ADVERTISEMENT

ADVERTISEMENT

മഞ്ഞുമ്മലിൽ പ്രതിഷേധറാലി നടത്തി

ഏലൂർ: ഒഡീഷയിൽ വൈദികരെ ആകമിച്ചതിനെതിരേ മഞ്ഞുമ്മൽ അമലോത്ഭവ മാതാ ഇടവകയുടെ നേതൃത്വത്തിൽ പ്രതിഷേധറാലി നടത്തി. അമലോത്ഭവ മാതാ പളളിയിൽ നിന്നാരംഭിച്ച പ്രതിഷേധ റാലി അയ്യംകുളം പയ്യപ്പിള്ളി സാംസ്കാരിക കേന്ദ്രത്തിന് മുമ്പിൽ സമാപിച്ചു.

ഇടവക വികാരി ഫാ. സ്റ്റീജൻ കണക്കശേരി അധ്യക്ഷതയിൽ ആരംഭിച്ച യോഗത്തിൽ സഹവികാരി ഫാ. ആൽബിൻ തോമസ് , അഡ്വ.ജെഫ്രിൻ മാനുവൽ, ജിനി ബാറ്റൻ, ജോർജ് പാളയത്തിൽ, കെ.പി. ആൻണി, വിക്ടർ ജോൺ, കെ.ജെ. ബെനഡിക്, സെബാസ്റ്റ്യൻ പേരെര തുടങ്ങിയവർ പങ്കെടുത്തു.

ADVERTISEMENT

പാന്പുകടിയേറ്റ് ചികിത്സയിലായിരുന്ന വ്യാപാരി മരിച്ചു

കോതമംഗലം: പാന്പുകടിയേറ്റ് ചികിത്സയിലായിരുന്ന വ്യാപാരി മരിച്ചു. ചെറുവട്ടൂർ കാവാട്ട് കൊച്ചുമുഹമ്മദാ(65)ണ് മരിച്ചത്. കബറടക്കം നടത്തി. ചെറുവട്ടൂർ ഹൈക്കോടതി കവലയിലുള്ള സ്വന്തം പച്ചക്കറി കടയ്ക്കുള്ളിൽ വച്ച് പാന്പുകടിയേറ്റ് അങ്കമാലി ആശുപത്രിയിലെ തീവ്രപരിചരണ വിഭാഗത്തിൽ രണ്ടാഴ്ചയായി ചികിത്സയിലായിരുന്നു. ഭാര്യ: നബീസ ചെറുവട്ടൂർ ഓലിൽ മലയിൽ കുടുംബാംഗം. മക്കൾ: മജീന, റെജീന, റസീന, റിയാസ് (ദുബൈ). മരുമക്കൾ: സലാം ഓടയ്ക്കാലി, ഖാദിർ പോഞ്ഞാശേരി, റസൽ മുളവൂർ, ഹസ്ന റിയാസ്.

ബൈക്ക് മോഷ്ടാക്കൾ പിടിയിൽ

കളമശേരി: എളമക്കരയിൽ വാടകയ്ക്ക് താമസിക്കുന്ന ലക്ഷദ്വീപ് സ്വദേശിയുടെ ബൈക്ക് മോഷ്ടിച്ച കേസിലെ പ്രതികളെ കളമശേരി പോലീസ് അറസ്റ്റ് ചെയ്തു. തൃശൂർ തിരുവത്ര മൂട്ടിൽ മണത്തല മാത്രക്കോട്ട് അമൽ (23), ചേർത്തല തൃച്ചാറ്റുകുളം കൊല്ലംപറമ്പിൽ അൻസിൽ മണി (22) എന്നിവരെയാണ് അറസ്റ്റ് ചെയ്തത്. കളമശേരി ഇൻസ്പെക്ടർ എം.ബി. ലത്തീഫിന്‍റെ നേതൃത്വത്തിൽ സബ് ഇൻസ്പെക്ടർ ടി.എസ്. സനീഷ്, സിപിഒമാരായ സിനു ചന്ദ്രൻ, ലിബിൻ കുമാർ എന്നിവർ ചേർന്ന് പിടികൂടുകയായിരുന്നു. വാഹനം മോഷ്ടിച്ചു നമ്പർ പ്ലേറ്റ് മാറ്റി പ്രതികൾ ഉപയോഗിച്ച് വരികയായിരുന്നു. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.

പനമ്പിള്ളിനഗറില്‍ കോടികള്‍ വിലമതിക്കുന്ന മിച്ചഭൂമി ഏറ്റെടുത്തു

കൊച്ചി: പനമ്പിള്ളി നഗറില്‍ കോടികള്‍ വിലമതിക്കുന്ന മിച്ചഭൂമി ഏറ്റെടുത്ത് റവന്യൂ വകുപ്പ്. എളംകുളം വില്ലേജിലെ 893/4,6,8, 9,10 സര്‍വേ നമ്പറുകളില്‍പ്പെട്ട 4.22 ഏക്കര്‍ സ്ഥലമാണ് ഒന്പതു വര്‍ഷം നീണ്ട നിയമ പോരാട്ടങ്ങള്‍ക്കൊടുവില്‍ റവന്യൂ സംഘം ഏറ്റെടുത്തത്. 1963ലെ ഭൂപരിഷ്‌കരണ നിയമത്തിന് പിന്നാലെ ഇതു മിച്ചഭൂമിയായി പ്രഖ്യാപിച്ചിരുന്നു. എന്നാല്‍ സ്ഥലമുടമകള്‍ നിയമനടപടികളുമായി മുന്നോട്ടു പോയതോടെ സാങ്കേതിക തടസങ്ങള്‍ മൂലം ഭൂമി ഏറ്റെടുക്കാന്‍ കഴിയാത്ത സ്ഥിതിയായി. 1973 മുതല്‍ ഇതു സംബന്ധിച്ചു കേസുകള്‍ ഉണ്ടായിരുന്നു. തുടര്‍ന്നു വൈക്കം മേഖല ലാൻഡ് ബോര്‍ഡ് ചെയര്‍മാന്‍റെ നിര്‍ദേശ പ്രകാരം നടപടിക്രമങ്ങള്‍ വേഗത്തിലാക്കിയതോടെയാണു ഭൂമി ഏറ്റെടുക്കാന്‍ കഴിഞ്ഞത്. കണയന്നൂര്‍ താലൂക്ക് തഹസില്‍ദാര്‍ ഡി. വിനോദിന്‍റെ നേതൃത്വത്തില്‍ ഭൂരേഖ തഹസില്‍ദാര്‍ സി.ആര്‍. ഷനോജ് കുമാര്‍, ഡെപ്യൂട്ടി തഹസില്‍ദാര്‍മാരായ ബിനോ തോമസ്, ബിജു ജോസ്, വില്ലേജ് ഓഫീസര്‍ പി. സജിത്ത്, സെക്ഷന്‍ ക്ലാര്‍ക്ക് മാര്‍ട്ടിന്‍ ടിനോയ് എന്നിവരടങ്ങിയ സംഘമാണ് നടപടിക്രമങ്ങള്‍ പൂര്‍ത്തിയാക്കിയത്.

കടൽകയറ്റം; എട്ടു വീടുകൾ തകർന്നു : ഉള്ളുലഞ്ഞ് കണ്ണമാലി

പള്ളുരുത്തി: കണ്ണമാലിയിൽ തുടർച്ചയായ മൂന്നാം ദിവസവും കടൽകയറ്റം രൂക്ഷമായതോടെ പ്രദേശത്ത് ജനജീവിതം പൂർണമായും സ്തംഭിച്ചു. എട്ടു വീടുകൾ തകർന്നു. ഇന്നലെ ഉച്ചയോടെ അതിശക്തമായാണ് കടൽ കരയിലേക്ക് അടിച്ചുകയറിയത്. ചെറിയ കടവ്, വാട്ടർ ടാങ്ക്, ഡിവൈൻ ചാപ്പൽ, ഗ്യാപ് റോഡ്, കാട്ടിപ്പറമ്പ്, കൈതവേലി, മാനാശേരി എന്നിവിടങ്ങളിലാണ് കടൽകയറ്റം രൂക്ഷമായത്. കഴിഞ്ഞ നാലു വർഷത്തിനിടെ ഏറ്റവും രൂക്ഷമായ കടൽകയറ്റമാണ് ചെല്ലാനത്ത് അനുഭവപ്പെടുന്നത്. അഞ്ഞൂറോളം വീടുകളിൽ വെള്ളം കയറി. വീടിനുള്ളിൽ ഉണ്ടായിരുന്ന ഭക്ഷ്യവസ്തുക്കൾ ഉൾപ്പെടെ ഉപയോഗശൂന്യമായി. കുടിക്കാൻ പോലൂം വെള്ളമില്ല. പ്രാഥമിക ആവശ്യങ്ങൾപോലും നിർവഹിക്കാനാകാത്ത സാഹചര്യമാണുള്ളത്. ബന്ധപ്പെട്ട വകുപ്പ് അധികൃതരുടെ നടപടിയിൽ പ്രതിഷേധിച്ച് ക്യാന്പുകളിൽ പോകാൻ ആരും തയാറാകുന്നില്ല. ഇവർ റോഡിലാണ് അഭയം തേടുന്നത്. ഇവർക്ക് ആവശ്യമായ ഭക്ഷണവും വെള്ളവും സന്നദ്ധ സംഘടനകൾ വഴി എത്തിക്കാൻ കൊച്ചി തഹസിൽദാർ ജോസഫ് ആന്‍റണി ഹെർട്ടിസ് മുൻകൈയെടുത്ത് നടപടി സ്വീകരിച്ചിട്ടുണ്ട്. എന്നാലും പ്രദേശവാസികളുടെ പ്രതിഷേധത്തിന് കുറവില്ല. ഇന്നലെ രാവിലെ ജിയോ ബാഗ് സ്ഥാപിക്കുന്ന ജോലികൾ ആരംഭിക്കുമെന്ന ഉറപ്പിൽ നാട്ടുകാർ റോഡ് ഉപരോധം താൽക്കാലികമായി അവസാനിപ്പിച്ചിരുന്നു. എന്നാൽ ഇന്നലെയും ജോലികൾ ആരംഭിച്ചില്ല. മഴയത്ത് ജോലികൾ ചെയ്യാൻ കഴിയില്ലെന്നാണ് അധികൃതർ വ്യക്തമാക്കിയത്. ഇതോടെ ജനം വീണ്ടും റോഡ് ഉപരോധം തുടങ്ങുകയായിരുന്നു. ചെറിയകടവിലും കണ്ണമാലിയിലുമാണ് റോഡ് ഉപരോധിച്ചത്. ഇതോടെ ഇതുവഴിയുള്ള ഗതാഗതം പൂർണമായും തടസപ്പെട്ടു. തഹസിൽദാർ ചെറിയ കടവിലെത്തി പ്രതിഷേധക്കാരുമായി ചർച്ച നടത്തി. താൽക്കാലിക പ്രതിരോധമായി ജിയോ ബാഗ് സ്ഥാപിക്കുന്നതിന് പകരം നിലവിൽ അനുവദിച്ച ഒന്നരക്കോടി രൂപ വിനിയോഗിച്ച് കരിങ്കല്ലുകൾ സ്ഥാപിക്കണമെന്ന ആവശ്യം പ്രതിഷേധക്കാർ മുന്നോട്ട് വച്ചു. ഇത് കളക്ടറുടെ ശ്രദ്ധയിൽപ്പെടുത്താമെന്ന് തഹസിൽദാർ സമരക്കാരെ അറിയിച്ചു. ഇതോടെ നാട്ടുകാർ ചെറിയ കടവിലെ റോഡ് ഉപരോധം അവസാനിപ്പിച്ചെങ്കിലും കണ്ണമാലിയിലെ ഉപരോധം തുടർന്നു.

നഗരത്തിലെ വെള്ളക്കെട്ട് : നഷ്ടം ഉണ്ടാകാതെയുള്ള നടപടികളാണ് നഗരസഭ സ്വീകരിക്കുന്നത്: മേയര്‍

കൊച്ചി: നഗരത്തിലെ വെളളക്കെട്ടുമായി ബന്ധപ്പെട്ട പ്രശ്‌നങ്ങളില്‍ സാമ്പത്തിക നഷ്ടം ഉണ്ടാകാതെയുള്ള സത്വരമായ നടപടികളാണ് നഗരസഭയുടെ ഭാഗത്ത് നിന്ന് ഉണ്ടാകാറുള്ളതെന്ന് മേയര്‍. എം. അനില്‍കുമാര്‍. ഇടപ്പള്ളി തോട് ഇറിഗേഷന്‍ ഡിപ്പാര്‍ട്ട്‌മെന്‍റിന് കൃത്യമായി ചെയ്യാന്‍ സാധിക്കാതെ വന്നത് കൊണ്ടാണ് ഒരു ടെന്‍ഡര്‍ കൂടി ക്ഷണിച്ചതെന്നും മേയര്‍ പറഞ്ഞു. പേരണ്ടൂര്‍ കനാലിന്‍റെ കാര്യത്തിലും സമാനമായ പ്രശ്‌നം നേരിട്ടിരുന്നു. ഇറിഗേഷന്‍ വിഭാഗമാണ് തേവര പേരണ്ടൂര്‍ കനാല്‍ നവീകരണം നടത്തേണ്ടത്. ഇറിഗേഷന്‍ വിഭാഗം രണ്ടു തവണ നടത്തിയ ടെന്‍ഡറില്‍ ആരും പങ്കെടുക്കാതായതോടെ പദ്ധതി നീളാന്‍ കാരണമായി. പിന്നീട് നാല് തവണയായി വിഭജിച്ച ശേഷമാണ് പദ്ധതി നടപ്പാക്കിയത്. പ്രതിപക്ഷം ആരോപിക്കുന്നത് പോലെ ടെന്‍ഡറില്‍ അഴിമതി നടന്നിട്ടുണ്ടോയെന്ന് പരിശോധിക്കാമെന്നും അപാകതകള്‍ പരിഹരിക്കുമെന്നും മേയര്‍ പറഞ്ഞു. കാനകളിലേയും തോടുകളിലേയും ചെളിയും പായലും നീക്കുന്നതിനുള്ള സില്‍ട്ട് പുഷര്‍, വീഡ് ഹാര്‍വെസ്റ്റര്‍, സക്ഷന്‍ കം ജെറ്റിംഗ് മെഷീനുകള്‍ എന്നിവ കൃത്യമായി പ്രവര്‍ത്തിക്കുന്നുണ്ട്. ഇത് ഹൈക്കോടതിക്ക് വരെ ബോധ്യമായ കാര്യമാണ്. എംജി റോഡിലെ കാനകളില്‍ ചെളി അടിഞ്ഞു കുടാന്‍ സാധ്യത കൂടുതലായതിനാല്‍ ഇവിടെ ഇടയ്ക്കിടെ ചെളി നീക്കുന്നുണ്ട്. അതാണ് എംജി റോഡില്‍ മെഷീന്‍ കൂടുതലായി ഉപയോഗിക്കാന്‍ കാരണമെന്നും മേയര്‍ പറഞ്ഞു.

മെട്രോപ്പൊളിറ്റന്‍ ആസൂത്രണ സമിതി : മുനിസിപ്പല്‍ കൗണ്‍സിലര്‍മാരുടെ പ്രതിനിധിയെ ഇന്ന് തെരഞ്ഞെടുക്കും

കൊച്ചി: വിശാല കൊച്ചിയുടെ വികസന സ്വപ്‌നത്തിനായി രൂപീകരിക്കുന്ന മെട്രോപ്പൊളിറ്റന്‍ ആസൂത്രണ സമിതിയിലേക്കുള്ള തെരഞ്ഞെടുപ്പ് ആരംഭിച്ചു. പഞ്ചായത്ത് പ്രസിഡന്‍റുമാരുടെ പ്രതിനിധി തെരഞ്ഞെടുപ്പില്‍ പി.എം. മനാഫ് (ആലങ്ങാട്), സജിത മുരളി (ഉദയംപേരൂര്‍), എന്‍.ജി. മേരി വിന്‍സന്‍റ് (കടമക്കുടി), രാജി സന്തോഷ് (ചൂര്‍ണിക്കര) എന്നിവരെയാണ് തെരഞ്ഞെടുത്തത്. മുനിസിപ്പല്‍ കൗണ്‍സിലര്‍മാരുടെ പ്രതിനിധികള്‍ക്കായുള്ള തെരഞ്ഞെടുപ്പ് ഇന്നും കോര്‍പറേഷന്‍ കൗണ്‍സിലര്‍മാരുടെ പ്രതിനിധികള്‍ക്കായുള്ള തെരഞ്ഞെടുപ്പ് നാളെയും നടക്കും. ജനറല്‍ വിഭാഗം, എസ്‌സി വിഭാഗം, സ്ത്രീസംവരണ വിഭാഗം തുടങ്ങിയ വിഭാഗങ്ങളിലാണ് തെരഞ്ഞെടുപ്പ് നടന്നത്. ജനറല്‍ വിഭാഗത്തില്‍ പി.എം. മനാഫിനും എസ്‌സി സംവരണ വിഭാഗത്തില്‍ സജിത മുരളിക്കും 15 വോട്ടുകള്‍ വീതം ലഭിച്ചു. സ്ത്രീ സംവരണ വിഭാഗത്തില്‍ മിനി രാജു, മേരി വിന്‍സന്‍റ്, രാജി സന്തോഷ് എന്നിവര്‍ നോമിനേഷന്‍ നല്‍കിയിരുന്നെങ്കിലും അവസാന നിമിഷം മിനി രാജു സ്ഥാനാര്‍ഥിത്വം പിന്‍വലിച്ചു. ഇതോടെ മേരി വിന്‍സെന്‍റ്, രാജി സന്തോഷ് എന്നിവര്‍ തെരഞ്ഞെടുക്കപ്പെട്ടു. ജില്ലാ കളക്ടറേറ്റ് പ്ലാനിംഗ് ഹാളില്‍ നടന്ന തെരഞ്ഞെടുപ്പില്‍ മെട്രോപ്പൊളിറ്റന്‍ ഏരിയയില്‍ ഉള്‍പ്പെടുന്ന 29 പഞ്ചായത്ത് പ്രസിഡന്‍റുമാര്‍ വോട്ട് ചെയ്തു. ജില്ലാ കളക്ടര്‍ എന്‍.എസ്.കെ. ഉമേഷ് വരണാധികാരിയായി. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍ പങ്കെടുത്തു. കൊച്ചി കോര്‍പറേഷന്‍, തൃപ്പൂണിത്തുറ, പെരുമ്പാവൂര്‍,കളമശേരി, പറവൂര്‍, ആലുവ, അങ്കമാലി, ഏലൂര്‍, തൃക്കാക്കര, മരട് മുനിസിപ്പാലിറ്റികളും പള്ളിപ്പുറം, കുഴുപ്പിള്ളി, എടവനക്കാട്, നായരമ്പലം, മുളവുകാട്, ഞാറയ്ക്കല്‍, ചേരാനല്ലൂര്‍, കടമക്കുടി, വരാപ്പുഴ, കോട്ടുവള്ളി, ഏഴിക്കര, കടുങ്ങല്ലൂര്‍, ആലങ്ങാട്, ചൂര്‍ണിക്കര, എടത്തല, കീഴ്മാട്, ശ്രീമൂലനഗരം, ചെങ്ങമനാട്, നെടുമ്പാശേരി, കാഞ്ഞൂര്‍, വാഴക്കുളം, ചെല്ലാനം, വടവുകോട് പുത്തന്‍കുരിശ്, ചോറ്റാനിക്കര, മുളന്തുരുത്തി, ഉദയംപേരൂര്‍,കുമ്പളം, കുമ്പളങ്ങി, എളങ്കുന്നപ്പുഴ പഞ്ചായത്തുകളുമാണ് കൊച്ചി മെട്രോപ്പൊളിറ്റന്‍ പ്രദേശത്ത് ഉള്‍പ്പെടുന്ന തദ്ദേശസ്ഥാപനങ്ങള്‍. കൊച്ചി മെട്രോപ്പൊളിറ്റന്‍ പ്രദേശം ഉള്‍പ്പെടുന്ന തദ്ദേശ സ്ഥാപനങ്ങളിലെ ജനപ്രതിനിധികളില്‍ നിന്നാണ് ആസൂത്രണസമിതി അംഗങ്ങളെ തെരഞ്ഞെടുക്കുന്നത്. അംഗങ്ങളില്‍ നിന്ന് ചെയര്‍മാനെയും തെരഞ്ഞെടുക്കും. മെട്രോപ്പൊളിറ്റന്‍ പ്രദേശത്തിന് മുഴുവനായി കരട് വികസന പദ്ധതി തയാറാക്കാന്‍ ഉദ്ദേശിച്ചുള്ളതാണ്ആസൂത്രണ കമ്മിറ്റി. 15 അംഗ കമ്മിറ്റിയില്‍ 10 പേരെ തദ്ദേശസ്ഥാപന ജനപ്രതിനിധികളില്‍ നിന്ന് തെരഞ്ഞെടുക്കും. അഞ്ചു പേരെ സര്‍ക്കാര്‍ നാമനിര്‍ദേശം ചെയ്യും. ഗ്രാമപഞ്ചായത്ത് പ്രസിഡന്‍റുമാരില്‍ നിന്ന് നാലുപേരെയും മുനിസിപ്പല്‍ കൗണ്‍സിലര്‍മാരില്‍ നിന്ന് രണ്ടംഗങ്ങളെയും കോര്‍പറേഷന്‍ കൗണ്‍സിലര്‍മാരില്‍ നിന്ന് നാല് അംഗങ്ങളെയുമാണ് തെരഞ്ഞെടുക്കുന്നത്. ഗ്രാമപഞ്ചായത്ത് പ്രസിഡന്‍റുമാരില്‍നിന്ന് തെരഞ്ഞെടുക്കപ്പെടുന്ന അംഗങ്ങളില്‍ രണ്ടു പേരും മുനിസിപ്പല്‍ കൗണ്‍സിലര്‍മാരില്‍ നിന്നുള്ള ഒരംഗവും കോര്‍പറേഷന്‍ കൗണ്‍സിലര്‍മാരില്‍ നിന്നുള്ള രണ്ട് അംഗങ്ങളും വനിതകളായിരിക്കണം. തദ്ദേശ സ്ഥാപനങ്ങളുടെ കാലാവധി തീരാന്‍ മാസങ്ങള്‍ മാത്രം ശേഷിക്കെ, ഇപ്പോള്‍ തെരഞ്ഞെടുക്കുന്ന ആസൂത്രണ സമിതിക്ക് എത്രനാള്‍ തുടരാന്‍ കഴിയുമെന്നതാണ് ആശങ്ക സൃഷ്ടിക്കുന്നത്. തെരഞ്ഞെടുപ്പിനുശേഷം തദ്ദേശ സ്ഥാപനങ്ങളില്‍ പുതിയ ഭരണസമിതി വരുന്നതോടെ ആസൂത്രണ സമിതിയില്‍ വീണ്ടും തെരഞ്ഞെടുപ്പ് നടത്തേണ്ടിവരും.

മഴയിൽ തളർന്നു റബർ ടാപ്പിംഗ്

ജിജു കോതമംഗലം കോതമംഗലം: തോരാതെ പെയ്യുന്ന മഴ റബർ ടാപ്പിംഗ് മേഖലയെ പ്രതിസന്ധിയിലാക്കി. മഴയത്ത് ടാപ്പിംഗ് നടത്തിയാൽ പുറംഭാഗം (പട്ട) നശിച്ചുപോകുമെന്നു കർഷകർ പറയുന്നു. ഷേഡുകൾ സ്ഥാപിച്ചിട്ടുള്ള മരങ്ങളിലും കനത്ത മഴയിലെ ടാപ്പിംഗ് ലഭിക്കുന്ന പാലിന്‍റെ അളവിനെ ബാധിക്കും. തൊഴിലാളി കുടുംബങ്ങൾ കടുത്ത സാമ്പത്തിക സാമ്പത്തിക ഞെരുക്കത്തിലായിരിക്കുകയാണ്. ഇടത്തരം ചെറുകിട കർഷക കുടുംബങ്ങളും, ചെറുകിട വ്യാപാരികളും പറഞ്ഞറിയിക്കാനാവാത്ത ദുരിതത്തിലാണ്. ജില്ലയിൽ കഴിഞ്ഞയാഴ്ചയിലുണ്ടായ കനത്ത കാറ്റിൽ 6800 റബർ മരങ്ങൾ ഒടിഞ്ഞുവീഴുകയോ മറിയുകയോ ചെയ്തിട്ടുണ്ടെന്നു കൃഷിവകുപ്പ് അധികൃതർ പറഞ്ഞു. ‌ഇതിൽ അയ്യായിരത്തോളം മരങ്ങൾ നിലവിൽ ടാപ്പിംഗ് നടത്തുന്നവയാണ്. 820 റബർ കർഷകർ തങ്ങളുടെ കൃഷി നശിച്ച വിവരം അധികൃതരെ അറിയിച്ചിട്ടുണ്ട്. സ്കൂൾ തുറന്നതോടെ കുട്ടികളുടെ യൂണിഫോമും, പുസ്തകങ്ങളും, ഫീസും, യാത്രയും എല്ലാം ചേർന്ന് അധികം പണച്ചെലവുണ്ടാകുന്ന ഘട്ടത്തിലാണ് കനത്ത മഴയിൽ ടാപ്പിംഗ് മേഖല പ്രതിസന്ധിയിലാകുന്നത്. ദിവസക്കൂലിക്കു പണിയെടുക്കുന്ന ടാപ്പിംഗ് തൊഴിലാളികളെ ഇതു കഷ്ടത്തിലാക്കി. ടാപ്പിംഗ് കുറയുന്പോൾ ആശ്രയിക്കാറുള്ള മറ്റു തൊഴിലുകളും പെരുമഴയിൽ എളുപ്പമല്ല. മഴ നീണ്ടുനിൽക്കുന്ന സാഹചര്യങ്ങളിൽ തൊഴിലാളി കുടുംബങ്ങൾക്ക് സൗജന്യ റേഷൻ ഏർപ്പെടുത്താനും സാമ്പത്തിക സഹായം നൽകാനും സർക്കാർ തയാറാകണമെന്ന ആവശ്യം ഉ‍യരുന്നുണ്ട്.

കൃഷിയിടങ്ങളിൽ‌ ദുരിതപ്പെയ്ത്ത് !

കൊച്ചി: പെരുമഴയും കനത്ത കാറ്റും കൃഷിയിടങ്ങളിൽ സങ്കടപ്പെയ്ത്താകുന്നു. ജില്ലയിൽ വാഴ, നെല്ല്, റബർ കൃഷികളിൽ വലിയ നാശനഷ്ടങ്ങളാണ് കാലവർഷം വിതയ്ക്കുന്നത്. കഴിഞ്ഞ ഒരാഴ്ചയ്ക്കിടെ ജില്ലയിൽ 24.5 കോടി രൂപയുടെ കാർഷിക വിളനാശമുണ്ടായെന്നു കൃഷിവകുപ്പിന്‍റെ കണക്കുകൾ വ്യക്തമാക്കുന്നു. ജൂണിൽ മാത്രം മഴയും കാറ്റും നഷ്ടമുണ്ടാക്കിയ കൃഷികൾക്കു കൃഷിവകുപ്പിൽ നിന്നു നഷ്ടപരിഹാരം ആവശ്യപ്പെട്ടുള്ള അപേക്ഷകരുടെ എണ്ണം 10,000 കടന്നു. 365 ഓളം ഹെക്ടറിലെ കൃഷിക്കു ചെറുതോ വലുതോ ആയ അളവിൽ കാലവർഷക്കെടുതിയുണ്ടായെന്നും കൃഷി വകുപ്പ് അധികൃതർ ചൂണ്ടിക്കാട്ടി. കാറ്റിലും വിലയിടിവിലും ഉലഞ്ഞ് വാഴക്കൃഷി മൂന്നു മാസം മുന്പു കിലോയ്ക്ക് 60 രൂപയിലധികം വില കിട്ടിയിരുന്ന ഏത്തക്കായ്ക്ക് ഇപ്പോൾ വില നാല്പതിലേക്കു താണു. വിലയിടിവിനൊപ്പം കനത്ത കാറ്റിലും മഴയിലുമുണ്ടായ നാശനഷ്ടങ്ങളും വാഴ കർഷകരെ വെട്ടിലാക്കി. കഴിഞ്ഞ മൂന്നാഴ്ചയ്ക്കിടെ 2.25 ലക്ഷത്തിലധികം വാഴ ജില്ലയിൽ കാലവർഷക്കെടുതിയിൽ നശിച്ചു. ഇതിൽ പകുതിയിലേറെയും കുലച്ചു പാകമായ വാഴകളാണെന്നു കൃഷിവകുപ്പ് ശേഖരിച്ച കണക്കുകൾ വ്യക്തമാക്കുന്നു. 3300 കർഷകരുടെ വാഴക്കൃഷി കാലവർഷത്തിൽ ഇതുവരെ നശിച്ചു. വാഴക്കൃഷിയിൽ‌ മാത്രം ജില്ലയിലെ നഷ്ടം 13 കോടിയലധികമാണ്. ഓണത്തിനു മികച്ച വില പ്രതീക്ഷിച്ചു വിളവെടുക്കാൻ പാകത്തിനു കൃഷി ചെയ്തിരുന്ന വാഴത്തോട്ടങ്ങൾ പലയിടത്തും, വെള്ളം കെട്ടി നശിക്കുന്ന സ്ഥിതിയിലാണ്. നെല്ല് വെള്ളത്തിൽ ഭാരിച്ച കൂലിയും നെൽപ്പാടങ്ങളിലെ അനുകൂല സാഹചര്യങ്ങൾ കുറഞ്ഞതും മൂലം നെൽകൃഷി നഷ്ടത്തിലായ കർഷകർക്കു കനത്ത മഴയും ദുരിതമായിട്ടുണ്ട്. 19 ഹെക്ടറിലെ നെൽകൃഷിക്ക് ഇതുവരെ ജില്ലയിൽ നാശം സംഭവിച്ചിട്ടുണ്ട്. പാകമായ നെല്ല് വെള്ളത്തിലായതും പാടത്തെ രൂക്ഷമായ വെള്ളക്കെട്ടുമെല്ലാം കർഷകർ നേരിടുന്ന പ്രതിസന്ധികളാണ്. അങ്കമാലി, കാലടി, നെടുന്പാശേരി, പെരുന്പാവൂർ, മൂവാറ്റുപുഴ മേഖലകളിലെല്ലാം കാലവർഷം കർഷകരെ കഷ്ടത്തിലാക്കിയിട്ടുണ്ട്. കാലവർഷക്കെടുതിയിൽ കൃഷി നശിച്ചവർക്കു സർക്കാർ സഹായം ലഭ്യമാക്കണമെന്ന ആവശ്യവുമായി കർഷക സംഘടനകൾ രംഗത്തെത്തിയിട്ടുണ്ട്. ജാതിക്ക കൃഷിയെയും കാറ്റും മഴയും ബാധിച്ചു. 4500 ജാതിക്കാ മരങ്ങൾക്കു കഴിഞ്ഞ രണ്ടാഴ്ചയ്ക്കിടെ നാശമുണ്ടായി. കോതമംഗലം താലൂക്കിന്‍റെ താഴ്ന്ന മേഖലകൾ ദിവസങ്ങളായി വെള്ളം കെട്ടി കൃഷി നശിക്കുന്ന സ്ഥിതിയിലാണ്. കപ്പ, വാഴ, ഇഞ്ചി തുടങ്ങിയ കൃഷികൾ വെള്ളത്തിനടിയിലായി. അടയ്ക്ക, കുരുമുളക്, പൈനാപ്പിൾ തുടങ്ങിയ കൃഷികളെയും കനത്ത മഴ ബാധിച്ചിട്ടുണ്ട്.

മാമലക്കണ്ടത്ത് കാറ്റില്‍ നാല് വീടുകള്‍ക്ക് ഭാഗികനാശം

കോതമംഗലം: മഴയ്‌ക്കൊപ്പം ഉണ്ടായ ശക്തമായ കാറ്റില്‍ കുട്ടമ്പുഴ പഞ്ചായത്തിലെ മാമലകണ്ടം മേഖലയില്‍ നാല് വീടുകള്‍ക്ക് ഭാഗികനാശം. 20 ഓളം കര്‍ഷകരുടെ വിവിധ കാര്‍ഷികവിളകള്‍ക്കും നാശം. മരങ്ങള്‍ വീണ് ഗതാഗത തടസവും വൈദ്യുത തൂണുകള്‍ ഒടിയുകയും വൈദ്യുത കമ്പികള്‍ പൊട്ടി വീണും പ്രദേശത്തെ വൈദ്യുതിയും നിലച്ചിരുന്നു. ഇന്നലെ പുലര്‍ച്ചെ 3.30 ഓടെയാണ് കാറ്റ് നാശം വിതച്ചത്. എളംബ്ലാശേരി ആദിവാസി ഉന്നതിയിലെ കന്നിയമ്മ ചെകിടന്‍ ഗിരിജ തങ്കപ്പന്‍, ലീല സത്യന്‍, മാമലകണ്ടം തൊണ്ടിമലയില്‍ ജാനു സുകുമാരന്‍ എന്നിവരുടെ വീടുകള്‍ക്കാണ് തകര്‍ച്ച നേരിട്ടത്. കന്നിയമ്മയുടെ വീടിന്‍റെ ഷീറ്റ് മേഞ്ഞ മേല്‍ക്കൂര മുഴുവനും മരങ്ങള്‍ വീണാണ് തകര്‍ന്നത്. ജാനു സുകുമാരന്‍റെ വീടിന് ഭാഗികമായി തകര്‍ച്ച നേരിട്ടു. കാലപ്പഴക്കംകൊണ്ട് ചോര്‍ച്ചയും മറ്റ് തകരാറും കാരണം പടുത വലിച്ച് കെട്ടി താമസിക്കുകയായിരുന്നു അഞ്ചംഗ കുടുംബം. മേല്‍ക്കൂരയുടെ ഒരു വശം തകര്‍ന്നതിനൊപ്പം കൃഷിനാശവും ഉണ്ടായിട്ടുണ്ട്. പുലര്‍ച്ചെ ആയതുകൊണ്ട് പലരും ഉറക്കത്തിലായിരുന്നു. എന്താണ് സംഭവിച്ചതെന്ന് ആദ്യം മനസിലായില്ല. വലിയൊരു ശബ്ദത്തോടെയാണ് കാറ്റ് വീശിയത്. പലരും പുറത്തേക്ക് ഓടി മാറുകയായിരുന്നു. മേല്‍ക്കൂര പൂര്‍ണമായും തകര്‍ന്ന കന്നിയമ്മയുടെ വീട്ടുസാധനങ്ങളുല്ലാം വെള്ളത്തിലായി. വൈദ്യുതി നിലച്ചതുകൊണ്ട് രാവിലെയാണ് നാശം വിലയിരുത്തിയത്. എളംബ്ലാശേരി ഊരുമൂപ്പന്‍ രാഘവന്‍ കോരാളിയില്‍, ചിന്നാണ്ടി പാട്ടന്‍, വാര്‍ഡ് മെംമ്പര്‍ ശ്രീജ ബിജു എന്നിവര്‍ ഉള്‍പ്പെടെ ഇരുപതോളം പേരുടെ റബര്‍, തെങ്ങ്, കവുങ്ങ്, ഏത്തവാഴ തുടങ്ങിയ വിവിധ വിളകളും നശിച്ചു. രാഘവന്‍റെ കൃഷിയിടത്തില്‍ ഉണ്ടായിരുന്ന വിവിധ ഇനം പഴവര്‍ഗ ചെടികളും കാറ്റെടുത്തു.

കുടുംബശ്രീ സിഡിഎസ് വാർഷികം സംഘടിപ്പിച്ചു

പിറവം: രാമമംഗലം പഞ്ചായത്ത് കുടുംബശ്രീ സിഡിഎസ് വാർഷികം സംഘടിപ്പിച്ചു. കൈതപ്പിളളിൽ ഓഡിറ്റോറിയത്തിൽ അനൂപ് ജേക്കബ് എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് പി.വി. സ്റ്റീഫൻ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് സ്‌മിത എൽദോസ് മുഖ്യപ്രഭാഷണം നടത്തി. മെമ്പർ സെക്രട്ടറി കെ. മനോജ്‌കുമാർ വാർഷിക റിപ്പോർട്ട് അവതരിപ്പിച്ചു. സിഡിഎസ് ചെയർപേഴ്സൺ ഷീബ, ജില്ലാ പഞ്ചായത്ത് പൊതുമരാമത്ത് സ്ഥിരംസമിതി അധ്യക്ഷ ആശ സനിൽ, രാമമംഗലം പഞ്ചായത്ത് വൈസ്പ്രസിഡന്‍റ് മേരി എൽദോ, ഷൈജ ജോർജ്, ആലീസ് ജോർജ്, ജിജോ ഏലിയാസ് തുടങ്ങിയവർ പ്രസംഗിച്ചു. വിവിധ മേഖലകളിൽ കഴിവുകൾ തെളിയിച്ച വ്യക്തിത്വങ്ങളെയും പരീക്ഷകളിൽ ജയം നേടിയവരെയും ആദരിച്ചു. കുടുംബശ്രീ അംഗങ്ങളുടെ അനുഭവം പങ്കുവയ്ക്കൽ, കലാപരിപാടികൾ എന്നിവയും നടന്നു.

ദീപിക ബാലജന സഖ്യം കൂത്താട്ടുകുളം മേഖല ഉദ്ഘാടനം

കൂത്താട്ടുകുളം: ദീപിക ബാലജന സഖ്യത്തിന്‍റെ തൊടുപുഴ പ്രവിശ്യാ പ്രവർത്തനവർഷ ഉദ്ഘാടനവും കൂത്താട്ടുകുളം മേഖല ഉദ്ഘാടനവും മേരിഗിരി പബ്ലിക് സ്കൂളിൽ കൂത്താട്ടുകുളം നഗരസഭ ചെയർപേഴ്സൺ വിജയ ശിവൻ നിർവഹിച്ചു. സ്കൂൾ പ്രിൻസിപ്പൽ ഫാ. മാത്യു കരീത്തറ അധ്യക്ഷത വഹിച്ചു. ദീപിക ബാലജന സഖ്യം ഡയറക്ടർ ഫാ. റോയി കണ്ണഞ്ചിറ (കൊച്ചേട്ടൻ) മുഖ്യ പ്രഭാഷണം നടത്തി. തൊടുപുഴ പ്രവിശ്യാ കോ ഓർഡിനേറ്റർ റോയ് ജെ. കല്ലറങ്ങാട്ട്, ദീപിക ബാലജന സഖ്യം സ്റ്റേറ്റ് റിസോഴ്സ് ടീം കോ ഓർഡിനേറ്റർ തോമസ് കുണിഞ്ഞി തുടങ്ങിയവർ പ്രസംഗിച്ചു.

വീടിന് മുകളിലേക്ക് മരങ്ങൾ കടപുഴകി വീണു

മൂവാറ്റുപുഴ: കഴിഞ്ഞ ദിവസമുണ്ടായ ശക്തമായ കാറ്റിലും മഴയിലും വീടിന് മുകളിലേക്ക് മരങ്ങൾ കടപുഴകി വീണു. ഞായറാഴ്ച വൈകുന്നേരം ആറോടെ ഈസ്റ്റ് മാറാടി പള്ളിക്കവലയ്‌ക്ക് സമീപം ആര്യപ്പിള്ളിയിൽ ഷിനാജ് ടി. റസാഖിന്‍റെ വീടിന് മുകളിലേക്കാണ് പുരയിടത്തിൽ നിന്നിരുന്ന പുളിമരവും തെങ്ങും കടപുഴകി വീണത്. മരം കടപുഴകി വീണ സമയം റസാഖിന്‍റെ മാതാവും കുട്ടിയും വീട്ടിലുണ്ടായിരുന്നെങ്കിലും പരിക്കുകളേൽക്കാതെ രക്ഷപ്പെട്ടു. വീടിന്‍റെ മേൽക്കൂര ഭാഗികമായി തകർന്നു. കോണ്‍ക്രീറ്റിന് പൊട്ടലും സംഭവിച്ചിട്ടുണ്ട്. പഞ്ചായത്തംഗവും വില്ലേജ് ഓഫീസറും സ്ഥലം സന്ദർശിച്ച് നാശനഷ്ടങ്ങൾ വിലയിരുത്തി.

കാടുകയറി മൂവാറ്റുപുഴ പ്രീമെട്രിക് ഹോസ്റ്റൽ

ഹോസ്റ്റൽ അടച്ചുപൂട്ടിയത് പുനരുദ്ധാരണത്തിന്‍റെ പേരിൽ മൂവാറ്റുപുഴ: പതിറ്റാണ്ടുകളായി മൂവാറ്റുപുഴ നഗരത്തിൽ പ്രവർത്തിച്ച് വന്നിരുന്ന പ്രീമെട്രിക് ഹോസ്റ്റൽ അടച്ചുപൂട്ടിയിട്ട് വർഷങ്ങൾ പിന്നിടുന്നു. ജില്ലയുടെ കിഴക്കൻ മേഖലയിലെ എസ്‌സി, എസ്ടി, ഒബിസി വിഭാഗത്തിൽപ്പെട്ട അഞ്ച് മുതൽ പത്താം ക്ലാസ് വരെ പഠിക്കുന്ന നിർധനരായ പെണ്‍കുട്ടികൾക്ക് പഠനത്തോടൊപ്പം താമസ സൗകര്യംകൂടി ഒരുക്കുന്നതിനായാണ് പട്ടികജാതി വികസന വകുപ്പ് വെള്ളൂർക്കുന്നത് പ്രീമെട്രിക് ഹോസ്റ്റൽ ആരംഭിച്ചത്. എന്നാൽ പുനരുദ്ധാരണ പ്രവർത്തനങ്ങളുടെ പേരിൽ മൂന്നു വർഷങ്ങൾക്ക് മുൻപാണ് ഹോസ്റ്റൽ അടച്ചുപൂട്ടിയത്. പിന്നീട് പുനരുദ്ധാരണ പ്രവർത്തനങ്ങൾ നടത്തുന്നതിന് അധികൃതർ തയാറായിട്ടില്ല. ഹോസ്റ്റലിൽ ഉണ്ടായിരുന്ന എസ്‌സി, എസ്ടി വിഭാഗത്തിൽപ്പെട്ട 27 പെണ്‍കുട്ടികളും ഒബിസി വിഭാഗത്തിൽപ്പെട്ട മൂന്നു പെണ്‍കുട്ടികളും ആലുവ, പെരുന്പാവൂർ പ്രദേശങ്ങളിലുള്ള ഹോസ്റ്റലിലേക്ക് മാറേണ്ടിവന്നിരുന്നു. പുനരുദ്ധാരണത്തിന്‍റെ പേരിൽ അടച്ചുപൂട്ടിയ ഹോസ്റ്റൽ ഇപ്പോൾ കാടുകയറി കിടക്കുന്ന അവസ്ഥയാണ്. ഹോസ്റ്റൽ അടച്ചുപൂട്ടിയതോടെ ജില്ലയിടെ കിഴക്കൻമേഖലയിലെ പട്ടികജാതി വിഭാഗത്തിൽപ്പെട്ട പെണ്‍കുട്ടികളുടെ പഠനം ദുഷ്കരമായിരിക്കുകയാണ്. അതേസമയം പട്ടികജാതി വികസന വകുപ്പാണ് പുനരുദ്ധാരണത്തിന്‍റെ പേരിൽ ഹോസ്റ്റൽ അടച്ചുപൂട്ടിയതെന്നാണ് നഗരസഭ അധികൃതർ പറയുന്നത്. ഹോസ്റ്റലിന്‍റെ പുനരുദ്ധാരണത്തിനായി നഗരസഭ 4.99 കോടി രൂപയുടെ എസ്റ്റിമേറ്റ് മന്ത്രിക്ക് തയാറാക്കി നൽകിയിരുന്നെന്നും എന്നാൽ പട്ടികജാതി വികസന വകുപ്പ് ഈ എസ്റ്റിമേറ്റ് അംഗീകരിക്കാതെ പൊതുമരാമത്ത് വകുപ്പ് തയാറാക്കി നൽകുന്ന എസ്റ്റിമേറ്റ് മാത്രമേ സ്വീകരിക്കു എന്ന നിലപാടെടുത്തതും പിന്നീട് പ്രീമെട്രിക് ഹോസ്റ്റലിന് പകരം പോസ്റ്റ്മെട്രിക് ഹോസ്റ്റലാണ് ഇനി നിർമിക്കേണ്ടതെന്ന് അറിയിച്ചതുമാണ് കാലതാമസം നേരിടാൻ കാരണമെന്ന് നഗരസഭാധ്യക്ഷൻ പി.പി. എൽദോസ് പറഞ്ഞു.

വെയ്റ്റിംഗ് ഷെഡിൽ ചെളിവെള്ളക്കെട്ട്

കോലഞ്ചേരി: മീമ്പാറ വെയ്റ്റിംഗ് ഷെഡിൽ ചെളിവെള്ളക്കെട്ട്. ബസ് യാത്രക്കാർക്ക് മഴക്കാലത്ത് ആശ്രയമായി മാറേണ്ട വെയ്റ്റിംഗ് ഷെഡിലാണ് മഴവെള്ളവും ഒഴുകിവരുന്ന ചെളി വെള്ളവും ഇരച്ച് കയറുന്നത്. വെയ്റ്റിംഗ് ഷെഡിൽ കയറിയ വെള്ളം കളയാൻ നിലവിൽ കാന കീറിയിരിക്കുകയാണ്. പൂതൃക്ക പഞ്ചായത്തിന്‍റെ കീഴിൽ 1978ൽ സ്ഥാപിച്ച വിശ്രമ കേന്ദ്രം കാലപ്പഴക്കം കൊണ്ട് നശിച്ച അവസ്ഥയിലാണ്. വാർക്കയിലെ കമ്പികൾ തുരുമ്പെടുത്ത് കോൺക്രീറ്റ് പാളികൾ പൊളിഞ്ഞ് താഴെ വീഴുന്ന അവസ്ഥയിലാണ്. ചൂണ്ടി - രാമമംഗലം റോഡ് ഉയർത്തി ടാർ ചെയ്തതോടെ നിലവിൽ കുഴിയിലാണ് വെയ്റ്റിംഗ് ഷെഡ് സ്ഥിതി ചെയ്യുന്നത്. നാടിനും യാത്രക്കാർക്കും ഉപകാരമാകുംവിധം അടിയന്തരമായി ഇത് പുനർനിർമിക്കണമെന്നാണ് നാട്ടുകാരുടെ ആവശ്യം.

ശ്രേഷ്ഠ ബാവയ്ക്ക് സ്വീകരണം നൽകി

കോതമംഗലം: ശ്രേഷ്ഠ കാതോലിക്ക ബസേലിയോസ് ജോസഫ് ബാവയ്ക്ക് മാർ ബസേലിയോസ് മെഡിക്കൽ മിഷൻ അസോസിയേഷന്‍റെ ആഭിമുഖ്യത്തിൽ മാർ ബസേലിയോസ് ഡെന്‍റൽ കോളജിൽ സ്വീകരണം നൽകി. കോതമംഗലം മേഖല മെത്രാപ്പോലീത്ത ഏലിയാസ് മാർ യൂലിയോസ് അധ്യക്ഷത വഹിച്ചു. മുതിർന്ന മാധ്യമ പ്രവർത്തകൻ ആർ. ശ്രീകണ്ഠൻ നായർ ഉദ്ഘാടനം നിർവഹിച്ചു. കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ അനുഗ്രഹ പ്രഭാഷണം നടത്തി. ഡീൻ കുര്യാക്കോസ് എംപി, ആന്‍റണി ജോണ്‍ എംഎൽഎ, എംബിഎംഎം അസോസിയേഷൻ സെക്രട്ടറി സലിം ചെറിയാൻ, മാർത്തോമാ ചെറിയപള്ളി വികാരി ഫാ. ജോസ് മാത്യു തച്ചേത്തുകുടി, നഗരസഭാധ്യക്ഷൻ കെ.കെ. ടോമി, നെല്ലിക്കുഴി പഞ്ചായത് പ്രസിഡന്‍റ് പി.എം. മജീദ്, മാർ ബസേലിയോസ് ഡെന്‍റൽ കോളജ് പ്രിൻസിപ്പൽ ബൈജു പോൾ കുര്യൻ, ട്രഷറർ ബിബിൻ ജോണ്‍, അസോസിയേഷൻ വൈസ് പ്രസിഡന്‍റ് കെ.ഒ. ഷാജി എന്നിവർ പ്രസംഗിച്ചു. ശ്രേഷ്ഠ ബാവായുടെ മുഖ്യ കാർമികത്വത്തിൽ മാർ ബസേലിയോസ് ഡെന്‍റൽ കോളജിന്‍റെ പുതിയ ഹോസ്റ്റൽ ബ്ലോക്കിന്‍റെ ശിലാസ്ഥാപനം നിർവഹിച്ചു. അതോടൊപ്പം കോളജിന്‍റെ 2025- 2026 പ്രവർത്തനങ്ങൾ ഉൾപ്പെടുത്തിയ ന്യൂസ് ലെറ്റർ ഏലിയാസ് മാർ യൂലിയോസ് മെത്രാപ്പോലീത്ത പ്രകാശനം ചെയ്തു. ചടങ്ങിൽ മാർത്തോമാ ചെറിയപള്ളി ഭരണ സമിതിയംഗങ്ങൾ, എംബിഎംഎം അസോസിയേഷന്‍റെ വിവിധ സ്ഥാപനങ്ങളിൽ നിന്നുള്ള ഡോക്ടർമാർ, അധ്യാപകർ, അനധ്യാപകർ, വിദ്യാർഥികൾ എന്നിവർ പങ്കെടുത്തു.

റോഡ് തകർന്ന നിലയിൽ

പാലക്കുഴ: തൊടുപുഴ - പിറവം റോഡിൽ പാലക്കുഴ എംസി കവലയ്ക്ക് സമീപം റോഡ് തകർന്ന നിലയിൽ. കുമരകം - കന്പംമേട് സ്റ്റേറ്റ് ഹൈവേയുടെ ഭാഗമായ ടി.പി റോഡിൽ പാലക്കുഴ എം.സി കവലയ്ക്ക് സമീപം റോഡിൽ വലിയകുഴികൾ രൂപപ്പെടുകയും നിത്യേന അപകടങ്ങൾ പതിവായിരിക്കുകയാണ്. ഈ റോഡിൽ മാറിക മുതൽ കരിന്പന വരെയുള്ള ഭാഗം ഒരു മാസം മുന്പാണ് പുനർനിർമിച്ചത്. റോഡ് ഉയർത്തുകയും ഇരുവശവും കോണ്‍ക്രീറ്റ് ചെയ്തു വെള്ളം കെട്ടിക്കിടക്കുന്നത് ഒഴിവാക്കുന്നതിനുള്ള മാർഗവും സ്വീകരിച്ചിരുന്നു. എന്നാൽ നിർമാണത്തിലെ അശാസ്ത്രീയതയും ഉപയോഗിച്ച വസ്തുക്കളുടെ ഗുണനിലവാരമില്ലായ്മയും ചുരുങ്ങിയ ദിവസങ്ങൾക്കുള്ളിൽ ഈ ഭാഗത്തെ റോഡിലെ ടാറിംഗ് പൊളിഞ്ഞു പോവുകയും വലിയ കുഴികൾ രൂപപ്പെടുന്നതിനും കാരണമായി. മഴക്കാലത്ത് കുഴികളിൽ വെള്ളം കെട്ടിനിന്ന് ഇവിടെ അപകടം നിത്യസംഭവമായി മാറിയിരിക്കുകയാണ്. ധാരാളം സ്കൂൾ വാഹനങ്ങളും, മറ്റും കടന്നുപോകുന്ന വഴിയാണിത്. അടിയന്തരമായി റോഡ് യുദ്ധകാലാടിസ്ഥാനത്തിൽ സഞ്ചാരയോഗ്യമാക്കണമെന്ന് ആവശ്യപ്പെട്ട് ബ്ലോക്ക് പഞ്ചായത്തംഗം സിബി ജോർജ് അധികാരികൾക്ക് പരാതി നൽകി.

കനത്ത മഴയിൽ വീട് തകർന്നു

പറവൂർ : തിങ്കൾ രാത്രി പെയ്ത കനത്ത മഴയിൽ വീട് തകർന്ന് വീണു. വടക്കേക്കര പഞ്ചായത്ത് 20-ാം വാർഡിൽ ചെട്ടിക്കാട് നാലുകണ്ടത്തിൽ ജാനകി കൃഷ്ണന്‍റെഋ വീടാണ് മഴയിലും കാറ്റിലും തകർന്നു വീണത്. ഇളയമകൻ രജീവും കുടുംബവുമാണ് 79 കാരിയായ ജാനകി കൃഷ്ണനോടൊപ്പം വീട്ടിൽ താമസിക്കുന്നത്. സ്കൂൾ അവധി ആയതിനാൽ ഇവർ ബന്ധു വീട്ടിൽ പോയതിനാൽ സംഭവസമയത്ത് വീട്ടിൽ ആരും ഉണ്ടാകാതിരുന്നത് വൻ അപകടം ഒഴിവാക്കി. വടക്കേക്കര പഞ്ചായത്ത് അധികൃതരുംമൂത്തകുന്നം വില്ലേജ് ഓഫീസ് ഉദ്യോഗസ്ഥരും സ്ഥലത്തെത്തി പരിശോധന നടത്തി. ഇവർക്ക് താമസിക്കാൻ താൽക്കാലിക സംവിധാനം ഒരുക്കിയിട്ടുണ്ട്.

റോഡിലേക്ക് മരംവീണ് വിദ്യാർഥിനി അടക്കം രണ്ടുപേർക്ക് പരിക്ക്

ഏലൂർ: ഏലൂർ പാട്ടുപുരക്കൽ കവലയിലുള്ള പതിറ്റാണ്ടുകൾ പഴക്കമുള്ള ക്ഷേത്ര പരിസരത്തെ കൂറ്റൻ ആൽമരത്തിന്‍റെ ഒരു ഭാഗം റോഡിലേക്ക് ഒടിഞ്ഞു വീണു. സ്കൂൾ കുട്ടിയടക്കം രണ്ടു പേർക്ക് പരിക്കേറ്റു. ഇന്നലെ രാവിലെ എട്ടോടെയായിരുന്നു സംഭവം. ധാരാളം കുട്ടികളും ജോലിക്ക് പോകാൻ എത്തിയ മുതിർന്നവരും ഇവിടെയുണ്ടായിരുന്നു. സ്വകാര്യ ബസിൽ ആളുകൾ കയറി പ്പോയ ഉടനെയാണ് അപകടമുണ്ടായത്. അതുകൊണ്ട് വൻ ദുരന്തം ഒഴിവായി. ഇവിടെ ബസ് കാത്ത് നിന്ന മഞ്ഞുമ്മൽ ഗാർഡിയൻ എഞ്ചൽസ് സ്കൂളിലെ വിദ്യാർഥിനിയും അധ്യാപികയുമാണ് അപകടത്തിൽപ്പെട്ടത്. ഒമ്പതാം ക്ലാസിൽ പഠിക്കുന്ന ഏലൂർ മന്ത്രത്ത് പമ്പിൽ കൃഷ്ണകുമാറിന്‍റെ മകൾ കീർത്തി (13) എന്ന കുട്ടിക്ക് തലയ്ക്കാണ് പരിക്ക്. പ്രാഥമിക ചികിത്സക്ക് ശേഷം വിദഗ്ധ ചികിത്സക്കായി അമൃത ആശുപത്രിയിലേക്ക് മാറ്റി, അധ്യാപികയായ ഏലൂരിൽ വാടകയ്ക്ക് താമസിക്കുന്ന ചേരാനല്ലൂർ തോട്ടക്കകത്ത് വീട്ടിൽ സ്ലെഫിൻ സാജു ( 54) മഞ്ഞുമ്മൽ ആശുപത്രിയിലുമാണ് ചികിത്സയ്ക്കായി പ്രവേശിപ്പിച്ചത്. ഇവർക്ക് കാലിൽ പൊട്ടലുണ്ട്. പരിസരത്തെ മൂന്നോളം വൈദ്യുത പോസ്റ്റുകൾ ഒടിഞ്ഞു വീണിരുന്നു. പ്രദേശത്തെ വൈദ്യുതി നിലച്ചു. സമീപത്തെ കടകൾക്കും നാശനഷ്ടമുണ്ടായി. മണിക്കൂറുകൾ ഗതാഗതക്കുരുക്കുമുണ്ടായി. ഏലൂർ, പറവൂർ ഭാഗത്തു നിന്നുമെത്തിയ ഫയർഫോഴ്സും പോലീസും നാട്ടുകാരും ചേർന്ന് ഏറെ നേരത്തെ പരിശ്രമത്തിനൊടുവിൽ മരം മുറിച്ചുമാറ്റിയാണ് ഗതാഗതം പുനസ്ഥാപിച്ചത്.

സേക്രഡ് ഹാർട്ട്‌ സിഎംഐ പബ്ലിക് സ്കൂളിൽ "ലോറേറ്റ്സ് ഡേ'

കൊച്ചി: ചെറിയ നേട്ടങ്ങളിൽ അഭിരമിക്കാതെ വലിയ ലക്ഷ്യങ്ങൾക്കു വേണ്ടി പ്രവർത്തിക്കണമെന്ന് എറണാകുളം സബ് കളക്ടർ കെ. മീര പറഞ്ഞു. തേവര സേക്രഡ് ഹാർട്ട്‌ സിഎംഐ പബ്ലിക് സ്കൂളിലെ 10, 12 ക്ലാസുകളിൽ മികച്ച വിജയം നേടിയ വിദ്യാർഥകളെ അനുമോദിക്കുന്ന സമ്മേളനം "ലോറേറ്റ്സ് ഡേ' ഉദ്ഘാടനം ചെയ്യുകയായിരുന്നു അവർ. പ്രിൻസിപ്പൽ ഫാ. വർഗീസ് കാച്ചപ്പള്ളി, വൈസ് പ്രിൻസിപ്പൽ വിനിത മെൻഡസ്, ഹെഡ്മിസ്ട്രസ് സിന്ധു തറയിൽ, കെജി ഹെഡ്മിസ്ട്രസ് ബിന്ദു തോമസ് എന്നിവർ പ്രസംഗിച്ചു. 10, 12 ക്ലാസുകളിലെ സ്കൂൾ ടോപ്പർമാരായ ശ്രാവൺ പ്രശാന്ത്, സെറിൻ പദുവ, മാർക്കോസ് ബി. വർഗീസ്, ബെൻ ജോർജ് സൈമൻ, അയാന തോമസ്, നിരഞ്ജൻ എം. മേനോൻ, ആൻ തെരേസ ജോർജ് എന്നിവരെ ആദരിച്ചു.

പുതിയ എല്‍ഇഡി വിളക്കുകള്‍ തെളിയുന്നില്ല; കരാറുകാരെ കുറ്റപ്പെടുത്തി മേയര്‍

കൊച്ചി: നഗരത്തില്‍ പുതുതായി സ്ഥാപിച്ച എല്‍ഇഡി ലൈറ്റുകള്‍ തെളിയുന്നില്ലെന്ന പ്രതിപക്ഷത്തിന്‍റെ ആരോപണത്തില്‍ കരാര്‍ കമ്പിനിയെ പഴിച്ച് മേയര്‍. വിഷയം ഉന്നയിച്ച് മുന്പ് സ്മാര്‍ട്ട് സിറ്റി സിഇഒയുടെയും ഡെപ്യൂട്ടി ചീഫ് എന്‍ജിനീയറുടെയും നേതൃത്വത്തില്‍ യോഗം നടത്തിയിരുന്നു. പരിഹാരം ഉണ്ടാകാത്തത് കൊണ്ട് ലൈറ്റുകള്‍ നന്നാക്കുന്നതിനായി സിഎസ്എംഎല്ലിന് കത്തു നല്‍കുമെന്നും മേയര്‍ അഡ്വ. എം. അനില്‍കുമാര്‍ കൗണ്‍സിലില്‍ പറഞ്ഞു. എല്‍ഇഡി ലൈറ്റുകളുടെ കാര്യത്തില്‍ കുറച്ച് പ്രശ്‌നങ്ങളുണ്ട്. പുതിയ ഏജന്‍സിയാണ് പദ്ധതി ഏറ്റെടുത്തിട്ടുളളത്. മഴക്കാലത്ത് ലൈറ്റുകള്‍ പോകുന്നത് പതിവാണ്. നോര്‍ത്ത് പാലം, ദേശീയപാതയിലുമെല്ലാം എല്‍ഇഡി ലൈറ്റുകള്‍ സ്ഥാപിച്ചു. ബാക്കി പോരായ്മകള്‍ പരിഹരിക്കുന്നതിന് കത്തു നല്‍കുമെന്നു മേയര്‍ പറഞ്ഞു.

എംഎംപിഎസ് വാർഷിക പൊതുയോഗം

ചെറായി: കടലിലെ അശാസ്ത്രീയ മത്സ്യബന്ധന രീതികളിൽ നിന്ന് സ്വയം ബോധവത്കരണത്തിലൂടെ പിൻതിരിയണമെന്ന് മുനമ്പം യന്ത്രവത്കൃത മത്സ്യബന്ധന പ്രവർത്തക സംഘം (എംഎംപിഎസ് ) വാർഷിക പൊതുയോഗം ആവശ്യപ്പെട്ടു. കടലിനെ മത്സ്യ ശോഷണത്തിൽ നിന്നും സംരക്ഷിക്കുന്നതിനു ബോട്ടുടമകൾക്കും തൊഴിലാളികൾക്കും ഒരുപോലെ ഉത്തരവാദിത്തം ഉണ്ടെന്നും യോഗം ചൂണ്ടിക്കാട്ടി. പ്രസിഡന്‍റ് ഒ.ജെ. ജെൻട്രിൻ അധ്യക്ഷനായി. പുതിയ ഭാരവാഹികളായി കെ.ബി. രാജീവ് - പ്രസിഡന്‍റ് , ഇ.കെ. ദിലീപ്- വൈസ് പ്രസിഡന്‍റ്, നീരജ് ടി. ആർ -സെക്രട്ടറി , ഷബീർ ബാവ - ജോ. സെക്രട്ടറി, സാംബൻ പോണത്ത് -ട്രഷറർ എന്നിവരെ തെരഞ്ഞെടുത്തു.

മണൽ ലോറി തടഞ്ഞതിന് മർദനം: സഹോദരന്മാർ അറസ്റ്റിൽ

ആലുവ: പെരിയാറിൽ നിന്ന് അനധികൃത മണൽ വാരിയെടുത്ത് കടക്കാൻ ശ്രമിച്ച ലോറി തടഞ്ഞ യുവാവിനെ ആക്രമിച്ച കേസിൽ സഹോദരങ്ങൾ പിടിയിൽ. ഉളിയന്നൂർ പനഞ്ചിക്കുഴി നിഷാദ് (47), ഷാജഹാൻ (40) എന്നിവരാണ് ആലുവ പോലീസിന്‍റെ പിടിയിലായത്.ആലുവ മാർക്കറ്റിന് സമീപം ആന്‍റണിയെയാണ് ഇവർ ക്രൂരമായി മർദ്ദിച്ചത്. സംഭവത്തെ തുടർന്ന് പ്രതികൾ ഒളിവിൽ പോയി. കഴിഞ്ഞ ദിവസം ഉളിയന്നൂരിലെ ഒളിസങ്കേതം വളഞ്ഞാണ് പിടികൂടിയത്. ഷാജഹാന് മണൽക്കടത്തുമായി ബന്ധപ്പെട്ട് മൂന്ന് കേസുകളുണ്ട്.പ്രതികളെകോടതിയിൽ ഹാജരാക്കി റിമാൻഡ് ചെയ്തു.

യൂത്ത് ലീഡര്‍ഷിപ്പ് പരിപാടി സംഘടിപ്പിച്ച് റോട്ടറി

കൊച്ചി: റോട്ടറി ക്ലബ് ഓഫ് കൊച്ചിന്‍ മിഡ്ടൗണ്‍ റോട്ടറി യൂത്ത് ലീഡര്‍ഷിപ്പ് പരിപാടി 'റൈല' സംഘടിപ്പിച്ചു. എളമക്കര അശോക വേള്‍ഡ് സ്‌കൂളില്‍ നടന്ന പരിപാടി പ്രസിഡന്‍റ് മരിയന്‍ പോള്‍ ഉദ്ഘാടനം ചെയ്തു. ഒന്‍പത്, 11 ക്ലാസുകളിലെ വിദ്യാര്‍ഥികള്‍ പരിശീലന പരിപാടിയില്‍ പങ്കെടുത്തു. പ്രശസ്ത പ്രഭാഷകരും മികച്ച റിസോഴ്സ് പേഴ്സണ്‍മാരും നേതൃത്വപരമായ ഗുണങ്ങളെക്കുറിച്ചും സംസാരത്തിലും എഴുത്തിലും ആശയവിനിമയ വൈദഗ്ധ്യത്തെക്കുറിച്ചും പരിശീലനം നല്‍കി.ബാബു ജോസഫ്, അനു സൂരജ്, സജിത റഷീദ്, അഡ്വ. നൈനാന്‍ ജോണ്‍ എന്നിവര്‍ ക്ലാസെടുത്തു.

നഗരസഭാ മന്ദിരം പുതുക്കി പണിയൽ; വൻ അഴിമതിയെന്ന് എൽഡിഎഫ്

അങ്കമാലി: അങ്കമാലി നഗരസഭാ ഓഫീസ് കെട്ടിടം പുതുക്കിപ്പണിയാൻ യുഡിഎഫ് ഭരണസമിതി ധൃതി കാട്ടുന്നത് ഈ ഇടപാടിൽ വൻ അഴിമതി നടന്നതിനാലാണെന്ന് എൽഡിഎഫ്. 1982 ൽ നിർമാണം പൂർത്തീകരിച്ച പഴയ നഗരസഭ ഓഫീസ് കെട്ടിടം തക്കസമയത്ത് അറ്റകുറ്റ പ്രവൃത്തി ചെയ്യാതെ അനാസ്ഥ കാണിക്കുകയും ഇപ്പോൾ ധൃതി പിടിച്ച് കെട്ടിടം പുതുക്കി പണിയാൻ തീരുമാനമെടുത്തതിനും പിന്നിൽ വൻ അഴിമതിയുണ്ടെന്ന് എൽഡിഎഫ് മുനിസിപ്പൽ കമ്മിറ്റി പ്രസ്ഥാവനയിൽ ചൂണ്ടിക്കാട്ടി. ഏത് സമയത്തും നിലം പൊത്താവുന്ന അവസ്ഥയിലായിരുന്നു ഈ കെട്ടിടം. തൂണുകളുടെ കമ്പികളെല്ലാം ദ്രവിച്ച് അടർന്ന് വീണുകൊണ്ടിരിക്കുകയാണ്. ഈ മന്ദിരത്തിന്‍റെ ജീർണാവസ്ഥ സംബന്ധിച്ച് വിദഗ്ധ സംഘ റിപ്പോർട്ട് നേരെത്തെ തേടിയിരുന്നതാണ്. എന്നാൽ, നഗരസഭാ ഭരണ കാലാവധി തീരാൻ മാസങ്ങൾ മാത്രം ബാക്കി നിൽക്കെ രണ്ട് കോടി എഴുപത്തിഏഴ് ലക്ഷം രൂപ ചെലവിട്ട് ഈ കെട്ടിടം പുതുക്കി പണിയുന്നതിന് പിന്നിൽ വൻ അഴിമതിയാണ് ഒളിഞ്ഞിരിക്കുന്നത്. കഴിഞ്ഞ നാല് വർഷക്കാലമായി കെട്ടിടത്തിന്‍റെ ജീർണാവസ്ഥ ചൂണ്ടിക്കാട്ടി പ്രതിപക്ഷ കൗൺസിലർമാരും എൽഡിഎഫും നിരവധി സമരങ്ങൾക്ക് നേതൃത്വം നൽകിയിരുന്നു. എന്നാൽ ഒരു നടപടിയും അതിൻമേൽ ഉണ്ടായില്ല. ഇപ്പോൾ തട്ടിക്കൂട്ടി ഒരു റിപ്പോർട്ട് തയാറാക്കി കോടികൾ ചെലവഴിച്ച് നടത്തുന്ന പുനരുദ്ധാരണ പ്രവൃത്തിയിൽ അഴിമതി മാത്രമാണുള്ളത്. അടിത്തറ ദ്രവിച്ചിരിക്കെ കോടികൾ ചെലവാക്കി പുതുക്കി പണിതാൽ എത്ര കാലം നിലനിൽക്കുമെന്ന് ഒരുറപ്പുമില്ല. അതിനാൽ ഇപ്പോൾ നടക്കുന്ന പ്രവൃത്തികൾ നിർത്തിവയ്ക്കണമെന്നും ഇല്ലെങ്കിൽ പ്രതിപക്ഷം ബഹുജനങ്ങളെ അണിനിരത്തി ശക്തമായ സമരപരിപാടികൾക്ക് നേതൃത്വം നൽകുമെന്നും എൽഡിഎഫ് മുനിസിപ്പൽ കമ്മിറ്റി മുന്നറിയിപ്പ് നൽകി. എൽഡിഎഫ് മണ്ഡലം കൺവീനർ അഡ്വ. കെ.കെ. ഷിബു, നേതാക്കളായ ബെന്നി മൂഞ്ഞേലി, എം.എസ്. ചന്ദ്രബോസ്, മാർട്ടിൻ ബി. മുണ്ടാടൻ, ജോർജ് കുര്യൻ പാറയ്ക്കൽ,സജി വർഗീസ്, ഗ്രേസി ദേവസി, പി.എൻ. ജോഷി തുടങ്ങിയവർ നിലം പൊത്താറായ കെട്ടിട്ടം സന്ദർശിച്ചു.

ഓഞ്ഞിത്തോട് റീസർവേ : തർക്ക പ്രദേശങ്ങളിൽ നാളെ പോലീസ് സംരക്ഷണയിൽ കല്ലിടൽ

ആലുവ: മൂന്ന് വർഷത്തിന് ശേഷം റീസർവേ പൂർത്തിയായ ഓഞ്ഞിത്തോടിൽ നാളെ പോലീസ് സഹായത്തോടെ അതിർത്തി കല്ലുകളിടും. പ്രശ്നബാധിത മേഖലയായ ഏലൂക്കരയിലെ 37 അടക്കം 213 അതിർത്തികല്ലുകളാണ് തോട് കടന്നു പോകുന്ന മേഖലകളിൽ ഇനിയും സ്ഥാപിക്കേണ്ടത്. മൂന്ന് വർഷം നീണ്ട സർവേയിൽ 300 ഓളം കല്ലുകൾ സ്ഥാപിച്ചിരുന്നു. കടുങ്ങല്ലൂർ പഞ്ചായത്തിൽ 404, ആലങ്ങാട് പഞ്ചായത്തിൽ 183 ഉൾപ്പെടെ ആകെ 587 കല്ലുകളാണ് ആകെ ഉള്ളത്. ഇനി ഇടേണ്ട 213 ൽ 132, 81 കല്ലുകളാണ് യഥാക്രമം കടുങ്ങല്ലൂർ, ആലങ്ങാട് പഞ്ചായത്തുകളിലായി സ്ഥാപിക്കേണ്ടത്. ഏറ്റവും കൂടുതൽ തർക്കം ഉള്ളത് ഇലഞ്ഞി ചുവടിലാണ്. രണ്ട് പഞ്ചായത്തുകളിലായി ഓഞ്ഞിത്തോടിന്‍റെ 64 കൈയേറ്റങ്ങളാണ് മൂന്ന് ഘട്ടങ്ങളായി നടത്തിയ റീസർവ്വെയിൽ കണ്ടെത്തിയത്. 2022 ൽ പുഴയുടെ അതിർത്തി നിർണയം നടത്തിയെങ്കിലും അതിർത്തി കല്ലുകൾ മുഴുവനായി സ്ഥാപിക്കുന്നതിൽ കടുങ്ങല്ലൂർ ആലങ്ങാട് പഞ്ചായത്തുകൾ, സർക്കാർ വകുപ്പുകളും താത്പര്യം എടുത്തില്ലെന്നാണ് ഓത്തിത്തോട് സംരക്ഷണ സമിതിയുടെ പരാതി. ഓഞ്ഞിത്തോട് സംരക്ഷണ ജനകീയ സമിതിയുടെ നേതൃത്വത്തിൽ ഹൈക്കോടതിയെ വീണ്ടും സമീപിച്ചതോടെയാണ് മുടങ്ങിക്കിടന്ന സർവേ നടപടികൾ പുന:രാരംഭിച്ചത്. കടുങ്ങല്ലൂർ ഗ്രാമപഞ്ചായത്തിലെ വിവിധ പ്രദേശങ്ങളിൽ മഴക്കാലത്ത് അനുഭവപ്പെടുന്ന വെള്ളക്കെട്ടിന് പരിഹാരമായി ഓഞ്ഞിത്തോട് വൃത്തിയാക്കുന്ന പദ്ധതി നടപ്പിലാക്കുമെന്ന് മന്ത്രി പി. രാജീവ് പറഞ്ഞു. ഓപ്പറേഷൻ വാഹിനിയിൽ പെടുത്തിയാണ് ശുചീകരണം നടപ്പിലാക്കുക.

ക്യാറ്റ്സ് ക്ലബ് പൂർത്തീകരിച്ചു നൽകിയ വീടിന്‍റെ താക്കോൽദാനം നടത്തി

കാലടി : ക്യാറ്റ്സ് ക്ലബ് മാണിക്യ മംഗലത്ത് പാതിവഴിയിൽ നിർമാണം നിലച്ച വനജ ഗോപിയുടെ വീട് പൂർത്തീകരിച്ച് നൽകി. ഇതിന്‍റെ താക്കോൽ സമർപ്പണം ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ നിർവഹിച്ചു. ക്ലബ് പ്രസിഡന്‍റ് ടി.കെ. സാജൻ അധ്യക്ഷത വഹിച്ചു. കാലടി ഗ്രാമപഞ്ചായത്ത് പ്രസിഡന്‍റ് ഷൈജൻ തോട്ടപ്പിള്ളി മുഖ്യാതിഥിയായി. വാർഡ് മെമ്പർ സ്മിത ബിജു, ക്ലബ് ഭാരവാഹികളായ അഡ്വ. കെ.ബി. സാബു, പി.എ. ജോയി, എം.ജെ.ജോൺസൺ, ടി.വി. രഘു എന്നിവർ പ്രസംഗിച്ചു. ക്ലബ് നൽകുന്ന ആറാമത്തെ വീടാണിത്. ഏഴാമത്തെ വീടിന്‍റെ പൂർത്തീകരണവും നടന്ന് കൊണ്ടിരിക്കുന്നു. കാലടിയിൽ കഴിഞ്ഞ 55 വർഷമായി പ്രവർത്തിക്കുന്ന 55 അംഗങ്ങളുള്ള ജീവകാരുണ്യ സന്നദ്ധ സേവന സംഘടനയാണ് ക്യാറ്റ്സ് ക്ലബ്.

ഹെറോയിനുമായി രണ്ടുപേർ അറസ്റ്റിൽ

പറവൂർ: ഹെറോയിനുമായി രണ്ടുപേർ എക്സൈസിന്‍റെ പിടിയിലായി. ആസാം സ്വദേശികളായ ഫറൂഖ്ദിൻ അഹമ്മദ് (30 ), മുഹമ്മദ് അലി (32) എന്നിവരെ വാണിയക്കാട് ഭാഗത്ത് നടന്ന പരിശോധനയ്ക്കിടെയാണ്. പറവൂർ എക്സൈസ് സർക്കിൾ ഇൻസ്പെക്ടർ എം.ഒ. വിനോദും സംഘവും ചേർന്ന് അറസ്റ്റ് ചെയ്തത്. ഇവരിൽ നിന്ന് 700 മില്ലിഗ്രാം ഹെറോയിനും സഞ്ചരിച്ചിരുന്ന സ്കൂട്ടറും പിടിച്ചെടുത്തിട്ടുണ്ട്. നിരവധി മയക്കുമരുന്ന് കേസുകളിൽ പ്രതികളാണിവർ. എക്സൈസ് ഇൻസ്പെക്ടർ നീതു മനോഹരൻ, പ്രിവന്‍റീവ് ഓഫീസർ സി.ജി. ഷാബു, കെ.എ. ശിവകുമാർ, ടി.ബി. സുബിൻ, പൗലോസ് ജേക്കബ് എന്നിവരും സംഘത്തിലുണ്ടായിരുന്നു.

എംഡിഎംഎയുമായി രണ്ടു പേർ പിടിയിൽ

മട്ടാഞ്ചേരി: എംഡിഎംഎയുമായി രണ്ടു പേർ മട്ടാഞ്ചേരി പോലീസിന്‍റെ പിടിയിലായി. മട്ടാഞ്ചേരി കൊച്ചിൻ കോളജ് ഭാഗത്ത് താമസിക്കുന്ന മുനീർ(32), തമിഴ്നാട് കൃഷ്ണഗിരി സിങ്കാരപ്പേട്ട സ്വദേശിയും ഇപ്പോൾ ബംഗളൂരുവിൽ താമസിക്കുന്ന ജെ. ജാബത്ത് (41) എന്നിവരെയാണ് 51 ഗ്രാം എംഡിഎംഎയുമായി മട്ടാഞ്ചേരി പോലീസ് ഇൻസ്പെക്ടർ കെ.എ. ഷിബിൻ, എസ്ഐ ജിമ്മി ജോസ് എന്നിവരുടെ നേതൃത്വത്തിൽ അറസ്റ്റ് ചെയ്തത്. ഓപ്പറേഷൻ ഡി ഹണ്ടിന്‍റെ ഭാഗമായി മട്ടാഞ്ചേരി പോലീസ് നടത്തിയ അന്വേഷണത്തിൽ മുനീർ മയക്കുമരുന്ന് വിൽപന നടത്തുന്നതായി വിവരം ലഭിച്ചിരുന്നു. തുടർന്ന് ഇയാൾ താമസിക്കുന്ന മട്ടാഞ്ചേരി കൊച്ചിൻ കോളജ് ഭാഗത്തുള്ള വീട്ടിൽ നടത്തിയ പരിശോധനയിലാണ് ഇയാളിൽ നിന്ന് മാരക മയക്കുമരുന്നായ എംഡിഎംഎ കണ്ടെടുത്ത് പ്രതിയെ അറസ്റ്റ് ചെയ്തത്. മുനീറിനെ വിശദമായി ചോദ്യം ചെയ്തതിൽ ഇയാൾക്ക് എംഡിഎംഎ വിൽപ്പനയ്ക്കായി നൽകിയത് ഖത്തർ ജയിലിൽ വച്ച് പരിചയപ്പെട്ട ജാബത്ത് എന്ന തമിഴ്നാട് സ്വദേശിയാണെന്നും ഇയാൾ ഇപ്പോൾ എറണാകുളത്തുണ്ടെന്നും അറിഞ്ഞതിനെ തുടർന്ന് നടത്തിയെ അന്വേഷണത്തിലാണ് ജാബത്തിനെ പിടികൂടിയത്. മുനീർ ഖത്തറിൽ ജോലി നോക്കി വരവെ മയക്ക്മരുന്ന് കൈവശം വച്ചതിന് അഞ്ചു വർഷം ജയിൽ ശിക്ഷ അനുഭവിച്ചിട്ടുണ്ട്. പിടിയിലായ ജാബത്ത് മയക്ക് മരുന്ന് കേസും തട്ടിപ്പ് കേസുമായി ഏഴ് വർഷത്തോളം ഖത്തർ ജയിലിൽ ഉണ്ടായിരുന്നതായി പോലീസ് പറഞ്ഞു. എസ്ഐ മിഥുൻ അശോക്, എഎസ്ഐ സമദ് തുടങ്ങിയവരുടെ നേതൃത്വത്തിലുള്ള സംഘമാണ് പ്രതികളെ പിടികൂടിയത്.

ജില്ലാ പഞ്ചായത്ത് കൈത്താങ്ങായി; 100 പേർക്ക് ഇനി നിവർന്നുനിൽക്കാം

കാക്കനാട്: ജില്ലാ പഞ്ചായത്തിന്‍റെ കൈത്താങ്ങും കളമശേരി റോട്ടറി ക്ലബ്ബിന്‍റെ സഹായവും കൂടിച്ചേർന്നപ്പോൾ കൃത്രിമ കാലുകളിൽ നിവർന്നുനിന്നത് അംഗപരിമിതിയുള്ള നൂറ് പേർ. ജില്ലാ പഞ്ചായത്ത്‌ പ്രിയദർശിനി ഹാളിൽ നടന്ന ചടങ്ങ് കളക്ടർ എൻ.എസ്.കെ. ഉമേഷ്‌ ഉദ്ഘാടനം ചെയ്തു. പ്രസിഡന്‍റ് മനോജ്‌ മൂത്തേടൻ അധ്യക്ഷത വഹിച്ചു. വൈസ് പ്രസിഡന്‍റ് എൽസി ജോർജ്, ജില്ലാ പഞ്ചായത്ത്‌ അംഗങ്ങളായ പി.എം. നാസർ, ലിസി അലക്സ്‌, ജില്ലാ പഞ്ചായത്ത്‌ സെക്രട്ടറി പി.എം. ഷെഫീഖ്, റോട്ടറി ക്ലബ് ഭാരവാഹികളായ തോമസ് വർഗീസ്, സുരേഷ് ബാബു, ഉമ്മൻ കെ ടി , വർഗീസ് സക്കറിയ, നാരായണ മേനോൻ, സക്കറിയ എബ്രഹാം, എൻ. ആനന്ദ് എന്നിവർ പ്രസംഗിച്ചു. കൃത്രിമകാലുകൾആവശ്യമുളളവർക്കായി ഒരു മാസം മുൻപ് ജില്ലാ പഞ്ചായത്തിൽ വച്ച് നടത്തിയ ക്യാമ്പിൽ പങ്കെടുത്തവർക്കാണ് ഇന്നലെ കൃത്രിമക്കാലുകൾ വിതരണം ചെയ്തത്.

"ആലപ്പുഴക്കാർ ഇൻ കൊച്ചി...' ഹൃദ്യമായി ഒത്തുചേരൽ

കൊച്ചി: ആലപ്പുഴയിൽ വേരുകളുള്ളവരും നിലവിൽ കൊച്ചിയിൽ താമസിക്കുന്നവരുമായ ആളുകൾക്കായി സംഘടിപ്പിച്ച "ആലപ്പുഴക്കാർ ഇൻ കൊച്ചി" സംഗമം ഹൃദയസ്പർശിയായി. ആലപ്പുഴയിലെ പഴയകാല ഓർമകൾ അയവിറക്കിയും സൗഹൃദങ്ങൾ പുതുക്കിയും കൊച്ചിയിലെ ആലപ്പുഴക്കാർ സന്തോഷം പങ്കുവച്ചു. കേരള പിഡബ്ല്യുഡി മുൻ ചീഫ് എൻജിനീയർ എം.എ. ചാക്കോ എട്ടുകെട്ടിൽ, ആലപ്പുഴ സൗത്ത് ഇന്ത്യൻ റബർ വർക്സ് മുൻ സിഇഒ ജി. കൃഷ്ണൻ എന്നിവരെ ചടങ്ങിൽ ആദരിച്ചു. എറണാകുളം രാമവർമ ക്ലബിൽ നടന്ന ചടങ്ങിൽ പ്രമുഖ സംവിധായകൻ സിബി മലയിൽ, വ്യവസായി ജോസ് പട്ടാറ, ഓം കുമാർ, ശ്രീകുമാർ, ബിന്ദു മാധവ്, രാജ്കുമാർ, ജോണി വാര്യംപറമ്പിൽ, ഔസേപ്പച്ചൻ വാളക്കുഴി എന്നിവരുൾപ്പെടെ നിരവധി പേർ പങ്കെടുത്തു. പ്രഫ. അയ്യങ്കാർ ഉൾപ്പെടെ അന്തരിച്ച ആലപ്പുഴയിലെ പ്രമുഖരെ യോഗം അനുസ്മരിച്ചു. ആലപ്പുഴ മുല്ലക്കൽ ചിറപ്പ്, പള്ളി പെരുന്നാളുകൾ, ബീച്ചിലെ കറക്കം, ദിൽഖുഷ്, ഐസിഎച്ച്, ബ്രദേഴ്സ് തുടങ്ങിയ ഇഷ്ടഭക്ഷണശാലകൾ, സി.ആർ. ലെതർ വർക്സ്, സെന്‍റ് ജോർജ് അംബ്രല്ല മാർട്ടിനടുത്തുള്ള കടകൾ, ലിയോ തേർട്ടീൻത് സ്കൂൾ, സെന്‍റ് ജോസഫ്സ് ഗേൾസ് സ്കൂൾ, കോളജ്, ഗോപി ചേട്ടന്‍റെ മുറുക്കാൻ കട, ആലപ്പുഴ ബീച്ച് തുടങ്ങിയ ആലപ്പുഴയുടെ ഓർമകൾ എല്ലാവരും പങ്കുവച്ചു. കൊച്ചിയിൽ സ്ഥിരതാമസമാക്കിയ ആലപ്പുഴക്കാരുടെ സംഗമം വരുംവർഷങ്ങളിലും നടത്തുമെന്നു സംഘാടകർ അറിയിച്ചു.

മഞ്ചക്കാട്-ഐക്കരവേലിത്താഴം റോഡരിക് ഇടിഞ്ഞു താഴ്ന്നു: ഭീതിയിൽ നാട്ടുകാർ

ചോറ്റാനിക്കര: റോഡരിക് ഇടിഞ്ഞുതാഴ്ന്നു. ഗതാഗത സൗകര്യം തടസപ്പെട്ട് നാട്ടുകാർ. ചോറ്റാനിക്കര പഞ്ചായത്ത് 11-ാം വാർഡിൽ മഞ്ചക്കാട് - ഐക്കരവേലിതാഴം റോഡിന്‍റെ ഒരു വശമാണ് സമീപത്തെ സ്വകാര്യ വ്യക്തിയുടെ ഭൂമിയിലേക്ക് ഇടിഞ്ഞു വീണിരിക്കുന്നത്. ഇതോടെ ഐക്കരവേലിതാഴം ഭാഗത്തുള്ള കുടുംബങ്ങൾ ദുരിതത്തിലായിരിക്കുകയാണ്. നിലവിൽ വാഹനങ്ങൾക്ക് കടന്നു പോകാൻ കഴിയാത്ത സ്ഥിതിയാണുള്ളത്. കഴിഞ്ഞ മാസാവസാനത്തോടെ പെയ്ത കനത്ത മഴയിലാണ് മെയ് 25ന് റോഡരിക് 50 അടിയോളം താഴേയ്ക്ക് ഇടിഞ്ഞത്. റോഡ് തകർച്ചയുടെ വക്കിലാണെന്ന് അന്നുമുതൽ ബന്ധപ്പെട്ടവരോട് പറഞ്ഞിട്ടും ആവശ്യമായ നടപടികൾ ആരും തന്നെ കൈക്കൊണ്ടില്ലെന്നാണ് പ്രദേശവാസികൾ പറയുന്നത്. ഇപ്പോൾ കാലവർഷം തിമിർത്ത് പെയ്യാൻ തുടങ്ങിയതോടെ റോഡിലൂടെയുള്ള കാൽനടയാത്ര പോലും അപകടത്തിലായിരിക്കുകയാണ്. മുൻപ് മണ്ണെടുത്ത് കുഴിയായി മാറിയ സ്വകാര്യ വ്യക്തിയുടെ ഭൂമിയുടെ അതിരിനോട് ചേർന്നാണ് റോഡ് കടന്നുപോകുന്നത്. 50 അടിയോളം ആഴമാണ് ഈ ഭാഗത്തുള്ളത്.ഇവിടെ പല ഭാഗത്തും റോഡരിക് ഇടിഞ്ഞിട്ടുണ്ട്. റോഡ് കടന്നുപോകുന്നതിന്‍റെ അവസാന ഭാഗത്ത് 40 ഓളം കുടുംബങ്ങളാണ് താമസിക്കുന്നത്. അപകടാവസ്ഥയെ തുടർന്ന് വാഹനഗതാഗതം തടസപ്പെട്ടതോടെ സ്കൂൾ വിദ്യാർഥികളും ദുരിതത്തിലായി. പാചകവാതക സിലിണ്ടറുകളുൾപ്പെടെ വീട്ടിലെത്തിക്കാൻ ആളുകൾ കഷ്ടപ്പെടുകയാണ്. ഇപ്പോൾ അര കിലോമീറ്ററോള നടന്നാണ് ആളുകൾ പ്രധാന റോഡിലേയ്ക്കെത്തുന്നത്. റോഡ് ഗതാഗത യോഗ്യമാക്കുന്നത് വരെ പഞ്ചായത്ത് മുൻകൈയെടുത്ത് മറ്റ് ഭാഗത്ത് കൂടി ഗതാഗത സൗകര്യമൊരുക്കണമെന്നും അതിനുവേണ്ട നടപടികൾ രണ്ട് ദിവസത്തിനുള്ളിലായില്ലെങ്കിൽ യൂത്ത് കോൺഗ്രസ് പ്രദേശവാസികളോടൊന്നിച്ച് സമരവുമായി മുന്നോട്ടു പോകുമെന്നും മുൻ നിയോജകമണ്ഡലം പ്രസിഡന്‍റ് ജോമോൻ ജോയ് പറഞ്ഞു. റോഡിന്‍റെ ഇടിഞ്ഞുവീണ വശം എത്രയും പെട്ടെന്ന് കരിങ്കൽ കെട്ടിയോ കോൺക്രീറ്റ് ചെയ്‌തോ സംരക്ഷിച്ച് ജനങ്ങൾക്ക് യാത്രാസൗകര്യമൊരുക്കണമെന്ന് ബ്ലോക്ക് പഞ്ചായത്തംഗം കെ.കെ. അജി ആവശ്യപ്പെട്ടു.

പ്ലാവിൽ നിന്നും വീണ് ഗൃഹനാഥൻ മരിച്ചു

ഇടക്കൊച്ചി: പ്ലാവിൽ ചക്ക പറിക്കാനായി കയറിയ ഗൃഹനാഥൻ വീണു മരിച്ചു. ഇടക്കൊച്ചി കോഴിക്കുട് സ്വദേശി എഡ് വിൻ ബായറാണ് മരത്തിന്‍റെ താഴെ മരിച്ചനിലയിൽ കണ്ടെത്തിയത്. ഉച്ചയ്ക്ക് ശേഷം വീട്ടിൽ നിന്ന് പോയ എഡ്്വിൻ തിരികെ എത്താത്തതിനെ തുടർന്നാണ് ബന്ധുക്കൾ അന്വേഷിച്ചിറങ്ങിയത്. പലപ്രാവശ്യം ഫോണിൽ ബന്ധപ്പെട്ടിട്ടും കിട്ടാത്തതിനെ തുടർന്ന് മകൻ കണ്ണങ്ങാട്ട് റോഡിലുള്ള പുരയിടത്തിൽ എത്തി നോക്കുന്പോഴാണ് എഡ് വിനെ പ്ലാവിന് താഴെ മരിച്ചു കിടക്കുന്നതായി കണ്ടെത്തിയത്. ചക്ക പറിക്കാൻ ഉപയോഗിച്ച തോട്ടിയും ഏണിയും പ്ലാവിനു താഴെ കിടക്കുന്ന അവസ്ഥയിലായിരുന്നു. മൃതദേഹം എറണാകുളം ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. സംസ്കാരം പിന്നീട്. ഭാര്യ: എഡ്വേഴ്സ്. മക്കൾ: നിമ്മി, എൽബിൽ.

ചെങ്ങമനാട്, നെടുമ്പാശേരി പഞ്ചായത്തുകളിൽ കാറ്റിൽ വ്യാപക നാശം

നെടുമ്പാശേരി: ചെങ്ങമനാട്, നെടുമ്പാശേരി പഞ്ചായത്തുകളിൽ ഞായറാഴ്ച വൈകിട്ട് കനത്ത മഴയോടൊപ്പമുണ്ടായ ശക്തമായ കാറ്റിൽ വിവിധ ഭാഗങ്ങളിൽ വ്യാപക നാശം. ചെങ്ങമനാട് 18-ാം വാർഡിൽ 80-ാം നമ്പർ അങ്കണവാടി കെട്ടിടത്തിന് മുകളിൽ സമീപത്തെ പറമ്പിലെ കൂറ്റൻ തേക്ക് മരം വീണ് മുൻ ഭാഗത്ത് സ്ഥാപിച്ച ഷീറ്റുകൾ നിലംപൊത്തി. കിഴക്ക്, പടിഞ്ഞാറ് ഭാഗത്തെ ഷീറ്റുകളാണ് മരം കടപുഴകി വീണ് നശിച്ചത്. കെട്ടിടത്തിനോ, മതിലുകൾക്കോ, കളി ഉപകരണങ്ങൾക്കോ കേടുപാടില്ല. ചെങ്ങമനാട് കൈത്തറി നെയ്ത്ത് സഹകരണ സംഘം വക കെട്ടിടത്തിന് മുകളിലും സമീപത്തെ സ്വകാര്യ വ്യക്തിയുടെ പറമ്പിലെ ഭീമൻ തേക്ക് മരം കടപുഴകി വീണ് ഷീറ്റും മേൽക്കൂരയും തകർന്നു. മേൽക്കൂര ഏത് നിമിഷവും നിലംപൊത്തുന്ന അവസ്ഥയിലാണ്. ഏതാനും തറികൾക്കും തെക്ക് വശത്തെ ഭിത്തിക്കും കേടുപാടുകളുണ്ടായിട്ടുണ്ട്. കടപുഴകി വീണ തേക്ക് മരം മാറ്റാനായിട്ടില്ല. ചെങ്ങമനാട് പഞ്ചായത്തിലെ എട്ട്, ഒൻപത്, 18 വാർഡുകളിൽ വ്യാപക കൃഷിനാശം സംഭവിച്ചു. മൂപ്പെത്തിയ ജാതി മരങ്ങളാണ് പ്രധാനമായും കടപുഴകി വീണത്. വിവിധയിനം വാഴകൾ, തെങ്ങ്, കവുങ്ങ്, മാവ് മരങ്ങളും കാറ്റിൽ നശിച്ചു. നെടുവന്നൂരിൽ കരുമത്തി ചാക്കപ്പൻ, പുത്തൻവീട്ടിൽ കരുമത്തി ബിജു ജോസഫ് എന്നിവരുടെ കൃഷികൾക്ക് ഭീമമായ നാശമുണ്ടായി. 18-ാം വാർഡിലെ പാലപ്രശേരി തെക്ക് കണ്ടംതുരുത്തിലും പലയിടത്തും ജാതി മരങ്ങളും വാഴ കൃഷികളും നശിച്ചു.

വീടിന്‍റെ മേൽക്കൂര തകർന്നു

വൈപ്പിൻ: മഴയെതുടർന്ന് വീടിന്‍റെ മേൽക്കൂരയുടെ ഒരു ഭാഗം നിലംപ്പൊത്തി. കിടന്നുറങ്ങിയിരുന്ന ആൾ അത്ഭുതകരമായി രക്ഷപ്പെട്ടു. പള്ളിപ്പുറം പഞ്ചായത്ത് 12-ാം വാർഡ് ചെറായി മരോട്ടിക്കൽ കൃഷ്ണന്‍റെ വീടാണ് തകർന്നത്. മുറിയിൽ കിടന്നുറങ്ങുകയായിരുന്ന മരുമകൻ സന്തോഷ് നിസാര പരിക്കുകളോടെ രക്ഷപ്പെട്ടു.

കടലേറ്റം: നായരമ്പലത്ത് വീടുകളിൽ വെള്ളം കയറി

വൈപ്പിൻ: വൈപ്പിൻ തീരത്ത് ശക്തമായ കടലാക്രമണത്തെ തുടരുന്നു. എടവനക്കാട്, ഞാറക്കൽ, പള്ളി വേളാങ്കണ്ണി കടപ്പുറം നായരമ്പലം പുത്തൻ കടപ്പുറം എന്നിവിടങ്ങളിൽ ഇന്നലെയും കടൽ കയറ്റം രൂക്ഷമായിരുന്നു. പുത്തൻ കടപ്പുറത്ത് ആറ് വീടുകളിൽ വെള്ളം കയറി. 50 ഓളം വീടുകൾക്ക് ഭീഷണിയുണ്ട്. പന്ത്രണ്ടാം വാർഡിൽ കൈതവളപ്പിൽ ജോഷി, സുധാ ബാബു, കാനപ്പിള്ളി മോളി, പള്ളിപ്പറമ്പിൽ ഷിജു, കണക്കാട്ടുശേരി അഭിലാഷ്, ബാബുരാജ് എന്നിവരുടെ വീടുകളിലാണ് വെള്ളം കയറിയത്. ശക്തമായ കടൽക്ഷോഭത്തിൽ പലയിടത്തും ജിയോ ബാഗ് ഉൾപ്പടെയുള്ള താത്കാലിക തടയണ സംവിധാനങ്ങൾ തകർന്ന് പോയി. തീരദേശ റോഡിന്‍റെ പല ഭാഗങ്ങളും തകർന്നിട്ടുണ്ട്. കാലാകാലങ്ങളിൽ കടൽ ഭിത്തി പുനർനിർമിക്കാത്ത നായരമ്പലത്തും ചെല്ലാനം മോഡലിൽ ടെട്രോപോഡ് ഉപയോഗിച്ചു കടൽഭിത്തി നിർമിക്കൽ മാത്രമാണ് ശാശ്വത പരിഹാരമെന്ന് പഞ്ചായത്തംഗം സി.സി. സിജി വ്യക്തമാക്കി.

നൂറ്റാണ്ടിലേറെ പഴക്കമുള്ള മുത്തശി മാവ് മറിഞ്ഞു വീണു

നെടുമ്പാശേരി: ഒരു നൂറ്റാണ്ടിലേറെ പഴക്കമുള്ള നെടുമ്പാശേരിയുടെ മുത്തശി മാവ് എന്ന് വിശേഷിക്കപ്പെടുന്ന മരം നിലംപൊത്തി. നെടുമ്പാശേരി മാർ അത്തനേഷ്യസ് ഹയർ സെക്കൻഡറി സ്കൂളിന്‍റെ മുറ്റത്ത് നിന്നിരുന്ന മാവാണ് മറിഞ്ഞത്. നിരവധി സ്കൂൾ കെട്ടിടങ്ങളുടെ നടുവിൽ നിന്നിരുന്ന ഈ മരം ഒഴിഞ്ഞ സ്ഥലത്തേക്ക് അദ്‌ഭുതകരമായിട്ടാണ് മറിഞ്ഞത്. ഒരു കെട്ടിടത്തിനും തകരാറുണ്ടായില്ല. കൊടിമരം മാത്രമാണ് മറിഞ്ഞത്. ഈ സ്കൂളിന്‍റെ സ്ഥാപകനായ വലിയപറമ്പിൽ ഗീവർഗീസ് മാർ ഗ്രിഗോറിയോസ് മെത്രാപ്പോലിത്തയാണ് ഈ മാവ് നട്ടതെന്ന് പ്രായം ചെന്ന ആളുകൾ സാക്ഷ്യപ്പെടുത്തുന്നു.

ആശ്വാസം ചാരിറ്റബിൾ സൊസൈറ്റി വാർഷിക സംഗമം

കൊച്ചി: പാലാരിവട്ടത്തെ ആശ്വാസം ചാരിറ്റബിൾ സൊസൈറ്റിയുടെ 14-ാമത് വാർഷിക സംഗമം ടി.ജെ. വിനോദ് എംഎൽഎ ഉദ്ഘാടനം ചെയ്തു. നടൻ ബാല, പിന്നണിഗായകൻ ബിജു നാരായണൻ എന്നിവർ മുഖ്യാതിഥികളായിരുന്നു. സൊസൈറ്റി പ്രസിഡന്‍റ് ഷൈജു കേളന്തറ അധ്യക്ഷത വഹിച്ചു. നിർധനരായ വൃക്ക രോഗികൾക്ക് കഴിഞ്ഞ 14 വർഷത്തിനിടെ 1.75 കോടി രൂപ ഡയാലിസിസിന് സാമ്പത്തിക സഹായം നൽകിയെന്ന് അദ്ദേഹം അറിയിച്ചു. 300 രോഗികൾക്ക് വൈദ്യുതി ബോർഡിലെ ജീവനക്കാർ നൽകുന്ന തുകയിൽ നിന്നാണ് സഹായം ലഭ്യമാക്കിയതെന്നും അദ്ദേഹം പറഞ്ഞു. ഫാ. ജോജി കുത്തുകാട്ട്, കെഎസ്ഇബി ഡെപ്യൂട്ടി ചീഫ് എൻജിനീയർ സുനിത ജോസ്, ഷിബു ചമ്മിണിക്കോടത്ത്, സ്റ്റീഫൻ നാനാട്ട്, സോണി കോവാട്ട്, ദീപക് സേവ്യർ തോമസ്, കെ.ജെ. മാർട്ടിൻ, സി.എസ്. ജോണി തുടങ്ങിയവർ പ്രസംഗിച്ചു.

വർക്ക്‌ഷോപ്പിന് മുന്നിൽ സൂക്ഷിച്ചിരുന്ന ബൈക്കുകൾ കത്തിനശിച്ചു

മരട്: വർക്ക്‌ഷോപ്പിന് മുന്നിൽ സൂക്ഷിച്ചിരുന്ന ബൈക്കുകൾ കത്തിനശിച്ചു. മരട് നഗരസഭ 14-ാം ഡിവിഷൻ എബിഎൽ റോഡിൽ തിങ്കളാഴ്ച രാവിലെ ഓഴോടെയായിരുന്നു സംഭവം. എൻജിൻ പണിക്കായി കൊണ്ടുവന്ന് സൂക്ഷിച്ചിരുന്ന ബൈക്കുകളാണ് കത്തിനശിച്ചത്. മൂന്ന് ബൈക്കുകൾ പൂർണമായും കത്തിനശിച്ചു. തൃപ്പൂണിത്തുറയിൽനിന്നും ഗാന്ധിനഗറിൽനിന്നും എത്തിയ അഗ്നിരക്ഷാസേനയാണ് തീയണച്ചത്. സമീപത്തുണ്ടായിരുന്ന കാർ തള്ളിനീക്കിയതിനാൽ കാറിന് തീപിടിച്ചില്ല. സാമൂഹ്യ വിരുദ്ധർ തീയിട്ടതാകാമെന്നാണ് നിഗമനം. ഷോർട്ട് സർക്യൂട്ടോ മറ്റോ ഉണ്ടാകാനുള്ള സാധ്യയില്ലെന്നും പറയുന്നു. ഗേറ്റിനകത്താണ് വർക്ക്ഷോപ്പ് സ്ഥിതി ചെയ്യുന്നത്. മരട് പോലീസിൽ വർക്ക്‌ഷോപ്പ് ഉടമ പരാതി നൽകി. ആറ് മാസം മുമ്പ് ഇവിടത്തെ പഴകിയ കെട്ടിടം പുലർച്ചെ തീപിടിച്ച് കത്തിനശിച്ചിരുന്നു.

യുവതിയെ കാപ്പ ചുമത്തി നാടുകടത്തി

തൃപ്പൂണിത്തുറ: യുവതിയെ കാപ്പ ചുമത്തി നാടുകടത്തി. ഹിൽപാലസ് പോലീസ് സ്റ്റേഷൻ പരിധിയിൽ നിരവധി കുറ്റകൃത്യങ്ങളിലെ പ്രതിയും പൊതുജന സമാധാന ലംഘന പ്രവർത്തനങ്ങളിൽ സ്ഥിരമായി ഏർപ്പെട്ടു വരുന്നയാളുമായ കരിങ്ങാച്ചിറ പാലത്തിങ്കൽ വീട് സൂര്യപ്രഭ (21) യെയാണ് സിറ്റി പോലീസ് കമ്മീഷണറുടെ ഉത്തരവ് പ്രകാരം നാടുകടത്തിയത്. സിറ്റി പോലീസിന്‍റെ പരിധിയിൽ പ്രവേശിക്കുന്നതിന് ആറ് മാസത്തേയ്ക്ക് തടഞ്ഞുകൊണ്ടുള്ളതാണ് കാപ്പ ഉത്തരവ്.

കാണാതായ പെൺകുട്ടികളെ കണ്ടെത്തി

പറവൂർ: പറവൂരിലെ എസ്‌‌‌‌സി എസ്ടി പ്രീമെട്രിക്ക് ഹോസ്റ്റലിൽനിന്നും കാണാതായ മൂന്നു പെൺകുട്ടികളെ കുന്ദംകുളത്തുനിന്നു പോലീസ് കണ്ടെത്തി. എട്ടും ഒമ്പതും ക്ലാസുകളിൽ പഠിക്കുന്ന കുട്ടികളെയാണ് തിങ്കളാഴ്ച്ച പുലർച്ചെ മുതൽ കാണാതായത്. രാത്രി ഭക്ഷണം കഴിക്കാൻ ഇവർ ഉണ്ടായിരുന്നെങ്കിലും പുലർച്ചെ നാലു മണിയോടെയുള്ള അന്വേഷണത്തിലാണ് ഇവരുടെ തിരോധാനം അധികൃതർ അറിയുന്നത്. തുടർന്ന് നഗരസഭയിലും നഗരസഭ പോലീസിലും പരാതി നൽകിയതിനെതുടർന്ന് അന്വേക്ഷണം ആരംഭിക്കുകയായിരുന്നു. ഇവരുടെ വശം ഫോൺ ഇല്ലാതിരുന്നതിനാൽ ആദ്യം അന്വേഷണം മുന്നോട്ട് പോയില്ല. രാവിലെ10 ഓടെ ഇതിലൊരു പെൺകുട്ടി മാതാവിനെ വിളിച്ച് തങ്ങൾ സുരക്ഷിതരാണെന്നും എന്നാൽ അന്വേഷിക്കേണ്ടതില്ലെന്നും പറഞ്ഞു. കുന്ദംകുളം ബസ് സ്റ്റാൻഡിൽ വച്ച് ഒരു സ്ത്രീയുടെ ഫോൺ വാങ്ങിയാണ് കുട്ടി വീട്ടിലേക്ക് വിളിച്ചതെന്ന് മനസിലാക്കിയ പോലീസ് അവിടെ എത്തി ഇവരെ കണ്ടെത്തുകയായിരുന്നു. ഇവരോടൊപ്പമുണ്ടായിരുന്ന ഒരാൺകുട്ടിയെയും പോലീസ് കസ്റ്റഡിയിലെടുത്തിട്ടുണ്ട്.

സിനിമാ പ്രദര്‍ശനവും പ്രഭാഷണവും 19ന്

കൊച്ചി: കൊച്ചിന്‍ ഫിലിം സൊസൈറ്റിയുടെ ആഭിമുഖ്യത്തില്‍ ചാവറ കള്‍ച്ചറല്‍ സെന്‍ററിന്‍റെ സഹകരണത്തോടെ ചലച്ചിത്ര പ്രദര്‍ശനവും പ്രഭാഷണവും സംഘടിപ്പിക്കുന്നു. 19 ന് വൈകീട്ട് 4.30ന് ചാവറ ലൈബ്രറി ഹാളില്‍. അമൃത വിഷ്യല്‍ മീഡിയ വിദ്യാര്‍ഥിനികളായ എസ്.എസ്. സ്‌നേഹ സംവിധാനം ചെയ്ത "പൂവ്', വൈഷ്ണവി സുരേഷിന്‍റെ "അഞ്ചേയം' എന്നീ ലഘു ചിത്രങ്ങളും, പ്രശസ്ത സംവിധായിക ആഗ്‌നെസ് മെര്‍ലറ്റന്‍റെ ആര്‍ട്ടമീസിയ എന്ന സിനിമയും പ്രദര്‍ശിപ്പിക്കും. ചിത്രകലയില്‍ സ്ത്രീകള്‍ക്ക് ശരീരഘടനാപഠനം നിഷിദ്ധമായിരുന്ന പത്തൊന്‍പതാം നൂറ്റാണ്ടില്‍ ഇറ്റലിയില്‍ ജീവിച്ചിരുന്ന ആര്‍ട്ടമീസിയ ജെന്‍റിലസ്‌കി എന്ന ചിത്രകാരിയുടെ സംഘര്‍ഷങ്ങള്‍ നിറഞ്ഞ ജീവചരിത്രമാണ് സിനിമയുടെ വിഷയം. ഈസിനിമയുടെ പശ്ചാത്തലത്തില്‍ പ്രഫ. സി.എസ്. ജയറാം പ്രഭാഷണം നടത്തും.

ജനത്തിന്‍റെ വിശുദ്ധീകരണമാണ് ശ്രേഷ്ഠ ബാവ ഏറ്റെടുത്തിരിക്കുന്നത്: മന്ത്രി പി. പ്രസാദ്

കുത്താട്ടുകുളം: ജനത്തിന്‍റെ വിശുദ്ധീകരണമാണ് ശ്രേഷ്ഠ കാതോലിക്ക മാർ ബസേലിയോസ് ജോസഫ് ബാവ ഏറ്റെടുത്തിരിക്കുന്നതെന്ന് മന്ത്രി പി. പ്രസാദ്. ഉള്ളിൽ നിന്ന് ഉറവപോലുള്ള മഹത്വത്താൽ കാതോലിക്ക ബാവ ഉത്തരവാദിത്വം നിറവേറ്റുമെന്നും മുന്നിൽനിന്ന് നയിക്കുമെന്നും മന്ത്രി പറഞ്ഞു. ശ്രേഷ്ഠ കാതോലിക്ക മാർ ബസേലിയോസ് ജോസഫ് ബാവയ്ക്ക് കൂത്താട്ടുകുളത്ത് നൽകിയ അനുമോദന സമ്മേളനം ഉദ്ഘാടനം ചെയ്യുകയായിരുന്നു മന്ത്രി. വടകര സെന്‍റ് ജോണ്‍സ് യാക്കോബായ പള്ളിയിൽ എത്തിച്ചേർന്ന ബാവയെ വികാരി ഫാ. പോൾ തോമസ് പീച്ചിയിൽ തിരിതെളിയിച്ച് സ്വീകരിച്ചു. ഇടവകയുടെ സഭാനേതൃത്വവും ഇടവകാംഗങ്ങളും നൽകിയ സ്വീകരണത്തിനു ശേഷം പള്ളിയിൽ പ്രത്യേക പ്രാർഥനാ ശുശ്രൂഷകൾ നടന്നു. തുടർന്ന് നിരവധി വാഹനങ്ങളുടെ അകന്പടിയോടെ കൂത്താട്ടുകുളത്ത് എത്തിച്ചേർന്ന ബാവയെ സ്വകാര്യ ബസ് സ്റ്റാൻഡിനു മുന്നിൽ നിന്നും സ്വീകരിച്ച് ടൗണ്‍ഹാളിലേയ്ക്ക് ആനയിച്ചു. തുടർന്ന് നടന്ന അനുമോദന സമ്മേളനം മന്ത്രി പി. പ്രസാദ് ഉദ്ഘാടനം ചെയ്തു. കണ്ടനാട് ഭദ്രാസന മെത്രാപ്പോലീത്ത ഡോ. മാത്യൂസ് മാർ ഇവാനിയോസ് അധ്യക്ഷത വഹിച്ചു. പാലാ രൂപത ബിഷപ് മാർ ജോസഫ് കല്ലറങ്ങാട് അനുഗ്രഹ പ്രഭാഷണം നടത്തി. ശേഷ്ഠ ബാവയ്ക്ക് കൂത്താട്ടുകുളം മേഖലയുടെ പ്രത്യേക ഉപഹാരം നൽകി. ജോസ് കെ. മാണി എംപി, അനൂപ് ജേക്കബ് എംഎൽഎ, മാത്യു കുഴൽനാടൻ എംഎൽഎ, കുത്താട്ടുകുളം നഗരസഭാധ്യക്ഷ വിജയ ശിവൻ, എൻഎസ്എസ് താലൂക്ക് യൂണിയൻ പ്രസിഡന്‍റ് ആർ. ശ്യാംദാസ്, എസ്എൻഡിപി യൂണിയൻ സെക്രട്ടറി സത്യൻ ചേരിയ്ക്കവാഴയിൽ, സഭ വൈദിക ട്രസ്റ്റി ഫാ. റോയ് ജോർജ് കട്ടച്ചിറ, സഭാ സെക്രട്ടറി ജേക്കബ് സി. മാത്യു, കമാൻഡർ കെ.എ. തോമസ്, ഫാ. പോൾ തോമസ് പീച്ചിയിൽ, ഫാ. ജെയിംസ് കുടിലിൽ, ഫാ. മാത്യു കരീത്തറ, മാർത്ത്മറിയം മുൻ സെക്രട്ടറി അമ്മിണി മാത്യു, പീറ്റർ കെ. ഏലിയാസ് എന്നിവർ പ്രസംഗിച്ചു.

കണ്ണമാലിയിൽ കടലേറ്റം രൂക്ഷം; നിസഹായരായി നിവാസികൾ

തോപ്പുംപടി: രണ്ടു ദിവസം തുടര്‍ച്ചയായി കടല്‍ കയറിയതോടെ കണ്ണമാലി ചെറിയകടവ് പ്രദേശത്ത് നിന്ന് ആളുകള്‍ ബന്ധുവീടുകളിലേക്ക് പലായനം തുടങ്ങി. കഴിഞ്ഞ ശനിയാഴ്ച ഒഴിഞ്ഞുനിന്ന കടലേറ്റം ഞായറാഴ്ചയും ഇന്നലെയും വീണ്ടും ശക്തമായി. കണ്ണമാലി പ്രദേശത്തെ നാലു മുതല്‍ എട്ട് വാര്‍ഡുകള്‍ വരെയുള്ള ജനങ്ങളാണ് വലിയ ദുരിതത്തിലായിരിക്കുന്നത്. തുടര്‍ച്ചയായ കടൽകയറ്റമായതിനാല്‍ വീടുകളില്‍ തങ്ങാന്‍ സാധിക്കുന്നില്ല. മുറികളില്‍ മുട്ടൊപ്പം വെള്ളമാണ്. മാലിന്യങ്ങളും വീടുകളിലേക്ക് കയറുന്നത് ബുദ്ധിമുട്ട് ഇരട്ടിയാക്കുന്നു. കണ്ണമാലി, ചെറിയകടവ്, കാട്ടിപ്പറമ്പ്, കൈതവേലി എന്നിവിടങ്ങളിലാണ് കടലേറ്റം രൂക്ഷമായിട്ടുള്ളത്. പ്രദേശത്തെ നാലു മുതല്‍ എട്ട് വാര്‍ഡുകളില്‍ പൂര്‍ണമായും വെള്ളം കയറിയ അവസ്ഥയിലാണ്. ഇവിടെ കടല്‍ വെള്ളം റോഡ് കവിഞ്ഞൊഴുകി. വാഹനങ്ങള്‍ക്ക് റോഡിലൂടെ സഞ്ചരിക്കാനാവാത്ത രീതിയില്‍ വെള്ളം ഉയര്‍ന്നിട്ടുണ്ട്. പഞ്ചായത്ത് അധികൃതര്‍ എന്ത് ചെയ്യണമെന്നറിയാത്ത അവസ്ഥയിലാണ്. കടലേറ്റം ശക്തമായതിനാല്‍ പ്രതിരോധ പ്രവര്‍ത്തനങ്ങളൊന്നും നടത്താന്‍ സാധിക്കുന്നില്ല. റോഡിനു കുറുകെ വള്ളം വച്ച് ഉപരോധവുമായി നാട്ടുകാർ കണ്ണമാലി: കടലേറ്റം രൂക്ഷമായതോടെ പൊറുതിമുട്ടിയ ജനങ്ങള്‍ കണ്ണമാലിയില്‍ റോഡ് ഉപരോധിച്ചു. വളളവുമായെത്തിയ പ്രതിഷേധക്കാര്‍ റോഡിനു കുറുകെ വള്ളം ഇറക്കി വച്ചാണ് ഉപരോധിച്ചത്. ചാക്കുകളും മരക്കൊന്പുകളും റോഡിനു കുറുകെയിട്ടു. ഇതേതുടർന്ന് ഏറെ നേരം ഗതാഗതം തടസപ്പെട്ടു.

കണ്ണമാലി പോലീസ് സ്ഥലത്തെത്തിയെങ്കിലും അധികൃതര്‍ എത്തി ഉറപ്പ് നല്‍കാതെ പിരിഞ്ഞു പോകില്ലെന്ന നിലപാടിലായിരുന്നു പ്രദേശവാസികൾ. ജില്ലാ കളക്ടര്‍ ഇടപെട്ടതിനെ തുടര്‍ന്ന് തഹസില്‍ദാര്‍ ജോസഫ് ഹെര്‍ട്ടിസ് സ്ഥലത്തെത്തി പ്രതിരോധ പ്രവര്‍ത്തനങ്ങള്‍ ഉടന്‍ ആരംഭിക്കാമെന്ന് നാട്ടുകാര്‍ക്ക് ഉറപ്പു നല്‍കി. കടലേറ്റം രൂക്ഷമായ പ്രദേശങ്ങളില്‍ ജിയോ ട്യൂബ് സ്ഥാപിക്കുന്ന പ്രവൃത്തി ഉടന്‍ ആരംഭിക്കുമെന്ന് തഹസില്‍ദാര്‍ പറഞ്ഞെങ്കിലും രാത്രിയോടെയാണ് ജനം പിരിഞ്ഞു പോയത്.

കൊച്ചി മെട്രോയ്ക്ക് എട്ടു വയസ്

കൊച്ചി: കൊച്ചിയിലെ നഗരയാത്രകൾക്ക് ചടുലവേഗം പകർന്ന മെട്രോ റെയിലിന് ഇന്ന് എട്ടു വയസ്. 2017 ജൂണ്‍ 17ന് ആരംഭിച്ച കൊച്ചി മെട്രോയിൽ ഓരോ വർഷവും യാത്രക്കാരുടെ എണ്ണം ഗണ്യമായി വർധിക്കുന്നുണ്ട്. അവധി ദിവസങ്ങളിലൊഴികെ പ്രതിദിനം ലക്ഷത്തിലേറെപ്പേര്‍ മെട്രോയില്‍ യാത്ര ചെയ്യുന്നുണ്ടെന്ന് കെഎംആർഎൽ അധികൃതർ പറഞ്ഞു. കഴിഞ്ഞ വര്‍ഷത്തെ യാത്രക്കാരുടെ എണ്ണം 3.5 കോടിയിരുന്നു. ഈ വര്‍ഷം 3.65 കോടി യാത്രക്കാരെയാണു പ്രതീക്ഷിക്കുന്നത്. മെട്രോ സേവനം ആരംഭിച്ച 2017-18 കാലയളവില്‍ വാര്‍ഷിക യാത്രക്കാരുടെ എണ്ണം 1.71 കോടിയായിരുന്നു. ചുരുങ്ങിയ കാലയളവിൽ പ്രവര്‍ത്തന ലാഭം നേടി, ഇന്ത്യന്‍ മെട്രോ കമ്പനികളിലും കൊച്ചി മെട്രോ മുന്നിലാണ്. 2023-24 സാമ്പത്തിക വര്‍ഷത്തെ പ്രവർത്തനലാഭം 22.5 കോടിയാണ്. മെട്രോയിലെ യാത്രക്കാരില്‍ യുവാക്കളാണ് കൂടുതലെന്നു കെഎംആർഎൽ അധികൃതർ അറിയിച്ചു. ലോകോത്തര നിലവാരത്തിലുള്ള സ്റ്റേഷനുകള്‍, ശുചിത്വവും വൃത്തിയും നിറഞ്ഞ പരിസരം, ശീതീകരിച്ച ട്രെയിന്‍, കൃത്യതയാര്‍ന്ന സേവനം, യുക്തിസഹമായ നിരക്ക് തുടങ്ങിയവ യൂവാക്കളെ മെട്രോയിലേക്ക് ആകര്‍ഷിക്കുന്ന ഘടങ്ങളാണ്. വിവിധ സ്റ്റേഷനുകളിൽ വന്നിറങ്ങുന്ന യാത്രക്കാർക്കു നഗരത്തിലെ പ്രധാന കേന്ദ്രങ്ങളിലേക്കെത്താൻ 15 ബസുകൾ ക്രമീകരിച്ചിട്ടുണ്ട്. വൈറ്റിലയില്‍ നിന്നും തൃപ്പൂണിത്തുറ നിന്നും ഇ-ഫീഡര്‍ ബസ് ഇന്‍ഫോപാര്‍ക്കിലേക്ക് ആരംഭിച്ചു. എലവേറ്റഡ് ട്രാം സാധ്യത മെട്രോയുടെ വിപുലീകരണത്തിന്‍റെ ഭാഗമായി ഹൈക്കോടതിയിൽ നിന്ന് തേവര വരെയുള്ള റൂട്ടില്‍ എലവേറ്റഡ് ട്രാം സര്‍വീസിനുള്ള സാധ്യത പഠനത്തിനും കെഎംആര്‍എല്‍ ഒരുങ്ങുകയാണ്. മെട്രോ രണ്ടാംഘട്ട വികസനത്തിന്‍റെ ഭാഗമായി പാലാരിവട്ടം-കാക്കനാട് ഇന്‍ഫോപാര്‍ക്ക് റൂട്ടില്‍ നിര്‍മാണം പുരോഗമിക്കുകയാണ്. മൂന്നാം ഘട്ടമായി ആലുവ-അങ്കമാലി റൂട്ടിലെ നിർമാണത്തിന് വിശദമായ പദ്ധതി റിപ്പോര്‍ട്ട് തയാറാക്കുന്ന പ്രാരംഭ പ്രവര്‍ത്തനങ്ങളും ആരംഭിച്ചതായി കെഎംആർ‌എൽ അറിയിച്ചു.

പെരിയാറിൽ ജലനിരപ്പുയർന്നു; മണപ്പുറം വെള്ളക്കെട്ടിൽ

ആലുവ: കനത്ത മഴയെത്തുടർന്ന് പെരിയാർ കരകവിഞ്ഞൊഴുകി ആലുവ മണപ്പുറത്തെ താത്കാലിക ശിവക്ഷേത്രത്തിന്‍റെ മേൽക്കൂരയുടെ താഴെ വരെ മുങ്ങി. പുലർച്ചെ 3.30 ഓടെയാണ് ക്ഷേത്രത്തിലെ ശിവലിംഗ പ്രതിഷ്ഠ മുങ്ങിയത്. ഇക്കുറി കാലവർഷത്തിലെ ആദ്യ ആറാട്ടാണിത്. നിരവധി ഭക്തരാണ് ആറാട്ട് കുളിക്കാനെത്തുന്നത്. അതേ സമയം പെരിയാറിന്‍റെ തീരത്ത് ജലനിരപ്പ് ഉയർന്നിട്ടില്ല. പെരിയാർ കരകവിഞ്ഞ് പ്രകൃതി ഒരുക്കുന്ന സ്വാഭാവിക വെള്ളപ്പൊക്കത്തിൽ ക്ഷേത്രം പൂർണമായും മുങ്ങുമ്പോഴാണ് ആലുവ മഹാദേവന് ആറാട്ട് നടക്കുന്നത്. മണൽപ്പരപ്പിൽ നിന്ന് താഴ്ത്തിയാണ് ക്ഷേത്ര മുറ്റം നിലകൊള്ളുന്നത്. ക്ഷേത്രം മുങ്ങിയാലും മണപ്പുറത്തെ ക്ഷേത്രത്തിൽ പൂജ നടത്തണമെന്ന ഐതിഹ്യമുള്ളതിനാൽ ക്ഷേത്ര ചുറ്റുമതിലിന് മുകളിൽ ശീവേലി തിടമ്പ് എത്തിച്ച് രാവിലെ അഭിഷേകം നടന്നു. മുൻ കാലങ്ങളിൽ പ്രത്യേക തോണിയിലാണ് താഴത്തെ ക്ഷേത്രത്തിൽ എത്തിയിരുന്നത്. പലപ്പോഴായി പെയ്ത കനത്ത മഴയും വിവിധ ഡാമുകളിൽ നിന്ന് കൂടുതൽ വെള്ളമെത്തിയതുമാണ് മണപ്പുറം ക്ഷേത്രം മുങ്ങാൻ കാരണമായത്. ബലി തർപ്പണത്തിന് എത്തുന്നവർക്ക് ക്ഷേത്ര ഓഡിറ്റോറിയത്തിൽ ദേവസ്വം ബോർഡും ഉപദേശക സമിതിയും സൗകര്യമൊരുക്കിയിട്ടുണ്ട്. മണപ്പുറത്തെ ക്ഷേത്രത്തറയിൽ താത്കാലികമായി കൂട്ടിയോജിപ്പിക്കുന്ന വിധത്തിൽ മരത്തടികളാൽ നിർമിക്കുന്ന താത്കാലിക ക്ഷേത്രത്തിലെ പ്രധാന ഭാഗങ്ങൾ മേടമാസം അവസാനത്തോടെ അഴിച്ചുമാറ്റിയിരുന്നു. ഇവിടത്തെ ശീവേലി തിടമ്പും മുകളിലെ പ്രധാന ക്ഷേത്രത്തിലേക്ക് മാറ്റി. ഈ ശീവേലി തിടമ്പ് എത്തിച്ചാണ് രാവിലെ അഭിഷേകം നടത്തിയത്.

വയോധികനെ വഴിയില്‍ ഉപേക്ഷിച്ച സംഭവം : അന്വേഷണത്തിന് ഉത്തരവിട്ട് മനുഷ്യാവകാശ കമ്മീഷന്‍

കൊച്ചി: തൃശൂര്‍ സ്വദേശിയായ 65-കാരനെ എറണാകുളം നോര്‍ത്ത് മേല്‍പ്പാലത്തിന് കീഴില്‍ ഉപേക്ഷിച്ച സംഭവം അസിസ്റ്റന്‍റ് പോലീസ് കമ്മീഷണര്‍ റാങ്കില്‍ കുറയാത്ത ഉദ്യോഗസ്ഥന്‍ അന്വേഷിക്കണമെന്ന് മനുഷ്യാവകാശ കമ്മീഷന്‍ ചെയര്‍പേഴ്‌സണ്‍ ജസ്റ്റീസ് അലക്‌സാണ്ടര്‍ തോമസ് എറണാകുളം ജില്ലാ പോലീസ് മേധാവിക്ക് നിര്‍ദേശം നല്‍കി. തൃശൂര്‍ സ്വദേശി ഷംസുദ്ദീനെയാണ് ഇക്കഴിഞ്ഞ 13ന് എറണാകുളം നോര്‍ത്ത് പാലത്തിന് താഴെ സഹോദരങ്ങള്‍ ഉപേക്ഷിച്ചു പോയതിനെ തുടര്‍ന്ന് അവശനിലയില്‍ കണ്ടെത്തിയത്. ഉപേക്ഷിക്കപ്പെട്ടയാളുടെ വിലാസം, മുതിര്‍ന്ന പൗരന്‍മാരുടെ സംരക്ഷണ നിയമത്തിന്‍റെ ലംഘനം സംഭവിച്ചിട്ടുണ്ടോ, സംഭവത്തില്‍ എഫ്‌ഐആര്‍ രജിസ്റ്റര്‍ ചെയ്തിട്ടുണ്ടോ തുടങ്ങിയ വിവരങ്ങള്‍ കൃത്യമായി അന്വേഷിച്ച് മൂന്നാഴ്ചക്കകം റിപ്പോര്‍ട്ട് സമര്‍പ്പിക്കണമെന്ന് കമ്മീഷന്‍ ആവശ്യപ്പെട്ടു. സാമൂഹികനീതിവകുപ്പ് ജില്ലാ ഓഫീസര്‍ സംഭവത്തെക്കുറിച്ച് അന്വേഷണം നടത്തണം. വയോധികന് ലഭ്യമാക്കിയ ചികിത്സ, പുനരധിവാസം ഉറപ്പാക്കിയിട്ടുണ്ടോ തുടങ്ങിയ വിവരങ്ങള്‍ അന്വേഷിച്ച് മൂന്നാഴ്ചയ്ക്കകം റിപ്പോര്‍ട്ട് സമര്‍പ്പിക്കണം. മുതിര്‍ന്ന പൗരന്‍മാരുടെ സംരക്ഷണ നിയമപ്രകാരം ഇപ്പോള്‍ ഉപേക്ഷിക്കപ്പെട്ട വയോധികനുമായി ബന്ധപ്പെട്ട് ആര്‍ഡിഒയ്ക്ക് മുന്നില്‍ കേസുകള്‍ നിലവിലുണ്ടോ എന്നും പരിശോധിക്കണം. അസിസ്റ്റന്‍റ് കമ്മീഷണറും ജില്ലാ സാമൂഹികനീതി ഓഫീസറും ജൂലൈ 15ന് രാവിലെ 10ന് എറണാകുളം ഗവ. ഗസ്റ്റ് ഹൗസില്‍ നടക്കുന്ന സിറ്റിംഗില്‍ നേരിട്ട് ഹാജരാകണമെന്നും ഉത്തരവില്‍ പറഞ്ഞു. പത്രവാര്‍ത്തയുടെ അടിസ്ഥാനത്തില്‍ സ്വമേധയാ രജിസ്റ്റര്‍ ചെയ്ത കേസിലാണ് നടപടി.

റെയില്‍വേ കള്‍വര്‍ട്ടുകളിലെ മാലിന്യനീക്കം പൂര്‍ത്തിയാകാത്തതില്‍ ഹൈക്കോടതിക്ക് അതൃപ്തി

കൊച്ചി: നഗരത്തിലെ റെയില്‍വേ കള്‍വര്‍ട്ടുകളിലെ മാലിന്യനീക്കം മഴക്കാലം എത്തിയിട്ടും പൂര്‍ത്തിയാകാത്തതില്‍ ഹൈക്കോടതിക്ക് അതൃപ്തി. 23 കള്‍വര്‍ട്ടുകളില്‍ 15 എണ്ണത്തിന്‍റെ ശുചീകരണമാണ് ഇന്നലെ വരെ പൂര്‍ത്തിയായതെന്ന് റെയില്‍വേ ഹൈക്കോടതിയെ അറിയിച്ചു. ഈ പ്രവൃത്തി സംബന്ധിച്ച് റെയില്‍വേയും കോര്‍പറേഷനും തമ്മില്‍ ധാരണയിലെത്താന്‍ വൈകിയതും കാലതാമസത്തിന് കാരണമായി. കള്‍വര്‍ട്ടുകളില്‍ പ്ലാസ്റ്റിക് മാലിന്യമടക്കം അടിയുന്നത് തടയാന്‍ ദീര്‍ഘകാലപരിഹാര നടപടികള്‍ ആവിഷ്‌കരിച്ച് നടപ്പാക്കണമെന്ന് ജസ്റ്റീസ് ദേവന്‍ രാമചന്ദ്രന്‍ നിര്‍ദേശിച്ചു. മഴ കഴിയുമ്പോള്‍ ഇതിനു തുടക്കം കുറിക്കണമെന്നും ആവശ്യപ്പെട്ടു. അടുത്തയാഴ്ച വിഷയം പരിഗണിക്കുമ്പോള്‍ പദ്ധതി നിര്‍ദ്ദേശം സമര്‍പ്പിക്കാമെന്ന് റെയില്‍വേ അറിയിച്ചു. നഗരത്തില്‍ വെള്ളം കെട്ടുന്ന ഹോട്‌സ്‌പോട്ടുകളില്‍ പ്രത്യേക ശ്രദ്ധവേണമെന്നും നിര്‍ദേശിച്ചു. കാനകളിലേയും തോടുകളിലേയും ചെളിനീക്കം പൂര്‍ത്തിയായിവരികയാണെന്ന് കോര്‍പറേഷന്‍ മറുപടി നല്‍കി. തൃക്കാക്കരയില്‍ നിന്ന് കൊച്ചി നഗരത്തിലേക്ക് വെള്ളം ഒഴുകിയെത്തുന്നതു സംബന്ധിച്ച റിപ്പോര്‍ട്ട് സമര്‍പ്പിക്കുന്നതിന് ജില്ലാ കളക്ടര്‍ സമയം തേടി. നഗരത്തിലെ വെള്ളക്കെട്ട് നിവാരണവുമായി ബന്ധപ്പെട്ട ഹര്‍ജികളിലാണ് അധികൃതര്‍ നിലപാടറിയിച്ചത്. വിഷയം വ്യാഴാഴ്ച വീണ്ടും പരിഗണിക്കും.

ചന്ദര്‍കുഞ്ച് അപ്പാര്‍ട്ട്‌മെന്‍റ് നിര്‍മാണത്തിലെ ക്രമക്കേട്: സിബിഐ അന്വേഷണമില്ല

കൊച്ചി: വൈറ്റില ചന്ദര്‍കുഞ്ച് അപ്പാര്‍ട്ട്‌മെന്‍റ് നിർമാണത്തിലെ ക്രമക്കേടുകള്‍ സംബന്ധിച്ച് സിബിഐ. അന്വേഷണത്തിന് ഉത്തരവിടണമെന്ന ആവശ്യം ഹൈക്കോടതി അനുവദിച്ചില്ല. ബലക്ഷയത്തിലായ ആര്‍മി ടവറുകള്‍ ഉടന്‍ പൊളിച്ചു നീക്കാനാണ് അധികൃതരുടെ തീരുമാനം. അതിനുമുമ്പ് മതിയായ അന്വേഷണം നടത്തിയില്ലെങ്കില്‍ നിർമാണത്തകരാറിന്‍റെ ഉത്തരവാദികള്‍ രക്ഷപ്പെടാന്‍ ഇടയാകുമെന്നായിരുന്നു ഫ്‌ളാറ്റിലെ അന്തേവാസിയായ റിട്ട. കേണല്‍ സിബി ജോര്‍ജ് നല്‍കിയ ഹര്‍ജിയിലെ വാദം. ദുരന്തനിവാരണ നിയമപ്രകാരം എഫ്‌ഐആര്‍ രജിസ്റ്റര്‍ ചെയ്യാന്‍ സിബിഐയോട് നിര്‍ദേശിക്കണമെന്നായിരുന്നു ആവശ്യം. എന്നാല്‍ അത്തരം ഉത്തരവിനുള്ള അസാധാരണ സാഹചര്യം നിലനില്‍ക്കുന്നില്ലെന്ന് വ്യക്തമാക്കിയാണ് ജസ്റ്റീസ് പി.വി. കുഞ്ഞികൃഷ്ണന്‍ ഹര്‍ജി തീര്‍പ്പാക്കിയത്.

ആർഎംപി കനാൽ ആഴം കൂട്ടാൻ ഓപ്പറേഷൻ വാഹിനി

വൈപ്പിൻ: ‘പുതുവൈപ്പിന്‍റെ ദുഖ’മെന്ന് കുപ്രസിദ്ധി നേടിയ ആർഎംപി കനാലിന്‍റെ മണൽ മൂടിയ ഭാഗത്ത് ഡ്രഡ്ജിംഗ് തുടങ്ങി. കൊച്ചി അഴിമുഖത്തോടു ചേർന്നുള്ള കനാലിന്‍റെ മുഖഭാഗം മണൽ മൂടിക്കിടക്കുന്നതിനാൽ പുതുവൈപ്പിന്‍റെ പടിഞ്ഞാറൻ മേഖലയിൽനിന്ന് മഴവെളളം ഇറങ്ങിപ്പോകാതെ വീടുകൾ പ്രളയ സമാനമായതിന്‍റെ പശ്ചാത്തലത്തിലാണ് നടപടി തുടങ്ങിയത്. നാട്ടുകാർ സമരസമിതി രൂപീകരിച്ച് പഞ്ചായത്തിനു മുന്നിൽ സമരം തുടങ്ങിയതോടെ പഞ്ചായത്ത് കളക്ടർക്ക് കത്തു നൽകി. യോഗം വിളിച്ച കളക്ടർ പോർട്ടിന്‍റെ അധീനതയിൽപ്പെട്ട ഈ ഭാഗം ഡ്രഡ്ജ് ചെയ്യാൻ പോർട്ടിനു നിർദേശം നൽകിയെങ്കിലും നടപടിയുണ്ടായില്ല. പ്രസിഡന്‍റ് രസികല പ്രിയരാജ് കളക്ടറോട് വിഷയത്തിന്‍റെ ഗൗരവം വിശദമാക്കിയതോടെ ഓപ്പറേഷൻ വാഹിനി പദ്ധതിയിൽപ്പെടുത്തി പണികൾ ചെയ്യാൻ ഇറിഗേഷൻ വകുപ്പിനു നിർദേശം നൽകുകയുമായിരുന്നു. പ്രശ്നത്തിന് ശാശ്വത പരിഹാരം തേടാനായി ശാസ്ത്രീയ പഠനം നടത്തുവാനും ഇറിഗേഷൻ വകുപ്പിനെ ചുമതലപ്പെടുത്തിയിട്ടുണ്ടെന്ന് പഞ്ചായത്ത് പ്രസിഡന്‍റ് അറിയിച്ചു. അതേസമയം ഇവിടെ ഡ്രഡ്ജിംഗിനു സ്ഥിരം സംവിധാനം വേണമെന്നും ഇതിനായി പ്ലാൻ ഫണ്ടിൽ പണം നീക്കിവെക്കണമെന്നും സമരസമിതി ചെയർമാൻ സി.ജി. ബിജു ആവശ്യപ്പെട്ടു.

ഇടമുളയിൽ വീടുകളിൽ വെള്ളം കയറി

ഏലൂർ: ഏലൂർ നഗരസഭ 13-ാം വാർഡായ ഇടമുള, ബോസ്കോ കോളനി, പവർലൂം എന്നിവിടങ്ങളിൽ വെള്ളം കയറി. രണ്ട് ദിവസമായി തോരാതെ പെയ്ത മഴയിൽ പെരിയാറിൽ ജലനിരപ്പ് ഉയർന്നതാണ് വീടുകളിൽ വെള്ളം കയറാൻ കാരണം. പരിസരത്തെ അഴുക്കുകളും മാലിന്യവും വെള്ളത്തിൽ വീട്ടുപടിക്കൽ നിറഞ്ഞു നിൽക്കുകയാണ്. കോവിഡും പനിയുമൊക്കെ പടർന്നു പിടിച്ചിരിക്കുന്ന സ്ഥലമാണിത്. ഒരു മഴ കൂടി പെയ്താൽ താമസക്കാരെ മാറ്റി പാർപ്പിക്കേണ്ടി വരുമെന്ന് വാർഡ് കൗൺസിലർ കെ.എം. ഇസ്മായിൽ പറഞ്ഞു.

കടമ്പ്രയാർ ഡിടിപിസി ഹോട്ടലിനു സമീപം പാടശേഖരം മണ്ണിട്ടു നികത്തുന്നു

കിഴക്കമ്പലം: പഴങ്ങനാട് കടമ്പ്രയാർ ഡിടിപിസി ഹോട്ടലിനു സമീപം പാടശേഖരം മണ്ണിട്ടു നികത്തുന്നതായി പരാതി. കഴിഞ്ഞ ദിവസങ്ങളിൽ ഹോട്ടലിനോടു ചേർന്ന് ഏകദേശം 20 സെന്‍റ് സ്‌ഥലത്താണ് മണ്ണിട്ട് നികത്തുന്നത് നാട്ടുകാരുടെ ശ്രദ്ധയിൽപ്പെട്ടത്. സംഭവത്തെക്കുറിച്ച് നാട്ടുകാർ പരാതി ഉന്നയിച്ചതോടെ പ്രദേശം സ്ഥിതി ചെയ്യുന്ന വാർഡ് 15ലെ മെമ്പർ ഷീബ ജോർജ് ഇന്നലെ രാവിലെ സ്ഥലത്തെത്തി നടത്തിയ അന്വേഷണത്തിലാണ് അനധികൃത പാടം നികത്തലാണെന്ന് കണ്ടെത്തിയത്. തുടർന്ന് പാടം നികത്തൽ നിർത്താൻ ആവശ്യപ്പെടുകയും നാട്ടുകാർ ഉൾപ്പടെ മണ്ണുമായി എത്തിയ ലോറി തടയുകയുമായിരുന്നു. ആകെ നാല് സെന്‍റ് സ്ഥലവും കെട്ടിടവും മാത്രമാണ് ഹോട്ടൽ നടത്തിപ്പിന് നൽകിയിട്ടുള്ളതെന്നും ബാക്കിഭാഗം നിലമായി കിടക്കുന്നതുമാണ്. നികത്തലുമായി ബന്ധപ്പെട്ട അന്വേഷണത്തിൽ പഞ്ചായത്ത് സെക്രട്ടറിക്ക് യാതൊരു അറിവും ലഭിച്ചിട്ടില്ലെന്നും വാർഡ് മെമ്പർ പറഞ്ഞു. എന്നാൽ ഞങ്ങൾക്ക് മുകളിൽനിന്ന് നിർദേശം കിട്ടിയിട്ടുണ്ടെന്നും രേഖകൾ ഉണ്ടെന്നുമാണ് ലോറിയിൽ മണ്ണുമായി എത്തിയ കാരാറുകാർ പറഞ്ഞത്. ഹോട്ടലിനോട് ചേർന്ന് കിടക്കുന്ന സ്വകാര്യ വ്യക്തിയുടെ സ്ഥലം നിലമാണോ കരഭൂമിയാണോ എന്ന് പരിശോധിച്ചാൽ മാത്രമേ നിജ സ്ഥിതി വ്യക്തമാകൂ. ഈ ഭാഗത്ത് വെള്ളം നിറഞ്ഞു കിടക്കുന്നതിനാൽ ഹോട്ടൽ പ്രവർത്തിക്കാൻ കഴിയാത്ത സ്ഥിതിവിശേഷവും പാർക്കിംഗും തടസപ്പെട്ടിരിക്കുകയാണ്.

ആര്‍ത്തലച്ച് തിര തീരത്തേക്ക്; വെള്ളത്തിലായത് കോടികള്‍

കൊച്ചി: കടലാക്രമണം രൂക്ഷമായ ജില്ലയിലെ തീരദേശത്ത് താല്‍ക്കാലിക സംവിധാനമൊരുക്കി കല്‍ക്ഷോഭത്തെ ചെറുക്കാനുള്ള സര്‍ക്കാര്‍ ശ്രമങ്ങൾ പാളി. മഴ രൂക്ഷമായതിന് പിന്നാലെ കടലാക്രമണവും കനത്തതോടെയാണ് കോടികള്‍ ചെലവിട്ട് ആരംഭിച്ച താല്‍ക്കാലിക സംരക്ഷണ സംവിധാനങ്ങള്‍ വെള്ളത്തിലായത്. ഇതോടെ പ്രശ്‌നപരിഹാരത്തിന് ശാശ്വത മാര്‍ഗങ്ങള്‍ വേണമെന്ന ദുരിതബാധിതരുടെ ആവശ്യവും ശക്തമായിരിക്കുകയാണ്. കണ്ണമാലി, എടവനക്കാട് പ്രദേശത്തെ തീരങ്ങളിലാണ് ജില്ലയില്‍ ഏറ്റവും കൂടുതല്‍ നാശം സംഭവിച്ചിട്ടുള്ളത്. മഴക്കാലപൂര്‍വ ശുചീകരണം പാളിയതോടെ പ്രതിഷേധമറിയിച്ച് തീരദേശവാസികള്‍ കടലില്‍ ഇറങ്ങി പ്രതിഷേധം അറിയിച്ചിട്ടും അധികാരികള്‍ ചെവിക്കൊണ്ടിരുന്നില്ല. മഴ കനത്തതിന് പിന്നാലെ വീടുകളിലടക്കം വെള്ളം കയറിയതോടെയാണ് അധികൃതര്‍ക്കും ചൂടുവച്ചത്. ശക്തമായി തുടരുന്ന മഴയ്ക്കിടെ ഏതാനും ചിലയിടങ്ങളില്‍ നിര്‍മിച്ച മണല്‍വാടകളാണ് ഇപ്പോള്‍ വെള്ളത്തിനടിയിലായിരിക്കുന്നത്. അതിനിടെ മണ്ണില്ലാത്തതിനാല്‍ ചിലയിടങ്ങളില്‍ താല്‍ക്കാലിക പ്രതിരോധ പ്രവര്‍ത്തനങ്ങളും നടത്താന്‍ കഴിയാത്ത സ്ഥിതിയാണ്. ജെസിബി ഉപയോഗിച്ച് നിര്‍മിച്ച മണല്‍വാടയും ജിയോ ബാഗുകളുമാണ് തകര്‍ന്നിട്ടുള്ളത്. മഴ തുടരുന്നതിനാല്‍ വേലിയേറ്റ സമയങ്ങളില്‍ കടല്‍ ശക്തമാണ്. ചെല്ലാനം കൊച്ചി തീരത്തെ ഈ വര്‍ഷത്തെ ഏറ്റവും ശക്തമായ കടല്‍ കയറ്റമാണ് ഈ ദിവസങ്ങളില്‍ ഉണ്ടായിട്ടുള്ളതെന്ന് പ്രദേശവാസികള്‍ പറഞ്ഞു. താല്‍ക്കാലിക സംരക്ഷണമൊരുക്കാന്‍ അനുവദിച്ചത് 1.25 കോടി ചെല്ലാനം പഞ്ചായത്തിലെ കടലാക്രമണം നേരിടുന്ന കണ്ണമാലി, ചെറിയ കടവ്, കാട്ടിപ്പറമ്പ് പ്രദേശങ്ങളില്‍ ജിയോ ബാഗ് നിരത്തി താല്‍ക്കാലിക സംരക്ഷണമൊരുക്കാനാണ് നിലവില്‍ തീരുമാനമായത്. ഇതിനായി കേരള സംസ്ഥാന ദുരന്ത നിവാരണ ഫണ്ടില്‍ നിന്ന് 1.25 കോടി രൂപ അനുവദിച്ചിരുന്നു. എന്നാല്‍ ഈ പ്രദേശങ്ങളിലെ വീടുകള്‍ ഇതിനോടകം തന്നെ വെള്ളത്തിലാണ്. കടലാക്രമണവും നാശനഷ്ടങ്ങളും രൂക്ഷമായതിന് ശേഷമാണ് സര്‍ക്കാര്‍ ഇടപെടല്‍ ഉണ്ടായിട്ടുള്ളതെന്ന് ദുരിത ബാധിതര്‍ ആരോപിക്കുന്നു. ജില്ലാ കളക്ടറുടെ നിര്‍ദേശത്തിന് പിന്നാലെ കണ്ണമാലി പ്രദേശത്ത് ഏതാനും ചിലയിടങ്ങളില്‍ മണല്‍വാടകള്‍ സ്ഥാപിക്കുന്ന ജോലികള്‍ ആരംഭിച്ചെങ്കിലും ഇവ തകര്‍ന്ന നിലയിലണ്. ജനകീയ ഹര്‍ത്താല്‍ 30ന് തീരസംരക്ഷണത്തില്‍ ടെട്രാപോഡ് കടല്‍ഭിത്തി, പുലിമുട്ട് നിര്‍മാണം വൈകുന്നതില്‍ പ്രതിഷേധിച്ച് ചെല്ലാനം കൊച്ചി ജനകീയ വേദിയുടെ നേതൃത്വത്തില്‍ ഈ മാസം 30ന് വിവിധ ബഹുജന സാമൂഹ്യ സംഘടനകളുടെ പിന്തുണയോടെ ചെല്ലാനം കൊച്ചി തീരത്ത് ജനകീയ ഹര്‍ത്താലിന് ആഹ്വാനം ചെയ്തു. പുത്തന്‍തോടിന് വടക്കോട്ടുള്ള കടല്‍ഭിത്തി നിര്‍മാണം ആരംഭിക്കണമെന്നത് പ്രദേശവാസികളുടെ വർഷങ്ങളായുള്ള ആവശ്യമാണ്. എന്നാല്‍ ഈ കാര്യത്തില്‍ സര്‍ക്കാര്‍ കടുത്ത അവഗണന തുടരുകയാണ്. ഈ സാഹചര്യത്തില്‍ ചെല്ലാനം കൊച്ചി തീരം സംരക്ഷിക്കാന്‍ പ്രദേശത്ത് ടെട്രാപോഡ് കടല്‍ ഭിത്തിയുടെയും പുലി മുട്ടുകളുടെയും നിര്‍മാണം ഉടന്‍ ആരംഭിക്കണമെന്ന് ചെല്ലാനം കൊച്ചി ജനകീയവേദി ജനറല്‍ കണ്‍വീനര്‍ വി.ടി. സെബാസ്റ്റ്യന്‍ ആവശ്യപ്പെട്ടു.

താത്കാലിക വിസിമാരുടെ നിയമനം: അപ്പീല്‍ വിധി പറയാന്‍ മാറ്റി

കൊച്ചി: താത്ക്കാലിക വിസിമാരുടെ നിയമനം നിയമപരമല്ലെന്ന സിംഗിള്‍ ബെഞ്ച് ഉത്തരവിനെതിരെ ചാന്‍സലര്‍ കൂടിയായ ഗവര്‍ണറും ബന്ധപ്പെട്ട വിസിമാരും നല്‍കിയ അപ്പീല്‍ ഹൈക്കോടതി വിധി പറയാന്‍ മാറ്റി. ജസ്റ്റീസ് അനില്‍ കെ. നരേന്ദ്രന്‍, ജസ്റ്റീസ് പി.വി. ബാലകൃഷ്ണന്‍ എന്നിവരടങ്ങുന്ന ഡിവിഷന്‍ ബെഞ്ചാണ് അപ്പീല്‍ പരിഗണിക്കുന്നത്. ഡിജിറ്റല്‍, സാങ്കേതിക സര്‍വകലാശാലാ വിസിമാര്‍ക്കു തത്ക്കാലം തുടരാമെന്ന മുന്‍ ഉത്തരവ് ഹര്‍ജി തീര്‍പ്പാക്കുന്നത് വരെ നീട്ടി. നയപരമായ തീരുമാനങ്ങളെടുക്കരുതെന്ന നിര്‍ദേശത്തോടെയാണ് തത്സ്ഥിതി ഉത്തരവ്. നിയമനത്തിനായി സര്‍ക്കാര്‍ നല്‍കിയ പട്ടിക അവഗണിച്ച് ഡോ. കെ. ശിവപ്രസാദ്, ഡോ. സിസ തോമസ് എന്നിവരെ താത്ക്കാലിക വിസിമാരായി അന്നത്തെ ഗവര്‍ണര്‍ ആരിഫ് മുഹമ്മദ് ഖാന്‍ നിയമിച്ചതിനെതിരെയായിരുന്നു സിംഗിള്‍ ബെഞ്ച് ഉത്തരവ്. സര്‍ക്കാര്‍ ശിപാര്‍ശ പ്രകാരം വേണം നിയമനമെന്ന ചട്ടം മറികടന്നാണ് ചാന്‍സലറുടെ നടപടിയെന്നും സിംഗിള്‍ ബെഞ്ച് ഉത്തരവ് ഇക്കാര്യങ്ങള്‍ പരിഗണിച്ചുള്ളതാണെന്നുമാണ് സര്‍ക്കാരിന്‍റെ വാദം. എന്നാല്‍, യുജിസി മാര്‍ഗനിര്‍ദേശ പ്രകാരം യോഗ്യതയുള്ളവരെ താത്ക്കാലിക വിസിമാരായി നിയമിക്കാന്‍ രണ്ട് സര്‍വകലാശാലാ ആക്ടുകളും ചാന്‍സലര്‍ക്ക് അധികാരം നല്‍കുന്നതായി ചാന്‍സലറും വിസിമാരും ചൂണ്ടിക്കാട്ടി.

എടയാർ മലിനീകരണം : സമരവുമായി കന്പനി തൊഴിലാളികൾ

ആലുവ: എടയാർ മേഖലയിൽ വ്യവസായ സ്ഥാപനങ്ങൾ തമ്മിലുള്ള പോര് രൂക്ഷമാക്കി പ്രത്യക്ഷ സമര പരിപാടികൾ നടന്നു. വ്യാപകമായ ദുർഗന്ധമെന്ന് ആരോപിച്ച് മറൈൻ അലൈൻസ് പ്രോഡക്റ്റ്സ് എന്ന കമ്പനിയുടെ മുന്നിൽ തൊട്ടടുത്ത ഇൻഡോ ജർമൻ കാർബൺ തൊഴിലാളികൾ പ്രതിഷേധ സമരം നടത്തി. ഇതിനു മറുപടിയായി അലൈൻസ് കമ്പനി തൊഴിലാളികൾ പ്രതിരോധ സമരം നടത്തി. എടയാർ വ്യവസായ മേഖലയിൽ പ്രവർത്തിക്കുന്ന മത്സ്യ, മാംസങ്ങൾ സംസ്ക്കരിച്ച് കോഴിത്തീറ്റ ഉണ്ടാക്കുന്ന കമ്പനിയിൽനിന്ന് രൂക്ഷഗന്ധം പരക്കുന്നതായി ആരോപിച്ചാണ് നൂറുകണക്കിന് തൊഴിലാളികൾ റാലിയും പ്രതിഷേധ സമരവും നടത്തിയത്. പ്രതിഷേധ യോഗത്തിൽ പരിസ്ഥിതി പ്രവർത്തകരും പങ്കെടുത്തു. ചിരട്ടക്കരി നിർമണ സ്ഥാപനമാണ് ഐജിസിഎൽ. എന്നാൽ സ്ഥാപനത്തെക്കുറിച്ച് പരാതിയുണ്ടെങ്കിൽ മലിനീകരണ നിയന്ത്രണ ബോർഡിനേയോ വ്യവസായ വകുപ്പിനേയോ സമീപിക്കാതെ തൊഴിലാളികളെക്കൊണ്ട് സമരം ചെയ്യിക്കുന്നത് ഗുഢലക്ഷ്യത്തിലാണ് അലൈൻസ് കമ്പനി തൊഴിലാളികൾ ആരോപിച്ചു. പരസ്പരം നിരവധി ആരോപണങ്ങൾ മാനേജ്മെന്‍റും തൊഴിലാളി സംഘടനാ നേതാക്കളും ഉന്നയിച്ചിട്ടുണ്ട്. ഇൻഡോ ജർമൻ കാർബൺ തൊഴിലാളികൾ നടത്തിയ സമരത്തെ പ്രതിരോധിക്കുവാൻ അലൈൻസ് കമ്പനി മാനേജ്മെന്‍റ് പ്രതിരോധ സമരം സംഘടിപ്പിച്ചത് സ്ഥലത്ത് സംഘർഷത്തിനിടയാക്കി. തുടർന്ന് ഇൻഡോ കാർബൺ തൊഴിലാളികൾ എടയാർ കവലയിലേക്ക് പ്രകടനം നടത്തി. ഇതിന് പിന്നാലെ പ്രകടനം നടത്താൻ എത്തിയ അലൈൻസ് തൊഴിലാളികളെ പോലീസ് തടഞ്ഞാണ് സംഘർഷം ഒഴിവാക്കിയത്. കഴിഞ്ഞ ദിവസം അനധികൃത ഗോഡൗണുകൾക്കെതിരെയും വലിയ ലോറികളുടെ പാർക്കിംഗിന് എതിരെയും എടയാർ മേഖലയിലെ ചെറുകിട വ്യവസായികൾ രംഗത്ത് വന്നിരുന്നു. സംഘടനയിലെ അംഗങ്ങൾക്കെതിരെയാണ് സംഘടന പരാതി പോലീസിനെ അറിയിച്ചത്. വ്യവസായശാല ഉടമകൾ പരസ്പരം പോരടിക്കുന്ന അസാധാരണ സംഭവങ്ങൾ ബിനാനിപുരം പോലീസിനും തലവേദന ആയിരിക്കുകയാണ്.

പ്ലൈവുഡ് കന്പനിയ്ക്കെതിരേ മാർച്ചും ധർണയും

ആരക്കുഴ: പഞ്ചായത്ത് ഒന്പതാം വാർഡിൽ കൊന്നാനിക്കാട് - പൊട്ടൻമല - നെടുന്പാറയിൽ നൂറുകണക്കിനു കുടുംബങ്ങൾ ആശ്രയിക്കുന്ന ശുദ്ധജല പദ്ധതിയുടെ ഭാഗമായ കിണറിനോടു ചേർന്ന് പ്ലൈവുഡ് കന്പനി ആരംഭിക്കാനുള്ള ശ്രമത്തിനെതിരെ ജനകീയ സമര സമിതിയുടെ പ്രതിഷേധം. സമരസമിതിയുടെ നേതൃത്വത്തിൽ എൽദോസ് കുന്നപ്പിള്ളി എംഎൽഎയുടെ പണ്ടപ്പിള്ളിയിലെ വീട്ടിലേക്ക് ജനകീയ പ്രതിഷേധ മാർച്ചും ധർണയും സംഘടിപ്പിച്ചു. ലൈബ്രറി ജംഗ്ഷനിൽ നിന്നാരംഭിച്ച മാർച്ച് എൽദോസ് കുന്നപ്പിള്ളി എംഎൽഎയുടെ വീടിന് സമീപം പോലീസ് തടഞ്ഞു. തുടർന്ന് നടന്ന ധർണ താലൂക്ക് ലൈബ്രറി കൗണ്‍സിൽ പ്രസിഡന്‍റ് ജോഷി സ്കറിയ ഉദ്ഘാടനം ചെയ്തു. ജനകീയ സമരസമിതി സെക്രട്ടറി കെ.എസ്. നിഷാദ് അധ്യക്ഷത വഹിച്ചു. യോഗത്തിൽ സമരസമിതി കണ്‍വീനർ പി.വി.തോമസ്, സിപിഎം ലോക്കൽ സെക്രട്ടറി ബിനോയി ഭാസ്കരൻ, ബിജെപി മണ്ഡലം സമിതി അംഗം കെ.എം. സിനിൽ എന്നിവർ പ്രസംഗിച്ചു. ജനങ്ങളുടെ കുടിവെള്ള സ്രോതസ് മലിനീകരണം ഉൾപ്പെടെ വലിയ പാരിസ്ഥിതിക പ്രത്യാഘാതങ്ങൾ സൃഷ്ടിക്കുന്ന പ്ലൈവുഡ് ഫാക്ടറിയുടെ നിർമാണം തുടർന്നാൽ ജനകീയ പ്രതിഷേധം ശക്തമാക്കാൻ ജനകീയ സമര സമിതി തീരുമാനിച്ചിട്ടുണ്ട്.

എൻസിസിക്ക് സ്വന്തം കെട്ടിടം നിർമിക്കും

വാഴക്കുളം: എൻസിസി 18 കേരള ബറ്റാലിയന് കല്ലൂർക്കാട് പഞ്ചായത്തിൽ സ്വന്തമായി ഓഫീസ് കെട്ടിടം ഉയരും. നാഗപ്പുഴയ്ക്കു സമീപമുള്ള കൂച്ചനിൽ ഓഫീസ്-കം-റസിഡൻഷ്യൽ കോംപ്ലക്സ് നിർമിക്കാനാണ് തീരുമാനം. ഇവിടെ വിദ്യാഭ്യാസ വകുപ്പിന്‍റെ ഒരേക്കറോളം സ്ഥലത്തു പ്രവർത്തിച്ചിരുന്ന ഗവ. എൽപി സ്കൂൾ കുട്ടികളുടെ ലഭ്യതക്കുറവുമൂലം രണ്ടായിരത്തിൽ നിർത്തലാക്കിയിരുന്നു. ഈ സ്ഥലമാണ് എൻസിസി കെട്ടിടത്തിനായി കണ്ടെത്തിയിട്ടുള്ളത്. കേരള-ലക്ഷദ്വീപ് എൻസിസി അഡീഷണൽ ഡയറക്ടർ ജനറൽ മേജർ ജനറൽ രമേശ് ഷണ്‍മുഖം, കേരള ബറ്റാലിയൻ കമാൻഡിംഗ് ഓഫീസർ കേണൽ എസ്.എം. പ്രശാന്ത് നായർ എന്നിവർ സ്ഥലം സന്ദർശിച്ച് കെട്ടിടം നിർമിക്കാൻ അന്തിമ തീരുമാനമെടുക്കുകയായിരുന്നു. വിശദമായ പ്ലാൻ തയാറാക്കാൻ പൊതുമരാമത്തുവകുപ്പ് ബിൽഡിംഗ്സ് വിഭാഗത്തിന് നിർദേശം നൽകും. മൂന്നാം റൗണ്ട് സ്ഥല പരിശോധനയ്ക്കെത്തിയ ഉന്നത ഉദ്യോഗസ്ഥർക്കൊപ്പം ബ്ലോക്ക് പഞ്ചായത്തംഗം പ്രഫ. ജോസ് അഗസ്റ്റിൻ, പഞ്ചായത്തംഗങ്ങളായ ബാബു മനയ്ക്കപ്പറന്പൻ, അനിൽ കെ. മോഹനൻ, പഞ്ചായത്ത‌് സെക്രട്ടറി കെ.ടി മാത്യു, എൻസിസി ഓഫീസർ സെസിൽ തുടങ്ങിയവരുമുണ്ടായിരുന്നു. നിലവിൽ 33 സ്ഥാപനങ്ങളിൽ നിന്നുള്ള 2600 കേഡറ്റുകൾക്ക് പരിശീലനം നൽകുന്ന 18 കേരള ബറ്റാലിയൻ റീജണൽ ഓഫീസ് മൂവാറ്റുപുഴയിലെ വാടകക്കെട്ടിടത്തിൽ പരിമിതമായ സൗകര്യത്തിലാണ് പ്രവർത്തിക്കുന്നത്.

പന്തപ്ര ഗോത്രവർഗ ഉന്നതിയിൽ കാട്ടാനശല്യം രൂക്ഷം

കോതമംഗലം : കുട്ടന്പുഴ പന്തപ്ര ഗോത്രവർഗ ഉന്നതിയിൽ കാട്ടാനശല്യം രൂക്ഷമായതായി പരാതി. ഇന്നലെ പുലർച്ചെയെത്തിയ കാട്ടാനക്കൂട്ടം വ്യാപകമായി കൃഷി നശിപ്പിച്ചു. മൂപ്പൻ കുട്ടൻ ഗോപാലൻ, ചെല്ലപ്പൻ, പ്രഭാകരൻ എന്നിവരുടെ കൃഷികൾക്കാണു നാശം. വീടിന്‍റെ മുറ്റത്തു വരെയെത്തിയ ആനകൾ തെങ്ങുകളും വാഴകളും തിന്നും ചവിട്ടിമെതിച്ചും നശിപ്പിക്കുകയായിരുന്നു. കാട്ടാനശല്യം ഇവിടെ നിത്യസംഭവമായി. ശനിയാഴ്ച രാത്രി കാട്ടാനകളെ തുരത്താനെത്തിയ വനപാലകർക്കെതിരെ ഉന്നതിയിൽ പ്രതിഷേധമുയർന്നിരുന്നു. വൈദ്യുതവേലി ഉൾപ്പെടെ സുരക്ഷാ ക്രമീകരണങ്ങൾ ഏർപ്പെടുത്തി വന്യമൃഗശല്യത്തിനു ശാശ്വത പരിഹാരം കാണാത്തതിലായിരുന്നു പ്രതിഷേധം.

ലൈഫ് ഭവനപദ്ധതി അവലോകനം: കൊച്ചി മേയർ സന്ദർശനം നടത്തി

കൂത്താട്ടുകുളം: കൊച്ചിൻ കോർപറേഷൻ കൂത്താട്ടുകുളത്ത് പൂർത്തീകരിക്കുന്ന ലൈഫ് ഭവനപദ്ധതി അവലോകനത്തിനായി മേയർ എം. അനിൽ കുമാർ സന്ദർശനം നടത്തി. നഗരസഭയിലെ കിഴകൊന്പിലാണ് ഭവനരഹിതർക്ക് വീടുകൾ ഒരുങ്ങുന്നത്. സ്വന്തമായി സ്ഥലവും വീടുമില്ലാത്ത 46 കുടുംബങ്ങൾക്ക് മൂന്ന് സെന്‍റ് സ്ഥലം വീതമാണ് അനുവദിച്ചത്. സംസ്ഥാന സർക്കാർ സൗജന്യ രജിസ്ട്രേഷനിലൂടെ സ്ഥലം പതിച്ചു നൽകി. രണ്ടേകാൽ ഏക്കർ സ്ഥലത്ത് കൊച്ചി കോർപറേഷനിലെ-39, ചേരനെല്ലൂർ പഞ്ചായത്തിലെ അഞ്ച്, എടത്തല പഞ്ചായത്തിലെ രണ്ടും കുടുംബങ്ങൾക്കുമാണ് വീടൊരുങ്ങുന്നത്. ഭ ൂരിഭാഗം വീടുകളും പൂർത്തിയായി. പൊതുവഴി, വാട്ടർ ടാങ്ക്, പൊതു കളിസ്ഥലം എന്നിവക്കും സ്ഥലം നീക്കിവച്ചിട്ടുണ്ട്. കൂത്താട്ടുകുളം നഗരസഭ വൈസ് ചെയർമാൻ സണ്ണി കുര്യാക്കോസ്, സിപിഎം ലോക്കൽ സെക്രട്ടറി ഫെബീഷ് ജോർജ് എന്നിവർ മേയറുമായി കൂടിക്കാഴ്ച നടത്തി. കോർപറേഷൻ സ്ഥിരം സമിതി അധ്യക്ഷ സി.ഡി. വത്സലകുമാരി, കൗണ്‍സിലർമാരായ പ്രിയ പ്രശാന്ത്, മിനി വിവേര, രഘുറാം ജി. പൈ എന്നിവരും മേയർക്കൊപ്പമുണ്ടായിരുന്നു.

രാജേഷ്-ബിന്ദു ദന്പതികളുടെ ഭവനസ്വപ്നം സഫലമായി

കൂത്താട്ടുകുളം : സുമനസുകളുടെ കൂട്ടായ ശ്രമത്തിൽ കൂത്താട്ടുകുളം നഗരസഭ 24-ാം വാർഡിലെ താമസക്കാരായ ഒലിക്കരയിൽ രാജേഷ്-ബിന്ദു, ദന്പതികളുടെ വീടെന്ന സ്വപ്നം യാഥാർഥ്യമായി. വർഷങ്ങളുടെ കാത്തിരിപ്പിനുശേഷമാണ് ഈ ദന്പതികൾക്ക് സുരക്ഷിതമായി കയറിക്കിടക്കാൻ ഒരു ഇടം ഒരുങ്ങിയത്. ഇവർക്ക് വീടുവയ്ക്കുന്നതിനായി 2016 - 17 കാലഘട്ടത്തിൽ നാല് ലക്ഷം രൂപ പട്ടികജാതി പട്ടികവർഗ വകുപ്പിൽ നിന്ന് അനുവദിച്ചിരുന്നു. അന്ന് ആ തുകകൊണ്ട് വീടിന്‍റെ പ്രധാന വാർക്ക വരെ മാത്രമേ പൂർത്തീകരിക്കാൻ കഴിഞ്ഞിരുന്നുള്ളൂ. ഇതിനിടെ ബിന്ദുവിന് സുഖമില്ലാതാവുകയും എറണാകുളം അമൃത ആശുപത്രിയിൽ അഡ്മിറ്റ് ചെയ്യുകയും ചെയ്തു. സാന്പത്തികമായി പിന്നാക്കം നിൽക്കുന്ന കുടുംബം ചികിത്സയ്ക്കായി ഏറെ കഷ്ടപ്പെട്ടിരുന്നു. നാട്ടുകാരുടെയും സുഹൃത്തുക്കളുടെയും സഹായത്തോടെയാണ് ചികിത്സ നടത്തിയിരുന്നത്. ഇതിനിടെ താമസിക്കുന്ന വീടിന്‍റെ അവസ്ഥ പരിതാപകരമായതോടെ വീട് നിർമാണം പുനഃരാരംഭിക്കാനുള്ള ആഗ്രഹം മുൻ നഗരസഭാംഗം തോമസ് ജോണിന്‍റെ ശ്രദ്ധയിൽപ്പെടുത്തി. വീട് നിർമാണം പുനരാരംഭിക്കാനുള്ള ആലോചന നടക്കുന്ന സമയത്ത് തോമസ് ജോണ്‍ വിദേശത്ത് താമസിക്കുന്ന മകന്‍റെ അടുക്കലേക്ക് പോകുകയും ചെയ്തു. തോമസ് ജോണിന്‍റെ കാനഡ സന്ദർശത്തിനിടയിൽ മകന്‍റെ നേതൃത്വത്തിൽ ഒരു ക്രിക്കറ്റ് ടൂർണമെന്‍റ് നടക്കുകയും ടൂർണമെന്‍റിൽ നിന്നും ലഭിച്ച തുക മകൻ, തോമസ് ജോണിന് നൽകുകയും ചെയ്തു. ഈ തുക രാജേഷ്- ബിന്ദു ദന്പതികളുടെ വീട് നിർമാണം പുനരാരംഭിക്കാൻ വിനിയോഗിക്കുകയായിരുന്നു. എന്നാൽ ആ തുകകൊണ്ട് നിർമാണം പൂർത്തിയാക്കാൻ കഴിയില്ലെന്ന് മനസിലാക്കി തോമസ് ജോണ്‍, കാട്ടുപാടത്ത് ഡോ. ചാക്കോച്ചനെ സമീപിക്കുകയും വീട് നിർമ്മാണം പൂർത്തീകരിക്കുന്നതിനുള്ള സഹായം തേടുകയും ചെയ്തു. ഡോക്ടറുടെ സഹായത്താൽ പ്ലംബിംഗ് ഇലക്ട്രിക്കൽ ജോലികൾ പൂർത്തീകരിച്ചു. ഇതിനൊപ്പം തന്നെ കൂത്താട്ടുകുളത്തെ ടൈൽസ് വ്യാപാരിയായ കുന്നുമേൽ റെന്നി വർഗീസ് വീടിന് ആവശ്യമായ ഫ്ളോറിംഗ് മെറ്റീരിയലുകൾ സൗജന്യമായി നൽകി. പിന്നീട് സുഹൃത്തുക്കളുടെയും സ്വകാര്യ സംഘടനകളുടെയും ചെറിയ സഹായങ്ങളും എത്തിത്തുടങ്ങി. ടിവിയും ഫ്രിഡ്ജും ഫാനുമടങ്ങുന്ന സഹായങ്ങൾകൂടി എത്തിയതോടെ വീട്ടിൽ ഐശ്വര്യത്തിന്‍റെ ആദ്യ തിരിതെളിഞ്ഞു. കേവലം മൂന്നാഴ്ച കൊണ്ടാണ് പണി പൂർത്തീകരിച്ച് വീട് കുടുംബത്തിന് കൈമാറിയത്. രാജേഷും ബിന്ദുവും മക്കളും രാജേഷിന്‍റെ ബന്ധുവും അടക്കം അഞ്ചു പേരാണ് വീട്ടിലെ താമസക്കാർ.

കെസിഎസ്എൽ രൂപത കൗണ്‍സിലും പ്രവർത്തനവർഷാരംഭവും

മൂവാറ്റുപുഴ: കെസിഎസ്എൽ രൂപത കൗണ്‍സിലിന്‍റെ ഉദ്ഘാടനം വികാരി ജനറാൾ മോണ്‍. പയസ് മലേക്കണ്ടത്തിൽ നിർവഹിച്ചു. കുട്ടികൾ എല്ലാവരും കഴിവുള്ളവരാണെന്നും യഥാർത്ഥ നേതാക്കന്മാരായി കുട്ടികളെ വളർത്തിക്കൊണ്ട് വരികയെന്നതാണ് കെസിഎസ്എൽ സഖ്യത്തിന്‍റെ ലക്ഷ്യമെന്നും ഉദ്ഘാടന സന്ദേശത്തിൽ അദ്ദേഹം പറഞ്ഞു. രൂപത കൗണ്‍സിൽ യോഗത്തിൽ 2024-25 പ്രവർത്തന വർഷത്തിലെ മികച്ച കെസിഎസ്എൽ ആനിമേറ്റർക്കുള്ള അവാർഡ് കെസിഎസ്എൽ രൂപത സമിതി അംഗവും പൈങ്ങോട്ടൂർ സെന്‍റ് ജോസഫ് ഹയർ സെക്കൻഡറി സ്കൂൾ ആനിമേറ്ററുമായ സിസ്റ്റർ രഞ്ജന എഫ്സിസിക്ക് സമ്മാനിച്ചു. കഴിഞ്ഞ പ്രവർത്തന വർഷത്തിൽ മികച്ച പ്രവർത്തനം കാഴ്ച വച്ച യൂണിറ്റുകളായ എൽപി വിഭാഗത്തിലെ സെന്‍റ് ജോസഫ് എൽപി സ്കൂൾ നെല്ലിമറ്റം, യുപി വിഭാഗത്തിലെ സെന്‍റ് ജോസഫ് യുപി സ്കൂൾ പൈങ്ങോട്ടൂർ, ഹൈസ്കൂൾ വിഭാഗത്തിലെ സെന്‍റ് ജോസഫ് ഹൈസ്കൂൾ കരിമണ്ണൂർ, ഹയർ സെക്കൻഡറി വിഭാഗത്തിലെ സെന്‍റ് ജോസഫ് ഹയർ സെക്കൻഡറി സ്കൂൾ പൈങ്ങോട്ടൂർ എന്നിവർക്കും മികച്ച രണ്ടും മൂന്നും സ്ഥാനങ്ങൾ നേടിയ യൂണിറ്റുകൾക്കും ട്രോഫികൾ വിതരണം ചെയ്തു. 2025 - 26 പ്രവർത്തന വർഷത്തിലെ വിദ്യാർഥി ഭാരവാഹികളുടെ തെരെഞ്ഞെടുപ്പും രൂപത കൗണ്‍സിൽ യോഗത്തിൽ നടന്നു. രൂപത ചെയർമാനായി കല്ലൂർക്കാട് സെന്‍റ് അഗസ്റ്റിൻസ് ഹയർ സെക്കൻഡറി സ്കൂളിലെ സിബിൻ ബാബു, രൂപത ജനറൽ സെക്രട്ടറിയായി മുവാറ്റുപുഴ സെന്‍റ് അഗസ്റ്റ്യൻസ് ഗേൾസ് ഹയർ സെക്കൻഡറി സ്കൂളിലെ എൽഹ എൽസ ജോഫി എന്നിവർ തെരഞ്ഞെടുക്കപ്പെട്ടു. രൂപത പ്രസിഡന്‍റ് ജിജോ മാനുവൽ കല്ലുങ്കലിന്‍റെ അധ്യക്ഷതയിൽ ചേർന്ന രൂപത കൗണ്‍സിൽ യോഗത്തിൽ രൂപത ഡയറക്ടർ ഫാ. മാത്യു രാമനാട്ട്, കെസിഎസ് മുൻ രൂപത ഡയറക്ടറും നെല്ലിമറ്റം സെന്‍റ് ജോസഫ് പള്ളി വികാരിയുമായ റവ. ഡോ. തോമസ് ജെ. പറയിടം, രൂപത ഓർഗനൈസർ സിസ്റ്റർ ലിറ്റിൽ ട്രീസ സിഎംസി, അവാർഡ് ജേതാവ് സിസ്റ്റർ രഞ്ജന എഫ്സിസി, സൂസൻ ചാക്കോ, എക്സിക്യൂട്ടീവംഗം സിസ്റ്റർ ലിൻഡ സിഎംസി എന്നിവർ പ്രസംഗിച്ചു.

എൻഎസ്എസ് യൂണിറ്റുകളെ അനുമോദിച്ചു

കോതമംഗലം: എംബിറ്റ്സ് എൻജിനീയറിംഗ് കോളജ് എൻഎസ്എസ് യൂണിറ്റുകളെയും പ്രോഗ്രാം ഓഫീസർ ഷിജു രാമചന്ദ്രനെയും തൊടുപുഴ ഐഎംഎ ബ്ലഡ് ബാങ്കിന്‍റെ നേതൃത്വത്തിൽ അനുമോദിച്ചു. ലോക രക്ത ദാതാക്കളുടെ ദിനത്തോടനുബന്ധിച്ച് രക്ത ദാതാക്കളെ അനുമോദിക്കുന്ന ചടങ്ങിലാണ് എൻഎസ്എസ് യൂണിറ്റിനെയും പ്രോഗ്രാം ഓഫീസറെയും അനുമോദിച്ചത്. ബെസ്റ്റ് ഡോണർ മോട്ടിവേറ്റർ അവാർഡാണ് ഷിജു രാമചന്ദ്രന് ലഭിച്ചത്. ഐഎംഎ ബ്ലഡ് ബാങ്കുമായി സഹകരിച്ച് രക്തദാന ക്യാന്പുകൾ സംഘടിപ്പിച്ചതിനാണ് യൂണിറ്റിനുള്ള അനുമോദനം. കോളജിലെ എൻഎസ്എസ് യൂണിറ്റിന് കീഴിലെ രുധിര സേനയും റെഡ് റിബണ്‍ ക്ലബും സംയുക്തമായിട്ടാണ് ക്യാന്പുകൾ സംഘടിപ്പിച്ചത്. തൊടുപുഴ നഗരസഭാ അധ്യക്ഷൻ കെ. ദീപക് അവാർഡ് വിതരണം ചെയ്തു. കോളജിന് വേണ്ടി പ്രോഗ്രാം ഓഫീസർമാരായ ഷിജു രാമചന്ദ്രൻ, ബേസിൽ ജി. പോൾ, രുധിര സേനാ കോ-ഓർഡിനേറ്റർമാരായ ലിയ ചാം ലിജു, ജിബിൻ വിൽസണ്‍, ഷറഫിയ റഷീദ് എന്നിവർ അവാർഡ് ഏറ്റുവാങ്ങി.

പി.പി. എസ്തോസ് അനുസ്മരണം

മൂവാറ്റുപുഴ: സിപിഎം മൂവാറ്റുപുഴ ഏരിയ സെക്രട്ടറി, ജില്ലാ കമ്മിറ്റിയംഗം, എംപി, എംഎൽഎ, മൂവാറ്റുപുഴ നഗരസഭാധ്യക്ഷൻ എന്നിങ്ങനെ പ്രവർത്തിച്ച പി.പി. എസ്തോസിന്‍റെ 36-ാമത് ചരമവാർഷിക ദിനാചരണം നടത്തി. ഏരിയ കമ്മിറ്റി ഓഫീസിനു മുന്നിൽ സിപിഎം ജില്ലാ സെക്രട്ടറിയേറ്റംഗം പി.ആർ. മുരളീധരൻ പതാക ഉയർത്തി. അനുസ്മരണ റാലിയോടെ എസ്തോസിന്‍റെ സ്മൃതിമണ്ഡപത്തിലെത്തി നേതാക്കളും പ്രവർത്തകരും പുഷ്പാർച്ചന നടത്തി. തുടർന്ന് ചേർന്ന അനുസ്മരണ യോഗം സിപിഎം ജില്ലാ സെക്രട്ടറി എസ്. സതീഷ് ഉദ്ഘാടനം ചെയ്തു. പി.എം. ഇസ്മയിൽ അധ്യക്ഷതവഹിച്ചു. ഏരിയ സെക്രട്ടറി അനീഷ് എം. മാത്യു, ഏരിയ കമ്മിറ്റിയംഗങ്ങളായ സി.കെ. സോമൻ, സജി ജോർജ് തുടങ്ങിയവർ പ്രസംഗിച്ചു. അനുസ്മരണ ദിനത്തോടനുബന്ധിച്ച് ഏരിയയിലെ ബ്രാഞ്ച് കേന്ദ്രങ്ങളിൽ പതാക ഉയർത്തി.

ഡിസിഎൽ പ്രവർത്തന വർഷ ഉദ്ഘാടനം ഇന്ന്

കൂത്താട്ടുകുളം: ഡിസിഎൽ തൊടുപുഴ പ്രവിശ്യാ പ്രവർത്തന വർഷ ഉദ്ഘാടനം ഇന്ന് കൂത്താട്ടുകുളം മേരിഗിരി പബ്ലിക് സ്കൂളിൽ നടക്കും. ഉച്ചകഴിഞ്ഞ് 1.15ന് സ്കൂൾ ഓഡിറ്റോറിയത്തിൽ ചേരുന്ന യോഗത്തിൽ പ്രവർത്തന വർഷത്തിന്‍റെയും പുതുതായി രൂപീകരിക്കുന്ന കൂത്താട്ടുകുളം മേഖലയുടെയും ഉദ്ഘാടനം നഗരസഭാധ്യക്ഷ വിജയ ശിവൻ നിർവഹിക്കും. പ്രിൻസിപ്പൽ ഫാ. മാത്യു കരീത്തറ സിഎംഐ അധ്യക്ഷത വഹിക്കും. ദേശീയ ഡയറക്ടർ കൊച്ചേട്ടൻ ഫാ. റോയി കണ്ണൻചിറ സിഎംഐ മുഖ്യപ്രഭാഷണം നടത്തും. പ്രവിശ്യാ കോ - ഓർഡിനേറ്റർ റോയ് ജെ. കല്ലറങ്ങാട്ട്, റിസോഴ്സ് ടീം കോ - ഓർഡിനേറ്റർ തോമസ് കുണിഞ്ഞി, എസ്. ബിനു, ഡയക്ടർ പി. ആഷാമേരി എന്നിവർ പ്രസംഗിക്കും.

മെറിറ്റ് അവാർഡ് വിതരണം ഇന്ന്

കോതമംഗലം: റെജുവിനേറ്റിംഗ് ഇടുക്കി സോഷ്യലി ആൻഡ് എഡ്യുക്കേഷൻ (ആർഐഎസ്ഇ) പദ്ധതിയുടെ ഭാഗമായി ഈ വർഷം എസ്എസ്എൽസി/ പ്ലസ് ടു പരീക്ഷകളിൽ കോതമംഗലം നിയമസഭാ മണ്ഡലത്തിലുൾപ്പെടുന്ന സ്കൂളുകളിൽ എല്ലാ വിഷയങ്ങൾക്കും എ പ്ലസ് നേടിയ വിദ്യാർഥികൾക്ക് ഇന്ന് മെറിറ്റ് അവാർഡ് വിതരണം ചെയ്യും. ഉച്ചകഴിഞ്ഞ് രണ്ടിന് കോതമംഗലം സെന്‍റ് അഗസ്റ്റിൻസ് ഗേൾസ് ഹയർ സെക്കന്‍ററി സ്കൂൾ ഹാളിലാണ് ചടങ്ങ് സംഘടിപ്പിച്ചിരിക്കുന്നത്.

ബസിൽ നിന്നു തെറിച്ചുവീണ് പതിനാറുകാരൻ മരിച്ചു

പള്ളുരുത്തി: ചെല്ലാനത്ത് ഓടിക്കൊണ്ടിരുന്ന ബസിൽനിന്ന് തെറിച്ചുവീണ് പതിനാറുകാരന് ദാരുണാന്ത്യം. ചെല്ലാനം മാലാഖപ്പടിയിൽ പുത്തൻതറ മാർട്ടിൻ സുമോദിന്‍റെ മകൻ പവനാണ് മരിച്ചത്. ആലുവ -ചെല്ലാനം റൂട്ടിൽ സർവീസ് നടത്തുന്ന ഫോർസ്റ്റാർ ബസിൽ ശനിയാഴ്ച രാത്രി ഏഴോടെയായിരുന്നു അപകടം. മാലാഖപ്പടിക്ക് മുന്പുള്ള സ്റ്റോപ്പിൽനിന്ന് ബസിൽ കയറിയ പവൻ പുറകിലെ വാതിൽപ്പടിയിൽ നിന്നാണ് പുറത്തേക്ക് തെറിച്ചുവീണത്. ഈ സമയം ബസിന്‍റെ വാതിലടച്ചിരുന്നില്ലെന്ന് പോലീസ് പറഞ്ഞു. ഗുരുതരമായി പരിക്കേറ്റ പവനെ ആശുപത്രിയിൽ പ്രവേശിപ്പിച്ചെങ്കിലും ഇന്നലെ പുലർച്ചെ മരിച്ചു. അപകടത്തിന്‍റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്. അലക്ഷ്യമായി വാഹനം ഓടിച്ചതിന് ബസ് ഡ്രൈവർക്കെതിരെ കണ്ണമാലി പോലീസ് കേസെടുത്തു. അതേസമയം സംഭവത്തിൽ ബന്ധുക്കളുടെ കൂടി മൊഴിയെടുക്കുമെന്നും പോലീസ് വ്യക്തമാക്കി. സംസ്കാരം നടത്തി. മാതാവ്: ഷാലു. സഹോദരി: അസ്ന.

ബൈക്ക് മോഷ്ടാവ് അറസ്റ്റില്‍

കൊച്ചി: ബൈക്ക് മോഷക്കേസിലെ പ്രതി അറസ്റ്റില്‍. ഇടപ്പള്ളി മൈ ജി ജീവനക്കാരന്‍റെ ബൈക്ക് മോഷ്ടിച്ച കേസില്‍ ബി. ലിബിന്‍(22) എന്നയാളെ കളമശേരി പോലീസ് കൊല്ലത്തു നിന്നാണ് പിടികൂടിയത്. മേയ് മൂന്നിനാണ് ഇടപ്പള്ളി മൈ ജിയുടെ മുമ്പില്‍ നിന്നും ഡ്യൂക്ക് കമ്പനിയുടെ ബൈക്ക് ലിബിന്‍ മോഷ്ടിച്ചത്. കേസിലെ മറ്റൊരു പ്രതിയായ മുഹമ്മദ് ബിലാല്‍(25) മറ്റൊരു മോഷണക്കേസില്‍ കുന്നംകുളം പോലീസ് കസ്റ്റഡിയില്‍ ആണ്.

ആശങ്ക ബാക്കി; സ്വകാര്യ ബസുകള്‍ക്ക് വാതില്‍ അടയ്ക്കാന്‍ മടി

കൊച്ചി: ചെല്ലാനത്ത് വാതില്‍ തുറന്നിട്ട് ഓടിയ സ്വകാര്യ ബസിനുള്ളില്‍ നിന്നും പുറത്തേക്ക് വീണ് 16-കാരന്‍ മരിക്കാനിടയായ സംഭവത്തിന് ശേഷവും ആശങ്ക ഇരട്ടിയാക്കി കൊച്ചിയില്‍ വാതില്‍ അടച്ച് സര്‍വീസ് നടത്താന്‍ കൂട്ടാക്കാതെ ഒരുവിഭാഗം സ്വക്യാര്യ ബസുകള്‍. എയര്‍ ഡോര്‍ സംവിധാനം ഉണ്ടായിട്ടും പല ബസുകളും ഇവ ഉപയോഗിക്കുന്നില്ല. സ്‌കൂളുകളുകള്‍ തുറന്ന സാഹചര്യത്തില്‍ സുരക്ഷിത യാത്ര ബസുകള്‍ ഉറപ്പുവരുത്തണമെന്ന ആവശ്യം ശക്തമായിട്ടും ഇവ കേള്‍ക്കാന്‍ പല ബസ് അധികൃതരും കൂട്ടാക്കുന്നില്ലെന്നാണ് ആക്ഷേപം സ്വകാര്യ ബസുകളില്‍ ഡ്രൈവര്‍ക്ക് ഓപ്പറേറ്റ് ചെയ്യാന്‍ കഴിയുംവിധം എയര്‍ഡോര്‍ സംവിധാനം ഏര്‍പ്പെടുത്തിയിട്ടും നഗരത്തില്‍ ഒടുന്ന ചുരുക്കം ചില ബസുകളാണ് ഇത്തരത്തില്‍ വാതില്‍ അടച്ച് സര്‍വീസ് നടത്തുന്നത്. യാത്രക്കാര്‍ക്ക് തുറക്കാനാകും വധമുള്ള പഴയ ഡോര്‍ ഘടിപ്പിച്ച ബസുകളുമുണ്ട് സര്‍വീസ് നടത്തുന്നവയില്‍. ഇവ ഒഴിവാക്കിയിട്ടും ഇത്തരം വാഹനങ്ങള്‍ക്കെതിരെ നടപടി സ്വീകരിക്കാന്‍ മോട്ടോര്‍ വാഹനവകുപ്പും തയാറാകുന്നില്ല. എയര്‍ഡോര്‍ ഘടിപ്പിച്ച ബസുകളില്‍ ചിലതില്‍ ഇവ വേണ്ടവിധം പ്രവര്‍ത്തിക്കുന്നുമില്ല. എയര്‍ഡോറുകള്‍ അടയ്ക്കുന്ന വാഹനങ്ങളിലാകട്ടെ തിരക്കിട്ട് വാതില്‍ അടയ്ക്കുമ്പോള്‍ യാത്രക്കാര്‍ ഇതിൽ കുടുങ്ങുന്നതും പതിവുകാഴ്ചയാണ്. യാത്രക്കാര്‍ കയറുമ്പോള്‍ തന്നേ ഡബിള്‍ ബെല്ലടിച്ച് വാഹനം മുന്നോട്ട് എടുക്കുന്നതു മൂലമാണ് ഇങ്ങനെ സംഭവിക്കുന്നത്. സ്‌കൂള്‍ തുറന്ന സാഹചര്യത്തില്‍ ഇത്തരം അപകടങ്ങള്‍ മുന്നില്‍ക്കണ്ട് വേണ്ട നടപടി സ്വീകരിക്കണമെന്ന ആവശ്യം ശക്തമാണ്.

ജില്ലാ നീന്തല്‍ മത്സരം: മികച്ച നേട്ടവുമായി വിശ്വജ്യോതി

അങ്കമാലി: കോതമംഗലം എംഎ കോളജില്‍ നടന്ന ജില്ലാ നീന്തല്‍ മത്സരത്തില്‍ അങ്കമാലി വിശ്വജ്യോതി സ്‌കൂള്‍ ടീമിന് മികച്ച നേട്ടം. സബ് ജൂണിയര്‍ വിഭാഗത്തില്‍ ഓവറോള്‍ ചാമ്പ്യന്‍ഷിപ്പും ജൂണിയര്‍ വിഭാഗത്തില്‍ ഓവറോള്‍ റണ്ണേഴ്‌സ് അപ്പും സ്‌കൂള്‍ നേടി. 46 സ്വര്‍ണം, 29 വെള്ളി, 26 വെങ്കല മെഡലുകളാണ് സ്‌കൂളിനായി താരങ്ങള്‍ വാരിക്കൂട്ടിയത്. ഗൗരി ജയേന്ദ്രന്‍, ജെറെമിയാസ് സോബിന്‍ എന്നിവര്‍ പങ്കെടുത്ത അഞ്ച് ഇനങ്ങളിലും സ്വര്‍ണവും, ജൊനാര്‍ത് സോബിന്‍ നാല് സ്വര്‍ണവും ഒരു വെള്ളിയും നേടി വ്യക്തിഗത ചാമ്പ്യന്മാരായി. 20 കുട്ടികള്‍ തിരുവനന്തപുരത്ത് നടക്കുന്ന സംസ്ഥാന നീന്തല്‍ മത്സരത്തില്‍ പങ്കെടുക്കുന്നതിനായി തെരഞ്ഞെടുക്കപ്പെട്ടു. തിളക്കമാര്‍ന്ന പ്രകടനം കാഴ്ച്ചവച്ച ടീമിനെയും പരിശീലകന്‍ അനില്‍കുമാറിനെയും മാനേജര്‍ ഫാ. അഗസ്റ്റിന്‍ മാമ്പിള്ളി, അസോസിയേറ്റ് ഡയറക്ടര്‍ ഫാ. ആഞ്ചലോ ചക്കനാട്ട്, പ്രിന്‍സിപ്പല്‍ റീന രാജേഷ്, വൈസ് പ്രിന്‍സിപ്പല്‍ ഷാലി ജോസ് എന്നിവര്‍ അനുമോദിച്ചു.

38 കിലോ കഞ്ചാവുമായി യുവതികള്‍ പിടിയില്‍

കൊച്ചി: എറണാകുളം നോര്‍ത്ത് റെയില്‍വേ സ്റ്റേഷനില്‍ 37.498 കിലോ കഞ്ചാവുമായി ഇതര സംസ്ഥാനക്കാരായ യുവതികള്‍ പിടിയില്‍. പശ്ചിമബംഗാൾ മൂര്‍ഷിദാബാദ് സ്വദേശികളായ സോണിയ സുല്‍ത്താന, അനിത കാത്തൂന്‍ എന്നിവരെയാണ് എറണാകുളം റെയില്‍വേ പോലീസ്, ആര്‍പിഎഫ്, റെയില്‍വേ പോലീസ് ഡാന്‍സാഫ് സംഘം എന്നിന സംയുക്തമായി നടത്തിയ പരിശോധനയിൽ പിടികൂടിയത്. റെയില്‍വേ പ്ലാറ്റ്‌ഫോമുകളിലും ട്രെയിനുകളിലുമുള്ള പതിവ് പരിശോധനയുടെ നടപടി തുടരുന്നതിനിടെയാണ് ഇന്നലെ രാവിലെ 10.30 ഓടെ പ്ലാറ്റ്‌ഫോമില്‍ നിന്നും യുവതികളെ പിടികൂടിയത്. രണ്ടാം നമ്പര്‍ പ്ലാറ്റ്‌ഫോമില്‍ ഇരിക്കുകയായിരുന്ന ഇവര്‍ പോലീസിനെ കണ്ടതോടെ എഴുന്നേറ്റ് പോകാന്‍ ശ്രമിച്ചതോടെ സംശയം തോന്നിയ വനിതാ ഉദ്യോഗസ്ഥര്‍ ഇവരെ തടഞ്ഞു. തുടര്‍ന്ന് ഇവരുടെ ട്രോളി ബാഗുകള്‍ പരിശോധിച്ചതോടെ വിവിധ പൊതികളിലായി സൂക്ഷിച്ചിരിക്കുന്ന കഞ്ചാവ് കണ്ടെത്തുകയായിരുന്നു.

വെര്‍ച്വല്‍ അറസ്റ്റ് തട്ടിപ്പ് : എറണാകുളം സ്വദേശിയുടെ ഒരു കോടി തട്ടിയെടുത്തു

കളമശേരി: വെര്‍ച്വല്‍ അറസ്റ്റിലൂടെ എറണാകുളം സ്വദേശിയുടെ ഒരു കോടിയിലേറെ രൂപ തട്ടിയെടുത്തതായി പരാതി. രാജ്യസുരക്ഷയ്ക്ക് ഭീഷണിയാകും വിധം രേഖകള്‍ ശത്രുരാജ്യത്തിന് ചോര്‍ത്തി കൊടുക്കാന്‍ സഹായിച്ചെന്ന കുറ്റം ആരോപിച്ചാണ് പണം തട്ടിയത്. സംഭവത്തില്‍ കളമശേരി പോലീസില്‍ പരാതി നല്‍കി. കഴിഞ്ഞ വെള്ളിയാഴ്ചയായിരുന്നു സംഭവം. രഞ്ജിത്കുമാര്‍ എന്ന പേരിലാണ് പരാതിക്കാരന്‍റെ ഫോണിലേക്ക് വാട്‌സ്ആപ്പ് കോള്‍ വന്നത്. ലക്‌നൗ ഇന്‍സ്‌പെക്ടര്‍ ഓഫ് പോലീസാണെന്ന് പരിചയപ്പെടുത്തിയ ശേഷം ഇന്ത്യന്‍ ആര്‍മിയുടെ ഔദ്യോഗിക വിവരങ്ങള്‍ പാകിസ്ഥാന് ചോര്‍ത്തി കൊടുക്കാന്‍ സഹായിച്ചവരുടെ ലിസ്റ്റില്‍ പേരുണ്ടെന്നു പറഞ്ഞു. രേഖകള്‍ ചോര്‍ത്തി നല്‍കിയതുവഴി ആസിഫ് ഫൗമി എന്ന ആളില്‍ നിന്ന് 55 ലക്ഷം കൈക്കൂലി വാങ്ങിയതായി കണ്ടെത്തിയെന്നും ഇയാള്‍ പറഞ്ഞു. കേസ് ഒത്തു തീര്‍പ്പാക്കാന്‍ പണം നല്‍കണമെന്നും അല്ലെങ്കില്‍ ജീവന് ഭീഷണിയുണ്ടാകുമെന്ന് ഭീഷണിപ്പെടുത്തി. തുടര്‍ന്ന് 1,05,06,184 രൂപ അവര്‍ ആവശ്യപ്പെട്ട പ്രകാരം നല്‍കുകയായിരുന്നുവെന്നാണ് പരാതിക്കാരന്‍ മൊഴി നല്‍കിയത്. കളമശേരി സബ്ഇന്‍സ്‌പെക്ടര്‍ സനീഷിന്‍റെ നേതൃത്വത്തില്‍ പരാതിക്കാരന്‍റെ മൊഴി രേഖപ്പെടുത്തി. അന്വേഷണം ആരംഭിച്ചു കഴിഞ്ഞതായി കളമശേരി പോലീസ് അറിയിച്ചു.

കാറിടിച്ച് എസ്ഐയെ അപായപ്പെടുത്താൻ ശ്രമം; രണ്ടുപേർ കസ്റ്റഡിയിൽ

വാഴക്കുളം: വാഹന പരിശോധനയ്ക്കിടെ എസ്ഐയെ കാർ കയറ്റി കൊലപ്പെടുത്താൻ ശ്രമിച്ച കേസിൽ രണ്ടുപേർ പോലീസ് കസ്റ്റഡിയിൽ. കാറിലുണ്ടായിരുന്നവരുടെ സുഹൃത്തുക്കളായ ഈരാറ്റുപേട്ട സ്വദേശികളായ ഷാഹിദ്, റഫ്സൽ എന്നിവരാണ് പോലീസ് കസ്റ്റഡിയിലുള്ളത്. കാറിലുണ്ടായിരുന്ന തൊടുപുഴ സ്വദേശികളായ ഷെറീഫ് (ചാർ സൗബീസ്), ആസിഫ് എന്നിവരെ മറ്റു വാഹനത്തിൽ കയറ്റി സംഭവസ്ഥലത്തു നിന്നു മാറുന്നതിന് സഹായം നല്കിയവരാണ് കസ്റ്റിഡിയിലുള്ളതെന്ന് കല്ലൂർക്കാട് പോലീസ് അറിയിച്ചു. ഇതിനിടെ ഉപേക്ഷിക്കപ്പെട്ട നിലയിൽ കണ്ടെത്തിയ കാർ പോലീസ് കസ്റ്റഡിയിലെടുത്തു. കെഎൽ 63 ഡി 7933 നമ്പറിലുള്ള സാൻട്രോ കാർ വെങ്ങല്ലൂർ ഭാഗത്താണ് ഉപേക്ഷിക്കപ്പെട്ട നിലയിൽ കണ്ടത്. പിടിച്ചെടുത്ത കാറിൽ ഫോറൻസിക് വിഭാഗം ഉദ്യോഗസ്ഥർ പരിശോധന നടത്തി. കല്ലൂർക്കാട് പോലീസ് സ്റ്റേഷനിലെ ഗ്രേഡ് എസ്ഐ ഇ.എം. മുഹമ്മദിനെയാണ് ശനിയാഴ്ച വൈകുന്നേരം നാലോടെ കല്ലൂർക്കാട് വഴിയാഞ്ചിറ ഭാഗത്തു വച്ച് വാഹനം കയറ്റി കൊലപ്പെടുത്താൻ ശ്രമിച്ചത്. ഗുരുതര പരിക്കേറ്റ എസ്ഐക്ക് തൊടുപുഴ സെന്‍റ് മേരീസ് ആശുപത്രിയിൽ ശസ്ത്രക്രിയ നടത്തി. പതിവു വാഹന പരിശോധനയ്ക്കായി പോകുമ്പോഴാണ് വഴിയാഞ്ചിറ ഭാഗത്ത് വഴിയരികിൽ സംശയാസ്പദമായ സാഹചര്യത്തിൽ കാർ നിർത്തിയിട്ടിരിക്കുന്നത് എസ്ഐയുടെ ശ്രദ്ധയിൽപ്പെട്ടത്. കാറിനടുത്തെത്തി ചോദ്യം ചെയ്തതോടെ ഡ്രൈവർ കാറെടുത്ത് എസ്ഐയെ അപായപ്പെടുത്താൻ ശ്രമിച്ച ശേഷം രക്ഷപ്പെടുകയായിരുന്നു.

ഭൂതത്താന്‍കെട്ട് ഡാമിന്‍റെ 11 ഷട്ടറുകൾ 21.30 മീറ്റര്‍ ഉയര്‍ത്തി

കോതമംഗലം: തീവ്ര മഴയെതുടര്‍ന്ന് ഭൂതത്താന്‍കെട്ട് ഡാമിന്‍റെ 11 ഷട്ടറുകളും കൂടുതല്‍ അളവില്‍ ഉയര്‍ത്തി. ഇന്നലെ ഉച്ചയോടെ 21.30 മീറ്ററായാണ് ഷട്ടറുകള്‍ ഉയര്‍ത്തിത്. ശനിയാഴ്ച 13.3 മീറ്ററായിരുന്നു. ഡാമിലെ ജലനിരപ്പ് 30.8 മീറ്ററാണ്. കുട്ടമ്പുഴ പഞ്ചായത്തിലെ പൂയംകുട്ടി മേഖലയില്‍ പുഴ കരകവിഞ്ഞതോടെ വിവിധ പ്രദേശത്തെ ജനജീവിതത്തെ സാരമായി ബാധിച്ചു. പൂയംകുട്ടി പുഴയില്‍ ജലനിരപ്പ് ക്രമാതീതമായി ഉയര്‍ന്നതോടെ ഇന്നലെ രാവിലെ മുതല്‍ മണികണ്ഠന്‍ചാല്‍ ചപ്പാത്ത് വെള്ളത്തിനടിയിലായി. പുഴയ്‌ക്ക് അക്കരെ ഇക്കരെ വാഹന ഗതാഗതം തടസപ്പെട്ടിരിക്കുകയാണ്. ബ്ലാവനയിലെ കടത്ത് സര്‍വീസും രാവിലെ മുതല്‍ നിലച്ചിരിക്കുകയാണ്. അഞ്ച് ആദിവാസി ഉന്നതികളും രണ്ട് ഗ്രാമങ്ങളും ബാഹ്യലോകവുമായി ബന്ധപ്പെടാനാവാതെ ഒറ്റപ്പെട്ട അവസ്ഥയിലാണ്. പുഴയിലെ ജലനിരപ്പ് താഴ്ന്നാലേ ജനജീവിതം സാധാരണ നിലയിലാകൂ. പെരിയാര്‍, പൂയംകുട്ടിപുഴ, ഉരുളന്‍തണ്ണി തോട്, ഇടമലയാര്‍, കുട്ടമ്പുഴയാര്‍, കോതമംഗലം പുഴ എന്നിവിടങ്ങളില്‍ വൈകിട്ടോടെ ജലനിരപ്പ് വലിയതോതില്‍ ഉയര്‍ന്നതോടെ താഴ്ന്ന പ്രദേശങ്ങള്‍ വെള്ളപ്പൊക്ക ഭീഷണിയിലായി.

മലയാറ്റൂർ മുളംകുഴിയിൽ വീണ്ടും കാട്ടാനക്കൂട്ടമിറങ്ങി

കാലടി: ഇല്ലിത്തോട് നാലാം ബ്ലോക്കിലെ മുളംകുഴി പ്രദേശത്ത് കാട്ടാനകൾ കൂട്ടത്തോടെയിറങ്ങി. ബ്ലോക്കിലെ ആദ്യ വീടായ തോപ്പിൽ എസ്‌റ്റേറ്റിന്‍റെ ഗേറ്റ് തുറന്ന് പുരയിടത്തിലേക്ക് ആനക്കൂട്ടം കടന്നെങ്കിലും കാര്യമായ നാശനഷ്ടങ്ങളൊന്നും ഉണ്ടായില്ല. രണ്ട് കുട്ടിയാന ഉൾപ്പെടെ ആറ് ആനകളാണ് കൂട്ടത്തിലുണ്ടായിരുന്നത്. ആൾ താമസമുള്ള വീട്ടുപരിസരത്ത് തീറ്റ തേടിയെത്തിയ ഇവ ചക്കയടക്കമുള്ള പഴവർഗങ്ങൾ കഴിച്ച് മടങ്ങിയെന്നാണ് വിവരം. തോപ്പിൽ എസ്റ്റേറ്റിൽ നിന്നും മറ്റ് പ്രദേശങ്ങളിലേക്ക് കടക്കാതെ ആനകൾ മടങ്ങിയെങ്കിലും പ്രദേശവാസികൾ ആശങ്കയിലാണ്. അക്കരെയുള്ള പാണൻകുഴി ഫോറസ്റ്റ് പ്രദേശത്ത് നിന്നും പുഴ നീന്തിക്കടന്നാണ് ആനകൾ എത്തുന്നത്. ചക്കയും മറ്റ് പഴവർഗങ്ങളും തേടിയാണ് ഇവ എത്തുന്നതെന്നാണ് പ്രദേശവാസികൾ പറ‍യുന്നത്. പ്രദേശത്തുനിന്ന് ഏകദേശം 50 മീറ്റർ നീങ്ങിയാൽ നിരവധി കുടുംബങ്ങൾ തിങ്ങി പാർക്കുന്ന ജനവാസ മേഖലയാണ്. തൊട്ടടുത്ത പ്രദേശമായ ചൂടൻ കവലയിൽ നൂറോളം കുടുംബങ്ങൾ താമസിക്കുന്നുണ്ട്. കനാലും ഫെൻസിങ്ങും ഉള്ളതിനാൽ ഈ പ്രദേശത്തേക്ക് ആനകളുടെ വരവ് കുറവായിരുന്നു.

കടല്‍ ഭിത്തി വേണം; ജനകീയ ഹര്‍ത്താലിനൊരുങ്ങി ജനകീയ വേദി

കൊച്ചി: ചെല്ലാനം പുത്തന്‍തോടിന് വടക്കോട്ട് കടല്‍ ഭീത്തി നിര്‍മാണം വൈകുന്നതില്‍ പ്രതിഷേധിച്ച് 30ന് ജനകീയ ഹര്‍ത്താലിന് ആഹ്വാനം ചെയ്ത് ചെല്ലാനം-കൊച്ചി ജനകീയ വേദി. ഈ വര്‍ഷത്തെ ഏറ്റവും ശക്തമായ കടലേറ്റമാണ് ചെല്ലാനത്തും സമീപ മേഖലകളിലും ഈ ദിവസങ്ങളില്‍ ഉണ്ടായതെന്ന് ജനറല്‍ കണ്‍വീനര്‍ വി.ടി. സെബാസ്റ്റ്യന്‍ പറഞ്ഞു. നാലു വര്‍ഷമായി പുത്തന്‍ തോടിന് വടക്കോട്ട് കടല്‍ഭിത്തി നിര്‍മിക്കണമെന്ന് ജനങ്ങള്‍ ആവശ്യപ്പെടുന്നുണ്ട്. എന്നാല്‍ കടുത്ത അവഗണനയാണ് സര്‍ക്കാര്‍ ഈ കാര്യത്തില്‍ തുടരുന്നത്. പുത്തന്‍തോടിന് വടക്കോട്ട് ടെട്രാപ്പോഡ് കടല്‍ ഭിത്തിയുടെയും പുലി മുട്ടുകളുടേയും നിര്‍മാണം ഉടന്‍ ആരംഭിക്കണമെന്ന് ആവശ്യപ്പെട്ടാണ് 30 ന് വിവിധ ബഹുജന സാമൂഹ്യ സംഘടനകളുടെ പിന്തുണയോടെ കടല്‍തീരത്ത് ജനകീയ ഹര്‍ത്താലിന് ആഹ്വാനം ചെയ്തിരിക്കുന്നതെന്ന് അദ്ദേഹം പറഞ്ഞു.

10 വീടുകൾ ഭാഗികമായി തകർന്നു

ഫോർട്ടുകൊച്ചി: ശക്തമായ കടലേറ്റത്തിൽ ചെറിയകടവ് ഡിവൈൻസ് ചാപ്പലിനു സമീപത്തെ വീടുകൾക്കും നാശനഷ്ടം. ബേബി അഗസ്റ്റിൻ താന്നിക്കൽ, ആന്‍റണി കാളിപറമ്പിൽ, ആന്‍റണി കുരിശുങ്കൽ, സോണി അത്തിപൊഴി, ബിജോയ്, പീറ്റർ പുളിയനത്ത്, ജോസഫ് വാഴയ്ക്കൽ, പ്രസ്തീന കടവി പറമ്പിൽ, ഓമന കിഴക്കേടത്ത്, ജൂഡ് മാളിയേക്കൽ എന്നിവരുടെ വീടുകൾക്കാണ് ശക്തമായ കാറ്റിലും കടലേറ്റത്തിലും നാശമുണ്ടായത്.. കടൽഭിത്തി ഇല്ലാത്ത ഈ മേഖലയിൽ വെള്ളം നിരവധി വീടുകളുടെ ഉള്ളിലൂടെയാണ് ഒഴുകി പോകുന്നത്. ചെളിയും മാലിന്യവും കലർന്ന വെള്ളം വീടുകളുടെ അടുക്കളവരെ തളം കെട്ടി കിടക്കുന്നതിനാൽ ഭക്ഷണം പാകം ചെയ്യാൻ പോലും പറ്റാത്ത അവസ്ഥയാണെന്ന് പരിസരവാസികൾ പറഞ്ഞു.

കണ്ണമാലിയിൽ കലിയടങ്ങാതെ കടൽ

തോപ്പുംപടി: സമീപകാലത്തെ ഏറ്റവും വലിയ കടലേറ്റം മൂലം ചെല്ലാനം പഞ്ചായത്തിലെ കണ്ണമാലി പ്രദേശത്ത് ജനജീവിതം ദുരിതമായി. ഇന്നലെ കാലവർഷത്തോടൊപ്പം ശക്തമായ കടൽ കയറ്റം കൂടി ആയതോടെ പ്രദേശങ്ങളിൽ ജനം എന്തു ചെയ്യണമെന്നറിയാതെ വലയുകയാണ്. വെള്ളം കയറിയതോടെ വീടുകളിൽ കിടന്നുറങ്ങാൻ പോലും പറ്റാത്ത അവസ്ഥയിലാണിപ്പോൾ. ടെട്രാപോഡ് ഇല്ലാത്ത കണ്ണമാലി, ചെറിയകടവ്, കാട്ടിപ്പറമ്പ്, കൈതവേലി വരെയാണ് രൂക്ഷത കൂടുതൽ. പ്രദേശത്തെ നാലു മുതൽ എട്ട് വരെയുള്ള വാർഡുകൾ പൂർണമായും വെള്ളത്തിലാണ്. ഇവിടെ കടൽ വെള്ളം റോഡും കവിഞ്ഞൊഴുകുകയാണ്. തുടർച്ചയായി മഴയും കടലേറ്റവും ഈ രീതിയിൽ അടുത്ത കാലത്തൊന്നുമുണ്ടായിട്ടില്ലെന്ന് നാട്ടുകാർ പറയുന്നു. കഴിഞ്ഞയാഴ്ച രൂക്ഷമായ കടലേറ്റത്തെ തുടർന്ന് താത്കാലികമായി ബന്ധുവീടുകളിലേക്ക് താമസം മാറിയവർ മടങ്ങിയെത്തിയവർ കടൽ കയറിയതോടെ വീണ്ടും ദുരിതത്തിലായി. ഞായറാഴ്ച്ച രാവിലെയോടെ ശക്തമായ രീതിയിൽ കരയിലേക്ക് കടൽ കയറി. കണ്ണമാലി മുതൽ ചെറിയ കടവ് വരെ റോഡിലൂടെ വാഹനം ഓടിച്ചു പോകാനാകാത്ത സ്ഥിതിയാണ്. നിരവധി വാഹനങ്ങൾ റോഡിന് ഇരുവശവും വെള്ളം കയറി കേടായ അവസ്ഥയിൽ കിടക്കുന്നു. അതേ സമയം കടലിനെ പ്രതിരോധിക്കാൻ എട്ടാം വാർഡിൽ 60 മീറ്ററോളം മണൽ വാട ഒരുക്കിയെങ്കിലും അവയെല്ലാം ഒലിച്ചുപോയി. കടൽ കയറ്റത്തെ കുറച്ചെങ്കിലും പ്രതിരോധിക്കാൻ ഒരു വാർഡിൽ കുറഞ്ഞത് 250 മീറ്റർ നീളത്തിലെങ്കിലും മണൽ വാട തീർക്കണമെന്നാണ് നാട്ടുകാർ പറയുന്നത്. ആദ്യ പ്രതിരോധ പ്രവർത്തനം കടലിൽ ഒലിച്ചു പോയി കടൽ കയറ്റത്തിന് താത്കാലിക പ്രതിരോധം ഒരുക്കാൻ ജില്ലാ കളക്ടർ അനുവദിച്ച ഒന്നേകാൽ കോടി രൂപയുടെ പ്രവൃത്തി ആരംഭിച്ചെങ്കിലും നിർമിച്ച മണൽ വാട അദ്യ കടലേറ്റത്തിൽ തന്നെഒലിച്ചു പോയി. ചെല്ലാനം പഞ്ചായത്തിലെ കണ്ണമാലി, ചെറിയകടവ്, കാട്ടിപ്പറമ്പ് പ്രദേശങ്ങളിൽ കടൽകയറ്റം തടയുന്നതിന് ജിയോ ബാഗ് നിരത്തി താത്കാലിക സംരക്ഷണമൊരുക്കാനാണ് സംസ്ഥാന ദുരന്ത നിവാരണ ഫണ്ടിൽ നിന്ന് കളക്ടർ 1.25 കോടി രൂപ അനുവദിച്ചത്. ശക്തമായ കടൽകയറ്റമുളള ഏഴ് സ്ഥലങ്ങളിൽ മണൽനിറച്ച ജിയോ ബാഗുകൾ സ്ഥാപിച്ച് താത്കാലിക സുരക്ഷ ഒരുക്കാനായിരുന്നു പദ്ധതിയെങ്കിലും ആദ്യ പ്രതിരോധ പ്രവർത്തനം തന്നെ പാളിയ അവസ്ഥയിലാണ്. എന്നാൽ താത്കാലിക പ്രതിരോധ പ്രവർത്തനമല്ല ശാശ്വതമായ സുരക്ഷയാണ് വേണ്ടതെന്നും കണ്ണമാലി പുത്തൻതോട് ഗ്യാപ്പിന് സമീപം നിർത്തി വച്ചിരിക്കുന്ന ടെട്രാ പോഡ് കടൽഭിത്തിയുടെ നിർമാണം വേഗത്തിൽ പൂർത്തിയാക്കണമെന്ന് കെഎൽസിഎ സ്റ്റേറ്റ് പൊളിറ്റിക്കൽ ഫോറം കൺവീനർ ടി.എ. ഡാൽഫിൻ പറഞ്ഞു. സർക്കാരിന്‍റെ അനാസ്ഥയാണ് പദ്ധതി വൈകാൻ കാരണം. പദ്ധതിക്കായി പണം വകയിരുത്തി പദ്ധതി പൂർത്തീകരിക്കണമെന്നും അദ്ദേഹം ആവശ്യപ്പെട്ടു.

സിഗ്നൽ മറികടന്നു വന്ന ആംബുലൻസ് ഇടിച്ച് കാർ ഡ്രൈവർക്ക് പരിക്ക്

ആലുവ: ദേശീയപാതയിൽ ട്രാഫിക് സിഗ്നൽ തെറ്റിച്ചുവന്ന ആംബുലൻസ് ഇടിച്ച് കാർ ഡ്രൈവർക്ക് പരിക്കേറ്റു. പരിക്കേറ്റ ചൊവ്വര സ്വദേശി നിഹാദിനെ (40) ആലുവ നജാത്ത് ആശുപത്രിയിൽ പ്രവേശിപ്പിച്ചു. ഇന്നലെ ഉച്ചക്ക് രണ്ടോയോടെ തോട്ടക്കാട്ടുകര ട്രാഫിക് സിഗ്നൽ ജംഗ്ഷനിലാണ് അപകടം നടന്നത്. കടുങ്ങല്ലൂർ റോഡിൽനിന്ന് ആലുവ ഭാഗത്തേക്ക് പോകാനായി ദേശീയപാതയിലേക്ക് കുറുകെ കടന്നപ്പോഴാണ് കാറിൽ ആംബുലൻസ് വന്നിടിച്ചത്. ഡ്രൈവറുടെ ഭാഗത്ത് വന്നിടിച്ച ആഘാതത്തിൽ കാർ കറങ്ങിയാണ് നിന്നത്. ശക്തമായ മഴയായതിനാൽ ചുവന്ന സിഗ്നൽ കണ്ടില്ലെന്ന് ആംബുലൻസ് ഡ്രൈവർ മലപ്പുറം സ്വദേശി അനന്തു മൊഴി നൽകിയിട്ടുണ്ട്. കാറിൽ നിഹാദിനൊപ്പം മറ്റൊരാൾ കൂടി ഉണ്ടായിരുന്നെങ്കിലും പരിക്കില്ല. ആലുവ പോലീസ് കേസെടുത്തു. തൃശൂർ സിറ്റി സർവീസിന്‍റേതാണ് ആംബുലൻസ്.

മാർ ബസേലിയോസ് ഡെന്‍റൽ കോളജിൽ ശ്രേഷ്ഠ ബാവയ്‌ക്ക് സ്വീകരണം നാളെ

കോതമംഗലം: മാർ ബസേലിയോസ് മെഡിക്കൽ മിഷൻ അസോസിയേഷന്‍റെ ആഭിമുഖ്യത്തിൽ കോതമംഗലം മാർ ബസേലിയോസ് ഡെന്‍റൽ കോളജിൽ പരിശുദ്ധ യാക്കോബായ സുറിയാനി സഭയുടെ നവാഭിഷിക്തനായ ശ്രേഷ്ഠ കാതോലിക്ക ബസേലിയോസ് ജോസഫ് ബാവയ്ക്ക് നാളെ സ്വീകരണം നൽകും. 12.30 നു കോളജിലെ മാർ ബസേലിയോസ് തോമസ് പ്രഥമൻ സ്മാരക ഓഡിറ്റോറിയത്തിലാണ് സ്വീകരണം ഒരുക്കിയിരിക്കുന്നത്. ഏലിയാസ് മാർ യൂലിയോസ് മെത്രാപ്പോലീത്ത അധ്യക്ഷത വഹിക്കും. സമ്മേളനം മാധ്യമപ്രവർത്തകൻ ആർ. ശ്രീകണ്ഠൻ നായർ ഉദ്ഘാടനം ചെയ്യും. കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ, ഡീൻ കുര്യാക്കോസ് എംപി, ആന്‍റണി ജോൺ എംഎൽഎ, മുനിസിപ്പൽ ചെയർമാൻ കെ.കെ. ടോമി, നെല്ലിക്കുഴി പഞ്ചായത്ത് പ്രസിഡന്‍റ് പി.എം. മജീദ്, മാർത്തോമാ ചെറിയപള്ളി വികാരി ഫാ. ജോസ് തച്ചേത്തുകൂടി എന്നിവർ പങ്കെടുക്കും.

‘ദി ലോറൽ ഫെസ്റ്റ് 25’ സംഘടിപ്പിച്ചു

കൂത്താട്ടുകുളം: മേരിഗിരി സിഎംഐ പബ്ലിക് സ്കൂളിന്‍റെ മെരിറ്റ് ഡേ ‘ദി ലോറൽ ഫെസ്റ്റ് 2025’ നടന്നു. ആഘോഷ പരിപാടിയിൽ എംജി യൂണിവേഴ്സിറ്റി മുൻ വൈസ് ചാൻസലർ ബാബു സെബാസ്റ്റ്യൻ മുഖ്യാതിഥിയായിരുന്നു. പരിപാടിയിൽ സിബിഎസ്ഇ പത്ത്, 12 ക്ലാസുകളിൽ ഉന്നത വിജയം കരസ്ഥമാക്കിയ വിദ്യാർഥികളെയും ജെഇഇ മെയ്ൻ, ജെഇഇ അഡ്വാൻസ്ഡ് പരീക്ഷകളിൽ ഉയർന്ന റാങ്കുകൾ കരസ്ഥമാക്കിയ വിദ്യാർഥികളെ ആദരിക്കുകയും പുരസ്കാരങ്ങൾ നൽകുകയും ചെയ്തു. സ്കൂളിൽനിന്നു ജെഇഇ അഡ്വാൻസ്ഡ് പരീക്ഷയിൽ ഉയർന്ന റാങ്കുകൾ കരസ്ഥമാക്കിയ ജോഷ്വാ സ്കറിയ, ആൽബർട്ട് ഓസ്റ്റിൻ, സുസൈൻ ജസീന്ത്, പ്രണവ് സാബു, ഐറിൻ സാബു, രഘുറാം എന്നിവരെയും പത്ത്, 12 ക്ലാസുകളിൽ സ്കൂൾ ടോപ്പേഴ്സായവരെയും പ്രത്യേകം ആദരിച്ചു. കാന്പസ് മാനേജർ ഫാ. ജോസ് പാറേക്കാട്ട് അധ്യക്ഷത വഹിച്ചു. സ്കൂൾ പ്രിൻസിപ്പൽ ഫാ. മാത്യു കരീത്തറ, വൈസ് പ്രിൻസിപ്പൽ ഫാ. ജിബിൻ കൂറ്റനാൽ, പ്രധാനാധ്യാപിക ബി. രാജിമോൾ, ബ്രില്യന്‍റ് സ്റ്റഡി സെന്‍റർ ഡെപ്യൂട്ടി ഡയറക്ടർ ജൂണി സെബാസ്റ്റ്യൻ, പിടിഎ വൈസ് പ്രസിഡന്‍റ് നീതു എം. ബാബു തുടങ്ങിയവർ പ്രസംഗിച്ചു.

കീച്ചേരിപ്പടിയിൽ ഓട ശുചീകരണം പൂർത്തിയായി

മൂവാറ്റുപുഴ: കീച്ചേരിപ്പടി പ്രദേശത്തെ ഓട ശുചീകരണം പൂർത്തിയായി. ഓടയിലെ മാലിന്യവും, വെള്ളക്കെട്ടും പ്രദേശവാസികളെ ദുരിത്തിലാക്കിയിരുന്നു. തുടർന്നാണ് ഈ വർഷത്തെ മഴക്കാലപൂർവ ശുചീക്കരണ പ്രവർത്തിയിൽ ഉൾപ്പെടുത്തി കീച്ചേരിപ്പടി-നിരപ്പ് റോഡ്, ഇഇസി മാർക്കറ്റ് റോഡ് എന്നിവിടങ്ങിലെ ഓടകളിലെ മാലിന്യം നഗരസഭഗം ഫൗസിയ അലിയുടെ നേതൃത്വത്തിൽ നീക്കം ചെയ്തത്. കെഎസ്ഇബി സെക്ഷൻ രണ്ട് ഓഫീസിനു മുന്നിൽ ഉണ്ടാവാറുള്ള വെള്ളക്കെട്ടും സമീപത്തെ ഓടയിൽ കാലങ്ങളായി കെട്ടിക്കിടക്കുന്ന മാലിന്യവും പ്രദേശവാസികളെ ഏറെ ബുദ്ധിമുട്ടിലാക്കിയിരുന്നു. ഇഇസി മാർക്കറ്റ് റോഡിൽ പകുതി സ്ഥലങ്ങളിൽ ഓടകൾ തുറന്നിരുന്നതും ശേഷിക്കുന്ന ഭാഗത്തെ ഓടയും പൈപും കാണാൻ സാധിക്കാത്തതും വെല്ലുവിളിയായെങ്കിലും രണ്ട് ആഴ്ചത്തെ പരിശ്രമത്തിനോടുവിലാണ് ഓട ശുചീകരണം പൂർത്തിയായത്. കീച്ചേരിപ്പടി പ്രദേശത്തെ ജനങ്ങളുടെ വർഷങ്ങളായുള്ള ദുരിത ത്തിനാണ് ഇതോടെ പരിഹാരമായത്. നഗരസഭഗം പി.എം സലീം, നഗരസഭ എഞ്ചിനീയർ ദിലീപ്, അസിസ്റ്റന്‍റ് എൻജിനീയർ ഹരിപ്രിയ, പ്രദേശവാസിയായ വെളിയത്തുകൂടി മാഹിൻ, സി.പി. സിറാജ്, അലി സെയ്ദ് എന്നിവരും ശുചീകാരണ പ്രവർത്തഞങ്ങൾക്ക് നേതൃത്വം നൽകി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact editor@deepika.com