍ തുടങ്ങിയവര്‍ പങ്കെടുത്തു.

സെന്‍റ് ജോസഫ്‌സ് എന്‍ജി. കോളജിൽ വിജയദിനാഘോഷം

പാലാ: സെന്‍റ് ജോസഫ്‌സ് എന്‍ജിനിയറിംഗ് കോളജിലെ വിജയദിനാഘോഷം മുന്‍ ഡിജിപി ഋഷിരാജ് സിംഗ് ഉദ്ഘാടനം ചെയ്തു. കോളജ് രക്ഷാധികാരി മാര്‍ ജോസഫ് കല്ലറങ്ങാട്ട് സന്നിഹിതനായിരുന്നു. അക്കാദമിക മികവ് പുലര്‍ത്തിയവരെയും മികച്ച നേട്ടങ്ങള്‍ കൈവരിച്ച വിദ്യാര്‍ഥികളെയും ഈ വര്‍ഷം ഡോക്‌ടറേറ്റ് നേടിയ കോളജിലെ അധ്യാപകരെയും ആദരിച്ചു. കോളജ് ചെയര്‍മാന്‍ മോണ്‍. ജോസഫ് തടത്തില്‍, കോളജ് ഡയറക്ടര്‍ റവ.ഡോ. ജയിംസ് ജോണ്‍ മംഗലത്ത്, പ്രിന്‍സിപ്പല്‍ ഡോ. വി.പി. ദേവസ്യ എന്നിവര്‍ പ്രസംഗിച്ചു.

ആരും അറിയാതെ കിടന്നിരുന്ന വെള്ളച്ചാട്ടം സോഷ്യല്‍ മീഡിയയിലൂടെ തരംഗമായി

പാലാ: നഗരത്തിന്‍റെ തിരക്കുകള്‍ക്കിടയില്‍നിന്നു മാറി ഗ്രാമത്തില്‍ ഒരു വെള്ളച്ചാട്ടം. മഴക്കാലമായതോടെ വെള്ളച്ചാട്ടത്തിനു ദൃശ്യഭംഗിയും സൗന്ദര്യവും കൂടിയിരിക്കുകയാണ്. പതിവു വെള്ളച്ചാട്ടങ്ങളും കാഴ്ചകളും കണ്ടുമടുത്ത ആളുകള്‍ മണ്‍സൂണ്‍ ഡെസ്റ്റിനേഷനായി പാലാ ടൗണിനു സമീപമുള്ള കവീക്കുന്ന് മീനാറ വെള്ളച്ചാട്ടത്തെ തെരഞ്ഞെടുത്തിരിക്കുകയാണ്. ഇതുവരെ ആരും അറിയാതെ കിടന്നിരുന്ന ഈ വെള്ളച്ചാട്ടം സമീപകാലത്താണ് സോഷ്യല്‍ മീഡിയയില്‍ തരംഗമായത്. മഴക്കാലമായതോടെ വെള്ളച്ചാട്ടവും ഇതിനു മുകളിലുള്ള ചെക്ക്ഡാമും സന്ദര്‍ശിക്കാന്‍ ദൂരസ്ഥലങ്ങളില്‍നിന്നുപോലും സന്ദര്‍ശകരെത്തുന്നുണ്ട്. ചൂണ്ടച്ചേരിയില്‍നിന്ന് ആരംഭിച്ച് രണ്ട് കിലോമീറ്റര്‍ അകലെ മീനച്ചിലാറ്റില്‍ പതിക്കുന്നതാണ് ഇവിടത്തെ നീരൊഴുക്ക്. മീനച്ചിലാറിന്‍റെ കൈവഴിയായും അറിയപ്പെടുന്നു. സന്ദര്‍ശകര്‍ക്ക് മനസില്‍ ഓര്‍ത്തിരിക്കാന്‍ പറ്റിയ ഒരിടമാണ് മീനാറ വെള്ളച്ചാട്ടം. എല്ലാ ടെന്‍ഷനുകളും മറന്ന് ഇത്തിരിനേരം ആസ്വദിക്കാനും സംസാരിച്ചിരിക്കാനും പറ്റിയ ഒരിടമാണിത്. കണ്ണിനും മനസിനും ഒരുപോലെ കുളിര്‍മ നല്‍കുന്നതാണ് ഈ വെള്ളച്ചാട്ടം. കാടിനു സമാനമായ പ്രകൃതി. ചെറിയ കല്ലിടുക്കുകളില്‍കൂടി നിറഞ്ഞുപതഞ്ഞ് ഒഴുകുകയാണ് വെള്ളം. വെള്ളത്തിലിറങ്ങിയാല്‍ അപകടസാധ്യതയുള്ളതിനാല്‍ ആരും ഇറങ്ങാതെ വെള്ളച്ചാട്ടം ആസ്വദിച്ചാല്‍ മതിയെന്നാണ് നാട്ടുകാര്‍ പറയുന്നത്. വെള്ളച്ചാട്ടം കാണാനെത്തുന്നവര്‍ പ്ലാസ്റ്റിക് കുപ്പി ഉള്‍പ്പെടെയുള്ള പാഴ്‌വസ്തുക്കള്‍ ഇവിടെ നിക്ഷേപിച്ചിട്ട് പോകരുതെന്നും നാട്ടുകാര്‍ അഭ്യര്‍ഥിക്കുന്നു. നാട്ടുകാര്‍ തന്നെയാണ് സന്ദര്‍ശകര്‍ക്ക് നിര്‍ദേശവും നല്‍കുന്നത്. നഗരസഭ ഇടപെട്ട് സുരക്ഷാക്രമീകരണങ്ങള്‍ നടത്തി വിനോദസഞ്ചാരകേന്ദ്രമാക്കി മാറ്റാനുള്ള നടപടികള്‍ സ്വീകരിക്കണമെന്നും സമീപവാസികള്‍ ആവശ്യപ്പെടുന്നു. പാലാ മുനിസിപ്പാലിറ്റിയിലെ എട്ടാം വാര്‍ഡിലാണ് ഈ വെള്ളച്ചാട്ടം സ്ഥിതി ചെയ്യുന്നത്. അപ്പുറം ഭരണങ്ങാനം പഞ്ചായത്താണ്. പാലാ-തൊടുപുഴ റോഡിൽ പാലാ കാര്‍മല്‍ ആശുപത്രിക്ക് സമീപമുള്ള റോഡില്‍ കൂടിയും പാലാ-ഈരാറ്റുപേട്ട റോഡില്‍ കൊച്ചിടപ്പാടിയില്‍നിന്നു കവീക്കുന്നിലേക്ക് പോകുന്ന റൂട്ടിലും സഞ്ചരിച്ചാല്‍ വെള്ളച്ചാട്ടത്തിലേക്ക് എത്താം. സമീപത്തായി തീര്‍ഥാടനകേന്ദ്രമായ പാമ്പൂരാംപാറ കുരിശുമലയും സ്ഥിതി ചെയ്യുന്നുണ്ട്.

കോഴിക്കൂട്ടിൽ കയറിയ പെരുമ്പാമ്പിനെ പിടികൂടി

മുക്കൂട്ടുതറ: കോഴിക്കൂട്ടിൽ കയറിയ ഭീമൻ പെരുമ്പാമ്പിനെ പിടികൂടി. മുക്കൂട്ടുതറ കൊല്ലമുള കാവുങ്കൽ ഉബൈദിന്‍റെ കോഴിക്കൂട്ടിൽ കയറിയ പെരുമ്പാമ്പിനെയാണ് വനംവകുപ്പിന്‍റെ ആർആർടി ടീം പിടിച്ചത്. ഇന്നലെ രാവിലെ 11ഓടെ 12 അടി നീളമുള്ള പെരുമ്പാമ്പാണ് കോഴിക്കൂട്ടിൽ കയറിയത്. കോഴികളുടെ അസാധാരണമായ ശബ്ദം കേട്ട് വീട്ടുകാർ ശ്രദ്ധിച്ചപ്പോഴാണ് പെരുമ്പാമ്പിനെ കണ്ടത്. തുടർന്ന് വനംവകുപ്പിൽ വിവരം അറിയിച്ചതിനെത്തുടർന്ന് ആർആർടി ടീം സ്ഥലത്തെത്തി പെരുന്പാന്പിനെ പിടികൂടി.

നിയന്ത്രണംവിട്ട മിനിലോറി നടപ്പാതയിലേക്ക് ഇടിച്ചുകയറി

പൊൻകുന്നം: പുനലൂർ-പൊൻകുന്നം സംസ്ഥാനപാതയിൽ ചിറക്കടവ് എസ്ആർവി സ്‌കൂളിന് സമീപം നിയന്ത്രണംവിട്ട മിനിലോറി നടപ്പാതയിലേക്ക് ഇടിച്ചുകയറി. ഇന്നലെ രാവിലെ 8.30ഓടെയായിരുന്നു അപകടം. ഡ്രൈവർ മൂവാറ്റുപുഴ മടവൂർ സ്വദേശി പുളിച്ചാലിൽ പരീത് തലനാരിഴയ്ക്ക് രക്ഷപ്പെട്ടു. ക്യാബിനിലേക്ക് തുളഞ്ഞുകയറിയ കമ്പി ഇദ്ദേഹത്തിന്‍റെ വസ്ത്രത്തിലും സീറ്റിലുമായിട്ടാണ് കൊണ്ടു കയറിയതെന്ന് ദൃക്‌സാക്ഷികൾ പറഞ്ഞു. ലോഡ് കയറ്റി വന്ന ലോറി പത്തനംതിട്ടയ്ക്കു പോകുകയായിരുന്നു. ഇതിനോട് ചേർന്നുള്ള വളവിൽ നിരന്തരം അപകടങ്ങളുണ്ടാകുന്നതായി പ്രദേശവാസികൾ പറഞ്ഞു. അടുത്തിടെ മറ്റൊരു വാഹനവും ഫുട്പാത്തിലെ കൈവരിയിൽ ഇടിച്ച് അപകടമുണ്ടായിരുന്നു.

പ്രേഷിതപ്രവര്‍ത്തനത്തിന് ഊര്‍ജം തീക്ഷ്ണമായ പ്രാര്‍ഥന: മാര്‍ പെരുന്തോട്ടം

ചങ്ങനാശേരി: തീക്ഷ്ണമായ പ്രാര്‍ഥനയിലൂടെയാണ് പ്രേഷിതപ്രവര്‍ത്തനത്തിനുള്ള ഊര്‍ജം ആര്‍ജിക്കുന്നതെന്ന് ആര്‍ച്ച്ബിഷപ് മാര്‍ ജോസഫ് പെരുന്തോട്ടം. അതിരൂപത ചെറുപുഷ്പ മിഷന്‍ലീഗ് 2025-26 പ്രവര്‍ത്തനവര്‍ഷം എസ്ബി കോളജ് കാവുകാട്ട് ഹാളില്‍ ഉദ്ഘാടനം ചെയ്തു പ്രസംഗിക്കുകയായിരുന്നു ആര്‍ച്ച്ബിഷപ്. അതിരൂപത പ്രസിഡന്‍റ് ഫെബിന്‍ അഗസ്റ്റിന്‍ മാത്യു അധ്യക്ഷത വഹിച്ചു. അതിരൂപതാ വികാരി ജനറാള്‍ മോണ്‍. സ്‌കറിയ കന്യാകോണില്‍ മാര്‍ഗരേഖയും പഠനഗ്രന്ഥ പ്രകാശനവും നടത്തി. ചെറുപുഷ്പ മിഷന്‍ ലീഗ് അതിരൂപതാ ഡയറക്ടര്‍ റവ.ഡോ. വര്‍ഗീസ് പുത്തന്‍പുരയ്ക്കല്‍, അസിസ്റ്റന്‍റ് ഡയറക്ടര്‍ ഫാ. സെബാസ്റ്റ്യന്‍ മാമ്പ്ര, ഓര്‍ഗനൈസിംഗ് പ്രസിഡന്‍റ് ടിന്‍റോ സെബാസ്റ്റ്യന്‍, ജോയിന്‍റ് ഡയറക്ടര്‍ സിസ്റ്റര്‍ ജെസ്‌ലിന്‍ ജെഎസ്, ജനറല്‍ സെക്രട്ടറി എബിന്‍ ജോസഫ്, ഓഫീസ് സെക്രട്ടറി സിസ്റ്റര്‍ മേരി റോസ്, ജോണ്‍സണ്‍ കാഞ്ഞിരക്കാട്, ലൂ ക്ക് അലക്‌സ്, ആനിമേറ്റര്‍ ബോബി തോമസ്, റോഹന്‍ ബെന്നി, ജോയല്‍ ജോണ്‍, സാലിച്ചന്‍ തുമ്പേക്കളം എന്നിവര്‍ പ്രസംഗിച്ചു. കഴിഞ്ഞ പ്രവര്‍ത്തനവര്‍ഷ കാലയളവില്‍ നടത്തപ്പെട്ട വിവിധ മത്സരങ്ങളില്‍ മികച്ച പ്രകടനം കാഴ്ചവച്ച കുഞ്ഞുമിഷനറിമാരെ സമ്മാനങ്ങള്‍ നല്കി ആദരിച്ചു. കുഞ്ഞേട്ടന്‍ പുരസ്‌കാര ജേതാവ് ജോണ്‍സണ്‍ കാഞ്ഞിരങ്ങാട്ടിനെ ആദരിച്ചു. തുടര്‍ന്ന് നടന്ന സെമിനാർ‍ റവ.ഡോ. മാണി പുതിയിടം നയിച്ചു.

എ പ്ലസ് ജേതാക്കൾക്ക് അനുമോദനം

കപ്പാട്: കത്തോലിക്ക കോൺഗ്രസ് കപ്പാട് യൂണിറ്റിന്‍റെ ആഭിമുഖ്യത്തിൽ എസ്എസ്എൽസി, പ്ലസ് ടു പരീക്ഷകളിൽ ഫുൾ എ പ്ലസ് നേടിയ കുട്ടികളെ അനുമോദിച്ചു. കപ്പാട് മാർ സ്ലീവാ പള്ളി വികാരി ഫാ. ആന്‍റണി മണിയങ്ങാട്ട് യോഗം ഉദ്ഘാടനം ചെയ്തു. യൂണിറ്റ് പ്രസിഡന്‍റ് ജോൺസൺ പന്തപ്ലാക്കൽ അധ്യക്ഷത വഹിച്ചു. രൂപത ഡയറക്ടറായി ചുമതലയേറ്റ ഫാ. ജസ്റ്റിൻ മതിയത്തിന് യോഗത്തിൽ സ്വീകരണം നൽകി. പരീക്ഷയിൽ ഉന്നത വിജയം നേടിയ ഡാനി ടോമി കടപ്ലാക്കൽ, സിന്‍റാ റോസ് ജോജോ തെക്കുംചേരിക്കുന്നേൽ എന്നിവരെ ഫാ. ആന്‍റണി മണിയങ്ങാട്ട്, ഫാ. ജസ്റ്റിൻ മതിയത്ത് എന്നിവർ ചേർന്ന് മെമന്‍റോ നൽകി ആദരിച്ചു. കത്തോലിക്ക കോൺഗ്രസ് ഗ്ലോബൽ വൈസ് പ്രസിഡന്‍റ് ജോമി കൊച്ചുപറമ്പിൽ, അസി. വികാരി ഫാ. മാത്യു നിരപ്പേൽ, രൂപത ജനറൽ സെക്രട്ടറി ജോസഫ് പണ്ടാരക്കളം, ട്രഷറർ ജോജോ തെക്കുംചേരികുന്നേൽ, യൂണിറ്റ് സെക്രട്ടറി സാബു മാത്യു മുടപ്പാലയിൽ, സജി ഡൊമിനിക് പ്ലാത്തോട്ടം,സാബു വട്ടോത്ത്, ഷാജി പുതിയാപറമ്പിൽ, സ്വപ്‌നിൽ കല്ലൂകുളങ്ങര എന്നിവർ പ്രസംഗിച്ചു. മുണ്ടക്കയം: കോൺഗ്രസ്‌ കരിനിലം വാർഡ് കമ്മിറ്റിയുടെ നേതൃത്വത്തിൽ എസ്എസ്എൽസി, പ്ലസ് ടു പരീക്ഷയിൽ ഉന്നത വിജയം നേടിയ കുട്ടികളെ ആദരിച്ചു. എരുമേലി സെന്‍റ് തോമസ് ഹയർ സെക്കൻഡറി സ്കൂൾ പ്രിൻസിപ്പൽ റോയ് സ്‌കറിയ കുമ്പളത്താനം യോഗം ഉദ്ഘാടനം ചെയ്തു. വാർഡ് പ്രസിഡന്‍റ് എൻ. ബാലൻ ആലുംമുട്ടിൽകിഴക്കേതിൽ അധ്യക്ഷത വഹിച്ചു. കോൺഗ്രസ് ബ്ലോക്ക്‌ പ്രസിഡന്‍റ് ബിനു മറ്റക്കര, മണ്ഡലം പ്രസിഡന്‍റ് കെ.എസ്. രാജു, ഡിസിസി ജനറൽ സെക്രട്ടറി പ്രകാശ് പുളിക്കൽ, റോയി കപ്പലുമാക്കൽ, വാർഡ് മെംബർമാരായ ബെന്നി ചേറ്റുകുഴി, ജാൻസി തൊട്ടിപ്പാട്, ബി. ജയചന്ദ്രൻ, വാർഡ് സെക്രട്ടറി ബാബു നെല്ലിക്കുന്നോരത്ത്‌, സിബിച്ചൻ കാരക്കാട്ട്, റെമിൻ രാജൻ തുടങ്ങിയവർ പ്രസംഗിച്ചു.

കാൽനടയാത്രക്കാർക്ക് ഭീഷണിയായി മരത്തടികൾ

വാഴൂർ: ദേശീയപാത 183ൽ ഇളംപള്ളി കവലയിൽ കൂട്ടിയിട്ടിരിക്കുന്ന മരത്തടികൾ കാൽനടയാത്രക്കാർ ദുരിതമാകുന്നു. ഇളംപള്ളി കവലയിലെ ബസ് കാത്തിരിപ്പുകേന്ദ്രത്തിന് സമീപം ഒരു മാസം മുമ്പ് പുറമ്പോക്കിലെ പ്ലാവ് റോഡിലേക്കു വീണപ്പോൾ അഗ്നിരക്ഷാസേന മുറിച്ചുമാറ്റിയ മരങ്ങളുടെ അവശിഷ്ടങ്ങളും ചില്ലകളുൾപ്പെടെയുള്ള ഭാഗങ്ങളാണ് കൂട്ടിയിട്ടിരിക്കുന്നത്. ഇത് ഇപ്പോൾ വാഹനങ്ങൾക്കും കാൽനടയാത്രക്കാർക്കും അപകട ഭീഷണിയായിരിക്കുകയാണ്. തടികൾ കിടക്കുന്നതിനാൽ റോഡിലൂടെ നടക്കേണ്ട സ്ഥിതിയിലാണ് കാൽനടയാത്രക്കാർ. ഇളംപള്ളി കവലയിലെ വളവ് തിരിഞ്ഞ് വേഗത്തിലെത്തുന്ന വാഹനങ്ങൾ കാൽനടയാത്രക്കാരെ ഇടിച്ച് അപകടം ഉണ്ടാകാനുള്ള സാധ്യതയും ഏറെയാണ്. കാൽനടയാത്രക്കാർക്ക് ഭീഷണിയായി മാറിയിരിക്കുന്ന മരത്തടികൾ എത്രയും വേഗം നീക്കം ചെയ്യണമെന്ന ആവശ്യം ശക്തമായിരിക്കുകയാണ്.

സാപ്സ് എക്സലൻസിയ അവാർഡ് ഡേ

കാഞ്ഞിരപ്പള്ളി: സിബിഎസ്ഇ പത്ത്, പന്ത്രണ്ട് ക്ലാസുകളിൽ ഉന്നത വിജയം കരസ്ഥമാക്കിയ വിദ്യാർഥികളെ അനുമോദിക്കുന്നതിനായി ആനക്കല്ല് സെന്‍റ് ആന്‍റണീസ് പബ്ലിക് സ്കൂളിൽ സാപ്സ് എക്സലൻസിയ അവാർഡ് ഡേ നാളെ രാവിലെ 10.30ന് സ്കൂൾ ഓഡിറ്റോറിയത്തിൽ നടക്കും. കർദിനാൾ മാർ ജോർജ് ആലഞ്ചേരി സമ്മേളനം ഉദ്ഘാടനം ചെയ്യും. സ്കൂൾ മാനേജർ ഫാ. ജോസഫ് പൊങ്ങന്താനം അധ്യക്ഷത വഹിക്കും. പ്രിൻസിപ്പൽ ഫാ. ആന്‍റണി തോക്കനാട്ട്, പിടിഎ വൈസ് പ്രസിഡന്‍റ് ശോഭ വർക്കി, അലുമ്നി അസോസിയേഷൻ പ്രസിഡന്‍റ് ഡോ. ജൂബിലന്‍റ് കിഴക്കേതോട്ടം, ബ്രില്യന്‍റ് സ്റ്റഡി സെന്‍റർ ഡയറക്ടർ സ്റ്റീഫൻ ജോസഫ്, സ്റ്റാഫ് സെക്രട്ടറി തനുജ മാത്യു, വിദ്യാർഥി പ്രതിനിധികളായ നകുൽ സി. അനിൽ, അസ്റ ഫാത്തിമ, നയന കൃഷ്ണകുമാർ, കെവിൻ ഷിജോ എന്നിവർ പ്രസംഗിക്കും. സമ്മേളനത്തിൽ ഉന്നത വിജയം നേടിയ വിദ്യാർഥികൾക്ക് കാഷ് അവാർഡും മെമന്‍റോയും നൽകും.

ചോര്‍ന്നൊലിക്കുന്ന പമ്പ് ഹൗസ് ടാർപോളിൻകൊണ്ടു മൂടി

വാഴൂര്‍: ചോര്‍ന്നൊലിക്കുന്ന ഇളംപള്ളി കവലയിലെ പമ്പ് ഹൗസ് മഴക്കാലമായതോടെ വെള്ളം അകത്തു വീഴാതിരിക്കുവാന്‍ ടാര്‍പോളിന്‍ കൊണ്ട് മൂടിയ നിലയില്‍. കെട്ടിടം തകര്‍ന്നു വീഴുമെന്ന പേടിയില്‍ പമ്പ് ഓപ്പറേറ്റര്‍ മോട്ടോര്‍ ഓണാക്കിയതിനുശേഷം കെട്ടിടത്തിനു പുറത്തിറങ്ങി നില്‍ക്കുകയാണിപ്പോൾ. ജലവിതരണ വകുപ്പിന്‍റെ നെടുംകുന്നം സെക്‌ഷന് കീഴിലാണ് പതിനേഴാംമൈല്‍ ഇളംപള്ളി തോടിന് സമീപത്തെ പമ്പ് ഹൗസ്. ഇവിടെനിന്നാണ് വാഴൂര്‍ പഞ്ചായത്തിലെ വിവിധ ഭാഗങ്ങളിലേക്ക് കുടിവെള്ളം വിതരണം ചെയ്യുന്നത്. അകത്ത് ജീവനക്കാരുള്ള സമയത്ത് കെട്ടിടം നിലംപൊത്തിയാല്‍ വലിയ അപകടമുറപ്പാണ്. പമ്പ് ഹൗസിന്‍റെ ശോച്യാവസ്ഥ പരിഹരിക്കാന്‍ അധികൃതര്‍ നടപടികള്‍ സ്വീകരിക്കുന്നില്ലെന്നാണ് ഉയരുന്ന പ്രധാന ആക്ഷേപം. എത്രയും വേഗം പമ്പ് ഹൗസിന് പുതിയ കെട്ടിടം നിര്‍മിക്കണമെന്നാണ് നാട്ടുകാരുടെ ആവശ്യം.

പാറത്തോട്-പിണ്ണാക്കനാട് റോഡില്‍ ഗർത്തം

കാഞ്ഞിരപ്പള്ളി: പാറത്തോട്-പിണ്ണാക്കനാട് റോഡില്‍ വലിയ ഗർത്തം രൂപപ്പെട്ടു. പാറത്തോട് മലനാടിനു സമീപം തോടിന് കുറുകെയുള്ള പാലത്തോട് ചേര്‍ന്നാണ് കുഴി രൂപപ്പെട്ടത്. ഇന്നലെ പുലര്‍ച്ചെയാണ് റോഡില്‍ കുഴി രൂപപ്പെട്ട നിലയില്‍ കണ്ടെത്തിയത്. കുഴിയുടെ അടിഭാഗത്തെ മണ്ണ് പൂര്‍ണമായും നീങ്ങിയ നിലയിലായിരുന്നു. ഇരു വശങ്ങളിലേക്കും എട്ടടിയോളം ദൂരത്തില്‍ കമ്പ് ഇറങ്ങിപ്പോകുന്ന ഗര്‍ത്തമാണ് രൂപപ്പെട്ടത്. മഴ തുടരുന്നതോടെ ഭാരവാഹനങ്ങളും ബസ് സര്‍വീസുമുള്ള ഈ റോഡില്‍ അപകടസാഹചര്യം കണക്കിലെടുത്ത് പൊതുമരാമത്ത് റോഡ് വിഭാഗം അധികൃതരെത്തി താത്കാലികമായി റോഡിലൂടെ ഗതാഗതം നിരോധിച്ചിരുന്നു. പിന്നീട് അറ്റകുറ്റപ്പണികള്‍ നടത്തി ഇന്നലെ വൈകുന്നേരത്തോടെയാണു ഗതാഗതം പുനഃസ്ഥാപിച്ചത്. കുഴി രൂപപ്പെട്ട ഭാഗത്തെ ടാറിംഗും മണ്ണും നീക്കിയ ശേഷം മെറ്റലും മക്കുമിട്ട് നിരത്തിയാണ് കുഴിയടച്ചത്.

മോദിയുടെ ഖജാന്‍ജിയായി അദാനിയെ മാറ്റിയെടുത്തു: ആര്‍. രാജേന്ദ്രന്‍

ചങ്ങനാശേരി: മണ്‍മറഞ്ഞ ഇന്ത്യന്‍ നേതാക്കളെ സംഘപരിവാറിന്‍റെ പട്ടികയില്‍പ്പെടുത്താന്‍ കേന്ദ്ര ഭരണാധികാരികള്‍ ശ്രമിക്കുന്നതായും പ്രധാനമന്ത്രി മോദിയുടെ ഖജാന്‍ജിയായി അദാനിയെ മാറ്റിയെടുത്തിരിക്കുന്നതായും സിപിഐ സംസ്ഥാന എക്‌സിക്യുട്ടീവ് അംഗം ആര്‍. രാജേന്ദ്രന്‍. സിപിഐ ചങ്ങനാശേരി മണ്ഡലം സമ്മേളനത്തിന്‍റെ സമാപനത്തില്‍ പ്രസംഗിക്കുകയായിരുന്നു അദ്ദേഹം. മധ്യേഷ്യയിലുണ്ടായിരിക്കുന്ന യുദ്ധാന്തരീക്ഷം ഇന്ത്യക്ക് ആശങ്കാജനകമാണെന്ന് അദ്ദേഹം കൂട്ടിച്ചേര്‍ത്തു. ജില്ലാ സെക്രട്ടറി അഡ്വ. വി.ബി. ബിനു അധ്യക്ഷത വഹിച്ചു. ജില്ലാ എക്‌സിക്യൂട്ടീവ് അംഗങ്ങളായ ടി.എന്‍. രമേശന്‍, അഡ്വ. മാധവന്‍പിള്ള, ജോണ്‍ വി. ജോസഫ്, ഷേര്‍ലി ഹരികൃഷ്ണന്‍, എം.ആര്‍. രഘുദാസ്, കെ.ടി. തോമസ്, പി.എസ്. രാജേഷ്, കെ. രഞ്ജിത്, എം.കെ. രാജേന്ദ്രന്‍ എന്നിവര്‍ പ്രസംഗിച്ചു. മണ്ഡലം സെക്രട്ടറിയായി അഡ്വ.ജി. രാധാകൃഷ്ണനെ തെരഞ്ഞെടുത്തു.

തിരക്കേറിയ റോഡില്‍ മെറ്റില്‍ക്കൂനകളും വീപ്പകളും : പെരുമ്പനച്ചിയിലെ ഓട നിര്‍മാണം സുരക്ഷാ മാനദണ്ഡങ്ങള്‍ പാലിക്കാതെയെന്ന്

ചങ്ങനാശേരി: പെരുമ്പനച്ചിയില്‍ സുരക്ഷാ മാനദണ്ഡങ്ങള്‍ പാലിക്കാതെയുള്ള ഓട നിര്‍മാണം വാഹനങ്ങള്‍ക്കും കാല്‍നടയാത്രക്കാര്‍ക്കും അപകടഭീഷണിയാകുന്നതായി പരാതി. വാഴൂര്‍ റോഡിലെ പെരുമ്പനച്ചി മുതല്‍ പൂവത്തുംമൂട് വരെയുള്ള ഭാഗത്താണ് ഓടനിര്‍മാണം നടക്കുന്നത്. ഓട നിര്‍മാണത്തിനായുള്ള മെറ്റില്‍ക്കൂനകള്‍ തിരക്കേറിയ റോഡിന്‍റെ വശത്ത് അലക്ഷ്യമായി നിക്ഷേപിച്ചിരിക്കുന്നതാണ് അപകട കാരണമാകുന്നത്. രാത്രി വാഹനങ്ങള്‍ ഇതിലേക്ക് ഇടിച്ചു കയറി അപകടത്തില്‍പ്പെടാനും സാധ്യതയുണ്ട്. കഴിഞ്ഞദിവസം കനത്ത മഴയത്ത് ബൈക്കില്‍ ഇതു വഴിയെത്തിയ ദമ്പതികള്‍ റോഡരികില്‍ വച്ചിരുന്ന വീപ്പയില്‍ തട്ടി മറിഞ്ഞു വീണു. ഓടിക്കൂടിയ നാട്ടുകാരാണ് ഇവരെ രക്ഷിച്ചത്. വഴിവിളക്കുകളില്ലാത്തതിനാൽ രാത്രികാലങ്ങളില്‍ സ്ഥല പരിചയമില്ലാത്തവര്‍ വന്നാല്‍ ഓടയിലേക്ക് വീഴും. യാത്രക്കാരുടെ ശ്രദ്ധയ്ക്കായി റിഫ്‌ളക്ടര്‍ ടേപ്പുകളോ, റിബണോ, ബോര്‍ഡുകളോ ഒന്നും സ്ഥാപിച്ചിട്ടില്ല.

വെരൂര്‍ ഇന്‍ഡസ്ട്രിയല്‍ നഗറില്‍ റോഡിന്‍റെ വശങ്ങള്‍ ചെളിക്കുളം

ചങ്ങനാശേരി: ചങ്ങനാശേരി-വാഴൂര്‍ റോഡില്‍ വെരൂര്‍ ഇന്‍ഡസ്ട്രിയല്‍ നഗറില്‍ റോഡിന്‍റെ വശങ്ങളില്‍ വെള്ളക്കെട്ടും ചെളിയും നിറഞ്ഞു വാഹന സഞ്ചാരവും കാല്‍നട യാത്രയും ദുരിതമായി. എസ്‌റ്റേറ്റ് പടി ബസ്‌സ്റ്റോപ്പ് മുതല്‍ മൂന്നാംമൈല്‍ ബസ്‌സ്റ്റോപ്പ് വരെയുള്ള ഭാഗത്താണ് റോഡിന്‍റെ വശങ്ങള്‍ ചെളിക്കുളമായിരിക്കുന്നത്. വെരൂര്‍ പള്ളിയുടെ കുരിശടിക്കു മുമ്പില്‍ പൈപ്പ് അറ്റകുറ്റപ്പണിക്കായി ഫുട്പാത്തിലെ ടൈലുകള്‍ ഇളക്കിയ ഭാഗം പൂര്‍വസ്ഥിതിയില്‍ ആക്കിയിട്ടില്ല. ഇവിടത്തെ പെട്രോള്‍ പമ്പിന് എതിര്‍വശത്ത് റോഡരികില്‍ മുപ്പതുമീറ്ററോളം ദൂരത്തില്‍ വെള്ളംകെട്ടി നിൽക്കുന്നത് കാല്‍നടയാത്രക്കാര്‍ക്ക് ദുരിതമാകുന്നുണ്ട്. വേഗത്തിലെത്തുന്ന വാഹനങ്ങള്‍ യാത്രക്കാരുടെ ദേഹത്തേക്ക് ചെളിവെള്ളം തെറിപ്പിക്കുന്നതു പതിവാണ്. റോഡിന്‍റെ വശങ്ങളിലെ അനധികൃത വഴിവാണിഭങ്ങൾ വാഹനങ്ങള്‍ക്കും കാല്‍നടയാത്രക്കാര്‍ക്കും ബുദ്ധിമുട്ടാകുന്നുണ്ട്. റോഡരികിലെ ചിലമരങ്ങളും ചിലതിന്‍റെ കൂറ്റന്‍ ശാഖകളും അപകടഭീഷണി സൃഷ്ടിക്കുന്നതായും പരാതിയുണ്ട്.

കനത്ത മഴയില്‍ മണ്‍തിട്ട ഇടിഞ്ഞു, വീടിനു നാശം; ദുരന്തം ഒഴിവായി

മാമ്മൂട്: കനത്ത മഴയില്‍ മണ്‍തിട്ട ഇടിഞ്ഞുവീണു. വീടിനു നാശനഷ്ടം നേരിട്ടു. വന്‍ദുരന്തം ഒഴിവായി. കാല്‍നൂറ്റാണ്ട് മുമ്പ് മണ്ണു നീക്കം ചെയ്ത ഭാഗത്ത് അവശേഷിച്ച മണ്‍തിട്ടയാണ് ഇടിഞ്ഞു വീണത്. ഇന്നലെ പുലര്‍ച്ചെയാണ് സംഭവം. മാടപ്പള്ളി പഞ്ചായത്ത് എട്ടാംവാര്‍ഡില്‍ മാമ്മൂട് കാരയ്ക്കാട്ടുപടി-കുറ്റിക്കാട്ടുപടി റോഡിലാണ് സംഭവം. മണ്ണും കൂറ്റന്‍കല്ലുമാണ് ഇടിഞ്ഞുവീണത്. ചിറപ്പുരയിടത്തില്‍ ജോര്‍ജിന്‍റെ വീടിന്‍റെ വശത്തുള്ള ബാത്ത്‌റൂമും പൈപ്പ് ഫിറ്റിംഗുകളുമാണ് തകര്‍ന്നത്. അതേസമയം, അവശേഷിക്കുന്ന മൺതിട്ടയും അപകട ഭീഷണിയിലാണ്. ചുറ്റുപാടും താമസിക്കുന്നവരോട് മാറിത്താമസിക്കണമെന്ന് അധികൃതർ നിർദേശിച്ചിട്ടുണ്ട്. പഞ്ചായത്ത് പ്രസിഡന്‍റ് മണിയമ്മ രാജപ്പൻ, വാർഡ് മെംബർ ജി. അശോക് എന്നിവർ സ്ഥലം സന്ദർശിച്ചു.

കര്‍ഷകരുടെ പ്രശ്‌നങ്ങളില്‍ സര്‍ക്കാര്‍ ഇടപെടണം: കത്തോലിക്കാ കോണ്‍ഗ്രസ്

ചങ്ങനാശേരി: പ്രതികൂലമായ കാലാവസ്ഥയും വെള്ളപ്പൊക്കവും മൂലം കഷ്ടപ്പെടുന്ന കര്‍ഷകര്‍ക്ക് അവരുടെ നെല്ലിന്‍റെ വില നല്‍കാത്തത് പ്രതിഷേധാര്‍ഹമാണെന്നും അടിസ്ഥാന മേഖലയില്‍ തൊഴില്‍ ചെയ്യുന്ന കര്‍ഷകരെ അവരുടെ ന്യായമായ അവകാശങ്ങള്‍ക്കായിപ്പോലും സമരം ചെയ്യേണ്ട അവസ്ഥയിലേക്ക് സര്‍ക്കാര്‍ വലിച്ചിഴയ്ക്കരുതെന്നും അതിരൂപത കത്തോലിക്ക കോണ്‍ഗ്രസ്. ഈ വിഷയത്തില്‍ സര്‍ക്കാര്‍ നിസംഗത തുടര്‍ന്നാല്‍ സമരമാര്‍ഗങ്ങളിലേക്ക് പ്രവേശിക്കുവാന്‍ നിര്‍ബന്ധിതരാകുമെന്നും കത്തോലിക്ക കോണ്‍ഗ്രസ് മുന്നറിയിപ്പു നല്‍കി. അതിരൂപത പ്രസിഡന്‍റ് ബിജു സെബാസ്റ്റ്യന്‍റെ അധ്യക്ഷതയില്‍ ചേര്‍ന്ന നേതൃസമ്മേളനം അതിരൂപതാ ഡയറക്ടര്‍ ഫാ. സെബാസ്റ്റ്യന്‍ ചാമക്കാല ഉദ്ഘാടനം ചെയ്തു. അതിരൂപതാ ജനറല്‍ സെക്രട്ടറി ബിനു ഡൊമിനിക്, ട്രഷറര്‍ ജോസ് വെങ്ങാന്തറ, സി.ടി. തോമസ്, ജോര്‍ജുകുട്ടി മുക്കത്ത്, റോസിലിന്‍ കെ. കുരുവിള, ജിനോ ജോസഫ്, സെബാസ്റ്റ്യന്‍ വര്‍ഗീസ്, കുഞ്ഞ് കളപ്പുര, പി.സി. കുഞ്ഞപ്പന്‍ കെ.എസ്. ആന്‍റണി എന്നിവര്‍ പ്രസംഗിച്ചു.

കാറ്റിലും മഴയിലും വൻ നാശം

കുമരകം: ശക്തമായ കാറ്റിലും മഴയിലും ഇന്നലെ രാത്രി കുമരകത്ത് വ്യാപകമായ നാശനഷ്ടങ്ങൾ ഉണ്ടായി. മരങ്ങൾ കടപുഴകി വീണ് ഗതാഗതം സ്തംഭിച്ചു. കുമരകം-അട്ടിപ്പീടിക റോഡിൽ ബിവറേജസ് കോർപറേഷന്‍റെ സമീപത്തായാണ് ആദ്യം മരം വീണത്. കോട്ടയത്തുനിന്നു വരുന്ന ചെറിയ വാഹനങ്ങൾ കോണത്താറ്റു പാലം നിർമാണം നടക്കുന്നതിനാൽ വൺവേ സംവിധാനം വഴി അട്ടിപീടിക റോഡിലെത്തിയാണ് കുമരകത്തെ പ്രധാന റോഡിലേക്ക് വീണ്ടും പ്രവേശിക്കുന്നത്. അതിനാലാണ് അട്ടിപ്പീടിക റോഡിൽ വീണ മരം വലിയ ഗതാഗതക്കുരുക്കിനിടയാക്കിയത്. കൈപ്പുഴ: ഇന്നലെ വൈകുന്നേരമുണ്ടായ ശക്തമായ കാറ്റിലും മഴയിലും കൈപ്പുഴയിൽ വ്യാപക നാശം. കൈപ്പുഴ കുരിശുപള്ളിക്ക് സമീപം കണ്ടത്തിൽ വീട്ടിലെ തേക്കുമരം കടപുഴകി വീണ് കല്ലറ-കൈതക്കനാൽ റോഡിൽ ഗതാഗതം തടസപ്പെട്ടു. കോട്ടയത്തുനിന്നു ഫയർഫോഴ്സെത്തി മരം വെട്ടിമാറ്റി ഗതാഗതം പുനഃസ്ഥാപിച്ചു. കൈപ്പുഴ പുളിങ്കാല ഭാഗത്തും കുടിലിൽ കവല ഭാഗത്തും വീടുകളുടെ മുകളിലേക്കു മരം വീണു.പ്രദേശത്ത് വ്യാപക നാശമാണ് ഇന്നലെ സംഭവിച്ചത്.

പിക്കപ്പ് വാൻ നിയന്ത്രണംവിട്ട് മരത്തിലിടിച്ചു

വെച്ചൂർ: വൈക്കം- വെച്ചൂർ റോഡിലെ അച്ചിനകത്ത് നിയന്ത്രണംവിട്ട പിക്കപ്പ് വാൻ മരത്തിമിടിച്ചു.അപകടത്തിൽ ആർക്കും പരിക്കില്ല. അപകടം നടന്ന ഭാഗത്ത് ആഴമുള്ള തോടും വെള്ളം നിറഞ്ഞ പാടവുമാണ്. മരത്തിൽ തട്ടിനിന്നില്ലായിരുന്നെങ്കിൽ വാഹനം വെള്ളത്തിലേക്കു മറിയുമായിരുന്നു.നാലു മാസം മുമ്പ് ഇവിടെ വാഹനം ഇടിച്ച് കലിങ്കിന്‍റെ സംരക്ഷണഭിത്തി തകർന്ന ഭാഗത്തുതന്നെയാണ് ഇന്നലെ പുലർച്ചെയും അപകടമുണ്ടായത്. യാത്രാബസോ മറ്റു വാഹനങ്ങളോ അപകടത്തിൽപ്പെടാൻ സാധ്യതയുള്ളതിനാൽ സംരക്ഷണഭിത്തി നിർമിക്കാൻ അധികൃതർ ഉടൻ നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.

സംവിധായകൻ തരുൺ മൂർത്തിക്ക് ജന്മനാട്ടിൽ ആദരം

വൈക്കം: ചലച്ചിത്ര സംവിധായകൻ തരുൺ മൂർത്തിക്ക് ജന്മനാട്ടിൽ പുരോഗമന കലാസാഹിത്യ സംഘവും വൈക്കം പി. കൃഷ്ണപിള്ള സ്മാരക ഗ്രന്ഥശാലയും ചേർന്ന് ആദരമൊരുക്കി. വൈക്കത്തെ കലാപാരമ്പര്യമുള്ള ഒരു കുടുംബത്തിൽനിന്നു വരുന്ന തരുൺ മൂർത്തി ഇതോടകം ശ്രദ്ധേയമായ ഓപ്പറേഷൻ ജാവ, സൗദി വെള്ളയ്ക്ക, തുടരും എന്നീ സിനിമകൾ സംവിധാനം ചെയ്‌തിട്ടുണ്ട്. സൗദി വെള്ളയ്ക്ക നിരവധി ദേശീയ-അന്തർദേശീയ ബഹുമതികൾ നേടി. തുടരും ബോക്‌സ് ഓഫീസിൽ റിക്കാർഡുകൾ തകർത്തുകൊണ്ട് തിയറ്ററുകളിൽ പ്രദർശിപ്പിക്കുന്നു. വൈക്കം സത്യഗ്രഹ സ്മാരക മന്ദിരത്തിൽ നടന്ന സമ്മേളനത്തിൽ സാഹിത്യപ്രവർത്തക സഹകരണസംഘം പ്രസിഡന്‍റ് അഡ്വ.പി.കെ. ഹരികുമാർ തരുൺ മൂർത്തിയെ ആദരിച്ചു. പുകസ ഏരിയാ പ്രസിഡന്‍റ് കെ.സി. കുമാരൻ അധ്യക്ഷത വഹിച്ചു. ഡോ. അജു കെ. നാരായണൻ മുഖ്യപ്രഭാഷണം നടത്തി. ഗാനരചയിതാവ് അജീഷ് ദാസൻ, സംസ്ഥാന നാടക അവാർഡ് ജേതാവ് പ്രദീപ് മാളവിക, തബലവാദക രത്ന ശ്രീരാമചന്ദ്രൻ, ഡി. മനോജ്, പ്രഫ. പാർവതി ചന്ദ്രൻ, അഡ്വ. അംബരീഷ് ജി. വാസു തുടങ്ങിയവർ പ്രസംഗിച്ചു. തുടർന്ന് തരുൺ മൂർത്തിയുടെ പിതാവും നാടക പ്രവർത്തകനുമായ വൈക്കം ഡി. മധുമൂർത്തി സംവിധാനം നിർവഹിച്ച വിഘടിക്കാതെ, വിച്ഛേദിക്കാതെ, വിഹായസിലേക്ക് എന്ന നാടകം അവതരിപ്പിച്ചു. വൈക്കം: ചലച്ചിത്ര സംവിധായകൻ തരുൺ മൂർത്തിയെ വൈക്കം ടൗൺ മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ ആദരിച്ചു. പ്രസിഡന്‍റ് സോണി സണ്ണി തരുൺ മൂർത്തിയെ പൊന്നാടയണിയിക്കുകയും മെമന്‍റോ നൽകി ആദരിക്കുകയും ചെയ്തു. ബ്ലോക്ക് കോൺഗ്രസ് പ്രസിഡന്‍റ് പി.ഡി. ഉണ്ണി, ഡിസിസി ഭാരവാഹികളായ അബ്ദുൾ സലാം റാവുത്തർ, എ. സനീഷ് കുമാർ , ജയ് ജോൺ, വി. സമ്പത്ത് കുമാർ, കെ.പി. ശിവജി തുടങ്ങിയവർ പ്രസംഗിച്ചു.

എന്‍റെ ഉയർച്ചയ്ക്കു പിന്നിൽ അച്ഛൻ: തരുൺ മൂർത്തി

വൈക്കം: ചിത്രരചനയിൽ കലാപ്രവർത്തനം ഒതുങ്ങിപ്പോകുമായിരുന്ന തന്നെ ഗൗരവമായ വായനയിലേക്കും എഴുത്തിലേക്കും കഥകളി അഭ്യസനത്തിലേക്കും കൈപിടിച്ചു നടത്തിയത് അച്ഛൻ മധുമൂർത്തിയാണെന്ന് ചലച്ചിത്ര സംവിധായകൻ തരുൺ മൂർത്തി. അച്ഛൻ നിർബന്ധിച്ച് കഥകളി അഭ്യസിപ്പിച്ചത് തന്‍റെ സിനിമാജീവിതത്തിൽ ഏറെ ഗുണം ചെയ്തു. കുടുംബത്തിൽ അച്ഛനും സഹോദരൻമാരുമൊക്കെ കലാകാരൻമാരാണ്. വല്യച്ഛനും കെപിസിസി നിർവാഹക സമിതിയംഗവുമായ മോഹൻ ഡി. ബാബുവും തന്‍റെ കലാപ്രവർത്തനത്തിന് വലിയ പ്രോത്സാഹനം നൽകി. അഭിഭാഷകനായി ശ്രദ്ധേയനാകുമെന്ന് കുടുംബം കരുതിയ വല്യച്ഛൻ പൊതു പ്രവർത്തനത്തിലാണ് മുഴുകിയത്. ജോലിക്കൊപ്പം നാടകത്തെയും കൂടെക്കൂട്ടിയ അച്ഛന് അഭിനയത്തോടും വലിയ അഭിനിവേശമുണ്ടായിരുന്നു. അഭിനയിക്കാൻ ചെന്ന‍യിടങ്ങളിൽ തിക്താനുഭവമുണ്ടായ അച്ഛനെ തന്‍റെ മൂന്നു സിനിമകളിലും അഭിനയിപ്പിച്ചു. ഇപ്പോൾ വിജയകരമായി ഓടുന്ന തുടരും എന്ന മോഹൻലാൽ ചിത്രത്തിൽ പ്രശസ്തരായ മറ്റാരെയെങ്കിലും അഭിനയിപ്പിക്കാൻ അച്ഛൻ നിർബന്ധിച്ചെങ്കിലും ആ വേഷം അച്ഛനിലൂടെ പൂർണതയിലെത്തിക്കണമെന്ന തന്‍റെ മോഹസാക്ഷാത്കാരത്തിന് മോഹൻലാലും നിർമാതാവ് രഞ്ജിത്തും ഉറച്ച പിന്തുണ നൽകി. കോന്പിനേഷൻ സീനിൽ അച്ഛനിൽനിന്ന് ഏറ്റവും മികച്ച പ്രകടനം ലഭിക്കാൻ ലാലേട്ടൻ ഏറെ സഹായിച്ചെന്നും അദ്ദേഹം പറഞ്ഞു. ഫഹദ് ഫാസിൽ നായകനാകുന്ന അടുത്ത സിനിമ നവംബറിൽ തുടങ്ങും. തന്നെ കലാകാരനാക്കിയ അച്ഛനായി അതിലും ഒരു വേഷമൊരുക്കാൻ തരുണും മകന്‍റെ ഫഹദ് ചിത്രത്തിൽ അഭിനയിക്കാൻ ആകാംക്ഷയോടെ മധുമൂർത്തിയും കാത്തിരിക്കുകയാണ്.

കടുത്തുരുത്തിയിൽ ആഫ്രിക്കന്‍ ഒച്ച് ശല്യം

കടുത്തുരുത്തി: മഴ ശക്തമായതിന് പിന്നാലെ കടുത്തുരുത്തിയില്‍ ആഫ്രിക്കന്‍ ഒച്ചിന്‍റെ ശല്യം രൂക്ഷം. അലരി, മങ്ങാട് മേഖലകളിലാണ് ഇവ വ്യാപകമായിരിക്കുന്നത്. ഒച്ചിന്‍റെ മുട്ടകള്‍ വ്യാപകമായി വിരിഞ്ഞ് ഒച്ചുകള്‍ പെരുകുകയാണ്. കോട്ടയം മുന്‍സിപ്പാലിറ്റി ജീവനക്കാരനായ അലരി പുഴക്കരോട്ട് ടോജി ഫിലിപ്പിന്‍റെ വീട്ടിലും പരിസരത്തുമെല്ലാം ആഫ്രിക്കന്‍ ഒച്ചുകളെക്കൊണ്ടു നിറഞ്ഞിരിക്കുകയാണ്. ആഴ്ചകളായി ദിവസവും രാവിലെ പുരയിടത്തില്‍നിന്ന് ഒച്ചുകളെ കണ്ടെത്തി ഉപ്പിട്ട് നശിപ്പിക്കുകയാണ് ടോജി. സമീപത്തെ വീടുകളിലും ഒച്ചുകളെ കണ്ടെത്തിയിട്ടുണ്ട്. ചെടികളും വീട്ടിലെ ഫലവൃഷങ്ങളും പച്ചക്കറികളും ഉൾപ്പെടെ പൂര്‍ണമായും തിന്നു നശിപ്പിക്കുകയാണ് കൂട്ടത്തോടെയെത്തുന്ന ഒച്ചുകളെന്ന് ‌ടോജി പറയുന്നു. പഞ്ചായത്തിന്‍റെ വിവിധ പ്രദേശങ്ങളിലും ആഫ്രിക്കന്‍ ഒച്ചുകള്‍ വ്യാപിച്ചിരിക്കുകയാണെന്ന് നിരീക്ഷണത്തിലാണ് പ്രദേശവാസികള്‍. എന്നാല്‍, ഇക്കാര്യം കൃഷി വകുപ്പോ പഞ്ചായത്തോ ആരോഗ്യ വകുപ്പോ അറിഞ്ഞിട്ടില്ല. ഒച്ചിനെ കൂട്ടത്തോടെ നിര്‍മാര്‍ജനം ചെയ്യുന്നതിനുള്ള നടപടികള്‍ സ്വീകരിക്കണമെന്നാണ് നാട്ടുകാരുടെ ആവശ്യം.

കാരിക്കോട് കെപിപിഎല്‍ വളപ്പിലെ മണ്ണിടിഞ്ഞു റോഡിലേക്ക് വീണു

കടുത്തുരുത്തി: തലയോലപ്പറമ്പ് - വെള്ളൂര്‍ - മൂര്‍ക്കാട്ടിപ്പടി റോഡില്‍ കാരിക്കോട് മുടക്കാരി ദേവീക്ഷേത്രത്തിനു സമീപം കെപിപിഎല്‍ വക സ്ഥലത്തെ മണ്ണിടിഞ്ഞു റോഡിലേക്കു വീണു. കനത്ത മഴയെത്തുടര്‍ന്ന് കെപിപിഎല്‍ വക സ്ഥലത്തെ ഏകദേശം പത്ത് അടി ഉയരമുള്ള മണ്‍തിട്ട ഇടിഞ്ഞ് റോഡിലേക്ക് വീഴുകയായിരുന്നു. റോഡിന്‍റെ മധ്യഭാഗം വരെ മണ്ണും വലിയ മണ്‍കട്ടകളും നിറഞ്ഞിരിക്കുകയാണ്. വാഹനയാത്രക്കാര്‍ക്ക് മുന്നറിയിപ്പായി ഇവിടെ അപകട സൂചനാ ബോര്‍ഡ് സ്ഥാപിച്ചിട്ടുണ്ട്. ഇപ്പോഴും വലിയ മണ്‍കട്ടകള്‍ റോഡിലേക്ക് അടര്‍ന്നുവീഴാവുന്ന നിലയിലാണുള്ളത്. മുകളില്‍ നിരവധി മരങ്ങള്‍ നില്‍ക്കുന്നതും സ്ഥിതി കൂടുതല്‍ വഷളാക്കുന്നു. മഴ കനത്താല്‍ വീണ്ടും മണ്ണിടിച്ചില്‍ ഉണ്ടാകാന്‍ സാധ്യതയുണ്ട്. സ്‌കൂള്‍ വാഹനങ്ങള്‍ ഉള്‍പ്പെടെ നിരവധി വാഹനങ്ങള്‍ ഇതുവഴി കടന്നുപോകുന്നതിനാല്‍ മണ്ണിടിയുന്നത് വലിയ അപകടഭീഷണിയാണ് ഉയര്‍ത്തുന്നത്. മണ്ണ് നീക്കം ചെയ്യുകയും കൂടുതല്‍ മണ്ണിടിച്ചില്‍ ഉണ്ടാകാതിരിക്കാന്‍ ആവശ്യമായ നടപടികള്‍ സ്വീകരിക്കുകയും ചെയ്യണമെന്നാണ് യാത്രക്കാരുടെയും നാട്ടുകാരുടെയും ആവശ്യം. photo കാരിക്കോട് മുടക്കാരി ദേവീക്ഷേത്രത്തിനു സമീപം കെപിപിഎല്‍ വക സ്ഥലത്തെ മണ്ണിടിഞ്ഞു റോഡിലേക്കു വീണ നിലയില്‍.

അസംപ്ഷന്‍ കോളജില്‍ ബിരുദദാന ചടങ്ങ് ഇന്ന്

ചങ്ങനാശേരി: അസംപ്ഷന്‍ ഓട്ടോണമസ് കോളജില്‍ വിവിധ യുജി, പിജി കോഴ്‌സുകള്‍ പാസായ വിദ്യാര്‍ഥിനികള്‍ക്ക് ബിരുദദാന ചടങ്ങ് ഇന്നു രാവിലെ പത്തിനു നടക്കും. കോളജ് ഇന്‍ഡോര്‍ സ്റ്റേഡിയത്തില്‍ നടക്കുന്ന സമ്മേളനത്തില്‍ കോളജ് മാനേജര്‍ മോണ്‍. ആന്‍റണി എത്തയ്ക്കാട്ട് അധ്യക്ഷത വഹിക്കും. ഹയര്‍ എഡ്യൂക്കേഷന്‍ പ്രിന്‍സിപ്പല്‍ സെക്രട്ടറി ഡോ. ശര്‍മിള മേരി ജോസഫ് ഉദ്ഘാടനം ചെയ്യും. പൂര്‍വ വിദ്യാര്‍ഥിനിയും 2024ലെ സിവില്‍ സര്‍വീസ് 569-ാം റാങ്ക് ജേതാവുമായ വി. ഹേമയെ സമ്മേളനത്തില്‍ ആദരിക്കും. ജോബ് മൈക്കിള്‍ എംഎല്‍എ മുഖ്യാതിഥി ആയിരിക്കും. പ്രിന്‍സിപ്പല്‍ ഡോ. റാണി മരിയ തോമസ്, വൈസ് പ്രിന്‍സിപ്പല്‍ ഡോ. ജിസി മാത്യു, വിദ്യാര്‍ഥി പ്രതിനിധി ഷൈന്‍ മരിയ ഷാജി എന്നിവര്‍ പ്രസംഗിക്കും.

എസ്.പി. പിള്ള സ്മാരക ലൈബ്രറിയിൽ സ്മൃതിദിനാചരണം

ഏറ്റുമാനൂർ: വടക്കേനട എസ്.പി. പിള്ള സ്മാരക വനിതാ ലൈബ്രറിയുടെ ആഭിമുഖ്യത്തിൽ എസ്.പി. പിള്ള സ്മൃതിദിനം ആചരിച്ചു. പ്രസിഡന്‍റ് സരസമ്മ ആർ. പണിക്കർ അധ്യക്ഷത വഹിച്ച അനുസ്മരണ സമ്മേളനം കോട്ടയം താലൂക്ക് ലൈബ്രറി കൗൺസിൽ സെക്രട്ടറി ഷൈജു തെക്കുംചേരി ഉദ്ഘാടനം ചെയ്തു. ഏറ്റുമാനൂർ എസ്എംഎസ്എം പബ്ലിക് ലൈബ്രറി പ്രസിഡന്‍റ് ജി. പ്രകാശ് അനുസ്മരണ പ്രഭാഷണം നടത്തി. അഡ്വ. പി. രാജീവ്‌ ചിറയിൽ, പി.ആർ. രാജേന്ദ്രകുമാർ, നഗരസഭാ കൗൺസിലർ സുരേഷ് ആർ. നായർ, ശ്രീമൂലം നേച്ചർ ക്ലബ്ബ് കമ്മിറ്റി അംഗം ജയിംസ് പുളിക്കൻ, ലൈബ്രറി സെക്രട്ടറി മായ സുജി, വൈസ് പ്രസിഡന്‍റ് വി. ജ്യോതി എന്നിവർ പ്രസംഗിച്ചു. എസ്.പി. പിള്ളയുടെ ചിത്രത്തിനു മുമ്പിൽ ഭദ്രദീപം തെളിച്ച് പുഷ്പാർച്ചന നടത്തി.

കോണത്താറ്റ് പാലം നിർമാണം അടിയന്തരമായി പൂർത്തിയാക്കണം

നീണ്ടൂർ: അപകടാവസ്ഥയിലായ നീണ്ടൂർ പ്രാലേൽ പാലത്തിന്‍റെ നിർമാണം നടക്കേണ്ട സാഹചര്യത്തിൽ കുമരകം കോണത്താറ്റ് പാലം നിർമാണം പൂർത്തിയാക്കാൻ അടിയന്തര നടപടി സ്വീകരിക്കണമെന്ന് കേരള കോൺഗ്രസ്-എം നീണ്ടൂർ മണ്ഡലം കമ്മിറ്റി ആവശ്യപ്പെട്ടു. നീണ്ടൂർ പ്രാലേൽ പാലം അപകടാവസ്ഥയിലാണ്. ഇക്കാര്യം സർക്കാരിന്‍റെ ശ്രദ്ധയിൽപ്പെടുത്തുകയും കഴിഞ്ഞ ബഡ്ജറ്റിൽ പാലം പുനർനിർമിക്കുന്നതിനും സ്ഥലം ഏറ്റെടുക്കുന്നതിനും ആവശ്യമായ ഫണ്ട് വകയിരുത്തുകയും ചെയ്തിട്ടുണ്ട്. കുമരകം കോണത്താറ്റ് പാലം പൂർത്തിയാക്കാതെ നീണ്ടൂർ പ്രാലേൽ പാലം പൊളിച്ചാൽ പടിഞ്ഞാറൻ മേഖലയിലെ ഗതാഗതസംവിധാനം താളം തെറ്റും. ഇപ്പോൾത്തന്നെ ധാരാളം വാഹനങ്ങളാണ് അപകടാവസ്ഥയിലുള്ള പ്രാലേൽ പാലത്തിലൂടെ കടന്നുപോകുന്നത്. അതിനാൽ കുമരകം കോണത്താറ്റ് പാലത്തിന്‍റെ നിർമാണം അതിവേഗം പൂർത്തീകരിച്ച് അപകടാവസ്ഥയിലുള്ള പ്രാലേൽ പാലത്തിന്‍റെ നിർമാണം അടിയന്തരമായി തുടങ്ങണമെന്ന് കേരള കോൺഗ്രസ് -എം നീണ്ടൂർ മണ്ഡലം കമ്മിറ്റി ആവശ്യപ്പെട്ടു. മണ്ഡലം പ്രസിഡന്‍റ് വി.സി. മത്തായി അധ്യക്ഷത വഹിച്ചു. സംസ്ഥാന കമ്മിറ്റി അംഗം തോമസ് കോട്ടൂർ ഉദ്ഘാടനം ചെയ്തു. പഞ്ചായത്ത് മെംബർമാരായ പുഷ്പമ്മ തോമസ്, ആലീസ് ജോസഫ്, സഹകരണ ബാങ്ക് ബോർഡ് മെംബർ വിനോദ് ചാമക്കാല, ജോസി സി. ജോസഫ്, ജയ്സൺ എബ്രാഹം, ജോസ്മോൻ ജോസ്, മനോജ് സുകുമാരൻ, ഗോപി മങ്ങാട്ടുകുഴി, പ്രസാദ് പറയൻകുന്ന്, ജയിംസ് മാക്കിൽ, നിഖിൽ ഫിലിപ്, സിജു പാലക്കാട്ട്, റെജി കുടിലിൽ, സിബി വയലുങ്കൽ, ജോസ്മോൻ തറയ്ക്കൽ, ലിൻസൺ പ്രാലേൽ തുടങ്ങിയവർ പ്രസംഗിച്ചു.

മുതിര്‍ന്ന പൗരന്മാരോടുള്ള അതിക്രമം: ബോധവത്കരണ ദിനാചരണം സംഘടിപ്പിച്ചു

കോട്ടയം: ജില്ലാ സാമൂഹ്യനീതി വകുപ്പിന്‍റെ നേതൃത്വത്തില്‍ മുതിര്‍ന്ന പൗരന്മാരോടുള്ള അതിക്രമങ്ങള്‍ക്കെതിരേയുള്ള ബോധവത്കരണ ദിനാചരണം സംഘടിപ്പിച്ചു. ജില്ലാതല ഉദ്ഘാടനം സിഎംഎസ് കോളജില്‍ ജില്ലാ പഞ്ചായത്തംഗം പി.എം. മാത്യു നിര്‍വഹിച്ചു. സംസ്ഥാന വയോജന കമ്മീഷന്‍ രൂപീകരണം ഉള്‍പ്പെടെ വിവിധ ചുവടുകളാണ് സര്‍ക്കാര്‍ മുന്നോട്ടുവയ്ക്കുന്നത്. യുവജനങ്ങളുടെ കരുതലോടെയുള്ള ഇടപെടലും വയോജന സംരക്ഷണത്തില്‍ അനിവാര്യമാണെന്ന് പി.എം. മാത്യു പറഞ്ഞു. സംസ്ഥാന വയോജന കൗണ്‍സില്‍ അംഗം തോമസ് പോത്തന്‍ അധ്യക്ഷത വഹിച്ചു. കോട്ടയം നഗരസഭാധ്യക്ഷ ബിന്‍സി സെബാസ്റ്റ്യന്‍ വയോജന സംരക്ഷണ പ്രതിജ്ഞ ചൊല്ലിക്കൊടുത്തു. വി.പി. സുനില്‍കുമാര്‍ ബോധവത്കരണ ക്ലാസ് നയിച്ചു. ജില്ലാ സാമൂഹ്യനീതി ഓഫീസര്‍ പി. പ്രദീപ്, ജില്ലാ സാമൂഹ്യനീതി ഓഫീസ് സീനിയര്‍ സൂപ്രണ്ട് എം.വി. സഞ്ജയന്‍, എസ്‌സിഎഫ്ഡബ്ല്യുഎ ജില്ലാ പ്രസിഡന്‍റ് ടി.വി. മോഹന്‍കുമാര്‍ എന്നിവര്‍ പങ്കെടുത്തു. നഗരത്തിലെ പ്രധാന ഇടങ്ങളില്‍ നടത്തിയ വാഹന പ്രചാരണ ജാഥയോടൊപ്പം സിഎംഎസ് കോളജ് വിദ്യാര്‍ഥികള്‍ അവതരിപ്പിച്ച ഫ്‌ളാഷ് മോബും ശ്രദ്ധേയമായിരുന്നു.

സ്കൂളിന്‍റെ ചുറ്റുമതിൽ ഇടിഞ്ഞുവീണു

അതിരമ്പുഴ: തുടർച്ചയായി പെയ്ത മഴയിൽ സ്കൂളിന്‍റെ ചുറ്റുമതിൽ ഇടിഞ്ഞുവീണു. അതിരമ്പുഴ സെന്‍റ് മേരീസ് എൽപി സ്കൂളിന്‍റെ ചുറ്റുമതിലാണ് ഇന്നലെ ഉച്ചകഴിഞ്ഞ് ഇടിഞ്ഞുവീണത്. ഏറ്റുമാനൂർ - അതിരമ്പുഴ റോഡിലേക്കാണ് മതിൽ വീണതെങ്കിലും മറ്റ് അനിഷ്ട സംഭവങ്ങൾ ഒന്നുമുണ്ടായില്ല.

കത്തോലിക്ക കോൺഗ്രസ് അതിരമ്പുഴ ഫൊറോന സമ്മേളനം

അതിരമ്പുഴ: കത്തോലിക്ക കോൺഗ്രസ് അതിരമ്പുഴ ഫൊറോന സമ്മേളനം നടത്തി. പ്രസിഡന്‍റ് ജോയി പാറപ്പുറത്ത് അധ്യക്ഷത വഹിച്ച സമ്മേളനം അതിരമ്പുഴ ഫൊറോന വികാരി റവ.ഡോ. ജോസഫ് മുണ്ടകത്തിൽ ഉദ്ഘാടനം ചെയ്തു. ക്രൈസ്തവരുടെ പിന്നാക്കാവസ്ഥയെപ്പറ്റി പഠിക്കാൻ നിയോഗിച്ച ജസ്റ്റീസ് ബെഞ്ചമിൻ കോശി കമ്മീഷൻ റിപ്പോർട്ട് എത്രയും വേഗം പ്രസിദ്ധീകരിക്കുകയും റിപ്പോർട്ടിൽ പറഞ്ഞിരിക്കുന്ന കാര്യങ്ങൾ നടപ്പിലാക്കുകയും ചെയ്യണമെന്ന് യോഗം സർക്കാരിനോട് ആവശ്യപ്പെട്ടു. ഫാ. ജോസഫ് ആലുങ്കൽ ആമുഖ സന്ദേശം നൽകി. ഫാ. ടോണി മണക്കുന്നേൽ, സെബാസ്റ്റ്യൻ പുല്ലാട്ടുകാല, അഡ്വ. പി.പി. ജോസഫ്, ബിജോ തുളിശേരിൽ, റോബിൻ ജോസഫ് ആലഞ്ചേരി മാനാട്ട്, സൂസൻ വർഗീസ് മാത്തശേരി, ജോയി കാരിക്കൊമ്പിൽ എന്നിവർ പ്രസംഗിച്ചു. അതിരമ്പുഴ പള്ളിയിൽനിന്നു കൊടിനാട്ടുംകുന്ന് പള്ളിയിലേക്കു സ്ഥലം മാറിപ്പോകുന്ന റവ.ഡോ. ജോസഫ് മുണ്ടകത്തിലിന് സമ്മേളനത്തിൽ യാത്രയയപ്പ് നൽകി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact editor@deepika.com