സൈമില്‍ ലോകോത്തര സ്‌കൂള്‍ പഠന പരിശീലനം ലക്ഷ്യം: പ്രഫ. ജെ. ഫിലിപ്പ് : Deepika.com Kerala News |

കോട്ടയം: ബിസിനസ് മാനേജ്‌മെന്‍റ് പരിശീലനത്തിലെ ഗുരു എന്നറിയപ്പെടുന്ന പ്രഫ. ജെ. ഫിലിപ്പിന്‍റെ നേതൃത്വത്തില്‍ ഏറ്റുമാനൂര്‍ പേരൂര്‍ പള്ളിക്കുന്നില്‍ സൈം ഇന്‍റര്‍നാഷണല്‍ സ്‌കൂളിന്‍റെയും മരിയ ഫിലിപ്പ് ബ്ലോക്കിന്‍റെയും ഉദ്ഘാടനം ഇന്നു നടക്കും.

എംബിഎ പരിശീലനത്തില്‍ മുന്‍നിര കേന്ദ്രങ്ങളായി ബംഗളൂരു, ചെന്നൈ, കൊച്ചി എന്നിവിടങ്ങളില്‍ പ്രവര്‍ത്തിക്കുന്ന സേവ്യര്‍ ഇന്‍സ്റ്റിറ്റ്യൂട്ട് ഓഫ് മാനേജ്‌മെന്‍റ് ആന്‍ഡ് ഓണ്‍ട്രപ്പണര്‍ഷിപ്പി(സൈം)ന്‍റെ നൂതന സംരംഭമാണ് പേരൂരില്‍ സ്ഥാപിതമായ സൈം സ്‌കൂള്‍.

ലോകോത്തര നിലവാരമുള്ള ഒരു സ്‌കൂള്‍ എന്ന സ്വപ്‌നം യാഥാര്‍ഥ്യമാകുന്നതായി പ്രഫ. ജെ. ഫിലിപ്പ് വ്യക്തമാക്കി. കുട്ടികളിള്‍ നേതൃവാസനയും പഠന-പാഠ്യേതര രംഗങ്ങളില്‍ സമഗ്രവികസനവുമാണ് ലക്ഷ്യമിടുന്നത്. ലോകത്തില്‍ എവിടെച്ചെന്നാലും നന്നായി ഇംഗ്‌ളീഷ് എഴുതുകയും സംസാരിക്കുകയും ചെയ്യാന്‍ സാധിക്കണം. പ്രസംഗം, ഡിബേറ്റ് തുടങ്ങിയവയിലും ശോഭിക്കണം. ജീവിതത്തില്‍ അര്‍പണബോധമുണ്ടാകണം. കഠിനാധ്വാനവും ആദര്‍ശശുദ്ധിയും പരിസ്ഥിതിസ്‌നേഹവും വളരണം-ഇത്തരത്തില്‍ കാലോചിതമായ ഒരു സ്‌കൂള്‍ പഠന സമുച്ചയമാണ് കോട്ടയത്ത് ലക്ഷ്യമിടുന്നതെന്ന് പ്രഫ. ജെ. ഫിലിപ്പ് പറഞ്ഞു.

അകാലത്തില്‍ പൊലിഞ്ഞ മകള്‍ മരിയ ഫിലിപ്പിന്‍റെ ആഗ്രഹമായിരുന്നു പിതാവ് ഒരു ബിസിനസ് സ്‌കൂള്‍ ആരംഭിക്കണമെന്നത്. മകളുടെ ഓര്‍മയ്ക്കായാണ് സൈം സ്‌കൂളിലെ പ്രധാന മന്ദിരത്തിന് മരിയ ഫിലിപ്പ് ബ്ലോക്ക് എന്ന് നാമകരണം ചെയ്തിരിക്കുന്നത്.

ഇന്ന് 12ന് നടക്കുന്ന ഉദ്ഘാടന സമ്മേളനത്തില്‍ സീറോമലബാർ സഭ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍, കര്‍ദിനാള്‍ മാര്‍ ജോര്‍ജ് ആലഞ്ചേരി, മന്ത്രി വി.എന്‍. വാസവന്‍, ആര്‍ച്ച്ബിഷപ് മാര്‍ ജോസഫ് പെരുന്തോട്ടം, മാര്‍ ജോസ് പുളിക്കല്‍, മാര്‍ തോമസ് തറയില്‍, തോമസ് ചാഴികാടന്‍ എംപി, ജോസ് കെ. മാണി എംപി, പി.സി. സിറിയക്, സൈം ചെയര്‍മാന്‍ പ്രഫ. ജെ. ഫിലിപ്പ് എന്നിവര്‍ പ്രസംഗിക്കും.